Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 5-й де́нь.
Слу́жба преподобному́ченику Аѳана́сію, игу́мену Бре́стскому.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 6.

Пе́рвѣе по́двигомъ твои́мъ* въ житіи́ земнѣ́мъ Бо́гови угожда́я,* страда́ніемъ второ́е му́ченически житіе́ твое́ сконча́лъ еси́.* Тѣ́мъ тя́ вѣнча́ за сугу́быя по́двиги* Христо́съ Человѣколю́бецъ* и Спа́съ ду́шъ на́шихъ. [Два́жды.]

Сла́ва, гла́съ то́йже:

Восхва́лимъ дне́сь пѣ́сньми страда́льца, земли́ на́шея преподобному́ченика Аѳана́сія. Се́й бо, измла́да Христа́ возлюби́въ, нелѣ́ностію велѣ́ніемъ Его́ угожда́я, во утвержде́ніе вѣ́ры Правосла́вныя странѣ́ на́шей послужи́. Ны́нѣ же, во оби́тели небе́сныя прія́тый, мо́литъ Христа́ Бо́га поми́ловати ду́ши на́ша.

И ны́нѣ, богоро́диченъ:

Ра́дуйся, звѣздо́ свѣтоза́рная, Свѣ́тъ, пре́жде денни́цы отъ Отца́ возсія́вшій, неизрече́нно ро́ждшая, Того́ сія́ніемъ озари́ ду́ши на́ша, спя́щія во тмѣ́ и сѣ́ни сме́ртнѣй.

На стихо́внѣ стихи́ры, гла́съ 4.

Про́мысломъ Бо́жіимъ* и человѣ́ческимъ избра́ніемъ* во игу́мена оби́тели Бересте́йскія* поста́вленъ бы́лъ еси́, преподобному́чениче,* и я́ко па́стырь преизря́дный,* вруче́нное ти́ Бо́гомъ ста́до во и́стинѣ наста́вилъ еси́.* Наста́ви и на́съ, вѣ́рно чту́щихъ па́мять твою́,* ка́ко въ вѣ́рѣ и́стиннѣй утверди́тися.

Сти́хъ: Честна́ предъ Го́сподемъ* сме́рть преподо́бныхъ Его́.

Земна́я отри́нувъ,* небе́сная себѣ́ уготовля́я,* я́ко страда́лецъ за и́стину, небе́сныя сла́дости вкуси́лъ еси́, страстоте́рпче.* Сея́ сла́дости испроси́ и на́мъ у Христа́, Спа́са на́шего,* я́ко моли́твенникъ о душа́хъ на́шихъ.

Сти́хъ: Блаженъ мужъ, бояйся Господа,* въ заповѣдехъ Его восхощетъ зѣло.

Дне́сь соше́дшеся вѣ́рніи твои́* въ прославле́ніе па́мяти твоея́, преподобному́чениче,* ра́дости и весе́лія испо́лнишася.* Житіе́мъ бо твои́мъ пра́веднымъ* и въ вѣ́рѣ Правосла́внѣй тве́рдымъ стоя́ніемъ* не то́кмо и́стинный на́мъ пу́ть къ небеси́ указу́еши,* но и ны́нѣ, я́ко предста́тель на́шъ предъ Го́сподомъ,* мо́лишися о спасе́ніи ду́шъ на́шихъ.

Сла́ва, и ны́нѣ, богоро́диченъ:

Къ покро́ву Твоему́ прибѣга́емъ, Дѣ́во Богоро́дице, и мо́лимъ Тя́: ско́ро на по́мощь на́мъ, вѣ́рно чту́щимъ Тя́, предвари́ и отъ вра́гъ ви́димыхъ и неви́димыхъ изба́ви, Ты́ бо еси́ заступле́ніе на́ше.

Тропа́рь, гла́съ 2:

Блаже́нъ еси́, о́тче на́шъ Аѳана́сіе, я́ко вѣ́рно пожи́лъ еси́, стоя́ бо́дренно за святу́ю Восто́чную вѣ́ру, со умиле́ніемъ при́сно поя́ несѣда́льное Пречи́стѣй, заповѣ́дуя никому́же наруша́ти Правосла́вныя вѣ́ры святы́я, пострада́въ за свидѣ́тельство и́стины да́же до сме́рти. Мы́ же, чту́ще святы́ню твою́, со дерзнове́ніемъ взыва́емъ ти́: о́тче на́шъ, преподобному́чениче Аѳана́сіе, похвало́ и украше́ніе на́ше.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 8:

Ду́шу твою́ и тѣ́ло отъ страсте́й очи́стивъ,* Ду́ха Свята́го жили́ще бы́лъ еси́,* и кра́сная мíра отъ ю́ности твоея́ презрѣ́въ,* ра́дуяся послѣ́довалъ еси́ Христу́.* Сего́ ра́ди сла́ву вѣ́чную воспрія́въ,* Тому́, я́ко предста́тель на́шъ, моли́ся* дарова́ти ми́ръ мíру* и душа́мъ на́шимъ ве́лію ми́лость. [Два́жды.]

