Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 29-й де́нь.
Преподо́бнаго отца́ на́шего Киріа́ка Отше́льника.

[ВЕЧЕРЪ,]
На Го́споди воззва́хъ: стихи́ры на 6, гла́съ 8. Подо́бенъ: Что́ вы́ нарече́мъ, святíи.

Стра́сти побѣди́въ тѣле́сныя* воздержа́нія уздо́ю,* чудодѣ́йственне Киріа́че,* безстра́стія во свѣ́тлую, о́тче, одѣ́ялся еси́ ри́зу,* и всю́ зло́бу обнажи́лъ еси́* дре́вле пра́отцы обнажи́вшаго,* и ны́нѣ обита́еши въ раи́, всегда́ веселя́ся.* Моли́ спасти́ся душа́мъ на́шимъ. [Два́жды.]

Нося́ кре́стъ на ра́мѣхъ твои́хъ,* послѣ́дствовалъ еси́ Христу́* невозвра́тнымъ по́мысломъ,* жите́йскихъ сласте́й небре́гъ, Киріа́че,* и стра́сти умертви́въ тѣле́сныя* спротяже́нными бдѣ́ніи и моли́твами,* благода́ть взя́лъ еси́, преподо́бне,* лѣчи́ти неду́ги.* Моли́ спасти́ся душа́мъ на́шимъ. [Два́жды.]

Въ пусты́ню всели́лся еси́, преподо́бне,* пи́щу, Киріа́че, го́рькое бы́ліе творя́,* и чу́вство огорчева́я,* душе́вныя сла́сти* изъ ко́рене истерза́лъ еси́, блаже́нне,* тѣ́мъ тя́ небе́сное наслажде́ніе по кончи́нѣ прія́тъ,* а́нгельски пожи́вша.* Моли́ спасти́ся душа́мъ на́шимъ. [Два́жды.]

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Киріа́че, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Агница, Агнца* я́ко ви́дѣ на дре́вѣ просте́рта во́лею кре́стнѣмъ,* вопія́ше Ма́терски,* болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ жи́знь дая́й, я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.

На стихо́внѣ окто́иха. Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́моновъ разруши́лъ еси́ полки́, а́нгеловъ пости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Го́споду, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́,* Тебе́ Ро́ждшая вопія́ше:* что́ стра́нное,* е́же ви́жу, та́инство, Сы́не Мо́й?* Ка́ко на Дре́вѣ умира́еши, пло́тію повѣ́шенъ,* жи́зни Пода́телю?

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ показа́лся еси́, богоно́се о́тче на́шъ Киріа́че, посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ къ тебѣ́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


НА УТРЕНИ,
Оба кано́на окто́иха безъ му́ченичновъ. И свята́го на 6. Творе́ніе Стефа́ново, его́же краегране́сіе: Киріа́че, бу́ди къ Бо́гу предста́тель. Гла́съ 8.

Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, Еди́ному Влады́цѣ.

Сла́ву боже́ственнаго ра́зума, Христе́, пода́ждь ми́ и благода́ть, преподо́бнаго досто́йно Киріа́ка воспѣ́ти, того́ моли́твами: Ты́ бо еси́ па́че сло́ва Сокро́вище му́дрыхъ уче́ній.

Пѣ́снь принося́щаго тебѣ́ ны́нѣ, Киріа́че блаже́нне, благосе́рдно пріи́мъ, боже́ственнѣй причасти́тися мнѣ́ Христа́ умоли́ лучи́ и свѣтозаре́нію и су́що получи́ти спасе́нія.

Си́лою Влады́чнею крѣ́пко утвержда́емь, Того́же стопа́мъ, о́тче, послѣ́довавъ, нача́льники тмы́, Киріа́че всеблаже́нне, побѣди́лъ еси́, и къ вы́шнему дости́глъ еси́ поко́ю.

Ра́вну показа́лъ еси́ на земли́ къ безпло́тнымъ ре́ть, все́ покори́въ плотско́е мудрова́ніе живоно́сному ду́ху, тѣ́мъ въ небе́сныхъ ны́нѣ лику́еши съ ни́ми дво́рѣхъ, богоно́сне.

Богоро́диченъ: Пѣ́сньми Пречи́стую Марíю, вѣ́рніи, похва́лимъ, Богома́терь облагода́тствованную, покро́въ боже́ственный, ти́хое приста́нище, всѣ́хъ вѣ́рныхъ спасе́ніе.

Пѣ́снь 3.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ па́че Тебе́, Го́споди.

