Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 16 августа 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДЬ ЦВѢТНАЯ.

ВО СВЯТУЮ И ВЕЛИКУЮ НЕДѢЛЮ ПАСХИ.

ПОСЛѢДОВАНІЕ ПОЛУНОЩНИЦЫ.

Благослови́вшу свяще́ннику, начина́емъ Трисвято́е и про́чее. Пріиди́те, поклони́мся.., три́жды. Псало́мъ 50-й.

И кано́нъ Вели́кія суббо́ты: ирмосы́ по два́жды, тропари́ же на двана́десять, со стиха́ми пѣ́сней.
Катава́сія: ирмо́съ о́ба ли́ка.

Кано́нъ, гла́съ 6:

Пѣ́снь 1.

Го́споди Бо́же мой, исхо́дное пѣ́ніе и надгро́бную Тебѣ́ пѣ́снь воспою́, погребе́ніемъ Твои́мъ жи́зни моея́ вхо́ды отве́рзшему и сме́ртію сме́рть и а́дъ умертви́вшему.

Горѣ́ Тя на престо́лѣ и до́лѣ во гро́бѣ, премíрная и подзе́мная, помышля́ющая, Спа́се мо́й, зы́бляхуся умерщвле́ніемъ Твои́мъ: па́че ума́ бо ви́дѣнъ былъ еси́ ме́ртвъ, Живонача́льниче.

Да Твоея́ сла́вы вся́ испо́лниши, сше́лъ еси́ въ ни́жняя земли́; отъ Тебе́ бо не скры́ся соста́въ мо́й, и́же во Ада́мѣ, и, погребе́нъ, истлѣ́вша мя́ обновля́еши, Человѣколю́бче.

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши на ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Образы погребе́нія Твоего́ показа́лъ еси́, видѣ́нія умно́живъ. Ны́нѣ же сокрове́нная Твоя́ богому́жно уясни́лъ еси́ и су́щимъ во а́дѣ, Влады́ко, — нѣ́сть свя́тъ, ра́звѣ Тебе́, Го́споди, — взыва́ющимъ.

Просте́рлъ еси́ дла́ни и соедини́лъ еси́ дре́вле разстоя́щаяся. Одѣя́ніемъ же, Спа́се, е́же въ плащани́цѣ и во гро́бѣ, окова́нныя разрѣши́лъ еси́, — нѣ́сть свя́тъ, ра́звѣ Тебе́, Го́споди, — взыва́ющія.

Гро́бомъ и печа́тьми, Невмѣсти́ме, содержи́мь бы́лъ еси́ хотѣ́ніемъ; и́бо си́лу Твою́ дѣ́йствы показа́лъ еси́, богодѣ́йственно пою́щимъ: нѣ́сть свя́тъ, ра́звѣ Тебе́ Го́споди, Человѣколю́бче.

Сѣда́ленъ, гла́съ 1:

Гро́бъ Тво́й, Спа́се, во́ини стрегу́щіи, ме́ртви отъ облиста́нія я́вльшагося а́нгела бы́ша, проповѣ́дающа жена́мъ Воскресе́ніе. Тебе́ сла́вимъ, тли́ Потреби́теля, Тебѣ́ припа́даемъ, Воскре́сшему изъ гро́ба и Еди́ному Бо́гу на́шему.

Сла́ва, и ны́нѣ, то́йже.

Пѣ́снь 4.

Ирмо́съ: На Крестѣ́ Твое́ Боже́ственное истоща́ніе прови́дя, Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, пріобща́яся су́щимъ во а́дѣ, я́ко Всеси́ленъ.

Седьмы́й де́нь дне́сь освяти́лъ еси́, его́же дре́вле благослови́лъ еси́ упокое́ніемъ дѣ́лъ: прево́диши бо вся́ческая и обновля́еши, суббо́тствуя, Спа́се мо́й, и назида́я.

Си́лою лу́чшаго, побѣди́вшаго Тебе́, отъ пло́ти душа́ Твоя́ раздѣли́ся, растерза́ющи бо обоя́ у́зы, сме́рти и а́да, Сло́ве, держа́вою Твое́ю.

Адъ, Сло́ве, срѣ́тъ Тя́, огорчи́ся, человѣ́ка зря́ обоже́на, уя́звлена ра́нами и Всесильнодѣ́теля, стра́шнымъ же зра́комъ поги́бе.

Пѣ́снь 5.

Ирмо́съ: Богоявле́нія Твоего́, Христе́, къ на́мъ ми́лостивно бы́вшаго, Иса́ія, Свѣ́тъ ви́дѣвъ Невече́рній, изъ но́щи у́треневавъ взыва́ше: воскре́снутъ ме́ртвіи, и воста́нутъ су́щіи во гробѣ́хъ, и вси́ земноро́дніи возра́дуются.

Новотвори́ши земны́я, Созда́телю, пе́рстенъ бы́въ, и плащани́ца и гро́бъ явля́ютъ е́же въ Тебѣ́, Сло́ве, та́инство. Благообра́зный бо совѣ́тникъ, Тебе́ Ро́ждшаго совѣ́тъ образу́етъ, въ Тебѣ́ велелѣ́пно новотворя́щаго мя́.

