Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 20-й де́нь.
Слу́жба святы́хъ му́ченикъ и исповѣ́дникъ, благовѣ́рнаго вели́каго кня́зя Михаи́ла и боля́рина его́ Ѳео́дора, Черни́говскихъ чудотво́рцевъ.

НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры пра́здника 3 и святы́хъ стихи́ры, гла́съ 4. Подо́бенъ: Зва́нный свы́ше.

Ярости царя́ богоме́рзкаго* и христоненави́стнаго* ника́коже убоя́вся, прему́дре Михаи́ле,* ни ослабѣ́лъ еси́ щадѣ́нія ра́ди живота́,* ни жела́ніемъ ца́рства,* его́же самово́льнѣ оста́вилъ еси́,* но Христа́ Еди́наго Бо́га исповѣ́далъ еси́:* Тому́ Еди́ному отъ души́ покланя́юся, — ре́клъ еси́, —* и сла́дцѣ умру́ за Уме́ршаго мене́ ра́ди.* Его́же моли́, страстоте́рпче Михаи́ле,* со страда́вшимъ съ тобо́ю Ѳео́доромъ боля́риномъ,* спасти́ ва́съ почита́ющія.

Пощади́ ю́ность твою́, — мучи́тель рече́, —* и поклони́ся мно́ю жела́емому бо́гу, со́лнцу же и огню́,* да со мно́ю ца́рствуеши.* Ты́ же, му́чениче, ре́клъ еси́:* да не бу́детъ мнѣ́, о пребеззако́нниче, Христа́ отврещи́ся* и ло́жнымъ бого́мъ твои́мъ поклони́тися.* Что́ бо мнѣ́ тобо́ю прети́мая му́ка* или́ настоя́щее житіе́* проти́ву бу́дущаго Ца́рствія?* Eго́же получи́ти моли́, прему́дре Михаи́ле,* съ до́блимъ Ѳео́доромъ боля́риномъ,* любо́вію ва́съ непреста́нно почита́ющимъ.

Ца́рь богоме́рзкій и весьма́ отчужде́нный Бо́га* покуша́шеся ле́стію, Михаи́ле,* ва́съ отврати́ти отъ вѣ́ры су́щія во Христа́* и ласка́ньми свои́ми увѣща́ти тща́шеся.* Глаго́лаше бо:* а́ще покло́нитеся со мно́ю превожделѣ́нному моему́ бо́гу,* сла́вы мíра сего́ со мно́ю насладите́ся.* Но наде́жди погрѣши́въ,* и въ дѣ́лѣхъ ру́къ свои́хъ увязе́ грѣ́шникъ.* Моли́твами, Христе́, Твои́хъ уго́дникъ* такова́го безчеловѣ́чія изба́ви ду́ши на́ша,* я́ко eди́нъ Милосе́рдъ и Человѣколю́бецъ.

Ины стихи́ры, гла́съ 2. Подо́бенъ: Терпя́ще муче́нія.

Претерпѣ́сте муче́нія болѣ́зни, пролія́сте кро́вь, я́ко во́ду, тѣ́мъ во страсте́хъ свои́хъ мно́гъ пло́дъ принесо́сте, о пречу́дне Михаи́ле и прему́дре Ѳео́доре! Христо́вы за́повѣди соблюда́юще и тѣ́ми утвержда́ющеся, уче́ньми наста́вника своего́, змíя злонача́льнаго попра́сте и побѣ́дными вѣнцы́ увязо́стеся отъ Христа́, Бо́га и Спа́са ду́шъ на́шихъ.

Со́лнца свѣ́тлаго, Михаи́ла, похва́лимъ, и лучу́ свѣтлосо́лнечную, Ѳео́дора, почти́мъ, свѣти́льника пресвѣ́тлая, сія́юща заря́ми, о́ба крѣпкоду́шна, зако́нную вѣ́ру пра́вяща, я́ко доброхра́бра пострада́ста, пе́рвымъ му́ченикомъ подо́бящеся, глаго́лаху: не поклони́мся тва́ри па́че Творца́, но, ма́ло претерпѣ́вше, вѣнцы́ свѣ́тлыя пріи́мемъ отъ Христа́, Бо́га и Спа́са ду́шъ на́шихъ.

Коего́ждо смотря́юще, Михаи́ле, устраша́ющихся му́къ, и иду́щихъ сквозѣ́ о́гнь, и покланя́ющихся со́лнцу, къ себѣ́ глаго́ласте: лу́чше на́мъ е́сть, Ѳео́доре, не ити́ сквозѣ́ о́гнь, ни поклони́тися де́мономъ, сла́вы ра́ди тлѣ́нныя, да вѣ́чнаго живота́ прича́стницы бу́демъ съ пострада́вшими Христа́ ра́ди, и съ ни́ми наслади́мся вѣ́чныхъ бла́гъ отъ Христа́, Бо́га и Спа́са ду́шъ на́шихъ.

