Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

ТРІОДЬ ЦВѢТНАЯ.

НЕДѢЛЯ ВСѢХЪ СВЯТЫХЪ.

ВЪ СУББОТУ ВЕЧЕРА, НА МАЛѢЙ ВЕЧЕРНИ,
На Го́споди воззва́хъ: поста́вимъ стихи́ 4 и пое́мъ стихи́ры воскре́сны 4, гла́съ 8:

Го́споди, Го́споди, не отве́ржи [насъ отъ Твоего́ лица́, но благоволи́ поми́ловати насъ Воскресе́ніемъ].

Ра́дуйся, Сіо́не [святы́й, ма́ти церкве́й, Бо́жіе жили́ще, Ты́ бо прія́лъ еси́ пе́рвый, оставле́ніе грѣхо́въ, Воскресе́ніемъ].

Еже отъ Бо́га Отца́ Сло́во, [пре́жде вѣ́къ Ро́ждшееся, въ послѣ́дняя же времена́, То́ежде отъ Неискусобра́чныя вопло́щшееся во́лею, распя́тіе сме́ртное претерпѣ́ и дре́вле умерщвле́ннаго человѣ́ка спасе́ Свои́мъ Воскресе́ніемъ].

Сла́ва, гла́съ 6:

Му́ченикъ боже́ственный ли́къ, [Це́ркви основа́ніе, благовѣ́стію сконча́ніе, вы́ дѣ́ломъ Спа́сова глаго́ланія испо́лнисте, ва́ми бо врата́ а́дова, на Це́рковь отве́рзшаяся, заключи́шася, кро́ве ва́шея ли́тіе и́дольскія же́ртвы изсуши́, закла́ніе ва́ше породи́ церко́вное исполне́ніе, безпло́тныхъ удиви́сте, Бо́гу вѣнцено́сцы предстоите́, Его́же непреста́нно моли́те о душа́хъ на́шихъ].

И ны́нѣ, богоро́диченъ догма́тикъ, гла́съ 8:

Ка́ко Тя́ ублажи́мъ, Богоро́дице? Ка́ко же воспое́мъ, Преблагослове́нная, непостижи́мое та́инство рожде́нія Твоего́? Вѣко́въ бо Творе́цъ и на́шего Содѣ́тель естества́, Сво́й о́бразъ уще́дривъ, низведе́ Самаго́ Себе́ во истоща́ніе неизслѣ́димое, Сы́й въ невеще́ственныхъ нѣ́дрѣхъ Отчихъ, во утро́бѣ Твое́й, Чи́стая, всели́ся, и пло́ть непрело́жно бы́сть, отъ Тебе́, Неискусобра́чная, пребы́въ у́бо е́же бѣ́ естество́мъ Бо́гъ. Тѣ́мже Ему́ покланя́емся, Бо́гу соверше́нну и Человѣ́ку соверше́нну, Тому́ во обое́мъ зра́цѣ, и́бо о́ба естества́ въ Не́мъ су́ть вои́стинну. Сугу́ба же вся́ проповѣ́дуемъ есте́ственная Его́ сво́йства, по сугу́бому существу́, два́ почита́юще дѣ́йства и хотѣ́нія: единосу́щенъ бо сы́й Бо́гу и Отцу́, самовла́стно хо́щетъ и дѣ́йствуетъ, я́ко Богъ; единосу́щенъ же сы́й и на́мъ, самовла́стно хо́щетъ и дѣ́йствуетъ, я́ко Человѣ́къ. Того́ моли́, Чи́стая Всеблаже́нная, спасти́ся душа́мъ на́шимъ.

На стихо́внѣ стихи́ра воскре́сна, [гла́съ 8:]

Возше́лъ еси́ на Кре́стъ, Іису́се, снизше́дый съ небесе́, прише́лъ еси́ на сме́рть, Животе́ Безсме́ртный, къ су́щимъ во тьмѣ́ Свѣ́тъ и́стинный, къ па́дшимъ всѣ́хъ Воскресе́ніе, Просвѣще́ніе, и Спа́се на́шъ, сла́ва Тебѣ́.

Та́же богоро́дичны, подо́бны 3, гла́съ 8. О, пресла́внаго чудесе́!

Сти́хъ: Помяну́ и́мя Твое́ во вся́комъ ро́дѣ и ро́дѣ.

Ра́дуйся, Богоро́дице Всепѣ́тая. Ра́дуйся, исто́чниче, жи́знь вѣ́рнымъ источа́ющій. Ра́дуйся, всѣ́хъ Влады́чице и Госпоже́ тва́ри Благослове́нная. Ра́дуйся, Всенепоро́чная, Препросла́вленная. Ра́дуйся, Всепречи́стая. Ра́дуйся, пала́то. Ра́дуйся, Боже́ственное селе́ніе. Ра́дуйся, Чи́стая. Ра́дуйся, Ма́ти Дѣ́во. Ра́дуйся Богоневѣ́сто.

Сти́хъ: Слы́ши, Дщи́, и ви́ждь, и приклони́ у́хо Твое́.

Ра́дуйся, Богома́ти Пречи́стая. Ра́дуйся, вѣ́рныхъ наде́жде. Ра́дуйся, мíра очище́ніе. Ра́дуйся, вся́кія ско́рби избавля́ющи рабы́ Твоя́. Ра́дуйся, человѣ́ковъ утѣше́ніе живоно́сное. Ра́дуйся, заступле́ніе. Ра́дуйся, предсто́лпіе призыва́ющимъ Тя́. Ра́дуйся, Бо́жіе Боже́ственное пребыва́ніе и горо́ свята́я.

Сти́хъ: Лицу́ Твоему́ помо́лятся бога́тіи лю́дстіи.

Ра́дуйся, Богоро́дице, Ма́ти Христо́ва. Ра́дуйся, еди́на наде́жде, человѣ́ковъ заступле́ніе. Ра́дуйся, прибѣ́жище. Ра́дуйся, свѣ́щниче Свѣ́та свѣ́тлый. Ра́дуйся, свѣще́ освяще́нная. Ра́дуйся, пала́то. Ра́дуйся, раю́. Ра́дуйся, Боже́ственное селе́ніе. Ра́дуйся, исто́чниче, источа́ющъ во́ды притека́ющимъ къ Тебѣ́.

Сла́ва, и ны́нѣ, богоро́диченъ:

Его́же не́бо не вмѣсти́, Дѣ́во Богоро́дице, во чре́вѣ Твое́мъ нетѣсномѣ́стно вмѣсти́ся, и пребыла́ еси́, Чи́стая, сло́вомъ неизрече́ннымъ, ничи́мже дѣ́вству оскве́рншуся. Ты́ бо еди́на была́ еси́ въ жена́хъ, и Ма́ти, и Дѣ́ва. И Ты́, еди́на Пречи́стая, воздои́ла еси́ Сы́на Живода́вца и на объя́тіяхъ Твои́хъ носи́ла еси́ недре́млющее Око. Но не оста́ви нѣ́дра Отча, я́коже пре́жде вѣкъ предбы́сть: но горѣ́ ве́сь Бо́гъ со а́нгелы, до́лѣ ве́сь изъ Тебе́ съ человѣ́ки, и вездѣ́ несказа́нно. Того́ моли́, Всесвята́я Влады́чице, спасти́ся правосла́вно Богоро́дицу Чи́стую исповѣ́дающимъ Тя́.

По Ны́нѣ отпуща́еши... И по Отче на́шъ...

Тропа́рь воскре́сенъ, [гла́съ 8:

Съ высоты́ снизше́лъ еси́, Благоутро́бне, погребе́ніе прія́лъ еси́ тридне́вное, да на́съ свободи́ши страсте́й, Животе́ и Воскресе́ніе на́ше, Го́споди, сла́ва Тебѣ́!]

Сла́ва, и ны́нѣ, богоро́диченъ:

[Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]

Ектеніи́. И отпу́стъ.



НА ВЕЛИЦЕЙ ВЕЧЕРНИ,
По обы́чномъ псалмѣ́ пе́рвую каѳи́сму всю́. На Го́споди воззва́хъ: поста́вимъ стихо́въ 10 и пое́мъ стихи́ры воскре́сны 3, и восто́чны [Анато́ліевы3, и святы́хъ 4.
Стихи́ры воскре́сны, гла́съ 8:

Вече́рнюю пѣ́снь, и слове́сную слу́жбу, Тебѣ́, Христе́, прино́симъ, я́ко благоволи́лъ еси́ поми́ловати на́съ Воскресе́ніемъ.

Го́споди, Го́споди, не отве́ржи насъ отъ Твоего́ лица́, но благоволи́ поми́ловати насъ Воскресе́ніемъ.

Ра́дуйся, Сіо́не святы́й, ма́ти церкве́й, Бо́жіе жили́ще, Ты́ бо прія́лъ еси́ пе́рвый, оставле́ніе грѣхо́въ, Воскресе́ніемъ.

Восто́чны [Анато́ліевы]:

Еже отъ Бо́га Отца́ Сло́во, пре́жде вѣ́къ Ро́ждшееся, въ послѣ́дняя же времена́, То́ежде отъ Неискусобра́чныя вопло́щшееся во́лею, распя́тіе сме́ртное претерпѣ́ и дре́вле умерщвле́ннаго человѣ́ка спасе́ Свои́мъ Воскресе́ніемъ.

Еже изъ ме́ртвыхъ Твое́ Воскресе́ніе славосло́вимъ, Христе́, и́мже свободи́лъ еси́ Ада́мскій ро́дъ отъ а́дова мучи́тельства, и дарова́лъ еси́ мíрови, я́ко Бо́гъ, жи́знь вѣ́чную и ве́лію ми́лость.

Сла́ва Тебѣ́, Христе́ Спа́се, Сы́не Бо́жій Единоро́дный, пригвозди́выйся на Крестѣ́ и воскресы́й изъ гро́ба тридне́венъ.

Стихи́ры всѣ́мъ святы́мъ, гла́съ 6. Подо́бенъ: Все́ отло́жше.

Духо́вніи вѣтíи, ученицы́ Спа́совы, Ду́ху орга́ни бы́вше вѣ́рою, разсѣ́яшася въ концы́ земли́, честно́е проповѣ́даніе правосла́внѣ сѣ́юще, отъ ни́хже прозябо́ша Боже́ственнымъ земледѣ́ліемъ, и благода́тію му́ченикъ во́инства, стра́сть честну́ю образу́юща, многообра́зными раздробле́ній ра́нами и огне́мъ, и со дерзнове́ніемъ мо́лятся о душа́хъ на́шихъ.

