Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 30-й де́нь.
Слу́жба Пресвятѣ́й Богоро́дицѣ ико́ны ра́ди Ея́ Озеря́нскія.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: поста́вимъ стихо́въ 8 и пое́мъ стихи́ры во гла́съ 8:

Арха́нгелъ Гавріи́лъ, отъ него́же Пречи́стую Дѣ́ву восхваля́ти научи́хомся, да предста́нетъ ликостоя́нію на́шему, вку́пѣ же пра́ведная Елисаве́тъ съ на́ми да возгласи́тъ: благослове́на еси́ въ жена́хъ, Богоро́дице, и Твоего́ чре́ва Пло́дъ благослове́нъ е́сть; Его́же умоли́, Влады́чице, дарова́ти душа́мъ на́шимъ ми́ръ и ве́лію ми́лость. [Два́жды.]

Зра́къ лица́ Твоего́, о Влады́чице, си́це вопіе́тъ лю́демъ: пріиди́те, христолю́бцы и пра́ведніи, духо́вную жа́жду серде́цъ ва́шихъ славосло́віемъ Бо́га утоли́те; пріиди́те, грѣ́шніи и маловѣ́рніи, свои́хъ оче́съ къ Нему́ возвести́ не смѣ́ющіи, и Моего́ предста́тельства предъ Ни́мъ проси́те дерзнове́нно, нѣ́сть бо грѣха́, Мою́ ми́лость отъ ка́ющихся отгоня́щаго; пріиди́те, и наде́жду спасе́нія ва́мъ возвращу́ и да́рую душа́мъ ва́шимъ ве́лію ми́лость. [Два́жды.]

Твоего́ милосе́рдія неизслѣ́димую бе́здну вѣ́дуще, Влады́чице, а́ще и я́звы грѣхо́въ мно́гихъ но́симъ, предъ Твои́мъ чудотво́рнымъ о́бразомъ умиле́нно себе́ поверга́емъ и въ покая́ніи Тебѣ́ вопіе́мъ: а́ще и ни еди́наго глаго́ла ко оправда́нію дѣ́лъ на́шихъ и́мамы, но Твои́хъ чудотворе́ній па́мятію сердца́ на́ша слеза́ми покая́нія согрѣва́емъ, ея́же ра́ди пода́ждь на́мъ согрѣше́ній проще́ніе и душа́мъ на́шимъ ве́лію ми́лость. [Два́жды.]

Сла́ва, и ны́нѣ, гла́съ 2:

Отъ пе́рваго Христо́ва чудесе́, е́же на бра́цѣ въ Ка́нѣ Галиле́йстѣй, Богоро́дичо предста́тельство о лю́дехъ наче́нся, до втора́го и стра́шнаго не преста́нетъ прише́ствія. О, ми́лости неизрече́нныя! О, снизхожде́нія благоутро́бнаго! Ка́ко Чи́стая Голуби́ца смра́дныхъ грѣ́шниковъ не возгнуша́ется? Ка́ко тѣ́хъ воздыха́нія ма́терски пріе́млетъ? Дерза́йте у́бо, бра́тіе, и моле́нія ва́ша къ Не́й умножа́йте; е́сть бо на́ше защище́ніе Пресвята́я Дѣ́ва, его́же врази́ одолѣ́ти не мо́гутъ, я́ко Тоя́ послу́шаетъ Христо́съ Бо́гъ и Спа́съ ду́шъ на́шихъ.

[Вхо́дъ. Проки́менъ дне́.] Паримíи Богоро́дичны.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ра, гла́съ 1:

Подоба́ше Озеря́нскому Влады́чицы на́шея о́бразу посредѣ́ вели́каго гра́да Ха́рькова утверди́тися, да мно́жество люде́й Тоя́ подно́жію покланя́тися навы́кнутъ и житія́ своего́ исправле́нію науча́тся, сказа́нію здѣ́ бы́вшихъ исцѣле́ній вне́млюще и о милосе́рдіи Пресвяты́я Богоро́дицы помышля́юще; къ Не́йже и ны́нѣ возопіи́мъ, глаго́люще: о Пречи́стая Дѣ́во и Ма́ти, Твои́хъ рабо́въ моле́нія не отве́ржи, но не́мощи на́ша предста́тельствомъ Твои́мъ исцѣли́, отъ ну́ждъ моли́твами Твои́ми на́съ изведи́ и да́руй на́мъ пре́жде конца́ покая́ніе.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Что́ диви́шися, человѣ́че,* разсѣче́нную обрѣ́тъ нѣ́когда ико́ну?* Что́ смуща́ешися?* Па́ки бо си́лою Бо́жіею* сію́ сраще́ну у́зриши.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Изъ до́му человѣ́ка того́* о́бразъ Влады́чицы* па́ки но́щію исчеза́етъ* и по у́тру въ дубра́вѣ древе́снѣй обрѣта́ется,* идѣ́же вчера́ косо́ю усѣче́ся.

