Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 32.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія во 2-й де́нь.
Свята́го му́ченика Ма́манта.
И преподо́бнаго отца́ на́шего Іоа́нна По́стника, патріа́рха Царя́ гра́да.

ВЕЧЕРЪ,
Обы́чная каѳи́сма. На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Кро́ви твое́й ка́плющи,* Жизнода́вцу Христу́,* кро́вь Свою́ тебе́ ра́ди излія́вшему,* приве́лся еси́, блаже́нне,* Иже и о́бщника тя́ сла́вы содѣ́я,* и Ца́рства Своего́ сприча́стника,* я́ко до́бльствовавша на льсти́ваго* и лю́тыя сего́ ко́зни,* до конца́ угаси́вша.

Сто́лпъ благоче́стія бы́лъ еси́,* основа́нъ тве́рдо на ка́мени вѣ́ры,* искуше́ньми неги́блемь* и бѣда́ми, блаже́нне.* Со мно́гою бо бу́рею и волне́ніемъ,* тебѣ́ прирази́вшіяся во́лны,* твоея́ не низложи́ша неукло́нныя крѣ́пости:* му́ченическимъ бо вѣнце́мъ* украси́тися вожделѣ́лъ еси́.

Вопло́щшемуся Бо́гу на́шему* и Стра́стію кре́стною низложи́вшему мучи́теля,* живоно́снымъ стопа́мъ,* страстоте́рпче, послѣ́дуя,* въ му́ченическое, ра́дуяся, вше́лъ еси́ суди́лище,* и ра́нами протерза́емь,* хва́лящагося погуби́ти мо́ре,* съ пло́тію, му́чениче, уязви́лъ еси́,* и на зе́млю низложи́лъ еси́.

Ины стихи́ры преподо́бнаго, гла́съ и подо́бенъ то́йже:

Отче Іоа́нне всече́стне,* мірска́го отступи́въ мяте́жнаго смѣше́нія,* Христо́вѣ же прите́клъ еси́* тишинѣ́, всепреподо́бне,* и видѣ́нія и боже́ственнаго дѣя́нія* всебога́тными я́сно сія́ніи* и́стинно обогати́лся еси́,* и вѣ́рнымъ пре́далъ еси́,* боголѣ́пнымъ житіе́мъ уясня́емь, блаже́нне.

Отче Іоа́нне всече́стне,* ты́ оде́ждею че́стно,* я́коже Ааро́нъ вторы́й, укра́шенъ,* святы́хъ Свята́я* ны́нѣ зри́ши,* вну́трь бы́въ и вторы́я завѣ́сы.* О, неизрече́ннаго твоего́, па́че ума́ сія́нія,* іера́рховъ боже́ственное удобре́ніе,* ему́же причасти́лся еси́.

Отче Іоа́нне всему́дре,* богови́дѣнъ бы́въ* нра́ва простото́ю,* Бо́гу ны́нѣ предстои́ши,* соедине́ніемъ лу́чшимъ* и непреста́ннымъ манове́ніемъ обожа́емь* и отону́днымъ свѣ́томъ исполня́емь,* ума́ чистото́ю, души́ свѣ́тлостію,* іера́рховъ боже́ственное украше́ніе и свяще́ннѣйшее.

Сла́ва, му́ченика, гла́съ 2. Византíево.

Но́въ са́дъ, я́коже ма́слина, на Бо́жіи трапе́зѣ положи́лся еси́, я́ко сы́нъ ходя́щихъ путе́мъ Госпо́днимъ: муче́нія ра́ди благослови́ тя Госпо́дь, и зри́ши блага́я го́рняго Сіо́на, наслажда́яся Боже́ственнаго ра́дованія съ роди́тельми вы́ну, Ма́манте достойнопѣ́тый, и́мже о́бщники ны́ мольба́ми твои́ми бы́ти сотвори́.

И ны́нѣ, богоро́диченъ или́ крестобогоро́диченъ, гла́съ то́йже. Подо́бенъ: Егда́ отъ Дре́ва.

