Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 4-й де́нь.
Слу́жба Пресвятѣ́й Влады́чицѣ на́шей Богоро́дицѣ, въ че́сть и па́мять явле́нія чудотво́рныя ико́ны Ея́ «Неопали́мыя Купины́».

НА ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 2. Подо́бенъ: Егда́ отъ дре́ва.

Пребыва́еши въ Рождествѣ́ и по Рождествѣ́ Дѣ́ва, огне́мъ неопали́мыя купины́ дре́вле прообразова́нная Моисе́ови, Богороди́тельнице, и созыва́еши вѣ́рныхъ собо́ры ико́ны Твоея́ честно́е явле́ніе благохвали́ти въ пѣ́снехъ духо́вныхъ: я́ко въ не́й зало́гъ благоволе́нія Твоего́ ро́ду христіа́нскому дарова́ла еси́ въ покро́въ и защи́ту отъ о́гненнаго запале́нія и молніено́снаго гро́ма. Се́ бо и на ико́нѣ зря́ще Тя́, въ подо́біи неопали́мыя купины́ изображе́нную, да́ры бла́гости Твоея́ отъ нея́ неоску́дно пріе́млемъ и Тя́ ублажа́емъ по до́лгу, я́ко ро́ждшую Спа́са и Изба́вителя ду́шъ на́шихъ. [Два́жды.]

Пла́мень страсте́й на́шихъ угаша́еши моли́твою Твое́ю, Богоро́дице Дѣ́во, предста́тельствуя за на́съ непреста́нно у престо́ла Сы́на Твоего́ и Бо́га на́шего, я́ко вои́стинну ве́ліе дерзнове́ніе и́маши къ Нему́ и ничто́же невозмо́жно е́сть хода́тайству Твоему́. Ибо са́мой ико́нѣ Твое́й дарова́ Онъ си́лу Боже́ственную соверша́ти мно́гая и преди́вная чудеса́, си́ми увѣря́я на́съ, я́ко никто́же прибѣга́яй къ покро́ву заступле́нія Твоего́ посра́мленъ оты́детъ. Сего́ ра́ди пое́мъ моли́твъ Твои́хъ си́лу и ублажа́емъ Тя́, Наде́ждо христіа́нъ, ро́ждшую Спа́са и Изба́вителя ду́шъ на́шихъ. [Два́жды.]

Пода́ждь по́мощь Твою́ держа́вную на́мъ, Богоро́дице, егда́, грѣ́хъ ра́ди на́шихъ, о́гненнаго запале́нія наказа́ніе на на́съ пріи́детъ внеза́пно или́ гро́мы и мо́лніи съ небесе́ на́съ устраша́тъ, тогда́ ико́ною Твое́ю свято́ю на́съ защити́ и изба́ви и яви́ся Утоли́тельница гнѣ́ва Бо́жія, на на́съ пра́ведно подви́женнаго. Мно́го бо мо́жетъ Ма́терняя моли́тва ко Творцу́, и всеси́льно хода́тайство Твое́ предъ лице́мъ Всевы́шняго, Его́же умоля́ти не преста́й за ро́дъ христіа́нскій, и́же въ пѣ́снехъ немо́лчныхъ ублажа́етъ Тя́, ро́ждшую Спа́са и Изба́вителя ду́шъ на́шихъ. [Два́жды.]

Сла́ва, и ны́нѣ, гла́съ то́йже:

Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.

Вхо́дъ. Проки́менъ дне́. Чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Исхо́да чте́ніе. [Глава́ 3.]

Вни́де Моисе́й въ го́ру Бо́жію Хори́въ. Яви́ же ся ему́ Ангелъ Госпо́день въ пла́мени о́гненнѣ изъ купины́. И ви́дѣ, я́ко купина́ горя́ше огне́мъ, и купина́ не сгара́ше. Рече́ же Моисе́й: преше́дъ, узрю́ видѣ́ніе вели́кое сіе́, что́ я́ко не сгара́етъ купина́? Якоже ви́дѣ Госпо́дь, я́ко приступа́етъ ви́дѣти, призва́ его́ Госпо́дь изъ купины́, глаго́ля: Моисе́е, Моисе́е. Онъ же рече́: что́ е́сть? И рече́: не прибли́жися сѣ́мо; изу́й сапо́гъ отъ ногу́ твое́ю: мѣ́сто бо, на не́мже ты́ стои́ши, земля́ свята́ е́сть. И рече́ ему́: Азъ е́смь Бо́гъ отца́ твоего́, Бо́гъ Авраа́мовъ, и Бо́гъ Исаа́ковъ, и Бо́гъ Іа́ковль. Отврати́ же Моисе́й лице́ свое́: стыдя́ше бо ся зрѣ́ти предъ Бо́гомъ. Рече́ же Госпо́дь къ Моисе́ю: ви́дя, ви́дѣхъ озлобле́ніе люде́й Мои́хъ, и́же во Еги́птѣ, и во́пль и́хъ услы́шахъ отъ наси́льствующихъ въ дѣ́лѣхъ, вѣ́мъ бо болѣ́знь и́хъ, и снидо́хъ, е́же изъя́ты и́хъ отъ руки́ еги́птянъ, и извести́ и́хъ отъ земли́ о́ныя, и ввести́ и́хъ въ зе́млю бла́гу и мно́гу, въ зе́млю, точа́щу ме́дъ и млеко́.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

