Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 30-й де́нь.
Слу́жба и́же во святы́хъ отцу́ на́шему Михаи́лу, пе́рвому митрополи́ту Кíевскому и всея́ Россíи.

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры [на 6], гла́съ 5. Подо́бенъ: Ра́дуйся, по́стниковъ.

Пе́рваго тя́ во іера́рсѣхъ* земля́ Россíйская пѣ́сньми вѣнча́етъ,* Михаи́ле преподо́бне, святи́телю Христо́въ блаже́ннѣйшій,* я́ко пе́рвѣе ту́ боже́ственнымъ креще́ніемъ* соверше́ннѣ просвѣти́лъ еси́,* пе́рвѣе свѣ́тъ Ева́нгелія во тму́ вне́слъ еси́,* пе́рвѣе и́дольскія тре́бы* разруши́въ зна́меніемъ кре́стнымъ,* тѣ́мъ удиви́лъ еси́ невѣ́рующія лю́ди.* И ны́нѣ, я́ко проповѣ́дникъ,* со святи́тели пе́рвыми предстоя́ Влады́цѣ своему́,* моли́ся прилѣ́жно* всѣ́мъ улучи́ти свѣ́тъ невече́рній* и прія́ти отъ Христа́ Бо́га ве́лію ми́лость. [Два́жды.]

Со́лнца вои́стину свѣтлѣ́йшій да́ръ,* вся́кія че́сти вы́шшій,* маргари́ту дража́йшую,* всю́ вселе́нную обогати́вшую —* Ева́нгеліе Христо́во,* невѣ́рія нището́ю содержи́мѣй земли́ Россíйской,* отъ Ца́рскаго гра́да прине́слъ еси́,* и сіе́ е́й дарова́лъ еси́.* Имже а́ки злато́ю у́тварію украше́нна,* я́ко дѣ́ва кра́сная, всѣ́хъ Царю́ предстои́тъ,* и наслажда́ется весе́лія въ черто́зѣ небе́сномъ,* идѣ́же ты́, святи́телю Михаи́ле, предстоя́,* моли́ наслѣ́дникомъ про́повѣди твоея́* прія́ти отъ Христа́ Бо́га ве́лію ми́лость. [Два́жды.]

Ти́хими вѣ́тры Вы́шняго по́мощи носи́мь,* а́ки перна́тъ и скороше́ственный оре́лъ,* нося́й Ева́нгеліе Христо́во,* въ зе́млю Россíйскую прише́лъ еси́,* и та́мо гнѣздя́щіяся* подъ сѣ́нію идолобѣ́сія,* ле́стныхъ вра́новъ птенцы́,* до конца́ боже́ственнымъ твои́мъ уче́ніемъ подави́лъ еси́,* свирѣ́пѣющія же лю́ди чудесы́ укроти́въ,* и гла́домъ душе́внымъ изнемо́гшія,* ева́нгельскимъ сло́вомъ напита́въ,* Христо́ви приве́лъ еси́,* Ему́же, святи́телю, моли́ся* дарова́ти всѣ́мъ ве́лію ми́лость. [Два́жды.]

Сла́ва, гла́съ 6:

Свидѣ́теля и́стины и проповѣ́дника Ева́нгелія Христо́ва, Михаи́ла іера́рха, лю́діе, восхва́лимъ, то́й бо, учени́къ Христа́, Учи́теля своего́, су́щи, по́сланъ въ невѣ́рныя лю́ди, пріи́де я́ко апо́столъ, и Первозва́ннаго проро́чествіе соверши́: прельще́нныя язы́ки зна́меніемъ воспяти́, и си́хъ обрати́въ, ко Влады́цѣ приведе́, и ны́нѣ, предстоя́ Вы́шняго престо́лу, мо́лится о душа́хъ на́шихъ.

