Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 27-й де́нь.
Слу́жба преподо́бнаго отца́ на́шего Савва́тія, нача́льника пусты́ни Солове́цкаго монастыря́.

ВЕЧЕРЪ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 8. Подо́бенъ: Му́ченицы Твои́.

Преподо́бне о́тче Савва́тіе, любве́ ра́ди Христо́вы вся́, я́же на земли́, преоби́дѣлъ еси́, и въ пусты́ню всели́вся, по́стническими труды́ уясни́лъ еси́ житіе́ твое́. Тѣ́мъ Христо́съ чуде́съ дарми́ обогати́ тя: помина́й на́съ, чту́щихъ тя́. [Два́жды.]

Преподо́бенъ и че́стенъ свѣти́льникъ боже́ственный и свѣтоно́сный подъ спу́домъ жите́йскія толстоты́ никогда́же скрыва́ется, но на версѣ́ полага́етъ его́ высо́кихъ чуде́съ Человѣколю́бецъ. Того́ моли́твами, Христе́, да́руй лю́демъ Твои́мъ ве́лію ми́лость. [Два́жды.]

Преподо́бне о́тче Савва́тіе, ты́, отъ ю́ности Христу́ порабо́тився, кре́стъ всечестны́й на ра́мена твоя́ возложи́лъ еси́, и не возврати́лся еси́ вспя́ть, но бы́лъ еси́ упра́вленъ во Ца́рствіе Бо́га, вопло́щшагося во спасе́ніе ду́шъ на́шихъ. [Два́жды.]

Въ лодіи́ тѣле́снѣй пла́вая, преподо́бне Савва́тіе, кро́ткими дыха́ніи Кро́ткаго Ду́ха легко́ преше́лъ еси́ жите́йскую пучи́ну, му́дре, и на Би́серѣ многоцѣ́ннѣмъ твоя́ имѣ́нія прода́въ и обрѣ́тъ Его́, въ себѣ́ удержа́лъ еси́, блаже́нъ бы́въ боже́ственными Его́ сія́ніи. [Два́жды.]

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безпоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ, гла́съ то́йже: Кто́ Тебе́ не ублажи́тъ...
Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, свяще́нная главо́, преподо́бне о́тче на́шъ Савва́тіе, а́нгельскимъ лико́мъ собесѣ́дниче, на земли́ добродѣ́тельно пожи́лъ еси́, и прече́стно и нескве́рнено зерца́ло, Ду́хомъ Святы́мъ озаря́ешися, пребога́те, и озаря́емь, прови́дѣлъ еси́ бу́дущая. Тѣ́мже Христа́ моли́, пода́ти душа́мъ на́шимъ ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, свяще́нная главо́, преподо́бне о́тче Савва́тіе, по́стниковъ непоколеби́мый сто́лпе, и страсте́й посѣка́я коре́нія, и де́моновъ погубля́я стремле́нія, кре́стнымъ всеору́жіемъ вся́ кознодѣ́йствія отгоня́я, и по преставле́ніи твое́мъ жи́въ, Святѣ́й Тро́ицѣ предстои́ши, за ны́ моля́ся, дарова́ти душа́мъ на́шимъ ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, свяще́нная главо́, преблаже́нне о́тче Савва́тіе, моли́твою враги́ устраша́я, неи́стовыя на святы́ню суду́ Бо́жію предае́ши, и приходя́щимъ съ вѣ́рою стра́сти и неду́ги отгоня́еши, и слукíя исправля́еши, и де́моны отъ человѣ́къ прогоня́еши, моли́твою же и свяще́нныя воды́ окропле́ніемъ мно́гимъ исцѣле́нія подава́я, Христа́ моля́, дарова́ти душа́мъ на́шимъ ве́лію ми́лость.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію я́ко мо́щно возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ, зерца́ломъ разрѣ́шшимся, о́тче на́шъ Савва́тіе, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ, по гла́су.

Тропа́рь преподо́бнаго, гла́съ 3:

Удали́вся мíра и водвори́вся въ пусты́ни, до́брымъ по́двигомъ подвиза́лся еси́, злострада́ніемъ, и внима́ніемъ, и моли́твами, отону́дуже и по сме́рти источа́еши исцѣле́нія, Савва́тіе, о́тче на́шъ, моли́ Христа́ Бо́га, спасти́ся душа́мъ на́шимъ.

