Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 4-й де́нь.
Свята́го священному́ченика Вави́лы, епи́скопа Вели́кія Антіохíи.
И свята́го проро́ка и богови́дца Моисе́я.

[ВЕЧЕРЪ,]
На Го́споди воззва́хъ: стихи́ры на 6, гла́съ 6. Подо́бенъ: Все́ отло́жше.

Кро́вію обагри́въ* твою́ свяще́нную оде́жду,* вше́лъ еси́ во Свята́я святы́хъ,* свя́тъ ты́ бы́въ, Вави́ло сла́вне,* и я́вѣ всегда́ наслажда́яся обоже́нія,* украша́емь и муче́ніемъ сія́я,* и а́нгелъ показу́яся* чистѣ́йшими причаще́ніи.* Тѣ́мъ тя́ чти́мъ* и любо́вію пра́зднуемъ* твое́ свяще́ннѣйшее торжество́,* достоблаже́нне.

Желѣ́зомъ око́ванъ,* непреткнове́нно стезю́ ше́ствовалъ еси́, преподо́бне,* къ небе́сному Гра́ду веду́щую,* честны́ми ра́нами,* Вави́ло всему́дре,* я́коже у́тварію обложе́нъ.* Въ него́же вше́дъ, я́ко побѣди́тель и́стиннѣйшій,* и му́ченикъ непобѣди́мь,* и священнодѣ́йственникъ свяще́ннѣйшій,* пое́ши со а́нгелы пѣснопѣ́ніе* боже́ственное чи́сто:* Свя́тъ, Свя́тъ, Свя́тъ, Тро́ице Единосу́щная.

Ста́ду предста́тельствуя* слове́сному, іера́рше,* па́лицею зна́нія* на зла́цѣ воспита́лъ еси́ сіе́ вѣ́ры,* и отъ звѣре́й спа́слъ еси́,* и Бо́га возвесели́лъ еси́,* съ высоты́ тя́ па́ствующаго.* Его́же пре́дъ безбо́жными, блаже́нне, проповѣ́дуя,* я́ко незло́биво закла́лся еси́ а́гня, ра́дуяся,* съ незло́бивыми о́троки,* и приве́лся еси́ съ ни́ми, же́ртва благово́нна всецѣ́ла,* Вави́ло всечу́дный.

Ины стихи́ры проро́ка, гла́съ 4. Подо́бенъ: Зва́нный свы́ше.

Научи́вся Бо́жіимъ та́йнамъ,* добро́ты неизрече́нныя и сла́вы чудесе́мъ,* Моисе́е богови́дче всехва́льне,* сѣ́ньми и начерта́ніи, и во о́бразѣхъ сія́ провозвѣсти́лъ еси́.* Тѣ́мъ Боже́ственнаго сія́нія Первонача́льнаго Нача́ла* безобра́зными о́бразы* и невеще́ственными вещми́ вво́диши воображе́нная на́мъ,* и е́же обожи́тися надъ фарао́номъ, я́ко Бо́гъ, блаже́нне,* обѣ́томъ и благода́тію стяжа́въ,* моли́ о всѣ́хъ чту́щихъ тя́.

Ты́, добродѣ́тельми превше́дъ,* въ видѣ́ніи бы́лъ еси́ бли́зъ всѣ́хъ Бо́га.* Посредѣ́ ви́хра и мра́ка же и о́блака вну́трь бы́въ,* ве́сь просла́вился еси́.* Отту́ду прія́тъ скрижа́ли Боже́ственныхъ Писа́ній* и равноа́нгельно благода́тію* я́сно блиста́еши душе́вными очесы́,* вку́пѣ и тѣле́сными,* и спокрыва́еши зловѣ́рное ослѣпле́ніе,* явля́я вѣ́рнымъ открове́ніе,* ты́ и сло́вомъ подава́еши,* моли́ спасти́ся на́мъ.

