Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 24-й де́нь.
Слу́жба преподо́бному отцу́ на́шему Ника́ндру пустынножи́телю, Пско́вскому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры, гла́съ 1. Подо́бенъ: Прехва́льніи му́ченицы.

Блаже́нне о́тче Ника́ндре,* ты́ тяготу́ дневну́ю поне́слъ еси́,* въ пусты́ню всели́вся* и полки́ бѣсо́вскія разгна́въ* благода́тію Свята́го Ду́ха,* и ны́нѣ со святы́ми сла́вы Бо́жія наслажда́ешися,* Ему́же моли́ся,* низпосла́тися на́мъ, чту́щимъ тя́,* ми́ру и ве́ліей ми́лости.

Преподо́бне о́тче Ника́ндре,* тя́ устраши́шася бѣ́сове* и отъ человѣ́къ отгна́ни бы́ша* моли́твами твои́ми, всебога́те,* и притека́ющимъ съ вѣ́рою* здра́віе незави́стно всѣ́мъ подае́ши,* Христо́ви моля́ся* умири́ти мíръ и спасти́ на́съ,* пра́зднующихъ святу́ю твою́ па́мять.

Сла́ва, гла́съ 2:

Пріиди́те, празднолю́бныхъ собо́ри, ра́достно похва́лимъ похвалу́ спасе́нія на́шего, Ника́ндра всеблаже́ннаго, я́ко, въ тѣ́лѣ сы́й, безпло́тнаго врага́ побѣди́ и, со земны́ми живы́й, небе́сныя благода́ти сподо́бися, бу́дущее сказу́я, я́ко настоя́щее, зане́ просвѣти́лъ е́сть душе́вная очеса́ у́мнымъ боговидѣ́ніемъ. Сего́ ра́ди, соше́дшеся, любе́зно возопіе́мъ ему́, глаго́люще: ра́дуйся, преподо́бне о́тче на́шъ, рачи́телю безмо́лвія, пусты́нный жи́телю, терпѣ́нія бе́здна, сто́лпъ крѣ́пости, прилѣ́жно мо́лимъ тя́ низпосла́ти на́мъ твои́ми моли́твами грѣхо́въ очище́ніе и ве́лію ми́лость.

И ны́нѣ, богоро́диченъ, гла́съ то́йже:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Ду́ху Пресвято́му* себе́ предугото́вавъ,* преподо́бне Ника́ндре,* и во Христа́ вѣ́рою утверди́вся,* помози́ и на́мъ проти́ву ко́зней діа́вольскихъ.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ, идѣ́же е́сть ра́ка* преподо́бнаго Ника́ндра,* вѣ́рнымъ всѣ́мъ спасе́ніе* и отъ неду́гъ исцѣле́ніе быва́етъ* вѣ́рою приходя́щимъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

До́мъ себѣ́ отъ пусты́ни* посто́мъ и моли́твою* на небесѣ́хъ притяжа́лъ еси́,* преподо́бне Ника́ндре, о́тче на́шъ,* сего́ ра́ди мо́лимъ тя́,* да обря́щемъ ми́лость въ де́нь су́дный.

Сла́ва, гла́съ 8:

Добродѣ́тельнаго житія́ твоего́ плоды́, преподо́бне, кто́ изчи́слити возмо́жетъ отъ земноро́дныхъ? Отъ ю́ности бо Христо́ви послѣ́довавъ и въ за́повѣдехъ Его́ ходя́ де́нь и но́щь, посто́мъ и моли́твою, кро́тостію и незло́біемъ, въ чи́стѣй со́вѣсти Тому́ порабо́талъ еси́, и ны́нѣ трудо́мъ твои́мъ воздая́ніе отъ руки́ Вседержи́теля бога́тно воспрія́лъ еси́. Сего́ ра́ди мо́лимъ тя́, всеблаже́нне Ника́ндре, о́тче на́шъ, моли́ спасти́ся душа́мъ на́шимъ.

И ны́нѣ, богоро́диченъ по гла́су:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

[Тропа́рь пи́санъ на вели́цѣй вече́рни.]



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ. На Го́споди воззва́хъ:] стихи́ры на 8, гла́съ 6. Подо́бенъ: Всю́ отложи́вше.

Все́ отве́рглъ еси́ мірско́е пристра́стіе* и, пло́ть свою́ преоби́дѣвъ,* Христа́ Еди́наго возлюби́лъ еси́,* Ему́же и послѣ́довавъ,* въ пусты́ню всели́лся еси́, преподо́бне,* идѣ́же мно́га лѣ́та трудолю́бнѣ подвиза́яся,* неосла́бно да́же до сме́рти* поревнова́лъ еси́ житію́ святы́хъ оте́цъ,* съ ни́миже ны́нѣ лику́еши на небесѣ́хъ,* предстоя́ Христо́ви въ неизглаго́ланнѣй ра́дости,* Его́же со дерзнове́ніемъ моли́* о душа́хъ на́шихъ. [Два́жды.]

Все́ возложи́въ на небесѣ́хъ упова́ніе* и та́мо сокро́вище некра́домое себѣ́ сокры́въ,* земна́я вся́ расточи́лъ еси́,* до́мъ и сро́дство оста́вивъ,* легко́ поте́клъ еси́ вслѣ́дъ Христа́,* взыску́я жи́тельства вѣ́чнаго,* е́же и получи́лъ еси́,* и ны́нѣ, преблаже́нне Ника́ндре,* о чту́щихъ досто́йно па́мять твою́* со дерзнове́ніемъ моли́ся,* во е́же спасти́ся на́мъ. [Два́жды.]

