Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Слу́жба и́же во святы́хъ отцу́ на́шему Дими́трію, митрополи́ту Росто́вскому, но́вому чудотво́рцу.
Его́же обрѣ́теніе моще́й пра́зднуется Септе́мврія въ 21-й де́нь.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Вма́лѣ бы́лъ еси́ вѣ́ренъ, Дими́тріе,* надъ мно́гими тя́ поста́ви Госпо́дь,* и вше́лъ еси́ въ ра́дость Го́спода твоего́,* идѣ́же предстоя́ Ему́,* мо́лишися о душа́хъ на́шихъ.

Въ единонадеся́тый ча́съ потруди́выйся,* ра́венъ дина́рій съ пе́рвыми пріе́млеши:* житія́ бо святы́хъ написа́вый на́мъ,* и са́мъ въ кни́ги живота́ вѣ́чнаго* съ ни́ми написа́лся еси́.

Отрочество твое́ на уче́ніе,* ю́ношество на по́двиги мона́шескія,* му́жественный же во́зрастъ на по́льзу всѣ́мъ освяти́лъ еси́,* и́хже ра́ди тя́ ны́нѣ* во святы́хъ почита́емъ.

Якоже мíръ и вся́ кра́сная мíра,* та́ко и нача́лство надъ бра́тіею оста́вивый,* всели́лся еси́ въ Кíевъ па́ки близъ пеще́ръ,* отону́дуже би́серъ житíй святы́хъ* труда́ми твои́ми ископа́лъ еси́ на́мъ.

Сла́ва, гла́съ то́йже:

Препросла́вленъ бу́ди, Тріипоста́сный Бо́же на́шъ, я́ко въ по́здняя лѣ́та, но́ваго чудотво́рца Дими́трія, Россíи дарова́лъ еси́.

И ны́нѣ богоро́диченъ, гла́съ то́йже:

Небе́сныхъ чино́въ ра́дованіе, на земли́ человѣ́ковъ крѣ́пкое предста́тельство, Пречи́стая Дѣ́во, спаси́ ны, и́же къ Тебѣ́ прибѣга́ющія, я́ко на Тя́ упова́ніе по Бо́зѣ, Богоро́дице, возложи́хомъ.

Аще же отда́ніе Воздви́женію, пра́здника.

На стихо́внѣ стихи́ры, гла́съ 2, самогла́сенъ:

Ра́дуйся, гра́де Росто́ве, я́ко отъ Кíева, съ преждепочи́вшими въ тебѣ́, и сего́ па́стыря Дими́трія, ны́нѣ во святы́хъ почита́емаго, прія́лъ еси́.

Сти́хъ: Свяще́нницы Твои́ облеку́тся въ пра́вду, [и преподо́бніи Твои́ возра́дуются].

Ра́дуйся, свяще́нное сосло́віе, въ тебѣ́ бо возсія́ священнонача́лникъ Дими́трій, на него́же излія́ся нетлѣ́ніе, а́ки мѵ́ро на браду́ Ааро́ню.

Сти́хъ: Честна́ предъ Го́сподемъ сме́рть преподо́бныхъ Его́.

Ра́дуйся, Дими́тріе, святи́телей похвало́, свяще́нниковъ сла́во, пра́вило мона́ховъ, Це́ркве утвержде́ніе.

Сла́ва, гла́съ то́йже:

Возда́ждь сла́ву Бо́гу твоему́, Россíе, я́ко Просла́вивый тебе́ пре́жде святы́ми не оставля́етъ прославля́ти и ны́нѣ.

И ны́нѣ, гла́съ то́йже: [Аще нѣ́сть отда́нія.]

Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

По Ны́нѣ отпуща́еши.., тропа́рь свята́го, гла́съ 8:

Правосла́вія ревни́телю и раско́ла искорени́телю, Россíйскій цѣле́бниче и но́вый къ Бо́гу моли́твенниче, списа́ньми твои́ми всѣ́хъ [1] уцѣлому́дрилъ еси́. Цѣвни́це духо́вная, Дими́тріе блаже́нне, моли́ Христа́ Бо́га спасти́ся Импера́тору на́шему [и́мярекъ], всему́ наслѣ́дію и держа́вѣ Его́. [2].

Сла́ва, и ны́нѣ, богоро́диченъ: [Аще нѣ́сть отда́нія пра́зднику.]

Иже на́съ ра́ди рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя.


НА ВЕЛИЦѢЙ ВЕЧЕРНИ,
Блаже́нъ му́жъ, антифо́нъ 1-й. [На Го́споди воззва́хъ:] стихи́ры на 8, гласъ 8. Подо́бенъ: О, пресла́внаго чудесе́!

Дне́сь свидѣ́тельство сы́на Гро́мова* и на тебѣ́ сбы́стся, свя́те Дими́тріе,* вои́стинну бо свидѣ́тельствовася ти́ отъ всѣ́хъ* и отъ Са́мыя Истины,* я́ко твои́ми моли́твами немощнíи врачу́ются,* слѣпíи прозира́ютъ, хромíи хо́дятъ,* де́мони отгоня́ются и вся́ ско́рби рѣша́тся.* Сего́ ра́ди почита́емъ тя́ вси́,* но́вый на́шъ Россíйскій чудотво́рче.

Новоявле́нне святи́телю Дими́тріе,* въ ча́съ сме́рти, па́че же живота́ твоего́* чре́сла любо́вію препоя́салъ еси́,* и но́зѣ обу́въ во упова́ніе Христо́во,* свѣти́льникъ вѣ́ры украси́лъ еси́ еле́емъ дѣ́лъ благи́хъ.* Тѣ́мъ съ му́дрыми вше́лъ еси́ въ небе́сный черто́гъ,* идѣ́же предстоя́ Влады́цѣ Христу́, помоли́ся,* да прише́дшу полу́нощному во́плю,* изы́демъ въ срѣ́теніе Ему́ и мы́ гото́ви.

Житіе́ нескве́рно, терпѣ́ніе, кро́тость и любо́вь нелицемѣ́рну, воздержа́ніе безмѣ́рное, всено́щное стоя́ніе, умиле́ніе боже́ственное, вѣ́ру и наде́жду и́стинну, съ ми́лованіемъ, о́тче, стяжа́въ, я́ко а́нгелъ пожи́лъ еси́ на земли́ съ тѣ́ломъ, Дими́тріе блаже́нне, моли́твенниче о душа́хъ на́шихъ [3].