Непреста́нно ше́ствовавъ жи́зни стезю́, измла́да бо возлюби́лъ еси́ Творца́ твоего́, преподо́бне, Его́же жажда́я иска́лъ еси́, еле́ня подо́бяся тече́нію на исто́чники во́дъ.

На серде́чнѣй досцѣ́ написа́ніе твое́ пріе́мъ, богоглаго́ливе, пе́рстомъ Ду́ха, я́ко одушевле́нная кни́га, дѣ́йственно соблю́лъ еси́ Христо́вы живи́тельныя за́повѣди.

Удержа́въ, преподо́бне, въ постѣ́хъ чре́во, ла́комственная жела́нія и плотску́ю сла́дость ты́ умертви́лъ еси́, съ чистото́ю, о́тче, пожи́въ чре́зъ все́ житіе́.

Веселя́ся, разу́мный Тро́ицѣ хра́мъ тебе́ сама́го сотвори́лъ еси́, у́мъ очища́я, и тѣ́ло, и ду́хъ, треблаже́нне, и бы́лъ еси́ прія́телище Трисо́лнечнаго Свѣ́та.

Богоро́диченъ: Дѣ́ва родила́ еси́, Неискусобра́чная, и Дѣ́ва пребыла́ еси́, Ма́ти безневѣ́стная, Богоро́дице Марíе, Христа́ Бо́га на́шего моли́, спасти́ся на́мъ.

Конда́къ, гла́съ 8. Подо́бенъ: Взбра́нной.

Яко побо́рника крѣ́пкаго и засту́пника чту́щи тя́ свяще́нная ла́вра всегда́, пра́зднуетъ лѣ́тнѣ па́мяти. Но, я́ко имѣ́я дерзнове́ніе ко Го́споду, отъ враго́въ находя́щихъ соблюди́ ны, да зове́мъ: ра́дуйся, о́тче треблаже́нне.

Сѣда́ленъ, гла́съ 5. Подо́бенъ: Собезнача́льное.

Воздержа́ніемъ житіе́ твое́ украси́лъ еси́, и у́ды умертви́въ, побѣди́лъ еси́ вра́жія прило́ги, о́тче преподо́бне, и пусты́ни насе́льникъ, свѣти́льникъ же мíра у́мный, Киріа́че, яви́лся еси́. Тѣ́мъ моли́ся Го́споду поми́ловати ду́ши на́ша. [Два́жды.]

Сла́ва, и ны́нѣ, богоро́диченъ:

Тя́ приста́нище, и стѣ́ну, и прибѣ́жище, и наде́жду, и покро́въ, и предста́тельницу те́плую обрѣ́тше, вѣ́рніи, къ Тебѣ́ притека́емъ, и вопіе́мъ прилѣ́жно, и взыва́емъ вѣ́рно: поми́луй, Богоро́дице, на Тя́ упова́ющія и отъ прегрѣше́ній изба́ви.

Крестобогоро́диченъ:

Кресто́мъ Сы́на Твоего́, Богора́дованная, и́дольская ле́сть вся упраздни́ся, и де́монская крѣ́пость попра́ся, сего́ ра́ди, вѣ́рніи, по до́лгу Тя́ всегда́ пое́мъ, и благослови́мъ, и Богоро́дицу и́стинно исповѣ́дающе Тя́, велича́емъ.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ужасе́ся твоего́ со́лнце воздержа́нія и крѣ́пости, лѣ́ты мно́гими тя́ гнѣ́вающася не возмо́же отню́дъ ви́дѣти, ниже́ во дни́ пи́щи пріе́млюща, преподо́бне, благомо́щно пѣснопою́ща бдѣ́ніи непреста́нными: си́лѣ Твое́й сла́ва, Человѣколю́бче.

Зако́ны но́выми и ве́тхимъ завѣ́томъ, му́дре, ра́зумомъ, блаже́нне, святы́хъ муже́й поуча́яся, вся́кія добродѣ́тели ви́дъ навы́къ, му́дрыя пчелы́ нра́ву ревну́я, и сосу́дъ бы́въ избра́ненъ, вопія́лъ еси́: си́лѣ Твое́й сла́ва, Человѣколю́бче.

Бога́тство сла́дости, хвала́ и ра́дость преподо́бныхъ еси́, Христе́ Бо́же, того́ ра́ди любя́й Тя́ Киріа́къ вся́ въ мíрѣ утѣ́шная вмѣни́ уме́ты, тѣ́мъ и въ пусты́няхъ непроходи́мыхъ любе́знѣ наслажда́шеся Твоея́ красоты́.

