Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 24-й де́нь.
Святы́я первому́ченицы и равноапо́стольныя Ѳе́клы.

[ВЕЧЕРЪ,]
На Го́споди воззва́хъ: стихи́ры на 6, гла́съ 8. Подо́бенъ: Го́споди, а́ще и на суди́щи.

Го́споди,* а́ще и во око́нца Ѳе́кла приводрузи́ся Твое́й любви́,* но разу́мно въ высоча́йшихъ предстоя́щи престо́лу Твоему́,* удивля́шеся Твоему́ несосу́дному благолѣ́пію,* я́вльшемуся человѣколю́бно,* да спасе́ши ду́ши на́ша. [Два́жды.]

Го́споди,* а́ще и учи́телю Ѳе́кла нево́лею уедини́ся,* но спребыва́юща Тя́ имя́ше во вре́мя страда́нія,* и обнаже́на одѣя́нія,* покрыва́шеся сла́вою Твое́ю,* и вѣнча́вшися руко́ю Твое́ю,* предзащища́етъ ду́ши на́ша. [Два́жды.]

Го́споди,* а́ще и свя́зану Ѳе́кла апо́столу притече́,* но пристра́стія земны́хъ у́зу отве́рже* и крѣ́пости Твоея́ вери́гою любве́* Тебѣ́ крѣ́пко привяза́ся,* Спа́су ду́шъ на́шихъ.

Го́споди,* а́ще и огню́ предаде́ся* чи́стая и первому́ченица Твоя́,* но не опали́ся въ не́мъ,* прохлади́теля иму́щи Тя́,* и во звѣ́рехъ мно́гихъ нея́тна пребы́сть,* руко́ю Твое́ю храни́ма,* Спа́са ду́шъ на́шихъ.

Сла́ва, гла́съ 6:

Страстоте́рпческими боре́ніи врага́ попра́ла еси́, Ѳе́кло всеблаже́нная, и, того́ ко́зни страда́льчески сокруши́вши, Ѳами́ра отбѣ́гла еси́, и Христу́ уневѣ́стилася еси́, и́стинному Рачи́телю, Па́влова собесѣ́днице и Стефа́ну сострада́льнице, дерзнове́ніе иму́щи, первому́ченице Христо́ва въ жена́хъ, вѣ́рно соверша́ющихъ всепра́зднственную па́мять твою́, отъ бѣ́дъ изба́ви моли́твами твои́ми.

И ны́нѣ, богоро́диченъ. Аще ли среда́ или́ пято́къ, крестобогоро́диченъ. Подо́бенъ: Все́ отло́жше.

Ору́жіе, я́коже рече́ Симео́нъ,* се́рдце Твое́ про́йде, Пресвята́я Влады́чице,* егда́ узрѣ́ла еси́* изъ Тебе́ возсія́вшаго неизрече́ннаго Сло́ва* отъ беззако́нныхъ, я́ко осужде́на,* на Крестѣ́ возноси́ма,* о́цта и же́лчи вкуша́юща,* ре́бра же ископава́ема,* рука́ми же и нога́ми пригвожда́ема,* и рыда́ніемъ крича́ла еси́,* вопію́щи ма́терски:* что́ сіе́, Ча́до сла́дкое,* но́вое та́инство?

На стихо́внѣ окто́иха. Сла́ва, святы́я, гла́съ 8. Анато́ліево:

Льво́въ стремле́ніе попра́ла еси́ и Ѳами́ра посрами́ла еси́, первому́ченице многострада́льная, послѣ́довала еси́ Жениху́ Твоему́, зову́щи: въ воню́ мѵ́ра Твоего́ притеко́хъ, Христе́. Тѣ́мъ и Па́вла и́щущи, съ небесе́ прія́ла еси́ дарова́ніе, и вѣне́цъ улучи́ла еси́ отъ страстополо́жника Бо́га, и мо́лиши непреста́нно дарова́ти грѣхо́въ проще́ніе, вѣ́рою соверша́ющимъ свяще́нную твою́ па́мять.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ми очесы́ ви́дится, о Влады́ко?* Содержа́й всю́ тва́рь,* на Дре́вѣ повѣ́шенъ бы́лъ еси́* и умерщвля́ешися, всѣ́мъ дая́й жи́знь, —* Богоро́дица пла́чущи глаго́лаше,* егда́ узрѣ́ на Крестѣ́ вознесе́на* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 4:

Словесе́мъ Па́вловымъ научи́вшися, богоневѣ́стная Ѳе́кло, и вѣ́рою утверди́вшися отъ Петра́, богозва́нная, первому́ченица яви́лася еси́ и первострада́льница въ жена́хъ, возшла́ еси́ на пла́мень, я́ко на мѣ́сто благоцвѣту́щее, звѣ́ри и юнцы́ устраши́шася тебе́, вооружи́ся бо Кресто́мъ. Тѣ́мъ моли́, всехва́льная, Христа́ Бога, спасти́ся душа́мъ на́шимъ.


