Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Сепре́мврія въ 22-й де́нь.
Свята́го проро́ка Іо́ны. И преподо́бнаго Іо́ны пресви́тера, отца́ Ѳеофа́на, творца́ кано́новъ, и Ѳео́дора Начерта́ннаго.

Зри́: Слу́жба проро́ка Іо́ны и преподо́бнаго Іо́ны пое́тся на повече́ріи.

Кано́нъ, его́же краегране́сіе: Твоего́ проро́ка, Христе́, пою́ сла́ву. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Душе́вное сохрани́въ, Іо́но блаже́нне, досто́инство, богови́дный бы́лъ еси́ о́бразъ и премíрное сподо́бился еси́ прообрази́ти Христо́во Воскресе́ніе, е́же пѣсносло́вимъ вси́, сла́вно бо просла́вися.

Вся́чески любо́вію къ Бо́гу преклони́лся еси́, приснопа́мятне, и сія́ніи су́щими отту́ду просвѣти́вся, и проро́къ язы́комъ велегла́сенъ отъ Него́ устро́енъ еси́, покая́нія врачевству́ уча́ спаси́тельному.

Преподо́бнаго Іо́ны:

Слуга́ Бо́жій бы́въ, о́тче, сохрани́лъ еси́, я́ко свяще́нникъ, Спа́сова повелѣ́нія, мірско́е бо смуще́ніе оста́вилъ еси́, кре́стъ тво́й взе́мъ, и жизноно́снымъ стопа́мъ, всеблаже́нне, послѣ́довалъ еси́.

Спасе́нія хода́тай, вѣ́дый ра́зумъ богодухнове́нный, все́ Писа́ніе благоче́стно проше́лъ еси́, боговѣща́нная повелѣ́нія навыка́я, Іо́но о́тче преподо́бне, свяще́нства отсю́ду прія́лъ еси́ достоя́ніе.

Богоро́диченъ: Возсія́ Со́лнце изъ Тебе́, Ма́ти Приснодѣ́во, Иже изъ Отца́ пре́жде вѣ́къ неви́димый и ви́димымъ же пресла́вно опису́емь тѣ́ломъ, благоче́стія заре́ю человѣ́ки просвѣти́.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Проро́къ, предзря́ си́лою Боже́ственною благода́ть, преходя́щую въ язы́ки, въ пучи́ну уны́нія низведе́ся, вопія́ Тебѣ́, Влады́ко: Ты́ еси́ Бо́гъ на́шъ, и нѣ́сть пра́веденъ па́че Тебе́, Го́споди.

Изре́къ благоче́стіе кора́бленникомъ и ра́бъ Высоча́йшаго тя́ сама́го научи́въ, въ пучи́ну вве́рженъ бы́лъ еси́, вопія́, проро́че сла́вне: Ты́ еси́ Бо́гъ на́шъ, и нѣ́сть пра́веденъ па́че Тебе́, Го́споди.

Преподо́бнаго:

Отъ на́съ ны́нѣ сло́во похвале́нія плето́мо пріе́мля, богоно́се, ра́дуяся, твои́хъ трудо́въ наслажда́ешися, и зовы́й, преподо́бне: Ты́ еси́ Бо́гъ на́шъ, и нѣ́сть пра́веденъ па́че Тебе́, Го́споди.

Глаго́лы услы́шавъ Влады́чни, оста́вилъ еси́ мíръ и я́же въ мíрѣ, приве́лъ еси́ сѣ́мя твое́ Го́споду, зовя́, преподо́бне: Ты́ еси́ Бо́гъ на́шъ, и нѣ́сть пра́веденъ па́че Тебе́, Го́споди.

Богоро́диченъ: Ты́ еди́на па́че всѣ́хъ су́щихъ отъ вѣ́ка вели́кихъ сподо́билася еси́ и па́че естества́, Бо́га бо невмѣсти́маго все́й тва́ри во утро́бѣ понесла́ еси́ и воплоти́ла еси́. Тѣ́мъ Богоро́дицу Тя́ вси́ почита́емъ.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Не терпя́ зрѣ́ти люде́й твои́хъ отпаде́нія, Іо́но богоглаго́ливе, тѣ́мъ и бѣжа́ти произво́ливъ, ки́томъ я́тъ бы́лъ еси́, погребе́ніе тридне́вное, блаже́нне, прообразу́я Христо́во.

