Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 3-й де́нь.
Свята́го священному́ченика Анѳи́ма, епи́скопа Никомидíйскаго. И преподо́бнаго отца́ на́шего Ѳеокти́ста, спо́стника вели́каго Евѳи́мія.

[ВЕЧЕРЪ,]
На Го́споди воззва́хъ: стихи́ры на 6, гла́съ 1. Подо́бенъ: Прехва́льніи му́ченицы.

Богому́дре блаже́нне,* очервле́ньми своея́ кро́ве* свяще́нную твою́* и боже́ственную оде́жду уясни́лъ еси́,* отъ си́лы бо благоче́стно въ си́лу* и отъ сла́вы въ сла́ву преше́лъ еси́.* И ны́нѣ моли́ся* дарова́ти душа́мъ на́шимъ* ми́ръ и ве́лію ми́лость.

Же́ртву пе́рвѣе* Бо́гу принося́ безкро́вную,* я́ко свяще́нникъ зако́ннѣйшій,* я́ко всепло́діе и прія́тну же́ртву* тебе́ сама́го кро́вію* я́ко му́ченикъ и́стиннѣйшій* по́слѣжде Христу́ прине́слъ еси́,* богоглаго́ливе всече́стне.* Его́же моли́ о пою́щихъ тя́.

Му́чениковъ во́инства* Христу́, о́тче, приве́лъ еси́,* уче́ніи твои́ми, Анѳи́ме, и наказа́ніи,* уча́ и наказу́я* и я́вѣ о́бразъ, богому́дре,* тебе́ сама́го предлага́я.* Съ ни́миже моли́ся* дарова́ти душа́мъ на́шимъ* ми́ръ и ве́лію ми́лость.

Ины стихи́ры преподо́бнаго, гла́съ и подо́бенъ то́йже:

Отче Ѳеокти́сте,* твоя́ свѣ́тлая па́мять* мона́ховъ собо́ры весели́тъ* добро́тами твоего́ житія́* и чуде́съ благода́тьми,* и дарова́ній свѣ́тлостьми́.* Христа́ моли́* дарова́ти душа́мъ на́шимъ* ми́ръ и ве́лію ми́лость.

Отче Ѳеокти́сте,* твоего́ терпѣли́ваго воздержа́нія* де́мони ужасо́шася* и упраздни́шася твои́ми* непреста́нными моли́твами, всехва́льне:* Христа́ бо поспѣ́шствующа стяжа́лъ еси́.* Его́же ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Отче Ѳеокти́сте,* Бо́жіе зда́ніе бы́лъ еси́:* е́же по о́бразу бо сохрани́въ,* и́стинствуя житіе́мъ,* и честна́го твоего́ о́браза* зва́ніе показа́лъ еси́, всечу́дне.* Христа́ моли́* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 6. Самогла́сенъ:

Свяще́нникъ зако́ннѣйшій, да́же до кончи́ны твоея́ бы́лъ еси́, блаже́нне Анѳи́ме, священнодѣ́йствуя бо боже́ственная и неизглаго́ланная Та́инства, кро́вь излія́лъ еси́ за Христа́ Бо́га и же́ртву благопрія́тну себе́ приве́лъ еси́. Тѣ́мъ, дерзнове́ніе имѣ́я къ Нему́, прилѣ́жно моли́ся о вѣ́рою и любо́вію соверша́ющихъ твою́ пречестну́ю па́мять и почита́ющимъ сію́ изба́витися напа́стей и вся́кихъ бѣ́дъ и обстоя́ній.

И ны́нѣ, богоро́диченъ или́ крестобогоро́диченъ, гла́съ то́йже. Подо́бенъ: Тридне́венъ.

Предстоя́щи дре́ву иногда́, во вре́мя распя́тія Дѣ́ва, и съ дѣ́вственникомъ ученико́мъ пла́чущи, вопія́ше: увы́ Мнѣ́, ка́ко стра́ждеши, всѣ́хъ, Христе́, сы́й безстра́стіе?

На стихо́внѣ окто́иха. Сла́ва, преподо́бнаго, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ. Тѣ́мже на небесѣ́хъ обрѣ́лъ еси́ мзду́ трудо́въ твои́хъ. Де́монская разори́лъ еси́ по́лчища и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ, [гла́съ то́йже]. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное, е́же ви́жду, та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ; сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Анѳи́ме, моли́ Христа́ Бо́га спасти́ся душа́мъ на́шимъ.