Сла́ва, гла́съ 6:

Аще и тма́ми бла́гъ земны́хъ обѣщава́ешися да́ти ми́ и ца́рствіе тлѣ́нное, е́же и са́мъ пома́лѣ и не хотя́ оста́виши, — страда́льче, ре́клъ еси́, — ника́коже Христа́ отмета́юся, но eди́наго Того́ Творца́ небесе́ и земли́ исповѣ́дую и несомнѣ́нно вѣ́рую. Его́же моли́, страда́льцевъ похвалó, Михаи́ле, съ до́блимъ Ѳео́доромъ боля́риномъ, спасти́ся душа́мъ любо́вію ва́съ почита́ющихъ.

И ны́нѣ, [пра́здника], гла́съ то́йже:

Дне́сь Дре́во яви́ся, дне́сь ро́дъ евре́йскій поги́бе, дне́сь вѣ́рными цари́ вѣ́ра явля́ется, и Ада́мъ дре́ва ра́ди испаде́, и па́ки Дре́вомъ де́мони вострепета́ша; Всеси́льне Го́споди, сла́ва Тебѣ́.

Вхо́дъ. Проки́менъ дне́. Чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: Кíими похва́льными.

Кíими му́дрыми словесы́ ублажи́мъ Христо́ва страда́льца, непобѣди́ма крѣ́постію, Михаи́ла, тве́рдаго душе́ю, Благочести́вѣйшаго Импера́тора на́шего украше́ніе и всея́ земли́ просвѣще́ніе, и Ѳео́дора, совѣ́тника блага́го по благоче́стію? Имже досто́йную сла́ву дарова́ Христо́съ, Бо́гъ на́шъ, имѣ́яй ве́лію ми́лость.

Сти́хъ: Воззва́ша пра́ведніи, и Госпо́дь услы́ша и́хъ.

Кíими, смире́нніи, устна́ми восхва́лимъ цѣлому́дренныя великому́ченики, Михаи́ла съ Ѳео́доромъ, оста́вльшія земна́я и послѣ́довавшія Христу́? Oвъ у́бо муче́нія страда́ніемъ, о́въ же кро́вію зе́млю освяща́ютъ и не престаю́тъ моля́ще Христа́ дарова́ти на́мъ ве́лію ми́лость.

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

Кíими, земнíи, устна́ми возвели́чимъ многопѣ́таго Михаи́ла крѣ́пкаго и Ѳео́дора до́блественнаго, поло́жшихъ ду́ши за́повѣди ра́ди боже́ственныя? Oвъ бо сме́рти подо́бяся Влады́чнѣй, о́въ же ре́вностію разгара́яся, и́хже вѣнча́ Христо́съ, Бо́гъ на́шъ, имѣ́яй ве́лію ми́лость.

Сла́ва, гла́съ 8:

Добро́тою по́двигъ свои́хъ украси́вшеся и отъ крове́й свои́хъ одѣя́ніе нося́ще, святíи, тѣ́мже я́ко пресвѣ́тлая свѣти́ла въ мíрѣ я́вльшеся Ду́ха благода́тію, просвѣща́юще оте́чество ва́ше, благочести́выя и ца́рскія о́трасли, страстоте́рпче и исповѣ́дниче Христо́въ Михаи́ле, ку́пно съ Ѳео́доромъ, предъ лице́мъ Госпо́днимъ съ му́ченики всегда́ предстоя́ще, моли́те спасти́ся душа́мъ на́шимъ, любо́вію благоче́стнo соверша́ющихъ па́мять ва́шу.

И ны́нѣ, пра́здника, гла́съ то́йже:

Гла́съ проро́ка Твоего́ Моисе́я, Бо́же, испо́лнися, глаго́ляй: у́зрите Живо́тъ ва́шъ, ви́сящь предъ очесы́ ва́шими. Дне́сь Кре́стъ воздвиза́ется, и мíръ отъ ле́сти свобожда́ется, дне́сь Христо́во Воскресе́ніе обновля́ется, и концы́ земли́ ра́дуются, въ кимва́лѣхъ Дави́дски пѣ́снь Тебѣ́ принося́ще и глаго́люще: содѣ́лалъ еси́ спасе́ніе посредѣ́ земли́, Бо́же, Кре́стъ и Воскресе́ніе; и́хже ра́ди на́съ спа́слъ еси́, Бла́же и Человѣколю́бче, Всеси́льне Го́споди, сла́ва Тебѣ́.

Тропа́рь, гла́съ 4:

Жи́знь ва́шу му́ченически соверши́вше, исповѣ́данія вѣнцы́ украси́вшеся, къ небе́снымъ востеко́сте, Михаи́ле прему́дре съ до́блимъ Ѳео́доромъ, моли́те Христа́ Бо́га сохрани́ти oте́чество ва́ше, Импера́тора же и лю́ди, по вели́цѣй Его́ ми́лости.

