Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 13-й де́нь.
Па́мять обновле́нія хра́ма свята́го, Христа́ и Бо́га на́шего Воскресе́нія. И предпра́зднство Воздви́женія Честна́го и Животворя́щаго Креста́. И свята́го священному́ченика Корни́лія Со́тника.

ВЕЧЕРЪ,
Обы́чная каѳи́сма. На Го́споди воззва́хъ: стихи́ры на 6. Обновле́нія 3, гла́съ 6. Самогла́сны:

Обновле́нія почита́ти, ве́тхій зако́нъ и до́брѣ имѣ́ющься, па́че же но́вая почита́ти обновле́ньми. Обновля́ются бо о́строви къ Бо́гу, я́ко глаго́летъ Иса́ія, я́же разумѣ́ти подоба́етъ отъ язы́къ це́ркви ны́нѣ устроя́емыя и водруже́ніе пріе́млющія тве́рдое Бо́гомъ. Тѣ́мже и мы́ настоя́щая обновле́нія духо́вно да торжеству́имъ.

Обновля́йтеся, бра́тіе, и, ве́тхаго человѣ́ка отложи́вше, въ но́вости жи́зни жи́тельствуйте, всѣ́мъ узду́ наложи́вше, отъ ни́хже сме́рть: вся́ у́ды нака́жемъ, вся́кую лука́вую дре́ва снѣ́дь возненави́дѣвше, и сего́ ра́ди то́чію помина́юще, дре́внихъ да бѣжи́мъ. Та́ко да обновля́ется человѣ́къ, си́це чти́тся обновле́ній де́нь.

Анато́ліево:

Положи́лъ еси́ сто́лпъ крѣ́пости — Це́рковь Твою́, Христе́, превѣ́чный Сло́ве, основа́лъ еси́ бо сію́ на ка́мени вѣ́ры. Тѣ́мже недви́жна пребыва́етъ во вѣ́къ, иму́щи Тя́ тоя́ ра́ди въ послѣ́дняя невра́щно бы́вша Чeловѣ́ка. Благодаря́ще у́бо, воспѣва́емъ Тя́, глаго́люще: Ты́ еси́ пре́жде вѣко́въ, и на вѣ́къ, и еще́ Ца́рь на́шъ, сла́ва Тебѣ́.

Ины стихи́ры свята́го, гла́съ 4, на 3. Подо́бенъ: Да́лъ еси́ зна́меніе.

Христо́съ, призрѣ́въ* на твоя́ благотворе́нія, Корни́ліе,* и боже́ственныя моли́твы,* а́нгела тебѣ́ свята́го посыла́етъ,* всего́ тя просвѣща́юща,* и апо́столовъ свяще́нныхъ верхо́внаго,* обновля́юща водо́ю и Ду́хомъ* тя́ вседомо́вно, достосла́вне,* и науча́юща лу́чшимъ Ду́ха благода́тію.

Ма́стію пома́занъ свяще́нства,* поте́клъ еси́ спаси́тельное проповѣ́даніе* возвѣсти́ти страна́мъ,* искореня́я пре́лести те́рніе, богому́дре,* и насажда́я неле́стное уче́ніе въ душа́хъ Ду́хомъ.* Тѣ́мже тя́ блажи́мъ,* я́ко іера́рха богопрія́тна* и непобѣди́ма му́ченика,* веселя́щеся, Корни́ліе.

Нра́вомъ твоея́ бла́гости* послѣ́дствующе, нему́дріи* яви́шася разу́мніи;* у́меръ же и естества́ зако́номъ всели́вся, блаже́нне, во гро́бъ,* сего́ исто́чникъ соверша́еши* мно́гихъ чуде́съ, му́дре Корни́ліе,* исцѣля́я боля́щія* и отгоня́я ду́хи лука́вствія* Ду́хомъ Святы́мъ, богодохнове́нне.

Сла́ва, обновле́нія, гла́съ 6. Самогла́сенъ. Іоа́нна мона́ха:

Па́мять обновле́ній соверша́юще, Го́споди, Тя́ святы́ни Да́теля сла́вяще, мо́лимъ, освяти́тися на́шимъ чу́вствомъ ду́шъ, моли́твами сла́вныхъ страстоте́рпецъ, Бла́же Всеси́льне.

И ны́нѣ, предпра́зднства, гла́съ то́йже:

Дне́сь дре́во яви́ся, дне́сь ро́дъ евре́йскій поги́бе, дне́сь вѣ́рными цари́ вѣ́ра явля́ется, и Ада́мъ дре́ва ра́ди испаде́, и па́ки дре́вомъ де́мони вострепета́ша: всеси́льне Го́споди, сла́ва Тебѣ́.

Аще ли въ пято́къ ве́чера: И ны́нѣ, богоро́диченъ пе́рвый настоя́щаго гла́са.
Вхо́дъ. Проки́менъ дне́, и чте́нія три́.

Ца́рствъ тре́тіихъ чте́ніе. [Глава́ 8.]

Ста́ Соломо́нъ предъ лице́мъ же́ртвенника Госпо́дня, предъ всѣ́мъ собо́ромъ Изра́илевымъ, и воздѣ́въ ру́цѣ свои́ на не́бо, и рече́: Го́споди Бо́же Изра́илевъ, нѣ́сть Бо́гъ, я́коже Ты́, на небеси́ горѣ́ и на земли́ до́лѣ. Аще бо не́бо и не́бо небесе́ не довлѣ́ютъ Тебѣ́, ка́ко до́мъ се́й, его́же созда́хъ и́мени Твоему́? Оба́че и при́зриши на моли́тву мою́, Го́споди Бо́же Изра́илевъ, услы́шати моле́нія и моли́тву, е́юже ра́бъ Тво́й мо́лится предъ Тобо́ю, къ Тебѣ́ дне́сь. Да бу́дутъ о́чи Твои́ отве́рсты на до́мъ се́й де́нь и но́щь, на мѣ́сто сіе́, о не́мже глаго́лалъ еси́: бу́детъ и́мя Мое́ та́мо, е́же услы́шати моли́тву, е́юже мо́лится ра́бъ Тво́й на мѣ́стѣ се́мъ, во дни́ и но́щи. И послу́шати мольбы́ раба́ Твоего́ и люде́й Твои́хъ Изра́иля. И ели́ка а́ще помо́лятся къ Тебѣ́ на мѣ́стѣ се́мъ, и Ты́ услы́шиши на мѣ́стѣ жили́ща Твоего́ на небеси́, и сотвори́ши, и ми́лостивъ бу́деши и́мъ.

При́тчей чте́ніе. [Глава́ 3.]

