Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Окто́врія въ 28-й де́нь.
Па́мять и́же во святы́хъ отца́ на́шего Арсе́нія, архіепи́скопа Се́рбскаго.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 1. Подо́бенъ: Небе́сныхъ чино́въ.

Дѣ́вства тезоимени́тый,* Се́рбскій свѣти́льникъ,* чудодѣ́йствомъ сія́я, вели́кій о́тче Арсе́ніе,* всѣ́хъ на́съ созыва́еши въ па́мять твою́* торжество́ соверша́ти духо́вное,* воспѣва́ти Спа́са Христа́.

Добродѣ́тели ве́рхъ* и вѣ́рныхъ основа́ніе,* апо́столовъ сла́ва,* іера́рховъ хвала́,* се́рбское утвержде́ніе, вели́кій о́тче Арсе́ніе,* всѣ́хъ призыва́еши свѣ́тло пра́здновати* всечестну́ю па́мять твою́.

Сла́ва, гла́съ 4:

Ева́нгельскихъ исто́чникъ словесы́ твои́ми, святи́телю о́тче Арсе́ніе, люде́й твои́хъ сердца́ напои́лъ еси́, и сѣ́мя благоче́стія въ ни́хъ моли́твами твои́ми возрасти́лъ еси́, и сія́ прине́слъ еси́ Христу́ пло́дъ изря́денъ. И ны́нѣ, предстоя́ у Него́ съ ли́ки апо́столъ и іера́рховъ, и на́съ помина́й, и сохрани́ отъ вся́каго озлобле́нія, я́ко въ ми́рѣ соверша́ти па́мять твою́.

И ны́нѣ, богоро́диченъ:

Богоро́дице, всѣ́хъ Цари́це, правосла́вныхъ похвало́, ерети́чествующихъ шата́нія разори́, и ли́ца и́хъ посрами́, не кла́няющихся, ниже́ чту́щихъ, Пречи́стая, честны́й Тво́й о́бразъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ума́ влады́ку* на стра́сти поста́вивъ,* плотолю́біемъ не порабо́тився,* а́нгельски чистото́ю,* о́тче Арсе́ніе, пожи́лъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Архіере́евъ похвала́* и свяще́нниковъ сла́ва,* пра́вило мона́шествующихъ,* о́тче Арсе́ніе,* ра́дуйся,* Це́ркве утвержде́ніе вели́кое.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Услы́ши моле́нія ра́бъ твои́хъ,* архіере́е, о́тче Арсе́ніе,* и сле́зъ не премолчи́,* и серде́чная проше́нія* подава́й лю́бящимъ тя́.

Сла́ва, гла́съ 4:

Подоба́етъ Се́рбскому ро́ду Арсе́нія вездѣ́ имѣ́ти архіере́я, я́ко нѣ́кую у́тварь ца́рскую и сокро́вище некра́домо, всѣ́мъ подаю́ща бога́тство, спасе́нія проповѣ́даніе, и вся́ собира́юща къ соедине́нію пѣ́сней благолѣ́пныхъ, къ нему́же возопіи́мъ: архіере́е и наста́вниче, Христа́ Бо́га моли́ о душа́хъ на́шихъ.

И ны́нѣ, богоро́диченъ:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ зове́мъ Ти́: ра́дуйся, еди́но предста́тельство ду́шъ на́шихъ.

Тропа́рь, гла́съ 8: Ми́лости наста́вниче... [пи́санъ на вели́цѣй вече́рни.] Сла́ва, и ны́нѣ, богоро́диченъ: Иже на́съ ра́ди Рожде́йся отъ Дѣ́вы... И отпу́стъ.



НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: пое́мъ стихи́ры на 8, гла́съ 5. Подо́бенъ: Ра́дуйся по́стниковъ.

Ра́дуйся, преосвяще́нне архіере́е, до́брое обрѣ́тъ Христо́во подо́біе, и́мже возше́лъ еси́ на высоту́ уче́ній распложда́я, дѣ́лы добродѣ́телей соверша́я, и си́ми колесни́цу о́гненную восхожде́нія твоего́ сотвори́въ, къ широтѣ́ Бо́жія гра́да дости́глъ еси́, небе́сный человѣ́че, земны́й а́нгеле, Арсе́ніе о́тче свяще́нне, Христа́ Бо́га моли́ душа́мъ на́шимъ дарова́ти ми́ръ и ве́лію ми́лость. [Три́жды.]

Ра́дуйся, освяще́нне о́тче архіере́е, дѣя́нія добродѣ́телей твои́хъ, небе́сныхъ каса́ющеся, подсо́лнечную просвѣща́ютъ, и къ боже́ственнѣй высотѣ́ вознося́щеся, у́мныя зари́ облиста́юще, сто́лпъ добродѣ́телей возвы́шши вы́спрь, боже́ственнаго твоего́ зра́ка возводя́щь, небе́сный человѣ́че, земны́й а́нгеле, Арсе́ніе освяще́нне, Христа́ Бо́га моли́ дарова́ти душа́мъ на́шимъ ми́ръ и ве́лію ми́лость. [Три́жды.]

Ра́дуйся, богоглаго́ливая главо́, Свята́го Ду́ха глаго́лы вѣща́ющи, трубо́ а́нгельская, всѣ́мъ воздая́ніе глася́щи, архіере́евъ ссе́льниче, грѣша́щихъ засту́пниче, те́плая утѣ́ха притека́ющимъ къ тебѣ́, и си́мъ возводя́щися, небе́снаго зра́ка пріе́мъ, обнови́лъ еси́, я́ко оре́лъ, ю́ность твою́, уче́ніемъ ча́да твоя́ просвѣща́я, небе́сный человѣ́че, земны́й а́нгеле, Арсе́ніе пресвяще́нне, Христа́ Бо́га моли́ дарова́ти душа́мъ на́шимъ ми́ръ и ве́лію ми́лость. [Два́жды.]

