Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 16-й де́нь.
Святы́я великому́ченицы Евфи́міи Всехва́льныя.

[ВЕЧЕРЪ,
На Го́споди воззва́хъ:] стихи́ры пра́здника, гла́съ 4. Подо́бенъ: Да́лъ еси́ зна́меніе.

Дне́сь возсія́ свѣтови́дно, я́коже со́лнце,* Кре́стъ Тво́й честны́й, Христе́,* утвержда́емый на Кра́ніевѣ мѣ́стѣ пресла́внѣмъ* и возвыша́емый, Спа́се,* на горѣ́ Твое́й пресвятѣ́й,* показу́я явле́ннѣйше,* я́ко тѣ́мъ, Всеси́льне,* на́ше естество́ возвы́силъ еси́ на небеса́,* я́ко Человѣколю́бецъ.

Возвѣсти́ша дне́сь небеса́, Непостижи́ме,* человѣ́комъ сла́ву Твою́,* свѣ́тло бо изоблиста́въ Креста́ о́бразъ* свѣ́томъ непристу́пнымъ,* неи́стовный и жесто́кій* богоубíйцъ нра́въ обличи́.* Тѣ́мъ Твое́ человѣколю́бное строе́ніе сла́вимъ,* Іису́се всеси́льне,* Спа́се ду́шъ на́шихъ.

Просте́ртіемъ ру́къ свои́хъ* Моисе́й побѣди́ Амали́ка,* о́бразъ зна́менуя кре́стный пре́жде;* мы́ же, дре́ву Креста́ покланя́ющеся ны́нѣ,* попира́емъ вра́жія ко́зни и кова́рства,* Христа́ побо́рника иму́ще,* на то́мъ возвы́шеннаго пло́тію,* и змíя умертви́вшаго,* и человѣ́ка спа́сшаго.

Ины стихи́ры, святы́я, гла́съ то́йже. Подо́бенъ: Яко до́бля.

Дѣ́вства добро́тами* и муче́ній кровьми́* ду́шу твою́ украси́вши, му́ченице сла́вная,* вручи́лася еси́ Созда́вшему,* сохраня́ющу тя́ нетлѣ́нну во вѣ́къ и́стинно,* о се́мъ ликовству́ющи* съ во́инствы арха́нгелъ и а́нгелъ,* апо́столъ, проро́къ и му́ченикъ ликостоя́ніи,* всехва́льная.

И къ коле́самъ привяза́ема,* и звѣрьми́ растерза́ема,* и огне́мъ и водо́ю* обостри́вши тво́й по́мыслъ Боже́ственнымъ Ду́хомъ,* тмы́ нача́льника тече́ніи кро́вными* му́жески удави́ла еси́* и востекла́ еси́ къ разу́мнымъ черто́гомъ,* вѣ́но Жениху́ твоему́, дѣ́во,* прине́сши страда́ніе.

И уме́рши жива́ при́сно,* крове́й проли́тія* въ Госпо́дню хвалу́, му́ченице, источи́ла еси́,* вѣ́рныя у́бо напая́ющи* и зна́ніемъ просвѣща́ющи,* невѣ́рныя же враги́ въ тѣ́хъ потопля́ющи.* Тѣ́мже сви́токъ тебѣ́ ввѣря́ется Боже́ственный,* его́же храни́ши и держи́ши во вѣ́ки,* церко́вныхъ догма́товъ.

Сла́ва, гла́съ 6:

Процвѣ́тшая добродѣ́тельми и просвѣще́нная по́мысломъ, мѵ́ро пролива́ющи въ сердца́ вѣ́рныхъ, я́же отъ восто́къ возсія́вши, я́ко звѣзда́ свѣ́тлая, и собра́ніе сотво́рши, Свята́го Ду́ха наше́ствіемъ, боже́ственныхъ оте́цъ, не преста́й о на́съ моля́щися ко Го́споду, Евфи́міе всесла́вная, спасти́ся душа́мъ на́шимъ.

И ны́нѣ, Креста́, гла́съ то́йже:

Четвероконе́чный мíръ дне́сь освяща́ется, четвероча́стному воздвиза́ему Твоему́ Кресту́, Христе́ Бо́же на́шъ, и ро́гъ Вѣ́рнаго совозно́сится Импера́тора на́шего; тѣ́мъ враго́въ сокруша́емъ ро́ги. Ве́лій еси́, Го́споди, и ди́венъ въ дѣ́лѣхъ Твои́хъ, сла́ва Тебѣ́.

На стихо́внѣ стихи́ры, гла́съ 6. Подо́бенъ: Тридне́венъ.

