Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 23.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 29-й де́нь.
Святы́я преподобному́ченицы Анастасíи Ри́мляныни и преподо́бнаго отца́ на́шего Авра́мія Затво́рника.

[ВЕЧЕРЪ,]
На Го́споди воззва́хъ: стихи́ры му́ченицы, гла́съ 8. Подо́бенъ: Что́ ва́съ нарече́мъ?

Му́ченице страстоте́рпице всехва́льная,* воздержа́ніемъ стра́сти низложи́вши плотскíя,* страда́ніемъ змíя умертви́ла еси́ врага́,* а́нгелы удиви́вши болѣ́зньми твои́ми,* человѣ́ки обвесели́вши страда́ніи твои́ми,* мона́шествующихъ удобре́ніе,* дѣ́вства сосу́дъ.* Моли́ спасти́* и просвѣти́ти ду́ши на́ша.

Что́ тя возъимену́емъ, сла́вная?* Дѣ́вства добро́тами невѣ́сту просія́вшу Христо́ву,* дще́рь избра́нну Вы́шняго Іерусали́ма,* сожи́тельницу а́нгеловъ и собесѣ́дницу,* черто́га мы́сленнаго наслажда́ющуся,* Анастасíе многострада́льная,* мона́шествующихъ удобре́ніе.* Моли́ спасти́* и просвѣти́ти ду́ши на́ша.

Терпѣ́ла еси́ зубо́въ искорене́ніе,* ру́къ отсѣче́ніе, и но́гъ, и сосце́въ,* ссѣка́ема на у́ды отъ беззако́нныхъ мучи́телей,* къ добро́тѣ Жениха́ взира́ющи* и болѣ́зни па́че естества́ терпя́щи,* Анастасíе многострада́льная,* невѣ́сто Христо́ва нетлѣ́нная,* моли́ спасти́* и просвѣти́ти ду́ши на́ша.

Ины стихи́ры преподо́бнаго, гла́съ то́йже. Подо́бенъ: О, пресла́внаго чудесе́!

Отче богому́дре Авра́міе,* Авраа́му подо́бникъ бы́въ ду́хомъ,* пресе́льникъ бы́лъ еси́* земли́ оте́ческія, блаже́нне.* Пло́ти пожела́нія отве́ргъ,* и въ хи́жинѣ ма́лѣй* заключи́въ, ра́дуяся, тѣ́ло твое́,* ду́шу же впери́лъ еси́ къ небеси́,* идѣ́же житіе́ я́вѣ стяжа́лъ еси́.

Преподо́бне о́тче Авра́міе,* Авраа́мскую ду́шу тезоиме́нно стяжа́въ,* напа́сти претерпѣ́лъ еси́,* вѣ́рою Боже́ственною укрѣпля́емь* и любо́вію Бо́гу соединя́емь,* обѣтова́нія зе́млю наслѣ́довалъ еси́,* украша́емь добродѣ́телей свѣтлостьми́.* Тѣ́мже, веселя́щеся,* твою́ па́мять торжеству́емъ.

Преподо́бне о́тче Авра́міе,* пре́лестьми лю́тѣ* поглоще́нную змíемъ* и попо́лзшуюся поги́бели въ ро́въ* Про́мысломъ Боже́ственнымъ возвле́клъ еси́* и спаса́ему Бо́гу предста́вилъ еси́.* Ея́же покая́нію* вси́ удиви́шася,* благоче́стно Го́спода сла́вящіи Преблага́го.

Сла́ва, и ны́нѣ, богоро́диченъ:

Ра́дуйся, Свѣ́та Боже́ственнаго носи́ло,* пресвѣ́тлый свѣ́щниче,* Пресвята́я Богоневѣ́сто:* Свѣ́тъ на́мъ возсія́ла еси́ отъ пречи́стою боку́ Твое́ю,* просвѣща́я мíра концы́* и освяща́я Свое́ю бла́гостію.* Ра́дуйся, нача́ло на́шего спасе́нія, Чи́стая.* Ра́дуйся, стра́шное слы́шаніе и глаго́ланіе* надѣ́ющихся на Тя́.