Сла́ва, и ны́нѣ, пра́здника, [гла́съ 1:

Спаси́, Го́споди, лю́ди Твоя́ и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство.]



НА УТРЕНИ,
Тропа́рь пра́здника, два́жды. Сла́ва, святы́хъ. И ны́нѣ, пра́здника.

По 1-мъ стихосло́віи сѣда́ленъ пра́здника, гла́съ 7:

Це́рковь вопіе́тъ Ти́, Христе́ Бо́же, въ пе́вкѣ и ке́дрѣ и кипари́сѣ, покланя́ющися Тебѣ́: побѣ́ды Импера́тору Богоро́дицею да́руяй, поми́луй на́съ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4:

Кре́стъ Тво́й, Го́споди, я́ко свѣ́тъ сія́я, те́мная ополче́нія отгоня́етъ и вѣ́рныя просвѣща́етъ, пою́щія: Кре́стъ е́сть мíру похвала́.

Сла́ва, и ны́нѣ, то́йже.

По поліеле́и сѣда́ленъ, гла́съ 4:

Иже а́нгеловъ равноче́стны вѣнцы́ отъ Христа́ прія́сте, за Него́же пострада́сте, Михаи́ле богому́дре и Ѳео́доре преди́вне, ми́ръ мíру испроси́те и душа́мъ на́шимъ ве́лію ми́лость. [Два́жды.]

Сла́ва, и ны́нѣ, пра́здника.

Степе́нна, 1-й антифо́нъ 4-го гла́са. Проки́менъ, [гла́съ 4]: Воззва́ша пра́ведніи,* и Госпо́дь услы́ша и́хъ. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Матѳе́я, зача́ло 36.

По 50-мъ псалмѣ́ стихи́ра, гла́съ 8:

Вла́сть земну́ю и ца́рство до́льнее оста́вивъ, потща́лся еси́ пріити́ къ Царю́ Вседержи́телю, Христу́ Бо́гу, всехва́льне Михаи́ле съ Ѳео́доромъ му́дрымъ, пострада́вшимъ съ тобо́ю, и поко́я доидо́сте небе́снаго, и ны́нѣ почива́ете у пра́отца Авраа́ма. Тѣ́мъ о на́съ моли́теся ко Царю́, Влады́цѣ на́шему, я́ко да ми́лостивъ бу́детъ на́мъ въ де́нь стра́шнаго Его́ прише́ствія, ва́шу творя́щимъ пресвѣ́тлую па́мять.

Кано́нъ пра́здника на 6.
И святы́хъ два́ кано́на на 8. Творе́ніе не́гли іеромона́ха Святы́я Горы́ Пахо́мія, кромѣ́ богоро́дичновъ. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Твои́ми моли́твами, страстоте́рпче Михаи́ле, благода́ть мнѣ́ и просвѣще́ніе съ небесе́ да́руй, я́ко да возмогý похвали́ти до́блести и страда́нія твоя́.

Боже́ственнымъ жела́ніемъ разжига́емь, Михаи́ле свя́те, съ Ѳео́доромъ боля́риномъ, па́ки къ ва́шему оте́честву возвраща́етеся, идѣ́же муче́нія вѣнцы́ отъ десни́цы Вы́шняго прія́сте; изря́дно помина́йте ва́съ почита́ющихъ.

Ца́рствія вѣ́чнующаго и ника́коже мимотеку́щаго воспомина́я наслажде́ніе, свя́те, ца́рство земно́е преоби́дѣвъ, и вмѣ́сто ски́птра кре́стъ взя́лъ еси́, и самозва́нъ къ подвиго́мъ устреми́лся еси́, ку́пно со страда́вшимъ съ тобо́ю Ѳео́доромъ боля́риномъ.

Богоро́диченъ: Святы́хъ Святѣ́йшая была́ еси́, Дѣ́во Чи́стая, святы́хъ Свята́го на руку́ Христа́ носи́вши, Боже́ственною си́лою тва́рь содержа́щаго.

Инъ кано́нъ святы́хъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Іису́су: Посли́ мнѣ́, Го́споди, оставле́ніе мно́гихъ мои́хъ согрѣше́ній и сло́во мнѣ́ да́руй, да съ ра́достію возмогу́ похвали́ти Тя́, просла́вльшаго святы́я Твоя́ му́ченики.

Пѣ́снь возсле́мъ, благочести́віи, цѣлому́дреннымъ смы́сломъ, Михаи́ла сла́внаго и Ѳео́дора благочести́ваго, ку́пно о́ба, сла́вяще.

Благоро́дства да́ръ отъ Бо́га пріе́мъ, благоче́стіе душе́вное возлюби́въ, па́че же и цѣлому́дріе, и добродѣ́тельми удобря́яся, Михаи́ле.

Богоро́диченъ: Прокля́ся сме́рть Тобо́ю и а́дово жа́ло притупи́ся, Ма́ти Чи́стая, Ты́ бо безсме́ртнаго Влады́ку пло́тію мíру родила́ еси́.