Сла́ва, и ны́нѣ, богоро́диченъ:



НА УТРЕНИ,
По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Житіе́ на земли́ благоче́стно сконча́въ, чи́сто селе́ніе Свята́го Ду́ха яви́лся еси́, просвѣща́я вѣ́рою приходя́щія къ честно́му гро́бу твоему́, блаже́нне. Тѣ́мже моли́ Влады́ку Христа́ Бо́га просвѣти́ти ду́ши на́ша, пра́зднующихъ всечестну́ю па́мять твою́, Савва́тіе богому́дре, о́тче на́шъ. [Два́жды.]

Сла́ва, и ны́нѣ, богоро́диченъ:

Всѣ́хъ Творца́ и Влады́ку, Бо́га же и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ Твои́хъ заче́нши, нетлѣ́нно родила́ еси́, Его́же сла́вяще, Тя́ велича́емъ, Дѣ́во, я́ко пала́ту всѣ́хъ Царя́ и мíра защище́ніе.

По 2-мъ стихосло́віи сѣда́ленъ, гла́съ 5. Подо́бенъ: Собезнача́льное Сло́во.

По́стника Госпо́дня пѣ́сньми почти́мъ, умертви́вшаго вся́ прило́ги страсте́й воздержа́ніемъ тве́рдымъ, и крѣ́пкимъ терпѣ́ніемъ вои́стину, и посрами́вша зѣло́ проти́внаго всю́ горды́ню, и ны́нѣ моля́щася Го́споду, поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ Рождества́ въ Тебѣ́ позна́ся, Чи́стая Приснодѣ́во, ужаса́етъ мо́й у́мъ и удивля́етъ по́мыслъ; сла́ва Твоя́, Богоро́дице, всѣ́мъ простре́ся, во спасе́ніе ду́шъ на́шихъ.

По поліеле́и сѣда́ленъ, гла́съ 8:

Егда́ къ боже́ственному жела́нію у́мъ тво́й впери́въ, тогда́ оста́вилъ еси́ до́лу влеку́щее мудрова́ніе и въ пусты́ню всели́лся еси́, въ морскíй о́стровъ, идѣ́же процвѣ́лъ еси́, я́ко кри́нъ, добродѣ́тельми прекра́сный, страсте́й искорени́въ те́рніе, и въ не́мъ всади́лъ еси́ плоды́ трудо́въ твои́хъ. Тѣ́мже и пожа́лъ еси́ снопы́, неотъе́млемое бога́тство на небесѣ́хъ, Савва́тіе преподо́бне, моли́ Христа́ Бо́га согрѣше́ній оставле́ніе пода́ти, честву́ющимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Вопло́щшееся Сло́во изъ утро́бы Твоея́ ро́ждши, Пресвята́я, мене́ же, растлѣ́ннаго грѣхи́ отъ прило́гъ лука́ваго, укрѣпи́, Ма́ти Бо́жія, и се́рдце мое́ очи́сти, Богоблагода́тная, Ма́терними Твои́ми моли́твами, да и а́зъ благода́рно зову́ Ти: Марíе Богоро́дице, моли́ Сы́на Твоего́ и Бо́га на́шего поми́ловати ста́до Твое́, е́же стяжа́ла еси́, Всенепоро́чная.

Та́же степе́нна, антифо́нъ 1-й 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми? Вся́кое дыха́ніе...] Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Иже на земли́ а́нгела и на небеси́ человѣ́ка Бо́жія, мѵ́ра благово́ніе, пи́щу благи́хъ добродѣ́телей, по́стниковъ похвалу́, Савва́тія почти́мъ: насажде́нъ бо въ дому́ Госпо́дни, и процвѣте́ пра́ведно, я́ко ке́дръ въ пусты́ни, умно́живъ ста́до Христо́во слове́сныхъ ове́цъ въ преподо́біи и пра́вдѣ.

Кано́нъ Богоро́дицы на 6 и преподо́бнаго Савва́тія на 8.

[Кано́нъ преподо́бнаго,] гла́съ 2.
Пѣ́снь 1.

Ирмо́съ: Гряди́те лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Просвѣще́ніемъ Трисо́лнечнаго Божества́ озари́вся, преподо́бне, свѣти́льникъ сія́я яви́лся еси́, просвѣща́я вѣ́рно свѣтоно́сную твою́ па́мять чту́щія.

