Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 21-й де́нь.
Слу́жба и́же во святы́хъ отцу́ на́шему Дими́трію, митрополи́ту Росто́вскому, чудотво́рцу.

НА МАЛѢЙ ВЕЧЕРНИ,
На Го́споди воззва́хъ: стихи́ры свята́го [на 4], гла́съ 1. Подо́бенъ: Небе́сныхъ чино́въ.

Вма́лѣ бы́лъ еси́ вѣ́ренъ, Дими́тріе,* надъ мно́гими тя́ поста́ви Госпо́дь,* и вше́лъ еси́ въ ра́дость Го́спода твоего́,* идѣ́же предстоя́ Ему́,* мо́лишися о душа́хъ на́шихъ. [Два́жды.]

Отрочество твое́ на уче́ніе,* ю́ность на по́двиги мона́шескія,* му́жескій же во́зрастъ на по́льзу всѣ́мъ освяти́лъ еси́,* и́хже ра́ди тя́ ны́нѣ во святы́хъ почита́емъ. [Два́жды.]

Сла́ва, гла́съ то́йже:

Якоже мíръ и вся́ кра́сная мíра, та́ко и нача́льство надъ бра́тіею оста́вивый, всели́лся еси́ въ Кíевъ па́ки близъ пеще́ръ, отону́дуже би́серъ житíй святы́хъ труды́ твои́ми ископа́лъ еси́ на́мъ.

И ны́нѣ, пра́здника, гла́съ 6. Самогла́сенъ:

Дне́сь са́дъ живо́тный отъ земны́хъ незаходи́мыхъ нѣ́дръ происхо́дитъ, на не́мъ пригвожде́ннаго Христа́ извѣству́етъ Воскресе́ніе, и воздвиза́емый рука́ми свяще́нническими, Того́ на небеса́ возвѣща́етъ возноше́ніе, и́мже на́ше смѣше́ніе отъ е́же на зе́млю паде́нія на небесѣ́хъ жи́тельствуетъ. Тѣ́мже благода́рственнѣ возопіи́мъ: Го́споди, вознесы́йся на не́мъ и тѣ́мъ совозне́съ на́съ, небе́сныя Твоея́ ра́дости сподо́би, я́ко Человѣколю́бецъ.

На стихо́внѣ стихи́ры свята́го, гла́съ 8:

Пріиди́те, Россíйскія Це́ркве сы́нове, ублажи́мъ учи́теля на́шего, и́же въ жи́зни свое́й на́съ наставля́я, по сме́рти же назира́я, пече́тся я́ко па́стырь до́брый о душа́хъ на́шихъ.

Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

Богодухнове́нный орга́нъ Всесвята́го Ду́ха, обличи́тель суему́дренныхъ раско́ловъ, вели́кій святи́тель Дими́трій, источа́яй струю́ благода́ти Бо́жія отъ многоцѣле́бныхъ моще́й свои́хъ, хода́тайствуетъ непреста́нно, и мо́лится Бо́гу о душа́хъ на́шихъ.

Сти́хъ: Пра́ведникъ я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится.

Слу́шая гла́са Госпо́дня, призыва́ющаго тя́ къ Себѣ́, гото́въ бы́лъ еси́, Дими́тріе, ко исхо́ду твоему́ отъ сея́ жи́зни. Въ ве́черъ и въ полу́нощи, въ пѣтлоглаше́ніе же и у́тро не воздрема́лъ еси́, ожида́я къ себѣ́ Го́спода, до́ндеже, срѣ́тивъ, вше́лъ еси́ къ Нему́ въ ра́дость вѣ́чную, идѣ́же предстоя́ Ему́, мо́лишися, да пода́стъ и на́мъ жи́знь свя́ту и кончи́ну христіа́нскую.

Сла́ва свята́го, гла́съ 2:

Ра́дуйся, Дими́тріе, святи́телей похвало́, свяще́нниковъ сла́во, пра́вило мона́ховъ, Це́ркве утвержде́ніе.

И ны́нѣ пра́здника, гла́съ 6:

Дне́сь Дре́во яви́ся, дне́сь ро́дъ евре́йскій поги́бе, дне́сь вѣ́рными цари́ вѣ́ра явля́ется, и Ада́мъ дре́ва ра́ди испаде́, и па́ки Дре́вомъ де́мони вострепета́ша; Всеси́льне Го́споди, сла́ва Тебѣ́.

По Ны́нѣ отпуща́еши... тропа́рь свята́го, гла́съ 8:

Правосла́вія ревни́телю и раско́ла искорени́телю, Россíйскій цѣле́бниче и но́вый къ Бо́гу моли́твенниче, списа́ньми твои́ми бу́ихъ уцѣлому́дрилъ еси́. Цѣвни́це духо́вная, Дими́тріе блаже́нне, моли́ Христа́ Бо́га спасти́ся Импера́тору на́шему [и́мярекъ] и всему́ наслѣ́дію и держа́вѣ Его́..

Сла́ва, и ны́нѣ, пра́здника:

Спаси́, Го́споди, лю́ди Твоя́ [и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство].


НА ВЕЛИЦѢЙ ВЕЧЕРНИ,
Стихосло́вимъ Блаже́нъ му́жъ, 1-й антифо́нъ. На Го́споди воззва́хъ: стихи́ры пра́здника [6], гла́съ 6. Подо́бенъ: Всю́ отложи́вше.

Кре́стъ воздвиза́емь* на не́мъ Вознесе́ннаго* Стра́сть пречи́стую* пѣ́ти повелѣва́етъ тва́ри все́й.* На то́мъ бо уби́въ на́съ уби́вшаго,* умерщвле́нныя оживи́лъ е́сть,* и удобри́, и на небесѣ́хъ жи́ти сподо́би, я́ко Милосе́рдъ,* премно́жествомъ бла́гости.* Тѣ́мъ, ра́дующеся,* вознесе́мъ и́мя Его́,* и Того́ возвели́чимъ* кра́йнее снизхожде́ніе. [Два́жды.]

Моисе́й предобрази́ тя,* ру́ки просте́ръ на высоту́,* и побѣжда́ше Амали́ка мучи́теля,* Кре́сте честны́й, вѣ́рныхъ похвало́,* страда́льцевъ утвержде́ніе,* апо́столовъ удобре́ніе,* пра́ведныхъ побо́рниче,* всѣ́хъ преподо́бныхъ спаси́телю.* Тѣ́мъ, тя́ воздвиза́ема,* зря́щи тва́рь, весели́тся* и торжеству́етъ, сла́вящи Христа́,* тобо́ю разстоя́щая собра́вшаго* кра́йнею бла́гостію. [Два́жды.]

Кре́сте пречестны́й,* его́же обстоя́тъ чи́ни а́нгельстіи, веселя́щеся,* дне́сь воздвиза́емь,* Боже́ственнымъ манове́ніемъ возно́сиши вся́* окраде́ніемъ снѣ́ди отгна́нныя* и въ сме́рть попо́лзшіяся.* Тѣ́мже тя́ сердцы́ и устна́ми,* вѣ́рніи, лобыза́юще,* свяще́ніе почерпа́емъ,* возноси́те, вопію́ще,* Христа́, Преблага́го Бо́га,* и Того́ покланя́йтеся Боже́ственному подно́жію. [Два́жды.]

