Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Сепре́мврія въ 22-й де́нь.
Свята́го священному́ченика Фо́ки, епи́скопа Синопíйскаго.

Зри́: Въ сíй же де́нь пое́мъ [слу́жбу] свято́му апо́столу Кодра́ту.

ВЕЧЕРЪ,
На Го́споди воззва́хъ: стихи́ры апо́стола 3, гла́съ 4. Подо́бенъ: Зва́нный свы́ше.

Яко священнонача́льникъ,* я́ко боже́ственный проповѣ́дникъ,* я́ко свидѣ́тель богоизбра́нный* Страсте́й Христо́выхъ* и хотя́щія яви́тися неизрече́нныя сла́вы* снаслѣ́дникъ, Кодра́те сла́вне,* всему́дро проповѣ́далъ еси́* Ева́нгеліе свяще́нное свяще́ннѣйше* и су́щія во тмѣ́ невѣ́дѣнія свѣтоводи́лъ еси́.* Тѣ́мъ чти́мъ, пра́зднующе ра́достно,* всесвяще́нную и святу́ю твою́ па́мять,* богоно́се блаже́нне.

Научи́вся боже́ственнымъ пресла́вно,* проше́лъ еси́, я́ко со́лнце, просвѣща́я зе́млю* мо́лніями про́повѣди,* священнотаи́нниче,* и во мра́цѣ су́щія ду́ши просвѣти́лъ еси́,* и тмы́ нача́льника тѣ́мъ отгна́въ* и мра́чныя его́ де́моны,* не терпя́щія въ тебѣ́ живу́щія свѣ́тлости,* и Боже́ственныя благода́ти,* и дѣ́йства Вседѣ́тельнаго, блаже́нне, Ду́ха,* священнонача́льниче Кодра́те,* моли́твенниче о благохва́лящихъ тя́.

Исповѣ́даніемъ Бо́жіимъ укрѣпля́емь,* я́звъ же добро́тами украша́емь,* отъ Аѳи́нъ отгони́мь, твоея́ па́ствы,* беззако́нными людьми́, всеблаже́нне,* и, я́ко исто́чникъ спаси́тельный,* зе́млю напои́лъ еси́,* и плодоно́сна показа́лъ еси́* оляденѣ́вшая пре́жде сердца́* суеты́ омраче́ніемъ,* я́ко апо́столъ и я́ко Христо́въ учени́къ и́стиннѣйшій,* священнонача́льниче Кодра́те,* моле́бниче о благохва́лящихъ тя́.

Ины стихи́ры священному́ченика, гла́съ 1. Подо́бенъ: Небе́сныхъ чино́въ.

Низложи́въ и́дольскую суету́* свяще́ннымъ твои́мъ сло́вомъ,* утверди́лъ еси́ вѣ́рою сердца́ неутвержде́нная,* и къ жи́зни, іера́рше, путеводи́лъ еси́,* и, пострада́въ зако́нно,* му́ченикъ Госпо́день, Фо́ко, бы́лъ еси́.

Свяще́нную оде́жду* омочи́въ въ кро́ви* свяще́нныя твоея́ пло́ти, свяще́ннѣйше о́тче,* сугу́бъ вѣне́цъ и́стинно отъ Христа́ прія́лъ еси́, всеблаже́нне,* и со а́нгелы лику́еши на небесѣ́хъ,* моля́ спасти́ся на́мъ.

Чуде́съ луча́ми* всю́ зе́млю просвѣща́еши,* су́щимъ въ мо́ри помога́еши, о́тче, всегда́,* неду́ги отго́ниши вся́кія души́* и плотскíя сла́бости,* отъ Го́спода благода́ть, му́чениче Фо́ко, пріе́мъ, богоблаже́нне.

Сла́ва, гла́съ 4. Кипріа́ново:

Измла́да бы́лъ еси́ Госпо́день рачи́тель, Фо́ко всеблаже́нне, священному́чениче му́дре, ору́жіе бо кре́стное на ра́мена взе́мъ, неукло́нно ше́ствовалъ еси́ пу́ть спасе́нія, и́мже а́нгеломъ сожи́тель бы́лъ еси́, де́моновъ противобо́рникъ и мíра моли́твенникъ яви́лся еси́ пресвѣ́телъ.