Огне́мъ воспаля́еми Госпо́дни любве́, огня́ презрѣ́ша, и я́ко Боже́ственное у́гліе возжига́еми честнíи му́ченицы во Христѣ́, попали́ша хвра́стное ле́сти шата́ніе, звѣре́й же загради́ша уста́ честны́мъ призыва́ніемъ, и во главы́ усѣка́еми, посѣко́ша врага́ вся́ ополче́нія, и крове́й пролива́юще пото́ки терпѣли́вно, Це́рковь напои́ша вѣ́рою просвѣща́ему.

Со звѣрьми́ бра́вшеся, біе́ми мече́мъ, ноготьми́ растерза́еми, рука́ми отъе́млеми, и му́чими тве́рдіи му́ченицы, и огне́мъ веще́ственнымъ неща́дно пали́ми, и пробода́еми, и соста́вы ссѣца́еми, претерпѣ́ша твердѣ́йше, упокое́ніе предви́дѣша бу́дущее, и нетлѣ́нныя вѣнцы́, и сла́ву Христа́, Ему́же со дерзнове́ніемъ мо́лятся о душа́хъ на́шихъ.

Во всѣ́хъ концѣ́хъ страда́вшія вѣ́рно апо́столы, му́ченики, свяще́нники богому́дрыя, честны́хъ женъ свяще́нное стека́ніе, свяще́нными пѣ́сньми по до́лгу восхва́лимъ, я́ко соедини́шася небе́снымъ земнíи, и страстьми́ безстра́стіе благода́тію Христо́вою прія́ша, и ны́нѣ, я́ко звѣ́зды свѣ́тлыя, озаря́юще на́съ, со дерзнове́ніемъ мо́лятся о душа́хъ на́шихъ.

Сла́ва, гла́съ то́йже:

Му́ченикъ боже́ственный ли́къ, Це́ркви основа́ніе, благовѣ́стію сконча́ніе, вы́ дѣ́ломъ Спа́сова глаго́ланія испо́лнисте, ва́ми бо врата́ а́дова, на Це́рковь отве́рзшаяся, заключи́шася, кро́ве ва́шея ли́тіе и́дольскія же́ртвы изсуши́, закла́ніе ва́ше породи́ церко́вное исполне́ніе, безпло́тныхъ удиви́сте, Бо́гу вѣнцено́сцы предстоите́, Его́же непреста́нно моли́те о душа́хъ на́шихъ.

И ны́нѣ, богоро́диченъ, гла́съ 8:

Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Вхо́дъ. Свѣ́те ти́хій... Проки́менъ дне́: Госпо́дь воцари́ся... И чте́нія.

Проро́чества Иса́іина чте́ніе. [Глава́ 43]:

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ра хра́ма. Та́же самогла́сны святы́хъ всѣ́хъ, гласъ 1:

Вѣ́ры согла́сіемъ мірско́е торжество́, отъ вѣ́ка Бо́гу благоугоди́вшихъ, патріа́рховъ честно́е и проро́ковъ сосло́віе, апо́столовъ удобре́ніе, му́чениковъ собра́ніе, по́стниковъ похвалу́, всѣ́хъ святы́хъ па́мять духо́внѣ пра́зднуимъ, мо́лятъ бо ся непреста́нно, дарова́тися ми́ру мíрови, и душа́мъ на́шимъ ве́ліей ми́лости.

Пріиди́те, вси́ вѣ́рніи, святы́хъ всѣ́хъ всесла́вную па́мять, во псалмѣ́хъ, пѣ́ніихъ и пѣ́снехъ духо́вныхъ восхва́лимъ, Крести́теля Спаси́телева, апо́столы, проро́ки и му́ченики, священнонача́льники, учи́тели же и преподо́бныя, по́стники и пра́ведныя, и святы́хъ же́нъ боголю́бное состоя́ніе, че́стно ублажа́юще, согла́сно возопіи́мъ: преблагíй Христе́ Бо́же на́шъ, тѣ́хъ моли́твами пода́ждь ми́ръ Це́рквамъ Твои́мъ, побѣ́ды на враги́ христолюби́вому Импера́тору, и душа́мъ на́шимъ ве́лію ми́лость.

Пріиди́те вси́ духо́внѣ возвесели́мся о па́мяти святы́хъ, се́ бо пріи́де богатотво́рная на́мъ дарова́нія принося́щи. Тѣ́мже во гла́сѣ ра́дости и чи́стѣй со́вѣсти возопіи́мъ, глаго́люще: ра́дуйтеся, проро́ковъ сосло́віе, и́же прише́ствіе Христо́во мíрови проповѣ́давше, и я́же издале́ча, я́ко бли́зу предви́дѣвше; ра́дуйтеся, апо́стольскій ли́че, язы́ковъ мре́жницы и ловцы́ человѣ́ковъ; ра́дуйтеся, му́чениковъ собо́ре, отъ коне́цъ земли́ собра́вшіися во еди́ну вѣ́ру, и о то́й му́къ томле́нія претерпѣ́вшіи, и соверше́ннѣ страда́нія вѣне́цъ пріе́мшіи; ра́дуйтеся, отце́въ наслажде́ніе, своя́ тѣлеса́ поще́ніемъ иста́явше и умертви́вше стра́сти плотскíя, у́мъ боже́ственнымъ раче́ніемъ впери́сте, на небеса́ возлетѣ́сте, и со а́нгелы водворя́ющеся, воспріе́млете вѣ́чная блага́я. Но, о проро́цы, апо́столи, и му́ченицы съ по́стники! Ва́съ Вѣнча́вшаго прилѣ́жно моли́те, изба́витися отъ вра́гъ ви́димыхъ и неви́димыхъ, въ вѣ́рѣ и любви́ соверша́ющимъ при́сно честну́ю па́мять ва́шу.

Сла́ва, гла́съ 5:

Ны́нѣшнему торжеству́ стеце́мся, вѣ́рніи, предлага́ется и на́мъ духо́вная трапе́за, и ча́ша та́инственная отъ сла́дкихъ бра́шенъ, весе́лія испо́лнена му́ченическихъ добродѣ́телей. Сíи бо терпѣливоду́шніи отъ коне́цъ земли́, тѣле́сное всеразли́чнымъ преда́вше ра́намъ, Бо́гу принесо́ша же́ртву слове́сну, вся́кій во́зрастъ: о́ви у́бо во главы́ усѣка́еми, о́віи же по хребту́ стру́жеми, друзíи же ру́къ отсѣче́ніе и всѣ́хъ удо́въ, вси́ вку́пѣ святíи Христо́вымъ страда́ніемъ о́бщницы бы́ша. Но вѣнцы́ тѣ́мъ возме́здіе му́къ пода́вый, Го́споди, во слѣ́дъ тѣ́хъ жи́тельствовати сподо́би на́съ, я́ко Человѣколю́бецъ.

И ны́нѣ, богоро́диченъ, гла́съ то́йже:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На стихо́внѣ стихи́ры воскре́сны, гла́съ 8:

Возше́лъ еси́ на Кре́стъ, Іису́се, снизше́дый съ небесе́, прише́лъ еси́ на сме́рть, Животе́ Безсме́ртный, къ су́щимъ во тьмѣ́ Свѣ́тъ и́стинный, къ па́дшимъ всѣ́хъ Воскресе́ніе, Просвѣще́ніе, и Спа́се на́шъ, сла́ва Тебѣ́.

Ины стихи́ры восто́чны [Анато́ліевы], по алфави́ту.

Сти́хъ: Госпо́дь воцари́ся, въ лѣ́поту облече́ся.

Христа́ славосло́вимъ, воскре́сшаго отъ ме́ртвыхъ, ду́шу бо и тѣ́ло пріе́мъ, стра́сти отобою́ду отсѣче́, пречи́стѣй у́бо души́ во а́дъ соше́дшей, его́же и плѣни́, во гро́бѣ же истлѣ́нія не ви́дѣ свято́е тѣ́ло Изба́вителя ду́шъ на́шихъ.

Сти́хъ: Ибо утверди́ вселе́нную, я́же не подви́жется.

Псалмы́ и пѣ́сньми славосло́вимъ, Христе́, отъ ме́ртвыхъ Твое́ Воскресе́ніе, и́мже насъ свободи́лъ еси́ мучи́тельства а́дова, и, я́ко Богъ, дарова́лъ еси́ жи́знь вѣ́чную, и ве́лію ми́лость.

Сти́хъ: До́му Твоему́ подоба́етъ [святы́ня, Го́споди, въ долготу́ днíй].

О, Влады́ко всѣ́хъ непостижи́ме, Тво́рче небесе́ и земли́! Кресто́мъ пострада́вый, мнѣ́ безстра́стіе источи́лъ еси́, погребе́ніе же пріе́мъ и воскре́съ во сла́вѣ, совоскреси́лъ еси́ Ада́ма руко́ю всеси́льною. Сла́ва Твоему́ тридне́вному воста́нію, и́мже дарова́лъ еси́ на́мъ вѣ́чную жи́знь и очище́ніе грѣхо́въ, я́ко еди́нъ Благоутро́бенъ.

Сла́ва, гла́съ 6:

Пріиди́те, вѣ́рніи, дне́сь ли́къ совокупи́вше, благоче́стно торжеству́имъ, и всѣ́хъ святы́хъ пресла́вную и честну́ю па́мять сла́вно почти́мъ, глаго́люще: ра́дуйтеся, апо́столи сла́вніи, проро́цы, и му́ченицы, и священнонача́льницы; ра́дуйтеся, преподо́бныхъ собо́ре и пра́ведныхъ; ра́дуйтеся, честны́хъ же́нъ ли́че, и Христа́ о мíрѣ моли́те, побѣ́ды Импера́тору на ва́рвары дарова́ти, и душа́мъ на́шимъ ве́лію ми́лость.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

По Трисвято́мъ тропа́рь: Богоро́дице Дѣ́во, ра́дуйся.., два́жды. И святы́хъ еди́нощи. И благослове́ніе хлѣ́бовъ. И чте́ніе Посла́нія собо́рнаго Іа́ковля.