НА УТРЕНИ,
Оба кано́на окто́иха, безъ му́ченичновъ, и святы́я кано́нъ на 6, его́же краегране́сіе: Первому́ченица боже́ственно сла́вится. Іоа́нна мона́ха. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко еди́нъ сла́вно просла́вися.

Гла́съ язы́ка не мо́жетъ всесла́вныхъ первому́ченицы повѣ́дати страда́льчествъ, изнемога́етъ бо къ похвалѣ́ досто́йнѣй.

Преста́ мучи́телево суесло́віе прего́рдое, на того́ бо жены́ благоче́стно во Христѣ́ му́жествоваша.

Глаго́лы неизрече́нными ева́нгельски огласи́вшися твои́ми, всеблаже́нне Па́вле, Христу́ дѣ́ва уневѣ́стися.

Богоро́диченъ: Гро́здъ Тя́ жизноно́сный, всемíрнаго точа́щъ сла́дость спасе́нія, Дѣ́ва, Христе́, породи́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Оле любве́ твоея́, па́че ума́, всечестна́я! Имже о Христѣ́ Па́влу привяза́лася еси́, соедини́вшися ду́хомъ.

Уязви́ти тя́, сла́вная, уя́звльшуюся жела́ніемъ духо́внымъ, мы́сль не возмо́же, земны́хъ наслажде́ніе.

Всѣ́хъ отсту́пльши плотски́хъ пристра́стій, бесѣ́дами ма́терними не умягчи́лася еси́, страстоте́рпице всехва́льная.

Богоро́диченъ: Евы прама́тере Ты́ исправле́ніе была́ еси́, Нача́льника жи́зни мíру, Богоро́дице, ро́ждши.

Конда́къ, гла́съ 8. Подо́бенъ: Яко нача́тки.

Дѣ́вства добро́тою просія́ла еси́, и му́ченичества вѣнце́мъ украси́лася еси́, апо́стольству ввѣря́ешися, дѣ́во, я́ко пресла́вная, и огня́ у́бо пла́мень въ ро́су преложи́ла еси́, юнца́ же я́рость моли́твою твое́ю укроти́ла еси́, я́ко первострада́льная.

Та́же сѣда́ленъ, гла́съ 8. Подо́бенъ: Прему́дрости.

Въ му́жество же́нство добродѣ́тельми преложи́вши любо́вію Христо́вою, Бо́жіе жили́ще обою́ду была́ еси́, страсте́й бо мра́къ поще́ніемъ ума́ливши, му́ченически показа́лася еси́ страда́нія хвала́. Тѣ́мъ и мíру, я́ко свѣти́ло, свѣ́тиши сугу́бо, возсія́ющи лучи́ Ду́ха, первому́ченице всехва́льная. Моли́ Христа́ Бо́га, прегрѣше́ній оставле́ніе пода́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́, безсѣ́менно ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тебѣ́ Божества́, и, я́ко младе́нца, дои́ши Зижди́теля и Го́спода. Тѣ́мже, а́нгельскій и человѣ́ческій ро́дъ, досто́йно сла́вимъ всесвято́е Рождество́ Твое́, и согла́сно вопіе́мъ Ти́: моли́ Христа́ Бо́га прегрѣше́ній оставле́ніе дарова́ти, досто́йно пою́щимъ сла́ву Твою́.

Крестобогоро́диченъ:

Агнца и Па́стыря и Изба́вителя Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости; долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй прегрѣше́ній оставле́ніе, вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Обруче́ную Ѳами́ру, невѣстово́децъ Па́велъ тя́ сочета́ Жениху́ Небе́сному, я́ко непоро́чную, Ѳе́кло всечестна́я.

Привѣ́силася еси́ любо́вію благоче́стія, Па́вловыми словесы́, и Ѳами́ровы глаго́лы, я́ко буесло́віе, му́ченице, укори́ла еси́.

Кропле́ніемъ боже́ственныя кро́ве Ада́мскій ро́дъ благослови́ся: Ева ра́дуется, ви́дящи у́бо жена́ми льсти́ваго змíя па́дающа.

