Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДЬ ЦВѢТНАЯ.

Слу́жба въ понедѣ́льникъ Свѣ́тлыя седми́цы.

ВО СВЯТУЮ И ВЕЛИКУЮ НЕДѢЛЮ ПАСХИ ВЕЧЕРА.

Благослове́нъ Бо́гъ на́шъ, всегда́, ны́нѣ и при́сно, и во вѣ́ки вѣко́въ.
И на́мъ отвѣща́ющимъ: Ами́нь.

И то́й начина́етъ: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.] И мы́ то́йжде отвѣща́емъ, три́жды.

И глаго́летъ настоя́тель преждерече́нныя стихи́:

1-й: Да воскре́снетъ Бо́гъ [и расточа́тся врази́ Его́, и да бѣжа́тъ отъ лица́ Его́ ненави́дящіи Его́].

2-й: Яко исчеза́етъ ды́мъ, [да исче́знутъ, я́ко та́етъ во́скъ отъ лица́ огня́].

3-й: Та́ко да поги́бнутъ грѣ́шницы [отъ лица́ Бо́жія, а пра́ведницы да возвеселя́тся].

4-й: Се́й де́нь, его́же сотвори́ Госпо́дь, [возра́дуемся и возвесели́мся въ о́нь].

Мы́ же на кíйждо сти́хъ пое́мъ: Христо́съ воскре́се [изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ], по еди́ножды.

Сла́ва. Мы же: Христо́съ воскре́се [изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.]

И ны́нѣ. Мы же: Христо́съ воскре́се [изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.]

И па́ки настоя́тель: Христо́съ воскре́се изъ ме́ртвыхъ, сме́ртію сме́рть попра́въ.

И мы́ коне́цъ: И су́щимъ во гробѣ́хъ живо́тъ дарова́въ.]

Та́же ектенія́ вели́кая отъ діа́кона: Ми́ромъ Го́споду помо́лимся...

Посе́мъ, Го́споди воззвахъ.., пое́мъ во гла́съ 2.
Поста́вимъ стихо́въ 6 и пое́мъ стихи́ры воскре́сны 3, гла́съ 2:

Пре́жде вѣ́къ отъ Отца́ ро́ждшемуся Бо́жію Сло́ву, вопло́щшемуся отъ Дѣ́вы Марíи, пріиди́те, поклони́мся: крестъ бо претерпѣ́въ, погребе́нію предаде́ся, я́ко Са́мъ восхотѣ́, и воскре́съ изъ ме́ртвыхъ, спасе́ мя заблужда́ющаго человѣ́ка.

Христо́съ, Спа́съ на́шъ, е́же на ны́ рукописа́ніе, пригвозди́въ на крестѣ́, загла́ди, и сме́рную держа́ву упраздни́. Покланя́емся Его́ тридне́вному Воскресе́нію.

Со арха́нгелы воспои́мъ Христо́во Воскресе́ніе: То́й бо е́сть Изба́витель и Спа́съ ду́шъ на́шихъ, и въ сла́вѣ стра́шной и крѣ́пцѣй си́лѣ, па́ки гряде́тъ суди́ти мíру, его́же созда́.

И восто́чны три́:

Тебе́, Распе́ншагося и Погребе́ннаго, а́нгелъ проповѣ́да Влады́ку, и глаго́лаше жена́мъ: пріиди́те, ви́дите, идѣ́же лежа́ше Госпо́дь; воскре́се бо, я́коже рече́, я́ко Всеси́ленъ. Тѣ́мже Тебѣ́ покланя́емся, Еди́ному Безсме́ртному: Жизнода́вче Христе́, поми́луй на́съ.

Кресто́мъ Твои́мъ упраздни́лъ еси́, ю́же отъ дре́ва кля́тву, погребе́ніемъ Твои́мъ умертви́лъ еси́ сме́рти держа́ву, воста́ніемъ же Твои́мъ просвѣти́лъ еси́ ро́дъ человѣ́ческій. Сего́ ра́ди вопіе́мъ Ти́: Благодѣ́телю Христе́ Бо́же на́шъ, сла́ва Тебѣ́.

Отверзо́шася Тебѣ́, Го́споди, стра́хомъ врата́ сме́ртная, вра́тницы же а́довы, ви́дѣвше Тя́, убоя́шася; врата́ бо мѣ́дная сокруши́лъ еси́, и вереи́ желѣ́зныя сте́рлъ еси́, и изве́лъ еси́ на́съ отъ тмы́ и се́ни сме́ртныя, и у́зы на́ша растерза́лъ еси́.

Сла́ва:

Спаси́тельную пѣ́снь пою́ще, отъ у́стъ возсле́мъ: пріиди́те вси́, въ дому́ Госпо́днемъ припаде́мъ, глаго́люще: на дре́вѣ Распны́йся, и изъ ме́ртвыхъ Воскресы́й, и Сы́й въ нѣ́дрѣхъ Отчихъ, очи́сти грѣхи́ на́ша.

И ны́нѣ, богоро́диченъ:

Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ со Ева́нгеліемъ. Свѣ́те ти́хій...

Та́же, проки́менъ вели́кій, гла́съ 7: Кто́ Бо́гъ ве́лій, я́ко Бо́гъ на́шъ? Ты́ еси́ Бо́гъ творя́й чудеса́. Сти́хъ 1: Сказа́лъ еси́ въ лю́дехъ си́лу Твою́. Сти́хъ 2: И рѣ́хъ: ны́нѣ нача́хъ, сія́ измѣ́на десни́цы Вы́шняго. Сти́хъ 3: Помяну́хъ дѣла́ Госпо́дня, я́ко помяну́ отъ нача́ла чудеса́ Твоя́. И па́ки: Кто́ Бо́гъ ве́лій, [я́ко Бо́гъ на́шъ? И мы́: Ты́ еси́ Бо́гъ творя́й чудеса́].

По проки́мнѣ же возглаша́етъ діа́конъ:
И о сподо́битися на́мъ слы́шанію свята́го Ева́нгелія, Го́спода Бо́га мо́лимъ.
Посе́мъ чте́тъ Ева́нгеліе настоя́тель во олтари́, Іоа́нна. [Зача́ло 65.]

Су́щу по́здѣ въ де́нь то́й во еди́ну отъ суббо́тъ, и две́ремъ затворе́ннымъ, идѣ́же бя́ху ученицы́ Его́ со́брани, стра́ха ра́ди іуде́йска, пріи́де Іису́съ и ста́ посредѣ́ и глаго́ла и́мъ: ми́ръ ва́мъ! И сіе́ ре́къ, показа́ имъ ру́цѣ и но́зѣ и ре́бра Своя́. Возра́довашася же ученицы́, ви́дѣвше Го́спода. Рече́ же и́мъ Іису́съ па́ки: ми́ръ ва́мъ! Якоже посла́ Мя́ Оте́цъ, и Азъ посыла́ю вы́. И сіе́ ре́къ, ду́ну и глаго́ла и́мъ: пріими́те Ду́хъ Свя́тъ. Имже отпустите́ грѣхи́, отпу́стятся и́мъ; и и́мже держите́, держа́тся. Ѳома́ же, еди́нъ отъ обоюна́десяте, глаго́лемый Близне́цъ, не бѣ́ ту́ съ ни́ми, егда́ пріи́де Іису́съ. Глаго́лаху же ему́ друзíи ученицы́: ви́дѣхомъ Го́спода. Онъ же рече́ и́мъ: а́ще не ви́жу на руку́ Его́ я́звы гвозди́нныя, и вложу́ пе́рста моего́ въ я́звы гвозди́нныя, и вложу́ ру́ку мою́ въ ре́бра Его́, не иму́ вѣ́ры.

Посе́мъ ектенія́: Рце́мъ вси́... и Сподо́би, Го́споди, въ ве́черъ се́й... Та́же: Испо́лнимъ вече́рнюю моли́тву...

И по возгла́сѣ пое́мъ стихи́ру воскре́сну, гла́съ 2:

Воскресе́ніе Твое́, Христе́ Спа́се, всю́ просвѣти́ вселе́нную, и призва́лъ еси́ Твое́ созда́ніе, Всеси́льне Го́споди, сла́ва Тебѣ́.

Та́же стихи́ры Па́схи, гла́съ 5:

[Сти́хъ: Да воскре́снетъ Бо́гъ, и расточа́тся врази́ Его́.]

Па́сха свяще́нная [на́мъ дне́сь показа́ся; Па́сха но́ва свята́я; Па́сха та́инственная; Па́сха всечестна́я; Па́сха — Христо́съ Изба́витель; Па́сха непоро́чная; Па́сха вели́кая; Па́сха вѣ́рныхъ; Па́сха, две́ри ра́йскія на́мъ отверза́ющая; Па́сха, всѣ́хъ освяща́ющая вѣ́рныхъ.

Сти́хъ: Яко исчеза́етъ ды́мъ, да исче́знутъ.

Пріиди́те отъ видѣ́нія, жены́ благовѣ́стницы, и Сіо́ну рцы́те: пріими́ отъ на́съ ра́дости благовѣ́щенія Воскресе́нія Христо́ва! Красу́йся, лику́й и ра́дуйся, Іерусали́ме, Царя́ Христа́ узрѣ́въ изъ гро́ба, я́ко жениха́ происходя́ща.

Сти́хъ: Та́ко да поги́бнутъ грѣ́шницы отъ лица́ Бо́жія, а пра́ведницы да возвеселя́тся.

Мѵроно́сицы жены́, у́тру глубоку́, предста́вша гро́бу Живода́вца, обрѣто́ша а́нгела на ка́мени сѣдя́ща, и то́й, провѣща́въ и́мъ, си́це глаго́лаше: что́ и́щете Жива́го съ ме́ртвыми? что́ пла́чете Нетлѣ́ннаго во тли́? Ше́дше, проповѣ́дите ученико́мъ Его́.

