Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 5-й де́нь.
Ина слу́жба свята́го проро́ка Заха́ріи и святы́я и пра́ведныя Елисаве́ти.

ВЪ ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры [на 8, гла́съ 4. Подо́бенъ: Да́лъ еси́ зна́меніе.

Ма́сть имѣ́я на себѣ́,* ри́зу же святу́ю,* приснопа́мятне Заха́ріе,* я́ко а́нгелъ, Бо́гу послужи́лъ еси́,* хода́тайствуя Содѣ́телю,* и зда́нію, блаже́нне,* и сказа́нія я́вѣ Боже́ственнаго Ду́ха пріе́мля.* Тѣ́мъ тя́ ублажа́емъ* и свято́е твое́ дне́сь соверша́емъ торжество́,* Спа́са сла́вяще. [Два́жды.]

Отроча́ ви́дѣлъ еси́, ро́ждшееся отъ Отрокови́цы,* Заха́ріе богодохнове́нне,* Отцу́ Собезнача́льно,* и своему́ предъявле́нно проро́чествуеши отроча́ти:* проро́къ бу́деши и́стинно,* Сего́ стези́ уготовля́я.* Съ ни́мже тя́ ублажа́емъ* и честно́е твое́ торжество́ свяще́нно пра́зднуемъ,* богоно́се пребога́те.

Хра́мъ жи́въ и одушевле́нъ* Боже́ственнаго Ду́ха бы́лъ еси́* и посредѣ́ хра́ма, сла́вне,* Бо́гу служа́ чи́стымъ се́рдцемъ,* непра́ведно закла́нъ бы́лъ еси́,* му́ченически соверша́я боже́ственное тече́ніе твое́, достосла́вне.* Тѣ́мъ въ небе́сный хра́мъ вше́лъ еси́* кро́вію свое́ю,* прося́ очище́нія душа́мъ на́шимъ.]

Ины стихи́ры, святы́я на 4, гла́съ 1. Подо́бенъ: Небе́сныхъ чино́въ.

Его́же исхо́ди искони́ дне́й вѣ́чныхъ,* Сего́ воплоща́емаго во утро́бѣ Дѣви́ческой ви́дѣла еси́,* егда́ Ма́терь Го́спода своего́ нарекла́ еси́,* Дѣ́ву цѣлова́вшую тя́,* съ Не́юже моли́ся, пра́ведная Елисаве́то,* да спасе́тъ ду́ши на́ша. [Два́жды.]

Благослове́нъ Пло́дъ е́сть чре́ва Дѣви́ческа,* исполня́яй вся́ческая, —* восклица́ла еси́, преблаже́нная Елисаве́то,* Ду́хомъ Бо́жіимъ дви́жима, та́ко глаго́лала еси́;* въ пѣ́снехъ у́бо тя́ почита́юще,* въ Тро́ицѣ сла́вимаго Бо́га велича́емъ.

Глаго́ланное отъ Го́спода къ Дѣви́цѣ бы́сть,* я́ко роди́тъ Іису́са,* спаса́ющаго лю́ди Своя́ отъ грѣ́хъ и́хъ,* бу́детъ соверше́ніе глаго́ланнымъ къ Не́й,* вѣща́ла еси́ Ду́хомъ Святы́мъ, Елисаве́то,* досто́йно у́бо тя́ похва́льными вѣнцы́ вѣнча́емъ.

Сла́ва, проро́ка, [гла́съ 8. Самогла́сенъ. Іоа́нна Мона́ха:

Свяще́нства зако́ннаго одѣ́янъ и́стинно оде́ждею, по чи́ну Ааро́нову служи́лъ еси́, и предстоя́ въ хра́мѣ, а́нгельскій зра́къ я́вѣ ви́дѣлъ еси́, преблаже́нне. Тѣ́мъ твое́ преставле́ніе вси́ пою́ще до́лжно, Заха́ріе, пѣ́сньми восхваля́емъ тя́, по ста́рости израсти́вша Іоа́нна сла́внаго: моли́ за ны́ ми́лостиваго Бо́га, спасти́ся на́мъ].

И ны́нѣ, богоро́диченъ, [гла́съ то́йже]: Ца́рь небе́сный...
Вхо́дъ. Проки́менъ дне́ и чте́нія три́.

Бытія́ чте́ніе. [Глава́ 18.]

Яви́ся Бо́гъ Авраа́му у ду́ба Мамврíя, сѣдя́щему предъ две́рьми хра́ма его́ въ полу́дне, воззрѣ́въ же очи́ма свои́ма, и узрѣ́, и се́ Тріе́ Му́жи стоя́ху пря́мо ему́. И ви́дѣвъ Я́, притече́ въ срѣ́теніе Имъ отъ две́рій хра́ма его́, и поклони́ся до земли́, и рече́: Го́споди, а́ще обрѣто́хъ благода́ть предъ лице́мъ Твои́мъ, не мини́ раба́ Твоего́, да принесе́тся вода́, и омы́ются но́ги Ва́ша, и прохладите́ся подъ ду́бомъ, и принесу́ хлѣ́бы, да я́сте. И посе́мъ минете́ на пу́ть Сво́й, его́же ра́ди соврати́стеся сѣ́мо къ рабу́ Своему́. И рѣ́ша: та́ко сотвори́, я́коже глаго́ла. И потща́вся Авраа́мъ въ хра́мину къ Са́ррѣ, и рече́ е́й: ускори́ взя́ти три́ спу́ды муки́ чи́сты и сотвори́ потре́бники. И тече́ Авраа́мъ въ кра́вы, и поя́ теле́цъ мла́дъ и до́бръ, и даде́ и́ рабу́, и ускори́ пригото́вити е́. И взя́ ма́сло и млеко́ и теле́цъ, е́же пригото́ва, и поста́ви предъ Ни́ми, и ядо́ша. Са́мъ же стоя́ше предъ Ни́ми подъ дре́вомъ, и реко́ста къ нему́: гдѣ́ Са́рра, жена́ твоя́? Онъ же, отвѣща́въ, рече́: се́ въ хра́минѣ. И рече́: се́ обра́щся пріиду́ къ тебѣ́, о вре́мени се́мъ въ часѣ́, и роди́тъ сы́на Са́рра, жена́ твоя́. Са́рра же услы́ша предъ две́рьми хра́мины, су́щи за ни́мъ. Авраа́мъ же и Са́рра ста́ра бѣ́ста, жи́вши дни́ мно́ги, и мину́ла бя́ше Са́рры же́нская не́мощь. И посмѣя́ся Са́рра, глаго́лющи въ себѣ́: не у́бо бы́ло ми́ досе́лѣ, се́ му́жъ мо́й ста́ръ. И рече́ Госпо́дь ко Авраа́му: что́ я́ко посмѣя́ся Са́рра, къ себѣ́ глаго́лющи: и а́ще пра́во рожду́, а́зъ бо состарѣ́хся? Еда́ не́мощно е́сть отъ Бо́га вся́ко сло́во? Въ сіе́ вре́мя возвращу́ся, и бу́детъ Са́ррѣ сы́нъ.

