Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 30-й де́нь.
Святы́хъ му́ченикъ Зино́вія и Зиновíи, сестры́ его́.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Муче́нія кро́вію* оде́жду твою́, Зино́віе, обагри́въ, сла́вне,* соверши́лъ еси́ свяще́ннѣйшу благода́тію,* съ не́юже вше́лъ еси́,* я́ко му́дръ архіере́й, во Свята́я святы́хъ;* же́ртва непоро́чна,* тебе́ ра́ди Поже́ршемуся,* и соверше́нное приноше́ніе пречи́сто* прине́слся еси́, свяще́ннѣйше.

Стру́жему тѣлеси́,* души́ свѣтлѣ́йшая добро́та,* пока́зовашеся краснѣ́йши,* священному́чениче Зино́віе, богому́дре пребога́те,* іера́рховъ добро́та,* страда́льцевъ хвала́,* чуде́съ же при́сный исто́чникъ,* духо́въ нечи́стыхъ прогони́тель,* Христо́въ боже́ственный побо́рникъ.

Спострада́ти тебѣ́ произво́ли* сестра́ единому́дренная тебѣ́,* Зиновíя, прему́дре,* я́же единокро́вная твоя́,* коно́бовъ бо врѣ́нія му́жески претерпѣва́ше,* огня́ преще́ніе и ну́ждную сме́рть.* Тѣ́мже улучи́ съ тобо́ю вѣнцы́ побѣ́ды* и вы́шнее Ца́рство,* священнотаи́нниче Зино́віе.

Сла́ва, гла́съ 6. Іоа́нна мона́ха:

Пѣ́сненный ли́къ воспле́щимъ дне́сь, о мучениколю́бцы, въ па́мяти всеблагочести́выхъ страда́лецъ Зино́вія и Зиновíи, сíи бо Тро́ицы бы́ша побо́рницы и на три́знищи му́жески неви́димаго врага́ честно́ю свое́ю кро́вію удави́ша, и побѣ́ды вѣне́цъ сла́вно прія́ша. Тѣ́мже къ ни́мъ возопіи́мъ: сопру́же святы́й, Го́споду благослове́нная дво́ице и просвѣще́нная, Спа́са моли́ о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

На дре́вѣ Жи́знь на́шу* зря́щи, Всенепоро́чная Богоро́дица, ви́сящу,* ма́терски рыда́ющи, вопія́ше:* Сы́не Мо́й* и Бо́же Мо́й,* спаси́ любо́вію пою́щія Тя́.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, и ны́нѣ, богоро́диченъ или́ крестобогоро́диченъ.



НА УТРЕНИ,
Оба кано́на окто́иха и святы́хъ на 4. Іо́сифъ. Гла́съ 8.

Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, еди́ному Влады́цѣ.

Престо́лу предстоя́ Христо́ву я́ко іере́й благопрія́тенъ и му́ченикъ изря́днѣйшій, Зино́віе треблаже́нне, я́же любо́вію честву́ющія твою́ па́мять свѣтоно́сную, жите́йскихъ изба́ви собла́зновъ.

Заре́ю просвѣща́емь, му́дре, Трисо́лнечнаго Сія́нія, мглу́ разори́лъ еси́ е́ллинскаго злосла́вія, и свѣ́томъ твои́хъ слове́съ вся́ просвѣти́въ, ны́нѣ преше́лъ еси́ къ незаходи́мому сія́нію.

Угль явле́нъ мы́сленный, огне́мъ вжига́емь Боже́ственнаго Ду́ха, всѣ́хъ сердца́ вже́глъ еси́ къ жела́нію боже́ственному, священнотаи́нниче, и пре́лесть попали́лъ еси́ вся́ку.

Богоро́диченъ: Ра́дуйся, пресвяты́й хра́ме, руно́ богоро́сное, запеча́танный исто́чниче, безсме́ртія струя́. Па́ству Твою́, Влады́чице, сохрани́ отъ всѣ́хъ сопроти́вныхъ невоева́ну.

