Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 29-й де́нь.
Слу́жба преподо́бнаго отца́ на́шего Авра́мія Росто́вскаго, чудотво́рца.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4. Самогла́сны, гла́съ 4:

Вѣ́рою и любо́вію, празднолю́бцы, соше́дшеся, псалмы́ и пѣ́сньми восхва́лимъ дне́сь небе́снаго человѣ́ка и земна́го а́нгела, къ нему́же возопіи́мъ: о, всеблаже́нне и преподо́бне, по́стниковъ похвало́! о на́съ моли́ся ко Го́споду, Авра́міе, о́тче на́шъ, поми́ловатися душа́мъ на́шимъ. [Два́жды.]

Честны́й и свѣтоно́сный, преподо́бне, тво́й пра́здникъ испо́лненъ ра́дости и весе́лія духо́внаго. Тѣ́мже соше́дшеся мона́ховъ мно́жества и христоимени́тіи лю́діе, любо́вію восхваля́юще, блажи́мъ боже́ственная дѣя́нія твоя́, я́ко бо кри́нъ во удо́ліи процвѣ́лъ еси́ и благово́ниши душе́вная на́ша чу́вства, Авра́міе, о́тче на́шъ, моли́ спасти́ся душа́мъ на́шимъ.

Яко уязви́лся еси́ жела́ніемъ боже́ственнымъ, преподо́бне о́тче на́шъ Авра́міе, взе́мъ бо кре́стъ тво́й, послѣ́довалъ еси́ Влады́цѣ Христу́. Тогда́ вся́ плотска́я мудрова́нія умертви́лъ еси́ и наслѣ́довалъ еси́ вои́стинну кро́ткихъ зе́млю, прича́стіемъ обожа́емь, неизрече́ннаго о́наго весе́лія наслажда́яся, помина́й на́съ, творя́щихъ всесвяту́ю и пречестну́ю твою́ па́мять.

Сла́ва, гла́съ 8:

Преподо́бне и богоблаже́нне о́тче на́шъ Авра́міе, вои́стинну сподо́бился еси́ боже́ственныя жи́зни, посто́мъ бо и бдѣ́ніемъ изнури́лъ еси́ тѣ́ло твое́, тѣ́мже и о́бразъ бы́лъ еси́ мона́ховъ. Аще бо и тѣле́сный язы́къ умолче́, но чудеса́ свидѣ́тельствуютъ. Гра́дъ же Росто́въ, проповѣ́дуя, хва́лится: имѣ́ю въ себѣ́, глаго́ля, неистощи́мое сокро́вище. Са́ми бо зря́ще честну́ю ра́ку моще́й твои́хъ, и чудеса́ быва́ема, прославля́ютъ просла́вльшаго тя́ Го́спода, Ему́же моли́ся дарова́ти вселе́ннѣй ми́ръ и ве́лію ми́лость.

И ны́нѣ, богоро́диченъ, [гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

На стихо́внѣ стихи́ры, гла́съ 2:

Ду́ха Свята́го теплото́ю, му́дре, жела́ніе се́рдца твоего́, е́же къ Бо́гу, согрѣ́явъ, и зи́му страсте́й умертви́въ, многоко́зненную же си́лу и́дола Веле́са низложи́лъ еси́, въ коне́цъ не́мощна сего́ показа́въ. Небе́сная же во́инства удиви́лъ еси́ терпѣ́ніемъ твои́мъ, я́ко по́стниковъ подража́тель и преподо́бныхъ сожи́тель, моли́ спасти́ся душа́мъ на́шимъ.

Сти́хъ: Честна́ предъ Го́сподемъ сме́рть преподо́бныхъ Его́.

Кре́стъ тво́й взе́мъ, преподо́бне Авра́міе, крѣ́пко послѣ́довалъ еси́ Христу́, на́съ ра́ди на Крестѣ́ распе́ншемуся; и Того́ ра́ди любве́ вся́ оста́вилъ еси́, и Того́ еди́наго возлюби́лъ еси́: Ему́же и со а́нгелы предстоя́, моли́ уще́дрити мíръ и спасти́ ду́ши на́ша.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Яко пріе́мъ, о́тче, небе́сное сѣ́мя, пло́дъ стори́чествующь добродѣ́тели прине́слъ еси́, Авра́міе о́тче на́шъ, пита́я благоче́стно гла́домъ та́ющія добродѣ́тели, отону́дуже исцѣле́нія вѣ́рою приходя́щимъ подае́ши. Тѣ́мже, я́ко имѣ́я дерзнове́ніе ко Христу́, моли́, преподо́бне о́тче на́шъ Авра́міе, спасти́ся вѣ́рою и любо́вію честву́ющимъ па́мять твою́.