Все́ жела́ніе устреми́въ къ Бо́гу,* пусты́ню дости́глъ еси́, преподо́бне,* и, въ не́й водвори́вся ра́достно,* со звѣрьми́ бра́лся еси́ и де́моны,* и́хже и побѣди́лъ еси́ му́жественно,* я́ко Христо́съ укрѣпи́ тя* и сла́вна показа́ чудотво́рца,* Ника́ндре пребога́те.* Тѣ́мже па́мять твою́ любо́вію пра́зднуемъ* и вѣ́рно мо́лимся:* моли́ о душа́хъ на́шихъ. [Два́жды.]

Все́ претерпѣ́лъ еси́ плотско́е озлобле́ніе* отъ лета́ющихъ живо́тныхъ* и не пощадѣ́лъ еси́ своея́ кро́ве,* въ пусты́ни живы́й, всеблаже́нне,* ра́ны подъя́лъ еси́ отъ злонра́вныхъ,* вопія́ о ни́хъ ко Го́споду:* не поста́ви и́мъ грѣха́ сего́;* и, всего́ себе́ истощи́въ,* преподо́бне Ника́ндре,* подража́лъ еси́ Христу́ Бо́гу на́шему,* Его́же со дерзнове́ніемъ моли́ о душа́хъ на́шихъ.

Сла́ва, гла́съ 5:

Стеце́мся ны́нѣ, о празднолю́бцы, псалмы́ и пѣ́сньми похва́лимъ преподо́бнаго и, веселя́щеся, воспои́мъ, глаго́люще: ра́дуйся, те́плый помо́щниче, Ника́ндре всеблаже́нне, пустынножи́телю, ра́дуйся, весе́ліе на́ше духо́вное и исцѣли́телю немощны́хъ чу́вствы, боля́щимъ гото́вое здра́віе, ны́нѣ же и на́съ, ча́дъ свои́хъ, пресвѣ́тло чту́щихъ па́мять твою́, не забу́ди, помина́я у престо́ла всѣ́хъ Царя́ и Бо́га, низпосла́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

Въ Чермнѣ́мъ мо́ри Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ.

Та́же вхо́дъ. Проки́менъ дне́. И чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 3:

Ны́нѣ наста́ де́нь свѣ́тлаго весе́лія, испо́лненъ торжества́ духо́внаго, я́ко Всецари́ца и Ма́ти Бо́жія благоизво́ли храни́ти и покрыва́ти во хра́мѣ Свое́мъ благода́тію Сы́на Своего́ и Бо́га гро́бъ уго́дника Своего́, отъ него́же сла́дкое благово́ніе дае́тся вѣ́рнымъ и струя́ незави́стна истека́етъ исцѣле́ній боля́щимъ. Тѣ́мже и мы́, ра́дующеся, зове́мъ: предвари́ изба́вити на́съ отъ вся́кихъ бѣ́дъ, преподо́бне Ника́ндре, о́тче на́шъ.

Весели́ся, пусты́ня непло́дствующая иногда́, ны́нѣ бо на́мъ пло́дъ ра́дости отъ тебе́ прозябе́, и воня́ благода́ти Бо́жія мѵроуха́етъ, ея́же наслажда́ющеся, Христа́ славосло́вимъ, Иже естество́ на́ше ми́лостивно призрѣ́, я́ко просла́ви прославля́ющаго Его́, преподо́бнаго отца́ на́шего Ника́ндра, сла́вою непристу́пнаго свѣ́та на небесѣ́хъ и на земли́ чуде́съ дѣ́йствомъ обогати́. Сего́ ра́ди и зове́мъ ему́ непреста́нно: моли́, мо́лимъ тя́, спасти́ся душа́мъ на́шимъ.

Пріиди́те, вси́ лю́діе, похва́лимъ похвалу́ спасе́нія на́шего, Ника́ндра преподо́бнаго, жи́теля пусты́ннаго и небе́снаго граждани́на, ему́же похваля́ему, весели́тся вѣ́рныхъ сосло́віе: се́й бо во́инъ яви́ся непобѣди́мь вои́стинну, му́жественно во́инствовавъ Царе́ви си́ламъ, ополча́яся посто́мъ и моли́твами и вся́кимъ духо́внымъ воздержа́ніемъ во вре́меннѣй жи́зни. И та́ко побѣди́ пресла́вно проти́вника, мы́сленнаго Амали́ка, и въ ра́дость Госпо́дню съ побѣ́днымъ вѣнце́мъ вни́де, пріе́мля за тру́дъ отъ руки́ Вседержи́теля воздая́ніе мно́го, Его́же и мо́литъ о душа́хъ на́шихъ.

Кто́ не воспое́тъ или́ кто́ не просла́витъ тя́, преподо́бне Ника́ндре, о́тче на́шъ, зря́ многоцѣле́бный гро́бъ тво́й, его́же окружа́ютъ неви́димо а́нгели и дѣ́йствуютъ о Бо́зѣ, моли́твами твои́ми, душа́мъ на́шимъ спасе́ніе и тѣлесе́мъ здра́віе? На земли́ бо ти́ еще́ жи́ву су́щу, стра́сти плотскíя до конца́ побѣди́лъ еси́. Удиви́шася по́двигу твоему́ небе́сніи чи́ни, ви́дѣвше тя́, во пло́ти су́ща, безпло́тныя враги́ побѣди́вша, пло́ть же и земна́я вся́ вмѣни́вша я́ко не су́ща. Сего́ ра́ди ны́нѣ небе́сная блага́я вся́ наслѣ́довалъ еси́ и со святы́ми всѣ́ми ра́дуешися во сла́вѣ Христа́ Бо́га на́шего, Ему́же прилѣ́жно помоли́ся, мо́лимся, и о на́съ, досто́йно чту́щихъ святу́ю па́мять твою́, во е́же спасти́ся душа́мъ на́шимъ.

