Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 17-й де́нь.
Святы́я му́ченицы Софíи и тре́хъ ея́ дще́рей: Вѣ́ры, Наде́жды и Любве́.

[ВЕЧЕРЪ,]
На Го́споди воззва́хъ: стихи́ры пра́здника, 3, гла́съ 1. Подо́бенъ: Небе́сныхъ чино́въ.

Кре́стъ возно́сится,* и де́мони прогоня́ются,* разбо́йникъ Еде́ма у́бо врата́ отверза́етъ,* сме́рть умерщвля́ется и ны́нѣ пуста́ яви́ся,* Христо́съ велича́ется.* Тѣ́мъ весели́теся, вси́ земноро́дніи,* кля́тва разруши́ся.

Пріиди́те, боголюби́віи вси́,* Кре́стъ честны́й возноси́мый ви́дяще,* возвели́чимъ ку́пно и сла́ву дади́мъ* еди́ному Изба́вителю и Бо́гу, взыва́юще:* Распны́йся на дре́вѣ кре́стнѣмъ,* не пре́зри моля́щихся на́съ.

Го́ресть дре́вле ослажда́я, Моисе́й* изба́ви Изра́иля, о́бразомъ Кре́стъ пропису́я;* мы́ же, сего́ вси́ боже́ственно, вѣ́рніи,* та́инственно вообража́юще въ сердца́хъ на́шихъ всегда́,* спаса́емся держа́вою его́.

Ины стихи́ры му́ченицъ, гла́съ 4. Подо́бенъ: Да́лъ еси́ зна́меніе.

Дѣ́вы отрокови́цы,* естества́ зако́номъ связу́емы* и я́вѣ укрѣпля́емы любо́вію Созда́теля,* у́зу пре́лести разруши́ша вѣ́рою,* и некрѣ́пкаго врага́,* вмужи́вшеся, нога́ми сотро́ша,* и побѣ́ды вѣнце́мъ* свѣтови́дно украси́шася,* и въ невѣ́стникъ всели́шася у́мный, ра́дующеся.

Вѣ́ра всехва́льная,* и Любо́вь сла́вная,* и Наде́жда богому́драя,* добродѣ́телей тезоимени́тыя* свѣтлѣ́йшихъ показа́вшеся,* страда́льчески лука́ваго низложи́ша,* прама́терь кова́рно прельсти́вшаго,* рая́ селе́ніе, обожи́вшеся, прія́ша,* о всѣ́хъ моля́щеся.

О огни́ неради́ша,* и о многообра́зныхъ му́кахъ,* и о сме́рти, всечестны́я:* Жениха́ бо добро́ту* краснѣ́йшаго вѣ́рою и́щуще,* разли́чными ра́нами украси́вшеся,* Тому́ счета́шася Софíины о́трасли,* Вѣ́ра, Наде́жда и Любо́вь же:* и́хже ра́ди, Го́споди, отъ лю́тыхъ свободи́ ны.

Сла́ва, и ны́нѣ, пра́здника, гла́съ 1. Самогла́сенъ:

Насажде́нное въ Кра́ніевѣ мѣ́стѣ Дре́во су́щаго живота́, на не́мже содѣ́ла спасе́ніе Превѣ́чный Ца́рь посредѣ́ земли́, возноси́мо дне́сь, освяща́етъ мíра концы́, и обновля́ется воскресе́нія до́мъ. Ра́дуются а́нгели на небеси́, и веселя́тся человѣ́цы на земли́, Дави́дски вопію́ще и глаго́люще: возноси́те Го́спода Бо́га на́шего и покланя́йтеся подно́жію но́гъ Его́, я́ко свя́то е́сть, подая́й мíру ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Водо́ю боготво́рною* и кро́вію Твое́ю, Сло́ве,* свѣ́тло Це́рковь украша́ется,* я́ко невѣ́ста,* Креста́ сла́ву пою́щи.

