Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 9-й де́нь.
Святы́хъ и пра́ведныхъ богооте́цъ Іоаки́ма и Анны.

[ВЕЧЕРЪ,]
На Го́споди воззва́хъ: стихи́ры пра́здника 3, гла́съ 1. Подо́бенъ: Небе́сныхъ чино́въ.

Іоаки́мъ и Анна торжеству́ютъ,* нача́токъ ро́ждше на́шего спасе́нія,* еди́ну Богоро́дицу,* съ ни́миже и мы́ пра́зднуемъ дне́сь,* отъ ко́рене о́наго Іессе́ева* блажа́ще Дѣ́ву Чи́стую.

Боговмѣсти́мая Отрокови́ца* и Богоро́дица Чи́стая,* проро́ковъ сла́ва,* Дави́дова Дщи́* дне́сь ражда́ется отъ Іоаки́ма и Анны цѣлому́дренныя,* и Ада́мова кля́тва, я́же на на́съ,* потребля́ется рождество́мъ Ея́.

Яже пре́жде непло́дная страна́* зе́млю плодоно́сну ражда́етъ* и, отъ непло́дныя утро́бы пло́дъ свя́тъ да́вши, млеко́мъ пита́етъ.* Чу́до стра́шно! Пита́тельница Жи́зни на́шея,* Яже небе́сный Хлѣ́бъ во чре́вѣ пріе́мши,* млеко́мъ отъ сосцу́ пита́ется.

Ины стихи́ры святы́хъ, гла́съ 4. Подо́бенъ: Да́лъ еси́ зна́меніе.

Пріиди́те ны́нѣ, лику́имъ пѣ́сненно,* о празднолю́бцы! и вѣ́рно пра́зднуимъ,* па́мять почита́юще* Іоаки́ма и Анны, честны́я дво́ицы;* тíи бо роди́ша на́мъ Богома́терь* и Дѣ́ву Чи́стую.* Тѣ́мже и преста́вишася отъ привре́менныхъ къ нетлѣ́ннымъ* и присноживы́мъ жили́щемъ,* моля́щеся спасти́ся на́мъ.

Ве́село красу́ется тва́рь вся́ дне́сь,* Богоро́дице Всепѣ́тая,* лѣ́тнюю принося́щи па́мять единому́дренно* Твои́хъ роди́телей,* Іоаки́ма чу́днаго,* ку́пно и Анны, торжеству́ющи:* ра́дость бо исхода́тайствоваша,* Тя́ па́че наде́жды израсти́вше, Свѣ́тъ облиста́вшую* и Пита́тельницу Жи́зни на́шея.

Ра́дуется дне́сь Анна, игра́ющи ду́хомъ,* и весели́тся, ра́дующися,* улучи́вши жела́ніе,* его́же жела́ше дре́вле, благоча́дія:* обѣща́нія бо пло́дъ и благослове́нія боже́ственный прозябе́,* Марíю Всенепоро́чную,* Бо́га на́шего ро́ждшую* и Со́лнце возсія́вшую* во тмѣ́ спя́щимъ.

Сла́ва, и ны́нѣ, гла́съ 5. Ефре́ма Карíя:

О, блаже́нная дво́ица, вы́ всѣ́хъ роди́телей превзыдо́сте, я́ко тва́ри всея́ Преиму́щую прозябли́ есте́! Истинно блаже́нъ еси́, Іоаки́ме, таковы́ Отрокови́цы бы́въ роди́тель. Блаже́нна ложесна́ твоя́, Анно, я́ко Ма́терь Жи́зни на́шея прозябла́ еси́; блаже́нни сосцы́, и́миже воздои́ла еси́ млеко́мъ Пита́вшую Пита́ющаго вся́кое дыха́ніе, Его́же моли́те, ва́мъ, всеблаже́нніи, мо́лимся, поми́ловатися душа́мъ на́шимъ.