Идѣ́же стоя́ша но́ги Христо́вы,* мѣ́сту покланя́емся,* вознося́ще треблаже́нный Кре́стъ,* на не́мже источи́ся* кро́вь Влады́чня,* источи́вшаго мíру Воскресе́ніе.

Сти́хъ: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть.

Умертви́вше стра́сти пло́ти* и ду́ха, богому́дріи,* потщи́мся возвы́ситися отъ земны́хъ* въ небе́сный поко́й,* Креста́ воздви́женіемъ,* сраспе́ншеся Влады́цѣ Христу́.

Сти́хъ: Бо́гъ же, Ца́рь на́шъ пре́жде вѣ́ка,* содѣ́ла спасе́ніе посредѣ́ земли́.

Животеку́щій изъ Боже́ственныхъ ре́бръ* исто́чникъ я́вѣ искипѣ́ Спа́совыхъ,* напая́ющь ду́ши* вѣ́рою покланя́ющихся* Боже́ственнымъ Его́ Страсте́мъ,* и Кресту́, и Воскресе́нію.

Сла́ва, святы́я, гла́съ 8. Византíево:

Вся́къ язы́къ да подви́жится къ благохвале́нію всехва́льныя Евфи́міи, вся́къ ро́дъ и во́зрастъ вся́къ, ю́ноши и дѣ́вы, Христо́ву дѣвому́ченицу похвала́ми да увѣнча́имъ: зако́нно бо вмужи́вшися и не́мощь же́нску отве́ргши, страда́льческими болѣ́зньми мучи́теля врага́ низложи́; небе́снымъ же и боже́ственнымъ вѣнце́мъ украси́вшися, мо́лится Жениху́ и Бо́гу, дарова́ти на́мъ ве́лію ми́лость.

И ны́нѣ, пра́здника, гла́съ то́йже. Іоа́нна мона́ха:

Его́же дре́вле Моисе́й прообразова́въ собо́ю, Амали́ка низложи́въ, побѣди́, и Дави́дъ пѣснопѣ́вецъ подно́жію Твоему́, вопія́, кла́нятися повелѣва́ше, Честно́му Кресту́ Твоему́, Христе́ Бо́же, дне́сь, грѣ́шніи, кла́няемся, устна́ми недосто́йными, Тя́ изво́лившаго пригвозди́тися на не́мъ, воспѣва́юще, мо́лимся: Го́споди, съ разбо́йникомъ Ца́рствія Твоего́ сподо́би на́съ.

Тропа́рь, гла́съ 4:

Агница Твоя́, Іису́се, Евфи́мія, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Сла́ва, и ны́нѣ, пра́здника:

Спаси́, Го́споди, лю́ди Твоя́ [и благослови́ достоя́ніе Твое́, побѣ́ды Благовѣ́рному Импера́тору на́шему [и́мярекъ], на сопроти́вныя да́руя и Твое́ сохраня́я Кресто́мъ Твои́мъ жи́тельство].


НА УТРЕНИ,
[На Бо́гъ Госпо́дь: Тропа́рь пра́здника, два́жды. Сла́ва, святы́я. И ны́нѣ, пра́здника.]

По 1-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства Твоего́.

Кре́стъ и сме́рть пострада́ти изво́лилъ еси́, посредѣ́ тва́ри сего́ водрузи́въ, егда́ благоволи́лъ еси́, Спа́се, тѣ́ло Твое́ пригвозди́ти, тогда́ и со́лнце лучи́ сокры́; сія́ и разбо́йникъ зря́, на Крестѣ́ Тя́ воспѣ́, вопія́, — помяни́ мя́, Го́споди, — и прія́ше, вѣ́ровавъ, ра́й.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 6. Подо́бенъ: Наде́жда мíра.

На дре́вѣ, Спа́се, кре́стнѣмъ за утро́бы ми́лости возвы́сився и ре́бра пробо́дъ копіе́мъ, растерза́лъ еси́ грѣхо́въ лю́тое рукописа́ніе, я́ко Всемо́щный Бо́гъ: тѣ́мъ Твое́ неизрече́нное пое́мъ благоче́стно, Сло́ве, смотре́ніе.

Сла́ва, и ны́нѣ, то́йже.

Кано́нъ пра́здника, со ирмосо́мъ на 6, и святы́я на 6.

Кано́нъ пра́здника, гла́съ 8.
Пѣ́снь 1.

Ирмо́съ: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшеходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Образъ дре́вле Моисе́й пречи́стыя Стра́сти въ себѣ́ само́мъ прообрази́, свяще́нныхъ средѣ́ стоя́: Кре́стъ же вообрази́въ, просте́ртыми побѣ́ду дла́ньми воздви́же, держа́ву погуби́въ Амали́ка всегуби́теля. Тѣ́мъ Христу́ пои́мъ, Бо́гу на́шему, я́ко просла́вися.

