Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 6-й де́нь.
Воспомина́ніе бы́вшаго чудесе́ въ Колосса́ехъ, е́же е́сть въ Хо́нѣхъ, отъ архистрати́га Михаи́ла.

ВЕЧЕРЪ,
По обы́чномъ стихосло́віи, на Го́споди воззва́хъ: стихи́ры на 6, гла́съ 4. Подо́бенъ: Яко до́бля.

Трисо́лнечнаго Божества́ предста́тель свѣтлѣ́йшій,* Михаи́ле явля́яся архистрати́же,* съ го́рними си́лами зове́ши, ра́дуяся:* Свя́тъ еси́ Отче,* Свя́тъ еси́ Собезнача́льное Сло́во,* Свя́тъ еси́ и Святы́й Ду́ше,* еди́на сла́ва,* еди́но ца́рство и естество́,* еди́но Божество́ и си́ла. [Два́жды.]

И ви́дъ тво́й о́гненъ,* и добро́та чу́дна,* Михаи́ле первоа́нгеле,* невеще́ственнымъ бо естество́мъ* прехо́диши концы́,* исполня́я повелѣ́нія всѣ́хъ Творца́,* си́ленъ въ крѣ́пости твое́й познава́емь,* и исто́чникъ исцѣле́ній хра́мъ тво́й содѣ́ловая,* зва́ніемъ твои́мъ святы́мъ почита́емый. [Два́жды.]

Творя́й а́нгелы Твоя́, я́коже писа́ся, ду́хи* и служа́щія Тебѣ́ пла́мень о́гненный,* посредѣ́ чино́въ пе́рвенствующа,* показа́лъ еси́ Го́споди,* Твои́хъ арха́нгельскихъ,* Михаи́ла архистрати́га,* Твои́мъ манове́ніемъ повину́ющася, Сло́ве,* и пѣ́снь трисвяту́ю* со стра́хомъ возглаша́юща сла́вѣ Твое́й. [Два́жды.]

Сла́ва, гла́съ 6. Самогла́сенъ. Византíево:

Сра́дуйтеся на́мъ, вся́ а́нгельская чинонача́лія, первостоя́тель бо ва́шъ и на́шъ предста́тель, вели́кій архистрати́гъ, въ дне́шній де́нь въ честнѣ́мъ его́ хра́мѣ, пресла́вно явля́яся, освяща́етъ. Тѣ́мже, по до́лгу воспѣва́юще, тому́ возопіи́мъ: покры́й на́съ кро́вомъ кри́лъ твои́хъ, велича́йшій Михаи́ле арха́нгеле.

И ны́нѣ, богоро́диченъ, [гла́съ то́йже]:

Сра́дуйтеся на́мъ, вся́ дѣ́вственныхъ ликостоя́нія, предста́тельница бо на́ша, и хода́таица, и покро́въ, и вели́кое прибѣ́жище, въ дне́шній де́нь въ честнѣ́мъ Ея́ и боже́ственнѣмъ пра́зднествѣ скорбя́щія утѣша́етъ. Тѣ́мже по до́лгу воспѣва́юще Сію́, возопіи́мъ: покры́й ны́ боже́ственнымъ предста́тельствомъ Твои́мъ, Пречи́стая Богоро́дице Влады́чице.

На стихо́внѣ окто́иха. Сла́ва, и ны́нѣ, гла́съ 8. Самогла́сенъ. Іоа́нна Мона́ха:

Яко чинонача́льникъ, и побо́рникъ, и а́нгеловъ началово́ждь, архистрати́же, вся́кія ну́жды и ско́рби, неду́говъ и лю́тыхъ грѣхо́въ свободи́, вѣ́рно воспѣва́ющія и моля́щія тя́, сла́вне, я́вѣ, я́ко невеще́ственъ, Невеще́ственнаго зря́, и непристу́пнымъ свѣ́томъ Влады́чнія сла́вы осіяе́мь. То́й бо человѣколю́бно пло́ть на́съ ра́ди отъ Дѣ́вы прія́тъ, спасти́ восхотѣ́въ человѣ́чество.