Аще ли случи́тся въ пято́къ ве́чера: Сла́ва, пра́здника. И ны́нѣ, богоро́диченъ пе́рвый гла́са настоя́щаго.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Анна богому́дренна и́стиною, гнѣздо́ пти́че ви́дѣвши на дре́вѣ пре́жде, свое́ безча́діе помяну́вши, вопія́ше: увы́ мнѣ́, Го́споди, Го́споди, а́зъ, грѣ́шна, еди́на обнища́хъ плодотворе́нія отъ Тебе́. Тогда́ Человѣколю́бецъ Бо́гъ пло́дъ е́й Дѣ́ву, Честнѣ́йшую всея́ тва́ри, даде́.

Сти́хъ: Слы́ши, Дщи́, и ви́ждь, и приклони́ у́хо Твое́.

Анна богому́дренна вои́стинну безча́дное болѣ́ніе непло́дія позна́вше пе́рвѣе, тѣ́мже, моля́щися, вопія́ше къ Бо́гу: печа́льну и непло́дну у́зу разрѣши́, и рожду́ Свято́е роди́ти Тя́ Иму́щую Сло́во, е́же, Влады́ко Христе́ Жизнода́телю, да́руеши Ей: роди́тъ бо Тя́, Спа́са всѣ́мъ человѣ́комъ.

Сти́хъ: Лицу́ Твоему́ помо́лятся бога́тіи лю́дстіи.

Истинно Влады́ка и Бо́гъ же, Твою́ моли́тву услы́шавъ, я́ко Са́ррину пре́жде, внегда́ услы́ша а́нгеловъ гла́съ, ра́дость тебѣ́ проповѣ́дающь: Бо́жію Ма́терь роди́ши. И возопи́ла еси́ весе́ліемъ души́: Влады́ка и Госпо́дь, Бо́гъ мо́й и Творе́цъ, и́стиною мнѣ́ оста́ви укоре́ніе, ро́ждшей Приснодѣ́ву.

Сла́ва, и ны́нѣ, гла́съ 8:

Иже изъ непло́дныхъ ложе́снъ же́злъ, Святу́ю Богоро́дицу, израсти́вше, изъ Нея́же Спасе́ніе мíру возсія́, Христо́съ Бо́гъ, сопру́гъ свя́тъ и сожи́тельство свя́то, Іоаки́мъ и Анна, тíи, преста́вльшеся къ небе́снымъ селе́ніемъ, съ свое́ю Дще́рію, Пречи́стою Дѣ́вою, со а́нгелы лику́ютъ, о мíрѣ моли́твы творя́ще. Съ ни́миже и мы́, соше́дшеся благоче́стно, воспѣва́юще, глаго́лемъ: и́же Богоотрокови́цею и Пречи́стою Марíею прароди́теле Христо́вы наре́кшеся, моли́теся о душа́хъ на́шихъ.

Тропа́рь святы́хъ, гла́съ 2:

Пра́ведныхъ Твои́хъ, Го́споди, па́мять пра́зднующе, тѣ́ми мо́лимъ Тя́: спаси́ ду́ши на́ша.

Или́ се́й, гла́съ 1:

Иже въ зако́ннѣй благода́ти пра́ведни бы́вше, Младе́нца богода́ннаго породи́ша на́мъ Іоаки́мъ и Анна. Тѣ́мже дне́сь свѣ́тло торжеству́етъ, ве́село пра́зднующи, Боже́ственная Це́рковь, честну́ю ва́шу па́мять, сла́вящи Бо́га, воздви́гшаго ро́гъ спасе́нія на́мъ въ дому́ Дави́довѣ.

Сла́ва, и ны́нѣ, пра́здника:

Рождество́ Твое́, Богоро́дице Дѣ́во, [ра́дость возвѣсти́ все́й вселе́ннѣй: изъ Тебе́ бо возсія́ Со́лнце Пра́вды — Христо́съ Бо́гъ на́шъ, и разруши́въ кля́тву, даде́ благослове́ніе, и упраздни́въ сме́рть, дарова́ на́мъ живо́тъ вѣ́чный].


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, богоотце́въ. И ны́нѣ, пра́здника.

По 1-мъ стихосло́віи сѣда́ленъ, гла́съ 3. Подо́бенъ: Дѣ́ва дне́сь.