И свята́го [4], гла́съ то́йже:

Потща́лся еси́ на земли́, свя́те Дими́тріе, ху́ждшее покори́ти лу́чшему и пло́ть порабо́тити ду́ху, тѣ́мъ и же́злъ архипа́стырскій воспрія́лъ еси́, и́мже благопокори́выя до́брѣ упа́слъ еси́, непокори́выя же дале́че прогна́лъ еси́. И ны́нѣ на небесѣ́хъ священнолѣ́пно предстои́ши, со а́нгелы ликовству́я.

Въ житіи́ твое́мъ, святи́телю Дими́тріе, чре́сла любо́вію препоя́салъ еси́, и но́зѣ обу́въ во упова́ніе Христо́во, свѣти́льникъ вѣ́ры украси́лъ еси́ еле́емъ дѣ́лъ благи́хъ, тѣ́мъ съ му́дрыми вше́лъ еси́ въ небе́сный черто́гъ, идѣ́же предстоя́ Влады́цѣ Христу́, моли́ся, да прише́дшу полу́нощному во́плю, изы́демъ въ срѣ́теніе Ему́ и мы́ гото́ви.

Гла́съ 8. Подо́бенъ: О, пресла́внаго чудесе́!

Украси́въ твою́ ду́шу добродѣ́тельми, и преше́дъ по́прище вре́менныя жи́зни во стра́сѣ Бо́жіи, обрѣ́лъ еси́ благода́ть предъ Бо́гомъ, свя́те Дими́трие, и ны́нѣ предстоя́й престо́лу Го́спода сла́вы, моли́ спасти́ся душа́мъ на́шимъ.

Па́стырю до́брый, усе́рдный подража́телю Пастыренача́льника Сы́на Бо́жія, услы́ши на́съ грѣ́шныхъ, призыва́ющихъ въ по́мощь твое́ немо́лчное хода́тайство, и моли́ о на́съ Всеми́лостиваго Бо́га, да избѣ́гнемъ вся́кихъ зо́лъ и напа́стей, и да улучи́мъ вѣ́чное блаже́нство, во е́же ку́пно съ тобо́ю, святи́телю Дими́тріе, сла́вити и воспѣва́ти Святу́ю Тро́ицу.

Сла́ва, гла́съ то́йже:

Похвала́ми ублажи́мъ святи́теля Дими́трія, іера́рха вели́каго, Златоу́ста Россíйскаго, и́же содѣ́лався сосу́дъ избра́нъ Всесвята́го Ду́ха, причте́нъ яви́ся ли́ку друго́въ Бо́жіихъ, и мо́лится дарова́ти ми́ръ и благоде́нствіе миролюби́вому Импера́тору на́шему [и́мярекъ], на враги́ побѣ́ду и одолѣ́ніе, наслѣ́дію же и держа́вѣ Его́ благоти́шіе и мíрови ве́лію ми́лость.

И ны́нѣ пра́здника, гла́съ 2:

Пріиди́те, вси́ язы́цы, благослове́нному дре́ву поклони́мся, и́мже бы́сть вѣ́чная пра́вда: пра́отца бо Ада́ма прельсти́вый дре́вомъ, Кресто́мъ прельща́ется, и па́даетъ низве́рженъ паде́ніемъ стра́ннымъ, мучи́тельствомъ одержа́вый ца́рское зда́ніе; Кро́вію Бо́жіею я́дъ змíевъ отмыва́ется, и кля́тва разруши́ся осужде́нія пра́веднаго, непра́веднымъ судо́мъ Пра́веднику осужде́ну бы́вшу; Дре́вомъ бо подоба́ше дре́во исцѣли́ти и Стра́стію Безстра́стнаго, я́же на Дре́вѣ, разрѣши́ти стра́сти осужде́ннаго. Но сла́ва, Христе́ Царю́, е́же о на́съ Твоему́ му́дрому смотре́нію, и́мже спа́слъ еси́ всѣ́хъ, я́ко Бла́гъ и Человѣколю́бецъ.

Вхо́дъ. Проки́менъ дне́, и чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры свята́го, гла́съ 5:

Пріиди́те, правосла́вныхъ собо́ри, воспои́мъ святи́теля, уче́ніемъ къ богоразу́мію на́съ наста́вльшаго, исто́чника чуде́съ преди́внаго, Це́ркве свѣти́льника пресвѣ́тлаго, учи́теля Росто́ву прему́драго, и все́й Россíи прекра́сное удобре́ніе. То́й бо избавля́етъ на́съ отъ вся́кихъ злы́хъ искуше́ній и бѣ́дъ, и мо́лится о душа́хъ на́шихъ.

Христо́во ста́до слове́сныхъ ове́цъ на зла́цѣ благоче́стія до́брѣ упа́слъ еси́, іера́рше. Тѣ́мже и по преставле́ніи церко́вныхъ твои́хъ ча́дъ не оставля́й, но посѣща́й, и Святѣ́й Тро́ицѣ со архіере́и предстоя́, моли́ спасти́ вся́, честны́хъ твои́хъ моще́й обрѣ́теніе любо́вію почита́ющія, Дими́тріе прехва́льне.

Зна́меніи и чудесы́ тебе́ Госпо́дь просла́ви, святи́телю Дими́тріе, прого́ниши бо ду́хи, и врачу́еши стра́сти, ду́ши просвѣща́еши вѣ́рныхъ, приходя́щихъ ко свято́му твоему́ гро́бу, а́нгеловъ собесѣ́дниче, апо́столовъ единонра́вне, архіере́евъ сопресто́льне, благовѣ́рія побо́рниче.

Сла́ва, гла́съ 6:

Гра́дъ освяти́ся, наро́ди благослови́шася, Це́рковь перворо́дныхъ ду́хомъ ликовству́етъ во обрѣ́теніи честны́хъ моще́й твои́хъ, іера́рше Дими́тріе, и лю́діе взыва́ютъ: ты́ на́ше утвержде́ніе, и тобо́ю хва́лимся. Молися́ спасти́ вся́, любо́вію святы́хъ твои́хъ моще́й обрѣ́теніе при́сно сла́вящія.

И ны́нѣ пра́здника, гла́съ 4:

Честна́го Креста́, Христе́, дѣ́йство прообрази́въ Моисе́й, побѣди́ проти́внаго Амали́ка въ пусты́ни Сина́йстѣй: егда́ бо простира́ше ру́цѣ, Креста́ о́бразъ творя́, укрѣпля́хуся лю́діе; ны́нѣ же веще́й сбытіе́ въ на́съ испо́лнися, дне́сь Кре́стъ воздвиза́ется, и де́мони бѣ́гаютъ, дне́сь тва́рь вся́ отъ тли́ свободи́ся, вся́ бо Креста́ ра́ди возсія́ша на́мъ дарова́нія. Тѣ́мже, ра́дующеся, вси́ припа́даемъ Тебѣ́, глаго́люще: я́ко возвели́чишася дѣла́ Твоя́, Го́споди, сла́ва Тебѣ́.