Вѣ́мъ дре́вле Ме́ррскія сладча́йшія во́ды проро́ка, зе́лій же го́рькую я́дь преложи́въ ты́, Киріа́че, въ сла́дкое вкуше́ніе, дерзнове́ніе показу́я я́вѣ ко Го́споду, и́стинно Своя́ рабы́ Боже́ственною си́лою сла́вящему.

Яко учени́къ и подража́тель Влады́ки Христа́, ра́бія лу́нствующася сы́на, о́тче, моли́твою исцѣля́еши, благода́ть пріе́мъ неду́ги отгоня́ти и де́монскія полки́ низлага́ти о́бразомъ Боже́ственнаго Креста́.

Богоро́диченъ: Ты́ вѣ́рныхъ хвала́ еси́, Безневѣ́стная, Ты́ предста́тельница, Ты́ и прибѣ́жище христіа́нъ, стѣна́ и приста́нище, къ Сы́ну бо Твоему́ мольбы́ но́сиши, Всенепоро́чная, и отъ бѣ́дъ спаса́еши вѣ́рою и любо́вію Богоро́дицу Чи́стую Тя́ сла́вящія.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго? Но обрати́ мя, и къ свѣ́ту за́повѣдей Твои́хъ, пути́ моя́ напра́ви, молю́ся.

Отъ Христа́ пріе́мь непобѣди́мую благода́ть Ду́ха, низложи́лъ еси́ у́бо держа́вно лю́таго міроде́ржца, душе́вныя стра́сти удержа́въ, Киріа́че, безстра́стія вѣнце́мъ вѣнча́лся еси́.

Крѣ́покъ яви́лся еси́, болѣ́зньми поще́нія терпѣ́въ тве́рдо, до ста́рости пребы́въ глубоча́йшія неосла́бленъ, преподо́бне, въ пусты́няхъ, я́ко ца́рскихъ дворо́въ въ черто́зѣхъ, со мно́гимъ весе́ліемъ живя́.

Всено́щная соверша́я, блаже́нне, бдѣ́нія и къ Бо́гу исходя́ не го́рдостно, моли́твою Невеще́ственному бесѣ́дуеши Уму́ и свѣ́тлыя пріима́лъ еси́, Киріа́че, свѣ́та лучи́, свѣтода́тельнѣ умо́мъ просвѣща́емь.

Свѣтоно́сія испо́лнився и проро́ческаго дарова́нія, преподо́бне, чи́стый тво́й язы́къ провозвѣсти́ му́чащаго дре́вле неду́га Ориге́нова, вредоу́мнаго и душетлѣ́ннаго, отню́дъ соверше́нное истребле́ніе.

Богоро́диченъ: Разу́мно увѣ́дѣ проро́ковъ сосло́віе Твоя́ та́инства: небе́сную бо две́рь Влады́ка Тя́ показа́, Чи́стая, и изъ Тебе́, Дѣ́во, воплоти́вся, пра́вды су́щимъ во тмѣ́ возсія́ Со́лнце.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Бо́гъ положе́ніемъ бы́въ Христа́ обоже́ніемъ, су́щаго естество́мъ Бо́га, есте́ственныя ра́ны неможе́нія исправля́лъ еси́, блаже́нне, неду́жныя исцѣля́я, де́монствующіяся а́біе лѣча́ боже́ственною благода́тію.

Избѣжа́лъ еси́ къ тебѣ́ приходя́щаго мно́жества наро́да и па́ки стра́шныя пото́ки пости́глъ еси́, уклоня́яся, приснопа́мятне, тщи́хъ похва́лъ человѣ́ческихъ сла́вицъ.

Яко сна́ тлѣ́ннаго мíра всю́ сла́ву зря́, Еди́наго Живу́щаго Бо́га лу́чшія сла́вы возлюби́лъ еси́ прича́стникъ бы́ти, ея́же, му́дре, пра́ведно сподо́бился еси́.

Богоро́диченъ: Яко одушевле́нный киво́тъ, прія́ла еси́ Сло́во Безнача́льное, я́ко свято́е святи́лище, Созда́теля вмѣсти́ла еси́, я́ко престо́лъ огнеобра́зный, но́сиши Влады́ку, Богома́ти, всея́ тва́ри.

Конда́къ, гла́съ 2. Подо́бенъ: Вы́шнихъ ища́.