Возложи́ Моисе́й на столпѣ́ врачевство́, тлетвори́ваго избавле́ніе и ядови́таго угрызе́нія, и дре́ву о́бразомъ Креста́ по земли́ пресмыка́ющагося змíя привяза́, лука́вный въ се́мъ обличи́въ вре́дъ. Тѣ́мъ Христу́ пои́мъ, Бо́гу на́шему, я́ко просла́вися.

Показа́ не́бо Креста́ побѣ́ду благоче́стія держа́телю и царю́ богому́дру, враго́въ въ не́мже злосе́рдныхъ низложи́ся свирѣ́пство, ле́сть же преврати́ся, и вѣ́ра распростре́ся земны́мъ конце́мъ Боже́ственная. Тѣ́мъ Христу́ пои́мъ, Бо́гу на́шему, я́ко просла́вися.

Инъ кано́нъ, святы́я, его́же краегране́сіе: Похваля́ю всехва́льную отрокови́цу. Творе́ніе Іоа́нна. Гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Влече́тъ къ пѣснопѣ́нію премíрныхъ во́инства и земны́хъ ли́ки всехва́льная отрокови́ца чудесы́.

Ро́дъ презрѣ́вши и ю́же отъ бога́тства свѣ́тлость, честна́я Евфи́мія вмѣ́сто всѣ́хъ Христа́ стяжа́.

Добро́ты возжела́въ Влады́ка всѣ́хъ краснѣ́йшаго твоего́ се́рдца, всехва́льная, небе́сныхъ черто́говъ сподо́би тя́.

Богоро́диченъ: Пречи́стая Богоро́дице, воплоще́нно Присносу́щное и Пребоже́ственное Сло́во па́че естества́ ро́ждшую, пое́мъ Тя́.

Пѣ́снь 3.

Ирмо́съ: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника; неплодя́щей же пре́жде Це́ркви, ны́нѣ процвѣте́ Дре́во Креста́, въ держа́ву и утвержде́ніе.

Яко испусти́, ударя́емь, во́ду краесѣко́мый, непокори́вымъ лю́демъ и жестосе́рдымъ, богозва́нныя проявля́ше Це́ркве та́инство, ея́же Кре́стъ держа́ва и утвержде́ніе.

Ре́бромъ пречи́стымъ, копіе́мъ прободе́ннымъ, вода́ съ Кро́вію истече́, обновля́ющая Завѣ́тъ и омыва́тельная грѣха́; вѣ́рныхъ бо Кре́стъ похвала́ и царе́й держа́ва и утвержде́ніе.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Яви́лася еси́ на суди́щи му́жественну ду́шу нося́щи, и врага́, я́коже нему́жественна, побѣди́ла еси́, всехва́льная.

Поро́къ въ добро́тѣ твое́й, ниже́ вра́ска души́ бы́сть, и тя́ Христо́съ невѣ́сту въ нетлѣ́нныя черто́ги прія́тъ.

Исцѣли́, всехва́льная, души́ моея́ стру́пы, му́ченице Христо́ва, и утиши́ твои́ми моли́твами жи́зни моея́ бу́рю.

Богоро́диченъ: Тя́ вси́ стяжа́хомъ прибѣ́жище и стѣ́ну на́шу, христіа́не, и Тя́ славосло́вимъ немо́лчно, Безневѣ́стная.

Конда́къ, гла́съ 4. Подо́бенъ:

Вознесы́йся на Кре́стъ во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ си́лою Твое́ю Благовѣ́рнаго Импера́тора на́шего [и́мярекъ], побѣ́ды дая́ Ему́ на сопоста́ты, посо́біе иму́щу Твое́, ору́жіе ми́ра непобѣди́мую побѣ́ду.

Икосъ:

Иже до тре́тіяго небесе́ восхище́нъ бы́сть въ ра́й, и глаго́лы слы́шавъ неизрече́нныя и боже́ственныя, и́хже не лѣ́ть язы́ки (человѣ́ческими) глаго́лати, что́ Гала́томъ пи́шетъ, я́ко рачи́теліе писа́ній прочто́сте и позна́сте: мнѣ́, глаго́летъ, хвали́тися да не бу́детъ, то́кмо во еди́номъ Крестѣ́ Госпо́дни, на не́мже страда́въ, уби́ стра́сти. Того́ у́бо и мы́ извѣ́стно да держи́мъ, Кре́стъ Госпо́день, хвалу́ вси́: е́сть бо на́мъ спаси́тельное сіе́ Дре́во, ору́жіе ми́ра, непобѣди́мая побѣ́да.

Сѣда́ленъ святы́я, гла́съ 8. Подо́бенъ: Прему́дрости.