И ны́нѣ, богоро́диченъ. Аще ли среда́ или́ пято́къ, крестобогоро́диченъ. Подо́бенъ: 3ва́нный свы́ше.

Не рыда́й Мене́, Ма́ти,* зря́щи на дре́вѣ ви́сяща,* Твоего́ Сы́на и Бо́га,* надъ вода́ми повѣ́сившаго зе́млю неде́ржно* и всю́ тва́рь созда́вшаго:* воста́ну бо, и просла́влюся,* и а́дова ца́рства сокрушу́ крѣ́постію,* и погублю́ того́ си́лу,* и у́зники изба́влю отъ того́ злодѣ́йства,* я́ко Благоутро́бенъ,* и Отцу́ Моему́ приведу́,* я́ко Человѣколю́бецъ.

На стихо́внѣ окто́иха.

Тропа́рь апо́стола, гла́съ 3:

Апо́столе святы́й Кодра́те, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Тропа́рь священному́ченика, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, въ видѣ́нія восхо́дъ, сего́ ра́ди сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Фо́ко, моли́ Христа́ Бо́га, спасти́ся душа́мъ на́шимъ.


НА УТРЕНИ,
Кано́нъ окто́иха еди́нъ и святы́хъ два́.

Кано́нъ апо́стола, его́же краегране́сіе: Тебѣ́, Кодра́те вели́кій, похвалу́ плету́. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Вѣнценося́ Царю́ си́лъ предста́въ, моли́ озари́ти соверша́ющія па́мять твою́ сію́ свѣ́тло, блаже́нне апо́столе.

Назида́я на основа́ніи вѣ́ры благочести́выхъ исполне́ніе крѣпча́йшими твои́ми уче́ніи, богоглаго́льниче, и́дольскую всю́ ле́сть низврати́лъ еси́.

Священнодѣ́йствуя свяще́нное Ева́нгеліе свяще́ннѣйшими словесы́ твои́ми, ду́ши Творцу́ твоему́ освяти́лъ еси́ вѣ́рою, приснопа́мятне Кодра́те, крѣ́постію Ду́ха.

Богоро́диченъ: Отъ Отрокови́цы пло́тію Неискусобра́чныя Творе́цъ тва́ри ражда́емь, по рождествѣ́, я́ко пре́жде рождества́, Дѣ́ву храни́тъ Ю, я́коже благоволи́.

Инъ кано́нъ священному́ченнка, его́же краегране́сіе: Пѣ́ти тя́, Фо́ко, да приложи́тъ Бо́гъ да́ръ. Іо́сифъ. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Пѣ́ти усе́рдствующу дне́сь боже́ственную па́мять твою́ свѣща́тельными Ду́ха заря́ми ду́шу мою́ осія́й, па́стырь и свидѣ́тель, сла́вне, Вседержи́теля явля́емь.

Му́чениковъ свѣ́тло обогати́лъ еси́, Бо́жіе благосла́віе, па́стырскими укра́шся добро́тами и обагри́въ кро́вію свяще́ннаго страда́нія твоего́ одѣя́ніе, богоблаже́нне.

Утверди́въ по́мыслъ у́ншими наде́ждами, всему́дре, въ зло́бѣ су́щаго си́льна всеконе́чно разсла́билъ еси́ и побѣдоно́сецъ изя́щнѣйшій къ небе́снымъ, Фо́ко, восте́клъ еси́.

Богоро́диченъ: Разрѣши́ся пра́отцевъ, Чи́стая, запреще́ніе, превѣ́чнаго бо ражда́еши Бо́га, мла́до Отроча́ явля́ющася и новотворя́щаго все́ человѣ́ческое и́стинно существо́.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Соверша́я стра́шная, Кодра́те, чудеса́, невѣ́рныхъ въ вѣ́ру Боже́ственную приве́лъ еси́, я́ко апо́столъ богопрія́тенъ, я́ко че́стенъ іера́рхъ, свяще́ннѣйше.

Боже́ственными уче́ніи мно́гія просвѣти́лъ еси́, Свѣ́та бо слуга́ яви́лся еси́, просвѣти́вшаго концы́, священнонача́льниче Кодра́те, боже́ственными сія́ньми.

Велича́йшихъ благи́хъ хода́тай бы́лъ еси́ па́ствѣ, изыма́я сію́ тмы́ невѣ́дѣнія и просвѣща́я ту́ пресла́вныхъ чуде́съ показа́ньми.

