Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДЬ ЦВѢТНАЯ.

Въ недѣ́лю 2-ю по Пятдеся́тницѣ.
Слу́жба преподо́бнымъ и богоно́снымъ отце́мъ на́шимъ, во Святѣ́й Горѣ́ Аѳо́нстѣй просія́вшимъ.

НА МАЛѢЙ ВЕЧЕРНИ,
На Го́споди воззва́хъ: стихи́ры воскре́сны 4. Сла́ва, преподо́бныхъ. И ны́нѣ, богоро́диченъ гла́са, ма́лыя вече́рни.
Сла́ва преподо́бныхъ, гла́съ 1:

И ны́нѣ, богоро́диченъ гла́са, ма́лыя вече́рни:

Дѣ́вственное торжество́ дне́сь, бра́тіе, [да взыгра́ется тва́рь, да ликовству́етъ человѣ́чество: созва́ бо на́съ Свята́я Богоро́дица, нескве́рное сокро́вище дѣ́вства; слове́сный втора́го Ада́ма ра́й; храни́лище соедине́нія дву́ естеству́; торжество́ спаси́тельнаго примире́нія; черто́гъ, въ не́мже Сло́во уневѣ́стивый пло́ть вои́стинну; ле́гкій о́блакъ, Иже надъ херуви́мы Су́щаго, съ тѣ́ломъ носи́вшій. Тоя́ моли́твами, Христе́ Бо́же, спаси́ ду́ши на́ша].

На стихо́внѣ: еди́нъ сти́хъ воскре́сенъ и святы́хъ стихи́ры, гла́съ 5. Подо́бенъ: Ра́дуйся, по́стническихъ.

Ра́дуйся, преподо́бныхъ Аѳо́нскихъ мно́жество, Цари́цы Небе́сныя ополче́ніе, вся́ нача́ла тмы́ и вла́сти лю́тыя посо́біемъ Бо́жіимъ побѣди́вшее, пло́ть умертви́вши и ду́хъ оживи́вши, всегда́шними сле́зъ пролія́ніи угаси́вшіи страсте́й у́глія, благода́ти прія́вшіи Боже́ственное дѣ́йство, и просвѣще́ніе въ се́рдцѣ суще́ственнѣ возсія́вшее, Христа́ умоли́те душа́мъ на́шимъ да́ти ве́лію ми́лость.

Сти́хъ: Восхва́лятся преподо́бніи во сла́вѣ и возра́дуются на ло́жахъ свои́хъ.

Ра́дуйся, преподо́бныхъ Аѳо́нскихъ мно́жество, отъ Горы́ я́ко свѣти́ла восходя́щіи, и всю́ вселе́нную дарова́ній луча́ми и добродѣ́телей Боже́ственныхъ озаря́ющіи, звѣ́зды многосвѣ́тлыя, я́сно показа́вшія сіе́ мѣ́сто не́бо друго́е и ума́лившія мра́къ де́монскій, человѣ́цы небе́сніи, земнíи а́нгелы, честны́я оби́тели Тро́ицы, Отца́ и Сы́на и Ду́ха, Христа́ умоли́те душа́мъ на́шимъ да́ти ве́лію ми́лость.

Сти́хъ: Воспо́йте Го́сподеви пѣ́снь но́ву, хвале́ніе Его́ въ Це́ркви преподо́бныхъ.

Ра́дуйся, преподо́бныхъ Аѳо́нскихъ мно́жество, добродѣ́телей свяще́нная жили́ща, до́мы дѣя́нія и видѣ́нія вку́пѣ, смиренному́дрія сокро́вища, моли́твы дѣ́лателища, всегда́шняя и пресла́дкая въ се́рдцѣ Іису́совѣ поуче́нія, кро́тости прія́тная украше́нія, со́лнцы разсужде́нія, исто́чницы умиле́нія, сугу́быя любве́ храни́лища, я́же къ Бо́гу и къ бли́жнему, Христа́ умоли́те, душа́мъ на́шимъ дарова́тися ве́ліей ми́лости.

Сла́ва, гла́съ 5:

О, блаже́нное мно́жество, и́же въ Горѣ́ отце́въ, кто́ тя́ по достоя́нію похва́литъ? Вы́ бо Крести́телю Іоа́нну, Па́влу Ѳиве́йскому и Анто́нію Вели́кому подража́вше, въ зе́млю пусты́нну и непрохо́дну Аѳо́на водвори́стеся, спаса́ющаго ва́съ Бо́га ча́юще. Отъ Боже́ственныя же благода́ти подви́гшеся, всю́ду въ Горѣ́ огра́ды свяще́нныя соста́висте, и мно́жества мона́шествующихъ въ спасе́нныхъ па́житехъ воспита́сте. Но и ны́нѣ на́съ, ва́ше ста́до, отъ вся́кія ну́жды изба́вити моли́те и спасти́ся душа́мъ на́шимъ.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́ вѣ́рніи по до́лгу, гра́дъ непоколеби́мый, стѣ́ну необори́мую, тве́рдую предста́тельницу, и прибѣ́жище ду́шъ на́шихъ.