Сла́ва, преподо́бнаго, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Ѳеокти́сте, о́тче на́шъ, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ.



НА УТРЕНИ,
Кано́нъ окто́иха еди́нъ и святы́хъ два́.

Кано́нъ священному́ченика, его́же краегране́сне: Цвѣ́тъ тя пою́ па́стырей и му́чениковъ. Гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Двоплете́нъ благоче́стія архіере́йства и страда́нія пріе́мъ вѣне́цъ, отъ Христа́ ублажа́ешися, пресла́вне.

Тебѣ́, Первопа́стырю, священнодѣ́йственникъ Тво́й, я́ко незло́биво и чи́сто а́гня, беззако́нныхъ рука́ми приведе́ся.

Разори́лъ еси́, іера́рше, еретико́въ тве́ржи, благочести́вымъ дерзнове́ніемъ, проповѣ́давъ Тро́ицу несозда́нную.

Богоро́диченъ: Пречи́стая Богоро́дице, Яже воплоще́нное Присносу́щное и Пребоже́ственное Сло́во па́че естества́ ро́ждши, пое́мъ Тя́.

Инъ кано́нъ преподо́бнаго, гла́съ то́йже. Его́же краегране́сіе: Твоя́ по́двиги, о Ѳеокти́сте, сказу́ю. Ѳеофа́ново.
Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Безстра́стія жела́ніемъ срѣ́чемь, пло́ти взыгра́нія, о́тче, увяди́лъ еси́, Ѳеокти́сте му́дре, Бо́гомъ помога́емь. И ны́нѣ на́мъ свѣ́та мы́сленнаго испо́лнитися помоли́ся Го́споду, пою́щимъ: сла́вно бо просла́вися.

Прилѣпи́вся тебѣ́ вели́кій Евѳи́мій боже́ственною, о́тче, любо́вію, и, спребыва́я, Ѳеокти́сте, крѣ́пко, стезю́ воздержа́нія про́йде дѣ́тельнѣ и́стинно и тебѣ́ совзыва́ше: Го́споду пои́мъ, сла́вно бо просла́вися.

Подтѣсни́лъ еси́ тѣ́ло, преблаже́нне, и стра́сти плотскíя, о́тче, порабо́тивъ, Ѳеокти́сте, я́ко прія́лъ еси́ свѣ́тлость благода́ти и, се́ю просвѣти́вся, боже́ственнѣ взыва́лъ еси́: Го́споду пои́мъ, сла́вно бо просла́вися.

Богоро́диченъ: Тя́ спасе́нія наде́жду иму́ще, Дѣ́во Ма́ти Бо́жія, Сло́во я́ко ро́ждшую, богоразу́мно прему́дріи въ воздержа́ніи просія́ша, Евѳи́мій, любе́зный всѣ́мъ, и боже́ственный Ѳеокти́стъ, Го́споду зову́ще: сла́вно бо просла́вися.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Яви́лся еси́ священному́ченикъ, священнодѣ́йствуя пе́рвѣе, преподо́бне, Изба́вителю: пото́мъ же я́ко же́ртву себе́ сама́го священнодѣ́йствовалъ еси́.

Бы́лъ еси́ не нае́мникъ, но вѣ́рнѣйшій па́стырь, преподо́бне, твою́ кро́вь пролива́я, боголюбе́зне, за ста́до твое́.

Изря́днѣ упа́слъ еси́ Влады́ки твоего́ ста́до, архіере́е, тѣ́мъ на мѣ́стѣ зла́чнѣ всели́лся еси́.

Богоро́диченъ: Да́ждь на́мъ по́мощь мольба́ми Твои́ми, Пречи́стая, прило́ги отрѣва́ющи лю́тыхъ обстоя́ній.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Пло́ть у́бо умертви́лъ еси́ твою́ воздержа́ніемъ, преподо́бне, ду́шу же Боже́ственныхъ благода́тей дарова́ньми просвѣти́лъ еси́.

Все́ у́бо жела́ніе ко Влады́цѣ твоему́ обрати́лъ еси́, я́ростію же на де́моны, богоно́се, вооружи́лся еси́.

Богоро́диченъ: Пѣ́нія воспѣва́юще, богонауче́нніи, Влады́чице, Тя́ по́стницы, я́ко Бо́га ро́ждшую, Богоро́дицу просла́виша.

