Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 28-й де́нь.
Святы́хъ му́ченикъ Тере́нтія и Неони́лы. И преподо́бнаго отца́ на́шего Стефа́на Савваи́та и творца́ кано́новъ.

[ВЕЧЕРЪ,]
На Го́споди воззва́хъ: стихи́ры му́чениковъ, гла́съ 4. Подо́бенъ: Яко до́бля.

Многообра́знымъ му́камъ* му́жески пріобщи́вшеся,* вра́жія возноше́нія низложи́сте,* исповѣ́дающе, блаже́нніи, предъ мучи́тели* Явльшагося на́съ ра́ди* дебельство́мъ пло́ти,* и пречи́стыя Стра́сти претерпѣ́вша во́лею,* и источи́вша мíру* просвѣще́ніе и безстра́стіе.

Съ Тере́нтіемъ возсія́* Неони́ла сла́вная,* Нитта́ же и Сарви́лъ чу́дніи,* Фо́тъ же и Іера́ксъ съ си́ми зако́нно пострада́вше* и о́гнь муче́ній Боже́ственною росо́ю Ду́ха угаси́вше* и бы́ша столпи́ благоче́стія,* и благопрія́тныя же́ртвы,* и приноше́нія пречи́ста.

Яко многосвѣ́тлое со́лнце,* съ луно́ю совоку́плься Неони́лою,* роди́лъ еси́, о Тере́нтіе,* ли́къ звѣ́здъ седмочи́сленъ,* му́ченическою кро́вію обагри́вшихся,* и свѣ́тлое испуща́ющихъ сія́ніе,* всели́вшихся же въ невече́рній поко́й,* идѣ́же всѣ́хъ страда́лецъ стада́* свѣ́тло ликовству́ютъ.

Ины стихи́ры преподо́бнаго, гла́съ 8. Подо́бенъ: О, пресла́внаго чудесе́!

Отче богоно́сне Стефа́не,* боже́ственнымъ смы́сломъ у́мъ укрѣпи́въ свѣтлѣ́йше,* я́рость же му́жествомъ,* цѣлому́дріемъ жела́ніе,* пра́вдою же всю́ си́лу души́ упра́вилъ еси́.* Мудролю́бнѣйше колесни́цу прекра́сну* добродѣ́телей состро́илъ еси́,* на ню́же всѣ́дъ, ра́дуяся,* возше́лъ еси́ къ высотѣ́, сла́вне.

Отче богоно́сне Стефа́не,* богосло́віемъ у́мъ* просвѣти́лъ еси́, преподо́бне,* я́коже копіено́сную я́рость* простира́я на ху́льныя, о́тче, еретики́,* возжелѣ́въ пи́щи вы́шнія,* ея́же сподо́бился еси́ причасти́тися, чу́дне,* предстоя́ престо́лу Всецаря́* и Вседержи́теля.

Отче богоно́сне Стефа́не,* воздержа́ніемъ у́мъ утучня́я всегда́,* къ Первовино́вному востещи́ сотвори́лъ еси́,* и отве́рглъ еси́ мíра смуще́ніе,* и молвы́ оттря́съ,* ума́ чистото́ю* сраствори́вся, всему́дре, съ жела́ніемъ,* вои́стинну кра́йнимъ,* богому́дре преподо́бне.

Сла́ва, и ны́нѣ, богоро́диченъ. Подо́бенъ то́йже:

Дѣ́вства сосу́дъ* и чи́стое Бо́жіе и кра́сное жили́ще,* молю́ Тя, всечестно́е,* ду́шу мою́ утѣ́ши,* озло́бленную я́домъ зміи́нымъ* и умерщвле́ную преступле́ньми,* я́ко да сла́влю Тя́,* вѣ́рныя вся́ возвели́чившую,* Богора́дованная.

Крестобогоро́диченъ, подо́бенъ то́йже:

Что́ зри́мое видѣ́ніе,* е́же Мои́ми очесы́ ви́дится, о Влады́ко:* содержа́й всю́ тва́рь* на дре́во воздви́женъ бы́въ* и умира́еши, всѣ́мъ дая́й жи́знь? —* Богоро́дица, пла́чущися, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.

Сла́ва, тропа́рь Стефа́на, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, архіере́овъ богодохнове́нное удобре́ніе, Стефа́не прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ.