Тропа́рь воскре́сенъ. Сла́ва преподо́бныхъ, гла́съ 1:

Аѳо́нскія отцы́ и въ тѣлеси́ а́нгелы, исповѣ́дники и преподо́бныя, святи́тели и му́ченики почти́мъ въ пѣ́снехъ и пѣ́ніихъ, подража́юще и́хъ добродѣ́телемъ, Горы́ все́ мно́жество мона́шествующихъ, взыва́юще единогла́сно: сла́ва Вѣнча́вшему ва́съ, сла́ва Освяти́вшему вы́, сла́ва въ бѣда́хъ на́шихъ предста́тели Показа́вшему.

И ны́нѣ, богоро́диченъ:

Гавріи́лу [вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].


НА ВЕЛИЦѢЙ ВЕЧЕРНИ,
На Го́споди воззва́хъ: стихи́ры воскре́сны 4 и преподо́бныхъ 6, гла́съ 4. Подо́бенъ: Яко до́бля.

Пустынножи́телей и общежи́телей составле́нія собери́теся, и свѣ́тлое торжество́ соста́вите. Се́ бо всѣ́хъ на́съ призва́ша къ учрежде́нію и ра́дости духо́вной здѣ́ подвиза́вшіися, вси́ преподо́бніи, своя́ до́блести предложи́вше, и страда́нія и по́двиги, я́же па́че естества́ соверши́ша. [Два́жды.]

Преподо́бныхъ сосло́віе, въ Горѣ́ се́й возсія́вшее и просвѣти́вшее тва́рь всю́, огра́ды су́щія Аѳо́на, и благоуха́нныя кри́ны вои́стинну и кра́сныя, и древеса́ благопло́дная и неувяда́емая, рѣ́ки же дарова́ній приснотеку́щія, мона́шествующихъ ли́цы по до́лгу да ублажи́мъ. [Два́жды.]

Въ тѣлеси́ безпло́тніи и Бо́жіи вои́стинну человѣ́цы, Аѳо́нъ ве́сь освяти́вшіи, столпи́ Горы́ о́гненніи, стоя́щіи съ любо́вію и ра́достію о́крестъ Чи́стыя Богома́тере, я́коже узрѣ́ша во иступле́ніи и Боже́ственномъ видѣ́ніи честнíи на́ши отцы́, сынолѣ́пно да восхва́лятся.

Гра́жданы почти́мъ небе́сныя, я́же воспита́ Гора́, тезоиме́нная свя́тости: іера́рхи, преподо́бныя, исповѣ́дники и му́ченики вку́пѣ, имену́емыя вся́ и неимену́емыя, отсю́ду я́ко отъ средото́чія по мíру разсѣ́явшіяся, и спаси́тели мно́гихъ ду́шъ содѣ́лавшіяся.

Сла́ва, гла́съ 6:

Дне́сь облиста́ па́че многозвѣ́зднаго не́ба но́вое торжество́, и́же во Аѳо́нѣ отце́въ, умы́ празднолю́бныхъ озаря́ющее. Пріиди́те у́бо, Горы́ пусты́нницы и общежи́тели, пѣ́сненными похвала́ми и́хъ воспривѣ́тствуемъ, глаго́люще: ра́дуйтеся, и́же во пло́ти безпло́тныя побѣди́вшіи де́моны, и на земли́ а́нгельской подража́вшіи; ра́дуйтеся, Аѳо́на храни́теліе и насели́теліе, и о все́мъ мíрѣ моли́твенницы си́льнѣйшіи; ра́дуйтеся, по Богоро́дицѣ на́ши предста́тели и многообра́зніи благодѣ́теліе и назира́теліе. Моли́теся ко Го́споду поми́ловатися душа́мъ на́шимъ.

И ны́нѣ, богоро́диченъ 1-й, гла́са:

Всемíрную сла́ву, [отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ].

Вхо́дъ, проки́менъ дне́ и чте́нія обы́чни.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Главы́ 4 и 5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. Узрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На литíи стихи́ры ищи́ въ мине́и [о́бщей].

