Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 30-й де́нь.
Свята́го священному́ченика Григо́рія, просвѣти́теля Вели́кія Арме́ніи.

[ВЕЧЕРЪ,]
На Го́споди воззва́хъ: стихи́ры на 6, гла́съ 6. Подо́бенъ: Все́ отло́жше.

Му́ченическими кровьми́* свяще́нную ри́зу обагри́въ,* вше́лъ еси́ во Свята́я святы́хъ, досточу́дне,* идѣ́же свѣ́тъ неизрече́нный,* идѣ́же Боже́ственная сла́ва,* идѣ́же гла́съ пра́зднующаго,* въ не́мже трудо́въ твои́хъ, му́чениче,* воспріе́млеши возме́здія,* и вѣне́цъ неувяда́ющій,* и вѣ́чнующее благосла́віе,* и ра́йское жили́ще,* Григо́ріе му́дре,* со дерзнове́ніемъ моли́ся* о душа́хъ на́шихъ.

Муче́ній не поколеба́ше* твоея́ души́ треволне́ніе,* ни затворе́ніе долговре́менное,* во мра́чнѣмъ рвѣ́ сокрыва́ющее тя́,* страда́льче сла́вный,* но, я́ко свѣ́тъ, возсія́лъ еси́* во тмѣ́ бѣ́дствующимъ суеты́,* я́же сы́ны дне́ показа́лъ еси́* ба́нею креще́нія,* и возрожде́ніемъ лу́чшимъ и спаси́тельнымъ,* и боже́ственнымъ и́стинно пребыва́ніемъ,* я́ко іера́рхъ богопрія́тенъ,* всему́дре Григо́ріе.

Жениха́ Безсме́ртнаго,* Тя́, всѣ́хъ Влады́ку,* Рипсимíя лю́бящи,* ко́жи тѣле́сныя содра́ніе пріе́млетъ,* страсте́й пе́рвѣе те́мное вре́тище* воздержа́ніемъ растерза́вши;* съ не́юже подвиза́ся и Гаіанíя приснопа́мятная,* дѣ́въ приводя́щи собо́ръ,* крѣ́пко пострада́вшій* и низло́жшій Евы дре́вняго лестца́;* я́же досто́йно хва́ляще,* Тя́, Христе́, сла́вимъ.

Сла́ва, гла́съ то́йже. Се́ргія. Самогла́сенъ:

Кто́ досто́йно добродѣ́телей твои́хъ повѣ́сть побѣ́ды? Ка́я уста́ муче́ній терпѣ́ніе изреку́тъ? Во обои́хъ бо до́блествовалъ еси́, Григо́ріе. Но не преста́й моля́, уго́дниче Христо́въ, спасти́ ду́ши на́ша, я́ко имѣ́я, священному́чениче, дерзнове́ніе мно́гое.

И ны́нѣ, богоро́диченъ или́ крестобогоро́диченъ, гла́съ то́йже. Подо́бенъ: Все́ отло́жше.

Агнца Своего́* Агница нескве́рная дре́вле* и непоро́чная Влады́чица* на Кре́стъ воздвиза́ема я́ко ви́дѣ,* Ма́терски восклица́ше* и, удивля́ющися, вопія́ше:* что́ видѣ́ніе сіе́, Ча́до сла́дкое,* но́вое и пресла́вное?* Ка́ко лю́діе неблагода́тніи* суди́щу Пила́тову предаю́тъ Тя́* и осужда́ютъ сме́ртію Живота́ всѣ́хъ?* Но пою́ Твое́ неизрече́нное,* Сло́ве, схожде́ніе.

На стихо́внѣ окто́иха. Сла́ва, гла́съ 6:

Въ незаходя́щій о́блакъ неизрече́ннаго свѣ́та вше́дъ разу́мно, му́ченикъ и па́стырь навы́че неизглаго́ланная та́инъ Христо́выхъ, я́ко му́ченикъ у́бо просвѣща́емь, я́ко па́стырь же тайново́дству науча́емь. Тѣ́мъ и сугу́быми вѣнцы́ отъ вы́шнія сла́вы увязе́ся, моля́ся всегда́ Христу́ о душа́хъ на́шихъ.

И ны́нѣ, богоро́диченъ или́ крестобогоро́диченъ, [гла́съ то́йже.] Подо́бенъ: Тридне́венъ.

Ви́дящи Тя́ распина́ема, Христе́,* Тебе́ Ро́ждшая вопія́ше:* что́ стра́нное,* е́же ви́жу, та́инство, Сы́не Мо́й?* Ка́ко на дре́вѣ умира́еши,* пло́тію повѣ́шенъ,* жи́зни Пода́телю?

