Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 19-й де́нь.
Слу́жба благовѣ́рнаго вели́каго кня́зя Ѳео́дора и ча́дъ его́, благовѣ́рныхъ князе́й Дави́да и Константи́на, Смоле́нскихъ и Яросла́вскихъ чудотво́рцевъ.

[НА ВЕЛИЦѢЙ ВЕЧЕРНИ,]
Блаже́нъ му́жъ.., [1-й антифо́нъ.] На Го́споди воззва́хъ: стихи́ры пра́здника 3, [гла́съ 4. Подо́бенъ: Да́лъ еси́ зна́меніе.

Кре́стъ всесвяты́й,* непобѣди́мая побѣ́да,* отъ земли́ явля́емь, дне́сь происхо́дитъ,* я́коже сокрове́нное сокро́вище,* обогаща́я вселе́нную заря́ми* всемíрныя своея́ бла́гости.* Тѣ́мъ преблаго́е строе́ніе сла́вимъ* на не́мъ сподо́бльшагося распя́тися* Христа́ Бо́га на́шего.

Дре́вле у́бо ополче́нія иноплеме́нныхъ возвраща́ше* Кре́стъ, вообража́емь Моисе́емъ,* уго́дникомъ и вѣ́рнымъ богови́дцемъ,* проро́комъ боже́ственнымъ,* ны́нѣ же дла́ньми свяще́нными* боже́ственнымъ возвыше́ніемъ вообража́емь,* де́моновъ ополче́нія* и іуде́евъ собо́ры отго́нитъ* и облича́етъ безбо́жныхъ де́рзости.

Держа́ва непобѣди́мая христіа́номъ на́мъ* е́сть Кре́стъ Тво́й, Спа́се на́шъ,* и́мже иноплеме́нная* язы́ковъ побѣжда́ются мно́жества* и ми́ръ Це́ркви Твое́й, Христе́,* правосла́вящимъ до́брѣ дарова́ся;* его́же ны́нѣ цѣлу́юще,* Тя́ мо́лимъ, Человѣколю́бче:* ча́сти ны́ сподо́би святы́хъ Твои́хъ.]

И святы́хъ [стихи́ры] 5. Гла́съ 8. Подо́бенъ: Что́ ва́съ нарече́мъ.

Преподо́бне о́тче Ѳео́доре,* просвѣще́нный благода́тію* Святы́я и Пресла́вныя* и Единосу́щныя Тро́ицы,* свѣ́томъ Безнача́льнаго Свѣ́та,* и тѣ́мъ всю́ зе́млю просвѣти́* и мно́гія на́ша грѣхи́ потреби́,* о́тче преподо́бне,* моли́ о спасе́ніи ду́шъ на́шихъ.

Свѣ́тлости духо́вныя* ты́ бы́лъ еси́ испо́лненъ,* о́тче преподо́бне Ѳео́доре,* проти́ву труду́ твоему́ вели́кому, свя́те.* Тѣ́мже ны́нѣ* во тмѣ́ су́щія ны́ грѣхо́внѣй просвѣти́,* я́ко дерзнове́ніе имѣ́я къ Бо́гу* и Спа́су всѣ́хъ,* моли́ спасти́ся душа́мъ на́шимъ.

Благода́тію Всесвята́го Ду́ха* грѣхо́вный мра́къ* отъ серде́цъ на́шихъ отгна́въ,* облегчи́ лежа́щій грѣ́хъ* на ра́мѣхъ на́шихъ,* преподо́бне Ѳео́доре,* да вси́ твою́ па́мять,* соше́дшеся, воспои́мъ,* очище́нія прося́ще,* моли́ о спасе́ніи ду́шъ на́шихъ.

Яко звѣ́зды всесвѣ́тлыя,* дѣ́тельми за́повѣдей Госпо́днихъ* сія́юще, пресла́вніи,* мíръ украси́сте, всечестнíи,* луча́ми просвѣща́юще велѣ́ній благовѣ́рія,* и е́реси тму́ отго́ните, преподо́бніи* Ѳео́доре и Дави́де съ Константи́номъ сла́внымъ.* Моли́те отъ тли́ и бѣ́дъ изба́витися* вѣ́рою творя́щимъ* всечестну́ю па́мять ва́шу.

Ины стихи́ры, гла́съ 8. Подо́бенъ: О, пресла́внаго чудесе́!

Преподо́бніи отцы́ прему́дріи,* Ѳео́доре и Дави́де съ Константи́номъ сла́внымъ,* слѣпы́мъ подае́те свѣ́тъ, и боля́щимъ исцѣле́ніе,* и хромы́мъ здра́віе, ми́лостивно преклоня́ющеся* приходя́щимъ вѣ́рою къ хра́му ва́шему* и прося́щимъ по́мощи ва́шея.* Ва́съ бо засту́пники и предста́тели и храни́тели,* вси́ вѣ́рніи, обрѣто́хомъ,* восхваля́юще ва́съ.

Преподо́бніи отцы́ всечестнíи,* Ѳео́доре и Дави́де и Константи́не,* до́брыми дѣ́тельми возше́дше,* а́ки на колесни́цу, къ Бо́гу востеко́сте,* побѣ́дныя по́чести пріе́млюще,* и, я́ко ми́лоти, тѣлеса́ ва́ша на́мъ, положе́на во гро́бѣ, отцы́, оста́висте* источа́ти исцѣле́нія* и прогони́ти ду́хи лука́выя.* Тѣ́мже блажи́мъ ва́съ, прехва́льніи.

Лико́мъ по́стническимъ сочета́стеся,* тѣ́хъ житіе́мъ украси́вшеся, блаже́нніи,* Ѳео́доре и Дави́де* съ Константи́номъ сла́внымъ,* и ны́нѣ въ небе́сныхъ селе́ніихъ живете́, веселя́щеся,* идѣ́же лику́ютъ а́нгели,* свѣ́томъ Боже́ственнымъ обожа́еми.* Помина́йте вы́ну блажа́щихъ ва́съ на земли́* и свято́е ва́ше творя́щихъ успе́ніе.

Сія́ніи духо́вными* озари́вшеся, святíи,* свѣтода́тельная заря́* яви́стеся, блаже́нніи,* и, я́ко лучи́, добродѣ́тели* во вся́ концы́ простира́ете,* и вѣ́рныхъ просвѣща́ете совокупле́нія,* и отго́ните тму́ ересе́й, преподо́бніи,* си́лою отъ Дѣ́вы Возсія́вшаго.

Сла́ва, гла́съ 8. Самогла́сенъ:

Равноа́нгельное житіе́ пожи́вше, болѣ́зньми по́стническими, отцы́ преподо́бніи, Ѳео́доре и Дави́де съ Константи́номъ сла́внымъ, воздержа́ніемъ тѣ́ло порабо́тивше, покори́ли есте́ ду́ху. Дѣ́лателе бы́вше за́повѣдей Госпо́днихъ, испе́рва подо́бную добро́ту о́браза сохрани́ли есте́, и страда́льныя по́двиги отъ по́стныхъ по́товъ соверши́ли есте́, и, сугу́быми вѣнцы́ украси́вшеся, прилѣ́жно Спа́са моли́те спасти́ся на́мъ.

