Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 11-й де́нь.
Слу́жба преподо́бнымъ отце́мъ Се́ргію и Ге́рману, Валаа́мскимъ чудотво́рцемъ.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ.

Небе́сныхъ чино́въ зри́телей* и Свѣ́томъ Трисо́лнечнымъ въ ра́йскомъ селе́ніи осіява́емыхъ,* всесвѣ́тлыхъ свѣти́льниковъ на́шихъ Се́ргія и Ге́рмана* въ земно́мъ селе́ніи и́хъ* наста́ де́нь свѣ́тлаго торжества́.

Сра́дуйтеся на́мъ, все́ вѣ́рныхъ мно́жество,* сликовству́йте, го́ры и хо́лми,* мо́ре и вся́, я́же въ не́мъ,* въ свѣтоно́сный де́нь па́мяти ди́вныхъ по́стниковъ,* на гора́хъ си́хъ, я́ко фи́никсъ, процвѣ́тшихъ.

Мірскíя сла́дости и грѣхо́вныя стра́сти* му́жески попра́вше, отцы́ богоно́сніи,* и въ тѣ́сномъ житіи́ ду́ши своя́ очи́стивше,* въ благода́тный ра́й внидо́ша,* и плоды́ безсме́ртія дне́сь вкуша́ютъ* и сла́дость вѣ́чныя жи́зни.

На тве́рди мы́сленнѣй, во оби́тели се́й,* я́ко двѣ́ пресвѣ́тлыя звѣзды́,* Се́ргій ди́вный и Ге́рманъ чу́дный* добродѣ́тельми возсія́ша и чуде́съ свѣ́тлостію,* и́хже свѣ́тъ сла́вы пребу́детъ въ ро́дъ и ро́дъ.

Сла́ва, гла́съ 3:

По́стниковъ торжество́ по́стнически пра́зднуемъ, бѣжи́мъ грѣхо́вныхъ страсте́й, невоздержа́нія, тщесла́вія и горды́ни, гнѣ́ва, не́нависти и зло́бы; посто́мъ же, смире́ніемъ и братолю́біемъ почти́мъ отце́въ честну́ю па́мять, да ра́дости и́хъ въ торжествѣ́ премíрномъ прича́стницы вси́ бы́ти сподо́бимся.

И ны́нѣ, пра́здника или́ богоро́диченъ, гла́съ то́йже:

Безсѣ́менно заче́ншая и безстра́стно роди́вшая Бо́га Сло́ва, христіа́нъ предста́тельнице, Богоро́дице Влады́чице! Къ Тебѣ́ припа́даемъ, Тя́ пое́мъ и славосло́вимъ и Тебѣ́ вси́ мо́лимся со слеза́ми: воззри́ на на́съ милосе́рдымъ о́комъ, отъ и́га страсте́й изба́ви на́съ и безстра́стіе да́руй душа́мъ на́шимъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Свято́му Ду́ху* свя́тъ и че́стенъ* сотво́рше себе́, святíи отцы́* добродѣ́тельными дѣя́ньми* и чуде́съ дарова́ньми обогати́шася.

Сти́хъ: Честна́ предъ Го́сподемъ* сме́рть преподо́бныхъ Его́.

Цвѣ́ти ра́йстіи* процвѣто́ша на́мъ, преподо́бніи,* по́стническихъ трудо́въ по́тами* облагоуха́юще всѣ́хъ на́съ.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Два́ чуде́съ исто́чника,* Се́ргія и Ге́рмана,* дарова́ се́й оби́тели* ди́вный во святы́хъ Госпо́дь,* въ наслажде́ніе вѣ́рно чту́щимъ святу́ю па́мять и́хъ.

Сла́ва, гла́съ 5:

Ангельскихъ чинонача́лій и преподо́бныхъ премíрное торжество́ возсія́ на́мъ въ па́мяти преподо́бныхъ оте́цъ Се́ргія и Ге́рмана, презрѣ́вшихъ земна́я, да наслѣ́дятъ небе́сная, попра́вшихъ плотска́я, да воспріи́мутъ духо́вная, и́мже и мзду́ вѣ́рныхъ рабо́въ Госпо́дь дарова́, на земли́ и на небесѣ́хъ просла́ви.

И ны́нѣ, богоро́диченъ, гла́съ то́йже:

Мы́сленная ста́мно, носи́вшая во чре́вѣ маннода́вца Христа́, Богоро́дице Дѣ́во! Того́ моли́ прилѣ́жно отъ го́рькія страсте́й рабо́ты изба́вити на́съ и въ пусты́ни безстра́стія ма́нны духо́вныя вся́ ны́ прича́стники сотвори́ти, отъ всѣ́хъ зо́лъ спасти́ и просвѣти́ти ду́ши на́ша.

Тропа́рь, гла́съ 4:

Ева́нгелія Христо́ва и́стинніи послу́шницы яви́стеся, преподо́бніи, мíръ и вся́, я́же въ не́мъ, я́ко не су́щая, преоби́дѣвше любве́ ра́ди Христо́вы, и въ морскíй о́стровъ всели́стеся и трудолю́бно въ не́мъ проти́ву ко́зней неви́димыхъ враго́въ подвиза́стеся, посто́мъ, бдѣ́ніемъ же и всено́щнымъ стоя́ніемъ пло́ти своя́ ду́ху му́дрѣ повину́ли есте́. Сего́ ра́ди отъ Вседержи́тельныя десни́цы досто́йныя вѣнцы́ прія́ли есте́. И ны́нѣ Пресвятѣ́й Тро́ицѣ предстоя́ще, моли́теся, всеблаже́нніи отцы́ Се́ргіе и Ге́рмане, сохрани́тися въ ми́рѣ христоимени́тому Импера́тору на́шему и спасти́ся душа́мъ на́шимъ.

