Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 5-й де́нь.
Свята́го проро́ка Заха́ріи, отца́ честна́го Іоа́нна Предте́чи.

[ВЕЧЕРЪ,]
На Го́споди воззва́хъ: стихи́ры на 6, гла́съ 4. Подо́бенъ: Да́лъ еси́ зна́меніе.

Ма́сть имѣ́я на себѣ́,* ри́зу же святу́ю,* приснопа́мятне Заха́ріе,* я́ко а́нгелъ, Бо́гу послужи́лъ еси́,* хода́тайствуя Содѣ́телю,* и зда́нію, блаже́нне,* и сказа́нія я́вѣ Боже́ственнаго Ду́ха пріе́мля.* Тѣ́мъ тя́ ублажа́емъ* и свято́е твое́ дне́сь соверша́емъ торжество́,* Спа́са сла́вяще.

Отроча́ ви́дѣлъ еси́, ро́ждшееся отъ Отрокови́цы,* Заха́ріе богодохнове́нне,* Отцу́ Собезнача́льно,* и своему́ предъявле́нно проро́чествуеши отроча́ти:* проро́къ бу́деши и́стинно,* Сего́ стези́ уготовля́я.* Съ ни́мже тя́ ублажа́емъ* и честно́е твое́ торжество́ свяще́нно пра́зднуемъ,* богоно́се пребога́те.

Хра́мъ жи́въ и одушевле́нъ* Боже́ственнаго Ду́ха бы́лъ еси́* и посредѣ́ хра́ма, сла́вне,* Бо́гу служа́ чи́стымъ се́рдцемъ,* непра́ведно закла́нъ бы́лъ еси́,* му́ченически соверша́я боже́ственное тече́ніе твое́, достосла́вне.* Тѣ́мъ въ небе́сный хра́мъ вше́лъ еси́* кро́вію свое́ю,* прося́ очище́нія душа́мъ на́шимъ.

Сла́ва, гла́съ 8. Самогла́сенъ. Іоа́нна Мона́ха:

Свяще́нства зако́ннаго одѣ́янъ и́стинно оде́ждею, по чи́ну Ааро́нову служи́лъ еси́, и предстоя́ въ хра́мѣ, а́нгельскій зра́къ я́вѣ ви́дѣлъ еси́, преблаже́нне. Тѣ́мъ твое́ преставле́ніе вси́ пою́ще до́лжно, Заха́ріе, пѣ́сньми восхваля́емъ тя́, по ста́рости израсти́вша Іоа́нна сла́внаго: моли́ за ны́ ми́лостиваго Бо́га, спасти́ся на́мъ.

И ны́нѣ, богоро́диченъ или́ крестобогоро́диченъ, [гла́съ то́йже]. Подо́бенъ: О, пресла́внаго чудесе́!

Что́ зри́мое видѣ́ніе,* е́же мои́ма очи́ма ви́дится, о Влады́ко:* Содержа́й всю́ тва́рь,* на Дре́во воздви́женъ бы́въ,* и умира́еши, всѣ́мъ дая́й жи́знь?* — Богоро́дица пла́чущи глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

На стихо́внѣ окто́иха, Сла́ва, гла́съ 2. Анато́ліево.

Яко чи́стъ іере́й во Свята́я святы́хъ вше́лъ еси́, и оде́ждею свяще́нною одѣ́янъ, непоро́чно Бо́гу служи́лъ еси́, я́коже Ааро́нъ законополага́я и я́ко Моисе́й водя́ колѣ́на Изра́илева, звонце́въ въ чи́стомъ зна́меніи. Тѣ́мже и убіе́нъ бы́лъ еси́, но кро́вь твоя́ пра́ведная спаси́тельное на́мъ исцѣле́ніе бы́сть, и я́ко мѵ́ро благово́нное, слу́хи отверза́етъ къ ше́ствію вѣ́чныя жи́зни. Заха́ріе треблаже́нне, Крести́теля Іоа́нна роди́телю и Елисаве́ти сопру́жниче, прилѣ́жно моли́ о душа́хъ на́шихъ.

И ны́нѣ, богоро́диченъ или́ крестобогоро́диченъ, [гла́съ то́йже]. Подо́бенъ: Егда́ отъ Дре́ва.