Мно́гимъ по́двигомъ пло́ть твою́ умерщвля́я,* украше́ніе и́ноковъ яви́лся еси́,* преподобному́чениче,* до́брѣ си́хъ къ небеси́ наставля́я.* Тѣ́мже ны́нѣ, во тмѣ́ грѣхо́внѣй су́щія, ны́ просвѣти́,* и я́ко дерзнове́ніе имѣ́яй ко Го́споду, Спа́су на́шему,* Того́ моли́ спасти́ся душа́мъ на́шимъ. [Два́жды.]

Сто́лпъ непоколеби́мый вѣ́ры Христо́вы* и и́стинный ревни́тель оте́ческихъ преда́ній бы́лъ еси́ въ житіи́ твое́мъ,* преподобному́чениче,* бо́дренно стоя́ за святу́ю Правосла́вную вѣ́ру.* Ра́зумъ на́шъ просвѣти́* и на́съ, вѣ́рно чту́щихъ па́мять твою́, въ вѣ́рѣ утверди́* ко спасе́нію ду́шъ на́шихъ. [Два́жды.]

Въ же́ртву Бо́гу себе́ самого́ принося́,* въ се́рдцѣ твое́мъ храни́лъ еси́ о́бразъ Христа́ — Агнца непоро́чна,* вда́вшаго Себе́ на закла́ніе за грѣхи́ мíра,* и Тому́ подража́я,* сла́дцѣ преда́лъ еси́ ду́шу твою́ въ ру́цѣ Бо́жіи.* Христо́выхъ страда́ній о́бщниче,* Того́ моли́ спасти́ся душа́мъ на́шимъ. [Два́жды.]

Сла́ва, гла́съ то́йже:

Ева́нгельски Го́спода Бо́га возлюби́въ, укра́силъ еси́ ду́шу твою́ добродѣ́тельми духо́вными, о́бразомъ подража́тельнымъ бы́въ вѣ́рному ста́ду твоему́, и я́ко свѣти́льникъ, стоя́й на свѣ́щницѣ, мно́гія ра́зумомъ благоразу́мія обогати́лъ еси́, пострада́въ же за и́стину Христо́ву да́же до кро́ве, благода́ти чудотворе́нія сподо́бился еси́. Не забу́ди и на́съ, убо́гихъ, во благода́ти твое́й, да прославля́юще Го́спода, дарова́вшаго тебѣ́ такова́я, спасе́мъ ду́ши на́ша.

И ны́нѣ, богоро́диченъ:

Ца́рь Небе́сный за человѣколю́біе [на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ. Чте́нія три́ му́ченическая.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Пріиди́те, вѣ́рніи, па́мять преподобному́ченика Аѳана́сія почти́мъ, я́ко многоцѣ́нный би́серъ духо́вный, укра́сившій сія́ніемъ вѣ́ры и благоче́стія страну́ на́шу. Моли́твенно притеце́мъ къ страстоте́рпцу за вѣ́ру Правосла́вную святу́ю, учи́телю воздержа́нія, исто́чнику умиле́нія, человѣ́ку небе́сному и а́нгелу земно́му, печа́льнику земли́ на́шея, и сле́зно тому́ возопіе́мъ: наста́ви на́съ вѣ́рою правовѣ́рною восхваля́ти Го́спода, ко спасе́нію ду́шъ на́шихъ.

Мо́щи твои́, преподобному́чениче, по успе́ніи твое́мъ исто́чникъ исцѣле́ній притека́ющихъ къ тебѣ́ явля́я, немо́лчно свидѣ́тельствуютъ о сла́вѣ твое́й, наставля́я на́съ на пу́ть, и́же е́сть къ животу́ и благоче́стію, и вѣща́я: возлюби́те Го́спода и обря́щете сла́ву вѣ́чную и поко́й со избра́нными, его́же да улучи́мъ твои́ми моли́твами, свя́те Аѳана́сіе.