Крове́й твои́хъ струя́ми, му́ченице Христо́ва, пото́пъ нечести́вымъ при́сно дѣ́йствуеши, всехва́льная; ту́чами же благода́ти слове́сныя ни́вы напая́ющи всегда́, въ ни́хже возраща́еши кла́съ вѣ́ры. Тѣ́мъ пресла́вно и по сме́рти яви́лася еси́ о́блакъ, источа́ющій жи́зни свидѣ́тельство, страстоте́рпице всехва́льная, моли́ся Христу́ Бо́гу, согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, гла́съ то́йже:

Посредѣ́ Еде́ма дре́во прозябе́ сме́рть, посредѣ́ же всея́ земли́ дре́во процвѣте́ жи́знь: вкуси́вше бо пе́рваго, нетлѣ́нни су́ще, тлѣ́нни бы́хомъ, получи́вше же втора́го, нетлѣ́нія наслади́хомся, Кресто́мъ бо спаса́еши, я́ко Бо́гъ, ро́дъ человѣ́ческій.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Горькоро́дныя преложи́ дре́вомъ Моисе́й исто́чники въ пусты́ни дре́вле, Кресто́мъ ко благоче́стію язы́ковъ проявля́я преложе́ніе.

Глубинѣ́ внѣ́дривый сѣку́щую издаде́ Іорда́нъ дре́ву, Кресто́мъ и креще́ніемъ сѣче́ніе ле́сти зна́менуя.

Свяще́нно ополча́ются четвероча́стніи лю́діе, предходя́ще о́бразомъ свидѣ́тельства ски́ніи, крестообра́зными чи́нми прославля́еми.

Чу́дно простира́емь, со́лнечныя лучи́ испуща́ше Кре́стъ, и повѣ́даша небеса́ сла́ву Бо́га на́шего.

Инъ. Ирмо́съ то́йже.

Нескве́рное зерца́ло Боже́ственныхъ разумѣ́ній тебе́ саму́ю устро́ивши, я́ко свѣти́льникъ зѣлолѣ́потнѣйшій, страда́лицъ посредѣ́, му́ченице, возсія́ла еси́.

Мра́чному не принесла́ еси́ де́мону же́ртвы, непобѣди́мая му́ченице: жизноно́сную бо возлюби́ла еси́ за благоче́стіе сме́рть прія́ти.

Яко неболѣ́зненно нося́щи со страстоно́сцы тѣ́ло, непоро́чная, ра́нами нечу́вственна пребыла́ еси́ Боже́ственныя любве́ раче́ніемъ.

Терпѣли́во стра́ждущу твоему́ лицу́, му́ченице, ра́нами свѣ́тло украша́шеся, мо́лніею же Боже́ственнаго Ду́ха враго́въ омрача́ше помышле́нія.

Богоро́диченъ: Очище́ніе на́мъ да́руй невѣ́дѣній, я́ко Безгрѣ́шенъ, и умири́ мíръ Тво́й, Бо́же, моли́твами Ро́ждшія Тя́.

Пѣ́снь 5.

Ирмо́съ: О, треблаже́нное Дре́во, на не́мже распя́ся Христо́съ, Ца́рь и Госпо́дь, и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Тебе́, приснопѣ́тое дре́во, на не́мже простре́ся Христо́съ, Еде́мъ храня́щее обраща́ющееся ору́жіе, Кре́сте, устыдѣ́ся: стра́шный же херуви́мъ уступи́, на тебѣ́ пригвожде́нному Христу́, подаю́щему ми́ръ душа́мъ на́шимъ.

Подзе́мныхъ си́лы проти́вныя Креста́ страша́тся начерта́ема зна́менія на возду́сѣ, по нему́же хо́дятъ небе́сныхъ и земноро́дныхъ ро́ди, колѣ́на преклоня́юще Христу́, подаю́щему ми́ръ душа́мъ на́шимъ.

Заря́ми нетлѣ́нными я́влься Боже́ственный Кре́стъ омраче́ннымъ язы́комъ, заблужде́ннымъ въ пре́лести, Боже́ственный свѣ́тъ облиста́въ, усвоя́етъ на не́мъ пригвожде́нному Христу́, подаю́щему ми́ръ душа́мъ на́шимъ.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Дне́ и мíра противополо́жное увѣ́дѣвши, ратолю́бнаго де́мона люби́ти не восхотѣ́ла еси́.

Мнѣ́въ твою́ осла́бити Боже́ственную, му́ченице, крѣ́пость, смѣ́хъ яви́ся козньми́ вселука́вый.

Пода́ждь ми́ просвѣще́ніе и ми́ръ, всехва́льная, рѣша́щи моли́твами твои́ми многомяте́жное смуще́ніе.

