Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 10-й де́нь.
Святы́хъ му́ченицъ Минодо́ры, Митродо́ры и Нимфодо́ры.

[ВЕЧЕРЪ,]
На Го́споди воззва́хъ: стихи́ры пра́здника 3. Гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Яко отъ безча́дна ложесна́* и непло́дна чре́ва,* же́злъ, Цвѣ́тъ нося́щій, прозяба́етъ дне́сь,* Богома́ти и Неискусобра́чная,* отъ пра́ведныхъ Іоаки́ма и Анны;* тѣ́мже ра́дуются проро́честіи собо́ри* и патріа́рховъ ве́сь со́нмъ* въ рождествѣ́ Ея́.

Дне́сь Дави́дъ ра́дуется,* и Іессе́й лику́етъ,* и Левíй велича́ется,* и игра́етъ ду́хомъ Іоаки́мъ пра́ведный,* и безча́діе рѣши́тся Аннино я́вѣ* Твои́мъ, рождество́мъ, Марíе Чи́стая,* о Неискусобра́чная,* и а́нгеловъ совокупле́ніе съ земны́ми всѣ́ми* блажа́тъ боже́ственное чре́во Твое́.

Ра́дуйся, земны́хъ совокупле́ніе;* ра́дуйся, хра́ме Госпо́день;* ра́дуйся, Ма́ти безневѣ́стная,* я́же Аннино разрѣ́шшая пресла́вно непло́дство* и земны́мъ источи́вшая оставле́ніе грѣхо́въ рождество́мъ Твои́мъ;* ра́дуйся, Всенепоро́чная;* ра́дуйся, Боже́ственный хра́ме;* ра́дуйся, ски́ніе,* въ Ню́же всели́ся Творе́цъ и Госпо́дь.

Ины стихи́ры святы́хъ, гла́съ 4. Подо́бенъ: Яко до́бля.

Обагре́ніи кро́вными* себе́ украси́вше,* кра́сному добро́тою дѣ́вы отрокови́цы* нетлѣ́нно совокупи́стеся* Христу́ Бо́гу на́шему,* соблюда́ющему ва́ше дѣ́вство нескве́рнено,* въ безсме́ртномъ нетлѣ́нія невѣ́стницѣ,* во оби́телехъ небе́сныхъ,* въ черто́зѣ нерукотворе́ннѣмъ, му́ченицы.

Несоверше́нными у́бо тѣлесы́* и соверше́ннымъ умо́мъ* ве́тхаго змíя злонача́льнаго* побѣди́сте, сла́вніи, си́лою Ду́ха* и не́мощну того́ крѣ́пость показа́сте.* Тѣ́мъ воспрія́сте вѣнцы́ побѣ́ды,* Минодо́ра, Митродо́ра и Нимфодо́ра,* Тро́ицы побо́рницы.

И на у́ды раздробля́еми,* и огне́мъ снѣда́еми,* и желѣ́зными ногты́ терза́еми,* и на дре́вѣ повѣ́шаеми, и мече́мъ ссѣка́еми,* не отверго́стеся Христа́,* страстоте́рпицы прехва́льніи.* Тѣ́мже прія́сте вѣне́цъ побѣ́ды,* Минодо́ра, Митродо́ра и Нимфодо́ра,* Тро́ицы побо́рницы.

Сла́ва, и ны́нѣ, гла́съ 2:

Что́ шу́мъ пра́зднующихъ быва́етъ? Іоаки́мъ и Анна торжеству́ютъ та́йно: ра́дуйтеся съ на́ми, глаго́люще, Адаме и Ево, дне́сь, я́ко и́мже дре́вле преступле́ніемъ затвори́ша ра́й, пло́дъ благосла́венъ на́мъ даде́ся, Богоотрокови́ца Марíя, отверза́ющи его́ всѣ́мъ вхо́дъ.

На стихо́внѣ стихи́ры пра́здника, гла́съ 1. Подо́бенъ: Небе́сныхъ чино́въ.

Да отве́рзется две́рь богопріе́мнаго хра́ма,* хра́мъ бо всѣ́хъ Царя́ и престо́лъ,* дне́сь со сла́вою вну́трь пріе́мъ,* Іоаки́мъ возлага́етъ, освяти́въ Го́споду,* Юже изъ него́ избра́нную* бы́ти Ма́терь Бо́жію.

Сти́хъ: Слы́ши, Дщи́, и ви́ждь,* и приклони́ у́хо Твое́.

Всемíрныя мíру ра́дости* возсія́ша мы́сленныя лучи́,* предвозвѣща́ющія всѣ́мъ* Со́лнце сла́вы, Христа́ Бо́га,* въ рождествѣ́ Твое́мъ, Пречи́стая.* Ты́ бо хода́таица яви́лася еси́* и́стиннаго весе́лія же и благода́ти.