На литíи стихи́ры, гла́съ 6. Самогла́сны:

Яко вои́стинну дре́вняго киво́та честнѣ́йшая яви́ся свята́я ико́на Твоя́, Богоро́дице Влады́чице, на не́йже боже́ственнаго ли́ка Твоего́ подо́біе созерца́емъ: на руку́ бо Твое́ю Богомладе́нца Предвѣ́чнаго, Го́спода Іису́са Христа́, держи́ши, а́нгеловъ и человѣ́ковъ Творца́, и всему́ мíру явля́еши изъ Тебе́ безсѣ́менно вопло́щшагося Бо́га Сло́ва. Ему́же раболѣ́пно кла́няющеся, пѣсносло́вимъ Тя́, вои́стинну Богоро́дицу, и мо́лимъ Ти ся прилѣ́жно: умири́ мíръ и спаси́ ду́ши на́ша Ма́тернимъ предста́тельствомъ Твои́мъ къ Ро́ждшемуся отъ Тебе́, еди́на Благослове́нная.

Предстоя́тъ честнѣ́й ико́нѣ Твое́й христолюби́віи лю́діе и съ любо́вію е́й покланя́ются, Богоро́дице Влады́чице, почерпа́я оби́льныя отъ нея́ да́ры щедро́тъ Твои́хъ: въ неду́зѣхъ врачество́, въ бѣда́хъ избавле́ніе, въ ско́рбехъ утѣше́ніе, и́бо всѣ́мъ вся́ блага́я и душеполе́зная да́руеши съ вѣ́рою прося́щимъ предъ пречи́стымъ о́бразомъ Твои́мъ. Сего́ ра́ди се́рдцемъ и усты́ благоговѣ́йно лобыза́емъ боже́ственнаго ли́ка Твоего́ подо́біе и мо́лимъ Ти ся прилѣ́жно: умири́ ми́ръ и спаси́ ду́ши на́ша всеси́льными моли́твами Твои́ми къ Ро́ждшемуся отъ Тебе́, еди́на Благослове́нная.

Пе́рвѣе написа́вшейся ико́нѣ Твое́й боже́ственнымъ евангели́стомъ Луко́ю и къ Тебѣ́ принесе́ннѣй, Богоро́дице Влады́чице, благоволи́ла еси́ о ико́нѣ се́й, я́ко ми́лостива су́щи, и, благослови́въ ю́, рекла́ еси́ со вла́стію: съ си́мъ о́бразомъ благода́ть Моя́ и си́ла. И воспѣ́ла еси́, ра́дуяся, я́коже и Бо́га внегда́ носи́ла еси́ во чре́вѣ, пѣ́снь проро́ческую: се́ отъ ны́нѣ ублажа́тъ Мя́ вси́ ро́ди. Тѣ́мже, ви́дяще съ гла́сомъ дѣ́йство чуде́съ мно́жество, отъ ико́ны Твоея́ явле́нное и присноявля́емое по все́й вселе́ннѣй, немо́лчными славословле́ніи Тя́ ублажа́емъ и мо́лимъ Ти ся прилѣ́жно: умири́ мíръ и спаси́ ду́ши на́ша благопрія́тнымъ хода́тайствомъ Твои́мъ къ Ро́ждшемуся отъ Тебе́, еди́на Благослове́нная.

Гора́ еси́ вели́кая и пресла́вная па́че горы́ Сина́йскія, Богоро́дице Влады́чице: та́ бо, не терпя́щи сни́тія Сла́вы Бо́жія, огне́мъ возгара́шеся, и гро́ми и мо́лніи та́мо бы́ша. Ты́ же Огнь Божества́, Бо́га Сло́во, неопа́льно во чре́вѣ Твое́мъ вмѣсти́ла еси́ и млеко́мъ пита́ла еси́ Пита́теля вселе́нныя. Къ Нему́же дерзнове́ніе Ма́тернее иму́щи, спаса́й отъ бѣ́дъ вѣ́рно пра́зднующихъ Тво́й честны́й пра́здникъ, въ не́мже пѣсносло́вимъ ми́лости Твоя́ и щедро́ты, и мо́лимъ Ти ся прилѣ́жно: умири́ ми́ръ и спаси́ ду́ши на́ша боже́ственнымъ моле́ніемъ Твои́мъ къ Ро́ждшемуся отъ Тебе́, еди́на Благослове́нная.