Егда́ нескве́рная Агница ви́дѣ Своего́ Агнца, на заколе́ніе, я́ко Человѣ́ка, во́лею влеко́ма, пла́чущи глаго́лаше: безча́дствовати Мя́ ны́нѣ тщи́шися, Христе́, Ро́ждшую Тя́. Что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́ ю́же па́че ума́ и сло́ва кра́йнюю бла́гость, Человѣколю́бче.

Тропа́рь, гла́съ 4:

Свяще́нства оде́ждею обложе́нъ, прему́дре, по зако́ну Бо́жію всесожже́нія прія́тна священнолѣ́пно приноси́лъ еси́, Заха́ріе, и бы́лъ еси́ свѣти́льникъ и зри́тель та́йныхъ, зна́менія въ тебѣ́ благода́ти нося́ я́вственно, всему́дре, и мече́мъ убіе́нъ бы́въ въ хра́мѣ Бо́жіи, Христо́въ проро́че, съ Предте́чею моли́ спасти́ся душа́мъ на́шимъ.


НА УТРЕНИ,
Оба кано́на окто́иха безъ му́ченичновъ. И свята́го на 6. Творе́ніе Ѳеофа́ново. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Па́мять, проро́че, твою́ восхвали́ти Ду́ха благода́ть молю́, помощи́ мнѣ́ твои́мъ хода́тайствомъ, взыва́я: Изба́вителю Бо́гу на́шему воспои́мъ.

Житіе́ твое́ непоро́чно обрѣ́теся, свяще́нства украси́ся оде́ждею и проро́чества свѣтоно́сными сія́ніи, богоглаго́ливе, блаже́нне.

Зако́ннымъ вѣнце́мъ главу́ украси́въ, Заха́ріе, яви́лся еси́ священноявле́ненъ, вопія́: Изба́вителю Бо́гу на́шему пои́мъ.

Богоро́диченъ: Поди́ра оде́ждею, я́ко Ааро́нъ, одѣ́янъ, Юже отъ ко́рене Іессе́ева прозя́бшую Отрокови́цу прія́лъ еси́, Изба́вителя во чре́вѣ носи́вшую.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Егда́ кади́ло сложе́нія приноси́лъ еси́, архіере́е, тогда́ Предте́чи прія́лъ еси́ провозвѣще́ніе.

Мѵ́ромъ свяще́нія свяще́нствовати тя́ пома́за, я́ко Ааро́на, тѣ́мъ видѣ́нія а́нгелова сподо́бился еси́.

Утро, провозвѣща́ющее вселе́ннѣй Тя́, Со́лнца Разу́мнаго, Спа́се, Заха́рія Іоа́нна роди́лъ е́сть.

Богоро́диченъ: Упра́ви житіе́ мое́, Богороди́тельнице Всечи́стая и жи́знь, Яже Заха́ріинъ до́мъ уясни́вшая.

Сѣда́ленъ, гла́съ 8. Подо́бенъ: Повелѣ́нное.

Свяще́нствовавъ Бо́гу по зако́ну и проро́чествовавъ Христа́ изъ Дѣ́вы, Заха́ріе, воплоще́нна отъ Ду́ха Свя́та, яви́лся еси́ вселе́ннѣй сто́лпъ свѣ́телъ, съ высоты́ Пра́вды Восто́ка, ве́сь мíръ осія́юща и въ пу́ть ми́ренъ направля́юща но́ги на́ша, ре́клъ еси́, спаса́юща ро́дъ на́шъ. [Два́жды.]

Сла́ва, и ны́нѣ, богоро́диченъ:

Яже непремѣ́ннаго Бо́га поро́ждшая, премѣня́емое при́сно се́рдце мое́ грѣхо́мъ и лѣ́ностію, прило́гми льсти́ваго, утверди́, Блага́я, моли́твами Ма́терними Твои́ми, я́ко да и а́зъ благода́рно сла́влю Тя́, Богороди́тельнице Марíе, поми́луй ста́до Твое́, е́же стяжа́ла еси́, Всенепоро́чная.

Крестобогоро́диченъ:

Сы́на Твоего́ и Бо́га Кресто́мъ, Дѣ́во, соблюда́емы при́сно, де́монскія прило́ги побѣжда́емъ и кова́рствія, госпо́дственно Тя́ Богоро́дицу и и́стинно пою́ще, и любо́вію, вси́ ро́ди, ублажа́емъ, Чи́стая, я́коже прорекла́ еси́. Тѣ́мъ согрѣше́ній на́мъ оставле́ніе моли́твами Твои́ми да́руй.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Проро́къ Тво́й, Влады́ко, о́бразы зако́нными вѣ́рно служа́ше Тебѣ́ и благода́ти сподо́бися усмотри́ти Твою́ и́стину.

