Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 31-й де́нь.
Святы́хъ апо́столъ Стахíя, Амплíя, [Апе́ллія, Аристову́ла, Нарки́сса, Урва́на] и свята́го му́ченика Епима́ха.

[ВЕЧЕРЪ,]
На Го́споди воззва́хъ: стихи́ры апо́столовъ, гла́съ 1. Подо́бенъ: Всехва́льніи му́ченицы.

Во всю́ протече́ зе́млю* ва́ше спаси́тельное* вѣща́ніе, Госпо́дни апо́столи,* сія́ніемъ благода́ти* озаря́ющее всѣ́хъ сердца́, сла́вніи,* и разоря́ющее пре́лести омраче́ніе.* Тѣ́мже моли́теся* дарова́ти душа́мъ на́шимъ* ми́ръ и ве́лію ми́лость.

Стахíй всеблаже́нный,* Христо́въ проповѣ́дникъ и апо́столъ,* и Апе́ллій чу́дный,* и Аристову́лъ, Урва́нъ,* Амплíй, и боже́ственный Нарки́ссъ,* Тро́ицу Всесвяту́ю проповѣ́давше,* язы́ки просвѣти́ша* и отъ рабо́ты изба́виша,* я́же вѣ́рою вси́ ублажи́мъ.

Свѣти́льницы Христо́вы пресвѣ́тліи,* сосу́ди чистѣ́йшіи,* всю́ зарю Ду́ха вѣ́рою вмѣсти́вше,* церко́вніи столпи́,* небеса́ пресла́вная,* сла́ву Бо́жію повѣ́дающе.* Того́ моли́те* дарова́ти душа́мъ на́шимъ* ми́ръ и ве́лію ми́лость.

Ины стихи́ры му́ченика, гла́съ 4. Подо́бенъ: Яко до́бля.

Дохнове́ніемъ Ду́ха Свята́го, Епима́ше,* жили́ще яви́лся еси́* боже́ственно, сла́вне,* и, отъ Него́ дѣ́йство пріе́мъ врачева́ній,* боля́щимъ бога́тно здра́віе подава́еши,* при́сно зову́щимъ:* Іису́се Жизнода́вче,* Ты́ еси́ весе́ліе же, и сла́ва* Твои́хъ му́чениковъ, и похвала́.

Дерзнове́ніемъ проповѣ́далъ еси́* и́стину, сла́вне,* я́ко Христо́въ во́инъ зако́ннѣйшій,* не убоя́вся судя́щаго я́рости звѣ́рскія,* поклоне́ніе бого́мъ не су́щимъ повелѣ́вша,* его́же посрами́лъ еси́* богодухнове́нными твои́ми словесы́, страстоте́рпче,* и проповѣ́далъ еси́ всѣ́мъ Су́щаго* надъ всѣ́ми Бо́га на́шего.

Яко кра́сны но́ги твоя́,* муче́нія украси́шася* пу́ть проити́ невозвра́тно* и, у́бо сконча́въ тече́ніе твое́,* вѣ́ру соблю́лъ еси́* и вѣне́цъ отъ руки́ Влады́чни прія́лъ еси́.* Его́же моли́ отъ тли́ и бѣ́дъ изба́витися* вѣ́рою творя́щимъ* пречестну́ю па́мять твою́.

Сла́ва, и ны́нѣ, богоро́диченъ. Подо́бенъ то́йже:

Въ зе́млю низве́рженъ бы́хъ,* грѣхи́ умертви́хся,* душе́вными страстьми́ и тѣле́сными,* тѣ́мже тмо́ю покрыва́юся отча́янія.* Но воздви́гни мя́ ны́нѣ,* къ жи́зни нетлѣ́ннѣй наставля́ющи мя́* и вы́шнему оте́честву,* идѣ́же гла́съ чи́стъ пра́зднующихъ,* Пресвята́я Богоневѣ́сто.

Крестобогоро́диченъ:

Агнца, и Па́стыря, Тя́* на дре́вѣ я́ко ви́дѣ* Агница ро́ждшая, рыда́ше* и ма́терски Тебѣ́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 3:

Апо́столи святíи, моли́те ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, му́ченику, гла́съ 4:

Му́ченикъ Тво́й, Го́споди, Епима́хъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

И ны́нѣ, богоро́диченъ или́ крестобогоро́диченъ.