Суде́й Изра́илевыхъ чте́ніе. [Глава́ 13.]

Бя́ше му́жъ во Апса́рѣ отъ пле́мене Да́нова, и́мя же ему́ Мано́е, и жена́ ему́ бя́ше непло́ды и не ражда́ше. И яви́ся а́нгелъ Госпо́день къ женѣ́ и рече́ къ не́й: се́ у́бо ты́ непло́ды и не роди́ши, се́ бо зачне́ши и роди́ши сы́на, и ны́нѣ снабди́ у́бо. Не пíй вина́, ни сике́ра и не я́ждь нечи́сто ничто́же, я́ко се́ ты́ въ утро́бѣ пріи́меши и породи́ши сы́на. И желѣ́зо на главу́ его́ не взы́детъ, я́ко назоре́й Бо́гови бу́детъ сіе́ отроча́ изъ чре́ва. И се́й на́чнетъ спасти́ Изра́иля изъ руки́ иноплеме́нникъ. И вни́де жена́ и рече́ му́жеви своему́, глаго́лющи: человѣ́къ Бо́жій пріи́де ко мнѣ́, и о́бразъ его́, я́ко о́бразъ а́нгела Бо́жія, стра́шенъ зѣло́, и вопроша́хъ его́: отку́ду еси́? И и́мене своего́ не повѣ́да ми́, и рече́ ми́: се́ ты́ во утро́бѣ зачне́ши и роди́ши сы́на. И ны́нѣ не пíй вина́, ни олови́ны, и не я́ждь ничто́же нечи́сто, я́ко назоре́й Бо́гу бу́детъ о́трочищъ, отъ утро́бы до дне́ сме́рти его́. И помоли́ся Мано́е къ Го́сподеви, и рече́: о, Го́споди! человѣ́къ Бо́жій, его́же Ты́ посла́, да пріи́детъ къ на́мъ и нака́жетъ ны́, что́ сотвори́мъ отроча́ти ражда́ющемуся. И послу́ша Бо́гъ моли́твы Мано́евы. И пріи́де па́ки а́нгелъ Бо́жій къ женѣ́. Сія́ же сѣдя́ше на селѣ́, Мано́е же, му́жъ ея́, не бя́ше съ не́ю. И потща́ся жена́, и, те́кши ско́ро, повѣ́да му́жу своему́, и рече́ къ нему́: се́ яви́ся ми́ му́жъ, и́же приходи́ въ де́нь о́нъ ко мнѣ́. И воста́въ, и́де Мано́е въ слѣ́дъ жены́ своея́, и пріи́де къ му́жу, и рече́ ему́: ты́ ли еси́ му́жъ, глаго́лавый къ женѣ́ мое́й? И рече́ а́нгелъ: а́зъ е́смь. И рече́ Мано́е: ны́нѣ у́бо да пріи́детъ сло́во твое́, что́ е́сть су́дъ отроча́те и что́ е́сть творе́ніе его́? И рече́ а́нгелъ Госпо́день къ Мано́еви: отъ сего́, е́же глаго́лахъ женѣ́, да сохрани́тся отъ всего́; и отъ всего́, е́же исхо́дитъ изъ виногра́да, да не я́стъ, и вина́ и сике́ра да не піе́тъ, и всего́ нечи́ста да не я́стъ, и все́, ели́ко заповѣ́дахъ, сіе́ да снабди́тъ. И рече́ Мано́е ко а́нгелу Бо́жію: да тя́ пону́димъ и сотвори́мъ предъ тобо́ю ко́злище отъ ко́зъ. И рече́ а́нгелъ Бо́жій къ Мано́еви: а́ще мя́ ну́диши, и не я́мъ хлѣ́ба твоего́. Но а́ще сотвори́ши всесожже́ніе Го́сподеви, то́ вознеси́ е́. Не вѣ́дяще бо Мано́е, я́ко а́нгелъ Госпо́день е́сть. И рече́ Мано́е ко а́нгелу Госпо́дню: что́ е́сть и́мя твое́, да егда́ сбу́дется сло́во твое́, просла́вимъ тя́? И рече́ ему́ а́нгелъ Госпо́день: почто́ се́ вопроша́еши и́мене моего́? Се́ же е́сть чу́дно. И взя́ Мано́е ко́злищъ отъ ко́зъ и тре́бу, и вознесе́ на ка́мень Го́сподеви, и сотвори́ чу́дно. Мано́е же и жена́ его́ глядѣ́ста. И бы́сть, егда́ пла́мень взы́де вы́ше олтаря́ до небесе́, и взы́де а́нгелъ Госпо́день въ пла́мени олтаря́. Мано́е же и жена́ его́ смотря́ста, и падо́ста ни́цъ на земли́.

Ца́рствъ пе́рвыхъ чте́ніе. [Глава́ 1.]

Воста́вши Анна по яде́ніи и́хъ, и́де въ Сило́мъ и ста́ предъ Го́сподемъ. Илíй же, жре́цъ, сѣдя́ше на престо́лѣ при пра́зѣ две́ри хра́ма Госпо́дня. И та́ умиле́нною душе́ю поклони́ся Го́споду и, пла́чущи, пропла́ка. И помоли́ся моли́твою къ Го́споду, глаго́лющи: Адонаи́ Го́споди Елои́ Савао́ѳъ. Аще, призря́, при́зриши на смире́ніе рабы́ Твоея́, и помяне́ши мя́, и да́си рабѣ́ Твое́й сѣ́мя му́жеско, то да́мъ е́ предъ Тобо́ю въ да́ръ до дне́ сме́рти его́, вина́ и пія́нства не піе́тъ, и желѣ́зо не взы́детъ на главу́ его́. И бы́сть, егда́ умно́жи моля́щися предъ Го́сподемъ, Илíй же, жре́цъ, взира́ше на уста́ ея́. И та́ глаго́лаше въ се́рдцы свое́мъ, то́кмо устнѣ́ ея́ двиза́стѣся, а гла́съ ея́ не слы́шашеся. И мня́ше ю́ Илíй пія́ну су́щу. И рече́ е́й Илíй: доко́лѣ пія́на еси́? Отыми́ вино́ твое́ и иди́ отъ мѣ́ста Госпо́дня. И отвѣща́ Анна, и рече́: ни́, господи́не мо́й, но жена́ въ жесто́къ де́нь а́зъ е́смь, вина́ и пія́нства не пи́хъ, но излія́хъ предъ Го́сподемъ ду́шу мою́. Не да́ждь рабы́ твоея́ дще́ремъ поруга́нія, я́ко отъ мно́жества уны́нія моего́ и отъ мно́жества сѣ́тованія моего́ стоя́хъ да́же досе́лѣ. И отвеща́ Илíй, и рече́ къ не́й: иди́ съ ми́ромъ, Бо́гъ Изра́илевъ да́стъ ти́ вся́ко проше́ніе твое́, его́же про́сиши отъ Него́. И рече́ Анна: да обря́щетъ раба́ твоя́ благода́ть предъ очи́ма твои́ма. И и́де жена́ путе́мъ свои́мъ, и вни́де во оби́тель свою́. И яде́ съ му́жемъ свои́мъ и пи́тъ, и лице́ ея́ не испаде́ ктому́. И у́треневаша зау́тра, и поклони́шася Го́сподеви, и идо́ша путе́мъ свои́мъ. И вни́де Елкана́ въ до́мъ сво́й во Ексармаѳе́мъ, и разумѣ́ Елкана́ жену́ свою́ Анну. И помяну́ ю́ Госпо́дь, и зача́тъ, и бы́сть во вре́мя днíй, и роди́ Анна сы́на и нарече́ и́мя ему́ Самуи́лъ, я́ко отъ Го́спода Бо́га Савао́ѳа испроси́хъ его́.