Сти́хъ: Лицу́ Твоему́ помо́лятся* бога́тіи лю́дстіи.

Всечестна́я сія́ сла́ва Твоя́, Чи́стая,* провозвѣща́етъ всѣ́мъ лю́демъ* Твоего́ благосе́рдаго благодѣ́тельства:* Ты́ бо ны́нѣшняго весе́лія Хода́таица еси́* и бу́дущія ра́дости вина́, Чи́стая,* моли́твою Твое́ю яви́ся на́мъ.

Сла́ва, и ны́нѣ, гла́съ 2. Самогла́сенъ:

Пронарече́нная всѣ́хъ Цари́ца, Бо́жіе оби́телище, отъ непло́дныя дне́сь утро́бы про́йде Анны сла́вныя, Присносу́щнаго Существа́ Боже́ственное пребыва́лище, Еюже безсту́дный а́дъ попра́ся и всеро́дная Ева въ тве́рдую жи́знь вво́дится. То́й досто́йно возопіи́мъ: блаже́нна Ты́ въ жена́хъ, и Пло́дъ чре́ва Твоего́ благослове́нъ.

Тропа́рь пра́здника:

Рождество́ Твое́, Богоро́дице Дѣ́во, [ра́дость возвѣсти́ все́й вселе́ннѣй: изъ Тебе́ бо возсія́ Со́лнце Пра́вды — Христо́съ Бо́гъ на́шъ, и разруши́въ кля́тву, даде́ благослове́ніе, и упраздни́въ сме́рть, дарова́ на́мъ живо́тъ вѣ́чный].


НА УТРЕНИ,
[На Бо́гъ Госпо́дь: Тропа́рь пра́здника, три́жды.]

По 1-й каѳи́смѣ сѣда́ленъ, гла́съ 4. Подо́бенъ: Ско́ро предвари́.

Іу́до, велича́йся, и да весели́тся Дави́дъ, Ада́ме, обнови́ся, и да крѣпи́тся Левíй, отъ ни́хже мнѣ́ роди́ся Христо́съ. Дви́гни цѣвни́цу, пѣснопи́сче, и глаго́ли: кто́ е́сть роди́вшаяся, Юже нарица́еши Дще́рь? Пита́тельница е́сть Жи́зни на́шея, Ма́ти Христа́ Бо́га.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 8. Подо́бенъ: Повелѣ́нное та́йно.

Обнови́ся, Ада́ме, ра́дуйся, Ево, весели́ся, Дави́де, благоду́шствуй, Анно, и́бо Ма́ти Зижди́теля твоего́ ражда́ется пресла́вно; лику́етъ, обно́вльшися, вся́ земля́ и ра́дуется, одѣ́яна во оде́жду; вся́къ язы́къ, лику́я, да вопіе́тъ ны́нѣ Марíи: блаже́нъ до́мъ Дави́довъ, я́ко пита́етъ Пита́тельницу Жи́зни на́шея.

Сла́ва, и ны́нѣ, то́йже.

Кано́нъ пра́здника, со ирмосо́мъ на 8, и му́ченицъ на 4.

Кано́нъ пра́здника, гла́съ 8.
Пѣ́снь 1.

Ирмо́съ: Сокруши́вшему бра́ни мы́шцею Свое́ю и прове́дшему Изра́иля сквозѣ́ Чермно́е мо́ре, пои́мъ Ему́, я́ко Изба́вителю на́шему Бо́гу, я́ко просла́вися.

Свята́я святы́хъ, во святѣ́мъ святи́лищи младе́нецъ возлага́ется воспита́тися отъ руки́ а́нгеловы. Вси́ у́бо вѣ́рно спра́зднуимъ въ рождествѣ́ Ея́.

Да ликовству́етъ вся́ тва́рь, да весели́тся же и Дави́дъ, я́ко отъ колѣ́на и отъ сѣ́мене его́ произы́де же́злъ, Цвѣ́тъ нося́щи Го́спода, Творца́ вся́ческихъ.

Непло́ды неражда́ющая Анна, но не безча́дна Бо́гу: се́ бо пронарече́ся отъ родо́въ Чи́стая Дѣ́ва Ма́ти. Тѣ́мже естества́ израсти́ Зижди́теля въ ра́біи о́бразѣ.

Тя́, незло́бивую Агницу, Агнца Христа́, Младе́нца отъ чре́ва Твоего́ приве́дшую въ на́ше существо́, вси́ отъ Анны рожде́нную Тя́ пѣ́сньми почита́емъ.