И ны́нѣ, пра́здника, [гла́съ то́йже:

Дне́сь Влады́ка тва́ри и Госпо́дь сла́вы на Крестѣ́ пригвожда́ется и въ ре́бра пробода́ется. Же́лчи и о́цта вкуша́етъ сла́дость церко́вная. Вѣнце́мъ отъ те́рнія облага́ется, покрыва́яй не́бо о́блаки. Оде́ждею облачи́тся поруга́нія, и зауша́ется бре́нною руко́ю, руко́ю созда́вый человѣ́ка. По плеще́ма біе́нъ быва́етъ, одѣва́яй не́бо о́блаки. Заплева́нія и ра́ны пріе́млетъ, поноше́нія и зауше́нія, и вся́ терпи́тъ мене́ ра́ди осужде́ннаго, Изба́витель мо́й и Бо́гъ, да спасе́тъ мíръ отъ пре́лести, я́ко Благоутро́бенъ.]

Вхо́дъ. Проки́менъ дне́. Чте́нія три́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 6:

По́стническому житію́ поревнова́лъ еси́, преподо́бне о́тче Ѳео́доре, и стра́стныя прило́ги въ тече́ніихъ сле́зъ твои́хъ потопи́лъ еси́, и благопрія́тное житіе́ твое́ лѣ́ствица боже́ственна и честна́, возводя́ща на небеса́, всѣ́мъ показа́ся, благоче́стія бо плоды́ въ себѣ́ показа́въ, си́лою Ду́ха Свята́го отгоня́ неможе́нія страсте́й отъ вѣ́рно пою́щихъ ти́: ра́дуйся, восто́ка звѣздо́ свѣтоза́рная; ра́дуйся, мона́шествующихъ свѣти́льниче приснопа́мятный; ра́дуйся, Це́ркве до́брое воспита́ніе и непозы́блемое утвержде́ніе; ра́дуйся, заблу́ждшихъ вели́кій вождю́; ра́дуйся, на́ша похвало́ и вселе́нныя ра́дованіе свѣ́тлое.

Иже на земли́ а́нгела и на небесѣ́хъ человѣ́ка Бо́жія, мíру благо́е украше́ніе, о́бразъ благи́хъ дѣ́телей, по́стниковъ похвалу́, Ѳео́дора почти́мъ: насажде́нъ бо въ дому́ Бо́жіи, процвѣте́ пра́ведно, я́ко ке́дръ въ пусты́ни, въ преподо́бствѣ и пра́вдѣ.

Преподо́бне о́тче Ѳео́доре, измла́да въ добродѣ́тели прилѣ́жнѣ пости́вся, орга́нъ бы́лъ еси́ Свята́го Ду́ха и, отъ Него́ пріи́мъ чуде́съ дѣ́тель, научи́лъ еси́ человѣ́ки преоби́дѣти сла́дкая, и ны́нѣ, Боже́ственнымъ свѣ́томъ чи́стѣ сія́я, просвѣти́ на́ша ра́зумы, о́тче преподо́бне Ѳео́доре.

Преподо́бне о́тче Ѳео́доре, тве́рдаго поще́нія страда́ньми утверди́вся, и въ незаходи́мый свѣ́тъ ду́хомъ преложи́лся еси́; пусты́ннымъ бо себе́ совокупи́въ духо́вно, огнепа́льныя стрѣ́лы де́монскія попра́лъ еси́ и, превы́ше вся́кія добродѣ́тели бы́въ, соводворя́ешися во Ца́рствіи небе́снѣмъ съ го́рними чи́ны: съ ни́ми моли́ся Христу́ Бо́гу, спасти́ ду́ши на́ша.

Сла́ва, гла́съ 5:

Преподо́бне о́тче Ѳео́доре, гла́съ ева́нгельскій Госпо́день услы́шавъ, мíръ оста́вивъ, бога́тство и сла́ву въ ничто́же вмѣни́въ, тѣ́мъ всѣ́мъ возопи́лъ еси́, глаго́ля: возлюби́те Бо́га, и обря́щете благода́ть вѣ́чную, ничто́же предпочти́те па́че любве́ Его́, да егда́ пріи́детъ въ сла́вѣ Свое́й, обря́щете поко́й со всѣ́ми святы́ми. Ихже моли́твами, Христе́, сохрани́ и спаси́ ду́ши на́ша.

И ны́нѣ, пра́здника, [гла́съ то́йже:

Гла́съ проро́къ Твои́хъ, Иса́іи и Дави́да, испо́лнися, Бо́же, глаго́лющій: пріи́дутъ вси́ язы́цы, Го́споди, и покло́нятся предъ Тобо́ю. Се́ бо лю́діе, и́же Твоея́, Бла́же, благода́ти напо́лнишася, во дво́рѣхъ Твои́хъ Іерусали́ма. Кре́стъ претерпѣ́вый за ны́, и Воскресе́ніемъ Твои́мъ животворя́й, сохрани́ и спаси́ ны.]

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, по́стныхъ вои́стинну по́двиговъ благово́нный сосу́де: кре́стъ бо на ра́мена взе́мъ и Влады́цѣ Христу́, всеблаже́нне, возложи́въ себе́, плотски́хъ покори́лъ еси́ долѣре́тный смы́слъ, добродѣ́тельми ду́шу преосія́въ, и къ Боже́ственному воскрили́лся еси́ раче́нію. Тѣ́мъ всесвяту́ю ва́шу обстоя́ще, всехва́льніи, ра́ку, Боже́ственнаго человѣколю́бія про́симъ получи́ти ва́шими мо́литвами и мíру дарова́ти ве́лію ми́лость.

Сти́хъ: Честна́ предъ Го́сподемъ сме́рть преподо́бныхъ Его́.

Угль богосвѣ́тлый, огню́ пріобщи́вся, богоно́се, Ду́ха, показа́лся еси́ въ мíрѣ, Ѳео́доре, просвѣща́я ду́ши вѣ́рно и благомы́сленно приступа́ющихъ ти́: къ Свѣ́ту бо вше́дъ невече́рнему, преподо́бне, пусты́нныя ороша́еши свы́ше Боже́ственною благода́тію и увяди́лъ еси́ у́гли лю́тыя. Тѣ́мъ и побѣ́дный я́вственно дарова́ тебѣ́ вѣне́цъ, о́тче преподо́бне Ѳео́доре, Боже́ственныя пра́вды Строи́тель Христо́съ, Его́же моли́ дарова́ти на́мъ ве́лію ми́лость.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Лѣ́ствица небовосхо́дная я́сно житіе́ твое́, богомы́сленнѣ, бы́сть, е́юже къ высотѣ́ взя́лся еси́ и Влады́цѣ Христу́ бесѣ́довати, всеблаже́нне Ѳео́доре, сподо́бился еси́. Умъ просвѣща́я, су́щими отту́ду сія́ній луча́ми освѣща́емь, равноа́нгельную свѣ́тлость прія́лъ еси́. Ему́же ны́нѣ предстоя́, моли́, преподо́бне Ѳео́доре, соверша́ющія боже́ственную и святу́ю па́мять твою́ съ тобо́ю предста́вити и мíру дарова́ти ве́лію ми́лость.

Сла́ва, гла́съ 5:

Преподо́бне о́тче Ѳео́доре, не да́лъ еси́ сна́ очесе́мъ твои́мъ, ниже́ вѣ́ждомъ дрема́нія, до́ндеже ду́шу и тѣ́ло отъ страсте́й свободи́лъ еси́ и Ду́ха жили́ще себе́ содѣ́лалъ еси́: прише́дъ бо Христо́съ со Отце́мъ, оби́тель въ тебѣ́ сотвори́, и, Единосу́щныя Тро́ицы благода́ть воспріи́мъ, великопроповѣ́дниче, преподо́бне Ѳео́доре, моли́ спасти́ся на́мъ.