Дѣ́ва дне́сь и Богоро́дица Марíя, черто́гъ неразори́мый небе́снаго Жениха́, ражда́ется отъ непло́дныя Анны Бо́жіею во́лею, носи́ло Бо́жія Сло́ва угото́вльшися: въ сіе́ бо предповелѣ́ся бы́ти Отрокови́ца и Ма́ти су́щія Жи́зни.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Дави́де, я́же кля́тся тебѣ́ дре́вле Пома́завый тя́, пло́дъ отъ чресла́ твоего́ на престо́лѣ твое́мъ испо́лни, да́въ Марíю. Зри́ши бо Юже отъ Анны Іу́довы и ра́дуешися, изъ Нея́же Христо́съ воплоти́ся, Спа́съ вся́ческихъ, безмѣ́рною бла́гостію спаса́я ро́дъ на́шъ.

Сла́ва, и ны́нѣ, то́йже.

Кано́нъ пра́здника со ирмосо́мъ на 6 и святы́хъ на 6 же.

Кано́нъ пра́здника, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Гряди́те, вѣ́рніи, Ду́хомъ Боже́ственнымъ ра́дующеся, Юже отъ непло́дове дне́сь прише́дшую человѣ́ковъ на спасе́ніе, Приснодѣ́ву Отрокови́цу пѣ́сньми почти́мъ.

Ра́дуйся, Чи́стая, Ма́ти и Рабо́ Христа́ Бо́га, Яже пе́рвому Хода́таица блаже́нству, человѣ́ческій ро́дъ, Тя́ вси́ досто́йно пѣ́сньми сла́вимъ.

Жи́зни ражда́ется дне́сь мо́стъ, и́мже человѣ́цы, воззва́ніе паде́нія, е́же отъ а́да, обрѣ́тшіи, Христа́ Жизнода́вца пѣ́сньми прославля́ютъ.

Инъ кано́нъ святы́хъ, его́же краегране́сіе: Твоя́ роди́тели, Всечи́стая, пою́ цѣлому́дренно. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Свѣщу́, мы́сленное Со́лнце возблиста́вшую, пло́тію отъ Нея́ возсія́вшее, добродѣ́телей свѣ́тлостьми просіява́юще, роди́ти сподо́бистеся, Анно богому́драя и Іоаки́мъ присноблаже́нный.

Всеобра́знымъ зрѣ́ніемъ къ Бо́гу и́стинно богопрія́тный Іоаки́мъ и Анна боже́ственная, неукло́нно моля́щеся, Пречи́стую Богоро́дицу роди́ша, пребо́льшую всея́ тва́ри свя́тостію.

Превысоку́ иму́ще жи́знь, житія́ же свѣ́тлость, всѣ́хъ вку́пѣ роди́телей бы́сте земны́хъ превы́шшіи, Нетлѣ́нну Дѣ́ву я́ко роди́вше и богоотцы́ и́стинно Тоя́ ра́ди бы́вше.

Богоро́диченъ: Спасе́нія всего́ нача́льницы, блаже́ннѣйшій Іоаки́мъ и Анна сла́вная, Чи́стую, и Непоро́чную, и Пречи́стую Богоро́дицу роди́ша, богоче́стія Сію́ пріе́мше воздая́ніе.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Непоро́чно Бо́гу пожи́вшіи, всѣ́хъ роди́сте Спасе́ніе, богому́дріи роди́теле Зижди́теля Ро́ждшія и Бо́га на́шего.

Всѣ́мъ жи́знь источа́яй Госпо́дь отъ непло́дове произведе́ Дѣ́ву, въ Ню́же всели́тися изво́ли, и по Рождествѣ́ сохрани́въ нетлѣ́нну.

Аннинъ пло́дъ, Марíю, дне́сь, Гро́здъ ро́ждшую живоно́сный, я́ко Богоро́дицу воспои́мъ, Предста́тельницу же всѣ́хъ и Помо́щницу.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Непло́дствующая, и дѣте́й лише́нная, и слеза́ми Содѣ́теля моля́щая, еди́ну Благослове́нную сподо́билася еси́ роди́ти, богопрія́тная Анно, зову́щи, я́ко нѣ́сть свя́тъ, ра́звѣ Тебе́, Го́споди.