Сти́хъ: Слы́ши, Дщи́, и ви́ждь,* и приклони́ у́хо Твое́.

О, преве́ліе чу́до!* разсѣче́нная ико́на* па́ки зри́тся сраще́на,* къ не́йже рука́ человѣ́ческая* прикосну́тися не можа́ше.

Сла́ва, и ны́нѣ, гла́съ 8:

Моли́твы вознося́ и благода́рныя излива́я сле́зы, селяни́нъ Богоро́дичну обрѣ́тъ ико́ну, сію́ ко іере́ю прино́ситъ, и ра́дости вси́ лю́діе исполня́ются и исцѣле́ній мно́гихъ предъ святы́нею сподобля́ются; та́ко бо Госпо́дь Свою́ Пречи́стую просла́ви Ма́терь, и но́вое жи́тельство христіа́нъ вѣ́рою укрѣпи́, и мѣ́сто пребыва́нія святы́ни въ ро́дъ и ро́дъ просла́ви.

Тропа́рь, гла́съ 3:

Твоего́ предста́тельства увѣре́ніе и милосе́рдія Твоего́ явле́ніе ико́на Озеря́нская на́мъ, Влады́чице, показа́ся; предъ не́юже ду́ши на́ша въ моли́твѣ излива́емъ и вѣ́рою Тебѣ́ вопіе́мъ: воззри́, Милосе́рдая, на лю́ди Твоя́, вся́ ско́рби на́ша и печа́ли утоли́, утѣше́ніе благо́е въ сердца́ на́ша низпосли́ и спасе́ніе вѣ́чное душа́мъ на́шимъ, Пречи́стая, испроси́.


НА УТРЕНИ,
На Бо́гъ Госпо́дь: Тропа́рь, два́жды. Сла́ва, и ны́нѣ: и па́ки то́йже.

По 1-мъ стихосло́віи сѣда́ленъ, гла́съ 2:

Ико́ну Влады́чицы, свое́ю косо́ю разсѣче́нную, узрѣ́въ, смире́нный му́жъ сію́ въ до́мъ сво́й прера́достно вно́ситъ, во у́тріе же па́ки на мѣ́стѣ обрѣ́тенія ея́ сраще́нную пріе́млетъ, и чу́до Богоро́дицы всѣ́мъ проповѣ́дуетъ.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 3:

Возлюби́ла еси́ нищету́ смире́нную, о Влады́чице, и святы́ню Твою́ тру́днику убо́гому вручи́ла еси́; то́й же сію́ це́ркви лю́дстѣй преда́въ, со апо́столомъ вся́ богатя́й яви́ся; съ ни́миже и на́шего не отве́ржи моле́нія.

Сла́ва, и ны́нѣ, то́йже.

По поліеле́и сѣда́ленъ, гла́съ 7:

Ку́ю похвалу́ принесе́мъ Ти́, Богоро́дице? Ко́е ли сплете́мъ Ти́ славосло́віе? Зане́, кромѣ́ трудо́въ или́ по́двиговъ на́шихъ посредѣ́ гра́да сего́ исто́чники исцѣле́ній источи́ла еси́ предъ Твое́ю ико́ною моля́щимся лю́демъ; и́хже и дне́сь услы́ши моли́твы, и на блага́я дѣя́нія, Пречи́стая, всѣ́хъ наста́ви.

Сла́ва, и ны́нѣ, то́йже.

Проки́менъ и Ева́нгеліе Богоро́дице о́бщіи: [Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждъ, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.]

