Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 23-й де́нь.
Зача́тіе честна́го сла́внаго проро́ка, Предте́чи и Крести́теля Госпо́дня Іоа́нна.

ВЕЧЕРЪ,
Обы́чная каѳи́сма. На Го́споди воззва́хъ: стихи́ры на 6, гла́съ 4. Подо́бенъ: Зва́нный свы́ше.

Свяще́нствуя боже́ственный Заха́рія,* и вну́трь бы́въ боже́ственнѣйшаго хра́ма,* и люде́й проше́нія принося́* Благодѣ́телю и Всеще́дрому,* боже́ственнѣйшаго а́нгела ви́дѣ, вопію́ща ему́:* моли́тва и моле́ніе твое́ услы́шася,* дерза́й, ста́рче, и не не вѣ́руй мнѣ́,* возымѣ́еши бо отроча́,* боже́ственнаго Предте́чу,* въ рожде́нныхъ жена́ми преиму́щаго,* Иліино́ю си́лою* Христу́ предше́ствующаго. [Два́жды.]

Стра́ненъ явля́ешися мнѣ́* видѣ́ніемъ и сло́вомъ,* стра́ненъ и глаго́лы и возвѣще́ньми, —* Заха́рія противовѣща́. —* Азъ бо спасе́нія лю́демъ пріидо́хъ проси́ти,* а не ча́да прія́ти,* я́ко ты́ приглаша́еши,* сопроти́вна тя́ обрѣта́ю проше́ній* и помышля́ю не и́стинствовати тя́.* Ка́ко бо, е́же глаго́леши, извѣ́стно яви́тся?* Елисаве́тъ бо непло́ды е́сть,* и а́зъ же, я́ко вѣ́си, ста́рецъ. [Два́жды.]

Что́ не вѣ́руеши словесе́мъ мои́мъ, Заха́ріе?* лжи́во благовѣ́щеніе глаго́леши приноси́ти мнѣ́?* Бо́жій арха́нгелъ е́смь,* я́же ми́ повелѣ́нна су́ть,* сія́ тебѣ́ глаго́лю, съ тобо́ю стоя́;* поне́же не вѣ́ровалъ еси́,* и не я́тъ вѣ́ры,* бу́деши глу́хъ и безгла́сенъ,* до́ндеже у́бо у́зриши мои́хъ глаго́лъ боже́ственное сбытіе́.* Егда́ же роди́тъ Елисаве́тъ тебѣ́* Сло́ва гла́съ — вели́каго Предте́чу,* уясняю́щуся язы́ку, благослови́ши Бо́га Изра́илева. [Два́жды.]

Сла́ва, гла́съ 6. Византíево:

Отъ непло́днаго дне́сь чре́ва пло́дъ моли́твы прозябе́ — Іоа́ннъ Предте́ча. Весели́ся, пусты́не, и лику́й, человѣ́чество, се́ бо покая́нія проповѣ́дникъ гряде́тъ во чре́вѣ ма́терни воплоща́тися. Пріиди́те, ра́дующеся въ сла́внѣмъ его́ зача́тіи, празднолю́бцы, лику́имъ, вопію́ще: и́же въ рожде́нныхъ жена́ми бо́льшій сы́й, не преста́й моли́тися, о вѣ́рою соверша́ющихъ боже́ственное твое́ зача́тіе, я́ко да обря́щемъ очище́ніе грѣхо́въ и ве́лію ми́лость.

И ны́нѣ, богоро́диченъ: Кто́ Тебе́ не ублажи́тъ...

На стихо́внѣ стихи́ры, гла́съ 6. Подо́бенъ: Все́ отло́жше.

Иду́щу во Свята́я святы́хъ свя́то,* свяще́нному проро́ку,* свято́му святы́й, я́коже писа́ся,* предста́въ, а́нгелъ приглаша́ше, глаго́ля:* услы́шася моли́тва твоя́,* и разрѣша́ется ны́нѣ Елисаве́тино непло́дство,* и роди́тъ тебѣ́, ста́рче, сы́на,* Іоа́нна Предте́чу,* свѣти́льника Со́лнца,* проро́ка Высоча́йшаго* и гла́съ, изъ Дѣ́вы Богоотрокови́цы* Сло́ва возсія́вшаго.

