Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Септе́мврія въ 1-й де́нь.
Нача́ло Инди́кта, си́рѣчь но́ваго лѣ́та.
И па́мять преподо́бнаго отца́ на́шего Симео́на Сто́лпника и архимандри́та, и ма́тере его́ Ма́рѳы.
И собо́ръ Пресвяты́я Богоро́дицы, и́же въ Міаси́нѣхъ.
И свята́го му́ченика Аиѳала́.
И святы́хъ му́ченицъ 40 же́нъ и свята́го Амму́на діа́кона, и учи́теля и́хъ.
И святы́хъ му́ченикъ Калли́сты, Ево́да и Ермоге́на, самобра́тій.
И па́мять пра́веднаго Іису́са, сы́на Нави́на.

ВЕЧЕРЪ,
Блаже́нъ му́жъ, 1-й антифо́нъ; а́ще же въ суббо́ту, стихологису́емъ каѳи́сму всю́.
На Го́споди, воззва́хъ: поста́вимъ стихо́въ 10 и пое́мъ стихи́ры инди́кта 3, гла́съ 1. Подо́бенъ: Небе́сныхъ чино́въ.

Самосло́внаго и боже́ственнаго уче́нія Христо́ва* моли́твѣ научи́вшеся,* на вся́къ де́нь возопіи́мъ Зижди́телю:* Отче на́шъ, Иже на небесѣ́хъ обита́яй,* насу́щный хлѣ́бъ подава́й на́мъ,* презира́я на́ша прегрѣше́нія.

Иже на Сина́йстѣй горѣ́* скрижа́ли написа́въ иногда́,* Са́мъ и ны́нѣ во гра́дѣ Назаре́тѣ по пло́ти,* кни́гу прія́лъ еси́ проро́ческую почести́, Христе́ Бо́же,* и сію́ согну́въ, учи́лъ еси́ лю́ди,* испо́лнитися Писа́нію о Тебѣ́.

Якоже евре́евъ тѣлеса́ въ пусты́ни иногда́,* не покори́вшихся и́стинно Тебѣ́, всѣ́хъ Влады́цѣ,* досто́йно падо́ша,* та́ко и ны́нѣ ко́сти разсы́пли* злочести́выхъ и невѣ́рныхъ ага́рянъ,* псало́мски, при а́дѣ, Христе́.

Ины стихи́ры преподо́бнаго, гла́съ 5. Подо́бенъ: Преподо́бне о́тче.

Преподо́бне о́тче, а́ще бы возмо́жно столпу́ вѣща́ти, не бы преста́лъ вопи́ти твоя́ болѣ́зни, труды́ и рыда́нія. Но о́нъ носи́мь бя́ше, не́же ноша́ше, я́ко дре́во, напая́емо слеза́ми твои́ми. Удиви́шася а́нгели, учуди́шася человѣ́цы, устраши́шася де́мони терпѣ́нія твоего́, Симео́не преподо́бне, моли́ спасти́ся душа́мъ на́шимъ.

Преподо́бне о́тче, си́лою Боже́ственнаго Ду́ха Влады́цѣ твоему́ подо́бяся, на сто́лпъ вше́лъ еси́, я́ко на кре́стъ. Но Онъ рукописа́ніе всѣ́хъ растерза́, ты́ же воста́нія страсте́й разруши́лъ еси́, Онъ я́ко овча́, ты́ же я́ко заколе́ніе, Онъ взы́де на кре́стъ, ты́ же на сто́лпъ. Симео́не преподо́бне, моли́ спасти́ся душа́мъ на́шимъ.

Преподо́бне о́тче, тѣ́ло омочи́въ слеза́ми и ду́шу очи́стивъ, на высоту́ возше́лъ еси́ добродѣ́телей; чу́вственное у́бо жили́ще имѣ́я сто́лпъ тво́й, мы́сленный же и небе́сный гра́дъ го́рній Сіо́нъ, а́нгелы удиви́лъ еси́, человѣ́ки ужаси́лъ еси́, де́моны посрами́лъ еси́ добродѣ́тельми твои́ми. Симео́не преподо́бне, моли́ спасти́ся душа́мъ на́шимъ.

Другíя стихи́ры свята́го, гла́съ 2, самогла́сны:

Отъ ко́рене блага́го благíй прозябе́ пло́дъ, отъ младе́нства свяще́нный Симео́нъ, благода́тію па́че не́же млеко́мъ воспита́нъ. И на ка́мень тѣ́ло возвы́сивъ, къ Бо́гу же превозвы́сивъ ра́зумъ, небе́сное созда́ добродѣ́тельми жили́ще, и съ боже́ственными си́лами лико́внѣ ше́ствуя, Христа́ бы́сть жили́ще, Бо́га и Спа́са ду́шъ на́шихъ.

Па́мять твоя́ во вѣ́къ пребыва́етъ, преподо́бне о́тче Симео́не, и кро́тость се́рдца твоего́, уго́дниче Христо́въ блаже́нне. Аще бо и преста́вился еси́ отъ на́съ, па́стырю до́брый, но не отступа́еши отъ на́съ ду́хомъ, въ любви́ Бо́гу предстоя́ и со а́нгелы лику́я на небесѣ́хъ, съ ни́миже моли́ спасти́ся душа́мъ на́шимъ.

Кипріа́ново: Моще́й твои́хъ ра́ка, всехва́льне о́тче, источа́етъ исцѣле́нія, и свята́я твоя́ душа́, со а́нгелы совоку́пльшися, досто́йно ра́дуется. Имѣ́я у́бо ко Го́споду, преподо́бне, дерзнове́ніе, и со безпло́тными лику́я на небесѣ́хъ, съ ни́миже моли́ спасти́ся душа́мъ на́шимъ.

Ге́рманово: Возлюби́лъ еси́, богоно́се, го́рнѣйшее любому́дріе, и внѣ́ мíра бы́лъ еси́, живы́й вы́шше ви́димыхъ, и зерца́ло нескве́рно Бо́жіе боже́ственно показа́лся еси́, и сы́й при́сно соединя́яся Свѣ́ту, свѣ́тъ пріима́лъ еси́, и яснѣ́йшій, блаже́нне, получи́лъ еси́ коне́цъ. Моли́ся о душа́хъ на́шихъ, му́дре Симео́не.

Сла́ва, гла́съ 6.

Ге́рманово: Боже́ственная благода́ть осѣня́етъ ра́ку моще́й твои́хъ, освяще́нный Симео́не, тѣ́мже и въ воню́ мѵ́ра чуде́съ твои́хъ притека́юще, неду́говъ исцѣле́ніе почерпа́емъ. Но́, о́тче преподо́бне, Христа́ Бо́га моли́ о душа́хъ на́шихъ.

И ны́нѣ, инди́кта, гла́съ то́йже.

Византíево: Иже со Ду́хомъ Святы́мъ соедине́нъ, Безнача́льне Сло́ве и Сы́не, всѣ́хъ ви́димыхъ и неви́димыхъ Содѣ́телю и Зижди́телю, вѣне́цъ лѣ́та благослови́, сохраня́я въ ми́рѣ правосла́вныхъ мно́жества, моли́твами Богоро́дицы и всѣ́хъ святы́хъ Твои́хъ.

Та́же вхо́дъ, проки́менъ дне́, и чте́нія.

Проро́чества Иса́іина чте́ніе. [Глава́ 61.]

Ду́хъ Госпо́день на Мнѣ́, Его́же ра́ди пома́за Мя́, благовѣсти́ти ни́щимъ посла́ Мя, исцѣли́ти сокруше́нныя се́рдцемъ, проповѣ́дати плѣ́нникомъ отпуще́ніе и слѣпы́мъ прозрѣ́ніе, проповѣ́дати лѣ́то Госпо́дне прія́тно и де́нь воздая́нія Бо́га на́шего, утѣ́шити вся́ пла́чущія, да́ти пла́чущимъ Сіо́нъ, сла́ву вмѣ́сто пе́пела, помаза́ніе весе́лія пла́чущимъ, одѣя́ніе сла́вы вмѣ́сто ду́ха уны́нія, и нареку́тся ро́ди пра́вды, насажде́ніе Госпо́дне въ сла́ву. И сози́ждутъ пусты́ни вѣ́чныя, запустѣ́вшія пре́жде воздви́гнутъ, и обновя́тъ гра́ды пусты́я, запустѣ́вшія отъ ро́да въ ро́дъ. И пріи́дутъ иноро́дніи, пасу́ще о́вцы Твоя́, и иноплеме́нницы ра́таи, и виногра́дари ва́ши. Вы́ же свяще́нницы Госпо́дни нарече́теся, служи́теліе Бо́га ва́шего. Рече́тся ва́мъ: крѣ́пость язы́ковъ поя́сте и въ бога́тствѣ и́хъ чу́дни бу́дете, вмѣ́сто стыдѣ́нія ва́шего сугу́баго и вмѣ́сто срамоты́, возра́дуется ча́сть и́хъ. Сего́ ра́ди зе́млю свою́ втори́цею наслѣ́дятъ, и весе́ліе вѣ́чное надъ главо́ю и́хъ: Азъ бо е́смь Госпо́дь, любя́й пра́вду и ненави́дяй хище́нія отъ непра́вды. И да́мъ тру́дъ и́хъ пра́ведникомъ, и завѣ́тъ вѣ́ченъ завѣща́ю и́мъ. И позна́ется во язы́цѣхъ сѣ́мя и́хъ, и вну́цы и́хъ посредѣ́ люде́й. Вся́къ ви́дяй и́хъ позна́етъ я́, я́ко сíи су́ть сѣ́мя, благослове́нное отъ Бо́га. И весе́ліемъ возвеселя́тся о Го́сподѣ.