Въ богодѣ́льнѣй и огнено́снѣй* Боже́ственнѣй любви́* бы́лъ еси́ собесѣ́дникъ,* я́ко дру́гу дру́гъ, Бо́гу,* и лице́мъ къ лицу́, Моисе́е треблаже́нне,* на Творца́ своего́ воззрѣ́въ,* ви́диши за́дняя заре́ю Сего́ я́вѣ,* и чре́зъ сква́жню навы́кнувъ,* пло́тію Сло́ва бу́дущее тебѣ́ богоявле́ніе.* Тѣ́мже и сто́лпъ предъиды́й,* пресла́вно предъ людьми́ богому́дрыми,* предхо́диши и спаса́еши вѣ́рно хва́лящія тя́.

Сла́ва, священному́ченика, гла́съ 6. Самогла́сенъ:

Восхо́дный степе́нь Це́рковь стяжа́ свяще́нныя твоя́ по́двиги, священному́чениче Вави́ло, ю́же и храни́ши незы́блену и ненавѣ́тну отъ волко́въ держа́вныхъ, проповѣ́дующую до́блести твоя́ и велича́ющую съ тобо́ю младе́нцы, за Христа́ заколе́нныя съ тобо́ю, блаже́нне.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Зача́тіе Твое́ безсѣ́менно и рожде́ніе безболѣ́зненно помышля́ющи, удивля́юся зѣло́: ка́ко си́це, я́ко злодѣ́й, благоволи́лъ еси́ умре́ти, Сы́не? Пречи́стая взыва́ше.

На стихо́внѣ окто́иха. Сла́ва, священному́ченика, гла́съ 6:

Суди́щу мучи́телеву предстоя́ и подвиза́яся за благоче́стіе, взыва́лъ еси́: се́ а́зъ и дѣ́ти, я́же мнѣ́ даде́ Бо́гъ; съ ни́миже вѣнча́вся на небесѣ́хъ, Вави́ло священному́чениче, моли́ непреста́нно, сѣте́й врага́ изба́витися душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́ющія Тя́ на Дре́вѣ, Дѣ́ва и Чи́стая Ма́ти Твоя́ зря́щи, я́коже Симео́нъ прорече́, утро́бою, Спа́се, уязвля́шеся.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодухнове́нне, въ видѣ́нія восхо́дъ: сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Вави́ло, моли́ Христа́ Бо́га спасти́ся душа́мъ на́шимъ.

И проро́ка, гла́съ 2:

Проро́ка Твоего́ Моисе́я па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.

Или се́й, гла́съ то́йже:

На высоту́ добродѣ́телей возше́лъ еси́, проро́че Моисе́е, и сего́ ра́ди сподо́бился еси́ ви́дѣти сла́ву Бо́жію, скрижа́ли благода́тныя Зако́на прія́тъ, и начерта́ній благода́ть въ себѣ́ нося́, и проро́ковъ бы́лъ еси́ честна́я похвала́, и благоче́стія вели́кое та́инство.


НА УТРЕНИ,
Кано́нъ окто́иха еди́нъ и святы́хъ два́.

[Кано́нъ священному́ченика.] Іоа́нна мона́ха. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Свои́ми кровьми́, я́ко Моисе́й Чермно́е мо́ре, безво́лненно проше́дъ, Вави́ло блаже́нне, Бо́гу побѣ́дную пѣ́снь вопія́лъ еси́: воспои́мъ Го́споду, я́ко просла́вися.

Ты́ земны́хъ преоби́дѣлъ еси́ жела́ніе, боже́ственному повину́въ жела́нію, е́же жи́ти, Вави́ло блаже́нне, Христо́ву гряды́й ви́дѣти красоту́.

Пребоже́ственныя Тро́ицы я́ко сы́й рачи́тель, съ треми́ у́мерлъ еси́ о́троки, ра́дуяся, Вави́ло блаже́нне, при́сно приводя́ ду́ши сія́ жела́ніемъ.