Сла́ва, и ны́нѣ, гла́съ 8:

Па́че ски́ніи Моисе́евы, по о́бразу небе́сному сотворе́нныя, всю́ Тя́ Бо́гъ освяти́, Богоро́дице, и па́че Ааро́ня киво́та испо́лни благода́ти Бо́жія изоби́льно, ея́же и ико́на Твоего́ подо́бія прича́стна показа́ся: источа́етъ бо освяще́ніе и цѣльбу́ душа́мъ и тѣлесе́мъ человѣ́ческимъ и уставля́етъ си́лу о́гненную прису́тствіемъ свои́мъ. Ейже съ любо́вію покланя́ющеся, про́симъ, Всеблага́я, и вопіе́мъ: огня́ вре́меннаго и вѣ́чнаго изба́ви на́съ, Благослове́нная Помо́щнице.

На стихо́внѣ стихи́ры, гла́съ 6:

Велича́емъ Тя́, Богоро́дице Дѣ́во, возвели́чившую ро́дъ на́шъ: изъ Тебе́ бо воплоти́ся Изба́витель па́дшаго человѣ́чества, Имже Ада́мъ и Ева кля́твы свободи́шася и отъ мра́чныхъ удо́лій а́дскихъ во Еде́мъ па́ки введо́шася, сы́й Бо́гъ на́шъ, спаса́яй при́сно Тя́ велича́ющія.

Сти́хъ: Слы́ши, Дщи́, и ви́ждь, и приклони́ у́хо Твое́.

Велича́емъ Тя́, Богоро́дице Дѣ́во, Засту́пницу усе́рдную ро́да христіа́нскаго, покро́вомъ ми́лости Твоея́ покрыва́ющую всю́ вселе́нную: се́ бо ико́на Твоя́ свята́я чуде́съ мно́жество источа́етъ и, я́ко у́тварь драга́я, Це́ркви Христо́вой дарова́ся бла́гостію Творца́, все́льшагося въ Тя́ пло́тію и просла́вльшаго Тя́ сла́вою Божества́. Изъ Тебе́ бо вои́стинну, а не привидѣ́ніемъ воплоти́ся сы́й Бо́гъ на́шъ, спаса́яй при́сно Тя́ велича́ющія.

Сти́хъ: Лицу́ Твоему́ помо́лятся бога́тіи лю́дстіи.

Велича́емъ Тя́, Богоро́дице Дѣ́во, я́ко одушевле́нный киво́тъ Божества́, пѣ́ніи хвале́бными честву́емъ Тя́, еди́ну Избра́нную и Благослове́нную въ жена́хъ: ложесна́ бо Твоя́ престо́лъ Себѣ́ сотвори́ сы́й Бо́гъ на́шъ, спаса́яй при́сно Тя́ велича́ющія.

Сла́ва, и ны́нѣ, гла́съ то́йже:

Отъ святы́я ико́ны Твоея́, Влады́чице Преблага́я, исцѣле́ній струи́ истека́ютъ, и́миже напая́ются благода́тно ду́ши на́ша и врачу́ются безме́здно тѣлеса́ на́ша; тѣ́мже Тя́, Цѣле́бницу ми́лостивую, при́сно въ пѣ́снехъ велича́емъ.

Тропа́рь, гла́съ 4:

Иже во огни́ купины́ неопали́мыя, дре́вле Моисе́емъ ви́дѣнныя, та́йну воплоще́нія Своего́ отъ неискусобра́чныя Дѣ́вы Марíи Прообразова́вый, То́й и ны́нѣ, я́ко чуде́съ Творе́цъ и всея́ тва́ри Созда́тель, ико́ну Ея́ святу́ю чудесы́ мно́гими просла́ви, дарова́въ ю́ вѣ́рнымъ во исцѣле́ніе неду́гомъ и въ защище́ніе отъ о́гненнаго запале́нія. Сего́ ра́ди вопіе́мъ Преблагослове́ннѣй: наде́ждо христіа́нъ, отъ лю́тыхъ бѣ́дъ, огня́ и гро́ма изба́ви на Тя́ упова́ющихъ, и спаси́ ду́ши на́ша, я́ко милосе́рда.


НА УТРЕНИ,
На Бо́гъ Госпо́дь: тропа́рь [Богоро́дицы, три́жды].

По 1-мъ стихосло́віи сѣда́ленъ, гла́съ 4. Подо́бенъ: Яви́лся еси́ дне́сь.