И ны́нѣ, пра́здника, гла́съ то́йже:

Пріиди́те, лю́діе, пресла́вное чу́до ви́дяще, [Креста́ си́лѣ поклони́мся: я́ко дре́во въ раи́ сме́рть прозябе́, сіе́ же жи́знь процвѣте́, безгрѣ́шнаго иму́щее пригвожде́нна Го́спода. Отъ Него́же, вси́ язы́цы, нетлѣ́ніе взе́млюще, зове́мъ: Иже Кресто́мъ сме́рть упраздни́вый, и на́съ свободи́вый, сла́ва Тебѣ́].

Тропа́рь на преставле́ніе свята́го, гла́съ 4:

Отъ ю́ности ва́шея Христо́вѣ любви́ прилѣпи́вшеся, святíи, усе́рдно зако́нъ и оправда́нія Того́ сохрани́сте, отону́дуже и чуде́сными дарова́ньми обогати́вшеся, исцѣле́нія источа́ете, Ѳео́доре, Дави́де и Константи́не, о вѣ́рою ва́съ почита́ющихъ моли́те Христа́ Бо́га, спасти́ся душа́мъ на́шимъ.

Сла́ва, и ны́нѣ, тропа́рь пра́здника, [гла́съ 1:

Спаси́, Го́споди, лю́ди Твоя́ и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство].

На пренесе́ніе моще́й свята́го тропа́рь, гла́съ 8:

Яко звѣ́зды многосвѣ́тлыя, отъ ю́ности возсія́вше, освѣти́ли есте́ сердца́ вѣ́рныхъ пренесе́ніемъ честны́хъ моще́й ва́шихъ, во пло́ти я́ко а́нгелы на земли́ показа́стеся, поще́ніемъ насажде́ни бы́сте, я́ко древа́, при вода́хъ воздержа́нія, напое́ни струя́ми сле́зъ ва́шихъ, и скве́рну омы́сте. Сего́ ра́ди яви́стеся прія́телища Бо́жія Ду́ха, Ѳео́доре, и Дави́де, и Константи́не, моли́те Христа́ Бо́га спасти́ся душа́мъ на́шимъ.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-мъ стихосло́віи сѣда́ленъ, гла́съ 1:

Трисія́ннаго Свѣ́та зарю́ въ души́ стяжа́въ, о́тче преподо́бне Ѳео́доре, въ по́двизѣ твое́мъ посто́мъ и моли́твами и бдѣ́ніи при́сно ду́шу твою́ просвѣща́я, тѣ́мъ прія́лъ еси́ дерзнове́ніе избавля́ти ны́ отъ бѣ́дъ и зо́лъ безчи́сленныхъ моли́твами твои́ми, преблаже́нне о́тче. [Два́жды.]

Сла́ва, и ны́нѣ, пра́здника, [гла́съ 7:

Це́рковь вопіе́тъ Тебѣ́, Христе́ Бо́же, въ пе́вкѣ и ке́дрѣ и кипари́сѣ, покланя́ющися Тебѣ́: побѣ́ды ца́рствующимъ Богоро́дицею да́руяй, поми́луй ны́].

По 2-мъ стихосло́віи сѣда́ленъ, гла́съ 8:

Тве́рдостію ра́зума украша́я себе́ и плотскíя тяготы́ отве́ргъ, горды́ню попра́лъ еси́ и бы́лъ еси́ оби́телище избра́нно Пресвята́го Ду́ха; неукло́ннымъ ра́зумомъ простира́яся ко Христу́ Бо́гу, многоко́зненнаго стрѣ́лы притупи́лъ еси́ и лу́къ врага́ сокруши́лъ еси́, преблаже́нне Ѳео́доре. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, [гла́съ 4:

Кре́стъ Тво́й, Го́споди, я́ко свѣ́тъ сія́я, те́мныя полки́ отгоня́етъ, и вѣ́рныя просвѣща́етъ, пою́щія: Кре́стъ е́сть мíрови похвала́].

По поліеле́и сѣда́ленъ, гла́съ 1:

Жите́йское мо́ре воздержа́ніемъ безъ труда́ преплы́вше, и въ приста́нище мы́сленное безстра́стія приста́ли есте́, сосу́ди воздержа́ніемъ бога́тства некра́дома благоче́стія яви́стеся, блаже́нніи, Ѳео́доре и Дави́де и Константи́не, безстра́стіемъ житіе́ ва́ше просвѣти́вше, тре́бующія ми́лости обогаща́ете, Христа́ Бо́га моля́ще дарова́ти на́мъ ве́лію ми́лость. [Два́жды.]

Сла́ва, и ны́нѣ, пра́здника, [гла́съ 8. Подо́бенъ: Повелѣ́нное та́йно.

Въ раи́ мя пре́жде дре́во обнажи́, о вкуше́ніи вра́гъ принося́ умерщвле́ніе, Креста́ же дре́во, живота́ одѣя́ніе человѣ́комъ нося́, водрузи́ся на земли́, и мíръ ве́сь испо́лнися вся́кія ра́дости. Его́же зря́ще возвыша́ема, Бо́гу вѣ́рою, лю́діе, согла́сно возопіи́мъ: испо́лнь сла́вы до́мъ Тво́й].

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 8:

Преподо́бніи отцы́ святíи, Ѳео́доре и Дави́де съ Константи́номъ сла́внымъ, поучи́вшеся де́нь и но́щь въ зако́нѣ Госпо́дни, досто́йни бы́сте дре́ва живо́тнаго сады́ бы́ти, и пло́дъ ва́шъ добродѣ́тельными вѣнцы́ цвѣте́тъ. Дерзнове́ніе иму́ще къ трудополо́жнику Христу́ Бо́гу, проси́те на́мъ очище́нія и ве́лія ми́лости.

Кано́нъ пра́здника на 6 и святы́хъ на 8.

[Кано́нъ пра́здника, гла́съ 8.
Пѣ́снь 1.

Ирмо́съ: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшеходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Образъ дре́вле Моисе́й пречи́стыя Стра́сти въ себѣ́ само́мъ прообрази́, свяще́нныхъ средѣ́ стоя́: Кре́стъ же вообрази́въ, просте́ртыми побѣ́ду дла́ньми воздви́же, держа́ву погуби́въ Амали́ка всегуби́теля. Тѣ́мъ Христу́ пои́мъ, Бо́гу на́шему, я́ко просла́вися.

Возложи́ Моисе́й на столпѣ́ врачевство́, тлетвори́ваго избавле́ніе и ядови́таго угрызе́нія, и дре́ву о́бразомъ Креста́ по земли́ пресмыка́ющагося змíя привяза́, лука́вный въ се́мъ обличи́въ вре́дъ. Тѣ́мъ Христу́ пои́мъ, Бо́гу на́шему, я́ко просла́вися.

Показа́ не́бо Креста́ побѣ́ду благоче́стія держа́телю и царю́ богому́дру, враго́въ въ не́мже злосе́рдныхъ низложи́ся свирѣ́пство, ле́сть же преврати́ся, и вѣ́ра распростре́ся земны́мъ конце́мъ Боже́ственная. Тѣ́мъ Христу́ пои́мъ, Бо́гу на́шему, я́ко просла́вися.]

Кано́нъ святы́хъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Мра́къ грѣхо́вный отжени́, Свѣтода́вче Христе́, свы́ше просвѣти́ окая́нную мою́ ду́шу, моли́твами преподо́бнаго Ѳео́дора.

Просвѣще́ніемъ Трисо́лнечнаго Божества́ озари́вшеся, му́дріи, Ѳео́доре и Дави́де и Константи́не, свѣти́ла яви́стеся и просвѣща́ете свѣтоно́сную ва́шу па́мять вѣ́рно чту́щія.