Егда́ нескве́рная Агница ви́дѣ Своего́ Агнца, на заколе́ніе, я́ко человѣ́ка, во́лею влеко́ма, рыда́ющи глаго́лаше: безча́дствовати Мя́ ны́нѣ тщи́шися, Христе́, Тебе́ ро́ждшую. Что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

На стихо́внѣ окто́иха. Сла́ва, му́ченика, гла́съ 4:

Пріиди́те, согла́сно, вѣ́рніи, па́мять соверши́мъ Ма́манта му́ченика, се́й бо но́вый Авель яви́ся на́мъ: я́коже бо о́нъ, па́стырь ове́цъ бы́въ, а́гнца на же́ртву пе́рвый приведе́, и вѣне́цъ страда́нія пе́рвый прія́тъ, та́ко и сла́вный страстоно́сецъ, питѣ́нными ста́ды преизя́ществовавъ, себе́ сама́го же́ртву благопрія́тну Христу́ приведе́ муче́ніемъ, и дерзнове́ніе имѣ́я къ Нему́, ми́ръ мíру про́ситъ, и душа́мъ на́шимъ ве́лію ми́лость.

И ны́нѣ, богоро́диченъ или́ крестобогоро́диченъ, [гла́съ то́йже]. Подо́бенъ: Яко до́бля въ му́ченицѣхъ.

Распина́ема ви́дящи* и въ ре́бра пробода́ема копіе́мъ, Пречи́стая, Христа́ Человѣколю́бца,* пла́каше, вопію́щи:* что́ сіе́, Сы́не Мо́й?* Что́ Тебѣ́ неблагода́рніи лю́діе возда́ша,* вмѣ́сто я́же сотвори́лъ еси́ до́брая и́мъ?* И тщи́шися безча́дствовати Мя́, Вселюбе́знѣйше?* Дивлю́ся, Благоутро́бне, Твоему́ во́льному распя́тію.

Тропа́рь му́ченика, гла́съ 4:

Му́ченикъ Тво́й, Го́споди, Ма́мантъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, преподо́бнаго, гла́съ то́йже:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́, Яже веще́й Истина: сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Іоа́нне, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ, по гла́су, или́ крестобогоро́диченъ.



НА УТРЕНИ,
Кано́нъ окто́иха еди́нъ со ирмосо́мъ на 6 и святы́хъ два́.

Кано́нъ му́ченика, на 4. Творе́ніе Ѳеофа́ново. Гласъ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Небеса́ обходя́, я́ко изря́денъ му́ченикъ бы́въ, и Трисія́нныя Зари́, сла́вне, исполня́яся, на земли́ честву́ющія тво́й честны́й и свѣтоно́сный де́нь сконча́нія, Боже́ственнаго просвѣще́нія сподо́би.

Благоро́діе и по всѣ́мъ соверше́нное ума́ твоего́ провѣ́дый Сло́во, Ма́манте, отъ пеле́нъ тя́ ра́зума испо́лни, и до́брыхъ сла́достьми многови́дно украси́, му́чениче страстоте́рпче всехва́льне.

Роди́теліе твои́ непоро́чныя вѣ́ры, предбѣ́дствующе, во изгна́ніи пре́лести, заключа́еми въ темни́цахъ, Бо́жіими велѣ́ньми прозябо́ша тебе́, разори́вшаго многобо́жія соу́зъ.

Богоро́диченъ: Пресла́вная о Тебѣ́ глаго́лашася въ ро́дѣхъ родо́въ, Яже Бо́га Сло́ва во чре́вѣ вмѣсти́вши, чиста́ же пребыва́еши, Богоро́дице Марíе. Тѣ́мъ Тя́ вси́ честву́имъ, по Бо́зѣ предста́тельство на́ше.

Инъ кано́нъ преподо́бнаго Іоа́нна, на 4. Творе́ніе Ге́рманово. Гла́съ то́йже.
Пѣ́снь 1.

Ирмо́съ: Истря́сшему въ мо́ри мучи́тельство фарао́не и Изра́иля су́шею наста́вльшему, пои́мъ Христу́, я́ко просла́вися во вѣ́ки.

Возсіяв́шему въ мíрѣ іера́рха му́драго, Ца́рствія сія́ющаго велѣ́ніи, воспои́мъ Христу́, я́ко просла́вися во вѣ́ки.

Просія́вшаго въ мíрѣ благоче́стія свѣ́томъ и нече́стія мглу́ отгна́вшаго, почти́мъ, вѣ́рніи, я́ко іера́рха вели́каго, Іоа́нна.

Яко предстоя́ со а́нгелы непристу́пному Царю́, соверша́ющимъ твою́ па́мять моли́ дарова́тися очище́нію, священнопроповѣ́дниче, всеблаже́нне Іоа́нне.