Богоро́диченъ: Дѣ́ву по Рождествѣ́ пое́мъ Тя́, Богоро́дице: Ты́ бо Бо́га Сло́ва пло́тію мíру породила́ еси́.

Пѣ́снь 6.

Ирмо́съ: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ; тѣ́мъ, тридне́венъ изше́дъ, премíрное Воскресе́ніе прописа́ше, пло́тію пригвожде́ннаго Христа́ Бо́га, и тридне́внымъ Воскресе́ніемъ мíръ просвѣ́щшаго.

Ста́ростію преклони́вся и неду́гомъ отягче́нъ, испра́вися Іа́ковъ, ру́цѣ премѣни́въ, дѣ́йствіе явля́я жизноно́снаго Креста́: и́бо ве́тхость зако́ннаго сѣно́внаго писа́нія новописа́, на се́мъ пло́тію пригвозди́выйся Бо́гъ, и душегуби́тельный неду́гъ ле́сти отгна́.

На ю́ныя возложи́въ дла́ни боже́ственный Изра́иль, крестови́дно главы́ явля́ше, я́ко старѣ́йшая сла́ва, законослужи́тели лю́діе. Тѣ́мже, подмнѣ́вся та́ко испрельсти́тися, не измѣни́ жизноно́снаго о́браза: превзы́дутъ бо лю́діе Христо́вы Бо́жіи новоутвержде́нніи, вопія́ху, Кресто́мъ огражда́еми.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Му́жественное въ же́нстѣй пло́ти души́ мудрова́ніе нося́щи, сла́вная, о звѣ́рехъ, су́щихъ въ вода́хъ, неради́ла еси́.

Побѣди́ла еси́ мучи́телей горды́ню безъ вре́да въ вода́хъ, му́ченице непобѣди́мая, со звѣрьми́ я́ко Іо́на пребы́вши.

Изба́ви звѣри́наго растлѣ́нія, услы́шавъ Госпо́дь твоя́ моли́твы, я́ко изъ ро́ва Даніи́ла, тя́, всехва́льная.

Богоро́диченъ: Еди́на сло́вомъ пло́тію Сло́во поро́ждшая, изба́ви, мо́лимся, сѣте́й вра́жіихъ ду́ши на́ша.

Конда́къ святы́я, гла́съ 4. Подо́бенъ: Вознесы́йся.

Во страда́льчествѣ твое́мъ до́брѣ подвиза́лася еси́ и по сме́рти ны́ освяща́еши чуде́съ точе́ньми, всехва́льная. Тѣ́мже твое́ успе́ніе свято́е пое́мъ, вѣ́рою притека́юще въ боже́ственный хра́мъ тво́й, да изба́вимся неду́говъ душе́вныхъ и чуде́съ благода́ть почерпе́мъ.

Икосъ:

Всехва́льныя хра́мъ ра́й показа́ся, посредѣ́ иму́щь са́дъ безсме́ртія — тѣ́ло ея́ честно́е; того́ собира́ющіи плоды́ благоцвѣ́тныя ско́ро освяща́ются, зря́ще бо, чудя́тся, ка́ко ме́ртвое тѣ́ло, я́ко жи́во, источа́етъ кро́ви, благово́нствующи вся́. Tѣ́мъ со тща́ніемъ пріиди́те со мно́ю вcи́, смире́ннымъ, и очи́стимся скве́рны вся́кія, цѣлу́юще сіе́, и чуде́съ благода́ть почерпе́мъ.

Пѣ́снь 7.

Ирмо́съ: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое; оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отцевъ и на́съ Бо́же, благослове́нъ еси́.

Отъ дре́ва вкуси́въ, пе́рвый въ человѣ́цѣхъ, въ тлѣ́ніе всели́ся: отверже́ніемъ бо жи́зни безче́стнѣйшимъ осуди́вся, всему́ ро́ду тѣлотлѣ́ненъ нѣ́кій яко вре́дъ неду́га преподаде́; но, обрѣ́тше, земноро́дніи, воззва́ніе кре́стнымъ дре́вомъ, зове́мъ: препѣ́тый отце́въ и на́съ Бо́же, благослове́нъ еси́.

Разруши́ повелѣ́ніе Бо́жіе преслуша́ніе, и дре́во принесе́ сме́рть человѣ́комъ, е́же неблаговре́менно прича́стно бы́вшее: во утвержде́ніе же зѣло́ честна́го. Отту́ду жи́зни дре́во возбраня́емо бѣ́, е́же разбо́йнику злоуме́ршу отве́рзе, благоразу́мно зову́щу: препѣ́тый отце́въ и на́съ Бо́же, благослове́нъ еси́.

