Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 22-й де́нь.
Слу́жба преподо́бному отцу́ на́шему Мака́рію Жа́бынскому, Бѣле́вскому чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, самогла́сны, гла́съ 4:

Соше́дшеся дне́сь, христоимени́тіи лю́діе, пѣ́сньми похва́льными вѣнча́имъ вели́каго во смире́ніи свое́мъ Мака́рія, блаже́нству соиме́ннаго, осѣня́ющаго на́съ покро́вомъ моли́твъ свои́хъ.

Христо́ва тя́ раба́, преподо́бне, вѣ́дуще и подви́жника благоче́стія вели́ка, къ тебѣ́ возво́димъ душе́вная и тѣле́сная очеса́ на́ша, твои́ми предста́тельствы ко Го́споду ча́юще спасе́ніе улучи́ти.

Земны́й а́нгелъ и небе́сный человѣ́къ яви́лся еси́, всеблаже́нне, и, отъ Христа́ пріи́мъ чуде́съ дарова́нія, душе́вныя и тѣле́сныя на́ша неду́ги си́лою твое́ю до конца́ потреби́.

Сла́ва, гла́съ 6:

Весели́тся и ра́дуется Це́рковь Россíйская, ликовству́етъ же оби́тель Жабы́нская, Влады́цѣ своему́ Христу́, я́ко да́ръ благопрія́тенъ, Мака́рія преподо́бнаго принося́, его́же моли́твами сохрани́ и спаси́ ны, Го́споди.

И ны́нѣ, богоро́диченъ, гла́съ то́йже:

Тебѣ́ мо́лимся, я́ко Бо́жіи Ма́тери, Благослове́нная, моли́ о спасе́ніи ду́шъ на́шихъ.

На стихо́внѣ стихи́ры, гла́съ 2:

Оста́вивъ мíръ, преподо́бне, и кре́стъ Христо́въ на ра́мена своя́ взе́мъ, Тому́ послѣ́довалъ еси́ и свѣти́льникъ мíру христіа́нскому яви́лся еси́, ему́же моли́ спасти́ся.

Сти́хъ: Честна́ предъ Го́сподемъ сме́рть преподо́бныхъ Его́.

Пучи́ну житія́ по́стнически преплы́въ, въ ти́хое приста́нище небе́снаго поко́я вше́лъ еси́, блаже́нне, его́же дости́гнути и на́мъ помоли́ся.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Егда́ преста́вился еси́, о́тче, прія́ша тя́ ли́цы а́нгельстіи, срѣто́ша пра́ведныхъ ли́цы, съ ни́ми же ликовству́я во сла́вѣ небе́снѣй и боговидѣ́нія насыща́емь, помяни́ ны́ ко Го́споду преблаго́му.

Сла́ва, и ны́нѣ, богоро́диченъ, гла́съ то́йже:

Предста́тельница и покро́въ Ты́ еси́, Пречи́стая, изба́ви на́съ отъ бѣ́дъ лю́тыхъ и обстоя́ній, и ду́ши на́ша спаси́ боже́ственными Твои́ми моли́твами.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 4. Подо́бенъ: Зва́нный свы́ше.

Преподо́бне о́тче, мяте́жъ мірскíй оста́вивъ и кре́стъ тво́й взе́мъ, послѣ́довалъ еси́ на́съ ра́ди распе́ншемуся Христу́, посто́мъ и жа́ждею плотскíя стра́сти умерщвля́я, грѣхо́вное же те́рніе всено́щными по́двиги искорени́лъ еси́, сле́зными исто́чники напои́лъ еси́ ни́ву души́ твоея́, воздѣ́лавъ пло́дъ стори́чный, и ны́нѣ предстои́ши всѣ́хъ Царю́, Его́же моли́ спасти́ и просвѣти́ти ду́ши на́ша.

Преподо́бне о́тче Мака́ріе, ду́шу и се́рдце отъ страсте́й очи́стивъ, до́мъ Ду́ха Пресвята́го показа́лся еси́, Его́же дѣ́йствіемъ свѣ́тло укра́шенъ бы́въ, зрѣ́лъ еси́ бу́дущая, я́ко настоя́щая, и далеча́йшая, я́ко бли́зъ су́щая, вѣ́сть бо Госпо́дь прославля́ти Своя́ уго́дники, Ему́же ны́нѣ во сла́вѣ небе́снѣй въ ли́цѣ святы́хъ предстоя́, моли́ спасти́ и просвѣти́ти ду́ши на́ша.