Свѣ́томъ Свѣ́тъ прія́лъ еси́, мра́чнѣйшимъ ты́ яснѣ́йшій, преблаже́нне: зако́номъ бо и благода́ть ны́нѣ тебѣ́ приложи́ся.

Бо́гу предстоя́й, боже́ственный Гавріи́лъ, благовѣству́я, яви́ тебѣ́, блаже́нне, гла́съ Сло́ва и Предте́чу.

Богоро́диченъ: Чи́стое жили́ще Содѣ́тель, Дѣ́во, тва́ри обрѣ́тъ Тя́, всели́ся, Елисаве́тино разрѣши́вый непло́дство.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́ ино́го не вѣ́мы.

Кида́рь положи́ся на главѣ́ твое́й, о проро́че, въ начерта́ніи иму́щь и́стинное Боже́ственное свяще́ніе.

Ра́дуется тва́рь рождество́мъ твои́мъ, архіере́е, ты́ бо прозя́блъ еси́ покая́нія проповѣ́дника.

Укра́шено твое́ житіе́ препроводи́въ, за́повѣди бо вся́ Госпо́дня съ Елисаве́тою соверши́лъ еси́.

Богоро́диченъ: Направля́ется къ пѣ́нію язы́къ тво́й, богоглаго́ливе, Неискусобра́чную бо во чре́вѣ нося́щу ви́дѣлъ еси́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Зако́на служа́й сѣ́ни, яви́ся и благода́ти проповѣ́дникъ, Спа́се на́шъ, сподо́бися бо ви́дѣти Твое́ воплоще́ніе.

Су́дными словесы́ укра́шся, Сло́во присносу́щное, пло́ть нося́що, Заха́ріе свяще́нне, прія́лъ еси́.

Яви́лся еси́ вну́трь хра́ма, служа́ Бо́гу, таи́нниче богодухнове́нне, іере́й бы́въ досточу́денъ.

Богоро́диченъ: Спа́са, Богома́ти, во утро́бѣ, Дѣ́во, нося́щи, Сло́ва Безнача́льнаго, Елисаве́ти позна́лася еси́ проро́чицѣ.

Конда́къ, гла́съ 3. Подо́бенъ: Дѣ́ва дне́сь.

Проро́къ дне́сь и свяще́нникъ Вы́шняго, Заха́рія предложи́, Предте́чевъ роди́тель, трапе́зу своея́ па́мяти, вѣ́рныя пита́я, питіе́ бо пра́вды всѣ́мъ раствори́въ, сего́ ра́ди скончава́ется, я́ко боже́ственный таи́нникъ Бо́жія благода́ти.

Икосъ:

Зако́на молча́ніемъ іера́рхъ связа́ся, а́нгела гла́сомъ, а́нгела пріе́мъ Христо́ва прише́ствія, проро́ка и таи́нника, съ Елисаве́тію непло́дною и цѣлому́дренною, и Того́ Рождество́мъ обнови́ся благода́ть и избавле́ніе, и примире́ніе на́ше всемíрное. Сего́ проповѣ́да Агнца, и Содѣ́теля, и естеству́ Обнови́теля, отъ непло́дныя утро́бы пло́дъ подаю́ща, Сы́на же, я́вльшася изъ Дѣ́вы, я́ко боже́ственный таи́нникъ Бо́жія благода́ти.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно, и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Егда́ гла́съ вопію́щаго пріи́де отъ непло́дныя, па́че естества́, твоего́ язы́ка у́зы разрѣши́, зва́ти: благослове́нъ еси́, Го́споди Бо́же, во вѣ́ки.

Люби́мичь роди́ся Женихо́въ отъ непло́дове, Рождество́ Дѣ́вы провозвѣща́я я́вѣ Предте́ча, вѣ́рою зову́щимъ: благослове́нъ еси́, Го́споди Бо́же, во вѣ́ки.

Ве́сь бы́лъ еси́, Заха́ріе, боже́ственный орга́нъ Ду́ха, треблаже́нне, и проро́ка твое́ провозвѣща́ше отроча́, благослове́нъ еси́, зову́ща, Го́споди Бо́же, во вѣ́ки.