Богоро́диченъ: Всели́ся въ Тя́ Огнь нестерпи́мый, не опали́въ утро́бы Твоея́, Богоро́дице, и попали́ стра́сти на́ша, и ти́ну пре́лести испепели́.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Исцѣле́нія соверша́я призыва́ніемъ Христо́вымъ, преподо́бне, отъ ле́сти вра́жія спа́слъ еси́ гра́дъ и лю́ди Бо́жіею благода́тію.

Хра́мъ сы́й Бо́жій, и́дольская ка́пища, му́чениче, низве́рглъ еси́, Вседѣ́тельную Си́лу имѣ́я Помо́щника и Содѣ́йствителя.

Во́инство ви́дѣно бы́сть, Фо́ко, а́нгельское и свѣ́тъ Бо́жій безмѣ́рный, предъ суди́тельными тя́ престо́лы Го́споду прославля́ющу.

Богоро́диченъ: Изъ Тебе́ Бо́гъ воплоти́вся, за благоутро́біе человѣ́комъ соедини́ся и кля́тву разруши́, еди́на Всеблагослове́нная Влады́чице.

Конда́къ священному́ченика, гла́съ 6. Подо́бенъ: Еже о на́съ.

Яко архіере́й принося́, о́тче, же́ртвы, на коне́цъ себе́ прине́слъ еси́ же́ртву живу́ю, свидѣ́тельствовавъ зако́нно о Христѣ́ Бо́зѣ, отъ а́нгелъ укрѣпля́емь и сме́рть изволя́я, сы́й съ вопію́щими тебѣ́: пріиди́, Фо́ко, съ на́ми, и никто́же на ны́.

Икосъ:

Жи́зни на небесѣ́хъ жела́ющіи, сла́дость на земли́ попира́юще, устнѣ́ очи́стимъ и язы́ки уясни́мъ на пѣ́нія и благохвале́нія, я́ко да исплете́мъ досто́йно Фо́кѣ іера́рху. До небе́сныхъ бо вра́тъ вше́дъ, невозбра́нно обрѣ́те во вну́тренняя ше́ствіе и зри́тъ Жела́емаго, отъ а́нгеловъ Сла́вимаго, отту́ду бо и мо́жетъ на́мъ уми́лостивити Еди́наго Благосе́рдаго душе́внымъ неду́гомъ, я́ко свидѣ́тельствовавъ о Не́мъ. Воспѣва́емъ у́бо ему́ и вопіе́мъ: призира́я на ны́, пріиди́, Фо́ко, съ на́ми, и никто́же на ны́.

Сѣда́ленъ апо́стола, гла́съ 3. Подо́бенъ: Красотѣ́ дѣ́вства.

Краснѣ́йшаго добро́тою су́ща па́че сыно́въ человѣ́ческихъ, Сло́во Пребезнача́льное, воплоще́нное па́че ума́, Кодра́те, проповѣ́далъ еси́, тѣ́мъ просвѣти́лъ еси́ во тмѣ́ су́щія, свѣ́тъ язы́комъ бы́въ я́ко іера́рхъ боже́ственъ. Тѣ́мъ твое́ свѣтоно́сное торжество́ вѣ́рою соверша́юще, пое́мъ тя́.

Сла́ва, му́ченика, гла́съ 1. Подо́бенъ: Гро́бъ Тво́й.

Яко му́ченикъ и па́стырь свяще́нно просла́вился еси́, кро́вію оде́жду свяще́нства обагри́въ свѣтлѣ́йше, и Го́споду предстои́ши. Тѣ́мъ дне́сь Бо́жія Це́рковь пра́зднуетъ пресла́вную твою́ па́мять, Фо́ко всеблаже́нне.

И ны́нѣ, богоро́диченъ:

Наде́ждо христіа́нъ, Пресвята́я Дѣ́во, Его́же родила́ еси́ Бо́га па́че ума́ и сло́ва, непреста́нно моли́ съ вы́шними си́лами, да́ти оставле́ніе грѣхо́въ на́мъ всѣ́мъ и исправле́ніе житія́, вѣ́рою и любо́вію при́сно Тя́ прославля́ющимъ.