Богоро́диченъ: Своего́ пріе́мши Содѣ́теля, я́ко Са́мъ восхотѣ́, изъ безсѣ́меннаго чре́ва Твоего́ па́че ума́ воплоща́ема, Чи́стая, тва́рей и́стинно показа́лася еси́ Влады́чица.

Инъ кано́нъ проро́ка, его́же краегране́сіе: Моисе́й, проро́ковъ пе́рвый, да похва́лится словесы́. Въ Богоро́дичнахъ же: Кли́ментово. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зныма Моисе́овыма рука́ма Амали́кову си́лу въ пусты́ни побѣди́лъ е́сть.

Моисе́й проро́ковъ да восхва́лится пе́рвый, я́ко предъ Бо́гомъ бесѣ́довалъ пе́рвый я́вѣ лице́мъ къ лицу́, не въ гада́ніихъ рече́ній, но я́ко въ ви́дѣ пло́ти ви́дѣвъ Того́.

Яко боже́ственна народоводи́теля и изба́вителя тя́ ро́ду твоему́ Изра́илю, Моисе́е богови́дче, даде́ Бо́гъ, Отцу́ я́коже помоли́ся, обѣтова́нія пома́заніемъ провозвѣща́я твое́ рожде́ніе.

Му́дрости тя́ сокро́вище обрѣто́ша ро́дныя добродѣ́тели, сокрове́но зна́ніемъ Бо́жіимъ, я́коже въ ковче́зѣ, богови́дче Моисе́е; тѣ́мъ тя́ воспита́ше цари́ца и Боже́ственный Про́мыслъ.

Богоро́диченъ: Устраши́ся Моисе́й, ви́дѣвъ пресла́вное въ пе́рвыхъ видѣ́ніе, купинѣ́ и пла́меню стра́нное смѣше́ніе, Бо́га изъ Дѣ́вы Ма́тере прообразу́ющее Нетлѣ́ннаго, Его́же, мину́въ времена́, ви́дѣ пло́тію.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Нѣ́сть свя́тъ, я́коже Ты́, Го́споди Бо́же мо́й, возвы́сивый ро́гъ вѣ́рнаго Твоего́ Вави́лы, и вѣнча́въ его́ вѣнце́мъ исповѣ́данія Твоего́.

Му́чениковъ бы́сть крѣ́пость, Го́споди, Кре́стъ Тво́й, утверди́вый о́троки съ блаже́ннымъ Вави́лою, и низложи́вый тѣ́ми пре́лести безбо́жныя де́рзости.

Крѣ́пость оскудѣ́, Христе́, діа́воля въ коне́цъ: незло́бивыми бо дѣтьми́ и боже́ственнымъ Вави́лою побѣжда́ется крѣ́пкій и посмѣва́емь е́сть, отъ ни́хъ поруга́емь.

Богоро́диченъ: Боже́ственнаго рождества́ Твоего́, Чи́стая, вся́кій естества́ чи́нъ прехо́дитъ чу́до: Бо́га бо преесте́ственно зачала́ еси́ во утро́бѣ, и ро́ждши, пребыва́еши Приснодѣ́ва.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Весьма́ неизрече́ннаго зна́нія испо́лнился еси́, богови́дче, Ду́хъ Святы́й чрезъ а́нгела дре́внихъ научи́ тя́ зна́нію я́сно.

Нося́й свѣ́тло Боже́ственныя зари́, богозна́меньми удиви́лъ еси́ Еги́петъ, претворя́я стихíй пресла́внѣ естество́, прему́дре.

Озаря́етъ кра́сное добро́ты твоея́, отъ Боже́ственныя зари́ свѣ́тлое, блаже́нне, жи́тельство и къ Боже́ственнѣй несы́тно вся́ привлече́ красотѣ́.