Преподо́бне о́тче Мака́ріе, кто́ исповѣ́сть труды́ твоя́, бдѣ́нія же и сухояде́нія, и е́же на земли́ лега́нія, и пусты́нная озлобле́нія? Безстра́стія сосу́дъ бы́лъ еси́, благода́ти испо́лненъ Свята́го Ду́ха, а́нгеломъ собесѣ́дниче и преподо́бнымъ сожи́телю, Вседержи́телю Бо́гу возложи́въ себе́, Его́же моли́ спасти́ и просвѣти́ти ду́ши на́ша.

Преподо́бне о́тче Мака́ріе, стра́нника и прише́льца себе́ на земли́ помышля́я, душе́вныя твоя́ очеса́ ко Іерусали́му небе́сному при́сно возводи́лъ еси́, слеза́ми посте́лю твою́ омыва́я. Ны́нѣ же небе́снаго ра́дованія въ собо́рѣ святы́хъ наслажда́яся и Бо́гови вы́ну предстоя́, моли́ спасти́ и просвѣти́ти ду́ши на́ша.

Ины стихи́ры, гла́съ 2. Подо́бенъ: Егда́ отъ дре́ва.

Егда́ Боже́ственное раче́ніе на́йде на тя́, преподо́бне, мірскíй мяте́жъ оста́вль, во оби́тель всели́лся еси́, въ не́йже трудолю́бнѣ подвиза́вся, украси́лъ еси́ ду́шу твою́ добродѣ́тельми и, наста́вникъ лю́демъ христоимени́тымъ я́влься, вве́лъ еси́ ты́я во огра́ду небе́сную, идѣ́же, ра́дуяся съ тобо́ю, взыва́ютъ ко Го́споду: сла́ва, Человѣколю́бче, Твоему́ смотре́нію.

Егда́ искуше́ніе ве́ліе наведе́ вра́гъ на оби́тель твою́, преподо́бне, ю́же ва́рвары разори́ша, ты́, ре́вности Боже́ственныя испо́лнився и упова́ніе свое́ на по́мощь Ма́тере Бо́жія возложи́въ, трудо́мъ сугу́бымъ вда́лъ еси́ себе́ и, изъ пе́пела ту́ю возсозда́въ и бра́тію собра́въ, съ не́ю ку́пно въ ра́дованіи ду́ха воспѣ́лъ еси́ Бо́гу: сла́ва, Человѣколю́бче, Твоему́ благосе́рдію.

Егда́ къ послѣ́днимъ лѣ́томъ живота́ твоего́, блаже́нне, прибли́зился еси́, вся́ попече́нія земна́я отве́ргъ и въ пучи́ну безмо́лвія вше́дъ, наединѣ́ еди́ному Бо́гови рабо́талъ еси́, душе́вному твоему́ спасе́нію то́кмо внима́я и о ми́рѣ всего́ мíра моля́йся, наипа́че же о бла́гѣ возгражде́нныя тобо́ю оби́тели, немо́лчно Христу́ вопія́: сла́ва, Человѣколю́бче, Твоему́ смотре́нію.

Егда́ преставле́нія твоего́ къ Бо́гу вре́мя приспѣ́, тогда́ непоро́чная твоя́ душа́ непреткнове́нно отъ возду́шныхъ мыта́рствъ, я́ко небопа́рный оре́лъ, крило́ма добродѣ́телей на небеса́ востече́ и ра́дости избра́нныхъ сподо́бися, и та́мо съ серафи́мы Го́сподеви пое́ши: сла́ва, Человѣколю́бче, Твоему́ смотре́нію.

Сла́ва, гла́съ 8:

Пріиди́те, по́стниковъ сосло́вія и вѣ́рныхъ мно́жества, свѣ́тлую и свяще́ннѣйшую па́мять отца́ на́шего Мака́рія восхва́лимъ, зову́ще ему́ си́це: ра́дуйся, свѣти́льниче благода́ти пресвѣ́тлый; ра́дуйся, звѣздо́ мíру свѣтлосія́нная; радуйся, пусты́ни благоукраси́телю и оби́тели возгради́телю; ра́дуйся, исто́чниче чуде́съ преизоби́льнѣйшій и неусыпа́ющій моли́твенниче о чту́щихъ па́мятъ твою́, преблаже́нне.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́. И чте́нія три́, преподо́бническая.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма. И свята́го стихи́ры самогла́сны, гла́съ 2:

Кíими похва́льными вѣнцы́ увязе́мъ Мака́рія преподо́бнаго, всея́ страны́ Россíйскія украше́ніе? То́й бо моли́твами свои́ми оби́тель Богоро́дичну возгради́, то́й и по преставле́ніи свое́мъ вѣ́рнымъ явля́ется и моли́твы возно́ситъ о прибѣга́ющихъ подъ кро́въ его́ ко Христу́, иму́щему ве́лію и бога́тую ми́лость.

