Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 7-й де́нь.
Предпра́зднство Рождества́ Пресвяты́я Богоро́дицы. И свята́го му́ченика Созо́нта.

[ВЕЧЕРЪ,]
На Го́споди воззва́хъ: стихи́ры предпра́зднства, гла́съ 1. Подо́бенъ: Небе́сныхъ чино́въ.

Всемíрныя мíру ра́дости возсія́ша* мы́сленныя лучи́,* предвозвѣща́ющія всѣ́мъ Со́лнце сла́вы, Христа́ Бо́га,* въ рождествѣ́ Твое́мъ, Пречи́стая,* Ты́ бо хода́таица показа́лася еси́* и́стиннаго весе́лія же и благода́ти.

Предпра́зднственная сія́ сла́ва Твоя́, Пречи́стая,* предвозвѣща́етъ всѣ́мъ* Твоя́ я́же па́че сло́ва лю́демъ благодѣя́нія,* Ты́ бо ны́нѣ весе́лія хода́таица* и бу́дущія ра́дости на́мъ вина́,* Богоро́дице Приснодѣ́во.

Боговмѣсти́мая Отрокови́ца* и Богоро́дица Чи́стая,* проро́ковъ сла́ва, Дави́дова Дщи́* дне́сь ражда́ется отъ Іоаки́ма и Анны цѣлому́дренныя,* и Ада́мова кля́тва, я́же на на́съ,* потребля́ется рождество́мъ Ея́.

Ины стихи́ры свята́го, гла́съ 4. Подо́бенъ: Да́лъ еси́ зна́меніе.

Си́лою укрѣпля́я* не́мощь твою́, блаже́нне,* на́шу не́мощь во́лею Понесы́й:* му́ченическое тече́ніе* Его́ ра́ди проше́лъ еси́, ра́дуяся,* и некрѣ́пкаго врага́ краснѣ́йшими нога́ми сокруши́лъ еси́.* Тѣ́мъ тебѣ́ исплете́ побѣ́дныя вѣнцы́* Іису́съ Человѣколю́бецъ* и Спа́съ ду́шъ на́шихъ.

Враги́ уязви́лъ еси́,* уя́звену тебѣ́, сла́вне,* и на зе́млю низве́рглъ еси́,* кресто́мъ вооружи́вся,* и всеору́жіи непобѣди́мыми обложе́нъ я́вѣ,* и любо́вію утвержда́емь* тя́ къ Ца́рствомъ мы́сленнымъ Пресе́льшаго,* я́ко непобѣди́ма му́ченика,* я́ко небе́снаго человѣ́ка.

Спа́су и Го́споду,* за тя́ во́льныя подъе́мшу Стра́сти,* я́вѣ подо́бяся,* страстоте́рпче Созо́нте,* самаго́ себе́ во́льно къ ра́намъ и къ я́звамъ,* къ нестерпи́мымъ му́камъ пре́далъ еси́.* Тѣ́мже почествова́ тя небе́сными дарова́ніи* и исто́чникъ исцѣле́ній* тя́ лю́бящимъ показа́.

Сла́ва, и ны́нѣ, предпра́зднства, гла́съ 4. Самогла́сенъ:

Всечестно́е Твое́ рождество́, Пресвята́я Дѣ́во Чи́стая, а́нгеловъ мно́жество на небеси́ и человѣ́ческій ро́дъ на земли́, ублажа́емъ, я́ко Ма́ти была́ еси́ Творца́ всѣ́хъ, Христа́ Бо́га. Того́ моля́щи о на́съ не преста́й, мо́лимся, и́же на Тя́ по Бо́зѣ упова́ніе поло́жшихъ, Богоро́дице Всепѣ́тая и Неискусобра́чная.

Аще же въ пято́къ ве́чера: Сла́ва, предпра́зднства. И ны́нѣ, догма́тикъ гла́са настоя́щаго.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Яко отъ неражда́ющія ма́тере* и непло́днаго заматерѣ́нія* же́злъ, Цвѣ́тъ нося́й,* прозяба́етъ дне́сь,* Богома́ти и Неискусобра́чная,* отъ пра́ведныхъ Іоаки́ма и Анны;* тѣ́мже ра́дуется ны́нѣ и проро́ческій собо́ръ,* патріа́рховъ все́ торжество́* въ рождествѣ́ Ея́.

Сти́хъ: Слы́ши, Дщи́, и ви́ждь,* и приклони́ у́хо Твое́.

Дне́сь Дави́дъ ра́дуется,* и Іессе́й ны́нѣ игра́етъ,* и Левíй велича́ется,* и ра́дуется ду́хомъ Іоаки́мъ пра́ведный,* и безча́дство Аннино разрѣша́ется* Твои́мъ рождество́мъ, Марíе Пречи́стая, Богора́дованная,* и а́нгельскій собо́ръ съ человѣ́ки,* вси́ блажи́мъ* боже́ственную утро́бу Твою́.

