Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 24-й де́нь.
Слу́жба зна́менія, бы́вшаго отъ ико́ны Пресвяты́я Влады́чицы на́шея Богоро́дицы, во гра́дѣ Пско́вѣ, и́же надъ Миро́жею рѣко́ю, во оби́тели Свята́го Спа́са.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 1. Подо́бенъ: Прехва́льніи му́ченицы.

Хра́мъ Святы́я Тро́ицы Единосу́щныя,* Твою́, Влады́чице, чудотво́рную ико́ну имѣ́я въ себѣ́,* всегда́ освяща́етъ вся́ вѣ́рою притека́ющія.* Тѣ́мже Тя́ по до́лгу ублажа́емъ,* всѣ́мъ вы́ну упова́ніе,* душа́мъ на́шимъ* тве́рдый покро́въ и держа́ва. [Два́жды.]

Гла́съ 4:

Гра́дъ, почита́ющій Тя́ и по до́лгу сла́вящій, огражда́еши, Всепѣ́тая, отъ безбо́жныхъ, Чи́стая, иноплеме́нникъ, отъ гла́да же, и тру́са, и напра́сныя сме́рти, и междоусо́бныя бра́ни всегда́, Дѣ́во Неискусобра́чная. Сего́ ра́ди сла́вимъ Тя́, Пречи́стая Богоневѣ́сто, человѣ́комъ Помо́щнице.

Ико́ну зра́ка Твоего́, Пречи́стая Богоблагода́тная Влады́чице, дарова́ла еси́ гра́ду Твоему́ бога́тство неотъе́млемо, покро́въ же, и сла́ву, и необори́мую стѣ́ну, исцѣле́ній сокро́вище, чуде́съ исто́чникъ приснотеку́щь, приста́нище же спасе́ное обурева́емымъ всегда́. Сего́ ра́ди пое́мъ Тя́, Препѣ́тая Чи́стая.

Почерпи́те, человѣ́цы, спасе́ніе душа́мъ и здра́віе тѣлесе́мъ. Рѣка́ бо всѣ́мъ предлежи́тъ, о́бразъ Приснодѣ́выя, источа́ющи на́мъ чуде́съ струи́, омыва́ющи сердца́мъ омраче́нія, страсте́мъ прогна́нія и ду́ши освяща́ющи благода́тію Боже́ственною.

Добро́ту Тя́ Іа́ковлю и лѣ́ствицу небе́сную [вѣ́мы], по не́йже сни́де Госпо́дь на зе́млю, тѣ́хже тогда́ о́брази Твою́ че́сть и сла́ву, Богоро́дице, проявля́ху: Ты́ бо родила́ еси́ Бо́га всѣ́хъ, Тя́ блажа́тъ небе́сніи а́нгели и земленíи человѣ́цы, я́ко за ве́сь мíръ мо́лишися и покрыва́еши ми́лостію и́же Тво́й честны́й соверша́ющихъ зна́менія пра́здникъ.

Сла́ва, и ны́нѣ, гла́съ 8:

Ужасну́шася разу́мная вся́ чинонача́лія, духо́вно совоку́пльше ли́къ, и недоумѣва́хуся съ на́ми и ду́си пра́ведныхъ су́щіи, позо́ратаи [1] бы́вше видѣ́нію преужа́сному и зна́менію преди́вному, ви́дяще о́бразъ Цари́цы всѣ́хъ, отъ него́же изъ о́чію сле́зы теча́ху, и Свои́ пречи́стѣи дла́ни просте́рши къ Ро́ждшемуся изъ Нея́, возврати́ти гнѣ́въ, подвиза́ющійся на ны́, и прося́щи мíру умире́нія, и царе́мъ держа́вы и утвержде́нія, и Бо́жіимъ це́рквамъ благостоя́нія, и спасе́нія душа́мъ на́шимъ.

Вхо́дъ. Проки́менъ дне́. И паримíи.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 6:

Злата́я кади́льнице, ру́чко и же́злъ, свѣти́льниче златоза́рный и сви́тче боже́ственный, въ не́мже пе́рстомъ Бо́жіимъ Сло́во написа́ся, Тебе́ велича́емъ.

Да́руй на́мъ, Богоро́дице, по́мощь отъ печа́ли, на Тя́ надѣ́ющимся, вѣ́рнымъ прибѣ́жище, избавля́й отъ бѣ́дъ рабы́ Твоя́, Дѣви́це, на Тя́ бо по Бо́зѣ упова́ніе вси́ возлага́емъ.

Влады́чице, Ма́ти Изба́вителя, пріими́ моле́ніе ра́бъ Твои́хъ, а́ще и недосто́йнѣ моля́щихся Ти, да мо́лишися за ны́ къ ро́ждшемуся изъ Тебе́ Влады́це мíру, бу́ди на́мъ Изба́вительница.