Сти́хъ: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть.

Копіе́ со кресто́мъ,* гво́зди и ина́я,* и́миже живоно́сное* Христо́во пригвозди́ся Тѣ́ло,* вознося́ще, поклони́мся.

Сти́хъ: Бо́гъ же, Ца́рь на́шъ пре́жде вѣ́ка,* содѣ́ла спасе́ніе посредѣ́ земли́.

Егда́ Амали́ка* Моисе́й побѣжда́ше,* на высоту́ ру́цѣ имѣ́я* крестоявле́нно,* образова́ше Христо́ву Стра́сть пречи́стую.

Сла́ва, и ны́нѣ, гла́съ 1:

Прообразу́я Кре́стъ Тво́й, Христе́, патріа́рхъ Іа́ковъ, внуко́мъ благослове́ніе да́руя, на глава́хъ премѣне́ны ру́ки сотвори́. Его́же, Спа́се, мы́ дне́сь вознося́ще, взыва́емъ: да́руй Христолюби́вому Импера́тору побѣ́ды, я́ко Константи́ну одолѣ́ніе.

Тропа́рь пра́здника, [гла́съ 1]:

Спаси́, Го́споди, лю́ди Твоя́ [и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство].


НА УТРЕНИ,
[На Бо́гъ Госпо́дь: тропа́рь три́жды.]

По 1-мъ стихосло́віи сѣда́ленъ, гла́съ 2. Подо́бенъ: Благоутро́бія су́щи.

Распе́ншуся Тебѣ́, Влады́ко Христе́, сме́рти держа́ва и крѣ́пость разруши́ся, и мучи́тельство попра́но бы́сть все́ вра́жіе, и оживле́ни бы́хомъ, дре́вле уме́ршіи дре́вомъ преступле́нія, дре́вомъ кре́стнымъ. Тѣ́мъ пое́мъ Стра́сти Твоя́.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Въ тебѣ́, треблаже́нне и жизнода́вче Кре́сте, лю́діе учрежда́ющеся, спра́зднуютъ съ невеще́ственными ли́ки, чи́ни архіере́йстіи благоговѣ́йно воспѣва́ютъ, мно́жество же мона́шествующихъ и по́стниковъ покланя́ются, Христа́ же распе́ншагося вси́ сла́вимъ.

Сла́ва, и ны́нѣ, то́йже.

Кано́нъ пра́здника со ирмосо́мъ на 8 и святы́хъ на 4.

Кано́нъ пра́здника, гла́съ 8.
Пѣ́снь 1.

Ирмо́съ: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшеходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Образъ дре́вле Моисе́й пречи́стыя Стра́сти въ себѣ́ само́мъ прообрази́, свяще́нныхъ средѣ́ стоя́: Кре́стъ же вообрази́въ, просте́ртыми побѣ́ду дла́ньми воздви́же, держа́ву погуби́въ Амали́ка всегуби́теля. Тѣ́мъ Христу́ пои́мъ, Бо́гу на́шему, я́ко просла́вися.

Возложи́ Моисе́й на столпѣ́ врачевство́, тлетвори́ваго избавле́ніе и ядови́таго угрызе́нія, и дре́ву о́бразомъ Креста́ по земли́ пресмыка́ющагося змíя привяза́, лука́вный въ се́мъ обличи́въ вре́дъ. Тѣ́мъ Христу́ пои́мъ, Бо́гу на́шему, я́ко просла́вися.

Показа́ не́бо Креста́ побѣ́ду благоче́стія держа́телю и царю́ богому́дру, враго́въ въ не́мже злосе́рдныхъ низложи́ся свирѣ́пство, ле́сть же преврати́ся, и вѣ́ра распростре́ся земны́мъ конце́мъ Боже́ственная. Тѣ́мъ Христу́ пои́мъ, Бо́гу на́шему, я́ко просла́вися.