[Зри́:] Аще ли у́бо не твори́тся бдѣ́ніе, на Го́споди воззва́хъ: воскре́сны 3: и восто́ченъ [Анато́ліевъ] еди́нъ, и святы́хъ на 6. Подо́бенъ: Все́ отло́жше. По Трисвято́мъ тропа́рь воскре́сенъ. Сла́ва, святы́мъ. И ны́нѣ, богоро́диченъ. [Пи́саны въ нача́лѣ у́трени.] И отпу́стъ. На Полу́нощницѣ кано́нъ Тро́ичный отъ окто́иха, гла́са.


ВЪ НЕДѢЛЮ ВСѢХЪ СВЯТЫХЪ НА УТРЕНИ,
На Богъ Госпо́дь: тропа́рь воскре́сный, гла́съ 8:

Съ высоты́ снизше́лъ еси́, Благоутро́бне, погребе́ніе прія́лъ еси́ тридне́вное, да на́съ свободи́ши страсте́й, Животе́ и Воскресе́ніе на́ше, Го́споди, сла́ва Тебѣ́. [Два́жды.]

Сла́ва, святы́мъ тропа́рь, гла́съ 4:

Иже во все́мъ мíрѣ му́ченикъ Твои́хъ, я́ко багряни́цею и ви́ссомъ, кровьми́ Це́рковь Твоя́ украси́вшися, тѣ́ми вопіе́тъ Ти́, Христе́ Бо́же: лю́демъ Твои́мъ щедро́ты Твоя́ низпосли́, ми́ръ жи́тельству Твоему́ да́руй, и душа́мъ на́шимъ ве́лію ми́лость.

И ны́нѣ, богоро́диченъ:

Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

По 1-мъ стихосло́віи сѣда́ленъ воскре́сенъ, гла́съ 8:

Воскре́слъ еси́ изъ ме́ртвыхъ, Животе́ всѣ́хъ, и а́нгелъ свѣ́та жена́мъ вопія́ше: преста́ните отъ сле́зъ, апо́столомъ благовѣсти́те, возопíйте пою́ща: я́ко воскре́се Христо́съ Госпо́дь, благоволи́вый спасти́, я́ко Бо́гъ, ро́дъ человѣ́ческій.

Сти́хъ: Воскресни́ Го́споди Бо́же мой, [да вознесе́тся рука́ Твоя́, не забу́ди убо́гихъ Твои́хъ до конца́].

Человѣ́цы, Спа́се, гро́бъ Твой запеча́таша, а́нгелъ ка́мень отъ две́рей отвали́, жены́ ви́дѣша воста́вша изъ ме́ртвыхъ, и ты́я благовѣсти́ша ученико́мъ Твои́мъ въ Сіо́нѣ: я́ко воскре́слъ еси́, Животе́ всѣ́хъ, и разрѣши́шася у́зы сме́ртныя, Го́споди, сла́ва Тебѣ́.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.

И чте́ніе во Ева́нгеліи толково́мъ.

По 2-мъ стихосло́віи сѣда́ленъ, гла́съ 8. Подо́бенъ: Повелѣ́нное та́йно.

Бѣлонося́й Гавріи́лъ свѣ́телъ предста́, я́ко въ ви́дѣ мо́лніи, Христо́ву гро́бу, и ка́мень отвали́ отъ гро́ба, и стра́хъ ве́лій содержа́ше Твоя́ стра́жи, и внеза́пу пребы́ша вси́ а́ки ме́ртвіи. Отъ гро́ба страже́й, и ка́мене печа́ти устыди́теся, пребеззако́нніи, разумѣ́йте, я́ко воскре́се Христо́съ.

Другíй сѣда́ленъ. Подо́бенъ: Прему́дрости Сло́ва.

Воскре́съ отъ гро́ба, я́ко вои́стинну, преподо́бнымъ повелѣ́лъ еси́ жена́мъ проповѣ́дати воста́ніе апо́столомъ, я́коже пи́сано е́сть: и ско́рый Пе́тръ предста́ гро́бу и, свѣ́тъ во гро́бѣ зря́, ужаса́шеся. Тѣ́мже и ви́дѣ плащани́цы еди́ны, кромѣ́ Боже́ственнаго тѣ́ла, въ не́мъ лежа́щія, со стра́хомъ возопи́: сла́ва Тебѣ́, Христе́ Бо́же, я́ко спаса́еши вся, Спа́се на́шъ, Отчее бо еси́ сія́ніе.

Сла́ва, и ны́нѣ, богоро́диченъ [не сѣдя́ще пое́мъ, но стоя́ще, и со стра́хомъ и благоговѣ́ніемъ глаго́лемъ настоя́щій]:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся, и Младе́нецъ бы́сть, пре́жде вѣ́къ Сы́й Бо́гъ на́шъ: ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

И чте́ніе во Ева́нгеліи толково́мъ.

По Непоро́чнахъ тропари́: Ангельскій собо́ръ... И по ни́хъ ипакои́, гла́съ 8:

Мѵроно́сицы Жизнода́вца предстоя́ща гро́бу, Влады́ку иска́ху въ ме́ртвыхъ, Безсме́ртнаго, и ра́дость благовѣ́щенія отъ а́нгела пріе́мша, апо́столомъ возвѣща́ху: я́ко воскре́се Христо́съ Бо́гъ, подая́й мíрови ве́лію ми́лость.

Степе́нна, гла́съ 8. Антифо́нъ 1:

Отъ ю́ности моея́ вра́гъ мя́ искуша́етъ, сластьми́ пали́тъ мя́, а́зъ же надѣ́яся на Тя́, Го́споди, побѣжда́ю сего́.

Ненави́дящіи Сіо́на, да бу́дутъ у́бо пре́жде исторже́нія я́ко трава́, ссѣче́тъ бо Христо́съ вы́я и́хъ, усѣче́ніемъ му́къ.

Сла́ва: Святы́мъ Ду́хомъ, Еже жи́ти вся́ческимъ, Свѣ́тъ отъ Свѣ́та, Бо́гъ вели́къ, со Отце́мъ пое́мъ Ему́, и съ Сло́вомъ.

И ны́нѣ, то́йже.

Антифо́нъ 2:

Се́рдце мое́ стра́хомъ Твои́мъ да покры́ется смиренному́дрствующее, да не возне́сшееся отпаде́тъ отъ Тебе́, Всеще́дре.

На Го́спода имѣ́вый наде́жду, не устраши́тся тогда́, егда́ огне́мъ вся́ суди́ти и́мать, и му́кою.

Сла́ва: Святы́мъ Ду́хомъ, вся́къ кто́ боже́ственный ви́дитъ, и предглаго́летъ, чудодѣ́йствуетъ вы́шняя, въ Тріе́хъ Еди́наго Бо́га поя́. Аще бо и трисія́етъ, единонача́льствуетъ Божество́.

И ны́нѣ, то́йже.

Антифо́нъ 3:

Воззва́хъ Тебѣ́, Го́споди, вонми́, приклони́ ми́ у́хо Твое́, вопію́щу, и очи́сти, пре́жде да́же не во́змеши мене́ отсю́ду.

Къ ма́тери свое́й земли́ отходя́й вся́къ, па́ки разрѣша́ется, прія́ти му́ки, или́ по́чести пожи́вшихъ.

Сла́ва: Святы́мъ Ду́хомъ, богосло́віе Еди́ница Трисвята́я, Оте́цъ бо безнача́ленъ, отъ Него́же роди́ся Сы́нъ безлѣ́тно, и Ду́хъ сопресто́ленъ, сообра́зенъ, отъ Отца́ спросія́вшій.

И ны́нѣ, то́йже.

Антифо́нъ 4:

Се́ ны́нѣ что́ добро́, или́ что́ красно́, но е́же жи́ти бра́тіи вку́пѣ? Въ се́мъ бо Госпо́дь обѣща́ живо́тъ вѣ́чный.

О ри́зѣ свое́й, Иже кри́ны се́льныя украша́яй повелѣва́етъ, я́ко не подоба́етъ пещи́ся.

Сла́ва: Святы́мъ Ду́хомъ, единови́дною вино́ю, вся́ содержа́тся миропода́тельнѣ, Бо́гъ бо Се́й е́сть, Отцу́ же и Сы́нови единосу́щенъ Госпо́дственнѣ.

И ны́нѣ, то́йже.

Проки́менъ, гла́съ 8: Воцари́тся Госпо́дь во вѣ́къ,* Бо́гъ тво́й, Сіо́не, въ ро́дъ и ро́дъ. Сти́хъ: Хвали́, душе́ моя́, Го́спода, восхвалю́ Го́спода въ животѣ́ мое́мъ. Вся́кое дыха́ніе... Ева́нгеліе отъ Матѳе́я воскре́сно, 1-е у́треннее, зача́ло 116: [Во вре́мя о́но,] единіина́десять ученицы́... [Зри́:] Отъ сего́ у́бо дне́ у́тренняя Ева́нгелія воскре́сна начина́емъ чести́ по ря́ду. Воскресе́ніе Христо́во... И псало́мъ 50-й. Сла́ва: Моли́твами святы́хъ апо́столовъ... И ны́нѣ: Моли́твами Богоро́дицы... Стихи́ра, гла́съ 6: Воскре́съ Іису́съ отъ гро́ба...

Кано́ны 4: воскре́сенъ со ирмосо́мъ на 4, крестовоскре́сенъ на два́, и Богоро́дицѣ на два́, и всѣ́мъ святы́мъ на 6.

Кано́нъ воскре́сенъ, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Всеси́льну Христо́ву Божеству́ ка́ко не диви́мся? Отъ страсте́й у́бо всѣ́мъ вѣ́рнымъ, безстра́стіе и нетлѣ́ніе точа́щу, отъ ребра́ же свята́го исто́чникъ безстра́стія иска́пающу, и Живо́тъ изъ гро́ба Присносу́щный.

Яко благолѣ́пенъ жена́мъ а́нгелъ ны́нѣ яви́ся, свѣ́тлыя нося́ есте́ственныя о́бразы невеще́ственныя чистоты́, зра́комъ же возвѣща́я свѣ́тъ воскресе́нія, зовы́й: воскре́се Госпо́дь.