Жезла́ объе́млетъ кра́й Іо́сифова, бу́дущая зря́, Изра́иль, ца́рствія держа́вное, я́ко возъиму́ществитъ пресла́вный Кре́стъ, проявля́я: се́й бо царе́й побѣдоно́сная похвала́, и свѣ́тъ вѣ́рою зову́щимъ: препѣ́тый отце́въ и на́съ Бо́же, благослове́нъ еси́.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Па́че ума́ яви́шася боже́ственныхъ му́чениковъ благому́жества, Зижди́тель бо всѣ́хъ тва́рь покаря́етъ во страда́ніихъ зову́щимъ: отце́въ на́шихъ Бо́же, благослове́нъ еси́.

Бляду́щая [Лжи́вая] загради́ преслову́щая отрокови́ца уста́ мучи́телей и горды́ню пребезза́конныхъ Ду́хомъ Святы́мъ, боже́ственно воспѣва́ющи: отце́въ на́шихъ Бо́же, благослове́нъ еси́.

Тро́ица преподо́бныхъ разже́гшія пе́щь дре́вле попали́, ны́нѣ же богому́драя, Тро́ицу пою́щи, слуги́ улови́, отце́въ Бо́га пою́щія: Бо́же, благослове́нъ еси́.

Та́инственно Жени́хъ ко всечи́стѣй невѣ́стѣ въ пе́щь прише́дъ, Ду́ха росо́ю, Отца́ благослове́ніемъ, сохрани́ пою́щую: отце́въ на́шихъ Бо́же, благослове́нъ еси́.

Богоро́диченъ: На́ше спасе́ніе я́коже восхотѣ́лъ еси́, Спа́се, устро́ити, во утро́бу Дѣ́вы всели́лся еси́, Юже мíру предста́тельницу показа́лъ еси́, oтце́въ на́шихъ Бо́же, благослове́нъ еси́.

Пѣ́снь 8.

Ирмо́съ: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Воздвиза́ему дре́ву, окропле́ну Кро́вію вопло́щшагося Сло́ва Бо́га, по́йте, небе́сныя си́лы; земны́хъ воззва́ніе пра́зднующе, лю́діе, поклони́теся Христо́ву Кресту́, и́мже мíру воста́ніе во вѣ́ки.

Земноро́дніи, дла́ньми, строи́теліе благода́ти, Кре́стъ, на не́мже стоя́ше Христо́съ Бо́гъ, возноси́те священнолѣ́пно и копіе́, Бо́жія Сло́ва Тѣ́ло пробо́дшее, да ви́дятъ язы́цы вси́ спасе́ніе Бо́жіе, сла́вяще Его́ во вѣ́ки.

Боже́ственнымъ судо́мъ предъизбра́нніи, весели́теся, христіа́нстіи вѣ́рніи ца́ріе, хвали́теся побѣдоно́снымъ ору́жіемъ, пріе́мше отъ Бо́га Кре́стъ честны́й: въ се́мъ бо колѣ́на бра́ней, де́рзости и́щуще, разсыпа́ются во вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Блаже́ннѣйшая въ жена́хъ, Вы́шняго возме́здную иму́щи благода́ть, поя́ше, хва́лящи Христа́ во вѣ́ки вся́.

Укрѣпле́на по́мысломъ невѣ́стника, невеще́ственнымъ раче́ніемъ, тѣ́ло предала́ еси́ на сме́рть и живе́ши во вѣ́ки вся́.

На ле́сть, я́коже на звѣ́ря, вооружи́вшися Святы́мъ Ду́хомъ, му́ченица взя́ше мзду́ во вся́ вѣ́ки.

Не душетлѣ́нную сме́рть прія́ла еси́, чи́стая, но благодерзнове́нно звѣ́ря угрызе́ніемъ нестарѣ́ющую, непоро́чная, измѣни́ла еси́ жи́знь во вѣ́ки вся́.

Богоро́диченъ: Напа́стей Ты́ прило́ги отгоня́еши и страсте́й нахо́ды, Дѣ́во, тѣ́мже Тя́ пое́мъ во вся́ вѣ́ки.

Пѣ́снь 9.

Ирмо́съ: Снѣ́дію дре́ва ро́ду прибы́вшая сме́рть Кресто́мъ упраздни́ся дне́сь, и́бо прама́терняя всеро́дная кля́тва разруши́ся Прозябе́ніемъ Чи́стыя Богома́тере, Юже вся́ си́лы небе́сныя велича́ютъ.

Го́рести убíйственныя, я́же отъ дре́ва, не оста́вивъ, Го́споди, Кресто́мъ бо сію́ соверше́нно истреби́лъ еси́. Сего́ ра́ди и дре́вомъ услади́ иногда́ го́ресть во́дъ Ме́рры: прообразу́ющее Креста́ дѣ́йство, е́же вся́ си́лы небе́сныя велича́ютъ.