Свѣ́томъ благода́ти озаряе́ми, преподо́бніи, Ѳео́доре и Дави́де и Константи́не сла́вніи, вѣ́рно па́мять ва́шу торжеству́ющія просвѣти́те и отъ тмы́ грѣхо́вныя моли́твами ва́шими изба́вите.

Богоро́диченъ: Пло́тію ро́ждши Безпло́тнаго, Богороди́тельнице Пречи́стая, тѣле́сныя на́ша и душе́вныя скве́рны омы́й окропле́ніемъ боже́ственныя Твоея́ моли́твы.

Другíй кано́нъ [святы́хъ], гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Вси́ вы́ Творцу́ возложи́сте себе́ и все́ душе́вное жела́ніе излія́сте къ Нему́, сего́ ра́ди духо́вную благода́ть воспрія́сте, свѣ́томъ ея́ озаря́еми, преподо́бне Ѳео́доре и Дави́де съ Константи́номъ сла́внымъ.

Измла́да Христа́ возлюби́лъ еси́, всеблаже́нне Ѳео́доре, новоявле́нне чудотво́рче, и пречи́стую Его́ Ма́терь, и ны́нѣ просвѣща́еши чудесы́, я́ко мо́лнія, всю́ вселе́нную.

Ны́нѣ, преблаже́нне Ѳео́доре, душа́ твоя́ почива́етъ на небеси́ со Христо́мъ во Ца́рствіи небе́снѣмъ, здѣ́ же честны́я твоя́ мо́щи даю́тъ исцѣле́нія приходя́щимъ съ вѣ́рою.

Богоро́диченъ: Ра́дуйся, Пречи́стая Богоро́дице, а́нгеловъ удивле́ніе, проро́ковъ про́повѣдь и апо́столовъ немо́лчная уста́, моли́ся Сы́ну Твоему́ и Бо́гу на́шему, да сохрани́тъ гра́дъ и мѣ́сто сіе́ преподо́бныхъ моле́ніемъ.

Катава́сія пра́здника: Кре́стъ начерта́въ...

Пѣ́снь 3.

[Ирмо́съ: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника; неплодя́щей же пре́жде Це́ркви, ны́нѣ процвѣте́ Дре́во Креста́, въ держа́ву и утвержде́ніе.

Яко испусти́, ударя́емь, во́ду краесѣко́мый, непокори́вымъ лю́демъ и жестосе́рдымъ, богозва́нныя проявля́ше Це́ркве та́инство, ея́же Кре́стъ держа́ва и утвержде́ніе.

Ре́бромъ пречи́стымъ, копіе́мъ прободе́ннымъ, вода́ съ Кро́вію истече́, обновля́ющая Завѣ́тъ и омыва́тельная грѣха́; вѣ́рныхъ бо Кре́стъ похвала́ и царе́й держа́ва и утвержде́ніе.

Инъ.]

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Непреста́нныя моли́твы при́сно принося́ще къ Бо́гу, блаже́нне Ѳео́доре и Дави́де съ Константи́номъ, за ве́сь мíръ и Трисвѣ́тлою Заре́ю озари́вшеся, просвѣща́ете, я́ко мо́лнія, вселе́нную.

Предстоя́ще Го́споду со безпло́тными си́лами, неизрече́нною сла́вою блиста́юще, преблаже́нне Ѳео́доре и Дави́де и Константи́не, за ны́ моли́теся, творя́щія честну́ю и пресла́вную па́мять ва́шу.

Напои́вше ду́ши сле́зными пото́ки, содѣ́ясте и́хъ, преподо́бніи, плодоно́сны добродѣ́тельми, вся́кая износя́ще чудеса́ на показа́ніе, пресла́вніи.

Богоро́диченъ: Ни́ва духо́вная, я́коже изъ бразды́ кла́съ, изнесла́ еси́ всю́ тва́рь Пита́ющаго вся́чески, Приснодѣ́во.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Яко свѣтоза́рное со́лнце яви́стеся Тріѵпоста́снаго Божества́, Ѳео́доре блаже́нне, съ Дави́домъ богому́дрымъ, и Константи́номъ пресла́внымъ, омраче́нныхъ ду́ши просвѣща́юще моли́твами ва́шими.

Измла́да во́зрастъ воспрія́лъ еси́ во гра́дѣ Смоле́нскѣ, по Христо́ву велѣ́нію на успе́ніе твое́ прише́лъ еси́ въ сла́вный гра́дъ Яросла́вль и сія́еши, я́ко со́лнце, блиста́ніемъ добродѣ́телей, преподо́бне Ѳео́доре.

Креста́ Госпо́дня си́лою укрѣпи́вся, блаже́нне Ѳео́доре, и поще́ніемъ и моли́твами вооружи́вся, стремле́нія де́монская на земли́ побѣди́лъ еси́ Бо́жіею си́лою.

Богоро́диченъ: Ра́дуйся, Влады́чице Дѣ́во, Церкве́й красота́, царе́й держа́ва и похвала́, непреста́нно моли́ся Христу́ Бо́гу, да сохрани́тъ гра́дъ се́й и лю́ди моли́твами Твои́ми.

[Конда́къ пра́здника, гла́съ 4. Подо́бенъ:

Вознесы́йся на Кре́стъ во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю Благовѣ́рнаго Импера́тора на́шего [и́мярекъ], побѣ́ды дая́ Ему́ на сопоста́ты, посо́біе иму́щу Твое́, ору́жіе ми́ра непобѣди́мую побѣ́ду.

Икосъ:

Иже до тре́тіяго небесе́ восхище́нъ бы́сть въ ра́й, и глаго́лы слы́шавъ неизрече́нныя и боже́ственныя, и́хже не лѣ́ть язы́ки (человѣ́ческими) глаго́лати, что́ Гала́томъ пи́шетъ, я́ко рачи́теліе писа́ній прочто́сте и позна́сте: мнѣ́, глаго́летъ, хвали́тися да не бу́детъ, то́кмо во еди́номъ Крестѣ́ Госпо́дни, на не́мже страда́въ, уби́ стра́сти. Того́ у́бо и мы́ извѣ́стно да держи́мъ, Кре́стъ Госпо́день, хвалу́ вси́: е́сть бо на́мъ спаси́тельное сіе́ Дре́во, ору́жіе ми́ра, непобѣди́мая побѣ́да.]

Сѣда́ленъ, гла́съ 1:

Жите́йское мо́ре воздержа́ніемъ безъ труда́ преплы́вше, и въ приста́нище мы́сленное безстра́стія приста́ли есте́, сосу́ди воздержа́ніемъ бога́тства некра́дома благоче́стія яви́стеся, блаже́нніи, Ѳео́доре и Дави́де и Константи́не, безстра́стіемъ житіе́ ва́ше просвѣти́вше, и тре́бующія ми́лости обогаща́ете, Христа́ Бо́га моля́ще дарова́ти на́мъ ве́лію ми́лость. [Два́жды.]

Сла́ва, и ны́нѣ, пра́здника, [гла́съ то́йже:

Горѣ́, я́ко Бо́гъ, не́бо престо́лъ имѣ́я и зе́млю, Христе́ Спа́се, подно́жіе нося́, Кре́стъ на́мъ показа́лъ еси́ Твои́хъ но́гъ подно́жіе, сему́ вси́ Дави́дски покланя́емся; того́ храни́теля и помо́щника иму́ще, вѣ́рно Тя́ сла́вимъ].

Пѣ́снь 4.

[Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Горькоро́дныя преложи́ дре́вомъ Моисе́й исто́чники въ пусты́ни дре́вле, Кресто́мъ ко благоче́стію язы́ковъ проявля́я преложе́ніе.

Глубинѣ́ внѣ́дривый сѣку́щую издаде́ Іорда́нъ дре́ву, Кресто́мъ и креще́ніемъ сѣче́ніе ле́сти зна́менуя.