Сла́ва, гла́съ 6. Самогла́сенъ:

Возсія́ всесвѣ́тлая дне́сь іера́рха па́мять, вѣ́рныя просвѣща́ющи и то́ки неоску́дно благоуха́нія точа́щи, въ не́йже собра́вшеся, цвѣ́ты добропѣ́сненными главы́ своя́ увя́зше, пресвяще́ннаго Арсе́нія хвала́ми почти́мъ и сего́ освяще́ннѣй главѣ́ ра́дость возгласи́мъ: ра́дуйся, боже́ственная ла́стовице, всѣ́мъ глася́щи пу́ть покая́нія; ра́дуйся, благово́ніемъ ра́ки твоея́ яви́вый житіе́ твое́; ра́дуйся, наде́жде всѣ́хъ хва́лящихъ тя́, освяще́нне Арсе́ніе, моли́ся о душа́хъ на́шихъ.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́ и чте́нія.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры самогла́сны, гла́съ 2:

Се́рбская пречестна́я Це́рковь, созыва́ющи на́съ, ликовству́етъ, тѣ́мъ, веселя́щеся съ духо́вными твои́ми ча́ды, тебѣ́ предстоя́ще и съ любо́вію почита́юще тя́, пѣ́сньми и пѣ́ніи зове́мъ: архіере́е Арсе́ніе, моли́ спасти́ся душа́мъ на́шимъ.

Изво́ливъ лу́чшая, су́щія же въ житіи́ ве́щи преоби́дѣлъ еси́, и го́рнее житіе́ возлюби́лъ еси́, одѣ́явся въ смире́ніе, му́ченически показа́лъ еси́ по́двигъ страда́нія тѣле́сными по́ты, ра́йское наслажде́ніе воспрія́лъ еси́, и въ свѣ́тлости святы́хъ бога́тно всели́лся еси́. Съ ни́миже Христу́ предстоя́, пресвяще́нне о́тче Арсе́ніе, моли́ спасти́ся душа́мъ на́шимъ.

Гла́съ 6:

Церко́вное свѣти́ло вси́ вѣ́мы богови́дное и ду́шъ спаси́теля, Христо́ва іера́рха Арсе́нія. Се́й у́бо чудодѣ́йствы сія́я и богосло́віемъ украша́емь, Христо́ва ста́да досто́инъ бы́сть, досточу́дный па́стырь, ми́лостивъ и благоувѣ́тливъ, и всего́ мíра концы́ просвѣти́.

Сла́ва, гла́съ 8:

Пресла́вно просла́вися свята́я це́рковь, въ не́йже стека́ются кня́зи и вси́ вѣ́рніи, духо́вная твоя́ ча́да, неисцѣ́льныхъ страсте́й пріе́млютъ исцѣле́нія о и́мени твое́мъ, святи́телю о́тче Арсе́ніе: моли́ спасти́ся душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.

На стихо́внѣ стихи́ры, гла́съ 2. Подо́бенъ: Кíими похва́льными вѣнцы́.

Кíими пѣ́сненными добро́тами воспои́мъ архіере́я Христо́ва, уста́ ти́хая и Ева́нгелія Его́ проповѣ́дника свѣ́тла, церко́внаго храни́теля и засту́пника земли́ Се́рбстѣй, Благовѣ́рному Царю́ на́шему побо́рника; его́же моли́твами враго́въ шата́ніе Христо́съ низложи́, имѣ́яй ве́лію ми́лость.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Кíими похва́льными вѣнцы́ увязе́мъ іера́рха, свяще́нства вѣнца́, благоче́стія управле́ніе, Це́ркве свѣ́тлое украше́ніе, исто́чника боже́ственныхъ исцѣле́ній неисчерпа́емаго, проли́тіе дарова́ній духо́вныхъ, рѣку́ мно́гихъ чуде́съ, зе́млю Се́рбскую веселя́щую тече́ніемъ, Арсе́нія, до́браго предста́теля на́шего и храни́теля.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Кíими украше́нными гла́сы воспои́мъ іера́рха, ди́внаго въ чудесѣ́хъ Арсе́нія, безпло́тныхъ сожи́теля, освяще́ннаго отъ пеле́нъ, столпа́ Це́ркве неподви́жима, весе́ліе земли́ Се́рбскія, пра́вды пра́вило, оби́димыхъ засту́пника, немощны́хъ врача́ безме́здна; его́же ра́ди дарова́ Христо́съ Це́рквамъ соедине́ніе, ми́ръ и ве́лію ми́лость.

Сла́ва, гла́съ 6:

Небе́снаго Ца́рствія во благода́ть у́зкою стезе́ю вше́лъ еси́ простра́нства; ра́йская оби́тель, пріи́мши тя́, наслѣ́дника сотвори́, и глаго́лы у́стъ твои́хъ хва́лящи, и житіе́ добродѣ́телей цвѣту́щее, и своея́ красоты́ о́бщника тя́ устро́и, пресвяще́нная же ра́ка благоуха́ніемъ испо́лнися. Мы́ же свѣтоно́сную па́мять любе́зно пра́зднуемъ, святи́телю о́тче Арсе́ніе, моли́ спасти́ся душа́мъ на́шимъ.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На благослове́ніи хлѣ́бовъ, Тропа́рь, гла́съ 8:

Ми́лости наста́вниче и благоутро́бія сокро́вище, е́же всѣ́мъ отве́рзлъ еси́, правовѣ́рія учи́телю и архіере́евъ боже́ственное удобре́ніе, о́тче на́шъ, іера́рше Арсе́ніе, ни́щихъ бы́лъ еси́ засту́пникъ: тѣ́мъ моли́ Христа́ Бо́га, просвѣти́ти ду́ши на́ша, да не когда́ у́снемъ въ сме́рть. [Два́жды.]

И Богоро́дице Дѣ́во... [Еди́ножды.]



НА УТРЕНИ,
[На Бо́гъ Госпо́дь: Тропа́рь святи́теля, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 3. Подо́бенъ: Боже́ственныя вѣ́ры.

Вели́кое со́лнце всея́ Се́рбскія страны́, добродѣ́телей твои́хъ сія́ніи и чуде́съ свѣ́тлостьми просвѣти́въ твоя́ ча́да вѣ́рная, и истреби́лъ еси́ страсте́й омраче́ніе, святи́телю о́тче Арсе́ніе, Христа́ Бо́га моли́ дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Боже́ственнаго естества́ не отлучи́вся, пло́ть бы́въ во чре́вѣ Твое́мъ: но Бо́гъ вочеловѣ́чився и пребы́сть, Иже по рождествѣ́ Ма́терь Тя́ Дѣ́ву, я́ко пре́жде Рождества́, сохрани́въ Всенепоро́чну, еди́нъ Госпо́дь: Того́ прилѣ́жно моли́ дарова́ти на́мъ ве́лію ми́лость.