Яви́ся въ огнепа́льнѣй купинѣ́ на Сина́и Твоего́, Влады́чице, нетлѣ́ннаго Рождества́ проо́бразъ, я́коже богосло́вцы Це́ркве Христо́вой богому́дренно исповѣ́дуютъ. Купина́ бо, огне́мъ горѣ́вшая, неопа́льна пребыва́ше. Та́ко и Ты́ Огнь Божества́ во чре́вѣ Твое́мъ неопа́льно носи́ла еси́, вопло́щшагося отъ Тебе́ Бо́га Сло́ва, Его́же моли́ спасти́ся на́мъ, пою́щимъ Тя́.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся.

Удиви́ся богови́децъ Моисе́й, ви́дѣвъ купину́, огне́мъ горя́щу и несгара́ему, и устраши́ся Боже́ственнаго тайноявле́нія, въ не́мже благоволи́ Госпо́дь воплоще́нія Своего́ отъ Дѣ́вы неискусому́жныя проо́бразъ мíру яви́ти, я́ко въ послѣ́дняя лѣ́та, спасти́ хотя́ па́дшее человѣ́чество, пло́ти дебельство́мъ Божества́ Своего́ сла́ву сокры́етъ, и съ на́ми поживе́тъ, спаса́я ду́ши на́ша отъ поги́бели вѣ́чныя.

Сла́ва, и ны́нѣ, то́йже.

По поліеле́и сѣда́ленъ, гла́съ 6. Подо́бенъ: Ангельскія си́лы.

Ангельскія си́лы боголѣ́пно Тебѣ́ слу́жатъ, небесе́ и земли́ Цари́це Богоро́дице, и Тво́й пресвяты́й о́бразъ обстоя́тъ неви́димо. Тѣ́хъ бо Творца́ и Го́спода воплоти́ла еси́ и на ру́ку Твое́ю, я́ко Младе́нца, носи́ла еси́, Иже го́рняя съ до́льними совокупи́, и а́нгелы съ человѣ́ки ликовствова́ти устро́и, пою́щія во гла́сѣхъ ра́дованія Твое́ нетлѣ́нное Рождество́.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Ева́нгеліе отъ Луки́, зача́ло 4.

По 50-мъ псалмѣ́ стихи́ра, гла́съ 2:

Весели́тся дне́сь гора́ Сина́йская и свѣ́тло торжеству́етъ, Ма́тери Госпо́дни свѣтоно́сное пра́зднество соверша́ющи на мѣ́стѣ то́мъ, идѣ́же неопали́мая купина́ вели́кимъ во проро́цѣхъ Моисе́емъ ви́дѣна бы́сть. Здѣ́ бо и до ны́нѣ благода́ть Бо́жія обита́етъ и чуде́съ мно́жество явля́етъ вѣ́рнымъ, благоче́стно Богоро́дицу въ пѣ́снехъ велича́ющимъ.

Кано́нъ [благода́ренъ Пресвятѣ́й Богоро́дицѣ со ирмосо́мъ на 6 и пра́здника, на 8.] Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Умъ помраче́нный мо́й просвѣти́, Дѣ́во, огнено́снымъ сія́ніемъ Твоея́ сла́вы, па́мять, въ славосло́віи изнемога́ющую, укрѣпи́ и воспламени́ хла́дное мое́ се́рдце боже́ственною любо́вію, да Тебѣ́, Купинѣ́ Неопали́мѣй, пѣ́ніе хвале́бное воспою́ досто́йно, Чи́стая.

Хра́мъ Трисо́лнечнаго Свѣ́та прекра́сный, украси́ моя́ чу́вства, молю́ся, да цѣлому́дренною мы́слію и нескве́рными усты́ огнезра́чныя ико́ны Твоея́ явле́ніе воспою́ досто́йно, Чи́стая.

Къ Твое́й пресвѣ́тлаго зра́ка ико́нѣ припа́даю, окая́нный: ду́шу мою́ озари́ благода́тно, яви́ и тѣ́ло нескве́рно и, отъ лю́тыхъ мя́ неду́говъ свободи́вши, покажи́ прича́стника наслѣ́дія небе́снаго, Богоневѣ́стная.

Неду́гующа страстьми́ многоразли́чными, отъ ико́ны Твоея́ боже́ственныя исцѣле́нія сподо́би мя́, о Богома́ти Влады́чице, да сла́влю чудеса́ Твоя́ и пою́ Тя, благи́хъ вино́вную, Вѣ́чную Бла́гость воплоти́вшую, мíра благу́ю Засту́пницу.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Низложи́ нало́ги бѣсо́вскія, стужа́ющія мнѣ́, Влады́чице, го́рдость въ добродѣ́тели, лицемѣ́ріе въ свя́тости, тщесла́віе во бдѣ́ніи, высокоу́міе въ благоговѣ́ніи и неблагода́рность въ благодѣя́ніихъ Сы́на Твоего́, еди́на Всепѣ́тая Дѣ́во.