Богоро́диченъ: Взя́лся еси́ стра́шнымъ видѣ́ніемъ ко ужа́сному зрѣ́нію, прему́дре, но возбрани́ гла́съ Го́спода, ро́ждшагося изъ Дѣ́вы пло́тію.

Конда́къ проро́ка, гла́съ 2:

Ли́къ проро́ческій съ Моисе́емъ и Ааро́номъ весе́ліемъ дне́сь весели́тся, я́ко коне́цъ проро́чествія и́хъ на на́съ испо́лнися: дне́сь сія́етъ Кре́стъ, и́мже на́съ спа́слъ еси́; тѣ́хъ моли́твами, Христе́ Бо́же, поми́луй на́съ.

Сѣда́ленъ священному́ченика, гла́съ 3. Подо́бенъ: Боже́ственныя вѣ́ры.

Точа́ вѣ́ры исповѣ́даніе, пре́лесть угаси́лъ еси́ злосла́вія, обличи́въ и́дольское безбо́жіе, и всесожже́ніе Боже́ственное бы́въ, чудотворе́ньми ороша́еши концы́: о́тче преподо́бне, Христа́ Бо́га моли́, дарова́ти на́мъ ве́лію ми́лость.

Сла́ва, и́нъ сѣда́ленъ, проро́ка, гла́съ 4:

Проро́ковъ всѣ́хъ тя́ пе́рваго я́ко су́ща, благоче́стно вѣ́дуще, восхваля́емъ вѣ́рніи: пе́рвый бо Бо́га ви́дѣлъ еси́, я́коже мо́щно бя́ше человѣ́ку ви́дѣти.

И ны́нѣ, богоро́диченъ:

Пречи́стыя ру́ки Твоя́, Дѣ́во Ма́ти, просте́рши, покры́й упова́ющія на Тя́, и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Крестобогоро́диченъ:

На Дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й безлѣ́тный?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Христо́съ моя́ си́ла, Бо́гъ и Госпо́дь, предъ суди́щемъ вопія́лъ еси́, мучи́тельскихъ преще́ній небоя́зненъ, священному́чениче Вави́ло, въ Го́сподѣ ра́дуяся.

Же́ртву непоро́чну, стра́шну, безкро́вну, Го́споду принося́, и себе́ сама́го заколе́ніе кро́вію, священному́чениче Вави́ло, нескве́рно приве́лъ еси́.

Дѣте́й, преподо́бне, младо́е мудрова́ніе, я́ко му́дръ дѣтоучи́тель, духо́внымъ воспита́въ млеко́мъ, священному́чениче Вави́ло, въ соверше́ніе испра́вилъ еси́.

Богоро́диченъ: Яко и́стинно невѣща́нна и непости́жна, Твоего́, Богоро́дице, благолѣ́пнаго су́ть рождества́, су́щимъ на земли́ и на небеси́, Приснодѣ́во, та́инства.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Гугна́нію язы́ка и гла́са твоего́ уясни́вшуся Боже́ственнымъ Про́мысломъ, богови́дче, витíя та́инъ Бо́жіихъ яви́лся еси́ глаго́лы, и ра́нами я́звилъ еси́ Еги́петъ.

Ко́ль пресла́вно зва́ніе твое́, о богови́дче! Ко́ль стра́шна дѣла́ твои́хъ чуде́съ! Яви́ся бо Сы́й тебѣ́ Бо́гъ, и сла́вою возвы́сивъ тя́, Изра́илю спаси́теля посла́.

Вся́каго перворо́дна порази́лъ еси́ еги́петскаго, я́ко Христо́съ де́моновъ умертви́ держа́ву: о́бразъ бо бу́дущаго тобо́ю дѣ́йствуемая и́стинно бы́ша, сла́вне.