Сти́хъ: И ты́, отроча́,* проро́къ Вы́шняго нарече́шися.

Глаго́ли ми́ я́вственнѣйше,* по чему́ позна́ю сіе́? —* па́ки ко а́нгелу блаже́ннѣйшій ста́рецъ рече́, —* я́ко ви́диши, испо́лненъ бо днíй е́смь,* Елисаве́тъ же непло́ды е́сть,* ка́ко у́бо мнѣ́ глаго́лы вѣща́еши* па́че естества́? удивля́юся.* Отню́дъ не и́стинствующа тя́ ны́нѣ помышля́ю,* о человѣ́че! отыди́.* Азъ бо лю́демъ избавле́нія испроша́ю,* а не отроча́ прія́ти,* ве́щь неудобопрія́тну.

Сти́хъ: Служи́ти Ему́ преподо́біемъ и пра́вдою предъ Ни́мъ* вся́ дни́ живота́ на́шего.

Бо́га Вседержи́теля* арха́нгелъ а́зъ е́смь,* Гавріи́лъ мнѣ́ и́мя, —* ста́рцу рече́ безтѣле́сный, —* и ны́нѣ огло́хни* и молча́нію научи́ся,* не вѣ́ровавъ мои́мъ глаго́ломъ.* Егда́ же роди́тъ ти́* трубу́ Сло́ва сопру́жница,* Ду́ху уясня́ющу тво́й язы́къ,* возопіе́ши я́вственнѣйше:* проро́къ Высоча́йшаго назове́шися, о отроча́!* Того́ предугото́вати благода́тію стези́,* я́ко благоволи́.

Сла́ва, гла́съ 6. Самогла́сенъ:

Ангелъ изъ непло́дныхъ ложе́снъ произше́лъ еси́, Крести́телю: отъ самы́хъ пеле́нъ въ пусты́ню всели́лся еси́, печа́ть же всѣ́хъ проро́ковъ показа́лся еси́. Его́же бо они́ многообра́зно прови́дѣша и гада́тельнѣ проповѣ́даша, Сего́ крести́ти во Іорда́нѣ удосто́ился еси́. Гла́съ же услы́шалъ еси́ Оте́ческій съ небесе́, свидѣ́тельствующь Того́ Сыновство́, и Ду́ха ви́дѣлъ еси́ голуби́цы въ ви́дѣ, гла́съ влекíй на Креща́емаго. Но, о проро́ковъ всѣ́хъ вы́шшій! Не преста́й моли́тися о на́съ, вѣ́рно твою́ соверша́ющихъ па́мять.

И ны́нѣ, богоро́диченъ:

Никто́же, притека́яй къ Тебѣ́, посра́мленъ отъ Тебе́ исхо́дитъ, Пречи́стая Богоро́дице Дѣ́во, но про́ситъ благода́ти и пріе́млетъ дарова́ніе къ поле́зному проше́нію.

Тропа́рь, гла́съ 4:

Пе́рвѣе неражда́ющая непло́ды, возвесели́ся, се́ бо зачала́ еси́ Со́лнца свѣти́льника я́вѣ, просвѣща́ти иму́ща всю́ вселе́нную, слѣпото́ю неду́гующую. Лику́й, Заха́ріе, вопія́ со дерзнове́ніемъ: проро́къ Вы́шняго е́сть хотя́й роди́тися.

Сла́ва, и ны́нѣ, богоро́диченъ: Еже отъ вѣ́ка утае́нное...

На повече́ріи, по трисвято́мъ, конда́къ Предте́чи.



НА УТРЕНИ,
По 1-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Елисаве́тъ непло́дствія свобо́дися, Дѣ́ва же па́ки Дѣ́ва пребы́сть, егда́ гла́сомъ Гавріи́ловымъ во чре́вѣ зача́тъ. Но во утро́бѣ предыгра́етъ, и́же во чре́вѣ дѣ́вственнѣмъ Бо́га предувѣ́давъ и Влады́ку, Предте́ча Іоа́ннъ, во спасе́ніе на́ше воплоща́ема. [Два́жды.]

