Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 28-й де́нь.
Свята́го му́ченика благовѣ́рнаго кня́зя Вячесла́ва Че́шскаго.

ВЕЧЕРЪ,
[На Го́споди воззва́хъ:] стихи́ры, гла́съ 8. Подо́бенъ: О, пресла́внаго чудесе́!

Трисвѣ́тлыми заря́ми* пресвѣ́тло укра́шенъ па́че со́лнца,* су́щимъ въ бѣда́хъ возсія́лъ еси́,* Вячесла́ве преди́вный,* разрѣша́я свя́занныхъ безъ пра́вды,* и болѣ́зни вся́кія отго́ниши* зову́щимъ вѣ́рно тя́ на по́мощь,* любо́вію пою́щимъ* всечестно́е ти́ успе́ніе.

Гряди́те, вси́ вѣ́рніи,* па́мять пречу́дную духо́вно пра́зднуемъ* Христо́ва служи́теля Вячесла́ва дне́сь,* оста́вль бо земно́е служи́тельство тлѣ́нное,* небе́сное Ца́рство прія́тъ* и въ ру́цѣ Влады́чни* пресвяту́ю свою́ ду́шу дне́сь предаде́,* прославля́я Го́спода,* уди́вльшаго па́мять его́.

Ины стихи́ры, гла́съ то́йже. Подо́бенъ: Иже въ Еде́мѣ ра́й.

Любо́вію ведо́мь вы́шняго зва́нія,* въ це́рковь Христо́ву идя́ше, преблаже́нне,* у нея́же прія́тъ вѣне́цъ ца́рскій,* и нетлѣ́ненъ, и непреиду́щъ,* и́мже озари́лся еси́, я́ко со́лнце,* за́паду и сѣ́вернымъ страна́мъ свѣ́тлую зарю́ испусти́въ чуде́съ,* пою́щимъ па́мять ти́ прехва́льную,* свя́те Вячесла́ве непобѣди́мый.

Проли́тіемъ пречи́стыя кро́ве ти́,* Вячесла́ве прехва́льне,* Це́рковь Христо́ву украси́лъ еси́,* я́ко ца́рскою багряни́цею,* е́юже укра́шшися,* вся́ страны́ собира́етъ на ли́къ,* пресвяще́нную ти́ па́мять свѣ́тло пра́здновати* и вѣ́рно Благодѣ́телю и Творцу́ всѣ́хъ вопи́ти:* сла́ва Ти́, Христе́, уди́вльшему па́мять свята́го Своего́.

Ина стихи́ра, гла́съ 4. Подо́бенъ: Яко до́бля.

Яко вели́ка помо́щника су́щимъ въ бѣда́хъ,* сне́мшеся, вси́ восхва́лимъ,* я́ко прія́тъ да́ръ благода́ти отъ Спа́са Христа́:* бѣ́дныя избавля́ти,* и печа́льныхъ утѣша́ти,* и болѣ́зни вся́ки исцѣля́ти* зову́щимъ вѣ́рою на по́мощь* и любо́вію творя́щимъ* пречу́дное его́ пра́зднество.

Тропа́рь, гла́съ 4:

Дне́сь а́нгели съ человѣ́ки ра́дуются вку́пѣ о́бщимъ весе́ліемъ, не́бо и земля́ свѣ́тло лику́ютъ въ па́мять твою́, свя́те Вячесла́ве, и мы́, грѣ́шніи, прилѣ́жно ти́ вопіе́мъ: помоли́ся къ Влады́цѣ о на́съ, изба́вити ны́ отъ напа́сти ви́димыхъ и неви́димыхъ вра́гъ, чту́щія пресвѣ́тлую па́мять твою́.

Инъ тропа́рь, гла́съ то́йже:

Страны́ Че́шскія кня́же преди́вный, правосла́вное наслѣ́діе блаже́нныя Людми́лы умно́живый, о́бразе кро́тости и смире́нія, му́дрости и безстра́шія, вѣ́рность за́повѣдемъ Христо́вымъ въ житіи́ твое́мъ сохрани́вый, и́стинную вѣ́ру въ окруже́ніи язы́чества утвержда́я, тѣ́мже и вѣне́цъ сла́вы отъ Царя́ царе́й прія́лъ еси́, и ны́нѣ правосла́вныхъ мíра всего́ назида́еши, моли́, свя́те Вячесла́ве, Всеблага́го Бо́га умири́ти мíръ и спасти́ ду́ши на́ша.


НА УТРЕНИ,
Аще хо́щеши чести́ сѣда́ленъ, зри́ тропа́рь, гла́съ 4, или́ сѣда́ленъ му́ченика о́бщій.

Кано́нъ свята́го, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Лику́имъ дне́сь, вѣ́рніи, ра́достно, свѣ́тлыми душа́ми пою́ще Спа́са на па́мять пречу́дную Христо́ва служи́теля Вячесла́ва.

Влады́чнимъ Страсте́мъ сла́вне уподо́бился еси́, я́ко а́гня непоро́чно, безъ пра́вды убива́емь, тѣ́мъ съ ли́ки му́ченикъ, богоблаже́нне, ны́нѣ весели́шися.