Чистоту́ возлюби́вши, вся́ кра́сная житія́ отве́рже, бога́тство, ро́дъ, красоту́ и сла́дости обру́чника, первому́ченица.

Богоро́диченъ: Богоро́дицу Тя́, Всечи́стая, просвѣще́нніи, вси́ зна́емъ: Со́лнце бо родила́ еси́ Пра́вды, Приснодѣ́во.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Претя́жкимъ страда́ніемъ на три́знищи подвиза́лася еси́, Ѳе́кло всеблаже́нная, и по́чести удосто́илася еси́.

Окра́деся змíй лука́вый, дѣ́ва бо боже́ственными Страстьми́ послуша́нію науча́шеся.

Побѣжда́шеся стыдѣ́ніе твое́ боже́ственнымъ дерзнове́ніемъ: о́гнь бо тя́ серде́чный, су́щій Тро́ицы, разжже́.

Богоро́диченъ: Марíе, Богоро́дице Безневѣ́стная, наде́жды враго́въ осуети́ и пою́щія Тя́ возвесели́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Отрокови́ца естества́ сла́бость, крѣ́постію Креста́ укрѣпи́вшися, ю́ношеское украше́ніе боже́ственною любо́вію отве́ргши, но́щію бо дерзне́ и потече́, жела́емаго благово́нная и́щущи уче́нія.

Черто́говъ преесте́ственно невѣ́стныхъ самово́льною измѣни́ любо́вію, благосла́вная и первому́ченица Ѳе́кла, е́же злодѣ́евъ обита́ти во узи́лищи: жела́ніе бо Творца́ зда́ній побѣжда́ше жела́нія.

Въ ду́сѣ облобыза́ше у́зы боже́ственнаго учи́теля, му́ченица, въ темни́цѣ я́ко въ боже́ственномъ цвѣ́тницѣ напая́ема словесы́, и возраста́ше, и приноша́ше, я́ко и́стинно Влады́цѣ, пло́дъ краснѣ́йшій.

Богоро́диченъ: Яко шипо́къ, я́ко чистѣ́йшій кри́нъ, я́ко благово́нную воню́, Отрокови́це, Творе́цъ, отъ кра́сныхъ удо́лій мірски́хъ Тя́ избра́въ, всели́ся во утро́бу Твою́, и роди́вся, благово́нія вся́ испо́лни.

Конда́къ, гла́съ 2. Подо́бенъ: Вы́шнихъ ища́.

Уязви́вши твое́ се́рдце, добродѣ́во, любо́вію Христо́вою, обру́чника вре́меннаго, я́ко небрего́ма, преоби́дѣла еси́, и на о́гнь дерзну́ла еси́, звѣре́й же уста́ загради́ла еси́, и спа́сшися отъ ни́хъ, прилѣжа́ше, Па́вла и́щущи, Ѳе́кло первострада́льная.

Икосъ:

Отъ Па́вла научи́вшися пути́ и́стины, по нему́же неукло́нно ше́ствовала еси́, пречу́дная, и твои́хъ оста́вивши, я́ко стра́нная, Стра́нному послѣ́довала еси́ му́жественнымъ ра́зумомъ и о́бразомъ. Тѣ́мже и Влады́ка тя́ же́нъ страстоте́рпицъ первострада́льну показа́ въ концѣ́хъ, въ ни́хже обше́дши пребыла́ еси́, Па́вла и́щущи, Ѳе́кло первострада́льная.

Пѣ́снь 7.

Ирмо́съ: Отъ Іуде́и доше́дше, о́троцы въ Вавило́нѣ иногда́, вѣ́рою тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Яко у́знику, Па́влу привяза́лася еси́ любо́вію, о всеблаже́нная! Узами нерѣши́мыми, вѣ́рою соглаша́ющи благоче́стно, и спою́щи: отце́въ на́шихъ Бо́же, благослове́нъ еси́.

Спредста́ла еси́ Па́влу предъ суди́щи непра́ведными, о добродѣ́во! И жела́ніемъ Влады́чнимъ вопія́ла еси́ во у́жасѣ, сту́дъ отве́ргши: отце́въ на́шихъ Бо́же, благослове́нъ еси́.

За любо́вь боже́ственную пе́щи тѣ́ло, му́ченице, отдала́ еси́, и Жела́емаго пребыла́ еси́ неопа́льна си́лою, вопію́щи: отце́въ на́шихъ Бо́же, благослове́нъ еси́.