По 2-мъ стихосло́віи сѣда́ленъ, гла́съ 3. Подо́бенъ: Боже́ственныя вѣ́ры.

Образы просія́лъ еси́ богоразу́мія, заре́ю облиста́лъ еси́ Се́рбское достоя́ніе и ча́да твоя́ наста́вилъ еси́ словесы́ твои́ми, нищелю́біе и любо́вь источи́лъ еси́. Авраа́мову страннолю́бію подо́бяся, о́тче Арсе́ніе, Христа́ Бо́га моли́ дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По поліеле́и сѣда́ленъ, гла́съ 2. Подо́бенъ: Повелѣ́нное та́йно.

Гряди́те, вси́ вѣ́рніи, вои́стинну уви́димъ чу́до ди́вно, тлѣ́нна бо я́ко нетлѣ́нна зря́ще боже́ственнаго смотре́нія, въ ра́зумъ приводя́ща сего́ свята́го архіере́я пѣ́сньми воспои́мъ, боже́ственная дѣя́нія, я́же о не́мъ ви́дяще, рце́мъ: ра́дуйся, о́тче, земли́ Се́рбскія, оте́цъ и учи́тель. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Повелѣ́нное та́йно пріе́мъ въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чнѣй: Приклони́вый схожде́ніемъ небеса́ вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ, пріе́мша ра́бій зра́къ, ужаса́юся зва́ти Тебѣ́: ра́дуйся, Невѣ́сто неневѣ́стная.

Степе́нна, 1-й антифо́нъ 4-го гла́са. Проки́менъ [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми?] Ева́нгеліе отъ Іоа́нна, зача́ло 36.

По 50-мъ псалмѣ́ стихи́ра, гла́съ 6:

Преподо́бне о́тче и преблаже́нне, свяще́нный па́стырю до́брый, Первопа́стыря Христа́ уго́дниче, положи́вый ду́шу за се́рбское достоя́ніе: ты́ ны́нѣ, архіере́е [Арсе́ніе] блаже́нне, испроси́ у Го́спода дарова́ти на́мъ ве́лію ми́лость.

Кано́нъ Богоро́дицы со ирмосо́мъ на 6. И свята́го на 8, гла́съ 6.

Пѣ́снь 1.

Ирмо́съ: Помо́щникъ и Покрови́тель бы́стъ мнѣ́ во спасе́ніе, Се́й мо́й Бо́гъ, и просла́влю Его́, Бо́гъ отца́ моего́, и вознесу́ Его́: сла́вно бо просла́вися.

Бо́же Спа́се мо́й, отве́рзи мои́ устнѣ́ и язы́къ мо́й уясни́, я́ко да воспою́ па́мять іера́рха Твоего́, его́же на земли́ удиви́лъ еси́ сла́вно сла́вити Тя́: сла́вно бо просла́вися.

Иже превы́шняя держа́щи, въ небе́сная се́ла водворя́ше тя му́дрость Бо́жія, дѣ́тели дарова́ній тебѣ́ воздаю́щи, го́рнихъ все́льника сотворя́етъ, Го́споду пою́ща: сла́вно бо просла́вися.

Боже́ственная краси́лища, веселя́ще свяще́ннаго твоего́ зра́ка, въ вы́шняя вселя́ютъ поко́ища, къ Боже́ственнѣй трапе́зѣ, Го́споду пою́ща: сла́вно бо просла́вися.

Богоро́диченъ: Окова́нныхъ Свободи́теля, Богоро́дице, и те́мныхъ Просвѣти́теля чре́во Твое́ пречи́стое вмѣсти́. Его́же рождество́мъ и́дольскія ле́сти свобо́ждшеся, Истинную навыко́хомъ воспѣва́ти Бо́жію Ма́терь.

Катава́сія: Отве́рзу уста́ моя́...

Пѣ́снь 3.

Ирмо́съ: Утверди́, Го́споди, на ка́мени за́повѣдей Твои́хъ подви́гшееся се́рдце мое́, я́ко еди́нъ Свя́тъ еси́ и Госпо́дь.

Просвѣще́ніе дѣ́тели твоея́ Боже́ственныхъ каса́яся, отъ земны́хъ къ па́мяти возво́дитъ вы́шняго жела́нія, преводя́ отъ тли́ въ жи́знь неконе́чную.

Па́мять твоя́ пребыва́етъ, святи́телю, и кро́тость се́рдца твоего́ въ ро́дъ и ро́дъ, се́й уподобля́еми, боже́ственныя твоея́ сла́вы насыща́ющеся, досто́йно тя́ воспева́емъ.

Пре́йде сѣ́нь зако́на, изнемо́гши, дѣ́ломъ благовѣствова́нія твоего́, Христо́съ Истина, сія́ющи, вся́ просвѣща́етъ, вѣ́рою па́мять твою́, святи́телю, пра́зднующія.

Богоро́диченъ: Свѣ́та Боже́ственнаго Заря́ изъ чре́ва Твоего́ просія́, вѣ́рныхъ благоуха́юща: Сего́ благово́ніе получи́вше, омраче́нія свободи́хомся Тобо́ю, Богоро́дице Пречи́стая.

Сѣда́ленъ, гла́съ 4. Подо́бенъ: Вознесы́йся.

Дне́сь іера́рха па́мять возсія́ на́мъ, солнцеобра́зно луча́ми сія́ющи, свѣ́та явле́ніе всѣ́мъ простира́етъ, и всѣ́мъ велегла́сно вопіе́тъ и глаго́летъ: пріиди́те, жела́емыхъ наслади́мся. [Два́жды.]

Сла́ва, и ны́нѣ, богоро́диченъ:

Те́плое заступле́ніе су́щихъ въ бѣда́хъ, и помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

Пѣ́снь 4.

Ирмо́съ: Услы́ша проро́къ прише́ствіе Твое́, Го́споди, и убоя́ся, я́ко хо́щеши отъ Дѣ́вы роди́тися и человѣ́комъ яви́тися, и глаго́лаше: услы́шахъ слу́хъ Тво́й и убоя́хся, сла́ва си́лѣ Твое́й, Го́споди.

Возсія́вый свѣ́тъ и Просвѣще́й у́тро, показа́ тя́ де́нь, освяще́нне о́тче Арсе́ніе, уче́ніемъ Божества́ Его́, вся́ къ свѣ́ту Того́ возводя́щаго. Имже просвѣща́ема духо́вная твоя́ ча́да, па́мять твою́ пра́зднуемъ.