Сла́ва, гла́съ 8:

Пріиди́те, мона́ховъ мно́жества, дне́сь, псало́мская пѣ́нія и цвѣ́ты духо́вныя принесе́мъ, я́ко вои́стинну мона́шескому удобре́нію и преподо́бныхъ сожи́телю. Его́же хва́ляще, си́це рце́мъ: ра́дуйся, свѣти́льниче многосвѣ́тлый, приведы́й ко Христу́ мона́ховъ мно́жества; ра́дуйся, гра́да Росто́ва похвала́ и утвержде́ніе, и всѣ́хъ вѣ́рныхъ благоути́шное приста́нище, и очище́ніе боля́щихъ во грѣсѣ́хъ, на боже́ственная ты́я возвыша́я раче́ія. Тѣ́мъ, въ пречестну́ю па́мять твою́, святу́ю и ангелоговѣ́йную обстоя́ще ра́ку, любе́зно облобыза́емъ, преподо́бне о́тче на́шъ Авра́міе, и Боже́ственнаго человѣколю́бія про́симъ получи́ти твои́ми моли́твами, мíру ми́ръ дарова́ти и душа́мъ на́шимъ ве́лію ми́лость.

И ны́нѣ, богоро́диченъ, [гла́съ то́йже:

Азъ, Дѣ́во Свята́я Богоро́дице, къ покро́ву Твоему́ прибѣга́ю: вѣ́мъ, я́ко обря́щу Тобо́ю спасе́ніе, мо́жеши бо, Чи́стая, помощи́ мнѣ́.]

Тропа́рь, гла́съ 1:

Просвѣти́вся Боже́ственною благода́тію, невѣ́рныя лю́ди наста́вилъ еси́ къ свѣ́ту богоразу́мія: и по сме́рти сія́я свѣ́тлостію житія́ твоего́, источа́еши исцѣле́нія притека́ющимъ съ вѣ́рою къ ра́цѣ моще́й твои́хъ, Авра́міе о́тче на́шъ, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ воскре́сенъ:

[Гавріи́лу вѣща́вшу Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ.]


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 1. Подо́бенъ: О, ди́внаго чудесе́!

О, пресла́внаго чудесе́! Исто́чникъ благоче́стія въ Росто́вѣ явля́ется и лѣ́ствица къ небеси́ Авра́мій быва́етъ на́мъ; весели́тся гра́дъ Росто́въ, имѣ́я въ себѣ́ мо́щи того́. Ра́дуется правосла́вныхъ мно́жество, Авра́мія иму́ще въ бѣда́хъ засту́пника, и къ нему́ вопію́ще: преподо́бне, ра́дуйся и Го́споду моли́ся дарова́ти душа́мъ на́шимъ ми́ръ и ве́лію ми́лость. [Три́жды.]

О, ди́внаго чудесе́! Вѣ́твь благода́ти въ Россíи воспитова́ется и кипари́съ доброво́нный въ Росто́вѣ возраста́етъ, и сто́лпъ непоколе́блемь правосла́внымъ утвержда́ется, и крѣ́пкій адама́нтъ душе́ю быва́етъ Авра́мій богоблаже́нный. Тѣ́мъ богому́дрыхъ собо́ри на высоту́ ду́хомъ вознеси́теся, преподо́бному вопію́ще: о́тче Авра́міе, ра́дуйся и Го́споду помоли́ся дарова́ти душа́мъ на́шимъ ми́ръ и ве́лію ми́лость. [Три́жды.]

Ди́вны твоя́ та́йны, Христе́ Бо́же! Яко дарова́лъ еси́ на́мъ такова́го свѣти́льника, Авра́мія предо́бляго, Правосла́вному Импера́тору на́шему на сопроти́вныя побо́рника, Веле́са погуби́вшаго и хра́мъ и́мени Твоему́ свято́му воздви́гшаго, въ не́мже и́мя Твое́ прославля́ется и вѣ́рніи укрѣпля́емся, припа́дающе къ Тебѣ́, всѣ́хъ Влады́цѣ, прося́ще, Человѣколю́бче, дарова́ти душа́мъ на́шимъ ми́ръ и ве́лію ми́лость. [Два́жды.]

Сла́ва, гла́съ 5:

Добродѣ́тели подража́теля похва́лимъ дне́сь, Авра́мія, похвалу́ Россíйскую, и па́мять его́ свѣ́тло торжеству́имъ, вѣ́рныхъ собо́ри соше́дшеся въ це́рковь Госпо́дню, мо́щи того́ облобыза́юще, и къ нему́ си́це вопію́ще: пріиди́ ны́нѣ, преподо́бне, и о на́съ непреста́нно моли́ся, пра́зднующихъ твое́ торжество́, да твои́ми моли́твами да́руетъ на́мъ Христо́съ ве́лію и бога́тую ми́лость.

И ны́нѣ, богоро́диченъ:

Въ Чермнѣ́мъ мо́ри [Неискусобра́чныя Невѣ́сты о́бразъ написа́ся иногда́: та́мо Моисе́й, раздѣли́тель воды́, здѣ́ же Гавріи́лъ, служи́тель чудесе́; тогда́ глубину́ ше́ствова немо́кренно Изра́иль, ны́нѣ же Христа́ роди́ безсѣ́менно Дѣ́ва; мо́ре по проше́ствіи Изра́илевѣ пребы́сть непрохо́дно, Непоро́чная по рождествѣ́ Емману́илевѣ пребы́сть нетлѣ́нна. Сы́й и пре́жде Сы́й, явле́йся я́ко Человѣ́къ, Бо́же, поми́луй на́съ].