Сла́ва, гла́съ 5:

Ра́дующеся ны́нѣ, мона́шеское достоя́ніе и все́ христоимени́тое мно́жество, де́нь преставле́нія отца́ на́шего свѣ́тло почти́мъ: дне́сь бо коне́цъ по́двига своего́ воспрія́тъ непобѣди́мый и ра́достно вни́де въ со́нмы пра́ведныхъ, съ ни́миже веселя́ся, Христо́ви предстои́тъ, одѣ́янъ во сла́ву вѣ́чныя ра́дости. Тѣ́мже и мы́, къ моще́мъ его́ припа́дающе, со слеза́ми возопіи́мъ: засту́пниче на́шъ, Ника́ндре всебога́те, непреста́нно моли́ся о на́съ, во е́же спасти́ся невре́днымъ отъ вся́каго зла́ вѣ́рою чту́щимъ всечестну́ю па́мять твою́, преподо́бне.

И ны́нѣ, богоро́диченъ, гла́съ то́йже:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, преподо́бне о́тче, Ника́ндре прему́дре, ты́ бо непобѣди́мь яви́лся еси́ ра́тникъ проти́ву бѣсо́вскаго ополче́нія, крѣ́пко бо препоя́сався въ живоно́сную ме́ртвость и кре́стное ору́жіе въ се́рдцы свое́мъ стяжа́въ, уби́лъ еси́ мы́сленнаго Копрони́ма мече́мъ вѣ́ры, и отъ пусты́ни, я́ко со́лнце, лучи́ испуща́еши, и озаря́еши сердца́ вѣ́рою чту́щихъ тя́, и отъ всѣ́хъ зо́лъ изыма́еши пресла́вно. Тѣ́мже лобыза́юще святу́ю твою́ ра́ку, любе́зно мо́лимъ, низпосла́тися моли́твами твои́ми, свя́те, мíрови спасе́нію и душа́мъ на́шимъ ве́ліей ми́лости.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, жела́телю вы́шнихъ, пусты́нный жи́телю, идѣ́же, трудолю́бно подвиза́вся, маловре́менное житіе́ до конца́ возненави́дѣлъ еси́ и до́лу влеку́щимъ отню́дь не порабо́талъ еси́, ревну́я отъ ю́ности житію́ Го́сподеви благоугоди́вшихъ и пу́ть непостоя́ннаго мо́ря добродѣ́тельно преплы́вшихъ, легко́ поне́слъ еси́ и́го Христо́во, тѣ́мъ и Свята́го Ду́ха прече́стенъ до́мъ показа́лся еси́. И ны́нѣ, преподо́бне Ника́ндре, свѣ́тло зря́ Святу́ю Тро́ицу, моли́ изба́вити на́съ отъ напа́стей вся́ческихъ и отъ вра́гъ ви́димыхъ и неви́димыхъ и душа́мъ на́шимъ да́ти ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, Ника́ндре пребога́те, побѣди́телю вра́жіихъ си́лъ, уго́дниче и дру́же Христо́въ и́скренній и моли́твенниче на́шъ непосты́дный, по́стникомъ похвала́ и утвержде́ніе, трудолю́бцемъ о́бразъ спасе́нный, пусты́нникомъ ти́хое и немяте́жное безмо́лвіе и всѣ́мъ пра́веднымъ весе́ліе, на́мъ же, грѣ́шнымъ, спасе́ніе, въ бѣда́хъ по́мощь и заступле́ніе, прибѣ́жище и покро́въ стра́ннымъ, здра́віе разли́чно боля́щимъ: тѣ́мъ моли́ся, мо́лимся, душа́мъ на́шимъ да́ти ми́ръ и ве́лію ми́лость.

Сла́ва, гла́съ 7:

Ра́дуются ны́нѣ собо́ри мона́шествующихъ въ пречестнѣ́мъ хра́мѣ Бо́жія Ма́тере, Тоя́ бо моли́твами и си́льнымъ поможе́ніемъ отца́ себѣ́ притяжа́хомъ, и ны́нѣ ко гро́бу его́ припаде́мъ, глаго́люще: преподо́бне о́тче на́шъ Ника́ндре, потщи́ся на́съ, ча́дъ свои́хъ, чи́сты предста́вити Го́сподеви, Его́же со Пресвято́ю Богоро́дицею вку́пѣ и со всѣ́ми святы́ми прилѣ́жно моли́, всеблаже́нне, Правосла́вному Импера́тору на́шему пода́ти здра́віе и всѣ́мъ вѣ́рнымъ спасе́ніе, очище́ніе грѣхо́въ и ве́лію ми́лость.

И ны́нѣ, богоро́диченъ, гла́съ то́йже:

Подъ кро́въ Тво́й, Влады́чице, вси́ земноро́дніи, прибѣга́юще, вопіе́мъ Ти́: Богоро́дице, упова́ніе на́ше, изба́ви ны́ отъ безмѣ́рныхъ прегрѣше́ній и спаси́ ду́ши на́ша.

На благослове́ніи хлѣ́бовъ: Тропа́рь преподо́бному, два́жды, и Богоро́дице Дѣ́во, ра́дуйся.., еди́ножды.
Аще нѣ́сть всено́щнаго бдѣ́нія, по трисвятѣ́мъ и по Отче на́шъ: Тропа́рь преподо́бнаго, еди́ножды. Сла́ва, и ны́нѣ, богоро́диченъ по гла́су.


Тропа́рь, гла́съ 4:

Гла́съ Боже́ственный, и́же во Ева́нгеліи, услы́шавъ, преподо́бне о́тче Ника́ндре, — пріиди́те ко Мнѣ́, вси́ тружда́ющіися и обремене́нніи, и Азъ упоко́ю вы́, — и пріе́мъ кре́стъ, послѣ́довалъ еси́ Христу́, мíръ оста́вль, въ пусты́ню всели́лся еси́, поще́ніемъ же и бдѣ́ніемъ небе́сный да́ръ воспріи́мъ, ду́ши неду́жныхъ, приходя́щихъ къ тебѣ́ съ вѣ́рою, исцѣля́еши, тѣ́мже и со а́нгелы сра́дуется, преподо́бне, ду́хъ тво́й.