Инъ кано́нъ, му́ченицъ, его́же краегране́сіе: Софíина зѣлоявле́нная и свѣ́тлая ча́да пою́. Ѳеофа́ново. Гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Премíрныя Твоея́, Христе́, и несказа́нныя прему́дрости осія́ніе да́руй мнѣ́, Влады́ко, благолѣ́пныя и благосла́вныя Твоея́ му́ченицы, я́ко да воспою́ Софíина прозябе́нія.

Нарица́ніе Твое́ я́вѣ жи́тельствомъ, богому́драя, украси́ся: всю́ бо проводи́ла еси́ жи́знь твою́ прему́дрости жела́ніемъ, сла́вная Софíе, му́дрости осія́вшися благода́тію.

Тво́й всеблаже́нный пло́дъ, Пребоже́ственныя Тро́ицы коли́чествомъ украша́емь, страда́льчески за Ону подвиза́ся, всему́драя Софíе, Прему́дрости Боже́ственныя тезоимени́тая.

Тѣ́ло и ду́шу добродѣ́тельми очи́стивше, дѣ́вы отрокови́цы три́ Тебѣ́ приведо́шася му́ченически, у́мному Жениху́ Христу́, Вѣ́ра съ Наде́ждею и Любо́вь сла́вная.

Богоро́диченъ: Весь зра́къ мо́й пріи́мъ, Иже во зра́цѣ Бо́жіи пре́жде зри́мь, всего́ обнови́, въ Твое́мъ чре́вѣ боголѣ́пно всели́вся, Пречи́стая. Тѣ́мже Богоро́дицу, вѣ́рніи, Тя́ вси́ сла́вимъ.

Пѣ́снь 3.

Ирмо́съ: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника; неплодя́щей же пре́жде Це́ркви, ны́нѣ процвѣте́ Дре́во Креста́, въ держа́ву и утвержде́ніе.

Яко испусти́, ударя́емь, во́ду краесѣко́мый, непокори́вымъ лю́демъ и жестосе́рдымъ, богозва́нныя проявля́ше Це́ркве та́инство, ея́же Кре́стъ держа́ва и утвержде́ніе.

Ре́бромъ пречи́стымъ, копіе́мъ прободе́ннымъ, вода́ съ Кро́вію истече́, обновля́ющая Завѣ́тъ и омыва́тельная грѣха́; вѣ́рныхъ бо Кре́стъ похвала́ и царе́й держа́ва и утвержде́ніе.

Инъ.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Гла́са послу́шавше Христо́ва, зову́ща къ безсме́ртнѣй и безстра́стнѣй жи́зни, послѣ́доваша вѣнцено́сицы дѣ́вы и му́ченицы, е́же вопи́ти Тебѣ́, Святы́й: хра́ме одушевле́нный пречи́стыя сла́вы Твоея́, Человѣколю́бче.

Крѣ́пость дарова́ Христо́съ стоя́щимъ предъ суди́щемъ му́ченически ва́мъ, я́ко обѣща́ся, и богодохнове́нныя му́дрости испо́лни, и свѣ́тлы показа́ побѣдоно́сныя му́ченицы, дѣ́вства сія́юща благода́тію.

Притупи́сте у́мъ вра́жій, дѣ́вы, великохва́льный и того́ горды́ню низложи́сте, великому́дренно подви́гшеся, и пре́жде хва́лящагося истреби́ти мо́ре, тече́ньми крове́й потопи́сте.

Му́дрости вы́шнія Христо́вы бога́тно насы́тившеся, избра́нныя му́дрости и благоу́мныя, дще́ри три́ посрами́ша му́чащихъ свирѣ́пства и неи́стовство неде́ржное, витíйствующе Боже́ственная уче́нія.

Богоро́диченъ: Святы́хъ Свята́го Христа́ свя́то породила́ еси́, cвяты́ни свято́е селе́ніе, во святы́хъ почива́ющаго, Ему́же вопіе́мъ: свя́тъ хра́мъ одушевле́нный неизрече́нныя сла́вы Твоея́, Человѣколю́бче.