Тро́иченъ: Три́ Безнача́льна сла́влю, Три́ Свя́та пою́, Три́ Соприсносу́щна въ Существѣ́ Еди́номъ проповѣ́дую: Еди́нъ бо во Отцѣ́, и Сы́нѣ, и Ду́сѣ славосло́вится Бо́гъ.

Богоро́диченъ: Кто́ ви́дѣ отроча́, его́же не всѣ́я оте́цъ, млеко́мъ пита́емое? Или́ гдѣ́ ви́дѣна бы́сть дѣ́ва ма́ти? Истинно па́че ума́ обоя́, Богороди́тельнице Чи́стая.

Кано́нъ святы́хъ же́нъ, его́же краегране́сіе: Тре́хъ сестре́ницъ и́скреннихъ страда́нія чту́. Іо́сифъ. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Тро́ицу несозда́нную, Юже благоче́стно проповѣ́дасте, ми́лостиву на́мъ сотвори́те, му́ченицы сла́вніи, ны́нѣ чту́щимъ ва́ша боже́ственныя стра́сти и исправле́нія, богоблаже́нныя.

О глаго́лѣхъ небрего́ша мучи́теля отрокови́цы, боже́ственнымъ огражда́еми ору́жіемъ вѣ́ры, и подъя́ша му́къ треволне́ніе и сме́рть непра́ведну за вся́ческихъ Жи́знь.

Си́лою укрѣпля́емы всемо́щною Зижди́теля, му́жескій прія́ша нра́въ всечестны́я и змíя стропти́ваго и велича́ваго нога́ми попра́ша и на зе́млю низложи́ша.

Богоро́диченъ: Яко одушевле́нъ хра́мъ, я́ко нетлѣ́нну ски́нію, я́ко две́рь небе́сную, я́ко Боже́ственную трапе́зу, я́ко пала́ту и престо́лъ Влады́чень, Марíю Чи́стую пѣ́сньми почти́мъ.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Воспита́вшися во Свята́я святы́хъ, Дѣ́во Пречи́стая Богоро́дице, вы́шши яви́лася еси́ тва́ри, Зижди́теля пло́тію поро́ждши.

Благослове́нно чре́во твое́, цѣлому́дренная Анно, пло́дъ бо израсти́ла еси́ дѣ́вства, Юже безсѣ́менно Пита́теля тва́ри ро́ждшую и Изба́вителя Іису́са.

Тя́ блажи́тъ, Приснодѣ́во, вся́ тва́рь, отъ Анны дне́сь ро́ждшуюся, отъ ко́рене Іессе́ева же́злъ, пречи́стъ цвѣ́тъ, Христа́, израсти́вшую.

Тя́ вы́шшую всея́ тва́ри, Богоро́дице, показу́я, Чи́стая, Сы́нъ Тво́й, е́же отъ Анны вели́читъ Твое́ рождество́ и всѣ́хъ весели́тъ дне́сь.

Тро́иченъ: Тебѣ́ покланя́емся, Отче Безнача́льне Существо́мъ, пое́мъ Безлѣ́тнаго Сы́на Твоего́ и чте́мъ Соприсносу́щнаго Ду́ха Твоего́, я́ко Еди́наго Тро́е естество́мъ Бо́га.

Богоро́диченъ: Свѣтода́вца и Нача́льника жи́зни человѣ́ческія ро́ждшая, Чи́стая Богоро́дице, яви́лася еси́ сокро́вище жи́зни на́шея и две́рь непристу́пнаго Свѣ́та.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Умерщвле́нный умо́мъ пребеззако́нный мучи́тель Жи́зни на́шея, Христа́, лю́тѣ отврещи́ся понужда́ше тя́, му́ченице Минодо́ро, ураня́я.

Взира́ющія къ Бо́гу мучи́тель не пощадѣ́, но же́зліемъ неми́лостивно сокруши́ у́ды твоя́, вѣне́цъ тебѣ́ плеты́й вѣ́чный, му́ченице, неувяда́ющій.

Му́ками, требога́тіи святíи му́ченицы, сокро́вище на небесѣ́хъ и вѣ́чнующую сла́ву обрѣто́ша, я́сно Бо́гу прибли́жишася.

Богоро́диченъ: Явльшися, души́ моея́ тму́ отжени́ и грѣхо́вныя плени́цы расто́ргни, Чи́стая Дѣ́во, и спаси́ мя, ро́ждшая Всеще́драго.

Конда́къ, гла́съ 4. Подо́бенъ: Вознесы́йся.

За Тро́ицу терпѣли́вно страда́льчествовавшія, многоко́зненнаго врага́ побѣди́сте, бра́тски обле́кшеся Ду́хомъ, тѣ́мже водвори́стеся съ пятьми́ дѣ́вами въ небе́сномъ, страстоте́рпицы, черто́зѣ, и со а́нгелы Всецарю́ въ весе́ліи непреста́нно предстоите́.