Еще́ отъ ю́на во́зраста Бо́гу освяще́нъ бы́лъ еси́, архіере́е, му́дрости рачи́телю. Тѣ́мже потща́лся еси́ тлѣ́нными вѣ́чнующая стяжа́ти, воздержа́нія брозда́ми себе́ обложи́въ, пло́ть ду́ху повину́лъ еси́, тѣ́мже и по честнѣ́мъ твое́мъ преставле́ніи совокупля́яся съ небе́сными ликостоя́ніи, и́хже житію́ во пло́ти поревнова́лъ еси́. Христа́, Ему́же отъ ю́ности послужи́лъ еси́, моли́ спасти́ся всѣ́мъ, честно́е моще́й твои́хъ обрѣ́теніе при́сно сла́вящимъ пѣ́сньми.

Сла́ва, гла́съ 8:

Кра́сны но́зѣ благовѣству́ющихъ ми́ръ, благовѣству́ющихъ блага́я, кра́сны вои́стинну но́зѣ и твои́, о Дими́тріе, па́че же ве́сь красе́нъ еси́, я́ко внегда́ пріити́ тебѣ́ на престо́лъ сво́й, а́біе ми́ръ всѣ́мъ благовѣсти́лъ еси́: ми́ръ Це́рквамъ и градо́мъ, ми́ръ дома́мъ и вся́кому сожи́тельству. Ми́ръ Бо́жій, я́коже Па́велъ, вѣща́лъ еси́, да водворя́ется въ сердца́хъ ва́шихъ, и ми́ръ имѣ́йте и святы́ню со всѣ́ми, бра́тіе. Та́ко у́бо и ны́нѣ посѣти́вый на́съ явле́ніемъ моще́й твои́хъ, благовѣству́й ми́ръ и благоде́нствіе Миролюби́вому Импера́тору на́шему [и́мярекъ]. И испроси́ ско́ро на враги́ побѣ́ду и одолѣ́ніе, наслѣ́дію же и держа́вѣ Его́ благоти́шіе, и мíрови ве́лію ми́лость.

И ны́нѣ, богоро́диченъ, гла́съ то́йже: [Аще нѣ́сть отда́нія.]

Ца́рь небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Вхо́дъ. Проки́менъ дне́, и чте́нія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 7:

Ве́лій еси́, Го́споди, и ди́венъ во святы́хъ Свои́хъ, я́ко по успе́ніи и во гро́бѣ Саму́илевы ко́сти проро́чествуютъ, и Елиссе́евы ме́ртвыя ме́ртвыхъ воскреша́ютъ, Иліина́ же ми́лоть сю́ду и сю́ду во́ды раздѣля́етъ. Чу́дна сія́ вои́стину и ди́вна, но чу́днѣе сѣ́нь Петро́ва и главотя́жи Па́вла, я́же ду́хи нечи́сты прогоня́ли и исцѣля́ли вся́ку болѣ́знь и я́зву. Си́мъ всѣ́мъ почуди́вшеся чудеса́мъ, просла́вимъ чудодѣ́ющаго Бо́га и ны́нѣ, во свято́мъ чудотво́рцѣ Дими́тріи.

Гла́съ 6:

Пріе́мляй моли́твы святы́хъ Твои́хъ на небеси́ и обѣща́вый ра́ди пра́ведныхъ не погуби́ти грѣ́шныя на земли́, повелѣ́лъ еси́ ты́я въ моли́тву призыва́ти къ Тебѣ́, Го́споди: иди́те бо, глаго́леши, къ рабу́ Моему́ Іову, и сотвори́тъ же́ртву и моли́тву за вы́. Но и са́мъ Тво́й уго́дникъ Моисе́й, и въ пещи́ тріе́ о́троцы, егда́ умоля́ху Тя́ за лю́ди согрѣ́шшія, пре́жде почи́вшихъ пра́отцевъ святы́хъ представля́ху Ти́. Си́це и ны́нѣ, моля́щеся Тебѣ́, Христе́ Бо́же на́шъ, приво́димъ въ моли́тву уго́дника Твоего́ Дими́трія, свя́то пожи́вшаго, да его́ ра́ди пра́ведника пощади́ши на́съ, грѣ́шныхъ, и спасе́ши ду́ши на́ша.

Гла́съ 5:

Пріиди́те, правосла́вныхъ собо́ри, воспои́мъ святи́теля, уче́ніемъ къ богоразу́мію на́съ наста́вльшаго, исто́чника чуде́съ преди́внаго, Це́ркве свѣти́льника пресвѣ́тлаго, учи́теля Росто́ву прему́драго и все́й Россíи прекра́сное удобре́ніе. То́й бо избавля́етъ на́съ отъ вся́кихъ злы́хъ искуше́ній и бѣ́дъ и мо́лится о душа́хъ на́шихъ.

Христо́во ста́до слове́сныхъ ове́цъ на зла́цѣ благоче́стія до́брѣ упа́слъ еси́, іера́рше. Тѣ́мже и по преставле́ніи церко́вныхъ твои́хъ ча́дъ не оставля́й, но посѣща́й. И Святѣ́й Тро́ице со архіере́и предстоя́, моли́ спасти́ вся́, честны́хъ твои́хъ моще́й обрѣ́теніе любо́вію почита́ющія, Дими́тріе прехва́льне.

Зна́меніи и чудесы́ тебе́ Госпо́дь просла́ви, святи́телю Дими́тріе, прогоня́еши бо ду́хи и врачу́еши стра́сти, ду́ши просвѣща́еши вѣ́рныхъ, приходя́щихъ ко свято́му твоему́ гро́бу, а́нгеловъ равностоя́телю, архіере́евъ сопресто́лне, апо́столовъ единонра́вне, благовѣ́рія побо́рниче.

Сла́ва, гла́съ 6:

Гра́дъ освяти́ся, наро́ди благослови́шася, Це́рковь перворо́дныхъ ду́хомъ ликовству́етъ во обрѣ́теніи честны́хъ твои́хъ моще́й, іера́рше Дими́тріе, съ людми́ зову́щи: ты́ моя́ крѣ́пость и утвержде́ніе, ты́ моя́ добро́та, и тобо́ю хвалю́ся. Моли́ся спасти́ вся́, любо́вію всемíрное святы́хъ твои́хъ моще́й обрѣ́теніе при́сно сла́вящія.