Конда́къ святы́хъ, гла́съ 1. Подо́бенъ: Гро́бъ Тво́й, Спа́се.

Софíи честны́я свяще́ннѣйшія вѣ́тви Вѣ́ра и Наде́жда и Любо́вь показа́вшеся, му́дрость обуи́ша е́ллинскую благода́тію, и пострада́вше, и побѣдоно́сицы яви́вшеся, вѣнце́мъ нетлѣ́ннымъ отъ всѣ́хъ Влады́ки Христа́ увязо́шася.

Сѣда́ленъ, гла́съ 1. Подо́бенъ: Ли́къ а́нгельскій.

Агницы слове́сныя Агнца и Па́стыря, огню́ и лю́тымъ му́камъ пре́дани бы́сте и яви́стеся а́нгеломъ равноче́стни. Тѣ́мъ вси́ свяще́нную ва́шу па́мять пра́зднуемъ въ весе́ліи се́рдца, дѣ́вы богому́дрыя.

Сла́ва, и ны́нѣ, пра́здника, подо́бенъ то́йже:

Ору́жіе Креста́ во бране́хъ показа́ся нѣ́когда благочести́вому царю́ Константи́ну, непобѣди́мая побѣ́да на враги́, вѣ́ры ра́ди. Сего́ трепе́щутъ проти́вныя си́лы, сіе́ бы́сть и вѣ́рныхъ спасе́ніе, и Па́влова хвала́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Горькоро́дныя преложи́ дре́вомъ Моисе́й исто́чники въ пусты́ни дре́вле, Кресто́мъ ко благоче́стію язы́ковъ проявля́я преложе́ніе.

Глубинѣ́ внѣ́дривый сѣку́щую издаде́ Іорда́нъ дре́ву, Кресто́мъ и креще́ніемъ сѣче́ніе ле́сти зна́менуя.

Свяще́нно ополча́ются четвероча́стніи лю́діе, предходя́ще о́бразомъ свидѣ́тельства ски́ніи, крестообра́зными чи́нми прославля́еми.

Чу́дно простира́емь, со́лнечныя лучи́ испуща́ше Кре́стъ, и повѣ́даша небеса́ сла́ву Бо́га на́шего.

Инъ.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Укрѣ́пльшеся Боже́ственною благода́тію, добропобѣ́дныя, Вѣ́ра, Любо́вь и Наде́жда мучи́телей преще́нія му́жественно посрами́ша, огне́мъ всесожега́емы, всему́дрыя, и Жениху́ Христу́ приводи́мы.

Возмого́ша, Креста́ всеору́жіемъ огради́вшеся, Вѣ́ра, Любо́вь и Наде́жда муче́ній благомо́щно ра́ны стерпѣ́ти, святы́я, да́же до кро́вей крѣпча́йше ко грѣху́ проти́вльшеся.

Свѣщи́ тричи́сленныя му́дрости сія́ющія, Вѣ́ра, Любо́вь и Наде́жда, Тро́ицы просвѣще́ньми я́вѣ блиста́ющіяся, пресвѣ́тло Це́ркви просвѣща́ютъ, ко спасе́нію на́шему и защище́нію.

Богоро́диченъ: Святы́хъ Свята́я Богоро́дице Всепѣ́тая, ожида́ніе язы́ковъ и спасе́ніе вѣ́рныхъ, изъ Тебе́ возсія́ Изба́витель и Жизнода́вецъ и Госпо́дь, во спасе́ніе на́съ, пою́щихъ Тя́.

Пѣ́снь 5.