Бо́гъ Прему́дростію основа́ зе́млю, угото́ва же небеса́ ра́зумомъ. Въ чу́вствѣ Его́ бе́здны разверго́шася, о́блацы же источи́ша ро́су. Сы́не, да не премине́ши, соблюди́ же мо́й совѣ́тъ и мы́сль, да живе́тъ душа́ твоя́, и благода́ть бу́детъ на твое́й вы́и: бу́детъ же исцѣле́ніе пло́темъ твои́мъ и попече́ніе косте́мъ твои́мъ. Да хо́диши надѣ́яся въ ми́рѣ во всѣ́хъ путе́хъ твои́хъ, нога́ же твоя́ не по́ткнется. Аще бо ся́деши, безбоя́зненъ бу́деши; а́ще же поспи́ши, сла́достно поспи́ши. И не убои́шися боя́зни наше́дшія, ниже́ стремле́ній нечести́выхъ находя́щихъ. Госпо́дь бо бу́детъ на всѣ́хъ путе́хъ твои́хъ, и утверди́тъ твою́ но́гу, да не позы́блешися. Не отрецы́ся благотвори́ти тре́бующему, внегда́ а́ще и́мать рука́ твоя́ помога́ти. Не рцы́: отше́дъ возврати́ся, и у́тро да́мъ, си́льну ти́ су́щу благотвори́ти; не вѣ́си бо, что́ породи́тъ находя́й де́нь. Не дѣ́лай на дру́га твоего́ зла́, прише́льствующа и упова́юща на тя́. Не любовра́жствуй на человѣ́ка всу́е, да не что́ на тя́ содѣ́лаетъ зло́е. Не стяжи́ злы́хъ муже́й поноше́нія, ниже́ ревну́й путе́мъ и́хъ. Нечи́стъ бо предъ Го́сподемъ вся́кій законопресту́пникъ, съ пра́ведными же не сочетава́ется. Кля́тва Госпо́дня въ домѣ́хъ нечести́выхъ, дворы́ же пра́ведныхъ благословля́ются. Госпо́дь го́рдымъ проти́вится, смире́ннымъ же дае́тъ благода́ть.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На стихо́внѣ стихи́ры предпра́зднства, гла́съ 5. Подо́бенъ:

Ра́дуйся, живоно́сный Кре́сте, благоче́стія непобѣди́мая побѣ́да, две́рь ра́йская, вѣ́рныхъ утвержде́ніе, Це́ркве огражде́ніе, и́мже тля́ разори́ся и упраздни́ся, и попра́ся сме́ртная си́ла, и вознесо́хомся отъ земли́ къ небе́снымъ; ору́жіе непобѣди́мое, бѣсо́въ сопротивобо́рче, сла́ва му́чениковъ, преподо́бныхъ я́ко вои́стину удобре́ніе, приста́нище спасе́нія, да́руяй мíру ве́лію ми́лость.

Сти́хъ: Возноси́те Го́спода Бо́га на́шего и покланя́йтеся подно́жію но́гу Его́, я́ко свя́то е́сть.

Ра́дуйся, Госпо́день Кре́сте, и́мже разрѣши́ся отъ кля́твы человѣ́чество, су́щія ра́дости зна́меніе, прогоня́яй враги́ во твое́мъ воздви́женіи, всече́стне. На́мъ помо́щниче, царе́й держа́во, крѣ́пость пра́ведныхъ, свяще́нниковъ благолѣ́піе, вообража́емый, и лю́тыхъ избавля́яй, же́злъ си́лы, и́мже пасе́мся, ору́жіе ми́ра, его́же со стра́хомъ обстоя́тъ а́нгели, Христа́ Боже́ственная сла́ва, подаю́щаго мíру ве́лію ми́лость.

Сти́хъ: Бо́гъ же, Ца́рь на́шъ пре́жде вѣ́ка, содѣ́ла спасе́ніе посредѣ́ земли́.

Ра́дуйся, слѣпы́хъ наста́вниче, немощны́хъ врачу́, воскресе́ніе всѣ́хъ уме́ршихъ, воздви́гнувый ны́, во тлю́ па́дшія, Кре́сте честны́й, и́мже разруши́ся кля́тва, и процвѣте́ нетлѣ́ніе, и земнíи обожи́хомся, и діа́волъ всеконе́чно низве́ржеся. Дне́сь воздвиза́ема тя́ ви́дяще рука́ми архіере́йскими, возно́симъ Вознесе́ннаго посредѣ́ тебе́, и тебѣ́ покланя́емся, почерпа́юще бога́тно ве́лію ми́лость.

Сла́ва, обновле́нія, гла́съ 2. Анато́ліево:

Обновле́ніе соверша́юще всесвяще́ннаго хра́ма Твоего́ Воскресе́нія, Тебе́ сла́вимъ, Го́споди, освяти́вшаго сего́, и соверши́вша самосоверше́нною Твое́ю благода́тію, и крася́щаго въ не́мъ свяще́нствуемыми отъ вѣ́рныхъ та́инственными и свяще́нными же́ртвами, и пріе́млюща отъ ру́къ ра́бъ Твои́хъ безкро́вныя и пречи́стыя же́ртвы, воздава́юща же пра́во принося́щимъ грѣхо́въ очище́ніе и ве́лію ми́лость.

И ны́нѣ, предпра́зднства, гла́съ то́йже:

Боже́ственное сокро́вище, въ земли́ кры́емо, Жизнода́вца Кре́стъ, на небесѣ́хъ показа́ся царю́ благочести́вому и побѣ́ды на враги́ подписа́ніе явля́етъ разу́мно; его́же, ра́достно, вѣ́рою и любо́вію, боже́ственно восте́къ къ высотѣ́ зрѣ́нія, тща́ніемъ же того́ отъ земны́хъ нѣ́дръ изнесе́, во избавле́ніе мíра и спасе́ніе ду́шъ на́шихъ.

Тропа́рь обновле́нія, гла́съ 4:

Якоже вы́шнія тве́рди благолѣ́піе, и ни́жнюю споказа́лъ еси́ красоту́ свята́го селе́нія сла́вы Твоея́, Го́споди, утверди́ сіе́ во вѣ́къ вѣ́ка и пріими́ на́ша въ не́мъ непреста́нно приноси́мая Тебѣ́ моле́нія, Богоро́дицею, всѣ́хъ Животе́ и Воскресе́ніе.

Сла́ва, му́ченика, гла́съ то́йже:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, въ видѣ́нія восхо́дъ; сего́ ра́ди сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Корни́ліе, моли́ Христа́ Бо́га, спасти́ся ду́шамъ на́шимъ.

И ны́нѣ, предпра́зднства, гла́съ то́йже:

Животворя́щій Кре́стъ Твоея́ бла́гости, его́же дарова́лъ еси́ на́мъ недосто́йнымъ, Го́споди, Тебѣ́ прино́симъ въ моли́тву: спаси́ Импера́тора и гра́дъ Тво́й моля́щійся, Богоро́дицею, еди́нe Человѣколю́бче.


НА УТРЕНИ,
[На Бо́гъ Госпо́дь: Тропа́рь обновле́нія, два́жды. Сла́ва, свята́го. И ны́нѣ, предпра́зднства.]

По 1-й каѳи́смѣ сѣда́ленъ, гла́съ 4. Подо́бенъ: Ско́ро предвари́.

Вся́ просвѣти́ прише́ствіемъ Христо́съ, мíръ обнови́ Ду́хомъ Боже́ственнымъ Свои́мъ, ду́ши обновля́ются, до́мъ бо возложи́ся ны́нѣ во сла́ву Госпо́дню, идѣ́же и обновля́етъ вѣ́рныхъ сердца́ Христо́съ, Бо́гъ на́шъ, во спасе́ніе человѣ́ковъ.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 4. Подо́бенъ: Ско́ро предвари́.