НА УТРЕНИ,
Еди́нъ кано́нъ окто́иха и святы́хъ два́.

Кано́нъ апо́столовъ, его́же краегране́сіе: Вѣ́рно похвалю́ Бо́жія слуги́. Іо́сифъ. Гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Вѣ́рою почита́ющія ва́шу, свяще́нніи благоглаго́ливіи, па́мять и торжеству́ющія ра́достно, страсте́й мглы́ изба́вите и вѣ́чныя ра́дости прича́стники содѣ́лайте.

Стопа́мъ послѣ́дующе Христа́, воплоще́ннаго за милосе́рдіе, пребога́тіи, Сего́ же повелѣ́ніемъ богонача́льнымъ служа́ще, яви́стеся всѣ́хъ заблу́ждшихъ наста́вницы къ благоче́стію.

Стахíя и Амплíя му́драго, и Урва́на, Апе́ллія же, и Нарки́сса, и Аристову́ла, Христо́вы ученики́ бы́вшія, вѣ́рою соше́дшеся, до́лжно ублажи́мъ.

Богоро́диченъ: Явственную го́ру Бо́жію, киво́тъ святы́й и трапе́зу, ста́мну же всезлату́ю, чи́стую Іису́сову пала́ту, Благослове́нную въ жена́хъ ублажи́мъ.

Инъ кано́нъ му́ченика. Гла́съ 4.
Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Воспою́ Тебѣ́, Го́споди Бо́же мо́й, я́ко показа́лъ еси́ на́мъ па́мять му́ченика, озаря́ющу вся́ческая, я́ко еди́нъ Многоми́лостивъ.

Воспою́ Тебѣ́, Го́споди Бо́же мо́й, я́ко непобѣди́ма Твоего́ показа́лъ еси́ му́ченика, побо́рника въ му́ченицѣхъ на безбо́жіе.

Воспою́ Тебѣ́, Го́споди Бо́же мо́й, я́ко дарова́ніи боже́ственными Твоего́ страда́льца украси́лъ еси́, Епима́ха, и че́стію вѣнча́лъ еси́.

Богоро́диченъ: Воспою́ Тебѣ́, Го́споди Бо́же мо́й, я́ко безсѣ́менно изъ утро́бы Дѣ́вы роди́лся еси́, Ея́же ра́ди и спаса́еши вся́, я́ко еди́нъ Многоми́лостивъ.

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Яко кла́съ многопло́денъ, му́дре, яви́лся еси́, сло́вомъ зна́нія, гла́домъ та́ющія вѣ́ры пита́я, Стахíе богоблаже́нне, и пи́щи лу́чшія прича́стники благода́тію содѣ́лавъ си́лою Ду́ха.

Мре́жею язы́ка, благоесте́ственно взе́мъ, улови́лъ еси́ изъ глубины́ ле́сти, апо́столе, и прине́слъ еси́ боже́ственно пи́щу прише́дшему, Нарки́ссе, спасти́ заблу́ждшаго, Царю́ и Влады́цѣ тва́ри.

Поте́клъ еси́, я́коже звѣзда́ отъ восто́ка, устреми́вся и Вретанíйскія гра́ды пости́глъ еси́, Христо́во проповѣ́дуя Ева́нгеліе и просвѣща́я благода́тію, блаже́нне Аристову́ле, вѣ́рно пріе́млющія сло́во твое́.

Богоро́диченъ: Черто́гъ свѣтоно́сенъ Христо́въ и престо́лъ высоча́йшій, Богороди́тельнице, яви́лася еси́, Всенепоро́чная: въ Тебѣ́ бо Еди́нъ почи́въ, на́ша отъя́тъ труды́ и бу́дущую досто́йнымъ угото́ва осла́бу.

Инъ.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Суровство́ нечести́выхъ омрачи́лъ е́сть, всехва́льнымъ Кресто́мъ хваля́ся, непобѣди́мый вѣнцено́сецъ Христо́въ, му́ченикъ Епима́хъ.

Сла́ву презрѣ́въ привре́менную и къ подвиго́мъ совле́кся, ра́довашеся богому́дрый и наслѣ́дникъ Христо́въ, му́ченикъ Епима́хъ.