Сла́ва, и ны́нѣ:

Ра́дуйся, горо́ свята́я и богохо́дная; ра́дуйся, одушевле́нная купино́ и неопа́льная; ра́дуйся, еди́на къ Бо́гу мíра мо́сте, преводя́щій сме́ртныя къ вѣ́чнѣй жи́зни; ра́дуйся, нетлѣ́нная Отрокови́це, неискусому́жно ро́ждшая спасе́ніе ду́шъ на́шихъ.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Го́рлица пустынолю́бная, свяще́нный Крести́тель, проповѣ́давый покая́ніе и яви́вый Христа́, бы́вша Человѣ́ка, всѣ́хъ грѣша́щихъ роди́ся предста́тель, всѣ́мъ обурева́емымъ помоществу́я неотсту́пнѣ. Того́ мольба́ми, Христе́, спаси́ мíръ Тво́й. [Два́жды.]

Сла́ва, и ны́нѣ, богоро́диченъ:

Еди́на ро́ждшая Творца́ всѣ́хъ, еди́на украси́вшая человѣ́чество рождество́мъ Твои́мъ, Пречи́стая, изба́ви мя́ сѣте́й льсти́ваго веліа́ра, поста́ви мя́ на ка́мени Христо́выхъ хотѣ́ній, Того́ моля́щи прилѣ́жнѣ, Его́же воплоти́ла еси́.

Оба кано́на окто́иха безъ му́ченичновъ и свята́го на 6. Іоа́нна Дамаски́на. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Непло́дствующія души́ моея́ помышле́нія непло́дная исто́ргни, непло́дныя прозябе́ніе благохвали́ти начина́ющу, твое́ во утро́бѣ ма́терни свято́е зача́тіе.

Свяще́нный Заха́рія, въ хра́мъ вше́дъ, ви́дѣ боже́ственнаго а́нгела, ему́ я́вѣ возвѣща́юща: сы́на въ ста́рости, свяще́нниче, пріи́меши Предте́чу.

Свѣти́льникъ Со́лнца сла́вы свѣтоза́ренъ во чре́вѣ зачина́ется возсія́ти ма́терни, и́мже тма́ разрѣша́ется страсте́й и непло́дствія у́зы — вели́кій Предте́ча.

Богоро́диченъ: Во чре́вѣ Твое́мъ Влады́ку, въ Ма́терни носи́ма, Богоро́дице Пречи́стая, чре́вѣ, ви́дѣвъ, взыгра́ся я́вѣ Іоа́ннъ, я́ко су́щій Того́ Предте́ча.

Катава́сія: Отве́рзу уста́ моя́...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Непло́ды дне́сь пло́дъ свяще́нный зачина́етъ, и́же напослѣ́докъ все́ непло́діе ду́шъ сѣки́рою мы́сленною отсѣщи́ хотя́щъ, благода́тію.

Огло́хнувъ вну́трь хра́ма, Заха́ріе вели́кій гла́съ Сло́ва возвѣще́ніемъ стра́шнымъ пріе́млетъ и свѣ́тло велича́етъ Го́спода благоутро́бнаго.

Показа́вый стезю́ тве́рду вѣ́рнымъ покая́нія, повелѣ́ніемъ а́нгела во чре́вѣ ма́терни прозябе́, Боже́ственнымъ Совѣ́томъ па́че наде́жди, сла́вный Предте́ча.

Богоро́диченъ: Во чре́вѣ носи́маго Христа́ Дѣ́вы я́ко позна́, и́же изъ непло́дове, взыгра́ся, провозвѣща́я ра́дость, прише́дшую на зе́млю сѣ́тованія вся́ изба́вити.

Сѣда́ленъ, гла́съ 4. Подо́бенъ: Удиви́ся Іо́сифъ.

Кадя́щу въ хра́мѣ Заха́ріи свяще́нному, Гавріи́лъ съ небесе́ предста́, глаго́ля къ нему́: я́ко въ ста́рости твое́й возымѣ́еши пло́дъ благосла́венъ, и непло́дство пе́рвое Елисаве́ти ны́нѣ разрѣши́тся а́біе, и непло́дства рожде́ніе; и заче́нши, роди́тъ проповѣ́дника Іису́сова же и Предте́чу. Тѣ́хъ мольба́ми, Спа́се мíра, спаси́ ду́ши на́ша. [Два́жды.]