Иже сожи́тельницу обогати́въ Боже́ственною благода́тію, Іоаки́мъ боже́ственный и богоглаго́ливый Хода́таицу спасе́нія человѣ́комъ роди́ти сподо́бися. Къ Не́йже взыва́емъ, я́ко нѣ́сть непоро́чны, па́че Тебе́, Влады́чице.

Воспое́мъ всечестну́ю сопру́гу, отъ нея́же возсія́ на́мъ Дѣ́ва, всѣ́хъ тва́рей превы́шши су́щи, Бо́га бо роди́, къ Нему́же возопіи́мъ, я́ко нѣ́сть свя́тъ, па́че Тебе́, Го́споди.

Богоро́диченъ: Непло́днаго поно́са избѣ́гши, роди́ Анна Богоро́дицу, Евы бо поноше́ніе пресла́вно потре́бльшую, къ Не́йже взыва́емъ, я́ко нѣ́сть непоро́чны, па́че Тебе́, Влады́чице.

Конда́къ пра́здника, гла́съ 4:

Іоаки́мъ и Анна поноше́нія безча́дства и Ада́мъ и Ева отъ тли́ сме́ртныя свободи́стася, Пречи́стая, во святѣ́мъ рождествѣ́ Твое́мъ. То́ пра́зднуютъ и лю́діе Твои́, вины́ прегрѣше́ній изба́вльшеся, внегда́ зва́ти Ти́: непло́ды ражда́етъ Богоро́дицу и Пита́тельницу Жи́зни на́шея.

Икосъ:

Моли́тва ку́пно и воздыха́ніе непло́дства и безча́дства Іоаки́ма же и Анны благопрія́тное, и во у́ши Госпо́дни вни́де, и прозябе́ пло́дъ живоно́сенъ мíру. Овъ бо моли́тву на горѣ́ творя́ше, о́ва же въ садѣ́ поноше́ніе ноша́ше, но съ ра́достію непло́ды ражда́етъ Богоро́дицу и Пита́тельницу Жи́зни на́шея.

Сѣда́ленъ, гла́съ 5. Подо́бенъ: Собезнача́льное.

Іоаки́мъ и Анна торжеству́ютъ, по Бо́зѣ бо досто́йно благода́ть обрѣто́ша и роди́ша пло́дъ, богопрія́тенъ хра́мъ, Дѣ́ву и Чи́стую Ма́терь Бо́жію, еди́ну Благослове́нную, моля́щуюся непреста́нно спасти́ся душа́мъ на́шимъ.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Воспѣва́емъ Тя́, Го́споди, вѣ́рнымъ спаси́тельное приста́нище пода́вшаго всѣ́мъ, Тебе́ Ро́ждшую.

Тя́, Богоневѣ́сто, похвалу́ всѣ́мъ Христо́съ яви́ и держа́ву пою́щимъ вѣ́рно Твое́ та́инство.

Неискусобра́чная Влады́чице, Твои́ми моли́твами избавля́еми прегрѣше́ній, благоразу́мно вси́ Тя́ ублажа́емъ.

Инъ.

Ирмо́съ: Прише́лъ еси́ отъ Дѣ́вы, не хода́тай, ни а́нгелъ, но Са́мъ, Го́споди, вопло́щся, и спа́слъ еси́ всего́ мя человѣ́ка. Тѣ́мъ зову́ Ти́: сла́ва си́лѣ Твое́й, Го́споди.

Ра́дуяся, Дѣ́ву отъ непло́дове пріе́млетъ, Ея́же ра́ди непло́діе мірско́е разрѣши́ся, Рождество́мъ дѣ́вствующую, Іоаки́мъ богому́дрый и богопрія́тный.

Пра́отецъ Бо́жій Іоаки́мъ ны́нѣ предлага́етъ на́мъ трапе́зу духо́вную, пребога́тый: я́ко Богома́терь и Пренетлѣ́нную Отрокови́цу роди́лъ е́сть.