На стихо́внѣ стихи́ры воскре́сны. Сла́ва, святы́мъ, гла́съ 8:

Кто́ возглаго́летъ по́двиги ва́ша, отцы́ блаже́нніи, или́ кто́ досто́йно воспое́тъ до́блести бы́вшаго здѣ́ ва́шего по́стничества: ума́ бо́дростное, моли́твы непреста́нное, о добродѣ́тели притру́дное со́вѣсти му́ченичество, изнуре́ніе тѣ́ла, проти́ву страсте́й по́двиги, всено́щная стоя́нія, приснотеку́щія сле́зы, я́же въ та́йнѣ вѣща́лища, смире́нное мудрова́ніе, на де́моновъ побѣ́ды и дарова́ній мно́жество, и надъ всѣ́ми, е́же о благоче́стіи вку́пѣ и Правосла́віи проти́ву нечести́выхъ и злосла́вныхъ, да́же до кро́ве и сме́рти противостоя́ніе? Ихже ра́ди отъ Христа́, я́ко побѣди́теліе вѣнча́шавшеся, достосла́вніи, моли́теся непреста́нно о на́съ, вѣ́рою соверша́ющихъ свѣ́тлое ва́ше торжество́.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь: Богоро́дице Дѣ́во.., два́жды. И святы́хъ еди́ножды. И чте́ніе.



[НА УТРЕНИ,
На Бо́гъ Госпо́дь: Тропа́рь воскре́сенъ, два́жды. Сла́ва, святы́хъ. И ны́нѣ, богоро́диченъ: Гавріи́лу вѣща́вшу...

По каѳи́смахъ сѣда́льны воскре́сны гла́са съ припѣ́вы и богоро́дичны и́хъ.

Поліеле́й и велича́ніе:

Ублажа́емъ ва́съ, преподо́бніи отцы́ Аѳо́нстіи, въ Горѣ́ се́й пости́вшіися, и чте́мъ святу́ю па́мять ва́шу, наста́вницы мона́ховъ и собесѣ́дницы а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...

Та́же: Ангельскій собо́ръ... Ипакои́ гла́са] и сѣда́льны святы́хъ, гла́съ 1. Подо́бенъ: Гро́бъ Тво́й.

Яко со́лнце свѣ́тлое, я́ко блиста́ющая денни́ца, па́мять честна́я и́же во Аѳо́нѣ отце́въ возсія́, Горы́ жи́тели освяща́ющи, и согрѣва́ющи и́ноковъ сердца́ къ подража́нію житія́ и́хъ боже́ственнаго и къ ре́вности вѣ́ры.

Сла́ва, по поліеле́и сѣда́ленъ, гла́съ 8. Подо́бенъ: Прему́дрость и Сло́во.

Бо́га возлюби́вше отъ души́ Аѳо́нстіи отцы́, преесте́ственныя по́двиги соверши́ша осо́бь пе́рвѣе: та́же бли́жняго те́плѣ возлюби́вше, въ разли́чныхъ мѣ́стехъ Горы́ воздвиго́ша Ла́вры и Оби́тели, и общежи́телей мно́жества въ тѣ́хъ собра́шася, и Аѳо́нъ гра́дъ сотвори́ша, къ ни́мъ у́бо возопіи́мъ: моли́теся Христу́ Бо́гу любве́ исполни́тели бы́ти на́мъ, любо́вію чту́щимъ святу́ю па́мять ва́шу.

И ны́нѣ, богоро́диченъ, гла́съ то́йже:

Ста́немъ вси́ благоговѣ́йно, и со стра́хомъ воспои́мъ вели́чія Бо́жія Ма́тере: Та́ бо Хра́мъ одушевле́нный и Престо́лъ небе́съ простра́ннѣйшій яви́ся Сопревѣ́чнаго Отцу́ Сло́ва. Та́ возрасти́ на́мъ дре́во жи́зни, всѣ́хъ Жи́знь во утро́бѣ нося́, То́ю обнови́шася до́льняя, и процвѣте́ язы́ковъ пусты́ня безпло́дная, То́ю украша́ется дѣ́вственныхъ ли́къ, и сла́вится Гора́ сія́, чудесы́ отъ нея́ озаря́ющися.

Степе́нна гла́са, и проки́менъ, и про́чее воскре́сно.

Кано́нъ воскре́сенъ, со ирмосо́мъ на 4, и Богоро́дицы на 2 и преподо́бныхъ кано́нъ на 8, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Бо́же всѣ́хъ, благода́ть да́руй ми́, Твоему́ рабу́ ны́нѣ, начина́ющему восхвали́ти пѣ́сньми, по бу́квѣ и по и́мени въ Горѣ́ се́й просія́вшія Аѳо́нскія преподо́бныя, Твою́ соверши́вшія во́лю.