Катава́сія пра́здника: Кре́стъ начерта́въ...

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Яря́ся, звѣ́рь нечести́вый уби́ти ва́съ повелѣва́етъ, сего́ скве́рнымъ повелѣ́ніемъ повину́тися не хотя́щихъ, и тва́ри па́че Творца́ не послужи́сте, но Христу́ вопія́сте: cвя́тъ еси́, Го́споди.

Любо́вію твоего́ Влады́ки снѣда́емь бы́въ, Михаи́ле, ку́пно съ Ѳео́доромъ боля́риномъ, ничто́же земна́го вмѣни́сте и Того́ жела́ніемъ муче́нія ча́шу испи́сте усе́рдно, Христу́ вопію́ще: cвя́тъ еси́, Го́споди.

Самозва́нъ отъ да́льныхъ стра́нъ оте́чество твое́ прише́дъ посѣти́ти и злоимени́таго царя́ богобо́рную пре́лесть обличи́ти, отъ него́же пострада́въ, же́ртва Бо́гу прине́слся еси́.

Богоро́диченъ: Возста́вила еси́, Чи́стая, па́ки па́дшій мо́й о́бразъ, ро́ждшая Вино́внаго па́че есте́ственнаго Воскресе́нія.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Всю́ мы́сль ва́шу ко Христу́, му́дріи, возложи́сте и, я́ко бра́тнею совоку́пльшеся любо́вію, благоче́стно cконча́сте тече́ніе.

Многолѣ́тни у́бо тѣ́ломъ, душа́ми же соверше́ни, святíи, я́ко благочести́ви о́ба, Бо́га возлюби́ли есте́ и и́доломъ не поклони́стеся.

Сла́ву возненави́дѣсте мимотеку́щую и тлѣ́нную и добродѣ́тельни яви́стеся сосу́ди, сла́вніи, въ житіи́ ва́шемъ.

Богоро́диченъ: Тя́ вси́ и́мамы прибѣ́жище и cтѣ́ну на́шу, христіа́не, и Тя́ сла́вимъ немо́лчно, Ма́ти Безневѣ́стная.

Конда́къ и и́косъ пра́здника.
Тáже сѣда́ленъ святы́хъ, гла́съ 1. Подо́бенъ: Ка́мени запеча́тану.

Ка́меніе тве́рдо яви́стеся и непребори́ми бы́сте мучи́телей преще́ніемъ, Михаи́ле сла́вне и Ѳео́доре прему́дре. Сего́ ра́ди Россíйстіи собо́ри вопію́тъ ра́достно: сла́ва Укрѣ́пльшему вы́, сла́ва Вѣнча́вшему вы́, сла́ва Просвѣ́щшему ва́ми ве́сь мíръ. [Два́жды.]

Сла́ва, и ны́нѣ, пра́здника, гла́съ 8. Подо́бенъ: Повелѣ́нное та́йно.

Прообража́ше та́инственно дре́вле Іису́съ Нави́нъ Креста́ о́бразъ, егда́ ру́цѣ простре́ крестови́дно, Спа́се мо́й, и ста́ со́лнце, до́ндеже враги́ низложи́, противостоя́щія Тебѣ́, Бо́гу; ны́нѣ бо за́йде, на Крестѣ́ Тя зря́, и держа́ву сме́ртную разруши́въ, ве́сь мíръ совоздви́глъ еси́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Богоме́рзкаго и злочести́ваго царя́ непра́ведна и лука́внѣйша па́че всея́ земли́, безбо́жную вѣ́ру укори́сте, и, лю́таго де́мона обличи́вше пре́лесть, я́ко а́гнцы, за Христа́ закла́ни бы́сте, и, я́ко со́лнце, по кончи́нѣ просія́ли есте́.

Усты́ свѣ́тлыми витíйствуя, исповѣ́далъ еси́ благоче́стно Еди́наго Бо́га, Михаи́ле, съ пострада́вшимъ съ тобо́ю Ѳео́доромъ; и сего́ ра́ди злочести́вый ца́рь не терпя́, повелѣва́етъ уби́ти ва́съ, на са́мѣй кончи́нѣ Христа́ исповѣ́дающія.

О, я́рости царя́ злочести́ваго и непра́веднаго убіе́нія! О, терпѣ́нія непобѣди́мыхъ страда́лецъ! Иже по вѣ́рѣ до́брѣ подви́гшеся, Христу́ вопія́ху: сла́ва си́лѣ Твое́й, Го́споди.

Богоро́диченъ: Неискусобра́чно родила́ еси́, о Дѣ́во, и по Рождествѣ́ яви́лася еси́ дѣ́вствующи па́ки. Тѣ́мъ немо́лчными гла́сы, — ра́дуйся, — Тебѣ́, Влады́чице, вѣ́рою несомнѣ́нною вопіе́мъ.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Въ немра́чнѣмъ зерца́лѣ, Боже́ственныхъ умо́въ си́лою Бо́жіею укрѣпи́вшеся, я́ко со́лнце просвѣти́стеся, Михаи́ле съ Ѳео́доромъ.