Пра́зднственный дне́сь обновле́ній, вѣ́рніи, де́нь дости́же на́съ, повелѣва́ющій избра́нію Христо́ву всѣ́мъ обнови́тися и свѣ́тлымъ лицéмъ пѣ́сни Влады́цѣ изъ глубины́ се́рдца воспѣ́ти вѣ́рно, я́ко Изба́вителю и на́съ обновля́ющему.

Сла́ва, и ны́нѣ, то́йже.

Кано́ны три́: обновле́нія, со ирмосо́мъ на 6, предпра́зднства на 4, и свята́го на 4.

Кано́нъ обновле́нія, творе́ніе Іоа́нна мона́ха. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Столпо́мъ путеводя́й дре́вле избра́ннаго Изра́иля, ба́нею креще́нія, Христе́, въ Сіо́нѣ насади́лъ еси́ Це́рковь, зову́щу: воспои́мъ пѣ́снь Бо́гу на́шему.

Дне́сь непристу́пныя Твоея́ сла́вы прише́ствіе, и́же на земли́, водруже́нный Тебѣ́ хра́мъ не́бо устро́и, въ не́мже согла́сно воспои́мъ пѣ́снь Бо́гу на́шему.

Не зако́номъ Це́рковь, Го́споди, украша́ется, ни ра́бскихъ просте́ртіемъ ру́къ, но, Креста́ благода́тію хва́лящися, пое́тъ Тебе́: воспои́мъ пѣ́снь Бо́гу на́шему.

Богоро́диченъ: Безсѣ́менно, Отчею во́лею, отъ Боже́ственнаго Ду́ха Бо́жія зачала́ еси́ Сы́на и пло́тію породила́ еси́, изъ Отца́ безма́терня и на́съ ра́ди изъ Тебе́ безо́тча.

Инъ кано́нъ предпра́зднства, по алфави́ту бе́зъ богоро́дичновъ. Іо́сифъ. Гла́съ то́йже.
Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Весели́ся, не́бо, и земле́, ра́дуйся: пресвяты́й бо Кре́стъ происхо́дитъ, освяща́я ны́ благода́тію, сего́ цѣлу́ющія, я́ко исто́чника святы́ни и всѣ́хъ обоже́нія вину́.

Ше́ствовати благоче́стно небе́сную стезю́ укрѣпи́ на́съ, пресвяты́й Кре́сте, вѣ́рно покланя́ющіяся тебѣ́, я́ко да проти́вныхъ укло́ньшеся про́пастей, о́бщницы Боже́ственныя сла́вы бу́демъ.

Зна́нны Творцу́ тобо́ю бы́вше, всечестны́й Кре́сте, се́рдцемъ и душе́ю объе́млемъ, всегда́ тя предлежа́ща зря́ще, и умо́мъ просвѣща́емся, всевино́вное Сло́во сла́вяще.

Богоро́диченъ: Гра́дъ Бо́га Всецаря́, благопрія́тное сокро́вище честно́е, Богоро́дице всенепоро́чная, сохрани́ Тво́й жре́бій, всегда́ благохва́лящій Тя́ и почита́ющій вѣ́рою Рождество́ Твое́.

Инъ кано́нъ свята́го, его́же краегране́сіе: Чуде́съ Твои́хъ сла́ву пою́, блаже́нне. Іо́сифъ. Гласъ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Сіе́ твое́ свѣтоно́сное и боже́ственное успе́ніе, и пресвѣ́тлую па́мять, и свяще́нное торжество́ торжеству́ющія, моли́твами твои́ми просвѣти́, іера́рше богоблаже́нне.

Яви́лся еси́ и пре́жде соверше́ннаго, му́дре, та́инствъ навыче́нія ми́лостынями и моли́твами, Корни́ліе, упраждня́яся, всеблаже́нне, и всѣ́хъ Го́спода мы́сли ища́ пра́востію.

Зако́новъ спаси́тельныхъ я́вѣ научи́лся еси́ пло́ти Соедини́вшагося кра́йнія ра́ди бла́гости, апо́столовъ верхо́вному ма́ніемъ Влады́чнимъ, блаже́нне, научи́вшу тя́.

Богоро́диченъ: Распаля́еши вѣ́рныхъ сердца́ при́сно сла́вити Тя́ несы́тною любо́вію, Богороди́тельнице Влады́чице: сла́ва бо еси́ человѣ́ковъ, ро́ждшая сла́вы Го́спода, Чи́стая.

Катава́сія: Кре́стъ начерта́въ...

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Освяти́лъ еси́ на земли́ Це́рковь Твою́, Христе́, Ду́хомъ, пома́завъ сію́ дне́сь Твоего́ ра́дованія еле́емъ.

Яви́лъ еси́, Бла́же, рукотворе́нную ски́нію дне́сь па́че ума́, сла́вы Твоея́ строи́тельно бы́вшее жили́ще.

Основа́ніе Тя́, Христе́, Це́рковь неруши́мо иму́щи, Твои́мъ Кресто́мъ вѣнча́ется, я́коже ца́рскою діади́мою.

Богоро́диченъ: Ты́ eди́на на земли́ па́че естества́ благи́хъ Хода́таица, Ма́ти Бо́жія, была́ еси́: тѣ́мже Тебѣ́, е́же ра́дуйся, прино́симъ.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Сла́ву Христо́ву тя́, быва́ющу вѣ́рою, сла́вимъ, прославля́еми твои́мъ, пресла́вне Госпо́день Кре́сте, честны́мъ объя́тіемъ и просвѣща́еми.

Въ весе́ліи прише́дше, вѣ́рніи, почерпе́мъ, я́ко отъ исто́чника чи́ста, Креста́, присноживу́щія во́ды и, спаса́еми, Бо́га восхва́лимъ.

Жи́знь сы́й Іису́съ, повѣ́шенъ, умертви́ся на дре́вѣ кре́стнѣмъ, eго́же ны́нѣ вѣ́рно объе́млюще, стра́сти отгоня́емъ, сме́рти хода́таи.

Богоро́диченъ: Яви́вшися, души́ моея́ тму́ отжени́, грѣхо́вныя у́зы, чи́стая Дѣ́во, расто́ргни и спаси́ мя, pо́ждшая Всеще́драго.

Инъ.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Свята́го просвѣще́ніе прія́лъ еси́ Ду́ха и Боже́ственную благода́ть отъ боже́ственныхъ у́стъ, всю́ пріе́мъ вседомо́вно боже́ственнаго верхо́внаго апо́стола прише́ствіемъ, возвѣща́ющаго спаси́тельная уче́нія.

Возвы́сився добродѣ́тельми, я́ко ке́дръ высокора́стный, и плоды́ благово́нны на́мъ израсти́въ, уче́ній пода́ніе, благода́ть чуде́съ и исцѣле́ній дѣ́йство, блаже́нне іера́рше Корни́ліе.

Велича́йшаго сподо́бився благосла́вія, Корни́ліе, съ верхо́внымъ и ины́ми мно́гими, поте́клъ еси́, проповѣ́дуя всю́ду проповѣ́даніе Боже́ственное, и́мже мы́ просвѣща́еми, тмы́ невѣ́дѣнія изба́вихомся.