Тропа́рь, гла́съ 4:

Небе́сныхъ во́инствъ архистрати́же, мо́лимъ тя́ при́сно мы́, недосто́йніи, да твои́ми моли́твами огради́ши на́съ кро́вомъ кри́лъ невеще́ственныя твоея́ сла́вы, сохраня́я на́съ, припа́дающихъ прилѣ́жно и вопію́щихъ: отъ бѣ́дъ изба́ви на́съ, я́ко чинонача́льникъ вы́шнихъ си́лъ.


НА УТРЕНИ,
Оба кано́на окто́иха безъ му́ченичновъ и арха́нгела кано́нъ на 6, его́же краегране́сіе: Пе́рваго пою́ безтѣле́сныхъ умо́въ. Іо́сифъ. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Боже́ственными свѣтлостьми́ облистава́емь всегда́, у́мъ мо́й озари́, е́же воспѣ́ти тя́, архистрати́же го́рнихъ во́инствъ, всѣ́хъ утвержде́ніе притека́ющихъ къ тебѣ́.

Умъ Пребезнача́льный премíрнаго чинонача́льника показа́ чи́на, тя́ пресла́вне архистрати́же, и свѣ́тъ су́щихъ во тмѣ́, и боже́ственное украше́ніе Це́ркве Своея́.

Умо́въ предваря́я небе́сныхъ въ Ду́сѣ, до́льнимъ же, всеизря́днѣйше, Михаи́ле, да́лся еси́ огражде́ніе, и утвержде́ніе, и ору́жіе, враги́ закала́ющее и потребля́ющее.

Богоро́диченъ: Дѣ́во Всенепоро́чная, Яже а́нгеловъ благолѣ́піе, человѣ́ковъ по́моще, Ты́ мнѣ́ помози́, морепла́вающему и въ бу́ри грѣха́ при́сно впа́дающу и бѣ́дствующу.

Пѣ́снь 3.

Ирмо́съ: Не му́дростію и си́лою и бога́тствомъ хва́лимся, но Тобо́ю, Отчею ѵпоста́сною Му́дростію, Христе́; нѣ́сть бо свя́тъ па́че Тебе́, Человѣколю́бче.

Крѣ́постію боже́ственною, воево́до а́нгеловъ всехва́льне, обхо́диши всю́ зе́млю, отъ лю́тыхъ ны́ изыма́я, призыва́ющія твое́ боже́ственное и́мя.

Яко боже́ственъ проповѣ́дникъ, я́ко предста́тель вѣ́рныхъ непосты́денъ, заблу́ждшихъ путево́ждь и наказа́тель бы́лъ еси́, Бо́жій архистрати́же богови́днѣйшій.

Боже́ственнаго сія́нія чи́стшее зерца́ло бы́лъ еси́, явле́нія честна́го свѣ́тло пріе́мъ Ду́ха, Михаи́ле первоа́нгеле досточу́дне.

Богоро́диченъ: Невеще́ственныя умы́ Соста́вивый во́лею въ веще́ственное Твое́ чре́во всели́ся хотѣ́ніемъ, Всенепоро́чная, пло́тію зри́мь Незрѣ́нный.

Сѣда́ленъ, гла́съ 8. Подо́бенъ: Прему́дрости.

Небе́сныхъ чино́въ наста́вникъ, служи́тель же сла́вы боже́ственныя, досто́йно бы́въ повелѣ́ніемъ Зижди́теля Твоего́, христіа́номъ еси́ хода́тай спаси́тельный, невеще́ственною твое́ю сла́вою земны́я назира́я. Тѣ́мже по до́лгу благохва́лимъ тя́ вси́, боже́ственное твое́ дне́сь воспѣва́юще торжество́, Михаи́ле архистрати́же, моли́ Христа́ Бо́га, грѣхо́въ оставле́ніе дарова́ти, пра́зднующимъ любо́вію боже́ственная твоя́ чудеса́.