Умерщвле́нія и тли́ человѣ́ки спа́сшую благода́ть предлага́етъ, хотя́щую бы́ти Ма́терь Бо́жію, Сло́во Присносу́щное пріе́мшую, несказа́нно воплоща́емое.

Отъ ко́рене Іессе́ева сопру́гъ возсія́, отъ него́же прозябе́ же́злъ, Цвѣ́тъ нося́щій, всего́ мя человѣ́ка облагово́нствующь мѵ́ромъ Божества́.

Богоро́диченъ: Напра́ви мое́, Богоро́дице, житіе́, повелѣ́ніи Боже́ственными наставля́ющи вопло́щшагося Сло́ва изъ Тебе́, и къ свѣ́ту наста́ви, Дѣ́во Ма́ти, Марíе Богоневѣ́сто.

Пѣ́снь 5.

Ирмо́съ: Сѣннопи́санный мра́къ гада́ній разори́въ и вѣ́рныхъ прибы́тіемъ и́стины, Богоотрокови́цею, озари́въ сердца́, и на́съ свѣ́томъ Твои́мъ, Христе́, наста́ви.

Воспои́мъ, лю́діе, всѣ́хъ вину́, су́щаго по на́мъ бы́ти Вино́внаго: Ея́же о́бразу ра́довахуся сподобля́еми проро́цы, явле́нное спасе́ніе отъ Тоя́ плодя́ще.

Отъ су́ха прозябе́ніе жезла́ іере́ева, Изра́илю показа́ проразсужде́ніе, и ны́нѣ свѣ́тлость прозя́бшихъ пресла́вно свѣ́титъ, отъ непло́дове всесла́вное рожде́ніе.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Цѣлому́дренная дво́ица, чистоты́ заря́ сія́ющая, Юже дѣ́вства боже́ственнымъ сія́ніемъ украси́вшую непло́дное естество́ человѣ́ческое на́мъ породи́ Анна и Іоаки́мъ богопрія́тный.

Дѣ́вственный богоукра́шенный престо́лъ, Иже всѣ́хъ превы́шши, дла́нію Боже́ственною, цѣлому́дрія честны́й сопру́гъ и богому́драя дво́ица породи́, Анна и Іоаки́мъ всехва́льніи.

Восто́ку свы́ше я́вльшуся въ наставле́ніе заблу́ждшихъ свѣтоно́сную две́рь боже́ственный Іоаки́мъ и Анна, богому́дренно пожи́вшіи, роди́ти, богови́дцы, я́вѣ сподо́бишася.

Зако́на Но́ваго богопи́санную скрижа́ль, на не́йже рѣше́ніе грѣхо́въ Ве́тхаго Зако́на Боже́ственное Сло́во прообрази́ пре́жде, я́ко отъ ка́мене, ны́нѣ усѣче́ манове́ніемъ Вседержи́тель отъ непло́дове.

Богоро́диченъ: Заре́ю Твое́ю, Богома́ти, уму́ моему́ озари́тися, омраче́нному грѣхо́мъ, повели́, Дѣ́во, невѣ́дѣнія мра́къ и прегрѣше́ній потребля́ющи, ины́я бо па́че Тебе́ храни́тельницы не вѣ́мъ.

Пѣ́снь 6.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Ко Го́споду въ ско́рби непло́дства возо́пиша Богома́тере богому́дріи роди́тели, и Сію́ въ ро́ды родо́въ роди́ша, на о́бщее спасе́ніе и похвалу́.

Прія́ша небе́сный да́ръ отъ Бо́га досто́инъ Богома́тере богому́дріи роди́тели, самѣ́хъ херуви́мовъ превы́шшее носи́ло, Сло́ва и Зижди́теля Роди́тельницу.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Плодови́тое сѣ́мя, е́же дре́вле непло́ды Анна воспріе́мши, отъ Боже́ственнаго осія́нія Отрокови́цу роди́ти сподо́бися, всѣ́ми тварьми́ влады́чествующую.

Ны́нѣ непло́ды ро́ждши, во́лею Бо́жіею, покоре́ніемъ прія́ти Дѣ́ву, ро́ждшую кромѣ́ плотскíя во́ли, Самому́ восхотѣ́вшу Бо́гу проявле́нно.