Богоро́диченъ: Пресла́вная возглаго́лашася о Тебѣ́ въ ро́дѣхъ родо́въ, Бо́га Сло́ва во чре́вѣ вмѣ́щшая, чиста́ же пребы́вши Богоро́дице Марíе. Тѣ́мже Тя́ вси́ почита́емъ, су́щее по Бо́зѣ заступле́ніе на́ше.

Кано́нъ крестовоскре́сенъ. Ирмо́съ: Во́ду проше́дъ...

Взя́шася врата́ болѣ́зненная, и ужасо́шася вра́тницы а́довы, зря́ще въ преиспо́днѣйшая Соше́дшаго, Иже на высотѣ́ всѣ́хъ превы́ше естества́.

Удиви́шася чи́ни а́нгельстіи, зря́ще на престо́лѣ посажде́но Отчи, па́дшее естество́ человѣ́ческое, затворе́ное въ преиспо́днихъ земли́.

Инъ кано́нъ Пресвятѣ́й Богоро́дицѣ. Ирмо́съ: Пои́мъ Го́сподеви...

Пречи́стая Богоро́дице, вопло́щшееся Присносу́щное и Пребоже́ственное Сло́во, па́че естества́ ро́ждши, пое́мъ Тя́.

Гро́здъ Тя́ Живоно́сенъ, всемíрнаго иска́пающъ сла́дость спасе́нія, Дѣ́ва, Христе́, роди́.

Кано́нъ всѣ́мъ святы́мъ, его́же краестро́чіе: Святы́хъ всѣ́хъ многоиме́нныя чи́ны пою́, гла́съ 8. Ирмо́съ: Колесницегони́теля фарао́ня...

Твои́хъ святы́хъ воспѣва́я чи́ны, Твои́мъ свѣ́томъ души́ мое́й моли́твами си́хъ озари́тися молю́ся, Ты́ бо еси́ Свѣ́тъ непристу́пный, невѣ́дѣнія мра́къ отгоня́, Твои́ми свѣтлостьми́, Сло́ве Бо́жій Свѣтода́вче Христе́. [Два́жды.]

Яко возвы́сился еси́ на дре́вѣ, привле́клъ еси́ къ Твоему́ позна́нію язы́ковъ все́ наслѣ́діе, Влады́ко, и свѣ́томъ уясни́лъ еси́ Святы́я Тро́ицы, апо́столы святы́ми Твои́ми, и́миже мглу́ пре́лести отгна́лъ еси́.

Законоположе́ніемъ Твои́мъ, Христе́, увѣщава́еми Твои́ апо́столи, я́же на земли́ вся благоче́стно отри́нуша, и свѣ́томъ благода́ти освѣти́ша всю́ вселе́нную, сла́вніи, ева́нгельски Тя́ проповѣ́дающе.

Сла́ва: Ра́дующеся му́ченицы, кре́стъ Тво́й взе́мше, и честну́ю Стра́сть неукло́нно подража́юще, мучи́тельскаго не убоя́шася преще́нія, до́бліи, ни огня́, ни меча́, ни ра́нъ, но ниже́ гла́да, ниже́ сме́рти.

И ны́нѣ, богоро́диченъ: Намѣ́реніе му́жеское дѣ́вы, Всечи́стая, воспріе́мше я́вѣ, му́ченическая бо страда́нія неукло́нно подража́юще, и псало́мски въ слѣ́дъ Тебе́, Сы́ну Твоему́, Дѣ́во, боже́ственнѣ сра́дующеся, Всецарю́ приведо́шася.

Катава́сія: Отве́рзу уста́ моя́...

Пѣ́снь 3.

Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Осужде́нна бы́вша Ада́ма вкуше́ніемъ грѣха́, пло́ти Твоея́ спаси́тельною Стра́стію оправда́лъ еси́, Христе́, Са́мъ бо непови́ненъ сме́ртнаго иску́са бы́лъ еси́, Безгрѣ́шне.

Воскресе́нія свѣ́тъ возсія́ су́щимъ во тмѣ́, и сѣ́ни сме́ртнѣй сѣдя́щимъ, Бо́гъ мо́й Іису́съ, и Свои́мъ Божество́мъ крѣ́пкаго связа́въ, сего́ сосу́ды расхи́тилъ е́сть.

Богоро́диченъ: Херуви́мъ и серафи́мъ превы́шши яви́лася еси́, Богоро́дице: Ты́ бо Еди́на прія́ла еси́ Невмѣсти́маго Бо́га въ Твое́мъ чре́вѣ, Нескве́рная. Тѣ́мже Тя́ вѣ́рніи вси́ пѣ́сньми, Чи́стая, ублажа́емъ.

Инъ. Ирмо́съ: Небе́снаго кру́га Верхотво́рче...

Отве́ргшагося пре́жде за́повѣди, Го́споди, изринове́нна мя́ отъ Тебе́ сотвори́лъ еси́, въ него́же вообрази́вся, послуша́нію же навы́къ, Себе́ па́ки назда́лъ еси́ распя́тіемъ.

Прему́дростію вся́ проувѣ́дѣвый, Го́споди, и ра́зумомъ Твои́мъ водрузи́вый преиспо́дняя, не не сподо́билъ еси́ снизхожде́ніемъ Твои́мъ, Сло́ве Бо́жій, воскреси́ти, е́же по о́бразу Твоему́.

Инъ. Ирмо́съ: Ты́ еси́ утвержде́ніе...

Да́ждь на́мъ по́мощь Твои́ми моли́твами, Всечи́стая, прило́ги отража́ющи лю́тыхъ обстоя́ній.

Евѣ прама́тери Ты́ исправле́ніе бы́ла еси́, Нача́льника жи́зни мíрови, Христа́, Богоро́дице, ро́ждши.

Инъ. Ирмо́съ: Утвержде́й въ нача́лѣ небеса́...

Свяще́нствомъ свяще́ннымъ свяще́нницы и па́стыріе обле́кшеся, и то му́дрственно окорми́вше Христу́, досто́йно украси́ша учи́тельства сло́во, свы́ше вои́стинну обогати́вшеся. [Два́жды.]

Украси́вшеся удобре́ньми пе́рваго добротворе́нія, и яви́вшеся я́ко непреле́стная свѣти́ла, онебеси́сте Це́рковь Христо́ву, святíи, оты́нуду и́наго ту разли́чно украси́вше. [Два́жды.]

Сла́ва: Зако́ну повину́ющеся Твоему́ блаже́нныхъ собо́ри, многообра́зными добродѣ́тельми просвѣти́вшеся, наслѣ́доваша оби́тели небе́сныя, Влады́ко, ра́дующеся, ину́ю бо и́ный, вси́ ты́я досто́йно испо́лниша.

Богоро́диченъ: Отъ чре́ва дѣ́вственна, Иже отъ Бо́га Бо́га Сло́ва родила́ еси́ на́мъ, Богома́ти, Его́же дѣ́вы чи́стыя боголѣ́пно возлюби́ша, и въ слѣ́дъ Тебе́ вся́ Сему́ я́вѣ послѣ́доваша.

Сѣда́ленъ, гла́съ 8. Подо́бенъ: Прему́дрости Сло́ва.

Пра́отецъ, оте́цъ, патріа́рхъ, апо́столъ, му́ченикъ, проро́къ, святи́телей и преподо́бныхъ Твои́хъ, по́стниковъ и пра́ведныхъ же, и вся́каго и́мене пи́саннаго въ кни́зѣ жи́зни, святу́ю па́мять соверша́юще, Христе́ Бо́же, всѣ́хъ подвиза́емъ на моли́тву, моля́щеся: умири́ мíръ Тво́й тѣ́ми, я́ко Человѣколю́бецъ, да вси́ вопіе́мъ Ти́: Бо́же, прославля́емый въ совѣ́тѣ святы́хъ Твои́хъ, Ты́ еси́ вои́стинну просла́вивый досто́йно па́мять и́хъ.

Сла́ва, то́йже. И ны́нѣ, богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ты врага́ су́ща мя́ зѣло́ возлюби́лъ еси́, Ты́ истоща́ніемъ стра́ннымъ соше́лъ еси́ на зе́млю, Благоутро́бне Спа́се, послѣ́дняго моего́ досажде́нія не отве́ргся, и пребы́въ на высотѣ́ пречи́стыя Твоея́ сла́вы, пре́жде безче́ствованнаго просла́вилъ еси́.

Кто́ зря́, Влады́ко, ны́нѣ не ужаса́ется, стра́стію сме́рть разруша́ему, кресто́мъ бѣжа́щее тлѣ́ніе, и сме́ртію а́дъ бога́тства истощава́емый, Боже́ственною си́лою Тебе́ распя́таго? Чу́дно дѣ́ло, Человеколю́бче!

Богоро́диченъ: Ты́ вѣ́рнымъ похвала́ еси́, Безневѣ́стная, Ты́ Предста́тельнице, Ты́ и прибѣ́жище христіа́нъ, стѣна́ и приста́нище, къ Сы́ну бо Твоему́ мольбы́ но́сиши, Всенепоро́чная, и спаса́еши отъ бѣ́дъ, вѣ́рою и любо́вію Богоро́дицу Чи́стую Тебе́ зна́ющихъ.

Инъ. Ирмо́съ: Услы́шахъ Го́споди...

На Крестѣ́ Тя́ пригвозди́ша законопресту́пныхъ дѣ́ти, Христе́ Бо́же, и́мже спа́слъ еси́ я́ко Благоутро́бенъ, сла́вящія Твоя́ страда́нія.

Воскре́съ отъ гро́ба, вся́ совоскреси́лъ еси́ су́щія во а́дѣ ме́ртвыя, и просвѣти́лъ еси́ я́ко Благоутро́бенъ, сла́вящія Твое́ воскресе́ніе.

Инъ. Ирмо́съ то́йже.

Кла́съ возрасти́вшая животво́рный, неора́нная ни́во, подаю́щаго мíрови жи́знь, Богоро́дице, спаса́й пою́щія Тя́.

Богоро́дицу Тя́, Всечи́стая, просвѣ́щшіися вси́ проповѣ́дуемъ, Со́лнце бо пра́вды родила́ еси́, Приснодѣ́во.

Инъ. Ирмо́съ: Ты моя́ крѣ́пость, Го́споди...

Совоку́плься собо́ръ святы́хъ Твои́хъ любо́вію, и Тебе́ наслажда́яйся, и́стинно же и чи́сто въ ра́дости, ли́къ неразруша́емый а́нгеломъ слику́етъ, о Тебѣ́, Всеви́дче, Бо́зѣ всѣ́хъ и Го́сподѣ. [Два́жды.]