Богоро́диченъ: Ра́дуйся, Ма́ти Приснодѣ́во, Бо́га Сло́ва во чре́вѣ Твое́мъ вмѣсти́вшая и ро́ждшая воплоще́ннаго я́ко Бо́га ку́пно и Человѣ́ка.

Сѣда́ленъ апо́столовъ, гла́съ 1. Подо́бенъ: Гро́бъ Тво́й, Спа́се.

Протече́ зе́млю честно́е ва́ше вѣща́ніе, просвѣща́ющее ду́ши невѣ́рныхъ человѣ́къ, апо́столи сла́вніи, свяще́нными хода́тайствы ва́шими. Тѣ́мъ дне́сь ра́достно соверша́емъ всечестну́ю и свѣтоза́рную ва́шу па́мять, вѣ́рно веселя́щеся.

Сла́ва му́ченика, гла́съ 3. Подо́бенъ: Боже́ственныя вѣ́ры.

Сто́лпъ одушевле́нъ, Истины свидѣ́тель бы́лъ еси́ во страда́ніи, неви́димыя враги́ побѣди́въ ви́димыми мучи́тели, всеизря́дне, отъ Христа́ вѣне́цъ пріе́мъ. Тѣ́мже зове́мъ ти́: не преста́й моля́ся, сла́вне, дарова́ти на́мъ ве́лію ми́лость.

И ны́нѣ, богоро́диченъ:

Боже́ственнаго естества́ не отлучи́вся, пло́ть бы́въ во чре́вѣ Твое́мъ, но Бо́гъ вочеловѣ́чився и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чную, еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, Нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Облиста́въ на земли́ пра́вды Со́лнце, я́коже лучи́ та́инственныя происпусти́ я́вѣ, Стахíя же и Нарки́сса, Урва́на и Амплíя, Аристову́ла и Апе́ллія, су́щихъ во тмѣ́ просвѣща́ющія.

Крѣ́постію Боже́ственнаго укрѣпля́емь Ду́ха, живу́щія во тмѣ́ сы́ны показа́лъ еси́ свѣ́та, Амплíе апо́столе, соверша́я чуде́съ дѣла́ пресла́вная и упраждня́я де́моновъ полки́.

Во́дъ боже́ственныхъ испо́лненъ, поте́клъ еси́ я́коже струя́, Урва́не, спаси́тельная, го́рькія и непи́тныя во́ды отгоня́я, и напая́я благода́тію благоче́ствующихъ, преблаже́нне, полноту́.

Богоро́диченъ: Яви́лася еси́ а́нгеловъ преиму́щи, Влады́чице: о́нымъ бо Стра́шнаго во утро́бѣ несказа́нно вмѣсти́ти сподо́билася еси́ и на рука́хъ носи́ти я́коже Младе́нца дне́й же и лѣ́тъ древнѣ́йша.

Инъ.

Ирмо́съ: Твоего́ на земли́ явле́нія, Христе́ Бо́же, проповѣ́дуя проро́къ прише́ствіе, съ весе́ліемъ вопія́ше: сла́ва си́лѣ Твое́й, Го́споди.

Безбо́жныхъ неради́въ преще́нія, къ по́двигомъ ополчи́ся, дерзнове́нно вопія́, благосла́вный Епима́хъ: сла́ва си́лѣ Твое́й, Го́споди. [Два́жды.]

Земна́я оплева́въ, сме́ртію Ца́рство наслѣ́дова сла́вный Епима́хъ, вѣ́рно вопія́: сла́ва си́лѣ Твое́й, Го́споди.

Иже со Отце́мъ и Ду́хомъ славосло́вимаго въ вы́шнихъ добропобѣ́дный Епима́хъ на три́знищи Го́спода всѣ́мъ невѣ́дущимъ проповѣ́да.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Па́стыря до́браго богоизбра́нныя о́вцы посреди́ волко́въ отъ Него́ я́вѣ по́слани бы́ша, сія́ укроща́юще и приводя́ще ко огра́дѣ мы́сленнѣй вѣ́рою.

Вели́кій тя́ Андре́й Византíи поста́ви епи́скопа, и́же та́мо вѣ́рно пла́вающія, Стахíе свяще́ннѣйше, и управля́ющаго къ приста́нищемъ ти́химъ Боже́ственною благода́тію.