Богоро́диченъ: Не приближа́йся сѣ́мо, Моисе́й слы́шавъ, Бо́жію гла́су вопію́щу изъ пла́мене купины́: свя́то бо мѣ́сто въ лѣ́поту преднаписа́, пло́тію роди́тися Христу́ изъ Чи́стыя.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Боже́ственную благода́ть Твою́, Іису́се, священному́ченикъ Вави́ла и́стинно съ высоты́ прія́ше, я́ко и дѣ́ти ю́ныя къ Твое́й любви́ приведе́, и сме́рти къ преоби́дѣнію.

Боже́ственнымъ зна́ніемъ Твои́мъ осія́вся, священному́ченикъ Вави́ла, вся́ уча́ше, Го́споди, Тя́ вѣ́дѣти, Еди́наго Бо́га, Су́що Го́спода, отъ мра́ка и льсти́ взыва́юща.

Боже́ственнымъ избра́ніемъ Твои́мъ прозна́менався священному́ченикъ Вави́ла слове́сное пасти́ ста́до Твое́, Тебѣ́ прино́ситъ, Сло́ве Бо́жій, кро́вь свою́, къ стези́ спасе́нія всѣ́хъ му́дре путеводя́.

Богоро́диченъ: Богоро́дицу Тя́ отъ души́, Влады́чице мíра блага́я, исповѣ́дующія спаса́й: Тя́ бо Предста́тельницу непобѣди́му и́мамы, су́щую Богороди́тельницу.

Инъ.

Ирмо́съ: Ты́, Го́споди мо́й, Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ударя́еши Чермно́е, и твори́ши раздѣле́нія мно́гая жезло́мъ твои́мъ, о богови́дче! да пока́жеши въ се́мъ Креста́ Боже́ственную си́лу.

О, дерзнове́нія прелюбе́знаго! О, простоты́ души́ чи́стыя! Аще позна́лъ еси́ мя́ па́че всѣ́хъ, — къ Бо́гу богови́децъ рече́, — разу́мно мнѣ́ яви́ся.

Ка́менемъ покры́вся, не ви́дѣлъ еси́ Бо́жія лица́, я́ко утае́на, о богови́дче, воплоще́ніе же позна́лъ еси́ Сло́ва, я́ко за́дняя.

Богоро́диченъ: Вше́лъ еси́ чу́вственне во мра́къ, и навы́клъ еси́ неизрече́нная, о богови́дче, я́ко хо́щетъ изъ Дѣ́вы Бо́гъ пло́тію роди́тися, Спа́съ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Жите́йское мо́ре преле́стное зря́ волну́емо бу́рею, Вави́ла, пресла́вный страда́лецъ, вопія́ше: возведи́ изъ тли́ жи́знь мою́, Многоми́лостиве.

Христу́ подо́бяся, за па́ству ду́шу твою́ пре́далъ еси́, о сла́вный му́чениче, и страда́льче Вави́ло блаже́нне, и преле́стныя стѣ́ны разори́лъ еси́.

Дѣте́й непостоя́нное утверди́ му́дре свои́ми страда́ньми Вави́ла, приснопа́мятный страда́лецъ, къ жи́зни небе́снѣй отъ земли́ преводя́, пресла́вный.

Богоро́диченъ: Пречи́стая Влады́чице, ро́ждшая земны́мъ Ко́рмчію Го́спода, страсте́й мои́хъ непостоя́нное и лю́тое укроти́ смуще́ніе и тишину́ пода́ждь се́рдцу моему́.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лоcти отъ ре́бръ Твои́хъ исте́кшею кро́вію.

Во́инство стяжа́въ Бо́жіе Изра́иль си́льное, се́дмь у́бо зло́бы ханане́йскія язы́ки погуби́лъ еси́, лю́демъ ты́ въ наслѣ́діе да́въ зе́млю и́хъ.

Неизглаго́ланно вше́дъ во мра́къ Боже́ственный, Моисе́е, идѣ́же Бо́гъ бя́ше, зовы́й тя́, пи́санныя скрижа́ли пе́рстомъ Его́ зако́нныя прія́лъ еси́, я́ко вели́къ уго́дникъ Его́.