Богоро́диченъ: Зако́на исполне́ніе Тя́, Отрокови́це, глави́зну всего́ проро́чествія Заха́рія зря́, позна́ше, вопія́: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Истины показа́ся проро́къ, Христо́вы бо стези́ Іоа́ннъ предгряды́й угото́ва Предте́ча, блаже́нне іера́рше, Его́же превозно́симъ во вся́ вѣ́ки.

Витíйствуя, благослови́лъ еси́ Влады́ку, спасе́ніе на́мъ пода́вшаго, отъ Дави́да возсія́вшаго на́мъ пло́тію Го́спода сла́вы, Его́же превозно́симъ во вся́ вѣ́ки.

Дарова́ній вели́кихъ сподо́бися, богоявле́нне, Предте́чу роди́въ, проро́ковъ всѣ́хъ вы́шшаго, Го́спода пою́ща и превознося́ще во вся́ вѣ́ки.

Богоро́диченъ: Іера́рхъ ку́пно и богопроповѣ́дникъ, Заха́рія Дѣ́вѣ и Ма́тери, Го́спода нося́щей тва́ри, ра́дуяся, поклони́ся, Юже превозно́симъ во вся́ вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Испо́лнился еси́ вдохнове́нія Утѣ́шителева и благослови́ти нача́тъ Го́спода, священнотаи́нниче богому́дре и богоблаже́нне.

Глаго́ловъ исхожде́нія арха́нгеловыхъ узрѣ́въ, богоглаго́ливе прехва́льне, къ благослове́нію язы́къ а́біе подви́гнулъ еси́.

Страда́нія вѣнцы́ и свяще́нства и просвѣще́ніемъ проро́чества украси́лся еси́, о Заха́ріе преблаже́нне и богоглаго́ливе!

Богоро́диченъ: Свѣ́та су́щи прія́телище, просвѣти́, Дѣ́во, помраче́нную ду́шу мою́ страстьми́ и кромѣ́шнія мя́ тмы́ изба́ви моли́твами Твои́ми.

Свѣти́ленъ. Подо́бенъ: Свѣ́те неизмѣ́нный.

Пе́рвѣе гла́сомъ а́нгела умолча́лъ еси́ въ невхо́дныхъ за хотя́щее бы́ти прозябе́ніе изъ тебе́ гла́са вопію́щаго, и ны́нѣ молчи́ши о́наго ра́ди, предъ невхо́дными заколе́нъ бы́въ, Заха́ріе.

Богоро́диченъ: Свѣ́тъ изъ Свѣ́та возсія́въ, Сло́ве, пре́жде денни́цы безлѣ́тно, Свѣ́тъ изъ Ма́тере подъ лѣ́томъ непремѣ́нно проше́лъ еси́, сія́ніи свѣтолу́чными концы́ мíра просвѣща́я, я́ко Свѣ́тъ мíра.

На стихо́внѣ окто́иха. Сла́ва, гла́съ 8:

Же́ртвы принося́ по зако́ну, Заха́ріе, ро́ждшемуся Бо́гу прине́слъ еси́ святу́ю твою́ ду́шу во Свята́я святы́хъ, свя́та преставле́нія, ору́жіемъ самово́льнымъ, въ преддве́ріи святи́лища, я́ко а́гнецъ, закала́емь.

И ны́нѣ, богоро́диченъ или́ крестобогоро́диченъ. Подо́бенъ: Го́споди, а́ще и на суди́щи.

Го́споди,* егда́ Тя́, Со́лнца Пра́вды,* со́лнце ви́дѣ* на Дре́вѣ повѣ́шена,* лучи́ скры́,* и луна́ свѣ́тъ во тму́ преложи́,* Всенепоро́чная же Твоя́ Ма́ти* утро́бою уязвля́шеся.


НА ЛИТУРГІИ,

Блаже́нна окто́иха, на 4, и проро́ка, пѣ́снь 3-я на 4. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ ко Евре́емъ, зача́ло 314. Алли́луія, гла́съ 7: Свѣ́тъ возсія́ пра́веднику, [и пра́вымъ се́рдцемъ весе́ліе. Сти́хъ: Истина отъ земли́ возсія́, и пра́вда съ небесе́ прини́че.] Ева́нгеліе Матѳе́я, зача́ло 96. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 37 – 40 об.

/ Къ оглавленію раздѣла /


Наверхъ / Къ титульной страницѣ

0