На стихо́внѣ стихи́ры пра́здника, гла́съ 5. Самоподо́бны:

Ра́дуйся, живоно́сный Кре́сте, благоче́стія непобѣди́мая побѣ́да, две́рь ра́йская, вѣ́рныхъ утвержде́ніе, Це́ркве огражде́ніе, и́мже тля́ разори́ся и упраздни́ся, и попра́ся сме́ртная держа́ва, и вознесо́хомся отъ земли́ къ небе́снымъ; ору́жіе непобѣди́мое, бѣсо́въ сопротивобо́рче, сла́ва му́чениковъ, преподо́бныхъ я́ко вои́стину удобре́ніе, приста́нище спасе́нія, да́руяй мíру ве́лію ми́лость.

Сти́хъ: Возноси́те Го́спода Бо́га на́шего и покланя́йтеся подно́жію но́гу Его́, я́ко свя́то е́сть.

Ра́дуйся, Госпо́день Кре́сте, и́мже разрѣши́ся отъ кля́твы человѣ́чество, су́щія ра́дости зна́меніе, прогоня́яй враги́ во твое́мъ воздви́женіи, всече́стне. На́мъ помо́щниче, царе́й держа́во, крѣ́пость пра́ведныхъ, свяще́нниковъ благолѣ́піе, вообража́емый, и лю́тыхъ избавля́яй, же́злъ си́лы, и́мже пасе́мся, ору́жіе ми́ра, его́же со стра́хомъ обстоя́тъ а́нгели, Христа́ Боже́ственная сла́ва, подаю́щаго мíру ве́лію ми́лость.

Сти́хъ: Бо́гъ же, Ца́рь на́шъ пре́жде вѣ́ка, содѣ́ла спасе́ніе посредѣ́ земли́.

Ра́дуйся, слѣпы́хъ наста́вниче, немощны́хъ врачу́, воскресе́ніе всѣ́хъ уме́ршихъ, воздви́гнувый ны́, во тлю́ па́дшія, Кре́сте честны́й, и́мже разруши́ся кля́тва, и процвѣте́ нетлѣ́ніе, и земнíи обожи́хомся, и діа́волъ всеконе́чно низве́ржеся. Дне́сь воздвиза́ема тя́ ви́дяще рука́ми архіере́йскими, возно́симъ Вознесе́ннаго посредѣ́ тебе́, и тебѣ́ покланя́емся, почерпа́юще бога́тно ве́лію ми́лость.

Сла́ва свята́го, гла́съ 4:

Возра́дуемся, Россíйстіи собо́ри, похвалу́ Росто́вскую ублажа́юще, чудотво́рца Дими́трія, се́й бо мно́го потруди́ся въ списа́ніи душеполе́зныхъ на́мъ кни́гъ, и́миже развраще́нніи отъ пра́ваго благоче́стія путіе́ ко и́стинѣ направля́ются, правосла́вныхъ же сердца́ въ правовѣ́ріи утвержда́ются. Ему́же и возопіи́мъ: О, прему́дрый учи́телю, моли́ся Христу́, да твои́мъ уче́ніемъ наставля́еми, полу́чимъ живо́тъ вѣ́чный.

И ны́нѣ пра́здника, гла́съ 8:

Его́же дре́вле Моисе́й прообразова́въ собо́ю, Амали́ка низложи́въ, побѣди́, и Дави́дъ пѣснопѣ́вецъ подно́жію Твоему́, вопія́, кла́нятися повелѣва́ше, Честно́му Кресту́ Твоему́, Христе́ Бо́же, дне́сь, грѣ́шніи, кла́няемся, устна́ми недосто́йными, Тя́ изво́лившаго пригвозди́тися на не́мъ, воспѣва́юще, мо́лимся: Го́споди, съ разбо́йникомъ Ца́рствія Твоего́ сподо́би на́съ.

На благослове́ніи хлѣ́бовъ: тропа́рь свята́го два́жды и пра́здника еди́ножды.



НА УТРЕНИ,
На Бо́гъ Госпо́дь: тропа́рь пра́здника два́жды. Сла́ва, свята́го. И ны́нѣ, пра́здника.

По 1-мъ стихосло́віи сѣда́ленъ пра́здника, гла́съ 6:

То́кмо водрузи́ся дре́во, Христе́, Креста́ Твоего́, основа́нія поколеба́шася сме́рти, Го́споди. Его́же бо пожре́ жела́ніемъ а́дъ, отпусти́ тре́петомъ; яви́лъ еси́ на́мъ спасе́ніе Твое́, Святы́й, и славосло́вимъ Тя́, Сы́не Бо́жій, поми́луй на́съ.

Сла́ва, и ны́нѣ, гла́съ 1. Подо́бенъ: Ка́мени запеча́тану.

Креста́ Твоего́ дре́ву покланя́емся, Человѣколю́бче, я́ко на не́мъ пригвозди́лся еси́, Животе́ всѣ́хъ. Ра́й отве́рзлъ еси́, Спа́се, вѣ́рою прише́дшему Ти́ разбо́йнику, и сла́дости сподо́бися, исповѣ́даяся Тебѣ́: помяни́ мя, Го́споди. Пріими́, я́коже о́наго, и на́съ, зову́щихъ: согрѣши́хомъ вси́, благоутро́біемъ Твои́мъ не пре́зри на́съ.

По 2-мъ стихосло́віи сѣда́ленъ [пра́здника], гла́съ 6:

Дне́сь проро́ческое испо́лнися сло́во: се́ бо покланя́емся на мѣ́сто, идѣ́же стоя́ша но́ги Твоя́, Го́споди. И Дре́во спасе́нія пріе́мше, грѣхо́вныхъ страсте́й свобо́ду получи́хомъ, моли́твами Богоро́дицы, Еди́не Человѣколю́бче.

Сла́ва, и ны́нѣ, гла́съ 8. Подо́бенъ: Повелѣ́нное та́йно.

Прообража́ше та́инственно дре́вле Іису́съ Нави́нъ Креста́ о́бразъ, егда́ ру́цѣ простре́ крестови́дно, Спа́се мо́й, и ста́ со́лнце, до́ндеже враги́ низложи́, противостоя́щія Тебѣ́, Бо́гу; ны́нѣ бо за́йде, на Крестѣ́ Тя зря́, и держа́ву сме́ртную разруши́въ, ве́сь мíръ совоздви́глъ еси́.