Тучено́сный о́блакъ, дожде́мъ и гра́домъ пла́мень погаси́въ, пра́ведно попаля́етъ неразу́мныя и спаса́етъ пѣснопою́щую му́ченицу: отце́въ на́шихъ Бо́же, благослове́нъ еси́.

Богоро́диченъ: Же́злъ была́ еси́, Дѣ́во, изъ Іессе́ева ко́рене, Преблаже́нная, Пло́дъ цвѣтонося́щій спасе́нія вѣ́рою Сы́ну Твоему́ зову́щимъ: отце́въ на́шихъ Бо́же, благослове́нъ еси́

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те Его́ во вѣ́ки.

Странноявле́ненъ тво́й по́мыслъ, во гро́бъ бо, я́ко во Еде́мъ, дѣ́во, всели́лася еси́, му́ченице, пою́щи Христа́ во вѣ́ки.

Помрачи́тися благолѣ́пію дѣ́вства свѣ́тлости не терпя́щи, твоея́ добро́ты, умре́ти изво́лила еси́ и жи́ти во вѣ́ки.

Животворя́щему и преесте́ственному сочета́вшися Христу́, первому́ченице, Жениху́, звѣ́ри изво́лила еси́ бы́ти храни́тели дѣ́вства.

Совле́кши твою́ тлѣ́нія оде́жду, благооде́ждна Христо́ва стадіоте́чница, прешла́ еси́ къ нестарѣ́ющей жи́зни во вѣ́ки.

Богоро́диченъ: Преесте́ственно Содѣ́теля и Спа́са, Бо́га Сло́ва, родила́ еси́, Дѣ́во. Тѣ́мъ Тя́ чти́мъ, Чи́стая, во вѣ́ки.

Пѣ́снь 9.

Ирмо́съ: Тя́, неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стину Бо́га, вы́шшую пречи́стыхъ си́лъ, немо́лчными славословле́ніи велича́емъ.

Кто́ твоему́ непобѣ́дному, о первому́ченице, не подиви́тся? Звѣ́ри бо мы́сленныя, стра́сти души́, укроти́вши, и неудержа́нныхъ звѣри́ныхъ стремле́ній не убоя́лася еси́, но пребыла́ еси́ посредѣ́ си́хъ нерастли́ма.

Не прохо́дный тве́рдый Бо́жіимъ повелѣ́ніемъ разсѣ́деся тебѣ́ ка́мень, богоно́снѣй му́ченицѣ, ба́нею возрожде́нія запеча́тствованну боже́ственную невѣ́сту, я́ко черто́гъ, бѣжа́щу вну́трь прія́тъ.

Исцѣли́, первому́ченице, я́звы души́ моея́, мíру ми́ръ пода́ждь, Вѣ́рному Импера́тору на́шему на ва́рвары враги́ побѣ́дная даю́щи, и мíръ Це́рквамъ твои́ми моли́твами.

Богоро́диченъ: Тебе́, Пресла́вную и Всесвяту́ю Богоро́дицу, вси́ вѣ́рніи, сла́вимъ немо́лчными пѣ́сньми и пое́мъ, я́ко ро́ждшую Го́спода всѣ́хъ, на спасе́ніе пою́щихъ Тя́.

Свѣти́ленъ:

Же́нъ сла́ву, наста́вницу страда́льцевъ, отве́рзшую всѣ́мъ муче́нія пути́, равноапо́стольную Ѳе́клу и первострада́льную благопохва́лимъ.

Богоро́диченъ:

Крѣ́пкимъ Твои́мъ кро́вомъ отъ навѣ́та враго́въ, Чи́стая, Твоя́ рабы́, сохрани́ ны вся́ невре́дны, Тя́ бо стяжа́хомъ еди́ну прибѣ́жище въ ну́ждахъ.

На хвали́техъ стихи́ры на 4, гла́съ 2. Анато́лія:

Невѣ́стника иму́щи на небесѣ́хъ, Христа́ Бо́га, жениха́ же небрегла́ еси́ привре́меннаго и обру́чника, Ѳе́кло первострада́льная, ма́тернимъ бо ласка́ніемъ разу́мно не повину́вшися, Па́влу послѣ́довала еси́, на ра́мена взе́мши зна́меніе Креста́, и огня́ у́бо не устраши́лася еси́, звѣре́й же свирѣ́пство въ кро́тость преложи́ла еси́. Фоки́ умертви́ла еси́, е́же о Христѣ́ погруже́ніемъ свята́го Креще́нія. Но, я́ко во страда́ніихъ до́блественнѣ боже́ственнѣ возсія́вшая, не оста́ви, моля́щися непреста́нно Го́споду, о вѣ́рою соверша́ющихъ всечестну́ю твою́ па́мять.

