Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 28-й де́нь.
Преподо́бнаго отца́ на́шего и исповѣ́дника Харито́на.

ВЕЧЕРЪ,
Стихологису́емъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.

Стра́сти тѣле́сныя* воздержа́ніемъ увяди́лъ еси́* и прилѣ́жнымъ моле́ніемъ,* змíя льсти́ваго сле́зъ ту́чами потопи́лъ еси́, блаже́нне,* и благоугоди́лъ еси́ Бо́гу попремно́гу,* Харито́не преподо́бне,* тѣ́мъ украси́ тя небе́сными дарми́* Іису́съ Человѣколю́бецъ* и Спа́съ ду́шъ на́шихъ. [Два́жды.]

По́томъ поще́нія* угаси́лъ еси́ у́гліе страсте́й, досточу́дне,* огню́ пріобща́яся ра́нами и болѣ́зньми,* исповѣ́давъ предъ беззако́нными мучи́тели* вопло́щшагося Сло́ва истоща́ніе,* и свидѣ́тель бы́лъ еси́,* упещре́нъ ра́нами* многообра́зныхъ му́къ,* богоно́се Харито́не пребога́те. [Два́жды.]

Въ пусты́няхъ и гора́хъ* ты́, бѣ́гая, удали́лся еси́,* ду́шу соблю́дъ нескве́рну, свяще́ннѣйше,* и Тро́ицы до́мъ, Харито́не, показа́лся еси́,* Ея́же си́лою свяще́нныя созда́лъ еси́ до́мы, блаже́нне,* и огра́ды на спаси́тельное мона́шествующихъ устрое́ніе,* честву́ющихъ па́мять твою́ святу́ю,* приснопа́мятне. [Два́жды.]

Сла́ва, гла́съ 4. Іоа́нна мона́ха:

Богоно́се Харито́не, ты́ и по сме́рти на небесѣ́хъ живе́ши во Христѣ́, Его́же ра́ди мíру тя́ распя́лъ еси́, внѣ́ бо пло́ти и мíра бы́въ, па́че ви́димыхъ пожи́лъ еси́ и́стинно: не бо́ жи́лъ еси́ тебѣ́ самому́, живя́ше же па́че въ тебѣ́ Христо́съ Бо́гъ на́шъ, Того́ моли́ спасти́ся душа́мъ на́шимъ.

И ны́нѣ, богоро́диченъ:

Иже Тебе́ ра́ди [богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость].

Вхо́дъ. Проки́менъ дне́. Чте́нія три́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры преподо́бнаго, гла́съ 1. Подо́бенъ: Всехва́льніи му́ченицы.

Харито́не прехва́льне,* твое́ житіе́ возложи́лъ еси́* добродѣ́телей попече́ніемъ:* пѣсносло́віемъ бо правовѣ́рною вѣ́рою* Христа́ похваля́ютъ,* твои́мъ покаря́ющеся уче́ніемъ,* и́мже, предстоя́,* утверди́тися умоли́ въ ми́рѣ* Боже́ственнаго Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Харито́не богодохнове́нне,* твое́ житіе́ у́бо ра́вно а́нгеломъ* земны́мъ объяви́ся,* небе́снымъ же я́ко благово́нная же́ртва* и до́брое кади́ло* твое́ исповѣ́даніе принесе́ся.* И ны́нѣ моли́ся,* дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ боя́йся Го́спода,* въ за́повѣдехъ Его́ восхо́щетъ зѣло́.

Харито́не пребога́те,* страсте́й побѣди́тель бы́лъ еси́* и разбо́йники побѣди́лъ еси́,* вѣнцено́сцемъ сликовству́я, блаже́нне;* о всѣ́хъ помина́й,* соверша́ющихъ твою́ па́мять,* ны́нѣ Христу́ моли́ся* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Харито́не, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́споду поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́нныя, сія́я чудесы́, Харито́не, о́тче на́шъ, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ:

Иже на́съ ра́ди рожде́йся [отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
[На Бо́гъ Госпо́дь:] Тропа́рь, два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ, гла́съ 4. Подо́бенъ: Вознесы́йся.