НА УТРЕНИ,
[На Бо́гъ Госпо́дь: Тропа́рь му́чениковъ, два́жды. Сла́ва, преподо́бнаго. И ны́нѣ, богоро́диченъ или́ крестобогоро́диченъ.]

Кано́нъ окто́иха еди́нъ [на 6], и святы́хъ два́ [кано́на на 8].

Кано́нъ му́чениковъ. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Глубино́ю обурева́емь грѣха́, Человѣколю́бче, къ еди́ной пучи́нѣ благоутро́бія Твоего́ взира́ю очесы́ моего́ се́рдца, окорми́ и спаси́ мя страстоте́рпецъ моли́твами.

Незаходи́мое ва́съ Со́лнце звѣ́зды показа́ на тве́рди Це́ркве Своея́, озаря́ющія сія́ніемъ по́двигъ, му́ченицы прехва́льніи, сея́ исполне́ніе.

Вѣ́ры побо́рницы, Це́ркве утвержде́ніе, Тере́нтій бы́сть, Нитта́ же, Сарви́лъ, Ѳеоду́лъ, Іера́ксъ, Неони́ла, и Ви́лъ чу́дный, Евни́кія же и Фо́тъ.

Богоро́диченъ: Ра́дости на́мъ хода́таица, я́ко пріе́мши полноту́ всего́ Божества́, яви́лася еси́, Всенепоро́чная. Тѣ́мже вси́ Тебѣ́, е́же ра́дуйся, со а́нгеломъ согла́сно зове́мъ, Богора́дованная.

Инъ кано́нъ преподо́бнаго. Гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Всю́ мою́ мра́чную, о́тче, мглу́ уны́нія свѣ́томъ Боже́ственнымъ разори́, Боже́ственную благода́ть пода́въ, Стефа́не, пѣ́ти па́мять твою́.

Еди́ный тебѣ́ добродѣ́телей иску́съ вѣ́домъ, мірскíя бо всеконе́чно зло́бы не прія́лъ еси́, отъ мла́денства Бо́гу, Стефа́не, возложе́нъ.

Всего́ Христу́ Спа́су ты́ тебе́ сама́го приве́дъ воздержа́тельно, заколе́ніе свѣ́тло благопрія́тно, безсме́ртнаго житія́, сла́вне, бы́лъ еси́ прича́стникъ.

Положи́ духо́вная мо́лнія сто́лпъ тя́ всесвѣ́телъ, пріе́мша достоя́ніе слу́жбы та́инственныя, вся́ вѣ́рныя озаря́ющая.

Богоро́диченъ: Пречи́стая Богоро́дице, всѣ́хъ ра́досте, Яже Бо́га въ Твое́й утро́бѣ вмѣсти́вши, Нескве́рная, изба́витися отъ вра́гъ моли́ся пою́щимъ Тя́.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Якоже со́лнце со многосвѣ́тлою луно́ю, соединя́емь Неони́лѣ сла́вный Тере́нтій, породи́ звѣ́здъ седмочи́сленный ли́къ му́чениковъ Христо́выхъ.

Сокруше́ніе твои́хъ уде́съ, страда́льче Тере́нтіе, пре́лести ко́сти, я́коже пра́хъ, истни́, тебѣ́ же исхода́таи сла́ву неизглаго́ланную.

Златы́ми впери́вшися крилы́, Евникíе, беззако́нныхъ лове́цъ кова́рствія избѣ́гла еси́ и вну́трь всели́лася еси́ черто́га мы́сленнаго.

Богоро́диченъ: Тя́ Му́дрость Бо́жія чистѣ́йшее селе́ніе обрѣ́тши, отъ Твои́хъ чи́стыхъ крове́й воплоти́ся, и по рождествѣ́ нетлѣ́нну показа́.

Инъ.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Скверня́щихъ въ житіи́ человѣ́ческія ду́ши избѣжа́вша тя́, Стефа́не, плотски́хъ, очи́сти пусты́ня издѣ́тска Боже́ственнымъ промышле́ніемъ.

Небе́сное иму́щіи житіе́, по́стницы тя́ пріе́мше, утверди́ша, блаже́нне, стра́хомъ Госпо́днимъ къ му́дрости Боже́ственнѣй.

Отце́въ повину́яся уче́ніемъ прему́дрости, стра́хъ Бо́жій, я́ко основа́ніе положи́лъ еси́ твоего́ небесоподо́бнаго, о́тче, житія́.