Сти́хъ: Лицу́ Твоему́ помо́лятся* бога́тіи лю́дстіи.

Ра́дуйся, человѣ́ческій собо́ре, ра́дуйся, Госпо́день хра́ме,* ра́дуйся, горо́ свята́я, ра́дуйся, Боже́ственная трапе́зо,* ра́дуйся, свѣти́льниче Свѣ́та,* ра́дуйся, сла́во правосла́вныхъ честна́я,* ра́дуйся, Марíе, Ма́ти Христа́ Бо́га,* ра́дуйся, Всенепоро́чная,* ра́дуйся, предложе́ніе Боже́ственнаго Хлѣ́ба,* ра́дуйся, ски́ніе, ра́дуйся, купино́ неопали́мая,* ра́дуйся, всѣ́хъ наде́ждо.

Сла́ва, и ны́нѣ, гла́съ 4. Ге́рманово:

Всемíрная, ра́дость отъ пра́ведныхъ возсія́ на́мъ, отъ Іоаки́ма и Анны, Всепѣ́тая Дѣ́ва, Яже премно́гія ра́ди чистоты́ хра́мъ Бо́жій одушевле́нный быва́етъ и еди́на вои́стинну Богоро́дица познава́ется. Тоя́ моли́твами, Христе́ Бо́же, ми́ръ мíру низпосли́ и душа́мъ на́шимъ ве́лію ми́лость.

Тропа́рь, гла́съ 4:

Му́ченикъ Тво́й, Го́споди, Созо́нтъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, предпра́зднства, гла́съ то́йже:

Отъ ко́рене Іессе́ева и отъ чре́слъ Дави́довыхъ Богоотрокови́ца Маріа́мъ ражда́ется дне́сь на́мъ, ра́достію бо ра́дуются вся́ческая и обновля́ются. Сра́дуйтеся ку́пно, не́бо и земля́, восхвали́те Ю, оте́чествія язы́ковъ! Іоаки́мъ весели́тся, и Анна торжеству́етъ, зову́щи: непло́ды ражда́етъ Богоро́дицу и Пита́тельницу Жи́зни на́шея.




НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, му́ченика. И ны́нѣ, предпра́зднства.

По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Ро́ждшися пресла́вно отъ непло́дныхъ ложе́снъ, отъ дѣ́вственныхъ чре́слъ родила́ еси́ па́че естества́: красе́нъ бо я́вльшися сте́бль, израсти́ла еси́ мíру Жи́знь. Сего́ ра́ди си́лы небе́сныя вопію́тъ Тебѣ́, Богоро́дице: сла́ва прише́ствію Твоему́, Чи́стая, сла́ва рождеству́ Твоему́, сла́ва дѣ́вству Твоему́, Ма́ти Безневѣ́стная.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Небе́сная вся́ ны́нѣ ра́дуются, человѣ́ческій ро́дъ ны́нѣ пра́зднуетъ съ ни́ми, и проро́цы та́йно вку́пѣ веселя́тся, Юже бо предви́дѣша о́бразнѣ въ дре́внихъ ро́дѣхъ купину́, и ста́мну, и же́злъ, о́блакъ, две́рь, и престо́лъ, и ве́лію го́ру, ражда́ется дне́сь.

Сла́ва, и ны́нѣ, то́йже.

Кано́нъ предпра́зднства со ирмосо́мъ на 8, его́же краегране́сіе: Рождество́ пою́ Богоотрокови́цы Дѣ́вы. Іо́сифъ. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ра́дующеся дне́сь, съ весе́ліемъ воспои́мъ боже́ственное рождество́ Богома́тере, и́бо роди́ Ра́дость вселе́ннѣй, печа́ль прама́тере потребля́ющую.

Отъ непло́дове происхо́дитъ грѣха́ непло́дство, Юже зако́нъ прописа́ и проповѣ́данія предъяви́ша боже́ственныхъ богоглаго́льниковъ, Пречи́стая Влады́чица и Всенепоро́чная.

Хра́мъ и пала́та Царе́ва бы́сть, въ Не́йже жили́ще Себѣ́ сотвори́въ, жили́ще Святы́я Тро́ицы вѣ́рныя содѣва́етъ Пресу́щественный.

Черто́гъ краснѣ́йшій, престо́лъ Бо́жій высоча́йшій изъ непло́дове происхо́дитъ, на не́мже сѣ́де пло́тію Пресу́щественный, сѣдя́щія во тмѣ́ поги́бели воздвиза́етъ къ зна́нію Свѣ́та бла́гостію.

Инъ кано́нъ свята́го, на 4, гла́съ то́йже. Ѳеофа́ново.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Спасти́ся честну́ю твою́ дне́сь па́мять почита́ющимъ, и отъ вся́ческихъ заступа́й напа́стей и бѣ́дъ, и скорбе́й, Благодѣ́теля Го́спода ны́нѣ моли́, пресла́вне.