Инъ тропа́рь, гла́съ 6:

Свѣти́ло незаходи́маго свѣ́та странѣ́ на́шей яви́лся еси́, богоблаже́нне, до́блественнѣ претерпѣ́въ вра́жія озлобле́нія, біе́ніе и ра́ны я́ко оде́жда нетлѣ́нія вмѣни́шася тебѣ́, со звѣрьми́ бо бра́вся и отъ человѣ́къ злы́хъ прободе́нія пріи́мъ, о тѣ́хъ моли́лся еси́: не поста́ви и́мъ грѣха́ сего́, глаго́ля. Тѣ́мже Влады́цѣ Христу́ уподо́бился еси́, достохва́льне Ника́ндре, о́тче на́шъ, моли́ся о душа́хъ на́шихъ.

Сла́ва, и ны́нѣ, богоро́диченъ:

Благослове́нную нарекíй Твою́ Ма́терь, прише́лъ еси́ на Стра́сть во́льным хотѣ́ніемъ, возсія́въ на Крестѣ́, взыска́ти хотя́ Ада́ма, глаго́ля а́нгеломъ: сра́дуйтеся Мнѣ́, я́ко обрѣ́теся поги́бшая дра́хма. Вся́ му́дре устро́ивый, Бо́же на́шъ, сла́ва Тебѣ́.

Аще въ пято́къ ве́чера: Сла́ва, и ны́нѣ, богоро́диченъ настоя́щаго гла́са.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ, гла́съ 4:

Гла́съ Госпо́день слы́шанъ тебѣ́ бы́сть, преподо́бне, въ пусты́ню зовы́й, въ не́йже и́стинный поко́й обрѣ́лъ еси́, посто́мъ, моли́твами и слеза́ми подвиза́яся де́нь и но́щь, житіе́мъ Варлаа́му и Се́ргію преподо́бнымъ уподо́бился еси́ пресла́вно и отту́ду де́монскія полки́ прогна́лъ еси́. Ны́нѣ же и гро́бъ тво́й источа́етъ исцѣле́ніе боля́щимъ, на́мъ же спасе́ніе подае́тъ и ве́лію ми́лость. [Два́жды.]

Сла́ва, и ны́нѣ, богоро́диченъ:

Упова́ніе и прибѣ́жище христіа́номъ, Богоро́дице Приснодѣ́во Марíе, не пре́зри упова́ющихъ на Тя́ рабо́въ Твои́хъ, тре́буемъ бо всегда́ Твоея́ по́мощи и заступле́нія, я́ко Ма́ти еси́ Зижди́теля всѣ́хъ, Христа́ Бо́га на́шего. Тѣ́мъ и велича́емъ Рождество́ Твое́, Пречи́стая, и вопіе́мъ: ра́дуйся, Дѣ́во Препросла́вленная; ра́дуйся, преподо́бныхъ похвало́; ра́дуйся, Богора́дованная Влады́чице; ра́дуйся, спасе́ніе душа́мъ на́шимъ и ве́лія ми́лость.

И чте́ніе отъ житія́ и чуде́съ преподо́бнаго отца́ на́шего Ника́ндра чудотво́рца.

По 2-й каѳи́смѣ сѣда́ленъ, гла́съ 1:

Вои́стинну пресла́вно житіе́ твое́, преподо́бне, и а́нгеломъ благоговѣ́йно, и́мже и подо́бникъ бы́лъ еси́, посто́мъ и моли́твами плотскíя огнепа́льныя стра́сти умертви́въ, и, ны́нѣ жи́въ, со живу́щими во странѣ́ живы́хъ ра́достно пое́ши Тро́ицу Единосу́щную. [Два́жды.]

Сла́ва, и ны́нѣ, богоро́диченъ:

Тя́, Пресвята́я Богоро́дице, а́нгели пою́тъ непреста́нно, я́ко Содѣ́теля тѣ́хъ и Бо́га на́шего, несказа́нно во чре́вѣ Твое́мъ заче́нши, родила́ еси́ неискусому́жно во спасе́ніе на́ше и избавле́ніе; Его́же и мо́лиши при́сно су́щимъ на земли́ здра́віе дарова́ти и мíру всему́ умире́ніе. Тѣ́мже и зове́мъ Ти́: ра́дуйся, всѣ́хъ родо́въ весе́ліе; ра́дуйся, Дѣ́во, христіа́нъ похвало́.

И па́ки чте́ніе отъ житія́ преподо́бнаго.

По поліеле́и сѣда́ленъ, гла́съ 8:

Ка́ко тя́ ублажи́мъ, преподо́бне, или́ ко́има устна́ма просла́вимъ твою́ досточу́дную па́мять? Ангела тя́ въ лѣ́поту нарица́емъ земна́го и небе́снаго человѣ́ка, еще́ бо ти́ во пло́ти су́щу, гла́са Бо́жія сподо́бился еси́ слы́шати и явле́ніе преподо́бнаго Алекса́ндра, Сви́рскаго чудотво́рца, ви́дѣти, къ по́двигу на неви́димыя си́лы укрѣпля́юща тя́, и́хже, подвиза́яся, побѣди́лъ еси́ и отъ человѣ́къ отгоня́еши при́сно. Сего́ ра́ди зове́мъ: ра́дуйся, богоблаже́нне Ника́ндре, о́тче на́шъ. [Два́жды.]

Сла́ва, и ны́нѣ, богоро́диченъ:

Дѣ́во Пренепоро́чная и Неискусому́жная Марíе, при́зри и посѣти́ рабо́въ Твои́хъ, вѣ́рно пою́щихъ и хва́лящихъ Тя́ во хра́мѣ Твое́мъ, Препѣ́тая: ра́дуйся, Богоблагода́тная, Богоро́дице Всепѣ́тая; ра́дуйся, спасе́ніе на́ше и утвержде́ніе; ра́дуйся, просвѣти́вшая ро́дъ на́шъ свѣтоно́снымъ Рождество́мъ Сы́на Твоего́ и Бо́га на́шего, Имже искорени́ся ле́сть бѣсо́вская; ра́дуйся, совокупи́вшая до́льняя небе́снымъ; ра́дуйся, Невѣ́сто неневѣ́стная.