Стра́нна мя́ любоче́стія сотвори́, молю́ Тя, Дѣ́во, и чу́жда любопы́тства о человѣ́ческихъ согрѣше́ніихъ, де́рзость и изли́шнее на ми́лость Сы́на Твоего́ упова́ніе отдали́ отъ мене́, да досто́йны Ему́ плоды́ принесу́, еди́на Пречи́стая.

Нача́ло отъ земли́ пріе́мшую ху́дость моего́ естества́ познава́я, молю́ Тя, Дѣ́во, да́ждь ми́ презрѣ́ніе славолю́бія, бѣ́гство человѣ́ческія хвалы́, позна́ніе со́бственнаго грѣха́ и со́бственныя не́мощи, еди́на Богоблаже́нная.

Кра́ткій всѣ́хъ веще́й и всего́ мíра коне́цъ, сме́ртный ча́съ и муче́ніе бу́дущее за суету́ дѣя́ній тщесла́вныхъ помышля́ти сподо́би мя́, Дѣ́во, да благода́тію Сы́на Твоего́ къ пути́ и́стиннаго покая́нія наста́вленъ, вѣ́чнаго избѣ́гну прокля́тія, Пренепоро́чная.

Сѣда́ленъ, гла́съ 8:

Вели́чія Твоя́ кто́ исповѣ́сть, Богоро́дице? Явле́ніемъ бо огнезра́чныя ико́ны Твоея́ возвесели́ла еси́ ду́ши правосла́вныхъ, мно́гія неду́ги е́ю врачу́я, отъ огня́ же и гро́ма защища́я и́же по Бо́зѣ на Тя́ упова́ніе возлага́ютъ. О, Всеми́лостивая Влады́чице! Не лиши́ у́бо и на́съ Твоего́ заступле́нія, спаси́ Правосла́внаго Импера́тора на́шего и всю́ держа́ву Его́ отъ вся́каго зла́, да Тобо́ю хва́лящеся, не постыди́мся во вѣ́ки.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Жестокосе́рдіемъ отягче́ннаго мя́ облегчи́, немилосе́рдіемъ къ тре́бующимъ окамене́нную утро́бу мою́ умягчи́, бу́рею сребролю́бія объя́таго мя́ утиши́, во огни́ неопали́мыя купины́ прообразова́нная Влады́чице.

Во упова́ніи тлѣ́нныхъ и вре́менныхъ веще́й не оста́ви мя́ и пла́мень хище́нія непра́веднаго угаси́ во мнѣ́ пла́менемъ огня́ Боже́ственнаго, Неопали́мая Купино́ я́вльшаяся, Богоневѣ́стная Влады́чице.

Идолослуже́ніе въ лихоима́ніи и заблужде́ніе отъ и́стиннаго благоче́стія и правосла́вныя вѣ́ры потреби́ отъ мене́, Влады́чице, и не попусти́ мя па́сти паде́ніемъ ерети́ческимъ, да восхваля́ю и́мя Твое́ благослове́нное до кончи́ны живота́ моего́ въ правосла́віи непоро́чно, еди́на Приснодѣ́во.

Умъ мо́й, молю́ Тя, Богоро́дице, благоустро́й къ позна́нію вѣ́чныхъ и́стинъ Христо́ва Ева́нгелія, къ разсмотре́нію тлѣ́нности вре́менныхъ бла́гъ напра́ви мо́й по́мыслъ и щедролю́біе да́руй ми́ неоску́дное, да благода́тію Христо́вою укра́шенъ, пою́ Тя, еди́на Приснодѣ́во.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Огнь нечистоты́ и вся́кія скве́рны во мнѣ́, безсту́дномъ, мо́ремъ бла́гости Твоея́ потопи́, и мглу́ грѣхо́вную разжени́, и се́рдце мое́ ра́дости испо́лни, Всенепоро́чная.

Срамосло́вію безобра́зному не да́ждь во мнѣ́ мѣ́ста, Влады́чице, селе́ніе собла́зновъ замѣни́ въ души́ мое́й зрѣ́ніемъ со́бственныхъ грѣхо́въ, хра́мъ мя́ чистоты́ и цѣлому́дрія содѣ́лай, да нескве́рными усты́ велича́ю Тя́ вы́ну, Всенепоро́чная.

Сме́рть, су́дъ и муче́нія вѣ́чная, грѣ́шникомъ угото́ванная, въ па́мяти мое́й углуби́, Влады́чице, да поне́ послѣ́дняя сія́ въ па́мяти содержа́, лю́тая беззако́нія оста́влю и плоды́ покая́нія и́стиннаго принесу́, велича́я Тя́ при́сно, еди́но души́ моея́ упова́ніе.