Юношески, сла́вніи священному́ченицы, му́ченическимъ венце́мъ увязо́стеся, богодѣ́тельнымъ пома́заніемъ, е́же пе́рвѣе свяще́нства укра́шени, пребога́тіи. Тѣ́мже сугу́бы вѣнцы́ досто́йно пріе́мше, со Христо́мъ вѣ́чно ра́дуетеся.

Плотско́е мудрова́ніе все́ ду́ху, богоно́сніи, вои́стинну повину́сте, по́стнически сего́ стремле́нія неудержи́мая посто́мъ увяди́вше, и ны́нѣ безстра́стія свѣ́томъ просвѣти́вшеся, мзды́ трудо́въ прія́сте.

Сла́ва: Яко Христа́, му́ченицы, Первому́ченика, му́ки зѣло́ претерпѣ́сте, терпѣли́во же и до́блественнѣ, я́ко въ чужди́хъ страда́льчествующе тѣлесѣ́хъ, сла́вніи, и ны́нѣ Ца́рствія наслѣ́дницы показа́вшеся, вѣ́рнымъ исцѣле́нія источа́ете.

И ны́нѣ, богоро́диченъ: Невѣ́ста Бо́жія была́ еси́, Богороди́тельнице, Сего́ бо Сло́во превѣ́чное, тѣле́снѣ родила́ еси́ на́мъ, въ Не́мже и жены́ свя́то пожи́вше, и страда́льчествы всеразли́чными Тобо́ю украси́вшеся, прама́тернее паде́ніе испра́виша.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Одѣ́ятися претерпѣ́лъ еси́ въ багряни́цу пре́жде стра́сти Твоея́, Спа́се, поруга́емь, первозда́ннаго покрыва́я безобра́зное обнаже́ніе, и на́гъ пригвозди́лся еси́ на Крестѣ́ пло́тію, совлача́я, Христе́, ри́зу умерщвле́нія.

Отъ пе́рсти сме́ртныя, Ты́ па́дшее мое́ па́ки назда́лъ еси́ существо́, воскре́съ, и нестарѣ́ющееся, Христе́ устро́илъ еси́, яви́въ па́ки я́коже ца́рскій о́бразъ, нетлѣ́нія жи́знь блиста́ющъ.

Богоро́диченъ: Ма́тернее дерзнове́ніе, е́же къ Сы́ну Твоему́ иму́щи, Всечи́стая, сро́днаго промышле́нія, е́же о на́съ, не пре́зри, мо́лимся, я́ко Тебе́ и Еди́ну христіа́не ко Влады́цѣ очище́ніе ми́лостивно предлага́емъ.

Инъ. Ирмо́съ: Просвѣти́ на́съ...

Наста́ви на́съ си́лою Креста́ Твоего́, Христе́, тѣ́мъ бо Тебѣ́ припа́даемъ, ми́ръ пода́ждь на́мъ, Человѣколю́бче.

Окорми́ живо́тъ на́шъ, я́ко Преблагíй, пою́щихъ Твое́ воста́ніе, и ми́ръ пода́ждь на́мъ, Человѣколю́бче.

Инъ. Ирмо́съ: Утренююще, вопіе́мъ Ти́...

Утоли́ нестерпи́мую бу́рю страсте́й мои́хъ, Яже Бо́га ро́ждшая, Окорми́теля и Го́спода.

Слу́жатъ Рождеству́ Твоему́, Пречи́стая Богоро́дице, а́нгельстіи чи́нове и человѣ́ковъ собра́ніе.

Инъ. Ирмо́съ: Вску́ю мя́ отри́нулъ еси́...

Предзрѣ́ти, я́коже проро́цы боже́ственніи, хотя́щая бы́ти сподо́бистеся, и возжелѣ́сте благоро́дію души́ очи́ститися житіе́мъ чи́стымъ, о богоно́сніи, просвѣща́еми си́лою Духо́вною. [Два́жды.]

Ли́къ святы́хъ ны́нѣ свѣ́тится Боже́ственными дарова́ньми, и́же пре́жде зако́на вси патріа́рси, проро́цы, апо́столи и му́ченикъ собо́ри, и по́стниковъ, и учи́телей, и пра́ведныхъ со священному́ченики. [Два́жды.]

Сла́ва: Свѣтя́щееся зря́ще Твои́хъ святы́хъ дне́сь собра́ніе, Твое́ю, Спа́се, свѣ́тлостію, и свѣща́ми неугаса́емыми благода́ти, Твое́ Боже́ственное бога́тство благи́хъ и изоби́ліе воспѣва́емъ непреста́нно, Человѣколю́бче.

Богоро́диченъ: Преди́вное Твое́ Рождество́ возлюби́вше жены́ пречестны́я, кра́сная житія́ нивочто́же вмѣни́ша, Всечи́стая, Его́ еди́ни рачи́тельно жела́юще свѣ́тлости и Боже́ственнаго осія́нія.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Дре́вомъ крѣ́пко низложи́ мя началозло́бный, Ты́ же, Христе́, возне́сся на Крестѣ́, крѣпча́е низложи́лъ еси́, посрами́въ сего́, па́дшаго же воскреси́лъ еси́.

Ты́ уще́дрилъ еси́ Сіо́на, возсія́вый отъ гро́ба, но́ваго вмѣ́сто ве́тхаго соверши́въ, я́ко Благоутро́бенъ, Боже́ственною Твое́ю кро́вію, и ны́нѣ ца́рствуеши въ не́мъ во вѣ́ки, Христе́.

Богоро́диченъ: Да изба́вимся отъ лю́тыхъ прегрѣше́ній, мольба́ми Твои́ми, Богороди́тельнице Чи́стая, и да улучи́мъ, Пречи́стая, Боже́ственное сія́ніе, изъ Тебе́ неизрече́нно воплоще́ннаго Сы́на Бо́жія.

Инъ. Ирмо́съ: Моли́тву пролію́ ко Го́споду...

Дла́ни на Крестѣ́ распросте́рлъ еси́, исцѣля́я неудержа́нно просте́ртую во Еде́мѣ ру́ку первозда́ннаго, и Твое́ю во́лею же́лчи вкуси́въ, и спа́слъ еси́, Христе́, я́ко Си́ленъ, сла́вящія Твоя́ страда́нія.

Сме́рти Изба́витель вкуси́, дре́вняго осужде́нія, я́ко да и тлѣ́нія ца́рство разруши́тъ, и во а́дская сше́дъ, воскре́си, и спасе́, я́ко Си́ленъ, пою́щія Его́ воскресе́ніе.

Инъ. Ирмо́съ: Ри́зу мнѣ́ пода́ждь свѣ́тлу...

Хра́мъ Тя́ Бо́жій и киво́тъ, и черто́гъ одушевле́нный, и две́рь небе́сную, Богоро́дице, вѣ́рніи возвѣща́емъ.

Тре́бищемъ разруши́тель, я́ко Бо́гъ, бы́вшее Рождество́ Твое́, Марíе Богоневѣ́сто, покланя́емо е́сть со Отце́мъ и Ду́хомъ.

Инъ. Ирмо́съ: Очи́сти мя́, Спа́се...

Яко честны́й, избра́нный, положе́нный Ка́мень краеуго́льный, святíи въ Сіо́нѣ обрѣ́тше Тя́, Влады́ко, основа́ніе непоколеби́мое, избра́нное ка́меніе себе́ назда́ша. [Два́жды.]

Пронзе́ннымъ Твои́мъ ре́бромъ, ка́пли кро́ве иска́паша, съ водо́ю богодѣ́тельно, мíръ обнови́ша, и боже́ственный собо́ръ святы́хъ всѣ́хъ Благодѣ́телю призда́ша. [Два́жды.]

Сла́ва: Пое́мъ всеблагоче́стно му́ченикъ о́блакъ боже́ственный, благода́тію просвѣще́нный, и возсія́вшій свѣтлѣ́е багряни́цею кро́ве, и червлени́цею и́хъ тве́рдаго страда́нія.

Богоро́диченъ: Ма́терь всеи́стинную Бо́жію Тя́ вси́ зна́емъ, Еюже естество́ же́нское изба́вльшееся, Всенепоро́чная, о Христѣ́ предпострада́, добродѣ́тели же вся́кія благоче́стно бы́сть испо́лнено.

Конда́къ, гла́съ 8:

Яко нача́тки естества́, Насади́телю тва́ри, вселе́нная прино́ситъ Ти́, Го́споди, богоно́сныя му́ченики. Тѣ́хъ моли́твами въ ми́рѣ глубо́цѣ Це́рковь Твою́, жи́тельство Твое́, Богоро́дицею соблюди́, Многоми́лостиве.

Икосъ:

Иже по все́й земли́ му́чившіися и на небеса́ пресели́вшіися, и́же стра́сти Христо́вы подража́вшіи и стра́сти на́ша отъе́млющіи, здѣ́ дне́сь собира́ются, перворожде́нныхъ показу́юще Це́рковь, я́ко го́рнія о́бразъ содержа́щу и Христу́ вопію́щу: Бо́гъ мо́й еси́ Ты́, Богоро́дицею соблюди́ мя, Многоми́лостиве.

И чте́мъ про́логъ.

Синакса́рь въ недѣ́лю всѣ́хъ святы́хъ.

Стихи́: Го́спода моего́ вся́ пою́ дру́ги.

             Аще же кто́ хотя́ ко всѣ́мъ да и́детъ.

Въ то́йже де́нь, въ недѣ́лю по Пятдеся́тницѣ, и́же повсю́ду вселе́нныя — во Асíи, Ливíи и Евро́піи, Сѣ́верѣ же и Юзѣ, святы́хъ всѣ́хъ пра́здникъ пра́зднуемъ. Его́же у́бо по Всесвята́го Ду́ха соше́ствіи боже́ственніи отцы́ на́ши узако́ниша соверша́ти, а́ки бы о́бразъ нѣ́кій показу́юще, я́ко Всесвята́го Ду́ха прише́ствіе, сицева́я апо́столы дѣ́йствова, освяти́вшее и упрему́дрившее и́же отъ на́шего смѣше́нія, въ наполне́ніе отпа́дшаго о́наго чи́на а́нгельскаго, си́хъ уста́вившее, и Бо́гу Христо́мъ приве́дшее: о́вѣхъ у́бо — муче́ніемъ и кро́вію, о́вѣхъ же — добродѣ́тельнымъ житіе́мъ и пребыва́ніемъ.