Богоро́диченъ: Безсѣ́менно зачала́ еси́, Богоневѣ́сто, Спа́са и Го́спода, избавля́ющаго ны́ отъ тли́, Тя́ вои́стинну пѣсносло́вящія.

Конда́къ Стефа́на, гла́съ 4. Подо́бенъ: Вознесы́йся.

Насади́лъ еси́ добродѣ́телей ра́й и напои́лъ еси́ то́ками сле́зъ твои́хъ, я́ко жи́зни, всесла́вне, дре́во получи́въ, спаси́ моли́твами твои́ми отъ тли́ ста́до твое́, изба́ви отъ обстоя́ній те́плѣ чту́щихъ тя́, Стефа́не, тя́ бо предста́теля велича́йша, му́дре, вси́ вѣ́рою и любо́вію стяжа́хомъ.

Сѣда́ленъ му́чениковъ, гла́съ 8. Подо́бенъ: Прему́дрости.

Яко звѣ́зды со́лнцу свѣтови́дны, Тере́нтію, дѣ́ти свяще́нныя я́вѣ совозсіява́ютъ и тва́рь просвѣща́ютъ, му́жескими по́двиги до́блественно сія́юще, многобо́жія но́щь разоря́ютъ. Ихже съ весе́ліемъ ублажа́емъ вѣ́рою, я́ко су́щія уго́дники Бо́жія, и возопіи́мъ: страстоте́рпцы всехва́льніи, моли́те Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять ва́шу.

Сла́ва, преподо́бнаго, гла́съ 5. Подо́бенъ. Собезнача́льное Сло́во.

Воздержа́ніемъ житіе́ украси́въ и стра́сти умертви́въ, попра́лъ еси́ вра́жія прило́ги, о́тче Стефа́не, и, преложи́вся къ Бо́гу, чудотво́рецъ показа́лся еси́, въ вѣ́чнѣй сла́вѣ со а́нгелы лику́я. Съ ни́миже моли́ непреста́нно поми́ловатися на́мъ.

И ны́нѣ, богоро́диченъ:

Те́плая предста́тельнице и непобѣди́мая, упова́ніе извѣ́стное и непосты́дное, стѣно́, и покро́ве, и приста́нище прибѣга́ющимъ къ Тебѣ́, Приснодѣ́во Чи́стая, Сы́на Твоего́ и Бо́га моли́ со а́нгелы, ми́ръ да́ти мíру, и спасе́ніе, и ве́лію ми́лость.

Крестобогоро́диченъ:

На Крестѣ́ зря́щи Тя́, Христе́, Ма́ти Твоя́, во́лею посредѣ́ разбо́йниковъ ви́сяща, растерза́ющися утро́бою, ма́терски глаго́лаше: безгрѣ́шный Сы́не, ка́ко непра́ведно на Крестѣ́, я́коже злодѣ́й, пригвожде́нъ еси́, человѣ́ческій ро́дъ хотя́ оживи́ти, я́ко Благоутро́бенъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Окормля́еми дла́нію всеси́льною, му́къ пучи́ну немо́кренно преидо́ша, до́ндеже достиго́ша въ приста́нище ти́хое вы́шняго Ца́рствія, му́ченицы.

Возвыша́емаго держа́вою нече́стія го́рдаго мучи́теля, вѣ́ры ору́жіи, му́ченицы всехва́льніи, низложи́сте, пою́ще: слава́ си́лѣ Твое́й, Го́споди.

Седмобра́тный ли́къ страстоте́рпцевъ съ двои́ми роди́тели, непоро́чная же́ртва Тебѣ́, тѣ́хъ ра́ди чу́дно поже́ршемуся, я́ко овча́, Влады́ко Христе́, приведо́шася.

Богоро́диченъ: Иже во́лею вся́ческая Созда́вый, зи́ждется хотя́ изъ Тебе́ па́че сло́ва, спаса́я, Неискусобра́чная, вѣ́рою зову́щія: сла́ва си́лѣ Твое́й, Го́споди.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Зако́номъ Боже́ственнымъ Ду́ха все́ покори́лъ еси́ плотско́е мудрова́ніе и сло́вомъ безслове́сная стремле́нія страсте́й отгна́лъ еси́, му́дре Стефа́не.