Мра́чнымъ не принесо́сте же́ртвы де́мономъ, му́ченицы непобѣди́міи, Свѣтода́вца же Бо́га возлюби́сте, по благоче́стіи изво́ливше сме́рть.

Исцѣли́те, прехва́льніи, души́ моея́ болѣ́зни, Христу́ Бо́гу моля́щеся, и утиши́те моли́твами ва́шими души́ моея́ мяте́жъ.

Богоро́диченъ: Бо́га, Его́же родила́ еси́, Пречи́стая Марíе, Тому́ помоли́ся, е́же рабо́мъ Твои́мъ пода́ти прегрѣше́ній оставле́ніе.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Дивлю́ся, о царю́, твоему́ безу́мію и су́етному глаго́лу, — исповѣ́дниче Михаи́ле ре́клъ еси́. И съ благоро́днымъ Ѳео́доромъ: тва́ри па́че Творца́ ника́коже да бу́детъ на́мъ покланя́тися, она́ бо человѣ́ка ра́ди сотворе́на е́сть.

Злочести́вый о́нъ законопресту́пный До́манъ, и́же пе́рвѣе вѣ́ры христіа́нскія отве́ргся, не терпя́ твоего́ исповѣ́данія, злѣ́ огорчи́ся, ноже́мъ отрѣ́зуетъ главу́ твою́ честну́ю, исповѣ́дниче Христо́въ Михаи́ле.

Аще честна́я свята́я тѣлеса́ ва́ша и небрего́ма пребы́ша отъ кровоя́децъ о́нѣхъ, пове́ржена псо́мъ на снѣде́ніе, но Бо́гъ соблюда́ше о́ная и столпо́мъ о́гненнымъ осіява́ше, пресвѣ́тлыми заря́ми.

Богоро́диченъ: Бо́гъ въ Тя́, Богома́ти, всели́ся, человѣ́ка назида́я, во тлю́ па́дшаго пре́лестію змíя.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ бо Тебе́, ино́го не вѣ́мы.

Па́че живота́ за Христа́ пострада́ти изво́листе, му́чениче Михаи́ле съ блаже́ннымъ Ѳео́доромъ, и съ Ни́мъ ца́рствуете при́сно.

Помышля́ше мучи́тель увѣща́ти ва́съ, прельсти́ти хотя́ тлѣ́нною сла́вою, но, Бо́жіею си́лою укрѣпи́вшеся, посрами́сте его́.

Да́руйте просвѣще́ніе и ми́ръ, прехва́льніи, мíру и разрѣши́те моли́твами ва́шими грѣхопаде́нія на́ша.

Богоро́диченъ: Дѣ́ву по Рождествѣ́ пое́мъ Тя́, Богоро́дице, Ты́ бо Бо́жіе Сло́во пло́тію мíру родила́ еси́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Недово́ленъ злочести́вый бы́въ мучи́тель о убіе́ніи благочести́ваго Михаи́ла, покуша́шеся и страда́льца Ѳео́дора ле́стію увѣща́ти: а́ще бо, — рече́, — бого́мъ мои́мъ поклони́шися, со мно́ю во сла́вѣ бу́деши и имѣ́нію господи́на твоего́ наслѣ́дникъ бу́деши.

Мнѣ́ да не бу́детъ, о царю́ пребеззако́нне, Христа́ отврещи́ся и ло́жнымъ твои́мъ бого́мъ поклони́тися. Мнѣ́ бо е́же жи́ти — Христо́съ и е́же умре́ти за Него́ — пріобрѣ́теніе.

Отъ ю́ности житіе́ твое́ чи́сто яви́ся Пресвята́го Ду́ха дарова́ніемъ, Ѳео́доре, посредѣ́ бо злочести́выхъ мучи́телей твоему́ господи́ну побо́рникъ бы́лъ еси́ и съ ни́мъ на небесѣ́хъ при́сно весели́шися.

Богоро́диченъ: Излія́въ пе́рвѣе я́дъ во у́ши Евины змíй вселука́вый, Tы́ же сего́ еди́на оттрясла́ еси́, Богома́ти, Истреби́теля сему́ ро́ждши.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Тма́ нареко́шася сы́нове Ага́рины, моле́нія къ Бо́гу ва́мъ принося́щимъ, ноже́мъ главы́ ва́ша отрѣ́заша, хода́таи вѣнце́мъ ва́шимъ, Михаи́ле, Боже́ственнымъ бы́вше.

Побѣди́ли есте́ мучи́телеву горды́ню, преблаже́нніи: того́ ра́ди псо́мъ на снѣ́дь помета́ема бы́ша тѣлеса́ ва́ша, но сохране́на бы́ша Бо́жіею благода́тію невре́дна.