Человѣколю́бца вѣ́дый Влады́ку, не терпя́ше проро́ческа да́ра зрѣ́ти укоря́ема, тѣ́мъ отлага́ше Бо́жіе повелѣ́ніе, бѣжа́, богоглаго́ливе.

Преподо́бнаго:

Отве́рзлъ еси́, Іо́но богому́дре, две́ри твоя́, Авраа́му подо́бяся, всѣ́мъ тре́бующимъ, преподо́бне, тѣ́мъ небе́сная Христо́съ отверза́етъ ти́ врата́, всеблаже́нне.

Всечестно́е свяще́нническое досто́инство украси́лъ еси́, Іо́но блаже́нне, и къ мона́шествующихъ же собра́ніемъ, ра́дуяся, ты́ прите́клъ еси́, вседомо́вно, преблаже́нне, приводи́мь.

Богоро́диченъ: Исцѣля́я Евино дре́внее преступле́ніе, въ Тя́, Всенепоро́чную и Всесвяту́ю, всели́ся, всего́ мя человѣ́ка вообрази́въ па́дшаго, Пребоже́ственный.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Іо́на, проро́къ вели́кій, тридне́внаго бы́сть преображе́ніе въ ка́мени, Христе́, погребе́нія Твоего́, и́мже спа́слъ еси́, Сло́ве, вѣ́рою и любо́вію Тебѣ́ зову́щія: ино́го, ра́звѣ Тебе́, Бо́га не зна́емъ.

Не терпя́ презрѣ́ти, Христе́ мо́й, ниневи́тянъ, въ ро́вѣ лежа́щихъ грѣхо́внемъ, но, уще́дривъ, посла́лъ еси́ и́мъ проро́ка Іо́ну, Влады́ко, проповѣ́дника, провозвѣща́ющаго я́вѣ покая́ніе.

Преподо́бнаго:

Христокра́снымъ просвѣща́яся житіе́мъ, Іо́но блаже́нне, всѣ́мъ че́стенъ показа́лся еси́, вѣ́сть бо и́стинно добродѣ́тель сла́вны соверша́ти сію́ иму́щія, яви́лся бо еси́ іере́й Христо́въ достопрія́тенъ.

Си́лою Боже́ственною укрѣпля́емь, блаже́нне, мірску́ю любо́вь крѣ́пко отве́рглъ еси́, и Влады́цѣ, ра́дуяся, прише́лъ еси́ во́льнымъ твои́мъ нра́вомъ, и, сохрани́въ вѣ́ру невреди́мо, вѣне́цъ сла́вы, богому́дре, прія́лъ еси́.

Богоро́диченъ: Еди́ну на́мъ во дву́ существа́хъ ви́димую Ѵпоста́сь, еди́на Благослове́нная, ражда́еши неизрече́нно, Бо́жія Бо́га Сло́ва, воплоти́вшагося за ми́лость неизрече́нную. Того́ моли́ сохрани́тися пою́щимъ Тя́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Яко Іо́ну отъ ки́та спа́слъ еси́, Спа́се, па́че ума́ неврежде́нна, та́ко и ны́нѣ спаси́ ду́шу мою́ отъ сѣ́тей зміи́ныхъ.

Спасе́нія ты́, проро́че, хода́тай бы́лъ еси́ вѣ́ровавшимъ твоему́ проповѣ́данію ниневи́тяномъ, сла́вне, покая́нія возопи́въ проповѣ́даніе.

Преподо́бнаго:

Жите́йскихъ веще́й, о́тче, нестоя́щее свѣ́дый, сія́ оста́вивъ, и къ возда́нію потща́ся жре́бія го́рняго, пребога́те.

Благочести́во мона́шествующихъ мно́жества пита́я, не оста́вилъ еси́, о́тче блаже́нне, тѣ́мъ сла́дости лу́чшія во оби́телехъ небе́сныхъ сподо́бился еси́.