И чте́ніе отъ чуде́съ преподо́бнаго.

[Та́же степе́нна, 1-й] антифо́нъ 4-го гла́са. Проки́менъ и Ева́нгеліе преподо́бническое. [Проки́менъ, гла́съ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.]

Та́же псало́мъ 50-й. По се́мъ стихи́ра, гла́съ 6:

Преподо́бне и достоблаже́нне о́тче Ника́ндре, тебе́ постыдѣ́шася бѣ́сове и исчеза́ху, пла́чуще, я́ко побѣди́лъ еси́ и́хъ моли́твами твои́ми; и человѣ́цы, напра́сно уязвля́ющіи тя́, посра́млени бы́ша; звѣ́ри же приви́дѣнніи, устраши́вшеся, отбѣго́ша, си́лою бо кре́стною тѣ́хъ прогна́лъ еси́; ты́ же непобѣди́мъ Христо́ви предстои́ши, и́же тя́ равноче́стна святы́мъ показа́, Ему́же и моли́ся о душа́хъ на́шихъ.

Кано́нъ [Богоро́дицы, со ирмосо́мъ на 6 и] свята́го Ника́ндра [на 8], его́же краестро́чіе: Ника́ндре преподо́бне, ра́дуйся. Гла́съ 4.

Пѣ́снь 1.

Ирмо́съ: Предѣли́въ пучи́ну чермну́ю Бо́гъ, фарао́на погрузи́вый въ не́й, прове́дъ Моисе́я немо́кренно въ пусты́ню и одожди́въ ма́нну въ снѣ́дь лю́демъ Изра́илевымъ, я́ко си́ленъ.

Наста́ви мя́, Го́споди, на пу́ть ра́зума, свѣ́тло воспѣ́ти уго́дника Твоего́, его́же сло́вомъ Твои́мъ въ пусты́ню изве́лъ еси́, и враги́ его́ подъ но́ги тому́ покори́лъ еси́, я́ко Всеси́ленъ.

Изба́ви вы́, Бо́же, отъ у́стъ душепа́губнаго во́лка моли́твами преподо́бнаго Своего́, и́же невре́дно премину́ жите́йскую пучи́ну, его́же ра́ди одожди́ на ны́ бога́тую Твою́ ми́лость, я́ко Всеси́ленъ.

Кто́ подо́бнѣ по́двиги твоя́ исчи́слити возмо́жетъ, пресла́вне Ника́ндре, и́миже подвиза́вся, врага́ побѣди́лъ еси́? И ны́нѣ сла́вно твори́ши чудеса́ дѣ́йствіемъ Свята́го Ду́ха, Бо́га Всеси́льна.

Аще и тма́ми покуша́шеся вра́гъ отъя́ти сокро́вище души́ твоея́, но, уя́звенъ бы́въ мече́мъ крѣ́пкаго ти́ воздержа́нія, побѣже́, ты́ же госпо́дствуеши у Царя́ сла́вы, Бо́га Всеси́льна.

Богоро́диченъ: Богоро́дице, Приснодѣ́во Марíе, простри́ ми ми́лостивнѣ десни́цу на по́мощь, умоля́ющи Сы́на Твоего́ и Бо́га, я́ко уя́звенъ е́смь лю́тѣ и на Тя́ то́чію наде́жду мою́ положи́хъ, Ты́ мя уще́дри.

Катава́сія: Отве́рзу уста́ моя́...

Пѣ́снь 3.

Ирмо́съ: Утверди́ся се́рдце мое́ въ Го́сподѣ, даю́щемъ моли́тву моля́щемуся, я́ко лу́къ си́льныхъ изнемо́же и немощству́ющіи препоя́сашася си́лою.

Непоколеби́мь пребы́лъ еси́ о Го́сподѣ, преподо́бне, даю́щемъ спасе́ніе прося́щимъ смире́нно, го́рдость же бѣсо́вская низпаде́ся, ви́дѣвши тя́ во пло́ти препоя́савшагося Бо́жіею си́лою.

Дарова́ тебѣ́ Госпо́дь, всебога́те, бога́тство неотъе́млемыя сла́вы, е́же возставля́ти разсла́бленныхъ, тѣ́мже и на́съ препоя́ши си́лою.

Разу́мно препоя́сався, свя́те, во оде́жду смире́ннаго богоразу́мія, не́мощны сотвори́ супоста́ты на́ша, моли́твами твои́ми, мо́лимся.

Богоро́диченъ: Наде́жда и упова́ніе на́ше, Влады́чице мíра, Блага́я Помо́щнице, спаси́, и въ крѣ́пости ро́гъ вознеси́ Благовѣ́рнаго Госуда́ря на́шего Импера́тора, и лю́ди отъ вся́кихъ бѣ́дъ и отъ разли́чныхъ обстоя́ній свободи́.

Сѣда́ленъ, гла́съ 3:

Яко заря́ со́лнечная, пресвѣ́тло сія́еши и всѣ́мъ вѣ́рно прибѣга́ющимъ подъ кро́въ ми́лости твоея́, преподо́бне, весе́ліе подае́ши и душа́мъ спасе́ніе; стяжа́лъ бо еси́ мно́гое дерзнове́ніе ко Христу́ Бо́гу, Ему́же и моли́ся непреста́нно, Ника́ндре, о́тче на́шъ всеблаже́нне, прегрѣше́ній оставле́ніе дарова́ти на́мъ и ве́лію ми́лость. [Два́жды.]

