Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 18-й де́нь.
Преподо́бнаго отца́ на́шего Евме́нія, епи́скопа Горти́нскаго, чудотво́рца.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 4. Подо́бенъ: Яко до́бля.

Возноси́му Тебѣ́, Влады́ко, на Кре́стъ,* совозне́слъ еси́ па́дшее Ада́мово естество́ все́,* сего́ ра́ди вознося́ще* пречи́стый Кре́стъ Тво́й, Человѣколю́бче,* отъ вы́шнія Твоея́ крѣ́пости* про́симъ, зову́ще:* спаси́, Вы́шній, я́ко Бо́гъ ми́лостивъ,* почита́ющія честно́е и свѣтоно́сное* Твоего́ Креста́ боже́ственное вознесе́ніе.

Псало́мски ны́нѣ предзря́ще* подно́жіе Твое́, Влады́ко,* идѣ́же но́ги Твоя́ стоя́ша пречи́стыя,* дне́сь любо́вію почита́емъ Кре́стъ Тво́й пречестны́й* и, вознося́ще благоче́стиво,* мо́лимъ Тя́, взыва́юще:* Вы́шній, вся́ Кресто́мъ Твои́мъ боже́ственнымъ освяти́въ,* Твоего́ неизрече́ннаго благоутро́бія* прича́стники покажи́ и благода́ти.

Яко непобѣди́мому ору́жію,* щиту́ непребори́му* и я́ко ски́птру Боже́ственному,* поклони́мся Кресту́ Твоему́, Христе́, пресвято́му,* и́мже мíръ спасе́ся,* и лику́етъ Ада́мъ;* земны́хъ собо́ри, сего́ пѣ́сньми благохва́ляще почита́емъ* и, того́ боже́ственное воздви́женіе соверша́юще,* очище́нія про́симъ.

Ины стихи́ры свята́го, гла́съ и подо́бенъ то́йже:

Ду́шу и тѣ́ло твое́* отъ страсте́й очи́стивъ,* Свята́го Ду́ха до́мъ бы́лъ еси́,* и свяще́нныхъ ма́стію* себе́ украси́лъ еси́,* предста́тель изя́щный бы́лъ еси́, Евме́ніе,* и собесѣ́дникъ святы́хъ а́нгеловъ,* и сла́вы Госпо́дни наслѣ́дникъ,* и моле́бникъ о хва́лящихъ тя́.

Пресла́вное житіе́ твое́,* добродѣ́тельми просвѣти́вшееся,* и чуде́съ просія́ свѣ́тлостьми,* и благосла́вна тя́ конце́мъ, всеблаже́нне, содѣ́ла,* и свѣти́льника непреле́стна,* и святы́хъ единосе́льна,* и гра́да свята́го граждани́на іера́рха,* а́нгеловъ сограждани́на,* чудотво́рче достосла́вне.

Кри́тское удобре́ніе,* Горти́нскаго предсѣда́теля,* Це́ркве непоколеби́мое основа́ніе,* іера́рха Евме́нія,* въ чудесѣ́хъ велича́йшаго,* и въ си́лахъ мно́гихъ бы́вша пресла́внаго,* и просвѣти́вша су́щая во мра́цѣ сердца́,* я́ко свѣти́льника вѣ́рныхъ,* велегла́сно, соше́дшеся, почти́мъ.

Сла́ва, и ны́нѣ, гла́съ 2. Самогла́сенъ:

Боже́ственное сокро́вище, въ земли́ скрыва́емо, Жизнода́вца Кре́стъ, на небесѣ́хъ показа́ся царю́ благочести́вому и побѣ́ды на враги́ подписа́ніе явля́етъ разу́мно; его́же, ра́дуяся, вѣ́рою и любо́вію, боже́ственно восте́къ къ высотѣ́ зрѣ́нія, тща́ніемъ же того́ отъ земны́хъ нѣ́дръ изнесе́, во избавле́ніе мíра и спасе́ніе ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Дне́сь Кре́стъ Христо́въ* возно́сится,* живоно́сное дре́во,* на не́мже пло́тію распя́тся,* вся́ призыва́я.