Инъ тропа́рь, гла́съ 1:

Отъ мірскíя молвы́ бѣ́гающе, безмо́лвія и благоче́стія рачи́тели, въ ти́хое приста́нище Валаа́ма отъ восто́ка пріидо́сте и въ не́мъ, ева́нгельски Христу́ добродѣ́тельми послѣ́довавше, на ве́рхъ соверше́нства востекли́ есте́, и ны́нѣ въ торжествѣ́ премíрномъ богозрѣ́ніемъ наслажда́ющеся, всеблаже́нніи отцы́ Се́ргіе и Ге́рмане, человѣколю́бца Бо́га моли́те, е́же спасти́ всѣ́хъ на́съ, благоче́стно ва́съ почита́ющихъ.

Сла́ва, и ны́нѣ, пра́здника или́ богоро́диченъ 1-го гла́са:

[Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.]


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди, воззва́хъ: стихи́ры на 8. [Аще слу́жба сія́ соверша́ется Септе́мврія во 11-й де́нь, глаго́лемъ попра́зднства стихи́ры 3 и святы́хъ на 5.] Гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Мíра жи́тели, Се́ргій и Ге́рманъ,* ко Христу́ любо́вію распали́вшеся,* мíръ и міроде́ржца ку́пно доблему́дренно побѣжда́ютъ* и добродѣ́телей лѣ́ствицею* къ соверше́нству житія́ ева́нгельскаго восхо́дятъ,* и́хже, я́ко свѣти́ла ве́лія,* пусты́ни се́й Христо́съ Бо́гъ дарова́,* свѣ́томъ дѣ́лъ и́хъ озаря́я ду́ши на́ша.

О, ди́внаго му́жества!* Многостра́стныя пло́ти не щадя́тъ святíи,* но, я́ко на врага́, востаю́тъ,* распина́юще ю́ со страстьми́ и похотьми́* и покаря́юще ду́хови.* Тѣ́мъ нетлѣ́нныя да́ры отъ Христа́ пріе́млютъ,* отъ земны́хъ къ небе́снымъ прехо́дятъ,* отъ а́нгелъ и человѣ́къ прославля́ются.

О, столпи́ одушевле́нніи, Се́ргіе и Ге́рмане,* добродѣ́тельми укра́шенніи,* ка́ко ва́съ по достоя́нію воспое́мъ въ пѣ́снехъ?* предѣ́лъ бо естества́ преше́дше,* во пло́ти а́нгели показа́стеся,* житію́ безпло́тныхъ подража́юще.* Тѣ́мъ я́ко по́стниковъ удобре́ніе* и небе́снаго Сіо́на жи́тели,* хода́таи же и моли́твенницы ко Го́споду* при́сно ублажа́етеся.

Яко ма́слины плодови́ты въ дому́ Бо́жіи возрасто́ша,* я́коже фи́никсы, добродѣ́тельми процвѣто́ша на́мъ преподо́бніи,* и я́ко сосу́ди Свята́го Ду́ха,* не зла́томъ, но дарова́ньми Боже́ственными украси́шася,* и́хже пра́зднующе па́мять, о празднолю́бцы,* житію́ и́хъ подража́имъ,* я́ко да сподо́битъ на́съ Бо́гъ* слы́шати съ ни́ми гла́съ пра́зднующихъ въ небе́сномъ Сіо́нѣ.

Сла́ва, гла́съ 6:

Сла́вимъ Тя́, Тріѵпоста́сный Бо́же, Тво́рче небесе́ и земли́, я́ко дарова́лъ еси́ на́мъ во о́бразъ благоугожда́ти Тебѣ́, Тобо́ю избра́нныхъ по́стниковъ, всеблаже́нныхъ отце́въ на́шихъ Се́ргія и Ге́рмана, и́хже любы́ къ Тебѣ́ бы́сть неразлу́чна, сою́зъ братолю́бія и́стиненъ, моли́тва непреста́нна, нра́ва кро́тость, сле́зъ струи́ приснотеку́щія, по́стъ, бдѣ́ніе и труды́, естества́ предѣ́лъ превосходя́щій. Тѣ́мже у́мъ и се́рдце предочи́стивше, отъ земли́ на не́бо восхо́дятъ и ны́нѣ въ вѣ́чной сла́вѣ Тебе́ со а́нгелы славосло́вятъ. Тѣ́хъ моли́твами, Влады́ко Человѣколю́бче, побѣ́ды Благовѣ́рному Импера́тору на́шему на супоста́ты да́руй, мíру ми́ръ низпосли́ и душа́мъ на́шимъ ве́лію ми́лость.

