Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДЬ ЦВѢТНАЯ.

Въ пято́къ Свѣ́тлыя седми́цы.
Пра́зднованіе Пресвятѣ́й Влады́чицѣ на́шей Богоро́дицѣ и Приснодѣ́вѣ Марíи въ че́сть ико́ны Ея́, имену́емыя «Живоно́сный Исто́чникъ».

[ВЕЧЕРЪ.]

На Го́споди воззва́хъ.., поста́вимъ стихо́въ 10, и пое́мъ стихи́ры воскре́сны осмогла́сника 6, гла́съ 6:

Побѣ́ду имѣ́яй, Христе́, ю́же на а́да, на Кре́стъ возше́лъ еси́, да во тмѣ́ сме́рти сѣдя́щія воскреси́ши съ собо́ю, Иже въ ме́ртвыхъ Свобо́дь, Источа́яй живо́тъ отъ Своего́ свѣ́та, Всеси́льне Спа́се, поми́луй на́съ.

Дне́сь Христо́съ, сме́рть попра́въ, я́коже рече́, воскре́се, и ра́дованіе мíру дарова́, да вси́ взыва́юще пѣ́снь, та́ко рце́мъ: Исто́чниче жи́зни, Непристу́пный Свѣ́те, Всеси́льне Спа́се, поми́луй на́съ.

Тебе́, Го́споди, Су́щаго по все́й тва́ри, грѣ́шніи ка́мо бѣжи́мъ? На небеси́ Са́мъ живе́ши, во а́дѣ попра́лъ еси́ сме́рть. Во глубины́ морскíя? — Та́мо рука́ Твоя́ Влады́ко. Къ Тебѣ́ прибѣга́емъ, Тебѣ́ припа́дающе, мо́лимся: Воскресы́й изъ ме́ртвыхъ, поми́луй на́съ.

Ины́я стихи́ры восто́чны, гла́съ то́йже.

Кресто́мъ Твои́мъ, Христе́, хва́лимся, и Воскресе́ніе Твое́ пое́мъ и сла́вимъ: Ты́ бо еси Бо́гъ на́шъ, ра́звѣ Тебе́ ино́го не вѣ́мы.

Сла́ва си́лѣ Твое́й, Го́споди, я́ко упраздни́лъ еси́ держа́ву иму́щаго сме́рти, обнови́лъ еси́ ны́ кресто́мъ Твои́мъ, да́руяй на́мъ жи́знь и нетлѣ́ніе.

Вы́ну благословя́ще Го́спода, пое́мъ Воскресе́ніе Его́: кре́стъ бо претерпѣ́въ, сме́ртію сме́рть погуби́.

Та́же, стихи́ры Живопріе́мнаго Исто́чника, гла́съ то́йже. Подо́бенъ: Всю́ отложи́вше.

Стра́нная и пресла́вная небе́съ Влады́ка на Тебѣ́ соверша́ше изнача́ла, Всенепоро́чная: и́бо свы́ше я́вственно ука́ну, я́коже до́ждь, во утро́бѣ Твое́й, Богоневѣ́сто, исто́чникъ Тя́ показу́я, все́ благо́е врѣ́ющій, оби́ліе же исцѣле́ній, благодѣя́нія источа́ющій всѣ́мъ незави́стно, тре́бующимъ крѣ́пости ду́шъ, и здра́віе тѣлесе́, водо́ю благода́ти.

Ма́нну Тя́ небе́сную, и рая́, Дѣ́во, исто́чникъ боже́ственный, имену́ю, Влады́чице, пріи́скреннѣ: земли́ бо тече́ то́къ, и благода́ть исто́чника Твоего́, четвероча́стіе ея́ покрыва́ющая стра́нными чудесы́ всегда́, и всѣ́мъ проси́мая быва́етъ вода́ піе́мая. Тѣ́мже, веселя́щеся, христоимени́тіи, притека́емъ вѣ́рно, святы́ню че́рплюще всегда́ сладкото́чную.

Струи́ исцѣле́ній источа́еши, Дѣ́во, вѣ́рно притека́ющимъ исто́чнику Твоему́ всегда́, Богоневѣ́сто. Ту́не бо излива́еши оби́льно и бога́тно неду́гующимъ исцѣле́нія: слѣпы́я ви́дящія явля́еши я́сно, приступа́ющія къ Тебѣ́; хро́мыя мно́гія испра́вила еси́, и разсла́бленныя стягну́ла еси́, умерщвле́на же оживи́ла еси́ возлія́ніемъ трегу́бымъ, неводне́нныхъ и злоды́шущихъ стра́сти исцѣли́ла еси́.

Повторя́емъ 1-ю стихи́ру.
Сла́ва, гла́съ 6:

Кто́ возглаго́летъ си́лы Твоя́, Исто́чниче, и́же неистоща́емыми чудесы́ изоби́луяй, мно́гая и па́че естества́ содѣва́еши исцѣле́ньми? Оле вели́чій, я́же всѣ́мъ излива́еши! Не то́кмо бо болѣ́зни неудо́бныя отгна́ла еси́ притека́ющихъ съ любо́вію, но и душе́вныя стра́сти измыва́еши очища́ющи, Всенескве́рная, всѣ́мъ подаю́щи ве́лію ми́лость.

И ны́нѣ, [гла́съ то́йже]:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ съ кади́ломъ. Свѣ́те ти́хій...

Проки́менъ, гла́съ 7: Возлюблю́ Тя, Го́споди, Крѣ́посте моя́,* Госпо́дь утвержде́ніе мое́. Сти́хъ: Бо́гъ мо́й, Помо́щникъ мо́й, и упова́ю на Него́. Сти́хъ: Хваля́, призову́ Го́спода, и отъ вра́гъ мои́хъ спасу́ся. Сти́хъ: Услы́ша отъ хра́ма свята́го Своего́ гла́съ мо́й. Та́же: Возлюблю́ Тя, Го́споди, Крѣ́посте моя́. [И мы́: Госпо́дь утвержде́ніе мое́.]