Крестобогоро́диченъ:

Что́ зри́мое видѣ́ніе,* е́же Мои́ма очи́ма ви́дится, о Влады́ко!* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь?—* Богоро́дица, пла́чущи, глаго́лаше,* егда́ узрѣ́ на Крестѣ́ возноси́ма,* изъ Нея́ неизрече́нно возсія́вшаго* Бо́га и Человѣ́ка.

Тропа́рь святы́я, гла́съ 4:

Агница Твоя́, Іису́се, Анастасíя, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́; тоя́ моли́твами, я́ко Ми́лостивъ, спаси́ ду́ши на́ша.

Сла́ва, преподо́бнаго, гла́съ 8:

Въ тебѣ́, о́тче, извѣ́стно спасе́ся, е́же по о́бразу: пріи́мъ бо кре́стъ, послѣ́довалъ еси́ Христу́, и дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй; тѣ́мже и со а́нгелы сра́дуется, преподо́бне Авра́міе, ду́хъ тво́й.


НА УТРЕНИ,
Кано́нъ преподо́бныя, его́же краегране́сіе: Му́жескія твоя́, му́ченице, восхвалю́ болѣ́зни. Творе́ніе Іо́сифово. Гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Сію́ свѣтоно́сную па́мять твою́ почита́ющему, богому́драя, просвѣще́ніе ми́ пода́ждь, души́ моея́ тму́ отгоня́щи.

Всю́ отъ пеле́нъ тебе́ саму́ю возложи́ла еси́ Зижди́телю твоему́ и огне́мъ воздержа́нія тѣле́сныя стра́сти попали́ла еси́.

Къ высотѣ́ муче́нія, му́ченице, возшла́ еси́, непощадѣ́вши пло́ти, и черто́говъ мы́сленныхъ, я́ко дѣ́ва, сподо́билася еси́.

Богоро́диченъ: Тя́, небомѣ́рную Лѣ́ствицу, на не́йже Бо́гъ утверди́ся, человѣ́ки небе́сны содѣ́лавъ, Отрокови́це, почита́емъ.

Инъ кано́нъ преподо́бнаго, его́же краегране́сіе: Твое́ честву́ю всесвѣ́тлое житіе́, блаже́нне. Іо́сифъ. Гла́съ то́йже.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Боже́ственными сія́я блиста́ніи, свѣтоно́сный тво́й соверша́ющія пра́здникъ, страсте́й омраче́нія, всеблаже́нне, моли́твами твои́ми, Авра́міе, изба́ви.

Боже́ственное разжже́ твою́ ду́шу, блаже́нне, жела́ніе, угаси́ плотска́я разжже́нія, о́тче, и невеще́ственно на земли́ тя жи́ти сотвори́.

Умертви́въ у́ды, я́же на земли́, поще́ніемъ и вся́кими злострада́ніи, о́тче му́дре, жи́зни сподо́бился еси́ лу́чшія на небесѣ́хъ, богоно́се Авра́міе.

Богоро́диченъ: Отъ крове́й Твои́хъ свяще́нныхъ Бо́га Отца́ Сло́во воплоти́ся преесте́ственно, Дѣ́во Марíе, Его́же моли́ плотска́я моя́ умертви́ти взыгра́нія.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Стоя́ла еси́ предъ суди́щемъ мучи́теля, Христа́, сла́вная, Творца́ всѣ́хъ и Влады́ку, Бо́га Сло́ва проповѣ́дающи.

Добро́та серде́чная ви́димымъ зра́комъ, сла́вная, изда́вшися, тя́, краснѣ́йшую, зря́щимъ яви́ла е́сть.

Бога́тство неистощи́мо исцѣле́ній тебѣ́ подаде́, отрокови́це, Христо́съ, Его́же нищету́ во́льно возлюби́ла еси́.