На литíи стихи́ра хра́ма и святѣ́й, гла́съ 6:

Іоа́ннъ, ви́дѣвъ Іису́са, — се́ Агнецъ Бо́жій, — возопи́, исполня́яй Иса́іино прорече́ніе; коне́цъ проро́комъ е́сть сы́нъ тво́й, Елисаве́то, досто́йно у́бо тя́ да ублажа́ютъ лю́діе.

Сы́на твоего́ десни́цѣ главу́ преклони́ Іису́съ, Госпо́дь госпо́дствующихъ сы́й и Влады́ка владѣ́ющихъ: ве́лія сла́ва твоя́, достохва́льная Елисаве́то.

Облича́ше велехва́льныя фарисе́и, глаго́ля къ ни́мъ: порожде́нія ехи́днина, сотвори́те плоды́ досто́йны покая́нія, гла́съ сы́й вопію́щаго въ пусты́ни, и почита́шеся учи́тель: такова́ сы́на ма́ти еси́, Елисаве́то свята́я.

Сла́ва, гла́съ 6:

За́повѣди Бо́жія храня́щи, пло́дъ, все́льшійся въ тя́, живы́я вѣ́ры, приноси́ла еси́, богому́драя Елисаве́то: кíими тя́ досто́йными пѣ́ніи, кíими досто́йными похвала́ми увѣнча́емъ, вѣ́рніи?

И ны́нѣ, богоро́диченъ, [гла́съ то́йже: Творе́цъ и Изба́витель мо́й, Пречи́стая...]

На стихо́внѣ стихи́ры, гла́съ 1:

Мно́гихъ досто́йна еси́ хвале́ній,* богому́драя Елисаве́то,* пра́ведною имену́емая сло́вомъ Бо́жіимъ,* въ за́повѣдехъ Госпо́днихъ ходи́вшая,* ми́лостію Бо́жіею подвиза́ема.

Сти́хъ: Честна́ предъ Го́сподемъ* [сме́рть преподо́бныхъ Его́].

Нелицемѣ́рную любо́вь къ Бо́гу,* нелицемѣ́рную любо́вь къ бли́жнимъ имѣ́ла еси́,* въ за́повѣдехъ Госпо́днихъ ходя́,* многосла́вная Елисаве́то:* пло́дъ се́ вѣ́ры твоея́ бы́сть.* Тѣ́мъ, торжеству́юще, ублажа́емъ тя́.

Сти́хъ: Блаже́нъ му́жъ, боя́йся Го́спода,* [въ за́повѣдехъ Его́ восхо́щетъ зѣло́].

Непло́дной и заматорѣ́вшей,* пресла́вный пло́дъ чре́ва дарова́ся тебѣ́* отъ Всеще́драго Бо́га —* покая́нія проповѣ́дникъ.* Тѣ́мъ тя́ ублажа́юще,* всеси́льную ми́лость Бо́жію велича́емъ.

Сла́ва, проро́ка, гла́съ 2. [Анато́ліево.

Яко чи́стъ іере́й во Свята́я святы́хъ вше́лъ еси́, и оде́ждею свяще́нною одѣ́янъ, непоро́чно Бо́гу служи́лъ еси́, я́коже Ааро́нъ законополага́я и я́ко Моисе́й водя́ колѣ́на Изра́илева, звонце́въ въ чи́стомъ зна́меніи. Тѣ́мже и убіе́нъ бы́лъ еси́, но кро́вь твоя́ пра́ведная спаси́тельное на́мъ исцѣле́ніе бы́сть, и я́ко мѵ́ро благово́нное, слу́хи отверза́етъ къ ше́ствію вѣ́чныя жи́зни. Заха́ріе треблаже́нне, Крести́теля Іоа́нна роди́телю и Елисаве́ти сопру́жниче, прилѣ́жно моли́ о душа́хъ на́шихъ].

И ны́нѣ, богоро́диченъ, [гла́съ то́йже]: О, чудесе́ но́ваго...


Тропа́рь, гла́съ 2:

Пра́ведныхъ Твои́хъ Заха́ріи и Елисаве́ти, Го́споди, па́мять пра́зднующе, тѣ́ми мо́лимъ Тя́: спаси́ ду́ши на́ша.

Слава, и нынѣ, богородиченъ: [Вся, паче смысла...]



[НА УТРЕНИ,
На Бо́гъ Госпо́дь: тропа́рь святы́хъ два́жды. Сла́ва, и ны́нѣ, богоро́диченъ.]

По 1-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

Ве́ліе человѣколю́біе Свое́, е́же къ земноро́днымъ, Всеблагíй Бо́гъ и́мать, на тебѣ́ показа́, Елисаве́то, я́ко пра́ведну тя́ бы́ти со Заха́ріемъ по неизрече́ннѣй бла́гости Свое́й изво́ли. Ка́я благодаре́нія Тебѣ́, Ми́лостиве, ка́я пѣ́нія принесе́мъ, грѣ́шніи раби́ Твои́, Влады́ко? [Два́жды.]

Сла́ва, и ны́нѣ:

Свы́ше наше́дшаго Ду́ха Свята́го осѣне́ніемъ зачала́ еси́, Дѣ́во Всенепоро́чная, и родила́ еси́ пре́жде вѣ́къ Су́щаго, да торжеству́етъ тва́рь, хва́лящи Тя́ и пресла́вное Рождество́ Твое́ велича́ющи, и да пое́тъ, ра́достію духо́вною веселя́щися, Изба́вителя душа́мъ на́шимъ роди́вшая, еди́на Благослове́нная.

По 2-й каѳи́смѣ сѣда́ленъ, гла́съ 4. Подо́бенъ: Удиви́ся Іо́сифъ.

Всера́достное дарова́ніе Аннѣ непло́дной Самуи́лъ бы́сть, всера́достное дая́ніе и тебѣ́, пра́ведная Елисаве́то, благода́ти тезоимени́тый. Ди́вная ми́лость Твоя́ къ человѣ́комъ, Бо́же. Сла́ва мно́гимъ щедро́тамъ Твои́мъ, сла́ва благоутро́бію Твоему́! [Два́жды.]