Звѣзду́ всесвѣ́тлу показа́ Христо́съ на высотѣ́ тя́ церко́внѣй, му́чениче, и́стинно, страда́ній твои́хъ сія́ньми вселе́нную всю́ просвѣща́юща, прехва́льне.

Возмути́въ нече́стія мо́ре, я́ко Госпо́день ко́нь, пучи́ною, му́чениче, честны́хъ и святы́хъ крове́й твои́хъ, я́коже фарао́на, потопи́лъ еси́ проти́вныхъ всю́ си́лу.

Богоро́диченъ: Безсѣ́менно Отчею во́лею отъ Боже́ственнаго Ду́ха Бо́жія зачала́ еси́ Сы́на и пло́тію породила́ еси́, су́щаго изъ Отца́ безма́терня и на́съ ра́ди изъ Тебе́ безо́тча.

Пѣ́снь 3.

Ирмо́съ: Яко непло́ды роди́ отъ язы́къ Це́рковь, и мно́гое въ ча́дѣхъ изнемо́же со́нмище, чу́дному Бо́гу на́шему возопіи́мъ: Свя́тъ еси́, Го́споди.

Земля́ плодови́та отъ земли́ непло́дныя ражда́ется, Яже плодороди́тъ Дѣ́лателя благи́хъ и жизноно́сный Кла́съ, пита́ющь вся́ Боже́ственнымъ манове́ніемъ.

Дне́сь прозябе́ дѣ́вства же́злъ, изъ него́же процвѣте́тъ Цвѣ́тъ, Садодѣ́латель на́шъ Бо́гъ, лука́выя ра́сли отсѣка́я кра́йнею бла́гостію.

Се́ несѣко́мая гора́ отъ ка́мене непло́дна отсѣче́нъ Ка́мень плодороди́тъ мы́сленный, Иже сокруше́ніе содѣ́лаетъ истука́нныхъ всѣ́хъ льсти́ваго.

Зако́на проначерта́нія Тя́ предсказа́ша, Отрокови́це: Законода́вца бо Ты́ зако́нныхъ кромѣ́ во чре́вѣ но́сиши, соблюда́юща Тя́ па́че сло́ва нетлѣ́нну и нескве́рну.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Крове́й твои́хъ струи́, я́ко рѣка́, Христа́ ра́ди поте́кше, о́гнь нечести́выхъ угаси́ша, му́чениче страстоте́рпче приснопѣва́емый.

Подъя́лъ еси́ терпѣли́вно ра́нъ приложе́нія, я́коже сто́лпъ необори́мь, сла́вне, пре́лести низложи́въ тверды́ню.

Низложи́лъ еси́ Дави́дски, я́коже Голіа́ѳа мы́сленнаго, мучи́теля и того́ во́инство, вѣ́ры пра́щею, всесла́вне.

Богоро́диченъ: Ты́ еди́на су́щимъ на земли́ па́че естества́ благи́хъ Хода́таица, Ма́ти Бо́жія, яви́лася еси́. Тѣ́мъ Ти́, е́же ра́дуйся, взыва́емъ.

Конда́къ свята́го Созо́нта, гла́съ 2. Подо́бенъ: Тве́рдыя.

Истиннаго и богому́драго му́ченика, страда́льца благоче́стія иску́снаго, соше́дшеся дне́сь, велегла́сно восхва́лимъ, Созо́нта, таи́нника благода́ти, исцѣле́ній да́теля богатѣ́йшаго: мо́литъ бо Христа́ Бо́га о всѣ́хъ на́съ.

Икосъ:

Возсія́вшаго я́вѣ въ честнѣ́й и боже́ственнѣй Христо́вѣ Це́ркви вели́каго страда́льца Созо́нта вси́ пѣ́сньми, пріиди́те, ны́нѣ усе́рдно восхва́лимъ того́, прине́сше досто́йная: се́й бо вои́стинну свирѣ́пство низложи́лъ е́сть идолослужи́телей, вѣ́рнымъ же спасе́ніе подая́ всегда́ пребыва́етъ. Тѣ́мъ, земноро́дніи, любо́вію привле́кшеся, ублажа́емъ ны́нѣ, почита́юще па́мять честну́ю и сла́вную страстоте́рпца, вопію́ще: Созо́нте всеблаже́нне, моли́ Христа́ Бо́га о всѣ́хъ на́съ.

Сѣда́ленъ, гла́съ 4. Подо́бенъ: Ско́ро предвари́.

Спа́сся вѣ́рою, Созо́нте многострада́льне, спаси́тельное бы́лъ еси́ обурева́емымъ приста́нище про́мысломъ Христа́ Бо́га, то́чиши бо исцѣле́ній рѣ́ки чту́щимъ тя́, уставля́еши болѣ́зни и распале́нія всегда́. Тѣ́мъ боже́ственную па́мять твою́ вѣ́рою почита́емъ.