Сѣда́ленъ Анѳи́ма, гла́съ 1. Подо́бенъ: Ли́къ а́нгельскій.

Кро́вь твоя́, му́дре, та́йно вопія́ше отъ земли́ къ Бо́гу, я́ко Авелева, богому́дре: я́вѣ бо проповѣ́далъ еси́ Тро́ицу Несозда́нную. Тѣ́мже, Анѳи́ме, па́стырски просія́въ, отгна́лъ еси́ ересе́й звѣ́ри, я́ко храни́тель вѣ́ры.

Сла́ва, преподо́бнаго, гла́съ 4. Подо́бенъ: Яви́лся еси́ дне́сь.

Отце́въ нача́льникъ наре́клся еси́ и мíру бы́лъ еси́ пресвѣ́тлое свѣти́ло, преподо́бне о́тче Ѳеокти́сте. Тѣ́мъ непреста́нно чти́мъ па́мять твою́.

И ны́нѣ, богоро́диченъ:

Пречи́стыя ру́ки Твоя́, Дѣ́во Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою Ма́тернею растерза́ема, жа́лостно вопія́ла еси́: увы́ Мнѣ́, ка́ко заше́лъ еси́, Свѣ́те Мо́й Безлѣ́тный?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Волко́въ собо́рища а́гнцы творя́ сло́вомъ, блаже́нне, умертви́лся еси́ тѣ́ломъ, ду́хъ же пре́далъ еси́ Го́споду.

Яко благово́нная и всечестна́я, Всецарю́ прія́тна же́ртва твоя́, и принося́щаго въ богому́дріи, и приноша́емаго пребеззако́нными рука́ми.

Пома́зался еси́ у́бо, преподо́бне, свяще́нническою ма́стію пе́рвѣе, соверши́лся же еси́ второ́е страда́льческою твое́ю, о́тче, кро́вію.

Богоро́диченъ: Очище́ніе на́мъ да́руй невѣ́дѣній, я́ко Безгрѣ́шенъ, и умири́ мíръ Тво́й, Бо́же, моли́твами Ро́ждшія Тя́.

Инъ.

Ирмо́съ: Всѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.

Прему́дрости пе́рвыя ты́ рачи́тель яви́лся еси́, прему́дре: житіе́ бо непоро́чно пожи́лъ еси́, очище́нъ изря́дне душе́ю и мы́слію, согла́сно взыва́я: сла́ва си́лѣ Твое́й, Го́споди.

Очи́стивъ у́мъ тво́й отъ страстны́я молвы́, сла́вне, и чу́вства му́дрѣ упра́вивъ, къ нему́тнѣй тишинѣ́, о́тче, устреми́лся еси́, усе́рдно воспѣва́я: сла́ва си́лѣ Твое́й, Го́споди.

Земны́я печа́ли воздержа́тельно оттря́съ, небе́сныя наде́жди стяжа́ Тво́й уго́дникъ, Влады́ко, боже́ственный Ѳеокти́стъ со Евѳи́міемъ, поя́: сла́ва си́лѣ Твое́й, Го́споди.

Богоро́диченъ: Яко яви́лся еси́ въ мíрѣ отъ Дѣ́вы, я́ко Человѣ́къ, дарова́лъ еси́ побѣ́ду преподо́бнымъ Твои́мъ: Твои́мъ бо Кресто́мъ де́моны сíи прогна́ша, вѣ́рою зову́ще: сла́ва си́лѣ Твое́й, Го́споди.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Безкро́вну Же́ртву прине́слъ еси́ Го́споду, сама́го же себе́ кро́вію плодоприне́слъ еси́, Анѳи́ме.

Ду́хъ тя́ Боже́ственный просвѣти́, іера́рше; тѣ́мъ пресла́вную торжеству́емъ па́мять твою́.

Боже́ственный у́бо тво́й язы́къ иска́па спасе́ніе, то́къ же кро́ве твоея́ духо́вное ра́дованіе.

Богоро́диченъ: Ути́ши непостоя́нную бу́рю страсте́й мои́хъ, Бо́га Ро́ждшая Ко́рмчію и Го́спода.

Инъ.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Умертви́ на́ша мудрова́нія, Человѣколю́бче, и плотска́я взыгра́нія благопрія́тными преподо́бнаго Твоего́ моли́твами. [Дважды.]