И ны́нѣ, пра́здника или́ богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и преподо́бныхъ, гла́съ 3. Самогла́сны:

Безнача́льнаго Свѣ́та, изъ тмы́ свѣ́тъ ди́вный созда́вшаго и свѣ́томъ позна́нія Своего́ просвѣти́вшаго вѣ́рныхъ сердца́, Человѣколю́бца Христа́ возлюби́вше, отцы́ богому́дріи во свѣ́тѣ Того́ повелѣ́ній до́брѣ ходи́ша и, отъ Него́ свѣ́томъ благода́ти просвѣ́щшеся, на́мъ, со тмо́ю страсте́й борю́щимся, свѣти́льницы яви́шася. Ихже моли́твами, Свѣтода́вче Го́споди, умы́ просвѣти́ и сердца́ на́ша очи́сти, я́ко Благоутро́бенъ.

Во́льную нищету́ я́ко две́рь къ соверше́нству избра́ша отцы́ богоно́сніи и, ни́щи бы́вше ду́хомъ, благода́тію обогати́шася, я́же свѣ́томъ Свои́мъ наста́ви и руководи́ и́хъ на высоту́ добродѣ́телей соверше́нства. Тоя́ у́бо и на́съ, Влады́ко Христе́, преподо́бныхъ моли́твами прича́стники бы́ти сподо́би и спаси́ ду́ши на́ша, я́ко Человѣколю́бецъ.

Поста́ и моли́твы си́ла во пло́ти су́щія вы́, Се́ргіе и Ге́рмане, а́ки безпло́тныя содѣ́ла. Зако́нъ бо пло́ти тве́рдости ума́ ва́шего не возмо́же поколеба́ти, но зако́ну ума́, о Бо́зѣ влады́чествующу, зако́нъ во удесѣ́хъ побѣжде́нъ быва́етъ. И на́мъ у́бо, о всеблаже́нніи, да́ръ цѣлому́дрія дарова́ти Христа́ Бо́га моли́те и спасти́ ду́ши на́ша.

Сла́ва, гла́съ 2:

Благода́тный свѣ́тъ Тріѵпоста́снаго Божества́ отъ ду́шъ ва́шихъ, Се́ргіе и Ге́рмане, мра́къ земна́го пристра́стія отгна́въ, на трудолю́бный по́стничества пу́ть наста́ви, сквозѣ́ страсте́й свирѣ́пое мо́ре проведе́, на го́ру безстра́стія возведе́, зако́нъ на скрижа́лехъ серде́цъ ва́шихъ написа́, духо́вныя ма́нны прича́стники сотвори́ и въ зе́млю обѣтова́нія, въ небе́сный Сіо́нъ, введе́, идѣ́же со а́нгелы лику́юще, Всеблага́го Творца́ моли́те, е́же спасти́ ду́ши на́ша.

И ны́нѣ, пра́здника или́ богоро́диченъ, гла́съ то́йже:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, богоизбра́нная дво́ице,* Се́ргіе и Ге́рмане,* непобѣди́міи Христо́вы во́ини,* мы́сленныхъ враго́въ побѣ́дою сла́вніи,* мона́шествующихъ утвержде́ніе,* оби́тели огражде́ніе,* и́миже въ на́съ тлетво́рныя стра́сти разруша́ются,* неду́зи исцѣля́ются,* де́мони прогони́ми быва́ютъ,* враго́въ горды́ня низпа́даетъ и мы́ спаса́емся.* Сла́ва ди́вному во святы́хъ Свои́хъ Бо́гу,* тѣ́хъ моли́твами подаю́щему вѣ́рнымъ ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, ра́дости на́шея вино́вне,* всеблаже́нне о́тче Се́ргіе* съ богому́дрымъ Ге́рманомъ!* Внидо́сте бо въ ра́дость пра́ведныхъ,* воспріе́млете мзду́ трудо́въ ва́шихъ отъ Влады́ки Христа́:* на земли́ вре́менно Тому́ послужи́вше,* ны́нѣ вѣ́чно на небесѣ́хъ съ Ни́мъ ца́рствуете.* Его́же Боже́ственною сла́вою осіява́еми,* въ свѣтоно́сный де́нь па́мяти ва́шея на́мъ спра́зднуйте,* Тому́ прилѣ́жно моля́щеся* низпосла́ти вѣ́рнымъ ве́лію ми́лость.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Ра́дуйся, оби́тель свята́я,* ра́дуйся, Боже́ственный хра́ме,* въ не́мже благоизво́ли Всеблагíй Госпо́дь тѣлесе́мъ святы́хъ почи́ти* и ра́ку и́хъ чуде́съ исто́чникомъ содѣ́лати.* Пріиди́те у́бо, вѣ́рніи,* почерпи́те и пíйте отъ сего́ исто́чника врачева́ній* благода́тныя воды́,* и къ вино́внымъ на́шея ра́дости съ на́ми воззове́мъ псало́мски:* ра́дуйтеся, пра́ведніи Се́ргіе и Ге́рмане,* ва́мъ бо подоба́етъ похвала́,* ва́мъ прино́симъ по Бо́зѣ же́ртву хвале́нія.

Сла́ва, гла́съ 8:

Мона́ховъ ли́цы, Бо́га въ Тро́ицѣ славосло́вящихъ, и все́ мно́жество, соше́дшеся, ублажи́мъ отцы́ всехва́льныя, безмо́лвія рачи́тели, и́стинныя по́стники, всеизря́дныя дѣ́латели зако́на Бо́жія, свѣти́льники благода́тныя, плотоно́сныя а́нгелы, и возопіе́мъ къ ни́мъ, глаго́люще: отцы́ богоизбра́нніи Се́ргіе и Ге́рмане, небе́сніи су́ще гра́ждане, Влады́ку всѣ́хъ моли́те, вся́ гра́ды и страны́ Россíйскія отъ гла́да и меча́ сохрани́ти, ми́ръ Це́ркви Свое́й дарова́ти и спасти́ ду́ши на́ша.