Вхо́дъ. Проки́менъ дне́. Чте́нія три́.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 6:

Пріиди́те, празднолю́бцы и по́стникъ сосло́віе, вѣ́рою соше́дшеся, я́ко и́стиннаго по́стника почти́мъ Авра́мія дне́сь, ше́ствовавшаго по стопа́мъ Влады́ки своего́ у́зкій пу́ть, и безстра́стную жи́знь, и вѣ́рою возопіи́мъ: о, всеблаже́нне, сожи́телю преподо́бныхъ и по́стниковъ похвало́, о на́съ моли́ся ко Го́споду поми́ловатися душа́мъ на́шимъ.

Преподо́бне о́тче богоно́се Авра́міе, отъ ма́тернихъ пеле́нъ Бо́гу возложе́нъ еси́ и любве́ ра́ди Того́ вся́ оста́вилъ еси́, и и́дола Веле́са сокруши́въ, кова́рства его́ вся́ сте́рлъ еси́, и оби́тель соста́вивъ, мно́жество мона́ховъ собра́лъ еси́ сла́вити многопѣ́тую Тро́ицу, Юже моли́, блаже́нне, спасти́ся душа́мъ на́шимъ.

Иже на земли́ а́нгела и на небесѣ́хъ человѣ́ка Бо́жія, мíра благо́е украше́ніе, пи́щу благи́хъ добродѣ́телей, по́стниковъ похвалу́, Авра́мія, почти́мъ: насажде́нъ бо въ дому́ Бо́жіи, процвѣте́ пра́ведно, я́ко ке́дръ въ пусты́ни, въ преподо́бствѣ и пра́вдѣ.

Сла́ва, гла́съ 8:

Мона́ховъ мно́жества наста́вника тя́ почита́емъ, о́тче на́шъ Авра́міе, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ. Съ ни́ми же моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Небе́сныхъ чино́въ ревни́тель, тѣ́хъ житіе́ пожи́въ, въ ме́ртвеннѣмъ тѣлеси́, я́ко а́нгелъ, показа́лся еси́. Сего́ ра́ди, отъ Христа́ Бо́га да́ръ чуде́съ пріе́мъ, и на́мъ оби́льно исцѣле́нія подава́еши, и отъ вся́кихъ скорбе́й спаса́еши къ тебѣ́ притека́ющія, я́ко на тя́ упова́ніе возлага́емъ и твои́ми моли́твами отъ бѣ́дъ избавля́емся, о́тче Авра́міе.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Небе́сныхъ чино́въ ра́дованіе твое́ житіе́, свя́те Авра́міе, и на земли́ человѣ́комъ ско́рый въ бѣда́хъ засту́пниче, моли́ся о на́съ, къ тебѣ́ притека́ющихъ и твое́ преставле́ніе пра́зднующихъ, я́ко на тя́ упова́ніе возлага́емъ и твои́ми моли́твами отъ бѣ́дъ спаса́емся.

Сти́хъ: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится.

Небе́сный человѣ́къ яви́ся на́мъ и земны́й а́нгелъ проповѣ́дуется дне́сь Авра́мій освяще́нный, его́же житію́ удиви́шася а́нгели и вострепета́ша ду́си лука́віи, то́й на́ми пра́зднуется дне́сь. И того́ торжество́ ликовству́юще, вопіе́мъ: моли́, преподо́бне, Христа́ Бо́га, да твои́ми моли́твами отъ вра́гъ свободи́мся.

Сла́ва, гла́съ 6:

Дне́сь вѣ́рныхъ собо́ри соше́дшеся, восхва́лимъ отца́ на́шего, духо́вно веселя́щеся и па́мять его́ свѣ́тло пра́зднующе, я́ко вра́жія полки́ прогна́вшаго и де́мона посрами́вшаго, и зла́го и́дола Веле́са искорени́вшаго, и гра́дъ Росто́въ купѣ́лію Свята́го Ду́ха обно́вльшаго, и ны́нѣ сія́юща чудесы́, Авра́мія предо́бляго; я́ко да того́ моли́твами да́руетъ на́мъ Христо́съ ве́лію и бога́тую ми́лость.

И ны́нѣ, богоро́диченъ:

[Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

[На благослове́ніи хлѣ́бовъ: Тропа́рь свята́го, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4:

Крѣ́пкій душе́ю адама́нтъ яви́лся еси́, преподо́бне, непоколе́блемо основа́ніе въ вѣ́рѣ имѣ́яй, о́тче Авра́міе. Сего́ ра́ди гну́снаго и́дола разори́лъ еси́ и въ не́мъ де́монскія полки́ побѣди́лъ еси́ я́ко до́бръ во́инъ Христо́въ. Ему́же моли́ся, да спасе́тъ тебе́ ра́ди ду́ши на́ша. [Два́жды.]