Сти́хъ: Се́й де́нь, его́же сотвори́ Госпо́дь, возра́дуемся и возвесели́мся въ о́нь.

Па́сха кра́сная, Па́сха, Госпо́дня Па́сха! Па́сха всечестна́я на́мъ возсія́. Па́сха, ра́достію дру́гъ дру́га объи́мемъ. О, Па́сха! Избавле́ніе ско́рби, и́бо изъ гро́ба дне́сь, я́ко отъ черто́га возсія́въ Христо́съ, жены́ ра́дости испо́лни, глаго́ля: проповѣ́дите апо́столомъ.]

Сла́ва, и ны́нѣ, гла́съ 5:

Воскресе́нія де́нь, [и просвѣти́мся торжество́мъ, и дру́гъ дру́га объи́мемъ. Рце́мъ — бра́тіе! — и ненави́дящимъ на́съ, прости́мъ вся́ Воскресе́ніемъ, и та́ко возопіи́мъ: Христо́съ воскре́се изъ ме́ртвыхъ, сме́ртію сме́рть попра́въ, и су́щимъ во гробѣ́хъ живо́тъ дарова́въ].

Христо́съ воскре́се.., три́жды, кромѣ́ конца́ стихи́ры.

Та́же, діа́конъ: Прему́дрость. Мы́ же: Благослови́. Настоя́тель: Сы́й благослове́нъ Христо́съ, Бо́гъ на́шъ, [всегда́, ны́нѣ и при́сно, и во вѣ́ки вѣко́въ]. И мы́: [Ами́нь.] Утверди́ Бо́же... Та́же, настоя́тель [вмѣ́сто: Сла́ва Тебѣ́, Христе́ Бо́же...]: Христо́съ воскре́се изъ ме́ртвыхъ, сме́ртію сме́рть попра́въ. И мы́: И су́щимъ во гробѣ́хъ живо́тъ дарова́въ.

И а́біе глаго́летъ отпу́стъ со кресто́мъ:

Христо́съ, воскресы́й изъ ме́ртвыхъ, [сме́ртію сме́рть попра́вый и су́щимъ во гробѣ́хъ живо́тъ дарова́вый, и́стинный Бо́гъ на́шъ, моли́твами Пречи́стыя Своея́ Ма́тере и всѣ́хъ святы́хъ, поми́луетъ и спасе́тъ на́съ, я́ко Бла́гъ и Человѣколю́бецъ.

Та́же, кре́стъ возвыша́я, глаго́летъ: Христо́съ воскре́се! [Три́жды.] Мы́ же отвѣща́емъ: Вои́стинну воскре́се! [Три́жды.] Та́же пое́мъ коне́чное: Христо́съ воскре́се.., три́жды, ве́сь тропа́рь.

И по не́мъ пѣ́ніемъ ко́нчимъ: И на́мъ дарова́ живо́тъ вѣ́чный, покланя́емся Его́ тридне́вному Воскресе́нію]. И цѣлу́емъ святы́я ико́ны.

И вхо́димъ въ трапе́зу, и глаго́лемъ:

Христо́съ воскре́се.., три́жды. Сла́ва, и ны́нѣ. Настоя́тель: Христе́ Бо́же благослови́... По воста́ніи же отъ трапе́зы, глаго́лемъ: Христо́съ воскре́се.., три́жды. Сла́ва, и ны́нѣ. Настоя́тель: Съ на́ми Бо́гъ Свое́ю благода́тію... И та́ко твори́мъ во всю́ седми́цу Свѣ́тлую вече́рни послѣ́дованіе.


ВЪ ПОНЕДѢЛЬНИКЪ СВѢТЛЫЯ СЕДМИЦЫ, НА УТРЕНИ.

Пре́жде нача́ла, вжига́етъ канди́ла и свѣщи́ параекклисіа́рхъ. Та́же кле́плетъ въ вели́кій кампа́нъ, и въ про́чія.

И собра́вшимся на́мъ во хра́мъ, іере́й полага́етъ обы́чный покло́нъ настоя́телю, и отхо́дитъ во святы́й олта́рь и, взе́мъ кади́льницу, стои́тъ предъ свято́ю трапе́зою, кромѣ́ у́бо свяще́нническія оде́жды, епитрахи́лій то́чію возло́жь све́рхъ ма́нтіи, кади́тъ крестообра́зно, глаго́ля:

Сла́ва Святѣ́й, и Единосу́щнѣй, [и Животворя́щей, и Нераздѣ́льнѣй Тро́ицѣ, всегда́, ны́нѣ и при́сно и во вѣ́ки вѣко́въ].

И начина́етъ тропа́рь: Христо́съ воскре́се.., три́жды. И на́мъ то́жде отвѣща́ющимъ.

И пое́мъ: Христо́съ воскре́се.., со стихи́ его́, я́коже изъяви́ся въ недѣ́лю у́тра и ве́чера:

[Іере́й, пе́рвый сти́хъ: Да воскре́снетъ Бо́гъ и расточа́тся врази́ Его́, и да бѣжа́тъ отъ лица́ Его́ ненави́дящіи Его́.

Мы́ же: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.

Вторы́й сти́хъ: Яко исчеза́етъ ды́мъ, да исче́знутъ, я́ко та́етъ во́скъ отъ лица́ огня́.

Мы́ же: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.

Тре́тій сти́хъ: Та́ко да поги́бнутъ грѣ́шницы отъ лица́ Бо́жія, а пра́ведницы да возвеселя́тся.

Мы́ же: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.

Четве́ртый сти́хъ: Се́й де́нь, его́же сотвори́ Госпо́дь, возра́дуемся и возвесели́мся въ о́нь.

Мы́ же: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.

Іере́й: Сла́ва Отцу и Сыну и Святому Духу.

Мы же: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.

Іере́й: И ны́нѣ, и при́сно, и во вѣ́ки вѣко́въ, ами́нь.

Мы же: Христо́съ воскре́се [изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ.]

И па́ки іере́й: Христо́съ воскре́се изъ ме́ртвыхъ, сме́ртію сме́рть попра́въ.

И мы́ коне́цъ: И су́щимъ во гробѣ́хъ живо́тъ дарова́въ.]

Въ мірски́хъ же хра́мѣхъ облачи́тся іере́й въ ри́зы.

Та́же ектенія́ вели́кая.


И по возгла́сѣ, а́біе пое́мъ кано́нъ, ирмо́съ: Воскресе́нія де́нь.., по два́жды, тропари́ же на 10, съ припѣ́вы: Христо́съ воскре́се... Въ Сла́ва же, И ны́нѣ, глаго́лемъ богоро́дичны господи́на Ѳеофа́на и господи́на Іо́сифа. Катава́сія, о́ба ли́ка вку́пѣ: Воскресе́нія де́нь... И послѣди́: Христо́съ воскре́се.., три́жды. И глаго́лемъ сіе́ во всю́ седми́цу вку́пѣ съ ирмосы́ на 14.

[Пѣ́снь 1.

Ирмо́съ: Воскресе́нія де́нь, просвѣти́мся, лю́діе. Па́сха, Госпо́дня Па́сха: отъ сме́рти бо къ жи́зни, и отъ земли́ къ небеси́, Христо́съ Бо́гъ на́съ преведе́, побѣ́дную пою́щія. [Два́жды.]

Припѣ́въ: Христо́съ воскре́се изъ ме́ртвыхъ.

Очи́стимъ чу́вствія, и у́зримъ непристу́пнымъ свѣ́томъ воскресе́нія, Христа́ блиста́ющася, и — ра́дуйтеся — реку́ща, я́сно да услы́шимъ, побѣ́дную пою́ще.

Припѣ́въ: Христо́съ воскре́се изъ ме́ртвыхъ.

Очи́стимъ чу́вствія, и у́зримъ непристу́пнымъ свѣ́томъ воскресе́нія, Христа́ блиста́ющася, и — ра́дуйтеся — реку́ща, я́сно да услы́шимъ, побѣ́дную пою́ще.

Припѣ́въ: Христо́съ воскре́се изъ ме́ртвыхъ.

Очи́стимъ чу́вствія, и у́зримъ непристу́пнымъ свѣ́томъ воскресе́нія, Христа́ блиста́ющася, и — ра́дуйтеся — реку́ща, я́сно да услы́шимъ, побѣ́дную пою́ще.

Припѣ́въ: Христо́съ воскре́се изъ ме́ртвыхъ.

Очи́стимъ чу́вствія, и у́зримъ непристу́пнымъ свѣ́томъ воскресе́нія, Христа́ блиста́ющася, и — ра́дуйтеся — реку́ща, я́сно да услы́шимъ, побѣ́дную пою́ще.

Припѣ́въ: Христо́съ воскре́се изъ ме́ртвыхъ.

Очи́стимъ чу́вствія, и у́зримъ непристу́пнымъ свѣ́томъ воскресе́нія, Христа́ блиста́ющася, и — ра́дуйтеся — реку́ща, я́сно да услы́шимъ, побѣ́дную пою́ще.

Припѣ́въ: Христо́съ воскре́се изъ ме́ртвыхъ.

Небеса́ у́бо досто́йно да веселя́тся, земля́ же да ра́дуется, да пра́зднуетъ же мíръ, ви́димый же ве́сь и неви́димый: Христо́съ бо воста́, весе́ліе вѣ́чное.

Припѣ́въ: Христо́съ воскре́се изъ ме́ртвыхъ.

Небеса́ у́бо досто́йно да веселя́тся, земля́ же да ра́дуется, да пра́зднуетъ же мíръ, ви́димый же ве́сь и неви́димый: Христо́съ бо воста́, весе́ліе вѣ́чное.

Припѣ́въ: Христо́съ воскре́се изъ ме́ртвыхъ.