Яже ра́дость отъ а́нгела пріи́мшая и ро́ждши Зижди́теля Твоего́, Дѣ́во, спаси́ Тебе́ велича́ющихъ.

Влады́чице, пріими́ моли́тву ра́бъ Твои́хъ и изба́ви на́съ отъ вся́кія ну́жды и печа́ли.

Сла́ва, и ны́нѣ, гла́съ 8:

Что́ у́бо, му́жіе богохрани́маго гра́да Пско́ва, ви́дѣвше преди́вное зна́меніе отъ Твоего́ пречи́стаго о́браза, Пресвята́я Влады́чице, сле́зы отъ пречи́стою о́чію, и ужа́сшеся, усрѣ́тше со свяще́ннымъ чи́номъ, тре́петни со слеза́ми си́це глаго́лаху: не пре́зри, Влады́чице, воздыха́нія ра́бъ Твои́хъ, и не отри́ни моле́ній на́шихъ въ коне́цъ, но моли́ о на́съ Сы́на Твоего́ и Бо́га на́шего, и ми́лостива и человѣколюби́ва Того́ на́мъ покажи́, изба́витися на́мъ пра́веднаго Его́ преще́нія, Ты́ бо еси́, Пречи́стая, заступле́ніе душа́мъ на́шимъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Сла́ва на небеси́* и на земли́ торжество́,* я́ко Богоро́дица* со святы́ми всѣ́ми* за вся́ ны́* къ Сы́ну Своему́ мо́лится.

Сти́хъ: Слы́ши, Дщи́, и ви́ждь,* и приклони́ у́хо Твое́.

Пріиди́те, вѣ́рніи,* во святу́ю сію́ це́рковь,* ту́ бо Богоро́дица Свое́ю ми́лостію* покрыва́етъ лю́ди* отъ вся́кихъ напа́стей вра́жіихъ.

Сти́хъ: Лицу́ Твоему́* помо́лятся бога́тіи лю́дстіи.

Пречи́стая Богоро́дице,* не забу́ди на́съ,* Твои́хъ рабо́въ,* но за ны́ помоли́ся,* вѣ́рою пою́щихъ Тя́.

Сла́ва, и ны́нѣ, гла́съ 8:

Да́лъ еси́ зна́меніе живо́тное отъ о́браза Пречи́стыя Твоея́ Ма́тере, Сло́ве, его́же зря́ще, любе́зно облобыза́имъ, и, отъ Сея́ ра́дости испо́лнившеся, стра́шны враго́мъ и борю́щимся съ на́ми явля́емся, и, та́инство Прему́дрости Бо́жія уви́дѣвше, хва́лимъ па́че сло́ва Ро́ждшую Тя́, Іису́се, чу́дная Добро́то, спаси́ всѣ́хъ на́съ, я́ко Милосе́рдъ.

Тропа́рь зна́менію Богоро́дицы, гла́съ 4:

Яко звѣзда́ пресвѣ́тла возсія́ въ Россíйстѣй земли́ ико́на честна́го о́браза Твоего́, Богоро́дице Дѣ́во, изъ обою́ о́чію точа́щи сле́зы Твоя́, я́ко рѣка́, и ви́дѣвше наро́ди пско́встіи, му́жи и жены́ и съ ча́ды, съ пла́чемъ моля́щеся о́бразу Твоему́, си́це глаго́лаху: о, Пресвята́я Влады́чице Богоро́дице, не забу́ди грѣ́шныхъ ра́бъ Твои́хъ, моля́щися Христу́ Бо́гу на́шему спасти́ся на́мъ.


НА УТРЕНИ,
На Бо́гъ Госпо́дь: тропа́рь то́йже, три́жды.

По 1-мъ стихосло́віи сѣда́ленъ, гла́съ 4:

Очи мы́сленніи очи́стивше, пріи́демъ, торжеству́юще свѣ́тло, чту́ще Богоотрокови́цу, добро́ту Іа́ковлю и Невѣ́сту всѣ́хъ Царя́, Христа́ Бо́га на́шего. Сія́ бо показа́ся не́бо, и кра́сная пала́та, и це́рковь одушевле́нна, и Сея́ си́лою сопроти́вныхъ побѣжда́емъ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4:

Не умолчи́мъ никогда́, Богоро́дице, си́лы Твоя́ глаго́лати, недосто́йніи: а́ще бо Ты́ не бы́ предстоя́ла, моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ.

Сла́ва, и ны́нѣ, то́йже.

Припѣ́въ зна́менію:

Велича́емъ Тя́, Пресвята́я Дѣ́во, богоизбра́нная Отрокови́це, и чте́мъ о́бразъ Тво́й честны́й, и́мже показа́ла еси́ пречу́дное зна́меніе.

И псало́мъ избра́нный: Помяни́, Го́споди, Дави́да и всю́ кро́тость его́...