Крестобогоро́диченъ:

Ви́дящи Тя́, Христе́, Всенепоро́чная Ма́ти ме́ртва на Крестѣ́ распросте́рта, вопія́ше: Сы́не мо́й, Собезнача́льне Отцу́ и Ду́ху, что́ неизрече́нное строе́ніе сіе́, и́мже спа́слъ еси́ пречи́стыхъ Твои́хъ ру́къ, Ще́дре, созда́ніе?

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Земледѣ́лавъ ни́ву серде́чную, серпо́мъ слове́съ твои́хъ зло́бы те́рніе все́ искорени́лъ еси́.

Исцѣле́ній да́ры всѣ́мъ на́мъ гро́бъ тво́й то́читъ, свяще́нне Кодра́те, хва́лящимъ тя́.

Ми́лостивно преклоня́яся, отъ злолю́тыхъ изыма́еши бѣ́дъ, свяще́нне Кодра́те, моля́щихъ тя́.

Свѣща́ми слове́съ твои́хъ просвѣща́я пре́лестію омраче́нныя, и хвра́стную пре́лесть всю́ попали́лъ еси́.

Богоро́диченъ: Отъ чи́стыхъ Твои́хъ воплоти́ся крове́й Содѣ́тель, Богоро́дице, и истлѣ́вшая вся́ обнови́лъ е́сть.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Свѣтлѣ́йшую тя́ звѣзду́ на высотѣ́ церко́внѣй положи́, Фо́ко, Влады́ка, страда́ній, свяще́ннѣйше, и чуде́съ сія́ньми всѣ́хъ сердца́ просвѣща́юща.

Исповѣ́давъ воплоще́ніе Влады́чне предъ мучи́тельскимъ суди́щемъ, му́чениче страстоте́рпче, и свѣ́тло посрами́лъ еси́ е́ллинская чти́лища и многобо́жное безбо́жіе.

Возвыша́ему мо́рю пре́лести многобо́жія бу́рею, Боже́ственнымъ окормле́ніемъ преше́лъ еси́, сла́вне, приста́нище тиша́йшее всѣ́мъ бы́въ пла́вающимъ.

Богоро́диченъ: Неискусобра́чная Дѣ́во Благослове́нная, іера́рховъ похвало́ и страстоте́рпцевъ всѣ́хъ вѣне́цъ, бѣ́дъ и скорбе́й пою́щія Тя́ изба́ви.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Чи́стую твою́ ду́шу чистѣ́йшій Бо́гъ селе́ніе Своея́ сла́вы обрѣ́тъ, очища́етъ тобо́ю ду́ши, оскве́рншіяся лю́тыми грѣхопаде́ньми.

Еллинстіи мудрецы́, твои́ми побѣжде́ни му́дрыми догма́ты, исповѣ́дати покори́шася, блаже́нне, Христа́ Содѣ́теля, Отца́ Безнача́льнаго Му́дрость и Си́лу.

Провозглаша́я свяще́нно су́щую человѣ́комъ свѣ́тлость отъ Отца́ свѣ́товъ, Кодра́те, просвѣти́лъ еси́ лю́ди чествова́ти и сла́вити Тро́ицу Нераздѣ́льную.

Богоро́диченъ: Воплоще́нна на́мъ во дву́ естества́хъ Сы́на родила́ еси́, изъ Отца́ пре́жде всѣ́хъ вѣко́въ, Чи́стая, рожде́ннаго безсѣ́менно, безлѣ́тно, я́ко Еди́нъ вѣ́сть.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ше́ствія вра́жія я́вственно запя́лъ еси́, напра́вивъ твоя́ ше́ствія къ стезя́мъ Боже́ственнаго хотѣ́нія, свяще́ннѣйше.

Терза́емо ра́нами многострада́льное тѣ́ло твое́ расто́рже безбо́жія у́зы Боже́ственною си́лою, Фо́ко богоблаже́нне.

Всецѣ́лое Бо́гу прине́слся еси́ заколе́ніе, поже́ршемуся на́съ ра́ди, всехва́льне, и крова́выя же́ртвы и́дольскія разори́вшему.

Богоро́диченъ: Му́дрость Бо́жія созда́ Себѣ́, о Влады́чице, отъ святы́хъ и чи́стыхъ Твои́хъ крове́й хра́мъ, я́ко благоволи́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Высо́кое не́бо бы́лъ еси́, сла́ву повѣ́дающее Бо́жію спаси́тельную, я́ко іера́рхъ боже́ственный, я́ко сла́венъ ты́, Кодра́те, апо́столъ.