И ны́нѣ, богоро́диченъ, гла́съ то́йже: [Аще нѣ́сть отда́нія.]

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На стихо́внѣ стихи́ры, гла́съ 3:

Слу́шая гла́са Госпо́дня, призыва́ющаго тя́ къ Себѣ́, гото́въ бы́лъ еси́, Дими́тріе, къ исхо́ду твоему́ отъ сея́ жи́зни. Въ ве́черъ и въ полу́нощи, въ пѣтлоглаше́ніе же и у́тро не воздрема́лъ еси́, ожида́я къ себѣ́ Го́спода, до́ндеже, срѣ́тивъ, вше́лъ еси́ къ Нему́ въ ра́дость вѣ́чную, идѣ́же предстоя́ Ему́, мо́лишися, да пода́стъ и на́мъ жи́знь свя́ту и кончи́ну христіа́нскую.

Сти́хъ: Свяще́нницы Твои́ облеку́тся въ пра́вду и преподо́бніи Твои́ возра́дуются.

Облекíйся ны́нѣ за по́двиги въ преподо́біе, обле́клся еси́ и во святы́ню за незло́біе, я́ко жениху́ цѣлому́дренну, возложи́ ти́ вѣне́цъ чудотворе́нія, и я́ко невѣ́сту, украси́ тя Госпо́дь за чистоту́ нетлѣ́ніемъ. Дарова́ же ти́ сокро́вища неветша́ющая на небеси́, я́ко и́ноческую нищету́ соблю́лъ еси́ по сме́рть на земли́, вѣ́руя Бо́гу бы́ти прія́тнѣе сіе́, а́ще кто́ тя помяне́тъ ничто́же оста́вивша по себѣ́. Помина́й у́бо на́съ ты́ па́че, приснопа́мятный Дими́тріе, мно́го прегрѣше́ній иму́щихъ, но ничто́же отъ благи́хъ дѣ́лъ содержа́щихъ.

Сти́хъ: Честна́ предъ Го́сподемъ сме́рть преподо́бныхъ Его́.

Любопы́тную десни́цу да отрази́ши отъ поиска́нія имѣ́ній твои́хъ, предвозвѣсти́лъ еси́ въ завѣ́тѣ, нищелю́бче Дими́тріе, глаго́ля: я́ко а́ще и мно́го кто́ потруди́тся о тѣ́хъ, но ничто́же обря́щетъ. Отъ него́же и мы́ научи́мся, бра́тіе, я́ко лу́чше не имѣ́ти или́ расточа́ти на ни́щія, не́же собира́ти и оставля́ти по себѣ́. Си́це бо мо́жемъ купи́ти у Христа́ Ца́рство небе́сное.

Сла́ва, гла́съ 4:

Возра́дуемся, Россíйстіи собо́ри, похвалу́ Росто́вскую ублажа́юще, чудотво́рца Дими́трія, се́й бо мно́го потруди́ся въ списа́ніи душеполе́зныхъ на́мъ кни́гъ, и́миже развраще́нныя отъ пра́ваго благоче́стія пути́ ко и́стинѣ направля́ются, правосла́вныхъ же сердца́ въ правовѣ́ріи утвержда́ются. Ему́же и возопіи́мъ: О, прему́дрый учи́телю, моли́ся Христу́, да твои́мъ уче́ніемъ наставля́еми, получи́мъ живо́тъ вѣ́чный.

И ны́нѣ, отда́нію пра́здника, или́ богоро́диченъ, гла́съ то́йже:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

На благослове́ніи хлѣ́бовъ, по Ны́нѣ отпуща́еши...
Тропа́рь [свята́го] два́жды и пра́зднику еди́ножды.



НА УТРЕНИ,
На Бо́гъ Госпо́дь: тропа́рь святи́телю два́жды. Сла́ва, и ны́нѣ, пра́здника, или́ богоро́диченъ.

По 1-мъ стихоло́гіи сѣда́ленъ, гла́съ 3:

Ма́рѳа и Марíя, сестры́ Ла́заревы, о́ва, сѣдя́щи при ногу́ Іису́сову, слы́шаше сло́во Его́, о́ва же печа́шеся о Христо́вомъ угоще́ніи; ты́ же, обои́мъ си́мъ подража́я, и въ разли́чныхъ послуша́ніяхъ Христо́во и́го сла́дцѣ носи́лъ еси́, и слы́ша и творя́ са́мъ сло́во Бо́жіе, тому́жде про́тчихъ учи́лъ еси́. Тѣ́мъ я́коже на земли́ отъ царе́й и влады́къ разли́чныя по́чести, та́ко и на небеси́ неотъе́млемыя тѣ́хъ ча́сти у Христа́ сподо́бился. Его́же моли́, да пода́стъ душа́мъ на́шимъ богому́дріе Марíино, тѣлесе́мъ же трудолю́біе Ма́рѳино. [Два́жды.]

Сла́ва, и ны́нѣ, отда́нію.
Или́ се́й богоро́диченъ, гла́съ то́йже:

Егда́ ся́детъ на престо́лѣ сла́вы Своея́ Судія́ нелицемѣ́рный, тогда́, о Богоневѣ́стная Влады́чице Марíе, всеси́льнымъ предста́тельствомъ Твои́мъ заступи́ мя; ни внима́нія бо, ни трудолю́бія стяжа́хъ се́стръ Ла́заревыхъ, но все́ житіе́ мое́ ижди́хъ, прилѣжа́ самолю́бію и молва́мъ жите́йскимъ. Тѣ́мже пре́жде вре́мене прибѣга́ю подъ кро́въ Тво́й и вопію́: заступи́ мя, о Всеблага́я моя́ Покрови́тельнице, въ де́нь о́нъ Су́дный.