По Ева́нгеліи стихи́ра, гла́съ 8:

О, ди́внаго чудесе́! Оскудѣ́вшей во дни́ на́ша вѣ́рѣ, чудеса́ отъ Богоро́дичныя не оскудѣва́ютъ ико́ны, ниже́ умолка́ютъ благода́рніи исцѣле́нныхъ гла́си. Къ си́мъ и на́ша пріобщи́мъ благодаре́нія, бра́тіе, и побѣ́ды надъ страстьми́ у Влады́чицы испро́симъ и душа́мъ на́шимъ ве́лія ми́лости.

Кано́нъ [похвалѣ́ Богоро́дицы со ирмосо́мъ на 6 и пра́здника, гла́съ 3, на 8.] Его́же краестро́чіе: Блаже́нно чре́во, носи́вшее Тя́, и сосца́, я́же еси́ сса́лъ.

Пѣ́снь 1.

Ирмо́съ: Пѣ́снь но́вую пои́мъ, лю́діе, отъ Дѣ́вы Ро́ждшемуся во спасе́ніе на́ше, и еди́но Сотво́ршему съ небе́сными земна́я, я́ко просла́вися.

Богоро́дице Пречи́стая! Моли́тву смире́нныхъ серде́цъ на́шихъ пріими́, па́че же Сама́ научи́ на́съ, о ни́хже подоба́етъ проси́ти и и́миже словесы́ пѣ́ти Тя́, Пренепоро́чную.

Лю́діе Бо́жіи сы́тости похвалѣ́ Твое́й не и́мутъ, Богоро́дице, но умиле́ннымъ славосло́віемъ чуде́съ Твои́хъ при́сно пита́ющеся, ве́ліе утѣше́ніе тѣ́мъ пріе́млютъ.

Ангели Твою́ чистоту́ воспѣва́ютъ, Влады́чице; на́мъ же, человѣ́комъ, помози́ Твое́ заступле́ніе при́сно помина́ти и чудеса́ отъ святы́я ико́ны Твоея́ повѣ́дати.

Житіе́ трудолюби́вое провожда́я, на дѣ́ланіе изы́де препро́стый му́жъ, внеза́пу же изображе́ніе Бо́жія Ма́тере зри́тъ, косо́ю его́ разсѣче́нное, и сіе́ со благоговѣ́ніемъ въ до́мъ сво́й прино́ситъ.

Еще́ спя́щу человѣ́ку тому́, свята́я ико́на Влады́чицы разсѣче́нная чуде́сно срасте́ся и па́ки на мѣ́сто явле́нія своего́ пренесе́ся, е́же ви́дѣвше, лю́діе Бо́жію Ма́терь просла́виша. Съ ни́ми и на́ши, о Влады́чице, моли́твы пріими́ ми́лостивно.

Катава́сія по уста́ву.

Пѣ́снь 3.

Ирмо́съ: Лу́къ сокруши́лъ еси́ вра́жій и щиты́ сте́рлъ еси́ крѣ́постію, Влады́ко Христе́, утвержде́ніе на́ше; Свя́тъ еси́, Го́споди.

Несомнѣ́нныя вѣ́ры испо́лненъ, іере́й Ѳео́доръ всеблагоговѣ́йно ико́ну Влады́чицы въ новосозда́ннѣмъ поставля́етъ хра́мѣ, и мно́жества люде́й та́мо притека́ти а́біе навыко́ша; дне́сь же святы́ня сія́ предъ очесы́ на́шими зри́тся и умиле́нія сердца́ на́ша исполня́етъ.

Не оста́ви на́съ, Богоро́дице, нечи́стыми страстьми́ вла́ятися, не оста́ви въ беззако́ніихъ на́шихъ поги́бнути, но моля́щіяся Тебѣ́ житіе́ свое́ испра́вити научи́ и Твое́ милосе́рдіе воспѣ́ти досто́йно.

Оному іере́ю Ѳео́дору Богоро́дица наста́вница бы́сть; Ея́ бо ра́ди чудотво́рнаго о́браза оби́тель и́ноковъ устро́и и са́мъ во а́нгельстѣмъ о́бразѣ житіе́ свое́ скончава́етъ. Потщи́мся у́бо, о бра́тіе, тоя́же ико́ны покло́нницы, себе́ самѣ́хъ въ во́лю Бо́жію при́сно предава́ти.