Пѣ́снь 3.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ и бу́ди на́мъ утвержде́ніе, Тя́ во и́стинѣ призыва́ющихъ .

Мѵ́ромъ пома́занія духо́внаго пома́занъ, Зино́віе, свяще́нствовалъ еси́, я́ко а́нгелъ, му́ченическими при кончи́нѣ украси́вся вѣнцы́.

Ду́шъ прирадѣ́ніе пріе́мъ, воздѣ́ланіемъ боже́ственнымъ, преподо́бне, плодоно́сны сія́ показа́лъ еси́, тѣ́мже Госпо́дни ра́дости сподо́бился еси́.

Сестра́ единокро́вная твоя́ тебе́ единому́дренна показа́ся, Зиновíя свяще́ннѣйшая, спострада́ти бо тебѣ́ произво́ли и съ тобо́ю наслади́тися сла́вы вѣ́чныя.

Богоро́диченъ: Тро́ицы Еди́наго родила́ еси́, въ человѣ́чество обле́кшася, Пресвята́я Ма́ти Дѣ́во: Его́же моли́ спасти́ Тя́ воспѣва́ющія.

Сѣда́ленъ, гла́съ 1. Подо́бенъ: Гро́бъ тво́й.

Мѵ́ромъ честны́мъ пома́занъ, яви́лся еси́, преблаже́нне, іере́й Бо́га Вы́шняго, Имже укрѣпля́емь, іера́рше Зино́віе, му́ченикъ бы́лъ еси́ и сограждани́нъ а́нгеловъ. Тѣ́мже дне́сь, всесвяту́ю па́мять творя́ще, пое́мъ тя́.

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ строе́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Всѣ́лъ еси́ на ко́ни, апо́столы Твоя́, Го́споди, и прія́лъ еси́ рука́ма Твои́ма узды́ и́хъ, и спасе́ніе бы́сть ѣжде́ніе Твое́ вѣ́рно пою́щимъ: сла́ва си́лѣ Твое́й, Го́споди.

Возвы́шенъ яви́лся еси́ страда́ніи честны́ми, свяще́ннѣйше, и прія́лъ еси́ вѣнцы́ побѣ́ды, му́дре, и вѣ́чное получи́лъ еси́ ра́дованіе, тѣ́мъ тя́ почита́емъ, о́тче іера́рше Зино́віе.

На дре́вѣ Просте́ршемуся во́лею подо́бяся, воздви́гся, не ужа́слся еси́, Зино́віе, и тлѣ́нія, сла́вне, и умерщвле́нія дебельства́ совле́клся еси́, о́тче, свяще́нниковъ похвало́.

Душа́ твоя́ крѣ́пкая де́монская утвержде́нія низложи́, ка́пища же разсѣдо́шася, твердѣ́йшею вѣ́рою твое́ю потребля́еми, Зино́віе сла́вне, священному́чениковъ похвало́.

Богоро́диченъ: Стра́ннымъ Твои́мъ Рождество́мъ отъ Бо́га устрани́вшіяся къ Нему́ присво́ила еси́, Всепѣ́тая, тѣ́мже велегла́сно Тя́ вси́ сла́вимъ и вопіе́мъ Ти́ вѣ́рою: ра́дуйся, земноро́дныхъ воззва́ніе.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Же́нское естество́ Ду́хомъ укрѣпи́ся и попра́, и́же въ раи́ прама́терь дре́вле запе́ншаго, и Боже́ственныя сла́вы на небесѣ́хъ сподо́бися, дѣ́вствомъ и страда́ньми сія́ющи.

Тучеро́денъ о́блакъ бы́сть язы́къ тво́й, я́ко одождя́ющь благоче́стія до́ждь, и вѣ́рныхъ сердца́ напая́ющь и къ благопло́дію священнодѣ́йственнѣ путеводя́щь добродѣ́тельныхъ, Зино́віе, дѣя́ній.