Сла́ва, и ны́нѣ, богоро́диченъ:

Подъ Твое́ благоутро́біе притека́юще, мо́лимъ, Богоро́дице Дѣ́во, не пре́зри рыда́нія на́шего и моли́твы, но ускори́ изба́вити отъ бѣ́дъ и скорбе́й лю́ди безотвѣ́тны, Ты́ бо еди́на еси́ извѣ́стнѣйшее христіа́номъ упова́ніе, и, къ Тебѣ́ прибѣга́юще, вси́ спаса́емся.

Пѣ́снь 4.

Ирмо́съ: Небеса́ добродѣ́тель Твоя́ покры́ла е́сть, и земля́ испо́лнися сла́вы Твоея́, Христе́. Тѣ́мже вѣ́рно вопіе́мъ: сла́ва си́лѣ Твое́й, Го́споди.

Еди́наго Бо́га въ се́рдцы твое́мъ имѣ́я, преподо́бне, въ пусты́ни трудолю́бно пожи́лъ еси́, Ника́ндре, о́тче на́шъ, взыва́я вѣ́рно: сла́ва си́лѣ Твое́й, Го́споди.

Пресвѣ́телъ и че́стенъ свѣти́льникъ ты́ еси́, о́тче Ника́ндре, не за́йде бо свѣ́тъ добродѣ́тельнаго твоего́ житія́ подъ спу́дъ забве́нія, но, я́ко со́лнце, озаря́етъ вѣ́рно Христо́ви пою́щихъ: сла́ва си́лѣ Твое́й, Го́споди.

Расточи́лъ еси́ имѣ́ніе твое́, о́тче, Христа́ ра́ди, отъ Него́же и гла́съ услы́шавъ, въ пусты́ню всели́лся еси́ и на высоту́ добродѣ́телей возше́лъ еси́, взыва́я: сла́ва си́лѣ Твое́й, Го́споди.

Богоро́диченъ: Изъ Твои́хъ Пречи́стыхъ чре́слъ, Богороди́тельнице, Сло́во Бо́жіе произы́де несказа́нно, Его́же объе́мши, отъ зо́лъ изба́вити умоли́ зову́щихъ: сла́ва си́лѣ Твое́й, Го́споди.

Пѣ́снь 5.

Ирмо́съ: Мра́къ разрѣши́ грѣха́ моего́, внегда́ возсія́ти Ти́ у́тро свѣ́тлое за́повѣдей Твои́хъ, Го́споди, непристу́пный Свѣ́те.

Его́же возлюби́лъ еси́ и Ему́же порабо́талъ еси́ отъ ю́ности, о́тче, Того́ умоли́ мра́къ грѣхо́вный отъ души́ моея́ разгна́ти сія́ніемъ духо́внымъ.

Приложи́лъ еси́, о́тче, труды́ ко трудо́мъ сугу́бо, сего́ ра́ди и мно́гая блага́я небе́сная приложи́шася тебѣ́. Тѣ́мже тя́ мо́лимъ: приложи́ и на́мъ ми́рнаго житія́ и ра́йскаго весе́лія.

О тѣ́лѣ твое́мъ небрегíй, преподо́бне, пребы́лъ еси́ на земли́, о небе́сныхъ поуча́яся, идѣ́же ны́нѣ ра́дуяся живе́ши; моли́ у́бо и на́мъ ра́дости тоя́ сопричасти́тися.

Богоро́диченъ: Нескве́рная Агнице и Богоотрокови́це Марíе, Твои́ми моли́твами укрѣпи́вшеся, святíи побѣди́ша бѣсо́вскія си́лы. Тѣ́мже и на́мъ, упова́ющимъ на Тя́, ско́ро предста́ни въ по́мощь, да посра́мятся и паду́тъ вси́ явля́ющіи рабо́мъ Твои́мъ зла́я.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Дале́че отъ Бо́га грѣ́хъ мя́ отри́ну, и въ пучи́нѣ зо́лъ погружа́юся, увы́ мнѣ́! Но, о предста́телю на́шъ те́плый, изба́ви отъ належа́щія ско́рби ду́шу мою́, преподо́бне Ника́ндре.

Оста́ви мя́ си́ла моя́, и лю́тѣ окружа́ютъ мя́ ско́рби, те́плѣ у́бо припа́даю ти́, преподо́бне Ника́ндре: пода́ждь ми́ долго́въ разрѣше́ніе, молю́ся, исцѣле́ніе тѣлеси́ и души́ спасе́ніе, моли́твами твои́ми, всебога́те.

Бе́здною грѣхо́въ сляца́емь, окая́нный, во глубинѣ́ отча́янія потопля́юся, но, предвари́въ моли́твами твои́ми, о́тче, руково́дствуй мя́ во свѣ́тъ боговѣ́дѣнія, я́ко оте́цъ благоутро́бный.

Богоро́диченъ: Безнача́льный Бо́гъ изъ Тебе́ роди́ся, Дѣ́во, и по рождествѣ́ Тя́ Дѣ́вою соблюде́ нетлѣ́нно, Того́ на́мъ ми́лостива сотвори́, мо́лимся, и отъ нахожде́ній лю́тыхъ зо́лъ сохрани́, я́ко Милосе́рда.

Конда́къ, гла́съ 1:

Яко лучу́ тя́ со́лнечную Христо́съ показа́, преподо́бне, сія́еши бо въ земли́ Россíйстѣй чуде́съ благода́тію и отгоня́еши тму́ страсте́й же и скорбе́й отъ приходя́щихъ къ тебѣ́ съ вѣ́рою. Тѣ́мже почита́емъ твою́ па́мять, Ника́ндре, о́тче на́шъ, и вопіе́мъ ти́: ра́дуйся, пустынножи́телей красото́ и странѣ́ на́шей похвало́ и утвержде́ніе.