Богоро́диченъ: Чистоты́ свѣтови́дное была́ еси́ селе́ніе, Свѣтода́теля носи́вши воплоща́ема, Человѣ́ка яви́вшася по на́мъ за человѣколю́біе и тлю́ разори́вша, пречи́стая Дѣ́во Богоневѣ́сто, нетлѣ́нное человѣ́ковъ воззва́ніе.

Конда́къ, гла́съ 4. Подо́бенъ: Яви́лся еси́.

Не́бо многосвѣ́тлое це́рковь показа́ся, вся́ просвѣща́ющая вѣ́рныя, въ не́йже стоя́ще, зове́мъ: се́й до́мъ утверди́, Го́споди.

Та́же сѣда́ленъ, гла́съ 8. Подо́бенъ: Повелѣ́нное.

Свидѣ́тельства ски́нію Христо́съ показа́, и боже́ственный Моисе́й на земли́ водрузи́, и хра́мъ обновля́етъ Соломо́нъ въ же́ртвахъ, мы́ же, къ но́вому Іерусали́му вѣ́рою прибѣга́юще, Дави́дски дади́мъ боже́ственное воспѣва́ніе Pаспе́ншемуся на́съ ра́ди, прося́ще проще́нія всѣ́хъ, и́миже согрѣши́хомъ.

Сла́ва, свята́го, гла́съ 4. Подо́бенъ: Яви́лся еси́.

Нача́токъ святы́й тя́ Це́рковь отъ язы́къ прія́тъ, просвѣща́ющаго сію́ добродѣ́тельными твои́ми дѣя́ньми, священнотаи́нниче богому́дре Корни́ліе.

И ны́нѣ, предпра́зднства, гла́съ то́йже. Подо́бенъ: Удиви́ся Іо́сифъ.

Просте́ръ Моисе́й ру́ки къ высотѣ́ небе́снѣй, прообразова́ше Кре́стъ, Боже́ственное ору́жіе вѣ́рныхъ, на не́мже Христо́съ грѣхи́ пригвозди́. Тѣ́мъ вра́гъ пла́каше, стражда́ болѣ́зненно чу́вствы, глаго́лаше: древя́ное мя́ копіе́ прободе́ посредѣ́ се́рдца моего́. Христо́съ вся́ отъ а́дскихъ у́зъ рѣши́тъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Не же́ртвами безслове́сныхъ Це́рковь, но Твое́ю честно́ю изъ ре́бръ живоно́сною кро́вію окропля́ется, лѣ́потно взыва́ющи: сла́ва си́лѣ Твое́й, Го́споди.

Селе́нія Госпо́дня возлю́бленная жела́ющимъ ви́дѣти открове́нно сла́ву лица́ Его́ согла́сно зову́тъ: сла́ва си́лѣ Твое́й, Го́споди.

Образу́ющи пома́заніе, Це́рковь избра́нныхъ люде́й Твои́хъ многоцѣ́ннымъ мѵ́ромъ дне́сь помазу́ется, Боже́ственную Ду́ха благода́ть неви́димо пріе́млющи.

Богоро́диченъ: Неискусобра́чно родила́ еси́, о Дѣ́во, и по рождествѣ́ яви́лася еси́ дѣ́вствующи па́ки, тѣ́мже немо́лчными гла́сы: е́же ра́дуйся, Тебѣ́, Влады́чице, вѣ́рою несумнѣ́нною зове́мъ.

Инъ.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Солнцезра́ченъ ви́дится покланя́емый отъ вѣ́рныхъ человѣ́ковъ Кре́стъ Госпо́день, Его́же цѣлу́юще, душа́ми просвѣща́емся.

Бо́гъ Госпо́дь воплоща́емь яви́ся, и возвы́сився на дре́вѣ; тому́ покланя́ющіяся просвѣща́етъ, при́сно отъ лю́тыхъ избавля́яй.

Очище́ніе на́мъ и оставле́ніе согрѣше́ній, Сло́ве Бо́жій, пода́ждь, вѣ́рно покланя́ющимся дне́сь предлежа́щему Кресту́ Твоему́ честно́му.

Богоро́диченъ: Не истощи́въ Оте́ческихъ нѣ́дръ, Сло́во въ Твои́хъ нѣ́дрѣхъ, Отрокови́це, восклони́ся, я́ко Младе́нецъ, хотя́ обнови́ти мя́, тли́ подлежа́щаго.

Инъ.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Ду́ха благода́ть пріи́мъ, я́коже со́лнце свѣтоза́рное, зе́млю проше́лъ еси́, Корни́ліе, отгоня́я тму́ идолонеи́стовства, прехва́льне.

Яко вели́ка рѣка́, исходя́, все́ лице́ земли́ напая́еши Боже́ственными уче́ніи, и пле́велы подавля́я многобо́жія, Корни́ліе.

Ме́ртвъ всему́ мíру бы́въ, Умерщвле́ннаго на́съ ра́ди Боже́ственное воста́ніе всѣ́мъ страстьми́ уме́ршимъ возвѣсти́лъ еси́, Корни́ліе всеблаже́нне.

Богоро́диченъ: Му́дрости чи́стое оби́телище Отчія преесте́ственно, чи́стая Дѣ́вo, была́ еси́, Еюже мы́ зло́бы ны́нѣ хитреца́ изба́вихомся.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́ дре́вле на Сина́и ски́нію нерукотворе́нную показа́лъ еси́ богови́дцу Моисе́ю, пропису́я, Христе́, Це́рковь Твою́.

Ты́, Го́споди, ски́нію на земли́ устро́илъ еси́, Ты́ чино́мъ небе́снымъ человѣ́ковъ ликостоя́нія сочетава́еши си́лою Твое́ю.

Тя́, Го́споди, исто́чникъ жи́зни вѣ́мы, Ты́, Свя́те, ми́ръ, прише́дъ, благовѣсти́лъ еси́, Христе́, Це́ркви Твое́й.

Богоро́диченъ: Тя́ oру́жіе тве́рдое на враги́ предлага́емъ, Тя́ держа́ву и наде́жду на́шего спасе́нія, Богоневѣ́сто, стяжа́хомъ.

Инъ.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

На стра́сти укрѣпи́ на́съ тлетво́рныя, тя́ почита́ющихъ и цѣлу́ющихъ, честны́й Кре́сте, святы́я Стра́сти святѣ́йшее зна́меніе.

Просвѣще́нніи дне́сь, сердцы́ и душа́ми, до́брыми ви́ды присту́пимъ, вѣ́рніи, и свяще́нному и боже́ственному дре́ву Креста́ поклони́мся.

Ме́ррскія ослажда́я пре́жде во́ды Моисе́й, зна́менуя дре́вомъ тебе́, честны́й Кре́сте, и́мже сла́дость спаси́тельную человѣ́комъ иска́палъ еси́.

Богоро́диченъ: За ны́ помоли́ся Христу́, отъ Твои́хъ чи́стыхъ крове́й, пречи́стая Отрокови́це, пло́тію веще́ственною одѣ́янну и земны́я обно́вльшу.

Инъ.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Ве́сь возложи́вся Вседержи́телю, глухи́мъ кумíромъ че́сти не прине́слъ еси́, священнотаи́нниче, отъ скверноубíйственныхъ человѣ́къ понужда́емъ.