Со́вѣсть имѣ́лъ еси́ бла́гу и о́ко серде́чное взира́ющее къ Бо́гу, тѣ́мже и Христо́съ вня́тъ моли́твѣ твое́й, му́дре, и съ преподо́бными сочта́ тя.

Ве́сь Тро́ицы бы́лъ еси́ жили́ще и та́мо душе́вное возложи́лъ еси́ жела́ніе, преподо́бне, сего́ ра́ди вѣ́чную па́мять воспрія́лъ еси́ и жи́знь неконча́емую.

Богоро́диченъ: Пло́тію ро́ждши Безпло́тнаго, Богоро́дице Чи́стая, стра́сти лю́тыя утоли́ ума́ моего́, Дѣ́во, и испра́ви мя́, Ма́ти Бо́жія, заблу́ждшаго, я́ко да сла́влю Тя́.

Катава́сія: Отве́рзу уста́ моя́...

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Напо́лнивъ се́рдце твое́ сле́зными пото́ки, преподо́бне Савва́тіе, плоды́ вся́кихъ добродѣ́телей износя́щее, чуде́съ показа́ніемъ, преблаже́нне.

Высото́ю смире́нія украша́емый, преподо́бне, низве́рглъ еси́ на зе́млю велехва́льнаго, Савва́тіе, о́тче преблаже́нне, изря́дными дѣ́лы твои́ми, посто́мъ и моли́твами.

Исцѣле́нія безчи́сленная источа́етъ гро́бъ тво́й, преблаже́нне о́тче, и отго́нитъ болѣ́зни человѣ́ческія, и душе́вныя врачу́етъ стра́сти, похваля́ющихъ труды́ твоя́, всече́стне.

Богоро́диченъ: Изъ ложе́снъ Твои́хъ возсія́ пресла́вно Вели́кое Со́лнце — Христо́съ Бо́гъ, Богоро́дице Дѣ́во, вся́ земны́я концы́ просвѣти́въ, и преподо́бныхъ ли́къ че́стно прія́тъ.

Сѣда́ленъ, гла́съ 4:

Жите́йское мо́ре воздержа́ніемъ безъ труда́ преплы́въ, ко приста́нищу ти́хому безстра́стія, ра́дуяся, приста́лъ еси́, преподо́бне о́тче Савва́тіе, богому́дре и преблаже́нне. [Два́жды.]

Сла́ва, и ны́нѣ, богоро́диченъ:

Дѣ́вство и рождество́, вы́ше естества́, въ Тебѣ́, Богоро́дице, совокупи́ся, я́ко всѣ́хъ Содѣ́теля и Бо́га воплоти́вшагося породила́ еси́, Спа́са ду́шъ на́шихъ.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя, человѣ́ка. Тѣ́мъ зову́ Ти: сла́ва си́лѣ Твое́й, Го́споди.

Зе́млю до́льнюю премину́въ, небе́сную стяжа́лъ еси́ жи́знь, и со безпло́тными ли́ки смѣси́лся еси́, преподо́бне Савва́тіе, содѣ́лавъ ду́шу твою́ хра́мъ Ду́ха Свята́го, и кро́ткихъ зе́млю наслѣ́довалъ еси́.

Яко Христо́во смире́ніе возлюби́въ, преподо́бне Савва́тіе, стяжа́лъ еси́ безстра́стіе, смири́въ же всю́ де́монскую горды́ню, блаже́нне, низложи́въ, низве́рглъ еси́.

Возсія́, я́ко со́лнце отъ восто́ка, чуде́съ луча́ми и а́нгельскому житію́ поревнова́въ, непреста́нными моли́твами, преподо́бне, просвѣти́лъ еси́ всю́ подсо́лнечную.

Богоро́диченъ: Блажи́тъ Тя́, Пресвята́я Богоро́дице, вся́къ во́зрастъ и вся́ка душа́ вѣ́рныхъ, Бо́жіе бо Сло́во па́че ума́ и сло́ва родила́ еси́, Препѣ́тая.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Возсія́ тебѣ́ Госпо́дь отъ Дѣ́вы, Его́же возжелѣ́лъ еси́, преподо́бне Савва́тіе, жили́ще имѣ́ющу въ морско́мъ о́стровѣ любве́ ра́ди Его́, и ны́нѣ Того́ сла́вы наслажда́ешися непреста́нно.