Дѣ́вства заря́ми сластолю́бія тму́ отгна́ла еси́ и свѣ́томъ страда́ній безбо́жія но́щь потреби́ла еси́, Зиновíе му́ченице, Іису́сова кра́сная невѣ́сто, жили́ще Боже́ственнаго Ду́ха.

Богоро́диченъ: Грѣха́ тя́жкимъ всегда́ обложе́нъ е́смь бре́менемъ, Пречи́стая, и вопію́ Ти: сіе́ хода́тайствомъ Твои́мъ боже́ственнымъ облегчи́, Ты́ бо еси́ предста́тельница грѣ́шниковъ препросла́вленная, Изба́вителя и Спа́са ро́ждши.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Моли́тва боже́ственныя души́ твоея́ прія́та бы́сть, я́ко кади́ло, о́тче: въ воню́ бо благово́нія, преблаже́нне, страда́ній, Зино́віе, поте́клъ еси́, Возсія́вшаго отъ Жены́ и всю́ тва́рь Просвѣ́щшаго.

Кро́вію страда́нія, блаже́нне, освяти́лъ еси́ зе́млю, ду́хъ же на небеса́ возше́дъ, перворо́дныхъ Це́рковь боже́ственнѣ уясни́, Зино́віе, іера́рховъ и му́чениковъ свѣ́тлая похвало́.

Утѣсни́лъ еси́ нече́стіе, блаже́нне, простра́нствомъ и́стиннаго благоче́стія и пути́, въ сіе́ веду́щія, заблу́ждшимъ лю́демъ показа́лъ еси́, и спа́слъ еси́ лю́тѣ потопля́емыя пре́лести вода́ми.

Богоро́диченъ: Украси́ ду́шу мою́, Дѣ́во, безобра́зіемъ страсте́й одержи́мую, и помышле́ньми и́стиннаго покая́нія окая́нное се́рдце мое́ утверди́, и спаси́ мя, на Тя́ несомне́нно, Дѣ́во, надѣ́ющагося.

Конда́къ, гла́съ 8. Подо́бенъ: Яко нача́тки.

Истины свидѣ́тели и благоче́стія проповѣ́дники, дво́ицу досто́йно почти́мъ въ богодухнове́нныхъ пѣ́снехъ, Зино́вія вку́пѣ съ му́дрою Зиновíею, ку́пно жи́вшія и отше́дшія и муче́ніемъ пріи́мшія вѣне́цъ нетлѣ́нный.

Икосъ:

До́бляго и вели́каго Зино́вія пѣ́сньми и пѣ́ніи восхва́лимъ съ до́брою дѣ́вою и нескве́рною Зиновíею, су́щею сострада́лицею, я́ко низложи́ша вра́жія свирѣ́пства и и́дольское безбо́жіе обличи́ша, вѣ́ру же Христо́ву уясни́ша. Тѣ́мже ра́достно прія́тна ны́нѣ вѣне́цъ нетлѣ́нный.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Тече́ніи кро́вными погаси́въ, всеприснопа́мятне, о́гнь безбо́жія, чудесы́ на́съ всегда́ ороша́еши дожде́мъ, Зино́віе, Влады́ку благосло́вящія: благослове́нъ еси́, Го́споди Бо́же, во вѣ́ки.

Въ Боже́ственный мра́къ вше́дъ, Неви́димаго, я́ко мо́щно, ви́дѣлъ еси́, ду́шу и у́мъ просвѣща́юща твою́, му́чениче, благочестивому́дренно пою́щаго: благослове́нъ еси́, Го́споди Бо́же, во вѣ́ки.

Дае́тъ тебѣ́ че́сть Влады́ка, пострада́вшу тве́рдо и низложи́вшу ко́зни вра́жія, и пою́щу велегла́сно: благослове́нъ еси́, Го́споди Бо́же, во вѣ́ки.