Сѣда́ленъ, гла́съ 4. Подо́бенъ: Удиви́ся.

Удиви́шася ва́шему терпѣ́нію мно́гому небе́сніи ли́цы безпло́тныхъ си́лъ: я́коже бо ино́му стра́ждущу пребыва́сте, го́лени и соста́вы сокруша́еми, сме́рть го́рькую терпя́ще и же́нскимъ тѣ́ломъ змíя отсту́пника сокруша́юще, дѣ́вы, невѣ́сты Жизнода́вца, вѣ́ры побо́рницы.

Сла́ва, и ны́нѣ, пра́здника, гла́съ то́йже:

Отъ ко́рене Іессе́ева и отъ чре́слъ Дави́довыхъ Богоотрокови́ца Маріа́мъ ражда́ется дне́сь на́мъ; ра́достію бо ра́дуются вся́ческая и обновля́ются. Сра́дуйтеся ку́пно, не́бо и земля́, восхвали́те Ю, оте́чествія язы́къ. Іоаки́мъ весели́тся, и Анна торжеству́етъ, зову́щи: непло́ды ражда́етъ Богоро́дицу и Пита́тельницу Жи́зни на́шея.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Патріа́рхъ Іа́ковъ, прови́дѣвъ, Спа́се, вели́чія я́сно строе́нія Твоего́, вопія́ше Ду́хомъ, ко Іу́дѣ глаго́ля та́йно: отъ лѣ́торасли возше́лъ еси́, Сы́не мо́й, возвѣща́я Тя́ отъ Дѣ́вы Бо́га.

Ны́нѣ же́злъ Ааро́новъ, отъ ко́рене Дави́дова прозя́бшій, ны́нѣ Дѣ́ва Чи́стая происхо́дитъ, и сликовству́етъ не́бо и земля́, и вся́ оте́чествія язы́ковъ, и Анна и Іоаки́мъ та́инственно.

Ны́нѣ да весели́тся не́бо, да ра́дуется же земля́, и да лику́етъ Іоаки́мъ и Дави́дъ: о́въ у́бо я́ко роди́тель Тво́й, и́стинно ро́ждшія Бо́га, о́въ же я́ко пра́отецъ Тво́й, проповѣ́дая Твоя́ вели́чествія, Чи́стая.

Сра́дуется Тебѣ́ дне́сь, богому́дренная Анно, вселе́нная: Изба́вителя бо тоя́ Ма́терь процвѣла́ еси́, Юже отъ ко́рене прозя́бшую Дави́дова, же́злъ си́лы на́мъ нося́щую, Цвѣ́тъ Христа́.

Тро́иченъ: Сла́влю Безнача́льна Бо́га, Отца́ и Сы́на и Свята́го Ду́ха, Единосу́щную Тро́ицу Несозда́нную, Ейже предстоя́тъ серафи́ми благоговѣ́йно, зову́ще: Свя́тъ, Свя́тъ, Свя́тъ еси́, Бо́же.

Богоро́диченъ: Пребезнача́льное Нача́ло, нача́ло пріе́млетъ изъ Тебе́, Богороди́тельнице, плотски́мъ вре́менемъ и пребыва́етъ собезнача́льно, и вопло́щься Сло́во Отчее, и Ду́ху соприсносу́щное, сохраня́я Боже́ственное досто́инство.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Сія́ющи луча́ми Креста́, присноблаже́нная Митродо́ра, къ дре́ву привя́зана, терпя́ше о́гненную му́ку, пре́лести у́гліе росо́ю любве́ Христо́вы погаша́ющи.

Явле́ннымъ видѣ́ніемъ по́мыслъ простира́ющи, зря́щи Жениха́ добро́ты недомы́сленныя, біе́ма же́зліемъ, присноблаже́нная Митродо́ра терпя́ше до́блественнѣ болѣ́зни.

Украси́стеся, дѣ́вы, и свѣ́тло просла́вистеся, препросла́вленное Сло́во вся́чески возлюби́вше, Его́же уя́звлены любо́вію, претерпѣ́сте страсте́й наше́ствія крѣ́пцѣ.

Богоро́диченъ: Умерщвле́нна мя́ зло́бою льсти́ваго, Всенепоро́чная, Жи́знь ро́ждшая, оживи́, къ Тебѣ́ бо прибѣго́хъ; и впа́дшася во глубину́ грѣхо́вную возведи́, я́ко ми́лостива, Всенепоро́чная.

Пѣ́снь 5.