Сла́ва, и ны́нѣ, богоро́диченъ:

Ра́дуйся, Влады́чице, небе́сная Цари́це, Бо́га пло́тію на́мъ ро́ждшая, еди́наго Агнца, за на́съ во́лею поже́ршагося. Того́ моли́, Всеблаже́нная, да Твои́ми моли́твами спасе́тъ ду́ши на́ша.

По 2-мъ стихосло́віи сѣда́ленъ, гла́съ 2:

Моли́твъ твои́хъ тре́буемъ, грѣ́шніи, и ты́я на́мъ пода́ждь, о́тче Авра́міе, я́ко да, наставля́еми и́ми, пре́йдемъ къ небу́рному приста́нищу и вѣнцы́ небе́сныя улучи́мъ, и тебѣ воспѣва́емъ: ра́дуйся, о́тче отце́въ, похвала́ на́ша и утвержде́ніе. [Два́жды.]

Сла́ва, и ны́нѣ, богоро́диченъ:

Моли́твы Твои́хъ ра́бъ пріими́, Богоро́дице, Засту́пнице на́ша и прибѣ́жище: къ кому́ бо прибѣ́гнемъ, ра́звѣ Тебе́, Влады́чице? Ты́ покро́въ на́шъ и заступле́ніе. И ны́нѣ не оста́ви на́съ до конца́ поги́бнути, да Твои́ми моли́твами отъ бѣ́дъ сохраня́емся, на Тя́ бо упова́ніе съ Бо́гомъ, Богоро́дице, возложи́хомъ.

[Велича́ніе:

Ублажа́емъ тя́, преподо́бне о́тче Авра́міе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 5:

Апо́столовъ ревни́тель бы́въ, преподо́бне, сего́ ра́ди и Богосло́ву бесѣ́довати сподо́бился еси́, и сего́ же́злъ пріи́мъ, Веле́са разруши́лъ еси́ и того́ ко́зни до конца́ искорени́лъ еси́, и невѣ́рныя ко Христо́вѣ вѣ́рѣ приве́лъ еси́. Ны́нѣ же Христа́ Бо́га моли́ о чту́щихъ па́мять твою́, дарова́ти на́мъ ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ:

Храни́телище нело́жное Содѣ́теля на́шего, Влады́чице Богоро́дице, сохрани́ гра́дъ и лю́ди, и́мя Твое́ свято́е сла́вящія, и покры́й покро́вомъ ми́лости Твоея́: Тя́ бо те́плу Предста́тельницу и́мамы ко изъ Тебе́ ро́ждшемуся Христу́, Бо́гу на́шему, да Твои́ми моли́твами спасе́тъ ду́ши на́ша.

Степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 8:

Пріиди́те, мона́ховъ мно́жества, пріиди́те, пусты́нное воспита́ніе, пріиди́те и ли́къ соста́вимъ, дне́сь бо трапе́за поставля́ется и па́че благово́нныхъ арома́тъ облагоуха́етъ на́съ па́мять преблаже́ннаго Авра́мія. Пріиди́те, стеце́мся къ ра́цѣ его́ и любе́зно цѣлу́емъ пречестно́е о́но тѣ́ло, нетлѣ́нно во гро́бѣ лежа́що, и на́мъ оби́льно исто́чникъ чуде́съ источа́ющо, и къ нему́ возопіе́мъ: о́тче Авра́міе, твои́ми моли́твами проси́ на́мъ у Христа́ ми́ра и ве́лія ми́лости.

Кано́нъ Богоро́дицы [со ирмосо́мъ] на 6 и преподо́бнаго на 8, гла́съ 1.

Пѣ́снь 1.

Ирмо́съ: Го́рькія рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пѣ́снь я́ко Благодѣ́телю пое́тъ Бо́гу, чудодѣ́ющему мы́шцею высо́кою, я́ко просла́вися.

Лю́тыми страстьми́ побѣжда́емь е́смь, окая́нный, и сего́ ра́ди молю́ Тя, Христе́ Бо́же, отъ си́хъ изба́вити мя́, я́ко да по достоя́нію возмогу́ воспѣ́ти Твоего́ уго́дника, Авра́мія преподо́бнаго.

Лю́тыхъ смуще́ній свободи́ мя, о́тче, да наставля́емь твои́ми моли́твами, свѣ́тло воспою́ твое́ торжество́, богоно́се Авра́міе.

Лю́таго и́дола искорени́лъ еси́, о́тче преблаже́нне, и ко Христу́ приве́лъ еси́ невѣ́рныхъ собо́рища, и ты́я, я́ко ке́дръ, и́же въ Лива́нѣ, умно́жилъ еси́ твои́ми моли́твами, во сто́ плодонося́щія и врага́ попира́ющія.