Озари́вся Иса́ія Ду́хомъ, Іоаки́ма и Анны рождество́, сви́токъ но́въ, ви́дѣ, въ не́мже написа́ся Сло́во воплоща́емо.

Богоро́диченъ: Та́инству предтече́тъ та́инство: пре́жде бо неплодя́щая благода́ть породи́ спасе́нія Хода́таицу, дѣ́вства рожде́ніемъ я́вльшуюся на́мъ.

Конда́къ, гла́съ 2. Подо́бенъ: Вы́шнихъ ища́.

Ра́дуется ны́нѣ Анна, непло́дства разрѣши́вшися соу́зъ, и пита́етъ Пречи́стую, созыва́ющи вся́ воспѣ́ти Дарова́вшаго отъ чре́ва ея́ человѣ́комъ еди́ну Ма́терь и Неискусому́жную.

Икосъ:

Яже у́зъ пре́жде безча́дства моли́твою изба́вльшися, призыва́етъ ны́ спра́здновати чудеси́ и да́ры принести́ Рожде́ннѣй, моля́щіяся предъ Не́ю съ любо́вію, Ейже я́ко иногда́ дѣ́вы предтеча́ху ско́ро, лику́юще и вопію́ще: се́ пріи́де всѣ́хъ воззва́ніе, се́ Ада́мъ свободи́ся, я́ко Анна пло́дъ прозябе́, еди́ну Ма́терь и Неискусому́жную.

Пѣ́снь 7.

Ирмо́съ: Купина́ въ горѣ́ огненеопа́льная и росоно́сная пе́щь халде́йская, я́вѣ предписа́ Тя, Богоневѣ́сто, Боже́ственный бо невеще́ственный въ веще́ственнѣмъ чре́вѣ, Огнь неопа́льно прія́ла еси́. Тѣ́мже изъ Тебе́ Ро́ждшемуся пое́мъ: благослове́нъ еси́, Бо́же оте́цъ на́шихъ.

Твое́ въ веще́ственныхъ явле́ніихъ, законополо́жникъ возбрани́ся разумѣ́ти, и вели́кое, Пречи́стая, та́инство, не му́дрствовати земноре́вностная, обра́зно наказу́емь иногда́. Тѣ́мже, уди́влься чудеси́, глаго́лаше: благослове́нъ Бо́гъ оте́цъ на́шихъ.

Го́ру и две́рь небе́сную, и мы́сленную Тя́ лѣ́ствицу боголѣ́пно ли́къ боже́ственный пронарече́, отъ Тебе́ бо Ка́мень отсѣче́ся не рука́ми му́жескими, и две́рь, Еюже про́йде Госпо́дь, Иже чуде́съ Бо́гъ оте́цъ на́шихъ.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Отъ ко́рене прозя́бши, дво́ице свята́я, Дави́да богому́драго, же́злъ всесвяще́нный, Дѣ́ву Чи́стую, мíру породи́сте, Цвѣ́тъ свяще́ннѣйшій на́мъ, Христа́, безсѣ́менно возсія́вшую.

Свѣщу́ многосвѣ́тлую Богоро́дицу Анна боже́ственная, я́коже златоза́ренъ свѣ́щникъ, нося́щи, мíръ ве́сь просвѣти́ боже́ственнымъ свѣ́томъ, дѣ́вства свѣ́тлыми сія́ньми.

Прароди́теліе сла́вніи воплоти́вшагося за неизрече́нную ми́лость Бо́га Вседержи́теля отъ Дще́ре богому́дрыя ва́шея, пребога́тіи, ны́нѣ мнѣ́, прибѣ́гшему къ ва́мъ, согрѣше́ній разрѣше́ніе испроси́те.

Богоро́диченъ: Яко су́ще пребо́льшимъ роди́телей, всѣ́ми Влады́чествующую тва́рьми роди́сте, Марíю Пречи́стую, ро́ждшую Бо́га, пло́тію обложе́нна, на́мъ уподо́бльшася за благоутро́біе мно́гое.

Пѣ́снь 8.