Сла́ва, и ны́нѣ, богоро́диченъ:

Ма́ти неискусобра́чная, престо́лъ херуви́мскій показа́ся утро́ба Твоя́ Бо́га непристу́пнаго, Ты́ бо еди́на вмѣсти́лище еси́ Бо́жіе, Бо́га ро́ждши воплоще́ннаго, отъ всѣ́хъ грѣхо́въ избавля́ющего рабы́ Своя́. Тѣ́мъ досто́йно е́сть се́рдцемъ и устна́ми ублажа́ти Тя́.

Велича́ніе:

Велича́емъ ва́съ, святíи пра́ведніи Заха́ріе и Елисаве́то, и чте́мъ святу́ю па́мять ва́шу, вы́ бо мо́лите о на́съ Христа́ Бо́га на́шего.

Избра́нный псало́мъ:

Ли́къ 1-й: Благослове́нъ Госпо́дь Бо́гъ Изра́илевъ, я́ко посѣти́ и сотвори́ избавле́ніе лю́демъ Свои́мъ. Ли́къ 2-й: И воздви́же ро́гъ спасе́нія на́мъ въ дому́ Дави́довѣ, Отрока Своего́. Ли́къ 1-й: Кля́тся Госпо́дь Дави́ду и́стиною и не отве́ржется ея́. Ли́къ 2-й: Та́мо возращу́ ро́гъ Дави́ду, угото́вахъ свѣти́льникъ пома́занному Моему́. Ли́къ 1-й: Си́льно на земли́ бу́детъ сѣ́мя его́. Ли́къ 2-й: Ро́дъ пра́выхъ благослови́тся. Ли́къ 1-й: Служи́ти Ему́ въ преподо́біи и пра́вдѣ предъ Ни́мъ вся́ дни́ живота́ на́шего. Ли́къ 2-й: И ты́, отроча́, проро́къ Вы́шняго нарече́шися. Ли́къ 1-й: Преды́деши бо предъ лице́мъ Госпо́днимъ, угото́вати пути́ Его́. Ли́къ 2-й: Да́ти ра́зумъ спасе́нія лю́демъ Его́. Ли́къ 1-й: Во оставле́ніе грѣхо́въ и́хъ, милосе́рдія ра́ди ми́лости Бо́га на́шего. Ли́къ 2-й: Напра́вити но́ги на́ша на пу́ть ми́ра. Ли́къ 1-й: Госпо́дь лю́битъ пра́ведники. Ли́къ 2-й: Благоволи́тъ Госпо́дь въ боя́щихся Его́ и во упова́ющихъ на ми́лость Его́. Ли́къ 1-й: Хвало́ Изра́илева, на Тя́ упова́ша отцы́ на́ши, упова́ша, и изба́вилъ еси́ и́хъ. Ли́къ 2-й: Се́й ро́дъ и́щущихъ Го́спода, и́щущихъ лице́ Бо́га Іа́ковля. Ли́къ 1-й: Блаже́ни вси́ боя́щіися Го́спода, ходя́щіи въ путе́хъ Его́. Ли́къ 2-й: Вѣ́сть Госпо́дь пути́ непоро́чныхъ, и достоя́ніе и́хъ во вѣ́ки бу́детъ. Ли́къ 1-й: Блаже́ни лю́діе, и́мже Госпо́дь Бо́гъ и́хъ. Ли́къ 2-й: Хвали́теся вси́ пра́віи се́рдцемъ. Ли́къ 1-й: Пра́вымъ подоба́етъ похвала́.

Сла́ва, и ны́нѣ. Аллилу́ія... [Три́жды.]


По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Въ повелѣ́нія Бо́жія процвѣта́юще со преблаже́ннымъ Заха́ріемъ, Бо́жіею руко́ю подвиза́ема, дще́рей Ааро́новыхъ о́трасле, всехва́льная Елисаве́то, моли́ Преблага́го Влады́ку, да прино́симъ и мы́, грѣ́шніи, до́бръ пло́дъ живы́я вѣ́ры. [Два́жды.]

Сла́ва, и ны́нѣ, богоро́диченъ:

Еди́на Роди́тельница Бо́гу, еди́на Приснодѣ́во, Пречи́стая Богоневѣ́сто, я́ко родила́ еси́ Дѣ́вою и пребыва́еши нетлѣ́нна. Тѣ́мъ Тя́ а́нгелъ и человѣ́къ чинонача́лія велича́ютъ.

[Степе́нна, 1-й антифо́нъ 4-го гла́са.] Проки́менъ, гласъ 4: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ. Вся́кое дыха́ніе да хва́литъ Го́спода... Ева́нгеліе отъ Луки́, зача́ло 2, е́же чте́тся на Рождество́ Предте́чи, его́же нача́ло: Бы́сть во дни́ Ирода, царя́ Іуде́йска... Коне́цъ: Призрѣ́ отъя́ти поноше́ніе мое́ въ человѣ́цѣхъ.

По 50-мъ псалмѣ́ стихи́ра, гла́съ 1:

Глаго́ланное отъ Го́спода къ Дѣви́цѣ бы́сть, [я́ко роди́тъ Іису́са, спаса́ющаго лю́ди Своя́ отъ грѣ́хъ и́хъ, бу́детъ соверше́ніе глаго́ланнымъ къ Не́й, вѣща́ла еси́ Ду́хомъ Святы́мъ, Елисаве́то, досто́йно у́бо тя́ похва́льными вѣнцы́ вѣнча́емъ].

Кано́нъ Богоро́дицѣ со ирмосо́мъ на 6 и проро́ку на 4. [Творе́ніе Ѳеофа́ново. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Па́мять, проро́че, твою́ восхвали́ти Ду́ха благода́ть молю́, помощи́ мнѣ́ твои́мъ хода́тайствомъ, взыва́я: Изба́вителю Бо́гу на́шему воспои́мъ.

Житіе́ твое́ непоро́чно обрѣ́теся, свяще́нства украси́ся оде́ждею и проро́чества свѣтоно́сными сія́ніи, богоглаго́ливе, блаже́нне.

Зако́ннымъ вѣнце́мъ главу́ украси́въ, Заха́ріе, яви́лся еси́ священноявле́ненъ, вопія́: Изба́вителю Бо́гу на́шему пои́мъ.

Богоро́диченъ: Поди́ра оде́ждею, я́ко Ааро́нъ, одѣ́янъ, Юже отъ ко́рене Іессе́ева прозя́бшую Отрокови́цу прія́лъ еси́, Изба́вителя во чре́вѣ носи́вшую.]

И святѣ́й на 4, гла́съ 8.
Пѣ́снь 1.

Ирмо́съ: Сокруши́вшему бра́ни [мы́шцею Свое́ю и прове́дшему Изра́иля сквозѣ́ Чермно́е мо́ре, пои́мъ Ему́, я́ко Изба́вителю на́шему Бо́гу, я́ко просла́вися].