И ны́нѣ, попра́зднства или́ богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь преподо́бныхъ, два́жды [пи́санъ на ма́лѣй вече́рни] и Богоро́дице Дѣ́во... или праздника, еди́ножды.



НА УТРЕНИ,
На Бо́гъ Госпо́дь: Тропа́рь преподо́бныхъ, два́жды. Сла́ва, и ны́нѣ, богоро́диченъ.
Аще слу́жба соверша́ется Септе́мврія во 11-й де́нь, егда́ е́сть попра́зднство, тогда́ пое́мъ тропа́рь пра́здника, два́жды. Сла́ва, святы́мъ. И ны́нѣ, пра́здника.

По 1-й каѳи́смѣ сѣда́ленъ, гла́съ 1:

Боже́ственнымъ жела́ніемъ распали́вшеся, преподо́бніи псало́мски ко Христу́ взыва́ху: что́ на́мъ е́сть на небеси́ па́че Тебе́, Бо́же вожделѣ́ннѣйше, жела́ній на́шихъ кра́ю? И отъ Тебе́ что́ восхотѣ́хомъ на земли́? Вся́ земна́я презрѣ́хомъ, вся́ тлѣ́нная вмѣни́хомъ за уме́ты, да Тебе́ еди́наго пріобря́щемъ, все́ю душе́ю возлю́бимъ и Тебѣ́ еди́ному послу́жимъ. Тѣ́хъ моли́твами, Человѣколю́бче Го́споди, любве́ Твоея́ сердца́ на́ша испо́лни и спаси́ на́съ, я́ко Благоутро́бенъ. [Два́жды.]

Сла́ва, и ны́нѣ, пра́здника или́ богоро́диченъ, гла́съ то́йже:

Яко небе́снаго Царя́ чистѣ́йшій хра́мъ была́ еси́, Пречи́стая, и, къ Нему́ иму́щая ма́тернее дерзнове́ніе, Того́ умоли́ти потщи́ся, е́же очи́стити ду́ши на́ша отъ мно́жества прегрѣше́ній и хра́мы че́стны въ жили́ще Себѣ́ человѣколю́біемъ Свои́мъ на́съ содѣ́лати, Того́ бо есмы́ творе́ніе. Аще и согрѣша́емъ, но наде́жды, е́же спасти́ся, не отпа́даемъ, иму́ще Тя́ къ Нему́, Влады́чице, те́плую о на́съ предста́тельницу.

По 2-й каѳи́смѣ сѣда́ленъ, гла́съ 5:

Не внѣ́шнее сткля́ницы и блю́да отъ Христо́выхъ слове́съ научи́шася преподо́бніи очища́ти, но вну́тренняго человѣ́ка отъ страсте́й грѣхо́вныхъ, отъ се́рдца бо исхо́дятъ помышле́нія зла́я. Тѣ́мъ въ безмо́лвіи, добродѣ́телей дѣ́ланіемъ и благода́ти дѣ́йствомъ серде́чную чистоту́ стяжа́вше, сосу́ди че́стни яви́шася Свято́му Ду́ху, и ны́нѣ на́мъ свы́ше, Христу́ предстоя́ще, неоску́дную благода́ть исцѣле́ній подаю́тъ и всѣ́мъ, вѣ́рно чту́щимъ свѣтоно́сную па́мять и́хъ. [Два́жды.]

Сла́ва, и ны́нѣ, пра́здника или́ богоро́диченъ, гла́съ то́йже:

Мы́сленная заре́, возсія́вшая мíру несозда́нное Со́лнце — Христа́, Пренепоро́чная Дѣ́во! Къ Тому́, я́ко Сы́ну Твоему́, простри́ Твои́ ма́тернія ру́цѣ съ моле́ніемъ, е́же возсія́ти на́мъ, грѣ́шнымъ, незаходи́мымъ свѣ́томъ благода́ти, я́ко да отло́жше дѣла́ тмы́, еле́емъ до́брыхъ дѣ́лъ просвѣти́мъ ду́ши на́ша и досто́йни бу́демъ вни́ти въ черто́гъ съ му́дрыми дѣ́вами, Тебе́, Влады́чице, велича́юще во вся́ вѣ́ки.

По поліеле́и сѣда́ленъ, гла́съ 4:

Хва́ляще и́мя Госпо́дне въ Боже́ственнѣмъ Его́ хра́мѣ, восхва́лимъ ку́пно вѣ́рныя Его́ рабы́, всехва́льныя отцы́ на́ша Се́ргія и Ге́рмана, и́же просла́виша Бо́га въ душа́хъ свои́хъ и тѣлесѣ́хъ и свѣ́томъ добродѣ́телей, я́ко звѣ́зды новоявле́нныя, просвѣти́шася во странѣ́ Каре́льстѣй. Тѣ́мже и Бо́гъ и́хъ въ небе́снѣмъ Ца́рствіи просла́ви и на́мъ помо́щники показа́, при́сно моля́щіяся о душа́хъ на́шихъ. [Два́жды.]