Ирмо́съ: Го́споди Бо́же на́шъ, ми́ръ да́ждь на́мъ, Го́споди Бо́же на́шъ, стяжи́ ны, Го́споди ра́звѣ Тебе́ ино́го не вѣ́мы, и́мя Твое́ имену́емъ.

Пречи́стое Твое́ рождество́, Дѣ́ва Непоро́чная, несказа́нное, и зача́тіе неизглаго́ланно, и рожде́ніе Твое́, Невѣ́сто неневѣ́стная: Бо́гъ бо бѣ́, ве́сь въ мя́ облекíйся.

Дне́сь да веселя́тся а́нгельстіи чи́ни, пѣ́сньми да лику́ютъ су́щіи изъ Ада́ма: роди́ся бо же́злъ, Цвѣ́тъ возрасти́вшій Христа́, Еди́наго Изба́вителя на́шего.

Дне́сь Ева разрѣша́ется осужде́нія, разрѣша́ется же и непло́дство, и Ада́мъ дре́внія кля́твы, о рождествѣ́ Твое́мъ, Тобо́ю бо отъ тли́ изба́вихомся.

Сла́ва Тебѣ́, Просла́вльшему непло́дную дне́сь: роди́ бо же́злъ присноцвѣту́щій отъ обѣща́нія, отъ него́же прозябе́ Христо́съ, Цвѣ́тъ жи́зни на́шея.

Тро́иченъ: Сла́ва Тебѣ́, Отче Святы́й, Бо́же Нерожде́нне; сла́ва Тебѣ́, Сы́не Безлѣ́тне, Единоро́дне; сла́ва Тебѣ́, Ду́ше Боже́ственный и Сопресто́льный, отъ Отца́ происходя́й и въ Сы́нѣ пребыва́яй.

Богоро́диченъ: Бы́сть чре́во Твое́ Со́лнца носи́ло, пребы́сть чистота́ Твоя́, я́коже пре́жде, невреди́ма, Дѣ́во, Христо́съ бо Со́лнце, я́ко отъ черто́га жени́хъ, яви́ся изъ Тебе́.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Нра́въ терпѣли́въ и непобѣди́мь смы́слъ му́ченицы предъ суди́щемъ показа́вше, побѣ́ды вѣне́цъ себѣ́ исплето́ша.

Ны́нѣ терпи́тъ желѣ́зныхъ ногте́й терза́нія крѣ́пко повѣ́шена Нимфодо́ра, Жениха́ возлюби́вши Безсме́ртнаго.

Трисвѣ́тлыя свѣщи́, трикро́вная хра́мина, селе́ніе Тро́ицы, да похва́лятся пѣ́сньми дѣ́вы богому́дрыя.

Богоро́диченъ: Тя́ еди́ну избра́нну и добру́ и непоро́чну обрѣ́тъ, воплоща́ется Пребоже́ственное Сло́во изъ Тебе́, Богора́дованная.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся, тѣ́мже, я́ко Іо́на, та́ко вопію́ Ти́: возведи́ отъ тли́ живо́тъ мо́й, Благоутро́бне Го́споди.

Святу́ю святы́хъ су́щу, цѣлому́дренніи роди́тели Твои́, Чи́стая, возложи́ша Тя́ въ хра́мѣ Госпо́дни воспита́тися че́стно и угото́ватися въ Ма́терь Ему́.

Непло́ды и ма́тери, лику́йте, дерза́йте и игра́йте, безча́дныя: безча́дна бо непло́ды Богоро́дицу прозяба́етъ, Яже изба́витъ отъ болѣ́зней Еву и кля́твы Ада́ма.

Слы́шу Дави́да, пою́ща Тебѣ́: приведе́тся дѣ́вы во слѣ́дъ Тебе́, приведу́тся въ хра́мъ Царе́въ. И съ ни́мъ Тя́ и а́зъ, Дще́рь Царе́ву, воспѣва́ю.

Пое́мъ свято́е Твое́ рождество́, чти́мъ и непоро́чное зача́тіе Твое́, Невѣ́сто Богозва́нная и Дѣ́во; сла́вятъ же съ на́ми а́нгеловъ чи́ни и святы́хъ ду́ши.

Тро́иченъ: Въ Тебѣ́ Тро́ическое та́инство пое́тся и сла́вится, Чи́стая: Оте́цъ бо благоволи́, и Сло́во всели́ся въ Тя́, и Боже́ственный Ду́хъ Тебе́ осѣни́.

Богоро́диченъ: Злата́я кади́льница была́ еси́, Огнь бо во утро́бѣ Твое́й всели́ся, Сло́во отъ Ду́ха Свя́та, и человѣ́ческимъ зра́комъ въ Тебѣ́ ви́дѣся, Богороди́тельнице Чи́стая.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Ви́дѣти жела́юще Твою́ добро́ту недомы́сленную, уязвля́еми любо́вію Твое́ю сладча́йшею, Безнача́льне Сло́ве, му́къ лю́тость до́блественнѣ претерпѣ́ша.