Велича́йшія свяще́ннаго созда́теля Ла́вры въ пѣ́снехъ почита́ю, я́ко нача́токъ боже́ственный, вели́каго Аѳана́сія, о́бразъ и примѣ́ръ и́же во Аѳо́нѣ оте́цъ, я́ко вои́стинну бы́вшаго въ видѣ́ніяхъ же и дѣя́ніяхъ.

Ватопе́дскаго сла́внаго Ага́пія восхвали́ти до́лжно, я́ко Богоро́диченъ услы́ша гла́съ, и порабоще́нъ бы́въ, изба́ви своего́ господи́на съ сы́нми, я́ко свобо́дный отъ вѣ́чныя му́ки.

Аѳана́сія, кра́снаго фи́никса Есфигме́нскія оби́тели, хвалю́ житіе́, боже́ственнаго же Ака́кія Но́ваго и Иверскаго Гавріи́ла преподо́бнаго, отъ мо́ря изъе́мшаго чудотво́рную Врата́рницу.

Ка́ко не почту́ честна́го Генна́дія, узрѣ́вшаго я́вѣ въ Ватопе́дѣ источи́вшійся еле́й отъ Богома́тере? Ка́коже умолчу́ па́ки богоно́снаго Гео́ргія, Иверскія оби́тели созда́теля?

Богоро́диченъ: Егда́ язы́ки раздѣля́ше Бо́гъ по числу́ а́нгелъ Свои́хъ, тогда́ Тебе́, Дѣ́во, предвѣ́дя бы́ти Ма́терь Свою́ Пречи́стую, Тебѣ́ отдѣли́ Го́ру сію́ вели́кую и кра́сную, я́ко наслѣ́діе избра́нное.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Богосло́ва вели́каго и свяще́нный орга́нъ Ду́ха Свята́го показа́вшася, боже́ственнаго Григо́рія Паламу́ воспѣва́ю, богосло́вовъ всѣ́хъ пра́вое изъясне́ніе и запечатлѣ́ніе.

Григо́ріевъ же дву́хъ восхвали́ти пра́ведно, въ предѣ́лехъ Ла́вры сла́вно пожи́вшихъ, и соиме́ннаго и́мъ Григо́рія друга́го, и́же оби́тель имени́ту свою́ воздви́же.

Оби́тель Есфигме́нская Даміа́на процвѣте́, Филоѳе́ева же па́ки ина́го произрасти́ преподобному́ченика Даміа́на, и съ ни́мъ боже́ственнаго Доме́тія, и́хже ублажи́мъ.

Діони́сія пою́, ди́внаго преподо́бнаго, Крести́теля Іоа́нна оби́тели созда́теля, и Доме́тія Діони́сіева дру́га, Духа дарова́ньми крася́щагося. Діони́сій другíй, Иверскія оби́тели прозябе́ніе, и Дамаски́нъ Ла́вры боже́ственное удобре́ніе, ны́нѣ ублажа́ются, я́ко сугу́быя вѣнцы́ му́ченичества и по́стничества прія́ша.

Богоро́диченъ: Ты́ обѣща́лася еси́, Дѣ́во, предра́товати всегда́ всѣ́мъ въ Горѣ́ се́й воздви́гшимъ бра́нь на бори́теля, борю́щаго человѣ́ки, тѣ́мже исполня́й Влады́чице, Твое́ обѣща́ніе.

Сѣда́ленъ, гла́съ 4. Подо́бенъ: Удиви́ся Іо́сифъ.

Удиви́шася вку́пѣ вся́ а́нгеловъ во́инства му́жеству души́ и боре́ніямъ ва́шимъ, я́же па́че естества́, отцы́ знаменоно́сніи, ка́ко тѣ́ломъ веще́ственнымъ обложе́ни су́ще, безпло́тныя враги́ побѣди́сте, и благода́рно пѣ́снь Го́сподеви побѣ́дную поя́ху: сла́ва Тебѣ́, сла́ва Укрѣпля́ющему тлѣ́нное сме́ртныхъ естество́. [Два́жды.]

Сла́ва, и ны́нѣ, богоро́диченъ, гла́съ то́йже:

Ужаса́етъ вся́къ у́мъ человѣколю́біе Твое́ мно́гое, Богоотрокови́це Маріа́мъ, е́же показа́ла еси́ испе́рва къ чи́ну здѣ́ подвиза́ющихся, отъ всея́ земли́ избра́вши краснѣ́йшую вку́пѣ же и велича́йшую Го́ру, и сію́, я́ко прили́чную и́нокомъ, и́мъ дарова́вши. Вели́ко вои́стинну е́же о на́съ промышле́ніе Твое́, Богоро́дице.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Пѣ́сньми почита́ю Евѳи́мія, настоя́теля Ватопе́дскаго, и́же бы́въ свя́занъ вери́гами, погруже́нъ бы́сть во глубинѣ́, я́ко обличи́вый пре́лесть латиному́дренныхъ твердѣ́йше, и вѣне́цъ му́ченичества отъ руки́ Госпо́дни неувяда́емый вои́стинну прія́лъ е́сть.