Любо́вь сея́ жи́зни изли́шнюю и плотска́го поко́я раче́ніе отложи́ отъ мене́, молю́ Тя, Дѣ́во Чи́стая, да су́етныхъ попече́ній избѣ́гъ, Тобо́ю получу́ нетлѣ́нное на небеси́ бога́тство, еди́на души́ моея́ Покрови́тельнице.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Ра́дости су́етныя, къ преогорче́нію бли́жняго приводя́щія, чу́жда мя́ содѣ́лай, Купино́ Неопали́мая вѣ́рными имену́емая, Пречу́дная Цари́це, о несча́стіяхъ и́скренняго безъ печа́ли бы́ти не допуща́й мене́, Человѣколюби́вая Влады́чице, и памятозло́бія изба́ви мя́, прилѣ́жно молю́ Тя, Всенепоро́чная Дѣ́во.

За́висти въ по́мыслѣ мое́мъ не да́ждь вкореня́тися, видѣ́ніемъ несгара́емыя купины́ прообразова́нная Моисе́ю и ро́ждшаяся отъ ко́рене свя́та, Дѣ́во, и братоненавидѣ́нія изба́ви мя́, Чи́стая, да не зло́бою мра́чною оскверне́нъ бы́въ, лишу́ся Бо́жія благода́ти и жи́зни вѣ́чныя, Всенепоро́чная Влады́чице.

Терпѣ́ніе въ бѣда́хъ утверди́ во мнѣ́, Всечи́стая, съ ра́дующимися духо́вную ра́дость, къ сѣ́тующимъ сожалѣ́ніе да́руй ми́, Пресвята́я, и братолю́біе низпосли́ мнѣ́ свы́ше, Любве́ Пучи́ну ро́ждшая Дѣ́во и любо́вь ве́лію при́сно явля́ющая ро́ду христіа́нскому.

Жела́ніе кра́йнее согрѣ́й во мнѣ́ вся́кому бли́жнему отъ души́ благотвори́ти, Блага́я, да не ка́ко зло́бъ лю́тыхъ душа́ моя́ испо́лнится, и живо́тъ мо́й а́ду прибли́жится, и пре́данъ бу́ду безъ ми́лости, я́ко несотвори́вый ми́лости, во тму́ кромѣ́шнюю, Всенепоро́чная Богоневѣ́сто.

Конда́къ, гла́съ 8:

Предочи́стимъ чу́вствія ду́шъ и тѣле́съ на́шихъ, да ви́димъ та́инство Боже́ственное, обра́зно явле́нное дре́вле вели́кому во проро́цѣхъ Моисе́ю купино́ю, горѣ́вшею огне́мъ и не сгара́вшею, въ не́йже Твоего́ безсѣ́меннаго Рождества́, Богоро́дице, предвозвѣще́ніе исповѣ́дуемъ и, благоговѣ́йно покланя́ющеся Тебѣ́ и ро́ждшемуся отъ Тебе́ Спа́су на́шему, со стра́хомъ вопіе́мъ: ра́дуйся, Влады́чице, покро́ве, и прибѣ́жище, и спасе́ніе ду́шъ на́шихъ.

Икосъ:

Прови́дя ди́вный Моисе́й въ неопали́мѣй купинѣ́ на Сина́и та́йну, отъ вѣ́ка утае́нную, Безлѣ́тнаго, въ лѣ́тѣ роди́тися восхотѣ́вшаго, рожде́ніе отъ Чи́стыя и Неискусобра́чныя Дѣ́вы, у́жасомъ содержи́мь, вопія́ше: сія́ земля́ вои́стину свята́ е́сть, я́ко Пло́дъ спаси́тельный мíру изъ Нея́ произы́детъ, Имже го́ресть паде́нія Ада́мова услади́тся. Сего́ послу́шая, и мы́, та́инства Бо́жія сбытіе́ [1] позна́вшіи, ублажа́емъ Тя́, Богоро́дице, возвели́чившую па́дшее человѣ́чество и милосе́рдіемъ неизрече́ннымъ призрѣва́ющую на ро́дъ христіа́нскій, тѣ́мже и зове́мъ Ти́: ра́дуйся, Влады́чице, покро́ве, и прибѣ́жище, и спасе́ніе ду́шъ на́шихъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Весе́ліе мірско́е пресѣцы́ и душетлѣ́нное пристра́стіе умертви́ во мнѣ́, Дѣ́во, презрѣ́ніе вре́менныхъ, жела́ніе вѣ́чныхъ бла́гъ и нетлѣ́нную ра́дость пода́ждь ми́ съ пою́щими: отце́въ Бо́же, благослове́нъ еси́.

Безчи́нное утѣше́ніе и изли́шество, у́мъ вредя́щее, душѣ́ скве́рну ражда́ющее, отлучи́ отъ мене́, Дѣ́во, и сподо́би во здра́віи душе́внѣмъ и тѣле́снѣмъ духо́внаго утѣше́нія наслажда́тися съ пою́щими: отце́въ Бо́же, благослове́нъ еси́.