Сла́ва, и ны́нѣ, пра́здника или́ богоро́диченъ, гла́съ то́йже:

Сбытіе́ слове́съ Твои́хъ, Влады́чице, зри́тся: се́ бо ублажа́ютъ Тя́ вси́ ро́ди, и мы́, раби́ Твои́, превозно́симъ вы́ну по Бо́зѣ и́мя Твое́ и вопіе́мъ: ра́дуйся, земноро́дныхъ ра́досте; ра́дуйся, дѣ́вственныхъ похвало́; ра́дуйся, страстьми́ обурева́емымъ ти́хое приста́нище; ра́дуйся, отча́яннымъ прибѣ́жище и спасе́ніе; ра́дуйся, вѣ́рнымъ засту́пнице и покро́ве; ра́дуйся, въ жена́хъ еди́на благослове́нная, Богоро́дице Марíе, ро́ждшая всѣ́мъ Жи́знь.

Та́же степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Свѣтоно́сная отце́въ па́мять, я́ко труба́ велегла́сная, отъ всѣ́хъ стра́нъ вѣ́рныхъ мно́жество созыва́етъ и гла́съ орга́новъ у́мныхъ ко хвале́нію возбужда́етъ. Восхва́лимъ у́бо и вознесе́мъ въ пѣ́снехъ ра́дости на́шея вино́вныя, всехва́льныя отцы́ на́ша Се́ргія и Ге́рмана, и́же на́мъ ны́нѣ неви́димо спра́зднуютъ, ду́хомъ сра́дуются и благода́тныя да́ры у Христа́ про́сятъ, е́же уще́дрити вся́, досто́йно пра́зднующія всечестну́ю па́мять и́хъ.

Кано́нъ пра́здника пе́рвый, или́ во окто́ихѣ Богоро́дицы со ирмосо́мъ на 6, и преподо́бныхъ на 8, гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Со́лнце пра́вды — Христе́, возсія́й ми́ дне́сь свѣ́томъ ра́зума Твоего́, да свѣти́льники на́ша, Се́ргія и Ге́рмана, се́рдцемъ и устна́ми воспою́ во сла́ву Твою́, Влады́ко.

Реко́ша въ себѣ́ святíи: бѣжи́мъ простра́ннаго пути́, зане́ въ па́губу веде́тъ, бѣжи́мъ грѣхо́вныхъ страсте́й, до а́да бо низво́дятъ, тѣ́сный же пу́ть возлю́бимъ, да наслѣ́димъ жи́знь вѣ́чную.

Якоже дожде́мъ, слеза́ми зе́млю се́рдца ва́шего напая́юще, и, я́ко со́лнцемъ, теплото́ю моли́твы согрѣва́юще, добродѣ́телей плоды́, Се́ргіе и Ге́рмане, виногра́да Дѣ́лателю принесо́сте.

Богоро́диченъ: Добродѣ́тели святы́хъ пою́ и сла́влю, са́мъ же зла́я твори́ти, увы́ мнѣ́, не престаю́. Но, Влады́ко Христе́, моли́твами Ма́тере Твоея́ и мене́, окая́ннаго, отъ сна́ лѣ́ности къ добродѣ́телей дѣ́ланію возбуди́.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Преслу́шавъ за́повѣдь, пра́отецъ сла́дости ра́йскія лише́нъ бы́сть, послуша́ніемъ же святíи вѣ́чную жи́знь наслѣ́довавше, богозрѣ́ніемъ наслажда́ются.

Та́йное дѣ́ланіе ва́ше, безмо́лвія люби́теліе, ви́дя Оте́цъ Небе́сный, я́ко сы́ны Своя́ уще́дри, благода́тію обогати́ и на небесѣ́хъ просла́ви.

Чистоты́ рачи́тели, земны́я а́нгелы, избра́нныя сосу́ды Свята́го Ду́ха, чи́стое зерца́ло цѣлому́дрія, Се́ргія и Ге́рмана чистото́ю се́рдца почти́мъ.

Богоро́диченъ: Ра́бъ сы́й чре́ва, ка́ко возмогу́ пло́ть ду́ху покори́ти и чистоту́ а́нгельскую стяжа́ти? Но, о дѣ́вственныхъ похвало́, Пречи́стая! Ты́ изъ плѣ́на сего́ изба́ви мене́, несмы́сленнаго.

Конда́къ и и́косъ пра́здника, а́ще е́сть попра́зднство.
Сѣда́ленъ, гла́съ 3:

Отъ шу́ма жите́йскихъ во́лнъ удаля́ющеся, во о́стровъ Нева́ по́нта съ восто́чныхъ стра́нъ пріидо́сте, идѣ́же ни глубина́ страсте́й, ни бу́ря духо́въ проти́вныхъ тве́рдости ума́ ва́шего, Се́ргіе и Ге́рмане, не возмо́же поколеба́ти, но по́двигомъ до́брымъ, въ безмо́лвіи подвиза́ющеся, благоуго́дни Христу́ яви́стеся, Его́же ны́нѣ предстоя́ще престо́лу, мольбу́ сотвори́те, да призира́етъ вы́ну милосе́рдымъ о́комъ Свои́мъ на мѣ́сто селе́нія ва́шего, спаса́я въ ми́рѣ ду́ши на́ша. [Два́жды.]