Свы́ше на́съ назира́еши, всеблаже́нне, и управля́еши житіе́ на́ше, соверша́ющихъ любо́вію, му́дре, па́мять твою́.

Богоро́диченъ: Сообита́тельная дво́ица, преизря́дная и богозва́нная, воплоще́ннаго изъ Дѣ́вы Чи́стыя Бо́га проповѣ́дуетъ, неизрече́нно на́мъ возсія́вшаго.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Крести́лъ еси́ водо́ю лю́ди и Святы́мъ Ду́хомъ, я́коже крести́лся еси́, крести́лся же еси́ и твое́ю, о́тче, кро́вію.

Яко розга́ Лозы́ жи́зненныя, избра́нъ и че́стенъ, мно́жайшій израсти́лъ еси́ Влады́цѣ твоему́ пло́дъ, всеблаже́нне.

Не преста́й, моле́нія творя́ ко Христу́, блаже́нне, о ста́дѣ твое́мъ и кро́вь предложи́въ моле́бную.

Богоро́диченъ: Хра́мъ Тя́ Бо́жій, и киво́тъ, и черто́гъ одушевле́нъ, и две́рь небе́сную, Богоро́дице, вѣ́рніи, возвѣща́емъ.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Яко со́лнце, су́щимъ на земли́ возсія́лъ еси́, свѣ́томъ благоче́стія просвѣща́я и добродѣ́телей разсѣва́я сія́ніе, и цѣлому́дрія уча́ свѣ́тлости, Ѳеокти́сте, твои́ми моли́твами и ны́нѣ вселе́нную умири́. [Дважды.]

Богому́дрымъ по́мысломъ ублажи́вся, я́же на земли́ преоби́дѣлъ еси́ вся́, и небе́сное, преблаже́нне о́тче, наслѣ́діе, всему́дре, предразсуди́лъ еси́, Ѳеокти́сте, и ны́нѣ я́вѣ на небесѣ́хъ живе́ши, ра́дуяся.

Богоро́диченъ: Привлеко́стеся добро́тою любве́ Христо́вы, благолѣ́пныя и боже́ственныя, пло́тію я́вльшагося въ мíрѣ отъ Святы́я Чи́стыя Богома́тере, и яви́стеся мона́ховъ извѣ́стнаго житія́ прописа́нія.

Конда́къ, гла́съ 4. Подо́бенъ: Вознесы́йся.

Во свяще́нницѣхъ благоче́стно пожи́въ и муче́нія пу́ть сконча́въ, и́дольская угаси́лъ еси́ служе́нія, побо́рникъ бы́въ твоему́ ста́ду, богому́дре. Тѣ́мже тя́ и почита́емъ ны́нѣ, та́йно вопію́ще: отъ бѣ́дъ изба́ви на́съ твои́ми моли́твами, приснопа́мятне Анѳи́ме.

Икосъ:

Пода́въ мнѣ́ зна́ніе Боже́ственное, мра́къ невѣ́дѣнія отъ моего́ се́рдца отжени́ моли́твами твои́ми, я́ко да пою́ твою́ вѣ́рно святу́ю па́мять, въ не́йже а́нгельстіи ли́цы съ му́ченическими дне́сь веселя́тся боже́ственнѣ и человѣ́цы пѣ́сньми похва́льными твою́ главу́, я́коже цвѣ́ты спле́тше, вѣнча́ютъ досто́йно, прося́ще отъ тебе́ прія́ти согрѣше́ній оставле́ніе и злы́хъ житія́ рѣше́ніе, враго́въ же ви́димыхъ изба́витися и неви́димыхъ твои́ми моли́твами, о́тче на́шъ Анѳи́ме.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Яко до́брая и я́ко ту́чная же́ртва твоя́ яви́ся, преблаже́нне Анѳи́ме: Самому́ бо Влады́цѣ кро́вію прине́слся еси́, принося́й безкро́вная, — отце́въ, — вопія́, — Бо́же, благослове́нъ еси́.

Пасы́йся и упа́съ, отобою́ду, о́тче, бога́тство собра́лъ еси́, и, сіе́ снабдѣ́въ, соблю́лъ еси́ печа́тію страда́нія, поя́ Христу́: отце́въ на́шихъ Бо́же, благослове́нъ еси́.