Богоро́диченъ: Ве́щь грѣхо́въ мои́хъ Твои́хъ моли́твъ огне́мъ попали́, Ма́ти Свѣ́та, ро́су ми́ Боже́ственную оставле́нія нося́щи.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Всеобра́зно возжелѣ́въ жела́ній коне́чное, мíра и пло́ти, богоно́се, внѣ́ бы́лъ еси́, тѣ́мъ воспрія́лъ еси́ премíрную сла́ву и вѣ́чнующее, о́тче, наслажде́ніе.

Хра́мъ жи́въ яви́лся еси́ вседѣ́тельнаго Ду́ха, о́тче, въ хи́жинѣ тѣ́ло заключи́въ, преподо́бне. Тѣ́мже облиста́лъ еси́ добродѣ́телей луча́ми, свяще́нно обожа́емь, блаже́нне Авра́міе.

Дѣ́ланіемъ болѣ́зней, добродѣ́телей зрѣ́лъ, преподо́бне, израсти́лъ еси́ кла́съ стори́чествующь, и́мже пита́ются че́стно честно́е твое́ успе́ніе торжеству́ющіи.

Богоро́диченъ: Въ Тебѣ́, Всесвята́я, всего́ Вино́вный за премно́гое милосе́рдіе хотя́ всели́ся и освяти́ человѣ́ческое существо́, преступле́ніемъ пе́рвѣе попо́лзшееся.

По 3-й пѣ́сни конда́къ Анастасíи, гла́съ 3. Подо́бенъ: Дѣ́ва дне́сь.

Дѣ́вства вода́ми очище́нна, преподо́бная, му́ченичества кровьми́, Анастасíе, вѣнча́вшися, подае́ши су́щимъ въ ну́ждахъ неду́говъ исцѣле́ніе и спасе́ніе, приступа́ющимъ отъ се́рдца, крѣ́пость бо тебѣ́ подае́тъ Христо́съ, источа́я благода́ть приснотеку́щую.

Сѣда́ленъ, гла́съ 8. Подо́бенъ: Прему́дрости.

Воздержа́нія росо́ю страсте́й погаси́ла еси́ пла́мень ю́ношески, огне́мъ же крове́й твои́хъ всю́ пре́лесть попали́ла еси́ и Жениху́ Сло́ву, я́ко да́ръ, принесла́ еси́ честно́е дѣ́вство и до́блественное страда́ніе. Тѣ́мже въ черто́гъ введе́ тя сла́вы, свѣ́тлѣ до́бльствовавшую и змíя попра́вшую, Анастасíе многострада́льная, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, преподо́бнаго, гла́съ 1. Подо́бенъ: Гро́бъ Тво́й.

Иже дре́внему Авраа́му подо́бяся, о́тче, удали́лся еси́ сро́дниковъ по пло́ти, повину́яся, Авра́міе, глаго́лу Бо́га на́шего. Тѣ́мже, пости́вся, и ду́шу свѣтлѣ́йшу показа́лъ еси́ со́лнечныхъ лу́чь, богому́дре всеблаже́нне.

И ны́нѣ, богоро́диченъ:

Наста́ви ны́ на пу́ть покая́нія, укло́ншіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная, Благослове́нная Марíе, прибѣ́жище отча́янныхъ человѣ́ковъ, Бо́жіе обита́лище.

Крестобогоро́диченъ:

Нескве́рная Агница, Агнца и Па́стыря, повѣ́шена на дре́вѣ, ме́ртва зря́щи, пла́чущи вѣща́ше, ма́терски восклица́ющи: ка́ко претерплю́ Твое́, е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Тя́, и́го легча́йшее Христо́во, му́ченице, поне́сшую отъ ю́ности, желѣ́зное у́же носи́ти пребеззако́ннующіи осуди́ша.