Сла́ва, и ны́нѣ, богоро́диченъ:

Чи́стая, Всенепоро́чная и Неискусобра́чная, еди́на Безлѣ́тнаго Сы́на и Сло́во Бо́жіе въ лѣ́тѣ ро́ждшая, Того́ со святы́ми и честны́ми апо́столы, му́ченики и проро́ки, преподо́бными, моли́ дарова́ти на́мъ очище́ніе и ве́лію ми́лость.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Гла́съ а́нгеловъ тя́, су́що а́нгела Христо́ва прише́ствія, свяще́ннику свяще́нно провозвѣсти́, изъ чре́ва непло́днаго прозяба́ти, блаже́нне Предте́че.

Пре́жде безча́дная и неражда́ющая, ны́нѣ весели́ся, непло́ды, я́ко Христо́ва Крести́теля и Предте́чу плодороди́ши всесла́вно, Елисаве́то досточу́дная.

Сѣки́рою, Предте́че, твоея́ моли́твы страсте́й мои́хъ те́рніе и помышле́ній исто́ргни преткнове́нія и плодоно́сенъ мо́й у́мъ добродѣ́тельми, всеблаже́нне, сотвори́.

Богоро́диченъ: Чре́во Тя́ ноша́ше, вся́ нося́щаго, Дѣ́вы, егда́ Крести́тель, во утро́бѣ носи́мь, Тебѣ́ поклони́ся, Христе́, и игра́я веселя́шеся.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Иду́щу вну́трь святи́лища и зако́нныя Творцу́ слу́жбы принося́щу яви́ся проро́ку святы́й а́нгелъ, возвѣща́я Предте́чи боже́ственное зача́тіе.

Ка́ко бу́детъ сіе́ мнѣ́ явле́нно? Есмь бо ста́рецъ, я́ко ви́диши, и непло́дну сопру́жницу и́мамъ, — рече́ Заха́рія ко арха́нгелу, — естества́ проти́вныя мнѣ́ глаго́леши глаго́лы.

Къ Са́ррѣ воззри́ Авраа́мовѣ и ви́ждь, ка́ко она́ Исаа́ка въ ста́рости роди́, человѣ́че, и глаго́лемымъ пра́ведно вѣ́руй, ста́рцу приглаша́ше вели́кій а́нгелъ.

Богоро́диченъ: Благослове́нна въ жена́хъ Ты́, Богора́дованная, я́вѣ Елисаве́тъ вопія́ше Тебѣ́, егда́ ражда́ющу безму́жно позна́ Тя, еди́ну по рождествѣ́ нетлѣ́нну пребы́вшу.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Сомнѣ́нно и́мамъ помышле́ніе а́зъ, и не вѣ́рую словесе́мъ твои́мъ, — арха́нгелу рече́ свяще́нникъ, — люде́й бо спасе́нія, не отъ мои́хъ чре́слъ плода́ прошу́.

Созда́тель естества́, а́нгеловъ Ца́рь, — служи́тель отвѣща́, — прише́ствія Своего́ а́нгела благоволи́ роди́ти тебѣ́; мои́мъ словесе́мъ не не вѣ́руй, человѣ́че.

Ви́дъ тво́й о́гненъ, и взо́ръ тво́й стра́шенъ, и чу́дно сло́во твое́, — Заха́рія рече́ служи́телю, — но у́бо не вѣ́рую тебѣ́, па́че естества́ глаго́лющу ми́ стра́нныя глаго́лы.

Богоро́диченъ: Свѣти́льникъ Со́лнца во о́блацѣ Ма́терни утро́бѣ скрыва́емь, позна́въ, сы́й въ те́мнѣмъ ложесна́ селе́ніи, поклони́ся, ра́дуяся, и игра́ше.

Конда́къ, гла́съ 1. Подо́бенъ: Ли́къ а́нгельскій.

Весели́тся свѣ́тло Заха́рія вели́кій со всесла́вною Елисаве́тію сопру́жницею, досто́йно зачина́юще Іоа́нна Предте́чу, его́же арха́нгелъ благовѣсти́, ра́дуяся, и человѣ́цы достодо́лжно почти́мъ, я́ко таи́нника благода́ти.