Сла́ва, и́нъ сѣда́ленъ, гла́съ 1. Подо́бенъ: Ли́къ а́нгельскій.

Ли́къ а́нгельскій архистрати́га имѣ́я, боже́ственнаго Михаи́ла, съ ни́мъ Святѣ́й Тро́ицѣ немо́лчное приноша́етъ пѣснопѣ́ніе, изъ не су́щихъ бо Содѣ́тель вся́ческихъ во́инства огнезра́чныхъ чино́въ Сло́вомъ приведе́.

И ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́ Бо́га, па́че ума́ же и сло́ва, непреста́нно моли́ съ вы́шними си́лами, пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

Крестобогоро́диченъ:

Нескве́рная Агница, Агнца и Па́стыря повѣ́шена на Дре́вѣ ме́ртва зря́щи, пла́чущи вѣща́ше, и Ма́терски восклица́ющи: ка́ко претерплю́ Твое́ е́же па́че сло́ва, Сы́не Мо́й, сни́тіе и во́льныя Стра́сти, Бо́же Преблагíй?

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Умъ сы́й Пе́рвый, соста́вилъ еси́ боже́ственныя умы́ хотѣ́ніемъ, нача́льника посредѣ́ си́хъ Михаи́ла содѣ́ла, всеблаже́ннымъ прича́стіемъ просвѣща́ема и у́мными богонача́ліи облиста́ема.

Пѣ́ніе свято́е со престо́лы и нача́лы, и си́лами, и властьми́, и свяще́нными госпо́дьствы возглаша́еши Тро́ицѣ, пресла́вне Михаи́ле, спаса́я ны́, пою́щія тя́.

Велича́емъ всѣ́хъ Творца́ же и Го́спода, за благоутро́біе да́вшаго обхране́ніе велича́йшее, и необори́му стѣ́ну, и забра́ло, Михаи́ла на́мъ, свѣтоза́рнаго архистрати́га.

Богоро́диченъ: Мы́сленно, Дѣ́во, Твоего́ Рождества́ пресла́вное ска́зоваше дре́вле священноявле́нный, Ду́хомъ го́ру присѣ́нную ви́дя Тя́ яснѣ́йше, изъ Нея́же Святы́й пріи́де Бо́гъ воплоща́емь.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Яви́лся еси́ предводя́щъ дре́вняго Изра́иля, повелѣ́ніемъ Су́щаго изъ Іа́кова, человѣ́комъ я́вльшагося дебельство́мъ тѣ́ла, Михаи́ле безтѣле́сный, а́нгеловъ архистрати́же.

Невеще́ственными сія́ніи обожа́емь при́сно, прича́стіемъ богонача́льнымъ, и на́мъ осія́ніе свѣтода́тельное подава́еши, первоа́нгеле, пресла́вно удивля́емь.

Украси́ся благода́тію боже́ственный тво́й хра́мъ, въ то́й бо прише́дъ, враче́вствъ пучи́ну его́ показа́лъ еси́, Михаи́ле первоа́нгеле, и страсте́й потреби́теля.

Богоро́диченъ: Умныхъ а́нгеловъ Тя́ показа́ Бо́гъ вы́шшую, всели́вся въ Твоя́ ложесна́, Чи́стая, Всенепоро́чная, Его́же моли́ всегда́ уще́дрити пою́щія Тя́.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Ра́дуется вѣ́рныхъ мно́жество, благохва́лящее тя́, и сла́витъ Всесвята́го Сло́ва, совоку́пльшаго земны́я со а́нгелы, Михаи́ле, Свое́ю бла́гостію.

Во́инства Изра́илева спа́слъ еси́, явля́яся и боже́ственная подая́ повелѣ́нія, архистрати́же, враги́ низложи́лъ еси́, и въ коне́цъ сія́ истреби́лъ еси́.