Совоспѣва́ю и друга́го боже́ственнаго Евѳи́мія, Иверскія оби́тели созда́теля, и́же литургису́я нѣ́когда Бо́гу, сто́лпъ ви́денъ бы́сть солнцеобра́зенъ отъ су́щихъ съ ни́мъ, и Дохіа́рскія оби́тели кти́тора пою́ друга́го па́ки Евѳи́мія преподо́бнаго.

Восхваля́ти Ѳеодо́сія досто́итъ, Филоѳе́евскія оби́тели игу́мена, и Ѳеофа́на подви́жника, Дохіа́рскія оби́тели боже́ственное удобре́ніе, и Филадельфíйскаго Ѳеоли́пта высокоу́мнаго, честны́я Тро́ицы услажде́нія.

Ѳео́ну ка́ко оста́влю безъ похвале́нія, свѣти́льника оби́тели Пантокра́торскія, и іера́рха сла́внаго Ѳессалони́тскаго? Или́ ка́ко и́стиннаго боголю́бца Ѳео́фила, боже́ственнаго мѵрото́чца, не почту́ въ словесѣ́хъ, его́же воня́ па́че всѣ́хъ арома́тъ?

Свяще́нныя оби́тели Иверскія созда́тель да воспое́тся мно́ю, Іоа́ннъ преподо́бный, и Іоа́ннъ, Ла́вры о́трасль, и съ ни́ми па́ки Иверскія оби́тели прозябе́нія, Іа́ковъ высокоу́мный и Іа́ковъ другíй, тве́рдіи Христо́вы преподобному́ченицы.

Богоро́диченъ: О, мно́гаго о Горѣ́ Твое́й, Влады́чице, попече́нія! Ты́ бо рекла́ еси́ бы́ти живу́щимъ въ не́й до́брѣ во всѣ́хъ добродѣ́телехъ Наста́вницею и Учи́тельницею, Пита́тельницею и Врачева́тельницею. Врачева́ніе же и пита́ніе, я́ковое хо́щеши разумѣ́й, душе́вное вку́пѣ и тѣле́сное.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Іоаса́фу преподо́бному, Діони́сіевы оби́тели похвалѣ́, приношу́ пѣ́снь, съ ни́мъ же чту́ Іероѳе́я, оби́тели Иверскія красоту́ и сла́ву, дре́внимъ преподо́бнымъ ра́внаго.

Прили́чнѣйше вои́стинну Ка́ллиста вели́каго въ пѣ́снехъ почти́ти, му́дрый о́ный и богодухнове́нъ орга́нъ благода́ти, и Иверскія оби́тели украше́ніе и сла́ву, и па́стырей честна́го началопа́стыря.

Изря́дная о́трасль оби́тели Зогра́фскія, да почти́тся въ пѣ́снехъ, Богоро́дицу ви́дѣвый очесе́ма, Косма́ преподо́бный. И Косма́ ины́й равноапо́стольный похвале́нъ бу́ди, Филоѳе́евскія оби́тели красота́.

О Го́сподѣ весели́ся и ты́, оби́тель Кутлуму́шская, я́ко процвѣ́лъ е́сть въ твои́хъ ке́лліяхъ Христо́въ іере́й и преподо́бный, Кипріа́нъ му́ченикъ. Съ си́мъ же да восхва́лится въ Ла́врѣ пожи́вый Конста́нтій.

Яко ма́терь о ча́дѣхъ, Діони́сіева оби́тель весели́тся о честнѣ́мъ преподо́бномъ Мака́ріи, Христо́вомъ новому́ченицѣ, и о Лео́нтіи, отъ гро́ба пресла́вно источи́вшемъ мѵ́ро всеблагово́нно.

Богоро́диченъ: Кто́ не ра́дуется слы́ша, кто́ обѣтова́ніями Твои́ми не услажда́ется? Ты́ бо рекла́ еси́, Отрокови́це, Сы́ну и Бо́гу Твоему́ предста́вити до́брѣ здѣ́ житіе́ сконча́вшія, проще́ніе прегрѣше́ній и́хъ испроси́вши.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Ла́вры свяще́нное воспита́ніе почти́мъ пѣ́сньми, безпло́тнаго во пло́ти богоно́снаго Макси́ма, отъ Боже́ственнаго Ду́ха бога́тую благода́ть проро́чества пріи́мшаго.