Житія́ архіере́йства твоего́ о́бразы, сопе́рника не иму́ще, безъ свидѣ́телей облича́ютъ тя́: плотска́я бо духо́внымъ покори́въ, отхожде́ніемъ свои́мъ въ небе́сная всели́ся, идѣ́же ликовству́я, преблаже́нне Арсе́ніе, свѣ́томъ Боже́ственнымъ просвѣти́ любо́вію пою́щія тя́.

Чуде́съ, и́хже сподо́бился еси́ отъ Влады́ки твоего́, преподо́бне, зря́ще, боже́ственная твоя́ ча́да, духо́вныя сла́дости насыща́емся, тя́ предста́теля иму́ще къ Нему́, прича́стія Боже́ственнаго сподо́би на́съ улучи́ти, мо́лимся.

Богоро́диченъ: Чре́во дѣ́вственное но́ситъ, Еде́мская две́рь отверза́ется, а́біе вѣ́рныхъ со́нмы дерза́юще вхо́дятъ, и́стинную Богоро́дицу вѣ́рно восхваля́ютъ, Рожде́нному отъ Нея́ зову́ще: сла́ва си́лѣ Твое́й, Го́споди.

Пѣ́снь 5.

Ирмо́съ: Ми́ръ мно́гъ лю́бящимъ Тя́, Христе́, и но́щь просвѣще́нія въ пи́щи слове́съ Твои́хъ: сего́ ра́ди отъ но́щи у́тренююще, про́симъ ми́лости отъ Тебе́, Человѣколю́бче.

Вседѣ́тельная и всемогу́щая му́дрость, и си́ла Влады́чня, столпа́ и́стинна тя́ пресвяще́ннаго сотво́рши, до́мъ создала́ е́сть, Боже́ственныя огра́ды Его́ наполня́ющь и ерети́ческая шата́нія прогоня́ющь, Арсе́ніе преблаже́нне, тѣ́мъ тя́ восхваля́емъ.

Возсія́въ отъ небе́съ благолѣ́піемъ Вы́шняго, примѣ́сомъ святи́тельства обложи́ тя́, небе́сныя трапе́зы состо́льника сотвори́, ны́нѣшняго же пода́теля вѣ́рнымъ показа́, свяще́нне, вопію́ща: про́симъ ми́лости отъ Тебе́, Человѣколю́бче.

Свѣтоли́тія Боже́ственнаго испо́лнившися, пресвяще́нная твоя́ глава́ сла́дости язы́ка удержа́ти не возмо́же: а́ще бо и въ зе́мленная сни́де, но ду́хомъ въ небе́сная дости́же, о́тче Арсе́ніе, ми́ръ испроси́ душа́мъ на́шимъ.

Богоро́диченъ: Пра́дѣдняя кля́тва разрѣши́ся и прама́терняя болѣ́знь исцѣли́ся, Пречи́стая, чре́ва Твоего́ Рождество́мъ: безсѣ́менно бо заче́нши, Сло́во родила́ еси́. Ему́же прилѣ́жно моли́ся спасти́ ны.

Пѣ́снь 6.

Ирмо́съ: Возопи́хъ всѣ́мъ се́рдцемъ мои́мъ къ Ще́дрому Бо́гу, и услы́ша мя́ отъ а́да преиспо́дняго, и возведе́ отъ тли́ живо́тъ мо́й.

Боже́ственныя сла́вы путеше́ствія дѣ́лы явля́юще, земна́я прово́дятъ съ весе́ліемъ, небе́сная же ра́дуются, пріе́млюще ду́хомъ пресвяще́ннаго Арсе́нія.

Благослове́нъ пло́дъ богопрія́тный, Боже́ственнаго Ду́ха дѣ́тельми сія́я, и преиспо́дняя помрача́я, въ торжество́ іера́рха собира́ющіяся просвѣща́етъ вои́стину: гряди́те, вѣ́рніи, просвѣти́мся.

Гра́днаго ше́ствія тече́ніе провосхища́я, бдя́й предстои́тъ Арсе́ній, зовы́й: гряди́те, ча́да, стра́ху Госпо́дню научи́теся, я́коже рече́ Госпо́дь: я́ко кро́токъ е́смь и смире́нъ се́рдцемъ, и обря́щете поко́й душа́мъ ва́шимъ.

Богоро́диченъ: Искони́ проро́чествія о Тебѣ́ прореко́ша, ны́нѣ же на Тебѣ́ испо́лнишася, Пречи́стая: о́въ бо Тя́ руно́ пронарече́, на него́же сни́де Сло́во Бо́жіе, ны́нѣ же Ты́, Дѣ́во, родила́ еси́ Го́спода.

Конда́къ, гла́съ 2. Подо́бенъ: Вы́шнихъ ища́.

Въ пи́щи слове́съ твои́хъ, богоно́се Арсе́ніе, разу́мно ча́да твоя́ пита́я, язы́комъ хваля́, устна́ми же пѣ́ніе принося́, вѣща́ніемъ зовы́й: Христе́, Ты́ еси́ Свѣ́тъ неизрече́нный.

Икосъ:

Сла́дкое твое́ вѣща́ніе въ послу́шество прихо́дитъ, громо́вными о́бразы простира́яся, въ добропослуша́ніе ну́дитъ, неизрече́нныя ра́дости о́бщники увѣщава́я: пріиди́те, ча́да, глаго́ля, возвели́чите Го́спода со мно́ю. Его́же сла́дости насыща́ющеся, въ небе́сная се́ла водвори́мся и свѣ́тлости сподо́бимся, вѣща́ніемъ зову́ще: Христе́, Ты́ еси́ Свѣ́тъ неизрече́нный.

Синакса́рь [и́же] во святы́хъ отцу́ на́шему Арсе́нію, Се́рбскому архіепи́скопу.