Яко ви́дѣ тя́ Іису́съ Нави́нъ, поклони́ся, вопроси́въ честна́го твоего́ и свята́го и́мене, нача́льниче а́нгеловъ, благоговѣ́ніемъ и стра́хомъ держи́мь.

Богоро́диченъ: Блаже́ни лю́діе, при́сно блажа́щія Тя́, Блаже́нная, Яже Бо́га Блаже́ннаго ро́ждшая, земны́я за милосе́рдіе неизрече́ннымъ едине́ніемъ обожи́вшаго.

Конда́къ, гла́съ 2:

Архистрати́же Бо́жій, служи́телю боже́ственныя сла́вы, а́нгеловъ нача́льниче и человѣ́ковъ наста́вниче, поле́зное на́мъ проси́, и ве́лію ми́лость, я́ко безпло́тныхъ архистрати́гъ.

Икосъ:

Ре́клъ еси́, Человѣколю́бче, въ Писа́ніихъ Твои́хъ: мно́жеству ра́доватися а́нгеловъ на небеси́ о человѣ́цѣ еди́номъ ка́ющемся, Безсме́ртне. Тѣ́мже мы́, и́же въ беззако́ніихъ, Безгрѣ́шне еди́не Сердцевѣ́дче, Тя́ моли́ти всегда́ дерза́емъ, я́ко Благоутро́бнаго, уще́дрити и низпосла́ти недосто́йнымъ умиле́ніе, Влады́ко, подая́ на́мъ проще́ніе, о всѣ́хъ бо на́съ мо́лится Тебѣ́ безпло́тныхъ архистрати́гъ.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Усмотри́въ, Даніи́лъ ви́дѣ купностоя́ща тя́, блаже́нне, и умудря́юща того́ въ Хова́рѣ, видѣ́ніе, е́же ви́дѣ, Гавріи́ле молніезра́чне, Михаи́ла чинонача́льника тому́ явля́юща.

Ангеловъ наста́вники, богови́дныя и свѣтоно́сныя, Михаи́ла и Гавріи́ла, на́ши благíя утѣ́шители и предста́тели, и храни́тели, восхва́лимъ вѣ́рою велегла́сно.

Красе́нъ и всеблаголѣ́пенъ и богови́денъ сы́й, во́ждь па́че ума́ невеще́ственныхъ духо́въ бы́лъ еси́, Михаи́ле свѣтоза́рнѣйше, съ ни́ми у́бо о всѣ́хъ на́съ моли́ся.

Богоро́диченъ: Ума́ Вели́каго и́стинно Сло́во Присносу́щное, Дѣ́во, въ Тя́ неизглаго́ланно и стра́шно всели́вшася ви́дя, возопи́ Гавріи́лъ арха́нгелъ: ра́дуйся, Престо́ле Высоча́йшаго, Благослове́нная.

Пѣ́снь 8.

Ирмо́съ: Изба́вителю всѣ́хъ, Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Мы́сленныхъ безтѣле́сныхъ чинонача́льникъ, моли́твенникъ человѣ́ковъ спаси́теленъ, боже́ственъ Бо́жій служи́тель, Михаи́ле, показа́лся еси́, поя́ непреста́нно: вся́ дѣла́, благослови́те, по́йте Го́спода.

Свѣти́льника два́ всесвѣ́тлая, Михаи́ле и Гавріи́ле арха́нгели, Трисвѣ́тлаго Божества́ сія́ньми тва́рь просвѣща́ющіи, лю́тыхъ мглу́ отгоня́ете.

Яко до́бріи ко́рмчіи, арха́нгели, ко приста́нищу боже́ственныя во́ли душе́вный кора́бль мо́й спаса́йте, отъ бу́ри грѣхо́въ па́дшій и бѣ́дствующій.