Леви́тскихъ кни́гъ чте́ніе. [Глава́ 26.]

Глаго́ла Госпо́дь сыно́мъ Изра́илевымъ, глаго́ля: а́ще въ повелѣ́ніихъ Мои́хъ хо́дите, и за́повѣди Моя́ сохраните́, и сотворите́ я́: и да́мъ ва́мъ до́ждь во вре́мя его́, и земля́ да́стъ рожде́нія своя́, и древа́ по́льная отдадя́тъ пло́дъ сво́й. И пости́гнетъ ва́съ млаче́ніе, обра́ніе вина́, и вина́ обра́ніе пости́гнетъ сѣ́ятву, и снѣ́сте хлѣ́бъ ва́шъ въ сы́тость, и вселите́ся съ тве́рдостію на земли́ ва́шей. И да́мъ ми́ръ въ земли́ ва́шей, и у́спнете, и не бу́детъ ва́съ устраша́яй. И погублю́ звѣ́ри лю́тыя отъ земли́ ва́шея, и бра́нь не про́йдетъ сквозѣ́ зе́млю ва́шу. И пожене́те враги́ ва́ша, и паду́тъ предъ ва́ми убіе́ни. И пожене́те пя́ть изъ ва́съ сто́, и сто́ ва́съ пожене́те тмы́. И паду́тъ врази́ ва́ши предъ ва́ми мече́мъ. И при́зрю на вы́, и возблагословлю́ вы, и возращу́ вы, и умно́жу вы́, и положу́ завѣ́тъ Мо́й съ ва́ми. И снѣ́сте ве́тхая и ве́тхая ве́тхихъ, и ве́тхая отъ лица́ но́выхъ изнесе́те. И положу́ завѣ́тъ Мо́й въ ва́съ, и не возгнуша́ется душа́ Моя́ ва́ми. И похожду́ въ ва́съ и бу́ду ва́мъ Бо́гъ, и вы бу́дете Мнѣ́ лю́діе. Аще же не послу́шаете Мене́, ниже́ сотворите́ повелѣ́ній Мои́хъ си́хъ, но ни покорите́ся и́мъ, и суде́бъ Мои́хъ вознегоду́етъ ду́ша ва́ша, я́коже ва́мъ не твори́ти всѣ́хъ за́повѣдей Мои́хъ и я́ко разори́ти завѣ́тъ Мо́й. И Азъ сотворю́ си́це ва́мъ: наведу́ на вы́ ску́дость, и сѣ́ете вотще́ сѣ́мена ва́ша, и изъядя́тъ труды́ ва́ша проти́вніи ва́ши. И поста́влю лице́ Мое́ на вы́, и паде́те предъ враги́ ва́шими, и пожену́тъ вы́ ненави́дящіи ва́съ, и побѣ́гнете, никому́же гоня́щу ва́съ. И сокрушу́ досажде́ніе горды́ни ва́шея, и положу́ не́бо ва́мъ я́ко желѣ́зно и зе́млю ва́шу я́ко мѣ́дяну. И бу́детъ вотще́ крѣ́пость ва́ша, и земля́ ва́ша не да́стъ сѣ́мене своего́, и древа́ се́льная не дадя́тъ плода́ своего́. И послю́ на вы́ звѣ́ри ди́вія земны́я, и поядя́тъ ва́съ, и потребя́тъ скоты́ ва́ша, и ума́лены сотворю́ вы́, и погуби́тъ вы́ находя́й ме́чь. И бу́детъ земля́ ва́ша пуста́: и дворы́ ва́ши бу́дутъ пу́сты, я́ко вы́ ходи́сте ко Мнѣ́ страно́ю, и Азъ пойду́ къ ва́мъ въ я́рости страно́ю: глаго́летъ Госпо́дь Бо́гъ, Святы́й Изра́илевъ.

Преподо́бнаго: Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры инди́кта, гла́съ 1. Самогла́сны.

Іоа́нна мона́ха: Наста́ вхо́дъ лѣ́та, созыва́ющь, почита́ти того́ просвѣща́ющія, Калли́сту, Ево́да и Ермоге́на, самобра́тныя страда́льцы, Симео́на равноа́нгельнаго и Іису́са Нави́на, и́же во Ефе́сѣ седмочи́сленныя о́троки и четверодесятосвѣ́тлый святы́хъ же́нъ ли́къ. Ихже па́мятемъ пріобща́ющеся, празднолю́бцы, возопіи́мъ благоче́стно: Го́споди, благослови́ дѣла́ ру́къ Твои́хъ и сподо́би ны́ до́брѣ преити́ лѣ́та обхожде́нія.

Сти́хъ: Тебѣ́ подоба́етъ пѣ́снь, Бо́же, въ Сіо́нѣ, и Тебѣ́ возда́стся моли́тва во Іерусали́мѣ.

Христе́ Бо́же на́шъ, Иже му́дростію вся́ содѣ́явый и изъ не су́щихъ во е́же бы́ти приведы́й, благослови́ вѣне́цъ лѣ́та, и гра́ды на́ша сохраня́й невре́дны, Благовѣ́рнаго же Импера́тора на́шего си́лою Твое́ю возвесели́, побѣ́ды дая́ Ему́ на сопоста́ты, Богоро́дицы ра́ди, да́руя мíру ве́лію ми́лость.

Гла́съ 2:

Сти́хъ: Испо́лнимся во благи́хъ до́му Твоего́, свя́тъ хра́мъ Тво́й, ди́венъ въ пра́вдѣ.

Кипріа́ново: Ди́венъ еси́, Бо́же, и чу́дна дѣла́ Твоя́, и путіе́ Твои́ неизслѣ́дими: еси́ бо Му́дрость Бо́жія, и Ѵпоста́сь соверше́нна, и Си́ла, Собезнача́ленъ же и Соприсносу́щенъ, и содѣ́тельною всеси́льною вла́стію въ мíръ прише́лъ еси́, ища́ е́же удобри́ти созда́ніе Твое́, неизрече́ннѣ отъ неискусому́жныя Ма́тере, не превра́щся Божество́мъ, завѣща́въ уста́вы и лѣ́та во спасе́ніе на́ше неизмѣ́нне. Сего́ ра́ди вопіе́мъ Ти́: Благíй Го́споди, сла́ва Тебѣ́.

Сти́хъ: Благослови́ши вѣне́цъ лѣ́та бла́гости Твоея́, Го́споди.

Дамаски́ново: Иже въ му́дрости вся́ содѣ́тельствовавый, Превѣ́чное Сло́во Отчее, и вся́ческую тва́рь всеси́льнымъ сло́вомъ Твои́мъ соста́вивый, благослови́ вѣне́цъ лѣ́та бла́гости Твоея́ и е́реси низложи́, Богоро́дицы ра́ди, я́ко Бла́гъ и Человѣколю́бецъ.

Сла́ва, свята́го, гла́съ 5:

Преподо́бне о́тче, добру́ изобрѣ́лъ еси́ лѣ́ствицу, е́юже возше́лъ еси́ на высоту́, ю́же обрѣ́те Илія́ колесни́цу о́гненну. Но о́нъ у́бо восхо́да ины́мъ не оста́ви, ты́ же и по сме́рти и́маши сто́лпъ тво́й. Небе́сный человѣ́че, земны́й а́нгеле, свѣти́льниче неусы́пный вселе́нныя, Симео́не преподо́бне, моли́ е́же спасти́ся душа́мъ на́шимъ.

И ны́нѣ, инди́кта, гла́съ то́йже.

Іоа́нна мона́ха: Ты́, Царю́, сы́й при́сно и пребыва́яй и во вѣ́ки безконе́чныя, пріими́ моле́ніе грѣ́шныхъ, прося́щихъ спасе́нія, и пода́ждь, Человѣколю́бче, земли́ Твое́й благопло́діе, благорастворе́ны возду́хи да́руя. Благовѣ́рнѣйшему Импера́тору спобо́рствуй на безбо́жныя ва́рвары, я́коже иногда́ Дави́ду, я́ко пріидо́ша сíи во оби́тели Твоя́ и всесвято́е мѣ́сто оскверни́ша, Спа́се. Но Ты́ да́руй побѣ́ды, Христе́ Бо́же, моли́твами Богоро́дицы, Побѣ́да бо Ты́ правосла́вныхъ и Хвала́.

Тропа́рь инди́кта, гла́съ 2:

Всея́ тва́ри Содѣ́телю, времена́ и лѣ́та во Свое́й вла́сти положи́вый, благослови́ вѣне́цъ лѣ́та бла́гости Твоея́, Го́споди, сохраня́я въ ми́рѣ Импера́тора и гра́дъ Тво́й, моли́твами Богоро́дицы, и спаси́ ны.

Сла́ва, преподо́бнаго, гла́съ 1:

Терпѣ́нія сто́лпъ, бы́лъ еси́, ревнова́вый пра́отцемъ, преподо́бне: Іову во страсте́хъ, Іо́сифу во искуше́ніихъ, и безпло́тныхъ жи́тельству, сы́й въ тѣлеси́, Симео́не, о́тче на́шъ, моли́ Христа́ Бо́га спасти́ся душа́мъ на́шимъ.

И ны́нѣ, Богоро́дицы, гла́съ то́йже:

Ра́дуйся, обра́дованная Богоро́дице Дѣ́во, приста́нище и предста́тельство ро́да человѣ́ческаго, изъ Тебе́ бо воплоти́ся Изба́витель мíра, еди́на бо еси́ Ма́ти и Дѣ́ва, присноблагослове́нная и препросла́вленная, моли́ Христа́ Бо́га ми́ръ дарова́ти все́й вселе́ннѣй.