Земны́хъ и тлѣ́нныхъ наслажде́ніе презрѣ́въ, Христу́ послѣ́довалъ еси́ и пусты́нныя жи́тели возлюби́лъ еси́ па́че мíра красоты́ и сла́дости привре́менныя, отону́дуже сподо́бился еси́ и свидѣ́тельства, и по́стничества лико́мъ сочета́тися, съ ни́миже моли́ спасти́ся рабо́мъ твои́мъ. [Два́жды.]

Сла́ва, и ны́нѣ, богоро́диченъ:

На престо́лѣ херуви́мстѣмъ сѣдя́й и въ нѣ́дрѣхъ Отчихъ водворя́яйся, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ, вопло́щся бо, Бо́гъ и́стинно воцари́ся надъ всѣ́ми язы́ки, и разу́мно ны́нѣ пое́мъ Ему́, Его́же умоли́ спасти́ся рабо́мъ Твои́мъ.

По 2-мъ стихосло́віи сѣда́ленъ, гла́съ 8. Подо́бенъ: Прему́дрости.

Іоа́нна нра́вомъ Крести́теля и Иліи́ Ѳесви́тянина добродѣ́телемъ посто́мъ подража́я, безпло́тно пожи́лъ еси́, со а́нгелы сла́вя Тро́ицу Безнача́льную и разбо́йниковъ нахожде́нія побѣжда́я му́жествомъ. Тѣ́мъ и страда́ніемъ крѣ́пко подвиза́лся еси́, Христо́ву Боже́ственному воплоще́нію кла́няяся съ Божество́мъ, Харито́не блаже́нне, моли́ Христа́ Бо́га грѣхо́въ оставле́ніе дарова́ти честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ Тя́, безсѣ́менно ро́ждшую Бо́га пло́тію, вси́ ублажа́емъ, ро́ди человѣ́честіи: Огнь бо всели́ся въ Тебѣ́ Божества́, и, я́ко Младе́нца, дои́ши Зижди́теля и Го́спода. Тѣ́мже, а́нгельскій и человѣ́ческій ро́дъ, досто́йно сла́вимъ всесвято́е Рождество́ Твое́ и согла́сно вопіе́мъ Ти́: моли́ Христа́ Бо́га прегрѣше́ній оставле́ніе дарова́ти досто́йно пою́щимъ сла́ву Твою́.

[Велича́ніе:

Ублажа́емъ тя́, преподо́бне о́тче Харито́не, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 4. Подо́бенъ: Вознесы́йся.

Земны́хъ и тлѣ́нныхъ наслажде́ніе презрѣ́въ, Христу́ послѣ́довалъ еси́ и пусты́нныя жи́тели возлюби́лъ еси́ па́че мíра красоты́ и сла́дости привре́менныя, отону́дуже сподо́бился еси́ и свидѣ́тельства, и по́стничества лико́мъ сочета́тися, съ ни́миже моли́ спасти́ся рабо́мъ твои́мъ. [Два́жды.]

Сла́ва, и ны́нѣ, богоро́диченъ:

По Бо́зѣ въ Тво́й, Богоро́дице, прибѣга́ю, смире́нный, покро́въ боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ грѣси́, и бою́ся, Влады́чице, му́къ и трепе́щу, моле́ніе сотвори́, Чи́стая, къ Сы́ну Твоему́, отъ си́хъ изба́вити мя́.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 10.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́моновъ погуби́лъ еси́ полки́, а́нгеловъ пости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицы со ирмосо́мъ на 6 и преподо́бнаго на 8.

Кано́нъ Богоро́дицы, его́же краегране́сіе: Пою́ похвалу́ живоно́снѣй Отрокови́цѣ. Гла́съ 2.
Пѣ́снь 1.