Человѣ́ковъ моли́твы и а́нгеловъ славосло́віе, Влады́чице, пріе́млющи, и моего́ убо́гаго не отврати́ моле́нія, ско́рбь души́ моея́ утоля́ющи, па́че же терпѣ́ніе въ ско́рбехъ при́сно мнѣ́ подаю́щи.

Сѣда́ленъ, гла́съ 5:

Моли́твъ, я́же о на́съ, при́сное устремле́ніе, и грѣ́шныхъ прибѣ́жище несумнѣ́нное, и пра́веднаго гнѣ́ва Бо́жія отклоне́ніе позна́хомъ Тя́, Богоро́дице Дѣ́во; у́бо и на на́съ долготерпѣ́ніе Твое́ простри́, и грѣхо́мъ на́шимъ проще́ніе испроси́, и во благи́хъ проше́нія на́ша испо́лни, Пречи́стая.

Сла́ва, и ны́нѣ, то́йже.

Пѣ́снь 4.

Ирмо́съ: Стра́нна и неизрече́нна Рождества́ Твоего́ та́йна; услы́шахъ слу́хъ Тво́й и убоя́хся, и, веселя́ся, вопію́ Ти́: си́лѣ Твое́й сла́ва, Человѣколю́бче.

Разли́чныхъ исцѣле́ній чудеса́ отъ новоявле́нныя Твоея́ ико́ны, Влады́чице, а́біе во окре́стныхъ страна́хъ слы́шана бы́ша и Святого́рскія пусты́ни настоя́теля боля́щаго на обѣща́ніе подвиго́ша, и́же, здра́віе получи́въ, ко хра́му Твоему́ пѣшеше́ствуетъ и оби́тель и́ноковъ со іере́емъ Ѳео́доромъ та́мо устроя́етъ.

Естество́ земны́хъ тва́рей отъ подо́бнаго себѣ́ ражда́ется; та́ко и оби́тель Озеря́нская отъ Святого́рскія нача́ло прія́тъ чудеса́ Твоя́ досто́йно воспѣва́ти. Ны́нѣ же оби́тели Куря́жская и Покро́вская се́й блаже́нный жре́бій прія́ша; въ ни́хже мы́ Твоему́ о́бразу со умиле́ніемъ покланя́емся, Влады́чице.

Влады́чице Пречи́стая, ели́ка про́симъ дне́сь отъ Тебе́ прія́ти, сія́ отъ мѣ́ста пребыва́нія чудотво́рныя Твоея́ ико́ны на́мъ пода́ждь, и немощно́е на́ше произволе́ніе утверди́, и небе́сныхъ бла́гъ жела́ніе въ сердца́ на́ша всели́.

Оный му́жъ явле́нія ико́ны Твоея́, Богоро́дице, во вре́мя дѣ́ланія зва́нія своего́ сподо́бися; та́ко бо Госпо́дь смире́нныя возвыша́етъ. Убо и отъ на́съ по́мыслы горды́ни и за́висти отжени́, Влады́чице, и вы́шнія по́чести бу́дущія жи́зни жела́ти на́съ научи́, Пречи́стая.

На́шему спасе́нію бу́ди, Богоро́дице, хода́таица и наста́вница, но и тѣле́сныя ну́жды и болѣ́зни на́ша исцѣли́; зане́, маловѣ́рни и нетерпѣли́ви су́ще, по́мыслы уны́нія въ бѣда́хъ на́шихъ вла́емся и наипа́че терпѣ́нія да́ръ у Бо́га проси́ти тре́буемъ.

Пѣ́снь 5.

Ирмо́съ: На земли́ Неви́димый яви́лся еси́ и человѣ́комъ во́лею сожи́лъ еси́ Непостижи́мый, и къ Тебѣ́ у́тренююще, воспѣва́емъ Тя́, Человѣколю́бче.

Огнь вѣ́ры въ лю́дехъ Твои́хъ возжже́ Твоя́, Богоро́дице, ико́на; егда́ бо вско́рѣ губи́тельная я́зва на страну́ на́шу на́йде, моля́щіися предъ чудотво́рнымъ о́бразомъ Твои́мъ всегда́ исцѣля́хуся. Мы́ же, тѣ́хъ пра́внуцы су́ще, благода́рную па́мять о се́мъ те́плѣ сохраня́емъ.