Еди́но естество́ Божества́ безнача́льное, еди́но Госпо́дство проповѣ́дуя, всему́дре, многобо́жія разруши́лъ еси́, Кодра́те, мра́чное безу́міе.

Зако́номъ естества́ во гро́бѣ твое́ тѣ́ло, блаже́нне, свяще́ннѣйше ны́нѣ лежа́що, чудодѣ́йствуетъ пресла́вная па́че естества́, Кодра́те приснопа́мятне.

Богоро́диченъ: Не́бо простры́й хотѣ́ніемъ, ино́е не́бо на земли́ Тя́ показа́, Богороди́тельнице Влады́чице, и Тобо́ю су́щія во тмѣ́ просвѣти́.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Мо́ре безбо́жія изсуши́лъ еси́, всему́дре, исто́чникъ жи́зни источа́яй, уче́нія преподо́бная, ны́нѣ же чуде́съ ту́чами омыва́еши страсте́й вся́кое злосмра́діе.

Взя́тся на дре́вѣ, лю́тѣ раздробля́емь и изчленя́емь, блаже́нне, и гла́съ съ высоты́, тя́ укрѣпля́ющій, внуши́лъ еси́, священнонача́льниче и му́чениче многострада́льне.

Стра́сти Безстра́стнаго, Фо́ко, уподо́бився, врачу́еши стра́сти разли́чныя и избавля́еши бу́ри и треволне́нія пла́вающихъ, къ Бо́гу боже́ственными твои́ми моли́твами.

Богоро́диченъ: Яко ту́ча, спаси́тельное Сло́во истощи́ся въ нетлѣ́нную Твою́ утро́бу, всесвята́я Отрокови́це, и зло́бныя пото́ки Боже́ственною си́лою изсуши́.

Конда́къ, гла́съ 8. Подо́бенъ: Яко нача́тки.

Яко священнонача́льника че́стна и страда́льца твердѣ́йша, вселе́нная прино́ситъ Тебѣ́, Го́споди, Кодра́та апо́стола и пѣ́сньми почита́етъ честну́ю его́ па́мять, прося́щи всегда́ прегрѣше́ній оставле́нія тѣ́мъ дарова́тися пою́щимъ его́, Благоутро́бне.

Икосъ:

Му́драго іера́рха почти́мъ, я́ко па́стыря вѣ́рна и учи́теля, я́ко во цвѣ́тницѣ страда́нія процвѣте́ шипо́къ свяще́ннѣйшій и вѣ́рныя ны́ облагово́ни, чуде́съ же луча́ми и дѣя́ніи добродѣ́тельными, просвѣще́нія испо́лнивъ всю́ зе́млю исцѣле́ній свѣ́тлостьми, удиви́ бо его́ Бо́гъ всѣ́мъ почита́ющимъ пѣ́сньми честну́ю его́ па́мять, я́ко Благоутро́бенъ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Возвы́сивъ у́мъ къ Пе́рвому Бла́гу, богови́днѣйшій хра́мъ Тро́ицы бы́лъ еси́, и су́щія во глубинѣ́ озлобле́нія возвы́силъ еси́ высоча́йшими твои́ми уче́ніи, зову́щія: благослове́нъ еси́, Бо́же отце́въ на́шихъ.

Сокруши́въ хра́мы и́дольскія моли́твъ раскопа́ньми, созда́лъ еси́ Боже́ственнымъ Ду́хомъ хра́мы Бо́жія, свяще́ннѣйше о́тче, и спаса́емыхъ мно́жества приве́лъ еси́, зову́щія: благослове́нъ еси́, Бо́же отце́въ на́шихъ.

Огнедохнове́нъ сы́й, я́ко духо́вный о́гнь Боже́ственный, всему́дре, въ се́рдцы твое́мъ имѣ́я всегда́, свѣща́ ви́дѣлся еси́, паля́щая всю́ хвра́стную ле́сть и вопію́щія просвѣща́ющая: благослове́нъ еси́, Бо́же отце́въ на́шихъ.

