Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 25-й де́нь.
Преподо́бныя ма́тере на́шея Евфроси́ніи [Александрíйскія.

ВЕЧЕРЪ,
На Го́споди воззва́хъ:] стихи́ры окто́иха 3, и святы́я 3, гла́съ 5. Подо́бенъ: Преподо́бне о́тче.

Ма́ти преподо́бная, Евфроси́ніе досточу́дная, су́що весе́лія возжелѣ́вши, того́ хода́тайствующую ше́ствовала еси́ стезю́: бога́тство бо измѣни́ла еси́ нището́ю мно́гою, плотска́го обру́чника — Живу́щимъ во вѣ́ки, пи́щу тлѣ́ющую — воздержа́ніемъ, поко́й — болѣ́зньми, су́щими въ страда́льчествѣ, су́щую въ мíрѣ — премíрною жи́знію, ю́же и получи́ла еси́ съ му́дрыми дѣ́вами, соблю́дши свѣщу́ твою́ неуга́сну и черто́гу сподо́бившися, я́ко дѣ́ва, я́ко невѣ́ста Христо́ва всехва́льная.

Струя́ми сле́зъ напои́вши тво́й ра́зумъ, угобзи́ла еси́ поще́ніемъ добродѣ́тельныя плоды́ и, лоза́ я́коже краснѣ́йшая, произнесла́ еси́ гро́зды кра́сныя, честна́я, и́хже боже́ственнаго мста́ я́вѣ насы́щше чу́вства душе́вная, наслажда́емся и́стинно твои́мъ подо́біемъ и весели́мся боже́ственнымъ весе́ліемъ, пія́нство отрѣва́юще, е́же отъ грѣха́, вопію́ще ти́, всечестна́я: Христа́ моли́ всегда́ дарова́ти вселе́ннѣй единомы́сліе, ми́ръ и ве́лію ми́лость.

Видѣ́ніе стра́нное и естеству́ неудобопрія́тное, ка́ко утаи́лася еси́ Евина ста́раго запина́теля лю́таго кова́рства, средѣ́ муже́й все́льшися соверше́ннымъ ра́зумомъ? Ка́ко посредѣ́ огня́ прошла́ еси́, не опа́льшися? Ка́ко сокры́ла еси́ же́нскую не́мощь, укрѣпля́ема Боже́ственною си́лою, на́шу не́мощь Пріи́мшаго и Возсія́вшаго отъ Отрокови́цы Неискусобра́чныя? Его́же моли́, со а́нгелы лику́ющи, дарова́ти вселе́ннѣй единомы́сліе, ми́ръ и ве́лію ми́лость.

Сла́ва, гла́съ 2. Студи́тово:

Чи́стое чистоты́ твоея́ сокро́вище безъ поро́ка отъ муже́й сохрани́ла еси́, невѣ́ста Христо́ва бы́вши, Евфроси́ніе всеблаже́нная; тѣле́сную бо добро́ту по́стническими труды́ увяди́вши, ду́шу же украси́вши доброзра́чіемъ благода́ти, въ му́жествѣ бо же́нство я́вѣ укры́вши, утаи́лася еси́ веліа́ровыхъ ловле́ній, а́нгельски пожи́вши, но проси́ ми́ра любо́вію благохва́лящимъ тя́, я́ко весе́лія тезоимени́тая, богоблаже́нная.

И ны́нѣ: богоро́диченъ или́ крестобогоро́диченъ. Подо́бенъ: Егда́ отъ дре́ва.

Гро́здъ всезрѣ́лый, Чи́стая, Его́же невоздѣ́ланно во утро́бѣ младоноси́ла еси́, на Дре́вѣ я́ко узрѣ́ла еси́ Сего́ ви́сяща, рыда́ющи, восклица́ла еси́, взыва́ющи: Ча́до, сла́дость иска́пай, е́юже пія́нство вся́кое страсте́й отъе́млется, Благодѣ́телю, Мене́ ра́ди, Тебе́ ро́ждшія, боже́ственными утѣше́ньми, я́ко Благоутро́бенъ.

На стихо́внѣ окто́иха. Сла́ва, гла́съ 6:

Пріиди́те, любодѣ́вственніи вси́ и чистоты́ рачи́теліе, пріиди́те, мона́шеская чета́ и преподо́бныхъ же́нъ ли́къ, вси́ согла́сно вѣ́рою воспои́мъ Евфроси́нію преблаже́нную: ра́дуйся, я́же въ же́нстѣмъ тѣ́лѣ му́жески до́блествовавши; ра́дуйся, цѣлому́дріемъ врага́ посрами́вши и Христа́ возлюби́вши; ра́дуйся, ка́мене честны́й, весе́лія тезоимени́тая. Но, о ма́ти преподо́бная, моля́щи не преста́й о чту́щихъ па́мять твою́.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Агнца Своего́* Агница нескве́рная дре́вле* и непоро́чная Влады́чица* на Кре́стъ воздвиза́ема я́ко ви́дѣ,* Ма́терски восклица́ше* и, удивля́ющися, вопія́ше:* что́ видѣ́ніе сіе́, Ча́до сла́дкое,* но́вое и пресла́вное?* Ка́ко лю́діе неблагода́тніи* суди́щу Пила́тову предаю́тъ Тя́* и осужда́ютъ сме́ртію Живота́ всѣ́хъ?* Но пою́ Твое́ неизрече́нное, Сло́ве, схожде́ніе.