Якоже многоцѣ́ненъ ка́мень, тя́ имя́ше, краеуго́льный, Ираклíйская честна́я Це́рковь, укрѣпля́юща, Апе́лліе блаже́нне, сію́ сло́вомъ и́стины, тѣ́мъ досто́йно почита́емъ тя́.

Богоро́диченъ: Зачала́ еси́ па́че сло́ва Сло́во и родила́ еси́, Всепѣ́тая, Его́же Оте́цъ изъ чре́ва роди́ пре́жде вѣко́въ, Чи́стая, тѣ́мже я́ко Сего́ Ма́терь Тя́ до́лжно ублажа́емъ.

Инъ.

Ирмо́съ: Просвѣще́ніе Твое́, Го́споди, низпосли́ на́мъ и отъ мглы́ прегрѣше́ній разрѣши́ ны, Бла́же, Тво́й ми́ръ да́руяй.

Защити́вся благода́ти ору́жіемъ Креста́, нечести́вымъ вопія́ше му́ченикъ: ме́чь же и о́гнь не отсѣче́тъ мя́ Христо́вы любве́.

Благосла́вный Епима́хъ, суди́щу предстоя́ беззако́ннующихъ, вопія́ше благоде́рзостнѣ: земли́ и небесе́ бо́зи несотво́ршіи, нечести́віи да поги́бнутъ.

Благосла́вный Епима́хъ, отъ Бо́га вдохну́вся, Отца́, Сло́ва и Свята́го Ду́ха во еди́номъ естествѣ́ невѣ́дущимъ Тро́ицу проповѣ́да.

Богоро́диченъ: Кто́ изрещи́ возмо́жетъ Рождества́ Твоего́, Чи́стая, па́че сло́ва пресла́вный о́бразъ? Естество́мъ бо Бо́га воплоще́нна па́че сло́ва родила́ еси́.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Мо́ря язы́ковъ возмути́вше Боже́ственными восхожде́ніи, спасо́сте дре́вле въ го́рцѣмъ мо́ри пото́пльшіяся и приведо́сте Изба́вителю спа́сшіяся, богоблаже́нніи.

Ми́лости Воли́теля Бо́га проповѣ́далъ еси́ и ле́сти свободи́лъ еси́, боже́ственный Нарки́ссе, ду́ши благочести́выхъ, вели́кій бы́въ, аѳи́нянъ предсѣда́тель и насади́тель садо́въ кра́сныхъ, богоблаже́нне.

Боже́ственный Урва́нъ, сло́во жизното́чное и благода́ть врачева́ній источи́въ, привлече́ лю́ди къ просвѣще́нію боже́ственнаго ра́зума, я́ко подража́тель Воплоти́вшагося и мíръ Спа́сшаго.

Богоро́диченъ: Пое́мъ Тя́, Еюже оправди́хомся, и́же пе́рвѣе осужде́нніи, и совокупи́хомся невеще́ственнымъ служи́телемъ, и рая́ сподо́бихомся, въ жена́хъ благослове́нная, Богора́дованная.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Оста́ви я́же въ мíрѣ и мíръ Епима́хъ, и тѣ́ло му́камъ му́жественно предаде́ за Влады́ку, и Христо́въ наслѣ́дникъ бы́сть.

Упраздни́ и́доловъ ле́сть Епима́хъ и сла́вы сподо́бися и́стинныя, пріе́мъ врачева́ній благода́ть, отъ ни́хже вси́ вѣ́рніи почерпа́емъ.

Пріобщи́вся Христо́вымъ страсте́мъ Епима́хъ си́лою распе́ншагося пло́тію Христа́ Бо́га и вѣнцы́ сла́вы отъ Него́ я́ко вѣ́ренъ прія́тъ.

Богоро́диченъ: Моли́ о рабѣ́хъ Твои́хъ, Дѣ́во Богоро́дице, изъ Тебе́ вопло́щшагося Бо́га на́шего, я́ко Тя́ и еди́ну Предста́тельницу на́шу вѣ́мы.

Конда́къ апо́столовъ, гла́съ 8. Подо́бенъ: Яко нача́тки.