Высоча́йшаго неви́димаго Бо́га, Корни́ліе, въ моли́твахъ призва́лъ еси́ и хра́мъ низложи́лъ еси́ ме́рзкихъ кумíровъ, вельми́ удивля́емь.

Вседержи́теля храня́ повелѣ́нія, въ темни́цѣ у́зы претерпѣ́лъ еси́ и у́зъ отрѣша́лъ еси́ зловѣ́рія безу́мныя, богому́дре.

Богоро́диченъ: Одожди́ ми, Пречи́стая, грѣхо́въ оставле́ніе, посѣти́ мя, немощству́юща и вла́ема напа́стьми жите́йскими и страстьми́ тѣле́сными.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Добро́ты Ца́рь Христо́съ возжела́ ны́нѣ избра́нныя Це́ркве и язы́ковъ Ма́терь показа́, отъ рабо́ты сынотвори́мыхъ Ду́хомъ.

Трепе́щутъ вражде́бныхъ де́моновъ полки́, Христо́вѣ Це́ркви Креста́ о́бразомъ знамену́емѣй и осѣня́емѣй свяща́тельнымъ Ду́ха осія́ніемъ.

Не песо́къ, но Христа́ основа́ніе иму́щи, я́же отъ язы́къ Це́рковь вѣнча́ется добро́тою непристу́пною и діади́мою ца́рскою украша́ется.

Богоро́диченъ: О чу́до, всѣ́хъ чуде́съ новѣ́е! Яко Дѣ́ва, во утро́бѣ вся́ Содержа́щаго неискусому́жно заче́нши, не тѣсновмѣсти́.

Инъ.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Прободе́нъ на тебѣ́ въ ре́бра, Зижди́тель, Кре́сте, во́льно повѣ́шенъ, кро́вь и во́ду источа́етъ, и́миже назда́хомся, вѣ́рно тя́ цѣлу́ющіи.

Дре́во Госпо́дне жизнода́рное, исто́чникъ безсме́ртія, избавле́ніе всего́ мíра, спаси́ ны, цѣлу́ющія тя́, я́ко храни́теля на́шего спаси́тельнаго.

Ору́жіе на́мъ крѣ́пкое показа́лся еси́, и́мже побѣжда́емъ вся́ навѣ́ты проти́вныхъ, боже́ственный Кре́сте, пра́востію душе́вною свяще́нно тя́ цѣлу́ющіи.

Богоро́диченъ: Святы́й хра́мъ во святы́хъ Почива́ющаго была́ еси́, Богороди́тельнице: тѣ́мже ны́, вѣ́рно пою́щія Тя́, освяща́еши, Дѣ́во Ма́ти.

Инъ.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Чи́сто творя́ моли́твы твоя́, а́нгела Бо́жія я́вственно ви́дѣлъ еси́, науча́юща тя́ лу́чшая и спасе́ная иму́щимъ.

Просвѣти́вся Ду́хомъ, свѣтода́тельная показа́лся еси́ звѣзда́, свѣтоза́рными сія́ніи концы́ просвѣща́я, священнотаи́нниче Корни́ліе.

Позна́въ Го́спода сла́вы, и́же ле́стію пре́жде помраче́нъ, прозира́еши, блаже́нне, моли́твою твое́ю и вседомо́вно пріе́млеши божéственное очище́ніе.

Богоро́диченъ: Сла́вы Госпо́дь отъ крове́й Твои́хъ дѣ́вственныхъ воплоти́ся, Еди́нъ, я́ко вѣ́сть, Всепѣ́тая, спаса́я ны́ бла́гостію.

Конда́къ, гла́съ 2. Подо́бенъ: Тве́рдыя.

Обновле́нія Ду́ха въ сердца́хъ и просвѣще́ніе вну́тренимъ да́руй вѣ́рою соверша́ющимъ свяще́нная обновле́нія хра́ма до́му Твоего́, eму́же благоволи́лъ еси́ созда́тися въ Твое́ Боже́ственное и́мя, Еди́нe во святы́хъ прославля́емый.

Икосъ:

Па́мять соверша́я обновле́ній, мудрѣ́йшій дре́вле Соломо́нъ Бо́гу живо́тныхъ безслове́сныхъ приноша́ше всесожже́нія и же́ртвы, егда́ же ны́нѣ Истина и Благода́ть пріи́де на зе́млю, же́ртвы а́біе преложи́, же́ртвовавъ же́ртву на спасе́ніе на́ше въ Cебѣ́, я́ко Человѣколю́бецъ. Це́рковь освяти́ и непоколеби́му сію́ покажи́, Еди́нъ во святы́хъ прославля́емый.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Росода́тельный у́бо пе́щный пла́мень показа́ся дре́вле, ны́нѣ же отъ еле́я пома́заніе духо́вное освяща́етъ зову́щія: благослове́нъ еси́ въ хра́мѣ сла́вы Твоея́, Го́споди.

Яко въ пещи́ богопрія́тнѣй, но́вѣй се́й ски́ніи, вси́ и́же отъ Изра́иля духо́внаго, ороша́еми, взыва́емъ: благослове́нъ еси́ въ хра́мѣ сла́вы Твоея́, Го́споди.

Уя́звленіи сладча́йшимъ боже́ственнымъ жела́ніемъ, пріиди́те, въ черто́зѣ се́мъ ца́рскомъ счета́емся Жениху́ Христу́: благослове́нъ еси́ въ хра́мѣ, зову́ще, сла́вы Твоея́, Го́споди.

Богоро́диченъ: Вы́шняго освяще́нное Боже́ственное селе́ніе, ра́дуйся: Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Инъ.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Дре́вле въ благослове́ніихъ дѣте́й Іа́ковъ тя́ проначерта́, честны́й Кре́сте, но мы́ тя ны́нѣ покланя́ющеся чти́мъ, просвѣще́ніе почерпа́юще.

Глаго́лы прія́ша коне́цъ ны́нѣ боже́ственныхъ проро́ковъ, Кре́сте свяще́ннѣйше: всѣ́хъ бо Госпо́дь на тебѣ́ возвы́сися, вся́ отъ тли́ избавля́я.

Усты́ тя́ и се́рдцемъ, всечестны́й Кре́сте, ны́нѣ объе́млюще, освяще́ніе, здра́віе и спасе́ніе всегда́ почерпа́емъ, души́ же и тѣлесе́.

Богоро́диченъ: Дѣ́во благослове́нная, моли́ся о на́съ, моля́щихся Тебѣ́, на Тя́ бо надѣ́емся вси́ и Тебѣ́ вопіе́мъ: Влады́чице, не пре́зри па́ствы Твоея́.

Инъ.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Ты́ язы́ковъ нача́токъ бы́лъ еси́, Корни́ліе, пе́рвый бо креще́ніе прія́лъ еси́ свято́е и Ду́ха благода́ть, я́ко пре́жде богоглаго́ливіи.

Велича́йшая чудеса́ соверша́я Боже́ственною благода́тію, къ вѣ́рѣ улови́лъ еси́ дре́вле злому́дрствующія, науча́я воспѣва́ти: Бо́же, благослове́нъ еси́.

Въ земли́ кры́емь и купино́ю покрове́нъ, Боже́ственными сказа́ньми, му́дрe, яви́лся еси́ чуде́съ точа́ благода́ть и неду́ги отгоня́я.