Икосъ:

Проро́ческое сло́во дѣ́ломъ соверши́лъ еси́, богому́дре, удали́вся бо мíра и въ пусты́ню всели́вся, преподо́бне, Бо́га обрѣ́лъ еси́ Помо́щника тебѣ́, и То́й тя́ бога́тно просла́ви и чуде́съ благода́тію обогати́ пресла́вно, я́ко и отъ гро́ба твоего́ здра́віе боля́щимъ истека́етъ незави́стно. Тѣ́мже, сте́кшеся, де́нь преставле́нія твоего́ духо́вно пра́зднуемъ, по́двиги твоя́ почита́юще и похва́льная воспѣва́юще: ра́дуйся, по́стниче терпѣливоду́шный, трудополо́жниче смиренному́дрый, исто́чниче сле́зъ непресыха́емый, сто́лпе моли́твенный неподви́жимый, сказа́телю бу́дущихъ нело́жный, послуша́нія бе́здно и высото́ смире́нія, извѣ́стный наслѣ́дниче небе́снаго Ца́рствія, помо́щниче скорбя́щимъ милосе́рдый, засту́пниче ко Влады́цѣ Христу́ Бо́гу непрело́жный, вели́кому Нову́граду и Пско́ву свѣ́тлая добро́то и всѣ́мъ вѣ́рнымъ спасе́ніе и сла́во, преподо́бне Ника́ндре, о́тче на́шъ, странѣ́ на́шей похвало́ и утвержде́ніе.

Пѣ́снь 7.

Ирмо́съ: Образу злато́му не поклони́вшеся, о́троцы авра́амстіи искуша́хуся, я́ко зла́то въ горни́лѣ, въ пещи́ о́гненнѣй, я́ко въ черто́зѣ свѣ́тлѣмъ, ликую́ще, поя́ху: благослове́нъ еси́, Бо́же оте́цъ на́шихъ.

Ничто́же предпоче́лъ еси́ земны́хъ па́че небе́сныхъ, но, я́ко зла́то въ горни́лѣ, искуси́лся еси́, въ пусты́ни живы́й, ве́сь свѣтови́дѣнъ бы́въ, не помрачи́ бо тя́ но́щь бѣсо́вскія пре́лести, зане́, всегда́ во свѣ́тѣ богомы́слія пребыва́я, взыва́лъ еси́: Бо́же, благослове́нъ еси́.

Еди́нъ Еди́ному Го́споду прилѣпи́вся, богоблаже́нне, моли́твами и посто́мъ вы́ну Тому́ бесѣ́довалъ еси́, тѣ́мже и вѣнце́мъ неувяда́емыя по́чести одѣ́янъ, ра́достно вше́лъ еси́ съ му́дрыми дѣ́вами въ невѣ́стникъ Христо́въ, вопія́: Бо́же, благослове́нъ еси́.

Ра́ка моще́й твои́хъ, преподо́бне Ника́ндре, свѣ́тъ вторы́й вѣ́рнымъ лю́демъ яви́ся, на ню́же взира́юще, бога́тно луча́ми чуде́съ озаря́емся и Христу́ вопіе́мъ: Бо́же, благослове́нъ еси́.

Богоро́диченъ: Ви́ждь, Влады́чице, души́ моея́ злосмра́дныя ра́ны, и́хже самохо́тнѣ подъя́хъ, окая́нный, и не могу́ приложи́ти пла́стыря, но, е́ле жи́въ сы́й, вопію́: ми́лостива мнѣ́ Врача́ всѣ́хъ и Бо́га Ма́терними Твои́ми моли́твами сотвори́, я́ко да спа́сся воспою́ Ти́: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Аще и въ пусты́ни сокры́лся еси́, преподо́бне, но не утаи́ся добродѣ́тельнаго житія́ твоего́ свѣ́тлость, снизше́дъ бо свы́ше, преподо́бный Алекса́ндръ на неви́димыя враги́ побѣ́ду дарова́ и пѣ́ти тя́ укрѣпи́: вся́ дѣла́, благослови́те, по́йте Го́спода.

Дре́во благоплодови́то гро́бъ тво́й обрѣ́теся посредѣ́ пусты́ни, отъ него́же чуде́сный виногра́дъ обыма́юще, непреста́нно ду́ши наслажда́емъ, и отъ напа́стей измѣня́емся, и почита́емъ терпѣ́ніе твое́, Ника́ндре преподо́бне, Христа́ славосло́вяще, зове́мъ: вся́ дѣла́, благослови́те, по́йте Го́спода.

Увы́ мнѣ́, что́ сотворю́, окая́нный, зря́ многотру́дныхъ моще́й твои́хъ ра́ку, блиста́ющуся о добродѣ́тели, ея́же не стяжа́хъ отню́дъ? Но, о преподо́бне Ника́ндре, наста́ви мя́ на пу́ть пра́вый, вопи́ти Христу́ и́стинно: вся́ дѣла́, благослови́те, по́йте Го́спода.

Богоро́диченъ: Отъ Тебе́, Пресвята́я Богоро́дице, излія́ся вода́ живо́тная на омове́ніе скве́рны всемíрныя, е́юже благоволи́ и мое́ се́рдце прохлади́ти и окропи́ти росо́ю моли́твъ въ кро́вѣ кри́лъ Твои́хъ во вѣ́ки вся́.

Пѣ́снь 9.

Ирмо́съ: Велича́емъ вси́ человѣколю́біе Твое́, Христе́, Спа́се на́шъ, сла́во ра́бъ Твои́хъ и вѣ́нче вѣ́рныхъ, возвели́чивый па́мять Ро́ждшія Тя́.

Идѣ́же осѣня́етъ благода́ть Твоя́, Христе́, Спа́се на́шъ, та́мо быва́етъ сла́ва рабо́мъ Твои́мъ и вѣнцы́ по́честей терпя́щимъ вѣ́рно. Тѣ́мъ и на́мъ да́руй ми́лости Твоя́, почита́ющимъ па́мять преподо́бнаго Твоего́.