Поста́ви послу́шати Бо́гъ гла́са Своего́, богови́дца Моисе́я, Себе́ Сама́го ему́ яви́въ, да пока́жетъ стра́шное со сла́вою та́инство Свое́.

Богоро́диченъ: Ма́ніемъ Боже́ственнымъ Тя́ преднапису́етъ Моисе́й сла́вный, ковче́гъ Богоро́дице, заря́ми Ду́ха всю́ду, я́ко зла́томъ, покрове́нъ въ сла́ву Бо́жію.

Конда́къ священному́ченику, гла́съ 8. Подо́бенъ: Яко нача́тки.

Яко благоче́стія проповѣ́дника и страда́льцевъ утвержде́ніе, Це́рковь сла́витъ тя́, Вави́ло сла́вне, освѣща́ема дне́сь; но, я́ко имѣ́я дерзнове́ніе ко Го́споду, въ ми́рѣ соверше́ннѣмъ велича́ющія и восхваля́ющія тя́, сохрани́ти Христу́ моли́ся, о многострада́льне.

Икосъ:

Мірску́ю я́вѣ суету́ помышля́я, мíра отчужде́нный, и Стра́сти Христо́вы подража́въ, плотскíя стра́сти умертви́лъ еси́, и кре́стъ тво́й взе́мъ, послѣ́довалъ еси́, му́чениче, Зижди́телю твоему́, и пребыва́я съ Ни́мъ ны́нѣ, моли́ся о честву́ющихъ тя́ и́стинно, о многострада́льне.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Небе́сная чинонача́лія дне́сь, побѣдоно́сцы зря́ще ю́ныя на пре́лесть, и чу́днаго Вави́лу, вопія́ху сра́дующеся Христу́: благослове́нъ еси́, Го́споди Бо́же отце́въ на́шихъ.

Влады́чня свѣтоно́сная уясни́ благода́ть соше́дшіяся вѣ́рныя, вѣнцено́сный же сла́вный Вави́ла повѣлева́етъ сра́дующимся вопи́ти: благослове́нъ еси́, Го́споди Бо́же отце́въ на́шихъ.

Мучи́телей у́бо недоумѣ́яшеся умышле́ніе, помоществова́ти не су́щимъ бого́мъ. Пресвятѣ́й же Тро́ицѣ чу́дный Вави́ла повелѣва́етъ вопи́ти: благослове́нъ еси́, Бо́же отце́въ на́шихъ.

Богоро́диченъ: Тобо́ю, Ма́ти Дѣ́во, Свѣ́тъ возсія́ вселе́ннѣй свѣ́телъ: Ты́ бо Зижди́теля всѣ́хъ родила́ еси́, Бо́га. Его́же моли́, Всечи́стая, низпосла́ти на́мъ, вѣ́рнымъ, ве́лію ми́лость.

Инъ.

Ирмо́съ: Въ пещи́ Авраа́мстіи о́троцы перси́дстѣй, любо́вію благоче́стія па́че, не́жели пла́менемъ опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Въ боговидѣ́ніихъ неизглаго́ланныхъ боже́ственный писа́тель бы́въ, ве́сь му́дрый ви́дъ ски́ніи ты́ сло́вомъ ухи́тривъ, началозда́телю Веселеи́лу предложи́лъ еси́ дѣя́ніе, богови́дче Моисе́е.

Свяще́нствовати дерзну́въ Корре́й съ тобо́ю, яви́ся низше́дъ во а́дъ жи́въ, всежре́бійно Бо́гу тебѣ́ честно́е, Моисе́е, храня́щу, ца́рствія и свяще́нства вку́пѣ.

