Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 30-й де́нь.
Слу́жба преподо́бнаго отца́ на́шего Григо́рія, и́же на Пе́льшмѣ рѣцѣ́, Во́логодскаго чудотво́рца.

[НА ВЕЛИЦѢЙ ВЕЧЕРНИ,]
Блаже́нъ му́жъ.., [1-й антифо́нъ]. На Го́споди воззва́хъ: стихи́ры преподо́бнаго [на 8], гла́съ 8. Подо́бенъ: О, пресла́внаго чудесе́!

Преподо́бне о́тче Григо́ріе,* мірскíя себе́ отлучи́лъ еси́ молвы́,* терпѣ́ніемъ же, и посто́мъ,* и ча́стыми моли́твами* пло́ть твою́ покори́лъ еси́ ду́ху,* и змíя лука́ваго сле́зъ ту́чами потопи́лъ еси́, блаже́нне,* и къ премíрному возше́лъ еси́ соверше́нію.* Тѣ́мже, почита́юще па́мять твою́, преподо́бне,* мо́лимъ тя́:* моли́ Христа́ Бо́га* спасти́ся душа́мъ на́шимъ. [Два́жды.]

Преподо́бне о́тче Григо́ріе,* мірскíй мяте́жъ оста́вивъ и взе́мъ кре́стъ тво́й,* послѣ́довалъ еси́ Христу́ невозвра́тнымъ по́мысломъ,* и, въ пусты́ню всели́вся, преподо́бне,* душе́вныя стра́сти изъ ко́рене исто́рглъ еси́,* и, тѣле́сная чу́вства огорчева́я,* злострада́нія претерпѣ́лъ еси́ во бдѣ́ніи съ чи́стою со́вѣстію,* и а́нгеловъ собесѣ́дникъ бы́въ, блаже́нне,* моли́ спасти́ся душа́мъ на́шимъ. [Два́жды.]

Преподо́бне о́тче Григо́ріе,* впери́въ у́мъ тво́й къ Бо́гу вѣ́рою,* плотска́го смѣше́нія* возгнуша́лся еси́ неуста́внаго* и, кре́стъ тво́й воспріи́мъ,* Всеви́дцу послѣ́довалъ еси́,* тѣ́ло непокори́вое* по́двиги воздержа́нія и по́мысла си́лою* порабо́тивъ Боже́ственному Ду́ху. [Два́жды.]

Преподо́бне о́тче Григо́ріе,* сла́ву маловре́менную оста́вивъ* и въ пусты́ню всели́вся,* бы́лъ еси́ добродѣ́тели подви́жникъ прилѣ́жный,* жесто́кимъ воздержа́ніемъ же и посто́мъ пло́ть твою́ изнури́въ,* того́ ра́ди Христо́съ обогати́ тя чудесы́.* Но помина́й ны́, ча́да твоя́,* вѣ́рою соверша́ющія всесвяще́нную па́мять твою́,* и испроси́ спасе́ніе душа́мъ на́шимъ. [Два́жды.]

Сла́ва, гла́съ 8. Самогла́сенъ:

Преподо́бне о́тче Григо́ріе, мíра красоты́ отре́клся еси́, и, вся́кое наслажде́ніе маловре́менныхъ возненави́дѣвъ, мона́шеское житіе́ па́че возлюби́лъ еси́, и въ не́мъ вельми́ подвиза́вся вся́кимъ злострада́ніемъ, за́дняя забыва́я, на пре́дняя же простира́яся, и того́ ра́ди а́нгеловъ собесѣ́дникъ бы́ти сподо́бился еси́. Но помина́й ста́до твое́, е́же собра́лъ еси́, му́дре, чту́щихъ вѣ́рою па́мять твою́, я́ко дерзнове́ніе имѣ́я ко Христу́ Бо́гу, моли́ спасти́ся душа́мъ на́шимъ.