Яко свяще́нная сокро́вища Всесвята́го Ду́ха и Со́лнца Сла́вы сія́нія, по до́лгу воспои́мъ му́дрыя апо́столы, Апе́ллія, Урва́на же и Аристову́ла, Амплíя, Нарки́сса и Стахíя, я́же благода́ть собра́ Бо́га на́шего.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Терпѣ́ніемъ напа́стей изба́вистеся врага́, искуша́ющаго вы́, ту́чами же сло́ва живо́тнаго, сла́вніи апо́столи, ве́сь угаси́сте пла́мень ле́сти, зову́ще: хва́льный и превозноси́мый оте́цъ на́шихъ Бо́же, благослове́нъ еси́.

Пресвѣ́тло и изря́дно совѣща́лъ еси́ и соверше́нно твоя́, Аристову́ле, ученики́, блаже́нне, наказа́лъ еси́, я́ко Ѵпоста́сную Му́дрость имѣ́я, тя́ наказу́ющу хва́льнаго возвѣща́ти отце́въ Бо́га и препросла́вленна.

Вѣ́рныхъ свяще́нное совокупле́ніе свяще́ннѣйшими гла́сы блажи́тъ тя́, Апе́лліе, кончи́ну бо блаже́нну имѣ́лъ еси́, житіе́ же а́нгельское, поя́ всегда́ хва́льнаго отце́въ Бо́га и препросла́вленна.

Богоро́диченъ: Изба́ви ны́ отъ напа́стей, и скорбе́й, и печа́лей разли́чныхъ, и язы́ковъ наше́ствія, Влады́чице Всепѣ́тая, я́ко да Тя́ сла́вимъ и Сы́ну Твоему́ взыва́емъ: хва́льный оте́цъ на́шихъ Бо́же, благослове́нъ еси́.

Инъ.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Со огне́мъ ле́сть попира́я му́жески, Распе́ншемуся добропобѣ́дный вопія́ше Епима́хъ: оте́цъ на́шихъ Бо́же, благослове́нъ еси́.

Не убоя́ся пла́мене, ниже́ звѣре́й ди́віихъ, ниже́ му́къ непобѣди́мый Епима́хъ, зовы́й: оте́цъ на́шихъ Бо́же, благослове́нъ еси́.

Со Отце́мъ Сло́ва и Всесвята́го Ду́ха не вѣ́дущимъ Епима́хъ проповѣ́дуя, взыва́ше: оте́цъ на́шихъ Бо́же, благослове́нъ еси́.

Богоро́диченъ: Неопа́льною купино́ю и росода́тельною пе́щію Ты́ пронаписа́вшаяся, Ма́ти Чи́стая, несказа́нно бо родила́ еси́ воплоще́ннаго Христа́ Бо́га, Благослове́нная.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Въ мíрѣ, я́коже мо́лнія, яви́стеся, богови́дцы, попаля́юще у́бо ле́сть, пою́щія же, сы́ны дне́ показу́юще, и вопію́щія: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.

Сла́дкою со́лію твои́хъ, Амплíе, уче́ній ле́сти гни́лость очи́стилъ еси́. Тѣ́мже, чту́ще тя́, пое́мъ: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.

Да пое́тся Стахíй сла́вный и Амплíй, Апе́ллій же и Нарки́ссъ, Урва́нъ же и всему́дрый, вопія́й вѣ́рно, Аристову́лъ: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.

Богоро́диченъ: Тя́ и стѣ́ну, и прибѣ́жище, и лѣ́ствицу, къ высотѣ́ преводя́щу человѣ́чество, Всенепоро́чная Чи́стая, вѣ́дяще, зове́мъ: благослови́те вся́ дѣла́ Госпо́дня Го́спода, по́йте и превозноси́те во вся́ вѣ́ки.

Инъ.

Ирмо́съ: Во о́бразѣ а́нгела, я́вльшагося въ пещи́ о́гненнѣй пѣсносло́вцемъ, Христа́ Бо́га по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Побѣди́теля ле́сти показа́вшаго и беззако́нныхъ муже́й, вѣнцено́сца Епима́ха, по́йте, о́троцы, свяще́нницы, благослови́те, лю́діе, превозноси́те во вся́ вѣ́ки.

Врача́ страсте́й и неду́говъ, на́мъ Дарова́вшаго, лю́тыхъ, страстоно́сца Епима́ха, по́йте, о́троцы, свяще́нницы, благослови́те, лю́діе, превозноси́те Его́ во вѣ́ки.

На земли́ па́мять Епима́ха, возвели́чившаго Христа́ и Тѣ́мъ исцѣли́вшаго разли́чныя неду́ги, свяще́нніи, по́йте и превозноси́те Его́ во вѣ́ки.