Еди́ной Христо́вѣ любви́, преподо́бне Савва́тіе, приложи́вся и все́ю душе́ю потща́вся испо́лнитель Бо́жіихъ за́повѣдей бы́ти, и мно́гихъ чуде́съ, преподо́бне, прія́лъ еси́ благода́ть.

Незло́бивъ и кро́токъ бы́въ, вся́ зло́бы вра́жія погуби́лъ еси́, и ми́лостивъ до конца́ я́влься, ми́лость душе́вную стяжа́лъ еси́ отъ Еди́наго Бо́га, и благода́ть и ми́лость прія́лъ еси́ и́стинную.

Богоро́диченъ: Воспо́йте Го́сподеви, вся́ земля́, по́йте вси́ яви́вшемуся изъ чре́ва Дѣ́вы неизрече́нно и Сію́ вѣ́рнымъ показа́вшаго тве́рдую наде́жду и похвалу́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Си́лою Христо́вою укрѣпля́емь, преподо́бне Савва́тіе, вся́ кова́рствія лука́ваго низве́рглъ еси́, и ны́нѣ безстра́стія умо́мъ очище́ннымъ, предстои́ши Бо́гу Вседержи́телю, на Него́же все́ жела́ніе возложи́лъ еси́.

Твоя́, всеблаже́нне Савва́тіе, преподо́бныя мо́щи, во гро́бѣ лежа́ще, неду́ги врачу́ютъ, де́монскія же полки́ отгоня́ютъ всегда́, отъ души́ приходя́щихъ съ вѣ́рою.

Боже́ственныхъ повелѣ́ній, о́тче, нра́вы стяжа́въ, кро́тость, и безмо́лвіе, и смире́ніе, сего́ ра́ди отъ Благодѣ́теля Бо́га бога́тно дарова́ніе прія́лъ еси́, исцѣле́нія да́ръ тре́бующимъ да́руеши.

Богоро́диченъ: Душе́вныя моя́ стра́сти, Пречи́стая, исцѣли́, Яже безстра́стія бы́вши исто́чникъ, просвѣти́вшая преподо́бныхъ ли́ки Рождество́мъ Твои́мъ.

Конда́къ, гла́съ 2:

Жите́йскія молвы́ отбѣ́гъ, всели́лся еси́ въ морскíй о́стровъ, му́дре, и кре́стъ тво́й взе́мъ, Христу́ послѣ́довалъ еси́, въ моли́твахъ, и во бдѣ́ніихъ, и въ поще́ніихъ, злострада́ньми пло́ть твою́ изнуря́я: тѣ́мъ бы́лъ еси́ преподо́бныхъ удобре́ніе. Сего́ ра́ди любо́вію па́мять твою́ пра́зднуемъ, преподо́бне Савва́тіе, моли́ Христа́ Бо́га непреста́нно о всѣ́хъ на́съ.

Икосъ:

Ка́ко возмогу́ твоя́ премно́гая чудеса́, о́тче, изрещи́, или́ труды́ твоя́ и злострада́нія, и́миже потруди́лся еси́, преподо́бне Савва́тіе, а́ще не ты́, свя́те, пода́си ми́ сло́во, недосто́йному рабу́ твоему́? Ты́ бо еси́ мона́ховъ похвала́ и утвержде́ніе, съ ни́миже Христа́ Бо́га моли́ непреста́нно о всѣ́хъ на́съ.

Пѣ́снь 7.

Ирмо́съ: Образу злато́му, на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.

Всѣ́хъ теку́щихъ, привре́менныхъ страсте́й, преподо́бне Савва́тіе, сподо́бился еси́ убѣжа́ти, всю́ наде́жду стяжа́въ къ Бо́гу, Его́же ра́ди дѣ́йствуеши, блаже́нне, пресла́вная чудеса́, поя́: отце́въ на́шихъ Бо́же, благослове́нъ еси́.

Ору́жіемъ моли́твъ твои́хъ лука́выя побѣди́въ полки́, съ небесе́ благода́ть прія́лъ еси́ цѣли́ти неду́ги и прогоня́ти де́моны отъ взыва́ющихъ вѣ́рою: благослове́нъ Бо́гъ отце́въ на́шихъ.