Сла́ва, и ны́нѣ, предпра́зднства, гла́съ 8. Подо́бенъ: Повелѣ́нное та́йно.

Да ра́дуется не́бо, и земля́ да весели́тся: Бо́жіе бо не́бо на земли́ роди́ся, Богоневѣ́стная сія́, отъ обѣтова́нія. Непло́ды младе́нца пита́етъ Марíю, и ра́дуется о рождествѣ́ Іоаки́мъ: же́злъ, глаго́ля, роди́ся мнѣ́, изъ него́же Цвѣ́тъ Христо́съ прозябе́, изъ ко́рене Дави́дова. Вои́стинну чу́до пресла́вно!

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Превы́шшая а́нгеловъ на земли́ Отрокови́ца ражда́ется, въ святы́ни су́щи и чистотѣ́ безъ разсужде́нія, Яже очище́ніе всѣ́хъ, Христа́, ражда́етъ, освяще́ніе и всесоверше́нное избавле́ніе.

Блаже́нно чре́во Аннино бы́сть, во чре́во бо хотя́щую вмѣсти́ти блаже́нное и невмѣсти́мое Сло́во породи́, возрожде́ніе всѣ́мъ вѣ́рнымъ подаю́щее.

Ны́нѣ мра́къ зло́бный потребля́тися начина́етъ, Со́лнца бо одушевле́нный о́блакъ возсія́ отъ непло́дныхъ ложе́снъ, Всенепоро́чная, Ея́же Рождество́ свѣтоза́рное воспра́зднуимъ.

Яко плодови́тая ма́слина, я́же отъ ко́рене прозя́бши Іессе́ева, Дѣ́во, Анна Тя́ прораща́етъ, прозяба́ющую ми́лостиваго Сло́ва, Ему́же ми́лость и и́стина всегда́ предхо́дитъ.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Распала́емь любо́вію Бо́жіею, всеблаже́нне, хвра́стную всю́ ле́сть безбо́жныхъ попали́лъ еси́ словесы́ твои́ми и, ра́дуяся, взыва́лъ еси́: сла́ва си́лѣ Твое́й, Го́споди.

Святодѣ́ланенъ сы́й хра́мъ Госпо́день, въ хра́мъ вте́клъ еси́ безбо́жныхъ и си́хъ служе́нія до́блественнѣ сокруши́лъ еси́, му́чениче страстоно́сче всехва́льне.

Врачевство́ яви́ся вся́каго неду́га, свяще́нный тво́й хра́мъ, вѣ́рою притека́ющимъ и до́блести твоя́ въ то́мъ почита́ющимъ, Созо́нте, страстоте́рпче прехва́льне.

Богоро́диченъ: Неискусобра́чно родила́ еси́ Го́спода, о Дѣ́во, и по рождествѣ́ яви́лася еси́ па́ки дѣ́вствующи. Тѣ́мже немо́лчными гла́сы, е́же ра́дуйся, Тебѣ́, Влады́чице, вѣ́рою несумнѣ́нною вопіе́мъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Запеча́танная ны́нѣ кни́га ражда́ется, Юже прочести́ невозмо́жно естество́мъ зако́на земны́хъ, соблюда́ема въ жили́ще Сло́ва, я́коже кни́ги прояви́ша богоглаго́ливыхъ Ду́хомъ.

Лоза́ дне́сь роди́ся спаси́тельная, Яже нетлѣ́нный процвѣте́тъ Гро́здъ Боже́ственный, сла́дость пролива́ющій, отъ Него́же вся́къ пія́й та́инственно, боже́ственное и спаси́тельное весе́ліе плоди́тъ.

Игра́йте, человѣ́цы, со а́нгелы лику́юще: дне́сь, отъ непло́дове Дѣ́вѣ ро́ждшейся, печа́ль преста́ и приво́дится ра́дость торжеству́ющимъ Тоя́ боже́ственное рождество́.

Боже́ственный прописа́ проро́къ проявле́ннѣйше сви́токъ Тя́ но́въ, въ не́мже пе́рстомъ Сло́во Отчимъ, Дѣ́во, напи́шется, въ кни́зѣ напису́я жи́зни вся́ бла́гостію, Того́ нача́льству повину́ющіяся.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, му́чениче, свѣ́томъ Тро́ическимъ просвѣ́щся, потреби́лъ еси́ безбо́жія многобо́жный мра́къ, свѣти́льникъ яви́вся присносвѣ́телъ.

Ты́, ши́покъ благоцвѣту́щь тече́ніемъ крове́й твои́хъ, блаже́нне, показа́вся, благово́ніемъ чуде́съ мíръ облагово́нилъ еси́.