Богоро́диченъ: Лю́тыхъ напа́стей и мно́гихъ прегрѣше́ній свободи́ мя, Влады́чице, и проще́ніе пода́ждь ми́, я́ко дерзну́хъ написа́ти мое́ю скве́рною десни́цею свято́е Твое́ и́мя.

Катава́сія: Отве́рзу уста́ моя́...

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Да утверди́тся се́рдце мое́ моли́твами твои́ми, свя́те, и научи́ мя, недосто́йнаго, похвали́ти по досто́инству пресла́вную па́мять твою́, богоно́се о́тче на́шъ Авра́міе.

Да утверди́ши ны́, богому́дре, на безпло́тныя враги́, е́же прогони́ти ты́я, твою́ же па́мять велича́ти и Христа́ прославля́ти, тебе́ просла́вльшаго, о́тче Авра́міе.

Да утверди́мся на ка́мени непоколеби́мѣмъ твои́хъ моли́твъ, да не поколе́блютъ на́съ прило́зи льсти́ваго, и у́мъ на́шъ просвѣти́ свѣ́томъ за́повѣдей Христо́выхъ, я́ко да вѣ́рою воспѣва́емъ тя́, преблаже́нне Авра́міе.

Богоро́диченъ: Да утвержде́нъ бу́ду ми́лостію Твое́ю, Влады́чице, и покрове́нъ кро́вомъ кри́лъ Твои́хъ, Богоро́дице, и избѣ́гну сѣте́й лука́ваго, воспѣва́я пресла́вное Твое́ торжество́.

По 3-й пѣ́сни сѣда́ленъ, гла́съ 5:

Апо́столовъ ревни́тель бы́въ, преподо́бне, сего́ ра́ди и Богосло́ву бесѣ́довати сподо́бился еси́, и сего́ же́злъ пріи́мъ, Веле́са разруши́лъ еси́ и того́ ко́зни до конца́ искорени́лъ еси́, и невѣ́рныя ко Христо́вѣ вѣ́рѣ приве́лъ еси́. Ны́нѣ же Христа́ Бо́га моли́ о чту́щихъ па́мять твою́, дарова́ти на́мъ ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ:

Побѣ́ду иму́ще крѣ́пкія си́лы на Тя́ любо́вію вѣ́рно надѣ́ющіися, Чи́стая Цари́це Дѣ́во Богоро́дице, враги́ покаря́юще, побо́рницу иму́щи Тя́, весели́мся.

Пѣ́снь 4.

Ирмо́съ: Разумѣ́хъ, Всеси́льне, Твое́ смотре́ніе и со стра́хомъ просла́вихъ Тя́, Спа́се.

Разумѣ́хъ, преподо́бне, мое́ недосто́инство и со стра́хомъ косну́хся къ твоему́ хвале́нію, но ты́, свя́те, пріими́, я́ко убо́гія двѣ́ ца́тѣ, съ вѣ́рою тебѣ́ приноси́мое хвале́ніе, всехва́льне о́тче Авра́міе.

Разумѣ́лъ еси́, о́тче преблаже́нне, кова́рствія лука́ваго Веле́са и сего́ до конца́ низложи́лъ еси́, на́съ на моли́тву воздви́гни дне́сь, да вѣ́рно ликовству́емъ, преблаже́нне, въ па́мяти твое́й, о́тче Авра́міе.

Разумѣ́лъ еси́, свя́те, де́мона во умыва́льницу твою́ вше́дша и па́кость тебѣ́ сотвори́ти хотя́ща, сосу́дъ кресто́мъ покры́въ, того́ опали́лъ еси́: ны́нѣ же на́съ спаси́ отъ его́ ловле́нія твои́ми моли́твами, о́тче Авра́міе.

Богоро́диченъ: Разумѣ́ла еси́, Влады́чице, воплоти́вшагося изъ Тебе́ Христа́ Бо́га на́шего, Того́ моли́, Богоблаже́нная, да Твои́ми моли́твами сохрани́тъ на́съ отъ вся́каго навѣ́та льсти́ваго.

Пѣ́снь 5.

Ирмо́съ: Отъ но́щи у́тренююще, пое́мъ Тя́, Христе́, Отцу́ Собезнача́льна и Спа́са ду́шъ на́шихъ: ми́ръ мíрови пода́ждь, Человѣколю́бче.

Изъ но́щи тмы́ глубо́кія возве́лъ еси́ лю́ди твоя́, и покая́нія свѣ́томъ просвѣти́въ, ко Христу́ приве́лъ еси́, богоно́се Авра́міе, и на́съ просвѣти́, блаже́нне, сія́ніемъ твоея́ благода́ти, я́ко да при́сно тя́ ублажа́емъ.

Изъ но́щи идолонеи́стовства извле́клъ еси́, о́тче, мно́жество люде́й и си́хъ погруже́ніемъ благода́ти озари́лъ еси́ духо́вныя; и ны́нѣ на́съ озари́ свѣ́томъ невеще́ственнымъ, и моли́твами твои́ми просвѣти́, я́ко да по до́лгу велича́емъ тя́.