Богоро́диченъ: Неискусому́жно, Пречи́стая Дѣ́во, родила́ еси́ и вѣ́чнуеши Дѣ́ва, явля́ющи и́стиннаго Божества́, Сы́на и Бо́га Твоего́, о́бразы.

Сѣда́ленъ, гла́съ 4. Подо́бенъ: Ско́ро предвари́.

Проро́къ бы́въ прише́ствія Христо́ва, Того́ тридне́вное, блаже́нне, воста́ніе я́вѣ провозвѣсти́лъ еси́, въ ки́товѣ чре́вѣ тридне́вновавъ невре́дно, зовя́: ны́нѣ да взы́детъ отъ тли́ живо́тъ мо́й къ Тебѣ́, отъ тлѣ́нія хотя́щаго земны́я изба́вити.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Не терпя́ зрѣ́ти тебе́ ско́рбію и печа́лію дручи́ма, проро́че всече́стне, а́біе простре́ ти́ пресла́вно сѣ́нь, осла́бу нося́щу, сы́й Благослове́нъ и Препросла́вленъ.

Измла́да Творцу́ Твоему́ освяти́лся еси́, Іо́но всехва́льне, богому́дре, всеблаже́нне, моли́твы бо ты́ прозябе́ніе бы́въ, проро́чествія благода́ть Ду́ха прія́ти сподо́бился еси́, пребога́те.

Преподо́бнаго:

Избра́ніемъ суда́ украси́лся еси́, свяще́нникъ бы́въ, Іо́но, о́тче преподо́бне, тѣ́мже вше́лъ еси́ вну́трь вы́шняго хра́ма, нехо́дная зря́, твоего́ священнодѣ́йства пло́дъ пожа́въ.

Оте́ческая возлюби́лъ еси́ ликостоя́нія и въ ли́цѣхъ оте́цъ ра́достно просла́вился еси́, Христу́ предстоя́, всеблаже́нне преподо́бне, пріе́млеши твоего́ служе́нія всего́ возда́ніе.

Богоро́диченъ: Облакъ Дѣ́ва Тя́, пра́вды Со́лнце, роди́, Дѣ́ва пребы́вши, дебе́лости плотскíя пріобщи́вшася, Человѣ́ка бы́вша, Христе́, Юже воспѣва́емъ, я́ко пресла́вную.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Яко въ черто́зѣ, въ звѣ́рѣ, богоглаго́ливый Іо́но, ру́цѣ распросте́ръ, возопи́лъ еси́, глаго́ля Всеви́дцу Бо́гу: Спа́се мо́й, отъ тли́ мя́ возведи́, па́ки да взы́детъ ны́нѣ къ Тебѣ́ живо́тъ мо́й.

Умное твоея́ души́ очи́стивъ отъ скве́рны, спримѣси́лся еси́ жела́емому, блаже́нне, и богови́дѣнъ бы́лъ еси́, Боже́ственнымъ ра́зумомъ обожа́емь, поя́: вся́ дѣла́, Го́спода по́йте и превозноси́те во вся́ вѣ́ки.

Преподо́бнаго:

Соверше́нною чи́стою любо́вію Христа́ вожделѣ́лъ еси́, священнота́инниче о́тче, и непреста́нными гла́сы вопія́лъ еси́: по́йте, вся́ дѣла́, Го́спода и превозноси́те во вся́ вѣ́ки.

Мірску́ю красоту́ оста́вивъ, во́лею Христу́, блаже́нне, прише́лъ еси́, благолѣ́піе Того́ жела́я зрѣ́ти, во оби́тели святы́я вселя́емь, превознося́ Христа́ во вѣ́ки.

Богоро́диченъ: Свяще́ннѣйшими Тя́ гла́сы свяще́ннѣйшіи Бо́жіи проро́цы, Чи́стая, бу́дущую Ма́терь провозгласи́ша я́сно всѣ́ми Влады́чествующаго, Пречи́стая, Его́же превозно́симъ во вся́ вѣ́ки.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Луча́ми благода́ти просвѣти́вся, бы́лъ еси́, Іо́но богоявле́нне, Христо́во проображе́ніе, тѣ́мъ я́ко проро́ка тя́ вси́, и́же благочести́во твои́хъ наслажда́ющеся всему́дрыхъ уче́ній, благохва́лимъ, досточу́дне.