Ватопе́дскія оби́тели почита́ю боже́ственныя о́трасли, Неофи́та сла́внаго, я́ко гла́съ услы́ша Чи́стыя Богоотрокови́цы, и въ преподо́бныхъ сія́ющаго Никоди́ма.

Діони́сіевы оби́тели преизря́дное удобре́ніе воспѣ́тъ бу́ди по до́лгу Ни́фонтъ чу́дный, Константинопо́ля па́стырь бы́вый и преподо́бныхъ ве́рхъ.

Весели́ся честна́я оби́тель Дохіа́рская, обогати́вшаяся кти́торомъ сла́внымъ, му́дрымъ Нео́фитомъ, произрасти́вшимъ добродѣ́тели вся́кія, я́ко дре́во благопло́дное.

Ски́те Каре́йскій, весели́ся въ Боже́ственномъ Ду́сѣ, процвѣ́тши и ты́ сла́внаго Некта́рія, некта́ръ пресла́дкій добродѣ́тели вся́кія и преподо́бнымъ ра́вна.

Богоро́диченъ: Спобо́рствомъ Твои́мъ, Богороди́тельнице, огра́ждшеся, я́ко всеору́жіемъ крѣ́пкимъ, Горы́ преподо́бніи все́ низложи́ша во́инство де́монское и по́чести побѣ́ды прія́ша.

Конда́къ, гла́съ 4. Подо́бенъ: Вознесы́йся.

Онебеси́вшія Го́ру отцы́, и показа́вшія въ не́й житіе́ а́нгельское проходи́ти, и мно́жества мона́ховъ въ не́й собра́вшія, восхва́лимъ вси́, къ ни́мъ взыва́юще: отъ вся́кія ну́жды и навѣ́та изба́вите на́съ, мно́жество преподо́бныхъ, Аѳо́нская похвало́.

Икосъ:

Ко́ль добро́ е́сть совокупле́ніе ва́ше, отцы́ богому́дріи, ко́ль красе́нъ и сла́докъ о́бщій се́й ва́шъ пра́здникъ, въ не́мже вси́ въ Горѣ́ се́й просія́вшіи святíи, имену́еміи вку́пѣ и неимену́еміи, о́бщее благохвале́ніе, я́ко по ду́ху бра́тія, пріе́млете, я́ко мѵ́ро, излива́емое на главу́ Ааро́ню и сходя́щее на браду́, и я́ко ро́су Аермо́нскую. Подоба́ше бо всѣ́мъ во еди́номъ мѣ́стѣ Го́сподеви угоди́вшимъ и во еди́нъ де́нь спра́здноватися. Сего́ ра́ди и мы́, су́щіи во Аѳо́нѣ пустынножи́тели и общежи́тели, во еди́но соше́дшеся, по до́лгу ва́съ ублажа́емъ, но́віи дре́внихъ, сы́ны отце́въ, грѣ́шніи святы́хъ, согла́сно взыва́юще: мѣ́сто сіе́, е́же во обита́ніе себѣ́ избра́сте, отъ вся́каго зла́ вы́сшее сохраня́йте, мно́жество преподо́бныхъ, Аѳо́нская похвало́.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Еди́нъ отъ святы́хъ и́же во Аѳо́нѣ, показа́ся Ни́фонтъ богоно́сный, пти́чее житіе́ пожи́вый въ предѣ́лехъ Ла́вры, и проро́чества да́ръ отъ Бо́га пріе́мый.

Ла́врскій Ни́лъ Мѵрото́чецъ, и Никоди́мъ Кавсокали́вскій цвѣ́тъ, Христу́ возлю́бленный му́ченикъ но́вый, въ сли́чныхъ пѣ́снехъ да похва́лятся досто́йно.

Ка́коже боже́ственнаго Ники́фора и́змемъ изъ ли́ка преподо́бныхъ, и́же безмо́лвно пожи́въ въ безмо́лвнѣйшихъ мѣ́стѣхъ, сподо́бился дарова́ній Ду́ха.

Па́велъ, дву́хъ оби́телей кти́торъ, Гео́ргіевскія и Ксиропота́мскія, подви́жниковъ добро́та, просія́вый при кончи́нѣ, я́коже друго́е со́лнце, въ пѣ́снехъ да велича́ется.

Пѣ́снь воспѣва́ю Пахо́мію, новому́ченику Христо́ву твердѣ́йшему, боже́ственнѣй о́трасли Кавсокали́вы су́щему, пріе́мшему вѣне́цъ сугу́бый отъ Го́спода.