Ты́, гро́здъ мы́сленный виногра́да сы́й Христо́ва, источи́лъ еси́ муче́нія благоумиле́нное вино́ вѣ́рою тя́ сла́вящимъ.

Богоро́диченъ: Тя́ ору́жіе непобѣди́мое на враги́ предлага́емъ, Тя́ основа́ніе и наде́жду на́шего спасе́нія, Богоневѣ́стная, и́мамы.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Роди́ся дне́сь мо́стъ, преводя́щь къ Свѣ́ту человѣ́чество, лѣ́ствица небе́сная, гора́ Бо́жія я́вственнѣйшая, Богоро́дица Дѣ́ва, Юже ублажа́емъ.

Червлени́ца Анна произведе́ багряни́цу, руно́ омочи́вшую воплоще́нія Царе́ва по́слѣжде, Юже досто́йно вси́ пѣсносло́вимъ.

Исто́чникъ ны́нѣ произы́де изъ ма́лыя ка́пли, Всенепоро́чная, Яже, Бе́здну спасе́нія ро́ждши, многобо́жія упраздни́тъ безмѣ́рныя то́ки.

Отъ непло́днаго ко́рене прозябла́ еси́ и изъ ко́рене зло́бы те́рніе па́че естества́ Твои́мъ боже́ственнымъ прозябе́ніемъ посѣ́кла еси́, Богороди́тельнице Дѣ́во, Присноблаже́нная.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Закла́тися любве́ ра́ди Бо́жія жела́я, я́коже непоро́чная же́ртва, Того́ трапе́зѣ прине́слся еси́. Сего́ ра́ди благоче́стно тя́ почита́емъ, прехва́льне.

Немо́кренно преплы́въ пре́лести пучи́ну, въ приста́нище вы́шняго Ца́рства, му́чениче, дости́глъ еси́, вѣ́чныя наслажда́яся тишины́, блаже́нне.

Ногты́ желѣ́зными твоя́ ре́бра строга́ше неми́лостивно мучи́тель, но ты́ въ ру́цѣ Бо́жіи ду́ха со сла́вою преложи́лъ еси́, всеблаже́нне приснопа́мятне.

Богоро́диченъ: О чу́до, всѣ́хъ чуде́съ новѣ́йшее! Яко Дѣ́ва, во чре́вѣ вся́ Содержа́щаго неискусому́жно заче́нши, не тѣсновмѣсти́.

Конда́къ предпра́зднства, гла́съ 3. Подо́бенъ: Дѣ́ва дне́сь.

Дѣ́ва дне́сь и Богоро́дица Марíя, черто́гъ безконе́чный Небе́снаго Жениха́, ражда́ется отъ непло́дове, Бо́жіимъ совѣ́томъ, колесни́ца Сло́ва благоукраша́ется: на сіе́ бо преднарече́ся Боже́ственная две́рь и Ма́ти су́щія Жи́зни.

Икосъ:

Иже отъ непло́дове пло́дъ даде́ся, Богоотрокови́ца Марíя, Юже прови́дѣша иногда́ боже́ственніи проро́цы Ду́хомъ; Сію́ мы́ дне́сь зря́ще, въ нѣ́дрѣхъ Анны игра́ющую, съ вѣ́рнымъ Іоаки́момъ мы́сленнѣ ко учрежде́нію стеце́мся и су́щія дале́че призове́мъ, глаго́люще: мíра сего́ ны́нѣ воззва́ніе, отъ непло́дна бо чре́ва прозябе́ Боже́ственная две́рь и Ма́ти су́щія Жи́зни.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Іоаки́мъ же и Анна ублажа́ются, ро́ждши блаже́нную я́вѣ чи́стую Богома́терь, блаже́нное Сло́во ро́ждшую, блаже́нны вѣ́рныя соверша́ющаго вся́.

Да́ръ че́стенъ стяжа́ша Тя́, Пречи́стая, Твои́ роди́теліе, заче́ншую Бо́га, обогати́вшаго дарми́ лу́чшими взыва́ющія: отце́въ Го́споди и Бо́же, благослове́нъ еси́.

Сосцы́ твои́ па́че вина́ блажа́йшіи, Анно богозва́нная, я́ко сосцы́ свяще́нными преблаго́е Сло́во Дои́вшую ты́ дои́ла еси́, Пода́теля млека́ и дыха́нію Пита́теля всему́.

Игра́й, бряца́й въ гу́сль твою́, богодохнове́нне Дави́де, и лику́й: се́ бо киво́тъ, его́же дре́вле провозвѣсти́лъ еси́, отъ непло́дствующа чре́ва про́йде, Царю́ тва́ри и Бо́гу соблюде́нъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Въ пе́щь болѣ́зненныхъ му́къ, му́чениче, вве́рженъ бы́въ, ро́су отъ Бо́га пріи́мъ терпѣ́нія, благода́рно же взыва́лъ еси́: благослове́нъ еси́ въ хра́мѣ сла́вы Твоея́, Го́споди.