Боже́ственными пѣ́сньми всеблагочести́во пое́мъ тя́, Христо́ва я́ко я́вльшася погребе́нія проображе́ніе и Воскресе́нія, блаже́нне, па́че ума́ зна́меніе бы́вшаго, его́же да наслади́мся хода́тайствы твои́ми, богопрія́тне.

Преподо́бнаго:

Правовѣ́рный ра́зумъ благолѣ́пно измла́да навы́къ, отъ Отца́ пре́жде вѣ́къ возсія́вшаго Сы́на и спокланя́ема Ду́ха, исходя́ща отту́ду неизрече́нно, я́вѣ уясни́лъ еси́, святи́тель бы́въ, преподо́бне.

Во оби́телехъ небе́сныхъ Созда́тель всели́ тя, Того́ та́инъ я́ко служи́теля честна́го, о́тче Іо́но богоно́се, и ны́нѣ на́съ твоя́ назира́еши сы́ны, всеблаже́нне, тя́ при́сно похваля́ющія.

Богоро́диченъ: Черто́гъ была́ еси́ па́че ума́ воплоще́нія Сло́ва, Дѣ́во Богороди́тельнице, одѣ́яна сла́вою добродѣ́телей и укра́шена, тѣ́мъ Тя́, Всенепоро́чную Богоро́дицу, велича́емъ.

Стихи́ры, гла́съ 4. Подо́бенъ: Да́лъ еси́ зна́меніе.

Заре́ю просвѣща́емь* Трисо́лнечнаго Божества́,* Іо́но всебога́те,* я́ко проро́къ Бо́жій, чи́стымъ се́рдцемъ* проро́чествія да́ръ воспрія́лъ еси́ я́вѣ,* и предсказа́лъ еси́ бу́дущая,* и Словесе́ тридне́вное прописа́лъ еси́ воста́ніе,* звѣ́рю примета́емь* и тлѣ́нія не пріе́мь.

Прозря́ хотя́щее на язы́ки бы́ти* Влады́ки спаси́тельное, блаже́нне, осія́ніе,* бѣжи́ши отъ лица́ Всецаря́,* сокрыва́яся, му́дре,* спасу́щихся Боже́ственныя про́повѣди,* и ки́ту пре́данъ бы́лъ еси́,* губя́щу тя́ ника́коже,* и на су́шу изда́лся еси́* Боже́ственными манове́ніи.

Христо́во тридне́вное* пропису́я воста́ніе,* отъ ки́та тридне́венъ изше́лъ еси́, блаже́нне,* — и еще́ три́ дни́, — Іо́но, возопи́въ,* — и Ниневíй развраще́нію коне́чному преда́стся,* — покая́ніемъ же зря́* не соверши́тися твое́й про́повѣди,* уныва́еши,* Бо́жію человѣколю́бію удивля́яся.

Сла́ва, и ны́нѣ, богоро́диченъ:

Судію́ пра́веднѣйшаго* поро́ждши, Чи́стая,* моли́, Влады́чице всенепоро́чная,* мене́, блу́дно пожи́вша,* осужде́ннаго и недоумѣ́нна,* въ бу́дущемъ стра́шнѣмъ судѣ́, Дѣ́во, не осуди́ти мя́,* сочета́ти же одесну́ю Его́* хотя́щимъ стоя́ти избра́ннымъ,* за ми́лость и мно́гую благосты́ню.

Аще ли среда́ или́ пято́къ, крестобогоро́диченъ:

Умерщвля́ема ви́дящи Христа́ всечи́стая Влады́чица* и умерщвля́юща льсти́ваго,* я́ко Влады́ку, пла́чущи, поя́ше* изъ утро́бы Ея́ проше́дша* и, долготерпѣ́нію Его́ чудя́щися, взыва́ше:* Ча́до любе́знѣйшее,* не забу́ди рабы́ Твоея́,* не укосни́, Человѣколю́бче,* мое́ утѣше́ніе.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 216 – 219 об.

/ Къ оглавленію раздѣла /


Наверхъ / Къ титульной страницѣ

0