Ка́пли крове́й твои́хъ многобо́жія угаси́ша у́гліе, лучи́ же чуде́съ твои́хъ страсте́й ве́щь попали́ша.

Не обнажи́ благода́ти, тѣ́ло твое́ обнажи́въ, лука́внѣйшій, истка́ну же па́че свы́ше нераздра́ну ри́зу исхода́таи тебѣ́.

Богоро́диченъ: По рождествѣ́ пребыла́ еси́ нетлѣ́нна Дѣ́ва, я́коже пре́жде рождества́, Юна бо Младе́нца родила́ еси́, пре́жде вѣ́къ познава́ема.

Инъ. Ирмосъ тойже.

Струя́ми, о́тче, сле́зъ твои́хъ душе́вныя скве́рны омы́въ, боже́ственное бы́лъ еси́ Ду́ха и честно́е, всеблаже́нне, жили́ще.

Бдѣ́ніе всено́щно, моли́тву непреста́нну, безпристра́стіе и любо́вь нелицемѣ́рну, и соверше́нну вѣ́ру удержа́лъ еси́.

Исцѣля́ти стра́сти и отгони́ти, преподо́бне, ду́хи, благода́ть прія́лъ еси́, Авра́міе, я́ко Бо́жій уго́дникъ и́стиннѣйшій.

Богоро́диченъ: Уны́ніемъ одержи́ма и грѣхо́мъ ны́нѣ погруже́на, мольбо́ю Твое́ю изба́ви мя́, Богоро́дице, Ма́ти Приснодѣ́во.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Не изнуре́на огне́мъ веще́ственнымъ яви́лася еси́, му́ченице Анастасíе, о́гнь бо тя́ серде́чный Боже́ственныя любве́ ороша́ше.

Ударе́ньми лица́, му́ченице Анастасíе, украси́вшися, враго́въ отрази́ла еси́ ме́рзское неразу́міе.

Протяже́на на дре́вѣ, богому́драя Анастасíе, любо́вію Жениха́ твоего́, Боже́ственную стра́сть образова́ла еси́.

Богоро́диченъ: Пое́мъ Тя́, Всепѣ́тая Влады́чице Богоро́дице, Бо́га бо препѣ́таго пло́тію родила́ еси́, Пречи́стая.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Яко плодови́тая розга́, гро́зды израсти́лъ еси́, о́тче Авра́міе, добродѣ́телей боже́ственныхъ, умиле́нія вино́ точа́щія и страсте́й пія́нство отъ ду́шъ отгоня́щія, и сердца́ вѣ́рныхъ веселя́щія.

Напа́сти тебѣ́ разли́чны змíй вселука́вый, о́тче, воздви́же, но того́ ору́жіемъ креста́, богоно́се, умертви́лъ еси́, и побѣ́ды вѣне́цъ отъ Бо́га пра́веднымъ судо́мъ прія́лъ еси́, богому́дре Авра́міе.

Святы́ни до́мъ, о́тче, Боже́ственнаго Ду́ха вѣ́рою бы́въ, созда́лъ еси́ до́мъ свяще́нный, и несвяще́нный собо́ръ несвяще́нныя ле́сти преложи́въ наказа́ньми, всѣ́хъ Бо́гу освяти́лъ еси́.

Богоро́диченъ: Ма́терь, Дѣ́ву Отрокови́цу, Боже́ственнымъ просвѣща́еми Ду́хомъ, Пречи́стая, свяще́нніи проро́цы свяще́нными Тя́ гла́сы провозвѣсти́ша, изъ Нея́же Бо́гъ Сло́во, па́че вины́ же и сло́ва, воплоти́ся за милосе́рдіе безчи́сленное.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Сокруша́емо тѣ́ло ра́нами явля́ше пра́вость твоея́ со́вѣсти, страстоте́рпице, ко Христу́ Бо́гу на́шему.

Ви́сящи высоко́, ра́ны, му́ченице, терпя́щи и не уя́звлено храня́щи души́ благоро́діе, достохва́льная.