Изъ но́щи страсте́й мои́хъ возведи́ мя, свя́те, и да́руй ми́ свѣ́тъ мы́сленный, да возмогу́, недосто́йный, отъ гру́баго ума́ моего́ худо́е сіе́ плете́ніе принести́ къ похвале́нію чуде́съ пресла́внаго твоего́ торжества́, богоно́се Авра́міе.

Богоро́диченъ: Изъ но́щи а́да преиспо́дняго изведе́ ны Сы́нъ Тво́й, Пречи́стая, и рая́ жи́тели па́ки содѣ́лавъ: сего́ ра́ди, покланя́ющеся Ему́, Тебе́, Дѣ́во, ублажа́емъ.

Пѣ́снь 6.

Ирмо́съ: Отве́рглъ мя́ еси́ во глубины́ се́рдца морска́го, и спа́слъ еси́ мя́, Спа́се, отъ рабо́ты сме́ртныя, и разрѣши́лъ еси́ у́зы беззако́ній мои́хъ.

Отверго́шася неразу́мніи твоего́ уче́нія, блаже́нне, и къ Веле́су, глу́ху и́долу, ниже́ глаго́лющу, ниже́ осяза́ющу притека́ху. И егда́ сего́ пробо́лъ еси́ тро́стію Богосло́вовою, тогда́ и си́хъ къ ра́зуму благоче́стія наста́вилъ еси́, о́тче Авра́міе.

Отве́рженъ е́смь въ ро́въ неча́янія, многостра́стный, но ты́ возведи́ мя, свя́те, на стезю́ покая́нія, я́ко да отве́ргу вся́ моя́ зла́я дѣя́нія и облеку́ся свѣ́томъ моли́твъ твои́хъ, о́тче Авра́міе блаже́нне.

Отве́рженъ бы́въ окая́нный де́монъ, восхотѣ́ спо́ну тебѣ́ сотвори́ти, преобразу́ется въ во́ина лука́вый, и предстае́тъ тогда́ владу́щему благовѣ́рному кня́зю Влади́міру, и того́ на тя́ вооружа́етъ. Ты́ же, сего́ прогна́въ, вя́щше прославля́ешися и кня́зя въ вѣ́рѣ утвержда́еши.

Богоро́диченъ: Отве́рзи мнѣ́, Влады́чице, две́ри ми́лости Твоея́, я́коже Сы́нъ Тво́й отве́рзе разбо́йнику и блудни́цѣ, и блу́дному две́ри милосе́рдія; я́ко да и а́зъ Твои́ми моли́твами улучу́ жи́знь вѣ́чную, воспѣва́я Твою́ бла́гость.

Конда́къ, гла́съ 2:

Иго Христо́во пріе́мъ, Авра́міе, и Того́ кре́стъ на ра́мо взе́мъ, послѣ́довалъ еси́ Ему́, насажде́нъ бы́въ въ дому́ Госпо́дни и процвѣ́лъ еси́, я́ко фи́никсъ, и я́ко ке́дръ, и́же въ Лива́нѣ, умно́жилъ еси́ ча́да твоя́, му́жъ жела́ній духо́вныхъ: отъ возлю́бленнаго же апо́стола Іоа́нна Богосло́ва благода́ть воспріи́мъ, жезло́мъ сокруши́лъ еси́ и́дола и разсы́палъ еси́ его́, я́ко пра́хъ, и чудотво́рецъ у́бо ве́лій яви́лся еси́, преподо́бне. Тѣ́мже Христа́ Бо́га моли́ непреста́нно о всѣ́хъ на́съ.

Икосъ:

Авра́міе богому́дре, житіе́ непоро́чно стяжа́лъ еси́, и кíй язы́къ человѣ́чь довлѣ́етъ когда́ къ похвалѣ́ повѣ́дати, я́же о тебѣ́? Оба́че воспое́мъ Бо́жію му́дрость и твоя́, преподо́бне, стра́сти и по́двиги, я́же на земли́, я́ко свѣти́льника тя́, я́вльшася всѣ́мъ человѣ́комъ и мно́гимъ терпѣ́ніемъ въ ли́цѣ а́нгельстѣмъ возсія́вша. Тѣ́мъ въ пѣ́снехъ вопіе́мъ ти́ си́це: ра́дуйся, Авра́міе преподо́бне и богоно́се, небе́сный человѣ́че и земны́й а́нгеле; ра́дуйся, Ду́ха Свята́го оби́телище; ра́дуйся, я́ко изъ мла́да послѣ́довалъ еси́ Святѣ́й Тро́ицѣ; ра́дуйся, цѣлому́дрія сто́лпе, низложи́вый де́мона многокова́рственнаго; ра́дуйся, я́ко отъ млады́хъ ногте́й послѣ́довалъ еси́ Христу́; ра́дуйся, свѣти́льниче многосвѣ́тлый, приведы́й ко Христу́ мона́ховъ мно́жества; ра́дуйся, разори́вый и́дола и воздви́гнувый Христо́ву це́рковь; ра́дуйся, и́же идолопокло́нники сотвори́лъ еси́ Пресвятѣ́й Тро́ицѣ покло́нники; ра́дуйся, я́ко моли́твами твои́ми де́мони побѣжда́ются; ра́дуйся, гра́ду Росто́ву похвала́, я́ко пе́рвую о́бщую оби́тель воздви́глъ еси́, и въ не́й мно́гія мона́хи, я́ко виногра́дъ Христо́въ, насади́лъ еси́ и Тро́ицу сла́вити научи́лъ еси́; ра́дуйся, Правосла́вному Импера́тору на́шему похвала́ и утвержде́ніе, Его́же соблюди́ моли́твами твои́ми отъ вра́гъ ненавѣ́тна, да зове́мъ ти́: ра́дуйся, о́тче Авра́міе блаже́нне, и Христа́ Бо́га моли́ непреста́нно о всѣ́хъ на́съ.