Свяще́нно ополча́ются четвероча́стніи лю́діе, предходя́ще о́бразомъ свидѣ́тельства ски́ніи, крестообра́зными чи́нми прославля́еми.

Чу́дно простира́емь, со́лнечныя лучи́ испуща́ше Кре́стъ, и повѣ́даша небеса́ сла́ву Бо́га на́шего.

Инъ.]

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ты́ на земли́ другíй а́нгелъ наре́клся еси́ чистото́ю, о́тче преподо́бне Ѳео́доре, полки́ вся́ де́монскія и е́реси попаля́я духо́вною благода́тію. Тѣ́мъ, соше́дшеся въ па́мять ва́шу, прославля́емъ Спа́са и Бо́га на́шего.

Яко Христо́во смире́ніе возлюби́вше, возвы́систеся безстра́стіемъ, смири́вше де́монскую горды́ню; возсія́вше, я́ко со́лнце отъ восто́ка, чуде́съ луча́ми просвѣща́ете всю́ подсо́лнечную.

Кади́ло благово́нія Всеви́дцу, преподо́бніи, Ѳео́доре и Дави́де съ Константи́номъ богому́дрымъ, ва́ша моли́твы принесо́сте, я́же обоня́, и прія́тъ, и въ по́стнѣмъ ку́пно пра́здницѣ устроя́етъ.

Богоро́диченъ: Безъ сѣ́мене зачала́ еси́ во чре́вѣ Творца́ и Го́спода, безъ поро́ка я́вльшися, Ма́ти Бо́жія, ве́сь мíръ крила́ми Твои́ми покрыва́еши, непоро́чная Госпоже́ пречи́стая, пречи́стыя Твоя́ ру́ки вознося́щи къ Нему́, изба́ви ны́ отъ бу́дущаго гнѣ́ва.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

На земли́ степе́нь имѣ́лъ еси́, всеблаже́нне Ѳео́доре, но твои́ми моли́твами и го́рнее Ца́рство воспрія́лъ еси́, преподо́бне, и ны́нѣ на небеси́ со Христо́мъ ца́рствуеши.

Исцѣле́ніе содѣва́етъ Боже́ственный хра́мъ ва́шъ, Ѳео́доре и Дави́де и Константи́не, отго́ните неду́ги отъ человѣ́ковъ и укрепля́ете мудрова́нія и́хъ восхвали́ти труды́ ва́ша, всечестнíи.

Со враго́мъ дре́вле бра́вшеся воздержа́ніемъ, крѣ́пости поста́висте побѣ́ду, преподо́бніи, Ѳео́доре и Дави́де съ Константи́номъ сла́внымъ, му́жески низложи́вше де́монская ополче́нія.

Богоро́диченъ: Христа́ на́мъ родила́ еси́, Пречи́стая Влады́чице, Богора́дованная Дѣ́во, спаси́ гра́дъ и лю́ди, къ Тебѣ́ упова́ющія, Богоро́дице Всенепоро́чная.

Пѣ́снь 5.

[Ирмо́съ: О, треблаже́нное Дре́во, на не́мже распя́ся Христо́съ, Ца́рь и Госпо́дь, и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Тебе́, приснопѣ́тое дре́во, на не́мже простре́ся Христо́съ, Еде́мъ храня́щее обраща́ющееся ору́жіе, Кре́сте, устыдѣ́ся: стра́шный же херуви́мъ уступи́, на тебѣ́ пригвожде́нному Христу́, подаю́щему ми́ръ душа́мъ на́шимъ.

Подзе́мныхъ си́лы проти́вныя Креста́ страша́тся начерта́ема зна́менія на возду́сѣ, по нему́же хо́дятъ небе́сныхъ и земноро́дныхъ ро́ди, колѣ́на преклоня́юще Христу́, подаю́щему ми́ръ душа́мъ на́шимъ.

Заря́ми нетлѣ́нными я́влься Боже́ственный Кре́стъ омраче́ннымъ язы́комъ, заблужде́ннымъ въ пре́лести, Боже́ственный свѣ́тъ облиста́въ, усвоя́етъ на не́мъ пригвожде́нному Христу́, подаю́щему ми́ръ душа́мъ на́шимъ.

Инъ.]

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Просвѣти́ твое́ житіе́ всю́ вселе́нную, преподо́бне о́тче Ѳео́доре, правовѣ́рными словесы́ сія́ющее, я́ко со́лнце, Трили́чнаго Божества́ заре́ю просвѣща́емь.

Це́ркве ты́ бы́лъ еси́ проповѣ́дникъ, свя́те, вся́ку е́ресь и ле́сть де́монскую разоря́я: тѣ́мже со а́нгелы ны́нѣ лику́еши.

Еди́ной любви́ Христо́вѣ вы́ приложи́вше ду́ши своя́, Ѳео́доре и Дави́де съ Константи́номъ сла́внымъ, и исполни́теліе Бо́жіихъ за́повѣдей бы́вше, мно́гихъ чуде́съ прія́сте благода́ть, всехва́льніи.

Незло́биви и кро́тцы, вся́ зло́бы вра́жія погу́бльше и ми́лостиви до конца́ я́вльшеся, блаже́нніи, отъ Еди́наго Ми́лостиваго благода́ть прія́сте, и́стинную и спаси́тельную.

Богоро́диченъ: Воспо́йте, вся́ земля́, по́йте же Возсія́вшему изъ чре́ва боголѣ́пно Неискусобра́чныя и Сію́ вѣ́рнымъ Показа́вшему тве́рду наде́жду и похвалу́.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Зако́нно моли́твами и посто́мъ всегда́ претерпѣва́сте, въ безстра́стіе одѣ́явшеся, пло́тскій ра́зумъ смири́вше крѣ́постію Боже́ственнаго Ду́ха.

Отъ ю́ности возжада́лъ еси́ о́браза мона́шескаго и отъ Христа́ воспрія́тъ вѣне́цъ неувя́дный и ри́зу нетлѣ́нную, и ны́нѣ, блаже́нне Ѳео́доре, со а́нгелы ра́дуется ду́хъ тво́й.

Гро́бъ честна́го твоего́ тѣлесе́ показа́лъ еси́ вѣ́рнымъ лю́демъ ду́шъ освяще́ніе, и тѣле́съ исцѣле́ніе, и страсте́й избавле́ніе, отъ твои́хъ моще́й цѣльбы́ почерпа́ющимъ.

Богоро́диченъ: Всесвѣ́тлымъ укра́шена свѣ́томъ, Богора́дованная Ма́ти, Ты́ бо породила́ еси́, Честнѣ́йшая всѣ́хъ, Христа́, Бо́га на́шего, Его́же моли́, да изба́витъ ны́ отъ вся́кихъ напа́стей.

Пѣ́снь 6.

[Ирмо́съ: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ; тѣ́мъ, тридне́венъ изше́дъ, премíрное Воскресе́ніе прописа́ше, пло́тію пригвожде́ннаго Христа́ Бо́га, и тридне́внымъ Воскресе́ніемъ мíръ просвѣ́щшаго.

Ста́ростію преклони́вся и неду́гомъ отягче́нъ, испра́вися Іа́ковъ, ру́цѣ премѣни́въ, дѣ́йствіе явля́я жизноно́снаго Креста́: и́бо ве́тхость зако́ннаго сѣно́внаго писа́нія новописа́, на се́мъ пло́тію пригвозди́выйся Бо́гъ, и душегуби́тельный неду́гъ ле́сти отгна́.