Ектенія́: Рце́мъ вси́... Сподо́би, Го́споди въ ве́черъ се́й.., и про́чая.

На стихо́внѣ стихи́ра воскре́сна, гла́съ 6, осмогла́сника:

Воскресе́ніе Твое́, Христе́ Спа́се, а́нгели пою́тъ на небесѣ́хъ, и на́съ на земли́ сподо́би чи́стымъ се́рдцемъ Тя́ сла́вити.

Та́же, настоя́щія стихи́ры Богоро́дицы, гла́съ 5. Подо́бенъ.

Ра́дуйся, Живоно́сный Исто́чниче, по моря́мъ разлива́яй чудеса́ на всю́ вселе́нную; Океа́не у́мный, Ни́ловы струи́ превосходя́й излива́ніемъ благода́ти; Силоа́ме вторы́й, во́ду источа́яй, а́ки отъ ка́мене пресла́вную, Іорда́ново же пріе́мый дѣ́йство; Ма́нно спаси́тельная же, я́сно быва́емая ко и́щущаго тре́бованію, бога́тая вои́стинну и незави́стная, Христо́ва Ма́ти Отрокови́це, излива́ющая мíрови ве́лію ми́лость.

Сти́хъ: Освяти́лъ е́сть селе́ніе Свое́ Вы́шній.

Пѣ́сньми чу́дными, вѣ́рніи, небе́сный Облакъ воспои́мъ, Ка́плю небе́сную — Живода́вца Христа́, на зе́млю нетлѣ́нно одожди́вшую, жи́ву ска́чущую, и источа́ющую безсме́ртная; Во́ду боже́ственную, Амвросíю не́ктара, никогда́же по питіи́ истлѣва́юща, жа́жду же, та́ющую ду́ши, отгоня́юща. Отъ Него́же пію́щимъ разу́мно, то́ки боже́ственныя предлага́ются отъ у́мнаго Чре́ва, точа́ща всѣ́мъ благода́ть незави́стную.

Сти́хъ: Рѣ́чная устремле́нія веселя́тъ гра́дъ Бо́жій.

Ра́дуйся, Живопріе́мный Исто́чниче, вѣ́чно источа́я благода́ти; лія́ніе исцѣле́ній, вся́кую неду́говъ крѣ́пость, немощну́ю и злу́ю, отгоня́ющее; слѣпы́хъ воззрѣ́ніе, и прокаже́нныхъ боже́ственное очище́ніе, точа́щее неду́говъ вся́кое врачевство́, всѣ́мъ притека́ющимъ вѣ́рно къ хра́му Твоему́; вели́кая о́бщая цѣльба́, безме́здная вои́стинну и гото́вая, Ма́ти Христа́ Сло́ва, источа́ющаго мíрови ве́лію ми́лость.

Сла́ва, гла́съ 5:

Востру́бимъ, празднолю́бцы, въ пѣ́снехъ, воспле́щемъ въ вода́хъ и возлику́имъ, ра́дующеся, вѣ́чными то́ками Живоно́снаго Исто́чника. Ца́ріе и кня́зи да стека́ются и исто́чника благода́ти да че́рплютъ незави́стно: цари́ бо спасе́, на одрѣ́ же содержи́мыя прикоснове́ніемъ возста́ви. Па́стыріе же и вси́ дождено́сный о́блакъ, спаси́тельную во́ду, сше́дшеся, почерпе́мъ: и́же въ неду́зѣхъ — свобожде́ніе; и́же въ бѣда́хъ — крѣ́пость; прохлажде́ніе — и́же въ жа́ждѣ; слѣпíи — о́чи, глусíи — благослы́шаніе, злостра́ждущіи — исцѣле́ніе; и́же въ сме́ртехъ — живоно́сную; вси́ повсю́ду вѣ́рнымъ источа́ющую во́ды спасе́нія, воспле́щуще, си́це воззове́мъ: присноживы́я то́ки излива́ющая отъ исто́чника, Чи́стая, не преста́й, Дѣ́во, всегда́ моля́щися о рабѣ́хъ Твои́хъ.

И ны́нѣ, гла́съ то́йже:

Воскресе́нія де́нь, и просвѣти́мся торжество́мъ, и дру́гъ дру́га объи́мемъ. Рце́мъ — бра́тіе! — и ненави́дящимъ на́съ, прости́мъ вся́ Воскресе́ніемъ, и та́ко возопіи́мъ: Христо́съ воскре́се изъ ме́ртвыхъ, сме́ртію сме́рть попра́въ, и су́щимъ во гробѣ́хъ живо́тъ дарова́въ.

Христо́съ воскре́се.., три́жды. И отпу́стъ.



НА УТРЕНИ,
Кано́нъ Па́сцѣ, со ирмосы́ на 8 и Богоро́дицы на 6.

Кано́нъ Па́сцѣ, гла́съ 1:
Пѣ́снь 1.

Ирмо́съ: Воскресе́нія де́нь, [просвѣти́мся, лю́діе. Па́сха, Госпо́дня Па́сха: отъ сме́рти бо къ жи́зни, и отъ земли́ къ небеси́, Христо́съ Бо́гъ на́съ преведе́, побѣ́дную пою́щія].

Припѣ́въ: Христо́съ воскре́се изъ ме́ртвыхъ.

Очи́стимъ чу́вствія, [и у́зримъ непристу́пнымъ свѣ́томъ воскресе́нія, Христа́ блиста́ющася, и — ра́дуйтеся — реку́ща, я́сно да услы́шимъ, побѣ́дную пою́ще].

Небеса́ у́бо досто́йно да веселя́тся, [земля́ же да ра́дуется, да пра́зднуетъ же мíръ, ви́димый же ве́сь и неви́димый: Христо́съ бо воста́, весе́ліе вѣ́чное].

И Богоро́дицы, его́же краестро́чіе: Νικηφόρου Καλλίστου τοῦ Ξανθοπούλου.
[Ирмо́съ то́йже.]

Припѣ́въ: Пресвята́я Богоро́дице, спаси́ на́съ.