Истинную любо́вь имѣ́ла еси́ къ Бо́гу, боголюби́вая Елисаве́то, за́повѣди Его́ храня́. Се́й бо и́стинно лю́битъ Бо́га, и́же за́повѣди Его́ соблюда́етъ, — боголюби́вую у́бо тя́ хвала́ми возвели́чимъ.

Благода́тію спасе́ни, добродѣ́тельми угожда́ти и́мамы Бо́гу, я́коже и Елисаве́ть во всѣ́хъ за́повѣдехъ Госпо́днихъ ходи́ безъ поро́ка, ю́же досто́йно пѣ́сньми да ублажи́мъ.

Дѣ́йствуяй вся́ во всѣ́хъ, Бо́же, и въ блаже́нной Елисаве́ти всеси́льную ми́лость Твою́ явля́лъ еси́: о всѣ́хъ дѣ́лѣхъ Твои́хъ благодаре́ніе Тебѣ́ прино́симъ.

Богоро́диченъ: Исаа́ка Са́рра ро́ждши непло́ды, ра́довашеся: Тебѣ́, дѣ́вствующей и ро́ждшей Го́спода Іису́са, па́че ра́доватися подоба́етъ, Пречи́стая.

Катава́сія: Кре́стъ начерта́въ...

Пѣ́снь 3.

[Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Егда́ кади́ло сложе́нія приноси́лъ еси́, архіере́е, тогда́ Предте́чи прія́лъ еси́ провозвѣще́ніе.

Мѵ́ромъ свяще́нія свяще́нствовати тя́ пома́за, я́ко Ааро́на, тѣ́мъ видѣ́нія а́нгелова сподо́бился еси́.

Утро, провозвѣща́ющее вселе́ннѣй Тя́, Со́лнца Разу́мнаго, Спа́се, Заха́рія Іоа́нна роди́лъ е́сть.

Богоро́диченъ: Упра́ви житіе́ мое́, Богороди́тельнице Всечи́стая и жи́знь, Яже Заха́ріинъ до́мъ уясни́вшая.

Инъ.]

Ирмо́съ: Утверди́ся се́рдце мое́ въ Го́сподѣ, [вознесе́ся ро́гъ мо́й въ Бо́зѣ мое́мъ, разши́ришася на враги́ моя́ уста́ моя́, возвесели́хся о спасе́ніи Твое́мъ].

Пра́ведну тя́ съ Заха́ріемъ, блаже́нная Елисаве́то, Ду́хъ Святы́й въ Писа́ніи нарече́: бѣ́ста пра́ведна предъ Бо́гомъ, глаго́ля. Мессíя же Пра́вда на́мъ е́сть отъ Бо́га, Мессíею у́бо оправда́на была́ еси́. Кто́ похва́льными пѣ́сньми тя́ не возвели́читъ?

Не оправди́тся предъ Го́сподемъ вся́къ живы́й, ты́ же пра́ведна была́ еси́, приснопа́мятная Елисаве́то; Госпо́дь Іису́съ освяще́ніе всѣ́мъ е́сть, свя́ту тя́ да восхваля́етъ вся́къ.

Ди́венъ во святы́хъ, Бо́же, пресла́вными и въ блаже́нной Елисаве́ти удиви́лся еси́, пѣ́снь благода́рственную прино́симъ Тебѣ́, Всеще́дрому.

Богоро́диченъ: Непло́ды въ ста́рости ро́ждши Са́рра, ма́терь су́щи, ублажа́шеся. Тя́, Ма́терь и Дѣ́ву, Пречи́стая, досто́йно восхвали́ти недоумѣ́емъ.

Конда́къ, [гла́съ 3. Подо́бенъ: Дѣ́ва дне́сь.

Проро́къ дне́сь и свяще́нникъ Вы́шняго, Заха́рія предложи́, Предте́чевъ роди́тель, трапе́зу своея́ па́мяти, вѣ́рныя пита́я, питіе́ бо пра́вды всѣ́мъ раствори́въ, сего́ ра́ди скончава́ется, я́ко боже́ственный таи́нникъ Бо́жія благода́ти.]

Икосъ:

[Зако́на молча́ніемъ іера́рхъ связа́ся, а́нгела гла́сомъ, а́нгела пріе́мъ Христо́ва прише́ствія, проро́ка и таи́нника, съ Елисаве́тію непло́дною и цѣлому́дренною, и Того́ Рождество́мъ обнови́ся благода́ть и избавле́ніе, и примире́ніе на́ше всемíрное. Сего́ проповѣ́да Агнца, и Содѣ́теля, и естеству́ Обнови́теля, отъ непло́дныя утро́бы пло́дъ подаю́ща, Сы́на же, я́вльшася изъ Дѣ́вы, я́ко боже́ственный таи́нникъ Бо́жія благода́ти.]

Сѣда́ленъ, [гла́съ 8. Подо́бенъ: Повелѣ́нное.

Свяще́нствовавъ Бо́гу по зако́ну и проро́чествовавъ Христа́ изъ Дѣ́вы, Заха́ріе, воплоще́нна отъ Ду́ха Свя́та, яви́лся еси́ вселе́ннѣй сто́лпъ свѣ́телъ, съ высоты́ Пра́вды Восто́ка, ве́сь мíръ осія́юща и въ пу́ть ми́ренъ направля́юща но́ги на́ша, ре́клъ еси́, спаса́юща ро́дъ на́шъ.]

Сла́ва, сѣда́ленъ святѣ́й, гла́съ 4:

Воплоти́вшуся уже́ Мессíи, пе́рвую тя́ благовѣ́стницу слы́шимъ, егда́ къ цѣлова́вшей тя́ богоизбра́нной Отрокови́цѣ со у́жасомъ глаго́лала еси́: отку́ду мнѣ́ се́, да пріи́де Ма́ти Го́спода Моего́ ко мнѣ́? Восхваля́юще у́бо тя́, вопіе́мъ: ра́дуйся, зерца́ло, та́йны Бо́жія на́мъ явля́ющее.

И ны́нѣ, богоро́диченъ:

Богоро́дицу Тя́ исповѣ́дуемъ, Влады́чице, Сы́номъ Твои́мъ, ро́ждшимся отъ Тебе́, спа́сшіися грѣ́шніи раби́, Бо́га бо непостижи́мо родила́ еси́, Кро́вію Свое́ю очища́ющаго на́съ отъ вся́каго грѣха́ и въ ра́йское весе́ліе приводя́щаго, Его́же съ Тобо́ю восхваля́емъ, веселя́щеся.

Пѣ́снь 4.

[Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Проро́къ Тво́й, Влады́ко, о́бразы зако́нными вѣ́рно служа́ше Тебѣ́ и благода́ти сподо́бися усмотри́ти Твою́ и́стину.