Богоро́диченъ: Неизрече́нно и безсѣ́менно заче́ншую и ро́ждшую Дѣ́ву Христа́ Бо́га на́шего, по́йте, дѣ́ти, свяще́нницы, благослови́те, лю́діе, превозноси́те Ю во вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Да земны́я концы́, испо́лненныя пре́лести борца́ и напо́лненныя омраче́нія безбо́жія, бла́гости свѣ́томъ озари́ши зна́нія Твоя́ спаси́тельныя зари́, Ще́дре, си́мъ посла́лъ еси́.

Яви́лся еси́ тезоиме́нно, сла́вне, спаси́тельный кла́съ, пшени́цу тре́бующимъ нося́щь, утвержде́ніе богоразу́мія подаю́щую и гла́да у́мнаго изыма́ющую, вѣ́рою тя́ и любо́вію, священнопроповѣ́дниче, пою́щимъ.

Уста́ Бо́жія бы́въ, ри́торовъ язы́ки неглаго́ливы показа́лъ еси́ и изъ горта́ни вра́жія, Аристову́ле, извле́клъ еси́ ду́ши, и приве́лъ еси́ Го́споду спасе́ны, соверше́нны позна́ніемъ.

Небеса́ у́бо бы́ша богови́дна живу́ща, Бо́жіи апо́столи, и́же на земли́ чи́сто ва́съ чту́щія и и́скренно вы́ну блажа́щія, прича́стники вѣ́чныя сподо́бите свѣ́тлости.

Богоро́диченъ: Но́сиши вся́ Нося́щаго и млеко́мъ пита́еши всѣ́мъ пи́щу Подаю́щаго. Ве́ліе и стра́шно, е́же па́че ума́, Твое́ та́инство, киво́те честна́го свяще́нія, Дѣ́во Богоро́дице, тѣ́мъ Тя́ вѣ́рою ублажа́емъ.

Инъ.

Ирмо́съ: Тя́, невмѣсти́мое Сло́во во утро́бу вмѣсти́вшую, небе́съ простра́ннѣйшую и херуви́мовъ сла́внѣйшую, Богоро́дице Чи́стая, пѣ́сньми велича́емъ.

Ты́ я́ко возлюби́лъ еси́ соверше́нно и умре́ти за уме́ршаго на́съ ра́ди Христа́. Тѣ́мже отъ Него́ въ вы́шнихъ вво́инился еси́, му́чениче, Его́же со Отце́мъ и Ду́хомъ пѣ́сньми велича́емъ.

Ты́ я́ко на земли́ Спа́са Бо́га исповѣ́далъ еси́ предъ нечести́выми мучи́тели вѣ́рно; ны́нѣ въ вы́шнихъ отъ Него́ предъ а́нгелы, свидѣ́телю Епима́ше, и отъ Отца́ и Ду́ха сла́вою вѣнча́лся еси́.

Богоро́диченъ: Тя́, свѣтоно́сный о́блакъ, и Чи́стую и сла́вную Дѣ́ву и Ма́терь Бо́жію, Моисе́ю я́вльшуюся та́инственно на горѣ́ Сина́йстѣй неопали́мую купину́, въ пѣ́ніихъ велича́емъ.

Свѣти́ленъ. Подо́бенъ: Жены́, услы́шите.

Боже́ственный Аристову́лъ и Стахíй пребога́тый, и Апе́ллій богому́дрый, и Нарки́ссъ, и Амплíй, и Урва́нъ, всему́дріи, ны́нѣ отъ на́съ да почту́тся я́ко Христо́вы апо́столи, и́миже мíръ отъ ле́сти многообра́зныя изба́вися.

Сла́ва, и ны́нѣ, богоро́диченъ:

Яви́лася еси́ преиму́щи херуви́мовъ, Всепѣ́тая, Сѣдя́щаго бо на си́хъ ра́менахъ, Пречи́стая Отрокови́це, на объя́тіихъ Твои́хъ носи́ла еси́ и Младе́нца млекопита́ла еси́. Его́же прилѣ́жно моли́ о на́съ, пою́щихъ Тя́, Богоро́дицу вои́стинну.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 271 об. – 277 об.

/ Къ оглавленію раздѣла /


Наверхъ / Къ титульной страницѣ

0