Тропа́рь, гла́съ 8:

Въ тебѣ́, ма́ти, извѣ́стно спасе́ся, е́же по о́бразу: пріи́мши бо кре́стъ, послѣ́довала еси́ Христу́, и, дѣ́ющи, учи́ла еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бная Евфроси́ніе, ду́хъ тво́й.


НА УТРЕНИ,
Оба кано́на окто́иха. И святы́я на 4, его́же краегране́сіе: Пѣ́сньми тя́ пою́, подо́бную весе́лія. Іо́сифъ. Гла́съ 5.

Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Пѣ́сньми богокра́сными пою́щаго дне́сь святу́ю твою́ па́мять и и́стинно достохва́льную, свѣ́томъ мя́ озари́ моли́твъ твои́хъ, всечестна́я, весе́лія боже́ственнаго тезоимени́тая.

Еди́ну Боже́ственную добро́ту Христо́ву возлюби́вши и Того́ распа́льшися невеще́ственными красота́ми, добро́тою тѣле́сною возгнуша́лася еси́, сла́вная, видѣ́ніи Боже́ственными упражня́ющися.

Невѣ́ста, укра́шеная добродѣ́телей красота́ми, обручи́лася еси́ и́стинно кра́сному добро́тою Христу́, оста́вивши привре́меннаго, Евфроси́ніе, обру́чника и житія́ всю́ красоту́.

Богоро́диченъ: Все́ Пожела́ніе, и Сла́дость, и Жи́знь изъ Тебе́ Возсія́вый премно́жествомъ бла́гости, Дѣ́во Всенепоро́чная, Его́же моли́ спасти́ непреста́нно Тя́ блажа́щія.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Вели́кія претерпѣ́вши по́двиги, вра́жія низложи́ла еси́ ухищре́нія, побѣди́ла еси́ де́монскія прило́ги, а́нгеломъ уподо́билася еси́, безсме́ртію поучи́вшися, ма́ти, въ ме́ртвеннѣмъ твое́мъ тѣлеси́.

Весели́тъ мона́шествующихъ сердца́, житіе́ твое́, утвержде́ніе су́ще и наказа́ніе ко спаси́тельнымъ за́повѣдемъ и къ стезя́мъ нетлѣ́нія, къ любви́ кра́йнѣйшему предѣ́лу, Евфроси́ніе, Созда́вшаго.

Просвѣща́етъ вѣ́рныхъ боже́ственная собра́нія свѣ́тлая твоя́ па́мять и достосла́вная, услажда́етъ преподо́бныхъ ли́ки, а́нгелы весели́тъ, съ ни́миже водворя́ешися, я́ко равноа́нгельному житію́, Евфроси́ніе, ревнова́вши.

Богоро́диченъ: Страсте́й мя́ лю́тое обурева́етъ волне́ніе, лука́выхъ духо́въ глубина́ одержи́тъ мя́, грѣхо́вный ви́хоръ коле́блетъ мое́ се́рдце: Богороди́тельнице, Ты́ мя́ утверди́, чи́стѣ Тя́ восхваля́юща.

Сѣда́ленъ, гла́съ 5. Подо́бенъ: Собезнача́льное Сло́во.

Же́нскую сла́бость укрѣпи́вши небе́сными наде́ждами, посредѣ́ всели́лася еси́, несомнѣ́нною мы́слію, муже́й, богодохнове́нная, Евина льсти́теля покори́вши твои́мъ говѣ́ніемъ, о Евфроси́ніе, во бдѣ́ніихъ и поуче́ніихъ, тѣ́мъ вѣ́рою тя́ блажи́мъ.

Сла́ва, и ны́нѣ, богоро́диченъ:

Тя́ приста́нище, и стѣ́ну, и прибѣ́жище, и наде́жду, и покро́въ, и предста́тельницу те́плу обрѣ́тше, вѣ́рніи, къ Тебѣ́ прибѣга́емъ и вопіе́мъ прилѣ́жно, и взыва́емъ вѣ́рно: поми́луй, Богоро́дице, на Тя́ упова́ющія и отъ прегрѣше́ній изба́ви.