И ны́нѣ, богоро́диченъ догма́тъ, [гла́съ то́йже: Ка́ко не диви́мся...]
Вхо́дъ. Проки́менъ дне́. И чте́нія три́ святи́тельская.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Твои́мъ, свя́те, прише́ствіемъ* земля́ Россíйская возвесели́ся,* и гра́дъ сла́вный Кíевъ* благоче́стно торжеству́етъ,* просвѣ́щшися креще́ніемъ боже́ственнымъ,* и и́же пе́рвѣе же́ртвы бѣсо́мъ приноша́ху,* се́ сíи Вы́шнему въ чи́стомъ се́рдцѣ* ду́ши своя́ дароно́сятъ,* иму́ще тя́ предыду́ща хода́тая* и моле́бника всѣ́хъ, чту́щихъ па́мять твою́.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Твое́, преблаже́нне Михаи́ле, прише́ствіе* и́доли ощути́вше,* рыда́юще, вопія́ху:* О, лю́тѣ на́шему окая́нству!* и́же пре́жде чествова́ніемъ ве́ліимъ* отъ всѣ́хъ почита́еми бы́хомъ,* ка́ко ны́нѣ поруга́ніе подъе́млемъ* отъ еди́наго стра́ннаго человѣ́ка,* Стра́ннаго Іису́са нося́щаго о́бразъ?* Иже подае́тъ мíру всему́ обновле́ніе.

Сти́хъ: Честна́ предъ Го́сподемъ* сме́рть преподо́бныхъ Его́.

Твои́мъ, о́тче Михаи́ле,* мѵ́ра духо́внаго пома́заніемъ,* пресла́вный гра́дъ Кíевъ благоуха́етъ* и пріе́млетъ начерта́ніе усыновле́нія.* Отпа́дшіи же мы́сленнаго Свѣ́та* и идолобѣ́сія тмо́ю омраче́нніи,* ба́нею креще́нія просвѣща́еми,* къ свѣ́ту богоразу́мія прихо́дятъ,* я́ко ча́да Свѣ́та* и лю́діе новоизбра́нніи.

Сла́ва, гла́съ 6:

Ду́хъ Боже́ственный хотя́ но́выя лю́ди Себѣ́ избра́ти, пе́рвѣе приведе́ въ позна́ніе боже́ственное вели́каго въ царѣ́хъ Влади́міра, и то́й, у́мнымъ сія́ніемъ освѣ́щся, отъ я́же свы́ше благода́ти во святѣ́й купѣ́ли, прія́тъ тя́, па́стыря, вы́шнимъ открове́ніемъ и приведе́ въ Россíю, ко овца́мъ, въ невѣ́ріи заблу́ждшимъ, я́же, твои́мъ уче́ніемъ и креще́ніемъ въ водѣ́ омы́въ, приве́лъ еси́ во дво́ръ ове́цъ Христо́выхъ, съ ни́миже ны́нѣ престо́лу Влады́чню предстоя́, помина́й на́съ, во дне́шній де́нь па́мять твою́ соверша́ющихъ, Михаи́ле, святи́телю Россíи первопресто́льне.

И ны́нѣ, богоро́диченъ, [гла́съ то́йже]: Богоро́дице, Ты́ еси́ лоза́...


Тропа́рь, гла́съ 4:

Дне́сь проро́чествіе во апо́столѣхъ Первозва́ннаго испо́лнися: се́ бо на си́хъ гора́хъ возсія́ благода́ть и вѣ́ра умно́жися. И и́же невѣ́ріемъ обветша́вшіи, боже́ственною купѣ́лію отроди́шася и бы́ша лю́діе обновле́нія, ца́рское свяще́ніе, язы́къ свя́тъ, Христо́во ста́до, ему́же ты́ пе́рвый па́стырь яви́лся еси́, я́ко пе́рвѣе креще́ніемъ послужи́вый. И ны́нѣ, предстоя́ Влады́цѣ Христу́ Бо́гу, моли́ всѣ́мъ сыно́мъ Россíйскимъ спасти́ся, и́маши бо дерзнове́ніе, я́ко іера́рхъ Бо́жій и священнослужи́тель.