И ны́нѣ, богоро́диченъ, [гла́съ то́йже]:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ, проки́менъ дне́. Чте́нія три́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, преподо́бне о́тче Григо́ріе, ты́ бо, и́го Христо́во на ра́мо взе́мъ до́блественнѣ, наи́тія вра́жія попра́лъ еси́, въ пусты́ню бо всели́вся, и въ не́й обрѣ́лъ еси́ небе́сную лѣ́ствицу. Тѣ́мже вси́ вѣ́рою почита́емъ па́мять твою́, о всеблаже́нне Григо́ріе, мона́шествующихъ похвало́, Христа́ непреста́нно моли́ спасти́ся душа́мъ на́шимъ.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, о́тче Григо́ріе, мона́ховъ мно́гихъ наста́вникъ бы́въ, тѣ́мже, вѣ́рою соше́дшеся, вси́ по достоя́нію тя́ чти́мъ, я́ко по́стника и служи́теля Христо́ва изя́щнаго, ра́дуяся бо, ше́ствовалъ еси́ въ пусты́ни непрохо́днѣй, му́дре, вся́ озлобле́нія претерпѣва́я, благода́тію Бо́жіею укрѣпля́емь, тѣ́мже тебѣ́ взыва́емъ: о на́съ моли́ся спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, о́тче Григо́ріе преподо́бне, сле́зными исто́чники ду́шу твою́ очища́я и всено́щнымъ стоя́ніемъ Бо́га моля́, отъ Него́же благода́тію укрѣпля́емь, земны́я ве́щи му́дре мимоте́клъ еси́, собра́лъ же еси́ въ ду́шу твою́ Боже́ственное бога́тство Ду́ха: непоро́чную моли́тву, чистоту́ краснолѣ́пну, бдѣ́ніе тве́рдо. Тѣ́мже и вы́шняго прія́тія наслѣ́дникъ яви́лся еси́, и, ны́нѣ въ небе́сныхъ селе́ніихъ водворя́яся, моли́ спасти́ся душа́мъ на́шимъ.

Сла́ва, гла́съ 8. Самогла́сенъ:

Преподо́бне и преблаже́нне, святѣ́йшій о́тче Григо́ріе, любве́ ра́ди Христо́вы вся́ оста́вилъ еси́, бога́тство и сла́ву въ ничто́же вмѣни́въ, и, въ пусты́ню вше́дъ, бдѣ́ніе же и сухояде́ніе воспріи́мъ и е́же на земли́ лега́ніе, и́миже чистоту́ душе́вную и тѣле́сную испра́вилъ еси́, устна́ми же и умо́мъ соверше́нное безмо́лвіе, у́зкій пу́ть и безстра́стный и ско́рбную жи́знь, ра́дуяся, ше́ствовалъ еси́. Тѣ́мже вѣ́рою вопіе́мъ ти́: о всеблаже́нне Григо́ріе, Христа́ непреста́нно моли́ спасти́ся душа́мъ на́шимъ.

И ны́нѣ, богоро́диченъ, [гла́съ то́йже]:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропарь, гласъ 8:

Любо́вію Христо́вою, богому́дре, просвѣти́вся, добродѣ́тельми облиста́лъ еси́ и, вся́кое наслажде́ніе плотско́е возненави́дѣвъ и въ пусты́ню всели́вся, въ не́йже вельми́ подвиза́лся еси́ въ жи́зни се́й вре́меннѣй въ пѣ́ніихъ, и во бдѣ́ніихъ, и въ поще́ніихъ, сего́ ра́ди и Христо́съ да́ромъ чуде́съ обогати́ тя. Но помина́й на́съ, чту́щихъ пресвѣ́тлую па́мять твою́, преподо́бне о́тче Григо́ріе, и моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ, [гла́съ то́йже:

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.]


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 5. Подо́бенъ: Собезнача́льное.