На ю́ныя возложи́въ дла́ни боже́ственный Изра́иль, крестови́дно главы́ явля́ше, я́ко старѣ́йшая сла́ва, законослужи́тели лю́діе. Тѣ́мже, подмнѣ́вся та́ко испрельсти́тися, не измѣни́ жизноно́снаго о́браза: превзы́дутъ бо лю́діе Христо́вы Бо́жіи новоутвержде́нніи, вопія́ху, Кресто́мъ огражда́еми.

Инъ.]

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Вѣ́рою и любо́вію прилѣпи́вся Влады́цѣ вы́шнихъ си́лъ, прему́дре Ѳео́доре, возсія́въ на земли́, я́ко со́лнце, мглу́ и́дольскую всю́ду потребля́я, вѣ́рныя же просвѣща́я моли́твами твои́ми.

Моли́твами предваря́я къ Бо́гу и Тому́ предстоя́ со а́нгелы, за ве́сь мíръ моли́ся, бра́нь непрія́зненную всю́ потреби́ти и побѣ́ду извѣ́стну да́ти на сопоста́ты Импера́тору на́шему.

Благи́ми нра́вы украси́вся, Христу́ прилѣпи́лся еси́ отъ ю́ности, и плотскíя стра́сти умори́въ воздержа́ніемъ, и къ жи́зни, преподо́бне Ѳео́доре, преста́вился еси́.

Глаго́ловъ зако́нныхъ испо́лнитель Бо́жіихъ бы́лъ еси́, испо́лнился еси́, о́тче прему́дре Дави́де, Боже́ственныхъ даро́въ и чуде́съ лучи́ всѣ́мъ испусти́лъ еси́.

Богоро́диченъ: Души́ моея́ стра́сти исцѣли́, Безстра́стія бы́вшая исто́чникъ и просвѣти́вшая ли́ки преподо́бныхъ отце́въ Рождество́мъ Свои́мъ.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Моля́ прилѣ́жно Го́спода, недви́жущагося о́трока цѣ́ла сотворя́еши и безгла́сна пре́жде, Бо́жіимъ про́мысломъ, многоглаго́лива показа́лъ еси́, о́тче на́шъ чудотво́рче Ѳео́доре, мона́шествующихъ свѣти́льниче пресвѣ́тлый.

Удиви́ся, блаже́нне, чудесе́мъ твои́мъ ве́сь мíръ, прему́дре Дави́де, и воспрія́лъ еси́ отъ Христа́ вѣне́цъ небе́сный, его́же сподо́би и на́мъ получи́ти твои́ми моли́твами, всече́стне.

Лу́къ си́льныхъ сокруши́лъ еси́ и бра́нь вся́ку непрія́знену истреби́лъ еси́, всеблаже́нне Ѳео́доре, дѣ́йствомъ, я́ко вѣща́ніемъ, испусти́лъ еси́ чудеса́ во всю́ вселе́нную.

Всеблаже́нне Ѳео́доре, уго́дниче Христо́въ, на небесѣ́хъ предстои́ши Христу́, моля́ся, здѣ́ же честны́я мо́щи твоя́ боля́щихъ исцѣля́ютъ и отъ грѣ́хъ изыма́ютъ.

Богоро́диченъ: Изсуши́ла еси́ сады́ безбо́жныхъ человѣ́ковъ, Всенепоро́чная Дѣ́во, Твои́мъ прозябе́ніемъ, прозя́бшую во мнѣ́ зло́бу искорени́, Богоневѣ́стная.

Конда́къ, гла́съ 8:

Яви́стеся свѣти́льницы всесвѣ́тліи во пло́ти, я́ко а́нгели, и, я́ко жи́зни древеса́ ра́йская, поще́ніемъ, бдѣ́ніемъ и вѣ́рою возраща́еми, процвѣли́ есте́, моли́твами ва́шими небе́сныя благода́ти пріе́мше, вра́чеве крѣ́пцы я́вльшеся, исцѣля́ете неду́гующихъ ду́ши, съ вѣ́рою прибѣга́ющихъ къ ра́цѣ моще́й ва́шихъ, чудотво́рцы сла́вніи, Ѳео́доре, Дави́де и Константи́не, моли́те Христа́ Бо́га грѣхо́въ оставле́ніе дарова́ти, вѣ́рою и любо́вію чту́щимъ па́мять ва́шу.

Икосъ:

Свы́ше зва́ніе пріе́мше пресла́вно, безсме́ртную жи́знь наслѣ́довасте, съ пло́тію бо на земли́ безпло́тныхъ житіе́ проше́дше, бы́сте страсте́й непрія́тни. Тѣ́мже восхваля́емъ вы́, отцы́ преподо́бніи, сицева́я глаго́люще: ра́дуйтеся, свѣ́тлая свѣти́ла и правосла́вныхъ сла́ва; ра́дуйтеся, цѣлому́дрія столпи́ необори́міи; ра́дуйтеся, прему́драго ра́зума явле́ніе; ра́дуйтеся, пра́вды рачи́теліе извѣ́стніи; ра́дуйтеся, я́ко по́стническими по́двиги умертви́вше плотски́хъ дѣя́ній стремле́нія; ра́дуйтеся, умы́ наслажда́ющеся небе́сныхъ неизрече́нныхъ; ра́дуйтеся, всю́ тва́рь благоче́стно удивля́юще чудесы́, и́миже посрами́шася де́мони; ра́дуйтеся, оружено́сцы духо́вніи, и́миже вся́ка стра́сть умертви́ся; ра́дуйтеся, исто́чницы жизненото́чныхъ во́дъ; ра́дуйтеся, помо́щницы вѣ́рно восхваля́ющимъ ва́съ; ра́дуйтеся, чудотво́рцы достохва́льніи, Ѳео́доре и Дави́де и Константи́не; ра́дуйтеся, помо́щницы вѣ́рою и любо́вію чту́щимъ па́мять ва́шу.

Пѣ́снь 7.

[Ирмо́съ: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое; оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отцевъ и на́съ Бо́же, благослове́нъ еси́.

Отъ дре́ва вкуси́въ, пе́рвый въ человѣ́цѣхъ, въ тлѣ́ніе всели́ся: отверже́ніемъ бо жи́зни безче́стнѣйшимъ осуди́вся, всему́ ро́ду тѣлотлѣ́ненъ нѣ́кій яко вре́дъ неду́га преподаде́; но, обрѣ́тше, земноро́дніи, воззва́ніе кре́стнымъ дре́вомъ, зове́мъ: препѣ́тый отце́въ и на́съ Бо́же, благослове́нъ еси́.

Разруши́ повелѣ́ніе Бо́жіе преслуша́ніе, и дре́во принесе́ сме́рть человѣ́комъ, е́же неблаговре́менно прича́стно бы́вшее: во утвержде́ніе же зѣло́ честна́го. Отту́ду жи́зни дре́во возбраня́емо бѣ́, е́же разбо́йнику злоуме́ршу отве́рзе, благоразу́мно зову́щу: препѣ́тый отце́въ и на́съ Бо́же, благослове́нъ еси́.

Жезла́ объе́млетъ кра́й Іо́сифова, бу́дущая зря́, Изра́иль, ца́рствія держа́вное, я́ко возъиму́ществитъ пресла́вный Кре́стъ, проявля́я: се́й бо царе́й побѣдоно́сная похвала́, и свѣ́тъ вѣ́рою зову́щимъ: препѣ́тый отце́въ и на́съ Бо́же, благослове́нъ еси́.

Инъ.]

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Прилѣ́жныя твоя́ по́двиги и труды́ почита́юще и сла́дость уче́нія твоего́, преподо́бне о́тче Ѳео́доре, и́миже просвѣти́ ны и научи́ воспѣва́ти Тріѵпоста́сное Божество́: отце́въ на́шихъ Бо́же, благослове́нъ еси́.