Сла́ва, гла́съ то́йже:

Ревну́я о вѣ́рѣ Правосла́внѣй, возскорбѣ́лъ еси́ печа́лію ве́ліею, я́ко вѣ́ра сія́ отъ неправовѣ́рныхъ попира́ется, и во дни́ ско́рби твоея́ моля́ся предъ ико́ною Пречи́стыя Влады́чицы, все́ упова́ніе возложи́лъ еси́ на заступле́ніе Ея́. Въ ча́съ же те́плыхъ моли́твъ твои́хъ, услы́шавъ гла́съ Влады́чицы, отъ святы́я ико́ны исходя́щъ, и внима́я велѣ́ніямъ его́, не то́кмо все́ житіе́ твое́ земно́е преда́лъ еси́ на защище́ніе вѣ́ры праоте́ческія, но и гоне́нія мно́гая претерпѣ́лъ еси́ за ню́, непреста́нно по́мощію Влады́чицы укрѣпля́емь. Вознеси́, свя́тче, моли́твы твоя́, ко Пресвятѣ́й Влады́чицѣ.

И ны́нѣ, богоро́диченъ, гла́съ 6:

Защище́ніе и покро́въ еси́ христіа́номъ, Влады́чице Богоро́дице, осѣни́ и на́съ покро́вомъ Твои́мъ, лю́тѣ стра́ждущихъ, да непреста́нно славосло́вимъ милосе́рдіе Твое́.

На стихо́внѣ стихи́ры, гла́съ 4:

Ра́дуйся, преподобному́чениче Аѳана́сіе,* сосу́де Бо́жій избра́нный,* отъ ю́ности бо Христа́ возлюби́въ,* гла́сомъ велѣ́нія Его́* Це́ркви Правосла́внѣй служи́ти при́званъ бы́лъ еси́,* и Тому́ порабо́тавъ въ по́тѣ лица́ твоего́,* свѣ́томъ и́стинныя вѣ́ры лю́ди наста́вилъ [еси́].* Тѣ́мже и ны́нѣ моли́твами твои́ми* испроси́ у Свѣтода́теля Христа́* ми́ра и утвержде́нія Це́ркве на́шея* и просвѣще́нія душъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, нача́льниче мона́ховъ,* Про́мысломъ Бо́жіимъ къ сему́ предука́занный,* жре́біемъ бо Боже́ственнымъ* поста́вленъ бы́лъ еси́ во игу́мена оби́тели Бересте́йскія,* да возвели́чиши оби́тель сію́* достохва́льнымъ житіе́мъ бра́тіи твоея́* и сла́внымъ стоя́ніемъ во Правосла́віи святѣ́мъ.* Ты́ же, прія́въ же́злъ игу́менства,* сотвори́лъ еси́ во́лю Посла́вшаго тя́ на по́двигъ се́й.* Сего́ ра́ди и мы́ къ тебѣ́ возопіе́мъ:* о́тче на́шъ Аѳана́сіе,* благоустро́й на́ша дома́шнія оби́тели моли́твами твои́ми.

Сти́хъ: Блаженъ мужъ, бояйся Господа,* въ заповѣдехъ Его восхощетъ зѣло.

Блажи́мъ тя́, преподобному́чениче Аѳана́сіе,* зане́ свѣ́томъ небе́снаго ра́зума просвѣтле́нъ бы́лъ еси́* въ дѣя́ніихъ па́стырства твоего́ и защище́нія и́стины,* видѣ́ніе бо чу́дно узрѣ́лъ,* ви́дѣвъ полки́ во́инства небе́снаго,* побѣжда́ющи гони́тели Це́ркве и́стинныя Христо́вы,* и я́ко му́жъ богобоязли́вый, упова́ніемъ на Бо́га себе́ ополчи́въ,* возста́лъ еси́ про́тиву враго́въ вѣ́ры Правосла́вныя,* не устраши́вшися ни темни́цею, ни у́зами,* ни муче́ніями, ни сме́ртію,* но вся́ сія́ претерпѣ́въ,* вѣне́цъ побѣ́дный отъ Бо́га воспрія́лъ еси́.* Сего́ ра́ди мо́лимъ тя́:* моли́ Христа́ Бо́га* огради́ти Це́рковь на́шу отъ навѣ́товъ вра́жіихъ.