Сла́ва, и ны́нѣ, богоро́диченъ, [гла́съ то́йже]: Еже отъ вѣ́ка утае́ное...



НА УТРЕНИ,
По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Сосу́дъ избра́нъ бы́лъ еси́, святи́телю Михаи́ле, пронести́ и́мя Христо́во предъ невѣ́рными человѣ́ки, къ ни́мже посла́лся еси́ въ Россíйскую зе́млю, ю́же, просвѣти́въ святы́мъ креще́ніемъ, ко богоразу́мію наста́вилъ еси́ уче́ніи твои́ми. Си́ми и на́съ наста́ви на стезю́ за́повѣдей Госпо́днихъ, мо́лимъ ти ся, уго́дниче Бо́жій преблаже́нне. [Два́жды.]

Сла́ва, и ны́нѣ, богоро́диченъ:

Ра́дуйся, златокова́нная ча́ше, Пречи́стая Дѣ́во, въ Не́йже Вино́ спасе́нію на́шему отъ Ду́ха Свята́го раствори́ся, си́мъ увесели́ сердца́ на́ша, Ты́ бо еси́ ча́ша, че́рплющая на́мъ вѣ́чную ра́дость.

По 2-мъ стихосло́віи сѣда́ленъ, гла́съ 5. Подо́бенъ: Собезна́чальное Сло́во.

Собезнача́льное Сло́во Отцу́ и Ду́хови, тобо́ю, святи́телю, въ зе́млю Россíйскую принесе́ся, е́же проповѣ́далъ еси́ усты́ твои́ми несумнѣ́нно, облича́я и́дольское неи́стовство, и лю́ди но́вы въ достоя́ніе Го́сподеви приве́лъ еси́, съ ни́миже предстоя́, я́ко священнотаи́нникъ и служи́тель Бо́жій, вы́ну моли́ся о душа́хъ, пою́щихъ твое́ честно́е, о́тче, преставле́ніе. [Два́жды.]

Сла́ва, и ны́нѣ, богоро́диченъ:

Собезнача́льному Сло́ву и́стинная Ма́ти су́щи, о на́съ, хотя́щихъ возда́ти въ ча́съ Суда́ сло́во, предста́ни и умоли́ Сы́на Своего́ те́плыми Ти́ мольба́ми, вѣ́мы бо, я́ко мно́го мо́гутъ Ма́тернія Твоя́ моли́твы, и си́хъ ра́ди надѣ́емся обрѣсти́ ми́лость въ де́нь стра́шнаго испыта́нія.

По поліеле́и сѣда́ленъ, гла́съ 8. Подо́бенъ: Возле́гъ на пе́рси.

Яко нача́льнику архіере́евъ и насади́телю въ Россíи вѣ́ры Христо́вы, разруши́телю и́дольскаго зловѣ́рія и па́стырю новоизбра́нныхъ люде́й, нача́тки пѣ́сненныя тебѣ́ прино́симъ, святи́телю Михаи́ле преблаже́нне, во дне́шній де́нь па́мять твою́ соверша́юще и любо́вію тебѣ́ зову́ще: я́ко предстоя́ Вы́шняго престо́лу, моли́ся согрѣше́ній оставле́ніе дарова́ти, благоче́стно покланя́ющимся честно́му гро́бу твоему́. [Два́жды.]

Сла́ва, и ны́нѣ, богоро́диченъ:

Яко всѣ́хъ скорбя́щихъ и́стинное утѣше́ніе и заблу́ждшихъ отъ и́стиннаго пути́ пра́вое наставле́ніе, предста́ни ско́ро на́мъ, Пречи́стая Богороди́тельнице, и лю́тѣ оби́димыхъ изба́ви отъ напа́сти, вся́ бо мо́жеши, ели́ка хо́щеши, иму́щи дерзнове́ніе къ Сы́ну Твоему́ и Бо́гу, Ему́же моли́ся, согрѣше́ній проще́ніе дарова́ти, благочестному́дренно почита́ющимъ Рождество́ Твое́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Іоа́нна, зача́ло 36.