По 2-мъ стихосло́віи сѣда́ленъ, гла́съ 8:

Яко на сѣда́лищи сѣдо́ша и у на́съ суевѣ́рствующіи фарисе́и, показу́юще себе́ бы́ти предъ невѣ́жы законоучи́телми, но не разумѣ́юще ни я́же са́ми утвержда́ютъ, ни я́же предъ други́ми глаго́лютъ, и́хже де́рзкое по прише́ствіи твое́мъ въ па́ству уви́дѣвъ неи́стовство, а́біе ревну́я по благоче́стіи, возревнова́лъ еси́, и а́ки Илія́, вся́ таиноводи́тельства раско́лническая изве́дъ на среду́, посрами́лъ еси́, оста́вивъ на́мъ въ позна́ніе лжи́ и́хъ обличи́тельное наставле́ніе. Его́же ра́ди тя́ ны́нѣ я́ко и́стиннаго наста́вника на́шего и учи́теля почита́емъ вси́, богому́дре Дими́тріе. [Два́жды.]

Сла́ва, и ны́нѣ, отда́нію.
Или́ се́й богоро́диченъ, гла́съ то́йже:

На вся́къ де́нь и ча́съ чрезъ Моисе́я и проро́ковъ взыва́етъ Сы́нъ Тво́й на покая́ніе мя́, о Госпоже́ Влады́чице, но а́зъ не то́кмо си́мъ, но ниже́ а́ще кто́ и отъ ме́ртвыхъ воста́лъ бы, небрегу́ внима́ти. Что́ у́бо бу́детъ и на что́ надѣ́юся а́зъ, окая́нный? То́кмо къ Тебѣ́ со слеза́ми вопію́: напра́ви слу́хъ и у́мъ мо́й къ призыва́ющему мя́ Сы́ну Твоему́, да и́миже вѣ́сть судба́ми наста́витъ мя́ на пу́ть покая́нія.

По поліеле́и сѣда́ленъ, гла́съ 7:

Яко фи́никсъ, процвѣ́лъ еси́ нетлѣ́ніемъ отъ земли́, и я́ко ке́дръ, и́же въ Лива́нѣ, умно́жился еси́ чудесы́, превозне́слся еси́ явле́ніемъ, я́ко гра́дъ, верху́ стоя́й, и возсія́лъ еси́ па́мятію твое́ю, я́ко свѣти́лникъ изъ-подъ спу́да на свѣ́тъ. Яже вся́ на тебѣ́ ви́дяще сбытія́, прославля́емъ Возвели́чившаго тя́ та́ко во святы́хъ Свои́хъ. Ты́ же я́ко имѣ́я дерзнове́ніе ко Христу́ Го́споду, помоли́ся, святоявле́нне Дими́тріе, да спасе́тъ и просвѣти́тъ ду́ши на́ша. [Два́жды.]

Сла́ва, и ны́нѣ отда́нію.
Или́ се́й богоро́диченъ, гла́съ то́йже:

Проро́цы Тя́ предвозвѣсти́ша, апо́столи Тя́ проповѣ́даша, му́ченицы просла́виша, святи́теліе ублажи́ша. Тѣ́мъ и мы́ съ ни́ми, Богоро́дицу, Тя́ исповѣ́дающе, благоче́стно велича́емъ.

Степе́нна 4-го гла́са, антифо́нъ 1-й. Проки́менъ, гла́съ 4: Уста́ моя́ возглаго́лютъ прему́дрость и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Вся́кое дыха́ніе... Ева́нгеліе отъ Іоа́нна, зача́ло 35, [отъ полу].

По 50-мъ псалмѣ́ стихи́ра, гла́съ 6:

Излія́ся благода́ть во устна́хъ твои́хъ, святи́телю Дими́тріе, уче́нми бо твои́ми Це́рковь украси́лъ еси́, и́стину Правосла́вія уясни́лъ, па́губное же раско́лническое мудрова́ніе посрами́лъ еси́. Тѣ́мъ я́коже въ житіи́, та́ко по отше́ствіи твое́мъ потщи́ся, да поне́ чудесы́ твои́ми увѣря́еми, пріи́дутъ въ чу́вство и просла́вятъ ку́пно съ на́ми Тріѵпоста́снаго Бо́га отъ на́съ исходя́щіи, но не отъ на́съ су́щіи.

Кано́нъ святи́телю Дими́трію на 8, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Го́рдому фарао́ну въ ожесточе́ніи уподо́бихся и того́ потопле́нію за нераска́яніе подпадо́хъ, но ты́, святы́й Дими́тріе, путеводи́тель ми́ бу́ди къ покая́нію, я́ко да и а́зъ отъ Христа́ получу́ вхо́дъ въ Зе́млю Обѣтова́нную.

Ни себе́ пощади́хъ, ни бли́жняго поми́ловахъ, но при́сно чре́ву, я́ко на Еги́петъ, рабо́тая, и са́мъ истаева́ю гла́домъ и жа́ждею, и други́мъ отъ крупи́цъ па́дающихъ насыща́тися возбраня́ю. Сего́ ра́ди къ тебѣ́, па́стырю до́брый Дими́тріе, истаева́емый, прибѣго́хъ, да напита́еши мя́, а́ки ма́нною, словесы́ твои́ми и напои́ши мя́ слеза́ми умиле́нія.

Уты́хъ, утолстѣ́хъ, забы́хъ Тя́, Бо́га, спаса́ющаго мя́, тя́жко бо уши́ма слы́шу и се́рдцемъ разумѣ́ю, а́ще и призыва́еши мя́ къ Себѣ́ чрезъ зако́нъ и проро́ки. Тѣ́мже, о Тво́рче и Изба́вителю мо́й! житіе́мъ и уче́ніемъ уго́дника Твоего́ Дими́трія испра́ви и спаси́ мя.

Богоро́диченъ: Ка́я по́льза въ кро́ви мое́й, внегда́ сходи́ти ми́ во истлѣ́ніе? или́ что́ приложи́тся мнѣ́, а́ще и ве́сь мíръ приобря́щу, ду́шу же погублю́? Но Ты́, Влады́чице, помози́ мнѣ́, да получу́ отъ Христа́ Спа́са Твоего́ проще́ніе грѣхо́въ и жи́знь вѣ́чную.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Утверди́ся се́рдце мое́ въ памятозло́біи, разшири́шася уста́ моя́ на смѣ́хи и осужде́нія, возвесели́хся о паде́ніи бли́жняго моего́, уче́нію же твоему́ богоуго́дному, святи́телю, ни ма́ло внима́хъ. Поне́ у́бо чудесы́ твои́ми премѣни́ мя отсе́лѣ и сотвори́ подража́теля житію́ твоему́.