Сти́хъ: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть.

Ра́дуйся, вѣ́рныхъ* хране́ніе Боже́ственное,* необори́мая стѣно́,* Кре́сте Госпо́день,* и́мже отъ земли́ вознесо́хомся.

Сти́хъ: Бо́гъ же, Ца́рь на́шъ пре́жде вѣ́ка,* содѣ́ла спасе́ніе посредѣ́ земли́.

Пріиди́те ве́село,* цѣлу́емъ вси́* живоно́сное дре́во,* на не́мже распростре́ся* Христо́съ, Избавле́ніе.

Сла́ва, и ны́нѣ, гла́съ 4:

Честна́го Креста́, Христе́, дѣ́йство прообрази́въ Моисе́й, побѣди́ проти́внаго Амали́ка въ пусты́ни Сина́йстѣй: егда́ бо простира́ше ру́цѣ, Креста́ о́бразъ творя́, укрѣпля́хуся лю́діе; ны́нѣ же веще́й сбытіе́ въ на́съ испо́лнися, дне́сь Кре́стъ воздвиза́ется, и де́мони бѣ́гаютъ, дне́сь тва́рь вся́ отъ тли́ свободи́ся, вся́ бо Креста́ ра́ди возсія́ша на́мъ дарова́нія. Тѣ́мже, ра́дующеся, вси́ припа́даемъ Тебѣ́, глаго́люще: я́ко возвели́чишася дѣла́ Твоя́, Го́споди, сла́ва Тебѣ́.

Тропа́рь пра́здника, [гла́съ 1]:

Спаси́, Го́споди, лю́ди Твоя́ [и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство].


НА УТРЕНИ,
[На Бо́гъ Госпо́дь:] тропа́рь пра́здника, три́жды.

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Просте́ръ Моисе́й ру́цѣ къ высотѣ́ небе́снѣй, прообразова́ше Крестъ́, Боже́ственное ору́жіе вѣ́рныхъ, на не́мже Христо́съ грѣхи́ пригвозди́. Тѣ́мъ вра́гъ пла́каше стражда́, болѣ́зненно чу́вствы, глаго́лаше: древяно́е мя́ копіе́ прободе́ посредѣ́ се́рдца моего́. Христо́съ вся́ отъ а́дскихъ у́зъ рѣши́тъ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 6. Подо́бенъ: Наде́жда мíра.

На дре́вѣ, Спа́се, кре́стнѣмъ за утро́бы ми́лости возвы́сився и ре́бра пробо́дъ копіе́мъ, растерза́лъ еси́ грѣхо́въ лю́тое рукописа́ніе, я́ко Всемо́щный Бо́гъ: тѣ́мъ Твое́ неизрече́нное пое́мъ благоче́стно, Сло́ве, смотре́ніе.

Сла́ва, и ны́нѣ, то́йже.

Кано́нъ пра́здника со ирмосо́мъ на 8 и свята́го на 4.

Кано́нъ пра́здника, гла́съ 8.
Пѣ́снь 1.

Ирмо́съ: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшеходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Образъ дре́вле Моисе́й пречи́стыя Стра́сти въ себѣ́ само́мъ прообрази́, свяще́нныхъ средѣ́ стоя́: Кре́стъ же вообрази́въ, просте́ртыми побѣ́ду дла́ньми воздви́же, держа́ву погуби́въ Амали́ка всегуби́теля. Тѣ́мъ Христу́ пои́мъ, Бо́гу на́шему, я́ко просла́вися.