Крестобогоро́диченъ:

На Крестѣ́ Тя зря́щи, Христе́, Ма́ти Твоя́, во́льно среди́ разбо́йниковъ повѣ́шена, терза́ющи Ма́терски утро́бу, глаго́лаше: безгрѣ́шне Сы́не, ка́ко непра́ведно, я́ко злодѣ́й, на Крестѣ́ повѣ́сился еси́, ро́дъ человѣ́чь оживи́ти хотя́, я́ко Преблагíй?

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Отцу́ тя́ Небе́сному вне́млющую, ду́шъ Невѣстово́дцу, о́тча любо́вь не возбрани́, ниже́ привре́меннаго жениха́, ше́ствовати пу́ть спаси́тельный.

Яко фи́никсъ, богому́дренно процвѣла́ еси́ пра́вды сла́дость и, я́ко ке́дръ, при вода́хъ воздержа́нія, богому́драя, плоды́ добродѣ́тельныя умно́жила еси́.

Огне́мъ воздержа́нія испепели́ла еси́ хвра́стныя сла́сти и, разгорѣ́вшися у́глемъ Госпо́дни любве́, чуде́съ лучи́ возсія́ла еси́.

Растерза́нъ ви́дится и лежа́щь предъ кра́сными твои́ми нога́ми пре́жде Евинъ ра́тникъ, изъ Дѣ́вы Ро́ждшагося си́лою, Евфроси́ніе, и благода́тію.

Богоро́диченъ: Уще́дри, Ще́драя су́щи, преокая́нную мою́ ду́шу, Богороди́тельнице Всенепоро́чная, отъ страсте́й грѣха́ лю́тѣ омрачи́вшуюся и стеню́щу.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Заре́ю боже́ственныхъ дѣя́ній, я́ко ка́мень смара́гдъ, чи́стая, ви́дѣна была́ еси́ посредѣ́ муже́й, му́жеская боре́нія показу́ющи и веселя́щи Го́спода.

Точа́щи сле́зы, я́ко арома́ты, облагово́нилася еси́, возвели́чилася еси́, я́ко мѵ́ро многоцѣ́нное, и Бо́гу принесла́ся еси́ дѣ́ва нерастлѣ́нна.

Все́ твое́ жела́ніе Бо́гу принесла́ еси́, Того́ жела́ющи, Того́ и́щущи, Того́ послѣ́дствующи законоположе́нію, дѣ́во, спаси́тельному.

Богоро́диченъ: Мла́да родила́ еси́, я́ко Младе́нца, Чи́стая, пре́жде вѣ́къ изъ Отца́ Безнача́льна безлѣ́тно Возсія́вшаго, Его́же о мíрѣ моли́, Богоневѣ́сто.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Яко чиста́ и непоро́чна, я́ко красна́, я́ко предобра́, Жениху́ Сло́ву ты́ уневѣ́стилася еси́, во вѣ́ки соблюда́ющему тя́ нетлѣ́нну.

Стена́ньми и слеза́ми взыску́ющи Содѣ́теля, Онаго видѣ́нія сподо́билася еси́, я́ко избра́нная со избра́нными, досточу́дная.

Воздержа́нія о́бразъ, цѣлому́дрія одушевле́нное подо́біе вѣ́рнымъ яви́лася еси́, благохва́лящимъ твою́ свяще́нную, о Евфроси́ніе, па́мять.

Богоро́диченъ: Па́че ума́, Безлѣ́тнаго, па́че сло́ва, Созда́теля, Всечи́стая, родила́ еси́, избавля́ющаго вся́кія тли́ Богоро́дицу пою́щія Тя́.

Конда́къ, гла́съ 2. Подо́бенъ: Вы́шнихъ ища́.

Вы́шнюю жи́знь возжелѣ́вши получи́ти, до́льнюю сла́дость тща́тельно оста́вила еси́ и саму́ю себе́ смѣси́ла еси́ посредѣ́ муже́й, краснѣ́йшая, Христа́ бо ра́ди, Жениха́ твоего́, о обру́чницѣ привре́менномъ небрегла́ еси́.

Икосъ:

Въ весе́ліи и ра́дости души́ возвесели́вше, воста́немъ тща́тельно услы́шати сло́во пресла́вное: прехо́дитъ бо у́мъ вся́къ повѣ́даніе сіе́ и удивля́етъ, я́ко жена́, посредѣ́ муже́й пребыва́ющи, побѣди́ веліа́ра, и о́гнь попра́ сласте́й, и не опали́ся отню́дъ: Христа́ бо вожделѣ́вши, нескве́рная, обру́чника привре́меннаго небрегла́ е́сть.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Свѣ́тъ тебѣ́ возсія́, Того́ сопру́зѣ, Евфроси́ніе сла́вная, пра́вый бо имѣ́ла еси́ ра́зумъ, пѣснопою́щи: Бо́же, благослове́нъ еси́.