Пло́ть твою́ повину́въ ду́ху, о́тче преподо́бне Савва́тіе, въ воздержа́ніи вся́цѣмъ пожи́лъ еси́, въ трудѣ́хъ и бдѣ́ніихъ, прехва́льне, имѣ́я чи́сту со́вѣсть, житіе́ небе́сное, воспѣва́я: благослове́нъ Бо́гъ отце́въ на́шихъ.

Богоро́диченъ: Ору́жіе, Чи́стая Дѣ́во, храня́щее пре́жде врата́ Еде́мская, плещи́ всѣ́мъ дае́тъ, низложи́вшимъ по́стнически бори́теля врага́ и при́сно взыва́ющимъ: отце́въ на́шихъ Бо́же, благослове́нъ еси́.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Мы́слію очище́нною, преподо́бне Савва́тіе, къ Бо́гу приближа́яся и всѣ́мъ вся́къ бы́въ, да Христа́ приобря́щеши, моли́ спасти́ вся́ пою́щія тя́, преподо́бне о́тче.

Сле́зъ твои́хъ ка́пли погаси́ша о́гнь грѣхо́вный, рѣку́ же чуде́съ показа́лъ еси́ всѣ́мъ на́мъ, вся́кія стра́сти потопля́ющу, притека́ющихъ къ тебѣ́, о́тче прехва́льне.

Вѣ́ру и наде́жду неразори́му и любо́вь и́стинную имѣ́лъ еси́, о́тче, и боже́ственное прирадѣ́ніе, терпѣ́ніе бла́го и поуче́ніе духо́вныхъ слове́съ, смиренному́дріе и соверше́нное беззло́біе.

Богоро́диченъ: Спаси́ мя, Ма́ти Бо́жія, спасе́нія нача́ло мíра я́вльшися, избавля́ющи мя́ молвы́, и нечи́стыхъ страсте́й, и вся́кія проти́вныя ско́рби, да Тя́ сла́влю во вся́ вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щся отъ Дѣ́вы, на́мъ яви́ся, омраче́нная просвѣти́ти, собра́ти расточе́нная. Тѣ́мъ Всепѣ́тую Богоро́дицу велича́емъ.

Процвѣ́лъ еси́ въ по́двизѣхъ по́стническихъ, прехва́льне о́тче на́шъ Савва́тіе, я́ко шипо́къ благово́ненъ, и я́коже кри́нъ, объюха́лъ еси́ со́вѣсти вѣ́рныхъ добродѣ́тельми и чудесы́. Тѣ́мже, преподо́бне, отжени́ отъ на́съ стра́сти смердя́щія.

Отве́рзеся тебѣ́, о́тче, небе́сное Ца́рствіе, сконча́вшему до́брое тече́ніе, и ви́диши, я́же а́нгели ви́дятъ, и трудо́въ воздая́ніе тебѣ́ подае́тъ по́чести Христо́съ, честву́я тя́, Своего́ уго́дника. Тѣ́мже тя́, преподо́бне, ублажа́емъ.

Сле́зъ твои́хъ проли́тіемъ о́гнь грѣхо́вный погаси́лъ еси́, Бо́гу угоди́въ, Савва́тіе преподо́бне, сокруши́лъ еси́ де́моновъ ко́зни. Тѣ́мже, предстоя́ще ра́цѣ моще́й твои́хъ, вѣ́рно ублажа́емъ тя́, досточу́дне.

Богоро́диченъ: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ниже́ я́ростію Твое́ю обличи́ мене́: мо́литъ Тя́, Христе́, ро́ждшая Тя́ Дѣ́ва, и а́нгельстіи чи́ни, и преподо́бныхъ собо́ри.

Свѣти́ленъ:

Святы́ни хра́мъ бы́лъ еси́, блаже́нне, по боже́ственному прича́стію, ра́йскій граждани́нъ, въ не́мже напитава́ешися невозбра́нно дре́ва разу́мнаго и нетлѣ́нныя сла́вы, па́мять творя́, Савва́тіе, о́тче богому́дре, вѣ́рно хва́лящихъ тя́. [Два́жды.]

Сла́ва, и ны́нѣ, богоро́диченъ:

Ра́дуйся, вѣ́рныхъ похвало́; ра́дуйся, преподо́бныхъ утвержде́ніе; ра́дуйся, правосла́вныхъ сла́во; ра́дуйся, свѣ́тъ су́щихъ во тмѣ́; ра́дуйся, хра́ме пресвяты́й; ра́дуйся, Бо́жій раю́, кля́твы разрѣше́ніе, Благослове́нная Марíе.