Богоро́диченъ: Яко заче́нши Превѣ́чное Безнача́льное Сло́во Отчее и пло́тію ро́ждши па́че сло́ва, Всепѣ́тая, моли́ прилѣ́жно, е́же изба́витися на́мъ отъ бѣ́дъ.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Яко свѣтоза́рну звѣзду́, страстоте́рпца Ма́манта положи́ Христо́съ на высотѣ́ Це́ркве Своея́, страда́ній свѣ́тлостьми и пресла́вныхъ чуде́съ всю́ подсо́лнечную просвѣща́юща.

Возше́дъ на го́ру и́стиннаго зна́нія и облиста́вся видѣ́ніи ума́ чистото́ю, естество́ безслове́сное, къ слове́сному пѣснопѣ́нію Боже́ственными повелѣ́ніи, блаже́нне, воздви́глъ еси́.

Юноша красе́нъ добро́тою бы́лъ еси́, тѣ́мъ беззако́нно и́щущимъ я́ти тя́ яви́лся еси́ непристу́пенъ, Прише́дшему на Стра́сть, я́ко всѣ́хъ Го́споду, приведе́ся.

Богоро́диченъ: Не́бо простры́й и земны́й, Пречи́стая, кру́гъ содержа́й ве́сь, естество́мъ Божества́, на объя́тіихъ Твои́хъ пло́тію держи́мь бы́сть и вѣ́рнымъ Тя́ утвержде́ніе всѣ́мъ показа́.

Инъ.

Ирмо́съ: Утвержде́й Сло́вомъ небеса́ и зе́млю основа́вый на вода́хъ мно́гихъ, утверди́ мя къ пѣ́нію славосло́вія Твоего́, Го́споди.

Воздержа́ніемъ, о́тче, и моли́твою неукло́нною возше́лъ еси́ къ вы́шнему гра́ду добродѣ́телей, богоно́се, идѣ́же сла́дости пото́къ, пита́ешися.

Яко дерзнове́ніе имѣ́я къ Бо́гу, іера́рше преподо́бне, Іоа́нне му́дре, моли́ спасти́ся вѣ́рою соверша́ющимъ па́мять твою́.

Яко благочести́выхъ догма́товъ наста́вникъ и му́дрыхъ слове́съ сказа́тель и́стиненъ, вѣнце́мъ увя́злся еси́ на е́реси, преподо́бне.

Богоро́диченъ: Яко не́бо и престо́лъ Тя́ Бо́жій, воспѣва́емъ вси́, Богороди́тельнице Чи́стая, я́ко изъ Тебе́ яви́ся Іису́съ Христо́съ Истина.

Сѣда́ленъ му́ченика, гла́съ 8. Подо́бенъ: Прему́дрости.

Благоче́стія сы́й рожде́ніе че́стно, нече́стія показа́лся еси́ потреби́тель, Ма́манте всехва́льне, си́лою Ду́ха: въ три́знищи бо ле́сть и́дольскую обличи́лъ еси́ и благоде́рзостно Тро́ицу пѣ́ти проповѣ́далъ еси́. Тѣ́мже и звѣре́мъ вда́нъ бы́въ, страстоно́сче, звѣ́ря умори́лъ еси́ и злонача́льнаго змíя. Сего́ ра́ди вопіе́мъ ти́: моли́ Христа́ Бо́га согрѣше́ній оставле́ніе дарова́ти честву́ющимъ любо́вію святу́ю па́мять твою́.

Сла́ва, преподо́бнаго, гла́съ 3. Подо́бенъ: Боже́ственныя вѣ́ры.

Сосу́дъ боже́ственный воздержа́нія, бога́тство некра́домо благоче́стія показа́лся еси́, Іоа́нне блаже́нне, въ безстра́стіи уясни́въ житіе́ твое́, тре́бующія обогати́въ ми́лостынею, о́тче преподо́бне. Христа́ Бо́га моли́ дарова́ти на́мъ ве́лію ми́лость.

И ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Дѣ́во Ма́ти, чистото́ю а́нгелы превозше́дшая, па́че всѣ́хъ мене́ пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница, Сло́ва нетлѣ́нная Дѣ́во Ма́ти, на Крестѣ́ зря́щи повѣ́шена изъ Нея́ безболѣ́зненно Прозя́бшаго, матеролѣ́пно рыда́ющи, взыва́ше: увы́, Ча́до Мое́, ка́ко стра́ждеши, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Самово́льнѣ къ подвиго́мъ отлучи́лся еси́, неужа́сно, сла́вне, му́дростію: Христа́ бо имѣ́лъ еси́ помога́юща Боже́ственною си́лою, не́мощь твою́ утвержда́юща, и свидѣ́теля показу́юща Свои́хъ страда́ній, и вы́шнѣй свѣ́тлости прича́стника.

Яко помо́щникъ, и́же отъ Бо́га, спу́тникъ тво́й, покаря́шеся, я́коже слове́снѣйшій, ди́вій звѣ́рь. Боже́ственною бо любо́вію ты́ покори́лъ еси́ стра́сти безслове́снѣйшія, красе́нъ яви́лся еси́ по́мысломъ мудрѣ́йшимъ, безслове́сіе враго́въ побѣ́ждь.

Предъ суди́лищи мучи́телей ты́ предста́лъ еси́, Сло́ва воплоще́ніе, блаже́нне, проявле́нно возглаша́я, и безбо́жія низлага́я свирѣ́пство, и вся́ несомнѣ́нно пѣ́ти науча́я: си́лѣ Твое́й сла́ва, Человѣколю́бче.

Богоро́диченъ: Рожде́ніемъ преесте́ственнымъ Рождества́ Твоего́, болѣ́зней грѣ́хъ разрѣши́ся, и отъ кля́твы земноро́дныхъ естество́ измѣни́ся, Богороди́тельнице Всенепоро́чная, и отверзо́шася до́льнымъ Тебе́ ра́ди го́рняя, и со а́нгелы человѣ́цы лику́ютъ.

Инъ.

Ирмо́съ: Та́йно проро́къ предзря́ отъ Дѣ́вы Тя́, Сло́ве, воплоща́ема, пѣ́сненно вопія́ше: сла́ва си́лѣ Твое́й, Го́споди.

Іера́рха вси́ му́драго въ пѣ́снехъ восхва́лимъ, глаго́люще: богоно́се Іоа́нне, моли́ся Го́споду прилѣ́жно, спасти́ся на́мъ.

Яко благочести́выхъ догма́товъ насади́теля и му́дра іера́рха тя́ иму́ще, богоблаже́нне о́тче, пѣ́сньми и пѣ́ньми восхваля́емъ тя́.

Свяще́нную твою́ па́мять, вѣ́рніи, первонача́льниче, пита́телю сла́вне, іера́рше Госпо́день, пѣ́ньми и пѣ́сньми пра́зднуемъ.

Богоро́диченъ: Безневѣ́стная Невѣ́сто и Чи́стая и Нескве́рная Ма́ти Христа́ Бо́га, Того́ непреста́нно моли́, спасти́ ду́ши пою́щихъ Тя́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Стру́жемь, ника́коже о тѣлеси́ сла́вный Ма́мантъ попече́ся, тлѣ́нія дебельство́ растерза́тися отложи́въ, и ко́жныя совле́къ ри́зы, и оде́жду нетлѣ́нія пріе́мъ.

Благода́рственную хвалу́ пѣ́лъ еси́ Зижди́телю твоему́, ископова́емь въ ре́бра, всеблаже́нне, и гла́съ съ небесе́ услы́шалъ еси́, утвержда́ющь па́че по́мыслъ тво́й къ лу́чшему и страда́ній болѣ́знь облегча́ющь.

Въ темни́цѣ заключе́ну яви́ся съ небесе́ тебѣ́, нося́щи пресла́вно видѣ́ніе, страстоте́рпче всеблаже́нне, многострада́льне, пи́щу нетлѣ́нія, голуби́ца краснѣ́йша: тлѣ́нія бо предѣ́лы премину́лъ еси́.

Богоро́диченъ: Воплоще́нія Боже́ственнаго и примѣне́нія несказа́ннаго Ты́ была́ еси́ Хода́таица, Яже пре́жде со́лнца изъ Отца́ Рожде́ннаго ро́ждши: Тобо́ю бо естество́ земны́хъ Бо́гу совокупи́ся и на престо́лѣ Сла́вы посади́ся.

Инъ.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя́ у́тромъ человѣколю́бія Твоего́, Го́споди.

Па́стырски пома́зался еси́ благоче́стія мѵ́ромъ, богому́дре, тѣ́мъ я́ко іера́рха вси́ восхваля́емъ тя́, преподо́бне.