И я́же па́че естества́ содѣ́ловаетъ: схо́дитъ у́бо Ду́хъ Святы́й въ ви́дѣ огня́, естество́мъ го́рнѣйшее имѣ́яй преложе́ніе, восхо́дитъ же къ го́рнимъ пе́рсть, естество́мъ до́лу прело́жна су́щи, и на́ше смѣше́ніе. Пре́жде вма́лѣ у́бо прія́тая и обоже́нная Бо́гомъ Сло́вомъ пло́ть, вознесе́нная и одесну́ю Отчи сла́вы сѣ́дшая, ны́нѣ же и всѣ́хъ влече́тъ хотя́щихъ, я́ко обѣтова́ніе, я́коже Бо́гу Сло́ву показу́ющу примире́нія дѣла́ и нѣ́кій намѣ́ренный коне́цъ, е́же къ на́мъ пло́тію прише́ствія Его́ и смотре́нія. Якоже дре́вле отринове́нныя въ соедине́ніе и дру́жество приво́дитъ Бо́жіе — незна́ющія отъ язы́къ лю́ди — человѣ́ческаго естества́, а́ки нѣ́кія нача́тки принося́щаго Бо́гу, и́же въ не́мъ разли́чно благоискуси́вшихся. По еди́ному у́бо о́бразу, си́це всѣ́хъ святы́хъ пра́зднуемъ пра́здникъ.

По второ́му же, поне́же мно́зи у́бо Бо́гу благоугоди́ша добродѣ́тели ра́ди кра́йнія, и инообра́зно безимени́тіи отъ человѣ́къ бы́ша, или́ и за нѣ́кая не́гли человѣ́ческая, мно́гу же оба́че сла́ву отъ Бо́га иму́ще, или́ я́ко мно́зи у́бо по Христѣ́ жи́тельствоваша во Индíи, и Еги́птѣ, и Аравíи, Междорѣ́чіи же и Фригíи, и и́же вы́ше Евкси́на мо́ря, еще́ же и во все́мъ За́падѣ, да́же и до самѣ́хъ Вретанíйскихъ острово́въ, и про́сто рещи́, въ Восто́цѣ и За́падѣ. Не бя́ше же подо́бно си́хъ всѣ́хъ я́коже подоба́етъ по́чести, ра́ди безчи́сльства, я́коже церко́вный прія́тъ обы́чай, да у́бо е́же отъ о́нѣхъ всѣ́хъ по́мощь пріи́мемъ, идѣ́же кто́ на земли́ Бо́гу благоугоди́. Инако же, и бу́дущихъ ра́ди, не́гли святы́хъ всѣ́хъ пра́здникъ боже́ственніи отцы́ пра́здновати узако́ниша: всѣ́хъ же, и́же пре́жде и по́слѣжде, явле́нныхъ же и неявле́нныхъ, во ели́цѣхъ Ду́хъ Святы́й всели́выйся освяти́, почита́юще и своспріе́млюще.

Или́ и тре́тіе. Подоба́ше по ча́сти на кíйждо де́нь пра́зднуемыя святы́я, и во еди́нъ собра́ти де́нь да яви́тся, я́ко о еди́номъ Христѣ́ подвиза́шася, и вси́ то́жде добродѣ́тели теко́ша по́прище. И та́ко вси́ я́ко Еди́наго Бо́га раби́ досто́йно вѣнча́ни бы́ша, Це́рковь сíи соста́виша, го́рній мíръ вознаполня́юще, поощря́юще же и на́съ ра́вный по́двигъ си́мъ твори́ти, разли́ченъ су́щъ и многови́денъ, къ по ели́ку же ко́ждо и́мать си́лы, всѣ́мъ усе́рдіемъ тща́тися.

Си́мъ у́бо, и́же отъ вѣ́ка святы́мъ всѣ́мъ, Ле́въ, приснопа́мятный и прему́дрый ца́рь, хра́мъ преве́лій и предо́брый созда́, бли́зу же е́сть се́й святы́хъ апо́столъ хра́ма вну́трь Константи́на гра́да. Пре́жде у́бо, я́коже глаго́лютъ, Ѳеофа́нѣ, женѣ́ его́, пе́рвѣе сего́ созида́яй, угоди́вшей Бо́гу въ коне́цъ. И е́же пресла́вное посредѣ́ мо́лвъ и ца́рствій вну́трь. И поне́же пріобщи́ намѣ́реніе свое́ Це́ркви, не обрѣ́те ея́ покоре́нныя во́ли свое́й, ниже́ восхотѣ́ мудрова́нія его́, глаго́лющи: «я́ко не лѣ́по е́сть о́ну, я́же вчера́ неда́вно растлѣва́шеся ца́рскимъ мечта́ніемъ и пи́щею, внеза́пу почита́ти толи́ко, я́коже созида́ти е́й сицевы́й хра́мъ великолѣ́пный и изря́дный, и ниже́ вре́мя дая́ше е́, а́ще и благоугоди́ Бо́гу». Тогда́ прему́дрѣйшій ца́рь собо́рнымъ хотѣ́ніемъ всея́ Це́ркве, вели́кій хра́мъ, и́же созда́, посвяти́ всѣ́мъ святы́мъ вселе́нныя, глаго́ля: «а́ще и Ѳеофа́на е́сть свята́, да сопричте́тся со всѣ́ми святы́ми».

И сего́ ра́ди а́зъ мню́, я́ко отсе́лѣ прія́тъ нача́ло пра́здноватися се́й пра́здникъ, внегда́ бя́ше и пре́жде. Сего́ ра́ди положи́ша и́ послѣди́ всѣ́хъ пра́здниковъ, о́крестъ вся́ пра́здники лѣ́та состяга́яй, и заключа́яй а́ки огражде́ніемъ. Зане́ церко́вное уставле́ніе и благочи́ніе, а́ще и пре́жде мно́гаго нача́ся, и пома́лѣ прихожда́ше въ до́брое уставле́ніе, я́коже подоба́ше. Но во дни́ сего́ царя́ уста́виша въ соверше́нное, и изобрази́ша чи́номъ, и́же дне́сь е́сть.

Тріо́дь у́бо, вкра́тцѣ рещи́, обдержи́тъ вну́трь съ вели́кимъ прилѣжа́ніемъ, ели́ка Бо́гъ сотвори́ на́съ ра́ди неизрече́нными словесы́: паде́ніе діа́воле съ небесе́, пе́рвою при́тчею изгна́ніе Ада́мово и преступле́ніе, е́же на́съ ра́ди Бо́га Сло́ва смотре́ніе все́, и ка́ко на небеса́ Святы́мъ Ду́хомъ па́ки взыдо́хомъ, и испа́дшій о́ный чи́нъ испо́лнихомъ, е́же святы́ми всѣ́ми познава́ется.

Вѣ́домо же бу́ди, я́ко вся́ ны́нѣ пра́зднуемъ, ели́ка благода́тно освяти́ Ду́хъ Святы́й. Глаго́лю у́бо высоча́йшія и освяща́тельныя умы́, девяти́ я́вѣ чино́въ, пра́отцы и патріа́рхи, проро́ки и свяще́нныя апо́столы, му́ченики и священнонача́льники, священному́ченики и преподобному́ченики, преподо́бныя и пра́ведныя, и вся́ святы́хъ же́нъ ликова́нія, и ины́я вся безимени́тыя святы́я, съ ни́миже да бу́дутъ и хотя́щіи бы́ти. Пре́жде же всѣ́хъ, и во всѣ́хъ, и со всѣ́ми, святы́хъ Святу́ю, Пресвяту́ю, и тѣ́хъ пребезсравни́тельно лу́чшую а́нгельскихъ чино́въ, Госпожу́ на́шу и Влады́чицу, Богоро́дицу Марíю Приснодѣ́ву.

Ея́же моли́твами, Христе́ Бо́же, и всѣ́хъ отъ вѣ́ка святы́хъ Твои́хъ, поми́луй и спаси́ на́съ, я́ко еди́нъ Бла́гъ и Человѣколю́бецъ. [Аминь.]

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Сла́вное истоща́ніе, Боже́ственное бога́тство Твоея́ нищеты́, Христе́, удивля́етъ а́нгелы, на Крестѣ́ зря́щія Тя́ пригвожда́ема, за е́же спасти́ вѣ́рою зову́щія: благослове́нъ Бо́гъ оте́цъ на́шихъ.

Боже́ственнымъ Твои́мъ соше́ствіемъ свѣ́та испо́лнилъ еси́ преиспо́дняя, и тма́ прогна́на бы́сть пре́жде гоня́щая. Отню́дуже воскресо́ша и́же отъ вѣ́ка ю́зницы, зову́ще: благослове́нъ Бо́гъ оте́цъ на́шихъ.

Тро́иченъ: Всѣ́хъ у́бо Го́спода, Еди́наго же еди́ному Единоро́дному Сы́ну правосла́вно Отца́, богосло́вяще Тя́ возвѣща́емъ, и Еди́наго вѣ́дяще отъ Тебе́ исходя́ща Ду́ха Пра́ваго, Соесте́ственна и Соприсносу́щна.

Инъ. Ирмо́съ: Отъ Іуде́и...

Спасе́ніе содѣ́лалъ еси́ посредѣ́ вселе́нныя, проро́чески, Бо́же, на дре́во бо вознесе́нъ бы́въ, вся́ призва́лъ еси́ вѣ́рою зову́щія: оте́цъ на́шихъ Бо́же, благослове́нъ еси́.

Воскре́съ отъ гро́ба, я́коже отъ сна́, Ще́дре, всѣ́хъ изба́вилъ еси́ отъ тли́, тва́рь же увѣря́ется апо́столы проповѣ́дающими воста́ніе: отце́въ Бо́же, благослове́нъ еси́.

Инъ. Ирмо́съ то́йже.

Отъ дѣ́вственнаго ложесна́ вопло́щся, яви́лся еси́ на спасе́ніе на́ше. Тѣ́мже Твою́ Ма́терь вѣ́дяще Богоро́дицу, благода́рственно зове́мъ: отце́въ Бо́же, благослове́нъ еси́.