Небеса́ у́бо досто́йно да веселя́тся, земля́ же да ра́дуется, да пра́зднуетъ же мíръ, ви́димый же ве́сь и неви́димый: Христо́съ бо воста́, весе́ліе вѣ́чное.

Припѣ́въ: Христо́съ воскре́се изъ ме́ртвыхъ.

Небеса́ у́бо досто́йно да веселя́тся, земля́ же да ра́дуется, да пра́зднуетъ же мíръ, ви́димый же ве́сь и неви́димый: Христо́съ бо воста́, весе́ліе вѣ́чное.

Припѣ́въ: Христо́съ воскре́се изъ ме́ртвыхъ.

Небеса́ у́бо досто́йно да веселя́тся, земля́ же да ра́дуется, да пра́зднуетъ же мíръ, ви́димый же ве́сь и неви́димый: Христо́съ бо воста́, весе́ліе вѣ́чное.

Сла́ва, богоро́диченъ: Умерщвле́нія предѣ́лъ сломи́ла еси́, вѣ́чную Жи́знь ро́ждшая — Христа́, изъ гро́ба возсія́вшаго дне́сь, Дѣ́во Всенепоро́чная, и мíръ просвѣти́вшаго.

И ны́нѣ, богоро́диченъ: Воскре́сшаго ви́дѣвши Сы́на Твоего́ и Бо́га, ра́дуйся со апо́столы, Богоблагода́тная Чи́стая, и е́же ра́дуйся пе́рвѣе, я́ко всѣ́хъ ра́дости вина́, воспрія́ла еси́, Богома́ти Всенепоро́чная.

Катава́сія: Воскресе́нія де́нь, просвѣти́мся, лю́діе. Па́сха, Госпо́дня Па́сха: отъ сме́рти бо къ жи́зни, и отъ земли́ къ небеси́, Христо́съ Бо́гъ на́съ преведе́, побѣ́дную пою́щія.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

Пѣ́снь 3.

Ирмо́съ: Пріиди́те, пи́во піе́мъ но́вое, не отъ ка́мене непло́дна чудодѣ́емое, но нетлѣ́нія исто́чникъ, изъ гро́ба одожди́вша Христа́, въ Не́мже утвержда́емся. [Два́жды.]

Припѣ́въ: Христо́съ воскре́се изъ ме́ртвыхъ.

Ны́нѣ вся́ испо́лнишася свѣ́та, не́бо же и земля́, и преиспо́дняя: да пра́зднуетъ у́бо вся́ тва́рь воста́ніе Христо́во, въ не́мже утвержда́ется.

Припѣ́въ: Христо́съ воскре́се изъ ме́ртвыхъ.

Ны́нѣ вся́ испо́лнишася свѣ́та, не́бо же и земля́, и преиспо́дняя: да пра́зднуетъ у́бо вся́ тва́рь воста́ніе Христо́во, въ не́мже утвержда́ется.

Припѣ́въ: Христо́съ воскре́се изъ ме́ртвыхъ.

Ны́нѣ вся́ испо́лнишася свѣ́та, не́бо же и земля́, и преиспо́дняя: да пра́зднуетъ у́бо вся́ тва́рь воста́ніе Христо́во, въ не́мже утвержда́ется.

Припѣ́въ: Христо́съ воскре́се изъ ме́ртвыхъ.

Ны́нѣ вся́ испо́лнишася свѣ́та, не́бо же и земля́, и преиспо́дняя: да пра́зднуетъ у́бо вся́ тва́рь воста́ніе Христо́во, въ не́мже утвержда́ется.

Припѣ́въ: Христо́съ воскре́се изъ ме́ртвыхъ.

Ны́нѣ вся́ испо́лнишася свѣ́та, не́бо же и земля́, и преиспо́дняя: да пра́зднуетъ у́бо вся́ тва́рь воста́ніе Христо́во, въ не́мже утвержда́ется.

Припѣ́въ: Христо́съ воскре́се изъ ме́ртвыхъ.

Вчера́ спогребо́хся Тебѣ́, Христе́, совостаю́ дне́сь воскре́сшу Тебѣ́, сраспина́хся Тебѣ́ вчера́, Са́мъ мя́ спросла́ви, Спа́се, во Ца́рствіи Твое́мъ.

Припѣ́въ: Христо́съ воскре́се изъ ме́ртвыхъ.

Вчера́ спогребо́хся Тебѣ́, Христе́, совостаю́ дне́сь воскре́сшу Тебѣ́, сраспина́хся Тебѣ́ вчера́, Са́мъ мя́ спросла́ви, Спа́се, во Ца́рствіи Твое́мъ.

Припѣ́въ: Христо́съ воскре́се изъ ме́ртвыхъ.

Вчера́ спогребо́хся Тебѣ́, Христе́, совостаю́ дне́сь воскре́сшу Тебѣ́, сраспина́хся Тебѣ́ вчера́, Са́мъ мя́ спросла́ви, Спа́се, во Ца́рствіи Твое́мъ.

Припѣ́въ: Христо́съ воскре́се изъ ме́ртвыхъ.

Вчера́ спогребо́хся Тебѣ́, Христе́, совостаю́ дне́сь воскре́сшу Тебѣ́, сраспина́хся Тебѣ́ вчера́, Са́мъ мя́ спросла́ви, Спа́се, во Ца́рствіи Твое́мъ.

Припѣ́въ: Христо́съ воскре́се изъ ме́ртвыхъ.

Вчера́ спогребо́хся Тебѣ́, Христе́, совостаю́ дне́сь воскре́сшу Тебѣ́, сраспина́хся Тебѣ́ вчера́, Са́мъ мя́ спросла́ви, Спа́се, во Ца́рствіи Твое́мъ.

Сла́ва, богоро́диченъ: На нетлѣ́нную жи́знь прихожду́ дне́сь бла́гостію Ро́ждшагося изъ Тебе́, Чи́стая, и всѣ́мъ конце́мъ свѣ́тъ Облиста́вшаго.

И ны́нѣ, богоро́диченъ: Бо́га, Его́же родила́ еси́ пло́тію, изъ ме́ртвыхъ, я́коже рече́, воста́вша, ви́дѣвши, Чи́стая, лику́й, и Сего́, я́ко Бо́га, Пречи́стая, возвелича́й.

Катава́сія: Пріиди́те, пи́во піе́мъ но́вое, не отъ ка́мене непло́дна чудодѣ́емое, но нетлѣ́нія исто́чникъ, изъ гро́ба одожди́вша Христа́, въ Не́мже утвержда́емся.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

Та́же ектенія́, и возгла́съ: Яко Ты́ еси́ Бо́гъ на́шъ, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ.]

Ипакои́, гла́съ 4:

Предвари́вшія у́тро [я́же о Марíи, и обрѣ́тшія ка́мень отвале́нъ отъ гро́ба, слы́шаху отъ а́нгела: во свѣ́тѣ присносу́щнѣмъ Су́щаго, съ ме́ртвыми что и́щете, я́ко человѣ́ка? Ви́дите гро́бныя пелены́, тецы́те и мíру проповѣ́дите, я́ко воста́ Госпо́дь, умертви́вый сме́рть, я́ко е́сть Сы́нъ Бо́га, спаса́ющаго ро́дъ человѣ́ческій].

И чте́ніе на 1-ю́ кни́гу: Въ нача́лѣ бѣ́ Сло́во... отъ Іоанна, толкова́ніе Златоу́стаго. [Отъ сего́ бо дне́ начина́емъ сію́ кни́гу и да́же до всѣ́хъ святы́хъ соверша́емъ.]

[Пѣ́снь 4.

Ирмо́съ: На Боже́ственнѣй стра́жи богоглаго́ливый Авваку́мъ да ста́нетъ съ на́ми, и пока́жетъ свѣтоно́сна а́нгела, я́сно глаго́люща: дне́сь спасе́ніе мíру, я́ко воскре́се Христо́съ, я́ко всеси́ленъ. [Два́жды.]

Припѣ́въ: Христо́съ воскре́се изъ ме́ртвыхъ.

Му́жескій у́бо по́лъ, я́ко разве́рзый дѣ́вственную утро́бу, яви́ся Христо́съ, я́ко человѣ́къ же, Агнецъ нарече́ся. Непоро́ченъ же, я́ко невку́сенъ скве́рны, на́ша Па́сха, и я́ко Бо́гъ и́стиненъ соверше́нъ рече́ся.

Припѣ́въ: Христо́съ воскре́се изъ ме́ртвыхъ.

Му́жескій у́бо по́лъ, я́ко разве́рзый дѣ́вственную утро́бу, яви́ся Христо́съ, я́ко человѣ́къ же, Агнецъ нарече́ся. Непоро́ченъ же, я́ко невку́сенъ скве́рны, на́ша Па́сха, и я́ко Бо́гъ и́стиненъ соверше́нъ рече́ся.

Припѣ́въ: Христо́съ воскре́се изъ ме́ртвыхъ.

Му́жескій у́бо по́лъ, я́ко разве́рзый дѣ́вственную утро́бу, яви́ся Христо́съ, я́ко человѣ́къ же, Агнецъ нарече́ся. Непоро́ченъ же, я́ко невку́сенъ скве́рны, на́ша Па́сха, и я́ко Бо́гъ и́стиненъ соверше́нъ рече́ся.

Припѣ́въ: Христо́съ воскре́се изъ ме́ртвыхъ.

Му́жескій у́бо по́лъ, я́ко разве́рзый дѣ́вственную утро́бу, яви́ся Христо́съ, я́ко человѣ́къ же, Агнецъ нарече́ся. Непоро́ченъ же, я́ко невку́сенъ скве́рны, на́ша Па́сха, и я́ко Бо́гъ и́стиненъ соверше́нъ рече́ся.

Припѣ́въ: Христо́съ воскре́се изъ ме́ртвыхъ.