Ирмо́съ: Нетре́ну, необы́чну, немо́кренно морску́ю ше́ствовавъ стезю́, избра́нный вопія́ше Изра́иль: Го́сподеви пои́мъ, я́ко просла́вися.

Невеще́ственная дре́вле лѣ́ствица и стра́нно оляденѣ́вшій пу́ть мо́ря Твое́ явля́ше Рождество́, Чи́стая, е́же пое́мъ вси́, я́ко просла́вися.

Си́ла Вы́шняго Ѵпоста́сь соверше́нная, Бо́жія Му́дрость, вопло́щшаяся, Пречи́стая, изъ Тебе́, человѣ́комъ пріобщи́ся, я́ко просла́вися.

Про́йде сквозѣ́ две́рь непрохо́дную заключе́нныя утро́бы Твоея́ пра́вды Со́лнце, Чи́стая, и мíру возсія́, я́ко просла́вися.

Кано́нъ свята́го, творе́ніе Іоа́нна мона́ха. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Мо́ря стра́стнаго пучи́ну преплы́въ, живоно́снымъ ору́жіемъ Креста́ фарао́на лука́ваго мы́сленнаго, блаже́нне, боже́ственною си́лою потопи́лъ еси́.

Го́споду возложе́нъ, блаже́нне, отъ ма́тернихъ пеле́нъ, предъ мучи́тельскимъ суди́щемъ Христа́ богому́дренно проповѣ́далъ еси́, Моисе́йски бо низложи́лъ еси́ противобо́рныхъ шата́нія.

Пре́лести оста́вивъ Еги́петъ, Харито́не преподо́бне, и пустынногра́жданинъ бы́въ, чи́сто бесѣ́довалъ еси́ Чи́стому и прія́лъ еси́ небе́сное наслѣ́діе.

Богоро́диченъ: Безсѣ́менно Отчею во́лею отъ Боже́ственнаго Ду́ха Бо́жія Ты́ зачала́ еси́ Сы́на и пло́тію родила́ еси́, изъ Отца́ безма́терня и на́съ ра́ди изъ Тебе́ безо́тча.

Катава́сія: Отве́рзу уста́ моя́...

Пѣ́снь 3.

Ирмо́съ: Лу́къ сокруши́ся си́льныхъ держа́вою Твое́ю, Христе́, и си́лою немощству́ющіи препоя́сашася.

Иже вре́мене внѣ́ вся́каго, я́ко време́нъ Творе́цъ, изъ Тебе́, Дѣ́во, во́льно Младе́нецъ созда́ся.

Чре́во, простра́ннѣйшее небе́съ, воспои́мъ, и́мже Ада́мъ на небесѣ́хъ, ра́дуяся, жи́тельствуетъ.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Весели́тся о тебѣ́ ученико́въ слове́сная па́ства твоя́ духо́вно, преподо́бне, твое́й обща́щися свѣ́тлости.

Мудрова́ніе плотско́е, я́ко вино́вное вражды́ на Бо́га, жи́зни Ду́ху, преподо́бне Харито́не, повину́лъ еси́.

Низложи́лъ еси́ Дави́дски иноплеме́нника Голіа́ѳа, преподо́бне, мы́сленнаго си́лу всеору́жіемъ Ду́ха.

Богоро́диченъ: Ты́ еди́на су́щимъ на земли́ па́че естества́ благи́хъ хода́таица, Ма́ти Бо́жія, была́ еси́. Тѣ́мъ Тебѣ́, — ра́дуйся, — зове́мъ.

Сѣда́ленъ, гла́съ 8. Подо́бенъ: Прему́дрости.

Страда́нія болѣ́зньми искуси́вся, поще́нія страда́ньми утверди́вся, зла́та свѣтлѣ́йшій благоче́стіемъ облиста́лъ еси́ и чи́стое прія́телище бы́лъ еси́ Ду́ха: лука́выхъ духо́въ тму́ разгна́лъ еси́. Тѣ́мъ собра́въ мона́шествующихъ мно́жества, па́стырь и́хъ бы́лъ еси́ и свѣти́льникъ свѣтлѣ́йшій, Харито́не блаже́нне. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому защище́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Пѣ́снь 4.