Яко кри́ны въ ве́ртѣ страда́льцевъ, процвѣто́ша пресла́вныя отрокови́цы и Це́рковь воня́ми разли́чныхъ му́къ облагово́ниша Ду́ха благода́тію.

Жениха́ Безсме́ртнаго Еди́наго жела́юще, неви́димою си́лою укрѣпля́еми, ви́димую сме́рть явле́нно преоби́дѣша дѣ́вы отрокови́цы.

Богоро́диченъ: Свя́тъ всели́выйся въ ложесна́ Твоя́ Госпо́дь, святѣ́йшу обрѣ́тъ Тя́ и чистѣ́йшу тва́ри всея́, Богома́ти Господоимени́тая, Пречи́стая Влады́чице.

Конда́къ пра́здника, гла́съ 4:

Іоаки́мъ и Анна поноше́нія безча́дства и Ада́мъ и Ева отъ тли́ сме́ртныя свободи́стася, Пречи́стая, во святѣ́мъ рождествѣ́ Твое́мъ. То́ пра́зднуютъ и лю́діе Твои́, вины́ прегрѣше́ній изба́вльшеся, внегда́ зва́ти Ти́: непло́ды ражда́етъ Богоро́дицу и Пита́тельницу Жи́зни на́шея.

Икосъ:

Моли́тва ку́пно и воздыха́ніе непло́дства и безча́дства Іоаки́ма же и Анны благопрія́тное, и во у́ши Госпо́дни вни́де, и прозябе́ пло́дъ живоно́сенъ мíру. Овъ бо моли́тву на горѣ́ творя́ше, о́ва же въ садѣ́ поноше́ніе ноша́ше, но съ ра́достію непло́ды ражда́етъ Богоро́дицу и Пита́тельницу Жи́зни на́шея.

Пѣ́снь 7.

Ирмо́съ: Халде́йская пе́щь, огне́мъ распаля́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Пра́зднуемъ, Чи́стая, и вѣ́рно покланя́емся свято́му Твоему́ Рождеству́, пою́ще Сы́на Твоего́, Имже изба́вихомся дре́вняго Ада́мова ны́нѣ осужде́нія.

Ны́нѣ Анна весели́тся и вопіе́тъ, хва́лящися: непло́ды су́щи, роди́хъ Бо́жію Ма́терь, Ея́же ра́ди осужде́ніе Евино разрѣши́ся, и я́же въ печа́лѣхъ болѣ́знь.

Ада́мъ свободи́ся, и Ева лику́етъ, и вопію́тъ ду́хомъ къ Тебѣ́, Богоро́дице: Тобо́ю изба́вихомся перворо́дныя кля́твы, я́вльшуся Христу́.

О, чре́во, вмѣсти́вшее Бо́жіе селе́ніе! О, утро́бо, носи́вшая небе́съ ши́ршую, престо́лъ святы́й, мы́сленный киво́тъ свяще́нія!

Тро́иченъ: Отца́ просла́вимъ, Сы́на и Ду́ха, во еди́нствѣ Божества́, Тро́ицу Пресвяту́ю, Нераздѣ́льную, Несозда́нную, и Соприсносу́щную, и Единосу́щную.

Богоро́диченъ: Ты́ Бо́га еди́на родила́ еси́, Дѣ́во, пресла́вно, Ты́ естество́ обнови́ла еси́ Рождество́мъ Твои́мъ, Марíе, Ты́ Еву разрѣши́ла еси́ перворо́дныя кля́твы, Богороди́тельнице Чи́стая.

Инъ.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Жре́ти и́доломъ глухи́мъ злочести́ваго мучи́теля повелѣва́юща оплева́сте, вопію́ще, отрокови́цы: отце́въ на́шихъ Бо́же, благослове́нъ еси́.

Просвѣще́нніи умо́мъ богонача́льными заря́ми, мглу́ и́дольскую очерни́сте, всехва́льныя, пою́ще: отце́въ на́шихъ Бо́же, благослове́нъ еси́.

Ни отсѣче́нія уде́съ, ни гоне́ніе, ни ско́рбь Христа́ отлучи́ти отню́дъ возмого́ша, вопію́щимъ му́ченицамъ: отце́въ на́шихъ Бо́же, благослове́нъ еси́.