Претерпѣ́ла еси́ зубо́въ, и ру́къ, и но́гъ отъя́тіе, му́ченице многострада́льная, взира́ющи ко Христу́, Жениху́ твоему́.

Богоро́диченъ: Человѣколю́бца ро́ждши, Бо́га, Благолюби́вая Влады́чице, Того́ моли́ гее́нны огня́ изба́витися на́мъ.

Инъ.

Ирмо́съ: Моли́тву пролію́ ко Го́споду, и Тому́ возвѣщу́ печа́ли моя́, я́ко золъ душа́ моя испо́лнися, и живо́тъ мой а́ду прибли́жися, и молю́ся, я́ко Іо́на: отъ тли, Бо́же, возведи́ мя.

Свѣти́льника, тя́, су́щіи во тмѣ́ пре́лести, неле́стно наставля́юща, обрѣ́тше къ путе́мъ жи́зни, богоно́се, невѣ́дѣнія тму́ отложи́ша и яви́шася свѣтови́дни вѣ́рою боже́ственною, Авра́міе.

Бо́дренно, умоли́въ Бо́га, посыла́еши просвѣще́ніе спасе́нія су́щимъ въ нощи́ идолонеи́стовства одержи́мымъ, богому́дре Авра́міе, и показа́лъ еси́ вся́ сы́ны свѣ́та и дне́, благода́тію.

Безмо́лвно твою́ жи́знь соверши́въ, я́же въ житіи́ треволне́нія, всеблаже́нне, Бо́жіими наде́ждами преше́лъ еси́ и къ ти́химъ приста́нищемъ дости́галъ еси́, Авра́міе, небе́снаго Ца́рства и Боже́ственныя свѣ́тлости.

Богоро́диченъ: Отягче́на мя́ дрема́ніемъ уны́нія, возста́ви Твои́мъ хода́тайствомъ, Ма́ти Бо́жія, и не да́ждь усну́ти въ сме́рть грѣха́, Дѣ́во, предста́тельницу бо и путевожда́ мое́й жи́зни напису́ю Тя́.

Конда́къ Авра́мія, гла́съ 3. Подо́бенъ: Дѣ́ва дне́сь.

Во пло́ти, я́ко а́нгелъ, на земли́ яви́лся еси́, и поще́ніемъ бы́лъ еси́, я́ко дре́во насажде́нное, водо́ю воздержа́нія до́брѣ возрасти́вся, и тече́ньми твои́хъ сле́зъ скве́рну омы́въ, сего́ ра́ди яви́лся еси́ прія́телище Боже́ственное, Авра́міе, Ду́ха.

Икосъ:

Тлѣ́нная презрѣ́въ, нетлѣ́нныя воспрія́лъ еси́ красоты́: сла́сти плотскíя возненави́дѣлъ еси́, му́дре, измла́да возлюби́въ чистоту́. Тѣ́мъ, черто́га мірска́го отбѣжа́въ, сопру́жницы же благосла́вныя и роди́телей уклони́вся, Еди́наго Бо́га я́сно, Рачи́теля, возжела́въ и возлюби́въ отъ всея́, о́тче, души́ и се́рдца и́стинно: сего́ ра́ди показа́лся еси́ дѣ́вства и чистоты́ прія́телище Боже́ственное, Авра́міе, Ду́ха.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Шу́мъ гла́са пра́зднующихъ идѣ́же е́сть лику́еши, страстоте́рпице, съ дѣ́вами Бо́гу Зижди́телю пѣснопою́щи: благослове́нъ еси́, Го́споди Бо́же, во вѣ́ки.

Уды сокруша́емы зря́щи и ногте́й истерза́ніе терпя́щи, принесла́ся еси́ Бо́гу же́ртва, пѣснопою́щи: благослове́нъ еси́, Го́споди Бо́же, во вѣ́ки.