Богоро́диченъ: Влады́чице мíра Ты́ еси́, Приснодѣ́во, изря́днѣе же Горы́ сея́ Влады́чица еси́, Чи́стая, и Предста́тельница, спаса́ющи сію́ отъ вся́каго навѣ́та же и вре́да.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Безмо́лвниковъ пе́рвѣйшій Горы́ се́й почита́ется Пе́тръ, во Аѳо́нѣ пожи́вый житіе́ невеще́ственно, въ тѣ́лѣ побѣди́вый безпло́тныя де́моны, на́гъ при́сно жи́знь всю́ проведы́й и Ду́ха Свята́го даро́въ боже́ственныхъ сподо́бивыйся бога́тно моли́твами Пренепоро́чныя.

Рома́на сла́внаго, по́стниковъ честносло́віе и новому́чениковъ Христо́выхъ наслажде́ніе почти́мъ пѣ́сньми, его́же я́ко ши́покъ израсти́ ски́тъ Ла́врскій честны́й Кавсокали́ва, и его́же ученика́ себѣ́ имѣ́ Ака́кій, но́вый въ лѣ́техъ и дре́вній въ подви́жничествѣ.

Са́вва да восхваля́ется мно́ю, іера́рхъ боже́ственный, отъ Христа́ чуде́съ прія́вый си́лу, Се́рбское ца́рство просвѣти́вый, я́ко со́лнце, съ Симео́номъ, отце́мъ свои́мъ по пло́ти, сы́номъ же по ду́ху, источи́вшимъ мѵ́ро, оби́тели Хиланда́рскія созда́тели боже́ственніи.

Филоѳе́йскія оби́тели наста́вника изря́дна Симео́на, и мѵроточи́ваго Си́мона почти́мъ, на ка́мени воздви́гшаго оби́тель превы́спренню явле́ніемъ небе́сныя звѣзды́, си́лу чуде́съ отъ Бо́га пріи́мша и вла́сть на ду́хи нечи́стыя.

Игра́й и па́ки лику́й, честна́я оби́тель вся́ Діони́сіева, возрасти́вшая боже́ственнаго Филоѳе́я, по́стниковъ украше́ніе, его́же отъ темни́цы Богоро́дица Марíя изба́ви, и отъ вся́каго навѣ́та де́монскаго, и его́же боже́ственная глава́, я́ко звѣзда́ свѣ́тлая, показа́ся.

Богоро́диченъ: На высо́цѣмъ мѣ́стѣ и свѣ́тлѣмъ престо́лѣ Влады́чице, ви́дена была́ еси́ сѣдя́щи, вся́ блиста́ющаяся, и о́крестъ Тебе́ стоя́ху ли́цы безсупру́жныхъ неисче́тны на полу́денныхъ высота́хъ Аѳо́на и о́крестъ Горы́, я́ко о́гненніи столпи́ ви́дяхуся, озаря́юще восхваля́емыя ны́нѣ.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Торжеству́й Ватопе́дская честна́я оби́тель, преподо́бными обогати́вшаяся двана́десятьми и страда́льцами, и́же изобличи́ша му́жественно злосла́віе все́ латиному́дренныхъ и злочести́выхъ, отъ ни́хже пре́дани бы́вше удавле́нія сме́рти, сугу́быя вѣнцы́ получи́ша.

Весели́ся Иверская боже́ственная оби́тель, я́ко все́ мно́жество принесла́ еси́ Іису́су преподобному́чениковъ отъ твои́хъ ча́дъ водо́ю удавле́ніемъ, я́ко царя́ Михаи́ла и Ве́кка патріа́рха латиному́дренныя мужему́дренно изобличи́ша.

По́й и ра́дуйся и ты́, оби́тель Зогра́фская, Го́споду прине́сшая твоя́ сы́ны два́десять и ше́сть, боже́ственныя преподобному́ченики, я́ко всесожже́нія свяще́нная, огне́мъ сконча́вшіяся, я́ко му́жественнѣ пре́лесть латиному́дренныхъ посрами́вшія.

И ты́, честны́й ски́те Каре́йскій, посто́ не лику́еши и не весели́шися, и́бо и ты́ ча́да твоя́ прине́слъ еси́ Христу́ тве́рдыя преподобному́ченики, мече́мъ усѣ́ченныя во главы́, я́ко защити́вшія оте́ческое уче́ніе и лати́нское изобличи́вшія.

Тро́иченъ: Пріими́ Пресвята́я Тро́ице честна́я, я́же Гора́ Аѳо́нская прино́ситъ Ти́, я́ко нача́тки и я́ко ѳиміа́мы избра́нныя, вся́ угоди́вшія пре́жде и по́слѣжде въ не́й, зна́емыя и незна́емыя, и моли́твами и́хъ отъ вся́каго вре́да сію́ сохраня́й.