Сла́ва, гла́съ то́йже:

Отче Аѳана́сіе, пострада́въ за исповѣ́даніе вѣ́ры, ра́дость пресвѣ́тлую и пречестну́ю сла́ву наслѣ́довалъ еси́ и вы́шняго гра́да Іерусали́ма и вѣ́чныхъ бла́гъ сонаслѣ́дникъ яви́лся еси́. Страсте́й побѣди́тель, во́ине за вѣ́ру вели́кій, страстоте́рпче Христо́въ, свѣти́льникъ многосвѣ́тлый страны́ на́шея, всѣ́хъ на́съ, соверша́ющихъ свяще́нную па́мять твою́, помина́й моли́твами твои́ми, да просла́вимъ Спа́са на́шего, тебе́ просла́вльшаго, Еди́наго во святы́хъ Свои́хъ Бо́га на́шего.

И ны́нѣ, богоро́диченъ, гла́съ 4:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

По Ны́нѣ отпуща́еши.., на благослове́ніи хлѣ́бовъ:
Тропа́рь, гла́съ 2: Блаже́нъ еси́, о́тче на́шъ Аѳана́сіе.., два́жды [пи́санъ на ма́лѣй вече́рни], и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ по гла́су.

По 1-мъ стихосло́віи сѣда́ленъ, гла́съ 6:

Житіе́мъ твои́мъ земны́мъ а́нгеломъ безпло́тнымъ уподо́бился еси́, преподобному́чениче, врага́ бо прего́рдаго смири́въ, крестоноше́ніе Бо́гови уго́дно соверши́лъ еси́. Тѣ́мже дне́сь, почита́юще па́мять твою́, мо́лимся: моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Бо́га Сло́ва породила́ еси́, заче́нши во чре́вѣ безсѣ́менно, неискусобра́чная Дѣ́во, Того́ моли́ о душа́хъ на́шихъ.

По 2-мъ стихосло́віи сѣда́ленъ, гла́съ 6:

Гро́здъ духо́вный на олта́рь Боже́ственный прине́слъ еси́ себе́, преподобному́чениче, тве́рдымъ стоя́ніемъ за вѣ́ру Правосла́вную и безстра́стнымъ исповѣ́даніемъ ея́. Тѣ́мже па́мять твою́ при́сно пѣ́сньми восхваля́емъ вѣ́рно. [Два́жды.]

Сла́ва, и ны́нѣ, богоро́диченъ:

Ка́ко не диви́мся богому́жному Рождеству́ Твоему́, Пречестна́я? Ужа́сно бо чу́до зача́тія и несказа́ненъ о́бразъ Рождества́ въ Тебѣ́ показа́ся. Рожде́ннаго Тобо́ю моли́ прости́ти прегрѣше́нія на́ша.

Поліеле́й.

Велича́ніе: Ублажа́емъ тя́, святы́й преподобному́чениче Аѳана́сіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Услы́шите сія́, вси́ язы́цы...

[По поліеле́и сѣда́ленъ, гла́съ 4. Подо́бенъ: Яви́лся еси́.

Въ поще́ніи иску́сенъ бы́въ, во страда́ніи просія́лъ еси́ и просвѣти́лъ еси́ вѣ́рныя твои́ми по́двиги, блаже́нне Аѳана́сіе, тѣ́мже тя́ вси́ согла́сно велича́емъ. [Два́жды.]

Сла́ва, и ны́нѣ, богоро́диченъ:

Надѣ́ждо непосты́дная надѣ́ющихся на Тя́, еди́на ро́ждшая па́че естества́ пло́тію Христа́ Бо́га на́шего, Того́ со святы́ми преподобному́ченики моли́ пода́ти вселе́ннѣй очище́ніе прегрѣше́ній и всѣ́мъ на́мъ пре́жде конца́ житія́ исправле́ніе.]

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Возлю́бленъ бы́въ Бо́гомъ отъ чре́ва ма́терня, я́ко пѣ́стунъ гра́да небе́снаго, взы́сканъ бы́лъ еси́ Имъ, и Тому́ житіе́мъ твои́мъ сла́внымъ угоди́въ, всѣ́мъ тре́бующимъ по́мощи твоея́ чудотво́рный пода́тель яви́лся еси́. Спаса́й на́съ, я́ко предста́тель на́шъ, чудотво́рче Аѳана́сіе.

Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Моисе́й иногда́, кре́стнымъ зна́меніемъ во́ды раздѣли́въ, проше́дъ со изра́ильтяны сквозѣ́ Чермно́е мо́ре и земна́го обѣтова́нія дости́же, ты́ же, преподобному́чениче, крестоноше́ніемъ пло́ть твою́ умертви́въ, земли́ обѣтова́нія дости́глъ [еси́], въ не́йже пра́вда живе́тъ.