Свѣ́томъ Свѣ́тъ прія́лъ еси́, мра́чнѣйшимъ ты́ яснѣ́йшій, преблаже́нне: зако́номъ бо и благода́ть ны́нѣ тебѣ́ приложи́ся.

Бо́гу предстоя́й, боже́ственный Гавріи́лъ, благовѣству́я, яви́ тебѣ́, блаже́нне, гла́съ Сло́ва и Предте́чу.

Богоро́диченъ: Чи́стое жили́ще Содѣ́тель, Дѣ́во, тва́ри обрѣ́тъ Тя́, всели́ся, Елисаве́тино разрѣши́вый непло́дство.

Инъ.]

Ирмо́съ: Проро́къ Авваку́мъ у́мныма очи́ма [прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́].

Жена́ су́щи Заха́ріина, во всѣ́хъ за́повѣдехъ безъ поро́ка ходи́ла еси́; и́ніи же дѣ́вы бы́ша, и еле́я добродѣ́телей не имѣ́яху: лу́чше зва́ніе твое́ па́че дѣ́вства о́нѣхъ, вся́къ во́зрастъ да сла́витъ тя́.

Па́велъ, вѣ́рныхъ обруча́я Христо́ви, и бра́чныхъ дѣ́вою чи́стою нарече́, глаго́ля: обручи́хъ ва́съ еди́ному Му́жу, дѣ́ву чи́сту; кольми́ па́че, во всѣ́хъ за́повѣдехъ ходи́вшую, тя́ къ му́дрымъ дѣ́вамъ Бо́гъ сочета́, богому́драя Елисаве́то, досто́йно у́бо тя́ восхваля́емъ.

Яко сто́лпъ о́гненный и о́блакъ путьше́ствующему къ землѣ́ обѣтова́ннѣй Изра́илю, та́ко ходи́вшую въ за́повѣдехъ Госпо́днихъ дво́ицу, блаже́ннаго Заха́рія и Елисаве́ту, во о́бразъ богоугожде́нія на́мъ предъяви́лъ еси́, Бо́же; неизрече́нное человѣколю́біе Твое́ е́сть, Всеси́льный Влады́ко.

Богоро́диченъ: Исаа́ка рожде́ніе отъ безча́дныя ма́тере поноше́ніе отъя́тъ и возвели́чи сла́вою, Ро́ждшееся отъ Тебе́ Свя́то пе́рвѣйшую сла́ву принесе́ Тебѣ́, Пречи́стая Дѣ́во и Ма́ти: вся́къ земноро́дный да сла́витъ Тя́.

Пѣ́снь 5.

[Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́ ино́го не вѣ́мы.

Кида́рь положи́ся на главѣ́ твое́й, о проро́че, въ начерта́ніи иму́щь и́стинное Боже́ственное свяще́ніе.

Ра́дуется тва́рь рождество́мъ твои́мъ, архіере́е, ты́ бо прозя́блъ еси́ покая́нія проповѣ́дника.

Укра́шено твое́ житіе́ препроводи́въ, за́повѣди бо вся́ Госпо́дня съ Елисаве́тою соверши́лъ еси́.

Богоро́диченъ: Направля́ется къ пѣ́нію язы́къ тво́й, богоглаго́ливе, Неискусобра́чную бо во чре́вѣ нося́щу ви́дѣлъ еси́.

Инъ.]

Ирмо́съ: Го́споди Бо́же на́шъ, ми́ръ да́ждь [на́мъ, Го́споди Бо́же на́шъ, стяжи́ ны, Го́споди, ра́звѣ Тебе́ ино́го не вѣ́мы, и́мя Твое́ имену́емъ].

Его́же Бо́гъ а́нгеломъ у Малахíя нарече́, глаго́ля: се́ Азъ посыла́ю а́нгела Моего́ предъ лице́мъ Твои́мъ, — сего́ ты́, непло́дная, родила́ еси́, Елисаве́ть, досто́йными у́бо тя́ вѣнча́емъ похвала́ми.

Гла́съ вопію́щаго Бо́га рожде́нное отъ тебе́, всечестна́я Елисаве́то, е́сть, тѣ́мъ, я́ко у́ста Бо́жія, кто́ не восхва́литъ тя́?

Яко отъ ка́мене иногда́ непло́дна во́ду лю́демъ Твои́мъ источи́лъ еси́, Бо́же, та́ко отъ непло́дныя Елисаве́ти покая́нію проповѣ́дателя дарова́лъ еси́: вся́ пресла́вная Твоя́, Всеси́льный Влады́ко.

Богоро́диченъ: Сугу́бъ пло́дъ — Іо́сифа и Веніами́на, Рахи́ль непло́ды имѣ́, почита́ется плодоро́діемъ, Ты́ же еди́наго ѵпоста́сію, сугу́ба естество́мъ родила́ еси́, Дѣ́во. Неизрече́нная сла́ва Твоя́, Ма́ти Емману́илева!

Пѣ́снь 6.

[Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Зако́на служа́й сѣ́ни, яви́ся и благода́ти проповѣ́дникъ, Спа́се на́шъ, сподо́бися бо ви́дѣти Твое́ воплоще́ніе.

Су́дными словесы́ укра́шся, Сло́во присносу́щное, пло́ть нося́що, Заха́ріе свяще́нне, прія́лъ еси́.

Яви́лся еси́ вну́трь хра́ма, служа́ Бо́гу, таи́нниче богодухнове́нне, іере́й бы́въ досточу́денъ.

Богоро́диченъ: Спа́са, Богома́ти, во утро́бѣ, Дѣ́во, нося́щи, Сло́ва Безнача́льнаго, Елисаве́ти позна́лася еси́ проро́чицѣ.

Инъ.]

Ирмо́съ: Яко во́ды морскíя, [Человѣколю́бче, волна́ми жите́йскими обурева́юся, тѣ́мже, я́ко Іо́на, та́ко вопію́ Ти́: возведи́ отъ тли́ живо́тъ мо́й, благоутро́бне Го́споди].

Во утро́бѣ твое́й сы́й Іоа́ннъ, Елисаве́то свята́я, ви́дѣвъ Спа́са своего́, и взыгра́ся младе́нецъ. Блаже́нна су́ть ложесна́ твоя́, я́вльшая младе́нца, позна́вшаго спасе́ніе свое́ — Іису́са.

Ду́хомъ Святы́мъ укрѣпля́ема проти́во всѣ́хъ хотѣ́ній, сы́на своего́ Іоа́нномъ именова́ла еси́, преблаже́нная Елисаве́то, вся́къ да хва́литъ тя́, орга́нъ Свята́го Ду́ха.

Твоему́ отъ Дѣ́вы рождеству́ недомы́слимому отъ непло́дныя Елисаве́ти зача́тіе, а́ки подо́біе, яви́лъ еси́, Бо́же: сла́ва держа́вной прему́дрости Твое́й!