Пѣ́снь 7.

Ирмо́съ: Явле́йся въ купинѣ́ законополо́жнику огне́мъ, и рождество́ Дѣ́вы проображе́й въ не́й, благослове́нъ еси́ Го́споди, Бо́же оте́цъ на́шихъ.

Яви́лся еси́ въ Россíи свѣти́льникъ пресвѣ́тлый, о́тче Авра́міе, Трисо́лнечными свѣтосія́ніи къ богозна́нію на́съ приводя́ и пѣ́ти науча́я: благослове́нъ Бо́гъ оте́цъ на́шихъ.

Яви́лся еси́ рѣка́ медото́чныхъ уче́ній, богоно́се, вѣ́рныя напая́я, грѣхи́ же потопля́я и къ позна́нію благоче́стія всѣ́хъ возводя́, и науча́я пѣ́ти: благослове́нъ Бо́гъ оте́цъ на́шихъ.

Явлься тебѣ́ учени́къ Христо́въ богослове́снѣйшій и дѣ́вственникъ возлю́бленный, тро́сть тебѣ́, блаже́нне, дарова́, е́юже діа́вола пробо́лъ еси́ и ктому́ неви́дима сего́ сотвори́лъ еси́, и человѣ́ки научи́лъ еси́ вопи́ти: благослове́нъ Бо́гъ оте́цъ на́шихъ.

Богоро́диченъ: Явле́йся я́ко Человѣ́къ Сы́нъ Тво́й, Богоневѣ́сто, на́съ обожи́ и къ ра́зуму ми́лости возведе́, и во свѣ́тѣ непристу́пнѣмъ ликова́ти устро́и воспѣва́ющія и глаго́лющія: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Пѣ́снь Тебѣ́ прино́симъ безпло́тныхъ, я́коже о́троцы въ пещи́, и, пою́ще, глаго́лемъ: благослови́те вся́ дѣла́ Госпо́дня Го́спода.

Пѣ́снь тебѣ́ приношу́, о́тче богоно́се Авра́міе, е́юже проповѣ́даю твоя́ по́двиги и чудеса́, и прославля́ю твое́ вели́чество, вопія́: благослови́те вся́ дѣла́ Госпо́дня Го́спода.

Пѣ́снь прино́сиши Христу́, лику́я со а́нгелы, о́тче Авра́міе, тѣ́хъ бо житію́ поревнова́лъ еси́ и на́съ въ па́мять твою́ ликова́ти устро́илъ еси́, пою́щихъ: благослови́те вся́ дѣла́ Госпо́дня Го́спода.

Пѣ́снь пое́ши херуви́мскую, и́мже и подо́бникъ бы́лъ еси́, кри́ла о́гненная воспріе́мъ, и́миже го́рняго Іерусали́ма дости́гъ, о на́съ моли́ся, о́тче Авра́міе, пою́щихъ вѣ́рно: благослови́те вся́ дѣла́ Госпо́дня Го́спода.

Богоро́диченъ: Пѣ́снь пріими́, Влады́чице, отъ несоверше́ннаго ума́ на́шего и моли́ся Сы́ну Твоему́ и Бо́гу на́шему, пода́ти на́мъ оставле́ніе грѣхо́въ, я́ко да воспѣва́емъ Тя́ во вся́ вѣ́ки.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Живоно́сный исто́чникъ благода́тныхъ во́дъ яви́лся еси́, Авра́міе богоблаже́нне: пода́ждь ми́ исто́чникъ сле́зъ, да омы́ю душе́вныя моя́ стра́сти и убѣлю́ свѣ́томъ покая́нія очернѣ́вшую ду́шу мою́.

Живоно́сный Кре́стъ на ра́мо взе́мъ, преподо́бне, распе́ншемуся на не́мъ Христу́ послѣ́довалъ еси́, о́тче Авра́міе, и вра́жія полки́ прогна́лъ еси́, и на́мъ проси́ ми́лости, торжеству́ющимъ твое́ пра́зднество, богоно́се.