Яко подража́тель сы́й апо́столовъ, богому́дре сла́вне, болѣ́зньми и бдѣ́ніи, церко́внымъ предста́тельствовалъ еси́ лю́демъ.

Ревни́телю Иліи́ и Моисе́ю богови́дцу поревнова́лъ еси́, о́тче священноявле́нне, и ересенача́льники посрами́лъ еси́.

Богоро́диченъ: Яко Цари́цу вси́ и Царя́ всѣ́хъ ро́ждшую, пріиди́те, со а́нгеломъ Благослове́нную почти́мъ.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Ре́вностію къ Бо́гу распала́емь, свяще́ннѣйше, о поджига́ющемъ пла́мени ника́коже попе́клся еси́, боже́ственнымъ ороша́емь съ небесе́ дожде́мъ, страда́льче до́блественнѣйше.

Юношамъ тріе́мъ Претвори́вый пе́щь въ ро́су свѣтоявле́нно, богому́дре, всеблаже́нне, отъ пла́мене исхити́ тя и огня́ показа́ пресла́вно си́льнѣйша.

Велича́йшія претерпѣва́я по́двиги, яви́лся еси́ превелича́йшъ, въ страда́льцѣхъ чу́денъ, въ му́ченицѣхъ же иску́сенъ. Тѣ́мъ и велича́йшихъ тя́ Подвигополо́жникъ воздая́ній сподо́би.

Богоро́диченъ: Бы́хомъ о́бщницы Боже́ственному естеству́, Пречи́стая, Боже́ственнымъ Рождество́мъ Твои́мъ, и поко́й небе́сный, со а́нгельскими чи́нми Тя́ восхваля́ющіи, во Христѣ́ наслѣ́дствовахомъ.

Инъ.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Церко́вную сла́ву украси́лъ еси́, Іоа́нне блаже́нне, боже́ственными твои́ми догма́ты и му́дрыми наказа́ніи, е́реси же исчезнове́ны сотвори́лъ еси́.

Яко свѣти́льникъ благоче́стія, догма́товъ твои́хъ добро́тою облиста́лъ еси́ по все́й тва́ри, богому́дре учи́телю, и помрачи́лъ еси́ е́реси сло́вомъ Бо́жіимъ.

Вмѣ́сто меча́ язы́комъ и сло́вомъ вооружи́вся, преподо́бне, лжи́вая отсѣ́клъ еси́ уче́нія вся́, и уясни́лъ еси́ всѣ́мъ Тро́ицу я́вѣ.

Богоро́диченъ: Рожде́йся изъ Дѣ́вы и мíръ просвѣще́й, Христе́ Бо́же, и мене́ отъ прегрѣше́ній мои́хъ изба́ви, я́ко Человѣколю́бецъ, и упра́ви жи́знь мою́, молю́ся.

Конда́къ, гла́съ 3. Подо́бенъ: Дѣ́ва дне́сь.

Жезло́мъ, свя́те, отъ Бо́га тебѣ́ да́ннымъ, лю́ди твоя́ упаси́ на па́житехъ живоно́сныхъ, звѣ́ри же неви́димыя и неукроти́мыя сокруши́ подъ но́ги тя́ пою́щихъ, я́ко вси́, и́же въ бѣда́хъ, предста́теля тя́ те́пла, Ма́манте, и́мутъ.

Икосъ:

Иже по все́й земли́ пресла́внаго тя́ му́ченика, и на небесѣ́хъ со а́нгелы лику́юща, воспои́мъ, Ма́манте, пе́рвѣе еле́ни въ пусты́няхъ я́вѣ доя́ща, и ны́нѣ бога́тныя лю́ди Госпо́дня, жезло́мъ си́лы, я́ко па́стыря добра́, пасу́ща и путеводя́ща на мѣ́сто зла́чно, идѣ́же е́сть и́стинно ра́йская сла́дость. Тоя́ бо ра́ди мíръ оста́вилъ еси́, я́ко да вси́ тя́ предста́теля, Ма́манте, те́пла и́мутъ.

Пѣ́снь 7.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Пе́щи ви́дъ, я́коже хла́да потре́бное тебѣ́ испо́лни, на дни́ бо мно́гія въ то́й, Ма́манте, затворе́нъ, не опали́лся еси́, вопія́ Сотво́ршему: благослове́нъ Бо́гъ оте́цъ на́шихъ.