Всѣ́мъ предста́тельствуеши, преподо́бне, притека́ющимъ съ вѣ́рою подъ кро́въ тво́й, явля́еши бо ся въ ско́рбехъ утѣ́шитель, въ болѣ́знехъ благосе́рдый вра́чь, на пути́ спасе́нія наста́вникъ прему́дрый, о всѣ́хъ предъ Бо́гомъ моли́твенникъ теплѣ́йшій. Сего́ ра́ди, чту́ще святу́ю па́мять твою́, къ тебѣ́, я́ко отцу́ милосе́рдому, взыва́емъ: моли́ Бо́га о на́съ, свя́те Мака́ріе.

Сла́ва, гла́съ 8:

Па́стырю до́брый, Пастыренача́льника Сы́на Бо́жія усе́рдный подража́телю, услы́ши на́съ, грѣ́шныхъ, призыва́ющихъ въ по́мощь твое́ немо́лчное хода́тайство, и моли́ о на́съ Всеми́лостиваго Бо́га, да избѣ́гнемъ вся́кихъ зо́лъ и напа́стей и улучи́мъ вѣ́чное блаже́нство, во е́же ку́пно съ тобо́ю, преподо́бне Мака́ріе, сла́вити и воспѣва́ти Святу́ю Тро́ицу.

И ны́нѣ, гла́съ то́йже:

Влады́чице, пріими́ моли́твы ра́бъ Твои́хъ [и изба́ви на́съ отъ вся́кія ну́жды и печа́ли].

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, преподо́бне Мака́ріе, Це́ркве Россíйскія пресла́вное украше́ніе, оби́тели твоея́ свѣ́тлая похвало́, Правосла́вія сто́лпе непоколеби́мый, чудотво́рче пресла́вный; ра́дуйся, те́плый на́шъ предста́телю предъ Бо́гомъ. Ему́же вы́ну предстоя́ со всѣ́ми святы́ми, моли́ся о спасе́ніи ду́шъ на́шихъ.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, свяще́нная главо́, и́ноковъ наста́вниче богому́дрый, отъ ю́ности Христа́ возлюби́вый и и́го Его́ благо́е съ ра́достію понесы́й; ра́дуйся, не сло́вомъ то́кмо, но па́че дѣ́ломъ и о́бразомъ житія́ твоего́ всѣ́хъ къ Бо́гу приводя́й. Ему́же и ны́нѣ предстоя́, моли́ся о ча́дѣхъ твои́хъ, вѣ́рою и любо́вію чту́щихъ святу́ю па́мять твою́, о́тче преподо́бне Мака́ріе.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Ра́дуйся, а́нгеломъ собесѣ́дниче, преподо́бне Мака́ріе, благоче́стно бо на земли́ пожи́въ, мно́ги, приходя́щія къ тебѣ́, стра́ху Госпо́дню научи́лъ еси́: благода́тію Пресвята́го Ду́ха озаря́емь, зрѣ́лъ еси́ бу́дущая, я́ко настоя́щая, и умиле́нія и ра́дости мно́ги, скорбя́щія душа́ми, испо́лнялъ еси́. Тѣ́мъ же мо́лимся ти́: моли́ся Го́сподеви о чту́щихъ тя́.