Ору́жіемъ ва́шихъ моли́твъ, Ѳео́доре и Дави́де съ Константи́номъ сла́внымъ, побѣди́сте де́моны и съ небесе́ благода́ть прія́сте исцѣля́ти болѣ́зни и прогони́ти ду́хи лука́выя отъ взыва́ющихъ: благослове́нъ Бо́гъ оте́цъ на́шихъ.

Посто́мъ, и моли́твою, и бдѣ́ніемъ, преподо́бне Ѳео́доре, просвѣти́вся, вше́лъ еси́ на высоту́ добродѣ́телей и научи́лъ еси́ житіе́мъ твои́мъ ве́сь мíръ вѣ́рно воспѣва́ти: отце́въ на́шихъ Бо́же, благослове́нъ еси́.

Богоро́диченъ: Ору́жіе, Чи́стая, храня́щее пре́жде врата́ Еде́мская, плещи́, Дѣ́во, всѣ́мъ дае́тъ, низложи́вшимъ по́стнически бори́теля врага́, при́сно взыва́ющимъ: отце́въ на́шихъ Бо́же, благослове́нъ еси́.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Блаже́нно житіе́ твое́ и кончи́на безсме́ртна, преподо́бне Ѳео́доре: сего́ ра́ди тя́ Христо́съ свы́ше украси́ вѣнце́мъ, и просвѣща́еши ве́сь мíръ чудесы́, всечу́дне.

Яви́лся еси́ ны́нѣ гра́да Яросла́вля, Дави́де богоблаже́нне, сто́лпъ неколе́бленъ и стѣна́ неруши́ма, вели́кое прибѣ́жище притека́ющимъ и пріе́млющимъ исцѣле́ній благода́ть неоску́дную.

Хотѣ́ніемъ отъ мірски́хъ сла́достей отлуча́ющеся, стра́нно человѣ́комъ Явльшемуся пло́тію присво́ившеся, и бу́дущая нетлѣ́нная стяжа́сте, святíи, пою́ще: благослове́нъ Бо́гъ отце́въ на́шихъ.

Богоро́диченъ: Безсѣ́менно заче́нши, Творца́ всѣ́хъ, Христа́ Бо́га, неизрече́нно родила́ еси́, Его́же моли́, дерзнове́ніе иму́щи къ Нему́, да спасе́тъ ны́, вопію́щія: благослове́нъ Бо́гъ отце́въ на́шихъ.

Пѣ́снь 8.

[Ирмо́съ: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Воздвиза́ему дре́ву, окропле́ну Кро́вію вопло́щшагося Сло́ва Бо́га, по́йте, небе́сныя си́лы; земны́хъ воззва́ніе пра́зднующе, лю́діе, поклони́теся Христо́ву Кресту́, и́мже мíру воста́ніе во вѣ́ки.

Земноро́дніи, дла́ньми, строи́теліе благода́ти, Кре́стъ, на не́мже стоя́ше Христо́съ Бо́гъ, возноси́те священнолѣ́пно и копіе́, Бо́жія Сло́ва Тѣ́ло пробо́дшее, да ви́дятъ язы́цы вси́ спасе́ніе Бо́жіе, сла́вяще Его́ во вѣ́ки.

Боже́ственнымъ судо́мъ предъизбра́нніи, весели́теся, христіа́нстіи вѣ́рніи ца́ріе, хвали́теся побѣдоно́снымъ ору́жіемъ, пріе́мше отъ Бо́га Кре́стъ честны́й: въ се́мъ бо колѣ́на бра́ней, де́рзости и́щуще, разсыпа́ются во вѣ́ки.

Инъ.]

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Сле́зъ ва́шихъ ка́пли погаси́ша собла́зны грѣхо́вныя, рѣку́ же чуде́съ показа́сте всѣ́мъ на́мъ, вся́кія стра́сти потопля́ющую притека́ющихъ къ ва́мъ, пресла́вніи отцы́ святíи, Ѳео́доре и Дави́де съ Константи́номъ сла́внымъ.

Вѣ́ру и наде́жду неразори́му и любо́вь и́стинную имѣ́ли есте́, отцы́, и ми́лостивное прилѣжа́ніе, терпѣ́ніе бла́го и поуче́ніе слове́съ духо́вныхъ, смиренному́дріе и соверше́нное беззло́біе.

Подвиза́вшеся до́брѣ, побѣди́сте вра́жія вся́ дѣ́йства и по концѣ́ житія́ вѣнча́стеся, му́дріи, ко всѣ́мъ преподо́бнымъ приче́тшеся, съ ни́миже чти́мъ вы́, превознося́ще Христа́ во вѣ́ки.

Богоро́диченъ: Ма́ти Бо́жія Чи́стая, страсте́й мои́хъ у́зы грѣхо́вныя, и молвы́, и неду́ги отжени́: и́маши бо къ Нему́ дерзнове́ніе и о́бласть поми́ловати ны́, Госпоже́ милосе́рдая, Спа́са поро́ждши пло́тію, Его́же непреста́нно моли́ спасти́ся на́мъ.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Лику́ютъ на небесѣ́хъ чи́ни а́нгельстіи, всеблаже́нне Ѳео́доре, и вѣ́рныхъ собо́ри на земли́, твою́ па́мять похваля́юще, вопію́тъ: Го́спода воспѣва́йте, дѣла́, и превозноси́те Его́ во вѣ́ки.

Помоли́ся Христу́ Бо́гу, преблаже́нне Ѳео́доре, о приходя́щихъ къ тебѣ́ съ вѣ́рою и хотя́щихъ отъ тебе́ почерпсти́ исцѣле́нія неоску́дную благода́ть, пою́щихъ: Го́спода воспѣва́йте, дѣла́, и превозноси́те Его́ во вѣ́ки.

Со безтѣле́сными си́лами, преподо́бніи отцы́, Христу́ предстоите́, моли́твами ва́шими, святíи, душе́вныя на́ша болѣ́зни исцѣли́те и отъ безчи́сленныхъ зо́лъ изба́вите на́съ, вопію́щихъ: Го́спода воспѣва́йте, дѣла́, и превозноси́те Его́ во вѣ́ки.

Богоро́диченъ: Изъ пречи́стаго Твоего́ чре́ва, Богома́ти, Небе́снаго Дождя́ Ка́пля на́мъ ука́не, на омове́ніе скве́рнъ, на здра́віе тѣле́съ, на прогна́ніе лука́ваго. Тѣ́мже Тя́ блажи́мъ, Чи́стая, во вѣ́ки.

Пѣ́снь 9.

[Ирмо́съ: Та́инъ еси́, Богоро́дице, ра́й, невоздѣ́ланно возрасти́вшій Христа́, Имже кре́стное живоно́сное на земли́ насади́ся Дре́во. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Да возра́дуются древа́ дубра́вная вся́, освяти́вшуся естеству́ и́хъ, отъ Него́же изнача́ла насади́шася, Христу́ распросте́ршуся на Дре́вѣ. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Свяще́нный воста́ ро́гъ и глава́ всѣ́мъ богому́дрымъ — Кре́стъ, и́мже грѣ́шныхъ мы́сленно стира́ются ро́ги вси́; тѣ́мъ, ны́нѣ возноси́му, покланя́ющеся ему́, Тя́ велича́емъ.

Инъ.]

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Естество́ тлѣ́нное премѣни́вше, въ вѣ́чныя оби́тели взыдо́сте, блаже́нніи, житіе́мъ чи́стымъ послѣ́довавше Влады́цѣ Бо́гу. Тѣ́мже честву́юще успе́ніе ва́ше, святíи, непреста́нно Христа́ велича́емъ.