Лѣ́то и мѣ́сто рожде́нія сего́ вели́каго му́жа Це́ркве на́мъ неизвѣ́стно, зане́ о́нъ уже́ въ по́лной си́лѣ во́зраста озари́лъ на́ше оте́чество. Оба́че сіе́ извѣ́стно, я́ко бѣ́ сы́нъ благочести́выхъ роди́телей, и я́ко оте́чество ему́ бѣ́ Сре́мъ, въ кото́ромъ и до ны́нѣ живу́тъ правосла́вни се́рби. Ощути́въ въ себѣ́ святи́тель та́йное влече́ніе къ духо́вному по́двигу и животу́, и предпоче́тъ вѣ́чная — вре́меннымъ, боже́ственная — су́етнымъ, изво́ли въ мона́шескомъ житіи́ проходи́ти лѣ́ствицу соверше́нствъ духо́вныхъ, сíесть ева́нгельскихъ добродѣ́телей. Сего́ ра́ди испыта́въ сво́й нра́въ и серде́чною моли́твою предугото́вавъ себе́ въ служе́ніе Христу́ Бо́гу, Це́ркви Его́ и своему́ наро́ду, отхо́дитъ въ монасты́рь и пострига́ется ту́ въ мона́шескій чи́нъ. Прише́дшу же до него́ слу́ху о свято́мъ Са́ввѣ, пе́рвомъ архіепи́скопѣ Се́рбскаго наро́да, я́ко креще́ніемъ и уче́ніемъ просвѣти́ Се́рбскую зе́млю, проповѣ́дуетъ вѣ́рнымъ покая́ніе и отпуще́ніе грѣхо́въ, са́мъ же благода́тію свы́ше озаря́емь сія́етъ по премно́гу въ добродѣ́телехъ, — востече́ къ нему́ а́ки крило́ма носи́мь, жела́ніемъ жела́я бы́ти бли́зъ человѣ́ка Бо́жія и равноапо́стольнаго му́жа, во е́же наслажда́тися медото́чными струя́ми боже́ственныхъ его́ уче́ній, и научи́тися восхо́ду отъ земны́хъ — къ небе́сному, отъ тлѣ́нныхъ — къ нетлѣ́нному, отъ человѣ́ческихъ — къ боже́ственному. Дости́гъ же въ монасты́рь Жи́чу, въ мѣ́сто апо́стольскаго престо́ла Са́ввы, умоли́ нѣ́коего отъ бра́тіи возвѣсти́ти святи́телю о не́мъ, его́же великоимени́тый святи́тель и прія́тъ любе́зно.

Жела́ющему боже́ственнаго любому́дрія — стяжа́ Госпо́дь учи́теля, духо́внаго по́двига и́щущему — отве́рзеся широ́кое по́прище, и ю́ный учени́къ не убоя́ся труда́, но самоохо́тно подве́ржеся и́гу благо́му, проходя́ сте́пени многоразли́чнаго испыта́нія стезе́ю безусло́внаго послуша́нія и самооверже́нія.

Подвиза́ющагося си́це на до́лзѣ вре́мени съ ра́достію и безъ малѣ́йшаго ослабле́нія, и приходя́щаго въ духо́вный во́зрастъ, поставля́етъ святи́тель екклисіа́рхомъ въ це́ркви хра́ма Вознесе́нія Спа́сова. Опредѣле́ніемъ сея́ церко́вныя слу́жбы восхище́нъ бѣ́ Арсе́ній, взира́я въ то́мъ архипа́стырскую ми́лость и о́тчее благоволе́ніе своего́ вели́каго учи́теля, и приложи́ труды́ къ трудо́мъ, попече́ніе къ попече́нію, моля́ся о́тай Христу́ Бо́гу, даю́щему благода́ть Свою́ не́мощи своя́ исповѣ́дающимъ, во е́же бы умудри́лъ и укрѣпи́лъ его́ въ слу́жбѣ повѣ́ренной ему́, вку́пѣ же наста́вилъ бы его́ Ду́хомъ Свои́мъ, е́же непоползнове́нно соверша́ти возло́женный на него́ до́лгъ. Дѣ́йствіемъ таковы́я моли́твы стяжа́въ наде́жду на благода́ть Ду́ха, начина́етъ богобоя́зненно, и соверша́етъ богоуго́дно святы́й Арсе́ній обя́занности екклесіа́рха на лѣ́та мно́га, приложи́въ къ тому́ непоро́чное житіе́ и смире́ніе, растворе́нное незло́біемъ се́рдца и чистото́ю души́, е́же ви́дѣвъ и испыта́въ архіепи́скопъ Са́вва, возво́дитъ его́ на сте́пень игу́мена пресла́вныя оби́тели Жи́чи, ввѣря́я ему́ строе́ніе церко́вное и внѣ́шнее. Сіе́ сбы́стся пре́жде пе́рваго отхо́да святи́теля Са́ввы во Іерусали́мъ, ды бы́ въ отсу́тствіи его́ не осла́бѣло до́брое правле́ніе свята́го до́му. Возвра́щшуся же ему́ отъ святы́хъ мѣ́стъ и прише́дшу въ свою́ оби́тель, обрѣ́те вся́ до́брѣ упра́вленная и въ чи́нѣ свое́мъ, е́же вельми́ благоуго́дно бѣ́ ему́. Поели́ку же сосѣ́дни у́гри [венгры], на похище́ніе чужи́хъ зе́мль лако́міи, ча́стыми вторже́ніями въ се́рбскую о́бласть, си́лою ору́жія удержа́ша нѣ́кую ча́сть пограни́чную, святи́тель Са́вва, а́ще и надѣ́яшеся, я́ко нападе́нія у́гровъ вско́рѣ отража́тся и а́ки незва́нніи сосѣ́ди возвратя́тся во своя́ си, оба́че предвари́ти жела́я случи́тися могу́щая, повелѣва́етъ игу́мену Арсе́нію я́тися пути́ къ восто́ко-ю́гу, и вну́трь предѣ́ловъ держа́вы изобрѣсти́ ино́е удо́бное мѣ́сто, идѣ́же бы постро́ена была́ архіеписко́пія. Арсе́ній же послу́шавъ своего́ господи́на, я́коже и всегда́, оты́де, а́може по́сланъ бы́сть и, обозрѣ́въ разли́чная мѣ́ста, избра́ еди́но въ предѣ́лѣ Хвоста́нскомъ, кото́рое по́здѣе наре́чено Меѳо́хія, и ту́ въ подно́жіи ка́менныхъ пеще́ръ и стѣ́нъ назна́мена, гдѣ́ бы имѣ́ла бы́ти постро́енна собо́рная це́рковь съ принадлежа́щими ке́лліями. И возвра́щся, повѣ́да святи́телю о наше́дшемся удо́бномъ мѣ́стѣ, на кото́ромъ повелѣ́ архіепи́скопъ зда́ти собо́рную це́рковь во и́мя святы́хъ Первоверхо́вныхъ Апо́столовъ Петра́ и Па́вла. Но́вая оби́тель сія́ про́звана бы́сть Пе́щь (Петьи) отъ пеще́ръ и стѣ́нъ ка́менныхъ, возвыша́ющихся съ восто́чныя страны́, и получи́ и́мя Се́рбскія Патріа́рхіи, въ дни́ ца́рствованія Стефа́на Душа́на, царя́ Се́рбскаго.