Ангелы спріе́мники, слико́вники тебѣ́, и о́бщники неизглаго́ланныхъ пѣ́сней, посредѣ́ пла́мене, му́чениче, имѣ́лъ еси́. Съ ни́миже всѣ́хъ Влады́цѣ взыва́лъ еси́: благослове́нъ Бо́гъ оте́цъ на́шихъ.

Яко ши́покъ неувяда́емь, я́ко отъ черто́га жени́хъ, исходя́, краснѣ́йшій, и́стинно отъ пе́щи, попали́въ безу́мныя, и зря́щія просвѣти́въ, зову́щія: благослове́нъ Бо́гъ оте́цъ на́шихъ.

Богоро́диченъ: Се́ ны́нѣ испо́лнися богоглаго́ливаго прорече́ніе, во утро́бѣ бо, Дѣ́во, Бо́га Сло́ва имѣ́ла еси́ и родила́ еси́ Жизнода́вца. Ему́же вси́ зове́мъ: благослове́нъ Бо́гъ оте́цъ на́шихъ.

Инъ.

Ирмо́съ: Въ нача́лѣ зе́млю основа́вый, и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Иже на земли́ свѣти́льника показа́вый благочести́ваго и му́драго іера́рха, благослове́нъ еси́ во вѣ́ки, Го́споди, Бо́же оте́цъ на́шихъ.

Истиннаго Іоа́нна вели́каго па́ствѣ Твое́й па́стыря показа́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Плотска́я привоста́нія, о́тче, низложи́въ, Христу́ вопія́лъ еси́: благослове́нъ еси́ во вѣ́ки, Го́споди, Бо́же оте́цъ на́шихъ.

Богоро́диченъ: На́съ ра́ди роди́выйся изъ Дѣ́вы и отъ врага́ изба́вивый мíръ, благослове́нъ еси́ во вѣ́ки, Го́споди, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Яко Даніи́лъ, зія́нія звѣре́й заусти́лъ еси́ боже́ственнымъ Влады́ки призва́ніемъ, сла́вне, змíя умертви́лъ еси́, злочести́выя посрами́лъ еси́, и я́ко побѣди́тель, на небесѣ́хъ, поя́, живе́ши въ весе́ліи: свяще́нницы, благослови́те, лю́діе, превозноси́те во вся́ вѣ́ки.

Побива́ху ка́меніемъ тя́, блаже́нне, ка́менію служа́щіи, и окамене́нніи душе́ю пребеззако́нніи, о́ко воздвиза́юща свяще́нныя твоея́, му́чениче, души́ къ неразсѣ́дному и неукло́нному Ка́меню и пою́ща усе́рдно: свяще́нницы, благослови́те, лю́діе, превозноси́те во вся́ вѣ́ки.

Подвигополо́жникъ, свы́ше тебѣ́ простира́я вѣне́цъ, я́коже побѣди́телю, и до́брый проше́дшу по́двигъ, пребога́те, возглаша́етъ тебѣ́ е́же къ Нему́ спѣши́ти, честно́е и сладча́йшее ше́ствіе, усе́рдно пою́щу: свяще́нницы, благослови́те, лю́діе, превозноси́те во вся́ вѣ́ки.

Богоро́диченъ: Преесте́ственно зачала́ еси́ Су́щаго изъ Отца́ безъ ма́тере, пребы́вши Дѣ́ва и по рождествѣ́, Чи́стая: Бо́жіе бо соедине́ніе обновля́етъ естества́ въ Тебѣ́, и обновля́ются существа́ предѣ́лы. Тѣ́мъ Тя́ правосла́вно, я́ко Бо́га ро́ждшую, и́стинно Богоро́дицу пое́мъ во вѣ́ки.

Инъ.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы, Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Моисе́ю подо́бяся, треблаже́нне, на го́ру возше́лъ еси́ и во мра́къ, мы́сленный благода́ти пріе́мъ зако́нъ, іера́рше, тѣ́мъ воспѣва́емъ Христа́ во вѣ́ки.

Лю́ди Твоя́ упа́съ, іера́рше, еги́петскую пре́лесть отрази́лъ еси́, и Вавило́на страсте́й убѣжа́въ, Сіо́нъ го́рній обрѣ́лъ еси́ жили́ще во вся́ вѣ́ки.

