Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣ́сяца Окто́врія въ 28-й де́нь.]
Слу́жба и́же во святы́хъ отцу́ на́шему Дими́трію, митрополи́ту Росто́вскому.

НА ВЕЧЕРНИ,
[Блаже́нъ му́жъ, 1-й антифо́нъ.] На Го́споди, воззва́хъ: стихи́ры [на 8], гла́съ 6.

Украси́въ твою́ ду́шу добродѣ́тельми,* и преше́дъ по́прище вре́менныя жи́зни* во стра́сѣ Бо́жіи,* обрѣ́лъ еси́ благода́ть предъ Бо́гомъ,* свя́те Дими́тріе,* и ны́нѣ, предстоя́й престо́лу Го́спода сла́вы,* моли́ спасти́ся душа́мъ на́шимъ. [Три́жды.]

Еще́ сы́й въ тѣ́лѣ,* распали́лся еси́ серафи́мскою къ Бо́гу любо́вію,* ны́нѣ же по отше́ствіи отъ вре́менныя жи́зни,* совле́кся у́зъ тѣле́сныхъ,* и наслажда́яся сла́дости ра́йскія,* наипа́че содѣ́лался еси́* обита́лищемъ любве́ Боже́ственныя,* и подража́я Христа́ Спаси́теля,* Его́же ны́нѣ лице́мъ къ лицу́ зри́ши,* сострада́й бѣ́дности человѣ́чества,* и бу́ди о на́шихъ не́мощехъ ко Го́споду хода́тай,* да изба́вившеся отъ ни́хъ,* избѣ́гнемъ и вре́менныхъ зо́лъ,* и вѣ́чныя сме́рти. [Три́жды.]

Па́стырю до́брый,* усе́рдный подража́телю Пастыренача́льника,* Сы́на Бо́жія,* услы́ши на́съ грѣ́шныхъ,* призыва́ющихъ въ по́мощь твое́ всеси́льное хода́тайство,* и моли́ о на́съ Всеми́лостиваго Бо́га,* да избѣ́гнемъ вся́кихъ зо́лъ и напа́стей,* и да улучи́мъ вѣ́чное блаже́нство,* во е́же ку́пно съ тобо́ю,* святи́телю Дими́тріе,* сла́вити и воспѣва́ти Божество́,* си́лу и единовла́стіе Пресвяты́я Тро́ицы. [Два́жды.]

Сла́ва, гла́съ то́йже:

Похвала́ми ублажи́мъ святи́теля Дими́трія, іера́рха вели́каго, Златоу́ста Россíйскаго, и́же ре́вностію по Го́сподѣ Бо́зѣ Вседержи́телѣ поощря́емь, непреста́нно облича́лъ возмуща́ющихъ тишину́ и правосла́віе Христо́вы Це́ркве, и содѣ́лався сосу́дъ избра́нъ Всесвята́го Ду́ха, причте́нъ яви́ся ли́ку друго́въ Бо́жіихъ. Тѣ́мже тебе́ почита́емъ, святи́теля Христо́ва, и усе́рдно мо́лимъ: бу́ди о на́съ засту́пникъ и хода́тай ко Тріѵпоста́сному Бо́гу, наста́ви на́съ на пу́ть спасе́нія, и да́руй улучи́ти отъ Го́спода Вседержи́теля ми́ръ душа́мъ на́шимъ, и ве́лію ми́лость.

И ны́нѣ, богоро́диченъ, гла́съ то́йже: Кто́ Тебе́ не ублажи́тъ, Пресвята́я Дѣ́во...
Вхо́дъ, проки́менъ дне́, и чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры, гла́съ 7:

Отче Дими́тріе, іера́рше вели́кій, Россíйское свѣти́ло, пріими́ похвалы́, отъ усе́рдія на́шего тебѣ́ по си́лѣ приноси́мыя, и бу́ди те́плый предста́тель и моли́твенникъ о душа́хъ на́шихъ.

Отче Дими́тріе, мечу́ на ерети́чествующихъ обою́ду о́стрый, отсѣцы́ отъ Христо́вы Це́ркве суему́дренныя пле́велы, и сохрани́ ю́ непоро́чну и чи́сту, да въ безопа́сномъ ея́ приста́нищѣ убѣ́гнемъ отъ ко́зней губи́теля дре́вняго.