Се́й у́бо губи́тельнѣй я́звѣ преше́дшей, чрезъ сто́ и па́че лѣ́тъ друга́я предѣ́лы Россíйскія земли́ посѣти́ трикра́ты; у́жасомъ же смяте́нніи лю́діе къ подно́жію святы́ни Бо́жія Ма́тере па́ки припа́даху и, ико́ну Влады́чицы во гра́дъ Ха́рьковъ принося́ще, отъ неду́га того́ исцѣле́ніе пріима́ху.

Иже въ бѣда́хъ су́щіи человѣ́цы, вѣ́дите, я́ко близъ ва́съ избавле́ніе вѣ́рное обрѣта́ется, а́ще то́кмо съ вѣ́рою сіе́ призыва́ти бу́дете, си́це глаго́люще: о Влады́чице, помози́ и прости́ на́съ грѣ́шныхъ, о на́съ милосе́рдовавши!

Вѣ́мы, Влады́чице, вѣ́мы, я́ко вѣ́ры испо́лненная моли́тва Тобо́ю не отщети́тся; но сицевы́я вѣ́ры лѣ́ности ра́ди на́шея не стяжа́хомъ, а́ще и стяжа́ти возжелѣ́хомъ. Тѣ́мже и вопіе́мъ: вѣ́руемъ, Пречи́стая, помози́ на́шему маловѣ́рію!

Широ́кій пу́ть житія́ злѣ́ возлюби́хомъ, Богоро́дице, къ поги́бели сы́ны своя́ влеку́щій и вѣ́ру и́хъ сокруша́ющій; но предъ свято́ю Твое́ю ико́ною предстоя́ще, покая́ніе о се́мъ прино́симъ и по́мощи Твоея́ смире́нно про́симъ, во е́же на пу́ть спасе́нія обрати́тися.

Пѣ́снь 6.

Ирмо́съ: Селе́нія Іо́на, е́же въ преиспо́днемъ а́дѣ, есте́ственный о́бразъ бы́въ, вопія́ше: возведи́ отъ тли́ живо́тъ мо́й, Человѣколю́бче.

Есте́ственнаго исцѣле́нія отча́явся, увѣща́нію же духо́внаго отца́ своего́ повину́яся, сухору́кій нѣ́кій му́жъ ко ико́нѣ Влады́чицы пѣ́шіимъ издале́ча притече́ хожде́ніемъ; и моли́тва вѣ́ры боля́щаго исцѣли́, и бы́сть рука́ его́ здра́ва, душа́ же хвале́нія Твоего́, Богоро́дице, испо́лнися.

Еже ко вре́менному житію́ потре́бное вма́лѣ поле́зно е́сть, но па́че си́хъ о су́хости серде́цъ на́шихъ воспла́чемъ, о бра́тіе, и исцѣле́нія страсте́й на́шихъ проси́ти потщи́мся, грѣхо́вное житіе́ свое́ ока́явше и го́рнихъ даро́въ те́плѣ возжелѣ́вше.

Твоея́ ми́лости сподо́бися хро́мый, во оби́тель Твою́, Богоро́дице, привезе́нный и предъ свято́ю ико́ною Твое́ю усе́рдную вознесы́й моли́тву, и́же а́біе исцѣле́ніе отъ неду́га своего́ прія́тъ и пѣ́шій въ до́мъ сво́й ра́достно возврати́ся.

Ядомъ страсте́й извраще́на ми́ душа́, и но́зѣ мои́ по пути́ спасе́нія ходи́ти не возмо́гутъ, а́ще не Твои́мъ, Пречи́стая, предста́тельствомъ благода́тную обря́щу по́мощь, во е́же на пу́ть пра́вый устреми́ти души́ моея́ ше́ствіе.

Испо́лни у́жаса видѣ́ніе ико́ны Твоея́, о Влады́чице, бѣсну́ю нѣ́кую дѣви́цу, бѣ́су на хулы́ сію́ подвиза́ющу; оба́че вознесе́нное це́рковію моле́ніе, па́че же Твоего́ предста́тельства си́ла, а́біе бѣ́са отъ дѣ́вы тоя́ изгна́ и здра́ву бы́вшую на славосло́віе подви́же.