Между́ тѣ́мъ проба́вивъ святи́тель Са́вва мно́га лѣ́та, обходя́ всеприлѣ́жно и́мъ воздви́гнутыя епа́рхіии и поуча́я всѣ́хъ отъ ма́ла до вели́ка, сла́вяше Бо́га, я́ко дарова́ оте́честву его́ архіепи́скопа, епи́скопы, игу́мены и и́ноки, ипа́ты же и воево́ды; похвали́ Го́спода, я́ко украси́ оте́чественную зе́млю собо́рными вели́кими це́рквами, честны́ми монасты́рми, и всѣ́ми благи́ми зако́нами и уста́вы, и, поне́же не хотя́ше сла́вы отъ человѣ́ковъ, первосвяти́тельства же вла́сть помы́сли оста́вити и коне́цъ житію́ своему́ въ чужи́хъ стра́нахъ прія́ти жела́ше. Сего́ ра́ди вознамѣ́ривъ втори́цею ити́ на поклоне́ніе святы́мъ мѣ́стомъ, нарече́ и посвяти́ въ прее́мника себѣ́ игу́мена Арсе́нія, его́же испыта́ и позна́ я́ко му́жа преподо́бна, во все́мъ боя́щася Бо́га, за́повѣди Его́ соблюда́юща и, па́че инѣ́хъ, беззло́біемъ и пра́вдою укра́шена. И та́ко всю́ вла́сть свою́ пренесе́ на свята́го Арсе́нія, въ монасты́ри Жи́чи, со всѣ́ми подру́чными епи́скопами, и священнодѣ́йствовавъ въ прису́тствіи са́маго кра́ля Владисла́ва, вельмо́жей и благоро́дныхъ земли́, и нарече́ его́ свои́мъ намѣ́стникомъ, оба́че безъ умале́нія и́мене архіепи́скопскаго.

Ука́жемъ въ похвалу́ свята́го Арсе́нія, я́ко мно́го отрица́шеся, мня́ себе́ недосто́йна такова́го досто́инства, вку́пѣ же и не́мощна къ ноше́нію бре́мене, съ кото́рымъ свя́заны то́ль вели́кія и тя́жкія до́лжности. И хотя́ сіе́ исповѣ́даніе его́ ноша́ше печа́ть и́стиннаго смире́нія, оба́че непопу́щшу святи́телю, на коне́цъ соизво́ли прія́ти престо́лъ архіепи́скопіи Се́рбскія.

Си́мъ благополу́чно соверши́вшимся, оты́де святи́тель Са́вва въ далеча́йшій пу́ть, святы́й же Арсе́ній отста́ пасти́ Це́рковь Госпо́дню и храни́ти виногра́дъ, къ нему́же преста́вленъ бы́сть. Вла́сть его́ церко́вная, е́юже опоя́сася, не бѣ́ никому́же тя́жка, но бла́га и пра́ведна. Благотворе́нія и ми́лостыни не забыва́ше, но упражня́ше обоя́ по примѣ́ру высо́каго и блаже́ннаго предше́ственника своего́. Ели́ко про́повѣдію уча́ше, толи́ко житіе́мъ богоуго́днымъ созида́ше и исправля́ше. Обы́чаи благíя вводя́ше и храни́ти и́хъ творя́ше, худы́я же искореня́ше бла́гостію и терпѣ́ніемъ. Согрѣша́ющихъ призыва́ше на покая́ніе и житія́ исправле́ніе, наказу́я и́хъ благи́ми совѣ́ты и моли́твы творя́ о возвраще́ніи и́хъ отъ путе́й нечести́выхъ; заблужда́ющихъ же и прилага́ющихъ се́рдца и умы́ своя́ въ науче́нія стра́нна, неправосла́вная, вразумля́ше здра́выми словеса́ми и́стины и крѣ́пкою пи́щею ева́нгельскою, не дая́ себѣ́ поко́я, до́ндеже не пріидо́ша въ ра́зумъ и́стины съ по́лнымъ убѣжде́ніемъ.