Грѣхо́мъ, сме́рть лю́тую ражда́ющимъ, оскверни́хъ ду́шу мою́, но Ты́, Пречи́стая Влады́чице, огнезра́чная и неопали́мая Купина́ я́вльшися, ти́ну страсте́й мои́хъ изсуши́ огне́мъ Бо́жія благода́ти и наста́ви мя́ на богоуго́дное житіе́, украси́ же воздержа́ніемъ и цѣлому́дріемъ и да́ждь ми́ чи́стымъ се́рдцемъ пѣ́ти: отце́въ Бо́же, благослове́нъ еси́.

Къ Твое́й огнезра́чной ико́нѣ взира́я, молю́ Тя, Влады́чице, омраче́ннаго мя́ самолю́біемъ, свѣ́томъ зра́ка Твоего́ просвѣти́ и, по́хоти плотскíя укроти́вши во мнѣ́, огне́мъ Бо́жія любве́ хла́дное се́рдце мое́ воспламени́, да Ро́ждшемуся отъ Тебе́ досто́йно возмогу́ пѣ́ти: отце́въ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Возмуще́ніе души́ моея́ утоли́, Всенепоро́чная, отъ клеветы́ навѣ́тующихъ изба́ви мя́, вражду́ грѣхо́вную во мнѣ́ укроти́ и не́нависть мра́чную отврати́ отъ мене́, Дѣ́во, да прославля́ю Тя́, Чи́стая, во вѣ́ки.

Огнь я́рости, во мнѣ́ зѣло́ разжже́нный, росо́ю благода́тныя моли́твы Твоея́ угаси́, хулу́, умножа́ющую души́ мое́й озлобле́ніе, и вся́кій ви́дъ зло́бы, гнѣздя́щійся въ се́рдцѣ мое́мъ, искорени́, Дѣ́во, да Тя́ прославля́ю, Чи́стая, во вѣ́ки.

Образъ Христо́въ ева́нгельскими добродѣ́тельми напиши́ въ души́ мое́й, Богоблагода́тная, укрѣпи́ и утверди́ мя во вся́комъ дѣ́лѣ благо́мъ, отъ вся́кія же зло́бы отврати́ се́рдце мое́, да ми́рными усты́ прославля́ю Тя́, Чи́стая, во вѣ́ки.

Кро́ткимъ о́комъ Твои́мъ ви́ждь мое́ смире́ніе, Пренепоро́чная Богоневѣ́сто, и приклони́ у́хо Твое́ къ моли́твѣ се́рдца моего́, кро́тостію и незло́біемъ благоукраси́ мя, помраче́ннаго безобра́зіемъ зло́бныхъ страсте́й, и сотвори́ прича́стника блаже́нства, кро́ткимъ обѣтова́ннаго, да ра́дуяся прославля́ю Тя́, Чи́стая, во вѣ́ки.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ско́рби се́рдца моего́ утиши́, Ра́досте скорбя́щихъ, уны́ніе душегуби́тельное отыми́ отъ мене́, Утоли́тельнице печа́ли, и лѣ́ность ко взыска́нію добродѣ́телей искорени́ во мнѣ́, Взыска́ніе поги́бшихъ, да Тебе́, Дѣ́во Чи́стая, непреста́нно велича́ю.

Малоду́шіемъ болѣ́знующаго мя́ оживи́, Цѣли́тельнице боля́щихъ, отча́яніемъ па́дшаго мя́ возста́ви, Одиги́тріе заблу́ждшихъ, грѣха́ми умерщвле́ннаго мя́ воскреси́, Спору́чнице грѣ́шныхъ, да Тебе́, Дѣ́во Непоро́чная, непреста́нно велича́ю.

Усе́рдіе во мнѣ́ твори́ти во́лю Бо́жію возбуди́ и ре́вность ко сла́вѣ Бо́жіей воспламени́ въ се́рдцѣ мое́мъ, Купино́ огнезра́чная и неопали́мая, и благоговѣ́йна служи́теля Христо́ва содѣ́лай мя́, Дѣ́во, Предводи́тельнице моего́ спасе́нія.

Слеза́ми покая́нія и умиле́нія изсо́хшую въ зно́и страсте́й ду́шу мою́ умягчи́, я́ко руно́ ороше́нное Гедео́на, и сокруше́ніе къ исправле́нію да́ждь ми́, Дѣ́во, да вѣ́чная бла́га унаслѣ́дую и съ ли́ки избра́нныхъ Бо́жіихъ воспою́ Тя, Хода́таицу моего́ спасе́нія.