Сла́ва, гла́съ 8:

Что́ тя нарече́мъ, преподо́бне Мака́ріе? Па́стыря до́браго, я́ко ду́шу свою́ за па́ству свою́ положи́ти гото́въ бы́лъ еси́; оби́тели возгради́теля, по́стниковъ похвалу́ и мона́ховъ украше́ніе, я́ко труды́, бдѣ́нія и поще́нія и́ноческая подъя́лъ еси́; земна́го а́нгела и небе́снаго человѣ́ка, присносу́щнаго свѣ́та ны́нѣ насыща́ющася. Тѣ́мъ же моли́ся Христу́ Бо́гу умири́ти мíръ и спасти́ ду́ши на́ша.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 4:

Отъ мірска́го житія́ изше́дъ въ ти́хое приста́нище жи́зни и́ноческія, преподо́бне Мака́ріе, вше́лъ еси́, въ не́йже до́брѣ подвиза́вся, ду́шу твою́ добродѣ́тельми превысо́кими обогати́лъ еси́ и яви́лся еси́ до́бръ па́стырь и учи́тель и́ноческому собо́ру, ему́же и оби́тель возгради́лъ еси́, та́же въ безмо́лвіе вше́дъ и боговидѣ́нія сподо́бився, ко Го́споду преста́вился еси́, Иже да́ромъ чуде́съ тя́ обогати́. Его́же ны́нѣ моли́, да спасе́тъ вѣ́рою и любо́вію почита́ющихъ святу́ю па́мять твою́.

На благослове́ніи хлѣ́бовъ: Тропа́рь преподо́бнаго, два́жды, и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ 4-го гла́са.

По 1-мъ стихосло́віи сѣда́ленъ, гла́съ 4:

Вре́менныхъ и до́льнихъ возгнуша́вся, высо́кая, при́сно пребыва́ющая, возлюби́лъ еси́, боже́ственнымъ жела́ніемъ распаля́я боголюби́вую твою́ ду́шу, и, сотвори́въ Всевы́шняго во́лю, воспрія́лъ еси́ бла́га небе́сная. [Два́жды.]

Сла́ва, и ны́нѣ, богоро́диченъ:

Твою́ по́мощь пода́ждь на́мъ, рабо́мъ Твои́мъ, Дѣ́во Влады́чице, вразуми́ и руково́дствуй на́съ на пути́ спасе́нія, избавля́я ны́ отъ бѣ́дъ и скорбе́й, я́ко ро́ждшая всѣ́хъ Избавле́ніе.

По 2-мъ стихосло́віи сѣда́ленъ, гла́съ 8:

Непостижи́мый Свѣ́тъ отъ Свѣ́та — Христо́съ Госпо́дь, почи́въ въ тебѣ́, преподо́бне, пресвѣ́тлу свѣщу́ показа́ тя́ мíру, я́ко блиста́еши свѣ́тлымъ житіе́мъ и сія́еши чудесы́. Тѣ́мъ же ра́достно пра́зднуемъ па́мятъ твою́, преблаже́нне Мака́ріе. [Два́жды.]

Сла́ва, и ны́нѣ, богоро́диченъ:

Отъ любве́ душе́вныя вопію́ Ти́, Влады́чице: пресвѣ́тлаго Со́лнца заре́, спасе́нія две́рь, небе́сная врата́, мы́сленная лѣ́ствице всѣ́хъ христіа́нъ, мольбы́ пріими́ Тя́ блажа́щихъ, наде́жду ду́шъ на́шихъ, и спасе́ніе на́мъ да́руй.

По поліеле́и сѣда́ленъ, гла́съ 4:

Псало́мски процвѣ́лъ еси́, я́ко фи́никсъ, въ постѣ́ и по́двизѣхъ, и бѣсо́вскія полки́ прогоня́еши, и да́руеши цѣльбы́ незави́стно всѣ́мъ. Тѣ́мъ же жите́йскими помышле́ньми у́мъ на́шъ мяту́щійся уцѣлому́дри, да чи́стѣ воспои́мъ Христа́. [Два́жды.]

Сла́ва, и ны́нѣ, богоро́диченъ:

Пречи́стая Дѣ́во, не пре́зри вѣ́рою къ Тебѣ́, Милосе́рднѣй, прибѣга́ющихъ и те́плаго Твоего́ заступле́нія прося́щихъ, моля́щи Сы́на Твоего́, Христа́ Бо́га на́шего, спасти́ся рабо́мъ Твои́мъ.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Уго́дниче Бо́жій, соприча́стниче Христо́въ, преподо́бне о́тче Мака́ріе, по и́мени твоему́ та́ко и житіе́ твое́, блаже́нства тезоиме́нне, жи́знь твоя́ сла́вна и успе́ніе со святы́ми, моли́ Христа́ Бо́га о душа́хъ на́шихъ.