Подвиза́ющуся си́це свято́му Арсе́нію въ дѣ́лѣхъ Це́ркви Бо́га Жи́ва, прихо́дятъ посла́нницы блаже́ннаго Са́ввы отъ Те́рнова, престо́льнаго гра́да Бо́лгарскія держа́вы, нося́ще собо́ю посла́ніе святи́теля и да́ры, опредѣле́нныя се́рбскимъ церква́мъ, вку́пѣ же объявля́юще приско́рбную вѣ́сть, я́ко святи́тель е́ле жи́въ оста́ въ помя́нутомъ гра́дѣ. Вско́рѣ за тѣ́мъ пріи́де и́нъ вѣ́стникъ, извѣству́яй о кратковре́менной болѣ́зни и о успе́ніи святи́теля. И пла́каше по не́мъ вся́ Се́рбская земля́. — Се́ я́вѣ испо́лни Бо́гъ жела́ніе святи́теля, что́бы въ чуже́й земли́ прія́лъ кончи́ну. Лѣ́ту же мину́вшу и тѣ́лу свята́го еще́ въ Те́рновѣ храни́му, прихо́дитъ честны́й и всеблаже́нный архіепи́скопъ Арсе́ній къ благочести́вому и держа́вному кра́лю Владисла́ву, си́це глаго́ля: «не лѣ́по е́сть на́мъ отъ Бо́га и человѣ́ковъ оста́вити отца́ на́шего, отъ Христа́ дарова́ннаго на́мъ апо́стола и учи́теля, подъе́мша толи́кія по́двиги и труды́, укра́сивша Се́рбскую зе́млю це́рквами, кра́левствомъ, архіепи́скопомъ же и епи́скопы, и всѣ́ми уста́вы и зако́нами Правосла́вія, да мо́щи его́ почива́ютъ внѣ́ предѣ́ла своего́ оте́чества и престо́ла. Молю́ тя́ у́бо, имѣ́й попече́ніе, ды бы́ мо́щи его́ пренесены́ бы́ли сѣ́мо въ оте́чествіе». Вельми́ уго́дно бѣ́ кра́лю Владисла́ву сло́во сіе́, вслѣ́дъ чего́ пи́шетъ еди́ножды и два́жды къ те́стю своему́, царю́ Бо́лгарскому Асѣ́ну, прося́ отъ него́ мо́щи своего́ стры́я. На пе́рвое посла́ніе отвѣща́ ему́ ца́рь: «а́ще бы тѣ́ло свята́го лежа́ло здѣ́ безче́стно и небрего́мо, имѣ́лъ бы при́чину проси́ти, а поне́же мо́щи его́ поко́ятся и храня́тся у на́съ, я́коже бы и у ва́съ, почто́ у́бо даете́ труды́ и свято́му, и на́мъ?» На второ́е же посла́ніе си́це отвѣщава́ше: «а́ще Бо́гу бѣ́ уго́дно свято́му упоко́итися у на́съ, вѣ́рующихъ во Христа́, кто́ е́смь а́зъ, да проти́влюся Бо́жіей во́ли, и потрясу́ гро́бъ и мо́щи свята́го, о пренесе́ніи свое́мъ ничто́ не завѣща́вшу? Вся́ у́бо ели́ка а́ще во́лиши проси́ти отъ мене́, невозбра́нно ти́ е́сть, а е́же неудо́бно ми́ е́сть да́ти, ну́дити мя́ оста́ви, зане́ и патріа́рхомъ, и вельмо́жами, и всѣ́мъ гра́домъ отъ таковы́хъ возбраня́емь е́смь». Кра́ль у́бо Владисла́въ не хотя́ носи́ти укори́зну отъ свои́хъ люде́й, и убоя́вся гнѣ́ва Бо́жія, а́ще бы и да́льше ко́сти свята́го оста́ли въ чуже́й земли́, е́млется пути́ са́мъ, ведя́ съ собо́ю мно́жество благоро́дныхъ свои́хъ, епи́скопы же и игу́мены, и испроси́въ мо́щи свята́го отъ те́стя своего́, повелѣ́ свои́мъ уско́рити въ дѣ́лѣ, да не ка́ко ца́рь измѣни́тъ сло́во свое́, я́коже и бы́сть. Оба́че тогда́ у́бо не превозмо́же глаго́лъ его́, зане́ мо́щи свята́го уже́ поспѣ́шно отнесены́ бы́ша на́шими, и́хже дости́гнувъ кра́ль, ра́довашеся. А егда́ бы́ша бли́зъ Се́рбскія земли́, изы́де въ срѣ́теніе святы́мъ моще́мъ архіепи́скопъ Арсе́ній, и съ ни́мъ собо́ръ церко́вный, и инíи мно́зіи отъ благоро́дныхъ, и сотвори́вше досто́йно поклоне́ніе святы́мъ моще́мъ, цѣлова́ху я́. Та́же поне́сше и́хъ, спрово́дяху вхо́дъ псалмы́ и пѣ́сньми да́же до монастыря́ Миле́шева, кра́лемъ Владисла́вомъ воздви́гнутаго, и ту́ въ вели́цѣй це́ркви Вознесе́нія Госпо́дня положи́ша киво́тъ въ свѣ́тлый и честны́й гро́бъ, кото́рый угото́валъ свято́му са́мъ кра́ль.

Святы́й Арсе́ній соверши́въ по чи́ну пра́вило въ па́мять незабве́нному благодѣ́телю и учи́телю своему́, возврати́ся въ Жи́чу. Оба́че о́во лѣта́ми ста́рости, ово́же сѣ́тованіемъ по святи́тели, въ Бо́зѣ усну́вшемъ, осла́бленъ, проразумѣ́, я́ко пріи́де ча́съ его́. Того́ ра́ди, доне́лѣже бѣ́ еще́ въ си́лѣ, поста́ви вмѣ́сто себе́ Са́вву втора́го во архіепи́скопа се́рблемъ, та́же до́лгимъ и тя́жкимъ тѣле́снымъ неду́гомъ исцѣжде́нъ, по прія́тіи святы́хъ та́инъ, отдаде́ съ ми́ромъ ду́хъ сво́й Бо́гу, мѣ́сяца Окто́врія въ 28-й де́нь, и погребе́ся въ пе́тьскомъ хра́мѣ святы́хъ апо́столовъ Петра́ и Па́вла, по́слѣ три́десять лѣ́тнаго правле́нія Се́рбскою Це́рковію. Его́же моли́твами сподо́би и на́съ, Влады́ко Христе́, ми́рною душе́ю и чи́стою со́вѣстію пріити́ въ ти́хое приста́нище Ца́рствія Твоего́. Ами́нь.

Пѣ́снь 7.

Ирмо́съ: Неизрече́нное чу́до, въ пе́щи Изба́вивый преподо́бныя о́троки изъ пла́мене, во гро́бѣ ме́ртвъ бездыха́ненъ полага́ется во спасе́ніе на́съ пою́щихъ: Изба́вителю Бо́же, благослове́нъ еси́.

Аще и земна́я превосхо́дитъ, вы́шнимъ каса́яся, благода́тію духо́вною съ си́ми совокупля́яся, неизрече́нныя ра́дости наполня́етъ, сы́ны свѣ́та сотворя́етъ, пою́щія: благослове́нъ Бо́гъ оте́цъ на́шихъ.

Жите́йская уныва́ютъ и боже́ственная красу́ются, небе́сная торжеству́ютъ, архіере́йскій тво́й ду́хъ пріе́млюще, земна́я попра́вша и въ небе́сныхъ лику́юща, съ весе́ліемъ поя́ху: оте́цъ на́шихъ Бо́же, благослове́нъ еси́.

Дѣ́тели боже́ственнаго твоего́ ду́ха разширя́юще вхо́ды, боже́ственная ча́да твоя́ веду́тъ въ живо́тъ. Ихже, жела́юще, про́симъ: моли́ о на́съ, пресвяще́нне Арсе́ніе.

Богоро́диченъ: Две́рь Тя́ заключе́нную нарече́ проро́къ, Чи́стая, ю́же никто́же про́йде, то́кмо Бо́гъ еди́нъ, отверза́я на́мъ па́ки еде́мскія вхо́ды, вѣ́рно сла́вящимъ Тя́, Богоро́дице.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши предбѣ́дствующе, царю́ющаго оплева́ша повелѣ́ніе безу́мное, и, совоку́плени и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте дѣла́ и превозноси́те во вся́ вѣ́ки.