Ны́нѣ источи́ ми, Дѣ́во Богоро́дице, исто́чниче, благода́ть даю́щи сло́ва, я́ко да воспою́ Тя Исто́чникъ, врѣ́ющій живо́тъ и благода́ть вѣ́рнымъ: Ты́ бо ѵпоста́сное Сло́во источи́ла еси́.

Врачевство́ па́че естества́ хра́мъ Тво́й, Честна́я, явля́ется всѣ́мъ, Отрокови́це: отъ сме́рти бо я́вныя притека́ющія вѣ́рныя я́вѣ возставля́етъ, и всѣ́мъ незави́стную то́читъ сла́дость.

Сла́ва: Излива́еши съ небесе́ неистощи́мо благода́ти вои́стинну Еди́на: слѣпѣ́юща бо твори́ши взира́ти къ свѣ́ту бла́томъ но́вымъ, возгласи́вши свы́ше па́че смы́сла Лео́нови.

И ны́нѣ: Общее любоче́стіе человѣ́чества, Честна́я, ра́дуйся, Марíе, ра́дуйся: всѣ́хъ бо Творе́цъ на Тя́, я́коже ка́пля, сни́де я́вственно, Исто́чникъ Тя́ безсме́ртенъ показа́въ, Богоневѣ́стная.

Пѣ́снь 3.

Ирмо́съ: Пріиди́те, пи́во піе́мъ [но́вое, не отъ ка́мене непло́дна чудодѣ́емое, но нетлѣ́нія исто́чникъ, изъ гро́ба одожди́вша Христа́, въ Не́мже утвержда́емся].

Ны́нѣ вся́ испо́лнишася [свѣ́та, не́бо же и земля́, и преиспо́дняя: да пра́зднуетъ у́бо вся́ тва́рь воста́ніе Христо́во, въ не́мже утвержда́ется].

Вчера́ спогребо́хся Тебѣ́, [Христе́, совостаю́ дне́сь воскре́сшу Тебѣ́, сраспина́хся Тебѣ́ вчера́, Са́мъ мя́ спросла́ви, Спа́се, во Ца́рствіи Твое́мъ].

Богоро́дицы подо́бны:

Свѣ́тлый Тя́ святы́й Хра́мъ Влады́ки всѣ́хъ, Отрокови́це, вѣ́мъ, и нетлѣ́нія Исто́чникъ, во́ду излива́ющъ — Христа́, отъ Него́же напая́емся.

Отъ Твоея́ благода́ти, Влады́чице, Исто́чниче, самоде́ржцу дае́ши исхо́довъ происхожде́ніе содержи́мо лю́тѣ, ка́мене подстоя́ніе стра́шное, водо́ю разрѣши́вшееся.

Сла́ва: Тече́тъ благода́ть незави́стная отъ Тебе́, Богоро́дице Дѣ́во, оби́льно точа́щая: хро́міи ска́чутъ о Тебѣ́, прокаже́нныхъ очища́ется мно́жество, и де́мони угнѣта́ются.

И ны́нѣ: Всѣ́мъ дае́ши исцѣле́ніе вѣ́рнымъ: царе́мъ, простце́мъ, ни́щимъ, князе́мъ, убо́гимъ, бога́тымъ о́бще, во́ду излива́яй Исто́чниче — разли́чное исцѣле́ніе.

Конда́къ Па́сцѣ, [гла́съ 8]:

Аще и во гро́бъ снизше́лъ еси́, [Безсме́ртне, но а́дову разруши́лъ еси́ си́лу, и воскре́слъ еси́, я́ко побѣди́тель, Христе́ Бо́же, жена́мъ мѵроно́сицамъ вѣща́вый, — ра́дуйтеся! — и Твои́мъ апо́столомъ ми́ръ да́руяй, па́дшимъ подая́й воскресе́ніе.

Икосъ:

Еже пре́жде со́лнца Со́лнце заше́дшее иногда́ во гро́бъ, предвари́ша ко у́тру, и́щущія я́ко дне́ мѵроно́сицы дѣ́вы, и друга́ ко друзѣ́й вопія́ху: О, други́ни! пріиди́те, воня́ми пома́жемъ тѣ́ло живоно́сное и погребе́ное, пло́ть Воскреси́вшаго па́дшаго Ада́ма, лежа́щую во гро́бѣ. Идемъ, потщи́мся, я́коже волсви́, и поклони́мся, и принесе́мъ мѵ́ра я́ко да́ры, не въ пелена́хъ, но въ плащани́цѣ Обви́тому, и пла́чимъ, и возопіи́мъ: о, Влады́ко! воста́ни, па́дшимъ подая́й воскресе́ніе].

[Сла́ва, и ны́нѣ,] сѣда́ленъ, гла́съ 8. Подо́бенъ: Прему́дрости сло́ва.

Приснотеку́щій Исто́чникъ и живо́тный, источа́яй струя́ боже́ственный то́къ согла́сно восхва́лимъ, благода́ти прося́ще: на кíйждо бо де́нь источа́етъ исцѣле́нія, я́ко рѣ́къ тече́нія показу́яй малѣ́йшая. Тѣ́мже, по до́лгу приступа́юще съ любо́вію, вѣ́рно почерпе́мъ отъ исто́чника неисчерпа́емое здра́віе, вои́стинну безсме́ртное, ороша́ющее вѣ́рно благочести́выхъ сердца́, устна́ми возопіи́мъ: Ты́ еси́ вѣ́рныхъ Утѣше́ніе.

Пѣ́снь 4.

Ирмо́съ: На Боже́ственнѣй стра́жи [богоглаго́ливый Авваку́мъ да ста́нетъ съ на́ми, и пока́жетъ свѣтоно́сна а́нгела, я́сно глаго́люща: дне́сь спасе́ніе мíру, я́ко воскре́се Христо́съ, я́ко всеси́ленъ].