По поліеле́и сѣда́ленъ, гла́съ 8. Подо́бенъ: Вѣ́рѣ Бо́жіи.

Яже небе́съ превы́шшая су́щи, херуви́мъ вои́стинну сла́внѣйши, всея́ тва́ри честнѣ́йши, Дѣ́во Пречи́стая, дне́сь благода́рственная, раби́ Твои́, прино́симъ о́бразу честна́го подо́бія Твоего́: Ты́ бо стра́нно и преди́вно зна́меніе показа́ла еси́ отъ пречи́стаго Твоего́ о́браза. Тѣ́мже согла́сно вопіе́мъ Ти́: Влады́чице Богоро́дице, моли́ Христа́ Бо́га согрѣше́ній оставле́ніе дарова́ти на́мъ, Тебе́ бо и́мамы наде́жду, раби́ Твои́.

Сла́ва, и ны́нѣ, то́йже.

Та́же степе́нна, 1-й антифо́нъ 4-го гла́са. Проки́менъ, [гла́съ 4]: Помяну́ и́мя Твое́* [во вся́комъ ро́дѣ и ро́дѣ]. Сти́хъ: Слы́ши, Дщи́, и ви́ждь, [и приклони́ у́хо Твое́]. Вся́кое дыха́ніе... Ева́нгеліе отъ Луки́, зача́ло 4: Во вре́мя о́но, воста́вши Маріа́мъ...

По 50-мъ псалмѣ́ стихи́ра, гла́съ 8:

Что́ у́бо, му́жіе... [Пи́сана на вече́рни, на литíи].

Кано́на два́ Пресвятѣ́й Богоро́дицѣ: 1-й кано́нъ со ирмосо́мъ на 8, 2-й кано́нъ на 6.


Кано́нъ благода́рственъ Пресвятѣ́й Богоро́дицѣ, его́же краегране́сіе сицево́: Да́ждь ми́ сло́во, Сло́ве Бо́жій, восхвали́ти Ро́ждшую Тя́. Гла́съ 6.
Пѣ́снь 1.

Ирмо́съ: Волно́ю морско́ю скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

Пріиди́те, всѣ́хъ вѣ́рныхъ благочести́вое мно́жество, духо́вно ли́къ совоку́пльше, Пречи́стую Ма́терь Сло́ва пѣ́сньми похва́лимъ, зря́ще отъ пречи́стаго Ея́ о́браза зна́меніе преди́вное показа́вшееся, е́же и воспои́мъ боже́ственными пѣ́сньми.

Якоже лѣ́ствицу превысо́кую зри́мъ Тя́ дне́сь, Дѣ́во Всенепоро́чная, е́юже къ небе́снѣй высотѣ́ восхо́димъ, Тя́ бо предста́тельницу и непобѣди́мое утвержде́ніе стяжа́вше, Пречи́стая, навѣ́тъ вра́жіихъ избавля́емся и спаса́емся, вѣ́рою къ Тебѣ́ притека́ющіи.

Въ рождествѣ́ тли́ не пріе́мши, тлѣ́нія всѣ́хъ на́съ, Дѣ́во, измѣни́, печа́ли уставля́ющи, Ма́тернимъ Твои́мъ дерзнове́ніемъ, Богора́дованная.

Инъ кано́нъ, гла́съ 8.
Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Боже́ственныя си́лы же́злъ преоблиста́я бла́гостію, святы́мъ зна́меніемъ отъ свята́го жили́ща, яви́ся чу́до па́че естества́ отъ о́браза Твоего́, Пречи́стая.

Ви́дѣша пресла́вное дне́сь зна́меніе, бы́вшее отъ боже́ственнаго Твоего́ зра́ка, Ма́ти Бо́жія, и е́же о Тебѣ́ та́инство проповѣ́дающееся, Богоро́дице Дѣ́во, издале́ча зря́щіи Твоя́ чудеса́.

Наде́жду иму́ще на Тя́, Богороди́тельнице, и несумнѣ́нну вѣ́ру, гра́да сего́ наро́ди, я́ко ца́рскій ски́петръ Тебе́ гра́ду забра́ла положи́ша, Дѣ́во, Неискусобра́чная.

Яко жи́ву Ма́терь Сло́ва ви́дѣвъ Тя́ наро́дъ многочи́сленный, зна́меніе изря́дно показа́вшу, и обстоя́ще Твою́ всечестну́ю ико́ну со свяще́ннымъ собо́ромъ, ру́цѣ воздѣ́вше къ высотѣ́, моля́хуся, Тебе́ призыва́юще на по́мощь.

Катава́сія: Отве́рзу уста́ моя́...

Пѣ́снь 3.