Же́злъ прорасти́ла еси́, Дѣ́во, отъ ко́рене Іессе́ова, Всеблаже́нная, Пло́дъ цвѣтонося́щій спаси́тельный, вѣ́рою Сы́ну Твоему́ зову́щимъ: отце́въ Бо́же, благослове́нъ еси́.

Инъ. Ирмо́съ: Бо́жія снисхожде́нія...

Святы́хъ чи́нове, во святы́хъ Почива́ющаго немо́лчно пою́ще, сла́дости боже́ственныя ны́нѣ наслажда́ются и, ра́дующеся, лику́ютъ пою́ще: благослове́нъ Бо́гъ оте́цъ на́шихъ.

Боже́ственными сія́ньми Трисо́лнечнаго Свѣтопроли́тія, че́стнѣ святы́хъ собо́ри осія́вшеся, Еди́ницу тричи́сленную богосло́вимъ: Отца́ безнача́льна и Сы́на благоче́стна и Ду́ха Свята́го.

Неизрече́нною сла́вою Твое́ю, егда́ яви́шися, Бо́же, посредѣ́ бого́въ, досто́йная подая́, и да́ры раздая́, и вѣнцы́ дая́, тогда́, Спа́се, сподо́би пѣ́ти Тебѣ́: благослове́нъ Бо́гъ оте́цъ на́шихъ.

Сла́ва: Ра́дующеся пои́мъ святы́хъ всѣ́хъ собо́ръ, отвсю́ду собра́вшихся, и ро́ды вку́пѣ и досто́инства, и жи́тельства, и съ ни́ми пое́мъ: благослове́нъ Бо́гъ оте́цъ на́шихъ.

И ны́нѣ, богоро́диченъ: Марíю Пречи́стую и Пресвяту́ю Богороди́тельницу, отрокови́цы вся́, ли́къ боже́ственный ку́пно соста́вивше, велегла́сно ра́дующеся возопíйте: ра́дуйся, ра́дости исто́чникъ на́мъ источа́ющая.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Іису́сова Божества́ пребоже́ственная си́ла, въ на́съ боголѣ́пно возсія́ла е́сть: пло́тію бо вку́шъ за всѣ́хъ сме́рть кре́стную, разруши́ а́дову крѣ́пость. Его́же непреста́нно о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Распны́йся воста́, великовы́йный паде́, пады́й и сокруше́нный испра́вися, тля́ отве́ржена бы́сть, и нетлѣ́ніе процвѣте́: Жи́знію бо ме́ртвенное поже́рто бы́сть. Отроцы благослови́те, свяще́нницы воспо́йте, лю́діе превозноси́те во вся́ вѣ́ки.

Тро́иченъ: Трисвѣ́тлое Божество́, Еди́ной сія́ющее Зари́ отъ Еди́наго Тріѵпоста́снаго Естества́, Роди́теля Безнача́льна, Единоесте́ственно же Сло́во Отцу́, и сца́рствующаго Единосу́щнаго Ду́ха, о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Инъ. Ирмо́съ: Побѣди́тели мучи́теля...

На дре́вѣ ру́цѣ мнѣ́ просте́рша, обнаже́ннаго мя́ призыва́юща, Свое́ю благообра́зною согрѣ́яти нагото́ю, благослови́те вся́ дѣла́ Го́спода и превозноси́те Его́ во вѣ́ки.

Изъ преиспо́дняго а́да возне́сша мя́, па́дшаго, и высокопресто́льною сла́вою Роди́теля поче́тшаго, благослови́те, вся дѣла́, Го́спода и превозноси́те Его́ во вѣ́ки.

Инъ. Ирмо́съ: Царя́ Небе́снаго...

Сопроти́вныхъ разжже́нныя и пламенови́дныя на на́съ угаси́ стрѣ́лы, я́ко да пое́мъ Тя́ во вся́ вѣ́ки.

Преесте́ственнѣ Содѣ́теля и Спа́са, Бо́га Сло́ва родила́ еси́, Дѣ́во, тѣ́мже Тя́ пое́мъ во вся́ вѣ́ки.

Инъ. Ирмо́съ: Седмери́цею пе́щь...

Ра́дуйтеся му́ченицы, проро́цы, апо́столи, священному́ченикъ честны́й собо́ре, пра́ведныхъ, преподо́бныхъ же и учи́телей боже́ственный ли́че, съ мѵроно́сицами жена́ми сладкопою́ще: о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Иже па́че ума́ свѣ́тлостію, насыща́еми святíи боже́ственнаго весе́лія, и ра́дости исполня́еми, бо́зи быва́ете, къ Бо́гу приближе́ніемъ, богодѣ́тельнымъ свѣ́тлостемъ обща́ющеся, и сла́вы неизрече́нныя просвѣти́вшеся луча́ми, Христа́ превозноси́те во вся́ вѣ́ки.

Благослови́мъ Отца́ и Сы́на и Свята́го Ду́ха, Го́спода.

Яви́вшеся, святíи, я́ко звѣ́зды многосвѣ́тлыя, церко́вное не́бо уясня́ете разли́чными дарова́ньми и разли́чными добро́тами, въ пра́вдѣ, цѣлому́дріи, му́жествѣ, ра́зумѣ, Влады́ку, свяще́нницы, воспо́йте, лю́діе, превозноси́те во вся́ вѣ́ки.

И ны́нѣ, богоро́диченъ: Съ весе́ліемъ вся́ жены́ богому́дрыя сконча́вшіяся, пою́тъ ду́хомъ Дѣ́ву Пречи́стую, и́стинную Ма́терь Бо́жію, отъ кля́твы прама́тере Евы на́съ изба́вившую, благоговѣ́йно предстоя́ще, Тоя́ воспо́йте Пло́дъ во вѣ́ки.

Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Отроки благочести́выя... Та́же пое́мъ: Честне́йшую херуви́мъ...

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Боже́ственнымъ и Безнача́льнымъ Естество́мъ про́стъ сы́й, сложи́лся еси́ прія́тіемъ пло́ти, въ Тебѣ́ Само́мъ сію́ соста́вивъ, Сло́ве Бо́жій, и пострада́въ, я́ко человѣ́къ, пребы́лъ еси́ кромѣ́ страсте́й, я́ко Бо́гъ. Тѣ́мже Тя́ во двою́ Существу́ нераздѣ́льно и неслія́нно велича́емъ.

Отца́ по Существу́ Боже́ственному, я́коже естество́мъ бывъ человѣ́къ, ре́клъ еси́ Бо́га Вы́шній, рабо́мъ снизходя́, воскре́съ отъ гро́ба, благода́тію Отца́ земноро́дныхъ поло́жъ, Иже по естеству́ Бо́га же и Влады́ку, съ Ни́мже Тя́ вси́ велича́емъ.

Богоро́диченъ: Яви́лася еси́, о Дѣ́во Ма́ти Бо́жія, па́че естества́ ро́ждши пло́тію Бо́га Сло́ва, Его́же Оте́цъ отры́гну отъ се́рдца Своего́ пре́жде всѣ́хъ вѣ́къ, я́ко Бла́гъ, Его́же ны́нѣ и тѣле́съ превы́шша разумѣ́емъ, а́ще и въ тѣ́ло облече́ся.

Инъ. Ирмо́съ: Устраши́ся...

Бо́жія Тя́ естество́мъ у́бо Сы́на, зача́таго во утро́бѣ свѣ́мы Богома́тере, и бы́вшаго на́съ ра́ди Человѣ́ка, и зря́ще Тя́ на Крестѣ́ естество́мъ у́бо стра́ждуща человѣ́ческимъ, безстра́стна же, я́ко Бо́га пребыва́юща, велича́емъ.

Разруши́ся тма́ дря́хлая, отъ а́да бо возсія́ Со́лнце пра́вды — Христо́съ, земли́ просвѣща́я вся́ концы́, сія́я Божества́ свѣ́томъ, небе́сный Человѣ́къ, Бо́гъ земны́й, Его́же во двою́ естеству́ велича́емъ.

Инъ. Ирмо́съ: Вои́стинну Богоро́дицу...

Ра́дости и весе́лія испо́лнь е́сть па́мять Твоя́, приступа́ющимъ исцѣле́нія точа́щи, и благоче́стно Богоро́дицу Тя́ возвеща́ющимъ.

Псалмы́ Тя́ воспѣва́емъ Благода́тная, и немо́лчно, е́же ра́дуйся, прино́симъ, Ты́ бо источи́ла еси́ всѣ́мъ ра́дость.

Инъ. Ирмо́съ: Ужасе́ся о се́мъ не́бо...

Наде́ждею и любо́вію вооруже́нно, и вѣ́рно огражде́нно счине́ніе избра́нныхъ, вся́ мучи́телей преще́нія, му́ки, и ра́ны ра́дующеся претерпѣ́ша, благосла́вно отъ Христа́ обогати́вшеся, побѣдотворя́щаго въ страда́ніихъ и́стины, первому́ченики.

Приста́нище спасе́нія, Крести́теля, апо́столы, проро́ки и му́ченики съ по́стники, боже́ственныя учи́тели и свяще́нники, патріа́рховъ же собра́ніе, и священному́ченики благосла́вныя, жены́ боголюби́выя, преподо́бныя и пра́ведныя ны́нѣ досто́йно восхва́лимъ.

Сла́ва: Огне́мъ искуси́вшеся искуше́ній, и сластьми́ не прельсти́вшеся, ра́дуетеся чи́стѣ, престо́лу Влады́чню свѣтови́дному предстоя́ще, сла́вніи собо́ри святы́хъ на небесѣ́хъ, разрѣши́вшимся зерца́ломъ, сѣ́ни же мимоше́дшей и́стинными явле́ньми.

И ны́нѣ, богоро́диченъ: Яви́лася еси́ разстоя́щимся совокупи́тельная, Тобо́ю бо а́нгеломъ единосе́льницы на небесѣ́хъ человѣ́цы бы́ша вои́стинну, и свидѣ́тельствуютъ чи́нове всѣ́хъ святы́хъ, ны́нѣ съ ни́ми пою́ще Твое́ Рождество́, Дѣ́во Богоро́дице, въ вѣ́чныхъ пѣ́снехъ.

Катава́сія: Всякъ земноро́дный...