Свѣтлѣ́йшу вся́каго зла́та вои́стинну имѣ́я ду́шу, пожре́ти златокова́нному, му́чениче, отню́дъ бо́гу и безду́шному не восхотѣ́лъ еси́, сама́го же себе́ же́ртву благово́ннѣйшу Го́споду поже́рлъ еси́.

Па́стырь вели́кій па́стыря су́що овца́мъ тя́, му́чениче, я́ко а́гня непоро́чно, Своему́ неле́стному ста́ду сочета́, во́лки нея́тна мы́сленными тя́ показа́, всехва́льне.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, вопію́щимъ: благослове́нна Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Подви́гнемъ язы́къ, пѣснопѣ́ньми боже́ственное рождество́ чту́ще, препѣ́тое Сло́во и пребоже́ственное Воплоти́вшія Ду́хомъ, и воззове́мъ: Го́спода по́йте, дѣла́, и превозноси́те Его́ во вся́ вѣ́ки.

Боже́ственніи, игра́йте, проро́цы, почита́юще Дѣ́вы рождество́: Та́ бо испо́лни всѣ́хъ проповѣ́данія, ва́ми сказу́емаго поро́ждши Христа́, вся́ческихъ Царя́, Его́же превозно́симъ во вся́ вѣ́ки.

Возопíйте, го́ры, весе́ліе, апо́столи и му́ченицы, лику́йте, преподо́бніи и пра́ведніи, ны́нѣ ра́дуйтеся въ рождествѣ́ дне́сь Госпо́дни Ма́тере, Го́спода по́йте, вопію́ще, и превозноси́те Его́ во вся́ вѣ́ки.

Процвѣте́ я́блоко благово́нное, ши́покъ Боже́ственный появи́ся, и облагово́ни дне́сь концы́, и злосмра́діе уста́ви грѣха́ на́шего, Всечи́стая и Ма́ти Сло́ва, Юже превозно́симъ во вся́ вѣ́ки.

Непло́дствующее естество́ человѣ́ческое честны́хъ дарова́ній Боже́ственнаго Ду́ха, дне́сь возвесели́ся, отъ непло́дове Богоотрокови́цу ро́ждшуся ви́дѣвъ, и возопíй: Го́спода по́йте, дѣла́, и превозноси́те Его́ во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ру́ку златосотворе́ннаго отъ́емь, му́дре, кумíра, ни́щимъ пода́лъ еси́, неистощи́мое, сла́вне, себѣ́ притворя́я муче́нія и́стинно бога́тство, приснопа́мятне, благослови́те, зовы́й, вся́ дѣла́ Госпо́дня, Го́спода.

Пло́тію безпло́тному спле́тся, посо́біемъ Христо́вымъ сего́ низложи́лъ еси́. Тѣ́мже ти́ по́чести, сла́вне, чуде́съ дѣ́йство Са́мъ подаде́, къ Нему́же, ра́дуяся, взыва́лъ еси́: благослови́те, вся́ дѣла́ Госпо́дня, Го́спода.

Отве́рзъ, напо́лнилъ еси́ уста́ твоя́ Ду́ха, Созо́нте всехва́льне, враго́въ же уста́, ху́лящихъ Творца́, испо́лнилъ еси́ вся́каго студа́ и Христу́, ра́дуяся, взыва́лъ еси́: благослови́те, вся́ дѣла́ Госпо́дня, Го́спода.

Богоро́диченъ: Ты́ еди́на во всѣ́хъ ро́дѣхъ, Дѣ́во Чи́стая, Ма́ти яви́лася еси́ Бо́жія, Ты́ Божества́ была́ еси́ прія́телище, Всенепоро́чная, не опа́льшися Огне́мъ непристу́пнаго Свѣ́та. Тѣ́мже вси́ Тя́ благослови́мъ, Марíе Богоневѣ́сто.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Се́ Бо́жіе мѣ́сто свято́е проявле́нно показа́ся, гра́дъ препросла́вленный Царе́въ назда́ся, свѣтоза́рный ра́й свѣ́тло процвѣте́, рая́ Хода́таица су́щи, къ Бо́гу же человѣ́ковъ усво́еніе.

Яви́ся свѣща́ и свѣти́льникъ дне́сь, златозаря́щій Свѣ́тъ превѣ́чный, въ Ню́же всели́вся, су́щія въ нощи́ лю́тыхъ просвѣти́тъ, разори́тъ же безбо́жія мглу́ и дне́ вся́ содѣ́лаетъ прича́стники и́стинно вѣ́ры ра́ди.

Дне́сь земля́ лику́етъ, но́вое бо не́бо ви́дѣ, Бо́жіе прекра́сное поро́ждшееся, въ Не́мже всели́вся пло́тію, небе́съ превы́шше возведе́тъ человѣ́ки и обожи́тъ вся́ бла́гостію, Его́же, пою́ще вѣ́рно, велича́емъ.