Изба́вителю и Бо́гу на́шему воспѣва́еши ны́нѣ пѣ́снь побѣ́дную, просвѣще́нъ сы́й Боже́ственнаго и свѣтоза́рнаго Спа́са благода́тію, омраче́нную ду́шу мою́ моли́твами твои́ми, свя́те Аѳана́сіе, озари́, да пою́ Бо́гу моему́ сла́вно.

Яко свяще́нника, и я́ко исповѣ́дника, и я́ко страда́льца за вѣ́ру Христо́ву укра́шеннаго, чту́ще па́мять твою́, прехва́льне, пои́мъ Го́сподеви: сла́вно бо просла́вися во святы́хъ Свои́хъ.

Богоро́диченъ: Отъ ви́димыхъ и неви́димыхъ вра́говъ изба́ви мя́, Ро́ждшая всѣ́хъ Влады́ку, и бу́рю страсте́й мои́хъ утиши́, да пою́ Бо́гу моему́: сла́вно бо просла́вися.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Въ Боже́ственнѣй любви́ благода́тію Ду́ха Свята́го утвержде́нный, благоче́стно пожи́лъ еси́, утвержда́я слове́сное ста́до твое́ на па́житяхъ живоно́сныхъ и въ небе́сную огра́ду мно́гія вве́лъ еси́.

На ка́мени вѣ́ры но́ги вѣ́рныхъ твои́хъ водрузи́въ, поколеба́лъ еси́ основа́ніе сопроти́вныхъ и спа́слъ еси́ лю́ди твоя́ отъ порабоще́нія вра́жія.

Тверды́нею вѣ́ры себе́ украша́я, жела́ній кра́ю дости́глъ еси́ и Це́ркве Зижди́телю благопрія́тенъ яви́лся еси́.

Богоро́диченъ: Недоумѣ́ютъ вси́ язы́цы, ка́ко небе́снаго кру́га Верхотво́рецъ, въ творе́ніихъ невмѣсти́мый, въ ложесна́ Твоя́ воплоща́емь всели́ся, Всенепоро́чная, на спасе́ніе на́съ, вѣ́рно воспѣва́ющихъ Тя́.

Сѣда́ленъ, гла́съ 6:

Му́ки му́жественно претерпѣ́въ, къ неболѣ́зненнѣй жи́зни себе́ уготовля́я, научи́лъ еси́ на́съ терпѣ́ніемъ стяжа́ти ду́ши на́ша. Тѣ́мже дне́сь Христо́ва Це́рковь, пра́зднующи святу́ю па́мять твою́, свѣ́тло ра́дуется. [Два́жды.]

Сла́ва, и ны́нѣ, богоро́диченъ:

Преукраше́нная Боже́ственною сла́вою, херуви́мовъ и серафи́мовъ превы́шши еси́, Пренепоро́чная, тѣ́мже Тя́ по до́лгу вси́ ро́ди ублажа́ютъ.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Весели́ся, пра́ведниче, о Го́сподѣ, побѣ́ду ти́ на враги́ безпло́тныя дарова́вшемъ, Тому́ со дерзнове́ніемъ вопіе́ши: Ты́ моя́ крѣ́пость, Го́споди, Ты́ моя́ и си́ла, не оста́ви милосе́рдіемъ Твои́мъ, Ще́дре, притека́ющихъ къ Тебѣ́.

Споспѣ́шествующу ти́ Влады́цѣ, прія́лъ еси́ отъ Него́ за по́двиги твоя́ да́ръ — неду́ги тѣле́сныя исцѣля́ти и многоболѣ́зненныя стра́сти врачева́ти зову́щихъ Христу́ Бо́гу: си́лѣ Твое́й сла́ва, Человѣколю́бче.

Рачи́тель Госпо́день измла́да бы́лъ еси́, ору́жіе бо кре́стное на ра́мена взе́мъ, неукло́нно ше́ствовалъ еси́, пу́ть спасе́нія себѣ́ тѣ́мъ уготовля́я. Сего́ ра́ди мíра моли́твенникъ яви́лся еси́ пресвѣ́телъ, поя́ Ему́ пѣ́снь побѣ́дную.

Богоро́диченъ: Пѣсносло́вимъ Тя́, Влады́чице, Ра́дость всему́ мíру ро́ждшая, Того́, я́ко Бла́га, моли́, Всенепоро́чная, презрѣ́ти беззако́нія досто́йно Ему́ вопію́щихъ: си́лѣ Твое́й сла́ва, Человѣколю́бче.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́ ино́го не вѣ́мы.