Возложи́ Моисе́й на столпѣ́ врачевство́, тлетвори́ваго избавле́ніе и ядови́таго угрызе́нія, и дре́ву о́бразомъ Креста́ по земли́ пресмыка́ющагося змíя привяза́, лука́вный въ се́мъ обличи́въ вре́дъ. Тѣ́мъ Христу́ пои́мъ, Бо́гу на́шему, я́ко просла́вися.

Показа́ не́бо Креста́ побѣ́ду благоче́стія держа́телю и царю́ богому́дру, враго́въ въ не́мже злосе́рдныхъ низложи́ся свирѣ́пство, ле́сть же преврати́ся, и вѣ́ра распростре́ся земны́мъ конце́мъ Боже́ственная. Тѣ́мъ Христу́ пои́мъ, Бо́гу на́шему, я́ко просла́вися.

Инъ кано́нъ свята́го, его́же краегране́сіе: Моли́твами твои́ми да́ждь ми́ Христа́ благоувѣ́тлива, блаже́нне. Іо́сифъ. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Имѣ́я Христа́, о́тче богому́дре Евме́ніе, послу́шающа твои́хъ моли́твъ боже́ственныхъ, Его́же ти́ха, блаже́нне, содѣ́лай любо́вію хва́лящимъ тя́.

Высокотво́рное отъ ю́ности, преподо́бне, возлюби́въ смире́ніе, го́рдаго смири́лъ еси́ змíя и да́ромъ врачева́ній я́вѣ обогати́лся еси́.

Вмѣсти́тельный Ду́ха орга́нъ бы́лъ еси́, пло́ти мудрова́нія мно́гими посты́ души́ покори́въ, лу́чшему го́ршее ты́ порабо́тивъ.

Богоро́диченъ: Яже о Тебѣ́, ны́нѣ проро́чествія испо́лнишася, Богороди́тельнице Влады́чице: Его́же бо провозвѣсти́ша высокоглаго́ливо, во чре́во вмѣсти́ла еси́, во дву́хъ соверше́нныхъ естества́хъ.

Пѣ́снь 3.

Ирмо́съ: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника; неплодя́щей же пре́жде Це́ркви, ны́нѣ процвѣте́ Дре́во Креста́, въ держа́ву и утвержде́ніе.

Яко испусти́, ударя́емь, во́ду краесѣко́мый, непокори́вымъ лю́демъ и жестосе́рдымъ, богозва́нныя проявля́ше Це́ркве та́инство, ея́же Кре́стъ держа́ва и утвержде́ніе.

Ре́бромъ пречи́стымъ, копіе́мъ прободе́ннымъ, вода́ съ Кро́вію истече́, обновля́ющая Завѣ́тъ и омыва́тельная грѣха́; вѣ́рныхъ бо Кре́стъ похвала́ и царе́й держа́ва и утвержде́ніе.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Прете́клъ еси́ тща́тельно, я́ко пчела́, цвѣтники́ слове́сныя, іера́рше, сла́дкій ме́дъ собира́я и въ серде́чныя со́ты влага́я.

Житіе́ чи́сто, сло́во же со́лію боже́ственною, Евме́ніе, устро́ивъ, показу́еши твою́, сла́вне, сокрове́нную и благода́ть, и свѣ́тлость.

Возвы́сился еси́, добродѣ́тельми украша́емь, и на высоча́йшія престо́лы возше́лъ еси́, мѵ́ромъ Боже́ственнаго Ду́ха пома́зався, и Христо́во благово́ніе познава́ешися.

Богоро́диченъ: Марíе, злата́я кади́льнице, страсте́й мои́хъ отжени́ злово́ніе и утверди́ коле́блема прило́ги льсти́ваго ратобо́рца.

Конда́къ [свята́го], гла́съ 2. Подо́бенъ: Вы́шнихъ ища́.

Свѣ́томъ Боже́ственнымъ просвѣти́вся, всеблаже́нне, просвѣща́еши ны́, любо́вію пою́щія твое́ честно́е и сла́вное и свято́е, о́тче, преставле́ніе, іера́рше Евме́ніе, моля́ непреста́нно о всѣ́хъ на́съ.