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, въ видѣ́нія восхо́дъ; сего́ ра́ди сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Григо́ріе, моли́ Христа́ Бо́га спасти́ся душа́мъ на́шимъ.


НА УТРЕНИ,
Оба кано́на окто́иха. И свята́го на 6, его́же краегране́сіе: Бо́драго пою́ тя, му́чениче, па́стыря. Гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Тро́ицѣ честнѣ́й предстоя́ вѣнцено́сецъ, я́ко бо́дръ па́стырь, я́ко му́ченикъ свяще́ненъ, свяще́нными твои́ми моли́твами успи́ страсте́й мои́хъ мра́чная привидѣ́нія хва́лящему тя́, блаже́нне Григо́ріе.

Незаходи́мый свѣти́льникъ, іера́рхъ вели́кій, многострада́льный па́стырь, подвиго́въ искуше́ніе, Арме́ніи хвала́ дне́сь на пѣ́ніе вѣ́рныя призва́: соше́дшеся, того́ ублажи́мъ.

Во́дъ живо́тныхъ Ду́ха, блаже́нне, напо́лнился еси́, я́ко рѣка́ Еде́ма у́мнаго исходя́щая, лице́ напая́я церко́вное и изсуша́я пучи́ну идолонеи́стовства, Григо́ріе.

Богоро́диченъ: Жены́, Кресто́мъ отъ Тебе́ Вопло́щшагося укрѣпля́емы, Чи́стая, пострада́ша крѣ́пко и Тому́ приведе́ны бы́ша во слѣ́дъ Тебе́, Дѣ́вы, дѣ́вства блиста́ньми и му́ченическими кровьми́ сія́юще.

Пѣ́снь 3.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Ра́нами подвиго́въ твои́хъ зу́бы сокруши́лъ еси́ льво́въ, и излія́ньми крове́й де́монскую кро́вь погубля́я, и́дольская же изъ ко́рене низвраща́еши ка́пища, досточу́дне.

Ни лю́тыхъ наляца́нія, ни го́рькія му́ки, ни мра́чнѣйшаго ро́ва затворе́ніе долговре́менное тво́й адама́нтскій преврати́ша по́мыслъ, му́чениче досточу́дне.

Дрема́нія твои́мъ очесе́мъ, му́чениче, не да́лъ еси́, до́ндеже дрема́ніемъ злы́мъ одержи́мыя злочести́во сы́ны дне́ показа́лъ еси́, зову́щія: свя́тъ еси́, Го́споди.

Богоро́диченъ: Дѣвома́терь Тя́, Отрокови́це, Рипсимíя му́ченица вѣ́дущи еди́ну, восхотѣ́ Твои́мъ добро́тамъ и Христу́ во слѣ́дъ приведе́ся, страстьми́ свѣтя́щися.

Сѣда́ленъ, гла́съ 4. Подо́бенъ: Вознесы́йся.

Пресвѣ́тлыми сія́ньми, іера́рше, озари́въ твою́ ду́шу свѣтоно́сно, добродѣ́тельми просвѣти́лъ еси́ лице́ земли́, имѣ́я въ се́рдцѣ твое́мъ Христа́; просвѣща́еши же, я́ко со́лнце незаходи́мое, язы́ковъ собо́ры, му́ченическими добро́тами на́съ удобря́я, Григо́ріе всему́дре. [Два́жды.]

Сла́ва, и ны́нѣ, богоро́диченъ:

Грѣхолюби́въ сы́й, молю́ Тя, Безгрѣ́шнаго Бо́га ро́ждшую, взе́млющаго грѣ́хъ мíра, Пречи́стая, многогрѣ́шную ду́шу мою́ уще́дрити и грѣхи́ моя́ мно́гія очи́стити, грѣ́шныхъ бо Ты́ еси́ очище́ніе и спасе́ніе вѣ́рныхъ и защище́ніе.

Крестобогоро́диченъ:

Изъ Безнача́льнаго Отца́ рожде́ннаго, въ послѣ́дняя времена́ пло́тію Ро́ждшая, на Крестѣ́ Тя́ ви́сяща зря́щи, Христе́, — увы́ Мнѣ́, любе́знейшій Іису́се! — вопія́ше, — ка́ко сла́вимый, я́ко Бо́гъ, отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́, во о́блацѣ ле́гцѣ пріи́де Іису́съ Пребоже́ственный нетлѣ́нною дла́нію и спасе́ зову́щія: сла́ва, Христе́, си́лѣ Твое́й.

На обзо́рную тя́ высоту́ муче́нія возведе́ высо́кій въ сла́вѣ Госпо́дь вы́шній, сла́вне, Его́же Стра́сти, ра́дуяся, изобрази́лъ еси́, священному́чениче: сла́ва, — вопія́, — си́лѣ Твое́й.