Богоро́диченъ: Преесте́ственно Зижди́теля отъ утро́бы Твоея́, Дѣ́во, роди́ти сподо́билася еси́, земны́я назида́юща, пою́щія вѣ́рою: Бо́же, благослове́нъ еси́.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Сотвори́вый пресла́вная непло́днѣй утро́бѣ, отве́рзый Анны неражда́ющая ложесна́, и пло́дъ е́й да́въ, Ты́ Бо́же Святы́й, Ты́ Сы́не Дѣ́вы, Ты́ отъ Сея́ пло́ть прія́лъ еси́, присноцвѣту́щія Дѣ́вы и Богоро́дицы.

Затворя́яй бе́здну и отверза́яй ю́, вознося́й во́ду во о́блацѣхъ и дая́й до́ждь, Ты́, да́вый, Го́споди, отъ непло́днаго ко́рене прозя́бнути Анны святы́я пречи́стъ пло́дъ, и роди́ти Богоро́дицу.

Дѣ́лателю мы́слей на́шихъ и Насади́телю ду́шъ на́шихъ, Ты́, непло́дную зе́млю благопло́дну показа́вый, Ты́ дре́вле суху́ю родови́ту, благокла́сну, бразду́ плодоно́сну содѣ́лалъ еси́ Анну святу́ю, пречи́стъ пло́дъ израсти́ти, Богоро́дицу.

Пріиди́те, вси́ у́зримъ, я́ко отъ черто́га ма́ла, Бо́жій гра́дъ, ны́нѣ ражда́емый, и́же отъ две́ри утро́бныя исхо́дъ иму́щую, вхо́дъ же не вѣ́дущу обще́нія: Еди́нъ Бо́гъ Зижди́тель Се́ю про́йде стезе́ю стра́нною.

Тро́иченъ: О, Тро́ице Пресу́щная, Еди́нице Собезнача́льная! Тя́ пое́тъ и трепе́щетъ мно́жество а́нгелъ, не́бо и земля́ и бе́здны ужаса́ются, человѣ́цы благословя́тъ, о́гнь рабо́таетъ, вся́ послу́шаютъ Тебе́, Тро́ице Свята́я, со стра́хомъ, я́же въ тва́ри.

Богоро́диченъ: О, новѣ́йшаго слы́шанія: Бо́гъ — Сы́нъ Жены́! О, безсѣ́меннаго Рождества́! Безму́жняя Ма́ти и рожде́нное Бо́гъ! О, ужа́снаго видѣ́нія! О, зача́тія стра́ннаго Дѣ́вы! О, несказа́ннаго Рождества́! Истинно па́че ума́ вся́ и видѣ́нія.

Инъ.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Изостри́вшеся любо́вію Творца́, притупи́сте жа́ла зміи́ная, въ же́нстѣмъ тѣлеси́ му́жескія воспріе́мше по́двиги, и вѣнцы́ небе́сными вѣнча́стеся.

Спле́тшеся посредѣ́ по́двига, неви́димыя враги́ съ пло́тію безпло́тныя побѣди́ша богому́дріи отрокови́цы, вопію́ще: благослови́те, вся́ дѣла́ Госпо́дня, Го́спода.

О Бо́зѣ Спа́сѣ вжиля́еми, о Христѣ́ Іису́сѣ возмога́юще, вра́жію некрѣ́пкую погуби́сте держа́ву, воспѣва́юще: вся́кая дѣла́, благослови́те, Госпо́дня, Го́спода.

Ца́рство вы́шнее получи́сте, со Христо́мъ Іису́сомъ ца́рствующе, испещре́ны ра́нами му́къ, добро́тою укра́шены, досточу́дныя отрокови́цы.

Богоро́диченъ: Яко Бо́жіе нескве́рное жили́ще, Его́же прія́ла еси́ воплоща́ема и во дву́ естеству́ зна́ема, Отрокови́це, Ему́же пое́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Чу́жде ма́теремъ дѣ́вство, и стра́нно дѣ́вамъ дѣторожде́ніе; на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ.

Досто́йное, Богома́ти, Твоея́ чистоты́ рождество́ наслѣ́довала еси́ чрезъ обѣща́ніе: иногда́ бо непло́днѣй богопрозябе́нъ пло́дъ вдала́ся еси́. Тѣ́мъ Тя́, вся́ племена́ земна́я, непреста́нно велича́емъ.

Испо́лнися вопію́щаго проро́чество, глаго́летъ бо: возста́влю ски́нію па́дшую свяще́ннаго Дави́да, въ Тебѣ́, Чи́стая, прообрази́вшуюся, Ея́же ра́ди всѣ́хъ человѣ́ковъ пе́рсть въ Тѣ́ло созда́ся Бо́жіе.

Пелена́мъ покланя́емся Твои́мъ, Богоро́дице, сла́вимъ Да́вшаго пло́дъ пре́жде непло́днѣй и Отве́рзшаго ложесна́ неражда́ющей пресла́вно. Твори́тъ бо вся́, ели́ка хо́щетъ, Бо́гъ сы́й самовла́стенъ.