Сме́рть хода́таицу жи́зни пріи́мъ, вся́ческимъ Влады́цѣ ны́нѣ въ сла́вѣ предстои́ши, ея́же и на́мъ улучи́ти умоли́, свя́те, творя́щимъ твою́ па́мять пречу́дную.

Кто́ исповѣ́сть твоя́ чудеса́, сла́вне, я́же твори́ши въ мíрѣ безъ числа́? Вы́ну бо всѣ́мъ вѣ́рнымъ оби́льно дае́ши исцѣле́ніе.

Богоро́диченъ: Впа́дша мя́ въ разбо́йники душегу́бными дѣ́лы и сме́ртію потопле́на воздви́гни, молю́ Ти ся, Госпоже́: Сы́ну Своему́ и Бо́гу за мене́ помоли́ся.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Любо́вію Христо́вою при́сно разжиза́емь къ це́ркви святѣ́й, та́мо, преблаже́нне, я́ко а́гнецъ незло́бивъ, непра́ведное претерпѣ́лъ еси́ убіе́ніе.

Кро́вію ти́ пресвѣ́тлою Це́рковь твоя́ укра́шшися, свѣ́тлы лучи́ испуща́етъ чуде́съ, пою́щи па́мять ти́, достосла́вне.

Заря́ми Тро́ичными измла́да просвѣ́щся, Христу́ наслѣ́дникъ, свя́те, бы́сть, Его́же моли́ посла́ти ми́ръ душа́мъ на́шимъ.

Богоро́диченъ: Чу́до Бо́жія Рождества́ Ти, Чи́стая, вся́каго естества́ прехо́дитъ чи́нъ: Бо́га бо Пресу́щна зача́тъ во чре́вѣ и, ро́ждши, пребыва́еши Приснодѣ́ва.

Инъ конда́къ, гла́съ 3:

Кня́же, во́ине страны́ Боге́міи преди́вныя, смире́ннымъ кня́жескимъ служе́ніемъ спасе́ніе стяжа́вый, у ца́рскаго престо́ла, свя́те Вячесла́ве, вѣне́цъ сла́вы му́ченика за Христа́ прія́лъ еси́, и ны́нѣ усе́рдно мо́лишися о вѣ́рныхъ, Ду́хомъ Бо́жіимъ къ вѣ́чному блаже́нству угото́ванныхъ, страну́ Че́шскую храни́ти въ Правосла́віи съ любо́вію призыва́я, во е́же спасти́ся душа́мъ на́шимъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Благодѣ́тельно измла́да въ вѣ́рѣ чи́стѣ воспита́нъ, чи́стыми свои́ми труды́ любо́вію Влады́цѣ послѣ́довалъ еси́, наде́ждею На́нь льсти́ваго врага́ посрами́въ.

Свѣ́тлостію сія́я, свя́те Вячесла́ве, грѣхи́ омраче́ны су́щія просвѣти́ твои́ми моли́твами, съ ли́ки му́ченикъ имы́й дерзнове́ніе за на́съ моли́тися.

Мечи́ ссѣка́емь, свя́те, непобѣди́ме, врага́ лука́ваго мече́мъ терпѣ́нія ссѣ́клъ еси́, тѣ́мъ и вѣне́цъ прія́тъ изъ руки́ Вседержи́теля.

Богоро́диченъ: Неизглаго́ланы и непостижи́мы, богоподо́бны вои́стину су́ть Твоего́, Богоро́дице, Рождества́ земны́мъ и небе́снымъ, Приснодѣ́во, та́йны.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Твои́ми страстьми́, прехва́льне, неболѣ́зненную жи́знь воспрія́въ, свя́те Вячесла́ве, стра́ждущимъ всѣ́мъ яви́ся заступле́ніе, на по́мощь вѣ́рно тя́ зову́щимъ.

Па́че со́лнца, блаже́нне, просвѣти́лъ еси́ сѣ́вера, и ю́га, и за́пада концы́ пресвѣ́тлыми заря́ми чуде́съ твои́хъ. Тѣ́мъ на́съ озари́, свя́те, па́мять твою́ пра́зднующихъ.

Су́щимъ въ бѣда́хъ помо́щникъ ты́ бы́сть, ни́щимъ кормле́ніе, печа́льнымъ утѣ́ха, тѣ́мъ и по сме́рти, свя́те, вся́ избавля́еши вѣ́рно тя́ зову́щія на по́мощь.

Богоро́диченъ: Богоро́дицу Тя́ отъ души́ исповѣ́дующія, Влады́чице мíру Блага́я, спаса́й, Тя́ бо заступле́ніе, Непоро́чная, и́мамы, су́щую вои́стину Богоро́дицу.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Житіе́ чи́сто поще́ніемъ стяжа́въ, Вячесла́ве преди́вне, и а́нгеломъ сограждани́нъ яви́вся, съ ни́миже моли́ о спасе́ніи ду́шъ на́шихъ.