Яко единолѣ́тный а́гнецъ, благослове́нный на́мъ вѣне́цъ — Христо́съ, во́лею за всѣ́хъ закла́нъ бы́сть, Пасха́ чисти́тельная, и па́ки изъ гро́ба кра́сное пра́вды на́мъ возсія́ Со́лнце.

Припѣ́въ: Христо́съ воскре́се изъ ме́ртвыхъ.

Яко единолѣ́тный а́гнецъ, благослове́нный на́мъ вѣне́цъ — Христо́съ, во́лею за всѣ́хъ закла́нъ бы́сть, Пасха́ чисти́тельная, и па́ки изъ гро́ба кра́сное пра́вды на́мъ возсія́ Со́лнце.

Припѣ́въ: Христо́съ воскре́се изъ ме́ртвыхъ.

Яко единолѣ́тный а́гнецъ, благослове́нный на́мъ вѣне́цъ — Христо́съ, во́лею за всѣ́хъ закла́нъ бы́сть, Пасха́ чисти́тельная, и па́ки изъ гро́ба кра́сное пра́вды на́мъ возсія́ Со́лнце.

Припѣ́въ: Христо́съ воскре́се изъ ме́ртвыхъ.

Богооте́цъ у́бо Дави́дъ предъ сѣ́ннымъ ковче́гомъ скака́ше игра́я, лю́діе же Бо́жіи святíи, образо́въ сбытіе́ зря́ще, весели́мся боже́ственнѣ, я́ко воскре́се Христо́съ, я́ко всеси́ленъ.

Припѣ́въ: Христо́съ воскре́се изъ ме́ртвыхъ.

Богооте́цъ у́бо Дави́дъ предъ сѣ́ннымъ ковче́гомъ скака́ше игра́я, лю́діе же Бо́жіи святíи, образо́въ сбытіе́ зря́ще, весели́мся боже́ственнѣ, я́ко воскре́се Христо́съ, я́ко всеси́ленъ.

Припѣ́въ: Христо́съ воскре́се изъ ме́ртвыхъ.

Богооте́цъ у́бо Дави́дъ предъ сѣ́ннымъ ковче́гомъ скака́ше игра́я, лю́діе же Бо́жіи святíи, образо́въ сбытіе́ зря́ще, весели́мся боже́ственнѣ, я́ко воскре́се Христо́съ, я́ко всеси́ленъ.

Сла́ва, богоро́диченъ: Созда́вый Ада́ма, Твоего́ пра́отца, Чи́стая, зи́ждется отъ Тебе́, и сме́ртное жили́ще разори́ Свое́ю сме́ртію дне́сь, и озари́ вся́ Боже́ственными блиста́ньми Воскресе́нія.

И ны́нѣ, богоро́диченъ: Его́же родила́ еси́, Христа́, прекра́сно изъ ме́ртвыхъ возсія́вша, Чи́стая, зря́щи, До́брая и Непоро́чная въ жена́хъ и Кра́сная, дне́сь во спасе́ніе всѣ́хъ, со апо́столы ра́дующися, Того́ прославля́й.

Катава́сія: На Боже́ственнѣй стра́жи богоглаго́ливый Авваку́мъ да ста́нетъ съ на́ми, и пока́жетъ свѣтоно́сна а́нгела, я́сно глаго́люща: дне́сь спасе́ніе мíру, я́ко воскре́се Христо́съ, я́ко всеси́ленъ.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

Пѣ́снь 5.

Ирмо́съ: Утренюемъ у́треннюю глубоку́, и вмѣ́сто мíра пѣ́снь принесе́мъ Влады́цѣ, и Христа́ у́зримъ, пра́вды Со́лнце, всѣ́мъ жи́знь возсія́юща. [Два́жды.]

Припѣ́въ: Христо́съ воскре́се изъ ме́ртвыхъ.

Безмѣ́рное Твое́ благоутро́біе, а́довыми у́зами содержи́міи зря́ще, къ свѣ́ту идя́ху, Христе́, весе́лыми нога́ми, Па́сху хва́ляще вѣ́чную.

Припѣ́въ: Христо́съ воскре́се изъ ме́ртвыхъ.

Безмѣ́рное Твое́ благоутро́біе, а́довыми у́зами содержи́міи зря́ще, къ свѣ́ту идя́ху, Христе́, весе́лыми нога́ми, Па́сху хва́ляще вѣ́чную.

Припѣ́въ: Христо́съ воскре́се изъ ме́ртвыхъ.

Безмѣ́рное Твое́ благоутро́біе, а́довыми у́зами содержи́міи зря́ще, къ свѣ́ту идя́ху, Христе́, весе́лыми нога́ми, Па́сху хва́ляще вѣ́чную.

Припѣ́въ: Христо́съ воскре́се изъ ме́ртвыхъ.

Безмѣ́рное Твое́ благоутро́біе, а́довыми у́зами содержи́міи зря́ще, къ свѣ́ту идя́ху, Христе́, весе́лыми нога́ми, Па́сху хва́ляще вѣ́чную.

Припѣ́въ: Христо́съ воскре́се изъ ме́ртвыхъ.

Безмѣ́рное Твое́ благоутро́біе, а́довыми у́зами содержи́міи зря́ще, къ свѣ́ту идя́ху, Христе́, весе́лыми нога́ми, Па́сху хва́ляще вѣ́чную.

Припѣ́въ: Христо́съ воскре́се изъ ме́ртвыхъ.

Присту́пимъ, свѣщено́сніи, исходя́щу Христу́ изъ гро́ба, я́ко Жениху́, и спра́зднуемъ любопра́зднственными чи́нми, Па́сху Бо́жію спаси́тельную.

Припѣ́въ: Христо́съ воскре́се изъ ме́ртвыхъ.

Присту́пимъ, свѣщено́сніи, исходя́щу Христу́ изъ гро́ба, я́ко Жениху́, и спра́зднуемъ любопра́зднственными чи́нми, Па́сху Бо́жію спаси́тельную.

Припѣ́въ: Христо́съ воскре́се изъ ме́ртвыхъ.

Присту́пимъ, свѣщено́сніи, исходя́щу Христу́ изъ гро́ба, я́ко Жениху́, и спра́зднуемъ любопра́зднственными чи́нми, Па́сху Бо́жію спаси́тельную.

Припѣ́въ: Христо́съ воскре́се изъ ме́ртвыхъ.

Присту́пимъ, свѣщено́сніи, исходя́щу Христу́ изъ гро́ба, я́ко Жениху́, и спра́зднуемъ любопра́зднственными чи́нми, Па́сху Бо́жію спаси́тельную.

Припѣ́въ: Христо́съ воскре́се изъ ме́ртвыхъ.

Присту́пимъ, свѣщено́сніи, исходя́щу Христу́ изъ гро́ба, я́ко Жениху́, и спра́зднуемъ любопра́зднственными чи́нми, Па́сху Бо́жію спаси́тельную.

Сла́ва, богоро́диченъ: Просвѣща́ется Боже́ственными луча́ми и живоно́сными Воскресе́нія Сы́на Твоего́, Богома́ти Пречи́стая, и ра́дости исполня́ется благочести́выхъ собра́ніе.

И ны́нѣ, богоро́диченъ: Не разве́рзлъ еси́ врата́ дѣ́вства въ воплоще́ніи, гро́ба не разруши́лъ еси́ печа́тей, Царю́ созда́нія, отону́дуже Воскре́сшаго Тя́ зря́щи Ма́ти, ра́довашеся.

Катава́сія: Утренюемъ у́треннюю глубоку́, и вмѣ́сто мíра пѣ́снь принесе́мъ Влады́цѣ, и Христа́ у́зримъ, пра́вды Со́лнце, всѣ́мъ жи́знь возсія́юща.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

Пѣ́снь 6.

Ирмо́съ: Снизше́лъ еси́ въ преиспо́дняя земли́ и сокруши́лъ еси́ вереи́ вѣ́чныя, содержа́щія свя́занныя, Христе́, и тридне́венъ, я́ко отъ ки́та Іо́на, воскре́слъ еси́ отъ гро́ба. [Два́жды.]

Припѣ́въ: Христо́съ воскре́се изъ ме́ртвыхъ.

Сохрани́въ цѣ́ла зна́менія, Христе́, воскре́слъ еси́ отъ гро́ба, ключи́ Дѣ́вы не вреди́вый въ рождествѣ́ Твое́мъ, и отве́рзлъ еси́ на́мъ ра́йскія две́ри.

Припѣ́въ: Христо́съ воскре́се изъ ме́ртвыхъ.

Сохрани́въ цѣ́ла зна́менія, Христе́, воскре́слъ еси́ отъ гро́ба, ключи́ Дѣ́вы не вреди́вый въ рождествѣ́ Твое́мъ, и отве́рзлъ еси́ на́мъ ра́йскія две́ри.

Припѣ́въ: Христо́съ воскре́се изъ ме́ртвыхъ.

Сохрани́въ цѣ́ла зна́менія, Христе́, воскре́слъ еси́ отъ гро́ба, ключи́ Дѣ́вы не вреди́вый въ рождествѣ́ Твое́мъ, и отве́рзлъ еси́ на́мъ ра́йскія две́ри.

Припѣ́въ: Христо́съ воскре́се изъ ме́ртвыхъ.

Сохрани́въ цѣ́ла зна́менія, Христе́, воскре́слъ еси́ отъ гро́ба, ключи́ Дѣ́вы не вреди́вый въ рождествѣ́ Твое́мъ, и отве́рзлъ еси́ на́мъ ра́йскія две́ри.

Припѣ́въ: Христо́съ воскре́се изъ ме́ртвыхъ.

Сохрани́въ цѣ́ла зна́менія, Христе́, воскре́слъ еси́ отъ гро́ба, ключи́ Дѣ́вы не вреди́вый въ рождествѣ́ Твое́мъ, и отве́рзлъ еси́ на́мъ ра́йскія две́ри.

Припѣ́въ: Христо́съ воскре́се изъ ме́ртвыхъ.