Сла́ва, и ны́нѣ, пра́здника или́ богоро́диченъ, гла́съ то́йже:

Не отъ а́нгелъ, ни отъ человѣ́къ, но отъ Твоего́ Сы́на, Влады́чице, Творца́ а́нгеловъ и человѣ́ковъ, кро́ткаго и смире́ннаго се́рдцемъ Іису́са, смире́нію удо́бь навы́кнути могу́ и не прилѣжу́: увы́ мнѣ́! го́рдъ сы́й, презо́рливъ и непокори́въ при́сно отъ нерадѣ́нія моего́ явля́юся. Тя́ у́бо, о Дѣ́во Пренепоро́чная, молю́ смире́нно съ те́плыми слеза́ми, е́же ду́хъ кро́тости и смире́нія се́рдцу моему́ дарова́ти, да вку́ситъ поко́й сладча́йшій душа́ моя́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Яко ло́зы виногра́да Христо́ва су́ще, Се́ргіе и Ге́рмане, грозда́ми добродѣ́телей процвѣ́тшіи, вино́мъ Боже́ственнаго весе́лія испо́лните сердца́ на́ша.

Мо́лимъ ва́съ, я́ко въ ра́дости су́щія пра́ведныхъ, всеблаже́нніи, вся́ку печа́ль и го́ресть отъ ду́шъ на́шихъ отгна́ти, я́ко да, ра́дующеся, сла́вимъ ва́съ.

Те́мная страсте́й бу́ря воста́ на мя́ и свѣ́тъ благода́ти сокрыва́ется отъ оче́съ мои́хъ. Но, о свидѣ́тельницы мы́сленніи! моему́ омраче́нію ускори́те въ по́мощь.

Богоро́диченъ: Ли́цы а́нгеловъ и преподо́бныхъ и мы́, грѣ́шніи, мо́лимъ Тя́, Благоутро́бне Го́споди, предста́тельствомъ Ма́тере Твоея́ уще́дри и спаси́ всѣ́хъ на́съ.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Кра́йнимъ безмо́лвіемъ, моли́твою же, и посто́мъ, и бдѣ́ніемъ ду́ши своя́ очи́стивше, пустыннолю́бцы Трисія́ннаго Свѣ́та прія́телище содѣ́лашася.

Не я́коже тро́сти, вѣ́тромъ коле́блемыя, но я́ко тве́рдіи столпи́, Се́ргій и Ге́рманъ, на краеуго́льномъ Ка́мени, Христѣ́, вѣ́рою утверди́вшеся, добродѣ́тельми просія́ша.

Іоа́ннову житію́ въ пусты́ни Іорда́новѣ и Иліину́ безмо́лвію на горѣ́ ревну́юще, преподо́бніи, страсте́й и́га дѣя́ніемъ свобо́ждшеся, богозрѣ́ніемъ просвѣти́шася.

Богоро́диченъ: Ты́ покро́въ мо́й отъ напа́стей вра́жіихъ, Влады́чице, Ты́ свѣ́тъ се́рдцу моему́, печа́льми жите́йскими омраче́нному, при́сно бу́ди, Богоро́дице, и спаси́ мя.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Яко же́ртву непоро́чну и всесожже́ніе ту́чно, принесо́ша себе́ святíи Бо́гу, и, па́че вся́каго всепло́дія же́ртвы и приноше́нія, благоуго́дни Ему́ яви́шася.

Умныма очи́ма зря́ще предъ собо́ю Го́спода, богоблаже́нніи, непоро́чно ше́ствовали есте́ по стезя́мъ за́повѣдей Его́, утвержде́ни иму́ще но́зѣ благода́тію Свята́го Ду́ха.

Не имѣ́ поко́я боголюби́вый ду́хъ ва́шъ, Се́ргіе и Ге́рмане, до́ндеже не обрѣто́сте себѣ́ мѣ́сто безмо́лвія. Въ то́мъ бо вѣ́рою и любо́вію съ Бо́гомъ соедини́вшеся, вѣ́чный поко́й наслѣ́довасте.

Богоро́диченъ: Не ки́томъ, я́коже Іо́на, но грѣхо́мъ пожре́нъ сы́й, вопію́: Влады́ко Христе́! моли́твами Пречи́стыя Твоея́ Ма́тере и преподо́бныхъ оте́цъ отъ истлѣ́нія мя́ изба́ви, я́ко Благоутро́бенъ.

Конда́къ, гла́съ 4:

Отъ мірска́го житія́ изше́дше, отверже́ніемъ мíра Христу́ послѣ́довасте, и достиго́сте вели́каго Нева́ е́зера, и, въ не́мъ на о́стровѣ Валаа́мѣ все́льшеся, равноа́нгельное житіе́ пожи́ли есте́, отону́дуже, веселя́щеся, прешли́ есте́ къ небе́снымъ черто́гомъ. И ны́нѣ со а́нгелы Влады́чню престо́лу предстоя́ще, помина́йте на́съ, ча́дъ свои́хъ, я́же собра́ли есте́, богому́дріи, да ра́достно отъ души́ вопіе́мъ: ра́дуйтеся, Се́ргіе и Ге́рмане, отцы́ преблаже́нніи.