Княже́ніе земно́е оста́вилъ еси́ вре́менное и ца́рское украше́ніе прія́тъ изъ десни́цы Влады́чни, тлѣ́нными вѣ́чная, я́ко му́дръ, стяжа́въ.

Пріими́ похвале́ніе изъ окая́нныхъ усте́нъ, свя́те, не могу́ща похвале́нія ти́ досто́йна исплести́ и моли́ Ми́лостиваго Бо́га дарова́ти на́мъ ве́лію ми́лость.

Богоро́диченъ: Пречи́стая Влады́чице, ро́ждшая земны́мъ Ко́рмчію и Го́спода, по́хотемъ ми́ злолю́тымъ устро́й смуще́ніе и тишину́ пода́ждь се́рдцу моему́.

Конда́къ, гла́съ 1. Подо́бенъ: Ли́къ а́нгельскій.

Съ ли́ки а́нгельскими предстоя́, блаже́нне кня́же Вячесла́ве, наслажда́ешися Боже́ственныя и неизрече́нныя добро́ты, и, отту́ду благодѣ́тельныя да́ры поче́рпъ чуде́съ, всѣ́мъ притека́ющимъ вѣ́рою подъ твою́ святы́ню источа́еши цѣльба́мъ дарова́ніе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Ста́рый злодѣ́й зави́де свято́му твоему́ житію́ и науща́етъ на убіе́ніе безу́мнаго ти́ собра́та. Ты́ же чи́стою со́вѣстію немо́лчно Творцу́ своему́ вопія́ше: благослове́нъ Бо́гъ оте́цъ на́шихъ.

Ве́село лику́етъ Пра́га дне́сь, пресла́вный ти́ гра́дъ, почита́я па́мять твою́, и, чудесы́ твои́ми озаря́я свѣ́тло, вся́ страны́ созыва́етъ вопи́ти: благослове́нъ Бо́гъ оте́цъ на́шихъ.

Ле́стію прелука́ваго дре́вле очервле́на бы́сть земля́ твоя́ братоубíйственною руко́ю; ны́нѣ же, кро́вію ти́ окропи́вшися, благоуха́нія же́ртву Христо́ви приноша́етъ, вопію́щи: благослове́нъ Бо́гъ оте́цъ на́шихъ.

Богоро́диченъ: Тобо́ю на́мъ, Дѣви́це, Свѣ́тъ возсія́, те́мнымъ, Ты́ бо родила́ еси́ Зижди́теля всѣ́мъ и Бо́га, у Него́же проси́, Пречи́стая, при́сно посыла́ти на́мъ, вѣ́рнымъ, ве́лію ми́лость.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Весе́лія добро́тами на́съ озаря́еши, пресла́вне, па́че со́лнца въ земли́ Боге́мстѣй благода́тными заря́ми свы́ше освяще́нъ, превозноша́я Христа́ во вѣ́ки.

Тѣ́ло твое́ свято́е, блаже́нне, пріи́мъ, Пра́га дне́сь, прехва́льный ти́ гра́дъ, преди́вная чудеса́ мíрови провозвѣща́етъ, превозноша́я Христа́ во вѣ́ки.

Кро́тостію укра́шенъ, преди́вне, и ра́зумомъ благовѣ́рія просвѣ́щся, Тро́ицы Пресвятѣ́й яви́лся еси́ вои́стину проповѣ́дникъ, превозноша́я Христа́ во вѣ́ки.

Богоро́диченъ: Отъ Свѣ́та Свѣтода́вца Словесе́ зача́тъ и неизрече́нно родила́ еси́ Пресу́щаго: Ду́хъ бо Бо́жій, Дѣви́це, въ Тя́ всели́ся, тѣ́мъ Тя́ пое́мъ, Чи́стая, во вѣ́ки вся́.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ве́лія благода́ти сподо́бився, сла́вне, просвѣти́лъ еси́ всю́ вселе́нную, исцѣле́нія всѣ́мъ оби́льно подава́я.

Пріими́, свя́те, ра́дость а́нгельскую и, предстоя́ Зижди́телю своему́, о на́съ помоли́ся, тебе́ велича́ющихъ.

Пріи́мъ ны́нѣ блаже́нный поко́й, не преста́й моля́ся, пресла́вне, свята́го блаже́нства причасти́тися вы́ну тя́ велича́ющимъ.

Богоро́диченъ: Богоро́дице, ро́ждшая Сло́во па́че словесе́, Зижди́теля Своего́, Дѣ́во, Того́ умоли́ спасти́ся душа́мъ на́шимъ.

Свѣти́ленъ. Подо́бенъ: Отъ земли́ преста́вися.

Отъ земли́ преступи́лъ еси́ ко Влады́цѣ, преблаже́нне Вячесла́ве, пріиди́ ны́нѣ духо́вно и присѣти́ ми́лостію пою́щихъ дне́сь честно́е ти́ пра́зднество.

Источникъ: Мине́я Сентя́брь. — М., 2003. — С. 846-851.

/ Къ оглавленію раздѣла /


Наверхъ / Къ титульной страницѣ

0