Спа́се мо́й, живо́е же и неже́ртвенное заколе́ніе, я́ко Бо́гъ Са́мъ Себе́ во́лею приве́дъ Отцу́, совоскреси́лъ еси́ всеро́днаго Ада́ма, воскре́съ отъ гро́ба.

Припѣ́въ: Христо́съ воскре́се изъ ме́ртвыхъ.

Спа́се мо́й, живо́е же и неже́ртвенное заколе́ніе, я́ко Бо́гъ Са́мъ Себе́ во́лею приве́дъ Отцу́, совоскреси́лъ еси́ всеро́днаго Ада́ма, воскре́съ отъ гро́ба.

Припѣ́въ: Христо́съ воскре́се изъ ме́ртвыхъ.

Спа́се мо́й, живо́е же и неже́ртвенное заколе́ніе, я́ко Бо́гъ Са́мъ Себе́ во́лею приве́дъ Отцу́, совоскреси́лъ еси́ всеро́днаго Ада́ма, воскре́съ отъ гро́ба.

Припѣ́въ: Христо́съ воскре́се изъ ме́ртвыхъ.

Спа́се мо́й, живо́е же и неже́ртвенное заколе́ніе, я́ко Бо́гъ Са́мъ Себе́ во́лею приве́дъ Отцу́, совоскреси́лъ еси́ всеро́днаго Ада́ма, воскре́съ отъ гро́ба.

Припѣ́въ: Христо́съ воскре́се изъ ме́ртвыхъ.

Спа́се мо́й, живо́е же и неже́ртвенное заколе́ніе, я́ко Бо́гъ Са́мъ Себе́ во́лею приве́дъ Отцу́, совоскреси́лъ еси́ всеро́днаго Ада́ма, воскре́съ отъ гро́ба.

Сла́ва: Возведе́ся дре́вле держи́мое сме́ртію и тлѣ́ніемъ, Воплоти́вшимся отъ Твоего́ пречи́стаго чре́ва, къ нетлѣ́ннѣй и присносу́щнѣй жи́зни, Богоро́дице Дѣ́во.

И ны́нѣ: Сни́де въ преиспо́дняя земли́, въ ложесна́ Твоя́, Чи́стая, Сше́дый, и Всели́выйся и Воплоти́выйся па́че ума́, и воздви́же съ Собо́ю Ада́ма, воскре́съ отъ гро́ба.

Катава́сія: Снизше́лъ еси́ въ преиспо́дняя земли́ и сокруши́лъ еси́ вереи́ вѣ́чныя, содержа́щія свя́занныя, Христе́, и тридне́венъ, я́ко отъ ки́та Іо́на, воскре́слъ еси́ отъ гро́ба.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

Ектенія́ и возгла́съ: Ты́ бо еси́ Ца́рь ми́ра и Спа́съ ду́шъ на́шихъ, и Тебѣ́ сла́ву возсыла́емъ, Отцу́ и Сы́ну и Свято́му Ду́ху, ны́нѣ и при́сно, и во вѣ́ки вѣко́въ.]

Конда́къ, гла́съ 8:

Аще и во гро́бъ [снизше́лъ еси́, Безсме́ртне, но а́дову разруши́лъ еси́ си́лу, и воскре́слъ еси́, я́ко побѣди́тель, Христе́ Бо́же, жена́мъ мѵроно́сицамъ вѣща́вый, — ра́дуйтеся! — и Твои́мъ апо́столомъ ми́ръ да́руяй, па́дшимъ подая́й воскресе́ніе].

Икосъ:

[Еже пре́жде со́лнца Со́лнце заше́дшее иногда́ во гро́бъ, предвари́ша ко у́тру, и́щущія я́ко дне́ мѵроно́сицы дѣ́вы, и друга́ ко друзѣ́й вопія́ху: О, други́ни! пріиди́те, воня́ми пома́жемъ тѣ́ло живоно́сное и погребе́ное, пло́ть Воскреси́вшаго па́дшаго Ада́ма, лежа́щую во гро́бѣ. Идемъ, потщи́мся, я́коже волсви́, и поклони́мся, и принесе́мъ мѵ́ра я́ко да́ры, не въ пелена́хъ, но въ плащани́цѣ Обви́тому, и пла́чимъ, и возопіи́мъ: о, Влады́ко! воста́ни, па́дшимъ подая́й воскресе́ніе.]

И чте́ніе. И по не́мъ:

Воскресе́ніе Христо́во [ви́дѣвше, поклони́мся Свято́му Го́споду Іису́су, еди́ному Безгрѣ́шному. Кресту́ Твоему́ покланя́емся, Христе́, и свято́е Воскресе́ніе Твое́ пое́мъ и сла́вимъ: Ты́ бо еси́ Бо́гъ на́шъ, ра́звѣ Тебе́ ино́го не зна́емъ, и́мя Твое́ имену́емъ. Пріиди́те, вси́ вѣ́рніи, поклони́мся Свято́му Христо́ву Воскресе́нію: се́ бо пріи́де Кресто́мъ ра́дость всему́ мíру. Всегда́ благословя́ще Го́спода, пое́мъ Воскресе́ніе Его́: распя́тіе бо претерпѣ́въ, сме́ртію сме́рть разруши́]. [Три́жды.]

Воскре́съ Іису́съ отъ гро́ба, [я́коже прорече́, даде́ на́мъ живо́тъ вѣ́чный и ве́лію ми́лость]. [Три́жды.]

[Пѣ́снь 7.

Ирмо́съ: Отроки отъ пе́щи Изба́вивый, бы́въ Человѣ́къ, стра́ждетъ я́ко сме́ртенъ, и стра́стію сме́ртное въ нетлѣ́нія облачи́тъ благолѣ́піе, Еди́нъ благослове́нъ отце́въ Бо́гъ и препросла́вленъ. [Два́жды.]

Припѣ́въ: Христо́съ воскре́се изъ ме́ртвыхъ.

Жены́ съ мѵ́ры богому́дрыя въ слѣ́дъ Тебе́ теча́ху: Его́же, я́ко ме́ртва, со слеза́ми иска́ху, поклони́шася, ра́дующіяся, Живо́му Бо́гу, и Па́сху та́йную Твои́мъ, Христе́, ученико́мъ благовѣсти́ша.

Припѣ́въ: Христо́съ воскре́се изъ ме́ртвыхъ.

Жены́ съ мѵ́ры богому́дрыя въ слѣ́дъ Тебе́ теча́ху: Его́же, я́ко ме́ртва, со слеза́ми иска́ху, поклони́шася, ра́дующіяся, Живо́му Бо́гу, и Па́сху та́йную Твои́мъ, Христе́, ученико́мъ благовѣсти́ша.

Припѣ́въ: Христо́съ воскре́се изъ ме́ртвыхъ.

Жены́ съ мѵ́ры богому́дрыя въ слѣ́дъ Тебе́ теча́ху: Его́же, я́ко ме́ртва, со слеза́ми иска́ху, поклони́шася, ра́дующіяся, Живо́му Бо́гу, и Па́сху та́йную Твои́мъ, Христе́, ученико́мъ благовѣсти́ша.

Припѣ́въ: Христо́съ воскре́се изъ ме́ртвыхъ.

Жены́ съ мѵ́ры богому́дрыя въ слѣ́дъ Тебе́ теча́ху: Его́же, я́ко ме́ртва, со слеза́ми иска́ху, поклони́шася, ра́дующіяся, Живо́му Бо́гу, и Па́сху та́йную Твои́мъ, Христе́, ученико́мъ благовѣсти́ша.

Припѣ́въ: Христо́съ воскре́се изъ ме́ртвыхъ.

Сме́рти пра́зднуемъ умерщвле́ніе, а́дово разруше́ніе, ино́го житія́ вѣ́чнаго нача́ло и, игра́юще, пое́мъ Вино́внаго, Еди́наго благослове́ннаго отце́въ Бо́га, и препросла́вленнаго.

Припѣ́въ: Христо́съ воскре́се изъ ме́ртвыхъ.

Сме́рти пра́зднуемъ умерщвле́ніе, а́дово разруше́ніе, ино́го житія́ вѣ́чнаго нача́ло и, игра́юще, пое́мъ Вино́внаго, Еди́наго благослове́ннаго отце́въ Бо́га, и препросла́вленнаго.

Припѣ́въ: Христо́съ воскре́се изъ ме́ртвыхъ.

Сме́рти пра́зднуемъ умерщвле́ніе, а́дово разруше́ніе, ино́го житія́ вѣ́чнаго нача́ло и, игра́юще, пое́мъ Вино́внаго, Еди́наго благослове́ннаго отце́въ Бо́га, и препросла́вленнаго.

Припѣ́въ: Христо́съ воскре́се изъ ме́ртвыхъ.

Яко вои́стинну свяще́нная, и всепра́зднственная сія́ спаси́тельная но́щь, и свѣтоза́рная, свѣтоно́снаго дне́, воста́нія су́щи провозвѣ́стница: въ не́йже безлѣ́тный Свѣ́тъ изъ гро́ба пло́тски всѣ́мъ возсія́.

Припѣ́въ: Христо́съ воскре́се изъ ме́ртвыхъ.

Яко вои́стинну свяще́нная, и всепра́зднственная сія́ спаси́тельная но́щь, и свѣтоза́рная, свѣтоно́снаго дне́, воста́нія су́щи провозвѣ́стница: въ не́йже безлѣ́тный Свѣ́тъ изъ гро́ба пло́тски всѣ́мъ возсія́.

Припѣ́въ: Христо́съ воскре́се изъ ме́ртвыхъ.

Яко вои́стинну свяще́нная, и всепра́зднственная сія́ спаси́тельная но́щь, и свѣтоза́рная, свѣтоно́снаго дне́, воста́нія су́щи провозвѣ́стница: въ не́йже безлѣ́тный Свѣ́тъ изъ гро́ба пло́тски всѣ́мъ возсія́.