Свѣти́ленъ:

Ико́ну Твою́ всечестну́ю въ зало́гъ благоволе́нія Твоего́ вѣ́рнымъ дарова́ла еси́, Влады́чице, покрыва́я и сохраня́я е́ю отъ о́гненнаго запале́нія на Тя́ упова́ющія. О, Ма́ти Царя́ Христа́ Бо́га! Бу́ди и на́мъ, грѣ́шнымъ, прибѣ́жище спасе́нія въ неча́янныхъ бѣда́хъ и хода́таица вѣ́чныя жи́зни.

Сла́ва, и ны́нѣ, то́йже.

На хвали́техъ стихи́ры [на 4], гла́съ 6:

О, вели́кія бла́гости и неисче́тнаго милосе́рдія Твоего́, Влады́чице! Удивля́еши на́съ пресла́вными чудесы́, и́хже источа́етъ ико́на Твоя́ свята́я, во о́бразѣ неопали́мыя купины́ Тя́ изобразу́ющая и о́гненнаго естества́ си́лу укроща́ющая си́лою Твое́ю боже́ственною. Юже съ весе́ліемъ пріе́млюще, Тя́, Чи́стую Богоотрокови́цу, достодо́лжно пѣ́сньми почита́емъ и ублажа́емъ. [Два́жды.]

О, благосе́рдаго Твоего́ о на́съ промышле́нія, Влады́чице! Въ годи́ну бѣ́дъ и обстоя́ній, егда́ внеза́пное запале́ніе о́гненное обы́метъ жили́ща на́ша, чу́дную ико́ну Твою́ посыла́еши на́мъ въ по́мощь и защи́ту и е́ю укроща́еши свирѣ́пство огня́, я́ко Ма́ти стихíями облада́ющаго Влады́ки Христа́. Тѣ́мже велегла́сно проповѣ́дуемъ Твоя́ чудеса́ и ми́лость мно́гу къ ро́ду христіа́нскому, и пѣ́сньми хвале́бными немо́лчно Тя́ велича́емъ и ублажа́емъ.

О, пресла́внаго чудесе́! Ка́ко огнезра́чная ико́на Твоя́, Влады́чице, огня́ си́лу угаша́етъ и свѣ́тлыми луча́ми Бо́жія благода́ти умы́ просвѣща́етъ и сердца́ весели́тъ? Вои́стинну бо торжество́ благоче́стія явле́ніе ико́ны Твоея́ познава́я, пра́зднуемъ сіе́ въ пѣ́снехъ духо́вныхъ ра́достно, и Тя́, Богоблагода́тная Дѣ́во, Вино́вницу ра́дости на́шея, славословле́нія гла́сы восхваля́емъ и ублажа́емъ.

Сла́ва, и ны́нѣ, гла́съ то́йже:

О, чу́до чуде́съ, Богоневѣ́стная Ма́ти и Дѣ́во! Чудотвори́ти не престае́ши и ны́нѣ ико́ною Твое́ю пречестно́ю, отра́ду и утѣше́ніе е́ю да́руя стра́нникомъ земны́мъ въ юдо́ли ско́рби и пла́ча. Изъ Тебе́ бо воплоти́ся Обнови́тель па́дшаго естества́ человѣ́ча, сы́й Бо́гъ на́шъ, дарова́вый на́мъ Тебе́ въ по́кровъ и защи́ту, Иже слы́шитъ моли́тву Твою́, за на́съ приноси́мую, и преклоня́ется къ моле́нію Твоему́ Ма́тернему, егда́ умоля́еши бла́гость Его́ за лю́ди согрѣши́вшія. Тѣ́мже не преста́й, благосе́рдая Влады́чице, предста́тельствовати за Импера́тора на́шего и за вся́ ны́, чту́щія Тя́, я́ко вои́стинну еси́ хода́таица непосты́дная на́шего спасе́нія.

Славосло́віе вели́кое, [ектеніи́ и отпу́стъ.]



НА ЛИТУРГІИ,

Блаже́нна отъ кано́на, пѣ́сни 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. [Сти́хъ: Лицу́ Твоему́ помо́лятся бога́тіи лю́дстіи.] Ева́нгеліе отъ Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.

Примѣчаніе:
[1] Сбытіе́ , т. е. исполненіе прообразованія; въ текстѣ ошибочно стоитъ — собы́тіе. (Прим. — А. К.)

Источникъ: Слу́жба съ ака́ѳистомъ Пресвятѣ́й Влады́чицѣ на́шей Богоро́дицѣ, въ че́сть и па́мять явле́нія чудотво́рныя ико́ны Ея́ «Неопали́мыя Купины́». — Изда́ніе второ́е. — Кíевъ: Въ Тѵпогра́фіи Кíево-Пече́рскія Успе́нскія Ла́вры, 1884. — C. 3-31, 73-82.

/ Къ оглавленію раздѣла /


Наверхъ / Къ титульной страницѣ

0