Гла́съ то́йже.

Возложи́вши себе́ всеси́льному манове́нію, укрѣпля́ема, я́ко первому́ченица Христо́ва, оста́вивши земну́ю любо́вь, одѣ́ялася еси́ во свѣ́тъ вѣ́чныя жи́зни, въ блаже́нный су́щи черто́гъ, въ не́мже же́нъ стада́ почива́ютъ, вхо́дъ обрѣ́тши вѣ́чныя жи́зни. Съ ни́миже моли́ся, равноапо́стольная Ѳе́кло, о душа́хъ на́шихъ.

Гла́съ 4:

Ли́къ соста́вите, мучениколю́бцы, подвиго́въ бо наста́ вре́мя, и первому́ченицы лѣ́тняя па́мять, вся́ на славосло́віе поуща́ющая Бо́жіе. Ѳе́кла бо, пе́рвая му́ченица въ жена́хъ, страда́льное по́прище соверши́вши, пе́рвая и вѣнцено́сица яви́ся, со дерзнове́ніемъ моля́щися о душа́хъ на́шихъ.

Гла́съ то́йже.

Твое́ па́че человѣ́ка страда́ніе, первому́ченице Христо́ва, не человѣ́честіи то́чію удиви́шася наро́ди, но и звѣ́ріе ужасо́шася свирѣ́піи, пла́мени не пла́мени вмѣни́шася тебѣ́, добродѣ́во Ѳе́кло, твоего́ ра́ди Жениха́ Христа́. Ра́довалася еси́ у́бо, Того́ ра́ди стра́ждущи и мíра отлуча́ема, да небе́снаго получи́ши блаже́нства, со дерзнове́ніемъ моля́щися о душа́хъ на́шихъ.

Сла́ва, гла́съ 1. Анато́лія:

Страда́льческій по́двигъ дне́сь предлежи́тъ, лю́діе, ликовству́имъ, и въ не́мъ соверша́емыя и пресла́вныя ве́щи у́зримъ: нескве́рная бо а́гница предлежи́тъ заколе́нію, по закла́вшемся о на́съ Христѣ́ Бо́зѣ, добродѣ́ва Ѳе́кла и богоневѣ́стная. Тѣ́мже тро́ическою вѣ́рою мучи́телей разруши́ безбо́жіе, и со а́нгелы ликовству́ющи, Спа́су мо́лится спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

Ору́жіе про́йде,* о Сы́не, Дѣ́ва глаго́лаше,* на Дре́вѣ я́ко узрѣ́* Христа́ ви́сяща,* Мое́ се́рдце* и терза́етъ, Влады́ко,* я́коже дре́вле Симео́нъ Мнѣ́ предрече́;* но воста́ни и спросла́ви, Безсме́ртне,* Ма́терь и Рабу́ Твою́, молю́ся.

На стихо́внѣ окто́иха. Сла́ва, му́ченицы, гла́съ 2. Анато́лія:

Пріиди́те, мучениколю́бцы, же́нъ похвалу́, первому́ченицу Ѳе́клу, въ пѣ́снехъ почти́мъ. Та́ бо супоста́та врага́ си́лою кре́стною попра́, и побѣ́ду взе́мши, досто́йно вѣнча́ся. Тѣ́мъ мо́лится многострада́льная, е́же изба́витися бѣ́дъ и бу́дущаго суда́, вѣ́рою и любо́вію соверша́ющимъ па́мять ея́.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Болѣ́зни претерпѣ́ла еси́ мно́гія въ распя́тіи Сы́на и Бо́га Твоего́, Пречи́стая, стеня́щи, слезя́щи и восклица́ющи: увы́ мнѣ́, Ча́до сладча́йшее, непра́ведно ка́ко стра́ждеши, хотя́ изба́вити су́щія изъ Ада́ма земноро́дныя? Тѣ́мъ, Всечи́стая Дѣ́во, Тя́ мо́лимъ вѣ́рою: ми́лостива на́мъ Того́ содѣ́лай.


НА ЛИТУРГІИ,

Блаже́нна окто́иха на 4, и святы́я пѣ́снь 3-я на 4. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, [Го́спода отъ исто́чникъ Изра́илевыхъ]. Апо́столъ къ Тимоѳе́ю, зача́ло 296. Аллилу́ія, гла́съ 1: Терпя́, потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Матѳе́я, зача́ло 104. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 230 об. – 235 об.

/ Къ оглавленію раздѣла /


Наверхъ / Къ титульной страницѣ

0