Единогла́сно, соше́дшеся, воспои́мъ па́мять благочести́ваго кня́зя, въ Россíи возсія́вшаго: ра́дуйся, — глаго́люще, — обра́дованный отъ Го́спода, Его́же непреста́нно моли́ отъ тли́ изба́вити жи́знь на́шу.

Богоро́диченъ: Уясня́ютъ проро́честіи гла́си Бо́жію Роди́тельницу, пое́мъ же Тя́ и мы́ и мо́лимъ, ви́дяще сбытіе́ честны́хъ прорица́ній: Бо́га бо и́стинно и чистоты́ вмѣсти́лище была́ еси́.

Конда́къ, гла́съ 8. Подо́бенъ: Взбра́нной Воево́дѣ.

Ца́рство земно́е въ ничто́же вмѣни́въ, сла́ву, я́ко преходя́щую, оста́вилъ еси́, самозва́нъ прише́дъ къ подвиго́мъ, Тро́ицу проповѣ́далъ еси́ предъ нечести́вымъ мучи́телемъ, страстотéрпче Михаи́ле съ до́блимъ Ѳео́доромъ, Царю́ си́лъ предстоя́ще, моли́те безъ вре́да сохрани́ти оте́чество ва́ше, Импера́тора же и лю́ди, да ва́съ непреста́нно почита́емъ.

Икосъ:

Кто́ по́двиги ва́ша и болѣ́зни возмо́жетъ извѣща́ти, страстоте́рпцы, я́же му́жески претерпѣ́сте за вѣ́ру Госпо́дню? И дарова́ній, и́хже сподо́бистеся, не довлѣ́ютъ уста́ человѣ́ческая исповѣ́дати. Прему́дростію бо укра́шени и му́жествомъ, бога́тство и сла́ву привре́менную возненави́дѣсте, Михаи́ле сла́вный, и съ пострада́вшимъ съ тобо́ю ди́внымъ Ѳео́доромъ, съ ни́мъ не разлучи́стеся на земли́ и на небеси́. Тѣ́мъ моли́те безъ вре́да сохрани́ти оте́чество ва́ше, Импера́тора же и лю́ди, да ва́съ непреста́нно почита́емъ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ни любви́ сопру́жницы, ни ча́дъ разлуче́нію внима́лъ еси́, но сія́ вся́ въ ру́ки преда́въ Бо́жія, я́ко Творца́ и Промы́сленника всѣ́хъ, вопія́лъ еси́: благослове́нъ Бо́гъ отце́въ на́шихъ.

Поревнова́въ му́жеству пре́жде бы́вшихъ му́чениковъ, тѣ́хъ блаже́нство и сла́ву получи́лъ еси́, достохва́льне Михаи́ле, ку́пно съ Ѳео́доромъ, вопію́ще: благослове́нъ Бо́гъ отце́въ на́шихъ.

Богоро́диченъ: Вы́шняго oсвяще́нное боже́ственное cеле́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Инъ.

Ирмо́съ: Отъ Іуде́и доше́дше, о́троцы въ Вавило́нѣ иногда́ вѣ́рою Тро́ическою пла́мень пе́щный попра́ша пою́ще: отцевъ Бо́же, благослове́нъ еси́.

Пріиди́те, Pоссíйстіи собо́ри, богоизбра́нное ста́до дне́сь воспои́мъ пѣ́сньми, похваля́юще му́ченики Христо́вы, Михаи́ла съ Ѳео́доромъ, благоче́стно пою́ще: отце́въ на́шихъ Бо́же, благослове́нъ еси́.

Оста́вилъ еси́ земно́е ца́рство и любве́ жены́ отврати́лся еси́ и дѣте́й ласка́нія, му́чениче Михаи́ле, взира́я на высоту́ къ Творцу́ твоему́, вопія́лъ еси́: отце́въ на́шихъ Бо́же, благослове́нъ еси́.

Во́инствомъ духо́внымъ препоя́савшеся, Михаи́ле всече́стне и Ѳео́доре прехва́льне, земно́е бога́тство оста́вльше, на небесѣ́хъ побѣ́дныя вѣнцы́ отъ Христа́ прія́сте, зову́ще: отце́въ на́шихъ Бо́же, благослове́нъ еси́.

Богоро́диченъ: Черто́гъ Тя́, Пречи́стая, Сло́ва воплоще́нія и престо́лъ и ло́жницу правому́дрствующе имену́емъ и веселя́щеся пои́мъ: отце́въ и на́съ Бо́же, благослове́нъ еси́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Взира́я на воздая́нія, су́щая на небесѣ́хъ, всече́стне, я́же лю́бящимъ Христо́съ предугото́ва и вопію́щимъ Ему́ отъ души́: благослови́те, вся́ дѣла́ Госпо́дня, Го́спода.