Ины́я страны́ хва́лятся прему́дростію свое́ю, другíя си́лою и бога́тствомъ, мы́ же похваля́емся многоцѣле́бными святы́хъ Бо́жіихъ и твои́ми мощми́, чудотво́рче Дими́тріе, отъ ни́хже получа́емъ тѣлесе́мъ здра́віе и душа́мъ на́шимъ спаси́тельное врачева́ніе.

Дая́й моли́тву моля́щимся и благословля́яй въ лѣ́та на́ша па́мять пра́ведника Твоего́, Дими́трія, пода́ждь моли́твами того́ крѣ́пость Импера́тору на́шему [и́мярекъ] и вознеси́ ро́гъ Пома́занника Твоего́, Го́споди.

Богоро́диченъ: Взбра́нная Побѣди́тельнице и крѣ́пкая во искуше́ніяхъ на́шихъ Засту́пнице, не пре́зри грѣ́хъ ра́ди на́шихъ ускори́ти на по́мощь, и отъ бѣ́дъ изба́вити на́съ, еди́на Чи́стая, еди́на Благослове́нная.

Сѣда́ленъ, гла́съ 8:

Дре́внихъ преподо́бію подража́я, освяти́лъ еси́ житіе́ твое́ на слу́жбу Бо́гови въ осмоена́десять лѣ́то. Отне́лѣже и бы́лъ еси́ вели́къ мона́хъ, свяще́нникъ, учи́тель, іера́рхъ, ны́нѣ же чудотво́рецъ, и моли́твенникъ о душа́хъ на́шихъ. [Два́жды.]

Сла́ва, и ны́нѣ отда́нію.
Или́ се́й богоро́диченъ, гла́съ то́йже.

Златокова́нный киво́тъ вмѣща́ше въ себѣ́ дре́вле богопи́санный зако́нъ и небе́сную ма́нну. Ты́ же, Богороди́тельнице, заче́нши, пло́тію Сы́на Бо́жія родила́ еси́ во обновле́ніе и спасе́ніе ду́шъ на́шихъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Позна́ во́лъ я́сли го́спода своего́ и осе́лъ стяжа́вшаго его́, а́зъ же безслове́сными страстми́ удали́хся отъ Творца́ моего́, но ты́, па́стырю благíй Дими́тріе, я́ко овча́ заблу́ждшее, взыщи́ мене́ и Христо́ву ста́ду сопричти́ мя.

Удо́бѣе отъ те́рнія собира́ти виногра́дное гро́здіе и отъ ре́пія смоко́віе, не́же отъ жесто́каго моего́ се́рдца приноси́ти еле́й милосе́рдія. Сего́ ра́ди, дѣ́лателю виногра́да Христо́ва Дими́тріе, огради́ мя стра́хомъ Госпо́днимъ и напо́й мя́ водо́ю умиле́нія.

Сія́я со́лнце Свое́ на благíя и дождя́ на пра́ведныя, да и вла́съ главы́ моея́ не поги́бнетъ, храни́ши мя́, грѣ́шнаго. Вся́ стихíи мене́ ра́ди зла́го ста́ша въ чи́нѣ свое́мъ, а́зъ еди́нъ то́чію пребыва́ю въ нечу́вствіи. Но да́ждь ми́, Го́споди, уго́дника ра́ди Твоего́ Дими́трія разумѣ́ти дѣла́ Твоя́, и слы́ша слу́хъ Тво́й, боя́тися Тебе́.

Богоро́диченъ: Внегда́ прибли́житися лѣ́томъ воплоще́нію, посредѣ́ двою́ живо́тну позна́нъ бы́сть. Внегда́ пріити́ вре́мени ко спасе́нію, посредѣ́ двою́ разбо́йнику яви́ся Сы́нъ Тво́й, Богоро́дице. Непостижи́мо во обои́хъ си́хъ Сло́во, да мы́, воплоще́нному и пострада́вшему за ны́ покланя́ющеся Сло́ву, Тя́, Ма́терь Бо́жію, въ пѣ́снехъ возвели́чимъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Свѣти́льникъ нога́ма мои́ма зако́нъ Госпо́день, и свѣ́тъ стезя́мъ мои́мъ оправда́нія Его́, а́зъ же, во тмѣ́ невѣ́дѣнія ползя́ и толкíйся, не хощу́ съ му́дрыми свѣти́лника стяжа́ти. Но ты́ мнѣ́, свѣтоявле́нне Дими́тріе, невѣстоводи́тель предста́ни, я́ко да и а́зъ ду́хомъ къ Бо́гу отъ но́щи у́треневати потщу́ся.

Болѣ́зную тѣ́ломъ, болѣ́зную и душе́ю: о́вому я́ко досади́хъ объяде́ніемъ и пія́нствомъ, о́ву же я́ко разсла́бихъ грѣха́ми. Сугу́ба болѣ́знь и тяжка́, но ты́, но́вый чудотво́рче, умоли́ Врача́ всѣ́хъ, да обоя́ исцѣли́ти благоизво́литъ.

Го́споди Бо́же на́шъ, да́ждь на́мъ ми́ръ во дне́хъ на́шихъ, Го́споди Бо́же на́шъ, стяжи́ въ на́съ любо́вь, да вси́ еди́ными усты́ и еди́нымъ се́рдцемъ исповѣ́дуемъ Еди́наго Тя́ въ Тро́ицѣ сла́вимаго Бо́га.

Богоро́диченъ: Стра́ха Госпо́дня во чре́вѣ не прія́хъ, ни се́рдцемъ о нерадѣ́ніи поболѣ́хъ, но, при́сно зачина́я и ражда́я грѣхи́ ко грѣхо́мъ, отъ умноже́нія тѣ́хъ со́вѣстію снѣда́юся. Сего́ ра́ди въ многопло́діи се́мъ беззако́нномъ къ Тебѣ́, Влады́чице, вопію́: сотвори́ мя́ возроди́тися въ живо́тъ вѣ́чный покая́ніемъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Отъ ки́та Іо́ну, отъ бла́та же е́зернаго тебе́, святи́телю Дими́тріе, изведе́ Госпо́дь на свѣ́тъ, о́въ тридне́венъ во утро́бѣ не вреди́ся, ты́ же четыредесятолѣ́тенъ неистлѣ́ненъ въ нѣ́дрѣхъ земны́хъ пребы́лъ еси́. Ве́ліе чу́до! Но бо́лше дарова́ніе Бо́жіе, и́бо тя́ чудесы́, я́ко проро́ка, просла́ви.