НА УТРЕНИ,
На Бо́гъ Госпо́дь: тропа́рь инди́кта, два́жды. Сла́ва, преподо́бнаго. И ны́нѣ, Богоро́дицы.

По 1-й стихоло́гіи сѣда́ленъ инди́кта, гла́съ 4. Подо́бенъ: Удиви́ся Іо́сифъ.

Яко Влады́цѣ всѣ́хъ и Пода́телю благи́хъ, Тебѣ́ припа́даемъ вѣ́рно, вопію́ще прилѣ́жно: отъ Твоего́ умоля́емь благоутро́бія, Спа́се, и моли́твами Ро́ждшія Тя́ и всѣ́хъ при́сно благоугожда́ющихъ Тебѣ́, лѣ́то благопрія́тно принести́ Тебѣ́, я́ко Бла́гъ, сподо́би, во дву́ существу́ честву́ющихъ и вѣ́рно сла́вящихъ Тя́.

Сла́ва, преподо́бнаго, гла́съ 8. Подо́бенъ: Прему́дрости.

Кре́стъ Госпо́день взе́мъ, му́дре, и Тому́ до конца́ послѣ́довавъ, умо́мъ не возврати́лся еси́ въ мíръ, богому́дре, воздержа́ніемъ и труды́ стра́сти умертви́въ, и хра́мъ угото́вилъ еси́ себе́ Го́споду твоему́. Тѣ́мже и дарова́ній возме́здіе прія́лъ еси́, исцѣля́ти неду́жныя и ду́хи отгони́ти, Симео́не преподо́бнѣйшій, моли́ Христа́ Бо́га грѣхо́въ оставле́ніе пода́ти пра́зднующимъ любо́вію святу́ю па́мять твою́.

И ны́нѣ, инди́кта: Яко Влады́цѣ всѣ́хъ... Зри́ вы́ше.

По 2-й стихоло́гіи сѣда́ленъ, гла́съ 8. Подо́бенъ: Прему́дрости и Сло́ва.

Воздержа́ніемъ, и труды́, и моли́твами ду́шу твою́ обучи́въ боголѣ́пнѣ, бы́лъ еси́ соприча́стникъ му́ченикомъ, блаже́нне, и чуде́съ и́стинно дарова́нія прія́лъ еси́, исцѣля́ти неду́ги вѣ́рою честву́ющихъ тя́. Тѣ́мже и де́монскія отгоня́еши полки́, на сія́ свы́ше вла́стію да́нною тебѣ́, Симео́не преблаже́нне, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, гла́съ 4. Подо́бенъ: Ско́ро предвари́.

Вошла́ еси́ въ по́двигъ муче́нія вѣ́рно, Калли́сто, проповѣ́дающи со двѣма́ бра́ты, Христа́ Бо́га на́шего, жела́ніемъ бо воспита́на, мы́сленныя сосу́ды и́стинно Христо́вы Це́ркве, соверши́ла еси́ си́хъ. Тѣ́мже сочета́лася еси́ и́мъ, му́ченице, въ вы́шнюю жи́знь.

И ны́нѣ, богоро́диченъ:

Ско́ро пріими́, Влады́чице, мольбы́ на́ша и сія́ принеси́ Твоему́ Сы́ну и Бо́гу, Госпоже́ Всечи́стая, разрѣши́ обстоя́нія къ Тебѣ́ притека́ющихъ, разруши́ навѣ́ты и де́рзости, Дѣ́во, ны́нѣ вооружа́ющихся на рабы́ Твоя́.

( Зри́: Аще е́сть хра́мъ преподо́бного Симео́на:)

[Поліеле́й и велича́ніе:

Ублажа́емъ тя́, преподо́бне о́тче на́шъ Симеоне, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный преподо́бному: Терпя́ потерпѣ́хъ Го́спода, и вня́тъ ми́ и услы́ша моли́тву мою́.]

По поліеле́и сѣда́ленъ преподо́бнаго, гла́съ 8. Подо́бенъ: Прему́дрости.

Превозше́лъ еси́ вѣ́рою, о́тче му́дре, и привре́менная вся́ презрѣ́въ, Христу́ послѣ́довалъ еси́ си́лою ду́ха, воздержа́ніемъ иста́илъ еси́ тѣ́ло твое́, преподо́бне, небе́сную сла́ву при́сно прови́дя. Тѣ́мже и обрѣ́лъ еси́ къ восхо́ду боже́ственному столпа́ лѣ́ствицу, твоего́ жела́нія прили́чну, Симео́не свяще́ннѣйшій. Моли́ Христа́ Бо́га согрѣше́ній оставле́ніе дарова́ти, пра́зднующимъ любо́вію святу́ю па́мять твою́.

Сла́ва, гла́съ 5. Подо́бенъ: Собезнача́льное.

Воздержа́ніемъ житіе́ твое украси́лъ еси́, умертви́въ тѣ́ло твое́, въ ничто́же обрати́лъ еси́ вра́жія прило́ги, о́тче блаже́нне, и преста́вился еси́ къ Бо́гу въ вѣ́чную жи́знь, я́ко досто́инъ наслѣ́дникъ. Тѣ́мже не преста́й моля́ся поми́ловатися душа́мъ на́шимъ.

И ны́нѣ, богоро́диченъ:

Пресвята́я Дѣ́ва, на́съ поми́луй, прибѣга́ющихъ вѣ́рою къ Тебѣ́, Благоутро́бнѣй, и прося́щихъ те́плаго Твоего́ заступле́нія. Мо́жеши бо, я́ко Блага́я, всѣ́хъ спасти́, я́ко су́щи Ма́ти Бо́га Вы́шняго, Ма́терними Твои́ми мольба́ми при́сно умоля́ющи, Богоблагода́тная.

Степе́нна, 1-й антифо́нъ 4-го гла́са. Проки́менъ, [гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Ева́нгеліе [отъ Луки́, зача́ло 24.] Та́же псало́мъ 50-й.

[По 50-мъ псалмѣ́] стихи́ра, [гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.] [1]

Кано́ны 3: Инди́кта, гла́съ 1, со ирмосо́мъ на 6. Творе́ніе ки́ръ Іоа́нна мона́ха. Ирмо́съ по два́жды, тропари́ на 4.
Пѣ́снь 1.

Ирмо́съ: Пои́мъ, вси́ лю́діе, отъ го́рькія рабо́ты фарао́ни Изра́иля Измѣ́ншему и во глубинѣ́ морстѣ́й нога́ми немо́крыми Наста́вльшему, пѣ́снь побѣ́дную, я́ко просла́вися.

Воспои́мъ вси́ Христу́, Имже соста́вишася вся́ческая и въ Не́мже соверши́шася неразлу́чна, я́ко изъ безнача́льнаго ро́ждшуся Бо́га Отца́ ѵпоста́сному Сло́ву, пѣ́снь побѣ́дную, я́ко просла́вися.

Воспои́мъ вси́ Христу́, Отчимъ благоволе́ніемъ я́вльшуся изъ Дѣ́вы и проповѣ́давшу лѣ́то Госпо́дне прія́тно, на́мъ на избавле́ніе, пѣ́снь побѣ́дную, я́ко просла́вися.

Въ Назаре́тъ прише́дъ Пода́тель Зако́на, въ де́нь суббо́тный уча́ше, законополага́я евре́емъ прише́ствія Своего́ неизрече́ннаго, и́мже, я́ко Ми́лостивъ, спаса́етъ ро́дъ на́шъ.

Богоро́диченъ: Пою́ще, вси́ вѣ́рніи, преди́вную Отрокови́цу, Христа́ вселе́ннѣй возсія́вшую и ра́дости вся́ческая испо́лнившую присносу́щныя жи́зни, при́сно восхваля́емъ, я́ко просла́вися.

Инъ кано́нъ святы́хъ же́нъ, на 4, его́же краегране́сіе: Тве́рдыхъ же́нъ му́ченицъ пою́ болѣ́зни. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Тве́рдо на противобо́рца подвиза́стеся, му́ченицы, посто́мъ у́бо пе́рвѣе, второ́е же кро́внымъ страда́ніемъ, сего́ ра́ди ва́ша па́мяти вѣ́рою почита́емъ.

Уязви́вшеся любо́вію на́съ ра́ди Претерпѣ́вшаго Кре́стъ же и сме́рть, Сего́ стопа́мъ послѣ́доваша святы́я жены́, плотску́ю не́мощь забы́вше.

Еллинскія же́ртвы и де́монская водруже́нія ору́жіемъ вѣ́ры низложи́сте и принесо́стеся ко хра́му небе́сному, сосу́ди одушевле́нніи, му́ченицы всечестнíи.

Богоро́диченъ: Укрѣ́пльшеся благода́тію отъ Твоея́ Возсія́вшаго утро́бы, Всенепоро́чная, отрокови́цы дѣ́вы отрази́ша му́къ треволне́ніе и въ слѣ́дъ Тебе́ приведо́шася, ра́дующеся.

Инъ кано́нъ преподо́бнаго, на 4, его́же краегране́сіе: Пріими́ пѣ́ніе, о Симео́не всеблаже́нне. Іоа́нна мона́ха. Гла́съ 8.
Пѣ́снь 1.

Ирмо́съ: Пои́мъ Го́сподеви, вси́ лю́діе, въ мо́ри Чермнѣ́мъ фарао́на погрузи́вшему, побѣ́дную пѣ́снь пою́ще, я́ко просла́вися.

Да́ждь мнѣ́, орга́номъ язы́ка гнилы́мъ, о богоно́се Симео́не, пѣ́снь тебѣ́ плету́щему, мольба́ми твои́ми, зна́нія свѣ́тъ богонауче́нъ.