Боже́ственная му́ченикъ страда́нія вои́стинну превзыдо́ша похвале́нія, па́че сло́ва и помышле́нія, я́ко тлѣ́ннымъ тѣ́ломъ безпло́тныя враги́ побѣди́ша, вопію́ще: благослови́те, вся́ дѣла́ Госпо́дня, Го́спода.

Непоколеби́мь въ по́двизѣхъ пребы́лъ еси́, па́че же нечести́выхъ сердца́ поколеба́лъ еси́, ви́дѣвшихъ тя́ непрекло́нна, свя́те Михаи́ле, ку́пно съ Ѳео́доромъ вопію́ща: благослови́те, вся́ дѣла́ Госпо́дня, Го́спода.

Богоро́диченъ: Та́инство стра́нно, и́стинно, подъ со́лнцемъ eди́на показа́ла еси́: Бо́га бо родила́ еси́, Чи́стая, Неви́димаго и Безнача́льнаго, Невмѣсти́маго, всѣ́мъ Непостижи́маго, Ему́же вопіе́мъ: благослови́те, вся́ дѣла́ Госпо́дня, Го́спода.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Не насы́тишася кро́ве ва́шея пога́ніи, но и главы́ ва́ша ноже́мъ отрѣ́заша, не устыдѣ́вшеся, Михаи́ле, благоро́дія и воспита́нныхъ во благоче́стіи: но благода́ть Бо́жія храня́ше ва́съ чрезъ а́нгела. Тѣ́мъ съ Ѳео́доромъ лику́еши, вопія́: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Прославля́я святы́я Своя́ му́ченики, Госпо́дь сто́лпъ о́гненъ яви́ надъ тѣлесы́ и́хъ, я́вѣ сія́ющь но́щію. Того́ ви́дѣвшіи къ дру́гъ дру́гу глаго́лаху: что́ сіе́ пресла́вное видѣ́ніе? И проповѣ́даша всѣ́мъ Христа́, сохра́ншаго Своя́ уго́дники, вопію́ще: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Тро́иченъ: Прославля́емъ Тя́, Отче и Сы́не и Святы́й Ду́ше, со а́нгелы зову́ще трисвяты́ми гла́сы, Трисо́лнечное Божество́: пріими́ за ны́ моля́щую Тя́ святу́ю дво́ицу, Михаи́ла съ Ѳео́доромъ, пою́щую Тебѣ́ непреста́нно: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Богоро́диченъ: Свѣ́та сосу́дъ яви́вшися, Чи́стая, просвѣти́ мя́ и въ повелѣ́ніи Cвѣ́та ходи́ти ми́ поспѣши́, Чи́стая, отъ чре́ва Твоего́ возсія́вша, просвѣти́вша вѣ́рныхъ сердца́, пою́щихъ: дѣ́ти, благослови́те, свяще́нницы, воспо́йте, лю́діе, превозноси́те Его́ во вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Пріиди́те, чи́стымъ се́рдцемъ и тре́звою со́вѣстію великому́ченика Михаи́ла съ совѣ́тникомъ крѣ́пкимъ Ѳео́доромъ, па́че зла́та свѣтя́щася зря́ще, велича́емъ.

Свѣ́тлая ва́ша, пребога́тіи, побѣ́дная храбо́рствія на враги́ ви́дѣвъ Всеви́дящее Око, по́двиги ва́ша вѣнцы́ одолѣ́нія вѣнча́етъ Спа́съ ду́шъ на́шихъ.

Во́инства а́нгеловъ удиви́шася, му́чениковъ же ли́ки и пра́ведныхъ собо́ри согла́сно похвали́ша Христа́, таково́е терпѣ́ніе ва́мъ дарова́вшаго.

Непобѣди́мая честна́я му́ченикъ дво́ица, на небесѣ́хъ живу́щи, пѣвцы́ своя́ помина́й, соверша́ющихъ во хвале́ніи свяще́нная ва́ша страда́нія, ва́съ непреста́нно велича́ющихъ.

Богоро́диченъ: Земля́ изба́вися отъ кля́твы дре́внія Рождество́мъ Твои́мъ, тѣ́мже Тя́, Богороди́тельнице, велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Положе́ни бы́сте на земли́, я́ко ме́ртви, но въ небе́сная пресели́стеся. Тѣ́мъ дерзнове́нія испо́лнистеся, сла́вніи, врагу́ пога́ному восхотѣ́вшу поруга́тися тѣлесе́мъ ва́шимъ, но стра́хомъ Госпо́днимъ отгна́сте, блаже́нніи.

Торжество́ у́бо Михаи́ла па́че со́лнца просвѣти́ся во всѣ́хъ страна́хъ, и Ѳео́дора предо́бляго, Це́рквей украше́ніе страда́нія ва́ша, му́чениковъ сла́ва, и архіере́евъ похвала́, и христіа́нъ утвержде́ніе.

Тро́иченъ: Шу́яго мя́ стоя́нія изба́ви на судѣ́, о Тро́ице Свята́я, и облегчи́ ми́ страсте́й волне́нія, и къ приста́нищу непотопле́на приведи́ мя́, моли́твами святы́хъ му́ченикъ, да Тя́ непреста́нно велича́емъ.