Не да́лъ еси́ очесе́мъ твои́мъ сна́ и вѣ́ждамъ дрема́нія, у́тренююще взыва́я: Го́споди, посѣти́ Твои́ми щедро́тами Це́рковь Твою́, ю́же стяжа́лъ еси́ честно́ю Твое́ю Кро́вію.

Словесы́ твои́ми, му́дре, заблу́ждшихъ облича́я, сою́зомъ вѣ́ры связа́лъ еси́ вру́ченное ти́ ста́до слове́сное, и ны́нѣ охраня́еши на́съ отъ вѣ́тровъ тлѣтво́рнаго уче́нія, науча́я воспѣва́ти Го́сподеви: спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Блаже́нно житіе́ твое́ на земли́ и кончи́на безсме́ртна, сего́ ра́ди нетлѣ́нная бога́тства стяжа́лъ еси́, преподо́бне о́тче, и просвѣща́еши притека́ющихъ тебѣ́ чудесы́.

Богоро́диченъ: Яко одушевле́нный черто́гъ, воспрія́вшій Царя́ ца́рствующихъ, и я́ко престо́лъ Влады́чень, Марíю Пренепоро́чную въ пѣ́снѣхъ возвели́чимъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Печа́ль ве́лія обдержи́тъ мя́, поне́же лю́тѣ окаля́хъ ду́шу грѣхми́ и оде́жду нетлѣ́нія разори́хъ, ты́ же, свя́тче, наста́ви мя́, ка́ко умоли́ти Го́спода, да очи́ститъ мя́ отъ тли́ страсте́й мои́хъ.

Укрѣпле́нъ бы́въ ра́зумомъ боже́ственнымъ, облича́лъ еси́ отмета́ющихся и́стинныя вѣ́ры Христо́вы, я́ко пребезу́мны. Тѣ́мже небе́сныя две́ри тебѣ́ отверзо́шася, блаже́нне, воспѣва́ющу Христа́ во вся́ вѣ́ки.

Сла́дости небе́сныя и пресвѣ́тлыя ра́дости испо́лненъ еси́, предстоя́ Тро́ицѣ Святѣ́й, ду́хомъ очи́щенный. Су́щія ны́ во тмѣ́ и сѣ́ни сме́ртнѣй моли́твами твои́ми не попусти́ а́ду прибли́зитися.

Богоро́диченъ: Ма́ти Всепѣ́тая, мíру всему́ Искупле́ніе отъ кля́твы зако́нныя роди́вшая, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

Конда́къ, гла́съ 4:

Мона́шескаго житія́ украше́ніе и му́чениковъ красоту́ яви́лъ себе́ житіе́мъ твои́мъ, Аѳана́сіе, и, я́ко со́лнце пресвѣ́тлое, лю́дямъ правосла́внымъ возсія́лъ еси́. Тѣ́мже и Христо́съ да́ромъ чуде́съ обогати́ тя, да чту́ще пресвѣ́тлую па́мять твою́, зове́мъ ти́: помина́й ста́до твое́ моли́твами твои́ми, преподо́бне.

Икосъ:

Яко волна́ми во́дъ мно́гихъ, обурева́ется Це́рковь Правосла́вная, коле́блема ло́жными уче́ніи и кова́рными ухищре́ніи вра́гъ ея́. Вѣ́руемъ и упова́емъ ку́пно съ тобо́ю, преподобному́чениче, я́ко врата́ а́дова не одолѣ́ютъ е́й, и мо́лимъ тя́: испроси́ у Го́спода вели́кія ми́лости, да низпо́слетъ на́мъ въ дни́ испыта́ній на́шихъ крѣ́пость ду́ха и тве́рдое стоя́ніе во и́стинѣ Правосла́вія, да не яви́тся кто́ изъ бра́тіи на́шея сы́номъ поги́бели.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Муче́нія терпя́, опаля́емь веще́ственнымъ огне́мъ, ду́шу твою́ огне́мъ невеще́ственнымъ ороси́лъ еси́, я́коже тріе́ о́троцы, посредѣ́ пла́мени взыва́я: отце́въ Бо́же, благослове́нъ еси́.