Сѣда́ленъ, гла́съ 5. Подо́бенъ: Собезнача́льное.

Правосла́вными сія́я, о́тче, уче́ньми, мра́чныя е́реси вся́ ума́лилъ еси́ и, чуде́съ самодѣ́латель показа́вся, Евме́ніе, преслову́щій по всему́ про́мысломъ Боже́ственнымъ бы́лъ еси́: тѣ́мъ тя́ вѣ́рою почита́емъ, я́ко іера́рха и а́нгеловъ равноче́стна.

Сла́ва, и ны́нѣ, подо́бенъ то́йже:

Кре́стъ претерпѣ́вый во́льнымъ совѣ́томъ, и отъ тли́ человѣ́ки свободи́лъ еси́, Спа́се: воспѣва́емъ, вѣ́рніи, и покланя́емся Тебѣ́, я́ко просвѣти́лъ еси́ ны́ си́лою Креста́, и вси́ Тя́ благослови́мъ, Человѣколю́бче и Ще́дрый, я́ко Жизнода́вца и Го́спода.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Горькоро́дныя преложи́ дре́вомъ Моисе́й исто́чники въ пусты́ни дре́вле, Кресто́мъ ко благоче́стію язы́ковъ проявля́я преложе́ніе.

Глубинѣ́ внѣ́дривый сѣку́щую издаде́ Іорда́нъ дре́ву, Кресто́мъ и креще́ніемъ сѣче́ніе ле́сти зна́менуя.

Свяще́нно ополча́ются четвероча́стніи лю́діе, предходя́ще о́бразомъ свидѣ́тельства ски́ніи, крестообра́зными чи́нми прославля́еми.

Чу́дно простира́емь, со́лнечныя лучи́ испуща́ше Кре́стъ, и повѣ́даша небеса́ сла́ву Бо́га на́шего.

Инъ.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

До́мъ бы́лъ еси́ Ду́ха, въ Боже́ственныхъ хра́мѣхъ упражня́яся, іера́рше, и честны́ми уче́ньми украша́яся.

Іера́рхъ богопрія́тенъ, о́тче му́дре, и предсѣда́тель Горти́нскій бы́въ, чуде́съ лучу́ изблиста́лъ еси́.

Зія́ніе вели́кое змíя твои́хъ моли́твъ поже́глъ еси́ луча́ми, на тя́ устреми́вшагося, свяще́ннѣйшій.

Богоро́диченъ: Свяще́нніи провозвѣсти́ша дре́вле гла́си Рождества́ Твоего́ глубину́, и́хже ны́нѣ сбытіе́ ви́дѣхомъ, Чи́стая.

Пѣ́снь 5.

Ирмо́съ: О, треблаже́нное Дре́во, на не́мже распя́ся Христо́съ, Ца́рь и Госпо́дь, и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Тебе́, приснопѣ́тое дре́во, на не́мже простре́ся Христо́съ, Еде́мъ храня́щее обраща́ющееся ору́жіе, Кре́сте, устыдѣ́ся: стра́шный же херуви́мъ уступи́, на тебѣ́ пригвожде́нному Христу́, подаю́щему ми́ръ душа́мъ на́шимъ.

Подзе́мныхъ си́лы проти́вныя Креста́ страша́тся начерта́ема зна́менія на возду́сѣ, по нему́же хо́дятъ небе́сныхъ и земноро́дныхъ ро́ди, колѣ́на преклоня́юще Христу́, подаю́щему ми́ръ душа́мъ на́шимъ.