Му́жескій у́бо по́лъ, [я́ко разве́рзый дѣ́вственную утро́бу, яви́ся Христо́съ, я́ко человѣ́къ же, Агнецъ нарече́ся. Непоро́ченъ же, я́ко невку́сенъ скве́рны, на́ша Па́сха, и я́ко Бо́гъ и́стиненъ соверше́нъ рече́ся].

Яко единолѣ́тный а́гнецъ, [благослове́нный на́мъ вѣне́цъ — Христо́съ, во́лею за всѣ́хъ закла́нъ бы́сть, Пасха́ чисти́тельная, и па́ки изъ гро́ба кра́сное пра́вды на́мъ возсія́ Со́лнце].

Богооте́цъ у́бо Дави́дъ [предъ сѣ́ннымъ ковче́гомъ скака́ше игра́я, лю́діе же Бо́жіи святíи, образо́въ сбытіе́ зря́ще, весели́мся боже́ственнѣ, я́ко воскре́се Христо́съ, я́ко всеси́ленъ].

Богоро́дицы подо́бны:

Па́че песка́ вои́стинну и ка́плій дожде́вныхъ бы́ша, Богоро́дице, мно́жества исто́чника дѣ́лъ Твои́хъ, непреста́нно теку́щая на всю́ зе́млю бога́тно, и вся́каго боля́ща лю́тѣ ско́ро исцѣля́ющая.

На стѣсне́нный жены́ отъ карки́на сосе́цъ вода́ возлива́ется, Дѣ́во, исто́чника Твоего́, Влады́чице, и а́біе преста́ша стра́сти смертоно́сныя струе́ю, и карки́нъ про́сто изы́ти позна́.

Сла́ва: Недомы́слимое въ Тебѣ́ и па́че естества́ содѣ́янное е́сть я́вственно, Богоро́дице: вода́ бо быва́етъ исто́чника Твоего́ исцѣле́ніе, неду́гомъ смертоно́снымъ проти́вное, его́же естество́ я́вѣ никогда́же вѣ́дяше.

И ны́нѣ: При́сно умерщвля́етъ мя́ вра́гъ сла́стными прило́ги, Влады́чице Исто́чниче Богоро́дице; не пре́зри, предвари́, ско́рая По́моще, сего́ же сѣ́тей мя́ изба́ви, да воспою́ Тя при́сно многопѣ́тую.

Пѣ́снь 5.

Ирмо́съ: Утренюемъ у́треннюю [глубоку́, и вмѣ́сто мíра пѣ́снь принесе́мъ Влады́цѣ, и Христа́ у́зримъ, пра́вды Со́лнце, всѣ́мъ жи́знь возсія́юща].

Безмѣ́рное Твое́ благоутро́біе, [а́довыми у́зами содержи́міи зря́ще, къ свѣ́ту идя́ху, Христе́, весе́лыми нога́ми, Па́сху хва́ляще вѣ́чную].

Присту́пимъ, свѣщено́сніи, [исходя́щу Христу́ изъ гро́ба, я́ко Жениху́, и спра́зднуемъ любопра́зднственными чи́нми, Па́сху Бо́жію спаси́тельную].

Богоро́дицы подо́бны:

Глаго́ланная, Дѣ́во Отрокови́це, исто́чника Твоего́ вои́стинну чудеса́ ужаса́ютъ человѣ́ковъ помышле́ніе: па́че бо естества́ су́ть, вся́ вѣ́рныя освяща́ющая.

Повѣствова́ руно́, ма́нна, и Силоа́мъ, и ка́мень точа́щъ, Соломо́новъ притво́ръ, благода́ть Твою́, Іорда́нскія во́ды, и исто́чникъ Самаряны́ни.

Сла́ва: Ка́пли Твоя́, Отрокови́це Дѣ́во, я́же исто́чника, и ме́ртваго оживи́ша — па́че сло́ва содѣ́янное и смы́сла: вся́ бо Твоя́, Всечи́стая, сло́во побѣжда́ютъ человѣ́ческое.

И ны́нѣ: Стра́сти моя́, Отрокови́це, исцѣли́, кровотече́нія исто́чникъ изсуша́ющи, и лю́тое пла́мене возжже́ніе, и здра́вія преложе́ніе, исхо́довъ сою́зъ, и чревотече́ніе.

Пѣ́снь 6.

Ирмо́съ: Снизше́лъ еси́ въ преиспо́дняя [земли́ и сокруши́лъ еси́ вереи́ вѣ́чныя, содержа́щія свя́занныя, Христе́, и тридне́венъ, я́ко отъ ки́та Іо́на, воскре́слъ еси́ отъ гро́ба].

Сохрани́въ цѣ́ла зна́менія, [Христе́, воскре́слъ еси́ отъ гро́ба, ключи́ Дѣ́вы не вреди́вый въ рождествѣ́ Твое́мъ, и отве́рзлъ еси́ на́мъ ра́йскія две́ри].

Спа́се мо́й, живо́е же и неже́ртвенное [заколе́ніе, я́ко Бо́гъ Са́мъ Себе́ во́лею приве́дъ Отцу́, совоскреси́лъ еси́ всеро́днаго Ада́ма, воскре́съ отъ гро́ба].

Богоро́дицы подо́бны:

Словеса́ Сло́ва, я́ко вои́стинну Исто́чника, воспѣва́емъ Тя́, Чи́стая: прему́дрости бо Глубину́ я́ко па́че сло́ва ражда́еши, Повѣ́сивша на возду́сѣ тече́нія и зе́млю на водѣ́.

Подшла́ еси́ лѣ́ствицъ несе́ніе, отъе́млющее сокруше́ніе и́же та́мо живопи́сцевъ, о Всесвяты́й Исто́чниче, спаса́яй лю́ди отъ тру́са до́му па́дшія.

Сла́ва: Утро́бы неродя́щія непло́дствомъ пре́жде, разрѣша́еши я́вѣ исто́чника Твоего́ струя́ми, и́бо, я́ко роди́вшая Влады́ку всѣ́хъ, и рожде́нія подае́ши.