Ирмо́съ: О, треблаже́нное Дре́во, на не́мже распя́ся Христо́съ, Ца́рь и Госпо́дь, и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Тебе́, приснопѣ́тое дре́во, на не́мже простре́ся Христо́съ, Еде́мъ храня́щее обраща́ющееся ору́жіе, Кре́сте, устыдѣ́ся: стра́шный же херуви́мъ уступи́, на тебѣ́ пригвожде́нному Христу́, подаю́щему ми́ръ душа́мъ на́шимъ.

Подзе́мныхъ си́лы проти́вныя Креста́ страша́тся начерта́ема зна́менія на возду́сѣ, по нему́же хо́дятъ небе́сныхъ и земноро́дныхъ ро́ди, колѣ́на преклоня́юще Христу́, подаю́щему ми́ръ душа́мъ на́шимъ.

Заря́ми нетлѣ́нными я́влься Боже́ственный Кре́стъ омраче́ннымъ язы́комъ, заблужде́ннымъ въ пре́лести, Боже́ственный свѣ́тъ облиста́въ, усвоя́етъ на не́мъ пригвожде́нному Христу́, подаю́щему ми́ръ душа́мъ на́шимъ.

Инъ.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Терпѣ́ніемъ мудрова́ній му́ки подъе́мляху, и му́дрости, су́щія въ Бо́зѣ, глаго́люще та́йны, держа́щаго посрами́ша три́ дѣ́вы богоно́сныя, вѣ́рою и естество́мъ связу́еми.

Ра́дуется прама́ти, ви́дящи побѣжда́ема льсти́ваго, изъ Еде́ма дре́вле изгна́вшаго сію́, жена́ми богому́дрыми, Наде́ждею, Вѣ́рою и Любо́вію, Софíи рожде́ньми.

Ядови́таго мучи́телева ласка́нія избѣго́ша и муче́ній я́звы во́льнѣ претерпѣ́ша честны́я отрокови́цы, Tвое́ю любо́вію уя́звльшеся, Христе́, и Боже́ственнымъ Твои́мъ раче́ніемъ.

Богоро́диченъ: Веселя́тся небе́сныя си́лы, ви́дяще Тя́, ра́дуются съ ни́ми человѣ́ковъ состоя́нія: Рождество́мъ бо соедини́шася Твои́мъ, Дѣ́во Богоро́дице, Его́же досто́йно сла́вимъ.

Пѣ́снь 6.

Ирмо́съ: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ; тѣ́мъ, тридне́венъ изше́дъ, премíрное Воскресе́ніе прописа́ше, пло́тію пригвожде́ннаго Христа́ Бо́га, и тридне́внымъ Воскресе́ніемъ мíръ просвѣ́щшаго.

Ста́ростію преклони́вся и неду́гомъ отягче́нъ, испра́вися Іа́ковъ, ру́цѣ премѣни́въ, дѣ́йствіе явля́я жизноно́снаго Креста́: и́бо ве́тхость зако́ннаго сѣно́внаго писа́нія новописа́, на се́мъ пло́тію пригвозди́выйся Бо́гъ, и душегуби́тельный неду́гъ ле́сти отгна́.

На ю́ныя возложи́въ дла́ни боже́ственный Изра́иль, крестови́дно главы́ явля́ше, я́ко старѣ́йшая сла́ва, законослужи́тели лю́діе. Тѣ́мже, подмнѣ́вся та́ко испрельсти́тися, не измѣни́ жизноно́снаго о́браза: превзы́дутъ бо лю́діе Христо́вы Бо́жіи новоутвержде́нніи, вопія́ху, Кресто́мъ огражда́еми.

Инъ.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Ра́дующеся, во Твои́, Влады́ко, пречи́стыя дла́ни возложи́ша наде́жды отрокови́цы три́, Тро́ицы коли́чествомъ и число́мъ почте́нныя и похваля́емыя.

Свѣтя́щеся дѣ́вства добро́тами, му́ченическими увязе́ньми украси́шася, и вѣне́цъ сугу́бъ свы́ше досто́йнѣ прія́ша отъ Христа́, Жизнода́вца и Всеще́драго.