По 50-мъ псалмѣ́ стихи́ра, гла́съ 6:

Свидѣ́теля и́стины и проповѣ́дника Ева́нгелія Христо́ва, Михаи́ла іера́рха, лю́діе, восхва́лимъ, то́й бо, учени́къ Христа́, Учи́теля своего́, су́щи, по́сланъ въ невѣ́рныя лю́ди, пріи́де я́ко апо́столъ, и Первозва́ннаго проро́чествіе соверши́: прельще́нныя язы́ки зна́меніемъ воспяти́, и си́хъ обрати́въ, ко Влады́цѣ приведе́, и ны́нѣ, предстоя́ Вы́шняго престо́лу, мо́лится о душа́хъ на́шихъ.

Кано́нъ Богоро́дицы со ирмосо́мъ на 6. И свята́го на 8, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Яко Бо́жій іера́рхъ и служи́тель, Вы́шняго престо́лу съ ли́ки святы́хъ на небеси́ предстоя́, моли́ся о на́съ, служа́щихъ богодухнове́нными пѣ́сньми, предста́ти съ тобо́ю, идѣ́же весе́ліе пра́ведныхъ.

Яко избра́нъ Го́сподеви во служе́ніе сла́вы Его́ на дѣ́ло Ева́нгелія Христо́ва, о со́бранныхъ на́съ въ па́мяти твое́й, святи́телю Михаи́ле, моли́ся, да порабо́таемъ въ за́повѣдехъ ева́нгельскихъ и пріи́мемъ мзду́ — весе́ліе пра́ведныхъ.

Яко свѣща́, на свѣ́щницѣ стоя́, свѣ́томъ твои́хъ благи́хъ дѣя́ній просія́лъ еси́ дале́че, я́ко и невѣ́рніи лю́діе твои́мъ, о́тче, наставле́ніемъ узрѣ́ша свѣ́тъ боговидѣ́нія, и ра́дуется страна́, тобо́ю просвѣще́нна.

Богоро́диченъ: Истинный Свѣ́тъ отъ ложе́снъ Твои́хъ яви́вшая мíру, на́съ, во тмѣ́ страсте́й ходя́щихъ, просвѣти́ и наста́ви на пу́ть, Пу́ть поро́ждшая ро́ду христіа́нскому, Марíе Богоневѣ́сто.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Не бѣ́ вѣ́ра насаждена́ въ Россíи, ниже́ благоче́стіе вкорене́но, до́ндеже ты́, святи́телю Михаи́ле, а́ки прему́дръ дѣ́латель, ляди́ну многобо́жія истреби́въ, всѣ́ялъ еси́ богоразу́мія сѣ́мя доброплодови́тое.

Свѣ́томъ свы́ше освѣ́щся, вели́кій Влади́міръ, а́ки зарю́ пріе́мь тя́, Бо́жій святи́телю, приведе́ во омраче́нную идолослуже́ніемъ Россíйскую зе́млю, да и та́мо освѣтя́тся лю́діе твои́мъ прише́ствіемъ и вразумля́тся и́стинныя вѣ́ры позна́ніемъ.

Со́лнце Пра́вды — Христо́съ Бо́гъ, а́ки лучу́ свѣтоза́рную яви́ тебе́, Михаи́ле, земли́ Россíйской, ю́же ты́ просвѣти́въ свѣ́томъ позна́нія Боже́ственныя вѣ́ры, и очи́стивъ ба́нею возрожде́нія, Влады́цѣ приве́лъ еси́ лю́ди но́вы, обновле́ны до́брымъ вѣ́ры исповѣ́даніемъ.

Богоро́диченъ: Со́лнце Пра́вды — Христо́съ Истинный Бо́гъ на́шъ, пло́ть заи́мствовавъ отъ Тебе́, мíру возсія́лъ е́сть, и тлю́ многобо́жія потреби́ до конца́. Свѣ́та жили́ще, Дѣ́во Марíе, уны́ніемъ мя́ омраче́нна просвѣти́, и наста́ви на пу́ть благодѣя́нія.