Позна́ша му́дрость, о́тче, твою́, пе́рсяне, еѳіо́пляне, индíане, и ски́ѳяне и ара́вовъ мно́жество, и просла́виша Христа́, тобо́ю прославля́емаго.

Благода́ти испо́лнився духо́вныя, отъ пасту́шескихъ бо ста́нищъ, я́ко Іа́ковъ, Дави́дъ и Моисе́й, началово́ждь слове́сныхъ яви́лся еси́ па́ствъ, блаже́нне.

Богоро́диченъ: Пречи́стая Богоро́дице, ра́дуйся, Честна́я, невмѣсти́маго Бо́га во утро́бѣ Твое́й вмѣсти́вшая, изба́витися лю́тыхъ испроси́ пою́щимъ Тя́.

Катава́сія: Кре́стъ начерта́въ, Моисе́й впря́мо жезло́мъ Чермно́е пресѣче́, Изра́илю пѣшеходя́щу; то́же обра́тно фарао́новымъ колесни́цамъ, уда́ривъ, совокупи́, вопреки́ написа́въ непобѣди́мое ору́жіе. Тѣ́мъ Христу́ пои́мъ, Бо́гу на́шему, я́ко просла́вися.

Пое́мъ и до отда́нія Честна́го Креста́.

Пѣ́снь 3.

Ирмо́съ: Утверди́ мене́, Христе́, на недви́жимомъ ка́мени за́повѣдей Твои́хъ и просвѣти́ мя свѣ́томъ лица́ Твоего́: нѣ́сть бо свя́тъ па́че Тебе́, Человѣколю́бче.

Утверди́, Бла́же, его́же насади́ любо́вію на земли́ десни́ца Твоя́, плодови́тъ виногра́дъ, сохраня́я Твою́ Це́рковь, Всеси́льне.

Въ дѣ́лѣхъ духо́вныхъ богокра́сныхъ крася́щіяся наста́вшее, Го́споди, лѣ́то сіе́, преведи́, Влады́ко, и́же вѣ́рою Тя́ пѣсносло́вящія, Бо́же вся́ческихъ.

Ти́хій ми́, Христе́, лѣ́тный кру́гъ дава́й, Ще́дре, и насы́ти мя́ слове́съ Боже́ственныхъ Твои́хъ, я́же яви́лся еси́ глаго́ля іуде́емъ въ суббо́тахъ.

Богоро́диченъ: Яко еди́ну преесте́ственно па́че человѣ́ка благода́ть во Твою́ утро́бу пріе́мшую и невра́щно ро́ждшую Христа́ Бо́га на́шего, при́сно Тя́ сла́вимъ.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Крѣ́постію всеси́льною укрѣпля́еми, противобо́рцевъ попра́сте си́лу, сего́ ра́ди я́ко побѣдоно́сицы отъ Христа́ вѣнча́стеся.

Яви́шася звѣ́рская зія́нія Боже́ственною си́лою Христо́вою недѣ́йственна: и изба́вистеся, богоно́сицы, невреди́мы, Бо́га почита́юще.

Воззрѣ́ніемъ къ Бо́гу обожа́еми, многобо́жія хла́дъ отри́нусте и къ теплотѣ́ вы́шнія сла́вы, страстоно́сицы, достиго́сте.

Богоро́диченъ: Зна́юще благоче́стно, проповѣ́даемъ Тя́ всеи́стинную Бо́жію Ма́терь, Всенепоро́чная: Тобо́ю бо на́мъ Созда́тель пріобщи́тися сподо́би.

Инъ.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ и бу́ди на́мъ утвержде́ніе, Тя́ во и́стинѣ призыва́ющихъ .

Ско́ро избѣ́гъ зи́мныя бѣды́ духо́въ, ко спаси́тельнѣй устреми́лся еси́ оби́тели, Симео́не, изъ нея́же и нестарѣ́емую жи́знь прія́лъ еси́.

Приклони́лъ еси́, ра́дуяся, покорли́вый слу́хъ тво́й, всеблаже́нне, Влады́цѣ блажа́щу и блаже́нную обрѣ́лъ еси́ жи́знь.

Сло́ва пріе́мъ сѣ́мена се́рдца твоего́ бразда́ми и сле́зъ напое́ніи, Христу́ умно́женъ кла́съ добродѣ́телей пожа́лъ еси́.

Богоро́диченъ: Неизрече́нно зачала́ еси́, Богоневѣ́сто, Спа́са и Го́спода, избавля́ющаго ны́ отъ лю́тыхъ, Тя́ во и́стинѣ призыва́ющія.

Катава́сія: Же́злъ во о́бразъ та́йны пріе́млется, прозябе́ніемъ бо предразсужда́етъ свяще́нника; неплодя́щей же пре́жде Це́ркви, ны́нѣ процвѣте́ Дре́во Креста́, въ держа́ву и утвержде́ніе.

Конда́къ инди́кта, гла́съ 2:

Въ Вы́шнихъ живы́й, Христе́ Царю́, всѣ́хъ ви́димыхъ и неви́димыхъ Тво́рче и Зижди́телю, Иже дни́ и но́щи, времена́ и лѣ́та сотвори́вый, благослови́ ны́нѣ вѣне́цъ лѣ́та, соблюди́ и сохрани́ въ ми́рѣ Правосла́внаго Импера́тора, и гра́дъ, и лю́ди Твоя́, Многоми́лостиве.

Та́же сѣда́ленъ инди́кта, гла́съ 8. Подо́бенъ: Прему́дрости.

Иже времена́ плодоно́сна и дожди́ съ небесе́ подая́ су́щимъ на земли́, и ны́нѣ, пріе́мля мольбы́ рабо́въ Твои́хъ, отъ вся́кія изба́ви ну́жды гра́дъ Тво́й, щедро́ты бо Твоя́ и́стинно на всѣ́хъ дѣ́лѣхъ Твои́хъ. Тѣ́мже вхо́ды благослови́ и исхо́ды, дѣла́ испра́ви въ на́съ ру́къ на́шихъ и согрѣше́ній проще́ніе да́руй на́мъ, Бо́же: Ты́ бо изъ несу́щихъ вся́ческая во е́же бы́ти, я́ко Си́ленъ, приве́лъ еси́.

Инъ сѣда́ленъ преподо́бнаго, гла́съ и подо́бенъ то́йже:

Земна́я вся́ оста́вивъ и въ мíрѣ сы́й тѣле́снѣ, ду́хомъ бы́лъ еси́ небе́сный а́нгелъ, находя́щія бо стра́сти умертви́въ пло́тію, Тро́ицы яви́лся еси́ уго́дникъ, блаже́нне. Тѣ́мже неду́гующихъ исцѣля́еши стра́сти и сло́вомъ ду́хи отгоня́еши благода́тію, Симео́не преблаже́нне, моли́ Христа́ Бо́га согрѣше́ній проще́ніе дарова́ти честву́ющимъ любо́вію святу́ю па́мять твою́.

Сла́ва, и́нъ сѣда́ленъ святы́хъ же́нъ, гла́съ 1. Подо́бенъ: Гро́бъ Тво́й, Спа́се.

Агницы слове́сныя, Агнцу и Па́стырю приведо́стеся вѣ́рно муче́ніемъ, тече́ніе соверши́вше и вѣ́ру соблю́дше. Тѣ́мъ ра́достно дне́сь восхваля́емъ, досточу́дніи, свяще́нную ва́шу па́мять, Христа́ велича́юще.

И ны́нѣ, богоро́диченъ:

Наста́ви ны́ на пу́ть покая́нія, уклоня́ющіяся при́сно къ злы́мъ безпу́тіемъ и Преблага́го прогнѣ́вающія Го́спода, Неискусобра́чная, Благослове́нная Марíе, прибѣ́жище отча́янныхъ человѣ́ковъ, Бо́жіе обита́лище.

Пѣ́снь 4.

Ирмо́съ: Разумѣ́хъ, Всеси́льне, Твое́ смотре́ніе и со стра́хомъ просла́вихъ Тя́, Спа́се.

Нача́ло Тебѣ́ лѣ́та лю́діе Твои́ прино́сятъ, а́нгельскими пѣ́сньми славосло́вяще Тя́, Спа́се.

Яко Человѣколю́бецъ сподо́би наче́ншимъ лѣ́то и сконча́ти Тебѣ́ благоуго́дно, Христе́.

Вседержи́телю, Еди́не Го́споди, лѣ́тъ обхожде́нія, ути́шивъ, мíру да́руй.

Богоро́диченъ: Яко приста́нище ны́нѣ ду́шъ на́шихъ и тве́рду наде́жду, Богоро́дицу вси́ воспои́мъ.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Претерпѣ́вше му́ки и сокруше́ніе тѣ́ла разли́чными о́бразы, раздробле́ніе же уде́съ и опале́ніе, небе́сная селе́нія наслѣ́довасте, насла́ждшеся дре́ва жи́зни, досточу́дніи.

Дѣви́цъ блаже́нныхъ по́двигу удиви́шася небе́сныя си́лы, я́ко врага́ побѣди́ша въ же́нстѣмъ естествѣ́, укрѣпля́еми си́лою отъ Жены́ Возсія́вшаго.

Отве́ргше мíра суету́ всю́, Бо́гу Еди́ному все́ю душе́ю прилѣпи́стеся, тѣ́мъ воздержа́нія болѣ́зни и страда́нія претерпѣ́сте, невѣ́сты Христо́вы терпѣли́віи.