Приведо́шася, Влады́ко, въ хра́мъ Тво́й, всѣ́хъ ца́рствующаго, дѣ́вственная сокро́вища честна́я пріобщи́тися Ца́рствію Твоему́: Ты́ бо тѣ́хъ и Свѣ́тъ еси́, и весе́ліе.

Богоро́диченъ: Ра́дуются о Тебѣ́, Дѣ́во Пречи́стая, ро́да на́шего пра́отцы, Еде́мъ воспріе́мше Тобо́ю, его́же преступле́ніемъ погуби́ша: Ты́ бо Чиста́ и пре́жде рождества́, и по рождествѣ́ еси́.

Конда́къ, гла́съ 4. Подо́бенъ:

Вознесы́йся на Кре́стъ во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю Благовѣ́рнаго Импера́тора на́шего [и́мярекъ], побѣ́ды дая́ Ему́ на сопоста́ты, посо́біе иму́щу Твое́, ору́жіе ми́ра непобѣди́мую побѣ́ду.

Икосъ:

Иже до тре́тіяго небесе́ восхище́нъ бы́сть въ ра́й, и глаго́лы слы́шавъ неизрече́нныя и боже́ственныя, и́хже не лѣ́ть язы́ки (человѣ́ческими) глаго́лати, что́ Гала́томъ пи́шетъ, я́ко рачи́теліе писа́ній прочто́сте и позна́сте: мнѣ́, глаго́летъ, хвали́тися да не бу́детъ, то́кмо во еди́номъ Крестѣ́ Госпо́дни, на не́мже страда́въ, уби́ стра́сти. Того́ у́бо и мы́ извѣ́стно да держи́мъ, Кре́стъ Госпо́день, хвалу́ вси́: е́сть бо на́мъ спаси́тельное сіе́ Дре́во, ору́жіе ми́ра, непобѣди́мая побѣ́да.

Пѣ́снь 7.

Ирмо́съ: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое; оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отцевъ и на́съ Бо́же, благослове́нъ еси́.

Отъ дре́ва вкуси́въ, пе́рвый въ человѣ́цѣхъ, въ тлѣ́ніе всели́ся: отверже́ніемъ бо жи́зни безче́стнѣйшимъ осуди́вся, всему́ ро́ду тѣлотлѣ́ненъ нѣ́кій яко вре́дъ неду́га преподаде́; но, обрѣ́тше, земноро́дніи, воззва́ніе кре́стнымъ дре́вомъ, зове́мъ: препѣ́тый отце́въ и на́съ Бо́же, благослове́нъ еси́.

Разруши́ повелѣ́ніе Бо́жіе преслуша́ніе, и дре́во принесе́ сме́рть человѣ́комъ, е́же неблаговре́менно прича́стно бы́вшее: во утвержде́ніе же зѣло́ честна́го. Отту́ду жи́зни дре́во возбраня́емо бѣ́, е́же разбо́йнику злоуме́ршу отве́рзе, благоразу́мно зову́щу: препѣ́тый отце́въ и на́съ Бо́же, благослове́нъ еси́.

Жезла́ объе́млетъ кра́й Іо́сифова, бу́дущая зря́, Изра́иль, ца́рствія держа́вное, я́ко возъиму́ществитъ пресла́вный Кре́стъ, проявля́я: се́й бо царе́й побѣдоно́сная похвала́, и свѣ́тъ вѣ́рою зову́щимъ: препѣ́тый отце́въ и на́съ Бо́же, благослове́нъ еси́.

Инъ.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Трисія́нною еди́нства благода́тію озаря́еми я́вѣ, дѣ́вы де́монское разруши́ша тмонеи́стовство, Cвѣ́тъ Тріѵпоста́сный богосло́вяще и пою́ще: хва́льный отце́въ Бо́гъ и препросла́вленъ.