Богоро́диченъ: Пѣ́сни Тебѣ́ благода́рственныя вси́ мы́, въ Горѣ́ се́й живу́щіи, прино́симъ, Ма́ти Бо́жія, я́ко спаса́еши на́съ при́сно отъ вся́каго обстоя́нія, пита́еши, грѣ́еши и промышля́еши. Но мо́лимъ Тя́ и Боже́ственнаго Ца́рствія по кончи́нѣ сподо́би.

Свѣти́ленъ воскре́сенъ: Сла́ва святы́хъ:

Весели́ся Горо́ тезоиме́нная свя́тости, стра́жи твоя́ ви́дящи и богоно́сныя отцы́, собра́нныя вся́ почита́емыя дне́сь, и пра́здникъ ра́достенъ собо́ра и́хъ съ свои́ми жи́тели соверша́й.

И ны́нѣ, богоро́диченъ воскре́сенъ.

На хвали́техъ стихи́ры воскре́сны 4, и святы́хъ 4, гла́съ 1. Подо́бенъ: Небе́сныхъ чино́въ.

Аѳо́нскихъ отце́въ честно́е собра́ніе, вси́ и́же на Аѳо́нѣ, восхва́лимъ пѣ́сньми, дру́ги Дѣ́вы и Христа́, рачи́тельныя уго́дники, на́ши предста́тели и моли́твенники непреста́нныя ко Го́споду.

На Горѣ́ Аѳо́нстѣй, отцы́ преподо́бніи, тѣле́снѣ пребыва́юще, мы́сль всю́ возвы́систе, въ го́ры мы́сленныя и вѣ́чныя, святíи, и я́ко невеще́ственніи а́нгели на земли́ вои́стинну пожи́сте.

[Сти́хъ: Восхва́лятся преподо́бніи во сла́вѣ и возра́дуются на ло́жахъ свои́хъ.]

Отъ смире́нія кра́йняго боже́ственное разсужде́ніе, отъ него́же острозрѣ́ніе и прозрѣ́ніе вои́стинну прія́сте, отцы́, отъ Бо́га благода́тію Ду́ха, и предви́дяще и глаго́люще извѣ́стно я́ко настоя́щая бу́дущая.

[Сти́хъ: Воспо́йте Го́сподеви пѣ́снь но́ву, хвале́ніе Его́ въ Це́ркви преподо́бныхъ.]

Пресвѣ́тлыя Тро́ицы ны́нѣ осіява́емы, непристу́пною сла́вою, богоно́сніи отцы́, и боже́ственнаго весе́лія и ра́дости исполня́еми, сла́вніи, за ны́ моли́теся прилѣ́жно изба́витися муче́нія.

Сла́ва, гла́съ 8.

Преподо́бныхъ оте́цъ ли́къ, отъ разли́чныхъ оте́чествъ устреми́выйся и въ Горѣ́ всели́выйся, е́же чрезъ естество́ избѣже́, е́же по естеству́ сохрани́, и я́же па́че естества́ сподо́бися дарова́ній, и на́мъ пу́ть подви́жничества дѣ́лы и словесы́ показа́, тѣ́мже по до́лгу и́хъ благохва́ляще, возопіи́мъ: о мно́жество преподо́бныхъ освяще́нное и вожделѣ́нное Бо́гу, о пче́льниче богособра́нный въ разсѣ́линахъ и пеще́рахъ Горы́, я́коже во у́ліяхъ мы́сленныхъ, сладча́йшій ме́дъ безмо́лвія соста́вивый, Тро́ицы услажде́нія, Богоро́дицы украше́нія, Аѳо́на похвале́нія и вселе́нныя честносло́вія. Моли́теся ко Го́споду поми́ловатися душа́мъ на́шимъ.

[И ны́нѣ, богоро́диченъ:

Преблагослове́нна еси́, [Богоро́дице Дѣ́во, Вопло́щшимъ бо ся изъ Тебе́ а́дъ плѣни́ся, Ада́мъ воззва́ся, кля́тва потреби́ся, Ева свободи́ся, сме́рть умертви́ся, и мы́ ожи́хомъ. Тѣ́мъ, воспѣва́юще, вопіе́мъ: благослове́нъ Христо́съ Бо́гъ, благоволи́вый та́ко, сла́ва Тебѣ́].

Славословіе великое, [ектеніи] и отпустъ.



НА ЛИТУРГІИ,

Блаже́нна гла́са на 6 и преподо́бныхъ 3-я пѣ́снь на 4, и про́чее по ря́ду: [Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 675-688.

/ Къ оглавленію раздѣла /


Наверхъ / Къ титульной страницѣ

0