И ны́нѣ: Ни сло́во, ни у́мъ, ниже́ язы́къ Твое́ возмо́гутъ, Чи́стая, рождество́ похвали́ти, но немощству́ютъ въ Тебѣ́, и облича́ется филосо́фовъ че́стность и ри́торовъ красота́.

Конда́къ, гла́съ 8. Подо́бенъ: Взбра́нной.

Отъ неистощи́мыя Ты́, исто́чниче Богоблагода́тный, подае́ши ми́, точа́щи во́ды Твоея́ благода́ти, приснотеку́щій па́че сло́ва, я́ко бо Сло́во ро́ждшая па́че смы́сла, молю́ Ти ся, ороси́ мя благода́тію, да зову́ ти: ра́дуйся, Водо́ спаси́тельная.

Икосъ:

Нескве́рная Богоро́дице, ро́ждшая Сло́во Отчее, пре́жде вѣ́къ нетлѣ́нно ро́ждшееся, разшири́ моя́ уста́, Чи́стая, спривнося́щи мя́ къ Твоему́ похвале́нію, я́ко да восхвалю́ Тя́, зовы́й исто́чнику Твоему́ сія́: Ра́дуйся, исто́чниче ра́дости непрестае́мыя; ра́дуйся, то́че добро́ты неизрече́нныя. Ра́дуйся, неду́говъ разли́чныхъ разрѣше́ніе; ра́дуйся, страсте́й вся́кихъ потопле́ніе. Ра́дуйся, струе́ свѣтови́днѣйшая, здра́вы творя́щая вѣ́рныя; ра́дуйся, водо́ благода́тнѣйшая неду́гующимъ многоразли́чно. Ра́дуйся, ча́ше ма́нны живото́чныя; ра́дуйся, ба́не и не́ктарю богоизлія́нный. Ра́дуйся, водо́ прему́дрости, невѣ́дѣніе отъе́млющая; ра́дуйся, растворе́ніе се́рдца, пи́щу боже́ственную излива́ющее. Ра́дуйся, приста́нище неможе́нія источа́ющая; ра́дуйся, пла́мень неду́гованія угаша́ющая. Ра́дуйся, Водо́ спаси́тельная.

Синакса́рь на Пресвяту́ю Госпожу́ Влады́чицу Богоро́дицу, Живопріе́мный Исто́чникъ.

[Та́же глаго́лемъ:]

Воскресе́ніе Христо́во ви́дѣвше, [поклони́мся Свято́му Го́споду Іису́су, еди́ному Безгрѣ́шному. Кресту́ Твоему́ покланя́емся, Христе́, и свято́е Воскресе́ніе Твое́ пое́мъ и сла́вимъ: Ты́ бо еси́ Бо́гъ на́шъ, ра́звѣ Тебе́ ино́го не зна́емъ, и́мя Твое́ имену́емъ. Пріиди́те, вси́ вѣ́рніи, поклони́мся Свято́му Христо́ву Воскресе́нію: се́ бо пріи́де Кресто́мъ ра́дость всему́ мíру. Всегда́ благословя́ще Го́спода, пое́мъ Воскресе́ніе Его́: распя́тіе бо претерпѣ́въ, сме́ртію сме́рть разруши́]. [Три́жды.]

Воскре́съ Іису́съ [отъ гро́ба, я́коже прорече́, даде́ на́мъ живо́тъ вѣ́чный и ве́лію ми́лость]. [Три́жды.]

Пѣ́снь 7.

Ирмо́съ: Отроки отъ пе́щи Изба́вивый, [бы́въ Человѣ́къ, стра́ждетъ я́ко сме́ртенъ, и стра́стію сме́ртное въ нетлѣ́нія облачи́тъ благолѣ́піе, Еди́нъ благослове́нъ отце́въ Бо́гъ и препросла́вленъ].

Жены́ съ мѵ́ры богому́дрыя [въ слѣ́дъ Тебе́ теча́ху: Его́же, я́ко ме́ртва, со слеза́ми иска́ху, поклони́шася, ра́дующіяся, Живо́му Бо́гу, и Па́сху та́йную Твои́мъ, Христе́, ученико́мъ благовѣсти́ша].

Сме́рти пра́зднуемъ умерщвле́ніе, [а́дово разруше́ніе, ино́го житія́ вѣ́чнаго нача́ло и, игра́юще, пое́мъ Вино́внаго, Еди́наго благослове́ннаго отце́въ Бо́га, и препросла́вленнаго].

Яко вои́стинну свяще́нная, [и всепра́зднственная сія́ спаси́тельная но́щь, и свѣтоза́рная, свѣтоно́снаго дне́, воста́нія су́щи провозвѣ́стница: въ не́йже безлѣ́тный Свѣ́тъ изъ гро́ба пло́тски всѣ́мъ возсія́].

Богоро́дицы подо́бны:

Почерпи́те, неду́гующіи, исцѣле́нія: Всечи́стая бо то́читъ отъ боже́ственнаго исто́чника сла́дость и́стинную, пото́къ сла́дости вои́стинну врѣ́ющій. Тѣ́мже и вѣ́рою то́ки незави́стныя почерпе́мъ вси́.

Удивля́ютъ слы́шащія, Влады́чице, стра́нная Твоя́ чудеса́ вся́ вѣ́рныя: нѣмы́я бо и глухíя, я́ко благоглаго́ливыя, показу́етъ вода́ Твоя́, стра́ждущія же лю́тѣ врачу́етъ, и исцѣле́ніе да́руетъ.

Сла́ва: Возво́диши отъ пе́щи скорбе́й, ороша́ющи вода́ми отъ стра́ннаго исто́чника приступа́ющія къ Тебѣ́, Чи́стая: карки́нскія бо ра́ны свобожда́ется человѣ́къ, прокаже́нна же исцѣля́еши, и распале́ніе угаси́ла еси́.

И ны́нѣ: Юноши и отрокови́цы Влады́чицу, и вси́ человѣ́цы вѣ́рою отъ души́ восхва́лимъ свѣ́тло: сокруше́нія бо гное́вицъ, и вре́ды лука́выхъ, и ото́ки, и разсла́бленнаго исцѣли́.