Богоро́диченъ: Невѣстокраси́тель боже́ственный арха́нгелъ, предста́въ, приглаша́ше Тебѣ́, е́же ра́дуйся, Невѣ́сто Бо́жія безневѣ́стная, а́нгеловъ сла́во и человѣ́ковъ спасе́ніе и огражде́ніе.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть; Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Се́ благолѣ́піе твоего́, арха́нгеле, боже́ственнаго хра́ма, осія́ющее свѣтоза́рнымъ твои́мъ прису́тствіемъ, чуде́съ мо́лніи испуща́етъ и тмы́ неду́говъ всегда́ отгоня́етъ Боже́ственною благода́тію.

Яко супру́гъ красе́нъ и лѣ́потенъ су́ще, Влады́чнимъ повелѣ́ніемъ су́щимъ на земли́ слу́жите, арха́нгели, отъ лю́тыхъ изыма́юще и всѣ́мъ просвѣще́ніе посыла́юще спаси́тельное Боже́ственнымъ Ду́хомъ.

Дне́сь ра́дуются съ на́ми безтѣле́сніи боже́ственніи у́ми, воспѣва́ема ви́дяще сего́ отъ всѣ́хъ, вели́каго и свѣ́тлаго архистрати́га, и любо́вію съ на́ми пра́зднуютъ, Жизнода́вца велича́юще.

Боже́ственная дво́ице и свѣтоза́рна, арха́нгели Михаи́ле всече́стне и Гавріи́ле препросла́вленне, Тро́ицѣ Честнѣ́й предстоя́ще, прегрѣше́ній вины́ и му́ки хва́лящія ва́съ изба́вите.

Богоро́диченъ: Гла́съ Тебѣ́ боже́ственнаго Гавріи́ла прино́симъ ра́достно и взыва́емъ: ра́дуйся, раю́, дре́во посредѣ́ жи́зни имѣ́яй, Пречи́стая, пресла́вная Сло́ва пала́то; ра́дуйся, Дѣ́во Всенепоро́чная.

Свѣти́ленъ:

Якоже дре́вле погрузи́лъ еси́ рѣки́ безчи́нная ше́ствія и шумѣ́нія, архистрати́же сла́вы, та́ко и ны́нѣ, арха́нгеле, язы́ковъ горды́ню и де́моновъ сверѣ́пства потреби́, я́ко да по до́лгу тя́ чти́мъ въ пѣ́снехъ досто́йно.

Богоро́диченъ: Почита́ютъ Рождество́ Твое́ безпло́тныхъ чи́ни: ра́дости бо земна́я Ты́ напо́лнила еси́ еди́на. Тѣ́мъ Тя́, Всенепоро́чную, вѣ́рніи, сла́вимъ, въ пѣ́ніихъ славосло́вяще: Свѣ́тъ бо су́щимъ во тмѣ́ возсія́ла еси́, я́ко у́тренній возсія́вшій де́нь.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Ангельски въ мíрѣ торжеству́юще,* на престо́лѣ сла́вы Бо́гу сѣдя́щему* возопіи́мъ пѣ́снь:* Свя́тъ еси́ Отче Небе́сный,* Свя́тъ еси́ Соприсносу́щное Сло́во,* Свя́тъ еси́ и Ду́ше Всесвяты́й. [Два́жды.]

Небе́снымъ пе́рвенствуяй въ дерзнове́ніи мно́зѣмъ* и предстоя́ престо́лу стра́шному въ сла́вѣ,* самови́дче неизрече́нныхъ,* спаса́й ны́, Михаи́ле архистрати́же,* су́щія въ ну́ждахъ бѣ́дъ и напа́стей,* моли́твами твои́ми, мо́лимся.

Безпло́тныхъ а́нгеловъ пе́рвый еси́ вои́стину* и служи́тель Боже́ственнаго свѣтозаре́нія о́наго,* самови́децъ же и таи́нникъ,* спаси́ ны, Михаи́ле архистрати́же,* лѣ́тно честву́ющія тя́ благоче́стно* и пою́щія Тро́ицу вѣ́рно.