Сло́во твое́ и́стинно и житіе́ богоуго́дно на земли́ изобрази́лъ еси́, преподо́бне, ны́нѣ же и на небесѣ́хъ Христо́ви предстоя́, моли́ся возвели́чити держа́ву ца́рствія Благовѣ́рнаго Импера́тора на́шего и во́инство Его́ ми́ромъ огради́ти.

Якоже предре́клъ еси́, богодухнове́нне, сохрани́тися отъ бѣ́дъ погре́бшимъ тѣ́ло твое́ иногда́, и бы́сть та́ко, и на́съ ны́нѣ отъ належа́щихъ обстоя́ній ми́лостивно заступи́, я́ко да спа́сшеся тобо́ю, вѣ́рно возвели́чимъ па́мять твою́.

Богоро́диченъ: Ко́е Тебѣ́ дарова́ніе принесе́мъ, Богоро́дице, или́ что́ вѣща́ти и́мамы, грѣ́шніи? То́чію уми́льно вопіе́мъ, моля́щеся: спаси́ рабы́ Твоя́, Богоблагода́тная Отрокови́це, я́ко да Тя́ при́сно велича́емъ.

Свѣти́ленъ:

Отъ ю́ности, о́тче, до́мъ Ду́ху Пресвято́му яви́лся еси́, во кро́тости со смиренному́дріемъ всего́ себе́ поручи́въ Го́сподеви, Иже и призрѣ́ неукло́нно на ти́хость души́ твоея́. Тѣ́мъ ны́нѣ и зе́млю кро́ткихъ на небесѣ́хъ наслѣ́довавъ, вѣ́чно лику́еши. [Два́жды.]

Сла́ва, и ны́нѣ, богоро́диченъ:

Ра́дуйся, Тебѣ́ зове́мъ, Благослове́нная Богоро́дице Дѣ́во, я́ко Тобо́ю присносу́щныя ра́дости прича́стницы бы́хомъ, Живо́тъ бо на́шъ и Спасе́ніе недомы́слимо и вы́ше естества́ родила́ еси́, сего́ ра́ди непреста́нно ублажа́ютъ Тя́ ро́дове родо́въ, я́коже пре́жде прорекла́ еси́.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

О, пресла́вное чу́до!* Са́дъ благопло́дный* гро́бъ тво́й,* преподо́бне Ника́ндре,* вѣ́рнымъ лю́демъ явля́ется дне́сь* и, я́ко со́лнце въ полу́дне, сія́етъ,* чудесы́ озаря́я досто́йно чту́щихъ па́мять твою́,* и но́щь несвѣ́тлыхъ скорбе́й прогоня́еши* отъ приходя́щихъ къ тебѣ́ съ вѣ́рою* и вѣ́рно пою́щихъ тя́.

О, пресла́внаго твоего́ житія́,* богому́дре Ника́ндре!* Ка́ко не удиви́мся, земноро́дніи,* я́ко, во пло́ти сы́й, безпло́тнымъ а́нгеломъ уподо́бился еси́?* Съ ни́миже ны́нѣ лику́еши* во свѣ́тѣ невече́рнемъ на небесѣ́хъ,* предстоя́ Христо́ви въ ра́дости,* Ему́же моли́ся о на́съ,* любо́вію хва́лящихъ тя́.

О, пречу́дне Ника́ндре,* пустынножи́телю пресла́вный,* дре́внимъ святы́мъ равностоя́телю,* во сла́вѣ присносу́щнѣй соводворя́ешися,* свѣ́тло зри́ши Лице́ Святы́я Трои́цы,* отъ Нея́же мы́сленно просвѣти́вся благода́тію,* и нетлѣ́ннаго сопричасти́лся еси́ Ца́рствія,* его́же и на́мъ помоли́ся улучи́ти* и отъ печа́ли изба́витися,* да пра́зднуемъ ра́достно па́мять твою́.

О, досточу́днаго твоего́ терпѣ́нія,* о му́жества душе́внаго,* о нра́ва непобѣди́маго,* достоблаже́нне Ника́ндре!* Побѣ́дѣ тезоимени́тъ я́влься,* вои́стинну побѣди́лъ еси́ нача́ла тмы́ и вла́сти возду́шныя* и, въ небе́сное наслѣ́діе отше́дъ ра́дуяся,* воспрія́лъ еси́ бога́тно воздая́ніе* отъ Царя́ Христа́ и Бо́га на́шего.

Сла́ва, гла́съ 8:

Мона́ховъ мно́жество, дне́сь духо́вно торжеству́юще, псало́мски восхва́лимъ па́мять преподо́бнаго отца́ Ника́ндра: блаже́нъ еси́, о́тче, я́ко путе́мъ нечести́выхъ не ходи́лъ еси́, но, въ зако́нѣ Госпо́дни поуча́яся де́нь и но́щь, мо́ре страсте́й жезло́мъ воздержа́нія разве́рзлъ еси́, и, въ пусты́ни пожи́вый, я́ко вторы́й Моисе́й, врага́ попра́лъ еси́, и, у́мнаго боговидѣ́нія сподо́бився, во обѣтова́нное оте́чество вше́лъ еси́, идѣ́же ку́пно со святы́ми пое́ши, веселя́ся, Тро́ицу Единосу́щную.

И ны́нѣ, богоро́диченъ:

Влады́чице, пріими́ моли́твы ра́бъ Свои́хъ и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3 и 6, и слу́жба вся́ преподо́бническая: [Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жба преподо́бному отцу́ на́шему Ника́ндру пустынножи́телю, Пско́вскому чудотво́рцу. — Тисне́ніе второ́е. — СПб.: Сѵнода́льная Тѵпогра́фія, 1898. — 76 с.

/ Къ оглавленію раздѣла /


Наверхъ / Къ титульной страницѣ

0