Пѣ́снь 8.

Ирмо́съ: Се́й нарече́нный и святы́й де́нь — [еди́нъ суббо́тъ ца́рь и госпо́дь, пра́здниковъ пра́здникъ и торжество́ е́сть торже́ствъ, въ о́ньже благослови́мъ Христа́ во вѣ́ки].

Пріиди́те, но́ваго виногра́да [рожде́нія, Боже́ственнаго весе́лія, въ наро́читомъ дни́ Воскресе́нія, Ца́рствія Христо́ва пріобщи́мся, пою́ще Его́, я́ко Бо́га, во вѣ́ки].

Возведи́ о́крестъ о́чи твои́, [Сіо́не, и ви́ждь: се́ бо пріидо́ша къ тебѣ́, я́ко богосвѣ́тлая свѣти́ла, отъ за́пада, и сѣ́вера, и мо́ря, и восто́ка ча́да твоя́, въ тебѣ́ благословя́щая Христа́ во вѣ́ки].

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Тро́иченъ: Отче Вседержи́телю, [и Сло́ве, и Ду́ше, треми́ соединя́емое во Ѵпоста́сехъ Естество́, Пресу́щественне и Пребоже́ственне! Въ Тя́ крести́хомся и Тя́ благослови́мъ во вся́ вѣ́ки].

Богоро́дицы подо́бны:

Боже́ственную исто́чникъ и честну́ю во́ду излива́етъ Тво́й, Дѣ́во: водны́хъ бо тече́ніе вспяща́етъ зѣло́, призыва́ніемъ боже́ственнымъ благода́ти. Тѣ́мже Тя́ почита́емъ, Исто́чниче, во вѣ́ки.

Вси́ честну́ю живото́чную Во́ду воспои́мъ му́дреннѣ: злодыха́нія бо то́къ по страна́мъ уставля́етъ и свобо́дное твори́тъ происхожде́ніе. Оле, Твои́хъ чуде́съ, Чи́стая Богороди́тельнице!

Сла́ва: Ка́я, Всепѣ́тая, восхва́лятъ уста́ Рождества́ Твоего́ стра́нное? Но и у́мъ кíй бы чуде́съ исто́чникъ изслѣ́довалъ и сло́во изглаго́лало? Нѣ́сть естеству́ крѣ́пость Твои́мъ чуди́тися.

И ны́нѣ: Вся́ о Тебѣ́ сме́рти держа́ва разори́ся внеза́пу, о Цари́це и Госпоже́! Ибо Царя́ Безсме́ртнаго, Живо́тъ Ты́ источи́ла еси́, Во́ду, Ма́нну, Христа́ во вѣ́ки.

Пѣ́снь 9.

Ирмо́съ: Свѣти́ся, свѣти́ся, [но́вый Іерусали́ме, сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́].

О, Боже́ственнаго, о любе́знаго, [о сладча́йшаго Твоего́ гла́са! Съ на́ми бо нело́жно обѣща́лся еси́ бы́ти, до сконча́нія вѣ́ка, Христе́. Его́же, вѣ́рніи, утвержде́ніе наде́жди иму́ще, ра́дуемся].

О, Па́сха ве́лія и свяще́ннѣйшая, [Христе́! О, му́дросте, и Сло́ве Бо́жій, и си́ло! Подава́й на́мъ и́стѣе Тебе́ причаща́тися въ невече́рнемъ дни́ Ца́рствія Твоего́].

Богоро́дицы подо́бны:

Во́ды вся́ превосхо́дитъ, Отрокови́це Чи́стая, исто́чника Твоего́ вода́, я́вѣ да́рующая свобожде́нія неду́говъ лю́тыхъ, и душа́мъ вся́кое здра́віе, я́ко па́че естества́ излива́емая.

Рѣши́тель неду́говъ но́вый се́, Силоа́мъ исто́чника Твоего́, Дѣ́во, зри́мъ вси́: о́чи бо пріе́млетъ огня́, вси́ же здра́віе при́сно къ животу́ пріе́млемъ.

Здра́вія и́щущіи, притецы́те ко исто́чнику: Отрокови́ца бо Дѣ́ва жи́тельствуетъ при водѣ́. Лику́й и весели́ся, вѣ́рныхъ мно́жество, си́це, я́коже подоба́етъ: пріи́детъ къ хра́му и воздая́ніе проше́ній пріе́млетъ.

Сла́ва: Возвы́сися исто́чника Твоего́ вода́ вы́ше небе́съ, и земли́ бе́здны то́ки претече́: сія́ е́сть пи́ща души́, питіе́ вѣ́рныхъ, ме́дъ изъ ка́мене, и ма́нны раздая́ніе.

И ны́нѣ: Весели́ши, Дѣ́во, царя́ преесте́ственнѣ, источа́ющи благода́ть отъ исто́чника присносу́щную, сему́ подава́ющи на враги́ крѣ́пость, побѣ́ды при́сно, здра́віе и ми́ръ, и проше́ній исполне́ніе.

Ексапостила́рій пра́зднику:

Пло́тію усну́въ, [я́ко ме́ртвъ, Царю́ и Го́споди, тридне́венъ воскре́слъ еси́, Ада́ма воздви́гъ отъ тли́, и упраздни́въ сме́рть: Па́сха нетлѣ́нія, мíра спасе́ніе.

Сла́ва, и ны́нѣ:] И Исто́чнику, подо́бенъ:

Исто́чникъ еси́ вои́стинну воды́ живы́я, Влады́чице: измыва́еши у́бо неду́ги ду́шъ и тѣле́съ лю́тыя, прикоснове́ніемъ Твои́мъ еди́нымъ то́кмо, Во́ду спасе́нія — Христа́ излива́ющи.

На хвали́техъ: Вся́кое дыха́ніе.., поста́вимъ стихо́въ 8, и пое́мъ стихи́ры осмогла́сника 4, гла́съ 6:

Кре́стъ Тво́й, Го́споди, жи́знь и воскресе́ніе лю́демъ Твои́мъ е́сть; и на́нь надѣ́ющеся, Тебе́, воскре́сшаго Бо́га на́шего пое́мъ, поми́луй на́съ!