Сѣда́ленъ, гла́съ 8:

Сѣ́чивомъ Ева́нгельскаго уче́нія посѣ́клъ еси́ и́дольское изва́яніе, ка́пища на зе́млю опрове́ргъ, благоче́стіе насади́лъ еси́, и́мже красу́ющися, гра́дъ Кíевъ любо́вію зове́тъ ти́: ра́дуйся, Михаи́ле, архіере́е Россíи первопресто́льне. [Два́жды.]

Сла́ва, и ны́нѣ, богоро́диченъ:

Пою́щихъ Ти́: ра́дуйся, изба́вльшая ва́рварскаго служе́нія, изми́ рабо́ты чужда́го и сокруши́вши въ мы́слехъ и́долы стра́стныя, насади́ благоразу́міе стра́ха Бо́жія, Ты́ бо еси́ всему́ бла́гу вина́, нача́токъ и исполне́ніе.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Христо́ва раба́ и благоче́стна строи́теля тебе́, святи́телю, и́долы ощути́вше, рыда́ху го́рцѣ поги́бели своея́, лю́діе же, креще́ніемъ обновле́нніи, веселя́хуся, пра́здникъ свѣ́телъ о Го́сподѣ пра́зднующе.

Тебѣ́, о́тче, на го́ры Кíевскія прише́дшу, пе́рвѣйшій и́долъ Перу́нъ, низве́рженъ, влача́шеся ко́ньми, про́чіимъ отъ стра́ха трясу́щимся куми́ромъ; лю́діе же обновле́нія веселя́хуся о Го́споде, пра́зднующе.

Вся́къ по́лъ и во́зрастъ люде́й, пре́жде омраче́нныхъ, ко просвѣще́нію грядя́ху на рѣку́ Поча́йню, и бы́сть по́лкъ безчи́сленный, тебе́ предводи́теля иму́щій, ему́же послужи́въ ба́нею креще́нія, къ богоразу́мію наста́вилъ еси́, Михаи́ле, Бо́жій архіере́ю.

Богоро́диченъ: Вси́ ро́ди блажа́тъ Тя́, Марíе Всецари́це, и мы́, пѣ́сньми блажа́ще, изображе́нному на ико́нѣ лицу́ Твоему́ покланя́емся, пра́здникъ свѣ́телъ въ па́мяти святи́теля Твоего́ пра́зднующе.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Бо́жіимъ свѣ́томъ освѣ́щшися, новокреще́нніи лю́діе, вопія́ху съ тобо́ю, Михаи́ле: Христе́ Бо́же, да́ждь Тебе́ еди́наго вѣ́дѣти, Сло́ва Бо́жія, отъ мра́ка идолобѣ́сія на́съ изыма́ющаго.

Падо́ша Іерихо́нскія стѣ́ны, Іису́сомъ Нави́номъ киво́ту обноси́му, падо́ша и и́доли, со кресто́мъ тебѣ́, святи́телю, предгряду́щу, лю́діе же прославля́ху Сло́во Бо́жіе, Тя́, Христе́, отъ мра́ка невѣ́рія человѣ́ки изыма́ющаго.

Красу́ется гра́дъ Кíевъ до дне́сь, ри́зою креще́нія одѣ́янъ отъ тебе́, святи́телю, и но́ситъ, а́ки гри́вну злату́, на вы́и честно́е Ева́нгеліе Христо́во, е́же мы́ лобыза́юще, прославля́емъ Сло́ва Бо́жія, отъ тмы́ грѣхо́вныя на́съ изыма́юща.