Заря́ми нетлѣ́нными я́влься Боже́ственный Кре́стъ омраче́ннымъ язы́комъ, заблужде́ннымъ въ пре́лести, Боже́ственный свѣ́тъ облиста́въ, усвоя́етъ на не́мъ пригвожде́нному Христу́, подаю́щему ми́ръ душа́мъ на́шимъ.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Ра́зумъ имѣ́лъ еси́, я́ко умири́въ отъ страсте́й, преподо́бне, у́мъ и ду́шу: тѣ́мъ разруша́еши сва́ры вѣ́рно ца́рствующихъ и до́брѣ покаря́ющихся тебѣ́.

Слу́хи подложи́въ тебѣ́ царе́й, вѣ́рный разруши́ до́лгую вражду́, па́губу родя́щую, и бра́тское единоу́міе лю́битъ, богому́дре Евме́ніе.

Якоже свѣти́льникъ, прише́дъ, Ри́мъ просвѣща́еши, соверша́я чудеса́ и во глубинѣ́ страсте́й ныря́ющія ко приста́нищу ти́ху врачевства́, блаже́нне, я́вѣ призыва́я.

Богоро́диченъ: Юна я́ко младе́нца на́мъ, Превѣ́чнаго же Сы́на родила́ еси́, воли́тельными двѣма́ дѣ́йствы су́ща сугу́баго, я́ко Человѣ́ка ку́пно же и Бо́га, Всенепоро́чная.

Пѣ́снь 6.

Ирмо́съ: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ; тѣ́мъ, тридне́венъ изше́дъ, премíрное Воскресе́ніе прописа́ше, пло́тію пригвожде́ннаго Христа́ Бо́га, и тридне́внымъ Воскресе́ніемъ мíръ просвѣ́щшаго.

Ста́ростію преклони́вся и неду́гомъ отягче́нъ, испра́вися Іа́ковъ, ру́цѣ премѣни́въ, дѣ́йствіе явля́я жизноно́снаго Креста́: и́бо ве́тхость зако́ннаго сѣно́внаго писа́нія новописа́, на се́мъ пло́тію пригвозди́выйся Бо́гъ, и душегуби́тельный неду́гъ ле́сти отгна́.

На ю́ныя возложи́въ дла́ни боже́ственный Изра́иль, крестови́дно главы́ явля́ше, я́ко старѣ́йшая сла́ва, законослужи́тели лю́діе. Тѣ́мже, подмнѣ́вся та́ко испрельсти́тися, не измѣни́ жизноно́снаго о́браза: превзы́дутъ бо лю́діе Христо́вы Бо́жіи новоутвержде́нніи, вопія́ху, Кресто́мъ огражда́еми.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Дѣ́тельное сокро́вище неиждива́емое имѣ́я въ се́рдцы твое́мъ, Христа́, Евме́ніе, я́коже бре́ніе вмѣни́лъ еси́ зла́то, е́же ца́рь подаде́ тебѣ́.

На высо́цѣмъ сѣда́лищи сѣ́лъ еси́, о́тче, ми́ра глаго́лъ привѣща́въ Це́ркви свы́ше, я́же ны́нѣ призыва́ніемъ твои́мъ хва́лится.

Не омочи́вся грѣха́ми, преплы́лъ еси́ житія́ бу́рю многоболѣ́зненную и въ приста́нища дости́глъ еси́, идѣ́же собо́ръ преподо́бныхъ весели́тся.

Богоро́диченъ: На Тя́ сше́дъ, небе́сный До́ждь оляденѣ́вшую зе́млю, Приснодѣ́во, богозна́нія вода́ми напои́въ, многопло́дну показа́.

Конда́къ, гла́съ 4. Подо́бенъ:

Вознесы́йся на Кре́стъ во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю Благовѣ́рнаго Импера́тора на́шего [и́мярекъ], побѣ́ды дая́ Ему́ на сопоста́ты, посо́біе иму́щу Твое́, ору́жіе ми́ра непобѣди́мую побѣ́ду.