По поліеле́и сѣда́ленъ свята́го, гла́съ 7:

Яко фи́никсъ, процвѣ́лъ еси́ нетлѣ́ніемъ отъ земли́, и я́ко ке́дръ, и́же въ Лива́нѣ, умно́жился еси́ чудесы́, превозне́слся еси́ явле́ніемъ, я́ко гра́дъ, верху́ стоя́й, и возсія́лъ еси́ па́мятію твое́ю, я́ко свѣти́льникъ изъ-подъ спу́да на свѣ́тъ. Яже вся́ на тебѣ́ ви́дяще сбытія́, прославля́емъ Возвели́чившаго тя́ та́ко во святы́хъ Свои́хъ. Ты́ же, имѣ́я дерзнове́ніе ко Христу́ Го́споду, моли́ся, святоявле́нне Дими́тріе, да спасе́тъ и просвѣти́тъ ду́ши на́ша.

Сла́ва, [инъ сѣда́ленъ, гла́съ то́йже]:

Просія́лъ еси́ добродѣ́тельнымъ житіе́мъ твои́мъ, святи́телю Дими́тріе, украша́яся красото́ю нра́ва, воздержа́ніемъ и милосе́рдіемъ, златослове́сными же твои́ми уче́ніи украша́я Христо́ву Це́рковь. Тѣ́мже, приснопа́мятне, предстоя́ престо́лу Вседержи́теля, моли́ Христа́ Бо́га дарова́ти грѣхо́въ оставле́ніе пра́зднующимъ любо́вію всечестну́ю па́мять твою́.

И ны́нѣ пра́здника, гла́съ 8. Подо́бенъ: Повелѣ́нное та́йно.

Въ раи́ мя пре́жде дре́во обнажи́, о вкуше́ніи вра́гъ принося́ умерщвле́ніе, Креста́ же дре́во, живота́ одѣя́ніе человѣ́комъ нося́, водрузи́ся на земли́, и мíръ ве́сь испо́лнися вся́кія ра́дости. Его́же зря́ще возвыша́ема, Бо́гу вѣ́рою, лю́діе, согла́сно возопіи́мъ: испо́лнь сла́вы до́мъ Тво́й.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́ живу́щіи по вселе́ннѣй. Вся́кое дыха́ніе... Ева́нгеліе отъ Іоа́нна, зача́ло 35, отъ полу́.

По 50-мъ псалмѣ́ стихи́ра свята́го, гла́съ 6:

Благíй ра́бъ и вѣ́рный еси́, умно́живый тала́нтъ вруче́нный тебѣ́ отъ Влады́ки твоего́: излія́ся бо благода́ть во устна́хъ твои́хъ, святи́телю Дими́тріе, я́ко уче́ньми твои́ми Це́рковь украси́лъ еси́, и́стину Правосла́вія уясни́лъ еси́, па́губное же раско́льническое мудрова́ніе посрами́лъ еси́; тѣ́мъ, я́коже въ житіи́, та́ко по отше́ствіи твое́мъ, потщи́ся, да поне́ чудесы́ твои́ми увѣря́еми, суему́дрствующіи пріи́дутъ въ чу́вство, и просла́вятъ ку́пно съ на́ми Тріѵпоста́снаго Бо́га.

Кано́нъ пра́здника со ирмосо́мъ на [8] и свята́го на 6.

Кано́нъ пра́здника, гла́съ 8.
Пѣ́снь 1.

Ирмо́съ: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшеходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Образъ дре́вле Моисе́й пречи́стыя Стра́сти въ себѣ́ само́мъ прообрази́, свяще́нныхъ средѣ́ стоя́: Кре́стъ же вообрази́въ, просте́ртыми побѣ́ду дла́ньми воздви́же, держа́ву погуби́въ Амали́ка всегуби́теля. Тѣ́мъ Христу́ пои́мъ, Бо́гу на́шему, я́ко просла́вися.

Возложи́ Моисе́й на столпѣ́ врачевство́, тлетвори́ваго избавле́ніе и ядови́таго угрызе́нія, и дре́ву о́бразомъ Креста́ по земли́ пресмыка́ющагося змíя привяза́, лука́вный въ се́мъ обличи́въ вре́дъ. Тѣ́мъ Христу́ пои́мъ, Бо́гу на́шему, я́ко просла́вися.

Показа́ не́бо Креста́ побѣ́ду благоче́стія держа́телю и царю́ богому́дру, враго́въ въ не́мже злосе́рдныхъ низложи́ся свирѣ́пство, ле́сть же преврати́ся, и вѣ́ра распростре́ся земны́мъ конце́мъ Боже́ственная. Тѣ́мъ Христу́ пои́мъ, Бо́гу на́шему, я́ко просла́вися.

Кано́нъ свята́го, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Со а́нгельскими чинонача́ліи предстоя́й Святѣ́й Тро́ицѣ, вели́кій іера́рше Дими́тріе, моли́ о на́съ грѣ́шныхъ, да полу́чимъ грѣхо́въ оставле́ніе.

По́стничествомъ и воздержа́ніемъ вся́кимъ порабо́тивый тѣ́ло ду́ху, и тѣ́ломъ содѣ́лавый нетлѣ́ніе и цѣльбоно́сную си́лу бре́нному веществу́ твоему́, научи́ и на́съ, о́тче святы́й, Бо́гу, а не мамо́нѣ рабо́тати.

Управля́я па́ству, ввѣ́ренную тебѣ́ отъ Началопа́стыря Христа́, и отгоня́я душевре́дныхъ волко́въ отъ Христо́вы огра́ды твои́ми Богодухнове́нными уче́ніи, назира́й и ны́нѣ, святи́телю Дими́тріе, да не ка́ко суему́дренніи раско́лы возмутя́тъ тишину́ церко́вную, но па́че моли́ Человѣколю́бца Бо́га, да вско́рѣ вси́ еди́ными усты́ и еди́нымъ се́рдцемъ восхва́лимъ Его́ благоутро́біе.

Богоро́диченъ: Избра́нну и Всечи́сту разумѣ́въ Тя́ Сы́нъ Бо́жій, Всенепоро́чная, Сы́нъ Тво́й бы́сть, сы́ны сотвори́ благода́тію, Богоро́дицу Тя́ чту́щія.

Катава́сія: Кре́стъ начерта́въ...

Пѣ́снь 3.

Ирмо́съ: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника; неплодя́щей же пре́жде Це́ркви, ны́нѣ процвѣте́ Дре́во Креста́, въ держа́ву и утвержде́ніе.

Яко испусти́, ударя́емь, во́ду краесѣко́мый, непокори́вымъ лю́демъ и жестосе́рдымъ, богозва́нныя проявля́ше Це́ркве та́инство, ея́же Кре́стъ держа́ва и утвержде́ніе.

Ре́бромъ пречи́стымъ, копіе́мъ прободе́ннымъ, вода́ съ Кро́вію истече́, обновля́ющая Завѣ́тъ и омыва́тельная грѣха́; вѣ́рныхъ бо Кре́стъ похвала́ и царе́й держа́ва и утвержде́ніе.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Утверди́вся на ка́мени вѣ́ры Христо́вы, тве́рдъ пребы́лъ еси́ во исповѣ́даніи Правосла́вія, и злоче́ствующихъ непреста́нно облича́лъ еси́.