Воево́дствующу тебѣ́ іуде́йскому язы́ку дре́вле, Моисе́е, яви́ся Михаи́лъ, нача́льникъ небе́сныхъ, и тѣ́ла твоего́ боже́ственный храни́тель: злонача́льника бо противоглаго́люща то́й посрами́.

Богоро́диченъ: Ааро́новъ Тя́ боже́ственный же́злъ прозя́бнути показа́ всѣ́мъ, Богоро́дице, рѣше́ніе грѣхо́въ, очище́ніе бо земны́мъ была́ еси́, я́коже ропта́вшимъ на Бо́га, о́но стра́шное преще́ніе.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Бо́га Отца́ Содѣ́теля, Единосу́щна Сы́на, и Бо́жія Ду́ха, въ пла́мени ю́ноши пѣ́ти повелѣва́ются: да благослови́тъ Го́спода вся́ тва́рь и превозно́ситъ во вся́ вѣ́ки.

Па́мять дне́сь, бра́тіе, священному́ченика Вави́лы я́же въ пла́мени ю́ноши пѣ́ти повелѣва́ютъ: благослови́те Го́спода, вся́ дѣла́, и превозноси́те Его́ во вѣ́ки.

Юніи дне́сь ученицы́ іере́я и му́ченика Вави́лы, съ ста́рцемъ вѣнча́вшеся, въ пещи́ ю́ношъ пѣ́снь пѣ́ти повелѣва́ютъ: благослови́те Го́спода, вся́ дѣла́, и превозноси́те Его́ во вѣ́ки.

Богоро́диченъ: Бо́га родила́ еси́ пло́тію, содержа́щаго руко́ю вся́, и на объя́тіихъ Сего́, Дѣ́во, носи́ла еси́. Его́же пое́мъ я́ко Го́спода, дѣла́, и превозно́симъ во вся́ вѣ́ки.

Инъ.

Ирмо́съ: Ру́цѣ распросте́ръ Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели о́троцы, взыва́юще: благослови́те, вся́ дѣла́ Го́сподня, Го́спода.

Уго́дникъ и́стинно Бо́жій, я́ко кро́токъ, слы́шалъ еси́ и дѣ́лы бы́лъ еси́. Тѣ́мъ позна́нъ бы́сть тебѣ́ Госпо́дь па́че всѣ́хъ проро́ковъ, Моисе́е, и, всели́вся въ тя́, вѣ́рно пѣ́ти научи́: благослови́те, вся́ дѣла́ Госпо́дня, Го́спода.

Яко таи́нникъ Бо́жій и служи́тель и ца́рь Изра́илевъ, Моисе́е богови́дче, я́влься, Христа́ проповѣ́далъ еси́ пріити́ въ пло́ти, прописа́въ Его́ въ себѣ́ стра́шное и Боже́ственное Прише́ствіе, Его́же и о́бразъ одушевле́нъ яви́лся еси́ я́вѣ, и проро́къ вѣ́ренъ.

Сло́ва проро́чествіемъ лю́ди и Зако́на повелѣ́ньми наста́вилъ еси́ вѣ́рно, зна́меньми и чудесы́ напра́вивъ и чуде́съ показа́ніи: отъ Бо́га бо показа́вся нача́льникъ, богови́дче Моисе́е; тѣ́мъ приложи́лся еси́ ко отце́мъ твои́мъ со сла́вою мно́гою.

Богоро́диченъ: Никто́же предуслы́ша пре́жде тебе́, богови́дче сла́вне Моисе́е, уго́дниче Христо́въ, зане́ вся́ изре́клъ еси́ Дѣ́вы смотре́нія, пропису́ющія Тоя́ Боже́ственное рождество́, въ пла́мени бо купины́ ви́дѣлъ еси́ зра́къ неви́димый.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Бо́гъ человѣ́комъ пу́ть показа́, Кресто́мъ къ высотѣ́ небе́снѣй благовосхо́денъ, сего́ ра́ди сме́рть побѣжда́ется земны́ми. Дѣ́ти бо ю́ныя сея́ не убоя́шася, съ чу́днымъ Вави́лою, я́же ублажа́емъ.