На хвали́техъ стихи́ры на 4, гла́съ 5. Подо́бенъ: Преподо́бне о́тче.

Преподо́бне о́тче, богоно́се Савва́тіе, вельми́ подвиза́лся еси́ во вре́меннѣй жи́зни, пѣ́сньми, и посто́мъ, и моли́твами о́бразъ бы́въ твои́мъ ученико́мъ. И ны́нѣ лику́еши съ безпло́тными, Христа́ непреста́нно славосло́вя, отъ Бо́га Бо́га Сло́ва, Изба́вителя, прекло́ншаго главу́ на Крестѣ́ и изба́вльшаго ро́дъ человѣ́ческій отъ пре́лести. Того́ у́бо моли́, преподо́бне, дарова́ти на́мъ ми́ръ и ве́лію ми́лость.

Преподо́бне о́тче, богоно́се Савва́тіе, и́стинно сподо́бился еси́ блаже́нныя жи́зни, ю́же чистото́ю и поще́ніемъ обрѣ́лъ еси́, преста́вився бо отсю́ду, живе́ши и́стинную жи́знь, со а́нгелы Христа́ непреста́нно славосло́вя, изъ Дѣ́вы неизрече́нно пло́ть пріи́мшаго, испрове́ргшаго а́да и воскреси́вшаго ме́ртвыя отъ вѣ́ка. Того́ моли́, Тому́ помоли́ся, преподо́бне, дарова́ти вселе́ннѣй ми́ръ и ве́лію ми́лость.

Блаже́нна пречестна́я оби́тель твоя́, отче богому́дре, иму́щи въ себѣ́ честны́я твоя́ мо́щи, блаже́нне, я́же съ вѣ́рою приходя́щимъ подаю́тъ оби́льно исцѣле́нія; блаже́ни ученицы́ твои́, и́же такова́го отца́ ча́да нареко́шася. Преподо́бне Савва́тіе, моли́твенниче те́плый, моли́ся ко Го́споду о душа́хъ на́шихъ.

Ны́нѣ всесвяще́нное и непоро́чное тѣ́ло твое́, преподо́бне о́тче на́шъ Савва́тіе, лежа́що во оби́тели твое́й, въ не́йже мно́го труди́лся еси́, исцѣле́нія неоску́дно подае́тъ съ вѣ́рою приходя́щимъ. Тѣ́мже мо́лимъ тя́, о́тче блаже́нне: моли́твами твои́ми ко Го́споду душе́вное на́мъ и тѣле́сное здра́віе пода́ти испроси́, тя́ вѣ́рою блажа́щимъ.

Сла́ва, гла́съ 6:

Пріиди́те, вси́ мона́шествующіи, пріиди́те, празднолю́бцы и по́стниковъ сосло́віе, вѣ́рою соше́дшеся, и́стиннаго по́стника дне́сь почти́мъ, вопію́ще: ра́дуйся, ше́ствовавый по стопа́мъ Влады́ки Христа́ у́зкій пу́ть и безпристра́стное житіе́. Якоже дре́вле Авраа́мъ пра́ведный и отцы́ преподо́бніи, страннолю́біе притяжа́лъ еси́, та́коже пресели́вся отъ оте́чества твоего́ и всели́вся во о́стровѣ морско́мъ, и въ не́мъ тече́ніе по́двигъ твои́хъ сконча́лъ еси́. И ны́нѣ источа́ютъ исцѣле́нія честны́я твоя́ мо́щи, всѣ́мъ притека́ющимъ съ вѣ́рою и вопію́щимъ: о всеблаже́нне и преподо́бне, по́стниковъ похвало́ и собесѣ́дниче безпло́тныхъ, мона́ховъ наста́вниче! О на́съ Христу́ Бо́гу моли́ся, да всегда́ па́мять твою́ любо́вію пра́зднуемъ.

И ны́нѣ, богоро́диченъ. Славосло́віе вели́кое. Ча́съ 1-й, и отпу́стъ.



НА ЛИТУРГІИ,

[Блаже́нна отъ кано́на, пѣ́снь 3 и 6.] Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 270 об. – 276.

/ Къ оглавленію раздѣла /


Наверхъ / Къ титульной страницѣ

0