Богоро́диченъ: Мѣ́сто, Дѣ́во, яви́лася еси́ свяще́нія, изъ него́же Бо́гъ яви́ся, освяща́я ны́ вѣ́рою, пѣснопою́щія: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Не убоя́лся еси́ меча́, іера́рше, не устраши́лся еси́ бѣ́дъ, не ужа́слся еси́ сме́рти, безсме́ртныя тя́ сла́вы показу́ющія прича́стника.

Священнодѣ́йственникъ та́инъ показа́лся еси́, и себе́ освяти́въ, же́ртва благово́нна бы́лъ еси́, и вы́шнія трапе́зы, Зино́віе, досто́инъ.

Чудодѣ́йствы сія́я, іера́рше, му́ченическими луча́ми свѣ́тло облиста́лъ еси́ и мра́къ пре́лести до конца́ отгна́лъ еси́.

Богоро́диченъ: Не земледѣ́ланный Гро́здъ заче́нши, источа́ющь вино́, Дѣ́во Ма́ти, оставле́нія страсте́й мя́ пія́нства измѣни́, молю́ся.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ Дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Стоя́лъ еси́ предъ суди́лищи, пресла́вне, мучи́телей, воплоще́ніе свѣ́тлымъ гла́сомъ проповѣ́дуя Вседержи́теля, и страда́нія Его́, кре́стъ, и сме́рть, и воскресе́ніе, и́мже спасе́ ны я́ко Человѣколю́бецъ.

О, чудесе́! ка́ко съ пло́тію безпло́тныя враги́ побѣди́? ка́ко низложи́ не́мощію многоко́зненнаго? ка́ко съ небе́сными служи́тели совокупи́тися земны́й подви́гся? его́же чту́ще, благоче́стно велича́емъ.

Тѣлеса́, му́ченицы честнíи, ра́намъ разли́чнымъ разли́чнѣ преда́сте, взира́юще къ вѣ́чному блаже́нству, бра́тскою бо любо́вію дру́гъ дру́гу свя́заны, му́ченическими добро́тами просвѣти́стеся, тѣ́мже ублажа́етеся.

Па́мять дне́сь ва́ша, свѣтозаре́ніемъ сія́ющи Ду́ха, всѣ́мъ просія́, чуде́съ благода́ть облиста́ющи и врачева́ній рѣ́ки оби́льно точа́щи, ю́же пра́зднующе, блажи́мъ вы́, Христо́вы му́ченицы.

Богоро́диченъ: Просвѣти́, две́ре Свѣ́та, се́рдца моего́ о́чи, молю́ся, дале́че отгоня́щи грѣха́ тму́ тяжча́йшую отъ окая́нныя моея́ души́, да велича́ю Тя́, да сла́влю Тя́, да любо́вію Тя́ пою́, Всепѣ́тую.

Свѣти́ленъ. Подо́бенъ: Жены́ услы́шите.

О, чудесе́! ка́ко пе́рстніи, зла́ти естество́мъ, яви́шася? и́бо ни о́гнь, ниже́ ме́чь, ниже́ звѣре́й зу́бы, ни му́ки, ни ра́ны си́хъ повреди́ша, но въ пло́ти безпло́тнаго низложи́вше, Го́споду о на́съ мо́лятся.

Сла́ва, и ны́нѣ, богоро́диченъ:

Стра́шно предста́тельство Твое́, Марíе богокра́сная, и стра́шна Твоя́ сла́ва все́й земли́, Богоро́дице, Тобо́ю бо ны́нѣ хва́лимся, Тя́ и Хода́таицу иму́ще къ Сы́ну и Зижди́телю Твоему́, и неусы́пною моли́твою Твое́ю спаса́емся вси́.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 267 об. – 271.

/ Къ оглавленію раздѣла /


Наверхъ / Къ титульной страницѣ

0