Богоро́диченъ: Красу́емся вси́ добро́тою Твое́ю, Марíе Богоневѣ́сто, красна́ бо еси́ вои́стинну, и красоты́ Твоея́ вожделѣ́въ Вы́шній, пло́ть отъ Тебе́ заи́мствова, и Человѣ́къ бы́въ, Тебе́ ра́ди, Чи́стая Дѣ́во, обожи́ на́съ, во тлю́ па́дшихъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Идолобѣ́сія смра́дное, а́ки Моисе́й, жезло́мъ сла́ное, кресто́мъ пресѣ́клъ еси́ мо́ре, святи́телю Михаи́ле, и лю́ди, омы́въ боговидѣ́нія водо́ю, приве́лъ еси́ въ приста́нище, пою́щия: сла́ва Тебѣ́, Христе́ Многоми́лостиве.

Иже пе́рвѣе блудя́щая Россíйская земля́, не утвержде́на, ны́нѣ тобо́ю, святи́телю Михаи́ле, наста́влена, пріи́де къ боговѣ́дѣнію, и пріе́мши пе́рстень усыновле́нія, весели́тся, зову́щи: сла́ва Тебѣ́, Христе́ мо́й, Многоми́лостиве.

Свирѣ́пѣющія невѣ́ріемъ лю́ди укроти́въ въ Россíйстѣй земли́ и яре́мъ повинове́нія Це́ркви возложи́въ на ня́, приве́лъ еси́, Михаи́ле, мно́гія дѣ́латели въ виногра́дъ Небе́снаго Влады́ки. Сотвори́ и на́съ, свя́те, поне́ во единонадеся́тый ча́съ дѣ́латели, да пріи́мемъ мзду́ съ послѣ́дними.

Богоро́диченъ: Свирѣ́пѣющія во мнѣ́ стра́сти укроти́, и яре́мъ смире́нія возложи́ на мя́, Богоро́дице, да въ то́мъ порабо́таю про́чее вре́мя, и обря́щу ми́лость въ де́нь Су́дный.

Конда́къ, гла́съ 2:

Моисе́й вторы́й Россíи яви́лся еси́, о́тче, пренесы́й мы́сленный виногра́дъ отъ еги́петскаго идолослуже́нія, въ зе́млю, проро́чествіемъ предувѣ́дѣну, о не́йже подобообра́зно рещи́: бу́детъ утвержде́ніе вѣ́ры на земли́, и на версѣ́хъ го́ръ Кíевскихъ превознесе́тся па́че Лива́на пло́дъ, пита́ющъ мíра всего́; отъ него́же вкуси́вше, ублажа́емъ тя́, Михаи́ле, Бо́жій святи́телю.

Икосъ:

Расточе́нныя лю́ди собра́въ во еди́нъ боговѣ́дѣнія ра́зумъ и креще́ніемъ омы́въ невѣ́дѣнія ве́тхость земли́ Россíйскія, просвѣти́лъ еси́ Кресто́мъ, и научи́въ сла́вити Пресвяту́ю Тро́ицу, Отца́ и Сы́на и Ду́ха Пресвята́го, соедини́лъ еси́ разу́мное ста́до Христу́ Бо́гу. Ему́же до дне́сь вѣ́рою неподви́жно стоя́щи, взыва́етъ: изба́ви отъ вся́каго зла́го обстоя́нія Импера́тора, гра́дъ и лю́ди, тя́ ублажа́ющія, Михаи́ле, Бо́жій святи́телю.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Хладода́тельною благода́ти отъ тебе́, святи́телю, Россíя омове́на водо́ю, чешуи́ разу́мныхъ оче́съ изба́вися во святѣ́й купѣ́ли, и позна́вши Еди́наго Созда́теля своего́, и вѣ́рою зове́тъ: благослове́нъ Бо́гъ оте́цъ на́шихъ.

Сла́вному гра́ду Кíеву, по креще́ніи свеселя́щуся, скве́рніи и́доли, въ ни́хже пе́рвѣйшій Перу́нъ, влачи́ми, рыда́ху го́рцѣ. Отту́ду лю́діе, позна́вше свое́ пе́рвое заблужде́ніе, съ тобо́ю, Михаи́ле, возопи́ша: благослове́нъ Бо́гъ оте́цъ на́шихъ.