Цѣвни́це, сладковоспѣ́вшая уче́нія спаси́тельная и всѣ́хъ, Корни́ліе, ду́ши услажда́ющая, показа́лся еси́, воспѣва́я: Бо́же, благослове́нъ еси́.

Тро́иченъ: Вси́ Тріѵпоста́сную Еди́ницу да просла́вимъ: Отца́ пребезнача́льнаго, Сы́на единосу́щнаго и Ду́ха Свята́го, пѣснопою́ще: Бо́же, благослове́нъ еси́.

Богоро́диченъ: Яви́лася еси́ человѣ́ческое смѣше́ніе обожи́вши боже́ственнымъ Твои́мъ Рождество́мъ, Дѣ́во Всенепоро́чная. Тѣ́мъ Тя́ по до́лгу, вѣ́рніи, славосло́вимъ.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Дне́сь ри́зою у́мною, свы́ше истка́нною отъ Боже́ственныя благода́ти, Це́рковь Твоя́, Го́споди, я́коже невѣ́ста, украси́ся и cвоя́ созыва́етъ къ весе́лію лю́ди, во е́же пѣ́ти: благослови́те, вся́ дѣла́ Госпо́дня, Го́спода.

Дне́сь вторы́й Ада́мъ, Христо́съ, показа́ ра́й мы́сленный, но́вую сію́ ски́нію, принося́щую вмѣ́сто дре́ва зна́нія живоно́сное Креста́ ору́жіе, пою́щимъ: благослови́те, вся́ дѣла́ Госпо́дня, Го́спода.

Тро́иченъ: Отца́ безнача́льнаго Тя́, Сы́на, и Ду́ха Свята́го, Еди́но Божество́, соверше́нно, безнача́льно, несѣко́мо, eдиносу́щно, несли́тно, во Ѵпоста́сѣхъ тре́хъ чту́ще, пое́мъ: благослови́те, вся́ дѣла́ Госпо́дня, Го́спода.

Богоро́диченъ: Ты́ еди́на во всѣ́хъ ро́дѣхъ, Дѣ́во Пречи́стая, Ма́ти Бо́жія показа́лася еси́. Ты́ Божества́ была́ еси́ обита́лище, Всенепоро́чная, неопали́вшися огне́мъ непристу́пнаго Свѣ́та. Тѣ́мъ вси́ Тя́ благослови́мъ, Марíе Богоневѣ́сто.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Спаси́тельному ору́жію и нерасте́рзному, вѣ́рныхъ гото́вой по́мощи, крѣ́пкому защище́нію, Кресту́ Госпо́дню ны́нѣ поклони́мся, предъ всѣ́ми предлежа́щу.

Высо́цѣ на дре́вѣ возвѣ́си впреки́ змíя, я́ко писа́ся, Моисе́й, пропису́я тя́, всечестно́е дре́во, и́мже пре́лести мы́сленныхъ зміе́въ избавля́емся.

Свѣще́ніе ду́шъ на́шихъ еси́, свѣтода́вче Кре́сте всече́стне: тя́ бо объе́млюще, нача́ла тмы́ же и вла́сти отража́емъ Боже́ственною твое́ю си́лою.

Богоро́диченъ: Чи́стую и Дѣ́ву почти́мъ, безнача́льное Cло́во и несозда́нное преесте́ственно pо́ждшую въ на́ше спасе́ніе, пѣ́сненно вопію́ще: благослови́мъ, Дѣ́во, Pождество́ Твое́.

Инъ.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Еди́наго отъ души́ на земли́ я́вльшагося Бо́га взыска́лъ еси́ ума́ пра́востію: тѣ́мъ бы́лъ еси́ нача́токъ, богоно́сне, язы́ковъ честны́й и Ду́ха прія́телище.

Угліемъ твои́хъ, блаже́нне, о́гненныхъ слове́съ вещество́ поже́глъ еси́ су́етства: тѣ́мъ къ Свѣ́ту невече́рнему преше́лъ еси́, вся́ озаря́я любо́вію, тя́ пою́щія.

Жре́бій, и ча́сть, и по́мощь, и Изба́витель, крѣ́пость же и хвала́, и свѣ́тъ тебѣ́ бы́сть Сло́во, вся́ призыва́ющее изъ не су́щаго, и руковожде́ніе, Корни́ліе богому́дре.

Тро́иченъ: Святы́й Отче, Святы́й Сло́ве, Всесвяты́й Ду́ше несозда́нне, Тро́ице нераздѣ́льная, спаси́ любо́вію пою́щія Твою́ держа́ву, и ца́рство, и вели́чество.

Богоро́диченъ: Изле́й на ны́ Твоя́ ми́лости обы́чно, Отрокови́це, и испроси́ на́мъ, Чи́стая, проще́ніе всѣ́хъ прегрѣше́ній, въ вѣ́дѣніи же и невѣ́дѣніи и отъ невнима́нія на́мъ прилу́чшихся.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Пріиди́те, чи́стымъ се́рдцемъ и тре́звенными у́мными очесы́ Царе́вы дще́ре, Це́ркве, красоту́, па́че зла́та свѣтя́щуюся, зря́ще, велича́емъ.

Ра́дуйся и весели́ся, невѣ́сто Царя́ Вели́каго, зря́щи свѣ́тло твоего́ Жениха́ красоту́, съ людьми́ твои́ми зову́щи: Тя́, Жизнода́вче, велича́емъ.

Еже съ высоты́ изя́щество, Спа́се, Це́ркви Твое́й пода́ждь: ино́го бо не вѣ́сть, ра́звѣ Тебе́, за ню́же Твою́ дре́вле ду́шу поло́жшаго, въ позна́ніи велича́ющую.

Богоро́диченъ: Ра́дуйся, oбра́дованная Невѣ́сто Царя́ Вели́каго, я́ко Тобо́ю отъ кля́твы Евины вси́, Чи́стая, изба́вихомся и жи́знь обрѣто́хомъ въ Рождествѣ́ Твое́мъ, Неневѣ́стная.

Инъ.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко Плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Христо́съ, на тебѣ́ повѣ́шенъ, мíръ возвы́си, па́дшій поги́бели во глубину́, и́стинно Кре́сте Госпо́день: тѣ́мже тебѣ́ любо́вію ны́нѣ покланя́емся, и чти́мъ, и сла́вимъ.

Ду́ши да очи́стимъ и сердца́ до́брыми еди́нѣми дѣя́ніи и, предлежа́щее посредѣ́ спаси́тельное зря́ще дре́во Креста́, вѣ́рою и любо́вію богому́дренно поклони́мся.

Яко со́лнце вели́кое, блиста́ньми твои́ми озаря́еши су́щія во тмѣ́ и де́моны попаля́еши, краснѣ́йшій Кре́сте. Тѣ́мже вопіе́мъ: просвѣти́ вся́ вѣ́рою покланя́ющіяся тебѣ́.

Богоро́диченъ: Свѣ́томъ мя́ озари́ Боже́ственнымъ, Свѣ́та прія́телище, Дѣ́во, страсте́й мои́хъ тму́ и сласте́й глубоча́йшую и́стинно но́щь, Богороди́тельнице Всесвята́я, отгоня́щи.