Прекрѣ́пкое я́ко ору́жіе кре́стъ обнося́ще, къ сопоста́тнымъ противоста́сте ополче́ніемъ, со Христо́мъ же побѣ́ду отнесо́сте, побѣди́вшимъ мíръ си́лою Божества́.

Богоро́диченъ: Сни́де, я́ко до́ждь на руно́, во утро́бу Твою́, богоглаго́ливый дре́вле рече́ проро́къ, Всенепоро́чная, Его́же во дву́ существу́ родила́ еси́, Ему́же взыва́емъ: сла́ва, Христе́, си́лѣ Твое́й.

Инъ.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́ и просла́вихъ держа́ву Твою́, Го́споди.

Не на песцѣ́, преблаже́нне, но на глубоча́йшихъ трудѣ́хъ твои́хъ положи́въ основа́ніе воздержа́нія, добродѣ́телей созда́лъ еси́ сто́лпъ непоколеби́мъ.

Всели́въ тѣ́ло твое́ въ жили́ще же́стоко, стра́хомъ пригвозди́лъ еси́ ду́ха и жили́ще наслѣ́дія боже́ственнаго обрѣ́лъ еси́, преподо́бне.

Укроти́лъ еси́ тѣле́сныя сокрове́нныя стра́сти, пребога́те, въ гнои́ лежа́ черве́й, о́тче, благово́ніе обрѣ́лъ еси́.

По стра́сти во́льнѣй Жизнотвори́вому Мертвецу́ подо́бяся, я́коже гро́бу, ро́ву те́мному са́мъ себе́ жи́ва пре́далъ еси́.

Богоро́диченъ: Бо́га, Его́же родила́ еси́, Пречи́стая Марíе, моли́ всегда́ рабо́мъ Твои́мъ дарова́ти согрѣше́ній проще́ніе.

Катава́сія: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Пѣ́снь 5.

Ирмо́съ: Отъ но́щи у́тренююще, пое́мъ Тя́, Христе́, Отцу́ Собезнача́льна и Спа́са ду́шъ на́шихъ: ми́ръ мíрови пода́ждь, Человѣколю́бче.

Исполня́яй вся́ческая бла́гости, Христе́, Ты́ благорастворе́ніемъ и благопло́діемъ, благослове́ньми вѣнча́емо, многокру́жное лѣ́то рабо́мъ Твои́мъ да́руй.

Лѣ́тное воздая́ніе покажи́ на́мъ преложе́ніе къ лу́чшимъ, ми́рное же устрое́ніе вѣ́дущимъ Тя́, Сло́ве Бо́жій, уподо́бльшася человѣ́комъ.

На зе́млю прише́лъ еси́, Собезнача́льне Отцу́, плѣ́нникомъ отпуще́ніе, слѣпы́мъ же прозрѣ́ніе отъ Отца́ возвѣща́я и вре́мя прія́тно.

Богоро́диченъ: На́ши наде́жды, Богоро́дице Чи́стая, и на́ше жела́ніе на Тя́ возлага́емъ, Ми́лостива на́мъ да́ждь, Дѣ́во, Его́же родила́ еси́.

Инъ.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Яко а́гницы непоро́чныя, я́ко же́ртвы прія́тныя, Агнцу и́стинному и Па́стырю, му́ченицы, принесо́стеся приноше́нія всебога́тая и прія́тна всесожже́нія.

Умерщвле́ни бы́вше тѣ́ломъ, ожи́сте душе́ю, Умертви́вшему крѣ́пость сме́рти, му́ченицы, я́ко уподо́бльшеся, и кресту́, и сме́рти, и стра́сти во́льней.

Еди́нъ ра́зумъ иму́ще въ тѣлесѣ́хъ мно́гихъ, Еди́наго Го́спода Іису́са, разли́чными ра́нами стру́жеми и огне́мъ сожига́еми, исповѣ́даху богому́дрыя.

Богоро́диченъ: Воздви́гни па́дша мя́ въ ро́вѣ искуше́ній и упра́ви, Бо́га Ко́рмчію Ро́ждшая, еди́на Всенепоро́чная, пе́рвѣе соедини́вшаго разстоя́щіяся бла́гостію.

Инъ.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Но́ваго Даніи́ла, Симео́не, Христо́съ тя́ показа́, изъ ро́ва бо звѣ́рска тя́ явле́ніемъ неврежде́на возврати́.

Ве́сь са́мъ себе́ Го́споду возложи́въ, слотѣ́, и мра́зу, и зно́ю проти́внымъ озлобле́ніемъ обнажи́лся еси́.

Но́вый Моисе́й и Илія́ показа́лся еси́, еди́нощи чрезъ всю́ четыредеся́тницу пи́щу пріе́мля во все́й жи́зни твое́й, преподо́бне.

Яко златоза́рнымъ, Симео́не, мони́стомъ, преподо́бне, у́жемъ облага́емь, небоше́ственникъ показа́лся еси́ боже́ственными кри́лы.

Богоро́диченъ: Моли́ при́сно Сы́на Твоего́ и Бо́га на́шего, Неискусобра́чная Марíе Чи́стая, низпосла́ти на́мъ, вѣ́рнымъ, ве́лію ми́лость.

Катава́сія: О, треблаже́нное Дре́во, на не́мже распя́ся Христо́съ, Ца́рь и Госпо́дь, и́мже паде́ дре́вомъ прельсти́вый, Тобо́ю прельсти́вся, Бо́гу пригвозди́вшуся пло́тію, подаю́щему ми́ръ душа́мъ на́шимъ.

Пѣ́снь 6.

Ирмо́съ: Проро́ка спа́слъ еси́ отъ ки́та, Человѣколю́бче, и мене́ изъ глубины́ прегрѣше́ній возведи́, молю́ся.

Житіе́ нача́ти благоуго́дно Тебѣ́, Влады́ко, съ лѣ́тнымъ начина́ніемъ на́съ сподо́би.

Дне́й духо́вныхъ, въ поуче́ніи Зако́на Твоего́, покажи́ испо́лнены, ще́дре Спа́се, пою́щія Тя́.

Богоро́диченъ: Ро́ждшая Го́спода, Богоро́дице Всенепоро́чная, изба́ви отъ бѣ́дъ вѣ́рою пою́щія Тя́, Пречи́стая.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Разраже́на и нога́ми же́нскими попира́ема, зря́щи прама́терь, боже́ственнѣ ра́дуется, ту́ю ле́стію изъ рая́ пе́рвѣе изгна́вшего.

Воздержа́ніемъ къ страда́нію усе́рдно совоку́пльшеся, Жениху́ ду́шъ ны́нѣ нетлѣ́ннѣ совокупи́стеся, и въ черто́зѣ Боже́ственнѣмъ, ра́достною душе́ю водворя́етеся.

Возвыша́емая му́къ сверѣ́пая волне́нія, му́ченицъ корабле́й потопи́ти не возмого́ша: держа́вною бо руко́ю къ Боже́ственнымъ приста́нищемъ достиго́ша.

Богоро́диченъ: Глаго́ловъ Твои́хъ сбытія́ зря́щи, возвели́чи наипа́че, Богома́ти, Тя́ Возвели́чившаго, ро́ди бо вси́ Тя́ ны́нѣ и́стинно ублажа́ютъ.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Зна́меній и чуде́съ тя́ Христо́съ самодѣ́теля показа́, Боже́ственнаго, блаже́нне, дѣ́йства прія́тно жили́ще.

Возне́слъ еси́ тѣ́ло твое́, Симео́не, я́ко на кре́стъ, на сто́лпъ. Тѣ́мъ спросла́вился еси́ на Дре́во тебе́ ра́ди возне́сшемуся Христу́.

Вы́шнее ше́ствіе обрѣ́тъ, Симео́не чу́дне, къ высотѣ́ небе́снѣй пою́щія тя́ вѣ́рно возведи́.

Богоро́диченъ: Го́ру, Юже прови́дѣ Даніи́лъ, изъ Нея́же несѣко́мый Ка́мень вѣ́ры отсече́ся — Христо́съ, Тя́ познава́емъ.

Катава́сія: Во́днаго звѣ́ря во утро́бѣ дла́ни Іо́на крестови́дно распросте́ръ, спаси́тельную стра́сть прообража́ше я́вѣ; тѣ́мъ, тридне́венъ изше́дъ, премíрное Воскресе́ніе прописа́ше, пло́тію пригвожде́ннаго Христа́ Бо́га, и тридне́внымъ Воскресе́ніемъ мíръ просвѣ́щшаго.

Конда́къ преподо́бнаго Симео́на, гла́съ 2:

Вы́шнихъ ища́й, вы́шнимъ совокупля́яйся и колесни́цу о́гненную сто́лпъ содѣ́лавый, тѣ́мъ собесѣ́дникъ а́нгеломъ бы́лъ еси́, преподо́бне, съ ни́ми Христу́ Бо́гу моля́ся непреста́нно о всѣ́хъ на́съ.

Икосъ:

Симео́ново непоро́чное житіе́ кíй язы́къ человѣ́чь довлѣ́етъ когда́ къ похвалѣ́ исповѣ́дати? Оба́че воспою́, Бо́жіею му́дростію, до́бляго сего́ исполи́на страда́ніе же и по́двиги, я́же на земли́, я́ко свѣти́льника я́вльшася всѣ́мъ человѣ́комъ, мно́гимъ терпѣ́ніемъ въ ли́цѣ а́нгельстѣмъ возсія́вша, съ ни́ми бо поя́ непреста́нно Христу́, воздержа́ніемъ чистоту́ стяжа́, моля́ся непреста́нно о всѣ́хъ на́съ.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но посреди́ пла́мене стоя́ще поя́ху: отце́въ Бо́же, благослове́нъ еси́.