Ирмо́съ: Услы́шахъ, Го́споди, сла́вное Твое́ смотре́ніе и просла́вихъ, Человѣколю́бче, непостижи́мую Твою́ си́лу.

Се́ превознесе́ся Боже́ственная гора́ до́му Госпо́дня превы́шше си́лъ, Богома́терь я́вственнѣйши.

Зако́нныхъ естества́ кромѣ́, еди́на, Дѣ́во, ро́ждши Влады́чествующаго тва́рію, сподо́билася еси́ боже́ственнаго зва́нія.

Инъ.

Ирмо́съ: Любве́ ра́ди, Ще́дре, Твоего́ о́браза на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Веселя́ся преподо́бный о Го́сподѣ, я́ко побѣди́тель, вопія́ше на враги́ безпло́тныя: Бо́гъ мо́й — крѣ́пость моя́ и Госпо́дь.

Вѣнча́ша тя́ благода́ти, Харито́не, страда́льческимъ вѣнце́мъ Христо́ва Ца́рства: пре́лести бо пія́нство искорени́лъ еси́, блаже́нне.

Муча́щія пре́жде сконча́нія твоего́, Харито́не, воздержа́нія болѣ́зньми сла́сти умертви́въ, живоно́сною ме́ртвостію, преподо́бне, одѣ́ялся еси́.

Богоро́диченъ: Неизрече́нно Твое́ рождество́ показа́ся, Богороди́тельнице, еди́на Чи́стая и Благослове́нная: тѣ́мъ Ти́ припа́дающе, — ра́дуйся, — взыва́емъ.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тмѣ́ заблу́ждшимъ, богоразу́мія просвѣще́ніе да́руя.

Облацы, весе́лія сла́дость кропи́те су́щимъ на земли́, я́ко Отроча́ даде́ся, Сы́й пре́жде вѣ́къ, изъ Дѣ́вы вопло́щся, Бо́гъ на́шъ.

Житію́ и пло́ти мое́й свѣ́тъ возсія́, и дря́хлость грѣха́ разруши́, напослѣ́докъ отъ Дѣ́вы безъ сѣ́мене вопло́щся, Вы́шній.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, преподо́бне, Свѣ́та нескве́рнено зерца́ло, Вы́шняго просвѣще́нія, свѣ́тло яви́лся еси́, Харито́не всеблаже́нне.

Ты́, преподо́бне, сугу́быми сія́еши благода́тьми, страда́нія бо ра́нами благоче́стно озари́лся еси́ и болѣ́зньми по́стничества.

Ты́, преподо́бне, душа́мъ вра́чь яви́лся еси́, боже́ственныя отъ млады́хъ ногте́й взыска́въ му́дрости, всеблаже́нне.

Богоро́диченъ: Тя́ ору́жіе непобѣди́мое на враги́ предлага́емъ, Тя́ держа́ву и наде́жду на́шего спасе́нія, Богоневѣ́сто, стяжа́хомъ.

Пѣ́снь 6.

Ирмо́съ: Гла́съ глаго́лъ моле́бныхъ отъ болѣ́зненныя, Влады́ко, души́ услы́шавъ, отъ лю́тыхъ мя́ изба́ви: еди́нъ бо еси́ на́шего спасе́нія вино́венъ.

Естество́ человѣ́ческое, рабо́тающее грѣху́, Влады́чице Чи́стая, Тобо́ю свобо́ду улучи́: Тво́й бо Сы́нъ, я́ко Агнецъ, за всѣ́хъ закала́ется.

Вопіе́мъ Ти́ вси́, и́стиннѣй Ма́тери Бо́жіей: прогнѣ́вавшія рабы́ изба́ви, Еди́на бо дерзнове́ніе къ Сы́ну и́маши.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Не песо́къ, но Христа́ основа́ніе положи́въ, назда́лъ еси́, о́тче, добродѣ́тель, зла́та честнѣ́йшую, и Тро́ицы Пресвяты́я до́мъ бы́лъ еси́.