Кано́нъ Богоро́дицѣ пара́клисисъ со ирмосо́мъ на 6 и свято́му на 8. Гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Госпо́дь, Ца́рь сла́вы, прославля́ющія Его́ просла́вити обѣтова́, на тебѣ́ же, преподо́бне, обоя́ устро́ишася, я́коже бо ты́ просла́вилъ еси́ Го́спода въ житіи́ твое́мъ, си́це и тя́ просла́ви тобо́ю просла́вленный Госпо́дь.

Вели́кій а́нгельскій о́бразъ прія́лъ еси́, кра́йняго смире́нія не оста́вль въ житіи́ твое́мъ, съ ли́ки же а́нгельскими на небеси́ ны́нѣ лику́еши. За ны́ у́бо помоли́ся, о́тче, а́нгельскими хвала́ми препросла́вленному Го́споду.

Труда́ми насади́лъ еси́, слеза́ми моли́твенными ороси́въ, я́ко са́дъ Бо́жій, оби́тель твою́, преподо́бне. Пріими́ у́бо и на́ша сле́зы умиле́нія и хода́тайственно вознеси́ я́ къ престо́лу препросла́вленнаго Го́спода.

Богоро́диченъ: Къ Богоро́дицъ о на́съ помоли́ся, о́тче преподо́бне, да умоли́тъ Сы́на Своего́ поми́ловати на́съ, сла́вно да просла́вится въ ми́лости Свое́й препросла́вленный Госпо́дь.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Процвѣла́ е́сть Жабы́нская пусты́ня за моли́твы избра́нника Твоего́, Го́споди, преподо́бнаго пустынножи́теля Мака́рія, въ не́йже да обря́щемъ утѣше́ніе, здра́віе же и спасе́ніе заступле́ніемъ преподо́бнаго.

Чуде́съ дарова́ніемъ благоволи́ Госпо́дь тя́ просла́вити, смире́ннаго и мно́го лѣ́тъ я́ко бы забве́ннаго, да немощны́мъ на́мъ пода́стъ благовре́менную по́мощь и вѣ́рѣ на́шей оскудѣва́ющей укрѣпле́ніе.

Богоно́се о́тче Мака́ріе, Бо́гу непреста́нный о на́съ бы́лъ еси́ моли́твенникъ и Пресвята́го Утѣ́шителя Ду́ха въ се́рдцѣ твое́мъ носи́лъ еси́. Но у́бо воздви́гни отъ сна́ грѣхо́внаго и отъ искуше́нія діа́вольскаго огради́ ны, моля́щіяся тебѣ́.

Богоро́диченъ: Богороди́тельнице Блага́я, моли́ о на́съ и на́ша недосто́йныя моли́твы принеси́ ко престо́лу Блага́го Сы́на Твоего́, и Твои́мъ да бу́детъ сомоли́твенникомъ о на́съ Мака́рій преподо́бный.

Сѣда́ленъ, гла́съ 4:

На тве́рдѣмъ вѣ́ры ка́мени утвержде́нъ сы́й, въ безмо́лвіи подвиза́яся, тече́ніе по́стничества до́брѣ сконча́лъ еси́ и мздовоздая́ніе отъ Христа́ прія́лъ еси́, Ему́же ны́нѣ моли́ся, всеблаже́нне, въ вѣ́рѣ и добродѣ́телехъ на́съ утверди́ти. [Два́жды.]

Сла́ва, и ны́нѣ, богоро́диченъ:

Ты покро́въ мо́й отъ напа́стей вра́жіихъ, Влады́чице, Ты́ свѣ́тъ се́рдцу моему́, печа́льми жите́йскими омраче́нному, при́сно бу́ди, Богоро́дице, и спаси́ мя.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Отъ Дѣ́вы Пречи́стыя на зе́млю прише́лъ еси́, во е́же спасти́ на́съ, Го́споди, и отъ спасе́нныхъ вели́кое мно́жество просла́вилъ еси́, да не то́кмо Тя́ у престо́ла Твоего́ славосло́вятъ, но и о на́съ хода́тайствуютъ. Вѣ́руемъ у́бо, я́ко въ со́нмѣ то́мъ пресвѣ́тломъ предста́тельствуетъ о на́съ преподо́бный оте́цъ на́шъ Мака́рій.

Отъ оте́чества на́шего взя́тъ бы́лъ еси́ въ небе́сное Ца́рствіе, о́тче преподо́бне. Не забу́ди у́бо ча́дъ твои́хъ, избра́нниче Бо́жій Мака́ріе, еще́ прише́льствующихъ на земли́.