Яко росо́ю живоно́сною, смире́ніемъ твои́мъ и безстра́стіемъ пе́щь я́рости беззако́ннующихъ мучи́телей твои́хъ угаси́лъ еси́, преподобному́чениче: чудя́хубося, зря́ще тя́ посредѣ́ муче́ній моля́щася за враги́ своя́.

Му́жествомъ му́ченическимъ чре́сла твоя́ препоя́савъ и житіе́мъ твои́мъ подви́жническимъ, я́ко ри́зою свѣтоза́рною, себе́ укра́сивъ, восте́клъ еси́ на трапе́зу Госпо́дню, я́коже избра́нный, поя́: благослове́нъ еси́, Бо́же оте́цъ на́шихъ.

Богоро́диченъ: Якоже бо купина́, ю́же ви́дѣ Моисе́й, не сгара́ше опаля́ема, та́ко Дѣ́ва неопа́льно пребыла́ еси́, пра́вды Со́лнце во чре́вѣ заче́ншая. Того́ моли́ спасти́ся душа́мъ на́шимъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Неусы́пна тя́ и́мамы моли́твенника, во́лны страсте́й утиша́юща, печа́ли утоля́юща и лю́тыхъ вся́ческихъ на́съ избавля́юща, вопію́щихъ: благослови́те, вся́ дѣла́ Госпо́дня, Го́спода.

Мудрова́нія врага́ прего́рдаго въ себѣ́ уби́въ, уму́ боже́ственному пріобщи́лся еси́ житіе́мъ твои́мъ чи́стымъ и ума́ свѣ́тлостію, зовы́й непреста́нно: благослови́те, вся́ дѣла́ Госпо́дня, Го́спода.

Изря́днаго уго́дника Христо́ва пѣ́сньми благохва́льными почти́мъ, я́ко испо́лнена я́вѣ благода́ти и боже́ственными сія́ньми преукра́шена, Изба́вителю Бо́гу вопію́ща: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Ра́дуйся, Благода́тная, Госпо́дь съ Тобо́ю, вѣща́ Ти арха́нгелъ Гавріи́лъ: изъ Тебе́ бо произы́де Отроча́ Предвѣ́чно, за милосе́рдіе неизрече́нное превозноси́мый отце́въ Бо́гъ благослове́нный.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ Дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Колѣнопреклоне́нно непреста́нно поя́ несѣда́льное Пречи́стѣй, взыва́лъ еси́: ра́дуйся, мíру Путеводи́тельнице, па́че а́нгелъ небе́сныхъ укра́шенная, укра́си мя красото́ю Твое́ю, да несрамле́нъ явлю́ся предъ Го́сподемъ мои́мъ.

Дивя́ся твоему́ снизхожде́нію во дни́ ю́ности моея́, молю́ тя, не оста́ви мене́, преподобному́чениче, во дни́ ста́рости моея́ и по сме́рти мое́й взыщи́ мене́, да моли́твами твои́ми очи́щенъ, очеса́ми духо́вными узрю́ черто́гъ небе́сный въ де́нь стра́шнаго Суда́ Госпо́дня.

Помяни́ ны́нѣ, свя́тче Бо́жій, и всѣ́хъ вѣ́рою къ тебѣ́ притека́ющихъ, и, отъ душе́вныхъ страсте́й избавля́я, защити́ ны отъ бѣ́дъ и обстоя́ній, и спасе́нія боже́ственнаго бу́ди на́мъ хода́тай.

Богоро́диченъ: Стра́нное и пресла́вное чу́до ви́димъ о Тебѣ́, Богоизбра́нная Влады́чице, я́ко мíра Вседержи́тель, Себе́ ума́ливъ, пло́ть отъ Тебе́ пріе́млетъ, и пита́я Пло́тію Свое́ю пречи́стою, къ животу́ вѣ́чному приво́дитъ лю́ди Своя́.

[Свѣти́ленъ. Подо́бенъ: Жены́, услы́шите.

Страда́ніемъ пе́рвое до́брѣ искуси́вся, второ́е же посто́мъ тече́ніе боже́ственное соверши́въ, на небеса́ возше́лъ еси́, Христу́ предстои́ши, Аѳана́сіе, о́тче преподо́бне, за на́съ моли́ся те́плѣ, пою́щихъ тя́. [Два́жды.]

Сла́ва, и ны́нѣ, богоро́диченъ:

Ра́дость неизрече́нную ро́ждши, Го́спода, ра́дости на́съ небе́сныя прича́стники сотвори́, всѣ́хъ Тебе́ почита́ющихъ, Пречи́стая, благода́ть и́стинну, отъ души́ вопію́щихъ Ти́: не забу́ди Твоя́ рабы́, Благослове́нная Марíе.]