Икосъ:

Свяще́нное Ева́нгеліе разгне́мъ, е́же Лука́ на́мъ написа́, свяще́нный и чу́дный, и Предте́чево у́зримъ зача́тіе, свѣ́тлое и честно́е. Глаго́летъ бо: я́ко вни́де ста́рецъ и пра́ведный Заха́рія во Свята́я святы́хъ, е́же покади́ти во вре́мя чреды́, предста́ ему́ Гавріи́лъ, благовѣству́я и глаго́ля: возымѣ́еши сы́на, священнонача́льниче, въ ста́рости, проро́ка же и Предте́чу, гла́са же и проповѣ́дника, и свѣти́льника присносвѣ́тлаго, и таи́нника благода́ти.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Не вѣ́ровавъ мои́мъ глаго́ломъ, оглохнове́ніе пріими́ явле́ннѣйше, и ражда́емь егда́ у́зриши гла́съ Сло́ва, воспріими́ гла́съ, благослове́нъ еси́, вопія́, Изра́илевъ Бо́же.

Лунѣ́ Елисаве́ти примѣша́яся, многосвѣ́тлый, я́ко со́лнце, Заха́рія свѣтоно́сна свѣти́льника свѣ́та породи́, свѣтя́ща на́мъ, су́щимъ во тмѣ́ страсте́й, держи́мымъ лю́тѣ.

Игра́нія я́ко глаго́лы употреби́въ, Христе́, вели́кій Предте́ча поклони́ся Тебѣ́ во чре́вѣ дѣ́вственнѣмъ, са́мъ носи́мь утро́бою Елисаве́тиною, Іису́се; отце́въ на́шихъ Бо́же, благослове́нъ еси́.

Богоро́диченъ: Луна́ Елисаве́тъ, вну́трь нося́щи звѣзду́, боже́ственнаго Предте́чу, поклони́ся свѣ́тлому о́блаку, Марíи, Со́лнце нося́щей, Христа́, плотоноси́ма отъ Нея́ на спасе́ніе на́ше.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Женихо́въ дру́гъ предуготовля́ется, гла́съ же Сло́ва нача́ло пріе́млетъ, и въ непло́днѣй ны́нѣ утро́бѣ пита́ется, Всецаря́ вели́кій во́инъ.

Непло́днымъ сердца́мъ дѣ́латель процвѣте́, страсте́й сѣки́ра уже́ куе́тся, теле́цъ честны́й воздержа́нія пита́ется, Предте́ча вели́кій: лю́діе, весели́теся.

Узы я́коже дре́вле непло́дныя, моего́ помышле́нія си́це окамене́ніе разрѣши́, Крести́телю, и плоды́ покая́нія мя́ сотвори́ возраща́ти, и жи́ти во вѣ́ки.

Богоро́диченъ: Чревоно́сную Тя́, Отрокови́це, я́ко Елисаве́тъ ви́дѣ, боже́ственнѣ возра́довася, вну́трь ея́ младе́нцу взыгра́вшуся, я́ко позна́вшу своего́ Влады́ку.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Христо́въ вели́кій и боже́ственный Предте́ча, непло́дная ны́нѣ врата́ отве́рзъ, водворя́ется, я́ко во ца́рскихъ, въ боку́ ма́тере: да я́ко во́инъ произы́детъ, Всецаря́ пути́ уготовля́я.

Бо́жій проро́че, ста́рче, лику́й, роди́ши бо сы́на, его́же бо́льшій въ человѣ́цѣхъ не воста́, Іоа́нна, Госпо́дня Предте́чу, взыгра́й, Елисаве́тъ, земля́ вся́, — ра́дуйся, — хвалу́ всѣ́хъ Творцу́ Бо́гу принося́щи.

На́съ, вѣ́рою благохва́лящихъ тя́, помяни́ ны́нѣ, Госпо́день проро́че и Предте́че, отъ душе́вныхъ страсте́й избавля́я: спаса́й ны́ отъ бѣ́дъ, къ небе́снѣй стези́ путево́ждствуя боголѣ́пно, присноблаже́нне.

Богоро́диченъ: Чи́стую Ма́терь я́вѣ позна́ Тя, непло́дныхъ у́зъ Елисаве́тъ я́ко ощути́ разрѣше́ну себе́ и нося́щу Предте́чу во утро́бѣ Твое́й Все́льшагося, Чи́стая Дѣ́во, Маріа́мъ Богора́дованная.