Сме́ртію — сме́ртное, погребе́ніемъ тлѣ́нное прелага́еши, нетлѣ́нно твори́ши бо, боголѣ́пно безсме́ртно творя́ прія́тіе: пло́ть бо Твоя́ истлѣ́нія не ви́дѣ Влады́ко, ниже́ душа́ Твоя́ во а́дѣ страннолѣ́пно оста́влена бы́сть.

Изъ Небра́чныя проше́дъ, и прободе́нъ въ ре́бра, Содѣ́телю мо́й, изъ Нея́ содѣ́лалъ еси́ обновле́ніе Евино, Ада́мъ бы́въ, усну́въ па́че естества́ сномъ есте́ственнымъ, и жи́знь воздви́гнувъ отъ сна́ и тлѣ́нія, я́ко Всеси́ленъ.

Пѣ́снь 6.

Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго, и погребе́нію да́вшагося, я́ко отъ черто́га отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Біе́нъ былъ еси́, но не раздѣли́лся еси́, Сло́ве, ея́же причасти́лся еси́ пло́ти: а́ще бо и разори́ся Тво́й хра́мъ во вре́мя стра́сти, но и та́ко еди́нъ бѣ́ соста́въ Божества́ и пло́ти Твоея́. Во обои́хъ бо Еди́нъ еси́ Сы́нъ, Сло́во Бо́жіе, Бо́гъ и Человѣ́къ.

Человѣкоубíйственно, но не богоубíйственно бы́сть прегрѣше́ніе Ада́мово: а́ще бо и пострада́ Твоея́ пло́ти пе́рстное существо́, но Божество́ безстра́стно пребы́сть, тлѣ́нное же Твое́ на нетлѣ́ніе преложи́лъ еси́, и нетлѣ́нныя жи́зни показа́лъ еси́ исто́чникъ Воскресе́ніемъ.

Ца́рствуетъ а́дъ, но не вѣ́чнуетъ надъ ро́домъ человѣ́ческимъ: Ты́ бо поло́жся во гро́бѣ, Держа́вне, живонача́льною дла́нію, сме́рти ключи́ разве́рглъ еси́ и проповѣ́далъ еси́ отъ вѣ́ка та́мо спя́щимъ, избавле́ніе нело́жное бы́въ, Спа́се, ме́ртвымъ Пе́рвенецъ.

Конда́къ, гла́съ 6:

Бе́здну Заключи́вый ме́ртвъ зри́тся, и сми́рною и плащани́цею обви́вся, во гро́бѣ полага́ется я́ко сме́ртный Безсме́ртный. Жены́ же пріидо́ша пома́зати Его́ мѵ́ромъ, пла́чущія го́рько и вопію́щія: сія́ суббо́та е́сть преблагослове́нная, въ не́йже Христо́съ усну́въ, воскре́снетъ тридне́венъ.

Икосъ:

Содержа́й вся́ на Кре́стъ вознесе́ся, и рыда́етъ вся́ тва́рь, Того́ ви́дящи на́га ви́сяща на дре́вѣ: со́лнце лучи́ сокры́ и звѣ́зды отложи́ша свѣ́тъ, земля́ же со мно́гимъ стра́хомъ поколеба́ся, и мо́ре побѣже́, и ка́меніе распаде́ся, гро́би же мно́ги отверзо́шася и тѣлеса́ воста́ша святы́хъ муже́й. Адъ ни́зу сте́нетъ и іуде́е совѣ́туютъ оклевета́ти Христо́во Воскресе́ніе. Жены́ же взыва́ютъ: сія́ суббо́та есть преблагослове́нная, въ не́йже Христо́съ, усну́въ, воскре́снетъ тридне́венъ.

Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене, во гро́бѣ ме́ртвъ бездыха́ненъ полага́ется, во спасе́ніе на́съ пою́щихъ: Изба́вителю Бо́же, благослове́нъ еси́.

Уязви́ся а́дъ, въ се́рдцѣ пріе́мъ Уя́звеннаго копіе́мъ въ ре́бра, и воздыха́етъ, огне́мъ Боже́ственнымъ иждива́емь, во спасе́ніе на́съ, пою́щихъ: Изба́вителю Бо́же, благослове́нъ еси́!

Бога́тъ гро́бъ, въ себѣ́ бо пріи́мъ я́ко спя́ща Содѣ́теля, жи́зни Боже́ственное сокро́вище показа́ся, во спасе́ніе на́съ, пою́щихъ: Изба́вителю Бо́же, благослове́нъ еси́.

Зако́номъ уме́ршихъ е́же во гро́бѣ положе́ніе, всѣ́хъ пріе́млетъ Жи́знь, и сего́ исто́чника показу́етъ воста́нія, во спасе́ніе на́съ, пою́щихъ: Изба́вителю Бо́же, благослове́нъ еси́.

Еди́но бя́ше неразлу́чное, е́же во а́дѣ, и во гро́бѣ, и во Еде́мѣ, Божество́ Христо́во, со Отце́мъ и Ду́хомъ, во спасе́ніе на́съ, пою́щихъ: Изба́вителю Бо́же, благослове́нъ еси́.