Зла́тъ пе́рстень но́выя благода́ти, архіере́е Михаи́ле, вложи́въ Россíи на ру́ку, обручи́лъ еси́ невѣ́сту чи́сту Христо́ви, отъ сего́ язы́ка Це́рковь. Яже и до дне́сь, духо́внѣ веселя́щися, зове́тъ: благослове́нъ Бо́гъ оте́цъ на́шихъ.

Богоро́диченъ: Зла́тъ пе́рстень имену́емъ Тя́, Дѣ́во Чи́стая, укра́шенъ, а́ки драгоцѣ́ннымъ адама́нтомъ, приедине́ніемъ Божества́ пло́ти, Христу́ отъ Тебе́ заи́мствованнѣй, тѣ́мъ любо́вію зове́мъ: благослове́нна Ты́ еди́на, нелѣ́поту естества́ на́шего преукраси́вшая.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Изъ пла́мене и́дольскія ле́сти изъе́мь, прему́дре, Россíйскую зе́млю, росо́ю креще́нія прохлади́лъ еси́, и нѣ́сть уже́ пали́ма развраще́ніемъ на пе́рвая, превознося́щи Христа́, и тебе́, па́стыря своего́, ублажа́ющи во вѣ́ки.

Вся́ до́брѣ разчини́въ, я́же о лю́дехъ новоизбра́нныхъ, поста́вилъ еси́ па́стыри и учи́тели по градѣ́хъ, и тѣ́мъ новоизбра́нное ста́до испоручи́въ, са́мъ отше́лъ еси́, па́стырей Нача́льнику Христу́ Бо́гу сца́рствовати во вѣ́ки.

Мно́гъ пла́чь и рыда́ніе гра́ду Кíеву, твои́мъ, о́тче, отше́ствіемъ къ Бо́гу сотвори́ся, но Вы́шній Іерусали́мъ, пріе́мля тя́ въ нѣ́дра своя́, возра́довася, идѣ́же живы́й, не забу́ди ста́да твоего́ и моли́, да съ тобо́ю всели́тся во вѣ́ки.

Богоро́диченъ: Мно́гое весе́ліе творю́ злы́ми дѣ́лы бѣсо́мъ и ра́дость, храни́телю же моему́ печа́ль отвсю́ду. О, Чи́стая Марíе, Ма́ти Христа́ Бо́га! наста́ви мя́ на покая́ніе, да бу́детъ о́нѣмъ пла́чь, а́нгелу же моему́ ра́дость, и мнѣ́ съ ни́мъ во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Яко фи́никсъ, процвѣ́лъ еси́, о́тче, въ дому́ Бо́жіи, и плоды́ — нетлѣ́ніе моще́й твои́хъ, всѣ́мъ явля́ется, отсю́ду у́бо, мы́, уразумѣ́вше, я́ко предстои́ши Христу́, тя́ пѣ́сньми велича́емъ.

Яко благово́нный кипари́съ, мо́щи твоя́, святи́телю, благоуха́ютъ, и наслажда́ютъ покланя́ющихся ра́цѣ твое́й, и́хже всегда́ испо́лни благоуха́нія твои́хъ моли́твъ, да твою́ па́мять пѣ́сньми вѣ́рно прославля́ютъ.

Ли́къ святи́телей Россíйскихъ и любопра́зднственныхъ собо́ри, усе́рдно стецы́теся ко святѣ́й ра́цѣ первосвяти́теля ва́шего, па́стыріе — первонача́льнаго па́стыря, лю́діе же — отца́ своего́ пѣ́сньми почти́те, вси́ ку́пно па́мять его́ ублажа́юще.

Богоро́диченъ: Вся́ тва́рь пѣсносло́витъ Тя́, Дѣ́во, я́ко проше́дшую вся́ небе́сная врата́ и ста́вшую одесну́ю огнезра́чнаго престо́ла Вы́шняго. Одесну́ю Сы́на Твоего́ ста́ти и на́съ сподо́би, я́ко пѣ́сньми, Ро́ждшагося изъ Тебе́, и Тя́ велича́емъ.