Печа́ли житія́ отве́ргся и а́нгельское воспріи́мъ житіе́, воздержа́ніемъ ду́шу удобри́лъ еси́ и чуде́съ благода́ть отъ Бо́га прія́лъ еси́ бога́тно, Григо́ріе блаже́нне, о на́съ моли́ся, благоче́стно восхваля́ющихъ тя́. [Два́жды.]

Сла́ва, и ны́нѣ, богоро́диченъ:

Пречи́стая Дѣ́во, на́съ поми́луй, вѣ́рою прибѣга́ющихъ къ Тебѣ́, Милосе́рдой, и прося́щихъ Твоего́ те́плаго, Влады́чице, заступле́нія, мо́жеши бо, я́ко Блага́, всѣ́хъ спасти́, я́ко су́щи Ма́ти Бо́га вы́шняго, Ма́терними Твои́ми мольба́ми при́сно объе́мши, Богора́дованная.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости.

Мно́гимъ воздержа́ніемъ, преподо́бне, житіе́ твое́ украси́въ, пу́ть показа́лъ еси́ хотя́щимъ, веду́щій въ жи́знь, добродѣ́тельми и смире́ніемъ, мíра бо отве́ргся и вся́, я́же въ мíрѣ кра́сная, преоби́дѣвъ, ева́нгельскимъ уче́ніемъ послѣ́довалъ еси́, жесто́кимъ у́бо житіе́мъ пло́ть твою́ изнуря́я, и го́рдаго змíя воздержа́ніемъ уби́лъ еси́, тѣ́мже на небесѣ́хъ водворя́ешися, Трисо́лнечному Божеству́ предстоя́, блаже́нне Григо́ріе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́ста Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и де́мономъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и свѣ́та невече́рняго моли́твами Твои́ми.

[Поліеле́й и велича́ніе:

Ублажа́емъ тя́, преподо́бне о́тче Григо́ріе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрости.

Нищету́ у́бо возлюби́лъ еси́ па́че бога́тства тлѣ́ннаго и сою́зомъ любве́ привяза́ся, земна́я и мимотеку́щая возненави́дѣвъ, блаже́нне, пусты́нное озлобле́ніе усе́рдно подъе́мъ, тѣ́мже и къ ре́вности а́нгельскаго житія́ воздви́глъ еси́ мно́жество мона́шествующихъ, преподо́бне о́тче на́шъ Григо́ріе, моли́ Христа́ Бо́га грѣхо́въ оставле́ніе дарова́ти на́мъ и ве́лію ми́лость. [Два́жды.]

Сла́ва, и ны́нѣ, богоро́диченъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся, и Младе́нецъ бы́сть, пре́жде вѣ́къ Сы́й Бо́гъ на́шъ: ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* [сме́рть преподо́бныхъ Его́]. Сти́хъ: Что́ возда́мъ Го́сподеви [о всѣ́хъ, я́же воздаде́ ми́?] Вся́кое дыха́ніе... Ева́нгеліе преподо́бническое, [отъ Матѳе́я, зача́ло 43].

По 50-мъ псалмѣ́ стихи́ра, гла́съ 8:

Преподо́бне и преблаже́нне, [святѣ́йшій о́тче Григо́ріе, любве́ ра́ди Христо́вы вся́ оста́вилъ еси́, бога́тство и сла́ву въ ничто́же вмѣни́въ, и, въ пусты́ню вше́дъ, бдѣ́ніе же и сухояде́ніе воспріи́мъ и е́же на земли́ лега́ніе, и́миже чистоту́ душе́вную и тѣле́сную испра́вилъ еси́, устна́ми же и умо́мъ соверше́нное безмо́лвіе, у́зкій пу́ть и безстра́стный и ско́рбную жи́знь, ра́дуяся, ше́ствовалъ еси́. Тѣ́мже вѣ́рою вопіе́мъ ти́: о всеблаже́нне Григо́ріе, Христа́ непреста́нно моли́ спасти́ся душа́мъ на́шимъ].