Бу́ди съ на́ми, о́тче на́шъ Мака́ріе, да съ тобо́ю дерзнове́нно Бо́га Отца́ просла́вимъ, Сы́на превознесе́мъ и Свято́му Ду́ху поклони́мся.

Богоро́диченъ: Съ Богоро́дицею, вслѣ́дъ Ея́, мы́слію во свята́я вни́демъ и къ Не́й во смире́ніи притеце́мъ, въ покая́ніи зову́ще: Спаси́тельнице, спаси́ на́съ.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Но́щи невѣ́дѣнія преше́дшей прибли́жися де́нь спасе́нія, и Свѣ́тъ мíру возсія́ — Христо́съ Госпо́дь. Къ Сему́ у́бо ны́нѣ, моли́твами преподо́бнаго Мака́рія, отъ грѣхо́вныя но́щи приведе́ніе и́мамы.

Но́щію въ пѣтлоглаше́ніе, и́мже Госпо́дь прише́ствіе Свое́ второ́е назна́менова, къ тебѣ́ Госпо́дь пріи́де ду́шу твою́ прія́ти, преподо́бне, моли́твами же твои́ми вложи́ въ ду́ши на́ша па́мять сме́ртную.

Но́щь многолѣ́тняя пре́йде, въ ню́же бѣ́ подъ спу́домъ па́мять твоя́, о́тче на́шъ, но сія́ ны́нѣ яви́ся, свѣтя́щи всѣ́мъ, и́же въ твое́й хра́минѣ су́ть, въ ню́же мы́, вѣ́рою и любо́вію влеко́ми, преведе́ніе и́мамы.

Богоро́диченъ: Не бо́йся, ма́лое ста́до, я́ко благоизво́ли Оте́цъ ва́шъ да́ти ва́мъ Ца́рство, — глаго́летъ Госпо́дь. И не изнемо́же глаго́лъ се́й у Го́спода, уже́ бо дости́же завѣ́щаннаго Ца́рства па́стырь на́шъ, да привлече́тъ съ собо́ю все́ ста́до свое́ моли́твами Богоро́дицы.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Бе́здна милосе́рдія Бо́жія бе́здну грѣхо́въ на́шихъ да превозмо́жетъ, ничесо́же отъ на́съ взыску́ющи, ра́звѣ сле́зъ покая́нія умиле́ннаго, о се́мъ помоли́ся за ны́, преподо́бне о́тче на́шъ.

Отъ бе́здны грѣхо́вной помози́ на́мъ, Бо́же, возни́кнути, моли́твами преподо́бнаго Мака́рія сподо́би ны́ пре́жде конца́ пока́ятися и Твои́хъ Боже́ственныхъ Та́йнъ прича́стникомъ бы́ти.

Сла́вимъ Тя́, Свята́я Тро́ице, и диви́мся бе́зднѣ милосе́рдія Твоего́ къ на́мъ, мно́го согрѣша́ющимъ. Но еще́ долготерпи́ о на́съ, Бо́же на́шъ, до́ндеже пока́емся со слеза́ми, при́сно помина́юще послѣ́дняя своя́.

Богоро́диченъ: Чи́стую чи́сто почти́мъ и устыди́мся предъ лице́мъ Ея́ скве́рнаго житія́ на́шего, о́тче преподо́бне! Ты́ у́бо наста́ви ны́ досто́йно чти́ти Ма́терь Бо́жію Пречи́стую.

Конда́къ, гла́съ 8:

Житіе́ чи́стое, терпѣ́ніе, кро́тость и любо́вь нелицемѣ́рну, воздержа́ніе соверше́нное, умиле́ніе Боже́ственное, вѣ́ру же и наде́жду и́стинну и милосе́рдіе стяжа́въ, равноа́нгельно, Мака́ріе, на земли́ пожи́лъ еси́ и на небеси́ Бо́гови съ ли́ки безпло́тныхъ предстои́ши. Съ ни́ми же, свя́те, моли́ся ми́ръ Россíйстѣй Це́ркви дарова́ти и душа́мъ на́шимъ ве́лію ми́лостъ.