Ты́ я́рости во́лны на врага́ вооружи́лъ еси́, Стефа́не, къ Еди́ному же Рачи́телю жела́ніе, Бо́гу, просте́рлъ еси́.

Свѣ́тлый свѣ́тъ узрѣ́лъ еси́ ты́ безстра́стія, преподо́бне Стефа́не, совле́кся мглы́ те́мныя страсте́й, благода́тію наставля́емь.

Во умѣ́ ты́ бу́дущая помышля́я, возгнуша́лся еси́ мимотеку́щихъ безслове́сія. Тѣ́мже вся́ наслѣ́довалъ еси́ болѣ́зньми присносу́щая.

Богоро́диченъ: Бо́га, Его́же родила́ еси́, Чи́стая Дѣ́во, Сего́ умоли́, рабо́мъ Твои́мъ дарова́ти согрѣше́ній проще́ніе и проти́вныхъ избавле́ніе.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Тя́, Го́споди, крѣ́пость стяжа́вше му́ченицы, терза́нія, и ра́ны, и о́гнь, и сме́рть му́жески преоби́дѣша.

О, дѣ́ти свяще́нныя! О, богопрія́тная заколе́нія! О, совокупле́ніе, разори́вшее ко́зни многоплете́нныя врага́ борю́щаго!

Побѣ́дами главу́ безсме́ртными вѣнча́ла еси́, побѣди́вшая змíя, Еву побѣди́вшаго, Евни́кіе добродѣ́во.

Богоро́диченъ: Свѣ́тъ безлѣ́тный на́мъ, Отчее Сія́ніе родила́ еси́, подъ лѣ́томъ бла́гости бога́тствомъ бы́вша, Всенепоро́чная.

Инъ.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Явля́ешися, я́ко свѣти́льникъ, съ небе́съ пою́щимъ тя́, отгоня́ дѣ́лъ омраче́ніе и боже́ственнаго вообража́я дѣя́нія осія́ніе.

Бо́дренну моли́тву и стоя́ніе всено́щное, ру́къ прилѣ́жное воздѣя́ніе стяжа́лъ еси́, о́тче, и исто́чники сле́зъ, Стефа́не.

Но́въ и́стинно пусты́ни яви́лся еси́ свѣ́телъ свѣти́льникъ, о Стефа́не, просвѣща́я во тмѣ́ держи́мыя злы́хъ.

Богоро́диченъ: Моли́ при́сно Сы́на Твоего́ и Бо́га на́шего, Неискусобра́чная Марíе Чи́стая, низпосла́ти на́мъ вѣ́рнымъ ми́лость.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Простре́ти неми́лостивно повелѣ́въ мучи́тель и къ колесе́мъ привяза́ти многообра́зными ви́ды му́ченики, но посрами́ся, непобѣди́мы ты́я ви́дѣвъ.

Звѣре́мъ въ снѣ́дь пре́дани бы́вше, показа́сте я́ кротча́йшія ове́цъ непреста́нными ва́шими моли́твами и вре́да отъ тѣ́хъ ника́коже прія́сте, святíи.

Сарви́лъ, Неони́ла, Фо́тъ и Ѳеоду́лъ, Ви́лъ, Іера́ксъ, Евни́кія же и Нитта́ боже́ственный съ Тере́нтіемъ, я́ко до́бліи, благоче́стно да восхва́лятся, му́ченицы.

Богоро́диченъ: Купина́ прообразова́ше вели́кое та́инство, е́же па́че ума́, Твоего́ Рождества́, огне́мъ всю́ду окружа́ема и ника́коже опаля́ема, Дѣ́во Всепѣ́тая.

Инъ.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же свя́зана мре́жами вра́жіими, я́ко отъ тли́ о́наго, спаси́.

Ты́ рука́ми, ви́дѣнъ бы́лъ еси́, Стефа́не, се́рнѣ подава́я пи́щу, душе́вныя бо стра́сти оттря́съ, надъ ди́віими живо́тными, я́коже пе́рвѣе во Еде́мѣ Ада́мъ, ца́рствовалъ еси́.

Путетворя́ Христу́ селе́ніе твоея́ въ клѣ́ти души́, чре́во твое́, Стефа́не, и язы́къ удержа́въ, и плотскíя сла́сти до конца́ умертви́лъ еси́.