Облича́я, моля́, совѣ́туя, не престава́лъ еси́ призыва́ти заблу́ждшихъ ове́цъ отъ Христо́ва ста́да, а́ще и не вси́ послу́шаша гла́са твоего́.

Сыно́въ Це́ркве, непоколеби́мо пребы́вшихъ во объя́тіихъ ея́, ободря́лъ еси́. И мы́, со сла́достію вне́млюще уче́нію твоему́, вопіе́мъ: нѣ́сть свя́тъ па́че Бо́га на́шего.

Богоро́диченъ: Избавля́ющаго человѣ́ки преслуша́нія, и Кро́вію Свое́ю омы́вшаго перворо́дный грѣ́хъ Ада́мовъ, Чи́стая и Всенепоро́чная родила́ еси́.

Конда́къ, гла́съ 4. Подо́бенъ:

Вознесы́йся на Кре́стъ во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю Благовѣ́рнаго Импера́тора на́шего [и́мярекъ], побѣ́ды дая́ Ему́ на сопоста́ты, посо́біе иму́щу Твое́, ору́жіе ми́ра непобѣди́мую побѣ́ду.

Икосъ:

Иже до тре́тіяго небесе́ восхище́нъ бы́сть въ ра́й, и глаго́лы слы́шавъ неизрече́нныя и боже́ственныя, и́хже не лѣ́ть язы́ки (человѣ́ческими) глаго́лати, что́ Гала́томъ пи́шетъ, я́ко рачи́теліе писа́ній прочто́сте и позна́сте: мнѣ́, глаго́летъ, хвали́тися да не бу́детъ, то́кмо во еди́номъ Крестѣ́ Госпо́дни, на не́мже страда́въ, уби́ стра́сти. Того́ у́бо и мы́ извѣ́стно да держи́мъ, Кре́стъ Госпо́день, хвалу́ вси́: е́сть бо на́мъ спаси́тельное сіе́ Дре́во, ору́жіе ми́ра, непобѣди́мая побѣ́да.

Сѣда́ленъ свята́го, гла́съ 8:

Дре́внихъ преподо́бію подража́я, освяти́лъ еси́ житіе́ твое́ на слу́жбу Бо́гови въ осмоена́десять лѣ́то. Отне́лѣже и бы́лъ еси́ вели́къ мона́хъ, свяще́нникъ, учи́тель, іера́рхъ, ны́нѣ же чудотво́рецъ, и моли́твенникъ о душа́хъ на́шихъ. [Два́жды.]

Сла́ва, и ны́нѣ пра́здника, гла́съ 4. Подо́бенъ: Ско́ро предвари́.

Въ тебѣ́, треблаже́нне и жизнода́вче Кре́сте, лю́діе учрежда́ющеся, спра́зднуютъ съ невеще́ственными ли́ки, чи́ни архіере́йстіи благоговѣ́йно воспѣва́ютъ, мно́жество же мона́шествующихъ и по́стниковъ покланя́ются, Христа́ же распе́ншагося вси́ сла́вимъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Горькоро́дныя преложи́ дре́вомъ Моисе́й исто́чники въ пусты́ни дре́вле, Кресто́мъ ко благоче́стію язы́ковъ проявля́я преложе́ніе.

Глубинѣ́ внѣ́дривый сѣку́щую издаде́ Іорда́нъ дре́ву, Кресто́мъ и креще́ніемъ сѣче́ніе ле́сти зна́менуя.

Свяще́нно ополча́ются четвероча́стніи лю́діе, предходя́ще о́бразомъ свидѣ́тельства ски́ніи, крестообра́зными чи́нми прославля́еми.

Чу́дно простира́емь, со́лнечныя лучи́ испуща́ше Кре́стъ, и повѣ́даша небеса́ сла́ву Бо́га на́шего.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Изъ мла́да воспита́нъ въ до́бромъ науче́ніи, остроту́ ума́ твоего́ не на суему́дренная у́мствованія обрати́лъ еси́, святи́телю Дими́тріе, но на созида́ніе и утвержде́ніе правосла́вныхъ, да обличе́ніе же и обузда́ніе непокори́выхъ; тѣ́мже и яви́лся еси́ досто́йный апо́стольскаго престо́ла намѣ́стникъ.

Неистощи́мое врачевство́ источа́ютъ многоцѣле́бная ра́ка моще́й твои́хъ, и и́же вѣ́рою къ ни́мъ притека́ющіи, обрѣта́ютъ отъ злы́хъ избавле́ніе.

За любо́вь, ю́же ко Христу́ и святы́мъ имѣ́лъ еси́, просла́вился еси́ да́ромъ чуде́съ и исцѣле́ній, сего́ ра́ди покланя́емся тебѣ́ и мо́лимъ тя́, я́ко уго́дника и дру́га Бо́жія, да помяне́ши на́съ во святы́хъ твои́хъ къ Бо́гу моли́твахъ.

Богоро́диченъ: Моли́ о на́съ Человѣколю́бца Бо́га, Пресвята́я Влады́чице, да не помяне́тъ беззако́ній на́шихъ, но да сотвори́тъ съ на́ми по ми́лости Свое́й.

Пѣ́снь 5.

Ирмо́съ: О, треблаже́нное Дре́во, на не́мже распя́ся Христо́съ, Ца́рь и Госпо́дь, и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Тебе́, приснопѣ́тое дре́во, на не́мже простре́ся Христо́съ, Еде́мъ храня́щее обраща́ющееся ору́жіе, Кре́сте, устыдѣ́ся: стра́шный же херуви́мъ уступи́, на тебѣ́ пригвожде́нному Христу́, подаю́щему ми́ръ душа́мъ на́шимъ.

Подзе́мныхъ си́лы проти́вныя Креста́ страша́тся начерта́ема зна́менія на возду́сѣ, по нему́же хо́дятъ небе́сныхъ и земноро́дныхъ ро́ди, колѣ́на преклоня́юще Христу́, подаю́щему ми́ръ душа́мъ на́шимъ.

Заря́ми нетлѣ́нными я́влься Боже́ственный Кре́стъ омраче́ннымъ язы́комъ, заблужде́ннымъ въ пре́лести, Боже́ственный свѣ́тъ облиста́въ, усвоя́етъ на не́мъ пригвожде́нному Христу́, подаю́щему ми́ръ душа́мъ на́шимъ.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Сохрани́, святи́телю Христо́въ, оте́чество твое́ ненавѣ́тно отъ враго́въ и да́руй на сопроти́вныя побѣ́ду и одолѣ́ніе Христоно́сному Импера́тору на́шему.

Огради́ на́съ, уго́дниче Бо́жій Дими́тріе, отъ всѣ́хъ ко́зней лука́ваго діа́вола, да не преткнове́нно возмо́жемъ прейти́ пу́ть житія́ сего́ во исполне́ніе за́повѣдей Бо́жіихъ.

Разжени́, о́тче Дими́тріе, тьму́ грѣхо́вную отъ душе́вныхъ оче́съ на́шихъ и просвѣти́ на́съ позна́ніемъ во́ли Бо́жія, да во свѣ́тѣ за́повѣдей Его́ соверши́мъ до́брѣ тече́ніе на́ше.