Ирмо́съ: Тобо́ю, Христе́, небеса́ утвержда́ема вся́, Сло́во Бо́жіе и Си́ла, исповѣ́дуютъ сла́ву неизрече́нну и вседѣ́тельныя руки́ Твоея́ сотворе́ніе, нѣ́сть бо пресвя́тъ, ра́звѣ Тебе́, Го́споди..

Умилосе́рдися на ста́до Твое́, Пречи́стая, и ми́ръ гра́ду Твоему́ да́руй, сопроти́вныхъ че́люсти сокруши́ и тѣ́хъ не́мощны до конца́ покажи́. — нѣ́сть бо пресвя́тъ, ра́звѣ Тебе́, Го́споди.

Общаго Па́стыря и Влады́ку поро́ждши, Христа́, Дѣ́во Неискусобра́чная, Тому́ помоли́ся настоя́щаго гнѣ́ва изба́витися на́мъ и проти́внаго обстоя́нія, Влады́чице.

Ми́лостивая, Ми́лостиваго ро́ждши Спа́са, ви́ждь озлобле́ніе и воздыха́ніе людíй Твои́хъ: ускори́, Пречи́стая, уще́дрити ны́.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Приклони́ у́хо Твое́, Блага́я, и ви́ждь озлобле́ніе на́ше и бѣ́дъ умноже́ніе, къ Тебѣ́ бо душе́вніи о́чи простира́емъ, Влады́чице, съ пла́чемъ колѣ́на преклоня́емъ, мо́лимъ Тя́, вопію́ще: сла́ва, Богома́ти, зна́менію Твоему́.

Пою́тъ Тя́, Богоро́дице, а́нгельстіи чи́ни и пра́зднуютъ проро́цы, патріа́рси со святи́тели, теку́ще во святу́ю це́рковь, съ ни́миже тогда́ и боголюби́віи наро́ди, ви́дѣша Тя́, Цари́це, за ны́, грѣ́шныя, къ Сы́ну моля́щуся поми́ловати гра́дъ и лю́ди, въ не́мъ живу́щія и сла́вящія Твоего́ пречи́стаго о́браза преди́вное зна́меніе.

О, пресла́вное зна́меніе, испо́лнено у́жаса! Ви́дѣвше и́же тогда́ наро́ди отъ Твоея́ всечестны́я ико́ны, Богороди́тельнице, отъ обою́ о́чію сле́зы исходя́ща, стра́хомъ одержи́ми, со слеза́ми си́це взыва́ху: Влады́чице, не оста́ви на́съ.

Зна́менія ны́нѣ наста́ де́нь, зна́меніе ико́ны Твоея́, Дѣ́во Богороди́тельнице, пра́здникъ свѣ́телъ соверша́юще, вопіе́мъ Ти́: нѣ́сть, Пречи́стая, па́че Тебе́, Богоневѣ́сто.

Сѣда́ленъ, гла́съ 8:

Юже дре́вле ли́къ проро́ческій проповѣ́да две́рь небе́сную, неопали́мую купину́, и свѣ́щникъ многосвѣ́тлый, злату́ю кади́льницу, ру́чку и же́злъ, пресла́вно дне́сь и ди́вно зна́меніе показа́. Тѣ́мже благода́рственная пѣ́нія воспису́емъ Ти́, раби́ Твои́, Богоро́дице: моли́ Христа́ Бо́га согрѣше́ній оставле́ніе дарова́ти, Тебе́ бо и́мамы наде́жду, раби́ Твои́.

Сла́ва, и ны́нѣ, то́йже.

Пѣ́снь 4.

Ирмо́съ: Удиви́ся Тво́й ра́зумъ отъ мене́, услы́шавшу пресла́вная велѣ́нія смотре́нія Твоего́, укрѣпи́ся же возлюбле́ніемъ Твоего́ схожде́нія: Ты́ бо моея́ нищеты́ не отве́рглся еси́.

Почита́ющій Тя́ гра́дъ, Пречи́стая, и по до́лгу блажа́щій, огражда́й отъ безбо́жныхъ, Чи́стая, иноплеме́нникъ, Ты́ бо тому́ еси́, Пречи́стая, бога́тство неотъе́млемо, покро́въ же и держа́ва.

Не мо́жетъ Тя́ сло́во человѣ́ческое, ни язы́къ хвали́ти досто́йно, отъ Тебе́ бо безъ сѣ́мене Живода́вецъ Бо́гъ воплоти́тися, Пречи́стая, изво́ли.

Помози́, Пречи́стая, спасти́ся пою́щимъ Тя́ и изба́ви отъ проти́вныхъ наше́дшаго преще́нія, Богороди́тельнице.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Яже Кла́съ прозя́бши и возрасти́вши животвори́вый, неора́нная Ни́ва, даю́щи мíрови жи́знь, Богоро́дице, спаса́й пою́щія Тя́.