Богоро́диченъ: Веніами́нъ, рожде́нный Рахи́ліею, ма́терь свою́ умертви́ въ рожде́ніи, рожде́нное отъ Тебе́ Сло́во — Живо́тъ е́сть всѣ́мъ и́стинный: Его́же умоли́, да надѣ́ющіися На́нь, живо́тъ и́мамы вѣ́чный.

Конда́къ, гла́съ 4:

Яко луна́ полна́, свѣ́тъ пра́вды отъ мы́сленнаго Со́лнца, Мессíи, прія́ла еси́ и во всѣ́хъ за́повѣдехъ Госпо́днихъ съ Заха́ріемъ ходи́ла еси́, боговозлю́бленная Елисаве́то. Досто́йными у́бо тя́ пѣ́сньми ублажа́юще, всеще́драго Свѣ́та, просвѣща́ющаго всѣ́хъ, Го́спода велича́емъ.

Икосъ:

Якоже на двои́хъ скрижа́лѣхъ иногда́ за́повѣди Своя́ изобрази́ Бо́гъ, та́ко благода́тію Свое́ю ва́съ просвѣти́, блаже́нный Заха́ріе со Елисаве́тою, я́ко въ за́повѣдехъ Его́ ходи́ти ва́мъ безъ поро́ка: досто́йнѣ у́бо восхваля́юще ва́съ, всеще́драго Свѣ́та, просвѣща́ющаго всѣ́хъ, Го́спода велича́емъ.

Пѣ́снь 7.

[Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Егда́ гла́съ вопію́щаго пріи́де отъ непло́дныя, па́че естества́, твоего́ язы́ка у́зы разрѣши́, зва́ти: благослове́нъ еси́, Го́споди Бо́же, во вѣ́ки.

Люби́мичь роди́ся Женихо́въ отъ непло́дове, Рождество́ Дѣ́вы провозвѣща́я я́вѣ Предте́ча, вѣ́рою зову́щимъ: благослове́нъ еси́, Го́споди Бо́же, во вѣ́ки.

Ве́сь бы́лъ еси́, Заха́ріе, боже́ственный орга́нъ Ду́ха, треблаже́нне, и проро́ка твое́ провозвѣща́ше отроча́, благослове́нъ еси́, зову́ща, Го́споди Бо́же, во вѣ́ки.

Богоро́диченъ: Зако́на исполне́ніе Тя́, Отрокови́це, глави́зну всего́ проро́чествія Заха́рія зря́, позна́ше, вопія́: благослове́нъ, Пречи́стая, Пло́дъ Твоего́ чре́ва.

Инъ.]

Ирмо́съ: Халде́йская пе́щь, [огне́мъ распала́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ].

Благодари́ти Бо́га учи́ши на́съ, богому́драя Елисаве́то, глаго́лющи о рожде́ніи твое́мъ: та́ко ми́ сотвори́ Госпо́дь; Бо́гомъ науче́нна еси́ учи́тельница.

Его́же а́нгелъ вну́трь олтаря́ Іоа́нномъ бы́ти объяви́ Заха́ріи, того́ ты́, рожде́ннаго отъ тебе́, всѣ́мъ лю́демъ, Бо́гомъ наставля́ема, та́кожде именова́ла еси́: а́нгеломъ подо́бенъ язы́къ тво́й, приснопа́мятная Елисаве́то.

Яко не́бо ма́нною обремени́въ Бо́гъ, о́ную лю́демъ въ пусты́ни низпусти́, та́ко отъ блаже́нныя Елисаве́ти Іоа́нна, благода́ти вѣща́теля, на́мъ дарова́: ве́лія ми́лость Твоя́ къ человѣ́комъ, Бо́же.

Богоро́диченъ: Са́рра, ро́ждши Исаа́ка, о́бразъ Іису́совъ, — ра́дость ми́ сотвори́ Госпо́дь, — глаго́лаше; Образова́ннаго Исаа́комъ ро́ждшая и дѣ́вствующая, па́че — ра́дуйся, — Всепѣ́тая Ма́ти Дѣ́во.

Пѣ́снь 8.

[Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Истины показа́ся проро́къ, Христо́вы бо стези́ Іоа́ннъ предгряды́й угото́ва Предте́ча, блаже́нне іера́рше, Его́же превозно́симъ во вся́ вѣ́ки.

Витíйствуя, благослови́лъ еси́ Влады́ку, спасе́ніе на́мъ пода́вшаго, отъ Дави́да возсія́вшаго на́мъ пло́тію Го́спода сла́вы, Его́же превозно́симъ во вся́ вѣ́ки.

Дарова́ній вели́кихъ сподо́бися, богоявле́нне, Предте́чу роди́въ, проро́ковъ всѣ́хъ вы́шшаго, Го́спода пою́ща и превознося́ще во вся́ вѣ́ки.

Богоро́диченъ: Іера́рхъ ку́пно и богопроповѣ́дникъ, Заха́рія Дѣ́вѣ и Ма́тери, Го́спода нося́щей тва́ри, ра́дуяся, поклони́ся, Юже превозно́симъ во вся́ вѣ́ки.

Инъ.]

Ирмо́съ: Покрыва́яй вода́ми [превы́спренняя Своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки].

Якоже о Це́ркви Свое́й рече́ Бо́гъ: вся́ кра́сная, бли́жняя моя́, и поро́ка нѣ́сть въ тебѣ́, та́ко безъ поро́ка ты́ еси́, пра́ведная Елисаве́то; Госпо́дь бо Іису́съ освяще́ніе вѣ́рнымъ Свои́мъ е́сть, всю́ кра́сную тя́ велича́емъ.

Во всѣ́хъ за́повѣдехъ Госпо́днихъ ходи́вшую зря́ху тя́ лю́діе, ту́не благода́тію Бо́жіею оправда́нную, достоблаже́нная Елисаве́то: досто́йно у́бо е́сть ми́лость Бо́жію сла́вити въ тебѣ́.

Пе́рвая проповѣ́дница соверша́емаго та́инства Твоего́ Елисаве́ть бы́сть, Іису́се, егда́ рече́, я́ко Госпо́дь Сы́й и Бо́гъ, благослове́нъ Пло́дъ чре́ва дѣви́ческаго еси́, дѣ́ло се́ Прему́дрости Твое́й, сла́ва человѣколю́бію Твоему́!

Богоро́диченъ: Самуи́лово рожде́ніе непло́дной ма́тери свое́й сле́зы отъ о́чію отре́ и ра́дость принесе́; ро́ждшійся отъ Тебе́ Госпо́дь всему́ мíру ра́дость сотвори́. Пѣ́сньми Тя́ непреста́нно, о Дѣ́во Ма́ти, велича́емъ.

Пѣ́снь 9.

[Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Испо́лнился еси́ вдохнове́нія Утѣ́шителева и благослови́ти нача́тъ Го́спода, священнотаи́нниче богому́дре и богоблаже́нне.

Глаго́ловъ исхожде́нія арха́нгеловыхъ узрѣ́въ, богоглаго́ливе прехва́льне, къ благослове́нію язы́къ а́біе подви́гнулъ еси́.