Икосъ:

Иже до тре́тіяго небесе́ восхище́нъ бы́сть въ ра́й, и глаго́лы слы́шавъ неизрече́нныя и боже́ственныя, и́хже не лѣ́ть язы́ки (человѣ́ческими) глаго́лати, что́ Гала́томъ пи́шетъ, я́ко рачи́теліе писа́ній прочто́сте и позна́сте: мнѣ́, глаго́летъ, хвали́тися да не бу́детъ, то́кмо во еди́номъ Крестѣ́ Госпо́дни, на не́мже страда́въ, уби́ стра́сти. Того́ у́бо и мы́ извѣ́стно да держи́мъ, Кре́стъ Госпо́день, хвалу́ вси́: е́сть бо на́мъ спаси́тельное сіе́ Дре́во, ору́жіе ми́ра, непобѣди́мая побѣ́да.

Пѣ́снь 7.

Ирмо́съ: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое; оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отцевъ и на́съ Бо́же, благослове́нъ еси́.

Отъ дре́ва вкуси́въ, пе́рвый въ человѣ́цѣхъ, въ тлѣ́ніе всели́ся: отверже́ніемъ бо жи́зни безче́стнѣйшимъ осуди́вся, всему́ ро́ду тѣлотлѣ́ненъ нѣ́кій яко вре́дъ неду́га преподаде́; но, обрѣ́тше, земноро́дніи, воззва́ніе кре́стнымъ дре́вомъ, зове́мъ: препѣ́тый отце́въ и на́съ Бо́же, благослове́нъ еси́.

Разруши́ повелѣ́ніе Бо́жіе преслуша́ніе, и дре́во принесе́ сме́рть человѣ́комъ, е́же неблаговре́менно прича́стно бы́вшее: во утвержде́ніе же зѣло́ честна́го. Отту́ду жи́зни дре́во возбраня́емо бѣ́, е́же разбо́йнику злоуме́ршу отве́рзе, благоразу́мно зову́щу: препѣ́тый отце́въ и на́съ Бо́же, благослове́нъ еси́.

Жезла́ объе́млетъ кра́й Іо́сифова, бу́дущая зря́, Изра́иль, ца́рствія держа́вное, я́ко возъиму́ществитъ пресла́вный Кре́стъ, проявля́я: се́й бо царе́й побѣдоно́сная похвала́, и свѣ́тъ вѣ́рою зову́щимъ: препѣ́тый отце́въ и на́съ Бо́же, благослове́нъ еси́.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Ме́ртвыхъ помысло́въ усе́рдіемъ души́ похваля́яся, во глубоча́йшей ста́рости, преподо́бне, стра́нствованія твори́лъ еси́ на благодѣя́ніе вѣ́рою пріе́млющихъ, Евме́ніе, тя́, сѣ́ятеля свяще́нныхъ и честны́хъ уче́ній.

Ри́мъ твои́хъ наслади́вся до́брыхъ, да́ръ люби́мый не хотя́ща, о́тче Евме́ніе, Ѳиваи́дѣ отсыла́етъ; идѣ́же бы́въ, востяга́еши сухоты́ посупле́ніе надожде́ніемъ честны́хъ моли́твъ твои́хъ, преподо́бне.

Сосцы́ воспита́вся воздержа́нія, чистоты́ млеко́ сса́лъ еси́ и во́зраста мѣ́ру дости́глъ еси́, вше́дъ на высоту́, о́тче, добродѣ́телей, и со́лнца возсія́въ свѣтлѣ́е богозна́меньми но́щію объя́тымъ страсте́й.

Богоро́диченъ: Невеще́ственнаго Свѣ́та селе́ніе Твое́ чре́во бы́сть, свѣтлостьми́ боже́ственнаго зна́нія безбо́жіе ума́лившаго, Пречи́стая Богоневѣ́сто Отрокови́це, Ейже, пою́ще, взыва́емъ: благослове́нъ Пло́дъ Твоего́ чре́ва.

Пѣ́снь 8.