Начина́ющіи лѣ́то, и пѣ́сней нача́токъ сотворя́емъ ца́рствующему Христу́, Ца́рствомъ безконе́чнымъ, правосла́вніи лю́діе, благоче́стно пою́ще: отце́въ Бо́же, благослове́нъ еси́.

Сы́й пре́жде вѣ́къ, на вѣ́къ же и еще́ Госпо́дь, воспѣва́ющимъ Тя́, Христе́, Исто́чникъ бла́гости, благи́хъ Твои́хъ даро́въ лѣ́то сіе́ испо́лни: отце́въ Бо́же, благослове́нъ еси́.

Богоро́диченъ: Яко раби́ Влады́цѣ, на моли́тву Чи́стую Ма́терь Твою́ Тебѣ́ предлага́емъ, Христе́, отъ вся́каго обстоя́нія лю́ди Твоя́, Бла́же, изба́вити, пою́щія: отце́въ Бо́же, благослове́нъ еси́.

Инъ.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Ко́ль непобѣди́мо твое́ мудрова́ніе, Амму́не богоно́се: и́бо, нача́льникъ ли́ка дѣ́въ, му́къ не убоя́лся еси́, съ ни́ми скончева́яся, я́ко діа́конъ и таи́нникъ боже́ственныя сла́вы, пѣ́лъ еси́: препѣ́тый Го́споди, Бо́же оте́цъ, благослове́нъ еси́.

Яко невѣстоводи́тель му́дръ, словесы́ помазу́еши му́жества, къ Жениху́ взира́ти и плотскíя терпѣ́ти болѣ́зни, зову́щія му́ченицы: препѣ́тый Го́споди, Бо́же оте́цъ, благослове́нъ еси́.

Да не облѣни́мся, се́ отве́рзеся три́знище, отрокови́цы, ста́немъ му́жески, Христо́съ вѣнцы́ простира́етъ, тѣ́ла на́шего не пощади́мъ, вопія́ху до́бліи на три́знищи: препѣ́тый Го́споди, Бо́же оте́цъ, благослове́нъ еси́.

Богоро́диченъ: Благослове́нъ Пло́дъ благослове́ннаго чре́ва Твоего́, Его́же благословя́тъ небе́сныя си́лы и человѣ́честіи собо́ри, на́съ Изба́вльшаго кля́твы дре́внія, Благослове́нная.

Инъ.

Ирмо́съ: Отроцы благочести́віи въ Вавило́нѣ о́бразу злато́му не поклони́шася, но, посредѣ́ пе́щи о́гненныя ороша́еми, пѣ́снь воспѣва́ху, глаго́люще: превозноси́мый отце́въ и на́съ Бо́же, благослове́нъ еси́.

Разрѣши́лъ еси́ у́бо сухоту́ недоумѣ́ющимся, и врата́ тѣ́мъ дожде́вныя отве́рзлъ еси́, и зе́млю коле́блющуюся моли́твами уста́вилъ еси́, и лю́ди зва́ти научи́лъ еси́: благослове́нъ Бо́гъ отце́въ на́шихъ.

Яко велича́йшій свѣти́льникъ церко́вный и многосвѣ́тлое, Симео́не, со́лнце, всю́ду лучи́ испуща́я, просвѣти́лъ еси́ и лю́ди зва́ти научи́лъ еси́: благослове́нъ Бо́гъ отце́въ на́шихъ.

Во́ды отвсю́ду стеко́шася, уго́дниче Христо́въ, человѣ́ковъ пучи́на во огра́дѣ твоего́ собра́ся воздержа́нія, отъ тебе́ вопи́ти наказу́еми: благослове́нъ Бо́гъ отце́въ на́шихъ.

Дре́вле у́бо ста́рца объя́тіи, скрижа́льми же твоего́ се́рдца, преподо́бне, неви́димою си́лою, Христо́съ упоко́ися, Симео́не. Тѣ́мже взыва́лъ еси́: благослове́нъ Бо́гъ отце́въ на́шихъ.

Богоро́диченъ: Подоба́ше безсѣ́менно Вопло́щшемуся изъ Тебе́ проити́, Дѣ́во Чи́стая, Ты́ бо яви́лася еси́ чистото́ю всѣ́хъ пребо́льши, Ему́же, вопію́ще, пѣ́сньми зове́мъ: благослове́нъ Бо́гъ отце́въ на́шихъ.

Катава́сія: Безу́мное велѣ́ніе мучи́теля злочести́ваго лю́ди поколеба́, ды́шущее преще́ніе и злохуле́ніе богоме́рзкое; оба́че три́ о́троки не устраши́ я́рость звѣ́рская, ни о́гнь снѣда́яй, но, противоды́шущу росоно́сному Ду́ху, со огне́мъ су́ще, поя́ху: препѣ́тый отцевъ и на́съ Бо́же, благослове́нъ еси́.

Пѣ́снь 8.

Ирмо́съ: Пѣсносло́вцы въ пещи́ спа́сшаго дѣ́ти и громопла́менную прело́жшаго на ро́су, Христа́ Бо́га по́йте и превозноси́те во вся́ вѣ́ки.

Яко Нача́льнику спасе́нія, Христе́, нача́токъ Тебѣ́ прино́ситъ лѣ́тный честна́я Це́рковь, зову́щи: по́йте и превозноси́те Христа́ во вѣ́ки.

Изъ не су́щихъ вся́ческая му́дрѣ обнови́вшаго Созда́теля и производя́щего време́нъ обраще́нія хотѣ́ніемъ, по́йте и превозноси́те Его́ во вѣ́ки.

Изводя́щему вся́ческая Бо́гу и времена́ измѣня́ющему, на многообра́зное человѣ́ковъ управле́ніе, пое́мъ: хвали́те и превозноси́те Христа́ во вѣ́ки.

Богоро́диченъ: Богома́терь Дѣ́ву Чи́стую, лѣ́тъ обхожде́ньми же и обраще́ньми, правосла́вно, человѣ́честіи собо́ри, пое́мъ Тя́, я́ко Богоро́дицу и всѣ́хъ спасе́ніе.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Свѣ́тлы себѣ́ отъ крове́й ри́зы му́ченическихъ обложи́сте, совле́кшеся и́стинно тлѣ́емаго грѣха́ми человѣ́ка и воспѣва́юще: Го́спода по́йте, дѣла́, и превозноси́те Его́ во вся́ вѣ́ки.

Оби́льнаго свѣ́та свѣтоли́тіями, Со́лнца мы́сленнаго Боже́ственными свѣтлостьми́, му́ченицы, освѣща́еми, но́щь претеко́сте безбо́жія, пою́ще единомышле́ніемъ души́: Го́спода по́йте, дѣла́, и превозноси́те Его́ во вся́ вѣ́ки.

Яко а́гницы, я́ко нескве́рныя ю́ницы, я́ко боже́ственныя голуби́цы, я́ко самово́льная заколе́нія, приведо́стеся, му́ченицы, Зижди́телю, и я́ко же́ртвы непоро́чны, согла́сно пою́ще: Го́спода по́йте, дѣла́, и превозноси́те Его́ во вся́ вѣ́ки.

Повелѣ́ніемъ мучи́телей пребеззако́нныхъ непра́ведную подъя́сте сме́рть, на у́ды ссѣца́еми, па́лицами сокруша́еми, неми́лостивнѣ біе́ми, огне́мъ всесожига́еми, мече́мъ посѣка́еми; тѣ́мъ безсме́ртная прія́сте съ ра́достію бога́тная воздая́нія.

Богоро́диченъ: Во слѣ́дъ Тебе́ теко́ша жены́, Мѵ́ра благово́ннаго вѣ́дуще, Всечестна́я Богоневѣ́сто, еди́на Неискусобра́чная, изъ утро́бы Твоея́ возсія́вшаго Единоро́днаго Сы́на, и съ Тобо́ю ца́рствуютъ и́стинно, пѣсносло́вяще Христа́ во вѣ́ки.

Инъ.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Отъ вся́каго отлучи́вся пристра́стія и ма́терію не́мощь уще́дривъ, я́ко живѣ́й яви́лся еси́ по сме́рти: Го́спода по́йте и превозноси́те Его́, вопія́, во вѣ́ки.

Юношу стя́гнулъ еси́ разсла́блена и о́дръ Фи́ларху повелѣва́еши на ра́му нести́, свяще́ннѣйше, вопія́: Го́спода по́йте и превозноси́те Его́ во вся́ вѣ́ки.

Благослови́мъ Отца́ и Сы́на и Свята́го Ду́ха, Го́спода.

Уясни́вый Іова стра́стію, согни́вшія пло́ти твоея́ гни́лость, въ би́серъ претвори́ многоцѣ́ненъ, тя́, Христо́въ уго́дниче Симео́не, Сла́вяй во вся́ вѣ́ки.

И ны́нѣ, богоро́диченъ: Отъ а́нгела ра́дость пріе́мшую, и ро́ждшую Го́спода сла́вы, и свѣ́тъ мíру возсія́вшую, вси́ Тя́ пое́мъ, Дѣ́во Богоро́дице, во вся́ вѣ́ки.

Та́же: Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Катава́сія: Благослови́те, о́троцы, Тро́ицы равночи́сленніи, Содѣ́теля Отца́ Бо́га, по́йте снизше́дшее Сло́во, и о́гнь въ ро́су претво́ршее и превозноси́те всѣ́мъ жи́знь подава́ющаго Ду́ха Всесвята́го во вѣ́ки.