Сла́ва, гла́съ то́йже:

Святи́телю Дими́тріе, моли́ Человѣколю́бца Бо́га, да изба́витъ на́съ отъ вся́кихъ бѣ́дъ и напа́стей, и да да́руетъ на́мъ Живо́тъ вѣ́чный.

И ны́нѣ, гла́съ то́йже:

Богоро́дице Дѣ́во, упова́ніе христіа́нъ, покры́й и соблюди́ на́съ Твои́ми къ Сы́ну Твоему́ и Бо́гу моли́твами отъ вся́кія ну́жды и печа́ли.

На стихо́внѣ стихи́ры, гла́съ 8:

Пріиди́те, Россíйскія Це́ркве сы́нове,* пріиди́те, ублажи́мъ учи́теля на́шего,* и́же въ жи́зни свое́й на́съ наставля́я,* по сме́рти же назира́я,* пече́тся я́ко па́стырь до́брый* о душа́хъ на́шихъ.

Сти́хъ: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ.

Богодухнове́нный орга́нъ Всесвята́го Ду́ха,* обличи́тель суему́дренныхъ раско́ловъ,* вели́кій святи́тель Дими́трій,* источа́ющій струю́ благода́ти Бо́жія* отъ многоцѣле́бныхъ моще́й свои́хъ,* хода́тайствуетъ непреста́нно,* и мо́лится Бо́гу о душа́хъ на́шихъ.

Сти́хъ: Пра́ведникъ, я́ко фи́никсъ процвѣте́тъ,* и я́ко ке́дръ, и́же въ Лива́нѣ, умно́жится.

Твое́ заступле́ніе получи́вше,* святи́телю Дими́тріе,* благода́рни есмы́ душе́ю и сердца́ми* и мо́лимъ тя́ усе́рдно:* подкрепи́ на́шу вѣ́ру къ Бо́гу* и наста́ви на́съ на стезю́ Его́ за́повѣдей,* да богоуго́дно пожи́вше въ вѣ́цѣ се́мъ,* наслѣ́дуемъ блаже́нство пра́ведныхъ.

Сла́ва, гла́съ то́йже:

Благíй ра́бе и вѣ́рный, умно́живый тала́нтъ, вруче́нный тебѣ́ отъ Влады́ки твоего́, научи́ и на́съ послѣ́довати достохва́льному примѣ́ру твоему́, да не съ лука́выми раба́ми осу́димся, но да сподо́бимся ра́дости вѣ́чныя.

И ны́нѣ, богоро́диченъ гла́са: [Безневѣ́стная Дѣ́во...]
По Ны́нѣ отпуща́еши раба́ Твоего́... Трисвято́е... И по возгла́сѣ,

Тропа́рь, гла́съ 8:

Правосла́вія ревни́телю и раско́ла искорени́телю, Россíйскій цѣле́бниче и но́вый къ Бо́гу моли́твенниче, списа́ньми твои́ми всѣ́хъ [1] уцѣлому́дрилъ еси́. Цѣвни́це духо́вная, Дими́тріе блаже́нне, моли́ Христа́ Бо́га спасти́ся Импера́тору на́шему [и́мярекъ], всему́ наслѣ́дію и держа́вѣ Его́.


НА УТРЕНИ,
На Бо́гъ Госпо́дь: Тропа́рь [святи́телю два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1:

Гра́ду Росто́ву и всѣ́мъ единозе́мнымъ россíаномъ показа́лся еси́ учи́тель и наста́вникъ, словесы́ и дѣла́ми показу́я пу́ть ко спасе́нію, Дими́тріе всеблаже́нне, и прія́лъ еси́ отъ Бо́га вѣне́цъ по́честей, угото́ванный лю́бящимъ Его́. Тѣ́мже дне́сь всесвяту́ю твою́ па́мять пра́зднующе, прославля́емъ Бо́га, прославля́ющаго святы́я Своя́. [Два́жды.]

Сла́ва, и ны́нѣ, богоро́диченъ:

Неискусому́жная Ма́ти Емману́илева, моли́ Сы́на Твоего́ и Бо́га на́шего, да да́руетъ на́мъ проще́ніе согрѣше́ній на́шихъ и ми́ръ душа́мъ на́шимъ.