Свѣти́ленъ. Подо́бенъ: Со ученики́.

Предте́чево сла́вное зача́тіе предвозвѣща́етъ изъ Дѣ́вы хотя́щаго роди́тися Царя́, я́ко се́й отъ Елисаве́ти непло́дныя и безча́дныя, ста́рца же и іере́я Заха́ріи вели́каго. Ихже моли́твами, и Богоро́дицы, и Іоа́нна Крести́теля Твоего́, Го́споди, спаси́ и уще́дри вся́. [Два́жды.]

Сла́ва, и ны́нѣ, богоро́диченъ:

Сотвори́ я́ко и́стинно съ Тобо́ю вели́чія Сы́нъ предвѣ́чный совѣ́томъ Оте́ческимъ, Жи́знь бо безсме́ртную безстра́стно родила́ еси́, и пребыла́ еси́ я́ко пре́жде рождества́, ма́терскихъ избѣ́гши, и Дѣ́ва по рождествѣ́ пребыла́ еси́, Дѣ́во.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Весели́тся тва́рь въ зача́тіи твое́мъ,* проро́че и Предте́че,* Крести́телю Іоа́нне,* боже́ственное бо твое́ рожде́ніе предзнамену́етъ на́мъ Влады́чнее Рождество́,* и сего́ ра́ди согла́сно,* су́щіи на земли́, досто́йно восхваля́емъ тя́.

Яко чу́дное свидѣ́тельство* обрѣ́тъ а́нгелъ зача́тіе непло́дныя,* Марíи приво́дитъ, ко увѣре́нію принося́.* Тѣ́мъ и мы́ Елисаве́ти непло́дствіе,* и Заха́рію, сопру́жника ея́,* и Іоа́нна восхва́лимъ.

Богоустро́енный свѣти́льникъ* присносу́щнаго Свѣ́та, Жениха́ дру́гъ,* Со́лнца сла́вы вели́кій свѣтоно́сецъ,* живы́й гла́съ Бо́жія Сло́ва,* Предте́ча прише́ствія Госпо́дня,* а́нгельскимъ приглаше́ніемъ ны́нѣ зачина́ется.

Же́ртвенникъ боже́ственный благово́нія Христо́ва,* одесну́ю стоя́ніе пріи́мъ* и зна́ніе Его́ благово́нствуя,* знамена́тельнѣ познава́ешися, Предте́че,* предста́тельствомъ а́нгеловымъ* одесну́ю святы́хъ прообразу́емь.

Сла́ва, и ны́нѣ, гла́съ 6. Самогла́сенъ:

Елисаве́тъ зача́тъ Предте́чу благода́ти, Дѣ́ва же — Го́спода сла́вы. Цѣлова́стѣся о́бѣ ма́тери, и младе́нецъ взыгра́ся, вну́трь бо ра́бъ хваля́ше Влады́ку. Удиви́вшися, ма́ти Предте́чева нача́тъ вопи́ти: отку́ду мнѣ́ сіе́, да Ма́ти Го́спода моего́ пріи́де ко мнѣ́? Да спасе́тъ лю́ди отча́янныя, имѣ́яй ве́лію ми́лость.

Славосло́віе вели́кое. И тропа́рь свята́го. Сла́ва и ны́нѣ, богоро́диченъ: Еже отъ вѣ́ка утае́нное... Ектеніи́, и про́чая.

Зри: О славосло́віи же вели́комъ да не почуди́шися: возмо́жно у́бо е́сть, я́коже уста́въ изъявля́етъ, и осмогла́снику пѣва́ему, и Го́сподеви пои́мъ.., глаго́лему, сотвори́ти и вели́кое славосло́віе.


НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ къ Гала́томъ, зача́ло 210, отъ полу́: Бра́тіе, Авраа́мъ два́ сы́на имѣ́... Аллилу́ія, гла́съ 4: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Луки́, зача́ло 2: Во вре́мя о́но, бы́сть во дни́ Ирода царя́... Коне́цъ: Поноше́ніе мое́ въ человѣ́цѣхъ. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 225 об. – 230 об.

/ Къ оглавленію раздѣла /


Наверхъ / Къ титульной страницѣ

0