Многобога́тный да́ръ и неотъе́млемое сокро́вище да́лъ еси́ гра́ду Твоему́, ико́ну Пречи́стыя Твоея́ Ма́тере, Сло́ве, и сея́ по́мощію проти́вныхъ низлага́й.

Въ боже́ственнѣмъ хра́мѣ Твое́мъ, Богора́дованная, идѣ́же чудотво́рная Твоя́ ико́на поста́влена бы́сть, во утвержде́ніе богохрани́мому гра́ду на́шему, совоку́пльшеся, Тя́ прославля́емъ.

Собо́ри вѣ́рныхъ и вся́ко состоя́ніе человѣ́ческое веселя́тся, совоку́пльшеся въ честнѣ́мъ хра́мѣ Твое́мъ, зря́ще въ не́мъ, я́коже пресвѣ́тлое со́лнце, о́бразъ Пречи́стыя Твоея́ Ма́тере, Сло́ве.

Пѣ́снь 5.

Ирмо́съ: Сою́зомъ любве́ связу́еми, апо́столи, влады́чествующему всѣ́ми себе́ Христу́ возло́жше, кра́сны но́ги очища́ху, благовѣству́юще всѣ́мъ ми́ръ.

Те́плая Засту́пнице къ Тебѣ́ прибѣга́ющимъ и ненадѣ́ющимся наде́жда, ви́ждь озлобле́нія людíй Твои́хъ и пода́ждь Твою́ по́мощь, Пречи́стая.

Яже Огнь ро́ждшая Боже́ственный, Дѣ́во, проти́вныхъ, Пречи́стая, моли́твы Твоея́ огне́мъ попали́, я́ко су́щи Ма́ти Зижди́теля, Всепѣ́тая.

Чи́стая Богоневѣ́сто, недоумѣ́нныя лю́ди уще́дри Ма́терними Твои́ми моли́твами и е́же на ны́ сопроти́вныхъ обстоя́ніе претвори́ вско́рѣ моли́твами Твои́ми.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Вели́кій преднапису́етъ Тя́ во проро́цѣхъ Моисе́й ковче́гъ, и трапе́зу, и свѣ́щникъ, и ру́чку, обра́зно явля́я воплоще́ніе е́же отъ Тебе́ Вы́шняго, Ма́ти Дѣ́во.

Яко щито́мъ, огражда́еми непобѣди́мою Твое́ю си́лою, Дѣ́во, сопроти́вныхъ побѣжда́емъ неизрече́нное мно́жество, Всепѣ́тая.

Ты́ бога́тство неистощи́мое, исцѣле́ній исто́чникъ вѣ́рою прибѣга́ющимъ ко хра́му Твоему́, идѣ́же пребыва́етъ честны́й о́бразъ Тво́й, Влады́чице.

Пѣ́снь 6.

Ирмо́съ: Ятъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго, и погребе́нію да́вшагося, я́ко отъ черто́га отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Изба́ви на́съ язы́ческаго наше́ствія и гра́дъ Тво́й, Всепѣ́тая, и не преда́ждь до конца́ поги́бнути наслѣ́дію Твоему́, Пречи́стая, но си́лою Ро́ждшагося изъ Тебе́, Влады́чице, проти́вныхъ низложи́.

Мно́го согрѣ́шшихъ къ Тебѣ́ не пре́зри, но пріими́ мольбу́ Ма́тере Твоея́ о на́съ, Ще́дре, да не похва́лятся сопроти́вніи, — гдѣ́ е́сть Бо́гъ и́хъ? — глаго́люще, но да разумѣ́ютъ вси́, я́ко Ты́, Изба́витель, съ на́ми еси́.

Ны́нѣ по́мощи пріи́де вре́мя, ны́нѣ премѣне́нію потре́ба, Чи́стая, къ Сы́ну Твоему́ и Бо́гу моли́ся, я́ко да уще́дритъ согрѣши́вшихъ на́съ и належа́щаго гнѣ́ва изба́витъ.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Псалмы́ Тя воспѣва́емъ, Обра́дованная, и немо́лчно Ти́, е́же ра́дуйся, вопіе́мъ, Ты́ бо источи́ла еси́ всѣ́мъ ра́дость.

Зна́меніе стра́шно и ве́щь пресла́вну отъ Твоея́ ико́ны, Влады́чице, дне́сь пра́зднующе, лю́діе Твои́, Богоро́дице, похва́льная, я́ко досто́йно похвалы́, прино́симъ Ти́, глаго́люще: ра́дуйся, Обра́дованная.

Честну́ю ико́ну Твою́ ра́достнымъ се́рдцемъ и душе́ю облобыза́емъ, веселя́щеся, и, те́плою вѣ́рою прикаса́ющеся, исцѣле́ніе почерпа́емъ.

