Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 9-й де́нь.
Свята́го му́ченика Северіа́на.

Зри́: Слу́жба му́ченика пое́тся на повече́ріи.

Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Одержа́ше велѣ́ніе нечести́вое жре́ти и́доломъ безду́шнымъ же и глухи́мъ, побѣжда́ше же Христо́съ, му́ченическими крѣ́пкими и до́блими противле́ніи.

Свобожда́ше отъ у́зъ отмѣта́ющіяся Христа́ и вся́, я́же обрѣ́те чту́щія Того́ Бо́га, вся́чески начина́ше му́чити, но, прилу́чся тебѣ́, богому́дре, посрами́ся.

Удиви́лъ еси́, му́чениче, злочести́ваго, до́блественнѣ устреми́вся на суди́щи, и бого́въ ло́жныхъ обличи́лъ еси́ со дерзнове́ніемъ не́мощь, и гни́лость, и некрѣ́пость.

Богоро́диченъ: Вмѣсти́ла еси́ еди́на небесы́ Невмѣсти́маго, Отрокови́це, во утро́бѣ Твое́й, боголѣ́пнѣ Все́льшагося въ Тя́ и естество́ человѣ́ческое отъ Тебе́ Пріе́мшаго.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Ра́довался еси́, біе́мь за Христа́, му́дре, ра́нами неми́лостивно, имѣ́лъ бо еси́ извѣ́стное болѣ́зней воздая́ніе.

Жи́лами ссѣка́емь, измѣне́ніемъ ча́стымъ, сла́вне, мучи́телей, и сіе́, я́коже въ чужде́мъ тѣлеси́, не ощуща́лъ еси́.

Обрѣ́лъ еси́ возме́здіе отъ Христа́, му́дре, вѣне́цъ пріе́мь пра́вды и ра́дость несконча́емую.

Богоро́диченъ: Вся́, Бли́жняя моя́, добра́ и непоро́чна бы́сть, — Тя́ прови́дя дре́вле, вопія́ше Соломо́нъ въ пѣ́снехъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Ласка́ніи мучи́тель твою́ умягчи́ти, му́чениче, крѣ́пость и побѣди́ти тя́ надѣ́яся, не́бо стрѣля́ти мня́ше.

Не чу́вствуеши, безу́мне, Христо́ву си́лу, укрѣпля́ющу мя́ проти́ву болѣ́знемъ и трудо́мъ? — мучи́телю взыва́лъ еси́, пресла́вне.

Аще не бы́ си́ла свы́ше, пода́нная мнѣ́, — мучи́телю взыва́ше Северіа́нъ, — ка́ко у́бо бы́хъ мо́глъ, пло́ть сы́й, претерпѣ́ти отсѣче́нія уде́съ?

Богоро́диченъ: Пресвята́я Богоневѣ́сто, да́ждь ми́ по́мощь мольба́ми Твои́ми изба́витися льсти́ваго, да Тя́ сла́влю, наде́жду мою́.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

На дре́во воздви́женъ бы́лъ еси́, сла́вне, и по тѣ́лу стро́ганъ ногтьми́ за всѣ́хъ Влады́чествующаго.

Бо́же мо́й, — вопія́лъ еси́, — укрѣпи́ по́двигъ се́й сконча́ти мнѣ́ муче́нія, стру́жему.

Яко ви́дѣ тя́ мучи́тель, сла́вне, неосла́бне му́ки терпя́ща, ужасе́ся окая́нный.

Богоро́диченъ: Наде́жда и предста́тельнице, и покро́ве мо́й, Богоро́дице, спаса́й мя́ мольба́ми Твои́ми отъ собла́знъ зміи́ныхъ.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Въ темни́цѣ тя́ заключи́ лю́тый и гла́домъ пону́ди тя́ отврещи́ся Христа́, Его́же возлюби́лъ еси́, блаже́нне, отъ ю́ности.

Ведо́мъ, му́дре, въ темни́цу, вся́ зря́щія тя́ Христа́ не отступи́ти, со дерзнове́ніемъ уча́, нака́зовалъ еси́.

Мече́мъ усѣщи́ тя, му́чениче, лю́тый и безу́мный мучи́тель повелѣ́, не поже́рша и́доломъ, но ты́ небре́глъ еси́.

Богоро́диченъ: Въ ри́зу ми́ облещи́ся свѣ́та Твои́ми моли́твами сотвори́, Богоневѣ́сто Влады́чице, въ де́нь су́дный, пою́ща Тя́.

Сѣда́ленъ, гла́съ 1. Подо́бенъ: Ли́къ а́нгельскій.

До́блестію души́ вооруже́нъ, богому́дре, изда́лъ еси́ себе́ къ разли́чнымъ му́камъ, любо́вію распала́емь Влады́ки, пребога́те, тѣ́мъ обличи́лъ еси́ мучи́телей неи́стовство и вѣне́цъ отъ Бо́га прія́лъ еси́ побѣ́ды нетлѣ́нный.

Пѣ́снь 7.