Непреста́нно гружа́емыя мра́комъ пра́отца, Го́споди, Кресто́мъ возвы́силъ еси́ дне́сь. Яко бо ле́стію весьма́ неудержа́нно естество́ преднизведе́ся, всеро́днѣ ны́ па́ки испра́ви свѣ́тъ Креста́ Твоего́, его́же, вѣ́рніи, велича́емъ.

Да о́бразъ пока́жеши мíру покланя́емый, Го́споди, Креста́, во всѣ́хъ я́ко пресла́вный, на небесѣ́хъ изобрази́лъ еси́, свѣ́томъ безмѣ́рнымъ озаре́нъ, царю́ всеору́жіе непобѣди́мое. Тѣ́мъ Тя́ вся́ си́лы небе́сныя велича́ютъ.

Инъ.

Ирмо́съ: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ си́лъ, немо́лчными славословле́ніи велича́емъ.

Тече́ніе живы́я кро́ве зна́меніе нетлѣ́нныя, свы́ше дарова́нныя тебѣ́ жи́зни, му́ченице всехва́льная, цѣле́ній бо сокро́вище непреста́нно, вѣ́рою че́рплющимъ яви́лася еси́.

Косне́ся тебѣ́ сме́рть естества́ зако́номъ, богому́драя, въ живоно́сную же ме́ртвость нестра́стно одѣ́ялася еси́, е́юже, я́ко одушевле́нное, твое́ тѣ́ло поло́жши всечестно́е, живе́ши нетлѣ́нно, и свидѣ́тельствуютъ твоя́ кровотече́нія.

Зако́ны страда́нія вѣнча́вшися, му́ченице, христопроповѣ́днице, сви́токъ благочести́выхъ ввѣ́ренный, Евфи́міе, догма́товъ честны́хъ, отъ ру́къ собо́ра, его́же я́ко сто́лпъ, держа́щи, живы́й Правосла́вія показу́еши.

Богоро́диченъ: Невѣ́сто неискусобра́чная, сосу́де благово́нія, Тя́ я́ко и́стинную и непоро́чную и Боже́ственнаго Облакъ Свѣ́та пріе́мшую, небе́сный До́ждь во утро́бѣ, Дѣ́во Ма́ти, велича́емъ.

Свѣти́ленъ:

И сме́рть претерпѣ́вши о Бо́зѣ Жи́вѣмъ, жива́ пребыва́еши, всехва́льная Евфи́міе, и Того́ сви́токъ во объя́тіяхъ твои́хъ содержа́щи, была́ еси́ предсто́лпіе правосла́вныхъ, вѣ́рно твою́ соверша́ющихъ честну́ю и боже́ственную и всесвяще́нную па́мять. [Два́жды.]

Сла́ва, и ны́нѣ, Креста́:

Свѣтоза́рными сія́ніи, Кре́стъ Госпо́день на Воздви́женіе его́ вся́ жела́ніемъ Боже́ственнымъ, предлежа́щь, призыва́етъ: пріиди́те, сего́ вси́ ра́достію, и любо́вію, и стра́хомъ цѣлу́имъ вѣ́рно и просла́вимъ еди́наго Творца́ и Влады́ку.

На хвали́техъ стихи́ры на 4, гла́съ 3. Самогла́сны:

Страда́льческое торжество́, вѣ́рніи, богому́дреннѣ соверша́емо, ви́дяще, чу́дному въ совѣ́тѣхъ Бо́гу на́шему благода́рственное пѣснопѣ́ніе воспои́мъ: неви́димую бо держа́ву проти́вныя си́лы въ же́нстѣмъ естествѣ́ побѣди́, и Боже́ственную Свою́ си́лу въ не́мощи соверши́въ доброму́ченицы. Tоя́ моли́твами спаса́етъ ду́ши на́ша. [Два́жды.]

Истины ча́шу отъ свои́хъ крове́й страда́льческихъ всехва́льная му́ченица Христо́ва раствори́вши и сію́ всегда́ предлага́ющи Це́ркви, въ не́йже церко́вныя пито́мцы му́дрости гла́сомъ созыва́етъ, глаго́лющи: почерпи́те пи́во Воскресе́нія свидѣ́тельное, невѣ́рныхъ прогони́тельное и страсте́й чисти́тельное, благочести́вымъ же душа́мъ храни́тельно, Спа́су зову́ще: напои́вый на́съ пото́комъ сла́дости Ду́ха, спаси́ ду́ши на́ша.