Губя́щаго безбо́жнаго врага́ всю́ зе́млю Арме́нскую Боже́ственною си́лою низложи́лъ еси́ и, я́ко заря́ просія́въ, просвѣти́лъ еси́ во тмѣ́ лежа́щія, му́дре, су́етства.

Многосугу́бно Созда́телю тво́й тала́нтъ прине́слъ еси́, спа́сшихся боже́ственными твои́ми уче́ніи, Григо́ріе, и отъ Него́ нестарѣ́ющійся жре́бій прія́лъ еси́, Ца́рство, е́же на небесѣ́хъ, и свѣ́тлость.

Богоро́диченъ: Яко добру́, я́ко избра́нну Тя́ и я́ко красну́ возлюби́ша отрокови́цы дѣ́вы, съ Рипсимíею страда́вшія, Дѣвома́ти Марíе, и во слѣ́дъ Тебе́ приведо́шася Сы́ну Твоему́, ра́дующеся.

Пѣ́снь 5.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Крестоявле́нно ви́дѣлъ еси́ зна́меніе я́вѣ, свѣ́томъ сія́ющее и разруша́ющее но́щь и́дольскую, свѣ́та же ча́да вѣ́рныя содѣ́ловающее.

Въ до́льнѣйшемъ тя́ ро́вѣ спасе́ Христо́съ Бо́гъ, со звѣрьми́ су́ща лѣ́тнымъ измѣне́ніемъ, хотя́ща свѣ́томъ Боже́ственнаго Сло́ва просвѣща́ти безу́мныя.

Му́ченически подвиза́вся, вѣнча́лся еси́ я́ко побѣди́тель, пома́зався же мѵ́ромъ архіере́йства, пома́залъ еси́ лю́ди, злосмра́дныя льсти́ изба́вивъ, Григо́ріе.

Богоро́диченъ: Воню́ ощути́вше мѵ́ра дѣ́вы, изъ Тебе́, Чи́стая Дѣ́во, возсія́вшаго Сло́ва, страда́льческими по́двиги Тому́ благоугоди́ша, ра́дующеся.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Слове́съ твои́хъ си́лою тре́бища разори́шася, и де́монстіи низложи́шася нетве́рдіи куми́ры, и вѣ́рныхъ сердца́ боже́ственнымъ утверди́шася раче́ніемъ.

Тирида́та, я́коже ве́пря свя́заннаго, приве́лъ еси́ я́ко а́гня Го́споду, пре́жде бы́вша во́лка свирѣ́паго, за вели́кое бога́тство благоутро́бія Бо́жія ны́нѣ спаса́ема.

Показа́лъ еси́ заблу́ждшимъ стезю́ Боже́ственную, неле́стными поуче́ніи, іера́рше, соверши́въ я́ко па́стырь, Па́стыря и́стиннаго подража́я, Григо́ріе.

Богоро́диченъ: Распина́ема отъ Тебе́, Богоро́дице, Вопло́щшагося я́ко увѣ́дѣ Рипсимíя, Тому́ сраспя́тся, я́ко а́гница Па́стырю, я́ко же́ртва Бо́гу непоро́чная.

Конда́къ, гла́съ 2. Подо́бенъ: Тве́рдыя.

Благосла́внаго и священнонача́льника вси́, я́ко страда́льца и́стины, дне́сь вѣ́рніи въ пѣ́снехъ и пѣснопѣ́ніихъ восхва́лимъ, бо́драго па́стыря и учи́теля Григо́рія, всемíрнаго свѣти́льника и побо́рника, Христу́ бо мо́лится, е́же спасти́ся на́мъ.

Икосъ:

Сего́ вели́каго во страстоте́рпцѣхъ, свѣти́льника боже́ственнаго, Арме́ніи вѣ́рна па́стыря и учи́теля въ пѣ́снехъ восхва́лимъ и пѣ́ніи боже́ственными главу́ его́ вѣнча́емъ, и́бо тму́ безбо́жія и́дольскаго погуби́, съ ни́миже и де́монское дѣ́йство все́ умертви́. Тѣ́мъ труды́ претерпѣ́въ крѣ́пкимъ по́мысломъ и благода́тію, Христу́ ны́нѣ мо́лится, е́же спасти́ся на́мъ.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Многови́дныя му́ки претерпѣ́въ, му́чениче, мно́гія отъ му́къ свободи́лъ еси́ и бу́дущія печа́ли, вопія́: оте́цъ на́шихъ Бо́же, благослове́нъ еси́.