По 2-мъ стихосло́віи сѣда́ленъ, гла́съ 1:

Упра́вивъ па́ству твою́ до́брѣ, свя́те Дими́тріе, получи́лъ еси́ мзду́ твою́ отъ Мздовоздая́теля, Христа́ Бо́га на́шего, Его́же моли́ непреста́нно, да и мы́ сподо́бимся причте́ны бы́ти къ ли́ку Его́ лю́бящихъ. [Два́жды.]

Сла́ва, и ны́нѣ, богоро́диченъ:

Подъ Твое́ покрови́тельство прибѣга́емъ, Богоро́дице Дѣ́во, и на Тя́ все́ упова́ніе на́ше возложи́вше, мо́лимъ хода́тайствовати за на́съ у престо́ла Сы́на Твоего́ те́плыми Твои́ми моли́твами.

По поліеле́и сѣда́ленъ, гла́съ 8:

Просія́лъ еси́ добродѣ́тельнымъ житіе́мъ твои́мъ, святи́телю Дими́тріе, украша́яся красото́ю нра́ва, воздержа́ніемъ и милосе́рдіемъ, златослове́сными же твои́ми уче́ніи украша́я Христо́ву Це́рковь. Тѣ́мже, приснопа́мятне, предстои́ши престо́лу Вседержи́теля: моли́ Христа́ Бо́га, дарова́ти грѣхо́въ оставле́ніе пра́зднующимъ любо́вію всечестну́ю па́мять твою́. [Два́жды.]

Сла́ва, и ны́нѣ, богоро́диченъ:

Тя́ стяжа́хомъ моли́твенницу те́плую къ Сы́ну Твоему́ и Бо́гу на́шему, не оста́ви на́съ, Всепѣ́тая Влады́чице, но избавля́й всегда́ рабы́ Твоя́ отъ вся́кія ну́жды и печа́ли.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, [внуши́те, вси́ живу́щіи по вселе́ннѣй]. Вся́кое дыха́ніе... Ева́нгеліе святительское, [отъ Іоа́нна, зача́ло 35, отъ полу́.]

По 50-мъ псалмѣ́ стихи́ра самогла́сна, гла́съ 8:

Благíй ра́бе и вѣ́рный, умно́живый тала́нтъ, вруче́нный тебѣ́ отъ Влады́ки твоего́, научи́ и на́съ послѣ́довати достохва́льному примѣ́ру твоему́, да не съ лука́выми раба́ми осу́димся, но да сподо́бимся ра́дости вѣ́чныя.

Кано́нъ Богоро́дицы со ирмосо́мъ на 6, и другíй кано́нъ свята́го на 8, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Со а́нгельскими чинонача́ліями предстоя́й Святѣ́й Тро́ицѣ, вели́кій іера́рше Дими́тріе, моли́ о на́съ грѣ́шныхъ, да полу́чимъ грѣхо́въ оставле́ніе.

По́стничествомъ и воздержа́ніемъ вся́кимъ порабо́тивый тѣ́ло ду́ху, и тѣ́ломъ содѣ́лавый нетлѣ́ніе и цѣльбоно́сную си́лу и бре́нному веществу́ твоему́, научи́ и на́съ, о́тче святы́й, Бо́гу, а не мамо́нѣ рабо́тати.

Управля́я па́ству, ввѣ́ренную тебѣ́ отъ Началопа́стыря Христа́, и отгоня́я душевре́дныхъ волко́въ отъ Христо́вы огра́ды твои́ми Богодухнове́нными уче́ніи, назира́й и ны́нѣ, святи́телю Дими́тріе, да не ка́ко суему́дренніи раско́лы возмутя́тъ тишину́ церко́вную, но па́че моли́ Человѣколю́бца Бо́га, да вско́рѣ вси́ еди́ными усты́ и еди́нымъ се́рдцемъ восхва́лимъ Его́ благоутро́біе.

Богоро́диченъ: Избра́нну и Всечи́сту разумѣ́въ Тя́ Сы́нъ Бо́жій, Всенепоро́чная, Сы́нъ Тво́й бы́сть, сы́ны сотвори́ благода́тію, Богоро́дицу Тя́ чту́щія.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Утверди́вся на ка́мени вѣ́ры Христо́вы, тве́рдъ пребы́лъ еси́ во исповѣ́даніи Правосла́вія, и злоче́ствующихъ непреста́нно облича́лъ еси́.