Конда́къ, гла́съ 7:

Засту́пнице христіа́номъ непосты́дная и Предста́тельнице гра́ду на́шему Пско́ву, не пре́зри моле́нія на́съ, грѣ́шныхъ, и ви́дящихъ отъ Твоего́ честна́го о́браза сле́зы теку́ща изъ обою́ о́чію и моля́щихся прилѣ́жно. Но предвари́, я́ко Бла́га, на по́мощь на́шу, вѣ́рно къ Тебѣ́ прибѣга́ющимъ, услы́ши на́ша моле́нія, Богоро́дице, и изба́ви на́съ отъ нахожде́нія пога́ныхъ, ускори́ же на моли́тву на́шу и потщи́ся на умоле́ніе, заступа́ющи при́сно, Богоро́дице, чту́щихъ Тя́: ра́дуйся, Дѣ́во, христіа́номъ похвало́.

Икосъ:

Разрѣши́ тму́ мои́хъ прегрѣше́ній, я́же во умѣ́ мое́мъ лежа́щую, и Твои́мъ мя́ свѣ́томъ просвѣти́, Дѣ́во, я́ко да возмогу́ Тебѣ́ похвалу́ принести́, Юже Оте́цъ восхвали́, и Ду́хъ Святы́й осѣни́, Сы́нъ же и Сло́во Бо́жіе всели́ся и, нетлѣ́нно отъ пречи́стою Твое́ю бо́ку проше́дъ, со человѣ́ки поживе́. Тѣ́мже грѣ́шніи мы́ и недосто́йніи раби́ Твои́, дне́сь соверша́юще свяще́нное торжество́, зна́меніе бы́вшее честны́я ико́ны Твоея́, въ о́ньже преди́вное чу́до показа́ла еси́, и Твоему́ чудеси́ уди́вльшеся, Твои́хъ бога́тныхъ дарова́ній испо́лнившеся, вмѣ́сто благово́нныхъ арома́тъ, ели́ко возмо́жно на́мъ, земны́мъ, похва́льная прино́симъ Ти́, глаго́люще: ра́дуйся, покро́ве и наде́жда гра́ду Твоему́; ра́дуйся, я́ко проти́вныхъ си́лою Твое́ю низлага́емъ; ра́дуйся, Разу́мнаго Со́лнца Ма́ти, вѣ́рныхъ просвѣща́ющи, невѣ́рныхъ же помрача́ющи; ра́дуйся, Дѣ́во, христіа́номъ похвало́.

Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене, во гро́бѣ ме́ртвъ бездыха́ненъ полага́ется, во спасе́ніе на́съ пою́щихъ: Изба́вителю Бо́же, благослове́нъ еси́.

Вои́стинну сокро́вище честно́е гра́ду Твоему́ ико́на Твоя́, Пречи́стая, дарова́ся, ю́же са́ми зря́ще, чудеси́ удивля́емся и Сы́ну Твоему́ вопіе́мъ: благослове́нъ Бо́гъ оте́цъ на́шихъ.

Якоже иногда́ ниневи́тяны покая́нія ра́ди пощади́въ, Сло́ве Бо́жій, про́повѣдію Іо́ны проро́ка, та́кожде и здѣ́ показа́ о́бразомъ Пречи́стыя Твоея́ Ма́тере, Христе́, вопію́щимъ: благослове́нъ Бо́гъ оте́цъ на́шихъ.

Хра́мъ Тя́ Бо́жій, Влады́чице, вѣ́дуще, во святѣ́мъ хра́мѣ Твое́мъ ру́ки нечи́стыя дви́жемъ на моли́тву: ви́ждь озлобле́ніе на́ше и пода́ждь Твою́ по́мощь, Богоро́дице.

Инъ.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́. Сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще, поя́ху: благослове́нъ еси́, Бо́же оте́цъ на́шихъ.

Ви́ждь, Пречи́стая, озлобле́ніе ра́бъ Твои́хъ, и не отри́ни въ коне́цъ, Твое́ бо есмы достоя́ніе и Твое́ю наде́ждею крѣпи́мся, да вси́ вопіе́мъ Ти́: ра́дуйся, Обра́дованная.

Свѣтоно́сная благода́ть и исцѣле́ніе даде́ся гра́ду Твоему́, о́бразъ Тво́й, Пречи́стая, его́же любе́зно облобыза́юще, весели́мся.

Незаходи́маго Свѣ́та свѣще́, Боже́ственнаго Сія́нія яви́ся свѣ́щникъ, златосія́ющь и мíръ ве́сь озаря́ющь заре́ю чи́стаго дѣ́вства, пою́щія Тя́ спаса́еши, Благослове́нная, Яже Бо́га пло́тію ро́ждши.