Живоно́снымъ Кресто́мъ врага́ опали́лъ еси́, и сего́ въ сосу́дѣ запеча́тавъ, ученико́мъ рабо́тати отше́лъ еси́, показу́я смире́нія о́бразъ, и си́хъ науча́я любому́дренно послѣ́довати тебѣ́.

Богоро́диченъ: Исто́чникъ ро́ждши на́мъ, Влады́чице, житіе́ ми́рно рабо́мъ Твои́мъ испроси́ и Благовѣ́рному Импера́тору на́шему на иноплеме́нники посо́бствуй, я́ко Ты́ еси́ спасе́ніе на́ше, Богоневѣ́стная.

Свѣти́ленъ. Подо́бенъ: Жены́ услы́шите.

По́стнически пожи́въ, о́тче Авра́міе, и на враги́ вла́сть пріи́мъ, я́ко и въ сосу́дѣ ты́я затворя́ти и кресто́мъ опаля́ти; и человѣ́ки отъ неду́гъ исцѣлева́еши, притека́ющія съ вѣ́рою къ ра́цѣ моще́й твои́хъ и почита́ющія, богоно́се, всечестну́ю па́мять твою́. [Два́жды.]

Сла́ва, и ны́нѣ, богоро́диченъ:

Зачала́ еси́ во утро́бѣ Бо́га, Его́же трепе́щутъ вся́ небе́сныя си́лы, Сего́, Дѣ́во, родила́ еси́ пло́тію, на́ше естество́ обожи́вшаго. Его́же моли́, богоблаже́нная, съ преподо́бнымъ Авра́міемъ, да спасе́тъ Тебе́ ра́ди ду́ши на́ша.

На хвали́техъ стихи́ры, на 4, гла́съ 2. Подо́бенъ: Егда́ отъ дре́ва.

Терпѣ́лъ еси́ гоне́нія отъ невѣ́рныхъ, ра́довался еси́ надѣ́емыми, я́же угото́ва Бо́гъ лю́бящимъ Его́. Сего́ ра́ди, преподо́бне, ве́тхаго совле́клся еси́ человѣ́ка и ве́тхаго искорени́въ и́дола, благода́тію же креще́нія просвѣти́лъ еси́ гра́дъ Росто́въ и въ не́мъ, я́ко со́лнце, сія́я чудесы́, Россíйскую страну́ отъ бѣ́дъ спаса́еши и отъ ва́рварскаго нахожде́нія. Сего́ ра́ди мо́лимъ тя́, о́тче Авра́міе: моли́ Христа́ Бо́га спасти́ся душа́мъ на́шимъ. [Два́жды.]

Терпѣ́лъ еси́ отъ идолопокло́нниковъ гоне́нія и ра́довался еси́ отъ Влады́ки Христа́ воздая́ніемъ, и къ невѣ́рнымъ вопія́лъ еси́: ну́ждно страда́ніе, но ра́достно возме́здіе; мно́ги ско́рби, но сла́докъ ра́й. И сего́ ра́ди они́, оста́вльше окая́ннаго Веле́са, къ тебѣ́ притека́ху, глаго́люще: моли́ Христа́ Бо́га, о́тче Авра́міе, да твои́ми моли́твами спасе́тъ ду́ши на́ша.

Терпѣ́лъ еси́ отъ врага́ ско́рби, и ра́дуяся, вѣне́цъ отъ Христа́ пріе́млеши, престо́лу сла́вы предстоя́, со а́нгелы лику́еши. О на́съ непреста́нно моли́ся, преподо́бне, да твои́ми моли́твами отъ бѣ́дъ и скорбе́й изба́вимся. Тя́ бо те́пла предста́теля къ Бо́гу и́мамы, я́ко да тебе́ ра́ди, о́тче Авра́міе, спасе́тъ ду́ши на́ша.

Сла́ва, гла́съ 8:

Пріиди́те, празднолю́бныхъ собо́ри, пріиди́те, правосла́вныхъ торжество́, пріиди́те, мона́ховъ богосочета́нный ли́че, пріиди́те, насы́титеся ны́нѣшняго пра́зднства. Пріиди́те, овча́та, Госпо́дня духо́вныя огра́ды. Пріиди́те, да лику́имъ свѣ́тло въ па́мять отца́ на́шего, дне́сь бо богоно́сный Авра́мій лику́етъ со безпло́тными си́лами, предстоя́ престо́лу всѣ́хъ Царя́ Христа́ Бо́га, и мо́лится о душа́хъ на́шихъ.

И ны́нѣ, богоро́диченъ, [гла́съ то́йже]:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. [Ектеніи́], и отпу́стъ.



НА ЛИТУРГІИ,

Блаже́нна свята́го отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, [гла́съ 6:] Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 10. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 260 – 267 об.

/ Къ оглавленію раздѣла /


Наверхъ / Къ титульной страницѣ

0