Сла́ва, богоро́диченъ: Умертви́въ Сы́нъ Тво́й сме́рть, Всенепоро́чная, дне́сь всѣ́мъ сме́ртнымъ пребыва́ющій живо́тъ во вѣ́ки вѣко́въ дарова́, еди́нъ Благослове́нный, отце́въ Бо́гъ и Препросла́вленный.

И ны́нѣ, богоро́диченъ: Всѣ́мъ ца́рствуяй созда́ніемъ, бы́въ человѣ́къ, всели́ся въ Твою́, Богоблагода́тная, утро́бу, и распя́тіе претерпѣ́въ и сме́рть, воскре́се боголѣ́пно, совозста́вивъ на́съ, я́ко Всеси́ленъ.

Катава́сія: Отроки отъ пе́щи Изба́вивый, бы́въ Человѣ́къ, стра́ждетъ я́ко сме́ртенъ, и стра́стію сме́ртное въ нетлѣ́нія облачи́тъ благолѣ́піе, Еди́нъ благослове́нъ отце́въ Бо́гъ и препросла́вленъ.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

Пѣ́снь 8.

Ирмо́съ: Се́й нарече́нный и святы́й де́нь — еди́нъ суббо́тъ ца́рь и госпо́дь, пра́здниковъ пра́здникъ и торжество́ е́сть торже́ствъ, въ о́ньже благослови́мъ Христа́ во вѣ́ки. [Два́жды.]

Припѣ́въ: Христо́съ воскре́се изъ ме́ртвыхъ.

Пріиди́те, но́ваго виногра́да рожде́нія, Боже́ственнаго весе́лія, въ наро́читомъ дни́ Воскресе́нія, Ца́рствія Христо́ва пріобщи́мся, пою́ще Его́, я́ко Бо́га, во вѣ́ки.

Припѣ́въ: Христо́съ воскре́се изъ ме́ртвыхъ.

Пріиди́те, но́ваго виногра́да рожде́нія, Боже́ственнаго весе́лія, въ наро́читомъ дни́ Воскресе́нія, Ца́рствія Христо́ва пріобщи́мся, пою́ще Его́, я́ко Бо́га, во вѣ́ки.

Припѣ́въ: Христо́съ воскре́се изъ ме́ртвыхъ.

Пріиди́те, но́ваго виногра́да рожде́нія, Боже́ственнаго весе́лія, въ наро́читомъ дни́ Воскресе́нія, Ца́рствія Христо́ва пріобщи́мся, пою́ще Его́, я́ко Бо́га, во вѣ́ки.

Припѣ́въ: Христо́съ воскре́се изъ ме́ртвыхъ.

Пріиди́те, но́ваго виногра́да рожде́нія, Боже́ственнаго весе́лія, въ наро́читомъ дни́ Воскресе́нія, Ца́рствія Христо́ва пріобщи́мся, пою́ще Его́, я́ко Бо́га, во вѣ́ки.

Припѣ́въ: Христо́съ воскре́се изъ ме́ртвыхъ.

Возведи́ о́крестъ о́чи твои́, Сіо́не, и ви́ждь: се́ бо пріидо́ша къ тебѣ́, я́ко богосвѣ́тлая свѣти́ла, отъ за́пада, и сѣ́вера, и мо́ря, и восто́ка ча́да твоя́, въ тебѣ́ благословя́щая Христа́ во вѣ́ки.

Припѣ́въ: Христо́съ воскре́се изъ ме́ртвыхъ.

Возведи́ о́крестъ о́чи твои́, Сіо́не, и ви́ждь: се́ бо пріидо́ша къ тебѣ́, я́ко богосвѣ́тлая свѣти́ла, отъ за́пада, и сѣ́вера, и мо́ря, и восто́ка ча́да твоя́, въ тебѣ́ благословя́щая Христа́ во вѣ́ки.

Припѣ́въ: Христо́съ воскре́се изъ ме́ртвыхъ.

Возведи́ о́крестъ о́чи твои́, Сіо́не, и ви́ждь: се́ бо пріидо́ша къ тебѣ́, я́ко богосвѣ́тлая свѣти́ла, отъ за́пада, и сѣ́вера, и мо́ря, и восто́ка ча́да твоя́, въ тебѣ́ благословя́щая Христа́ во вѣ́ки.

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Тро́иченъ: Отче Вседержи́телю, и Сло́ве, и Ду́ше, треми́ соединя́емое во Ѵпоста́сехъ Естество́, Пресу́щественне и Пребоже́ственне! Въ Тя́ крести́хомся и Тя́ благослови́мъ во вся́ вѣ́ки.

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Тро́иченъ: Отче Вседержи́телю, и Сло́ве, и Ду́ше, треми́ соединя́емое во Ѵпоста́сехъ Естество́, Пресу́щественне и Пребоже́ственне! Въ Тя́ крести́хомся и Тя́ благослови́мъ во вся́ вѣ́ки.

Припѣ́въ: Пресвята́я Тро́ице, Бо́же на́шъ, сла́ва Тебѣ́.

Тро́иченъ: Отче Вседержи́телю, и Сло́ве, и Ду́ше, треми́ соединя́емое во Ѵпоста́сехъ Естество́, Пресу́щественне и Пребоже́ственне! Въ Тя́ крести́хомся и Тя́ благослови́мъ во вся́ вѣ́ки.

Припѣ́въ: Благослови́мъ Отца́ и Сы́на и Свята́го Ду́ха, Го́спода.

Богоро́диченъ Пріи́де Тобо́ю въ мíръ Госпо́дь, Дѣ́во Богоро́дице, и чре́во а́дово расто́ргъ, сме́ртнымъ на́мъ воскресе́ніе дарова́, тѣ́мже благослови́мъ Его́ во вѣ́ки.

Припѣ́въ: И ны́нѣ, и при́сно, и во вѣ́ки вѣко́въ, ами́нь.

Богоро́диченъ Всю́ низложи́въ сме́рти держа́ву Сы́нъ Тво́й, Дѣ́во, Свои́мъ Воскресе́ніемъ, я́ко Бо́гъ Крѣ́пкій совознесе́ на́съ и обожи́, тѣ́мже воспѣва́емъ Его́ во вѣ́ки.

Катава́сія: Се́й нарече́нный и святы́й де́нь — еди́нъ суббо́тъ ца́рь и госпо́дь, пра́здниковъ пра́здникъ и торжество́ е́сть торже́ствъ, въ о́ньже благослови́мъ Христа́ во вѣ́ки.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

9-ю пѣ́снь пое́мъ съ припѣ́вы.

Діа́конъ: Вели́читъ душа́ моя́ воскре́сшаго тридне́вно отъ гро́ба Христа́ Жизнода́вца.

И пе́рвый ли́къ ирмо́съ: Свѣти́ся, свѣти́ся, но́вый Іерусали́ме, сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́.

И вторы́й ли́къ пое́тъ вторы́й припѣ́въ: Вели́читъ душа́ моя́ во́лею страда́вша, и погребе́на, и воскре́сшаго тридне́вно отъ гро́ба.

И ирмо́съ: Свѣти́ся, свѣти́ся, но́вый Іерусали́ме, сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́.

Та́же пе́рвый ли́къ пое́тъ тре́тій припѣ́въ: Христо́съ — но́вая Па́сха, Же́ртва жива́я, Агнецъ Бо́жій, взе́мляй грѣхи́ мíра.

И сти́хъ: О, Боже́ственнаго, о любе́знаго, о сладча́йшаго Твоего́ гла́са! Съ на́ми бо нело́жно обѣща́лся еси́ бы́ти, до сконча́нія вѣ́ка, Христе́. Его́же, вѣ́рніи, утвержде́ніе наде́жди иму́ще, ра́дуемся.

И вторы́й ли́къ пое́тъ то́йже припѣ́въ: Христо́съ — но́вая Па́сха, Же́ртва жива́я, Агнецъ Бо́жій, взе́мляй грѣхи́ мíра.

И сти́хъ: О, Боже́ственнаго, о любе́знаго, о сладча́йшаго Твоего́ гла́са! Съ на́ми бо нело́жно обѣща́лся еси́ бы́ти, до сконча́нія вѣ́ка, Христе́. Его́же, вѣ́рніи, утвержде́ніе наде́жди иму́ще, ра́дуемся.

Та́же пе́рвый ли́къ пое́тъ четве́ртый припѣ́въ: Ангелъ вопія́ше Благода́тнѣй: Чи́стая Дѣ́во, ра́дуйся! И па́ки реку́: ра́дуйся! Тво́й Сы́нъ воскре́се тридне́венъ отъ гро́ба и ме́ртвыя воздви́гнувый, лю́діе, весели́теся.

И сти́хъ: О, Боже́ственнаго, о любе́знаго, о сладча́йшаго Твоего́ гла́са! Съ на́ми бо нело́жно обѣща́лся еси́ бы́ти, до сконча́нія вѣ́ка, Христе́. Его́же, вѣ́рніи, утвержде́ніе наде́жди иму́ще, ра́дуемся.

И вторы́й ли́къ пое́тъ то́йже припѣ́въ: Ангелъ вопія́ше Благода́тнѣй: Чи́стая Дѣ́во, ра́дуйся! И па́ки реку́: ра́дуйся! Тво́й Сы́нъ воскре́се тридне́венъ отъ гро́ба и ме́ртвыя воздви́гнувый, лю́діе, весели́теся.

И сти́хъ: О, Боже́ственнаго, о любе́знаго, о сладча́йшаго Твоего́ гла́са! Съ на́ми бо нело́жно обѣща́лся еси́ бы́ти, до сконча́нія вѣ́ка, Христе́. Его́же, вѣ́рніи, утвержде́ніе наде́жди иму́ще, ра́дуемся.