Кано́нъ Богоро́дицы, со ирмосо́мъ на 6. И свята́го на 8, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Земна́я и мимотеку́щая я́ко уме́ты вмѣни́въ, Христа́ еди́наго пріобрѣ́лъ еси́, Его́же любо́вію уязви́въ ду́шу твою́, Григо́ріе преподо́бне, моли́ся ко Го́споду на́съ просвѣти́ти.

Возше́дъ на высоту́ добродѣ́телей, до́лу влеку́щія сла́сти оплева́лъ еси́, сла́дость показа́лъ еси́ спасе́ніе, о́тче преподо́бне, ста́ду твоему́.

Нахожде́нія вра́жія лука́выхъ духо́въ, отъ Бо́га сокруше́ннымъ се́рдцемъ пріе́мъ по́мощь, Григо́ріе блаже́нне, и воздержа́ніемъ огради́вся, побѣди́лъ еси́ и́хъ.

Богоро́диченъ: Прему́дрость Бо́жію вои́стинну, Сло́во Отчее несказа́нно ро́ждшая, души́ моея́ лю́тую я́зву исцѣли́ и серде́чную болѣ́знь, Ма́ти Бо́жія, укроти́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Попали́лъ еси́ у́гліемъ воздержа́нія страсте́й те́рніе, преподо́бне, и прогоня́я нечи́стыя ду́хи, богоблаже́нне.

Яко свѣти́льникъ, твою́ ду́шу сле́зными пото́ки украша́я, преподо́бне, се́рдце твое́ поже́рлъ еси́ Бо́гу.

Стра́сти душетлѣ́нныя успи́лъ еси́ бо́дростными моли́твами и бдѣ́ньми, всеблаже́нне, тѣ́мже въ небе́сный черто́гъ всели́лся еси́, ра́дуяся.

Богоро́диченъ: Уста́ви неуста́вное помышле́ній мои́хъ, Чи́стая, смуще́ніе, Ма́ти Бо́жія, къ Сы́ну Твоему́ направля́ющи моя́ движе́нія.

Сѣда́ленъ, гла́съ 8. Подо́бенъ: Прему́дрости.

Красоты́ мірскíя отъ млады́хъ ногте́й, преподо́бне, возненави́дѣвъ, Христа́ же еди́наго отъ се́рдца возлюби́лъ еси́ и, Тому́ вседу́шно прилѣпи́вся, я́ко безпло́тенъ, на земли́ пожи́лъ еси́ съ пло́тію, сла́ву же мимотеку́щую и бога́тство въ ничто́же вмѣни́въ, небе́сное бога́тство воспрія́лъ еси́ и сла́ву вѣ́чную. Тѣ́мже и ублажа́емъ свято́е Твое́ успе́ніе и, въ не́мъ торжеству́юще, вопіе́мъ ти́: богоно́сне о́тче на́шъ Григо́ріе, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная [Невѣ́ста Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и де́мономъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й и вы́шняго прича́стія сподо́би и свѣ́та невече́рняго моли́твами Твои́ми].

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Яко въ поро́дѣ благово́ннѣй и добродѣ́тели въ раи́ одушевле́ннѣмъ, воздержа́ніемъ процвѣ́лъ еси́, и́мже пита́еши чту́щія тя́.

Мíра любве́ отре́кся, дости́же го́рняго Іерусали́ма, идѣ́же Христо́съ со Отце́мъ и Ду́хомъ, и вѣнца́ отъ Него́ сподо́бися, со безпло́тными ли́ки поя́: сла́ва си́лѣ Твое́й, Го́споди.

Законополо́жника воздержа́нію мона́ховъ и пра́вило кро́тости, я́ко Моисе́я тя́ и Дави́да вои́стинну стяжа́вше, о́тче, ублажа́емъ.