Се́ отве́рзеся ва́мъ, отцы́, небе́сное Ца́рство, сконча́вшимъ до́брое тече́ніе, и ви́дите, я́же ви́дятъ а́нгели, воздая́ніе трудо́въ подае́тъ ва́мъ по́чести Бо́гъ. Тѣ́мже ублажа́емъ вы́.

Вы́спрь къ Бо́гу мы́сль иму́ще, преподо́бніи, земна́я оста́висте, труда́ ра́ди воздержа́ніемъ за неосла́бное облегча́еми, и со а́нгелы ны́нѣ водворя́етеся, Христа́ велича́юще.

Богоро́диченъ: Пощади́ мя, Го́споди, пощади́, егда́ хо́щеши суди́ти ми́, не осуди́ мене́ во о́гнь, ниже́ я́ростію Твое́ю обличи́ мя, мо́литъ Тя́ Дѣ́ва, ро́ждшая Тя́, Христе́, и а́нгеловъ собо́ри, и преподо́бныхъ соста́вы.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Удиви́ся во все́мъ мíрѣ, Ѳео́доре, твоя́ па́мять, чудесы́ сія́ющи, я́коже со́лнце, и злы́я болѣ́зни исцѣля́ющи всѣ́хъ. Тѣ́мже на́ша стра́сти разжени́, мо́лимся тебѣ́, прося́ на́мъ отпуще́нія, чудотво́рче Христо́въ, и просвѣти́ ны твои́ми моли́твами, да тя́ вси́ велича́емъ.

Да вхо́дятъ ны́нѣ во святы́й хра́мъ, къ честны́мъ твои́мъ моще́мъ, преподо́бне Ѳео́доре, благоче́стія держа́тели и вся́къ во́зрастъ, припа́дающе, про́сятъ отъ тебе́ почерпсти́ исцѣле́нія, здра́вія и спасе́нія, Христа́ велича́юще.

И ны́нѣ моли́теся ко Христу́ Бо́гу, всечу́дніи, Ѳео́доре и Дави́де и Константи́не, да ва́ши честны́я мо́щи всегда́ подаю́тъ слѣпы́мъ прозрѣ́ніе и хромы́мъ хожде́ніе, больны́мъ исцѣле́ніе и всѣ́мъ здра́віе и спасе́ніе, да ва́съ вси́ велича́емъ.

Богоро́диченъ: Пресвята́я Дѣ́во, Богоро́дице Марíе, со а́нгелы, и арха́нгелы, и со всѣ́ми небе́сными си́лами, и со проро́ки и апо́столы, и съ ли́ки преподо́бныхъ отце́въ и свяще́нныхъ му́ченикъ, и со блаже́ннымъ Ѳео́доромъ, моли́ся Сы́ну Твоему́, Христу́ Бо́гу на́шему, да изба́витъ ны́ отъ всѣ́хъ бѣ́дъ, Тя́ велича́ющія.

Свѣти́ленъ:

Якоже со́лнце блиста́я, зарю́ испуща́еши чуде́съ, просвѣща́я всѣ́хъ сердца́, твою́ сла́вную па́мять творя́щихъ вѣ́рно, преблаже́нне Ѳео́доре, и спаса́еши отъ бѣ́дъ и бу́дущаго гнѣ́ва. [Два́жды.]

Сла́ва, и ны́нѣ, пра́здника:

[Кре́стъ — храни́тель всея́ вселе́нныя, Кре́стъ — красота́ Це́ркве, Кре́стъ — царе́й держа́ва, Кре́стъ — вѣ́рныхъ утвержде́ніе, Кре́стъ — а́нгеловъ сла́ва и де́моновъ я́зва.]

На хвали́техъ стихи́ры, гла́съ 8:

Преподо́бне о́тче, досточу́дне Ѳео́доре, обрѣ́тши ду́шу твою́ отъ скве́рны вся́кія чи́сту, Ду́ха благода́ть Всесвята́го въ тя́ всели́ся, я́ко незаходи́мый свѣ́тъ: Его́же дѣ́йствомъ ду́хи лука́выя отго́ниши всегда́ и исцѣля́еши неду́ги и болѣ́зни приходя́щихъ къ тебѣ́ просты́мъ се́рдцемъ, и соверша́ющихъ твою́ па́мять святу́ю, и кла́няющихся моще́мъ твои́мъ, и вопію́щихъ: богоно́се, Христо́въ уго́дниче, моли́ спасти́ся на́мъ. [Два́жды.]

Чу́вства вся́ пло́ти обузда́въ и нака́занъ зако́номъ бы́въ, му́дре, Боже́ственнаго зна́нія, отту́ду просла́вился еси́ сла́вою, и отъ сла́вы, сла́вне, въ сла́ву преше́лъ еси́, и, я́ко исто́чникъ, Ду́ха Свята́го си́лою чудеса́ ди́вна содѣ́ялъ еси́, преподо́бне о́тче Ѳео́доре, дѣя́нія да́ръ равноапо́столенъ пріи́мъ отъ вы́шняго про́мысла, и щито́мъ и́стиннымъ огра́ждся, си́лою Креста́ укрѣпи́вся, полки́ проти́вныхъ побѣжда́я; и человѣ́ки я́сно научи́, просвѣща́я чудесы́ мно́гими, Ѳео́доре блаже́нне, моли́ спасти́ся на́мъ.

Вся́ чту́щія вѣ́рою па́мять твою́ свѣ́тло сподо́би твои́ми моли́твами лю́тыхъ напа́стей и стра́стныхъ бу́рь всѣ́хъ гонзну́ти при́сно, и грѣхо́въ проще́ніе прія́ти, и доити́ ми́лости и ра́дости неизрече́нныя, преблаже́нне Ѳео́доре, моли́ спасти́ся на́мъ.

Сла́ва, гла́съ то́йже:

Пріиди́те, вси́ вѣ́рніи, согла́сно воспои́мъ преблаже́ннаго Ѳео́дора, благоче́стія свѣ́тлость, воздержа́нія пра́вило, терпѣ́нія сто́лпъ, чистоты́ сокро́вище, смире́нія рѣку́ оби́льную, ни́щихъ утѣше́ніе, стра́нныхъ страннопріи́мника, и́стинныя любве́ Христо́вы дѣ́лателя и́стинно и́скренняго, и Сему́ у́бо жи́въ предстои́тъ, человѣ́ковъ засту́пникъ и спаси́тель показа́ся, болѣ́зней и страсте́й неисцѣ́льныхъ и вся́кихъ напа́стей исцѣли́тель, и мо́литъ спасти́ся на́мъ.

И ны́нѣ, пра́здника, гла́съ то́йже:

Его́же дре́вле Моисе́й [прообразова́въ собо́ю, Амали́ка низложи́въ, побѣди́, и Дави́дъ пѣснопѣ́вецъ подно́жію Твоему́, вопія́, кла́нятися повелѣва́ше, Честно́му Кресту́ Твоему́, Христе́ Бо́же, дне́сь, грѣ́шніи, кла́няемся, устна́ми недосто́йными, Тя́ изво́лившаго пригвозди́тися на не́мъ, воспѣва́юще, мо́лимся: Го́споди, съ разбо́йникомъ Ца́рствія Твоего́ сподо́би на́съ].


НА ЛИТУРГІИ,

Блаже́нна пра́здника, пѣ́снь 7-я, на 4, и святы́хъ, пѣ́снь 3-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 186 об. – 196.

/ Къ оглавленію раздѣла /


Наверхъ / Къ титульной страницѣ

0