Же́злъ, укрѣпля́ющь тя́, Кре́стъ иму́щи, де́монская зія́нія прешла́ еси́ невре́дна, преподо́бная, пѣснопою́щи: Бо́же, благослове́нъ еси́.

До́мъ се́рдце твое́ Свята́го Ду́ха, преподо́бная, соверши́ла еси́, тя́ укрѣ́пльшаго и показа́вшаго духо́въ лука́выхъ си́льнѣйшу.

Богоро́диченъ: Тѣ́ломъ обложе́ннаго Бо́га Безтѣле́снаго, Всенепоро́чная, родила́ еси́, на́съ избавля́ющаго, стра́хомъ пѣснопою́щія: Бо́же, благослове́нъ еси́.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Ти́ну страсте́й оттрясла́ еси́, отрокови́це, а́нгеловъ невеще́ственному житію́ поревнова́вши, съ ни́миже и воспѣва́еши: Го́спода по́йте и превозноси́те во вся́ вѣ́ки.

Дае́тъ тебѣ́ жи́знь жи́зни Храни́тель, Того́ бо стопа́мъ послѣ́довала еси́, Того́ добро́ты вожделѣ́вши Боже́ственныя, съ Ни́мже и весели́шися во вся́ вѣ́ки.

Вознесла́ся еси́ ко оби́телемъ присножи́тельнымъ и́стинно, жела́ніе получи́вши, его́же возлюби́ла еси́, Дре́ва, дѣ́во, жи́зни наслажда́ющися и превознося́щи Христа́ во вѣ́ки.

Богоро́диченъ: Вся́ избра́нна, укра́шена вся́, Бо́гъ Юже возлюби́, Юже избра́, яви́лася еси́, Дѣ́во Препросла́вленная, при́сно: тѣ́мъ Тя́ пое́мъ всегда́, я́ко Богоро́дицу.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Свяще́нное торжество́ мона́шествующихъ собо́ръ хва́литъ, па́мять твою́ соверша́я богосвѣ́тлую, ли́къ ра́дуется мона́хинь, яви́ся бо чи́стая всѣ́хъ свѣ́тлость, Евфроси́ніе досточу́дная.

Яко че́стно возложе́ніе небе́снаго была́ еси́ хра́ма, я́ко кри́нъ, во дво́рѣхъ процвѣла́ еси́ Бо́жіихъ, я́ко шипо́къ сладково́нный, принесла́ся еси́ Всецарю́, я́ко честно́е мѵ́ро, Евфроси́ніе всеблаже́нная.

Тебе́ саму́ю просвѣти́ла еси́ добродѣ́телей твои́хъ украше́ніемъ свѣ́тлымъ, и привела́ся еси́ къ мы́сленному черто́гу, чи́стая, и ны́нѣ недомы́сленную смотря́еши добро́ту Христо́ву, и обоже́ніе пріе́млеши соверше́ннѣйшее.

Свята́я твоя́ па́мять освяща́етъ дне́сь вѣ́рныя, точа́щи просвѣще́ніе и святы́ню, въ не́йже тя́ мо́лимъ, я́ко избра́нную невѣ́сту Христо́ву: спаси́ моли́твами твои́ми, Евфроси́ніе, на́съ всегда́.

Богоро́диченъ: Свѣ́томъ лица́ Твоего́ во тмѣ́ лежа́щаго страсте́й озари́, Свѣ́та две́ре мы́сленная, да не но́щь пости́гнетъ мя́ сме́ртная, Влады́чице Чи́стая, спасе́нія моего́ неча́яніе отсѣка́ющи.

Свѣти́ленъ. Подо́бенъ: Ду́хомъ во святи́лищи.

Кня́зя утаи́вшися студа́, и сего́ въ любому́дромъ о́бразѣ показа́ла еси́ безу́мна, дѣ́ва су́щи душе́ю и тѣ́ломъ, была́ еси́ му́жъ ра́зумомъ и вѣ́рою, Евфроси́ніе преподо́бная, дѣ́вственниковъ добро́та и мона́хинь красота́.

Сла́ва, и ны́нѣ, богоро́диченъ:

Де́нь мнѣ́ возсія́й у́мнаго весе́лія, Ты́ бо еси́, Чи́стая, свѣ́тъ и жи́знь су́щимъ во тмѣ́: хотѣ́нію бо мощна́ еси́ и е́же твори́ти и́маши, я́ко су́щи всѣ́хъ Влады́чица, изба́ви вся́ отъ бѣ́дъ, и скорбе́й, и собла́знъ чужда́го.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 236 – 240.

/ Къ оглавленію раздѣла /


Наверхъ / Къ титульной страницѣ

0