Богоро́диченъ: Изба́вльшеся Тобо́ю кля́твы пра́дѣднія, Богора́дованная, до́брыхъ вину́ Тя вѣ́мы, я́ко всевино́вное ро́ждшую Сло́во, па́че ума́ же и чудесе́, и вопіе́мъ Ти́, Пречи́стая, Благослове́нная, Бо́га пло́тію ро́ждшая.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ярости мучи́телей не устраши́лся еси́, сла́вне, па́ствѣ же предста́тельствуя слове́снѣй, я́ко а́гнецъ, прине́слся еси́ Первопа́стырю Христу́, му́ченически, Фо́ко, прославля́емь.

Искуше́нъ бы́лъ еси́, я́ко зла́то въ горни́лѣ, му́чениче, посредѣ́ вве́рженъ ва́пна пламенови́днаго и ника́коже опаля́емь, — благослове́нъ еси́, Бо́же мо́й, — взыва́я, — въ хра́мѣ сла́вы Твоея́, Го́споди.

Боже́ственная любо́вь, распаля́ющи се́рдце твое́, Боже́ственною росо́ю тя́, сла́вне, сохрани́ во огни́ неизнуря́ема, безбо́жія же, іера́рше, ти́ну сожига́юща.

Богоро́диченъ: Согни́вшій души́ моея́ до́мъ, Пречи́стая Отрокови́це, покая́нія о́бразы, я́ко Блага́я, обнови́, Яже все́ человѣ́чество Рождество́мъ Твои́мъ обнови́вшая.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Утвержде́ны на у́мнѣмъ Ка́мени душе́вныя имѣ́я стопы́, запя́лъ еси́, блаже́нне, Госпо́дни враги́ и вся́, Кодра́те, утверди́лъ еси́ пою́щія и превознося́щія Христа́ во вся́ вѣ́ки.

Укра́шену добродѣ́тельми имѣ́я ду́шу и се́рдце, украси́лъ еси́ сло́вомъ уче́нія ду́ши, избавля́я нелѣ́поты вся́каго идолонеи́стовства, Кодра́те богоглаго́ливе.

Яко учени́къ Іису́совъ, я́ко апо́столъ свѣ́телъ, я́ко Со́лнца пра́вды свѣтови́дная мо́лнія, Кодра́те, просвѣти́, освяти́ соверша́ющія святу́ю твою́ па́мять.

Богоро́диченъ: Свяще́ннѣйшими Тя́ гла́сы свяще́ннѣйшіи Бо́жіи, Чи́стая, проро́цы бу́дущую Ма́терь провозгласи́ша я́сно всѣ́ми Влады́чествующаго, Пречи́стая, Его́же благослови́мъ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Благода́ть во уста́ твоя́, му́дре Фо́ко, излія́ся, тѣ́мъ обрати́лъ еси́ блудя́щія лю́ди змíя совѣ́томъ и приве́лъ еси́, я́коже па́стырь и́стинный, Христу́ зову́щія: благослови́те, вся́ дѣла́ Госпо́дня, Го́спода.

Неусы́пна и́мать тя́, му́дре, вѣ́рныхъ собо́ръ моли́твенника, утоля́юща мо́ря во́лны сверѣ́пыя, напа́сти же укроща́юща и лю́тыхъ вся́ческихъ на́съ избавля́юща, вопію́щія: благослови́те, вся́ дѣла́ Госпо́дня, Го́спода.

Струи́ цѣле́ній хра́мъ тво́й тре́бующимъ то́читъ всегда́, приста́нище явля́яся нево́лненное и страсте́й отгони́тельное тебе́ почита́ющимъ и Христу́, му́чениче, зову́щимъ: благослови́те, вся́ дѣла́ Госпо́дня, Го́спода.

Да твою́ честву́емъ честну́ю, Фо́ко, па́мять, торжеству́юще, преблага́го Го́спода умоли́ усе́рднѣйше, избавле́ніе неудо́бныхъ на́мъ дарова́ти, вопію́щимъ: благослови́те, вся́ дѣла́ Госпо́дня, Го́спода.

Богоро́диченъ: Зако́нныя Тя́ прообража́ху ковче́гъ и ста́мна, иму́щая ма́нну, Пречи́стая, Боже́ственная трапе́за, па́ки же и свѣ́щникъ златоза́рный, во открове́ніе язы́ковъ Свѣ́тъ поро́ждшую, просвѣща́ющій богозна́ніемъ земны́я концы́.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Укра́шенъ ра́зумомъ кра́сному Влады́цѣ предстои́ши, свѣтлѣ́йшъ при́сно, я́ко іера́рхъ богопрія́тенъ, я́ко апо́столъ боже́ственъ, со всѣ́ми апо́столы и́стинно ми́ръ мíру, Кодра́те, испроша́я.