Страда́нія вѣнцы́ и свяще́нства и просвѣще́ніемъ проро́чества украси́лся еси́, о Заха́ріе преблаже́нне и богоглаго́ливе!

Богоро́диченъ: Свѣ́та су́щи прія́телище, просвѣти́, Дѣ́во, помраче́нную ду́шу мою́ страстьми́ и кромѣ́шнія мя́ тмы́ изба́ви моли́твами Твои́ми.

Инъ.]

Ирмо́съ: Чу́жде ма́теремъ дѣ́вство, [и стра́нно дѣ́вамъ дѣторожде́ніе; на Тебѣ́, Богоро́дице, обоя́ устро́ишася. Тѣ́мъ Тя́, вся́ племена́ земна́я, непреста́нно велича́емъ].

Вѣ́руяй прише́дшаго Мессíю бы́ти Го́спода своего́ и за́повѣди Госпо́дня храня́, благоугоди́ла еси́ Ему́, Елисаве́то. Моли́ у́бо Всеблага́го Влады́ку всѣ́хъ восхваля́ющихъ Тя́ спасти́ся душа́мъ.

Иже за́повѣди Бо́жія сохраня́етъ, того́ возлюби́ти и яви́тися ему́ обѣщава́ется Бо́гъ; въ за́повѣдехъ Его́ ходи́вшая, тѣ́мже Бо́гомъ возлю́блена еси́, Елисаве́то, моли́ Всеблага́го о Тезоимени́той, да и возлю́битъ Бо́га, и возлю́блена бу́детъ [или: правосла́вныхъ христіа́нехъ, да и возлю́бятъ Бо́га и возлю́блени бу́дутъ] благоутро́біемъ Его́.

И непло́дна, и заматорѣ́вшая Елисаве́ть, ю́жика Марíина, роди́: Ты́ возвели́чилъ еси́ ми́лость Твою́ съ не́ю, Бо́же, отъ Тебе́ вся́ко дая́ніе бла́го, сла́ва неизрече́ннымъ щедро́тамъ Твои́мъ.

Богоро́диченъ: Отъ ю́ности крѣ́покъ явля́яся Сампсо́нъ, сла́ва непло́днѣй ма́тери свое́й бы́сть; въ ро́ждшемся отъ Тебе́ Іису́сѣ все́ исполне́ніе е́сть Божества́ тѣле́снѣ: сла́внѣйшую Тя́ всѣ́хъ святы́хъ велича́емъ, Дѣ́во Пречи́стая.

Свѣти́ленъ проро́ку. [Подо́бенъ: Свѣ́те неизмѣ́нный.

Пе́рвѣе гла́сомъ а́нгела умолча́лъ еси́ въ невхо́дныхъ за хотя́щее бы́ти прозябе́ніе изъ тебе́ гла́са вопію́щаго, и ны́нѣ молчи́ши о́наго ра́ди, предъ невхо́дными заколе́нъ бы́въ, Заха́ріе.]

Сла́ва, святѣ́й. Подо́бенъ: Не́бо звѣзда́ми.

Ма́терей непло́дныхъ сла́ва, грѣ́шникомъ о́бразъ добродѣ́телей ты́ была́ еси́, за́повѣди Госпо́дня храня́щи, блаже́нная Елисаве́ть: сла́вимъ бла́гость Бо́жію, на тебѣ́ явля́емую.

И ны́нѣ, богоро́диченъ.

[Свѣ́тъ изъ Свѣ́та возсія́въ, Сло́ве, пре́жде денни́цы безлѣ́тно, Свѣ́тъ изъ Ма́тере подъ лѣ́томъ непремѣ́нно проше́лъ еси́, сія́ніи свѣтолу́чными концы́ мíра просвѣща́я, я́ко Свѣ́тъ мíра.

На хвали́техъ стихи́ры [на 4], гла́съ 1:

Непло́дную и заматорѣ́вшую Елисаве́ть* плодоро́діемъ благослови́лъ еси́, Бо́же,* да яви́ши всеси́льную бла́гость Твою́,* и на́съ, изсыха́емыхъ на вся́къ де́нь отъ грѣ́хъ,* благода́тію Твое́ю уще́дри,* да бу́демъ дре́во добропло́дное, Всеми́лостиве. [Два́жды.]

Пра́ведна бѣ́ста предъ Тобо́ю,* но Твое́ю благода́тію, Ще́дре,* и въ за́повѣдехъ Твои́хъ хожда́ху* безъ поро́ка дво́ица приснопа́мятная,* вся́ сія́ ми́лость Твоя́, Влады́ко,* сла́ва благоутро́бному милосе́рдію Твоему́.

Бо́гъ, дѣ́йствуяй въ ва́съ и е́же хотѣ́ти, и е́же дѣ́яти блага́я,* достоблаже́нная дво́ице,* и наслѣ́дники ва́съ Ца́рствія сотвори́* ра́ди вели́кія Своея́ ми́лости:* сла́ва Тебѣ́, Всеми́лостивому Влады́цѣ.

Сла́ва, гла́съ 6:

Бо́лій въ рожде́нныхъ жена́ми имену́емый отъ Прему́дрости Вѣ́чныя, отъ непло́дныя тя́ произы́де, боголюби́вая Елисаве́то; да сра́дуемся, вѣ́рніи, приснопа́мятнѣй, Благода́теля велича́юще.

И ны́нѣ, гла́съ 4:

Пѣва́емый отъ серафи́мъ и отъ херуви́мовъ Носи́мый, престо́лъ избра́лъ еси́ прекра́сный, утро́бу Чи́стыя Богоотрокови́цы. Тѣ́мъ благода́рственное возсыла́емъ Ти́: сла́ва Тебѣ́, Еди́не Человѣколю́бче, сла́ва Тебѣ́, Іису́се Пресла́дкій, сла́ва Тебѣ́, Всеупова́ніе на́ше, сла́ва Тебѣ́, Спасе́ніе вѣ́рныхъ, сла́ва благоутро́бному смотре́нію Твоему́.

Славосло́віе вели́кое. [Ектеніи́.] И отпу́стъ.



НА ЛИТУРГІИ,

Блаже́нна проро́ку, пѣ́снь 3-я на 4, и святѣ́й, пѣ́снь 6-я на 4. Проки́менъ, [гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́]. Апо́столъ [ко Евре́емъ, зача́ло 314. Алли́луія, гла́съ 7: Свѣ́тъ возсія́ пра́веднику, и пра́вымъ се́рдцемъ весе́ліе. Сти́хъ: Истина отъ земли́ возсія́, и пра́вда съ небесе́ прини́че.] Ева́нгеліе [Матѳе́я, зача́ло 96.] Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Слу́жба свята́го проро́ка Заха́ріи и святы́я и пра́ведныя Елисаве́ти. — М.: Въ Сѵнода́льной Тѵпогра́фіи, 1723. — 12 л.

/ Къ оглавленію раздѣла /


Наверхъ / Къ титульной страницѣ

0