Орга́нъ зло́бы змíй зна́ется, но, твои́ми, богоно́се, угожде́ніи, Харито́не, побѣжде́нъ, непра́ведныя отъ пра́веднаго про́мысла отмща́етъ.

Ничто́же тебе́ отъ Христо́вы любве́ отлучи́: ни ураня́емо тѣ́ло, ни сме́ртный су́дъ претя́щій, во едине́ніи Боже́ственнѣмъ наслажда́яся, блаже́нне.

Богоро́диченъ: О, чу́до, всѣ́хъ чуде́съ новѣ́е! Яко Дѣ́ва во чре́вѣ вся́ческая Содержа́щаго сло́вомъ, неискусому́жно заче́нши, не тѣ́сно вмѣсти́.

Конда́къ, гла́съ 2. Подо́бенъ: Въ моли́твахъ.

Наслади́вся, богому́дре, воздержа́нія и пло́ти твоея́ вожделѣ́нія обузда́въ, яви́лся еси́ вѣ́рою возраща́емь и, я́ко жи́зни дре́во посредѣ́ рая́, процвѣ́лъ еси́, Харито́не всеблаже́нне свяще́ннѣйшій.

Икосъ:

Отве́рзи моя́ уста́, преблаже́нне, благопрія́тными твои́ми моли́твами, предстоя́ Бо́гу, всесла́вне преподобному́чениче, да воспою́ боже́ственное твое́ житіе́ и возглаго́лю досто́йно добродѣ́тели твоя́, я́же на земли́ те́плою любо́вію соверши́лъ еси́. Исповѣ́дникъ бо бы́лъ еси́ крѣпча́йшій, воздержа́ніе же вѣ́рою испра́вилъ еси́, бдѣ́ніе и чистоту́ возлюби́въ, Харито́не всеблаже́нне свяще́ннѣйшій.

Пѣ́снь 7.

Ирмо́съ: Вѣтíи яви́шася о́троцы любому́дрѣйшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Зря́ще въ нощи́ у́бо Іа́ковъ, я́ко въ гада́ніи Бо́га, воплоще́нъ же изъ Тебе́, свѣ́тлостію яви́ся пою́щимъ: Пребоже́ственный отце́въ Бо́гъ и препросла́вленъ.

Зна́менія е́же въ Тебѣ́ неизрече́ннаго провозвѣща́я сплете́нія, со Іа́ковомъ бо́рется: чрезъ е́же во́льно соедини́ся человѣ́комъ, Чи́стая, Пребоже́ственный отце́въ Бо́гъ и препросла́вленъ.

Ме́рзокъ, не проповѣ́дуяй Тя́ Сы́на Дѣ́вы, Еди́наго [отъ] Всепѣ́тыя Тро́ицы, и несумнѣ́нною мы́слію, и язы́комъ вопія́: Пребоже́ственный отце́въ Бо́гъ и препросла́вленъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Иже въ пещи́ авраа́мскимъ подо́бяся ре́вностію благоче́стія, велѣ́ніе мучи́тельско, богоно́сне, попра́лъ еси́: благослове́нъ еси́, зовы́й, Бо́же мо́й, Го́споди.

Яко въ пещи́ искуше́нія разжже́нія боже́ственна, хладода́тельная съ небесе́ благода́ть посѣти́ тебе́, преподо́бне: благослове́нъ еси́, зовы́й, Бо́же мо́й, Го́споди.

Яко уя́звленъ Тро́ическимъ Бо́жіимъ раче́ніемъ, то́й равночи́сленныя огра́ды духо́внѣ пою́щія возложи́лъ еси́: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: О подо́біи зла́тѣ небре́гше, треблаже́нніи ю́ноши, неизмѣ́нный и живы́й Бо́жій о́бразъ ви́дѣвше, среди́ огня́ воспѣва́ху: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Ви́дѣнъ бы́сть на земли́ чрезъ Тебе́ и съ человѣ́ки поживе́, Иже бла́гостію несравне́нный и си́лою. Ему́же пѣснопою́ще, вси́ вѣ́рніи, зове́мъ: осуществова́нная да пое́тъ Го́спода вся́ тва́рь и превозно́ситъ во вся́ вѣ́ки.