Богоро́диченъ: Дѣ́во Непоро́чная, ро́ждшая Свѣ́тъ и́стинный, облиста́й на́мъ свѣ́тъ Боговѣ́дѣнія во спасе́ніе на́ше.

Пѣ́снь 6.

Ирмо́съ: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ; тѣ́мъ, тридне́венъ изше́дъ, премíрное Воскресе́ніе прописа́ше, пло́тію пригвожде́ннаго Христа́ Бо́га, и тридне́внымъ Воскресе́ніемъ мíръ просвѣ́щшаго.

Ста́ростію преклони́вся и неду́гомъ отягче́нъ, испра́вися Іа́ковъ, ру́цѣ премѣни́въ, дѣ́йствіе явля́я жизноно́снаго Креста́: и́бо ве́тхость зако́ннаго сѣно́внаго писа́нія новописа́, на се́мъ пло́тію пригвозди́выйся Бо́гъ, и душегуби́тельный неду́гъ ле́сти отгна́.

На ю́ныя возложи́въ дла́ни боже́ственный Изра́иль, крестови́дно главы́ явля́ше, я́ко старѣ́йшая сла́ва, законослужи́тели лю́діе. Тѣ́мже, подмнѣ́вся та́ко испрельсти́тися, не измѣни́ жизноно́снаго о́браза: превзы́дутъ бо лю́діе Христо́вы Бо́жіи новоутвержде́нніи, вопія́ху, Кресто́мъ огражда́еми.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Воззри́ милосе́рднымъ о́комъ, святи́телю Христо́въ, на волне́ніе грѣхо́вное, на́съ обурева́ющее, и упра́ви пла́ваніе на́ше въ ти́хое Приста́нище милосе́рдія Бо́жія.

Бу́ди на́мъ до́брый ко́рмчій, о́тче Дими́тріе, и не оста́ви на́съ поги́бнути во грѣсѣ́хъ на́шихъ, но въ ни́хже са́мъ, я́ко человѣ́къ искуша́емь бы́лъ еси́, помози́ и на́мъ, искуша́емымъ.

Свя́те Дими́тріе, бу́ди о на́съ засту́пникъ и хода́тай ко Многоми́лостивому Бо́гу, да возведе́тъ отъ тли́ живо́тъ на́шъ.

Богоро́диченъ: Устна́ми и се́рдцемъ велича́емъ Тя́, Ма́терь Бо́жію: Ты́ же, примири́вшая Бо́гу ве́сь ро́дъ человѣ́ческій, не отри́ни на́съ отъ Твоего́ заступле́нія.

Конда́къ свята́го, гла́съ 8:

Звѣзду́ Россíйскую, отъ Кíева возсія́вшую и чрезъ Но́вградъ Сѣ́верскій въ Росто́въ дости́гшую, всю́ же страну́ сію́ уче́ньми и чудесы́ озари́вшую, ублажи́мъ златослове́снаго учи́теля Дими́трія, то́й бо всѣ́мъ вся́ написа́, я́же къ наставле́нію, да всѣ́хъ пріобря́щетъ, я́коже Па́велъ Христу́, и спасе́тъ правовѣ́ріемъ ду́ши на́ша.

Икосъ:

Пра́веднымъ о ка́ющихся на небеси́, на́мъ же, грѣ́шнымъ, на земли́, о тебѣ́, пра́ведниче Дими́тріе, подоба́етъ возра́доватися, я́ко но́ваго тя́ къ Бо́гу моли́твенника о на́съ стяжа́хомъ, его́же досто́йными похвала́ми ублажа́юще, си́це отъ ра́дости зове́мъ: ра́дуйся, Росто́вская похвало́ и всея́ Россíи прославле́ніе.

Пѣ́снь 7.

Ирмо́съ: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое; оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отцевъ и на́съ Бо́же, благослове́нъ еси́.

Отъ дре́ва вкуси́въ, пе́рвый въ человѣ́цѣхъ, въ тлѣ́ніе всели́ся: отверже́ніемъ бо жи́зни безче́стнѣйшимъ осуди́вся, всему́ ро́ду тѣлотлѣ́ненъ нѣ́кій яко вре́дъ неду́га преподаде́; но, обрѣ́тше, земноро́дніи, воззва́ніе кре́стнымъ дре́вомъ, зове́мъ: препѣ́тый отце́въ и на́съ Бо́же, благослове́нъ еси́.

Разруши́ повелѣ́ніе Бо́жіе преслуша́ніе, и дре́во принесе́ сме́рть человѣ́комъ, е́же неблаговре́менно прича́стно бы́вшее: во утвержде́ніе же зѣло́ честна́го. Отту́ду жи́зни дре́во возбраня́емо бѣ́, е́же разбо́йнику злоуме́ршу отве́рзе, благоразу́мно зову́щу: препѣ́тый отце́въ и на́съ Бо́же, благослове́нъ еси́.

Жезла́ объе́млетъ кра́й Іо́сифова, бу́дущая зря́, Изра́иль, ца́рствія держа́вное, я́ко возъиму́ществитъ пресла́вный Кре́стъ, проявля́я: се́й бо царе́й побѣдоно́сная похвала́, и свѣ́тъ вѣ́рою зову́щимъ: препѣ́тый отце́въ и на́съ Бо́же, благослове́нъ еси́.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Христо́ва ра́ди смире́нія, о́бразъ смире́нія яви́лся еси́, свя́те Дими́тріе. И мнѣ́ пода́ждь, не въ го́рдости, но во смире́ніи взыва́ти: благослове́нъ еси́, Бо́же оте́цъ на́шихъ.

Воздержа́ніемъ покори́лъ еси́ тѣ́ло ду́ху твоему́, святи́телю Дими́тріе. Пода́ждь и мнѣ́ въ воздержа́ніи пожи́ти, да нескве́рными устна́ми воззову́: благослове́нъ еси́, Бо́же оте́цъ на́шихъ.

Уче́ніи твои́ми, о́тче Дими́тріе, управля́еши мы́сли на́ша. И мы́, подража́юще тебѣ́, воспѣва́емъ Бо́гу: благослове́нъ еси́, Бо́же оте́цъ на́шихъ.

Богоро́диченъ: Безнача́льнаго Бо́га зачала́ еси́ во чре́вѣ Твое́мъ, Пречи́стая Дѣ́во, Его́же пою́ще, зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Воздвиза́ему дре́ву, окропле́ну Кро́вію вопло́щшагося Сло́ва Бо́га, по́йте, небе́сныя си́лы; земны́хъ воззва́ніе пра́зднующе, лю́діе, поклони́теся Христо́ву Кресту́, и́мже мíру воста́ніе во вѣ́ки.

Земноро́дніи, дла́ньми, строи́теліе благода́ти, Кре́стъ, на не́мже стоя́ше Христо́съ Бо́гъ, возноси́те священнолѣ́пно и копіе́, Бо́жія Сло́ва Тѣ́ло пробо́дшее, да ви́дятъ язы́цы вси́ спасе́ніе Бо́жіе, сла́вяще Его́ во вѣ́ки.