Ирмо́съ: Въ пещи́ о́трочестѣй прообрази́лъ еси́ иногда́ Твою́ Ма́терь, Го́споди, о́бразъ же Сія́ изъ огня́ изыма́ше, неопа́льно входя́щія. Юже пое́мъ, я́вльшуюся Тобо́ю конце́мъ дне́сь, и превозно́симъ во вся́ вѣ́ки.

Яже къ Бо́гу на́шего примире́нія предопредѣле́нная ски́нія, е́же бы́ти ны́нѣ начина́етъ, иму́щи роди́ти Сло́ва, на́мъ дебельство́мъ пло́ти я́вльшася. Его́же пое́мъ, изъ не су́щихъ во е́же бы́ти Тѣ́мъ пріе́мшіи, и превозно́симъ во вся́ вѣ́ки.

Непло́дства преложе́ніе мірско́е благи́хъ разрѣши́ непло́дство и я́сно чу́до Христа́ показа́, къ земны́мъ прише́дша, Его́же пое́мъ, изъ не су́щихъ во е́же бы́ти Тѣ́мъ пріе́мшіи, и превозно́симъ во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Бога́тствомъ кипя́щіи добродѣ́телей сла́вою Боже́ственною укра́шенную Цари́цу Дѣ́ву Іоаки́мъ честны́й и Анна цѣлому́дренная роди́ша, Юже вся́ тва́рь пое́тъ я́ко Богоро́дицу.

Же́злъ си́лы на́мъ ва́ми, дру́ги Бо́жіими, по́сланъ бы́сть, Всенепоро́чная Невѣ́ста, Еюже посредѣ́ враго́въ безбо́жныхъ одолѣва́емъ, кова́рствія тѣ́хъ попира́юще.

Ору́жіе на́мъ отъ Бо́га благоволе́нія тобо́ю, сопру́же свяще́ннѣйшій, дарова́ся, и́мже ны́нѣ мы́, вѣ́рніи, кра́снѣ при́сно вѣнча́емся, Бо́га ро́ждшая Чи́стая Дѣ́во Ма́ти.

Си́ла Бо́жія плодоноше́ніемъ непло́дствующее чре́во отве́рзе, и предгряде́тъ Две́рь дѣ́вства свѣ́тлостьми, Ея́же ра́ди Сло́во пріи́де къ земны́мъ, вопло́щься неизрече́ннымъ сло́вомъ.

Богоро́диченъ: Свѣтоли́тіи изъ Тебе́ Воплоще́ннаго на́съ ра́ди просвѣще́нная дво́ица изря́дная роди́телей Твои́хъ да бу́детъ, Пренепоро́чная Влады́чице, хода́тайство на́мъ бла́гъ небе́сныхъ.

Пѣ́снь 9.

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Иже непокори́вымъ лю́демъ изъ ка́мене источи́въ во́ду, благопокори́вымъ же язы́комъ да́руетъ отъ чре́слъ непло́дныхъ пло́дъ на весе́ліе на́мъ, Тя́, Богома́ти Пречи́стая, Юже досто́йно велича́емъ.

Напра́снаго дре́вняго отъя́тельницу осужде́нія и прама́тере исправле́ніе, Юже ро́да къ Бо́гу вину́ присвое́нія, къ Зижди́телю мо́стъ, Тя́, Богоро́дице, велича́емъ.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Единому́дренніи и единоду́шніи добродѣ́телію су́ще, Пречи́стыя Дѣ́вы честнíи роди́теліе, соверша́ющимъ усе́рдно прехва́льную и сла́вную па́мять ва́шу, свяще́ннѣйшіи, спасти́ся моли́теся.

Па́жить разруши́сте сме́ртную, сла́вніи, Жи́зни Ма́терь свѣ́тло ро́ждшіи, потре́бльшую сея́ прило́гъ и безсме́ртныя жи́зни исхода́таившую наде́жду вѣ́ры ра́ди.

Кра́сное я́ко со́лнце Іоаки́мъ, единя́яся свѣтоно́снѣй лунѣ́ Аннѣ, породи́ дѣ́вства лучу́, Еюже Заря́ Боже́ственнаго Существа́, Пло́ти по Ѵпоста́си соедини́вшися, на́мъ возсія́.