Икосъ:

Ангельски на земли́ пожи́вша, преподо́бнаго отца́ на́шего Мака́рія, пріиди́те, лю́діе, соше́дшеся, восхва́лимъ, си́це къ нему́ реку́ще: ра́дуйся, на земли́ пожи́вый небе́сно; ра́дуйся, во пло́ти, а́ки безпло́тенъ, подвиза́выйся; ра́дуйся, стра́сти до конца́ умертви́вый и безстра́стія дости́гнувый; ра́дуйся, ду́шу твою́ дарова́ньми Ду́ха Свята́го испо́лнивый; ра́дуйся, оби́тель возгради́вый и и́ноковъ собра́вый; ра́дуйся, па́стырскимъ жезло́мъ твои́мъ во огра́ду небе́сную ты́я упра́вивый; ра́дуйся, гра́да Бѣле́ва похвало́; ра́дуйся, пусты́ни твоея́ непоколеби́мое утвержде́ніе; ра́дуйся, при́сно моля́щійся Го́сподеви ми́ръ Россíйстѣй Це́ркви дарова́ти и душа́мъ на́шимъ ве́лію ми́лость.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Сы́й благослове́нный Христо́съ Бо́гъ на́шъ да изба́витъ на́съ огня́ гее́нскаго, со слеза́ми покая́нными о се́мъ помо́лимся. Кто́ же ны́нѣ да́стъ очесе́мъ на́шимъ исто́чникъ сле́зъ, а́ще не ты́, о́тче, блаже́нство пла́ча позна́вый въ житіи́ твое́мъ.

Высо́кій пла́мень невѣ́рія и нече́стія возно́ситъ беззако́ннующій. Но мы́ сохрани́ти вѣ́ру потщи́мся, убѣжи́мъ нече́стія, убои́мся пла́мене гее́нскаго, ко Христу́ притеце́мъ и у Него́ съ Мака́ріемъ блаже́нство улучи́мъ.

Еди́нъ Сы́й Святы́я Тро́ицы, Христе́ Бо́же на́шъ! Сотвори́ въ на́съ оби́тель, по обѣтова́нію Твоему́, съ Преблагослове́ннымъ и Препросла́вленнымъ Твои́мъ Отце́мъ и со Святы́мъ Ду́хомъ, жи́зни и утѣше́нія Пода́телемъ.

Богоро́диченъ: Ра́дуйся, Влады́чице, и ра́дость на́мъ пода́ждь, отъ бѣ́дъ спаси́, въ ми́рѣ Це́рковь Сы́на Твоего́ сохрани́ и умоли́, да благослови́тъ Онъ ца́рство правосла́вное, я́ко достоя́ніе Свое́.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Въ тѣлеси́ а́нгела, почти́мъ Мака́рія, блаже́нству тезоимени́таго, и, подража́я его́ житію́ во Христѣ́, поне́ еди́наго отъ блаже́нствъ ева́нгельскихъ дости́гнути потщи́мся.

Огнь искуше́ній грѣхо́вныхъ пали́тъ мя́, но стра́ждущую мою́ ду́шу ороси́ росо́ю благода́ти Христо́вой и твои́ми моли́твами, блаже́нне.

Да пребу́детъ благослове́ніе твое́ богоуго́дное во и́мя Пресвяты́я Тро́ицы на оби́тели твое́й, и на земли́ оте́чествія твоего́, и на всѣ́хъ, тебе́ усе́рдно призыва́ющихъ, о́тче преподо́бне.

Богоро́диченъ: Доны́нѣ и во вѣ́ки блажи́мъ Тя́, вси́ ро́ди, Свята́я Богороди́тельнице. Спаси́ на́съ, я́ко Спа́са родила́ еси́ ду́шъ на́шихъ.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Со а́нгельскими чи́нми, хва́лящими Го́спода, и съ Богоро́дицею Того́ хвали́ти сподо́бился еси́, сподо́би же и на́съ, преподо́бне о́тче на́шъ, да съ тобо́ю Го́спода сла́вимъ и Богоро́дицу велича́емъ.

Ангели, вхожде́ніе Пречи́стыя во Свята́я святы́хъ зря́ще, удиви́шася. Мы́ же диви́мся, ка́ко во святы́й хра́мъ, труда́ми твои́ми созда́нный на мѣ́стѣ, ва́рвары разоре́нномъ, чудотво́рною ико́ною Свое́ю вни́де Пречи́стая, Юже, я́ко Всепѣ́тую Богоро́дицу, велича́емъ.