Свѣ́томъ Боже́ственнымъ озаря́ема, благоуха́ніемъ цвѣту́щи, свяще́нная па́мять твоя́, Арсе́ніе, просвѣща́етъ вѣ́рныя, созыва́ющи вопи́ти: Го́спода воспѣва́йте дѣла́ и превозноси́те Его́ во вѣ́ки.

Жела́емыхъ сы́тости боже́ственная твоя́ ча́да напо́лнитися прося́ще, благоукраше́нною твое́ю па́мятію прохлажда́еми, и, веселя́щеся, вѣ́рно пою́тъ Просла́вльшаго па́мять твою́, іера́рше, взыва́юще: Го́спода воспѣва́йте дѣла́ и превозноси́те Его́ во вѣ́ки.

Па́мять твоя́ вѣ́чная, архіере́е, кро́тость и смире́ніе се́рдца твоего́ возвѣща́ющи, въ ню́же собира́еми, просвѣще́нія Боже́ственнаго хода́тайствомъ твои́мъ надѣ́ющеся получи́ти жела́емыхъ, весе́ліемъ зову́ще: Го́спода по́йте дѣла́ и превозноси́те Его́ во вѣ́ки.

Богоро́диченъ: Неоску́дныя то́ки милосе́рдія источа́ющи призыва́ющимъ Тя́, Влады́чице, и пѣ́сньми хва́лящихъ Тя́, Чи́стая, не оста́ви моля́щихся Тебѣ́, Ца́рствія Сы́на Твоего́ сподо́би, вопію́щія вѣ́рою: Го́спода воспѣва́йте дѣла́ и превозноси́те Его́ во вѣ́ки.

Пѣ́снь 9.

Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ, высо́кими умы́, вѣ́рніи, пріиди́те, наслади́мся, возше́дша Сло́ва, отъ Сло́ва научи́вшеся, Его́же велича́емъ.

Тече́ньми премину́ землена́я твоя́ жи́знь, и небе́снаго тя́ селе́нія не оста́ви, и́бо не потче́ся нога́ пло́ти твоея́, дрема́нія ду́хъ тебе́ не одолѣ́, храня́щу тя́ Бо́гу. Тѣ́мже моли́ за ны́ Го́спода, пресвяще́нне о́тче Арсе́ніе.

Небе́сніи ли́цы ра́дуются, мы́ же, земленíи, славосло́вимъ: де́монская крѣ́пость исчезе́, пресвяще́ннаго твоего́ ду́ха вы́спрь ви́дяще водворя́ема въ небе́сная селе́нія, о хва́лящихъ тя́ моли́, свяще́нне Арсе́ніе.

Тро́иченъ: Отцу́, и Сы́ну, и Свято́му Ду́ху вѣ́рою покланя́емся, Тричи́сленное Еди́нство сла́вяще и съ любо́вію воспѣва́юще, глаго́лемъ: моли́твами іера́рха Твоего́ Арсе́нія, поми́луй и сохрани́ вся́ ны́.

Богоро́диченъ: Дре́внимъ преступле́ніемъ введе́ въ па́губу пра́баба естество́ земно́е: Рождества́ же Твоего́ чревоноше́ніемъ, Пречи́стая, па́ки къ Бо́гу примири́хомся. Его́же сла́вяще, Тебе́, Дѣ́во, велича́емъ.

Свѣти́ленъ. Подо́бенъ: Не́бо звѣзда́ми.

Святи́телю преста́вльшуся, собра́шася наро́ди погребсти́ тѣ́ло его́, а́нгели же веселя́щеся, пріима́ху ду́шу его́, вселя́ющуюся во святы́я дворы́. [Два́жды.]

Сла́ва, и ны́нѣ, богоро́диченъ:

Держа́внымъ Твои́мъ покро́вомъ отъ вра́гъ навѣ́та рабы́ Твоя́ сохрани́, Чи́стая, вся́ ны́ невре́дны, Тя́ бо стяжа́хомъ еди́ну прибѣ́жище въ ско́рбехъ.

На хвали́техъ стихи́ры на 4, гла́съ 4. Подо́бенъ: Яко до́бля.

Мимоте́къ земна́я,* вы́шнихъ дости́глъ еси́* и со а́нгельскими ли́ки водворя́ешися,* Тро́ицы проповѣ́дникъ яви́вся.* Ейже предстоя́ со дерзнове́ніемъ,* за ны́ моли́ся прилѣ́жно,* Арсе́ніе преподо́бне,* сопресто́льниче архіере́евъ и похвала́. [Два́жды.]

Отъ чу́вственна твоего́ житія́* на небеса́ возводи́ма,* со святы́ми сія́юща пресвѣ́тло, горѣ́ вселя́ема,* тя́ земна́я славосло́вятъ* и небе́сная ра́дуются:* съ ни́миже Христу́ предстоя́,* моли́ся о на́съ, Арсе́ніе, сопресто́льниче архіере́евъ* и похвала́ преподо́бныхъ.

Наи́тіемъ Свята́го Ду́ха,* освяще́нная твоя́ глава́, іера́рше,* чу́вственнымъ зра́комъ прозря́щи,* язы́чными струя́ми* со архіере́и изво́ли сла́вити* въ Тро́ицѣ Еди́но Божество́.* Ейже предстоя́, Арсе́ніе,* моли́ о на́съ,* сопресто́льниче архіере́евъ и похвала́.

Сла́ва, гла́съ 6:

Превзы́де па́мять твоя́, богоно́се іера́рше Арсе́ніе, па́че чу́вственнаго свѣ́та сія́ющи, пречу́дная бо сотвори́лъ и ди́вная прія́лъ еси́, пра́выми пути́ ше́ствовавъ, пресла́вная наслѣ́довалъ еси́. Въ не́йже лику́юще, духо́вная ча́да въ небе́сная се́ла моли́твами твои́ми водворя́ются, и веселя́тся, тебѣ́ предстоя́ще, и торжеству́ютъ твое́ кра́сное успе́ніе, тобо́ю прося́ще получи́ти отъ Христа́ ве́лію ми́лость.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на свята́го, пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Кни́га Се́рблякъ, содержа́щая въ себѣ́ богослуже́бная моле́бная пра́вила святы́мъ се́рбскаго ро́да. — Бѣ́лградъ, 1861. — Л. 41 – 48 об.

/ Къ оглавленію раздѣла /


Наверхъ / Къ титульной страницѣ

0