Конда́къ, гла́съ 5:

Не отри́ни, о Милосе́рдая Ма́ти, сле́зъ и воздыха́ній на́шихъ, но проше́нія на́ша ми́лостивно пріи́мши, предъ ико́ною Твое́ю моля́щихся люде́й вѣ́ру укрѣпи́, умиле́ніемъ сердца́ и́хъ испо́лни и кре́стъ земна́го житія́ носи́ти и́мъ помози́; ели́ка бо хо́щеши, мо́жеши.

Икосъ:

Егда́ Святы́я Влады́чицы на́шея ико́на во гра́дъ на́шъ на ко́еждо лѣ́то прино́сится или́ па́ки во бли́жнюю оби́тель изно́сится, тогда́ гра́да сего́ лю́діе, ко провожде́нію святы́ни устреми́вшеся, благода́тнымъ исполня́ются умиле́ніемъ и покая́ніе те́плое о грѣсѣ́хъ свои́хъ прино́сятъ. Но сицево́е покая́нное умиле́ніе и па́мять чуде́съ, отъ святы́ни на́шея быва́емыхъ, при́сно въ душа́хъ на́шихъ подоба́етъ храни́ти на́мъ, о бра́тіе, и на святу́ю Богоро́дицы ико́ну взира́ющимъ глаго́лати: кре́стъ земна́го житія́ носи́ти на́мъ помози́, ели́ка бо хо́щеши, мо́жеши.

Пѣ́снь 7.

Ирмо́съ: Го́рдый мучи́тель, но дѣте́й бы́сть игра́лище. Якоже бо пе́рсть, попра́вше седмери́чный пла́мень, поя́ху: благослове́нъ еси́, Го́споди Бо́же оте́цъ на́шихъ.

Свя́заннаго мя́ страсте́й наси́льствомъ па́че бѣсны́я тоя́ дѣ́вы окаява́ю а́зъ; та́я бо нево́лею вла́сти его́ предана́ бы́вши, му́ку пріима́ше, а́зъ же во́лею бѣсо́вское исполня́ю хотѣ́ніе. Но, о Влады́чице, Твоего́ Сы́на во́лю твори́ти научи́ мя.

Огради́, Влады́чице, мое́ помышле́ніе, да не хуло́ю или́ зло́бою во вла́сть де́мономъ преда́мъ свою́ ду́шу, но сію́ непреста́нныя потщу́ся исполня́ти моли́твы, глаго́ля: предста́тельствомъ Ма́тере Твоея́ отъ лука́ваго изба́ви мя́, Го́споди.

Свяще́нною водо́ю предъ чудотво́рнымъ Богоро́дицы о́бразомъ окропле́нъ бы́въ, исцѣлѣ́ бѣсны́й человѣ́къ, и́же пре́жде вся́ лю́ди бѣснова́ньми свои́ми зѣло́ устраша́ше, по си́хъ же со благоговѣ́ніемъ и ти́хостію души́ благодаре́ніе о чудеси́ Влады́чицѣ принесе́. Съ ни́мъ и на́съ, о Всеблага́я, услы́ши моля́щихся Тебѣ́.

Це́рковь, въ не́йже ико́на Твоя́ пребыва́етъ, Богоро́дице, враче́бница неду́говъ тѣле́сныхъ и душе́вныхъ явля́ется, вѣ́ры же учи́тельница и невѣ́рія я́вная обличи́тельница.

Аще тѣ́хъ человѣ́къ исцѣле́нныхъ толи́каго не и́мамъ упова́нія и вѣ́ры, но покая́нія моего́ ра́ди исцѣли́, Всеблага́я, души́ моея́ бѣснова́ніе, и ти́хость смиренному́дрія пода́ждь моему́ се́рдцу.

Пѣ́снь 8.

Ирмо́съ: Веще́ственнаго огня́ пла́мень невеще́ственнымъ увяди́ша богозри́міи о́троцы и поя́ху: благослови́те вся́ дѣла́ Госпо́дня Го́спода.

Язы́къ человѣ́ческій не возмо́жетъ изрещи́, коли́кую ду́ши на́ша любо́вь и умиле́ніе вмѣща́ютъ къ Тебѣ́, о Всеблага́я, ниже́ бо словесы́, ни пѣ́ньми насы́титися возмо́гутъ, но сія́ слеза́ми ра́дости предъ святы́нею Твое́ю восполня́ютъ.