Бо́га Отца́ просла́вимъ, тебѣ́, богоно́сному отцу́ на́шему, послѣ́дующе, Боже́ственнаго Сы́на возвели́чимъ, да съ Ни́мъ и всыновле́ніе Отчее пріи́мемъ, Свято́му Ду́ху поклони́мся, да научи́тъ ны́ моли́тися, я́коже подоба́етъ, да и Са́мъ, вопія́ въ душа́хъ на́шихъ, укрѣпи́тъ на́съ къ Бо́гу сыно́внѣ вопи́ти: Авво, Отче!

Богоро́диченъ: Ра́дуйся, Ра́досте на́ша! Пребу́ди съ на́ми, я́ко да и Госпо́дь, Иже съ Тобо́ю, въ на́съ пребу́детъ. Собери́ во дво́ръ церко́вный о́вцы расточе́нныя, отпа́дшія возврати́ къ соедине́нію, просвѣти́ омраче́нныхъ невѣ́ріемъ, да вси́ вку́пѣ Тя́, Всепѣ́тую Богоро́дицу, велича́емъ.

Свѣти́ленъ:

Свѣтоза́рна свѣти́льника вѣ́ры, во странѣ́ на́шей возсія́вша и со́лнца свѣтлѣ́йше чудесы́ свои́ми на́съ просвѣ́щша, Мака́рія преподо́бнаго, блаже́нству тезоиме́ннаго, пѣ́сньми восхва́лимъ. [Два́жды.]

[Сла́ва, и ны́нѣ,] богоро́диченъ:

Богоро́дице Дѣ́во, ра́дуйся, отъ а́нгела ра́дость пріи́мшая, ра́дуйся, Влады́чице, и спаси́ на Тя́ упова́ющія.

На хвали́техъ стихи́ры [на 4], гла́съ 8:

Тѣ́снымъ путе́мъ въ житіи́ твое́мъ, преподо́бне Мака́ріе, ше́ствовалъ еси́, по́двигомъ до́брымъ въ пусты́ни подвиза́яся и, тече́ніе благо́е въ преподо́біи соверша́я, тѣ́мъ и превели́кое воздая́ніе обрѣ́лъ еси́ у Бо́га, Ему́же, свя́те, моли́ся дарова́ти душа́мъ на́шимъ ве́лію ми́лость.

Возсія́ на́мъ богоуго́дное житіе́ твое́, пресла́вне Мака́ріе, всѣ́мъ бо яви́лся еси́ пра́вило вѣ́ры и о́бразъ кро́тости, по́двиговъ и́ноческихъ и воздержа́нія зерца́ло, любве́ же и смире́нія бога́тство, и́хже ра́ди просла́вленъ еси́ отъ Го́спода, Его́же моли́ спасе́ніе душа́мъ на́шимъ дарова́ти.

Зна́меньми и чудесы́ тебе́ Госпо́дь просла́ви, преподо́бне Мака́ріе, прого́ниши бо ду́хи и врачу́еши стра́сти, ду́ши просвѣща́я вѣ́рныхъ, приходя́щихъ ко свято́му твоему́ гро́бу, а́нгеловъ собесѣ́дниче и преподо́бныхъ сожи́телю.

Вся́ оста́вивъ земна́я, къ небе́снымъ у́мъ тво́й впери́лъ еси́, въ слеза́хъ и воздыха́ніихъ жи́знь твою́ препроводи́въ, и́хже ра́ди небе́сныхъ селе́ній дости́глъ еси́, идѣ́же свѣ́тъ невече́рній сія́етъ Христа́ Бо́га на́шего, Его́же непреста́нно моли́ спасти́ ду́ши на́ша.

Сла́ва, гла́съ то́йже:

Оте́цъ сиро́тъ и вдо́въ защи́тникъ, бога́тство ни́щихъ, боля́щихъ утѣше́ніе и исцѣле́ніе и су́щихъ въ бога́тствѣ наста́вникъ, ста́рости же́злъ, и наказа́ніе ю́ности, и мона́шествующимъ добродѣ́телей пра́вило яви́лся еси́, преблаже́нне о́тче на́шъ Мака́ріе.

И ны́нѣ, [богоро́диченъ]:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, [гла́съ 7:] Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24, или́ отъ Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Слу́жба преподо́бному отцу́ на́шему Мака́рію Жа́бынскому, Бѣле́вскому чудотво́рцу. [Мѣ́сяца Іаннуа́рія въ 22-й де́нь и Септе́мврія въ 22-й де́нь.] — М.: Сѵнода́льная Тѵпогра́фія, 1915. — 24 л.

/ Къ оглавленію раздѣла /


Наверхъ / Къ титульной страницѣ

0