Икосъ:

Ка́ко, неразу́менъ сы́й, воспою́ по́стники всехва́льныя? Сло́во бо прему́дрости и сло́во ра́зума нѣ́сть дано́ ми́, безслове́сіемъ одержи́му су́щу. Ты́ Са́мъ, смы́сла Пода́телю, Іису́се, Прему́дрость вѣ́чная и Сло́во Бо́жіе Ѵпоста́сное, моли́твами преподо́бныхъ у́мъ мо́й просвѣти́ и да́руй сло́во, да гла́сомъ а́нгельскимъ воспою́ и́хъ, глаго́ля: ра́дуйтеся, звѣ́зды мы́сленныя, отъ восто́ка на́мъ возсія́вшія; ра́дуйтеся, безмо́лвія люби́тели всеизря́дніи; ра́дуйтеся, Христо́выхъ за́повѣдей дѣ́латели непоро́чніи; ра́дуйтеся, златíи сосу́ди, Ду́хомъ Святы́мъ испо́лненніи; ра́дуйтеся, столпи́ одушевле́нніи, зда́ніе по́стничества утвержда́ющіи; ра́дуйтеся, кри́ни, чистото́ю серде́чною, а́ки снѣ́гомъ, убѣле́нніи; ра́дуйтеся, ма́слины, отъ Христа́ на́мъ еле́й милосе́рдія плодонося́щія; ра́дуйтеся, вѣ́рнымъ побо́рницы, моли́твеннымъ копіе́мъ сопроти́вныя поража́ющіи; ра́дуйтеся, цѣли́теліе тѣле́сныхъ не́мощей и страсте́й душе́вныхъ; ра́дуйтеся, ускоря́ющіи въ по́мощь обурева́емымъ и ва́мъ моля́щимся; ра́дуйтеся, Валаа́му свѣти́ла ве́лія и пресвѣ́тлая; ра́дуйтеся, Се́ргіе и Ге́рмане, отцы́ всеблаже́нніи.

Пѣ́снь 7.

Ирмо́съ: Юноши три́ въ Вавило́нѣ, велѣ́ніе мучи́телево на бу́йство прело́жше, посредѣ́ пла́мене вопія́ху: благослове́нъ еси́, Го́споди, Бо́же оте́цъ на́шихъ.

Огню́ су́щу въ ва́съ, Се́ргіе и Ге́рмане, Боже́ственныя любве́, пла́мень по́хоти и о́гнь я́рости претвори́ся въ ро́су. Тѣ́мъ, ра́дующеся, въ безмо́лвіи воспѣва́сте: благослове́нъ еси́, Го́споди, Бо́же оте́цъ на́шихъ.

Пло́ти свое́й, я́коже злато́му и́долу о́троцы, преподо́бніи не послужи́ша, но, апо́стольски распина́юще ю со страстьми́ и похотьми́, покори́ша ду́ху и, хра́мы че́стни сотво́ршеся Свято́му Ду́ху, взыва́ху: благослове́нъ еси́, Го́споди, Бо́же оте́цъ на́шихъ.

Яко чистоты́ храни́тели, чистѣ́йшему Божеству́ вмѣсти́лище содѣ́лашася, любому́дріи, и, во пло́ти су́ще, тайнодѣ́йствіемъ Утѣ́шителя къ премíрныхъ зрѣ́нію восхища́хуся, пою́ще: благослове́нъ еси́, Го́споди, Бо́же оте́цъ на́шихъ.

Богоро́диченъ: Яко Ма́терь Безнача́льнаго Бо́га Сло́ва су́щую, Тя́, Влады́чице, прошу́ умиле́нно отъ безслове́сныхъ страсте́й изба́вити мя́, я́ко о́троки отъ пе́щи халде́йскія, да съ ни́ми, ра́дуяся, воспою́: благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Бо́дреннымъ ума́ трезвѣ́ніемъ и те́плымъ ко Христу́ моле́ніемъ, діа́вола, я́ко льва́ рыка́ющаго и и́щущаго кого́ поглоти́ти, преподо́бніи посрами́ша, стра́стныя того́ прило́ги отсѣ́кше. Тѣ́мъ со о́троки поя́ху: вся́ дѣла́, благослови́те, по́йте Го́спода.

Вся́ ору́жія Бо́жія Се́ргій и Ге́рманъ воспріи́мше на гора́хъ Валаа́ма, я́коже Моисе́й и Ааро́нъ, воздѣя́ніемъ ума́ и ру́къ на высоту́, сопроти́вныхъ си́лу, вѣ́рнымъ спобо́рствующе, осла́биша, пою́ще пѣ́снь: вся́ дѣла́, благослови́те, по́йте Го́спода.

Безнача́льная, Вседержи́тельная, Единосу́щная Свята́я Тро́ице, моли́твами преподо́бныхъ Твои́хъ отъ тре́хъ мы́сленныхъ враго́въ боре́ній ду́ши на́ша изба́ви, поми́луй и спаси́ всѣ́хъ, благоче́стно Тя́ исповѣ́дающихъ.

Богоро́диченъ: Богоуго́дно пожи́вшимъ послѣ́довати мене́ сотвори́ до́брыми дѣ́лы, Всенепоро́чная, потребля́ющи отъ души́ моея́ прило́ги лука́выхъ де́моновъ и возводя́щи при́сно у́мъ мо́й къ зрѣ́нію за́повѣдей Сы́на Твоего́ и Творца́ моего́.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

На тве́рдомъ вѣ́ры ка́мени благода́тію утвержде́ни су́ще, въ безмо́лвіи подвиза́ющеся, тече́ніе по́стничества до́брѣ сконча́вше и мздовоздая́ніе отъ Христа́ пріи́мше, Тому́ ны́нѣ моли́теся, всеблаже́нніи, въ вѣ́рѣ и добродѣ́тели вѣ́рныя Своя́ утверди́ти.