Богоро́диченъ: Подъ лѣ́томъ бы́вша, Иже отъ Отца́ безлѣ́тно возсія́вшаго, Богома́ти, на́мъ родила́ еси́, Его́же моли́ спасти́ пою́щія Тя́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Страсте́й мглу́ отгна́въ, преподо́бне, заря́ми, о́тче, по́двигъ твои́хъ и просвѣще́ніе Ду́ха въ се́рдцы воспріи́мъ, Григо́ріе, и́мже попали́лъ еси́ вся́ де́монская ополче́нія и лико́мъ по́стническимъ причта́лся еси́.

Погаси́въ стра́сти росо́ю воздержа́нія, о́тче блаже́нне, бога́тно вже́глъ еси́ о́гнь любве́, и вѣ́ры, и поще́нія, свѣти́льникъ, просвѣща́яся безсме́ртіемъ, и дне́ сы́нъ, о́тче, бы́лъ еси́.

Удобри́въ свяще́нную твою́ ду́шу, о́тче всеблаже́нне Григо́ріе, изволе́ніемъ простоты́, и ху́дость ри́зную имѣ́лъ еси́, тѣ́мже украше́ніе добродѣ́тельно показа́лся еси́ чту́щимъ всечестну́ю па́мять твою́.

Богоро́диченъ: Еди́на ро́ждши Дѣ́ва, еди́на муженеиску́сна яви́лася еси́, Всенепоро́чная, во утро́бѣ бо Сло́во Отчее пріе́мши безнача́льное, и млеко́мъ дои́ши, Дѣ́во, чу́до стра́нно! и, дѣ́вствующи, зако́ны обновля́еши естества́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Собра́лъ еси́ въ души́ твое́й боже́ственныя плоды́ Ду́ха: непоро́чну моли́тву, чистоту́ же кра́сну и бдѣ́ніе тве́рдо, воздержа́нія болѣ́зни, и́миже хра́мъ показа́лся еси́ Бо́га Вседержи́теля.

Душе́вный ра́зумъ впери́въ, сла́вне, и чу́вствія окорми́въ, му́дре, святы́ню благоче́стія су́щимъ на земли́ возвѣща́лъ еси́ и е́же къ небеси́ восхожде́ніе.

Земны́хъ веще́й ху́дость мимоте́клъ еси́, му́дре, невеще́ственною же моли́твою на небеса́ возлетѣ́лъ еси́ и вы́шняго воспрія́тія наслѣ́дникъ яви́лся еси́ житія́ соверше́ніемъ.

Богоро́диченъ: Прія́ла еси́ вои́стинну Боже́ственное Сло́во въ ложесна́ Твоя́ и Сего́ па́че естества́, Пречи́стая, родила́ еси́, Его́же мольба́ми Твои́ми умоли́ отъ бѣ́дъ вся́ изба́вити рабы́ Твоя́.

Конда́къ, гла́съ 8:

Христо́вою любо́вію уязви́вся, преподо́бне, и Тому́ невозвра́тнымъ жела́ніемъ послѣ́довалъ еси́, вся́кое наслажде́ніе плотско́е возненави́дѣвъ и въ пусты́ню всели́вся, въ не́й вельми́ подвиза́лся еси́, тѣ́мъ и Христо́съ да́ромъ чуде́съ обогати́ тя. Помина́й на́съ, чту́щихъ пресвѣ́тлую па́мять твою́, да зове́мъ ти́: ра́дуйся, преподо́бне Григо́ріе, о́тче на́шъ.

Икосъ:

Ева́нгельскій гла́съ, о́тче, услы́шавъ, вся́ оста́вилъ еси́ плотска́я мудрова́нія, бога́тство и сла́ву въ ничто́же вмѣни́въ, и на стра́сти, я́ко безпло́тенъ, подвиза́лся еси́, и безпло́тныхъ ликостоя́ніемъ чистото́ю уподо́бился еси́, и ра́зума дарова́ніе отъ Бо́га прія́лъ еси́, е́же пода́ждь въ пѣ́снехъ пою́щему ти́ си́це: ра́дуйся, Григо́ріе преподо́бне и богоно́сне, небе́сный человѣ́че и земны́й а́нгеле; ра́дуйся, Ду́ха Свята́го прекра́сное оби́телище; ра́дуйся, богоблаже́нне, вельми́ подвиза́вся во вре́меннѣй жи́зни, по достоя́нію обогати́лся еси́ благода́тію Ду́ха, ея́же дарова́ніе пода́ждь на́мъ, ча́домъ твои́мъ, да зове́мъ ти́: ра́дуйся, преподо́бне Григо́ріе, о́тче на́шъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Въ зла́цѣ боже́ственныхъ наказа́ній ста́до, о́тче, воспита́лъ еси́ и жезло́мъ уче́нія звѣ́ри отгна́въ ересе́й, поя́: отце́въ на́шихъ Бо́же, благослове́нъ еси́.

Зѣ́льнымъ поще́ніемъ, я́ко благово́нною пи́щею, пита́я ду́шу твою́, преподо́бне Григо́ріе, тѣ́мже и Трисо́лнечному Божеству́ предста́ти сподо́бился еси́, со а́нгелы поя́: отце́въ на́шихъ Бо́же, благослове́нъ еси́.

Въ приста́нище ти́хое вше́дъ, богому́дре, жите́йскихъ пла́ваній отбѣ́гъ и волну́емыхъ въ бу́ри стра́шнѣй спаси́тельное окормле́ніе бы́въ, воспѣва́я: отце́въ на́шихъ Бо́же, благослове́нъ еси́.

Богоро́диченъ: Изба́вихомся вси́ отъ страсте́й и бѣ́дъ, обстоя́ній и неду́говъ многообра́зныхъ моли́твами Твои́ми, Богома́ти, Сы́ну Твоему́ зову́ще: благослове́нъ Бо́гъ отце́въ на́шихъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Въ поще́ніихъ крѣ́пкое и въ моли́твахъ нелѣ́ностное, терпѣ́ніе во искуше́ніихъ, Григо́ріе преподо́бне, на земли́ показа́лся еси́, Бо́гу предстоя́, зове́ши: хвали́те и превозноси́те Его́ во вѣ́ки.

Уязви́вся боже́ственнымъ жела́ніемъ, всеблаже́нне, тѣ́мже и непоро́чно и пра́ведно житіе́ проше́лъ, до́ндеже дости́глъ еси́ Ца́рскаго престо́ла, со а́нгелы поя́: хвали́те и превозноси́те Его́ во вѣ́ки.

Украше́нъ добродѣ́тельми, въ по́стницѣхъ я́ко а́нгелъ показа́лся еси́, во свѣ́тѣ неизрече́нныя сла́вы почива́еши, пѣ́снь воспѣва́я Христу́ Бо́гу: хвали́те, по́йте и превозноси́те Его́ во вѣ́ки.

Богоро́диченъ: Поглоще́ннаго болѣ́зньми и па́дшаго возста́ви, Богома́ти, я́ко да Тя́ сла́влю во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Душетлѣ́нныя стра́сти побѣди́въ и я́ко па́стырь и́стинный, упа́слъ еси́ слове́сное ста́до, я́ко цвѣ́ты ра́йскими, напитава́я си́хъ благода́тію, блаже́нне.

Узкій и приско́рбный ше́ствовавъ пу́ть, о́тче Григо́ріе, тѣле́снѣ у́бо преста́вился еси́, ду́хомъ же жи́въ Бо́гу предстои́ши, но я́ко имѣ́я дерзнове́ніе къ Бо́гу, моли́ спасти́ся на́мъ.

Предѣ́лъ неукло́ненъ вѣ́ры и воздержа́нія о́бразъ иму́ще по́двиги твоя́, преподо́бне, вои́стинну Зижди́теля пѣ́сньми велича́емъ.

Богоро́диченъ: Въ Тя́ всели́ся, Всенепоро́чная, и и́же пе́рвѣе родонача́льнымъ злообра́зно запе́нша человѣкоубíйца низложи́въ, Роди́выйся изъ Тебе́ вся́ ны́ спа́слъ е́сть.