Ирмо́съ: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Воздвиза́ему дре́ву, окропле́ну Кро́вію вопло́щшагося Сло́ва Бо́га, по́йте, небе́сныя си́лы; земны́хъ воззва́ніе пра́зднующе, лю́діе, поклони́теся Христо́ву Кресту́, и́мже мíру воста́ніе во вѣ́ки.

Земноро́дніи, дла́ньми, строи́теліе благода́ти, Кре́стъ, на не́мже стоя́ше Христо́съ Бо́гъ, возноси́те священнолѣ́пно и копіе́, Бо́жія Сло́ва Тѣ́ло пробо́дшее, да ви́дятъ язы́цы вси́ спасе́ніе Бо́жіе, сла́вяще Его́ во вѣ́ки.

Боже́ственнымъ судо́мъ предъизбра́нніи, весели́теся, христіа́нстіи вѣ́рніи ца́ріе, хвали́теся побѣдоно́снымъ ору́жіемъ, пріе́мше отъ Бо́га Кре́стъ честны́й: въ се́мъ бо колѣ́на бра́ней, де́рзости и́щуще, разсыпа́ются во вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Побѣди́въ врага́ и тече́ніе до́брое соверши́въ, въ глубоча́йшей ста́рости ко отце́мъ твои́мъ преше́лъ еси́, я́ко пшени́ца зрѣ́лая, на стра́ннѣй земли́ пріе́мь житія́ коне́цъ.

Ника́коже по́мняще твои́хъ, о́тче, до́брыхъ, дѣ́ти Ѳиваи́дстіи, оте́честву и па́ствѣ, свяще́нную твою́ ра́ку, лѣ́потно держа́щіи, предпосыла́ютъ, ея́же возвраще́ніемъ чуде́съ то́чатъ благода́ть.

Ра́ка, Кири́ллово честно́е и многострада́льное пре́жде содержа́ше тѣ́ло, и твое́ ны́нѣ скрыва́етъ преи́скренно, му́дре, совокупи́въ житіе́мъ единому́дренныя, и́хже го́рнее оте́чество имѣ́етъ во вѣ́ки.

Богоро́диченъ: Свяще́ннѣйшій проро́ковъ честны́й ли́къ Тя́ пропису́етъ киво́тъ и несѣко́мую го́ру, же́злъ и две́рь, е́юже, я́ко вѣ́сть, про́йде Вы́шній, па́ки заключе́ну оста́вивъ Тя́, Дѣ́во.

Пѣ́снь 9.

Ирмо́съ: Снѣ́дію дре́ва ро́ду прибы́вшая сме́рть Кресто́мъ упраздни́ся дне́сь, и́бо прама́терняя всеро́дная кля́тва разруши́ся Прозябе́ніемъ Чи́стыя Богома́тере, Юже вся́ си́лы небе́сныя велича́ютъ.

Го́рести убíйственныя, я́же отъ дре́ва, не оста́вивъ, Го́споди, Кресто́мъ бо сію́ соверше́нно истреби́лъ еси́. Сего́ ра́ди и дре́вомъ услади́ иногда́ го́ресть во́дъ Ме́рры: прообразу́ющее Креста́ дѣ́йство, е́же вся́ си́лы небе́сныя велича́ютъ.

Непреста́нно гружа́емыя мра́комъ пра́отца, Го́споди, Кресто́мъ возвы́силъ еси́ дне́сь. Яко бо ле́стію весьма́ неудержа́нно естество́ преднизведе́ся, всеро́днѣ ны́ па́ки испра́ви свѣ́тъ Креста́ Твоего́, его́же, вѣ́рніи, велича́емъ.