Иже кро́вію Христо́вою ду́ши запеча́тавше въ де́нь избавле́нія, кро́вь святу́ю, отъ му́ченическаго исто́чника востека́ющую на́мъ, съ весе́ліемъ духо́внымъ проро́чески почерпе́мъ, живото́чныхъ страсте́й Спа́совыхъ и присносу́щныя сла́вы образова́тельну. Тѣ́мже Ему́ возопіи́мъ: прославля́яйся во святы́хъ Твои́хъ, Го́споди, всехва́льныя Твоея́ страстоте́рпицы моли́твами спаси́ ду́ши на́ша.

Сла́ва, гла́съ 6:

Одесну́ю Спа́са прeдcта́ дѣ́ва и страстоте́рпица и му́ченица Евфи́мія, одѣ́яна добродѣ́тельми, непобѣжде́на и преукра́шена еле́емъ чистоты́ и кро́вію страда́нія, и вопію́щи къ Нему́, ра́достно свѣщу́ держа́щи: въ воню́ мѵ́ра Твоего́ теко́хъ, Христе́ Бо́же, я́ко уязви́хся Твое́ю любо́вію а́зъ, не отлучи́ мене́, Женише́ небе́сный. Тоя́ моли́твами низпосли́ на́мъ, Всеси́льне Спа́се, ми́лости Твоя́.

И ны́нѣ, гла́съ то́йже:

Дне́сь происхо́дитъ Кре́стъ Госпо́день, и вѣ́рніи пріе́млютъ того́ жела́ніемъ, и взе́млютъ исцѣле́нія души́ же и тѣ́ла и вся́кія болѣ́зни. Сего́ цѣлу́имъ ра́достію и стра́хомъ: стра́хомъ, грѣха́ ра́ди, я́ко недосто́йни су́ще; ра́достію же, спасе́нія ра́ди, е́же подае́тъ мíру на то́мъ пригвозди́выйся Христо́съ Бо́гъ, имѣ́яй ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пѣ́сньми та́инственными* воспои́мъ согла́сно* Кре́стъ Госпо́день,* на не́мже Спа́съ распя́тся,* всѣ́хъ Воскресе́ніе.

Сти́хъ: Возноси́те Го́спода Бо́га на́шего* и покланя́йтеся подно́жію но́гу Его́, я́ко свя́то е́сть.

Пріиди́те, мона́шествующихъ* мно́жества, соше́дшеся,* воспои́мъ боже́ственнѣ* живоно́сное дре́во,* на не́мже Христо́съ распростре́ся.

Сти́хъ: Бо́гъ же, Ца́рь на́шъ пре́жде вѣ́ка,* содѣ́ла спасе́ніе посредѣ́ земли́.

Просла́вимъ, вѣ́рніи,* Кре́стъ Госпо́день,* на не́мже источи́ся* кро́вь Влады́чня,* во всѣ́хъ избавле́ніе.

Сла́ва, гла́съ 1. Византíево:

Дне́сь ли́цы отце́въ, всехва́льная, собра́вшеся Христа́ ра́ди, сви́токъ тебѣ́ прино́сятъ Правосла́вныя вѣ́ры, его́же пріе́мши въ честны́я твоя́ ру́ки, храни́ши до конца́. Тѣ́мже и, человѣ́ковъ ликостоя́нія, соше́дшеся, твое́ страда́ніе честву́емъ, вопію́ще благоче́стно: ра́дуйся, всехва́льная, же́нское естество́ въ му́жеское прeложи́вшая ополче́ніе; pа́дуйся, всехва́льная, правосла́вную и отцепре́данную вѣ́ру невре́дну сохра́ньшая; pа́дуйся, моля́щаяся о душа́хъ на́шихъ.

И ны́нѣ, гла́съ то́йже. Андре́я Іерусали́мскаго:

Дне́сь я́ко вои́стину святовѣща́нный глаго́лъ Дави́довъ коне́цъ прія́тъ: се́ бо я́вѣ пречи́стыхъ но́гъ Твои́хъ покланя́емся подно́жію, и на сѣ́нь крилу́ Твое́ю надѣ́ющеся, Всеще́дрый, вопіе́мъ Ти́: да зна́менается на на́съ свѣ́тъ лица́ Твоего́. Правосла́вныхъ люде́й Твои́хъ ро́гъ вознеси́, честна́го Креста́ Твоего́ воздви́женіемъ, Христе́ Многоми́лостиве.


НА ЛИТУРГІИ,

Блаже́нна отъ кано́на пра́здника, пѣ́снь 3-я, на 4, и му́ченицы, пѣ́снь 6-я, на 4. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 6: Терпя́, потерпѣ́хъ Го́спода, и вня́тъ ми́, и услы́ша моли́тву мою́. Ева́нгеліе Луки́, зача́ло 33. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 157 об. – 165 об.

/ Къ оглавленію раздѣла /


Наверхъ / Къ титульной страницѣ

0