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ вы́шнихъ Живы́й, и во гро́бъ ма́лъ страннопріе́млется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Собезнача́льнаго Сло́ва Отцу́, Дѣ́во Пречи́стая, нетлѣ́нно родила́ еси́, Того́ моли́, Богороди́тельнице, отъ сопроти́вныхъ напа́стей спасти́ся пою́щимъ: дѣ́ти, благослови́те и превозноси́те Его́ во вѣ́ки.

Его́же проповѣ́даше на престо́лѣ превысо́цѣ Иса́ія, Сего́ въ ложесна́хъ, Дѣ́во, вмѣсти́ла еси́ и нетлѣ́нно породила́ еси́, Того́ моли́ спасти́ся гра́ду Твоему́, пою́щу: дѣ́ти, благослови́те, свяще́нницы, по́йте и превозноси́те Его́ во вѣ́ки.

Еди́на су́щи Блага́я, Преблага́го Сло́ва умоли́ прилѣ́жно, настоя́щаго гнѣ́ва гра́ду Твоему́ изба́витися, несумнѣ́нною вѣ́рою Сы́ну Твоему́ зову́щимъ: дѣ́ти, благослови́те, свяще́нницы, по́йте и превозноси́те Его́ во вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Сопроти́вныхъ разжже́нныя пламенови́дныя на на́съ угаси́ стрѣ́лы, я́ко да Тя́ пое́мъ, Чи́стая, во вѣ́ки.

Па́че естества́ Содѣ́теля и Спа́са, Бо́га Сло́ва родила́ еси́, Дѣ́во, тѣ́мже Тя́ пое́мъ, Чи́стая, во вѣ́ки.

Яко нетлѣ́нное зерца́ло имѣ́я гра́дъ Тво́й ико́ну Твою́, Пречи́стая, сопроти́вящихся низлага́емъ и Сы́ну Твоему́ вопіе́мъ: благослови́те, вся́ дѣла́ Госпо́дня, Го́спода.

Что́ Ти принесе́мъ, Пречи́стая, отъ всея́ тва́ри сла́вимѣй? Недоумѣ́емся, Влады́чице, то́чію е́же Гавріи́лъ научи́: ра́дуйся, Обра́дованная.

Пѣ́снь 9.

Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ высо́кими умы́, вѣ́рніи, пріиди́те наслади́мся, возше́дша Сло́ва, отъ Сло́ва научи́вшеся, Его́же велича́емъ.

Окомъ милосе́рдымъ Твои́мъ свы́ше при́зри на гра́дъ и лю́ди Твоя́, Пречи́стая, ины́я бо по́мощи не и́мамы, то́кмо Тебе́, Всенепоро́чная, да Тя́ вси́, я́ко Ма́терь Бо́жію, непреста́нно велича́емъ.

Еди́на ро́ждши Сло́во воплоще́нно, Дѣ́во Всепѣ́тая, приснотеку́щій исто́чникъ исцѣле́ній излива́еши вѣ́рою притека́ющимъ ко хра́му Твоему́, Пречи́стая.

Раби́ Твои́, вопіе́мъ Ти́, Пречи́стая Ма́ти Бо́жія: обы́чныя ми́лости Твоя́ на гра́дъ и лю́ди ми́лостивно покажи́, сопроти́вныхъ обстоя́ній на́съ измѣни́, да Тя́ вси́ непреста́нно велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Се́ вре́мя благопрія́тно и де́нь спасе́нія, зна́меніе ико́ны Твоея́, Пречи́стая, е́же пра́зднующе свѣ́тло, духо́внѣ торжество́ соверша́емъ.

Яже Боже́ственною свѣ́тлостію озаря́ется, зри́мъ дне́сь, Пречи́стая, ико́ну Твою́ честну́ю, е́йже кла́няющеся, Тя́ велича́емъ.

Мы́сли очи́стивше, празднолю́бнаго гра́да Пско́ва собо́ри свяще́нныхъ ли́ковъ и всѣ́хъ вѣ́рныхъ благочести́вое мно́жество, восхвали́те Ма́терь Сло́ва, е́же отъ Тоя́ о́браза бы́вшее преди́вное зна́меніе, ему́же со стра́хомъ кла́няющеся, велича́емъ.

Дѣ́вства Твоего́ зна́меніе невреди́мо сохрани́ Сло́во Бо́жіе, изъ Тебе́ проше́дъ, сохрани́ти и гра́дъ Тво́й мо́лимся неразори́мь, Дѣ́во Всепѣ́тая, да Тя́ непреста́нно велича́емъ.

Свѣти́ленъ Богоро́дицѣ. Подо́бенъ: Жены́, услы́шите.

Вожделѣ́въ Твое́й добро́тѣ Іису́съ, Пречи́стая, въ Тя́ всели́ся и Тя́ Засту́пницу гра́ду Твоему́ Сло́во Бо́жіе дарова́, его́же сохраня́й заступле́ніемъ Твои́мъ при́сно, я́ко да Тя́ ублажа́емъ, Пренепоро́чная Отрокови́це.