Побѣди́тельными вѣнча́лся еси́ вѣнцы́, Стефа́не, по́стничества, де́моновъ бо полки́ побѣди́лъ еси́ и помышле́ній и страсте́й прило́ги низложи́лъ еси́, блаже́нне.

Богоро́диченъ: Па́че ума́ воплоще́ннаго Го́спода во чре́вѣ Твое́мъ сотвори́ Твои́мъ рабо́мъ ми́лостива бы́ти Твои́ми моли́твами, Чи́стая, я́ко да стра́шнаго изба́вимся муче́нія.

Конда́къ, му́чениковъ, гла́съ 4. Подо́бенъ: Вознесы́йся.

Му́ченическая честна́я па́мять пріи́де дне́сь, веселя́щи вся́ческая, Тере́нтія прему́драго и подру́жіи его́. Те́плѣ у́бо стеце́мся, да пріи́мемъ исцѣле́ніе, сíи бо благода́ть пріе́мше отъ Ду́ха Свята́го исцѣля́ти неду́ги и болѣ́зни ду́шъ на́шихъ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Въ пе́щь муче́ній вве́ржени бы́вше, му́ченицы, ро́су съ небесе́ обрѣто́сте терпѣ́ніемъ, благода́рно взыва́юще: благослове́нъ еси́ въ хра́мѣ сла́вы Твоея́, Го́споди.

Вкорене́но душе́вное иму́ще мудрова́ніе на ка́мени непрело́жныя вѣ́ры Христо́вы, безбо́жныхъ свирѣ́пства тру́съ, му́ченицы моли́твою творя́ще, низложи́ша.

Повѣ́шени бы́вше и по ре́бромъ крѣ́пко стру́жеми, о́цтомъ лютѣ́йшимъ же и огне́мъ сожига́еми, блаже́нніи, всю́ попали́сте ве́щь ле́стную, сла́вніи.

Богоро́диченъ: Одѣва́яй не́бо о́блаки, Пречи́стая, Тя́ не́бо показа́ на земли́, изъ Тебе́ облече́ся во всего́ человѣ́ка и обожа́етъ мя́ за милосе́рдіе безчи́сленное.

Инъ.

Ирмо́съ: Отроки ороси́вый въ пещи́ и Дѣ́ву сохрани́вый, ро́ждшую Тя́, по рождествѣ́, благослове́нъ еси́, Бо́же оте́цъ на́шихъ.

Вои́стинну Нетлѣ́нныя тя́ Тро́ицы благода́ть обрѣ́тши, сосу́дъ, Стефа́не, избра́нъ, я́коже жела́ше, въ тебѣ́ упоко́ися, и дарова́ніи обогати́, и врача́ душе́вныхъ страсте́й показа́.

Таи́нниче пресвѣ́тлаго богонача́лія, зри́телю сла́вы неизрече́нныя Бо́жія причаща́яйся, пода́ждь на́мъ просвѣще́ніе, творя́щимъ вѣ́рою па́мять твою́, уго́дниче Христо́въ, преблаже́нне Стефа́не.

Во́ду Моисе́йски въ земли́ невла́жнѣй, жа́ждущу твоему́ ученику́, Стефа́не, твои́мъ жезло́мъ начерта́въ, источи́лъ еси́, преподо́бне, пѣснопоя́ Христу́ Вседержи́телю: благослове́нъ еси́, Бо́же оте́цъ на́шихъ.

Богоро́диченъ: Подоба́ше безсѣ́менно Воплоще́нному изъ Тебе́ проити́, Марíе Чи́стая, па́че со́лнца я́вльшися Чи́стая и Нескве́рная, на объя́тіихъ бо носи́ла еси́, Благослове́нная, Бо́га Вседержи́теля.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

На о́гнь дерзну́ша, свѣ́томъ Боже́ственнаго Ду́ха просвѣща́еми, коно́бовъ врѣ́нія показа́ша недѣ́йственна, боже́ственный хла́дъ съ небесе́ боже́ственныя му́ченицы пріе́мше, и́хже по достоя́нію, вѣ́рніи, восхва́лимъ.

Ангеловъ яви́ся мно́жество, на три́знищи я́сно укрѣпля́юще ва́съ, всехва́льніи му́ченицы, и болѣ́зни отъе́млюще; съ ни́миже отроко́въ пѣ́снь взыва́ете: благослови́те вся́ дѣла́ Госпо́дня Го́спода.