Сла́ва, гла́съ то́йже. Самогла́сенъ:

Чинонача́льникъ вы́шнихъ си́лъ Михаи́лъ, первостоя́тель боже́ственныхъ чино́въ, дне́сь на́съ къ торжеству́ созва́, и́же всегда́ съ на́ми ходя́й и сохраня́яй вся́ отъ вся́каго діа́воля обстоя́нія. Пріиди́те у́бо, празднолю́бцы и христолю́бцы, цвѣ́ты добродѣ́телей взе́мше, чи́стыми по́мыслы и со́вѣстію благостоя́нною арха́нгеловъ собо́ръ почти́мъ, то́й бо, непреста́нно Бо́гу предсто́я, и трисвяту́ю пѣ́снь воспѣва́я, мо́литъ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Всехва́льніи му́ченицы.

Ору́жіе про́йде,* о Сы́не, —* Дѣ́ва глаго́лаше,* на Дре́вѣ я́ко ви́дѣ Христа́ повѣ́шена, —* Мое́ се́рдце растерза́ется, Влады́ко,* я́коже дре́вле Симео́нъ Мнѣ́ прорече́;* но воста́ни и спросла́ви, Безсме́ртне,* Ма́терь и Рабу́ Твою́,* молю́ся.

На стихо́внѣ окто́иха. Сла́ва, арха́нгела, гла́съ 5:

Идѣ́же осѣня́етъ благода́ть твоя́, арха́нгеле, отту́ду діа́воля прого́нится си́ла, не терпи́тъ бо свѣ́та твоего́ ви́дѣти спады́й денни́ца. Тѣ́мъ мо́лимъ тя́, огнено́сныя его́ стрѣ́лы, я́же на ны́ дви́жимыя, угаси́ хода́тайствомъ твои́мъ, избавля́я на́съ отъ собла́зновъ его́, достохва́льный Михаи́ле архистрати́же.

И ны́нѣ, богоро́диченъ, или́ крестобогоро́диченъ, [гла́съ то́йже]. Подо́бенъ: Ра́дуйся.

Агнца Своего́ Агница иногда́ зря́щи къ заколе́нію тща́щася, усе́рдно послѣ́доваше, сія́ вопію́щи Ему́: ка́мо и́деши, Ча́до Мое́ Сладча́йшее, Христе́? Чесо́ ра́ди ско́рое тече́ніе сіе́, Долготерпѣли́ве, тече́ши нелѣ́ностно, Іису́се Вожделѣ́ннѣйшій Безгрѣ́шный, Многоми́лостиве Го́споди? Да́ждь Мнѣ́ сло́во, Рабѣ́ Твое́й, Сы́не Мо́й Вселюбе́знѣйшій. Не пре́зри, Ще́дре, молча́, Тя́ стра́нно Ро́ждшую, Бо́же Всеще́дрый, да́руяй мíру ве́лію ми́лость.


НА ЛИТУРГІИ,

Блаже́нна арха́нгела, пѣ́снь 3-я и 6-я. Проки́менъ, гла́съ 4: Творя́й а́нгелы Своя́ ду́хи, и слуги́ Своя́ пла́мень о́гненный. Сти́хъ: Благослови́, душе́ моя́, Го́спода, [Го́споди Бо́же мо́й, возвели́чился еси́ зѣло́]. Апо́столъ ко Евре́емъ, зача́ло 305. Аллилу́ія, гла́съ 5: Хвали́те Го́спода, вси́ а́нгели Его́, [хвали́те Его́ вся́ си́лы Его́]. Сти́хъ: Яко То́й рече́, и бы́ша, [То́й повелѣ́, и созда́шася]. Ева́нгеліе Луки́, зача́ло 51. Прича́стенъ: Творя́й а́нгелы Своя́ ду́хи, [и слуги́ Своя́ пла́мень о́гненный].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 48 об. – 49 об., 52 об. – 56.

/ Къ оглавленію раздѣла /


Наверхъ / Къ титульной страницѣ

0