Предо́брая дво́ица прозябе́, Іоаки́мъ и Анна, Юницу нескве́рную, изъ Нея́же Юне́цъ упита́нный проше́дъ, за мíръ закла́ся, е́мляй прегрѣше́нія человѣ́ковъ, приноси́мыя же разоря́я же́ртвы де́мономъ.

Просвѣти́ ны, Свѣ́тъ ро́ждшая, свѣтоно́сное Твое́ рождество́ ду́хомъ, Богороди́тельнице, торжеству́ющія, и свѣ́та бу́дущаго покажи́, Пречи́стая, прича́стники, и ми́ръ пода́ждь и избавле́ніе лю́тыхъ, Ма́терними Твои́ми моли́твами.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ка́мень избра́нъ показа́лся еси́ Христо́въ, Ка́мене краеуго́льнаго, му́чениче, валя́емь на земли́ и пре́лести разоря́я тверды́ню, вѣ́рныхъ же сердца́ твердѣ́йша содѣ́ловая.

Струю́ тя́ жи́зни стяжа́вши Христо́ва ны́нѣ Це́рковь, кровьми́ твои́ми, я́ко вода́ми, напои́вшися, му́чениче, страда́ній твои́хъ и чуде́съ всегда́ благолѣ́піемъ украша́ется.

Обрѣ́лъ еси́ воздая́ніе подвиго́въ и трудо́въ твои́хъ, богому́дре, небе́сное Ца́рство, въ не́мже лику́я, Созо́нте, вѣ́рою творя́щихъ твою́ свяще́нную па́мять помина́й, всесла́вне.

Богоро́диченъ: Плени́цы мои́хъ ны́нѣ согрѣше́ній разрѣши́, Дѣ́во Богоро́дице, благоутро́бія Исто́чникъ ро́ждшая, еди́на Богоблаже́нная, и ра́дости напо́лни, я́ко да досто́йно велича́ю Тя́.

Свѣти́ленъ му́ченика. Подо́бенъ: Жены́, услы́шите.

Ору́жіемъ честна́го Твоего́ креста́ вооружи́вся, страда́лецъ Тво́й, Сло́ве, проти́вныя си́лы тве́рдо побѣди́, и мучи́тели посрами́, и за Тя́ пострада́, и съ Тобо́ю, Христе́ мо́й Всецарю́, ца́рствуетъ при́сно.

Сла́ва, и ны́нѣ, предпра́зднства:

Ада́ме, обнови́ся, и Ева, возвели́чися, проро́цы, со апо́столы лику́йте и пра́ведными, о́бщая бо ра́дость возсія́ а́нгеловъ же и человѣ́ковъ отъ пра́ведныхъ дне́сь Іоаки́ма и Анны, Богоро́дица Марíя.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пріиди́те, и́же отъ Ада́ма,* Юже отъ Дави́да изра́стшую* и Христа́ ро́ждшую* воспои́мъ Дѣ́ву,* Марíю Пречи́стую.

Сти́хъ: Слы́ши, Дщи́, и ви́ждь,* и приклони́ у́хо Твое́.

Хвалу́ Изба́вителю* принесе́мъ Го́споду,* отъ непло́дове* да́вшему на́мъ Богоро́дицу* и еди́ну Приснодѣ́ву.

Сти́хъ: Лицу́ Твоему́ помо́лятся* бога́тіи лю́дстіи.

Дне́сь ра́дость* всея́ вселе́нныя* отъ непло́дныхъ ложе́снъ* ражда́ется пресла́вно,* Ма́ти всѣ́хъ Царя́.

Сла́ва, и ны́нѣ, гла́съ 2. Самогла́сенъ:

Пронарече́нная всѣ́хъ Цари́ца, Бо́жіе оби́телище, отъ непло́дныя дне́сь утро́бы про́йде Анны сла́вныя, Присносу́щнаго Существа́ боже́ственное пребыва́лище, Еюже безсту́дный а́дъ попра́ся и всеро́дная Ева въ тве́рдую жи́знь вво́дится. То́й досто́йно возопіи́мъ: блаже́нна Ты́ въ жена́хъ, и Пло́дъ чре́ва Твоего́ благослове́нъ.


НА ЛИТУРГІИ,

Блаже́нна предпра́зднства, пѣ́снь 3-я, на 4, и свята́го, пѣ́снь 6-я, на 4. Проки́менъ, гласъ 7: Возвесели́тся пра́ведникъ о Го́сподѣ и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́тимися къ Тебѣ́]. Апо́столъ къ Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].


(Мрк.) Подоба́етъ вѣ́дати, а́ще случи́тся предпра́зднство Рождества́ Пресвяты́я Богоро́дицы и му́ченика Созо́нта въ недѣ́лю.