Жены́ нѣ́кія двѣ́ ослѣ́пшія ю́ныя дще́ри, отъ земны́хъ враче́въ никоея́же по́льзы получи́вшія, внеза́пу предъ ико́ною Богоро́дицы прозрѣ́ша, и отъ того́ дне́ да́же до ста́рости здра́вы пребыва́юща, сію́ ико́ну почита́ти зна́емыя увѣщава́ху.

Ева́нгеліемъ Христо́вымъ обѣща́нная вѣ́рнымъ чудеса́ ви́димъ здѣ́ умножа́ющася; у́бо и жи́ти ева́нгельски потщи́мся, бра́тіе, да не преще́ніе, Ти́ру и Сидо́ну Христо́мъ предрече́нное, на́ша нечу́вственныя пости́гнетъ ду́ши.

Еди́нъ по еди́ному прихо́дятъ сѣ́мо вѣ́рніи, исцѣле́нія и́мъ бы́вшая отъ ико́ны Богоро́дицы исповѣ́дающе и сію́ зла́томъ и самоцвѣ́тнымъ ка́меніемъ украша́юще; тѣ́мже и ду́ши на́ша зла́томъ добродѣ́телей украси́мъ, да ми́лостей Пречи́стыя досто́йни яви́мся.

Сла́ву Бо́жіей Ма́тери воздава́ше исцѣле́нная отрокови́ца, уже́ сме́рть прія́ти иму́щая, но по внеза́пнѣмъ отъ ико́ны сея́ исцѣле́ніи па́мять о чудеси́ до ста́рости храни́вшая и вся́ драгоце́нныя ря́сны своя́ на ри́зу о́браза сего́ приложи́вшая.

Пѣ́снь 9.

Ирмо́съ: Сла́дкою пречи́стаго Твоего́ Рождества́ стрѣло́ю уязвле́ни, Чи́стая, Твое́й достожела́ннѣй добро́тѣ дивя́щеся, пѣ́сньми а́нгельскими досто́йно Тя́, я́ко Ма́терь Бо́жію, велича́емъ.

Иже почита́нія Богоро́дицы отпа́дшіи, посрами́теся, еретицы́, умиле́нное пѣ́ніе То́й, отъ правосла́вныхъ возноси́мое, слы́шаще; па́че же въ чу́вство прише́дше, къ на́шему сопричти́теся моле́нію, да вку́пѣ Чи́стую возвелича́емъ.

Святы́мъ Свои́мъ апо́столомъ обѣтова́ше Спа́съ, я́ко вся́къ, бли́жнему своему́ ми́лость во и́мя ученика́ Его́ творя́й, своея́ не погуби́тъ мзды́. Сицевы́я, о бра́тіе, сугу́бо сподобите́ся, а́ще во и́мя Ма́тере Госпо́дни въ дѣ́лѣхъ братолю́бія подвиза́тися бу́дете, моле́ніе Влады́чицѣ при́сно принося́ще.

Се́ ро́ди земнíи ублажа́ютъ Тя́, Влады́чице, я́коже прорекла́ еси́, и Тобо́ю возно́ситъ смире́нныя се́рдцемъ Христо́съ и а́лчущія бла́гъ вся́ческихъ исполня́етъ, богатя́щіяся же и го́рдыя посрамля́етъ. Тѣ́мже но́вый Изра́иль ми́лости Твоя́, человѣ́честву дарова́нныя, воспомина́етъ и Тя́, Пречи́стая, велича́етъ.

Азъ еди́нъ, па́че всѣ́хъ грѣ́шенъ сы́й, а́ще и чудесе́мъ Твои́мъ, Богоро́дице, умиля́юся, но житія́ своего́ додне́сь не испра́вихъ; оба́че, я́коже су́ху ру́ку моля́щемуся испра́вила еси́, си́це изсо́хшую мою́ исцѣли́ ду́шу, да Тя́ непреста́нно велича́ю.