Погребе́ніе Твое́, Влады́ко, ра́й отве́рзе человѣ́ческому ро́ду; и отъ тли́ изба́вльшеся, Тебе́, воскре́сшаго Бо́га на́шего пое́мъ, поми́луй на́съ!

Со Отце́мъ и Ду́хомъ Христа́ воспои́мъ, воскре́сшаго изъ ме́ртвыхъ, и къ Нему́ возопіи́мъ: Ты́ еси́ Жи́знь на́ша и Воскресе́ніе, поми́луй на́съ!

Тридне́венъ воскре́слъ еси́, Христе́, изъ гро́ба, я́коже е́сть пи́сано, совоздви́гнувый пра́отца на́шего. Тѣ́мже Тя́ и сла́витъ ро́дъ человѣ́ческій, и пое́тъ Твое́ воскресе́ніе.

И Богоро́дицы стихи́ры, гла́съ 2. Подо́бенъ: До́ме Евфра́ѳовъ.

Вода́ исто́чника спаси́тельная е́сть всѣ́мъ немощству́ющимъ: присту́пимъ вѣ́рою, благода́ть почерпе́мъ.

Кла́дязь живото́чный Исто́чника безсме́ртнаго приступа́ющимъ любо́вію исцѣле́ній подае́тъ излія́ніе неисчерпа́емое.

[Сти́хъ: Освяти́лъ е́сть селе́ніе Свое́ Вы́шній.]

Укрѣпля́етъ ду́ши вода́ Дѣ́выя: и́же въ скве́рнахъ страсте́й, притеце́мъ ко Отрокови́цѣ, и сія́ измы́емъ.

[Сти́хъ: Рѣ́чная устремле́нія веселя́тъ гра́дъ Бо́жій.]

Ру́чка свяще́нная, и Ма́нна незави́стная изъ пречи́стыя утро́бы излива́етъ Влады́ку: потре́бу вся́ческую почерпе́мъ.

И стихи́ры Па́схи, по обы́чаю и́хъ.

[Сти́хъ: Да воскре́снетъ Бо́гъ, и расточа́тся врази́ Его́.

Па́сха свяще́нная на́мъ дне́сь показа́ся; Па́сха но́ва свята́я; Па́сха та́инственная; Па́сха всечестна́я; Па́сха — Христо́съ Изба́витель; Па́сха непоро́чная; Па́сха вели́кая; Па́сха вѣ́рныхъ; Па́сха, две́ри ра́йскія на́мъ отверза́ющая; Па́сха, всѣ́хъ освяща́ющая вѣ́рныхъ.

Сти́хъ: Яко исчеза́етъ ды́мъ, да исче́знутъ.

Пріиди́те отъ видѣ́нія, жены́ благовѣ́стницы, и Сіо́ну рцы́те: пріими́ отъ на́съ ра́дости благовѣ́щенія Воскресе́нія Христо́ва! Красу́йся, лику́й и ра́дуйся, Іерусали́ме, Царя́ Христа́ узрѣ́въ изъ гро́ба, я́ко жениха́ происходя́ща.

Сти́хъ: Та́ко да поги́бнутъ грѣ́шницы отъ лица́ Бо́жія, а пра́ведницы да возвеселя́тся.

Мѵроно́сицы жены́, у́тру глубоку́, предста́вша гро́бу Живода́вца, обрѣто́ша а́нгела на ка́мени сѣдя́ща, и то́й, провѣща́въ и́мъ, си́це глаго́лаше: что́ и́щете Жива́го съ ме́ртвыми? что́ пла́чете Нетлѣ́ннаго во тли́? Ше́дше, проповѣ́дите ученико́мъ Его́.

Сти́хъ: Се́й де́нь, его́же сотвори́ Госпо́дь, возра́дуемся и возвесели́мся въ о́нь.

Па́сха кра́сная, Па́сха, Госпо́дня Па́сха! Па́сха всечестна́я на́мъ возсія́. Па́сха, ра́достію дру́гъ дру́га объи́мемъ. О, Па́сха! Избавле́ніе ско́рби, и́бо изъ гро́ба дне́сь, я́ко отъ черто́га возсія́въ Христо́съ, жены́ ра́дости испо́лни, глаго́ля: проповѣ́дите апо́столомъ.

Сла́ва, и ны́нѣ, гла́съ то́йже:

Воскресе́нія де́нь, и просвѣти́мся торжество́мъ, и дру́гъ дру́га объи́мемъ. Рце́мъ — бра́тіе! — и ненави́дящимъ на́съ, прости́мъ вся́ Воскресе́ніемъ, и та́ко возопіи́мъ: Христо́съ воскре́се изъ ме́ртвыхъ, сме́ртію сме́рть попра́въ, и су́щимъ во гробѣ́хъ живо́тъ дарова́въ.

Христо́съ воскре́се.., три́жды, кромѣ́ конца́ стихи́ры.]
Ектеніи́ и отпу́стъ. И ча́съ пе́рвый. Часы́ Па́схи.



НА ЛИТУРГІИ,

Антифо́ны Па́схи. Проки́менъ дне́, гла́съ 8: Во всю́ зе́млю изы́де вѣща́ніе и́хъ, и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. И Богоро́дицы, [гла́съ 3]: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ.

Апостолъ въ Дѣяніихъ, зачало 7.