На небесѣ́хъ черто́ги иму́ще, свѣщено́сныя ду́ши, со а́нгелы ве́село ны́нѣ ликовству́ете, сла́ву присносу́щную зря́ще и глаго́люще: хва́льный отце́въ Бо́гъ и препросла́вленъ.

Терпѣли́во, я́ко о́троцы, противле́ніе показа́вше, о́гнь попра́ша му́жественно: тѣ́хъ бо равночи́сленніи ра́зумъ равноста́тный богоно́сныя стяжа́шa, хва́льнаго отце́въ при́сно Бо́га и препросла́вленнаго.

Богоро́диченъ: Дае́ши, Чи́стая, оставле́ніе прегрѣше́ній воспѣва́ющимъ Тя́ вѣ́рно, избавля́ющи напа́стей и вся́каго обстоя́нія: Тя́ бо ны́нѣ стяжа́хомъ прибѣ́жище, Богоневѣ́стная, я́ко xва́льнаго отце́въ Бо́га рука́ми носи́вшая.

Пѣ́снь 8.

Ирмо́съ: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Воздвиза́ему дре́ву, окропле́ну Кро́вію вопло́щшагося Сло́ва Бо́га, по́йте, небе́сныя си́лы; земны́хъ воззва́ніе пра́зднующе, лю́діе, поклони́теся Христо́ву Кресту́, и́мже мíру воста́ніе во вѣ́ки.

Земноро́дніи, дла́ньми, строи́теліе благода́ти, Кре́стъ, на не́мже стоя́ше Христо́съ Бо́гъ, возноси́те священнолѣ́пно и копіе́, Бо́жія Сло́ва Тѣ́ло пробо́дшее, да ви́дятъ язы́цы вси́ спасе́ніе Бо́жіе, сла́вяще Его́ во вѣ́ки.

Боже́ственнымъ судо́мъ предъизбра́нніи, весели́теся, христіа́нстіи вѣ́рніи ца́ріе, хвали́теся побѣдоно́снымъ ору́жіемъ, пріе́мше отъ Бо́га Кре́стъ честны́й: въ се́мъ бо колѣ́на бра́ней, де́рзости и́щуще, разсыпа́ются во вѣ́ки.

Инъ.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Дѣ́вы богосвѣ́тлыя, Вѣ́ра, Наде́жда, Любо́вь, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Сія́ющія и свѣтови́дныя муче́ніемъ проявле́нно бы́вшія дѣ́вы, вѣ́рніи, воспои́мъ, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Враче́вствъ струю́ оби́льно, дово́льно и бога́тно ра́ки страстоте́рпицъ источа́ютъ при́сно, вѣ́рою зову́щимъ: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Богоро́диченъ: Земля́ свята́я была́ еси́, Чи́стая, жизноно́сный Кла́съ ро́ждшая, присносу́щныя жи́зни Хода́тая, Христа́, Ему́же вси́ зове́мъ: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Пѣ́снь 9.

Ирмо́съ: Та́инъ еси́, Богоро́дице, ра́й, невоздѣ́ланно возрасти́вшій Христа́, Имже кре́стное живоно́сное на земли́ насади́ся Дре́во. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Да возра́дуются древа́ дубра́вная вся́, освяти́вшуся естеству́ и́хъ, отъ Него́же изнача́ла насади́шася, Христу́ распросте́ршуся на Дре́вѣ. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Свяще́нный воста́ ро́гъ и глава́ всѣ́мъ богому́дрымъ — Кре́стъ, и́мже грѣ́шныхъ мы́сленно стира́ются ро́ги вси́; тѣ́мъ, ны́нѣ возноси́му, покланя́ющеся ему́, Тя́ велича́емъ.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Свѣ́томъ Трисія́ннымъ исполня́еми и сія́нія Боже́ственнаго ны́нѣ насыща́ющеся, купноиме́нныя добродѣ́телей и тождеиме́нныя Любве́, Наде́жди и Вѣ́ры, наде́ждею и любо́вію ны́ и вѣ́рою утверди́те.