Яко побѣди́тели мы́сленныхъ враго́въ, Се́ргіе и Ге́рмане, предстоя́ще ны́нѣ престо́лу небе́сныхъ си́лъ Царя́, моли́те бла́гость Его́ Благочести́вому Импера́тору на́шему на сопоста́ты побѣ́ду и одолѣ́ніе дарова́ти.

Въ небе́сныхъ су́ще оби́телехъ, преподо́бніи, Влады́ку всѣ́хъ моли́те оби́тель сію́ и вся́ гра́ды и страны́ христіа́нскія въ ми́рѣ сохрани́ти и вся́ ны́ спасти́, благоче́стно ва́съ почита́ющія.

Богоро́диченъ: Ка́мень краеуго́льный, Христо́съ, вѣ́рнымъ е́сть основа́ніе, невѣ́рнымъ же — ка́мень претыка́нія и собла́зна. На се́мъ Ка́мени, Влады́чице, утверди́ мое́ помышле́ніе и спаси́ мя, я́ко къ Нему́ иму́щая ма́тернее дерзнове́ніе.

Свѣти́ленъ:

Свѣтода́вче Го́споди! Свѣти́льниковъ на́шихъ, Се́ргія и Ге́рмана, моли́твами просвѣти́ на́съ, вѣ́рою Тебѣ́ служа́щихъ и благоче́стно пра́зднующихъ свѣтоно́сную тѣ́хъ па́мять. [Два́жды.]

Сла́ва, и ны́нѣ, пра́здника или́ богоро́диченъ:

Свѣще́ та́инственная, Богоневѣ́сто! Су́щимъ во тмѣ́ неразу́мія свѣ́томъ ра́зума и́стины возсія́й и спаси́ всѣ́хъ, благоче́стно Тя́ я́ко Ма́терь Бо́жію велича́ющихъ.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́ во о́бразъ на́мъ* благоугожда́ти Тебѣ́, Го́споди,* благíя и вѣ́рныя рабы́ Твоя́ Се́ргія и Ге́рмана,* и́же у́мнымъ бо́дреннымъ трезвѣ́ніемъ* бори́тели де́моны посрами́ша,* стра́стныя прило́ги и́хъ доблему́дренно отрази́вше* и грѣху́ не бы́вше раби́,* Тебѣ́ благоуго́дни яви́шася,* Іису́се Всеси́льне, Спа́се ду́шъ на́шихъ.

Творе́ніемъ Госпо́днихъ за́повѣдей* и непреста́нныя моли́твы дѣ́йствомъ* Боже́ственныя любве́ теплоту́ стяжа́вше, святíи отцы́,* и сла́дость тоя́ душе́внымъ чу́вствомъ вкуси́вше,* ко Христу́ взыва́ху:* ника́я ина́я сла́дость* не разлучи́тъ на́съ отъ любве́ Твоея́,* Іису́се Сладча́йшій, Спа́се ду́шъ на́шихъ.

Яко неистощи́мое сокро́вище* и непрестае́мый пото́къ духо́вныхъ дарова́ній,* преподо́бныхъ оте́цъ ра́ка* въ Боже́ственнѣмъ се́мъ хра́мѣ отъ Тебе́ на́мъ дарова́ся,* Іису́се Человѣколю́бче, Спа́се всего́ мíра,* Благода́телю ще́дрый,* Врачу́ ду́шъ и тѣле́съ на́шихъ.

Ра́дуйся, пусты́не,* пре́жде безпло́дна и необита́ема бы́вшая,* ны́нѣ же я́ко кри́нъ цвѣту́щая* и и́нокъ мно́жествомъ испо́лненная;* взыгра́йте, го́ры Валаа́ма и вся́ древа́ дубра́вная,* во дне́шній де́нь ра́достнаго торжества́,* хва́ляще съ на́ми Се́ргія и Ге́рмана,* отцы́ всехва́льныя.

Сла́ва, гла́съ 6:

Благода́рнымъ се́рдцемъ и устна́ми хва́лимъ Тя́, Всеси́льне Го́споди, ди́вный во святы́хъ Твои́хъ и творя́й и́ми ве́лія и пресла́вная; ди́венъ бо яви́лся еси́ и въ преподо́бныхъ отцѣ́хъ на́шихъ, и́миже въ ну́ждахъ вѣ́рнымъ посо́бствуеши, предста́тельствомъ и́хъ больны́мъ подае́ши здра́віе, отъ злы́хъ духо́въ свобожда́еши, отъ потопле́нія спаса́еши. Тѣ́мъ, ны́нѣ соверша́юще па́мять и́хъ, покланя́емся держа́вѣ Твое́й и, славосло́вяще, вопіе́мъ: Безнача́льный Отче, Собезнача́льный Сы́не и равноче́стный Святы́й Ду́ше, Трои́це Свята́я, сла́ва Тебѣ́.

И ны́нѣ, пра́здника, или́ богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].


НА ЛИТУРГІИ,

Блаже́нна отъ кано́на пра́здника, а́ще е́сть, преподо́бныхъ, пѣ́снь 3 и 6. Проки́менъ, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́]. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 10 об. – 19.

/ Къ оглавленію раздѣла /


Наверхъ / Къ титульной страницѣ

0