Сла́ва, и ны́нѣ, то́йже.

На хвали́техъ стихи́ры Богоро́дицѣ, гла́съ 4. Самогла́сны:

Се́ хра́мъ пресвѣ́телъ и мѣ́сто свяще́нія, идѣ́же честна́я ико́на Ма́тере Бо́жія Сло́ва, приступи́те, человѣ́цы, и исцѣле́ніе почерпи́те, я́ко спасе́ніе Тоя́ ра́ди дарова́ся ро́ду человѣ́ческому.

Что́ Тя, Богороди́тельнице, нареку́? Це́рковь Боже́ственную, вертогра́дъ Еде́мскій имену́ю, и Но́евъ, Чи́стая, ковче́гъ нареку́, спаса́ющій на́съ, ца́рское свяще́ніе и всесвя́тъ язы́къ, Христа́ Бо́га на́шего собо́ръ, Моисе́ову же киво́ту уподо́блю Тя́, въ не́мже очисти́лище, и же́злъ прозя́бшій, свѣ́щникъ, и ру́чку, и кади́льницу всезлату́ю, въ ню́же прибѣга́етъ вся́къ вѣ́рный и испроша́етъ ве́лію ми́лость.

Яже ненаде́жнымъ упова́ніе извѣ́стно, согрѣша́ющимъ спасе́ніе, Марíе Всепѣ́тая, Чи́стая Богороди́тельнице, пріими́ моле́ніе на́ше, и испроси́ разрѣше́ніе, я́же согрѣши́хомъ въ житіи́, Ма́терними Твои́ми моли́твами спаси́ отъ бѣ́дъ и бу́дущаго суда́, Влады́чице, вели́кія ра́ди Твоея́ ми́лости.

Ра́дуйся, непосты́дная Предста́тельнице; ра́дуйся, Преблага́я Богоро́дице; ра́дуйся, очисти́лище мíру; ра́дуйся, ра́досте скорбя́щимъ и приста́нище обурева́емымъ; ра́дуйся, Яже всѣ́мъ помога́ющи су́щимъ въ ну́ждахъ; Ты́ сохрани́ на́съ, Влады́чице, и всѣ́хъ изба́ви ско́рбныхъ, Всенепоро́чная, почита́ющихъ Твое́ ди́вное зна́меніе.

Сла́ва, и ны́нѣ, гла́съ 5:

Востру́бимъ трубо́ю пѣ́сней, прекло́ньшися бо свы́ше, всѣ́хъ Цари́ца, Ма́ти Дѣ́ва благослове́ньми вѣнчава́етъ воспѣва́ющихъ Ю. Ца́ріе и кня́зи да стеку́тся и Цари́цѣ да воспле́щутъ въ пѣ́снехъ, Царя́ ро́ждшей, и́же сме́ртію одержи́мыя пре́жде разрѣши́ти человѣколю́бно благоизво́лившаго. Па́стыри и учи́тели, до́бляго Па́стыря Пречи́стую Ма́терь, Сло́ва, въ честнѣ́мъ Ея́ хра́мѣ соше́дшеся, восхва́лимъ, свѣ́щникъ златоза́рный и свѣтоно́сный о́блакъ, небе́съ ши́ршую, одушевле́нный же ковче́гъ, огнезра́чный Влады́чній престо́лъ, маннопріе́мную злату́ю ру́чку, затворе́нную Сло́ва две́рь, всѣ́мъ христіа́номъ прибѣ́жище, пѣ́сньми благогла́сными похваля́юще, си́це рце́мъ: пала́то Сло́ва, сподо́би смире́нныхъ на́съ небе́снаго Ца́рствія, вся́ бо возмо́жна хода́тайству Твоему́.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на Богоро́дицы, пѣ́снь 3-я и 6-я. Проки́менъ, [гла́съ 3, пѣ́снь Богоро́дицы]: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíомъ, зача́ло 240. Аллилу́ія, [гла́съ 8:] Слы́ши, Дщи́, и ви́ждь, и приклони́ у́хо Твое́. [Сти́хъ: Лицу́ Твоему́ помо́лятся бога́тіи лю́дстіи.] Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.

Примѣчаніе:
[1] Свидѣтеліе, очевидцы.

Источникъ: Слу́жба зна́менія, бы́вшаго отъ ико́ны Пресвяты́я Влады́чицы на́шея Богоро́дицы, во гра́дѣ Пско́вѣ, и́же надъ Миро́жею рѣко́ю, во оби́тели Свята́го Спа́са. Мѣ́сяца Септе́мврія въ 24-й де́нь. (Изъ Моско́вской Мине́и 1666 го́да.) — СПб.: Сѵнода́льная Типогра́фія, 1902. — 31 л.

/ Къ оглавленію раздѣла /


Наверхъ / Къ титульной страницѣ

0