Свѣти́ленъ:

Мірска́го пристра́стія, я́ко отъ скве́рны, уклони́лся еси́, и, а́лчбою пло́ть увяди́въ, обнови́лъ еси́ ду́шу му́жествомъ, преподо́бне, и сла́вою обогати́лся еси́ небе́сною, сла́вне. Тѣ́мже моля́ не преста́й о хва́лящихъ тя́, о́тче Григо́ріе преподо́бне. [Два́жды.]

Сла́ва, и ны́нѣ, богоро́диченъ:

Вои́стинну Богоро́дицу Тя́ исповѣ́дуемъ, Влады́чице, спа́сшіися Тобо́ю, Бо́га бо неизрече́нно родила́ еси́, разо́ршаго Кресто́мъ сме́рть, къ Себѣ́ же приве́дша преподо́бныхъ собо́ры, съ ни́миже Тя́ восхваля́емъ, Дѣ́во.

На хвали́техъ стихи́ры на 4, гла́съ 6. Самогла́сны:

Богому́дре Григо́ріе, сла́ву маловре́менную оста́вивъ и въ пусты́ню всели́вся, плотско́е мудрова́ніе все́ ду́ху повину́лъ еси́; поще́ньми и страда́ньми утверди́вся, ко отце́мъ преста́вился еси́ въ ста́рости до́брѣй. Тѣ́мже мо́лимъ тя́ ны́нѣ, ча́да твоя́: моли́ о на́съ, спасти́ся душа́мъ на́шимъ. [Два́жды.]

Возсія́ дне́сь пресвѣ́тлая и всепра́зднственная па́мять твоя́, о́тче преподо́бне Григо́ріе, созыва́ющи многочи́сленное по́стниковъ сосло́віе и преподо́бныхъ ликостоя́ніе, а́нгели же съ человѣ́ки я́ко вои́стинну къ похвале́нію въ Тро́ицѣ покланя́емаго Бо́га на́шего, Его́же моли́ о душа́хъ на́шихъ.

Богоно́сне и преподо́бне, блаже́нный о́тче Григо́ріе, не да́лъ еси́ сна́ твои́мъ очесе́мъ, ни вѣ́ждомъ дрема́нія, серде́чное жела́ніе е́же ко Христу́ си́ми явля́я, Его́же отъ ю́ности возлюби́лъ еси́, и живя́ше въ тебѣ́ Христо́съ Бо́гъ на́шъ со Отце́мъ и Святы́мъ Ду́хомъ. Того́ моли́, богоблаже́нне о́тче, спасти́ся душа́мъ на́шимъ.

Сла́ва, гла́съ 8:

Преподо́бне о́тче Григо́ріе, гла́съ ева́нгельскій услы́шавъ, мíръ оста́вилъ еси́, бога́тство и сла́ву въ ничто́же вмѣни́въ, ду́шу съ тѣ́ломъ очи́стивъ отъ всѣ́хъ страсте́й, и Свята́го Ду́ха прекра́сная оби́тель яви́лся еси́ и вселе́ніе, и ра́дость вѣ́чную воспрія́лъ еси́, блаже́нне и прему́дре. Тѣ́мже и стада́ мона́ховъ со архіере́йскими чи́нми, чудесы́ удивля́еми, достолѣ́пно и ра́достно отъ души́ вопіе́мъ Ти́: богоблаже́нне преподо́бне о́тче на́шъ Григо́ріе, моли́ Христа́ Бо́га уще́дрити мíръ и спасти́ ду́ши на́ша.

И ны́нѣ, богоро́диченъ, [гла́съ то́йже]:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. Ектеніи́, и отпу́стъ.]



НА ЛИТУРГІИ,

Слу́жба преподо́бническая: [Блаже́нна отъ кано́на свята́го, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 292 – 298.

/ Къ оглавленію раздѣла /


Наверхъ / Къ титульной страницѣ

0