Боже́ственнымъ судо́мъ предъизбра́нніи, весели́теся, христіа́нстіи вѣ́рніи ца́ріе, хвали́теся побѣдоно́снымъ ору́жіемъ, пріе́мше отъ Бо́га Кре́стъ честны́й: въ се́мъ бо колѣ́на бра́ней, де́рзости и́щуще, разсыпа́ются во вѣ́ки.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Ты́ бы́лъ еси́ до́брый учи́тель на́шъ, о́тче Дими́тріе, вопія́ всѣ́мъ послу́шающимъ уче́нія твоего́: превозноси́те Христа́ во вѣ́ки.

Богому́дрый іера́рше, всеблаже́нне Дими́тріе, ми́лостивою и человѣколю́бною къ на́мъ любо́вію, моли́ о на́съ Человѣколюби́ваго Бо́га, Его́же превозно́симъ во вся́ вѣ́ки.

Зловре́дное мудрова́ніе суему́дровъ испрове́рглъ еси́, свя́те Дими́тріе, вѣ́рныя же наста́вилъ еси́ пребы́ти тве́рдыми во и́стиннѣй вѣ́ре, превозноси́те, вопія́, Христа́ во вѣ́ки.

Богоро́диченъ: Преесте́ственное и чу́дное Рождество́ Твое́, Дѣ́во, воспѣва́емъ благоче́стно, превознося́ще Христа́ во вѣ́ки.

На 9-й пѣ́сни Честнѣ́йшую... не пое́мъ, но пое́мъ припѣ́въ пра́здника: Велича́й, душе́ моя́, пречестны́й Кре́стъ Госпо́день. Та́же ирмо́съ 1-го кано́на: Та́инъ еси́, Богоро́дице... И другíй ли́къ подо́бнѣ, припѣ́въ и ирмо́съ. И къ про́чимъ [4] стихо́мъ то́йже припѣ́въ пое́мъ.

Пѣ́снь 9.

Ирмо́съ: Та́инъ еси́, Богоро́дице, ра́й, невоздѣ́ланно возрасти́вшій Христа́, Имже кре́стное живоно́сное на земли́ насади́ся Дре́во. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Да возра́дуются древа́ дубра́вная вся́, освяти́вшуся естеству́ и́хъ, отъ Него́же изнача́ла насади́шася, Христу́ распросте́ршуся на Дре́вѣ. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Свяще́нный воста́ ро́гъ и глава́ всѣ́мъ богому́дрымъ — Кре́стъ, и́мже грѣ́шныхъ мы́сленно стира́ются ро́ги вси́; тѣ́мъ, ны́нѣ возноси́му, покланя́ющеся ему́, Тя́ велича́емъ.

Другíй припѣ́въ: Велича́й, душе́ моя́, животворя́щаго Креста́ Госпо́дня воздви́женіе. И ирмо́съ: Снѣ́дію дре́ва... И другíй ли́къ подо́бнѣ, припѣ́въ и ирмо́съ. Тропари́ же [4] съ си́мже припѣ́вомъ.

Инъ.

Ирмо́съ: Снѣ́дію дре́ва ро́ду прибы́вшая сме́рть Кресто́мъ упраздни́ся дне́сь, и́бо прама́терняя всеро́дная кля́тва разруши́ся Прозябе́ніемъ Чи́стыя Богома́тере, Юже вся́ си́лы небе́сныя велича́ютъ.

Го́рести убíйственныя, я́же отъ дре́ва, не оста́вивъ, Го́споди, Кресто́мъ бо сію́ соверше́нно истреби́лъ еси́. Сего́ ра́ди и дре́вомъ услади́ иногда́ го́ресть во́дъ Ме́рры: прообразу́ющее Креста́ дѣ́йство, е́же вся́ си́лы небе́сныя велича́ютъ.

Непреста́нно гружа́емыя мра́комъ пра́отца, Го́споди, Кресто́мъ возвы́силъ еси́ дне́сь. Яко бо ле́стію весьма́ неудержа́нно естество́ преднизведе́ся, всеро́днѣ ны́ па́ки испра́ви свѣ́тъ Креста́ Твоего́, его́же, вѣ́рніи, велича́емъ.

Да о́бразъ пока́жеши мíру покланя́емый, Го́споди, Креста́, во всѣ́хъ я́ко пресла́вный, на небесѣ́хъ изобрази́лъ еси́, свѣ́томъ безмѣ́рнымъ озаре́нъ, царю́ всеору́жіе непобѣди́мое. Тѣ́мъ Тя́ вся́ си́лы небе́сныя велича́ютъ.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Наслажда́яся, о́тче, вѣ́чныя жи́зни, о не́йже усе́рдно подвиза́лся еси́, моли́ и на́мъ сея́ дости́гнути.

Аще и пресели́лся еси́ отъ на́съ на го́рняя, святи́телю Дими́тріе, оба́че ду́хомъ пребыва́еши съ призыва́ющими тя́, науча́я и укрѣпля́я ходи́ти по стези́ спаси́тельныхъ за́повѣдей Бо́жіихъ.

Яви́лся еси́ благоче́стія свѣти́льникъ всесвѣ́тлый, ри́торъ изя́щнѣйшій и правосла́вныхъ архіере́евъ удобре́ніе. Тѣ́мъ тя́ серде́чною любо́вію досто́йно велича́емъ.

Богоро́диченъ: Богоро́дице Дѣ́во, Его́же родила́ еси́ Человѣколю́бца Бо́га, моли́ со святи́телемъ Дими́тріемъ, да спасе́тъ ду́ши на́ша. Катава́сія: Та́инъ еси́, Богоро́дице, ра́й... Другíй: Снѣ́дію дре́ва... Съ припѣ́вы. И покло́нъ.

Свѣти́ленъ пра́здника. Подо́бенъ: Ученико́мъ.

Кре́стъ — храни́тель всея́ вселе́нныя, Кре́стъ — красота́ Це́ркве, Кре́стъ — царе́й держа́ва, Кре́стъ — вѣ́рныхъ утвержде́ніе, Кре́стъ — а́нгеловъ сла́ва и де́моновъ я́зва.

Сла́ва свята́го, гла́съ 8:

Поставля́яй предѣ́лы язы́ковъ по числу́ а́нгелъ Свои́хъ, и собира́яй отъ разсѣ́янныхъ сыно́въ Ада́млихъ Це́рковь Свою́, умножа́еши въ не́й святы́я Твоя́, Бо́же на́шъ, я́ко звѣ́зды на небеси́, отъ ни́хже просія́ и па́мять святи́теля Твоего́ Дими́трія. Его́же ра́ди просвѣти́ ду́ши, помраче́нныя раздо́рнымъ суевѣ́ріемъ, да вку́пѣ зове́мъ Ти́ пѣ́снь трегу́бую: аллилу́ія.

И ны́нѣ пра́здника. Подо́бенъ: Жены́, услы́шите.