Яко мѵ́ромъ, пома́зався, священноявле́нне, сло́вомъ и дѣ́ломъ благоче́стія, священнодѣ́йствуеши Боже́ственная, свяще́ннѣйше. Тѣ́мъ Тро́ицу во еди́номъ существѣ́ пое́ши во вся́ вѣ́ки.

Богоро́диченъ: Въ ложесна́ всели́вшагося Дѣ́вы, и Сея́ ра́ди ужа́сно и па́че сло́ва, ве́тхаго Ада́ма обнови́вша, Го́спода по́йте, и превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Возложи́лъ еси́ ду́шу твою́ Изба́вителю, и къ Сему́ усе́рдно восте́клъ еси́, добро́тами укра́шенъ свѣ́тло свяще́нныхъ подвиго́въ твои́хъ и боре́ній чу́дныхъ, всехва́льне ору́жниче, свѣти́ло вселе́нныя, церко́вное удобре́ніе.

Совокупи́лся еси́ со а́нгелы, а́нгельское на земли́ жи́тельство стяжа́въ, и съ ни́ми пое́ши во хвале́ніи ра́достно свяще́нное пѣснопѣ́ніе, Ма́манте, Тро́ицѣ всехва́льно, обожа́емь Боже́ственными прича́стіи, и сла́вою непрее́мною обогаща́емь.

Яко имѣ́я дерзнове́ніе къ Бо́гу, боже́ственное твое́ сіе́ торжество́ ра́достно, му́чениче, соверша́ющія, и честно́е и свяще́нное твое́ страда́ніе вѣ́рою чи́стою хва́лящія, помина́й всеблаже́нне, и бу́ри и бѣ́дъ и напа́стей ны́ спаси́.

Богоро́диченъ: Неискусому́жную Ма́терь су́щихъ на земли́, Отроча́ ражда́ющу, кто́ слы́ша когда́? И Рожде́нное, безнача́льна Бо́га же и соесте́ственна Отцу́ пребезнача́льному же и Ро́ждшей преесте́ственно? О, стра́ннаго та́инства! О, Боже́ственнаго обще́нія, и́мже Бо́гу соедини́хомся!

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Безстра́стіемъ и вѣ́рою, наде́ждею и любо́вію, словеса́ на́мъ жи́зни вѣ́чныя показа́въ, му́дре Іоа́нне, моли́ спасти́ся душа́мъ на́шимъ.

Жезло́мъ Ду́ха Свята́го лю́ди я́ко упа́сша честны́я Це́ркве, и отгна́вша богобо́рныя е́реси, вси́ іера́рха восхваля́емъ тя́.

Яко церко́внаго свѣти́льника и іера́рха, во псалмѣ́хъ и пѣ́ніихъ честву́емъ тя́ немо́лчно и ра́ку моще́й твои́хъ, блаже́нне о́тче Іоа́нне, великоимени́те.

Богоро́диченъ: Ра́дуйся, присноживо́тный исто́чниче нетлѣ́нія; ра́дуйся, всесвѣ́тлый Со́лнца мы́сленнаго о́блаче; ра́дуйся, носи́ло Божества́ всего́; ра́дуйся, ковче́же свяще́нія.

Свѣти́ленъ окто́иха. Сла́ва, му́ченика. Подо́бенъ: Ученико́мъ.

Млеко́мъ воспита́лся еси́ еле́ней, въ гора́хъ живы́й, му́чениче Ма́манте, но яви́лся еси́ па́ки на три́знищи, страда́въ усе́рднѣйше, и побѣ́ды взе́мъ вѣне́цъ, ко Го́споду отше́лъ еси́.

Богоро́диченъ: Иже жи́зни боже́ственнѣй и блаже́ннѣй позави́дѣвъ ми́ дре́вле въ раи́, вра́гъ льсти́вѣйшій и вселука́вый, и Еде́ма изгна́на сотвори́ мя, умерщвля́ется Твои́мъ Рождество́мъ, Дѣ́во.


НА ЛИТУРГІИ,

Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ къ Ри́мляномъ, зача́ло 99. Аллилу́ія, гла́съ 4: Пра́ведникъ я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Іоа́нна, зача́ло 50. Прича́стенъ: Ра́дуйтеся [пра́ведніи о Го́сподѣ, пра́вымъ подоба́етъ похвала́].

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 17-24.

/ Къ оглавленію раздѣла /


Наверхъ / Къ титульной страницѣ

0