До́мъ себе́ Тро́ицы соверши́въ, блаже́нне, хра́мы и́дольскія разори́лъ еси́, хра́мы же воздви́глъ еси́ Всеви́дцу Сло́ву, лю́демъ на спасе́ніе.

Священнодѣ́латель яви́лся еси́, тебе́ сама́го же́ртву пре́жде те́плѣ прине́слъ еси́ Влады́цѣ твоему́, Ему́же жря́ пото́мъ, благочести́вымъ дае́ши душа́мъ во спасе́ніе.

Богоро́диченъ: Му́ченическими вѣнцы́ укра́шены, отрокови́цы изъ Дѣ́вы возсія́вшему Бо́гу приведо́шася, пѣснопѣ́сненно вопію́ще: Христе́, благослове́нъ еси́.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Пострада́въ зако́нно, посрами́лъ еси́ беззако́нныя враги́ крѣпча́йше, священнослужи́телю Григо́ріе, и Бо́гу приве́лъ еси́ мно́жество пою́щихъ: вся́кая дѣла́, благослови́те, Госпо́дня, Го́спода.

Воздѣ́лавъ непло́дную ни́ву, насѣ́ялъ еси́ слове́сная сѣ́мена, во сто́ пожа́въ слове́сныхъ кла́совъ благопло́діе, Дѣ́лателю ду́шъ угобзи́вшее.

Блиста́ньми слове́съ твои́хъ просвѣти́лъ еси́ и мно́гія тмы́ приве́лъ еси́, на́съ ра́ди во́лею Претерпѣ́вшему Стра́сти, Ему́же пѣснопое́мъ: благослови́те, вся́ дѣла́ Госпо́дня, Го́спода.

Богоро́диченъ: Ни мно́жества му́къ убоя́вшися, ни плотски́мъ сласте́мъ повину́вшися, отъ Дѣ́вы Го́спода су́ща исповѣ́да, вопію́щи, Рипсимíя: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Си́лою вжиля́емь Христо́вою, претерпѣ́лъ еси́ му́къ болѣ́зни, и ка́пища погуби́лъ еси́ де́монская, и хра́мы и́дольскія раскопа́лъ еси́, лю́ди же, су́щія въ невѣ́дѣніи, просвѣти́лъ еси́, священному́чениче всече́стне.

Яко у́тро, возсія́ на́мъ па́мять твоя́, благода́тей зарю́ нося́щи, ты́ бо свѣ́та яви́лся еси́ прія́телище Боже́ственнаго и къ Свѣ́ту возше́лъ еси́ невече́рнему, бога́тно озаря́емь свѣтоли́тіи Боже́ственными, преподо́бне.

Собесѣ́дникъ яви́лся еси́ проро́ковъ, му́чениковъ же и апо́столовъ купножи́тель, архіере́евъ и преподо́бныхъ, а́нгеловъ и арха́нгеловъ равноста́тенъ, съ ни́миже о на́съ, чту́щихъ тя́, о́тче, моли́ Человѣколю́бца.

До́блествоваша жены́ честны́я, испаде́ніе Евино исправля́юще, претерпѣ́ша болѣ́зней треволне́ніе, вельми́ на высоту́ хва́лящагося нога́ми краснѣ́йшими сокруши́ша, и́хже досто́йно ублажа́емъ.

Богоро́диченъ: Свѣ́томъ лица́ изъ Тебе́ Возсія́вшаго озари́вшися, Приснодѣ́во, любо́вію неудержа́нною, Рипсимíя Стра́сти Его́ и Сме́рть свое́ю пло́тію изобрази́, тѣ́мже съ Тобо́ю, Влады́чице, ны́нѣ весели́тся.

Свѣти́ленъ. Подо́бенъ: Ученико́мъ.

Въ ро́вѣ вре́менно затворе́на со звѣрьми́ Григо́рія похва́лимъ сла́внаго, премѣни́вша ди́вія ве́пря мучи́теля Тирида́та и огласи́вша сло́во все́й земли́ просвѣще́нія.

Богоро́диченъ:

Честнѣ́йши еси́ всѣ́хъ тва́рей, Богоро́дице, Христа́ поро́ждшая, Того́ у́бо моли́ сохрани́тися ма́лѣй се́й па́ствѣ Твое́й невреди́мѣй отъ вся́каго навѣ́та проти́внаго.


НА ЛИТУРГІИ,

Блаже́нна окто́иха на 4, и свята́го пѣ́снь 3-я, на 4. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Кори́нѳяномъ, зача́ло 166. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Матѳе́я, зача́ло 103. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 288 – 292.

/ Къ оглавленію раздѣла /


Наверхъ / Къ титульной страницѣ

0