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Разруши́ся Пречи́стый хра́мъ, па́дшую же совозставля́етъ ски́нію: Ада́му бо пе́рвому Вторы́й, Иже въ вы́шнихъ Живы́й, сни́де да́же до а́довыхъ сокро́вищь. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Преста́ де́рзость ученико́въ, Аримаѳе́й же изря́дствуетъ Іо́сифъ: ме́ртва бо и на́га зря́, надъ всѣ́ми Бо́га, про́ситъ и погреба́етъ, зовы́й: о́троцы благослови́те, свяще́нницы воспо́йте, лю́діе, превозноси́те во вся́ вѣ́ки.

О, чуде́съ но́выхъ! О, бла́гости! О, неизрече́ннаго терпѣ́нія! Во́лею бо подъ земле́ю печатлѣ́ется, Иже въ вы́шнихъ Живы́й, и я́ко льсте́цъ, Бо́гъ оклевета́ется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Пѣ́снь 9.

Ирмо́съ: Не рыда́й Мене́, Ма́ти, зря́щи во гро́бѣ, Его́же во чре́вѣ безъ сѣ́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́гъ, вѣ́рою и любо́вію Тя́ велича́ющія.

Въ стра́ннѣмъ Твое́мъ рождествѣ́ болѣ́зней избѣжа́вше па́че естества́, ублажи́хся, Безнача́льне Сы́не; ны́нѣ же Тя́, Бо́же мо́й, бездыха́нна зря́щи ме́ртва, ору́жіемъ печа́ли растерза́юся лю́тѣ; но воскресни́, я́ко да возвели́чуся.

Земля́ покрыва́етъ Мя́ хотя́ща, но устраша́ются а́довы вра́тницы, одѣ́яна ви́дяще оде́ждею окровавле́ною, Ма́ти, отмще́нія: враги́ бо Кресто́мъ порази́въ, я́ко Бо́гъ, воскре́сну па́ки и возвели́чу Тя́.

Да ра́дуется тва́рь, да веселя́тся вси́ земноро́дніи, вра́гъ бо плѣни́ся а́дъ: съ мѵ́ры жены́ да срѣта́ютъ, Ада́ма со Евою избавля́ю всеро́дна, и въ тре́тій де́нь воскре́сну.

Трисвято́е, и по Отче на́шъ.

Тропа́рь, гла́съ 2:

Егда́ снизше́лъ еси́ къ сме́рти, Животе́ безсме́ртный, тогда́ а́дъ умертви́лъ еси́ блиста́ніемъ Божества́. Егда́ же и уме́ршія отъ преиспо́днихъ воскреси́лъ еси́, вся́ си́лы небе́сныя взыва́ху: Жизнода́вче, Христе́ Бо́же на́шъ, сла́ва Тебѣ́.

Посе́мъ ектенія́: Поми́луй на́съ, Бо́же...
И отпу́стъ.

Источникъ: Послѣдованіе во святую и Великую недѣлю Пасхи и во всю Свѣтлую седмицу. — М.: Сѵнодальная Тѵпография, 1899. — Л. 2 – 8.


Уставъ совершенія Пасхальной полунощницы:

Въ концѣ полуношницы, по установившейся богослужебной практикѣ, совершается перенесеніе плащаницы съ средины храма въ алтарь. Дѣлается это такимъ образомъ. Полунощницу іерей служитъ въ одной епитрахили, но въ началѣ 9-й пѣсни канона возлагаетъ на себя еще фелонь; облачается и діаконъ. Царскія двери отверзаются, и черезъ нихъ проходятъ священнослужители. Іерей кадитъ плащаницу. Когда на катавасіи запоютъ слова: Возстану бо и прославлюся.., возлагаетъ ее на голову и безмолвно чрезъ царскія двери переноситъ въ алтарь. Здѣсь кладетъ ее на престолъ и снова кадитъ, послѣ чего царскія двери затворяются, а іерей снимаетъ съ себя фелонь, діаконъ также разоблачается. Плащаница остается на престолѣ до отданія Пасхи. Перенесеніе плащаницы можетъ быть совершаемо и во время пѣнія тропаря: Егда снизшелъ еси...

Примѣчанія:
[1] Разумѣются пѣсни Свящ. Писанія: Поимъ Господеви... [въ праздничной редакціи].
[2] Это можно понимать такъ: Іерей: Слава Тебѣ, Христе Боже... Ликъ: Слава, и нынѣ. Господи, помилуй 3. Благослови. Священникъ внѣ алтаря: Воскресый изъ мертвыхъ, Христосъ истинный Богъ... Ликъ: Господи, помилуй 3..

Источникъ: Богослужебный Уставъ Православной Церкви. Опытъ изъяснительнаго изложенія порядка богослуженія Православной Церкви. — Составилъ смотритель Дмитровскаго Духовнаго училища, магистръ богословія Василій Розановъ. — М.: Типо-литографія А. В. Васильева, 1902. — С. 651.

/ Къ оглавленію раздѣла /


Наверхъ / Къ титульной страницѣ

0