Яви́лася еси́, я́ко лоза́, богому́драя, ру́цѣ и но́зѣ, я́ко вѣ́тви, рѣ́жемы, и на́мъ мы́сленно вино́ источа́ющи, сердца́ утѣша́ющее и страсте́й отрѣва́ющее пія́нство.

Богоро́диченъ: Во всего́ человѣ́ка обле́кся Нескве́рный, кромѣ́ грѣха́, изъ утро́бы Твоея́, Чи́стая, про́йде Плотоно́сецъ, Его́же умоли́ вѣ́рою Тя́ честву́ющія спасти́.

Инъ. Ирмо́съ то́йже.

Да вы́шнее Ца́рство получи́ши и сла́ву неизрече́нную, сла́ву же попира́емую, му́дре, и тлѣ́нную я́ко смы́сленъ и разу́менъ преоби́дѣлъ еси́ му́дренно.

Егда́ во́лкъ лука́вый а́гницу твою́ расто́ргне льсти́внѣ, тогда́ сего́, му́дре, че́люсти сокруши́лъ еси́, сію́ же я́ко па́стырь изря́днѣйшій къ жи́зни приве́лъ еси́.

Зако́номъ повину́яся Влады́чнимъ, заблу́ждшее взыска́лъ еси́ и обрѣ́лъ еси́, и на ра́мена твоя́ взе́мъ, всеблаже́нне, я́ко па́стырь вве́лъ еси́ во огра́ду покая́нія.

Богоро́диченъ: Еди́на Еди́наго отъ Тро́ицы родила́ еси́ во дву́ существу́, ѵпоста́си же еди́нѣй Ви́димаго, Дѣ́во. Ему́же пѣснопое́мъ: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Юношески до́бльствовавши, страстоно́сице всехва́льная, и на пре́лесть воздви́гла еси́ побѣ́ды. Ру́къ бо лише́нія и но́гъ терпѣ́ла еси́, сосце́въ же и зубо́въ твои́хъ искорене́ніе, му́ченице, претерпѣ́ла еси́, въ ра́дости пѣснопою́щи: лю́діе, превозноси́те Христа́ во вѣ́ки.

Всесвѣтла́, я́ко со́лнце, дѣ́вства свѣ́тлостьми, и муче́нія добро́тами облиста́ла еси́, и мíръ просвѣти́ла еси́ свѣтолу́чными сія́ніи твоего́ терпѣ́нія, страстоте́рпице, вопію́щи: о́троцы, благослови́те, свяще́нницы, воспо́йте, лю́діе, превозноси́те Христа́ во вѣ́ки.

Оскверне́нную страстьми́ ду́шу мою́, богоневѣ́сто, и очерне́нную прило́ги змíя, твои́ми мольба́ми отъ лю́тыхъ очи́сти, и свѣ́тлымъ осѣне́ніемъ твои́мъ, му́ченице Анастасíе, озари́ вопи́ти: свяще́нницы, по́йте, лю́діе, превозноси́те Христа́ во вѣ́ки.

Богоро́диченъ: Тя́, Чи́стую и Непоро́чную, дѣ́ва жела́ющи, непоро́чно и тѣ́ло и ду́шу соблюде́, страсте́й подпале́нія терпѣ́ніемъ испепели́вши, искуше́ніе же мно́гихъ претерпѣ́вши му́къ, и ны́нѣ въ небе́сныхъ черто́зѣхъ лику́етъ съ Тобо́ю, веселя́щися во вся́ вѣ́ки.

Инъ.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Въ поги́бели ро́въ чи́стую све́рже голуби́цу твою́ злодѣ́йственный змíй, но сію́ изве́лъ еси́, о́тче, всему́дренно, благослови́те, поя́, дѣла́ Го́спода и превозноси́те Его́ во вѣ́ки.

И въ житіи́ обходя́, о́тче Авра́міе, и по кончи́нѣ вра́чь боля́щихъ яви́лся еси́, Ду́ха благода́тію Боже́ственною, благослови́те, поя́, дѣла́ Го́спода и превозноси́те Его́ во вѣ́ки.