Свя́тъ Госпо́дь Бо́гъ на́шъ... [Пое́мъ по гла́су.] Та́же експостила́рій воскре́сенъ:

Со ученики́ взы́демъ на го́ру Галиле́йскую, вѣ́рою Христа́ ви́дѣти глаго́люща вла́сть прія́ти вы́шнихъ и ни́жнихъ, научи́мся, ка́ко учи́тъ крести́ти, во и́мя Отца́ и Сы́на и Свята́го Ду́ха, язы́ки вся́, и спребыва́ти ученико́мъ, я́коже обѣща́ся, до сконча́нія.

Сла́ва, свѣти́ленъ всѣ́мъ святы́мъ. Подо́бенъ:

Крести́теля и Предте́чу, апо́столы, проро́ки, му́ченики и священнонача́льники же, по́стники и преподо́бныя, священному́ченики, ку́пно боголюби́выя жены́ и пра́ведныя вся́, и а́нгеловъ чи́ны, до́лжно пѣ́сньми увязе́мъ моля́щеся, сла́ву си́хъ получи́ти отъ Христа́ Спа́са.

И ны́нѣ, богоро́диченъ:

Иже горѣ́ прославля́емый боже́ственнѣ отъ а́нгеловъ, отъ нѣ́дръ Отчихъ, Пречи́стая, не отсту́пль неизрече́нно, съ до́льними поживе́. Ты́ же Сего́ была́ еси́ спасе́нія хода́таица, отъ чи́стыхъ Твои́хъ крове́й Сему́, Чи́стая, па́че сло́ва плоть заимода́вши. Его́же моли́ рабо́мъ Твои́мъ избавле́ніе да́ти прегрѣше́ній.

На хвали́техъ, Вся́кое дыха́ніе.., поста́вимъ стихо́въ 8, и пое́мъ стихи́ры воскре́сны, гла́съ 8:

Го́споди, а́ще и суди́лищу предста́лъ еси́ отъ Пила́та суди́мый, но не отступи́лъ еси́ отъ престо́ла, со Отце́мъ седя́й, и воскре́съ изъ ме́ртвыхъ, мíръ свободи́лъ еси́ отъ рабо́ты чужда́го, я́ко Ще́дръ и Человѣколю́бецъ.

Го́споди, а́ще и я́ко ме́ртва во гро́бѣ іуде́и положи́ша, но я́ко Царя́ спя́ща во́ини Тя́ стрежа́ху, и я́ко живота́ сокро́вище, печа́тію печа́таша. Но воскре́слъ еси́ и по́далъ еси́ нетлѣ́ніе душа́мъ на́шимъ.

Го́споди, ору́жіе на діа́вола Кре́стъ Тво́й да́лъ еси́ на́мъ, трепе́щетъ бо и трясе́тся, не терпя́ взира́ти на си́лу Его́, я́ко ме́ртвыя возставля́етъ, и смерть упраздни́. Сего́ ра́ди покланя́емся погребе́нію Твоему́ и воста́нію.

Ангелъ Тво́й, Го́споди, Воскресе́ніе проповѣ́давый, стра́жи у́бо устраши́, жена́мъ же возгласи́, глаго́ля: что́ и́щете Жива́го съ ме́ртвыми? Воскре́се Бо́гъ сы́й, и вселе́ннѣй жизнь дарова́!

Ина стихи́ра восто́чная [Анато́ліева], того́жде гла́са:

Пострада́лъ еси́ Кресто́мъ, Безстра́стный Божество́мъ, погребе́ніе прія́лъ еси́ тридне́вное, да на́съ свободи́ши отъ рабо́ты вра́жія, и обезсме́ртивъ оживотвори́ши на́съ, Христе́ Бо́же, воскресе́ніемъ Твои́мъ, Человѣколю́бче.

Ины стихи́ры всѣ́мъ святы́мъ, гла́съ 4. Подо́бенъ: Яко до́бля.

Святы́я Госпо́дь и́же на земли́ удиви́, Того́ бо ра́ны и страда́нія въ пло́ти воспрія́ша, въ си́хъ крася́щеся, и боже́ственными удобре́ньми явле́нно удобря́еми, я́же воспои́мъ я́ко неувяда́ющія цвѣ́ты, я́ко звѣ́зды непреле́стныя Це́ркве, я́ко во́льная заколе́нія.

Сти́хъ: Воззва́ша пра́ведніи и Госпо́дь услы́ша и́хъ.

Съ проро́ки апо́столи, съ преподо́бными учи́теліе, со священному́ченики вси́ пра́ведніи, и же́нъ пострада́вшее, и любо́вію пости́вшееся святы́хъ мно́жество, и пра́ведныхъ чи́нове, да восхва́лятся свяще́нными пѣ́сньми, я́ко го́рняго Ца́рствія наслѣ́дницы, я́ко рая́ жи́теліе.

Сти́хъ: Ди́венъ Бо́гъ во святы́хъ Свои́хъ, [Бо́гъ Изра́илевъ].

Иже зе́млю онебеси́вшіи добродѣ́телей свѣ́тлостію, и́же Христо́ву смерть подража́вшіи, безсме́ртія хода́тайственный пу́ть ше́ствовавшіи, и́же стра́сти человѣ́комъ рукодѣ́йствіемъ благода́ти очи́стившіи, и́же во все́мъ мíрѣ единоду́шно страда́льчествовавшіи, до́блественнѣ да восхва́лятся му́ченицы.

Сла́ва, стихи́ра у́тренняя ева́нгельская, 1-я, гла́съ 1:

На го́ру ученико́мъ иду́щимъ за земно́е вознесе́ніе, предста́ Госпо́дь, и поклони́вшеся Ему́, и да́нныя вла́сти вездѣ́ научи́вшеся, въ поднебе́сную посыла́хуся проповѣ́дати е́же изъ ме́ртвыхъ воскресе́ніе, и е́же на небеса́ возше́ствіе, и́мже и во вѣ́ки спребыва́ти нело́жный обѣща́ся Христо́съ Богъ, и Спа́съ ду́шъ на́шихъ.

И ны́нѣ: Преблагослове́нна еси́, Богоро́дице Дѣ́во... Славосло́віе вели́кое. По Трисвято́мъ тропа́рь воскре́сенъ то́чію, ектеніи́ и отпу́стъ. И ча́съ 1-й въ притво́рѣ, и поуче́ніе Студи́тово, и соверше́нный отпу́стъ.


НА ЛИТУРГІИ,
Блаже́нна воскре́сна гла́са, на 4, гла́съ 8:

Помяни́ на́съ, Христе́, Спа́се мíра, я́коже помяну́лъ еси́ разбо́йника на дре́вѣ, и сподо́би всѣ́хъ, Еди́не Ще́дре, небе́снаго Ца́рствія Твоего́.

На дре́вѣ пригво́ждся, Спа́се нашъ, во́лею, дре́вомъ Ада́ма отъ кля́твы изба́вилъ еси́, воздава́я, я́ко Ще́дръ, е́же по о́бразу, и рая́ вселе́ніе.

Слы́ши, Ада́ме, и ра́дуйся со Евою, я́ко обнажи́вый дре́вле обои́хъ, и пре́лестію взе́мый плѣне́нны на́съ, Кресто́мъ Христо́вымъ упраздни́ся.

Дне́сь Христо́съ воскре́съ отъ гро́ба, всѣ́мъ вѣ́рнымъ подая́ нетлѣ́ніе, и ра́дость обновля́етъ мѵроно́сицамъ по стра́сти и воста́ніи.

И отъ кано́на всѣ́хъ святы́хъ пѣ́снь 6-я, на 4. Проки́менъ апо́стола, гла́съ 8: Помоли́теся и воздади́те Го́сподеви Бо́гу на́шему. Сти́хъ: Вѣ́домъ во Іуде́и Бо́гъ, во Изра́или ве́ліе и́мя Его́. И святы́мъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Апо́столъ ко Евре́омъ, зача́ло 330: [Бра́тіе,] святíи вси́... Аллилу́ія, гла́съ 4: Сти́хъ: Воззва́ша пра́ведніи и Госпо́дь услы́ша и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь. Ева́нгеліе Матѳе́я, зача́ло 38: [Рече́ Госпо́дь Свои́мъ ученико́мъ:] вся́къ у́бо, и́же исповѣ́сть Мя́ предъ человѣ́ки... Прича́стный: Хвали́те Го́спода съ небе́съ... Другíй: Ра́дуйтеся, пра́ведніи, о Го́сподѣ... На трапе́зѣ утѣше́ніе бра́тіи, гото́вящимся къ по́стному по́двигу.


[Зри:] Подоба́етъ вѣ́дати: а́ще хра́мъ всѣ́хъ святы́хъ:

На ма́лѣй и вели́цѣй вече́рни, и на у́трени, и на литургíи, подо́бнѣ пое́мъ, я́коже случи́тся въ недѣ́лю вели́каго свята́го, ему́же быва́етъ бдѣ́ніе. То́чію на у́трени пое́мъ поліеле́й.

По поліеле́и:

Велича́емъ ва́съ, апо́столи, му́ченицы, проро́цы, и вси́ святíи, и чте́мъ святу́ю па́мять ва́шу, вы́ бо мо́лите о на́съ Христа́ Бо́га на́шего.

Псало́мъ избра́нный: Блаже́нъ му́жъ боя́йся Го́спода... И сѣда́ленъ святы́мъ, пи́санъ въ кано́нѣ по 3-й пѣ́сни. Степе́нна гла́са. Проки́менъ: Вся́кое дыха́ніе... И Ева́нгеліе святы́мъ. Воскресе́ніе Христо́во... И псало́мъ 50-й. Сла́ва: Моли́твами всѣ́хъ святы́хъ... И ны́нѣ: Моли́твами Богоро́дицы... Вмѣ́сто Воскре́съ Іису́съ... стихи́ра всѣ́мъ святы́мъ, ку́ю во́лиши. Кано́нъ воскре́сенъ со ирмосо́мъ на 4, и Богоро́дицы на 2, и святы́мъ на 8. И про́чее, я́коже предписа́ся.

Коне́цъ, и Бо́гу сла́ва.

Источникъ: Послѣдованіе во святую и Великую недѣлю Пасхи и во всю Свѣтлую седмицу. — М.: Сѵнодальная Тѵпография, 1899. — Л. 214 – 229 об.

/ Къ оглавленію раздѣла /


Наверхъ / Къ титульной страницѣ

0