Яко Свѣ́тъ сы́й, Христе́, Всечи́стый, стра́стный мглы́ ду́шу мою́ очи́сти, моли́твами, Влады́ко, Твои́хъ страстоте́рпецъ, Вави́лы и дѣте́й, и́хже лѣ́тнюю па́мять соверша́юще, благосла́вно торжеству́емъ.

Страсте́й врачева́нія почерпе́мъ, сла́внѣй Це́ркви страда́лецъ притека́юще: въ ту́ бо пріидо́ша а́нгельстіи ли́цы, и ду́си пра́ведныхъ всѣ́хъ, и Влады́чица съ чу́днымъ Вави́лою, врачева́нія подава́ющи.

Богоро́диченъ: Сы́на, безлѣ́тно отъ Отца́ возсія́вша, Ты́, во чре́вѣ несказа́нно заче́нши, родила́ еси́, Богома́ти Чи́стая, Дѣ́во Пресвята́я, моли́ о рабѣ́хъ Твои́хъ еди́наго Человѣколю́бца Бо́га, спасти́ ро́дъ на́шъ.

Инъ.

Ирмо́съ: Ка́мень нерукосѣ́чный отъ несѣко́мыя горы́ Тебе́, Дѣ́во, краеуго́льный отсѣче́ся, Христо́съ, совокупи́вый разстоя́щаяся естества́; тѣ́мъ веселя́щеся, Тя́, Богоро́дице, велича́емъ.

Бы́лъ еси́, богови́дче, самови́децъ Госпо́день и по сме́рти, не во мра́чныхъ гада́ніихъ, я́ко въ ка́мени пе́рвѣе, но въ человѣ́честѣй пло́ти Христа́ ви́дѣвъ, облиста́юща Божество́мъ.

Гора́ Ѳаво́ръ просла́вися па́че Сина́йскія бога́тно, идѣ́же Моисе́й изъ ме́ртвыхъ, и Ѳесви́тянинъ отъ стра́нъ живу́щихъ Христа́ со апо́столы зря́ху преобразу́ющася, я́ко Су́що Бо́га.

Спаси́ мя́ ми́лостивною твое́ю моли́твою, и моли́твъ дерзнове́ніемъ, я́ко Изра́иля отъ бѣ́дъ, Моисе́е богови́дче, и лю́тыхъ, и ну́ждныхъ, христіа́нъ исполне́ніе отъ вся́каго вре́да, пою́щихъ Тя́.

Богоро́диченъ: Ста́мну Тя́ злату́ю, и скрижа́ль, и Боже́ственную трапе́зу, Дѣ́во, пе́рвѣе Моисе́й написа́въ, я́вѣ пока́зоваше Бо́га роди́тися изъ Тебе́. Его́же ви́дѣвше пло́тію, вѣ́рно пѣ́снь скончава́емъ Твою́.

Свѣти́ленъ. Подо́бенъ: Не́бо звѣзда́ми.

Жре́цъ ку́пно и же́ртва, Вави́ло, яви́лся еси́ Бо́жія, жря́ Ему́ безкро́вно, и свои́ми кровьми́ поже́рся съ соверше́нными младе́нцы, съ ни́миже Тя́ ны́нѣ восхваля́емъ.

Сла́ва, и ны́нѣ, богоро́диченъ:

Твоему́ о́бразу, Дѣ́во, не покланя́ющіяся, и Сы́на и Бо́га Твоего́, вѣ́рою чи́стою, низложи́ я́ко безбо́жныя, и гее́ннѣ преда́ждь.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ ко Евре́емъ, зача́ло 330. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 67. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 30 об. - 37.

/ Къ оглавленію раздѣла /


Наверхъ / Къ титульной страницѣ

0