Чистото́ю душе́вною боже́ственно вооружи́вся и непреста́нную моли́тву, я́ко копіе́, вручи́въ крѣ́пко, ссѣ́клъ еси́ де́монская ополче́нія, Киріа́че, о́тче на́шъ, моли́ся непреста́нно о всѣ́хъ на́съ.

Икосъ:

Ка́ко восхвалю́ окая́нный а́зъ твоя́ по́двиги, преподо́бне о́тче? Сле́зъ же ка́ко пучи́ну отры́гну? Ты́ бо, въ житіи́ преизя́ществуя, а́нгельскій пости́глъ еси́ ли́къ. Вся́ не́гли воздержа́ніемъ стра́сти умертви́лъ еси́, му́дре, и пло́ть порабо́тивъ, покори́лъ еси́ сію́ ду́ху, моли́тву же имѣ́я, я́ко ме́чь, тмы́ предста́теля низложи́лъ еси́, моли́ся непреста́нно о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Зако́новъ и слове́съ богодохнове́нныхъ наслади́ горта́нь поуче́ніемъ па́че ме́да Тво́й вѣ́рнѣйшій уго́дникъ: благослове́нъ еси́, Го́споди, пѣснопоя́, Бо́же, во вѣ́ки.

Блаже́нне богоглаго́ливе, приво́диши пою́щія тя́ Христу́, очище́ны отъ ти́ны страсте́й моли́твами твои́ми, вопію́щія, Киріа́че, и глаго́лющія: благослове́нъ еси́, Го́споди Бо́же, во вѣ́ки.

Льво́въ избѣжа́въ сверѣ́пства, Даніи́лъ просла́вися, слуги́ же тѣ́хъ имя́ше повелѣва́я Киріа́къ, зовы́й Тебѣ́: благослове́нъ еси́, Го́споди Бо́же, во вѣ́ки.

Всю́ Ду́ха благода́ть всели́, Христе́, рачи́тель бо Твоея́ пречи́стыя добро́ты бы́сть, вседу́шно Киріа́къ, зовя́й Тебѣ́: благослове́нъ еси́, Го́споди Бо́же, во вѣ́ки.

Тро́иченъ: Дѣя́нію приложи́въ видѣ́ніе, Тріѵпоста́сное проповѣ́далъ еси́ Существо́, во Отцѣ́ и Сы́нѣ и Ду́сѣ, зовя́й, Киріа́че богопрія́тне: благослове́нъ еси́, Го́споди Бо́же, во вѣ́ки.

Богоро́диченъ: Угаси́ пла́мень страсте́й мои́хъ и укроти́ ересе́й бу́рю, Богома́ти: Тя́ бо имѣ́емъ предста́тельницу христіа́не и побо́рницу, и Тя́ вѣ́рою воспѣва́емъ во вѣ́ки.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилѣжа́ще, о́троцы вопія́ху: благослови́те, вся́ дѣла́ Госпо́дня, Го́спода.

Тече́ньми сле́зъ напои́лъ еси́, блаже́нне, свяще́нную твою́ ду́шу умиле́ніемъ боже́ственнымъ, и многопло́дну показа́лъ еси́, поя́: благослови́те, вся́ дѣла́, Го́спода и превозноси́те Его́ во вѣ́ки.

Ѳесви́тянинъ дре́вле су́шею пресуши́ ту́чныя ка́пли, ты́ же дождя́ проли́тіе на во́зрастъ жа́твы низве́лъ еси́, всеблаже́нне, поя́: благослови́те, вся́ дѣла́, Го́спода и превозноси́те Его́ во вѣ́ки.

Ты́ злосла́вныхъ ле́сть обличи́лъ еси́, Ориге́на ученико́въ бу́іяго и басносло́вца, до́блими по́двиги: благослови́те, поя́, правосла́вно Го́спода и превозноси́те Его́ во вѣ́ки.

Тро́иченъ: Тро́ицы Еди́но благоче́стно научи́лъ еси́, о́тче, Существо́, въ тре́хъ со́лнцѣхъ я́ко еди́ну зарю́ же и свѣ́тлость: благослови́те, глаго́ля, правосла́вно Го́спода и превозноси́те Его́ во вѣ́ки.

Богоро́диченъ: Ада́ма, Дѣ́во, па́дшаго яви́лася еси́ дщи́, Бо́жія же Ма́ти Обнови́вшаго мое́ существо́, Его́же пое́мъ, вся́ дѣла́, я́ко Го́спода и превозно́симъ во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ Дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Верте́пъ тя́, му́дре, прія́тъ, пріе́мшаго исто́чникъ благода́тный, чудодѣ́йствовавша боже́ственнаго дре́вле отца́ Харито́на Моисе́йски, Киріа́че, и стѣна́ незы́бленна па́ствѣ о́наго бы́лъ еси́ и храни́тель твердѣ́йшій.