Та́же пе́рвый ли́къ пое́тъ припѣ́въ: Возбуди́лъ еси́, усну́въ, ме́ртвыя отъ вѣ́ка, ца́рски рыка́вый я́ко отъ Іу́ды ле́въ.

И сти́хъ: О, Боже́ственнаго, о любе́знаго, о сладча́йшаго Твоего́ гла́са! Съ на́ми бо нело́жно обѣща́лся еси́ бы́ти, до сконча́нія вѣ́ка, Христе́. Его́же, вѣ́рніи, утвержде́ніе наде́жди иму́ще, ра́дуемся.

И вторы́й ли́къ пое́тъ припѣ́въ: Магдали́на Марíя притече́ ко гро́бу, и Христа́ ви́дѣвши, я́ко вертогра́даря вопроша́ше.

И сти́хъ: О, Па́сха ве́лія и свяще́ннѣйшая, Христе́! О, му́дросте, и Сло́ве Бо́жій, и си́ло! Подава́й на́мъ и́стѣе Тебе́ причаща́тися въ невече́рнемъ дни́ Ца́рствія Твоего́.

Та́же пе́рвый ли́къ пое́тъ припѣ́въ: Ангелъ облиста́яй жена́мъ вопія́ше: преста́ните отъ сле́зъ, я́ко Христо́съ воскре́се.

И сти́хъ: О, Па́сха ве́лія и свяще́ннѣйшая, Христе́! О, му́дросте, и Сло́ве Бо́жій, и си́ло! Подава́й на́мъ и́стѣе Тебе́ причаща́тися въ невече́рнемъ дни́ Ца́рствія Твоего́.

И вторы́й ли́къ пое́тъ припѣ́въ: Христо́съ воскре́се, сме́рть попра́вый, и ме́ртвыя воздви́гнувый, лю́діе, весели́теся.

И сти́хъ: О, Па́сха ве́лія и свяще́ннѣйшая, Христе́! О, му́дросте, и Сло́ве Бо́жій, и си́ло! Подава́й на́мъ и́стѣе Тебе́ причаща́тися въ невече́рнемъ дни́ Ца́рствія Твоего́.

Та́же пе́рвый ли́къ пое́тъ припѣ́въ: Дне́сь вся́ка тва́рь весели́тся и ра́дуется, я́ко Христо́съ воскре́се и а́дъ плѣни́ся.

И сти́хъ: О, Па́сха ве́лія и свяще́ннѣйшая, Христе́! О, му́дросте, и Сло́ве Бо́жій, и си́ло! Подава́й на́мъ и́стѣе Тебе́ причаща́тися въ невече́рнемъ дни́ Ца́рствія Твоего́.

И вторы́й ли́къ пое́тъ припѣ́въ: Дне́сь Влады́ка плѣни́ а́да, воздви́гнувый ю́зники, я́же отъ вѣ́ка имя́ше лю́тѣ одержи́мыя.

И сти́хъ: О, Па́сха ве́лія и свяще́ннѣйшая, Христе́! О, му́дросте, и Сло́ве Бо́жій, и си́ло! Подава́й на́мъ и́стѣе Тебе́ причаща́тися въ невече́рнемъ дни́ Ца́рствія Твоего́.

Та́же пе́рвый ли́къ пое́тъ припѣ́въ: Вели́читъ душа́ моя́ Тріѵпоста́снаго и Нераздѣ́льнаго Божества́ держа́ву.

Богоро́диченъ: Согла́сно, Дѣ́во, Тебе́ блажи́мъ вѣ́рніи: ра́дуйся, Две́ре Госпо́дня; ра́дуйся, Гра́де одушевле́нный; ра́дуйся, Ея́же ра́ди на́мъ ны́нѣ возсія́ свѣ́тъ, изъ Тебе́ Рожде́ннаго изъ ме́ртвыхъ Воскресе́нія.

И вторы́й ли́къ пое́тъ припѣ́въ: Ра́дуйся, Дѣ́во, ра́дуйся, ра́дуйся, Благослове́нная, ра́дуйся, Препросла́вленная! Тво́й бо Сы́нъ воскре́се тридне́венъ отъ гро́ба.

Богоро́диченъ: Весели́ся и ра́дуйся, Боже́ственная Две́ре Свѣ́та: заше́дый бо Іису́съ во гро́бъ возсія́, просія́въ со́лнца свѣтлѣ́е и вѣ́рныя вся́ озари́въ, Богора́дованная Влады́чице.

Та́же о́ба ли́ка, соше́дшеся вку́пѣ, пою́тъ пе́рвый припѣ́въ: Вели́читъ душа́ моя́ воскре́сшаго тридне́вно отъ гро́ба Христа́ Жизнода́вца.

И ирмо́съ: Свѣти́ся, свѣти́ся, но́вый Іерусали́ме, сла́ва бо Госпо́дня на тебѣ́ возсія́. Лику́й ны́нѣ и весели́ся, Сіо́не. Ты́ же, Чи́стая, красу́йся, Богоро́дице, о воста́ніи Рождества́ Твоего́.

И тропа́рь: Христо́съ воскре́се изъ ме́ртвыхъ, сме́ртію сме́рть попра́въ и су́щимъ во гробѣ́хъ живо́тъ дарова́въ. [Три́жды.]

Ектенія́ и возгла́съ: Яко Тя́ хва́лятъ вся́ си́лы небе́сныя, Отца́ и Сы́на и Свята́го Ду́ха, и Тебѣ́ сла́ву возсыла́ютъ, ны́нѣ и при́сно, и во вѣ́ки вѣко́въ.]

Таже ексапостила́рій:

Пло́тію усну́въ, [я́ко ме́ртвъ, Царю́ и Го́споди, тридне́венъ воскре́слъ еси́, Ада́ма воздви́гъ отъ тли́, и упраздни́въ сме́рть: Па́сха нетлѣ́нія, мíра спасе́ніе]. [Три́жды.]

На хвали́техъ: Вся́кое дыха́ніе... И пое́мъ стихи́ры воскре́сны, гла́съ 2:

Вся́кое дыха́ніе и вся́ тва́рь Тя́ сла́витъ, Го́споди, я́ко Кресто́мъ смерть упраздни́лъ еси́, да пока́жеши лю́демъ е́же изъ ме́ртвыхъ Твое́ Воскресе́ніе, я́ко еди́нъ Человѣколю́бецъ.

Да реку́тъ іуде́и, ка́ко во́ини погуби́ша стрегу́щіи Царя́? Почто́ бо ка́мень не сохрани́ Ка́мене жи́зни? Или́ Погребе́ннаго да дадя́тъ, или́ Воскре́сшему да покло́нятся, глаго́люще съ на́ми: сла́ва мно́жеству щедро́тъ Твои́хъ, Спа́се на́шъ, сла́ва Тебѣ́!

Ра́дуйтеся, лю́діе, и весели́теся, а́нгелъ сѣдя́й на ка́мени гро́бномъ, то́й на́мъ благовѣсти́, ре́къ: Христо́съ воскре́се изъ ме́ртвыхъ, Спа́съ мíра, и испо́лни вся́ческая благоуха́нія. Ра́дуйтеся, лю́діе, и весели́теся!

Ангелъ у́бо е́же — ра́дуйся! — пре́жде Твоего́ зача́тія, Го́споди, Благода́тнѣй принесе́; а́нгелъ же ка́мень сла́внаго Твоего́ гро́ба въ Твое́ Воскресе́ніе отвали́. Овъ у́бо въ печа́ли мѣ́сто весе́лія о́бразы возвѣща́я; се́й же въ сме́рти мѣ́сто Влады́ку Жизнода́вца проповѣ́дуя на́мъ. Тѣ́мже вопіе́мъ Ти́: Благодѣ́телю всѣ́хъ, Го́споди, сла́ва Тебѣ́!

И стихи́ры Па́схи съ припѣ́вы и́хъ, я́коже предписа́ся во у́трени недѣ́ли, [гла́съ 5:

Сти́хъ: Да воскре́снетъ Бо́гъ, и расточа́тся врази́ Его́.

Па́сха свяще́нная на́мъ дне́сь показа́ся; Па́сха но́ва свята́я; Па́сха та́инственная; Па́сха всечестна́я; Па́сха — Христо́съ Изба́витель; Па́сха непоро́чная; Па́сха вели́кая; Па́сха вѣ́рныхъ; Па́сха, две́ри ра́йскія на́мъ отверза́ющая; Па́сха, всѣ́хъ освяща́ющая вѣ́рныхъ.

Сти́хъ: Яко исчеза́етъ ды́мъ, да исче́знутъ.

Пріиди́те отъ видѣ́нія, жены́ благовѣ́стницы, и Сіо́ну рцы́те: пріими́ отъ на́съ ра́дости благовѣ́щенія Воскресе́нія Христо́ва! Красу́йся, лику́й и ра́дуйся, Іерусали́ме, Царя́ Христа́ узрѣ́въ изъ гро́ба, я́ко жениха́ происходя́ща.

Сти́хъ: Та́ко да поги́бнутъ грѣ́шницы отъ лица́ Бо́жія, а пра́ведницы да возвеселя́тся.

Мѵроно́сицы жены́, у́тру глубоку́, предста́вша гро́бу Живода́вца, обрѣто́ша а́нгела на ка́мени сѣдя́ща, и то́й, провѣща́въ и́мъ, си́це глаго́лаше: что́ и́щете Жива́го съ ме́ртвыми? что́ пла́чете Нетлѣ́ннаго во тли́? Ше́дше, проповѣ́дите ученико́мъ Его́.

Сти́хъ: Се́й де́нь, его́же сотвори́ Госпо́дь, возра́дуемся и возвесели́мся въ о́нь.