Богоро́диченъ: О, чудесе́, пребо́льша ума́! Чу́до ве́ліе и́стинно и пресла́вно, ка́ко вмѣсти́ся во утро́бу Твою́ Бо́гъ, ника́коже вмѣсти́мый? Его́же о хва́лящихъ Тя́ умоли́, Дѣ́во, отъ бѣ́дъ избавля́ющи и отъ беззако́нныхъ вра́гъ всегда́.

Свѣти́ленъ:

Да просла́вимъ вси́ Бо́га, просла́вльшаго святы́я Своя́ великому́ченики, Михаи́ла ку́пно съ Ѳео́доромъ: тíи бо пострада́ша за Христа́, и вѣнцы́ отъ Него́ прія́ша, и ны́нѣ, въ вы́шнихъ предстоя́ще, о мíрѣ мо́лятся. [Два́жды.]

Сла́ва, и ны́нѣ, пра́здника.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́ зна́меніе* Це́ркви Твое́й, Христе́, великому́ченикъ,* Михаи́ла ку́пно и до́бляго Ѳео́дора,* Тя́ возлюби́вшихъ,* всѣ́ми Владу́щаго,* чи́стымъ се́рдцемъ и душе́ю соверше́нною,* обои́хъ побо́рниковъ вѣ́ры* и исто́чникъ чуде́съ,* сокруши́вшихъ де́монскaя ополче́нія. [Два́жды.]

Отъ ко́рене изра́слъ еси́ честна́го,* Михаи́ле благоро́дне,* и́стину возлюби́въ,* и нетлѣ́нный Христо́въ изво́лилъ еси́ живо́тъ* и Ца́рство неруши́мо,* съ Ѳео́доромъ ди́внымъ зако́нно пострада́вше,* и вѣнцы́ отъ Него́ побѣ́ды прія́сте,* му́ченицы святíи* и моли́твенницы о душа́хъ на́шихъ.

За́повѣди учи́теля ва́шего соблю́дше,* не повелѣ́вшаго ва́мъ де́мономъ поклони́тися,* Христо́въ испо́лнисте зако́нъ* и Того́ повелѣ́нія:* земну́ю сла́ву въ ничто́же вмѣни́сте,* небре́гше повелѣ́нія царе́ва,* тва́ри повелѣва́ющаго поклони́тися.* Михаи́ле, похвало́ Россíйская, съ Ѳео́доромъ сла́внымъ,* моли́теся о душа́хъ на́шихъ.

Сла́ва, гла́съ 8:

Да весели́тся ра́достію все́ человѣ́чество дне́сь, и да лику́ютъ новоизбра́нніи лю́діе, похваля́юще страстоте́рпца вели́каго кня́зя Михаи́ла, ку́пно съ боля́риномъ его́, до́блимъ Ѳео́доромъ, къ ни́мже си́це глаго́люще: ра́дуйтеся, я́ко Христа́ исповѣ́давше, діа́вола же обличи́сте; ра́дуйтеся, я́ко мучи́теля безбо́жнаго посрами́сте; ра́дуйтеся, я́ко вку́пѣ пострада́сте и вку́пѣ Тро́ицѣ предстоите́, моля́щеся всегда́ спасти́ся душа́мъ на́шимъ.

И ны́нѣ, пра́здника, [гла́съ то́йже]:

Гла́съ проро́ка Твоего́ [Моисе́я, Бо́же, испо́лнися, глаго́ляй: у́зрите Живо́тъ ва́шъ, ви́сящь предъ очесы́ ва́шими. Дне́сь Кре́стъ воздвиза́ется, и мíръ отъ ле́сти свобожда́ется, дне́сь Христо́во Воскресе́ніе обновля́ется, и концы́ земли́ ра́дуются, въ кимва́лѣхъ Дави́дски пѣ́снь Тебѣ́ принося́ще и глаго́люще: содѣ́лалъ еси́ спасе́ніе посредѣ́ земли́, Бо́же, Кре́стъ и Воскресе́ніе; и́хже ра́ди на́съ спа́слъ еси́, Бла́же и Человѣколю́бче, Всеси́льне Го́споди, сла́ва Тебѣ́].

Славосло́віе вели́кое, [ектеніи́] и отпу́стъ.




НА ЛИТУРГІИ,

Блаже́нна пра́здника, пѣ́снь 8-я, и святы́хъ, пѣ́снь 3-я. Проки́менъ, [гла́съ 4]: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, я́ко одесну́ю мене́ е́сть, да не подви́жуся. Апо́столъ ко Ефесе́омъ, зача́ло 233. Аллилу́ія, [гла́съ 4]: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Іоа́нна, зача́ло 52. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 204 об. – 213.

/ Къ оглавленію раздѣла /


Наверхъ / Къ титульной страницѣ

0