Цѣлому́дренно пожи́вше и благоче́стно, блаже́нніи, ны́нѣ сла́дости несказа́нныя сподо́бистеся, Богоявле́нія получи́вше Иже отъ ва́съ мíру Явльшагося, Его́же моли́те спасти́ся душа́мъ на́шимъ.

Свѣти́ленъ. Подо́бенъ: Посѣти́лъ ны́ е́сть.

Яже Евы кля́тву Потре́бльшая ны́нѣ ражда́ется отъ ста́рецъ непло́дныхъ, отъ Анны и Іоаки́ма, Юже со а́нгелы вси́ по до́лгу въ пѣ́снехъ, вѣ́рніи, да восхва́лимъ.

Сла́ва, и ны́нѣ:

Яко отъ со́лнца со́лнце и отъ луны́ луна́, отъ Анны и Іоаки́ма Всенепоро́чная Отрокови́ца роди́ся и просвѣти́ мíра концы́ Свои́мъ сія́ніемъ, Юже пою́ще, досто́йно ублажи́мъ, соверша́юще честну́ю и́хъ па́мять.

На стихо́внѣ стихи́ры пра́здника, гла́съ 6. Подо́бенъ: Тридне́венъ.

Ны́нѣ игра́й, проро́че Дави́де,* се́ бо отъ чре́слъ твои́хъ Дѣ́ва,* Богоотрокови́ца Марíя,* роди́ся пресла́вно,* Ея́же ра́ди земнíи боже́ственно* обрѣто́ша воззва́ніе паде́нія.

Сти́хъ: Слы́ши, Дщи́, и ви́ждь,* и приклони́ у́хо Твое́.

Умерщвле́нія совлачи́тся ти́ны, благода́тію,* Ада́мъ со Евою,* и оживля́ются всеро́дная,* отъ непло́дныя бо ро́ждшися* и́стинно, Богоро́дица* мірско́е разрѣши́ непло́дство.

Сти́хъ: Лицу́ Твоему́ помо́лятся* бога́тіи лю́дстіи.

Всечестно́е Твое́ рождество́* свѣ́тло торжеству́емъ со а́нгелы,* Ма́ти Дѣ́во Чи́стая.* Но, о Богороди́тельнице,* не преста́й защища́ти христіа́нъ,* воспѣва́ющихъ Тя́.

Сла́ва, и ны́нѣ, пра́здника, гла́съ 2:

Дне́сь Всенепоро́чная Чи́стая произы́де отъ непло́дове, дне́сь вся́ческая ра́дуются въ Тоя́ рождествѣ́. Ада́мъ узъ разрѣша́ется, и Ева кля́твы свободи́ся, небе́сная вся́ веселя́тся, и ми́ръ человѣ́комъ да́руется. Мы́ же, славосло́вяще, вопіе́мъ: сла́ва въ вы́шнихъ Бо́гу, и на земли́ ми́ръ, въ человѣ́цѣхъ благоволе́ніе.


НА ЛИТУРГІИ,

Блаже́нна пра́здника, пѣ́снь 1-я, 2-го гла́са, на 4, и святы́хъ, пѣ́снь 6-я, на 4. Проки́менъ пра́здника, и до отда́нія. Та́же святы́хъ, гла́съ 4: Ди́венъ Бо́гъ во святы́хъ Свои́хъ, [Бо́гъ Изра́илевъ]. Сти́хъ: Въ це́рквахъ благослови́те Бо́га, [Го́спода отъ исто́чникъ Изра́илевыхъ]. Апо́столъ къ Гала́томъ, зача́ло 210, отъ полу́. Аллилу́ія, гла́съ 1: Спасе́ніе пра́ведныхъ отъ Го́спода, [и Защи́титель и́хъ е́сть во вре́мя ско́рби]. Ева́нгеліе Луки́, зача́ло 36. Прича́стенъ пра́здника, и святы́хъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 87 – 88, 90 об. – 95 об.

/ Къ оглавленію раздѣла /


Наверхъ / Къ титульной страницѣ

0