Па́сха кра́сная, Па́сха, Госпо́дня Па́сха! Па́сха всечестна́я на́мъ возсія́. Па́сха, ра́достію дру́гъ дру́га объи́мемъ. О, Па́сха! Избавле́ніе ско́рби, и́бо изъ гро́ба дне́сь, я́ко отъ черто́га возсія́въ Христо́съ, жены́ ра́дости испо́лни, глаго́ля: проповѣ́дите апо́столомъ.

Сла́ва, и ны́нѣ, гла́съ 5:

Воскресе́нія де́нь, и просвѣти́мся торжество́мъ, и дру́гъ дру́га объи́мемъ. Рце́мъ — бра́тіе! — и ненави́дящимъ на́съ, прости́мъ вся́ Воскресе́ніемъ, и та́ко возопіи́мъ: Христо́съ воскре́се изъ ме́ртвыхъ, сме́ртію сме́рть попра́въ, и су́щимъ во гробѣ́хъ живо́тъ дарова́въ.

Та́же: Христо́съ воскре́се.., три́жды.

Посе́мъ діа́конъ глаго́летъ ектеніи́:

Поми́луй на́съ, Бо́же... и Испо́лнимъ у́треннюю моли́тву на́шу Го́сподеви. И по возгла́сѣ, діа́конъ: Прему́дрость. Мы́ же: Благослови́.

Настоя́тель: Сы́й благослове́нъ Христо́съ, Бо́гъ на́шъ, всегда́, ны́нѣ и при́сно, и во вѣ́ки вѣко́въ. И мы́: Ами́нь. Утверди́ Бо́же...

Посе́мъ настоя́тель, держа́ кре́стъ, [вмѣ́сто: Сла́ва Тебѣ́, Христе́ Бо́же...] пое́тъ: Христо́съ воскре́се изъ ме́ртвыхъ, сме́ртію сме́рть попра́въ. И мы́ пое́мъ: И су́щимъ во гробѣ́хъ живо́тъ дарова́въ.

И а́біе настоя́тель глаго́летъ отпу́стъ:

Христо́съ, воскресы́й изъ ме́ртвыхъ, сме́ртію сме́рть попра́вый и су́щимъ во гробѣ́хъ живо́тъ дарова́вый, и́стинный Бо́гъ на́шъ, моли́твами Пречи́стыя Своея́ Ма́тере и всѣ́хъ святы́хъ, поми́луетъ и спасе́тъ на́съ, я́ко Бла́гъ и Человѣколю́бецъ.

Та́же, кре́стъ возвыша́я, глаго́летъ: Христо́съ воскре́се! [Три́жды.] Мы́ же отвѣща́емъ: Вои́стинну воскре́се! [Три́жды.] Та́же пое́мъ коне́чное: Христо́съ воскре́се.., три́жды, ве́сь тропа́рь.

И по не́мъ пѣ́ніемъ ко́нчимъ: И на́мъ дарова́ живо́тъ вѣ́чный, покланя́емся Его́ тридне́вному Воскресе́нію.

Посе́мъ многолѣ́тны, и цѣлу́емъ честны́й кре́стъ, держи́мый въ руку́ настоя́теля.]

И ча́съ пе́рвый. [Глаго́лемъ: Христо́съ воскре́се.., три́жды. И про́чее, я́коже ука́зъ е́сть о часѣ́хъ Свѣ́тлыя седми́цы.]

[Си́це же быва́етъ слу́жба у́трени во всю́ седми́цу Свѣ́тлую. Твори́мъ же и литíю внѣ́ оби́тели.

[Зри́:] Подоба́етъ вѣ́дати, я́ко твори́мъ исхожде́ніе дне́сь внѣ́ монастыря́, преднося́ще хору́гви. Въ рука́хъ же держа́ще свято́е Ева́нгеліе, честны́й Кре́стъ, и ико́ны Воскресе́нія Христо́ва, Пречи́стыя Богоро́дицы. Пое́мъ кано́нъ Па́схи съ богоро́дичны на 8. И катава́сія: ирмо́съ то́йже. По 6-й пѣ́сни, послѣди́ Ева́нгелія глаго́лемъ: Воскресе́ніе Христо́во ви́дѣвше.., три́жды. Та́же стихи́ра: Воскре́съ Іису́съ отъ гро́ба.., три́жды. Та́же 7-я, 8-я и 9-я пѣ́сни. И про́чее моле́бна.[1]


НА ЛИТУРГІИ,
Антифо́ны Па́схи непремѣ́нно, я́коже указа́ся въ недѣ́лю Па́схи.


Проки́менъ Апо́стола, гла́съ 8: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь.

Апо́столъ, Дѣя́ній. [Зача́ло 2.]

Во дни́ о́ны, возврати́шася апо́столи во Іерусали́мъ отъ горы́, нарица́емыя Елео́нъ, я́же е́сть близъ Іерусали́ма, суббо́ты иму́щія пу́ть. И, егда́ внидо́ша, взыдо́ша на го́рницу, идѣ́же бя́ху пребыва́юще, Петръ же и Іа́ковъ, и Іоа́ннъ и Андре́й, Фили́ппъ и Ѳома́, Варѳоломе́й и Матѳе́й, Іа́ковъ Алфе́овъ и Си́монъ Зило́тъ, и Іу́да Іа́ковль. Сíи вси́ бя́ху терпя́ще единоду́шно въ моли́твѣ и моле́ніи съ жена́ми и Марíею, Ма́терію Іису́совою, и съ бра́тіею Его́. И во дни́ ты́я воста́въ Пе́тръ посредѣ́ учени́къ, рече́, [бѣ́ же име́нъ наро́да вку́пѣ, я́ко сто́ и два́десять]: му́жіе бра́тіе! Подоба́ше сконча́тися Писа́нію сему́, е́же предрече́ Духъ Святы́й усты́ Дави́довыми о Іу́дѣ, бы́вшемъ вожди́ е́мшимъ Іису́са, я́ко причте́нъ бѣ́ съ на́ми и прія́лъ бя́ше жре́бій слу́жбы сея́. Подоба́етъ у́бо отъ сходи́вшихся съ на́ми муже́й во вся́ко лѣ́то, въ не́же вни́де и изы́де въ на́съ Госпо́дь Іису́съ, наче́нъ отъ креще́нія Іоа́ннова да́же до дне́, въ о́ньже вознесе́ся [на не́бо] отъ на́съ, свидѣ́телю Воскресе́нія Его́ бы́ти съ на́ми еди́ному отъ си́хъ. И поста́виша два́: Іо́сифа, нарица́емаго Варса́ву, и́же нарече́нъ бы́сть Іу́стъ, и Матѳíя. И помоли́вшеся, рѣ́ша: Ты́, Го́споди, Сердцевѣ́дче всѣ́хъ, покажи́, его́же избра́лъ еси́ отъ сею́ двою́ еди́наго, прія́ти жре́бій служе́нія сего́ и апо́стольства, изъ него́же испаде́ Іу́да, ити́ въ мѣ́сто свое́. И да́ша жре́бія и́ма, и паде́ жре́бій на Матѳíя, и причте́нъ бы́сть ко единона́десяти апо́столомъ.

Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ.] Сти́хъ: Бо́гъ прославля́емь въ совѣ́тѣ святы́хъ.

Ева́нгеліе отъ Іоа́нна. [Зача́ло 2.]

Бо́га никто́же ви́дѣ нигдѣ́же; Единоро́дный Сы́нъ, сы́й въ ло́нѣ Отчи, То́й исповѣ́да. И сіе́ е́сть свидѣ́тельство Іоа́нново, егда́ посла́ша жи́дове отъ Іерусали́ма іере́и и леви́ты, да вопро́сятъ его́: ты́ кто́ еси́? И исповѣ́да, и не отве́ржеся, и исповѣ́да, я́ко нѣ́смь а́зъ Христо́съ. И вопроси́ша его́: что́ у́бо? Илія́ ли еси́ ты́? И глаго́ла: нѣ́смь. Проро́къ ли еси́? И отвѣща́: ни́. Рѣ́ша же ему́: кто́ еси́? Да отвѣ́тъ да́мы посла́вшимъ ны́. Что́ глаго́леши о тебѣ́ само́мъ? Рече́: а́зъ гла́съ вопію́щаго въ пусты́ни, — испра́вите пу́ть Госпо́день, — я́коже рече́ Иса́ія проро́къ. И по́сланніи бя́ху отъ фарисе́й. И вопроси́ша его́, и рѣ́ша ему́: что́ у́бо креща́еши, а́ще ты́ нѣ́си Христо́съ, ни Илія́, ни проро́къ? Отвѣща́ и́мъ Іоа́ннъ, глаго́ля: а́зъ креща́ю водо́ю; посредѣ́ же ва́съ стои́тъ, Его́же вы́ не вѣ́сте. То́й е́сть Гряды́й по мнѣ́, Иже предо мно́ю бы́сть. Ему́же нѣ́смь а́зъ досто́инъ, да отрѣшу́ реме́нь сапогу́ Его́. Сія́ въ Виѳава́рѣ бы́ша, объ о́нъ по́лъ Іорда́на, идѣ́же бѣ́ Іоа́ннъ крестя́.

Прича́стенъ: Тѣ́ло Христо́во [пріими́те, Исто́чника безсме́ртнаго вкуси́те. Аллилу́ія]. [Три́жды.]

На трапе́зѣ быва́етъ утѣше́ніе вели́кое бра́тіи.

Примѣчаніе:
[1] Пентикоста́ріонъ, е́же е́сть Пятдеся́тница [Цвѣтна́я тріо́дь]. Кíевъ: Въ тѵпогра́фіи Кíево-Пече́рской Успе́нской Ла́вры, 1864, л. 14 об.

Источникъ: Послѣдованіе во святую и Великую недѣлю Пасхи и во всю Свѣтлую седмицу. — М.: Сѵнодальная Тѵпография, 1899. — Л. 38 – 45 об.

/ Къ оглавленію раздѣла /


Наверхъ / Къ титульной страницѣ

0