Кре́стъ воздвиза́ется дне́сь, и мíръ освяща́ется: Иже бо со Отце́мъ сідя́й и Ду́хомъ Святы́мъ, на се́мъ ру́цѣ распростре́, мíръ ве́сь привлече́ къ Твоему́, Христе́, позна́нію; и́же у́бо на Тя́ надѣ́ющіяся боже́ственныя сподо́би сла́вы.

На хвали́техъ стихи́ры пра́здника, гла́съ 8. Самоподо́бны.

О, пресла́внаго чудесе́,* живоно́сный са́дъ,* Кре́стъ пресвяты́й* на высоту́ возноси́мь явля́ется дне́сь.* Славосло́вятъ вси́ концы́ земнíи,* устраша́ются де́монскія полки́.* О, каковы́й да́ръ земны́мъ дарова́ся!* Имже, Христе́, спаси́ ду́ши на́ша,* я́ко еди́нъ Благоутро́бенъ.

О, пресла́внаго чудесе́,* я́ко гро́здъ, испо́лненъ живота́,* понесы́й Вы́шняго,* отъ земли́ воздвиза́емь Кре́стъ ви́дится дне́сь,* и́мже вси́ къ Бо́гу привлеко́хомся,* и поже́рта бы́сть до конца́ сме́рть.* О, Дре́во пречестно́е,* и́мже воспрія́хомъ во Еде́мѣ безсме́ртную пи́щу,* Христа́ сла́вяще!

О, пресла́внаго чудесе́,* широта́ Креста́ и долгота́* небеси́ равна́ е́сть,* я́ко Боже́ственною благода́тію освяща́етъ вся́ческая.* О се́мъ язы́цы ва́рварстіи побѣжда́ются,* о се́мъ ски́птры царе́й утвержда́ются.* О, боже́ственныя лѣ́ствицы,* е́юже восхо́димъ на небеса́,* вознося́ще въ пѣ́снехъ Христа́ Го́спода!

И свята́го. Гла́съ 6. Подо́бенъ: Всю́ отложи́вше.

Ве́сь отъ ю́ности твоея́ возложи́лся еси́ на взыска́ніе прему́дрости и стра́ха Бо́жія, я́же обрѣ́тъ, не въ земли́, а́ки лѣни́вый ра́бъ, сокры́лъ еси́, но уча́ и творя́ по Да́вшему ти́ тала́нтъ, во сто́ трудо́въ умно́жилъ еси́ его́, и бы́лъ еси́ вели́кій купе́цъ, износя́й на свѣ́тъ ве́тхая и но́вая, и открыва́я глубины́ ра́зума богопи́санныхъ кни́гъ, ку́плю добру́ дѣ́яти научи́лъ еси́ на́съ. Тѣ́мъ, благíй и вѣ́рный ра́бе Бо́жій Дими́тріе, за толи́ка явле́нна твоя́ къ на́мъ сокро́вища, вше́лъ еси́ въ ра́дость Го́спода Твоего́. [Два́жды.]

Ве́сь у́мъ плѣни́лъ еси́ въ послуша́ніе вѣ́ры, да благи́ми дѣ́лы украси́ши ю́, отню́дуже и дѣ́латель виногра́да Христо́ва яви́лся еси́ иску́сный. Вся́ку бо ро́згу, не творя́щу плода́, стра́хомъ Госпо́днимъ посѣ́клъ еси́, и еди́но благоче́стіе сохраня́лъ еси́ въ не́мъ, отвнѣ́ его́ огражда́лъ еси́ догма́ты церко́вными, внутрьу́ду укрѣпи́лъ еси́ столпо́мъ правосла́вія, всю́ду предточи́лія ископова́я уче́ній твои́хъ. Тѣ́мъ и ны́нѣ, святы́й трудолю́бче Дими́тріе, присѣща́й виногра́дъ тво́й, его́же насади́ десни́ца Вы́шняго, да плодоприно́ситъ гро́здіе спасе́нія.

Сла́ва, гла́съ 6:

Воспо́й, Россíе, Го́сподеви пѣ́снь но́ву, похвали́, гра́де, Бо́га Твоего́, Росто́ве, я́ко благоволи́ Вы́шній дарова́ти на́мъ но́ваго чудотво́рца Дими́трія, свидѣ́тельствованна отъ всѣ́хъ и отъ Са́мыя Истины. Его́же па́мять во святы́хъ почита́юще, восхва́лимъ и мы́, ста́рцы съ ю́нотами, и возвели́чимъ да́вшаго Бо́га на́шего толи́кому уго́днику Своему́ въ на́съ просія́ти нетлѣ́ніемъ святолѣ́пнымъ и чудодѣ́йствіемъ.

И ны́нѣ пра́здника, гла́съ то́йже:

Днесь происхо́дитъ Кре́стъ Госпо́день, и вѣ́рніи пріе́млютъ того́ жела́ніемъ, и взе́млютъ исцѣле́нія души́ же и тѣ́ла и вся́кія болѣ́зни. Сего́ цѣлу́имъ ра́достію и стра́хомъ: стра́хомъ, грѣха́ ра́ди, я́ко недосто́йни су́ще; ра́достію же, спасе́нія ра́ди, е́же подае́тъ мíру на то́мъ пригвозди́выйся Христо́съ Бо́гъ, имѣ́яй ве́лію ми́лость.

Славосло́віе вели́кое. По трисвято́мъ тропа́рь свята́го. Сла́ва, и ны́нѣ, пра́здника. Та́же ектеніи́, и отпу́стъ.

На часѣ́хъ тропа́рь пра́здника, Сла́ва, свята́го. Конда́къ пра́здника и свята́го премѣня́юще.


НА ЛИТУРГІИ,

Блаже́нна, отъ кано́на пра́здника пѣ́снь 9-я на 4, и свята́го пѣ́снь 6-я на 4. По вхо́дѣ тропа́рь пра́здника и свята́го. Сла́ва, конда́къ свята́го. И ны́нѣ, конда́къ пра́здника. [Проки́менъ пра́здника, гла́съ 7: Возноси́те Го́спода Бо́га на́шего и покланя́йтеся подно́жію но́гу Его́, я́ко свя́то е́сть. Сти́хъ: Госпо́дь воцари́ся, да гнѣ́ваются лю́діе. И свята́го, гла́съ 1: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Апо́столъ свята́го, ко Евре́омъ, зача́ло 318. Аллилу́ія пра́здника, гла́съ 1: Помяни́ со́нмъ Тво́й, его́же стяжа́лъ еси́ испе́рва. Сти́хъ: Бо́гъ же, Ца́рь на́шъ пре́жде вѣ́ка, содѣ́ла спасе́ніе посредѣ́ земли́. И свята́го, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Ева́нгеліе свята́го, отъ Іоа́нна, зача́ло 36. Прича́стенъ пра́здника: Зна́менася на на́съ свѣ́тъ лица́ Твоего́, Го́споди. И свята́го: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 19 об. – 31.

/ Къ оглавленію раздѣла /


Наверхъ / Къ титульной страницѣ

0