Яко да́ръ Тебѣ́, Богоро́дице, пѣснопѣ́ніе, отъ Анны ро́ждшейся, вѣ́рно дароно́симъ: ма́тери Ма́терь, дѣ́вы же Дѣ́ву еди́ну, славосло́вяще, покланя́емся Тебѣ́, пое́мъ и сла́вимъ.

Тро́иченъ: Чу́жде е́сть беззако́ннымъ сла́вити Безнача́льную Тро́ицу, Отца́ и Сы́на же и Свята́го Ду́ха, несозда́нное Вседержа́вство, Еюже мíръ ве́сь содержи́тся ма́ніемъ держа́вы Ея́.

Богоро́диченъ: Вмѣсти́ла еси́ во утро́бѣ Твое́й, Дѣ́во Ма́ти, Еди́наго отъ Тро́ицы, Христа́ Царя́, Его́же пое́тъ вся́ тва́рь и трепе́щутъ вы́шніи чи́ни: Того́ моли́, Всечи́стая, спасти́ся душа́мъ на́шимъ.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ви́дѣти жела́юще добро́ту Жениха́, всеобра́знымъ ма́ніемъ къ Нему́, богоно́сицы, безсме́ртію поучи́стеся въ ме́ртвеннѣмъ тѣлеси́. Тѣ́мъ досто́йно ублажа́етеся.

Яви́стеся мучи́телей посредѣ́, а́ки въ во́лцѣхъ суро́выхъ, а́гницы нескве́рныя, си́хъ звѣрови́дное пребора́ющія, и Христу́, благопрія́тна я́ко же́ртва, принесо́стеся.

Вѣне́цъ исплето́сте ку́пно неветша́ющъ, дѣ́вы, Боже́ственныя улучи́вше сла́вы, и Ца́рствія и́стинно непоколеби́маго прія́ти, я́ко му́ченицы, съ му́ченики сподо́бистеся.

Ея́же сподо́бистеся сла́вы, е́же получи́сте ликова́ніе, соверша́ющимъ любо́вію ва́шу па́мять улучи́ти моли́теся, я́ко дерзнове́ніе иму́ще ко Влады́цѣ, честны́я дѣ́вы.

Богоро́диченъ: Пощади́ мя, Христе́, егда́ хо́щеши суди́ти мíръ со сла́вою, разори́ мглу́ страсте́й мои́хъ моли́твами Ро́ждшія Тя́ и честны́хъ му́ченицъ Твои́хъ, я́ко Бла́гъ и Многоми́лостивъ.

Свѣти́ленъ. Подо́бенъ: Свѣ́те неизмѣ́нный.

Со́лнце отню́дуже произы́де мы́сленное по пло́ти дне́сь озари́ мíръ отъ непло́дныхъ ложе́снъ. Тѣ́мже, игра́юще, вопіе́мъ: ра́дуйся, Марíе, пра́отцевъ избавле́ніе.

Сла́ва, и ны́нѣ, то́йже.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Бо́жій,* еди́на Богоро́дица* отъ непло́дове* и безча́дныя происхо́дитъ,* и ра́дуется Ада́мъ,* обновля́емый.

Сти́хъ: Слы́ши, Дщи́, и ви́ждь,* и приклони́ у́хо Твое́.

Дне́сь ра́дость* ражда́ется отъ Анны,* возвѣща́ющи мíру* разрѣше́ніе кля́твы,* возра́дуйтеся, вся́ческая.

Сти́хъ: Лицу́ Твоему́ помо́лятся* бога́тіи лю́дстіи.

Ра́дуйся, Іоаки́ме,* и Анно богому́драя,* я́ко ро́ждшая мíру* ра́дость и весе́ліе* и спасе́нія хода́таицу.

Сла́ва, и ны́нѣ, гла́съ 4:

Всемíрная, ра́дость отъ пра́ведныхъ возсія́ на́мъ, отъ Іоаки́ма и Анны, Всепѣ́тая Дѣ́ва, Яже премно́гія ра́ди чистоты́ хра́мъ Бо́жій одушевле́нный быва́етъ и еди́на вои́стинну Богоро́дица познава́ется. Тоя́ моли́твами, Христе́ Бо́же, ми́ръ мíру низпосли́ и душа́мъ на́шимъ ве́лію ми́лость.


НА ЛИТУРГІИ,
Блаже́нна пра́здника, пѣ́снь 4-я и 5-я, на 8.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 107 об. – 115.

/ Къ оглавленію раздѣла /


Наверхъ / Къ титульной страницѣ

0