Въ вѣ́рныхъ це́ркви Тріѵпоста́сное Естество́ богосло́вилъ еси́ и, предъ се́ю, богоно́се, непра́ведныхъ судо́мъ убива́емь, пѣ́лъ еси́: отце́въ на́шихъ Бо́же, благослове́нъ еси́.

Богоро́диченъ: Отъ дѣ́вственнаго чре́ва вопло́щься яви́лся еси́ на спасе́ніе на́ше. Тѣ́мже, Твою́ Ма́терь вѣ́дуще Богоро́дицу, благода́рно взыва́емъ: отце́въ на́шихъ Бо́же, благослове́нъ еси́.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Всѣ́мъ жела́ніемъ прилѣпи́вся воздержа́ніемъ тве́рдымъ твоему́ Влады́цѣ, Того́ ны́нѣ пита́ешися сія́ніи, зовы́й: благослове́нъ еси́, Го́споди Бо́же, во вѣ́ки.

Пло́дъ боже́ственъ Влады́цѣ прине́слъ еси́ житіе́ твое́, треблаже́нне, и же́ртву прія́тну и непоро́чну, зовы́й: благослове́нъ еси́, Го́споди Бо́же, во вѣ́ки.

Коне́цъ болѣ́зней обрѣ́лъ еси́, о́тче, наслажде́ніе е́же въ раи́, отъ тѣ́снаго бо пути́ дости́глъ еси́ къ простра́нству Ца́рствія, всему́дре, благословя́ Христа́ во вѣ́ки.

Богоро́диченъ: Се́ Дѣ́ва боже́ственное Отроча́ породи́, Его́же ны́нѣ богоно́сніи позна́вше Бо́га и Го́спода, вопія́ху: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Священному́ченика благосла́внаго въ па́мяти, вѣ́рніи, весели́теся, вопію́ще: Тя́ превозно́симъ, Христе́, во вѣ́ки.

Іера́рха му́ченическимъ зря́ще благолѣ́пно укра́шена вѣнце́мъ, Го́спода пое́мъ и превозно́симъ во вѣ́ки.

Тро́ицы уго́дника и кро́вь Тоя́ ра́ди излія́вшаго почти́мъ, Го́спода пою́ще и превознося́ще во вся́ вѣ́ки.

Богоро́диченъ: Свѣща́тельну Тя́ и златоза́рну всели́выйся въ Тя́ Свѣ́тъ Непристу́пный, Дѣ́во, показа́ свѣщу́ во вся́ вѣ́ки.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Съ похвала́ми быва́етъ, богоно́се, па́мять твоя́: пра́вды бо яви́лся еси́ пита́тель, му́жества, му́дрости и цѣлому́дрія, о́тче му́дре, Содѣ́телю и Изба́вителю взыва́я: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоно́снаго вси́ благохвале́ньми почти́мъ, я́ко испо́лнена я́вѣ благода́ти и Боже́ственными сія́ньми просвѣще́на изря́днѣ, Содѣ́телю и Изба́вителю вопію́ща: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Во гро́бѣ тѣ́ло твое́ святи́тель погребе́ и благоду́шія свѣ́тлый тезоимени́тъ: ду́шу же а́нгели на небеса́ принесо́ша, Содѣ́телю ра́достно пѣснопою́ще: дѣ́ти, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Любому́дрствовати вожделѣ́вше, Му́дрости жела́ніемъ Ѵпоста́сныя, по́стницы богому́дріи, мíру, Всенепоро́чная, я́вльшіяся, Отрокови́це, изъ Тебе́ и боголѣ́пно добродѣ́тели насади́вшіяся, Юже дѣ́ти благословя́тъ, свяще́нницы пою́тъ, лю́діе превозно́сятъ во вся́ вѣ́ки.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Ты́ у́бо овца́мъ па́стырь вѣ́ренъ показа́лся еси́, Па́стырю же овча́ приве́лся еси́ на же́ртву и сугу́бу прія́лъ еси́ сла́ву, тѣ́мъ тя́ честву́юще ублажа́емъ.

Ты́ начерта́нія воздержа́ніемъ, преблаже́нне, благоче́стія шары́ себѣ́ вообрази́въ, и́стинно по Бо́жію о́бразу ду́шу твою́ показа́лъ еси́, блаже́нне.