Инъ.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Ко свяще́ному торжеству́ Це́рковь вся́ собира́етъ въ па́мять твою́ честну́ю, проповѣ́дниче Христо́въ: ты́ бо равностоя́тель святы́хъ яви́лся еси́ ученико́въ, Ду́ха Святáго, я́ко они́, наслѣ́довавъ.

Украси́лся еси́ догма́ты благоче́стія, я́ко священнодѣ́латель, уподо́бился еси́ Бо́жіимъ боже́ственнымъ служи́телемъ: то́чиши же враче́вствъ всегда́, блаже́нне, рѣ́ки, отгоня́я неду́ги человѣ́ковъ, Корни́ліе свяще́ннѣйшій.

Украси́вся ри́зою спаси́тельною, ю́же Христо́съ истка́, воплоти́вся, ны́нѣ прера́достно вы́шняя Ца́рства обхо́диши, зря́ чи́сто добро́ту недомы́сленную Женихо́ву, достосла́вне.

Честна́я ра́ка твоя́, я́ко исто́чникъ, то́читъ вѣ́рнымъ врачевства́ оби́льно, и отгоня́етъ, Корни́ліе, ду́хи лука́выя, и просвѣща́етъ всѣ́хъ очеса́, вѣ́рою благохва́лящихъ тя́.

Богоро́диченъ: Просвѣще́ніе ми́ испроси́, póждшая Свѣ́тъ, отъ Свѣ́та возсія́вшій, омраче́ніе дале́че отъ менé отгоня́щи и сласте́й, и искуше́ній, Пречи́стая Влады́чице, предста́тельнице непосты́дная.

Свѣти́ленъ обновле́нія. Подо́бенъ: Ду́хомъ во святи́лищи.

Юже пречи́стою кро́вію искупи́лъ еси́, Сло́ве, всечу́дную и всечестну́ю и святу́ю Це́рковь обнови́ Ду́хомъ, Бла́же, и удобри́ заря́ми Боже́ственнѣйшими, сла́вою прославля́я досто́йно Твоего́ хра́ма обновле́ніе соверша́ющихъ.

Сла́ва, и ны́нѣ, предпра́зднства. Подо́бенъ то́йже:

Свѣтода́тельными сія́ньми Кре́стъ Госпо́день, въ того́ вознесе́ніе, вся́ любо́вію Боже́ственною, предлежа́, призыва́етъ: пріиди́те, сего́ вси́ ра́достію, и любо́вію, и стра́хомъ цѣлу́емъ вѣ́рно и просла́вимъ Еди́наго Творца́ и Влады́ку.

На хвали́техъ стихи́ры обновле́нія на 6, гла́съ 4. Подо́бенъ: Да́лъ еси́ зна́меніе.

Дне́сь боже́ственный,* и свяще́нный, и честны́й Христо́ва Воскресе́нія* свѣ́тло обновля́ется свѣтоно́сный до́мъ,* и дае́тъ мíру Гро́бъ* Боже́ственный Живо́тъ,* и вруча́етъ исто́чникъ безсме́ртный,* то́читъ струи́ благода́ти чуде́съ,* оби́луетъ во́ды,* и да́руетъ исцѣле́нія* того́ вѣ́рою пою́щимъ.

Возсія́ свы́ше свѣтови́дная заря́, сія́ющи* и вся́ просвѣща́ющи;* вѣ́рно у́бо почти́мъ Христа́ Содѣ́теля* воскресе́ніе вси́* и обновле́ній свяще́нныхъ живоно́сное* боже́ственное торжество́,* въ пѣ́снехъ воспра́зднуемъ* и во псалмѣ́хъ воскли́кнемъ,* я́ко да ми́лостива обря́щемъ* Спа́са и Го́спода.

Посредѣ́ земли́ возноси́ма* предуви́дѣти жела́юще* Креста́ ски́птръ святы́й,* ду́ши предочи́стимъ и озари́мъ ра́зумы,* свѣ́томъ просвѣща́ющеся;* и, си́лою Боже́ственною облиста́еми, Христа́ воспои́мъ,* дре́вомъ честны́мъ Его́ свяще́ніе подаю́щаго* вѣ́рою взыва́ющимъ* и те́плѣ Того́ пою́щимъ.

Ины стихи́ры, гла́съ 1, самогла́сны. Іоа́нна мона́ха:

Обновля́йся, обновля́йся, но́вый Іерусали́ме, пріи́де бо тво́й свѣ́тъ, и сла́ва Госпо́дня на тебѣ́ возсія́: се́й до́мъ Оте́цъ созда́, се́й до́мъ Сы́нъ утверди́, се́й до́мъ Ду́хъ Святы́й обнови́, просвѣща́яй, и утвержда́яй, и освяща́яй ду́ши на́ша.

Анато́лія:

Дре́вле у́бо обновля́я хра́мъ, Соломо́нъ безслове́сныхъ живо́тныхъ же́ртвы и всесожже́нія принесе́, Го́споди. Егда́ же благоволи́лъ еси́, Спа́се, образо́мъ у́бо упраздни́тися, позна́тися же и́стинѣ, безкро́вныя же́ртвы ро́ды человѣ́честіи прино́сятъ сла́вѣ Твое́й, всѣ́ми бо влады́чествуяй, вся́ческая освяща́еши Святы́мъ Ду́хомъ.

Гла́съ 4. Іоа́нна мона́ха:

Обновля́ется дне́сь я́же отъ язы́къ Це́рковь честно́ю и живото́чною кро́вію отъ пречи́стыхъ и нетлѣ́нныхъ ре́бръ вопло́щшагося отъ Святы́я Дѣ́вы Христа́, Бо́га на́шего. Тѣ́мже, собра́вшеся вѣ́рныхъ ли́цы, просла́вимъ Отца́ и Сы́на и Свята́го Ду́ха, Еди́но Божество́, содержа́щее вся́ческая.

Сла́ва, гла́съ 3. Самогла́сенъ:

Къ себѣ́ восходи́, человѣ́че, бу́ди но́въ вмѣ́сто ве́тхаго и души́ пра́зднуй обновле́нія, до́ндеже вре́мя житія́; да обновля́ется тебѣ́ вся́каго житія́ пу́ть, дре́вняя бо преидо́ша, cе́ бы́ша вся́ нова́. Сіе́ пра́зднику плодопринеси́, до́брымъ измѣне́ніемъ измѣня́емь: си́це обновля́ется человѣ́къ, та́ко чти́тся обновле́ній де́нь.