Незло́біемъ, блаже́нне, пра́вдою же и цѣлому́дріемъ, и вѣ́рою просія́въ, а́нгеломъ, преподо́бне, счи́слился еси́, благослови́те, поя́, дѣла́ Го́спода и превозноси́те Его́ во вѣ́ки.

Богоро́диченъ: Струи́ живы́я яви́лася еси́ всесвято́е селе́ніе, отъ Нея́же пію́ще, умертви́вшіися, жи́знь наслѣ́дуемъ, вопію́ще: благослови́те дѣла́ вся́ Го́спода и превозноси́те Его́ во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

На дре́вѣ повѣ́шена была́ еси́, Сло́ва Бо́жія образу́ющи Стра́сть блаже́нную, и отсѣче́ніе терпѣ́ла еси́ ру́къ твои́хъ и но́гъ, зубо́въ искорене́ніе, язы́ка же отрѣ́заніе и сосце́въ, чи́стая Анастасíе, мона́шествующихъ сла́во и му́чениковъ украше́ніе.

Яко невѣ́ста, украси́лася еси́ добро́тою, обручи́вшися Жениху́ страда́ньми добротво́рными, вну́трь же черто́говъ свѣтови́дныхъ, я́ко избра́нная, всели́лася еси́, нося́щи свѣщу́ дѣ́вственную. И ны́нѣ ца́рствуеши съ Живу́щимъ во вѣ́ки, Анастасíе, сія́ющи.

Иска́паютъ болѣ́зни твоя́ сла́дость, грѣха́ го́ресть отъе́млющу, ра́ка же то́читъ исцѣле́ній рѣ́ки и потопля́етъ вся́ стра́сти, и неду́ги лю́тыя въ сла́ву Спа́сову, честна́я Анастасíе, и́же по достоя́нію тя́ сла́вятъ.

До́блествоваша жены́, Твои́мъ Кресто́мъ укрѣ́пльшеся, Христе́ Всеси́льне, и вра́жію главу́ многоко́зненную му́жески, Сло́ве Бо́жій, сокруши́ша, и рая́ ра́достно селе́ніе получи́вше, обоже́ніе прія́ша ди́вное, воспѣва́юще Тя́.

Богоро́диченъ: Поне́сшаго Тя́ пло́ть отъ Жены́, я́ко позна́ му́ченица Твоя́, Го́споди, дѣ́вственными укра́шена луча́ми и муче́нія кро́вію обагрена́, Тебѣ́, Бо́гу, во слѣ́дъ Ма́тере Твоея́, сла́вно приведе́ся, я́ко ца́рствующему тва́рію.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ви́дѣти сподо́бился еси́, о́тче богоно́се, чрезъ наде́жду тебѣ́ дре́вле жела́емая, и́хже о́ко не ви́дѣ и у́хо не слы́ша.

Красе́нъ яви́лся еси́, боже́ственными добродѣ́телей луча́ми сія́я, Авра́міе, и кра́сному Влады́цѣ, ра́дуяся, предстои́ши.

Совокупи́лся еси́ лико́мъ всѣ́хъ преподо́бныхъ, и съ ни́ми обоже́нія, преподо́бне, получи́въ, моли́ е́же спасти́ся всѣ́мъ на́мъ.

Де́нь весе́лія приво́дитъ ра́достно, свяще́нное твое́, Авра́міе, успе́ніе, Це́рковь честву́ющи житіе́ твое́.

Богоро́диченъ: Благолюби́вая Дѣ́во, озло́бленную грѣхо́мъ ду́шу мою́ ублажи́ и бла́гъ небе́сныхъ прича́стника сотвори́.


НА ЛИТУРГІИ,

Проки́менъ, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, [боя́йся Го́спода, въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 253 об. – 259 об.

/ Къ оглавленію раздѣла /


Наверхъ / Къ титульной страницѣ

0