Дре́вніи о́ніи ниневи́тяне, невѣ́рніи язы́цы су́ще, еди́ною проро́ческою про́повѣдію пока́ялися. Азъ же, толи́ко наставле́ній боже́ственныхъ имѣ́я и по вся́ дни́ что́мая слу́шая, неиспра́венъ пребыва́ю, но ты́, святи́телю, моли́твами твои́ми къ дѣ́ланію си́хъ наста́ви мя́.

Бе́здна грѣхо́въ послѣ́дняя обы́де мя́, и треволне́ніе страсте́й погружа́етъ мя́. Тѣ́мъ, до́ндеже не понре́ душа́ моя́ во а́дѣ, къ Тебѣ́, Го́споду Бо́гу, отъ ско́рби вопію́, да пра́ведника Твоего́ ра́ди Дими́трія услы́шиши и спасе́ши мя́.

Богоро́диченъ: Ско́рая въ бѣда́хъ Помо́щнице, гото́вое обурева́емымъ приста́нище, сохрани́ мя, Ма́ти Бо́жія, отъ потопле́нія жите́йскаго и не да́ждь ми́ разби́тися о ка́мень па́губы душе́вныя.

Конда́къ, гла́съ 8:

Звѣзду́ Россíйскую, отъ Кíева возсія́вшую и чрезъ Но́вградъ Сѣ́верскій въ Росто́въ дости́гшую, всю́ же страну́ сію́ уче́нми и чудесы́ озари́вшую, ублажи́мъ златослове́снаго учи́теля Дими́трія, то́й бо всѣ́мъ вся́ написа́, я́же къ наставле́нію, да всѣ́хъ пріобря́щетъ, я́коже Па́велъ Христу́, и спасе́тъ правовѣ́ріемъ ду́ши на́ша.

Икосъ:

Пра́веднымъ о ка́ющихся на небеси́, на́мъ же, грѣ́шнымъ, на земли́, о тебѣ́, пра́ведниче Дими́тріе, подоба́етъ возра́доватися, я́ко но́ваго тя́ къ Бо́гу моли́твенника о на́съ стяжа́хомъ. Его́же досто́йными похвала́ми ублажа́юще, си́це отъ ра́дости зове́мъ: ра́дуйся, Росто́вская похвало́ и всея́ Россíи прославле́ніе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Якоже тріе́ о́троцы въ пещи́ вавило́нстѣй о́гненную си́лу угаси́ша моли́твою, та́ко ты́, богоявле́нне Дими́тріе, возни́кшій о́гнь въ саможего́мыхъ ски́тахъ уче́нми твои́ми потреби́лъ еси́. Отню́дуже тя́ за спасе́ніе ду́шъ погиба́ющихъ Госпо́дь просла́ви чудесы́ и нетлѣ́ніемъ, мы́ же святолѣ́пными пѣ́сньми ублажа́емъ.

О, коли́кихъ бла́гъ, окая́нніи, лиши́стеся, раско́лницы: ни священнонача́лника бо и́мате, ни вождя́ и́стиннаго ко спасе́нію, ниже́ Безкро́вныя Же́ртвы, ниже́ други́хъ та́инствъ сподобля́етеся. Но поне́ ны́нѣ позна́йте па́губное свое́ заблужде́ніе, и а́ще дѣло́мъ и уче́нію ангелоподо́бнаго Дими́трія не вѣ́рите, то чудеса́мъ, отъ него́ быва́емымъ, я́коже халде́и о́ніи, вѣ́руйте, да съ на́ми ку́пно еди́ными усты́ помо́литеся Бо́гу оте́цъ на́шихъ.

Вои́стину, Бо́же на́шъ, Ты́ еси́ еди́нъ Бо́гъ бого́въ и Госпо́дь господе́й и ра́звѣ Тебе́ ина́го и Твоея́ Святы́я Собо́рныя Це́ркве нѣ́сть ни на небеси́, ни на земли́, идѣ́же подоба́етъ спасти́ся. Сего́ ра́ди да́ждь на́мъ еди́ными усты́ и еди́нымъ се́рдцемъ удивля́ющаго вся́ хотѣ́нія Своя́ во святы́хъ, Тебе́ сла́вити.

Богоро́диченъ: Прови́децъ Даніи́лъ усмотри́ Тя́ го́ру, Неискусому́жная Дѣ́во, приснопа́мятный же во святы́хъ на́шъ Дими́трій, я́коже Гедео́нъ — Руно́ Ороше́нное Тя́ нарече́. Мы́ же, обоя́ исповѣ́дающе, про́симъ: да на отто́ргшемся отъ Тебе́ Ка́мени — Христѣ́, утвержда́ется Це́рковь и правовѣ́рующихъ сердца́ росо́ю благода́ти Твоея́ напая́ются.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Вся́ сре́дства, святи́телю, на взыска́ніе заблу́ждшихъ употреби́лъ еси́, разлива́ющійся пла́мень по ски́тамъ водо́ю покая́нія погаша́я, морѣ́лщиковъ къ Безсме́ртной Трапе́зѣ призыва́я, просвѣще́нныхъ же и отпа́дшихъ, да не второ́е крестя́щеся па́ки распина́ютъ Христа́, еди́наго держа́тися креще́нія утвержда́лъ еси́. Всѣ́хъ повсю́ду правовѣ́рію учи́лъ еси́, и ны́нѣ свои́ми списа́нми тому́жде учи́ши. Тѣ́мъ я́ко и́стиннаго учи́теля во святы́хъ почита́емъ тя́.

Дре́внимъ о́нымъ вавило́нскимъ столпотвори́телемъ врази́ на́шего благоче́стія уподо́блшеся, дерзну́ша неразу́мія своего́ то́лки на песцѣ́ суевѣ́рія назда́ти. Имже егда́ опро́шася уче́ній твои́хъ во́ды, святи́телю, а́біе поколеба́шася во основа́ніи, и бы́сть и́мъ паде́ніе ве́ліе, на́мъ же, благочести́вымъ — подкрѣпле́ніе и исправле́ніе.