Во дни́ о́ны, вку́пѣ Пе́тръ и Іоа́ннъ восхожда́ста во святи́лище на моли́тву въ ча́съ девя́тый. И нѣ́кій му́жъ, хро́мъ отъ чре́ва ма́тере своея́ сы́й, носи́мь быва́ше, его́же полага́ху по вся́ дни́ предъ две́рьми церко́вными, реко́мыми Кра́сными, проси́ти ми́лостыни отъ входя́щихъ въ це́рковь. Иже ви́дѣвъ Петра́ и Іоа́нна хотя́щія вни́ти въ це́рковь, проша́ше ми́лостыни. Воззрѣ́въ же Пе́тръ на́нь со Іоа́нномъ, рече́: воззри́ на ны́. Онъ же прилѣжа́ше и́ма, мня́ нѣ́что отъ нею́ прія́ти. Рече́ же Пе́тръ: сребра́ и зла́та нѣ́сть у мене́; но е́же и́мамъ, сіе́ ти даю́: во и́мя Іису́са Христа́ Назоре́я воста́ни и ходи́. И е́мь его́ за десну́ю ру́ку, воздви́же; а́біе же утверди́стѣся его́ плеснѣ́ и гле́знѣ, и вскочи́въ ста́ и хожда́ше, и вни́де съ ни́ма въ це́рковь, ходя́ и скача́, и хваля́ Бо́га.

И Богоро́дицы, къ Филипписíемъ, зача́ло 240.

Бра́тіе, сіе́ да му́дрствуется въ ва́съ, е́же и во Христѣ́ Іису́сѣ: Иже во о́бразѣ Бо́жіи сы́й, не восхище́ніемъ непщева́ бы́ти ра́венъ Бо́гу; но Себе́ ума́лилъ, зра́къ раба́ пріи́мъ, въ подо́біи человѣ́честѣмъ бы́въ и о́бразомъ обрѣ́теся я́коже человѣ́къ; смири́лъ Себе́, послушли́въ бы́въ да́же до сме́рти, сме́рти же кре́стныя. Тѣ́мже и Бо́гъ Его́ превознесе́ и дарова́ Ему́ и́мя, е́же па́че вся́каго и́мене, да о и́мени Іису́совѣ вся́ко колѣ́но поклони́тся — небе́сныхъ, и земны́хъ и преиспо́днихъ, — и вся́къ язы́къ исповѣ́сть, я́ко Госпо́дь Іису́съ Христо́съ въ сла́ву Бо́га Отца́.

Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ]. Сти́хъ: Бо́гъ прославля́емь въ совѣ́тѣ святы́хъ. [И Богоро́дицы, гла́съ 8:] Слы́ши Дщи́ и ви́ждь, и приклони́ у́хо Твое́.

Ева́нгеліе отъ Іоа́нна, зача́ло 7.

Во вре́мя о́но, сни́де Іису́съ въ Капернау́мъ, Са́мъ и Ма́ти Его́, и бра́тія Его́ и ученицы́ Его́; и ту́ не мно́ги дни́ пребы́ша. И бли́зъ бѣ́ Па́сха Іуде́йска, и взы́де во Іерусали́мъ Іису́съ и обрѣ́те въ це́ркви продаю́щія о́вцы, и волы́ и го́луби, и пѣ́няжники сѣдя́щія. И сотвори́въ би́чь отъ ве́рвій, вся́ изгна́ изъ це́ркве, о́вцы и волы́; и торжнико́мъ разсы́па пѣ́нязи, и дски́ опрове́рже. И продаю́щимъ го́луби рече́: возми́те сія́ отсю́ду, и не твори́те до́му Отца́ Моего́ до́му ку́пленаго. Помяну́ша же ученицы́ Его́, я́ко пи́сано е́сть: жа́лость до́му Твоего́ снѣ́сть Мя́. Отвѣща́ша же іуде́е и рѣ́ша Ему́: ко́е зна́меніе явля́еши на́мъ, я́ко сія́ твори́ши? Отвѣща́ Іису́съ и рече́ и́мъ: разори́те це́рковь сію́, и тре́ми де́нми воздви́гну ю́. Рѣ́ша же іуде́е: четы́редесять и шестію́ лѣ́тъ создана́ бы́сть це́рковъ сія́, и Ты́ ли тре́ми де́нми воздви́гнеши ю́? Онъ же глаго́лаше о це́ркви тѣ́ла Своего́. Егда́ у́бо воста́ отъ ме́ртвыхъ, помяну́ша ученицы́ Его́, я́ко се́ глаго́лаше, и вѣ́роваша Писа́нію и словеси́, е́же рече́ Іису́съ.

И Богороди́цы, отъ Луки́, зача́ло 54.

Во вре́мя о́но, вни́де Іису́съ въ ве́сь нѣ́кую; жена́ же нѣ́кая, и́менемъ Ма́рѳа, прія́тъ Его́ въ до́мъ сво́й; и сестра́ е́й бѣ́, нарица́емая Марíя, я́же и сѣ́дши при ногу́ Іису́сову, слы́шаше сло́во Его́. Ма́рѳа же мо́лвяше о мно́зѣ слу́жбѣ, ста́вши же рече́: Го́споди! не бреже́ши ли, я́ко сестра́ моя́ еди́ну мя́ оста́ви служи́ти? Рцы́ у́бо е́й, да ми́ помо́жетъ. Отвѣща́въ же Іису́съ, рече́ е́й: Ма́рѳо! Ма́рѳо! пече́шися и мо́лвиши о мно́зѣ; еди́но же е́сть на потре́бу. Марíя же благу́ю ча́сть избра́, я́же не отъи́мется отъ нея́. Бы́сть же, егда́ глаго́лаше сія́, воздви́гши нѣ́кая жена́ гла́съ отъ наро́да, рече́ Ему́: блаже́но чре́во носи́вшее Тя́, и сосца́, я́же еси́ сса́лъ! Онъ же рече́: тѣ́мже у́бо блаже́ни слы́шащіи сло́во Бо́жіе и храня́ще е́.

Прича́стный: Тѣ́ло Христо́во пріими́те, [исто́чника безсме́ртнаго вкуси́те]. И Богоро́дицѣ: [Ча́шу спасе́нія пріиму́, и и́мя Госпо́дне призову́.

Источникъ: Послѣдованіе во святую и Великую недѣлю Пасхи и во всю Свѣтлую седмицу. — М.: Сѵнодальная Тѵпографія, 1899. — Л. 66 об. – 81.

/ Къ оглавленію раздѣла /


Наверхъ / Къ титульной страницѣ

0