Да вы́шняя Kрѣ́пость ны́нѣ укроти́тъ обдержа́щую бу́рю е́реси, о страстоте́рпицы непобѣди́міи, и пода́стъ вѣ́рнымъ единоу́міе, проси́те, мо́лимъ непреста́нно, добродѣ́вы.

Но́щь житія́, всему́дрыя, преше́дше, де́нь постиго́сте невече́рній, му́ченически веселя́щеся и дѣ́вственно хва́лящecя благода́тію, и Боже́ственнаго Ца́рствія нетлѣ́ннаго сподобля́еми.

Богоро́диченъ: О, ка́ко Дѣ́ва роди́ присносу́щее Сло́во и Ѵпоста́сное, Сія́ніе Отчія Ѵпоста́си, на́шего Благодѣ́теля и Го́спода, изъ Нея́ вопло́щшася, Его́же досто́йно велича́емъ.

Свѣти́ленъ:

Кре́стъ — храни́тель всея́ вселе́нныя, Кре́стъ — красота́ Це́ркве, Кре́стъ — царе́й держа́ва, Кре́стъ — вѣ́рныхъ утвержде́ніе, Кре́стъ — а́нгеловъ сла́ва и де́моновъ я́зва.

Сла́ва, и ны́нѣ, то́йже.

На стихо́внѣ стихи́ры, гла́съ 6. Подо́бенъ: Тридне́венъ.

Идѣ́же стоя́ша но́ги Христо́вы,* мѣ́сту покланя́емся,* вознося́ще треблаже́нный Кре́стъ,* на не́мже источи́ся* кро́вь Влады́чня,* источи́вшаго мíру Воскресе́ніе.

Сти́хъ: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть.

Умертви́вше стра́сти пло́ти* и ду́ха, богому́дріи,* потщи́мся возвы́ситися отъ земны́хъ* въ небе́сный поко́й,* Креста́ воздви́женіемъ,* сраспе́ншеся Влады́цѣ Христу́.

Сти́хъ: Бо́гъ же, Ца́рь на́шъ пре́жде вѣ́ка,* содѣ́ла спасе́ніе посредѣ́ земли́.

Животеку́щій изъ Боже́ственныхъ ре́бръ* исто́чникъ я́вѣ искипѣ́ Спа́совыхъ,* напая́ющь ду́ши* вѣ́рою покланя́ющихся* Боже́ственнымъ Его́ Страсте́мъ,* и Кресту́, и Воскресе́нію.

Сла́ва, и ны́нѣ, гла́съ 2:

Пріиди́те, вси́ язы́цы, благослове́нному дре́ву поклони́мся, и́мже бы́сть вѣ́чная пра́вда: пра́отца бо Ада́ма прельсти́вый дре́вомъ, Кресто́мъ прельща́ется, и па́даетъ низве́рженъ паде́ніемъ стра́ннымъ, мучи́тельствомъ одержа́вый ца́рское зда́ніе; Кро́вію Бо́жіею я́дъ зміе́въ отмыва́ется, и кля́тва разруши́ся осужде́нія пра́веднаго, непра́веднымъ судо́мъ Пра́веднику осужде́ну бы́вшу; Дре́вомъ бо подоба́ше дре́во исцѣли́ти и Стра́стію Безстра́стнаго, я́же на Дре́вѣ, разрѣши́ти стра́сти осужде́ннаго. Но сла́ва, Христе́ Царю́, е́же о на́съ Твоему́ му́дрому смотре́нію, и́мже спа́слъ еси́ всѣ́хъ, я́ко Бла́гъ и Человѣколю́бецъ.


НА ЛИТУРГІИ,
Блаже́нна пра́здника, пѣ́снь 4-я, на 6.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 165 об. – 172 об.

/ Къ оглавленію раздѣла /


Наверхъ / Къ титульной страницѣ

0