Безнача́лне Отче, Сы́не Собезнача́льне, Утѣ́шителю Благíй Ду́ше Пра́вый; Сло́ва Бо́жія Роди́телю, Отца́ Безнача́лна Сло́ве, Ду́ше Живы́й и Зи́ждяй: Тро́ице Еди́нице, поми́луй мя́.

Богоро́диченъ: Якоже купина́, огне́мъ распаля́ема, сама́ не сгара́ше, но богови́дца, устраши́въ, приведе́ къ почита́нію, та́ко Ты́, Неискусобра́чная Невѣ́сто, пріе́мши во утро́бу Огнь Божества́, нетлѣ́нна въ Рождествѣ́ пребыла́ еси́. Ди́вное та́инство! Непоко́рниковъ благоче́стію стыдо́мъ опаля́еши, почита́телей же правовѣ́рныхъ ороша́еши чудесы́ изоби́лно.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Благослове́нъ Госпо́дь на́шъ, я́ко посѣти́ на́съ въ лѣ́та сія́ и воздви́же на́мъ въ Правосла́вно-Россíйской Це́ркви но́ваго чудотво́рца Дими́трія. Якоже бо во дни́ живота́ своего́ служа́ше преподо́біемъ и пра́вдою, та́ко и по кончи́нѣ подае́тъ ра́зумъ заблу́ждшимъ ко взыска́нію путе́й спаси́тельныхъ.

Сла́ва Тебѣ́, Пастыренача́льниче, я́ко и во дни́ на́ша поста́вилъ еси́ на стра́жи бо́драго па́стыря Дими́трія, и́мже прогоня́ются посмра́дшія ко́злища ста́до Твое́ непоро́чное.

Сла́ва Тебѣ́, Христе́ Бо́же, благочести́вымъ похвало́ и правовѣ́рнымъ весе́ліе, я́ко проповѣ́даніе свята́го Твоего́ Дими́трія достовѣ́рными чудесы́ утвержда́еши.

Богоро́диченъ: Ра́дость отъ а́нгела пріи́мшей, и мы́, по прорече́нію Твоему́ ублажа́юще со всѣ́ми ро́ды, ева́нгельски вопіе́мъ: ра́дуйся, Благода́тная, Госпо́дь съ Тобо́ю.

Свѣти́ленъ, гла́съ 8:

Поставля́яй предѣ́лы язы́ковъ по числу́ а́нгелъ Свои́хъ, и собира́яй отъ разсѣ́янныхъ сыно́въ Ада́млихъ Це́рковь Свою́, умножа́еши въ не́й святы́я Твоя́, Бо́же на́шъ, я́ко звѣ́зды на небеси́, отъ ни́хже просія́ и па́мять святи́теля Твоего́ Дими́трія. Его́же ра́ди просвѣти́ ду́ши, помраче́нныя раздо́рнымъ суевѣ́ріемъ, да вку́пѣ зове́мъ Ти́ пѣ́снь трегу́бую: аллилу́ія.

Сла́ва, и ны́нѣ, отда́нію.
Или́ се́й богоро́диченъ, гла́съ то́йже:

Стопа́мъ отходя́щаго отъ на́съ въ го́рняя, святи́теля Дими́трія послѣ́дующе, со упова́ніемъ къ Тебѣ́, Влады́чице, вопіе́мъ: я́коже Тя́ на пречи́стой ико́нѣ съ Превѣ́чнымъ Младе́нцемъ пи́шемую зри́мъ на земли́, та́ко да́ждь на́мъ ви́дѣти стоя́щую одесну́ю Сы́на Твоего́ Бо́га въ непристу́пнѣмъ свѣ́тѣ на небеси́.

На хвали́техъ стихи́ры, гла́съ 6. Подо́бенъ: Все́ отло́жше.

Ве́сь отъ ю́ности твоея́ возложи́лся еси́* на взыска́ніе прему́дрости и стра́ха Бо́жія,* я́же обрѣ́тъ, не въ земли́, а́ки лѣни́вый ра́бъ, сокры́лъ еси́,* но уча́ и творя́ по Вда́вшему ти́ тала́нтъ,* во сто́ трудо́въ умно́жилъ еси́ его́,* и бы́лъ еси́ вели́кій купе́цъ,* износя́й на свѣ́тъ ве́тхая и но́вая,* и открыва́я глубины́ ра́зума богопи́санныхъ кни́гъ,* ку́плю добру́ дѣ́яти научи́лъ еси́ на́съ.* Тѣ́мъ, благíй и вѣ́рный ра́бе Бо́жій Дими́тріе,* за толи́ка явле́нна твоя́ къ на́мъ сокро́вища,* вше́лъ еси́ въ ра́дость Го́спода Твоего́.

Ве́сь у́мъ плѣни́лъ еси́ въ послуша́ніе вѣ́ры,* да благи́ми дѣ́лы украси́ши ю́,* отню́дуже и дѣ́латель виногра́да Христо́ва яви́лся еси́ иску́сный.* Вся́ку бо ро́згу, не творя́щу плода́,* стра́хомъ Госпо́днимъ посѣ́клъ еси́,* и еди́но благоче́стіе сохраня́лъ еси́ въ не́мъ,* отвнѣ́ его́ огражда́лъ еси́ догма́ты церко́вными,* внутрь у́ду укрѣпи́лъ еси́ столпо́мъ правовѣ́рія,* всю́ду предточи́лія ископова́я уче́ній твои́хъ.* Тѣ́мъ и ны́нѣ, святы́й трудолю́бче Дими́тріе,* присѣща́й виногра́дъ тво́й,* его́же насади́ десни́ца Вы́шняго,* да плодоприно́ситъ гро́здіе спасе́нія.

Ве́сь невозвра́тно наде́ждою возве́рглся еси́ на Бо́га:* препла́вая пучи́ну мíра сего́, блаже́нне,* молва́ми жите́йскими не погрузи́лся еси́,* ниже́, искуше́нми обурева́емь, прирази́лся собла́зномъ,* но, при́сно благоти́шіемъ наставля́емь,* дости́глъ еси́ безмо́лвнаго приста́нища,* и наче́нъ кора́бль Це́ркве Христо́вы пра́вити,* па́ки къ безбѣ́дному пла́ванію испра́вилъ еси́,* па́ки ереседы́шущія преложи́лъ еси́ въ тщету́ вѣ́тры* и ко́твою твои́хъ наставле́ній утверди́лъ еси́ его́,* я́ко диви́тися на́мъ и отъ Бо́га проси́ти,* да и впре́дь проти́вныя ересе́й вѣ́тры* моли́твами твои́ми утиши́ши.