Іере́й же, покади́въ святу́ю трапе́зу, возгласи́тъ: Богоро́дицу и Ма́терь Свѣ́та въ пѣ́снехъ возвели́чимъ. И покади́въ святы́й олта́рь и всю́ Це́рковь, и бра́тію, е́же повсегда́ на 9-й пѣ́сни у́трени не оставля́ется. Мы́ же стихослогису́емъ 9-ю пѣ́снь, пою́ще велегла́сно, на гла́съ 6: Вели́читъ душа́ моя́ Го́спода... Припѣва́емъ же: Честнѣ́йшую херуви́мъ... [На 9-й бо пѣ́сни, я́ко а́ще нѣ́сть пра́здникъ Госпо́дскій, то́ всегда́, а́ще и вели́кое славосло́віе, или́ хра́мъ свята́го ко́его бу́детъ, стихологису́емъ Честнѣ́йшую...]

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная, и ны́нѣ на на́съ напа́стей свирѣ́пѣющую угаси́ти мо́лимся пе́щь: да Тя́, Богоро́дице, непреста́нно велича́емъ.

Сло́во Бо́жіе и Си́ла, и́стинная Му́дрость и ѵпоста́сная, содержа́щая и пра́вящая вся́ческая му́дрѣ, и ны́нѣ наста́вшее рабо́мъ Твои́мъ вре́мя, во устрое́ніи ти́сѣ произведи́.

Вся́ дѣла́ Твоя́, Го́споди: небеса́, земля́, свѣ́тъ и мо́ре, во́ды и вси́ исто́чницы, со́лнце же, луна́ и тма́, звѣ́зды, о́гнь, человѣ́цы и ско́ти, со а́нгелы восхваля́ютъ Тя́.

Еди́нъ еси́ Превѣ́чный, я́ко Творе́цъ вѣко́въ, и ца́рствующее тріѵпоста́сное Еди́но Божество́ нераздѣ́льное, мольба́ми Чи́стыя Богома́тере лѣ́то плодоно́сно наслѣ́дію Твоему́ покажи́.

Богоро́диченъ: Спа́се всего́, и Строи́телю, и Зижди́телю, и Вседержи́телю тва́ри, мольба́ми безсѣ́менно Ро́ждшія Тя́, ми́ръ мíру Твоему́ пода́ждь, соблюда́я Це́рковь всегда́ немяте́жну.

Инъ.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́, тѣ́мъ Тя́ вси́ велича́емъ.

Подаю́тъ исцѣле́ній то́ки тре́бующимъ, я́ко отъ исто́чника Всеблаже́нныя, уставля́ютъ па́губу неду́говъ и страсте́й отгоня́ютъ зно́й, сердца́ боголюби́выхъ напая́ютъ къ благопло́дію боже́ственныхъ дѣ́яній.

Боже́ственный діа́конъ Амму́нъ, Келси́на же, и къ си́мъ четы́редесять боже́ственныя и богому́дрыя жены́, пострада́вше зако́нно, вѣнча́шася и ны́нѣ со а́нгелы лику́ютъ, я́же по до́лгу ублажа́емъ.

Вознесо́стеся, держа́ву на враги́ взе́мше, и а́нгеломъ уподо́бистеся, дре́ва наслажда́етеся невозбра́нно жи́зненнаго въ раи́, богоневѣ́сты, исто́чникъ ны́нѣ до́брыхъ прія́сте, о мíрѣ моля́щеся.

Богоро́диченъ: Му́дрости вмѣсти́лище па́че ума́ лу́чшаго яви́лася еси́, Отрокови́це непоро́чная, одушевле́нъ Престо́лъ же и две́рь; тѣ́мъ я́ко Цари́цу возлюби́ша дѣ́вы Тя́, Дѣ́во, въ слѣ́дъ Тебе́ приведо́шася, Богоотрокови́це.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́ Рождество́ Приснодѣ́вы въ на́ше, вѣ́рныхъ, спасе́ніе пѣ́сньми немо́лчными велича́емъ.

Воцари́вшася надъ страстьми́ терпѣ́ніемъ, Христо́съ тя́ прія́тъ, Симео́не богоно́се, Своему́ о́бщника Ца́рству: тѣ́мъ тя́ пѣ́сньми почита́емъ.

Цѣле́бнѣй благода́ти сподо́бився отъ некра́домыхъ Ду́ха сокро́вищъ, богоно́се Симео́не, исцѣле́нія подае́ши торжеству́ющимъ па́мять твою́.

Возше́дъ, преподо́бне, небе́снаго тече́нія на добродѣ́тельный возду́хъ, страда́ньми препоя́санъ, возлетѣ́въ къ ски́ніямъ небе́снымъ, моли́ спасти́ся душа́мъ на́шимъ.

Богоро́диченъ: Купина́, горя́щая огне́мъ и неопаля́ема, яви́лася еси́, о Влады́чице, заче́нши безсѣ́менно Бо́га и Спа́са мíра, Его́же непреста́нно велича́емъ.

Катава́сія: Та́инъ еси́, Богоро́дице, ра́й, невоздѣ́ланно возрасти́вшій Христа́, Имже кре́стное живоно́сное на земли́ насади́ся Дре́во. Тѣ́мъ, ны́нѣ возноси́му, покланя́ющеся Ему́, Тя́ велича́емъ.

Другíй [ирмо́съ]: Снѣ́дію дре́ва ро́ду прибы́вшая сме́рть Кресто́мъ упраздни́ся дне́сь, и́бо прама́терняя всеро́дная кля́тва разруши́ся Прозябе́ніемъ Чи́стыя Богома́тере, Юже вся́ си́лы небе́сныя велича́ютъ.

Свѣти́ленъ инди́кта. Подо́бенъ: Ученико́мъ.

Бо́же бого́въ и Го́споди, тріѵпоста́сное Естество́, Непристу́пне, Присносу́щне, Несозда́нне и всѣ́хъ Содѣ́телю, Вседержи́телю, Тебѣ́ припа́даемъ вси́ и Тя́ мо́лимъ: настоя́щее лѣ́то сіе́ я́ко Бла́гъ благослови́въ, сохрани́ въ ми́рѣ Импера́тора, и вся́ лю́ди Твоя́, Ще́дре.

Сла́ва, преподо́бнаго. Подо́бенъ то́йже:

Якоже свѣти́ло, преподо́бне, свѣтоно́сное твое́ житіе́ облиста́вшее просвѣти́ подсо́лнечную всю́, чуде́съ луча́ми. Столпо́мъ бо, о́тче, возше́лъ еси́, я́ко лѣ́ствицею, къ Бо́гу, идѣ́же всѣ́хъ жела́ній, Симео́не, коне́чное и́стинно воспрія́тіе е́сть, о на́съ моля́ся, честву́ющихъ Тя́, блаже́нне.

И ны́нѣ, инди́кта. Подо́бенъ то́йже:

Содѣ́телю и Прави́телю всея́ тва́ри сы́й, времена́ и лѣ́та положи́въ въ Твое́й вла́сти, лѣ́тній кру́гъ, благослове́ньми, Ще́дре, бла́гости вѣнча́й, въ ми́рѣ сохраня́я Твоя́ лю́ди невре́дны и цѣ́лы, мо́лимся, моли́твами Ро́ждшія Тя́ и боже́ственныхъ а́нгелъ.

На хвали́техъ стихи́ры самогла́сны инди́кта, на 4. Гла́съ 3.

Іоа́нна мона́ха: Превѣ́чное Сло́во Отчее, Иже во о́бразѣ Бо́жіи сы́й и соста́вивый тва́рь изъ не су́щаго во е́же бы́ти, времена́ и лѣ́та въ Свое́й вла́сти положи́вый, благослови́ вѣне́цъ лѣ́та бла́гости Твоея́, да́руя ми́ръ це́рквамъ Твои́мъ, и побѣ́ды Вѣ́рнѣйшему Импера́тору, благопло́діе же земли́, и на́мъ ве́лію ми́лость.

Гла́съ 4.

Того́же: Ца́рствіе Твое́, Христе́ Бо́же, ца́рство всѣ́хъ вѣко́въ, и влады́чество Твое́ во вся́комъ ро́дѣ и ро́дѣ, вся́ бо му́дростію сотвори́лъ еси́, времена́ и лѣ́та на́мъ предложи́въ. Тѣ́мже, благодаря́ще о всѣ́хъ и за вся́, вопіе́мъ: благослови́ вѣне́цъ лѣ́та бла́гости Твоея́ и сподо́би на́съ неосужде́нно вопи́ти Тебѣ́: Го́споди, сла́ва Тебѣ́.

Андре́я Пи́рскаго: Ше́ствія Твоя́, Бо́же, ше́ствія ве́лія и чу́дна: тѣ́мъ строе́нія Твоего́ си́лу велича́емъ, я́ко Свѣ́тъ отъ Свѣ́та прише́лъ еси́ во окая́нный мíръ Тво́й и пе́рвую погуби́лъ еси́ кля́тву ве́тхаго Ада́ма, я́ко благоволи́лъ еси́, Сло́ве, и на́мъ му́дростію времена́ и лѣ́та положи́лъ еси́, е́же сла́вити вседѣ́тельную Твою́ бла́гость: Го́споди, сла́ва Тебѣ́.

Святы́хъ же́нъ, гла́съ 2.

Ге́рманово: Егда́ стра́стію Твое́ю, Го́споди, вселе́нную утверди́лъ еси́, тогда́ и немощству́ющіи препоя́сашася си́лою, жены́ му́жествоваша на горча́йшаго мучи́теля, и побѣжде́ніе ма́тернее испра́вивше, па́ки въ сла́дости ра́йстѣй бы́ша, въ сла́ву Твою́, ро́ждшагося отъ Жены́, и спа́сшаго ро́дъ человѣ́ческій.