Облича́я, моля́, совѣ́туя, не престава́лъ еси́ призыва́ти заблу́ждшихъ ове́цъ отъ Христо́ва ста́да, а́ще и не вси́ послу́шаша гла́са твоего́.

Сыно́въ Це́ркве, непоколеби́мо пребы́вшихъ во объя́тіихъ ея́, ободря́лъ еси́. И мы́, со сла́достію вне́млюще уче́нію твоему́, вопіе́мъ: нѣ́сть свя́тъ па́че Бо́га на́шего.

Богоро́диченъ: Избавля́ющаго человѣ́ки преслуша́нія, и Кро́вію Свое́ю омы́вшаго перворо́дный грѣ́хъ Ада́мовъ, Чи́стая и Всенепоро́чная родила́ еси́.

Сѣда́ленъ, гла́съ 8:

Исцѣле́нія и чудеса́, истека́ющая отъ чудото́чныхъ моще́й твои́хъ, святи́телю Дими́тріе, ра́дуютъ вѣ́рныхъ сердца́ и возбужда́ютъ любо́вію пѣ́ти тебѣ́: ра́дуйся, о́тче, Россíйская похвало́. [Два́жды.]

Сла́ва, и ны́нѣ, богоро́диченъ:

Еди́на и́стинная христіа́нъ Покрови́тельнице, вся́кихъ лю́тыхъ обстоя́ній, бѣ́дъ и скорбе́й на́съ изба́ви, и мольба́ми Твои́ми спаси́ ду́ши на́ша.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Изъ мла́да воспи́танъ въ до́бромъ науче́ніи, остроту́ ума́ твоего́ не на суему́дренная у́мствованія обрати́лъ еси́, святи́телю Дими́тріе, но на созида́ніе и утвержде́ніе правосла́вныхъ, да обличе́ніе же и обузда́ніе еретико́въ; тѣ́мже и яви́лся еси́ досто́йный апо́стольскаго престо́ла намѣ́стникъ.

Неистощи́мое врачевство́ источа́ютъ многоцѣле́бная ра́ка моще́й твои́хъ, и и́же вѣ́рою къ ни́мъ притека́ющіи, обрѣта́ютъ отъ злы́хъ избавле́ніе.

За любо́вь, ю́же ко Христу́ имѣ́лъ, просла́вился еси́ да́ромъ чуде́съ и исцѣле́ній, сего́ ра́ди покланя́емся тебѣ́ и мо́лимъ тя́, я́ко уго́дника и дру́га Бо́жія, да помяне́ши на́съ во святы́хъ твои́хъ къ Бо́гу моли́твахъ.

Богоро́диченъ: Моли́ о на́съ Человѣколю́бца Бо́га, Пресвята́я Влады́чице, да не помяне́тъ беззако́ній на́шихъ, но да сотвори́тъ съ на́ми по ми́лости Свое́й.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Сохрани́, святи́телю Христо́въ, оте́чество твое́ ненавѣ́тно отъ враго́въ и да́руй на сопроти́вныя побѣ́ду и одолѣ́ніе Крестоно́сному Импера́тору на́шему.

Огради́ на́съ, уго́дниче Бо́жій Дими́тріе, отъ всѣ́хъ ко́зней лука́ваго діа́вола, да не преткнове́нно возмо́жемъ преити́ пу́ть житія́ сего́ во исполне́ніе за́повѣдей Бо́жіихъ.

Разжени́, о́тче Дими́тріе, тьму́ грѣхо́вную отъ душе́вныхъ оче́съ на́шихъ и просвѣти́ на́съ позна́ніемъ во́ли Бо́жіей, да во свѣ́тѣ за́повѣдей Его́ соверши́мъ до́брѣ тече́ніе на́ше.

Богоро́диченъ: Дѣ́во Непоро́чная, ро́ждшая Свѣ́тъ и́стинный, облиста́й на́мъ свѣ́тъ Боговѣ́дѣнія во спасе́ніе на́ше.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Воззри́ милосе́рднымъ о́комъ, святи́телю Христо́въ, на волне́ніе грѣхо́вное, на́съ обурева́ющее, и упра́ви пла́ваніе на́ше въ ти́хое Приста́нище милосе́рдія Бо́жія.