Да о́бразъ пока́жеши мíру покланя́емый, Го́споди, Креста́, во всѣ́хъ я́ко пресла́вный, на небесѣ́хъ изобрази́лъ еси́, свѣ́томъ безмѣ́рнымъ озаре́нъ, царю́ всеору́жіе непобѣди́мое. Тѣ́мъ Тя́ вся́ си́лы небе́сныя велича́ютъ.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Яко Христо́въ іера́рхъ, отъ си́лы, о́тче, въ си́лу преше́лъ еси́ чу́дно, идѣ́же ли́цы свяще́ннѣйшіи слу́жатъ во стра́сѣ Тро́ицѣ Честнѣ́й, со всѣ́ми небе́сными, всеблаже́нне Евме́ніе, си́лами.

Уста́ви ны́нѣшнюю бу́рю оте́чества, Божество́ твои́ми умилостивля́я моли́твами: ва́рварское, блаже́нне, нахожде́ніе низложи́, на́съ му́чащее, искуше́ніе, срѣ́ющее злы́хъ во глубину́ поги́бели, приснопа́мятне Евме́ніе.

Твоя́ всесвяще́нная па́мять созыва́етъ па́стыри преподо́бныя и лю́ди благочести́выя, освяще́ніе всѣ́мъ нося́щи: ю́же соверша́ющія, бога́тно озари́ ны сія́ньми, су́щими въ тебѣ́ благода́тьми, всехва́льне Евме́ніе.

Богоро́диченъ: Но́сиши Нося́щаго вся́ Боже́ственною си́лою и пита́еши, Всечи́стая, отъ сосе́цъ все́ дыха́ніе Пита́ющаго, па́че ума́ Твое́ чу́до удивля́етъ а́нгелы и человѣ́ки, при́сно Тя́ пою́щія и любо́вію блажа́щія.

Свѣти́ленъ:

Свѣтоза́рными сія́ніи, Кре́стъ Госпо́день на Воздви́женіе его́ всѣ́хъ жела́ніемъ Боже́ственнымъ, предлежа́, созыва́етъ: пріиди́те, сего́ вси́ ра́достію, и любо́вію, и стра́хомъ цѣлу́имъ вѣ́рно и просла́вимъ еди́наго Творца́ и Влады́ку.

Сла́ва, и ны́нѣ, то́йже:

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пѣ́сньми та́инственными* воспои́мъ согла́сно* Кре́стъ Госпо́день,* на не́мже Спа́съ распя́тся,* всѣ́хъ Воскресе́ніе.

Сти́хъ: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть.

Пріиди́те, мона́шествующихъ* мно́жества, соше́дшеся,* воспои́мъ боже́ственнѣ* живоно́сное дре́во,* на не́мже Христо́съ распростре́ся.

Сти́хъ: Бо́гъ же, Ца́рь на́шъ пре́жде вѣ́ка,* содѣ́ла спасе́ніе посредѣ́ земли́.

Просла́вимъ, вѣ́рніи,* Кре́стъ Госпо́день,* на не́мже излія́ся* кро́вь Влады́чня,* во всѣ́хъ избавле́ніе.

Сла́ва, и ны́нѣ, гла́съ 4:

Свѣтосія́ненъ звѣзда́ми о́бразъ предпоказа́, Кре́сте, побѣ́ду одолѣ́нія благочести́вому царю́ вели́кому, его́же ма́ти Еле́на изобрѣ́тши, міроявле́нна сотвори́, и тя́ дне́сь воздви́жуще, вѣ́рныхъ ли́цы, зове́мъ: просвѣти́ ны свѣ́тлостію твое́ю, Кре́сте живоно́сный, освяти́ ны крѣ́постію твое́ю, всечестны́й Кре́сте, и утверди́ ны воздви́женіемъ твои́мъ, воздвиза́емый ко ополче́нію враго́въ.


НА ЛИТУРГІИ,
Блаже́нна пра́здника, пѣ́сни 5-я и 6-я, на 6.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 172 об. – 179.

/ Къ оглавленію раздѣла /


Наверхъ / Къ титульной страницѣ

0