Сла́ва, преподо́бнаго, гла́съ то́йже:

Отъ ко́рене блага́го благíй прозябе́ пло́дъ, и́же отъ младе́нства, свяще́нный Симео́нъ, благода́тію па́че не́же млеко́мъ воспита́нъ, и на ка́мень тѣ́ло возвы́сивъ, къ Бо́гу же превозвы́сивъ ра́зумъ, небе́сное созда́ добродѣ́тельми жили́ще, и съ боже́ственными си́лами лико́внѣ ше́ствуя, Христа́ бы́сть жили́ще, Бо́га и Спа́са ду́шъ на́шихъ.

И ны́нѣ, инди́кта. Гла́съ 8.

Ге́рманово: Неизрече́нною му́дростію соста́вивый вся́ческая, Сло́ве, Христе́ Бо́же, времена́ и лѣ́та на́мъ предложи́вый, дѣла́ ру́къ Твои́хъ благослови́, и вѣ́рнаго Импера́тора си́лою Твое́ю возвесели́, подая́ Ему́ на ва́рвары крѣ́пость, я́ко Еди́нъ Бла́гъ и Человѣколю́бецъ.

Та́же славосло́віе вели́кое.
И по трисвято́мъ тропа́рь инди́кта. Сла́ва, свята́го: И ны́нѣ: Ра́дуйся, Обра́дованная...

Ектеніи́, и отпу́стъ, и ча́съ 1-й. На 1-мъ часѣ́ тропа́рь инди́кта. Сла́ва, свята́го. И ны́нѣ, богоро́диченъ часо́въ. По трисвято́мъ конда́къ инди́кта и свята́го глаго́лемъ премѣня́юще. И про́чая, и соверше́нный отпу́стъ.


НА ЛИТУРГІИ,

Блаже́нна отъ кано́на инди́кта, пѣ́снь 3-я на 4, и преподо́бнаго, пѣ́снь 6-я на 4. По вхо́дѣ тропа́рь, пре́жде инди́кта, и Богоро́дицы: Ра́дуйся, Обра́дованная... и преподо́бнаго. Сла́ва, конда́къ свята́го. И ны́нѣ, конда́къ инди́кта. [Аще же хра́мъ Богоро́дицы: И ны́нѣ, хра́ма Богоро́дицы, инди́кта же конда́къ глаго́ли въ нача́лѣ.] Проки́менъ инди́кта, гла́съ 3: Ве́лій Госпо́дь на́шъ, и ве́лія крѣ́пость Его́, и ра́зума Его́ нѣ́сть числа́. Сти́хъ: Хвали́те Го́спода, я́ко бла́гъ псало́мъ, [Бо́гови на́шему да услади́тся хвале́ніе]. И преподо́бнаго проки́менъ, гла́съ 7: Честна́ предъ Го́сподемъ сме́рть преподо́бныхъ Его́. Апо́столъ къ Тимоѳе́ю, зача́ло 282: Ча́до Тимоѳе́е, молю́ у́бо пре́жде... И преподо́бнаго, къ Колосса́емъ, зача́ло 258: Бра́тіе, облецы́теся у́бо... Аллилу́ія, гла́съ 4: Тебѣ́ подоба́етъ пѣ́снь, Бо́же, въ Сіо́нѣ, [и Тебѣ́ возда́стся моли́тва во Іерусали́мѣ]. Сти́хъ: Благослови́ши вѣне́цъ лѣ́та бла́гости Твоея́, Го́споди. И преподо́бнаго, [гла́съ 6:] Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе Луки́, зача́ло 13: Во вре́мя о́но, вни́де Іису́съ въ Назаре́тъ, идѣ́же бѣ́ воспита́нъ... И преподо́бнаго, Матѳе́я, зача́ло 43: Вся́ Мнѣ́ предана́ су́ть... Прича́стенъ: Благослови́ши вѣне́цъ лѣ́та бла́гости Твоея́, Го́споди. Другíй: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.] Зри́: Дневны́й же Апо́столъ и Ева́нгеліе вычита́емъ на преди́.


(Мрк.) Подоба́етъ вѣ́дати: Аще прилучи́тся пе́рвый де́нь мѣ́сяца Септе́мврія въ недѣ́лю.

Оставля́ется слу́жба святы́хъ же́нъ и пое́тся, егда́ екклисіа́рхъ разсу́дитъ. Пое́тся же воскре́сна слу́жба со возслѣ́дованіемъ инди́кта и преподо́бнаго Симео́на си́це:

На ма́лѣй вече́рни стихи́ры воскре́сны и Богоро́дицы, по обы́чаю. Тропа́рь воскре́сенъ. Сла́ва, и ны́нѣ, богоро́диченъ.

На вели́цѣй вече́рни пое́мъ: Блаже́нъ му́жъ.., каѳи́сму всю́. На Го́споди воззва́хъ: стихи́ры воскре́сны 3, и восто́ченъ [Анато́ліевъ] еди́нъ, и инди́кта три́, и свята́го три́. Сла́ва, инди́кта. И ны́нѣ, богоро́диченъ гла́са. И чте́ній инди́кта два́ и свята́го еди́но. На литíи стихи́ра хра́ма и инди́кта стихи́ры стихо́вныя. Сла́ва, свята́го. И ны́нѣ, инди́кта, пи́сана на хвали́техъ. На стихо́внѣ стихи́ры воскре́сны, по алфави́ту, съ припѣ́вы и́хъ. Сла́ва, свята́го. И ны́нѣ, инди́кта. На благослове́ніи хлѣ́бовъ: Богоро́дице, Дѣ́во, ра́дуйся.., два́жды, и инди́кта еди́ножды. И чте́ніе въ посла́ніихъ апо́стольскихъ.

На у́трени, на Бо́гъ Госпо́дь: тропа́рь воскре́сенъ два́жды. Сла́ва, свята́го. И ны́нѣ, инди́кта. По каѳи́смахъ сѣда́льны воскре́сны съ Богоро́дичны и́хъ и чте́ніе въ толкова́ніихъ ева́нгельскихъ, е́же на ряду́. По непоро́чнахъ тропари́, и ипакои́, и чте́ніе. Степе́нны и проки́менъ гла́са. Вся́кое дыха́ніе... Ева́нгеліе воскре́сное. Воскресе́ніе Христо́во... Псало́мъ 50-й. Стихи́ра воскре́сна. Кано́нъ воскре́сенъ со ирмосо́мъ на 4, и Богоро́дицы на 2, и инди́кта на 4, и свята́го на 4. Катава́сія: Кре́стъ начерта́въ... По 3-й пѣ́сни конда́къ инди́кта и свята́го, и сѣда́ленъ свята́го, два́жды. Сла́ва, и ны́нѣ, инди́кта. И чте́ніе житія́ свята́го Симео́на. По 6-й пѣ́сни конда́къ воскре́сенъ и и́косъ. И чте́мъ про́логъ. На 9-й пѣ́сни пое́мъ Честнѣ́йшую... Свѣти́ленъ воскре́сенъ. Сла́ва, свята́го. И ны́нѣ, инди́кта. На хвали́техъ стихи́ры поскре́сны 4 и инди́кта 3, гла́съ 3: Превѣ́чное Сло́во... съ припѣ́вомъ инди́кта. Та́же самогла́сенъ свята́го, гла́съ 2, съ припѣ́вомъ: Честна́ предъ Го́сподемъ сме́рть преподо́бныхъ Его́. Отъ ко́рене блага́го... Сла́ва, стихи́ра ева́нгельская. И ны́нѣ: Преблагослове́нна еси́... Славосло́віе вели́кое. По трисвято́мъ тропа́рь воскре́сенъ то́чію. Ектеніи́. И отпу́стъ. И оглаше́ніе. И обы́чное исхожде́ніе. И ча́съ 1-й въ притво́рѣ. И коне́чный отпу́стъ.

На часѣ́хъ глаго́лемъ тропа́рь воскре́сенъ. Сла́ва, инди́кта. И ны́нѣ, богоро́диченъ часо́въ. По Отче на́шъ... конда́къ инди́кта. На 3-мъ часѣ́ тропа́рь воскре́сенъ. Сла́ва, свята́го. И ны́нѣ, богоро́диченъ часо́въ. По Отче на́шъ... конда́къ свята́го. Та́кожде и на про́чихъ часѣ́хъ, конда́къ воскре́сенъ и инди́кта и свята́го глаго́лемъ премѣня́юще.

На литургíи блаже́нна воскре́сна гла́са на 4, и отъ кано́на инди́кта, пѣ́снь 3-я на 4, и свята́го, пѣ́снь 6-я на 4. По вхо́дѣ тропа́рь воскре́сенъ, и инди́кта, и свята́го. Конда́къ воскре́сенъ. Сла́ва, свята́го. И ны́нѣ, инди́кта. Проки́менъ, Апо́столъ, Аллилу́ія и Ева́нгеліе, пре́жде инди́кта, воскре́сно же подъ зача́ло, та́же свята́го. Прича́стенъ инди́кта, пото́мъ свята́го.

Примѣчаніе:
[1] См. напр. Анѳоло́гіонъ, съ Бо́гомъ съдержа́й церко́вную слу́жбу избра́нныхъ святы́хъ на ве́сь го́дъ. По чи́ну въсто́чнаго благоче́стія испра́влено и по всему́ и́стиннѣ отъ гре́ческаго преве́дено. Кíевъ: Напеча́тано въ Оби́тели общежи́тельной монастыря́ Пече́рскаго, 1619 г. С. 13-14.

Источникъ: Минíа, мѣ́сяцъ Септе́мврій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 2-17.

/ Къ оглавленію раздѣла /


Наверхъ / Къ титульной страницѣ

0