Свѣти́ленъ:

Царе́ви всѣ́хъ предстои́ши, святи́телю Михаи́ле, и благослове́ніемъ вѣнча́ется ве́рхъ тво́й отъ Вы́шняго десни́цы. Простри́ ру́ку твою́ и благослови́ на́съ, я́коже нѣ́коего на пресви́терство восходя́ща: не у́мерлъ бо еси́, но во вѣ́ки живе́ши. Тѣ́мже па́мять твою́ пѣ́сньми пое́тъ Россíйская Це́рковь, въ не́йже и мы́ сла́вимъ. [Два́жды.]

Сла́ва, и ны́нѣ, богоро́диченъ:

Царя́ вѣко́въ Ма́ти, Цари́це и Влады́чице, надъ страстьми́ покажи́ царе́й пѣвцы́ Твоя́, се́ бо приво́димъ Ти́ въ моли́тву чу́днаго Михаи́ла, іера́рха, въ его́же па́мяти пра́зднующе, Тебе́ велича́емъ.

На хвали́техъ стихи́ры [на 4], гла́съ 1. Подо́бенъ: Небе́сныхъ чино́въ.

Дне́сь торжеству́етъ па́мять твою́, святи́телю, ма́ти градо́въ, преслову́щій Кíевъ, и лю́діе Россíйстіи хвала́ми почита́ютъ, въ вѣ́чную жи́знь твое́ преставле́ніе; отше́лъ бо еси́ къ небе́снымъ и не отступа́еши земны́я, назира́я, я́ко при́сный хода́тай и моли́твенникъ о душа́хъ на́шихъ. [Два́жды.]

Пе́рвое но́ваго лѣ́та начина́юще обхожде́ніе, я́ко пе́рвѣйшему тебѣ́, блаже́нне, и нача́льнѣйшему Россíйскія земли́ архіере́ю, пе́рвыя пѣ́сней рукоя́ти прино́симъ: пріими́ у́бо сія́ въ да́ръ че́стенъ и возда́ждь на́мъ твои́мъ благослове́ніемъ, я́ко при́сно сы́й моли́твенникъ о душа́хъ на́шихъ.

Услади́вся жела́ніемъ любве́ Христо́вы, разу́мныя воспрія́лъ еси́ крилѣ́, прелетѣ́въ отъ ни́жнихъ въ вы́шняя, и отверзо́шася ти ра́йскія две́ри, въ ня́же вше́дъ, наслажда́ешися боговидѣ́нія; то́ю сла́достію обвесели́ ду́ши пою́щихъ па́мять твою́, Михаи́ле святи́телю.

Сла́ва, гла́съ 2:

Отъ небе́съ пріе́мь пома́заніе духо́внѣ, Михаи́ле преблаже́нне, бы́лъ еси́, я́ко ма́слина плодови́та въ дому́ Бо́жіи, и плода́ми твои́ми услади́вся, вели́кій въ царѣ́хъ Васи́лій прія́тъ тя́ любо́вію во управле́ніе земли́ Россíйскія, ю́же очи́стивъ отъ идолослуже́нія, приве́лъ еси́ богоразу́мію. Тѣ́мъ, по достоя́нію па́мять твою́ соверша́юще и къ ра́цѣ моще́й твои́хъ припа́дающе, мо́лимся: ипроси́ отъ Христа́ Бо́га Импера́тору крѣ́пкую держа́ву, лю́демъ ста́ду твоему́ благостоя́ніе, и всѣ́мъ проще́ніе грѣхо́въ и ве́лію ми́лость.

И ны́нѣ, богоро́диченъ, [гла́съ то́йже]: Спаси́ отъ бѣ́дъ рабы́ Твоя́...
Славосло́віе вели́кое и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. [Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 298 – 304.

/ Къ оглавленію раздѣла /


Наверхъ / Къ титульной страницѣ

0