И ны́нѣ, предпра́зднства, гла́съ то́йже. Іоа́нна мона́ха:

Христе́, Бо́же на́шъ, во́льное Твое́ распя́тіе во о́бщее воскресе́ніе ро́да челове́ческаго воспріе́мый и тро́стію Креста́ обагре́ніемъ червле́нымъ Твоя́ пе́рсты окровави́вый, оста́вительная на́мъ ца́рски подписа́ти человѣколю́бствовавъ, не пре́зри на́съ, бѣ́дствующихъ, и па́ки е́же отъ Тебе́ разстоя́нія. Но уще́дри, Еди́не Долготерпѣли́ве, су́щія во обстоя́ніи лю́ди Твоя́ и воста́ни, побори́ борю́щія ны́, я́ко всеси́ленъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на обновле́нія, пѣ́снь 3-я и 6-я. Проки́менъ, гла́съ 4: До́му Твоему́ подоба́етъ святы́ня, Го́споди, въ долготу́ днíй. Сти́хъ: Госпо́дь воцари́ся, въ лѣ́поту облече́ся. Апо́столъ ко Евре́емъ, зача́ло 307. Аллилу́ія, гла́съ 2: Основа́нія Его́ на гора́хъ святы́хъ. Сти́хъ: Пресла́вная глаго́лашася о тебѣ́, гра́де Бо́жій. Ева́нгеліе Матѳе́я, зача́ло 67. Прича́стенъ: Го́споди, возлюби́хъ благолѣ́піе до́му Твоего́ и мѣ́сто селе́нія сла́вы Твоея́. Аллилу́ія, три́жды.


Зри́: Вѣ́домо же бу́ди и сіе́: Аще прилучи́тся Воздви́женіе Честна́го Креста́ въ недѣ́лю.

Въ суббо́ту же предъ Воздви́женіемъ: на литургíи: проки́менъ и аллилу́ія, обновле́нія еди́нъ. А суббо́ты проки́менъ предъ Воздви́женіемъ оставля́ется. Апо́столъ же, и Ева́нгеліе чте́тся пре́жде обновле́нія, и пото́мъ суббо́ты предъ Воздви́женіемъ. Прича́стенъ обновле́нія. Рядовы́й же Апо́столъ и Ева́нгеліе вычита́емъ напреди́, а недѣ́ли предъ Воздви́женіемъ чте́тся Апо́столъ и Ева́нгеліе въ мимоше́дшую недѣ́лю.


(Мрк.) Подоба́етъ вѣ́дати: Яко а́ще случи́тся обновле́нія, 13-й де́нь, въ недѣ́лю:

Оставля́ется слу́жба свята́го Корни́лія, и пое́тся, егда́ разсу́дитъ екклисіа́рхъ. Пое́тся же воскре́сная слу́жба со обновле́ніемъ и съ предпра́зднствомъ Честна́го Креста́.

На ма́лѣй вече́рни: стихи́ры воскре́сны и Богоро́дицы, по обы́чаю. Тропа́рь воскре́сенъ. Сла́ва, и ны́нѣ, богоро́диченъ.

На вели́цѣй вече́рни: Блаже́нъ му́жъ.., каѳи́сма вся́. На Го́споди воззва́хъ: стихи́ры воскре́сны 3, и восто́ченъ [Анато́ліевъ] еди́нъ, и обновле́нія 3, и креста́ 3, гла́съ 5. Подо́бенъ: Ра́дуйся.., пи́саны на стихо́внѣ. Сла́ва, обновле́нія. И ны́нѣ, богоро́диченъ 1-й гла́са. Вхо́дъ. И чте́нія 3, обновле́нія. На литíи: стихи́ра хра́ма и обновле́нія хвали́тныя, гла́съ 1: Обновля́йся, обновля́йся... и гла́са 4-го: Обновля́ется дне́сь.., гла́съ то́йже: Посреде́ земли́ возноси́ма... Сла́ва, гла́съ 5: Иже въ нѣ́дрѣхъ Оте́ческихъ препочива́яй, Сло́ве, Ду́хомъ Твои́мъ Святы́мъ обнови́ хра́мъ, и́же во и́мя Твое́ воздви́женый. И ны́нѣ, гла́съ 6: Дне́сь дре́во яви́ся... На стихо́внѣ: стихи́ры воскре́сны гла́са. Сла́ва, гла́съ 2: Обновле́ніе соверша́юще... И ны́нѣ креста́, гла́съ то́йже: Боже́ственное сокро́вище... На благослове́ніи хлѣ́бовъ: тропа́рь Богоро́дице, Дѣ́во.., два́жды. И обновле́нія, еди́ножды. И чте́ніе въ посла́ніихъ апо́стольскихъ.

На у́трени: На Бо́гъ Госпо́дь: тропа́рь воскре́сенъ, два́жды. Сла́ва, обновле́нія: И ны́нѣ, креста́. По каѳи́смахъ: сѣда́льны воскре́сны. Сла́ва, и ны́нѣ, обновле́нія; богоро́дичны же оставля́ются. И чте́ніе во Ева́нгеліи, недѣ́ля предъ Воздви́женіемъ. По непоро́чнахъ ипакои́. И чте́мъ во Ева́нгеліи недѣ́лю рядову́ю. Степе́нна, и проки́менъ гла́са. Вся́кое дыха́ніе... Ева́нгеліе воскре́сное. Воскресе́ніе Христо́во... и псало́мъ 50-й. Стихи́ра воскре́сна. Кано́нъ воскре́сенъ со ирмосо́мъ на 4, и Богоро́дицы на 2, и обновле́нія на 4, и креста́ на 4. Катава́сія: Кре́стъ начерта́въ... По 3-й пѣ́сни: конда́къ и и́косъ обновле́нія, и сѣда́ленъ. Сла́ва, и ны́нѣ, креста́, и чте́ніе. По 6-й пѣ́сни: конда́къ воскре́сенъ и и́косъ. И про́логъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, обновле́нія. И ны́нѣ, креста́. На хвали́техъ: стихи́ры воскре́сны 4, и обновле́нія, гла́съ 4. Подо́бенъ: Да́лъ еси́ зна́меніе.., двѣ́, и самогла́сны двѣ́, гла́съ 3. Къ себѣ́ восходи́, человѣ́че... Другíй: Христе́ Бо́же на́шъ... Пе́рвый припѣ́въ: До́му Твоему́ подоба́етъ святы́ня, Го́споди, въ долготу́ днíй. Другíй: Госпо́дь воцари́ся, въ лѣ́поту облече́ся. Сла́ва, стихи́ра ева́нгельская. И ны́нѣ: Преблагослове́нна еси́, Богоро́дице Дѣ́во... Славосло́віе вели́кое. Тропа́рь воскре́сенъ, и ектеніи́, и отпу́стъ, и оглаше́ніе, и обы́чное исхожде́ніе въ притво́ръ, и ча́съ 1-й.

На часѣ́хъ: Тропа́рь воскре́сенъ. Сла́ва, обновле́нія. И ны́нѣ, богоро́диченъ часо́въ. По Отче на́шъ: конда́къ воскре́сенъ, и обновле́нія, глаго́лемъ премѣня́юще.

На литургíи: Блаже́нна воскре́сна гла́са на 6 и обновле́нія пѣ́снь 3-я, на 4. По вхо́дѣ: тропа́рь воскре́сенъ, и обновле́нія, и креста́. Конда́къ воскре́сенъ. Сла́ва, и ны́нѣ, обновле́нія. Проки́менъ, Апо́столъ, аллилу́ія и Ева́нгеліе пре́жде недѣ́ли предъ Воздви́женіемъ, и ря́дъ подъ зача́ло, та́же обновле́нія. Прича́стенъ: Хвали́те Го́спода съ небе́съ... и обновле́нія.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 125 об.– 137 об.

/ Къ оглавленію раздѣла /


Наверхъ / Къ титульной страницѣ

0