На хвали́техъ стихи́ры [на 4], гла́съ 6:

Преподо́бне о́тче,* хотя́ всѣ́мъ се́рдцемъ Бо́гу благоугожда́ти,* по́двигомъ до́брымъ до конца́ подвиза́лся еси́,* и я́ко зла́то, въ горни́лѣ очи́щено, яви́лся еси́,* сія́яй красото́ю духо́вною ча́домъ твои́мъ,* и́хже житіе́мъ твои́мъ, я́ко нѣ́кою небовосхо́дною лѣ́ствицею,* на высоту́ добродѣ́телей возводя́,* велелѣ́пно восхваля́ти Го́спода научи́лъ еси́.* Помина́й на́съ, о́тче Аѳана́сіе, въ моли́твахъ твои́хъ,* да и мы́ не то́кмо въ житіи́ се́мъ,* но и ку́пно съ тобо́ю на небесѣ́хъ* восхва́лимъ просла́вльшаго тя́ Го́спода. [Два́жды.]

Недоумѣ́етъ у́мъ на́шъ,* кíими похва́льными словесы́ возвели́чимъ Творца́,* дарова́вшаго на́мъ въ тебѣ́ исто́чникъ исцѣле́ній,* пресвѣ́тлую ра́дость,* ору́жіе отъ навѣ́товъ вра́жіихъ,* неусы́пнаго стра́жа страны́ на́шея* и моли́твенника къ Бо́гу о душа́хъ на́шихъ.* До́блестнѣ воспѣва́я со ли́ки небе́сными хвалу́ Бо́гу,* научи́ и на́съ пѣ́ти и превозноси́ти Его́* во вся́ вѣ́ки.

Преподо́бне о́тче Аѳана́сіе,* я́ко дре́во свѣтлоплодови́тое,* ве́лій пло́дъ духо́вный прине́слъ еси́* Це́ркви Святѣ́й Правосла́внѣй,* вѣ́рное ста́до твое́ въ и́стинѣ укрѣпля́я,* отпа́дшихъ вразумля́я и коле́блющихся утвержда́я;* зане́ ны́нѣ отъ плода́ небе́снаго пита́ешися,* утверди́ и на́съ въ вѣ́рѣ и и́стинѣ,* да и мы́ въ чистотѣ́ духо́внѣй и во благоче́стіи поживе́мъ,* непреста́нно славосло́вяще Спа́са на́шего.

Сла́ва, гла́съ то́йже:

Любве́ ра́ди Христо́вы, преподобному́чениче Аѳана́сіе, ве́лія труды́ и злострада́нія претерпѣ́лъ еси́ во благоустрое́ніе Це́ркве Его́ святы́я. Яко адама́нтъ бо тве́рдый, не то́кмо тве́рдо стоя́лъ еси́ за и́стину, но, я́ко исповѣ́дникъ, неуста́нно облича́я хули́тели Правосла́вныя вѣ́ры и предрѣка́я и́мъ гнѣ́въ Бо́жій, претерпѣ́лъ еси́ за сіе́ злострада́нія, темни́цу, поруга́нія и му́ченическую кончи́ну. Сего́ ра́ди вше́лъ еси́ въ ра́дость Го́спода твоего́, и ны́нѣ въ селе́ніихъ небе́сныхъ водворя́яся, воспѣва́еши со а́нгелы Го́сподеви пѣ́снь хвале́бную. Испроси́ на́мъ у Го́спода ве́лія ми́лости, да и мы́ въ бу́дущемъ вѣ́цѣ воспое́мъ ку́пно съ тобо́ю хвалу́ Бо́гу.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ Живота́, Тебѣ́ мо́лимся: моли́ся, Влады́чице, со святы́ми апо́столы, поми́ловати ду́ши на́ша.


[НА ЛИТУРГІИ,

Слу́жба преподобному́ченическая: Блаже́нна отъ кано́на, пѣ́снь 3 и 6. Проки́менъ, гла́съ 7: Восхва́лятся преподо́бніи во сла́вѣ и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ. Апо́столъ къ Тимоѳе́ю, зача́ло 291. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Ма́рка, зача́ло 37. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жба преподобному́ченику Аѳана́сію, игу́мену Бре́стскому. — Варшава: Сѵнодальная Тѵпографія, 1929. — 12 л.

/ Къ оглавленію раздѣла /


Наверхъ / Къ титульной страницѣ

0