Люде́й мольбы́ и славосло́вія, предъ чудотво́рнымъ Твои́мъ о́бразомъ и на вся́комъ мѣ́стѣ возноси́мыя, благоутро́бно, Влады́чице, пріими́, и, у́зами Твоея́ любве́ ду́ши на́ша проро́чески связа́вши, сія́ въ небе́сное привлецы́ Ца́рство, и та́мо Твоему́ лицу́ поклони́тися сподо́би.

Свѣти́ленъ. Подо́бенъ: Жены́, услы́шите.

Образъ Богоро́дицы Озеря́нскій, чуде́сно при ко́рени древе́съ яви́вся и мно́гими исцѣле́ньми просла́вився, дне́сь на моли́тву лю́ди призыва́етъ. Зри́, о душе́ моя́, Ма́тере Бо́жія милосе́рдіе безмѣ́рное, и одѣя́ніе твое́ просвѣти́, и отъ скве́рныхъ дѣ́лъ отврати́ся навѣ́ки. [Три́жды.]

На хвали́техъ поста́вимъ стихо́въ 4, и пое́мъ стихи́ры во гла́съ 4, повторя́юще пе́рвую:

Святы́я Твоея́ ико́ны поклоне́ніе, о Влады́чице, ду́ши на́ша умиля́етъ и ра́дуетъ, моли́тва же, предъ не́ю возноси́мая, со́нъ отъ оче́съ на́шихъ отгоня́етъ и па́мятію ми́лости Твоея́ сердца́ человѣ́ческая любве́ ко всѣ́мъ исполня́етъ; въ не́йже утверди́ на́съ Твои́мъ предста́тельствомъ и пода́ждь рабо́мъ Твои́мъ ми́ръ и ве́лію ми́лость. [Два́жды.]

Святы́хъ а́нгеловъ чи́ни и человѣ́ковъ собо́ри Твое́ заступле́ніе прославля́ютъ, Пречи́стая Дѣ́во, Единоро́дный же Сы́нъ Тво́й и Бо́гъ на́шъ сіе́ съ любо́вію пріе́млетъ и отъ моли́твъ Ма́тере Своея́ николи́же отврати́тся; я́же и о на́съ грѣ́шныхъ дне́сь вознеси́, Всепѣ́тая.

Аще и мно́гими отсту́пствы сы́нове ро́да на́шего гнѣ́ва Твоего́, Влады́чице, досто́йни яви́шася, но па́че воззри́ на вѣ́ру вѣ́рныхъ и терпѣ́ніе; и я́коже Госпо́дь гра́ды согрѣши́вшія ра́ди десяти́ пра́ведникъ пощади́ти обѣтова́ше, та́ко и Ты́, о Богома́ти, немно́гихъ ра́ди смире́нныхъ Твои́хъ ра́бъ многогрѣ́шный ро́дъ на́шъ поми́луй, и къ Сы́ну Твоему́ о всѣ́хъ на́съ предста́ни, да пода́стъ душа́мъ на́шимъ ми́ръ и прегрѣше́ній отпуще́ніе.

Сла́ва, и ны́нѣ, гла́съ 2:

Дне́сь Влады́чицы чудотво́рная ико́на прославля́ется, дне́сь вѣ́рніи на моли́тву предъ не́ю отвсю́ду собира́ются, дне́сь и маловѣ́рніи по́мыслми покая́нія озаря́ются, си́лы небе́сныя о сла́вѣ Пречи́стыя ра́дуются, мы́ же, я́ко а́нгеломъ научи́хомся, та́ко вопіе́мъ: ра́дуйся, Благода́тная, Госпо́дь съ Тобо́ю, благослове́на Ты́ въ жена́хъ, благослове́но Твое́ къ на́мъ милосе́рдіе, благослове́нъ Пло́дъ чре́ва Твоего́, сла́ва Тебѣ́!

Славосло́віе вели́кое, [ектеніи́] и отпу́стъ.



НА ЛИТУРГІИ,

Слу́жба вся́ Богоро́дицѣ: [Блаже́нна, отъ кано́на пра́здника, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Слу́жба Пресвятѣ́й Богоро́дицѣ ико́ны ра́ди Ея́ Озеря́нскія. — Пг.: Сѵнода́льная тѵпогра́фія, 1915. — C. 5-33.

/ Къ оглавленію раздѣла /


Наверхъ / Къ титульной страницѣ

0