Твоя́ преда́нія, о́тче, невре́дна соблюда́юще и страда́ніе честву́юще, благоче́стно Тро́ицу во Еди́номъ Божества́ Естествѣ́ пѣ́сньми непреста́нно блажи́мъ.

Богоро́диченъ: Противля́ющихся, Христе́, Твое́й Це́ркви мы́шцы сокруши́ Богоро́дицы ра́ди и вѣ́рнаго Импера́тора на́шего утверди́, да Тя́ непреста́нно велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Струя́ми твои́хъ сле́зъ очи́стився, ны́нѣ Свѣ́та наслажда́ешися, Ѳеокти́сте, Трисія́ннаго, Тому́ предстоя́ я́вѣ и отону́дными изря́днѣйше просвѣще́нъ луча́ми, свы́ше назира́еши на́съ, твою́ па́мять соверша́ющихъ, всеблаже́нне.

Любо́вію и наде́ждею вооружи́вся и вѣ́рно огражде́нъ, разори́лъ еси́ хи́трости и кова́рства вра́жія и, побѣди́тель бы́въ, ны́нѣ вѣнцено́сецъ живе́ши съ боже́ственными ли́ки а́нгелъ и преподо́бныхъ о́крестъ престо́ла Всецаря́.

Цѣлому́дренно, и пра́ведно и благочести́во на земли́ съ человѣ́ки пожи́вше, на небесѣ́хъ сія́ете, богому́дріи по́стницы, со безпло́тныхъ чи́нми, Заре́ю пита́ющеся Богонача́льною, отъ Нея́же и по́двиговъ пра́ведно вѣнцы́, я́ко побѣдоно́сцы, прія́сте.

Богоро́диченъ: Боже́ственная, и богому́драя и свяще́нная дво́ице отце́въ пресвѣ́тлая, ва́шими мольба́ми мíру ми́ръ отъ Бо́га низпосла́тися проси́те и Це́рквамъ и́стинно единоу́міе и вѣ́ру, моли́твами благопрія́тными Богоро́дицы, преблаже́нніи.

Свѣти́ленъ. Подо́бенъ: Ученико́мъ.

Ли́къ приведи́ дне́сь лѣ́тный ве́сь, Никомидíйскій, ра́дуяся, гра́де, до́браго па́стыря твоего́, и взыгра́й, назира́теля имѣ́яй, соблюда́юща тя́, вре́да вра́гъ вы́шша.

Сла́ва, и ны́нѣ, богоро́диченъ:

Со апо́столы моли́, Богоро́дице, Твоего́ Сы́на и Го́спода поми́ловатися всѣ́мъ пою́щимъ Тя́, и сла́вящимъ, и во ико́нахъ Тя́ честву́ющимъ, и покланя́ющимся досто́йно, и любо́вію облобыза́ющимъ.

На стихо́внѣ окто́иха. Сла́ва, гла́съ 4. Самогла́сенъ. Ефре́ма Карíйскаго.

Никомидíйскому великогра́ду вся́къ гра́дъ и страна́ спра́зднуетъ дне́сь въ па́мять честна́го его́ граждани́на, и́бо концы́ земнíи пле́щутъ, веселя́щеся ны́нѣшнимъ торжество́мъ священному́ченика. Сему́ и мы́, пѣ́сньми, я́ко цвѣ́ты, вѣнцы́ спле́тше, возопіи́мъ: ра́дуйся, па́стырю до́брый, и́же ду́шу положи́вый за о́вцы, же́ртва и жре́цъ, іере́й и овча́. Тебѣ́ мо́лимся: съ пострада́вшими съ тобо́ю Христа́, Анѳи́ме, моли́ ста́до твое́ сіе́ отъ иноплеме́нныхъ волко́въ изба́вити и небе́сныя огра́ды съ тобо́ю сподо́битися.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Распина́ема Христа́ Человѣколю́бца ви́дящи Пречи́стая* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Тебѣ́ безблагода́тніи лю́діе возда́ша* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.


НА ЛИТУРГІИ,

Блаже́нна окто́иха на 4, и Анѳи́ма пѣ́снь 3-я на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 334. Аллилу́ія, гла́съ 2: Свяще́нницы Твои́ облеку́тся въ пра́вду, [и преподо́бніи Твои́ возра́дуются]. Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 24 – 30 об.

/ Къ оглавленію раздѣла /


Наверхъ / Къ титульной страницѣ

0