Ирмо́съ: Въ нача́лѣ зе́млю основа́вый и небеса́ сло́вомъ утверди́вый, благослове́нъ еси́ во вѣ́ки, Го́споди Бо́же оте́цъ на́шихъ.

Ка́меніемъ о́стрымъ уста́ твоя́ сокруши́ нечести́вый, проповѣ́дающа со дерзнове́ніемъ Христа́ посредѣ́ пребеззако́нниковъ. Его́же сла́вы получи́въ, ны́нѣ лику́еши та́мо.

Повѣ́шенъ на стѣнѣ́, страстоте́рпче, мучи́теля мно́гимъ гнѣ́вомъ, къ ка́мени тя́жку привя́занъ, не отве́рглся еси́ Христа́, отце́въ Бо́га препросла́вленна.

О, тве́рдаго противле́нія твоего́, блаже́нне! О, те́плыя любве́ къ Зижди́телю! Ея́же ра́ди вѣнце́мъ украси́ тя нетлѣ́ннымъ, до́брѣ пострада́вша.

Богоро́диченъ: Ты́ мо́й еси́ свѣ́тъ, Дѣ́во Богоро́дице, Ты́ еси́ ра́дость и покро́въ, и приста́нище мое́, Благослове́нная, и Тя́ сла́влю, я́ко ро́ждшую Бо́га отце́въ на́шихъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Претерпѣ́лъ еси́ ра́ны до конца́, во́ине Христо́въ, и преста́вился еси́, ра́дуяся, къ вы́шнему, преблаже́нне, Ца́рствію.

Не посрами́лся еси́, Христа́ ра́ди, доблему́дренне, претерпѣ́въ му́ки разли́чныя, тѣ́мже и просла́вился еси́ во вся́ вѣ́ки.

Вѣнцено́сецъ со страда́льцы ны́нѣ лику́я и́стинно окру́гъ Царя́, помина́й вѣ́рою твою́ па́мять творя́щихъ.

Богоро́диченъ: Богороди́тельнице, христіа́нъ предста́тельнице, изми́ ны вся́кія ну́жды, да Тя́ пое́мъ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Рука́ми тебе́ лю́бящихъ, блаже́нне, твое́ тѣ́ло опря́тано погребе́ся, я́ко свя́то, и исцѣле́ній источа́етъ струи́, въ сла́ву Бо́жію.

О чу́до, ка́ко воста́ уме́рый о́трокъ и срѣта́ше твое́ тѣ́ло на пути́, къ погребе́нію несо́мо, му́чениче всечу́дне!

Получи́въ вѣ́чное, блаже́нне, Ца́рство и Влады́цѣ че́стнѣ предстоя́, о пою́щихъ тя́ те́плѣ моли́ся.

Богоро́диченъ: Диви́шася а́нгеловъ чинонача́лія, воплоще́нна зря́ще Тя́ нося́щую Творца́ вѣко́въ, Приснодѣ́ву.

Стихи́ры, гла́съ 4. Подо́бенъ: Да́лъ еси́ зна́меніе.

Жи́лами ссѣка́емь* Христа́ ра́ди, сла́вне,* и на дре́вѣ повѣ́шенъ,* и пло́тію стру́жемь неми́лостивно бичми́*, жре́ти же и́доломъ повелѣва́емь, му́дре,* не отве́рглся еси́ всѣ́хъ Го́спода,* но обличи́лъ еси́ болѣ́зньми твои́ми* не́мощь и ху́дость и́дольскую* и бы́лъ еси́ а́нгеловъ собесѣ́дникъ.

Ра́дуяся, отлучи́лся еси́ къ по́двигу,* я́ко зако́нный страда́лецъ, досточу́дне,* до́блимъ смы́сломъ,* о му́кахъ, му́чениче, неради́въ,* сме́ртію же Христу́* уподо́битися тща́ся, чу́дне,* тѣ́мъ тя́ вѣнце́мъ Ца́рствія украси́* Іису́съ Человѣколю́бецъ* и Спа́съ ду́шъ на́шихъ.

Сла́ва, гла́съ то́йже:

Узникъ ведо́мъ* и я́звами крася́ся,* зря́щимъ повелѣва́лъ еси́* подо́битися нра́ву твоему́,* къ небе́снымъ, блаже́нне, воздая́ніемъ смотря́щимъ,* я́же мно́го весе́ліе и красоту́ подаю́тъ,* я́ко нетлѣ́нная и во вѣ́ки пребыва́ющая,* въ ни́хъ пребыва́ющія* творя́ще наслѣ́дники Ду́хомъ.

И ны́нѣ, пра́здника:

Дне́сь излія́ся Боже́ственное бога́тство* благода́ти Влады́ки* во вся́ мíра концы́* отъ исто́чника непло́дныя,* дарова́нія источа́ющаго и́стинно* и возвѣща́ющаго Сего́ происхожде́ніе* любо́вію рождество́ Ея́ чту́щимъ* и вопію́щимъ: Іису́се Всеси́льне,* Ты́ еси́ Спа́съ ду́шъ на́шихъ.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 88 об. – 90 об.

/ Къ оглавленію раздѣла /


Наверхъ / Къ титульной страницѣ

0