Въ суббо́ту на ма́лѣй вече́рни, стихи́ры воскре́сны и Богоро́дицы по обы́чаю. Тропа́рь воскре́сенъ. Сла́ва, и ны́нѣ, богоро́диченъ его́.

На вели́цѣй вече́рни, по каѳи́смѣ, на Го́споди воззва́хъ: стихи́ры воскре́сны 3, и восто́ченъ [анато́ліевъ] еди́нъ, и предпра́зднства 3, и му́ченика 3. Сла́ва, предпра́зднства. И ны́нѣ, богоро́диченъ пе́рвый, гла́са настоя́щаго. На литíи стихи́ра хра́ма, та́же стихи́ры стихо́вны предпра́зднства вече́рнія. Сла́ва, и ны́нѣ, предпра́зднства, пи́санъ на у́трени на стихо́внѣ. На стихо́внѣ стихи́ры воскре́сны. Сла́ва, и ны́нѣ, предпра́зднства. На благослове́ніи хлѣ́бовъ: тропа́рь Богоро́дице Дѣ́во.., два́жды, и предпра́зднства, еди́ножды. И чте́ніе въ посла́ніихъ апо́стольскихъ.

На у́трени, на Бо́гъ Госпо́дь: Тропа́рь воскре́сенъ, два́жды. Сла́ва, му́ченика. И ны́нѣ, предпра́зднства. По каѳи́смахъ сѣда́льны воскре́сны и богоро́дичны и́хъ. И чте́ніе во Ева́нгеліи толково́мъ, недѣ́ля предъ Воздви́женіемъ. Посе́мъ непоро́чны и ипакои́. И чте́ніе, недѣ́ля ря́дъ. Степе́нна и проки́менъ гла́са. Вся́кое дыха́ніе... И Ева́нгеліе воскре́сно. И Воскресе́ніе Христо́во... Та́же кано́нъ воскре́сенъ со ирмосо́мъ на 4, и Богоро́дицы на 2, и предпра́зднства на 4, и му́ченика на 4. Катава́сія: Кре́стъ начерта́въ... По 3-й пѣ́сни: Конда́къ предпра́зднства и и́косъ, и му́ченика. Сла́ва, сѣда́ленъ му́ченика. И ны́нѣ, предпра́зднства. По 6-й пѣ́сни: Конда́къ и и́косъ воскре́сенъ, и чте́мъ про́логъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, му́ченика. И ны́нѣ, предпра́зднства. На хвали́техъ: стихи́ры воскре́сны 4, и восто́ченъ [анато́ліевъ] еди́нъ, и предпра́зднства подо́бны 3, того́ дне́ стихо́вныя, съ припѣ́вы и́хъ. Сла́ва, стихи́ра ева́нгельская. И ны́нѣ, Преблагослове́нна еси́... Славосло́віе вели́кое. Тропа́рь воскре́сенъ то́чію. Ектеніи́, и отпу́стъ, и оглаше́ніе. И обы́чное исхожде́ніе въ притво́ръ, и ча́съ 1-й.

На 1-мъ часѣ́: Тропа́рь воскре́сенъ. Сла́ва, предпра́зднства. И ны́нѣ, богоро́диченъ часо́въ. По Отче на́шъ: конда́къ предпра́зднства, и коне́чный отпу́стъ.

На 3-мъ часѣ́: Тропа́рь воскре́сенъ. Сла́ва, му́ченика. И ны́нѣ, богоро́диченъ часо́въ. По Отче на́шъ: конда́къ воскре́сенъ. Та́кожде и на про́чихъ часѣ́хъ глаго́лемъ тропа́рь воскре́сенъ пре́жде, а предпра́зднства и му́ченика премѣня́юще. Кондаки́ же, воскре́сенъ и предпра́зднства, глаго́лемъ премѣня́юще.

На литургíи, блаже́нна окто́иха, на 6, и съ тро́ичнымъ, и предпра́зднства, пѣ́снь 3-я, на 4. По вхо́дѣ: Тропа́рь воскре́сенъ и предпра́зднства. Та́же хра́ма свята́го и му́ченика. Конда́къ воскре́сенъ и хра́ма свята́го. Сла́ва, му́ченика. И ны́нѣ, предпра́зднства. Проки́менъ, апо́столъ, аллилу́ія и ева́нгеліе пре́жде недѣ́ли предъ Воздви́женіемъ и ря́дъ недѣ́ли подъ зача́ло. Та́же свята́го. Проки́менъ гла́са оставля́ется. Прича́стенъ: Хвали́те Го́спода съ небе́съ... И му́ченика: Въ па́мять вѣ́чную бу́детъ пра́ведникъ...

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 56 об. – 66.

/ Къ оглавленію раздѣла /


Наверхъ / Къ титульной страницѣ

0