Вои́стинно Тя́, Чи́стую, проповѣ́дающе, сла́вимъ Богоро́дицу: Ты́ бо родила́ еси́ Еди́наго отъ Тро́ицы воплоще́нна. Ему́же со Отце́мъ и Ду́хомъ вси́ пѣснопое́мъ: да пое́тъ Го́спода вся́ тва́рь и превозно́ситъ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Пе́рси, разжига́емы огне́мъ непра́веднѣ, преподо́бне, ле́сть погаси́лъ еси́, са́мъ же неопали́мь пребы́лъ еси́, дѣ́йствомъ Свята́го Ду́ха и ко благоче́стію лю́ди пѣ́ти возста́вилъ еси́: благослови́те, вся́ дѣла́ Госпо́дня, Го́спода.

Во Христа́ обле́клся еси́ вои́стинну, дре́вняго человѣ́ка совле́кся и обличи́въ, преподо́бне, тмы́ міродержи́теля ра́нами муче́нія, съ весе́ліемъ вопія́: благослови́те, вся́ дѣла́ Госпо́дня, Го́спода.

Па́вловъ нело́жнѣ, Харито́не, бы́въ учени́къ, того́ стопа́мъ послѣ́довалъ еси́, преподо́бне, и наста́вникъ показа́лся еси́ мона́хомъ, всѣ́мъ бы́въ пра́вило добродѣ́тели вопію́щимъ: благослови́те, вся́ дѣла́ Госпо́дня, Го́спода.

Богоро́диченъ: Ты́ еди́на во всѣ́хъ родѣ́хъ, Дѣ́во Чи́стая, яви́лася еси́ Ма́ти Бо́жія, Ты́ Божества́ была́ еси́ пребыва́лище, Всенепоро́чная, не опа́льшися огне́мъ непристу́пнаго Свѣ́та. Тѣ́мъ вси́ Тя́ благослови́мъ, Марíе Богоневѣ́сто.

Пѣ́снь 9.

Ирмо́съ: Ве́сь еси́ жела́ніе, ве́сь сла́дость, Сло́ве Бо́жій, Дѣ́вы Сы́не, Бо́же бого́въ, Го́споди святы́хъ Пресвяты́й, тѣ́мъ Тя́ вси́ съ Ро́ждшею велича́емъ.

Же́злъ крѣ́пости даде́ся естеству́ тлѣ́нному, Сло́во Бо́жіе во утро́бѣ Твое́й, Чи́стая, и сіе́ возста́ви, ко а́ду попо́лзшееся. Тѣ́мже Тя́, Всечи́стая, я́ко Богоро́дицу, велича́емъ.

Юже изво́лилъ еси́, Влады́ко, пріими́ ми́лостивно Моли́твенницу, Ма́терь Твою́, о на́съ, и Твоея́ бла́гости вся́ческая испо́лнятся, да Тя́ вси́, я́ко Благодѣ́теля, велича́емъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ни гро́бъ, хода́тай забве́нія, покры́ти возмо́же твои́хъ, преподо́бне Харито́не, добродѣ́телей: твоя́ бо па́мять вѣ́чнующая со́лнечно возсія́, ю́же досто́йно велича́емъ.

Пріиди́те, лѣ́тнюю па́мять духо́вно соверша́юще, бра́тіе, добродѣ́тельми подража́юще, богоно́сцу поревну́имъ и съ ни́мъ возопіи́мъ: Тя́ велича́емъ, Трисвяты́й.

Страстьми́ коле́блющіяся и бу́рею грѣхо́вною, исповѣ́дниче, погружа́емыя, ко Христу́ я́ко дерзнове́ніе имѣ́я, всегда́ сохраня́й, благоче́стно тя́ велича́ющія.