Бо́дро имѣ́я къ Бо́гу о́ко, Сарви́ле, се́рдца твоего́, оче́съ терпѣ́лъ еси́ избоде́ніе, облича́я мучи́теля, безбо́жія мгло́ю одержи́маго. Тѣ́мъ вси́ тя́, я́ко дне́ сы́на, ублажа́емъ.

Богоро́диченъ: Отчимъ благоволе́ніемъ Сы́на во утро́бѣ прія́ла еси́, осѣни́вшу Боже́ственному Ду́ху, Пречи́стая, и ро́ждши я́ко пе́рвѣе Пречи́ста пребыла́ еси́; къ Нему́же непреста́нно моли́ся изба́витися всѣ́мъ, Дѣ́во, тли́ и озлобле́нія.

Инъ.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Повину́лся еси́, блаже́нне, Го́споду, пребыва́ніемъ житія́ непоро́чнаго, и, отту́ду укрѣпи́вся, враги́ покоря́еши подъ но́зѣ твои́ и сокруша́еши, на ты́я болѣ́зньми, я́ко ору́жіи, до́блествовавъ.

Единообра́зно житіе́ имѣ́я, и́стины сло́во показа́ и обы́чай про́стъ и пра́въ, нелука́въ нра́въ, боголюби́въ ра́зумъ. Тѣ́мже тя́ пою́ще, Христа́ превозно́симъ во вѣ́ки.

Вседу́шно, о́тче, возлюби́лъ еси́ Бо́га, пли́щей отврати́лся еси́, непрохо́дныя же обходя́ пусты́ни, наслажда́лся еси́ Еди́наго Рачи́теля твоего́, Его́же ра́ди уме́ты вмѣни́лъ еси́ вся́.

Богоро́диченъ: Извѣ́стно вѣ́дящіи Тя́, Дѣ́ву и Бо́жію Ма́терь, па́че сло́ва, пое́мъ Тя́ всеблагоче́стно, вѣ́рою пѣснопою́ще: Го́спода по́йте и превозноси́те Его́ во вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ра́й яви́стеся, средѣ́ жи́зни дре́во иму́щъ, исто́чникъ же, пролива́ющъ ка́пли исцѣле́ній и рѣка́, и́стинно испо́лнена, святíи, боже́ственныхъ во́дъ Ду́ха.

Столпи́ Христо́вы Це́ркве и тиша́йшая приста́нища су́щихъ въ пучи́нѣ лю́тыхъ обурева́емыхъ, му́ченицы яви́стеся, и мíра пита́теліе, и а́нгеловъ сожи́тельницы.

Въ небе́сныхъ се́лѣхъ съ ра́достію живете́, добро́ты недомы́сленныя вку́пѣ сматря́юще и наслажда́ющеся и́стиннаго обоже́нія, вѣнцено́сцы великоимени́тіи.

Богоро́диченъ: Яже небе́съ ши́рши и херуви́мовъ святѣ́йши, всея́ же тва́ри вку́пѣ честнѣ́йши, Бо́га, Его́же родила́ еси́, о на́съ моли́, Богороди́тельнице, чту́щихъ Тя́.

Инъ.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Тѣ́сный пу́ть ше́ствовалъ еси́, его́же ничто́же въ мíрѣ и́стинно ну́жднѣйше, сего́ ра́ди во Еде́мъ вше́лъ еси́, простра́нное поко́ище.

Ти́хъ яви́лся еси́, о Стефа́не, на небесѣ́хъ бо вѣнце́мъ сла́вы вѣнча́лся еси́, блаже́нне, досто́йно, поя́ Вѣнча́вшаго тя́.

Чу́дно житіе́ твое́ просія́, благово́нно, я́ко ши́покъ въ ве́ртѣ, и я́ко свѣ́щникъ на возду́сѣ, свѣтови́дно озаря́я, всеблаже́нне, честву́ющіи тя́.

Богоро́диченъ: Дѣ́ву вси́ и Пречи́стую, вѣ́рніи, Богоро́дицу, неизрече́нно носи́вшую во утро́бѣ Бо́га и Спа́са, въ пѣ́снехъ велича́емъ.

Источникъ: Минíа, мѣ́сяцъ Окто́врій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 230 об. – 236 об.

/ Къ оглавленію раздѣла /


Наверхъ / Къ титульной страницѣ

0