Ве́сь еси́ любо́вію прилѣпи́лся къ Бо́гу и бли́жнему,* па́стырское бо о ста́дѣ свое́мъ возымѣ́въ попече́ніе,* душе́ю труди́лся еси́ въ богомы́сліи и въ поуче́ніяхъ,* тѣ́ломъ же въ послуже́ніи тре́бующимъ отъ тебе́ по́мощи:* изнемога́ющія вѣ́рою укрѣпля́я,* боля́щія душе́ю покая́ніемъ врачу́я,* сокруше́нныя со́вѣстію тве́рдымъ упова́ніемъ обязу́я,* заблу́ждшія отъ и́стины на пу́ть пра́вый обраща́я* и поги́бшія ересьми́ къ благоче́стію взыску́я.* Тѣ́мъ, о па́стырю на́шъ предо́брый, святи́телю Дими́тріе,* помоли́ся о ста́дѣ твое́мъ Пастыренача́лнику Христу́ Бо́гу,* да упасе́тъ е́ Са́мъ въ единомы́сліи любве́ и правовѣ́ріи.

Сла́ва, гла́съ 6:

Похвали́, гра́де, Бо́га Твоего́, Росто́ве, воспо́й, Россíе, Го́сподеви пѣ́снь но́ву, я́ко благоволи́ Вы́шній дарова́ти на́мъ но́ваго чудотво́рца Дими́трія, свидѣ́тельствованна отъ всѣ́хъ и отъ Са́мыя Истины. Его́же па́мять во святы́хъ почита́юще, восхва́лимъ и мы́, ста́рцы съ ю́нотами, и возвели́чимъ да́вшаго Бо́га на́шего толи́кому уго́днику Своему́ въ на́съ просія́ти нетлѣ́ніемъ святолѣ́пнымъ и чудодѣ́йствіемъ. [4]

И ны́нѣ, отда́нію.
Или́ богоро́диченъ, гла́съ то́йже:

Красота́ дѣ́вства Твоего́ неопи́санна, добро́та Твоя́, о Богома́ти, несказа́нная, избра́нна бо еси́, я́коже со́лнце, полна́, я́ко луна́ и дуга́ въ явле́нія своя́, а́ки стебло́ Лива́ново въ жа́тву на гора́хъ, и я́ко кипари́съ возраста́яй отъ удо́лія до небе́съ. Мно́гія добро́ты Твоя́ и вели́чія, Приснодѣ́во, но бо́лши всѣ́хъ, я́ко но́сиши Нося́щаго вся́. Его́же моли́ ку́пно со святы́мъ Дими́тріемъ, да спасе́тъ и просвѣти́тъ правовѣ́ріемъ ду́ши на́ша.

Славосло́віе вели́кое, [тропари́] и отпу́стъ.



НА ЛИТУРГІИ,

Блаже́нна, отъ кано́на [святи́теля] пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Примѣчанія:
[1] Такъ въ изданіяхъ 1759, 1763, 1798, и послѣдующихъ.
[2] Въ изданіи 1759 г.: «...моли Христа Бога спастися ИМПЕРАТРИЦѢ нашей ЕЛИСАВЕТѢ ПЕТРОВНѢ, всему наслѣдію, и державѣ ЕЯ».
[3] Въ изданіи 1759 г. (л. 3 об. – 4) вмѣсто двухъ послѣднихъ стихиръ: «Житіе нескверно...» и «Еще отъ юна возраста...» приведены слѣдующія:
       «Съ седма́го мѣ́сяца на́чалъ еси́ труди́тися* въ списа́ніяхъ житíй святы́хъ,* въ седмы́й и мзду́ прія́лъ еси́* явле́ніемъ моще́й твои́хъ;* и въ не́же лѣ́то преста́вился еси́,* въ то́ са́мое отъ чре́слъ ПЕТРА ВЕЛИКАГО* испроси́лъ еси́ на́мъ ИМПЕРАТРИЦУ ЕЛИСАВЕТУ на свѣ́тъ.* Ейже спасти́ся и всѣ́мъ чту́щимъ тя́,* моли́ новоявле́нне Дими́тріе».
       «О, глубина́ суде́бъ Бо́жіихъ!* О, бе́здна неисчерпа́емыхъ Его́ бла́гостей!* Ка́ко за пра́ведниче прія́тіе* мзду́ пра́ведничу САМОДЕРЖИЦА воспрія́:* по обрѣ́теніи бо моще́й святы́хъ,* за де́нь же лѣ́тнія твоея́ па́мяти,* де́нь Благовѣ́рнаго Вели́каго Кня́зя ПАВЛА ПЕТРОВИЧА возсія́.* Его́же да сохрани́тъ си́це благоволи́вый Госпо́дь* тебе́ ра́ди, пра́ведниче Бо́жій Дими́тріе».
[4] Первоначальный варіантъ стихиры: «Воспо́й, Россíе, Го́сподеви пѣ́снь но́ву, похвали́, гра́де, Бо́га Твоего́, Росто́ве, возвесели́ся и ТЫ, САМОДЕРЖИЦЕ на́ша ЕЛИСАВЕТЪ ПЕТРОВНА, я́ко благоволи́ Вы́шній въ ца́рство ТВОЕ дарова́ти на́мъ но́ваго чудотво́рца Дими́трія, избра́нна ТВОИМЪ роди́телемъ свидѣ́тельствованна же отъ всѣ́хъ и отъ Са́мыя Истины. Его́же па́мять во святы́хъ почита́юще, восхва́лимъ и мы́, ста́рцы съ ю́нотами, и возвели́чимъ да́вшаго Бо́га на́шего, толи́кому уго́днику Своему́ въ на́съ просія́ти нетлѣ́ніемъ святолѣ́пнымъ и чудодѣ́йствіемъ» (М., Сѵнодальная Тѵпографія, 1759, л. 25 об.).

Источникъ: Слу́жба и́же во святы́хъ отцу́ на́шему Дими́трію, митрополи́ту Росто́вскому, но́вому чудотво́рцу. — М.: Сѵнодальная Тѵпографія, 1763. — 26 л.

/ Къ оглавленію раздѣла /


Наверхъ / Къ титульной страницѣ

0