Богоро́диченъ: Ра́дуйся и весели́ся, Невѣ́сто Царя́ вели́каго, созерца́ющая свѣ́тло Твоего́ Жениха́ красоту́, па́че зла́та сія́ющую и па́че со́лнца облиста́вшую.

Свѣти́ленъ. Подо́бенъ: Жены́, услы́шите.

Страда́ніемъ у́бо пе́рвѣе до́брѣ искуси́вся, второ́е же посто́мъ тече́ніе боже́ственное соверши́въ, на небеса́ возше́лъ еси́ и Христу́ предстои́ши, Харито́не, о́тче преподо́бне, за ны́ моля́ся те́плѣ, пою́щія тя́. [Два́жды.]

Сла́ва, и ны́нѣ, богоро́диченъ:

Ра́дость неизрече́нную ро́ждши, Го́спода, ра́дости на́съ небе́сныя прича́стники сотвори́, всѣ́хъ Тебе́ почита́ющихъ вои́стинну, Пречи́стая, и отъ души́ вопію́щихъ Ти́: не забу́ди Твои́хъ рабо́въ, Благослове́нная Марíе.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Благода́ть Ду́ха,* Харито́не о́тче, тебѣ́ возсія́вши,* свѣ́тло просвѣти́ тя,* отсю́ду ума́лилъ еси́ страсте́й но́щь* и безстра́стія де́нь пости́глъ еси́,* чи́стѣ чистѣ́йшему Свѣ́ту совоку́плься,* въ Не́мже жи́тельствуя,* не забу́ди, богогла́се,* вѣ́рою пою́щихъ свяще́нную твою́ па́мять. [Два́жды.]

Благода́ть, жела́нную тебѣ́,* Харито́не, нося́ небе́сную,* земны́хъ небре́глъ еси́,* сего́ ра́ди, я́ко безпло́тенъ, страда́тельное избра́лъ еси́ житіе́,* я́ко присносу́щныя, сла́дости пото́ка* благоче́стно наслади́тися хотя́, богопрія́тне,* и слеза́ми изсуши́лъ еси́* му́тный исто́чникъ, преподо́бне, страсте́й,* и напои́лъ еси́ душепи́щныя кла́сы.

Благода́ть исцѣле́ній, Харито́не,* отъ благода́ти Боже́ственныя досто́йно прія́лъ еси́,* отсю́ду духо́въ тебѣ́ лука́выхъ низлага́ется пре́лесть,* и, неду́гъ неудо́ныхъ* тли́ отбѣ́гъ, преше́лъ еси́, преподо́бне,* источа́еши бо, я́ко во́ды,* благода́тныя твоя́ струи́,* отъ ни́хже напая́еми,* воспѣва́емъ па́мять твою́.

Сла́ва, гла́съ 5:

Преподо́бне о́тче, гла́съ ева́нгельскій Госпо́день услы́шавъ, мíръ оста́вилъ еси́, бога́тство и сла́ву въ ничто́же вмѣни́въ. Тѣ́мже всѣ́мъ вопія́лъ еси́: возлюби́те Бо́га, и обря́щете благода́ть вѣ́чную, ничто́же предпочти́те па́че любве́ Его́, да егда́ пріи́детъ во сла́вѣ Свое́й, обря́щете поко́й со всѣ́ми святы́ми. Его́же моли́твами, Христе́, сохрани́ и спаси́ ду́ши на́ша.

И ны́нѣ, богоро́диченъ:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую Предста́тельницу и прибѣ́жище ду́шъ на́шихъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3 и 6. Проки́менъ, гла́съ 7: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, [хвале́ніе Его́ въ це́ркви преподо́бныхъ]. Апо́столъ Кори́нѳяномъ, зача́ло 176. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 276 – 283.

/ Къ оглавленію раздѣла /


Наверхъ / Къ титульной страницѣ

0