Бу́ди на́мъ до́брый ко́рмчій, о́тче Дими́тріе, и не оста́ви на́съ поги́бнути во грѣсѣ́хъ на́шихъ, но въ ни́хже са́мъ, я́ко человѣ́къ искуша́емь бы́лъ еси́, помози́ и на́мъ, искуша́емымъ.

Свя́те Дими́тріе, бу́ди о на́съ засту́пникъ и хода́тай ко Многоми́лостивому Бо́гу, да возведе́тъ отъ тли́ живо́тъ на́шъ.

Богоро́диченъ: Устна́ми и се́рдцемъ велича́емъ Тя́, Ма́терь Бо́жію: Ты́ же, примири́вшая Бо́гу ве́сь ро́дъ человѣ́ческій, не отри́ни на́съ отъ Твоего́ заступле́нія.

[Конда́къ свята́го, гла́съ 8:

Звѣзду́ Россíйскую, отъ Кíева возсія́вшую и чрезъ Но́вградъ Сѣ́верскій въ Росто́въ дости́гшую, всю́ же страну́ сію́ уче́ньми и чудесы́ озари́вшую, ублажи́мъ златослове́снаго учи́теля Дими́трія, то́й бо всѣ́мъ вся́ написа́, я́же къ наставле́нію, да всѣ́хъ пріобря́щетъ, я́коже Па́велъ Христу́, и спасе́тъ правовѣ́ріемъ ду́ши на́ша.

Икосъ:

Пра́веднымъ о ка́ющихся на небеси́, на́мъ же, грѣ́шнымъ, на земли́, о тебѣ́, пра́ведниче Дими́тріе, подоба́етъ возра́доватися, я́ко но́ваго тя́ къ Бо́гу моли́твенника о на́съ стяжа́хомъ, его́же досто́йными похвала́ми ублажа́юще, си́це отъ ра́дости зове́мъ: ра́дуйся, Росто́вская похвало́ и всея́ Россíи прославле́ніе.]

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Христо́ва ра́ди смире́нія, о́бразъ смире́нія яви́лся еси́, свя́те Дими́тріе. И мнѣ́ пода́ждь, не въ го́рдости, но во смире́ніи взыва́ти: благослове́нъ еси́, Бо́же оте́цъ на́шихъ.

Воздержа́ніемъ покори́лъ еси́ тѣ́ло ду́ху твоему́, святи́телю Дими́тріе. Пода́ждь и мнѣ́ въ воздержа́ніи пожи́ти, да нескве́рными устна́ми воззову́: благослове́нъ еси́, Бо́же оте́цъ на́шихъ.

Уче́ніями твои́ми, о́тче Дими́тріе, управля́еши мы́сли на́ши. И мы́, подража́юще тебѣ́, воспѣва́емъ Бо́гу: благослове́нъ еси́, Бо́же оте́цъ на́шихъ.

Богоро́диченъ: Безнача́льнаго Бо́га зачала́ еси́ во чре́вѣ Твое́мъ, Пречи́стая Дѣ́во, Его́же пою́ще, зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Ты́ бы́лъ еси́ строи́тель спасе́нія на́шего, о́тче Дими́тріе, вопія́ всѣ́мъ послу́шающимъ уче́нія твоего́: превозноси́те Христа́ во вѣ́ки.

Богому́дрый іера́рше, всеблаже́нне Дими́тріе, ми́лостивою и человѣколю́бною къ на́мъ любо́вію, моли́ о на́съ Человѣколюби́ваго Бо́га, Его́же превозно́симъ во вся́ вѣ́ки.

Зловре́дное мудрова́ніе раско́льниковъ испрове́рглъ еси́, свя́те Дими́тріе, вѣ́рныя же наста́вилъ еси́ пребы́ти тве́рдымъ во и́стиннѣй вѣ́рѣ, превозноси́те, вопія́, Христа́ во вѣ́ки.

Богоро́диченъ: Преесте́ственное и чу́дное Рождество́ Твое́, Дѣ́во, воспѣва́емъ благоче́стно, превознося́ще Христа́ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Наслажда́яся, о́тче, вѣ́чныя жи́зни, о не́йже усе́рдно подвиза́лся еси́, моли́ и на́мъ дости́гнути о́ныя.