Твои́хъ Магнисíя иму́щи ра́ку моще́й, я́ко боже́ственный киво́тъ, и отъ него́ вся́ку, Кодра́те, по́льзу исчерпа́етъ любо́вію, оби́тели же небе́сныя, твою́ ду́шу имѣ́ющія, со всѣ́ми святы́ми веселя́тся.

Свѣтоза́рный тво́й де́нь, свѣтоно́сная твоя́ па́мять, и́стинно благосла́вный тво́й пра́здникъ всѣ́мъ, я́ко со́лнце, возсія́, ю́же вѣ́рно соверша́емъ, Кодра́те, очище́ніе грѣхо́въ моля́щеся моли́твами твои́ми обрѣсти́ и ве́лію ми́лость.

Богоро́диченъ: Пощади́ мя, Го́споди, пощади́, егда́ хо́щеши суди́ти ми́, и не осуди́ мене́ во о́гнь, ни я́ростію Твое́ю обличи́ мене́: мо́литъ Тя́ Дѣ́ва, Тебе́ ро́ждшая, Христе́, апо́столовъ мно́жество и съ проро́ки му́ченицы.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Священносло́віи боже́ственными, свяще́ннаго, пріиди́те, па́стыря вси́ всесвяще́нную па́мять свяще́ннѣйше торжеству́емъ, благодѣ́телю Бо́гу за ны́ моля́щаго.

Яви́лся еси́ распаля́емь ре́вностію Влады́ки, егда́, му́чениче, въ ба́ню разжже́нную вше́лъ еси́, въ не́йже ду́хъ тво́й въ Бо́жіи ру́цѣ веселя́ся, му́чениче, пре́далъ еси́.

Тя́ іера́рховъ ли́ки, и му́чениковъ собра́нія, и свяще́нныхъ апо́столовъ соводворе́ніе, всѣ́хъ же пра́ведныхъ, му́чениче Фо́ко, ду́си, иму́ще посредѣ́ себе́, веселя́тся.

Простре́ся въ мíрѣ па́мять твоя́, ду́ши просвѣща́ющи благохва́лящихъ вѣ́рою по́двиги твоя́, и боре́нія, и до́блественное страда́ніе, па́стырю и му́чениче досточу́дне.

Богоро́диченъ: Просвѣти́, Чи́стая, ду́шу мою́, омраче́нную грѣхо́мъ, и вѣ́чнующаго мя́ пла́мене и тмы́ изба́ви хода́тайствомъ Твои́мъ, да Твое́, ра́дуяся, восхваля́ю вели́чество.

Свѣти́ленъ апо́стола. Подо́бенъ: Ду́хомъ во святи́лищи.

Тече́ніе кра́сныхъ твои́хъ но́гъ, Кодра́те апо́столе, возврати́въ, къ ше́ствію небе́сному возше́лъ еси́ ра́дуяся, и, Тро́ицѣ предста́въ, во Отцѣ́ ви́диши Сы́на и Ду́ха Боже́ственнаго, сего́ ра́ди вѣ́рою пресвяще́нную твою́ и боже́ственную пра́зднуемъ па́мять.

Сла́ва, священному́ченика. Подо́бенъ: Не́бо звѣзда́ми.

Архіере́евъ сла́ва и ни́щихъ защи́тникъ ты́ показа́лся еси́, богому́дре о́тче, и сто́лпъ добродѣ́телей, тѣ́мъ помина́й всѣ́хъ пою́щихъ тя́, Фо́ко.

И ны́нѣ, богоро́диченъ:

Тя́ предста́тельницу вси́ и́мамы, грѣ́шніи, о Всесвята́я Дѣ́во! Ты́ благопремѣ́нна на́мъ сотвори́ Сы́на Твоего́ Ма́терними Твои́ми моли́твами.


НА ЛИТУРГІИ,

Проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 311. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 215 – 216, 219 об. – 225.

/ Къ оглавленію раздѣла /


Наверхъ / Къ титульной страницѣ

0