Су́що раче́ніемъ жи́зни кре́стъ на ра́мена взе́мъ, житіе́, Киріа́че, поуче́ніе положи́лъ еси́ сме́рти, тѣ́мъ и ны́нѣ къ нестарѣ́ющейся преста́вился еси́ сла́дости нетлѣ́ннѣй, небе́снымъ лико́мъ во свѣ́тѣ при Бо́зѣ сликовству́еши при́сно.

Облиста́въ заре́ю, разже́гся Ду́ха, и яви́лся еси́ превы́шнимъ ликостоя́ніемъ свѣ́телъ, но озари́ мо́й у́мъ, блаже́нне, разу́мнымъ и трисія́ннымъ свѣ́томъ Божества́, моли́твами твои́ми и отъ страсте́й мя́ и прегрѣше́ній спаси́.

Вѣнча́вшеся побѣди́тельною діади́мою, Харито́не богоглаго́ливе и Киріа́че блаже́нне, и предстоя́ще въ высоча́йшихъ Христу́, па́ству свою́ оте́чески отъ бѣ́дъ избавля́юще, ны́нѣ призира́йте пра́зднующую ва́ша па́мяти.

Богоро́диченъ: Напрязи́, и благопу́тствуй, и ца́рствуй, Сы́не Богома́тере, исма́ильтянина врага́ покаря́я, ра́тующаго ны́, Христолюби́вому Импера́тору, моли́твами, мо́лимся, Ро́ждшія Тя́ неискусому́жно, я́ко Бо́гъ и Человѣколю́бецъ.

Свѣти́ленъ. Подо́бенъ: Ду́хомъ.

Ду́шу очи́стивъ, преподо́бне, страсте́й омраче́нія зѣ́льнымъ посто́мъ и моли́твою непреста́нною, зерца́ло, о́тче, бы́лъ еси́ боже́ственныхъ осія́ній, возвожде́нія посыла́я на́мъ ны́нѣ, свѣти́льниче мона́ховъ, Киріа́че богоно́се.

Сла́ва, и ны́нѣ, богоро́диченъ:

Истинно Богоро́дицу Тя́ исповѣ́дуемъ, Влады́чице, Тобо́ю спа́сшіися, и́бо Бо́га неизрече́нно родила́ еси́, разруши́вшаго Кресто́мъ сме́рть, къ Себѣ́ же привле́кши преподо́бныхъ собо́ры, съ ни́миже Тя́ восхваля́емъ, Дѣ́во.

На стихо́внѣ окто́иха. Сла́ва, гла́съ 5:

Преподо́бне о́тче, не да́лъ еси́ сна́ твои́мъ очесе́мъ, ни вѣ́ждомъ твои́мъ дрема́нія, до́ндеже ду́шу и тѣ́ло отъ страсте́й свободи́лъ еси́, и тебе́ сама́го угото́валъ еси́ Ду́ху жили́ще. Прише́дъ бо Христо́съ со Отце́мъ, оби́тель у тебе́ сотвори́, и Единосу́щныя Тро́ицы уго́дникъ бы́въ, великопроповѣ́дниче о́тче на́шъ Киріа́че, моли́ся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Ра́дуйся.

Егда́ Гро́зда невсажде́нна, Его́же, я́ко розга́, прорасти́, узрѣ́ на Дре́вѣ ви́сяща и копіе́мъ пробода́ема Боже́ственная ре́бра: что́ се, — глаго́лаше, — Сы́не и Бо́же? ка́ко, Иже неду́ги вся́ и стра́сти исцѣли́вый, Стра́сть пріе́млеши, Безстра́стный по естеству́ сы́й Божество́мъ? Что́ Ти невозблагода́тніи лю́діе, Благодѣ́телю, сія́ возда́ша вмѣ́сто благодѣя́ній? — вопія́ше Пречи́стая. Но Того́ Страстьми́ отъ страсте́й мя́ изба́вити, моли́ся непреста́нно, я́ко да сла́влю Тя́.


НА ЛИТУРГІИ,

Блаже́нна окто́иха, на 4, и преподо́бнаго, пѣ́снь 3-я на 4. Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя Его́. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 283 – 288.

/ Къ оглавленію раздѣла /


Наверхъ / Къ титульной страницѣ

0