Аще и пресели́лся еси́ отъ на́съ на го́рняя, святи́телю Дими́тріе, оба́че ду́хомъ пребыва́еши съ призыва́ющими тя́, науча́я и укрѣпля́я ходи́ти по стезѣ́ спаси́тельныхъ за́повѣдей Бо́жіихъ.

Яви́лся еси́ благоче́стія свѣти́льникъ всесвѣ́тлый, ри́торъ изя́щнѣйшій и правосла́вныхъ архіере́евъ удобре́ніе. Тѣ́мъ тя́ серде́чною любо́вію досто́йно велича́емъ.

Богоро́диченъ: Богоро́дице Дѣ́во, Его́же родила́ еси́ Человѣколю́бца Бо́га, моли́ со святи́телемъ Дими́тріемъ, да спасе́тъ ду́ши на́ша.

Свѣти́ленъ:

Во́ждь спасе́нія яви́лся еси́ на́мъ, о́тче Дими́тріе, златоза́рными словесы́ твои́ми уча́ и наказу́я, и ны́нѣ не престава́й озаря́ти сердца́ на́ши свѣ́томъ и́стиннаго боговѣ́дѣнія. [Два́жды.]

[Сла́ва, и ны́нѣ,] богоро́диченъ:

Влады́чице Ми́лостивая, моли́ Сы́на Твоего́ о на́съ грѣ́шныхъ, да изба́вимся вѣ́чныя тли́ и вся́кія ско́рби, и да получи́мъ вѣ́чная блага́я: вся́ бо мо́жеши, ели́ка хо́щеши.

На хвали́техъ стихи́ры [на 4], гла́съ 8:

Чистоту́ се́рдца, ума́ пра́вость* и кро́тость нра́ва прови́дѣвъ,* сердцевѣ́дѣцъ Бо́гъ возво́дитъ тя́ на престо́лъ архіере́йства,* пома́завъ тя́ и соверши́въ на сіе́ вели́кое зва́ніе:* ты́ же, прія́въ корми́ло,* напра́вилъ еси́ па́ству твою́* въ приста́нище Боже́ственнаго хотѣ́нія,* Дими́тріе всеблаже́нне. [Два́жды.]

Вня́въ словесе́мъ сы́на Гро́мова,* распали́лъ еси́ себе́ любо́вію:* Бо́га бо всеконе́чно,* а бли́жняго, я́ко са́мъ себе́, возлюби́лъ еси́.* Тѣ́мже и Госпо́дь возлюби́ тя,* свя́те Дими́тріе,* ми́лостивнѣ преклоня́яся на твоя́ проше́нія,* и ны́нѣ, имѣ́яй дерзнове́ніе,* моли́ непреста́нно о душа́хъ на́шихъ. [Два́жды.]

Сла́ва, гла́съ то́йже:

Пріиди́те, вѣ́рніи, пріиди́те, лю́бящіи Боже́ственную сла́ву, пріиди́те, восхва́лимъ а́нгела земна́го и небе́снаго человѣ́ка, вели́каго святи́теля Дими́трія, то́й бо источа́етъ на́мъ струи́ Бо́жія милосе́рдія и мо́лится о душа́хъ на́шихъ.

И ны́нѣ, богоро́диченъ:

Влады́чице, пріими́ моли́тву ра́бъ Твои́хъ, и изба́ви на́съ отъ вся́кія ну́жды и печа́ли.

Славосло́віе вели́кое, [ектеніи́] и отпу́стъ.



[НА ЛИТУРГІИ,

Блаже́нна, отъ кано́на святи́теля пѣ́снь 3-я и 6-я. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Примѣчаніе:
[1] Такъ въ изданіяхъ 1759, 1763, 1798 и послѣдующихъ; въ изданіи 1909 года — «бу́ихъ».

Источникъ: Слу́жба и́же во святы́хъ отцу́ на́шему Дими́трію, митрополи́ту Росто́вскому. — М.: Въ Сѵнодальной Тѵпогра́фіи, [1798]. — Л. 1 – 14 об., 29 – 33.

/ Къ оглавленію раздѣла /


Наверхъ / Къ титульной страницѣ

0